Read 𐴀𐴞𐴥𐴉𐴞𐴐𐴞𐴀𐴡𐴥𐴓𐴢 5

𐴀𐴞𐴥𐴉𐴞𐴐𐴞𐴀𐴡𐴥𐴓𐴢5

¹𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴀𐴝𐴊𐴡𐴙𐴅𐴧𐴝 𐴉𐴟𐴀𐴝𐴙𐴕 𐴀𐴞𐴥𐴏𐴝𐴉𐴠, 𐴀𐴞𐴥𐴁𐴝𐴌 𐴑𐴡𐴉𐴞𐴥𐴘𐴡𐴃𐴢 𐴓𐴡𐴖𐴢;²𐴀𐴝𐴦𐴌 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞 𐴔𐴟𐴇𐴝𐴥𐴁𐴧𐴡𐴃𐴡𐴃𐴢 𐴏𐴡𐴓𐴡 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴀𐴝𐴣𐴀𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥 𐴀𐴝𐴣𐴀𐴌𐴝𐴓𐴧𐴝 𐴁𐴡𐴥𐴓𐴞 𐴕𐴞𐴎𐴡𐴌 𐴎𐴝𐴕𐴡𐴌𐴠 𐴑𐴟𐴥𐴐𐴁𐴡𐴊𐴝𐴌 𐴑𐴟𐴌𐴁𐴝𐴕𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴉𐴠𐴥𐴓𐴝𐴘𐴧𐴠.

³𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠𐴕𐴝𐴤𐴑𐴝𐴌𐴞𐴌, 𐴀𐴠𐴊𐴧𐴠 𐴇𐴡𐴕𐴡𐴤 𐴋𐴡𐴥𐴙𐴓𐴧𐴝 𐴕𐴝𐴉𐴝𐴑𐴞𐴌 𐴘𐴝𐴥 𐴓𐴝𐴓𐴏𐴞𐴥𐴌 𐴈𐴡𐴃𐴝𐴤 𐴀𐴟𐴥𐴊𐴧𐴗𐴝 𐴕𐴡 𐴃𐴝𐴥𐴑𐴡𐴗𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴄𐴞𐴥𐴑 𐴕𐴡.⁴𐴇𐴠𐴥𐴕𐴊𐴞𐴓𐴧𐴝, 𐴇𐴡𐴕𐴡𐴤 𐴁𐴠𐴌𐴠𐴙𐴅𐴧𐴝 𐴈𐴡𐴃𐴝𐴤, 𐴁𐴠𐴇𐴝𐴌 𐴈𐴡𐴃𐴝𐴤, 𐴘𐴝𐴥 𐴁𐴞𐴍𐴝𐴙𐴓𐴧𐴝 𐴔𐴡𐴐𐴑𐴝𐴌𐴞 𐴘𐴡𐴥 𐴕𐴡 𐴃𐴝𐴥𐴑𐴡𐴗𐴑, 𐴎𐴞𐴀𐴕 𐴀𐴡𐴥 𐴄𐴞𐴥𐴑 𐴕𐴡; 𐴘𐴝𐴥𐴌𐴁𐴡𐴊𐴡𐴓𐴢 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌 𐴒𐴡𐴌𐴡𐴤.⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴉𐴝𐴑𐴧𐴝𐴒𐴡𐴌𐴞 𐴎𐴝𐴕𐴡, 𐴇𐴡𐴕𐴡𐴤 𐴎𐴠𐴕𐴝𐴤𐴑𐴟𐴌, 𐴕𐴝𐴉𐴝𐴑 𐴔𐴝𐴕𐴟𐴥𐴙𐴐𐴢 𐴘𐴝𐴥 𐴓𐴝𐴓𐴡𐴥𐴏𐴁𐴡𐴕𐴡𐴃𐴧𐴟 𐴔𐴡𐴀𐴏𐴞𐴤𐴌 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴇𐴡𐴕𐴡𐴤 𐴔𐴞𐴌𐴝𐴏𐴢 𐴕𐴝𐴥𐴘 𐴊𐴠. 𐴓𐴝𐴓𐴡𐴥𐴏𐴢 𐴒𐴡𐴌𐴝𐴥 𐴔𐴟𐴃𐴧𐴞 𐴉𐴟𐴣𐴎𐴝 𐴓𐴡𐴘 𐴁𐴡𐴌𐴝𐴁𐴡𐴌.

𐴕𐴟𐴌𐴡𐴌 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴡

⁶𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴒𐴝𐴓𐴟𐴖𐴝𐴘 𐴒𐴡𐴌𐴞𐴥 𐴊𐴟𐴥𐴑𐴝 𐴕𐴡 𐴊𐴠 𐴉𐴝𐴥𐴕, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴀𐴠𐴥𐴕𐴝 𐴕𐴝𐴉𐴡𐴥𐴌𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴢 𐴀𐴝𐴘𐴧𐴠𐴤.⁷𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴇𐴡𐴕𐴡𐴤 𐴁𐴝𐴎𐴝𐴥 𐴕𐴡 𐴌𐴝𐴙𐴑𐴧𐴡𐴥.

⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴑 𐴇𐴝𐴓𐴠 𐴀𐴝𐴕𐴊𐴝𐴤𐴌 𐴀𐴝𐴐𐴧𐴞𐴥𐴓𐴝, 𐴔𐴡𐴕𐴃𐴡𐴌 𐴔𐴝𐴓𐴞𐴑𐴡𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴕𐴟𐴌; 𐴇𐴠𐴥𐴃𐴡𐴓𐴧𐴝 𐴕𐴟𐴌𐴡𐴌 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴡,⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴟𐴌𐴡𐴌 𐴒𐴟𐴓𐴝𐴒𐴝𐴓𐴝 𐴀𐴡𐴥𐴙𐴓𐴊𐴠 𐴃𐴡 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴁𐴝𐴥𐴓𐴝𐴘, 𐴉𐴡𐴌𐴇𐴠𐴥𐴏𐴒𐴝𐴌𐴞, 𐴀𐴠𐴊𐴧𐴠 𐴇𐴝𐴥𐴣𐴏𐴝;¹⁰𐴀𐴝𐴦𐴌 𐴔𐴝𐴓𐴞𐴑 𐴎𐴞𐴀𐴕 𐴓𐴡𐴥𐴘 𐴑𐴟𐴥𐴐𐴞 𐴀𐴡𐴥, 𐴎𐴝𐴏𐴝𐴘 𐴒𐴡𐴌𐴞𐴥 𐴇𐴞𐴥𐴀𐴕 𐴒𐴡𐴌𐴡𐴤.¹¹𐴀𐴝𐴕𐴊𐴝𐴤𐴌𐴡𐴌 𐴁𐴠𐴉𐴝𐴥𐴘𐴊𐴝 𐴈𐴝𐴔𐴡𐴃𐴢 𐴐𐴡𐴥𐴌𐴞𐴑 𐴕𐴡 𐴀𐴡𐴥𐴘𐴧𐴡, 𐴁𐴡𐴥𐴓𐴑𐴠 𐴇𐴞𐴥𐴀𐴕𐴡𐴌 𐴀𐴝𐴏𐴡𐴥𐴓𐴞𐴘𐴡𐴃𐴢 𐴎𐴝𐴇𐴠𐴥𐴌 𐴒𐴡𐴌𐴡𐴤;¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴀𐴝𐴙𐴊𐴧𐴡𐴕𐴠 𐴎𐴞𐴀𐴕 𐴒𐴡𐴌𐴠𐴥 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴕 𐴀𐴟𐴥𐴊𐴧𐴗𐴝 𐴐𐴡𐴥𐴌𐴔𐴡𐴌 𐴈𐴡𐴃𐴝𐴤.

¹³𐴔𐴡𐴕𐴃𐴡𐴌 𐴕𐴟𐴌𐴠 𐴎𐴝𐴇𐴠𐴥𐴌 𐴒𐴡𐴙𐴓𐴧𐴠𐴥 𐴃𐴡 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴇𐴠𐴥𐴌 𐴀𐴡𐴥𐴘𐴎𐴝𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴀𐴕 𐴎𐴝𐴇𐴠𐴥𐴌 𐴀𐴡𐴥𐴘𐴎𐴝𐴒𐴡𐴘 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴕𐴟𐴌.¹⁴𐴇𐴠𐴥𐴃𐴡𐴓𐴧𐴝 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴀𐴡𐴥 𐴒𐴟𐴥𐴔𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴏𐴠𐴃𐴡𐴕 𐴀𐴡𐴥𐴘𐴎𐴡𐴒𐴡𐴘,𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥,𐴃𐴡𐴥𐴘 𐴔𐴡𐴀𐴏𐴞𐴤 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴡𐴓𐴞𐴁𐴡𐴥.“

¹⁵𐴇𐴠𐴥 𐴀𐴞𐴥𐴏𐴝𐴉𐴠, 𐴏𐴝𐴘𐴧𐴡𐴥 𐴃𐴟𐴣𐴀𐴝𐴥𐴌𐴝 𐴇𐴡𐴕𐴊𐴞𐴓𐴧𐴝 𐴏𐴡𐴓𐴡𐴀𐴌; 𐴁𐴠𐴑𐴟𐴉𐴡𐴌 𐴋𐴡𐴥𐴙𐴓𐴧𐴝 𐴕𐴡 𐴁𐴡𐴥𐴓𐴑𐴠 𐴁𐴟𐴊𐴧𐴞𐴥𐴔𐴝𐴕𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴡;¹⁶𐴇𐴡𐴕𐴡𐴤 𐴔𐴡𐴑𐴝 𐴕𐴝 𐴇𐴝𐴥𐴌𐴝𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠 𐴎𐴡𐴁𐴝𐴕𐴝 𐴈𐴡𐴥𐴌𐴝𐴉𐴢.¹⁷𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴁𐴠𐴑𐴟𐴉𐴢 𐴕𐴡 𐴀𐴡𐴥𐴘𐴧𐴡, 𐴁𐴡𐴥𐴓𐴑𐴠 𐴔𐴝𐴓𐴞𐴑𐴡𐴌 𐴔𐴡𐴕𐴐𐴝𐴥 𐴑𐴞𐴦 𐴊𐴠 𐴁𐴟𐴎𐴡𐴥.

¹⁸𐴐𐴡𐴥𐴌𐴝𐴁𐴢 𐴇𐴝𐴥𐴘 𐴄𐴟𐴀𐴓𐴢 𐴕𐴡 𐴀𐴡𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴘𐴝𐴐𐴞 𐴒𐴡𐴌𐴝𐴥 𐴁𐴝𐴘𐴁𐴡𐴥. 𐴘𐴝𐴥𐴌𐴁𐴡𐴊𐴡𐴓𐴢 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥,¹⁹𐴀𐴝𐴦𐴌 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴌 𐴑𐴝𐴖𐴝𐴓𐴞, 𐴏𐴠𐴀𐴌, 𐴀𐴠𐴊𐴧𐴠 𐴌𐴟𐴀𐴈𐴝𐴥𐴕𐴞𐴌 𐴒𐴡𐴎𐴡𐴥𐴓𐴢 𐴀𐴡𐴥𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴈𐴡𐴃𐴝𐴤 𐴈𐴡𐴀; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴧𐴟 𐴔𐴝𐴓𐴞𐴑𐴡𐴌 𐴕𐴝𐴔𐴠 𐴏𐴠𐴀𐴌 𐴒𐴡𐴀 𐴀𐴠𐴊𐴧𐴠 𐴁𐴝𐴎𐴝𐴕𐴝 𐴁𐴝𐴎𐴡,²⁰𐴀𐴝𐴦𐴌 𐴇𐴝𐴥𐴔𐴞𐴐𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴓𐴧𐴝 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴀𐴝𐴓𐴧𐴝 𐴁𐴝𐴉𐴡𐴌 𐴐𐴟𐴥𐴑𐴟𐴌 𐴒𐴡𐴌𐴡𐴤.

𐴁𐴡𐴖𐴢 𐴀𐴠𐴊𐴧𐴠 𐴇𐴡𐴥𐴐𐴡𐴔

²¹𐴔𐴡𐴀𐴏𐴞𐴤𐴌 𐴋𐴡𐴦𐴌 𐴌𐴝𐴑𐴞𐴥 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴒𐴡𐴏𐴝𐴥𐴘𐴊𐴡.

²²𐴁𐴡𐴖𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡, 𐴎𐴠𐴕𐴊𐴞𐴓𐴧𐴝 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴡.²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴥𐴐𐴡𐴔 𐴀𐴡𐴥𐴙𐴓𐴊𐴠 𐴃𐴡 𐴁𐴡𐴖𐴢 𐴖𐴡𐴥𐴌 𐴔𐴝𐴃𐴝𐴥, 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤 𐴘𐴡𐴥 𐴎𐴡𐴔𐴝𐴥𐴃𐴡𐴌 𐴔𐴝𐴃𐴝𐴥; 𐴀𐴝𐴦𐴌 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴒𐴝𐴦𐴌 𐴕𐴠𐴅𐴝𐴃𐴊𐴡𐴘𐴝.²⁴𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴎𐴡𐴔𐴝𐴥𐴃𐴠 𐴎𐴠𐴕𐴊𐴞𐴓𐴧𐴝 𐴕𐴞𐴎𐴡𐴌𐴠𐴥 𐴔𐴡𐴀𐴏𐴞𐴤𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴠, 𐴇𐴠𐴥𐴕𐴊𐴞𐴓𐴧𐴝 𐴁𐴡𐴖𐴝𐴥𐴙𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴘𐴡𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴝𐴌 𐴎𐴡𐴌𐴟𐴌.

²⁵𐴇𐴡𐴥𐴐𐴡𐴔 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴎𐴡𐴔𐴝𐴥𐴃𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴠𐴥 𐴀𐴝𐴦𐴌 𐴇𐴞𐴥𐴘𐴝𐴕𐴡𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴊𐴞𐴉𐴠𐴥𐴓𐴝𐴘𐴧𐴠,²⁶𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴑𐴝𐴓𐴝𐴔𐴡𐴌 𐴊𐴟𐴖𐴝𐴌𐴝 𐴇𐴠𐴥 𐴎𐴡𐴔𐴝𐴥𐴃𐴡𐴌𐴠 𐴉𐴝𐴕𐴞𐴥 𐴓𐴡𐴥𐴘 𐴊𐴟𐴥𐴘𐴉𐴠𐴓𐴝𐴘 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥 𐴉𐴝𐴌𐴠,²⁷𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴇𐴠𐴥 𐴎𐴡𐴔𐴝𐴥𐴃𐴡𐴌𐴠 𐴀𐴠𐴀𐴕 𐴕𐴟𐴌𐴝𐴕𐴞 𐴁𐴝𐴕𐴝𐴘 𐴕𐴞𐴎𐴡𐴌 𐴇𐴝𐴣𐴏𐴠 𐴇𐴝𐴥𐴎𐴞𐴌 𐴒𐴡𐴌𐴝𐴥𐴘 𐴉𐴝𐴌𐴠, 𐴎𐴞𐴁𐴝𐴤𐴃𐴢 𐴇𐴡𐴕𐴡𐴤 𐴊𐴝𐴑, 𐴑𐴟𐴣𐴌𐴝𐴘𐴧𐴝 𐴘𐴝𐴥 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴝𐴥𐴘, 𐴁𐴡𐴥𐴓𐴑𐴠 𐴇𐴞𐴥𐴁𐴝 𐴂𐴝𐴑 𐴀𐴠𐴊𐴧𐴠 𐴁𐴠𐴈𐴡𐴏𐴟𐴥𐴌.²⁸𐴇𐴠𐴥𐴃𐴡𐴓𐴧𐴝, 𐴇𐴡𐴥𐴐𐴡𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴕𐴞𐴎𐴡𐴌 𐴒𐴝𐴦𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴝𐴥𐴌 𐴉𐴡𐴥𐴌𐴡𐴏𐴢. 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴕𐴞𐴎𐴡𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥 𐴊𐴠;²⁹𐴇𐴡𐴕𐴡𐴤𐴑𐴞𐴘𐴠 𐴃𐴡 𐴕𐴞𐴎𐴡𐴌 𐴒𐴝𐴦𐴌𐴠 𐴇𐴡𐴕𐴡𐴤𐴊𐴞𐴕 𐴕𐴝𐴉𐴡𐴥𐴌𐴡𐴃𐴢 𐴒𐴡𐴙𐴅𐴧𐴠𐴥 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴇𐴞𐴥𐴘𐴝𐴕𐴡𐴌𐴠 𐴉𐴝𐴓𐴞𐴘𐴡𐴌𐴠 𐴎𐴡𐴃𐴧𐴡𐴕 𐴁𐴠 𐴒𐴡𐴌𐴠𐴥, 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴎𐴡𐴔𐴝𐴥𐴃𐴡𐴌𐴠 𐴒𐴡𐴌𐴠𐴥;³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴊𐴠 𐴀𐴞𐴥𐴁𐴝𐴌 𐴒𐴝𐴦𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢.³¹”𐴇𐴞𐴥𐴘𐴝𐴕𐴡𐴓𐴧𐴝 𐴃𐴡 𐴔𐴡𐴌𐴡𐴃𐴉𐴟𐴖𐴝𐴘𐴠 𐴕𐴞𐴎𐴡𐴌 𐴁𐴝𐴉𐴔𐴝𐴦𐴃𐴧𐴟 𐴎𐴟𐴊𐴝 𐴀𐴡𐴥𐴘 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴁𐴡, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕 𐴀𐴠𐴑 𐴅𐴞𐴏𐴞𐴥𐴔 𐴀𐴡𐴥𐴘𐴎𐴝𐴘𐴁𐴡𐴘.“ ³²𐴇𐴞𐴥𐴘𐴝𐴕 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴒𐴟𐴉𐴡𐴕𐴞, 𐴓𐴠𐴑𐴞𐴕 𐴀𐴝𐴀𐴛 𐴔𐴡𐴀𐴏𐴞𐴤 𐴀𐴠𐴊𐴧𐴠 𐴎𐴡𐴔𐴝𐴥𐴃𐴡𐴌 𐴔𐴟𐴃𐴝𐴓𐴠𐴑 𐴈𐴡𐴀𐴙𐴌 𐴊𐴠.³³𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴃𐴧𐴟 𐴘𐴡𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴀𐴝𐴦𐴌 𐴁𐴡𐴖𐴝𐴥𐴙𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴘𐴡𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴝𐴥𐴌 𐴀𐴟𐴎𐴟 𐴑𐴞𐴥𐴘𐴝𐴓𐴢 𐴌𐴝𐴑𐴝𐴤𐴌 𐴎𐴡𐴌𐴟𐴌.

The Word for the World International

https://app.library.bible/content/87faca8b51c22590