Read 𐴀𐴞𐴥𐴉𐴞𐴐𐴞𐴀𐴡𐴥𐴓𐴢 4

𐴀𐴞𐴥𐴉𐴞𐴐𐴞𐴀𐴡𐴥𐴓𐴢4

𐴌𐴟𐴀𐴌 𐴏𐴡𐴥𐴓𐴧𐴟𐴑

¹𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴎𐴠𐴦𐴕𐴞𐴑𐴞 𐴔𐴝𐴓𐴞𐴑𐴡𐴌 𐴖𐴝𐴏𐴃𐴠𐴥 𐴁𐴡𐴕 𐴀𐴝𐴏𐴞𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴈𐴝𐴘𐴃𐴠𐴥 𐴎𐴞𐴘𐴝𐴥𐴕𐴡𐴓𐴧𐴝 𐴋𐴝𐴈𐴝 𐴒𐴞𐴘𐴠𐴥 𐴇𐴞𐴥𐴘𐴝𐴕𐴡𐴌 𐴓𐴝𐴦𐴘𐴠𐴑 𐴎𐴞𐴕𐴊𐴞𐴒𐴞 𐴈𐴝𐴍𐴡;²𐴉𐴟𐴌𐴝𐴉𐴟𐴌𐴞 𐴐𐴞𐴥𐴊𐴝𐴘𐴠 𐴀𐴠𐴊𐴧𐴠 𐴕𐴡𐴌𐴡𐴔𐴠, 𐴏𐴡𐴁𐴡𐴥𐴌𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴠 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥,³𐴐𐴝𐴥𐴕𐴃𐴞𐴌 𐴁𐴝𐴕𐴡𐴌 𐴁𐴟𐴥𐴃𐴡𐴌𐴠 𐴌𐴟𐴀𐴌 𐴏𐴡𐴥𐴓𐴧𐴟𐴑 𐴄𐴞𐴑𐴝𐴘 𐴌𐴝𐴑𐴞𐴥 𐴁𐴡𐴓𐴧𐴝 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥.⁴𐴅𐴞𐴏𐴞𐴥𐴔 𐴀𐴝𐴏𐴠𐴤 𐴊𐴠 𐴀𐴠𐴑𐴧𐴝𐴥𐴕, 𐴀𐴝𐴦𐴌 𐴂𐴝𐴑-𐴌𐴟𐴀 𐴀𐴝𐴏𐴠𐴤 𐴊𐴠 𐴀𐴠𐴑𐴎𐴡𐴕, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴈𐴝𐴘𐴃𐴠𐴥 𐴀𐴠𐴑𐴧𐴝𐴥𐴕 𐴀𐴝𐴐𐴝𐴤 𐴓𐴧𐴝 𐴁𐴠 𐴋𐴝𐴈𐴝 𐴒𐴞𐴘𐴠𐴥;⁵𐴔𐴝𐴓𐴞𐴑 𐴀𐴝𐴏𐴠𐴤 𐴊𐴠 𐴀𐴠𐴑𐴎𐴡𐴕, 𐴀𐴞𐴔𐴝𐴕 𐴀𐴝𐴏𐴠𐴤 𐴊𐴠 𐴀𐴠𐴑𐴧𐴝𐴥𐴕, 𐴁𐴝𐴥𐴂𐴄𐴞𐴏𐴔𐴝 𐴀𐴝𐴏𐴠𐴤 𐴊𐴠 𐴀𐴠𐴑𐴒𐴗𐴝𐴥,⁶𐴁𐴠𐴒𐴧𐴟𐴥𐴕𐴡𐴌 𐴀𐴝𐴓𐴧𐴝 𐴀𐴠𐴊𐴧𐴠 𐴁𐴝𐴉𐴢 𐴀𐴝𐴏𐴠𐴤 𐴊𐴠 𐴘𐴡𐴥 𐴀𐴠𐴑𐴎𐴡𐴕, 𐴎𐴞𐴁𐴝𐴤 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴁𐴠𐴒𐴧𐴟𐴥𐴕𐴡𐴌 𐴊𐴟𐴖𐴝𐴌𐴝 𐴈𐴝𐴔 𐴒𐴡𐴌𐴠𐴥 𐴀𐴠𐴊𐴧𐴠 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤.

⁷𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴌 𐴖𐴡𐴌𐴠 𐴔𐴡𐴀𐴏𐴞𐴤𐴌 𐴁𐴝𐴍𐴞𐴊𐴞𐴘𐴝 𐴔𐴡𐴎𐴞𐴕 𐴌𐴝𐴇𐴝𐴥𐴔𐴡𐴃𐴢 𐴀𐴡𐴥𐴘𐴧𐴠.⁸𐴇𐴠𐴥𐴃𐴡𐴓𐴧𐴝 𐴂𐴝𐴑-𐴑𐴝𐴓𐴝𐴔𐴠 𐴉𐴡𐴥𐴌𐴔𐴝𐴌 𐴊𐴠,”𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴀𐴝𐴏𐴔𐴝𐴕𐴡𐴃𐴢 𐴀𐴟𐴙𐴄𐴧𐴠𐴥𐴒𐴡𐴘,𐴇𐴠𐴥𐴣𐴃𐴧𐴠 𐴁𐴡𐴕𐴊𐴞 𐴀𐴡𐴥𐴑𐴧𐴡𐴓𐴢 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴒𐴞𐴀𐴓𐴢,𐴀𐴝𐴦𐴌 𐴀𐴞𐴥𐴁𐴝𐴘𐴠 𐴔𐴝𐴙𐴕𐴐𐴡𐴥𐴌𐴠 𐴇𐴝𐴥𐴊𐴞𐴘𐴝 𐴀𐴡𐴥𐴑𐴧𐴡𐴓𐴢 𐴊𐴞𐴀𐴓𐴢.“

⁹”𐴀𐴞𐴥𐴁𐴝 𐴀𐴟𐴙𐴄𐴧𐴠𐴥𐴒𐴡𐴘“ 𐴀𐴡𐴌 𐴔𐴝𐴀𐴕𐴞 𐴑𐴞𐴦؟ 𐴇𐴞𐴥𐴘𐴝𐴕𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠, 𐴀𐴞𐴥𐴁𐴝 𐴕𐴞𐴏𐴠 𐴊𐴟𐴕𐴞𐴘𐴝𐴙𐴌 𐴎𐴝𐴒𐴝𐴃𐴢 𐴀𐴡𐴥 𐴓𐴝𐴙𐴔𐴧𐴞𐴥𐴓𐴢 𐴊𐴠 𐴀𐴝𐴏𐴠𐴤.¹⁰𐴎𐴞𐴁𐴝𐴤 𐴓𐴝𐴙𐴔𐴧𐴞𐴥𐴓𐴢 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤 𐴀𐴝𐴏𐴔𐴝𐴕 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌𐴠 𐴁𐴡𐴥𐴌𐴝𐴘𐴉𐴠𐴓𐴝𐴘 𐴉𐴝𐴌𐴠.¹¹𐴀𐴞𐴥𐴁𐴝 𐴕𐴞𐴎𐴠𐴁𐴝𐴎𐴠 𐴇𐴡𐴊𐴟𐴥𐴕𐴡𐴌𐴠 𐴏𐴝𐴥𐴇𐴝𐴁𐴞 𐴀𐴡𐴥𐴘𐴁𐴝𐴌, 𐴇𐴡𐴊𐴟𐴥𐴕𐴡𐴌𐴠 𐴕𐴡𐴁𐴞 𐴀𐴡𐴥𐴘𐴁𐴝𐴌, 𐴇𐴡𐴊𐴟𐴥𐴕𐴡𐴌𐴠 𐴃𐴡𐴁𐴡𐴓𐴞𐴑-𐴒𐴡𐴌𐴡𐴤𐴘𐴝 𐴀𐴡𐴥𐴘𐴁𐴝𐴌, 𐴇𐴡𐴊𐴟𐴥𐴕𐴡𐴌𐴠 𐴎𐴡𐴔𐴝𐴥𐴃𐴡𐴌 𐴏𐴡𐴌𐴡𐴘𐴝 𐴀𐴡𐴥𐴘𐴁𐴝𐴌, 𐴀𐴠𐴊𐴧𐴠 𐴇𐴡𐴊𐴟𐴥𐴕𐴡𐴌𐴠 𐴀𐴟𐴏𐴃𐴝𐴃𐴢 𐴀𐴡𐴥𐴘𐴁𐴝𐴌 𐴕𐴞𐴘𐴝𐴔𐴡𐴃𐴢 𐴊𐴞𐴦𐴘𐴠𐴥,¹²𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴓𐴧𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥 𐴃𐴡𐴘𐴧𐴝𐴌 𐴒𐴡𐴌𐴞𐴥 𐴁𐴡𐴓𐴧𐴝; 𐴎𐴠𐴀𐴕𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴔𐴡𐴀𐴏𐴞𐴤𐴌 𐴒𐴝𐴦 𐴁𐴝𐴌𐴞𐴥 𐴀𐴟𐴍𐴠𐴤,¹³𐴀𐴡𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴎𐴠𐴃𐴡𐴥𐴑𐴧𐴝𐴓𐴢 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴀𐴞𐴔𐴝𐴕𐴡𐴃𐴢 𐴀𐴠𐴑 𐴏𐴡𐴥𐴓𐴧𐴟𐴑 𐴕𐴡𐴥 𐴀𐴡𐴥𐴘 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴉𐴟𐴖𐴝𐴌𐴠 𐴎𐴝𐴕𐴞𐴉𐴠𐴥𐴓𐴝𐴘 𐴕𐴡𐴥 𐴉𐴝𐴌𐴞, 𐴀𐴝𐴦𐴌 𐴀𐴡𐴊𐴧𐴟𐴥𐴌 𐴁𐴝𐴓𐴡𐴑 𐴕𐴡𐴥 𐴀𐴡𐴥𐴘 𐴎𐴠𐴊𐴧𐴟𐴥𐴌 𐴀𐴡𐴥𐴘𐴓𐴠 𐴔𐴡𐴀𐴏𐴞𐴤𐴌 𐴉𐴟𐴌𐴝𐴘𐴞𐴌 𐴇𐴠𐴥𐴊𐴧𐴟𐴌 𐴉𐴡𐴀𐴣𐴏𐴠.

¹⁴𐴃𐴝𐴌𐴉𐴡𐴌𐴠 𐴀𐴝𐴣𐴀𐴌𐴝 𐴀𐴝𐴌 𐴉𐴟𐴀𐴝𐴙𐴕 𐴕𐴡 𐴃𐴝𐴥𐴑𐴞𐴘𐴟𐴔, 𐴔𐴝𐴙𐴕𐴐𐴠𐴥 𐴏𐴝𐴓𐴝𐴥𐴑𐴞 𐴀𐴠𐴊𐴧𐴠 𐴊𐴟𐴥𐴑𐴝𐴁𐴝𐴎𐴞 𐴒𐴡𐴌𐴞𐴥 𐴀𐴡𐴙𐴕𐴧𐴡 𐴑𐴞𐴘𐴡𐴥𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴘 𐴁𐴡𐴓𐴧𐴝 𐴎𐴠 𐴃𐴝𐴦𐴓𐴞𐴔 𐴊𐴠, 𐴇𐴠𐴥 𐴃𐴝𐴦𐴓𐴞𐴔𐴡𐴃𐴢 𐴁𐴡𐴘𐴧𐴝𐴌𐴠 𐴃𐴟𐴙𐴓𐴧𐴝𐴤 𐴒𐴡𐴙𐴌𐴡𐴌 𐴋𐴡𐴥𐴙𐴓𐴧𐴝 𐴀𐴝𐴣𐴀𐴌𐴝 𐴀𐴞𐴑𐴧𐴝𐴤 𐴀𐴟𐴙𐴑𐴧𐴝𐴤 𐴋𐴟𐴥𐴓𐴝𐴃𐴢 𐴕𐴡 𐴃𐴝𐴥𐴑𐴞𐴘𐴟𐴔,¹⁵𐴁𐴡𐴥𐴓𐴑𐴠 𐴔𐴟𐴇𐴝𐴥𐴁𐴧𐴡𐴃𐴠 𐴇𐴡𐴥𐴑 𐴈𐴡𐴃𐴝𐴤 𐴈𐴡𐴀𐴘𐴧𐴡𐴌𐴠 𐴉𐴡𐴃𐴧𐴞𐴥 𐴔𐴞𐴑𐴧𐴝𐴥𐴃𐴧𐴟 𐴁𐴝𐴌𐴞𐴥 𐴀𐴟𐴍𐴞𐴤 𐴀𐴟𐴁𐴝𐴤𐴌 𐴁𐴝𐴓𐴡𐴑 𐴒𐴝𐴦 𐴁𐴡𐴕𐴞𐴘𐴟𐴥𐴔 𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴔𐴝𐴃𐴝𐴥, 𐴘𐴝𐴥𐴕𐴞 𐴔𐴡𐴀𐴏𐴞𐴤,¹⁶𐴎𐴞𐴁𐴝𐴤𐴌 𐴎𐴡𐴌𐴞𐴘𐴝 𐴒𐴟𐴣𐴍𐴝 𐴒𐴝𐴦 𐴒𐴝𐴥𐴕 𐴇𐴝𐴥𐴀𐴌 𐴒𐴞𐴌𐴝𐴤𐴌 𐴔𐴡𐴊𐴡𐴃𐴠 𐴎𐴟𐴌𐴝 𐴓𐴡𐴖𐴢 𐴀𐴠𐴊𐴧𐴠 𐴊𐴡𐴥𐴙𐴅𐴧𐴝 𐴃𐴝𐴥𐴑𐴠, 𐴀𐴝𐴦𐴌 𐴎𐴠𐴣𐴃𐴧𐴠𐴥 𐴉𐴡𐴃𐴧𐴞𐴥 𐴇𐴞𐴥𐴏𐴧𐴝𐴘𐴠 𐴎𐴠𐴊𐴧𐴟𐴥𐴌 𐴈𐴝𐴔 𐴒𐴡𐴌𐴝𐴥 𐴉𐴡𐴌𐴠 𐴇𐴠𐴥𐴊𐴧𐴟𐴌 𐴒𐴡𐴌𐴠𐴥, 𐴃𐴡𐴥𐴘 𐴇𐴠𐴥 𐴒𐴝𐴦 𐴒𐴝𐴥𐴕 𐴁𐴝𐴌𐴠𐴥 𐴀𐴝𐴦𐴌 𐴇𐴞𐴥𐴘𐴝𐴕𐴠 𐴕𐴞𐴎𐴡𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴁𐴝𐴕𐴝𐴘𐴃𐴟𐴓𐴠𐴥.

𐴉𐴟𐴌𐴝𐴕𐴝 𐴎𐴞𐴕𐴊𐴞𐴒𐴞 𐴀𐴠𐴊𐴧𐴠 𐴕𐴡𐴘𐴝 𐴎𐴞𐴕𐴊𐴞𐴒𐴞

¹⁷𐴇𐴠𐴥𐴃𐴡𐴓𐴧𐴝, 𐴔𐴝𐴓𐴞𐴑𐴡𐴌 𐴕𐴝𐴔𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴊𐴞𐴌, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴕𐴊𐴞𐴓𐴧𐴝 𐴕𐴞𐴎𐴡𐴌 𐴁𐴠𐴇𐴝𐴌 𐴑𐴞𐴥𐴘𐴝𐴓𐴠 𐴏𐴡𐴓𐴠, 𐴃𐴟𐴣𐴀𐴝𐴥𐴌𐴝 𐴀𐴝𐴌 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴎𐴞𐴕𐴊𐴞𐴒𐴞 𐴕𐴡 𐴈𐴝𐴍𐴝𐴘𐴧𐴡𐴥,¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴁𐴟𐴎𐴢 𐴀𐴝𐴕𐴊𐴝𐴤𐴌𐴡𐴃𐴢 𐴉𐴡𐴌𐴞 𐴀𐴝𐴏𐴠𐴤, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴊𐴡𐴌𐴡𐴤𐴌 𐴎𐴡𐴌𐴞𐴘𐴝 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴧𐴝𐴌 𐴁𐴝𐴦𐴁𐴟𐴃𐴠 𐴎𐴝𐴕𐴑𐴝𐴌𐴞 𐴕𐴡 𐴃𐴡𐴥𐴕𐴠 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴘𐴠 𐴊𐴠𐴦 𐴊𐴠 𐴎𐴞𐴕𐴊𐴞𐴒𐴞𐴃𐴧𐴟 𐴔𐴝𐴀𐴌𐴟𐴔 𐴀𐴡𐴥𐴘 𐴀𐴝𐴏𐴠𐴤;¹⁹𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴕𐴡𐴤 𐴐𐴡𐴥𐴌𐴡𐴔𐴇𐴝𐴘𐴝 𐴕𐴝𐴥𐴘; 𐴀𐴞𐴥𐴃𐴝𐴌𐴝 𐴕𐴞𐴎𐴡𐴃𐴧𐴟 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴕𐴝𐴉𐴝𐴑 𐴈𐴝𐴔 𐴒𐴡𐴌𐴞𐴥𐴁𐴝𐴌 𐴎𐴠 𐴀𐴝𐴎𐴧𐴟 𐴀𐴝𐴏𐴠𐴤 𐴇𐴞𐴥𐴀𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴕𐴞𐴎𐴡𐴌𐴠𐴥 𐴀𐴝𐴘𐴝𐴐𐴞𐴃𐴢 𐴒𐴡𐴏𐴝𐴥𐴘𐴊𐴞𐴘𐴠.

²⁰𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴇𐴠𐴥𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴉𐴝𐴘𐴧𐴡𐴥 𐴊𐴠 𐴕𐴡,²¹𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝 𐴀𐴡 𐴏𐴡𐴥𐴘𐴧𐴞 𐴔𐴡𐴎𐴞𐴕 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴡 𐴀𐴝𐴦𐴌 𐴀𐴞𐴥𐴁𐴝𐴌 𐴃𐴡𐴌𐴉𐴡𐴥𐴃𐴧𐴟 𐴃𐴝𐴦𐴓𐴞𐴔 𐴉𐴝𐴘𐴧𐴡𐴥, 𐴎𐴠 𐴏𐴡𐴥𐴘𐴧𐴞 𐴇𐴠𐴥 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴏𐴠𐴤,²²𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴀𐴝𐴒𐴡𐴌 𐴎𐴠 𐴏𐴡𐴓𐴝𐴏𐴡𐴓𐴢 𐴀𐴝𐴏𐴠𐴤, 𐴇𐴠𐴥 𐴉𐴟𐴌𐴝𐴕𐴝 𐴔𐴝𐴕𐴟𐴥𐴙𐴐𐴡𐴌𐴠 𐴉𐴟𐴥𐴖𐴝𐴣𐴃𐴞 𐴑𐴟𐴥𐴓𐴞 𐴉𐴠𐴥𐴓𐴝𐴘𐴊𐴡, 𐴎𐴞𐴁𐴝𐴤 𐴊𐴟𐴥𐴑𐴝𐴁𐴝𐴎𐴞𐴌 𐴀𐴝𐴎𐴧𐴟 𐴓𐴡𐴘 𐴁𐴞𐴒𐴞𐴍𐴞𐴎𐴝𐴌𐴒𐴡𐴥𐴘;²³𐴀𐴠𐴊𐴧𐴠 𐴀𐴝𐴓𐴧𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴊𐴠𐴔𐴝𐴑𐴡𐴌 𐴑𐴞𐴥𐴘𐴝𐴓𐴡𐴌𐴠 𐴕𐴡𐴘𐴝 𐴒𐴡𐴙𐴃𐴧𐴡𐴥 𐴊𐴡;²⁴𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴕𐴡𐴘𐴝 𐴔𐴝𐴕𐴟𐴥𐴙𐴐𐴡𐴌𐴠 𐴉𐴞𐴕𐴊𐴞𐴥𐴉𐴠𐴓𐴡, 𐴎𐴞𐴁𐴝𐴤𐴌𐴠 𐴀𐴝𐴓𐴧𐴝𐴌 𐴏𐴟𐴥𐴌𐴡𐴃𐴠 𐴏𐴡𐴥𐴘𐴧𐴞 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴀𐴠𐴊𐴧𐴠 𐴂𐴝𐴑𐴞𐴌 𐴏𐴝𐴥𐴀𐴣𐴃𐴠 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠.

𐴕𐴡𐴘𐴝 𐴎𐴞𐴕𐴊𐴞𐴒𐴞𐴓𐴧𐴝 𐴕𐴞𐴘𐴡𐴔 𐴀𐴡𐴥𐴑𐴧𐴡𐴓𐴢

²⁵𐴇𐴠𐴥 𐴀𐴞𐴥𐴏𐴝𐴉𐴠, 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴖𐴝𐴤 𐴉𐴠𐴥𐴓𐴝𐴘𐴊𐴡 𐴀𐴝𐴦𐴌 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴇𐴡𐴥𐴑 𐴈𐴡𐴃𐴝𐴤 𐴈𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴃𐴡 𐴀𐴠𐴑 𐴒𐴝𐴦𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢.²⁶”𐴒𐴟𐴐𐴧𐴝𐴤 𐴀𐴟𐴍𐴞𐴤𐴓𐴠 𐴀𐴟𐴍𐴡𐴥𐴑, 𐴔𐴡𐴕𐴃𐴡𐴌 𐴒𐴟𐴕𐴝𐴤 𐴕𐴡 𐴒𐴡𐴙𐴅𐴧𐴡𐴥.“ 𐴃𐴟𐴣𐴀𐴝𐴥𐴌𐴝𐴌 𐴒𐴟𐴐𐴧𐴝𐴤𐴌𐴠 𐴁𐴠𐴙𐴓𐴢 𐴒𐴡𐴥𐴓𐴞𐴁𐴝𐴌 𐴀𐴝𐴒𐴠 𐴉𐴝𐴕𐴞𐴥 𐴒𐴡𐴌𐴞𐴥𐴉𐴠𐴓𐴝𐴘𐴧𐴡;²⁷𐴀𐴞𐴁𐴞𐴓𐴞𐴥𐴐𐴡𐴌𐴠 𐴔𐴡𐴑𐴝 𐴕𐴡 𐴊𐴞𐴘𐴡.²⁸𐴏𐴟𐴌 𐴀𐴡𐴥𐴑𐴧𐴡𐴓𐴠 𐴀𐴝𐴌 𐴏𐴟𐴌𐴞 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴒𐴡𐴔 𐴉𐴠𐴐𐴝𐴤 𐴁𐴝𐴕𐴝𐴘 𐴕𐴞𐴎𐴡𐴌 𐴀𐴝𐴥𐴃𐴠 𐴔𐴠𐴀𐴕𐴧𐴡𐴃𐴢 𐴒𐴡𐴌𐴡𐴤; 𐴎𐴠𐴀𐴕𐴠 𐴔𐴟𐴀𐴃𐴝𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴞𐴦 𐴁𐴡𐴓𐴧𐴝 𐴕𐴞𐴎𐴡𐴃𐴧𐴟 𐴑𐴠𐴏𐴧𐴟𐴥 𐴃𐴝𐴥𐴑𐴠.

²⁹𐴃𐴟𐴣𐴀𐴝𐴥𐴌𐴝𐴌 𐴔𐴟𐴑𐴡𐴃𐴧𐴟 𐴇𐴡𐴕𐴡𐴤 𐴁𐴟𐴌𐴝 𐴈𐴡𐴃𐴝𐴤 𐴕𐴡 𐴕𐴠𐴦𐴓𐴝𐴘𐴧𐴡𐴥, 𐴁𐴡𐴥𐴓𐴑𐴠 𐴎𐴞𐴀𐴕 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴀𐴞𐴥𐴃𐴝𐴌𐴝𐴌 𐴎𐴡𐴌𐴟𐴌𐴡𐴃𐴢 𐴔𐴡𐴎𐴞𐴕 𐴁𐴝𐴕𐴝𐴘𐴃𐴟𐴓𐴞𐴤 𐴁𐴡𐴓𐴧𐴝 𐴒𐴡𐴔 𐴇𐴞𐴥𐴀𐴕 𐴁𐴠 𐴕𐴠𐴦𐴓𐴝𐴘𐴧𐴡𐴥, 𐴎𐴠𐴀𐴕𐴠 𐴉𐴟𐴥𐴕𐴡𐴘𐴝 𐴀𐴡𐴥𐴑𐴧𐴡𐴓𐴠 𐴇𐴞𐴥𐴀𐴕𐴡𐴃𐴧𐴟 𐴉𐴝𐴥𐴘𐴊𐴝 𐴉𐴝𐴦.³⁰𐴀𐴝𐴦𐴌 𐴀𐴝𐴓𐴧𐴝𐴌 𐴂𐴝𐴑-𐴌𐴟𐴀𐴌𐴠 𐴕𐴝𐴌𐴝𐴏𐴢 𐴕𐴡 𐴒𐴡𐴙𐴅𐴧𐴡𐴥, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴡𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡𐴓𐴧𐴝 𐴔𐴡𐴀𐴌 𐴓𐴝𐴒𐴝𐴘𐴊𐴞𐴘𐴝 𐴒𐴞𐴘𐴠𐴥, 𐴎𐴠𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴁𐴝𐴌 𐴊𐴞𐴕 𐴕𐴟𐴥 𐴀𐴝𐴘𐴧𐴠𐴤.³¹𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴔𐴡𐴕𐴇𐴝𐴓𐴝𐴇𐴝𐴓𐴞, 𐴌𐴝𐴑, 𐴒𐴟𐴐𐴧𐴝𐴤, 𐴀𐴟𐴎𐴡𐴌 𐴊𐴞 𐴇𐴡𐴙𐴅𐴧𐴝 𐴊𐴞𐴘𐴝, 𐴁𐴡𐴊𐴕𐴝𐴔 𐴒𐴡𐴌𐴝𐴥, 𐴀𐴠𐴊𐴧𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴊𐴟𐴐𐴧𐴡𐴕𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡.³²𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴠𐴀𐴌𐴁𐴝𐴕𐴞 𐴒𐴡𐴌𐴡𐴤 𐴀𐴠𐴊𐴧𐴠 𐴉𐴠𐴄𐴉𐴟𐴌𐴝𐴕𐴞 𐴊𐴝𐴈𐴡𐴥, 𐴀𐴝𐴦𐴌 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴀𐴠𐴕𐴊𐴞𐴓𐴧𐴝 𐴔𐴝𐴉𐴢 𐴒𐴡𐴌𐴡𐴤, 𐴎𐴠𐴕𐴊𐴞𐴓𐴧𐴝 𐴀𐴝𐴓𐴧𐴝𐴘𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴠.

The Word for the World International

https://app.library.bible/content/87faca8b51c22590