Read 𐴀𐴞𐴥𐴉𐴞𐴐𐴞𐴀𐴡𐴥𐴓𐴢 3

𐴀𐴞𐴥𐴉𐴞𐴐𐴞𐴀𐴡𐴥𐴓𐴢3

𐴁𐴠𐴘𐴡𐴇𐴟𐴥𐴊𐴞𐴌 𐴇𐴝𐴣𐴏𐴠 𐴂𐴝𐴥𐴀𐴟𐴓𐴡𐴌 𐴈𐴝𐴥𐴀𐴊𐴠𐴔𐴞

¹𐴀𐴝𐴀𐴛 𐴂𐴝𐴥𐴀𐴟𐴓𐴢 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴖𐴝𐴏𐴃𐴠𐴥 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴇𐴠𐴥𐴊𐴔𐴡𐴃𐴊𐴝𐴌𐴞 𐴒𐴡𐴌𐴡𐴤𐴕𐴠 𐴁𐴡𐴕𐴊𐴞𐴃𐴢 𐴀𐴝𐴏𐴞𐴤, 𐴀𐴝𐴀𐴛 𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴞𐴥.

²𐴁𐴠𐴐𐴡𐴥𐴑 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴌 𐴀𐴠𐴕𐴃𐴠𐴎𐴝𐴔𐴡𐴌 𐴁𐴝𐴦𐴁𐴟𐴃𐴠 𐴃𐴟𐴣𐴀𐴝𐴥𐴌𐴝 𐴉𐴟𐴥𐴙𐴕𐴧𐴡, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴉𐴡𐴀𐴣𐴏𐴝𐴘𐴁𐴝𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴣𐴀𐴌𐴠𐴥 𐴊𐴞𐴦𐴘𐴝 𐴒𐴞𐴘𐴠𐴥,³𐴘𐴝𐴥𐴕𐴞, 𐴒𐴟𐴉𐴡𐴕𐴞 𐴖𐴝𐴀𐴕 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴖𐴝𐴈𐴞𐴤 𐴊𐴞𐴥 𐴀𐴝𐴣𐴀𐴌𐴠𐴥 𐴎𐴝𐴕𐴝𐴘𐴧𐴠𐴥, 𐴎𐴞𐴘𐴝𐴥𐴕 𐴘𐴝𐴦𐴌 𐴀𐴝𐴒𐴠 𐴁𐴝𐴍𐴞𐴥𐴌 𐴏𐴝𐴥𐴀𐴣𐴃𐴠 𐴓𐴠𐴑𐴞𐴥𐴉𐴠𐴓𐴝𐴘𐴧𐴞.⁴𐴇𐴞𐴥𐴘𐴝𐴕 𐴉𐴡𐴌𐴞𐴥𐴓𐴠 𐴃𐴟𐴣𐴀𐴝𐴥𐴌𐴝 𐴎𐴝𐴕𐴞 𐴉𐴝𐴌𐴞𐴁𐴝𐴥, 𐴔𐴡𐴀𐴏𐴞𐴤𐴌 𐴒𐴟𐴉𐴡𐴕𐴞𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴇𐴡𐴊𐴧𐴟𐴥𐴌 𐴁𐴟𐴎𐴞𐴥,⁵𐴎𐴞𐴘𐴝𐴥𐴕 𐴀𐴡𐴙𐴕𐴧𐴡 𐴎𐴡𐴁𐴝𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴞𐴕𐴏𐴝𐴥𐴕-𐴎𐴝𐴃𐴞𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴕𐴡𐴥 𐴎𐴝, 𐴎𐴠𐴕𐴊𐴞𐴓𐴧𐴝 𐴘𐴝𐴓𐴝 𐴀𐴞𐴥𐴁𐴝𐴌 𐴂𐴝𐴑 𐴏𐴝𐴥𐴇𐴝𐴁𐴞 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴒𐴞𐴥𐴘𐴠.⁶𐴇𐴠𐴥 𐴒𐴟𐴉𐴡𐴕𐴞 𐴀𐴡𐴥𐴙𐴓𐴊𐴠 𐴘𐴝𐴀𐴕, 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴀𐴟𐴏𐴞𐴥𐴓𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴘𐴡𐴇𐴟𐴥𐴊𐴞𐴌 𐴉𐴟𐴥𐴖𐴝𐴣𐴃𐴞 𐴔𐴞𐴌𐴝𐴏𐴊𐴝𐴥𐴌 𐴀𐴡𐴥𐴘𐴧𐴠, 𐴀𐴠𐴑𐴞𐴤 𐴒𐴝𐴦𐴌 𐴇𐴞𐴥𐴏𐴧𐴝 𐴀𐴡𐴥𐴘𐴧𐴠, 𐴀𐴠𐴊𐴧𐴠 𐴖𐴝𐴦𐴊𐴝 𐴖𐴝𐴀𐴕𐴡𐴌 𐴁𐴝𐴥𐴒𐴞 𐴀𐴡𐴥𐴘𐴧𐴠 𐴎𐴞𐴘𐴝𐴥𐴕 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴒𐴡𐴌𐴝𐴥 𐴒𐴞𐴥𐴘𐴠.

⁷𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴌 𐴇𐴝𐴥𐴊𐴞𐴘𐴝𐴘𐴠 𐴀𐴝𐴀𐴛 𐴇𐴠𐴥 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴈𐴝𐴥𐴀𐴊𐴠𐴔 𐴁𐴡𐴙𐴕𐴧𐴞𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴌 𐴑𐴟𐴊𐴟𐴌𐴟𐴃𐴡𐴌 𐴁𐴡𐴓𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴝 𐴒𐴞𐴘𐴠𐴥.⁸𐴀𐴝𐴓𐴧𐴝𐴌 𐴃𐴝𐴔𐴝𐴥𐴔 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴝𐴀𐴛 𐴀𐴠𐴁𐴧𐴠 𐴕𐴞𐴌𐴡𐴥𐴐𐴧𐴗𐴝 𐴊𐴠 𐴀𐴡𐴥𐴘𐴓𐴠 𐴘𐴡, 𐴀𐴝𐴣𐴀𐴌 𐴖𐴡𐴌𐴠 𐴀𐴠 𐴌𐴝𐴇𐴝𐴥𐴔𐴡𐴃𐴢 𐴃𐴝𐴥𐴕 𐴀𐴡𐴥𐴘𐴧𐴠, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴔𐴡𐴀𐴏𐴞𐴤𐴌 𐴀𐴡𐴐𐴞𐴥𐴔𐴝𐴕𐴝 𐴊𐴡𐴥𐴕𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥𐴁𐴝𐴌,⁹𐴀𐴠𐴊𐴧𐴠 𐴒𐴟𐴉𐴡𐴕𐴞 𐴖𐴝𐴀𐴕𐴡𐴌 𐴀𐴠𐴕𐴃𐴠𐴎𐴝𐴔 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴝𐴈𐴝𐴤𐴘𐴁𐴝𐴌, 𐴎𐴞𐴘𐴝𐴥𐴕 𐴒𐴟𐴎𐴡𐴌𐴞𐴒𐴞𐴘𐴡𐴥𐴘 𐴊𐴠 𐴎𐴡𐴁𐴝𐴕𐴝 𐴀𐴡𐴥𐴑𐴧𐴡𐴓𐴢 𐴉𐴡𐴙𐴅𐴧𐴡𐴕𐴃𐴡 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴓𐴟𐴑𐴝𐴘𐴧𐴝 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥,¹⁰𐴎𐴠𐴀𐴕𐴠 𐴘𐴝𐴓𐴝 𐴎𐴡𐴔𐴝𐴥𐴃𐴡𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴒𐴞𐴘𐴝𐴕𐴡𐴌 𐴁𐴝𐴦𐴁𐴟𐴃𐴠, 𐴀𐴝𐴏𐴔𐴝𐴕𐴞 𐴎𐴝𐴒𐴝𐴃𐴢 𐴀𐴝𐴏𐴠𐴤 𐴊𐴠 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴠𐴊𐴧𐴠 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌𐴠 𐴎𐴝𐴕𐴝𐴘𐴊𐴞𐴘𐴝 𐴎𐴝.¹¹𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴕𐴞𐴎𐴡𐴌 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴞 𐴔𐴡𐴑𐴏𐴡𐴥𐴃𐴢 𐴔𐴡𐴎𐴞𐴕 𐴁𐴠 𐴒𐴡𐴙𐴅𐴧𐴞𐴥𐴓𐴢, 𐴎𐴞𐴘𐴝𐴥𐴕𐴡𐴌𐴠 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌 𐴊𐴟𐴖𐴝𐴌𐴝 𐴉𐴟𐴌𐴝 𐴒𐴡𐴙𐴅𐴧𐴠𐴥,¹²𐴎𐴞𐴁𐴝𐴤𐴌 𐴎𐴡𐴌𐴞𐴘𐴝 𐴀𐴠𐴊𐴧𐴠 𐴎𐴞𐴁𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤𐴕𐴠 𐴀𐴝𐴣𐴀𐴌𐴝 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴀𐴠𐴊𐴧𐴠 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴀𐴝𐴓𐴧𐴝𐴌 𐴐𐴝𐴥𐴙𐴑𐴧𐴝𐴃𐴢 𐴎𐴝𐴘 𐴉𐴝𐴌𐴞.¹³𐴇𐴠𐴥𐴃𐴡𐴓𐴧𐴝, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴎𐴡𐴌𐴞𐴘𐴝 𐴎𐴠 𐴊𐴟𐴑-𐴔𐴡𐴏𐴞𐴁𐴡𐴃𐴢 𐴉𐴝𐴙𐴌 𐴇𐴞𐴥𐴀𐴕𐴠 𐴇𐴞𐴥𐴔𐴧𐴡𐴃𐴢 𐴕𐴡 𐴇𐴝𐴥𐴌𐴝𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴀𐴞𐴎𐴧𐴡𐴃𐴡𐴓𐴧𐴝 𐴁𐴠 𐴀𐴡𐴥𐴌.

𐴔𐴡𐴀𐴏𐴞𐴤𐴌 𐴔𐴟𐴇𐴝𐴥𐴁𐴧𐴡𐴃𐴢

¹⁴𐴀𐴝𐴀𐴛 𐴇𐴠𐴥𐴃𐴡𐴓𐴧𐴝 𐴀𐴡 𐴁𐴝𐴉𐴡𐴌 𐴔𐴟𐴀𐴕𐴃𐴟 𐴀𐴝𐴣𐴍𐴟𐴥 𐴉𐴠𐴥𐴓𐴝𐴘,¹⁵𐴎𐴞𐴁𐴝𐴤𐴌 𐴈𐴠𐴥𐴕𐴃𐴟 𐴀𐴝𐴏𐴔𐴝𐴕 𐴎𐴡𐴁𐴞𐴕𐴡𐴌 𐴇𐴝𐴥𐴀𐴌 𐴎𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴉𐴡𐴘𐴊𐴝 𐴀𐴡𐴥𐴘𐴧𐴠.¹⁶𐴀𐴝𐴀𐴛 𐴊𐴟𐴖𐴝 𐴒𐴡𐴌𐴞𐴥 𐴊𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴡𐴈𐴞𐴥𐴔𐴝𐴌 𐴃𐴟𐴖𐴝𐴚𐴒𐴡𐴌𐴞 𐴔𐴡𐴎𐴞𐴕 𐴀𐴞𐴥𐴁𐴝𐴌 𐴌𐴟𐴀𐴌 𐴊𐴟𐴖𐴝𐴌𐴝 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴁𐴡𐴓𐴢 𐴊𐴞 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴠𐴥 𐴉𐴝𐴥𐴕,¹⁷𐴎𐴠𐴀𐴕𐴠 𐴀𐴞𐴔𐴝𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴔𐴡𐴀𐴏𐴞𐴤 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴃𐴝𐴥𐴑𐴠. 𐴀𐴝𐴀𐴛 𐴀𐴝𐴌𐴡𐴤 𐴊𐴟𐴖𐴝 𐴒𐴡𐴌𐴞𐴥 𐴊𐴠, 𐴔𐴟𐴇𐴝𐴥𐴁𐴧𐴡𐴃𐴡𐴃𐴢 𐴐𐴞𐴥𐴛𐴡𐴌 𐴒𐴝𐴏𐴝𐴤𐴘 𐴀𐴠𐴊𐴧𐴠 𐴇𐴠𐴥 𐴁𐴟𐴕𐴞𐴘𐴝𐴊𐴞𐴃𐴢 𐴄𐴞𐴑𐴞 𐴃𐴝𐴥𐴑𐴞 𐴃𐴟𐴣𐴀𐴝𐴥𐴌𐴝 𐴎𐴠𐴕¹⁸𐴃𐴝𐴔𐴝𐴥𐴔 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴁𐴟𐴎𐴞𐴥 𐴉𐴝𐴌𐴡 𐴊𐴠, 𐴔𐴡𐴀𐴏𐴞𐴤𐴌 𐴇𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴇𐴡𐴃𐴡𐴥 𐴐𐴡𐴍𐴝, 𐴇𐴡𐴃𐴡𐴥 𐴓𐴝𐴔𐴁𐴝, 𐴇𐴡𐴃𐴡𐴥 𐴀𐴟𐴣𐴏𐴡𐴓𐴢, 𐴀𐴠𐴊𐴧𐴠 𐴇𐴡𐴃𐴡𐴥 𐴔𐴟𐴌,¹⁹𐴀𐴝𐴦𐴌 𐴇𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴎𐴞𐴘𐴝𐴥𐴕 𐴎𐴝𐴕𐴞 𐴉𐴝𐴌𐴞𐴁𐴝𐴥𐴌 𐴁𐴝𐴀𐴌𐴠, 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴇𐴞𐴥𐴘𐴝𐴕 𐴎𐴝𐴕𐴞 𐴉𐴝𐴌𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴃𐴝𐴔𐴝𐴥𐴔 𐴉𐴟𐴌𐴝𐴘𐴞𐴌 𐴇𐴠𐴥𐴊𐴧𐴟𐴌 𐴉𐴟𐴌𐴝𐴘𐴧𐴝 𐴀𐴡𐴥𐴘𐴎𐴡𐴒𐴡𐴘.

²⁰𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴈𐴝𐴔 𐴒𐴡𐴌𐴠𐴥 𐴊𐴠 𐴑𐴟𐴊𐴟𐴌𐴟𐴃𐴢 𐴔𐴡𐴎𐴞𐴕، 𐴀𐴝𐴣𐴀𐴌𐴝 𐴔𐴝𐴒𐴞 𐴊𐴠 𐴀𐴠𐴊𐴧𐴠 𐴏𐴞𐴕𐴃𐴝 𐴒𐴡𐴌𐴞𐴥 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴡𐴀𐴗𐴃𐴢 𐴁𐴠𐴐𐴝𐴤𐴁𐴞𐴐𐴞𐴤 𐴒𐴡𐴌𐴞𐴥 𐴉𐴝𐴌𐴠,²¹𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝 𐴎𐴡𐴔𐴝𐴥𐴃𐴡𐴌 𐴊𐴟𐴖𐴝𐴌𐴝 𐴀𐴠𐴊𐴧𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝, 𐴇𐴝𐴥𐴀𐴌 𐴎𐴡𐴁𐴝𐴕𐴝 𐴀𐴠𐴊𐴧𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴇𐴝𐴥𐴔𐴞𐴐𐴝 𐴀𐴡𐴥𐴖𐴝𐴃𐴢 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.

The Word for the World International

https://app.library.bible/content/87faca8b51c22590