Read 𐴈𐴝𐴔𐴡𐴥𐴓𐴢 7

𐴈𐴝𐴔𐴡𐴥𐴓𐴢7

𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴀𐴠𐴏𐴄𐴞𐴥𐴉𐴠𐴕𐴡𐴌 𐴏𐴡𐴥𐴉𐴝𐴘

¹𐴇𐴠𐴥𐴃𐴟𐴕𐴡𐴃𐴢 𐴁𐴡𐴌𐴡 𐴀𐴞𐴔𐴝𐴔𐴠 𐴀𐴠𐴏𐴄𐴞𐴥𐴉𐴠𐴕𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴀𐴕 𐴏𐴡𐴥𐴘𐴧𐴞 𐴀𐴡𐴥𐴘 𐴕𐴠𐴥؟“

²𐴀𐴠𐴏𐴄𐴞𐴥𐴉𐴠𐴕𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴡𐴥 𐴁𐴝𐴥𐴘𐴧𐴝𐴙𐴕 𐴀𐴝𐴦𐴌 𐴁𐴝𐴉𐴝𐴥𐴙𐴕, 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴡. 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔 𐴇𐴝𐴥𐴌𐴝𐴕 𐴐𐴡𐴥𐴀𐴌𐴡𐴃𐴢 𐴃𐴝𐴥𐴑𐴞𐴁𐴝𐴌 𐴀𐴝𐴒𐴠 𐴔𐴠𐴏𐴡𐴂𐴡𐴥𐴄𐴡𐴔𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢 𐴔𐴡𐴈𐴞𐴥𐴔𐴝𐴌 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴊𐴝𐴈𐴝𐴤 𐴊𐴞𐴥𐴓𐴢,³𐴀𐴝𐴦𐴌 𐴈𐴡𐴀𐴙𐴓𐴢 𐴊𐴠, ’𐴃𐴡𐴌 𐴔𐴟𐴓𐴧𐴟𐴑 𐴀𐴠𐴊𐴧𐴠 𐴃𐴡𐴌 𐴀𐴠𐴒𐴝𐴕𐴝-𐴒𐴟𐴙𐴐𐴧𐴞𐴥 𐴀𐴡𐴥𐴑𐴧𐴡𐴓𐴢 𐴀𐴠𐴌𐴞 𐴀𐴡 𐴔𐴟𐴓𐴧𐴟𐴑𐴡𐴃𐴢 𐴎𐴝𐴦 𐴎𐴞𐴘𐴝𐴥𐴕 𐴀𐴝𐴀𐴛 𐴃𐴡𐴌𐴠𐴥 𐴊𐴝𐴈𐴝𐴤𐴘𐴧𐴟𐴔.‘

⁴”𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴑𐴝𐴏𐴊𐴞𐴘𐴡 𐴀𐴡𐴥𐴑𐴧𐴡𐴓𐴡𐴌 𐴔𐴟𐴓𐴧𐴟𐴑 𐴀𐴠𐴌𐴞 𐴇𐴝𐴥𐴌𐴝𐴕𐴡𐴃𐴢 𐴎𐴝𐴘 𐴃𐴝𐴥𐴙𐴑𐴧𐴠𐴒𐴡𐴘. 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴁𐴝𐴉𐴢 𐴔𐴡𐴌𐴞𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠 𐴔𐴟𐴓𐴧𐴟𐴑 𐴘𐴝𐴀𐴕𐴡𐴃𐴢 𐴓𐴡𐴌𐴞 𐴀𐴝𐴀 𐴁𐴝𐴘𐴧𐴠𐴥, 𐴎𐴞𐴘𐴝𐴥𐴕𐴡𐴃𐴢 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴃𐴝𐴥𐴑𐴡𐴌.⁵𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠 𐴔𐴟𐴓𐴧𐴟𐴑 𐴘𐴝𐴀𐴕𐴡𐴌 𐴇𐴡𐴕𐴡𐴤 𐴇𐴞𐴥𐴏𐴧𐴝 𐴔𐴞𐴌𐴝𐴏𐴢 𐴕𐴡𐴥 𐴊𐴠𐴦, 𐴄𐴠𐴥𐴚 𐴌𐴝𐴑𐴞𐴥 𐴉𐴝𐴌𐴠 𐴊𐴠 𐴇𐴠𐴥𐴃𐴧𐴡𐴌 𐴀𐴟𐴥𐴊𐴧𐴗𐴝 𐴕𐴡𐴥 𐴊𐴠𐴦; 𐴓𐴠𐴑𐴞𐴕 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴖𐴝 𐴕𐴟 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴟𐴥𐴊𐴧𐴗𐴝 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝 𐴓𐴧𐴡𐴥𐴘 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴑𐴞, 𐴀𐴠 𐴔𐴟𐴓𐴧𐴟𐴑 𐴘𐴝𐴀𐴕 𐴘𐴡𐴥𐴒𐴧𐴗𐴝𐴌 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝 𐴎𐴝𐴘 𐴘𐴡𐴥𐴒𐴧𐴗𐴝𐴌 𐴎𐴠 𐴕𐴡𐴏𐴡𐴥𐴓𐴢 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴞𐴁𐴡 𐴀𐴞𐴥𐴃𐴝𐴌𐴝𐴌 𐴑𐴡𐴁𐴎𐴝𐴃𐴢 𐴒𐴡𐴌𐴞𐴥𐴊𐴞𐴁𐴡.⁶𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴙𐴓𐴢, ’𐴃𐴡𐴌 𐴕𐴡𐴏𐴡𐴥𐴓𐴢 𐴀𐴡𐴥𐴑𐴧𐴡𐴓𐴢 𐴉𐴡𐴌𐴡𐴌 𐴔𐴟𐴓𐴧𐴟𐴑𐴡𐴃𐴢 𐴃𐴡𐴥𐴌 𐴏𐴝𐴥𐴌𐴝 𐴁𐴡𐴕𐴞 𐴃𐴝𐴥𐴑𐴞𐴁𐴡; 𐴇𐴠𐴥𐴍𐴠 𐴀𐴞𐴥𐴃𐴝𐴌𐴝𐴌𐴠 𐴒𐴟𐴓𐴝𐴔𐴞𐴃𐴢 𐴌𐴝𐴑𐴞𐴥𐴁𐴡, 𐴀𐴝𐴦𐴌 𐴏𐴝𐴙𐴌 𐴐𐴡𐴥𐴃𐴢 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴎𐴟𐴓𐴟𐴥𐴔 𐴇𐴝𐴥𐴘𐴁𐴡.‘⁷𐴀𐴝𐴓𐴧𐴝𐴘𐴠 𐴀𐴝𐴌𐴡𐴤 𐴈𐴡𐴀𐴙𐴓𐴢 𐴊𐴠, ’𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴠 𐴑𐴡𐴗𐴔𐴡𐴌 𐴒𐴟𐴓𐴝𐴔𐴞 𐴒𐴡𐴌𐴞𐴥𐴁𐴡, 𐴀𐴝𐴀𐴛 𐴇𐴠𐴥 𐴑𐴡𐴗𐴔𐴡𐴌𐴠 𐴏𐴝𐴥𐴣𐴎𐴝 𐴊𐴞𐴥𐴘𐴟𐴔, 𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴇𐴠𐴥 𐴔𐴟𐴓𐴧𐴟𐴑𐴡𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴢 𐴀𐴠 𐴎𐴝𐴒𐴝𐴃𐴢 𐴀𐴝𐴣𐴀𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥𐴁𐴡.‘ ⁸𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴌𐴝𐴎𐴞𐴕𐴝𐴔𐴝𐴌 𐴕𐴞𐴐𐴝𐴥𐴕 𐴀𐴞𐴥𐴏𐴝𐴉𐴠 𐴘𐴡𐴥𐴒𐴧𐴗𐴝𐴌𐴠 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥𐴌 𐴕𐴞𐴘𐴡𐴔 𐴊𐴞𐴀𐴓𐴢. 𐴃𐴡𐴥𐴘 𐴎𐴠𐴣𐴃𐴧𐴠𐴥 𐴀𐴞𐴁𐴌𐴝𐴇𐴞𐴥𐴔𐴡𐴃𐴧𐴟 𐴀𐴞𐴏𐴝𐴈𐴝𐴥𐴑 𐴎𐴡𐴌𐴔𐴡 𐴀𐴡𐴥𐴘𐴧𐴠, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴀𐴝𐴣𐴐𐴄𐴡 𐴊𐴞𐴕𐴡𐴃𐴢 𐴊𐴞𐴕 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥𐴘𐴧𐴠; 𐴁𐴝𐴦𐴊𐴠 𐴀𐴞𐴏𐴝𐴈𐴝𐴥𐴑𐴡𐴃𐴧𐴟 𐴘𐴝𐴑𐴟𐴁𐴢 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢, 𐴀𐴝𐴦𐴌 𐴘𐴝𐴑𐴟𐴁𐴡𐴃𐴧𐴟 𐴁𐴝𐴌𐴡𐴥 𐴈𐴝𐴥𐴀𐴕𐴊𐴝𐴕𐴡𐴌 𐴁𐴝𐴉𐴊𐴝𐴊𐴝 𐴒𐴟𐴥𐴕 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢.

⁹”𐴇𐴠𐴥 𐴁𐴝𐴉𐴊𐴝𐴊𐴝 𐴒𐴟𐴥𐴕𐴠 𐴘𐴟𐴏𐴟𐴥𐴉𐴡𐴌𐴠 𐴌𐴞𐴐𐴠𐴥 𐴀𐴞𐴅𐴞𐴤𐴂𐴡𐴃𐴢 𐴁𐴠𐴏𐴞𐴉𐴠𐴥𐴓𐴝𐴙𐴓𐴢, 𐴔𐴡𐴕𐴃𐴡𐴌 𐴀𐴝𐴓𐴧𐴝 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢,¹⁰𐴀𐴝𐴦𐴌 𐴀𐴞𐴥𐴁𐴝𐴌𐴠 𐴃𐴝𐴔𐴝𐴥𐴔 𐴔𐴡𐴏𐴞𐴁𐴡𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴝𐴏𐴝𐴀𐴙𐴓𐴢. 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴀𐴞𐴅𐴞𐴤𐴂𐴡𐴌 𐴁𐴝𐴀𐴣𐴐𐴧𐴝 𐴉𐴠𐴥𐴌𐴟𐴖𐴝𐴕𐴡𐴃𐴧𐴟 𐴔𐴠𐴀𐴌𐴁𐴝𐴕𐴞 𐴉𐴝𐴦𐴁𐴝𐴀𐴙𐴓𐴢 𐴀𐴝𐴦𐴌 𐴁𐴟𐴊𐴧𐴞𐴥𐴔𐴝𐴕 𐴁𐴝𐴕𐴝𐴀𐴙𐴓𐴢, 𐴁𐴝𐴦𐴊𐴠 𐴀𐴞𐴥𐴃𐴠 𐴀𐴞𐴥𐴁𐴝𐴌𐴠 𐴀𐴞𐴅𐴞𐴤𐴂𐴡𐴌 𐴀𐴠𐴊𐴧𐴠 𐴀𐴞𐴥𐴃𐴝𐴌 𐴌𐴝𐴎𐴔𐴡𐴇𐴡𐴥𐴓𐴢 𐴒𐴟𐴣𐴍𐴝𐴌 𐴇𐴝𐴥𐴑𐴞𐴔 𐴁𐴝𐴕𐴝𐴀𐴙𐴓𐴢.

¹¹”𐴘𐴝𐴥𐴌𐴁𐴝𐴦𐴊𐴠, 𐴒𐴟𐴣𐴍𐴝 𐴀𐴞𐴅𐴞𐴤𐴂𐴡𐴃𐴢 𐴀𐴠𐴊𐴧𐴠 𐴑𐴝𐴥𐴕𐴝𐴕𐴡𐴃𐴢 𐴀𐴠𐴒𐴧𐴗𐴝𐴤 𐴌𐴝𐴄𐴢 𐴀𐴡𐴥𐴀𐴙𐴓𐴢, 𐴎𐴞𐴁𐴝𐴤𐴘𐴠 𐴁𐴞𐴐𐴞𐴤 𐴊𐴟𐴑 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴒𐴟𐴥𐴕𐴠 𐴇𐴝𐴥𐴘 𐴁𐴡𐴓𐴧𐴝 𐴈𐴝𐴥𐴕𐴝 𐴕𐴡𐴥 𐴉𐴝𐴦.¹²𐴔𐴡𐴕𐴃𐴡𐴌 𐴘𐴝𐴑𐴟𐴁𐴠 𐴎𐴠𐴃𐴧𐴡𐴥𐴃𐴢 𐴀𐴞𐴅𐴞𐴤𐴂𐴡𐴃𐴢 𐴈𐴝𐴥𐴕𐴝 𐴀𐴝𐴏𐴠𐴤 𐴁𐴡𐴥𐴓𐴞 𐴉𐴟𐴥𐴙𐴕𐴧𐴞𐴓𐴢, 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴒𐴟𐴥𐴕𐴡𐴌𐴠 𐴉𐴡𐴀𐴘𐴓𐴝 𐴁𐴝𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴙𐴓𐴢.¹³𐴊𐴟𐴏𐴝𐴥𐴌𐴝𐴁𐴝𐴌𐴡𐴃𐴢 𐴇𐴠𐴥𐴍𐴠 𐴒𐴞𐴦𐴘𐴠𐴥 𐴌𐴝𐴥𐴌, 𐴘𐴟𐴏𐴟𐴥𐴉𐴠 𐴀𐴞𐴥𐴁𐴝𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴕𐴞𐴎𐴡𐴌 𐴉𐴡𐴌𐴞𐴏𐴡 𐴊𐴞𐴀𐴓𐴢, 𐴁𐴝𐴦𐴊𐴠 𐴉𐴠𐴥𐴌𐴟𐴖𐴝𐴕𐴠 𐴘𐴟𐴏𐴟𐴥𐴉𐴡𐴌 𐴉𐴡𐴌𐴞𐴁𐴝𐴌𐴡𐴌 𐴁𐴝𐴦𐴁𐴟𐴃𐴠 𐴎𐴝𐴕𐴞 𐴉𐴝𐴙𐴅𐴧𐴞𐴥𐴓𐴢.¹⁴𐴃𐴝𐴌𐴉𐴡𐴌𐴠 𐴘𐴟𐴏𐴟𐴥𐴉𐴠 𐴀𐴞𐴥𐴁𐴝𐴌 𐴁𐴝𐴉𐴢 𐴘𐴝𐴑𐴟𐴁𐴡𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴃𐴝𐴔𐴝𐴥𐴔 𐴀𐴠𐴒𐴝𐴕𐴝-𐴒𐴟𐴙𐴐𐴧𐴞𐴥 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴘𐴃𐴡𐴤 𐴈𐴡𐴥𐴁𐴡𐴌 𐴉𐴡𐴀𐴣𐴏𐴝𐴘𐴧𐴠. 𐴀𐴞𐴥𐴃𐴝𐴌𐴝 𐴑𐴟𐴓𐴠𐴇𐴝𐴓𐴠 𐴇𐴡𐴥𐴙𐴃𐴧𐴡𐴌 𐴉𐴝𐴣𐴏𐴢 𐴎𐴡𐴕 𐴀𐴝𐴐𐴧𐴞𐴥𐴓𐴢.¹⁵𐴁𐴝𐴦𐴊𐴠 𐴘𐴝𐴑𐴟𐴁𐴢 𐴀𐴞𐴅𐴞𐴤𐴂𐴡𐴃𐴢 𐴒𐴞𐴀𐴓𐴢; 𐴇𐴠𐴥𐴍𐴠 𐴀𐴞𐴥𐴁𐴝 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴒𐴟𐴥𐴕 𐴀𐴠𐴕𐴃𐴠𐴇𐴝𐴓𐴢 𐴀𐴡𐴥𐴘𐴒𐴞𐴘𐴡𐴘.¹⁶𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴐𐴠𐴑𐴠𐴥𐴔𐴡𐴃𐴢 𐴓𐴡𐴘𐴎𐴝𐴘 𐴈𐴡𐴁𐴡𐴌𐴡𐴃𐴢 𐴊𐴞𐴘𐴝 𐴒𐴞𐴘𐴠𐴥; 𐴈𐴡𐴁𐴡𐴌𐴡𐴏𐴃𐴝𐴥𐴕 𐴖𐴝𐴀𐴕𐴡𐴃𐴢 𐴎𐴞𐴘𐴝𐴥𐴕 𐴀𐴞𐴁𐴌𐴝𐴇𐴞𐴥𐴔𐴠 𐴐𐴠𐴑𐴠𐴥𐴔 𐴐𐴡𐴥𐴀𐴌𐴡𐴃𐴢 𐴈𐴝𐴔𐴡𐴌𐴡𐴌 𐴉𐴟𐴀𐴝𐴙𐴕 𐴊𐴡𐴃𐴧𐴟 𐴄𐴞𐴛𐴝 𐴊𐴞𐴦 𐴑𐴞𐴕𐴞𐴓𐴡𐴥𐴙𐴓𐴢.

¹⁷”𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔 𐴓𐴡𐴥𐴘 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴖𐴝𐴦𐴊𐴝 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴀𐴡𐴑𐴃𐴡𐴥 𐴎𐴠𐴃𐴧𐴡𐴥𐴃𐴢 𐴋𐴝𐴥𐴑𐴠 𐴀𐴝𐴘𐴧𐴠𐴤𐴌, 𐴀𐴞𐴅𐴞𐴤𐴂𐴡𐴃𐴢 𐴀𐴝𐴣𐴀𐴌𐴝𐴌 𐴑𐴡𐴗𐴔 𐴁𐴝𐴌𐴞𐴥 𐴁𐴞𐴐𐴞𐴤 𐴀𐴡𐴥𐴘𐴒𐴞𐴓𐴒𐴡𐴘,¹⁸𐴘𐴝𐴥𐴌𐴁𐴝𐴦𐴊𐴠, 𐴀𐴞𐴅𐴞𐴤𐴂𐴡𐴃𐴢 𐴀𐴝𐴌 𐴀𐴠𐴒𐴧𐴗𐴝𐴤 𐴁𐴝𐴀𐴣𐴐𐴧𐴝 𐴀𐴟𐴙𐴄𐴧𐴞𐴥𐴓𐴢, 𐴎𐴠𐴦𐴕𐴞𐴑𐴞 𐴘𐴟𐴏𐴟𐴥𐴉𐴡𐴌 𐴁𐴝𐴦𐴁𐴟𐴃𐴠 𐴑𐴠𐴏𐴧𐴟𐴥 𐴕𐴡 𐴎𐴝𐴙𐴕𐴃𐴡.¹⁹𐴀𐴞𐴥𐴃𐴠 𐴀𐴝𐴣𐴀𐴌𐴝𐴌 𐴑𐴡𐴗𐴔 𐴓𐴡𐴘 𐴏𐴝𐴓𐴝𐴥𐴑𐴞 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴟𐴥𐴌 𐴎𐴟𐴓𐴟𐴥𐴔 𐴒𐴡𐴙𐴅𐴧𐴞𐴥𐴓𐴢 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝𐴃𐴧𐴟 𐴕𐴞𐴎𐴡𐴌 𐴊𐴟𐴊𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴉𐴡𐴌𐴠, 𐴎𐴠𐴀𐴕𐴠 𐴇𐴞𐴥𐴀𐴕 𐴔𐴡𐴌𐴞𐴎𐴝𐴒𐴡𐴥𐴘.

²⁰”𐴇𐴠𐴥 𐴀𐴡𐴑𐴃𐴡𐴥𐴃𐴢 𐴔𐴟𐴀𐴏𐴝 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢. 𐴀𐴞𐴥𐴁𐴝 𐴁𐴞𐴐𐴞𐴤 𐴐𐴟𐴥𐴕𐴊𐴡𐴌 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴃𐴞𐴕 𐴔𐴝𐴐𐴢 𐴉𐴡𐴙𐴅𐴧𐴡𐴕𐴃𐴡 𐴁𐴝𐴉𐴡𐴌 𐴒𐴡𐴥𐴌𐴡𐴃𐴢 𐴉𐴝𐴓𐴝 𐴒𐴞𐴀𐴓𐴢.²¹𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴎𐴠𐴃𐴧𐴡𐴥𐴃𐴢 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠, 𐴉𐴠𐴥𐴌𐴟𐴖𐴝𐴕𐴡𐴌 𐴎𐴞𐴥𐴀𐴘𐴠 𐴀𐴞𐴥𐴁𐴝𐴌𐴠 𐴓𐴡𐴘𐴎𐴝𐴘 𐴕𐴞𐴎𐴡𐴌 𐴉𐴟𐴖𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴉𐴝𐴙𐴓𐴧𐴞𐴥𐴓𐴢.²²𐴔𐴟𐴀𐴏𐴝𐴘𐴠 𐴀𐴞𐴅𐴞𐴤𐴂𐴞 𐴀𐴡𐴥𐴑𐴧𐴡𐴓𐴡𐴌 𐴃𐴝𐴔𐴝𐴥𐴔 𐴐𐴞𐴥𐴑𐴧𐴝𐴌 𐴀𐴠𐴓𐴡𐴥𐴔 𐴉𐴝𐴘𐴧𐴠𐴥, 𐴀𐴝𐴦𐴌 𐴀𐴞𐴥𐴁𐴝 𐴈𐴡𐴃𐴝𐴤𐴃𐴢 𐴀𐴠𐴊𐴧𐴠 𐴈𐴝𐴔𐴡𐴃𐴢 𐴃𐴝𐴦𐴑𐴡𐴃𐴖𐴝𐴓𐴝 𐴀𐴝𐴐𐴧𐴞𐴥𐴓𐴢.

²³”𐴁𐴝𐴦𐴊𐴠 𐴔𐴟𐴀𐴏𐴝 𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴀𐴡𐴥𐴘𐴧𐴠 𐴌𐴝𐴥𐴌, 𐴕𐴞𐴎𐴡𐴌 𐴑𐴡𐴗𐴔 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴇𐴝𐴥𐴓𐴡𐴃𐴢 𐴏𐴝𐴘𐴃𐴡𐴥 𐴎𐴝𐴘𐴃𐴡 𐴊𐴠𐴔𐴝𐴑𐴡𐴃𐴢 𐴀𐴝𐴙𐴐𐴧𐴠𐴥.²⁴𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴀𐴠𐴎𐴧𐴡𐴕 𐴀𐴞𐴅𐴞𐴤𐴂𐴞 𐴔𐴝𐴙𐴕𐴐𐴠𐴥 𐴀𐴠𐴒𐴧𐴗𐴝𐴤 𐴀𐴞𐴏𐴌𐴝𐴥𐴙𐴓𐴞𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴒𐴡𐴌𐴠𐴥𐴌. 𐴃𐴡𐴥𐴘 𐴀𐴞𐴥𐴁𐴝 𐴎𐴝𐴘𐴧𐴡𐴌𐴠 𐴀𐴞𐴏𐴌𐴝𐴥𐴙𐴓𐴞 𐴖𐴝𐴌𐴠 𐴁𐴝𐴏𐴝𐴘 𐴀𐴞𐴅𐴞𐴤𐴂𐴡𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴊𐴡𐴓𐴝 𐴓𐴡𐴘𐴧𐴠𐴥.²⁵𐴔𐴟𐴀𐴏𐴝𐴘𐴠 𐴁𐴝𐴥𐴙𐴂𐴧𐴞𐴓𐴢 𐴊𐴠, 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴌𐴠𐴇𐴝𐴥𐴘 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴁𐴝𐴌𐴠 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴌 𐴑𐴡𐴗𐴔𐴞 𐴁𐴝𐴥𐴘𐴧𐴝𐴙𐴕 𐴊𐴠 𐴁𐴟𐴎𐴞𐴥𐴁𐴡, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴕𐴡𐴥 𐴁𐴟𐴎𐴠𐴥.²⁶𐴃𐴝𐴌𐴉𐴡𐴌 𐴊𐴞𐴕 𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴊𐴟𐴘 𐴎𐴡𐴕 𐴀𐴞𐴏𐴌𐴝𐴥𐴙𐴓𐴞𐴘𐴠 𐴔𐴝𐴌𐴝𐴔𐴝𐴌𐴞 𐴊𐴠𐴌. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴁𐴡𐴕𐴝𐴘𐴊𐴞𐴁𐴝𐴌 𐴑𐴟𐴐𐴞𐴥𐴐𐴠 𐴈𐴡𐴀𐴌 𐴊𐴠, ’𐴀𐴠𐴑𐴞𐴤, 𐴃𐴟𐴣𐴀𐴝𐴥𐴌𐴝 𐴃𐴡 𐴁𐴝𐴥𐴘 𐴁𐴝𐴥𐴘, 𐴃𐴟𐴣𐴀𐴝𐴥𐴌𐴝 𐴑𐴞𐴘𐴝𐴥 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴔𐴝𐴌𐴝𐴔𐴝𐴌𐴞 𐴊𐴡𐴌؟‘

²⁷”𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴡𐴙𐴕𐴧𐴡 𐴖𐴝𐴌𐴠 𐴎𐴟𐴓𐴟𐴥𐴔 𐴒𐴡𐴌𐴠𐴥𐴌, 𐴘𐴡𐴥𐴒𐴧𐴗𐴝𐴘𐴠 𐴔𐴟𐴀𐴏𐴝𐴌𐴠 𐴋𐴠𐴥𐴙𐴑𐴧𐴝 𐴔𐴝𐴌𐴞 𐴈𐴡𐴀𐴌 𐴊𐴠, ’𐴃𐴡𐴌𐴠𐴥 𐴇𐴡𐴕𐴠 𐴀𐴝𐴣𐴀𐴌𐴝𐴌 𐴇𐴝𐴥𐴑𐴞𐴔 𐴀𐴠𐴊𐴧𐴠 𐴁𐴞𐴏𐴝𐴌𐴇𐴝𐴌 𐴁𐴝𐴕𐴝𐴘𐴧𐴠𐴥؟‘²⁸’𐴃𐴟𐴘 𐴑𐴞 𐴀𐴝𐴣𐴀𐴌𐴠𐴥 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝𐴘𐴁𐴞 𐴎𐴠𐴕𐴊𐴞𐴓𐴧𐴝 𐴒𐴠𐴓𐴢 𐴊𐴠 𐴇𐴝𐴙𐴓𐴧𐴝 𐴀𐴠𐴎𐴧𐴡𐴕 𐴀𐴞𐴅𐴞𐴤𐴂𐴞𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴡𐴏؟‘ ²⁹𐴇𐴞𐴥𐴘𐴝𐴕 𐴉𐴟𐴥𐴕𐴞 𐴔𐴟𐴀𐴏𐴝 𐴊𐴝𐴥𐴘𐴒𐴞𐴘𐴠𐴒𐴡𐴘, 𐴀𐴝𐴦𐴌 𐴔𐴞𐴀𐴊𐴞𐴘𐴝𐴕 𐴔𐴟𐴓𐴧𐴟𐴑𐴡𐴃𐴢 𐴀𐴠𐴎𐴧𐴡𐴕 𐴁𐴞𐴊𐴠𐴐𐴡𐴥𐴙𐴃𐴧𐴝 𐴀𐴞𐴥𐴏𐴝𐴉𐴠 𐴃𐴝𐴥𐴙𐴑𐴧𐴞𐴓𐴢. 𐴇𐴠𐴥𐴍𐴠 𐴀𐴞𐴥𐴁𐴝𐴃𐴧𐴟 𐴊𐴟𐴖𐴝𐴥 𐴉𐴟𐴖𐴝 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢.

³⁰”𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴒𐴟𐴎𐴡𐴌𐴞 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴑𐴟𐴀𐴃𐴡𐴌 𐴉𐴝𐴀𐴌𐴡𐴌 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴀𐴠𐴒𐴧𐴗𐴝𐴤 𐴎𐴡𐴓𐴠𐴌 𐴊𐴠 𐴀𐴡𐴦𐴙𐴕𐴡𐴌 𐴎𐴝𐴥𐴋𐴧𐴗𐴝𐴃𐴢 𐴔𐴟𐴀𐴏𐴝𐴌𐴠 𐴊𐴝𐴈𐴝𐴤𐴊𐴞𐴘𐴠.³¹𐴇𐴞𐴥𐴘𐴝𐴕 𐴊𐴠𐴑𐴞𐴥 𐴔𐴟𐴀𐴏𐴝 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴓𐴒𐴡𐴘, 𐴀𐴝𐴦𐴌 𐴐𐴟𐴥𐴕𐴊𐴡𐴌𐴒𐴡𐴌𐴞 𐴏𐴝𐴘 𐴁𐴡𐴓𐴧𐴝 𐴀𐴝𐴌𐴡𐴤 𐴋𐴝𐴥𐴑𐴠 𐴒𐴞𐴦𐴘𐴠𐴥 𐴌𐴝𐴥𐴌, 𐴔𐴝𐴁𐴟𐴊𐴠 𐴀𐴠𐴀𐴕 𐴈𐴡𐴀𐴌 𐴊𐴠 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴠,³²’𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴃𐴡𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝, 𐴘𐴝𐴥𐴕𐴞 𐴀𐴞𐴁𐴌𐴝𐴇𐴞𐴥𐴔 𐴀𐴡𐴌, 𐴀𐴞𐴏𐴝𐴈𐴝𐴥𐴑𐴡𐴌 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴀𐴝𐴓𐴧𐴝.‘ 𐴇𐴠𐴥𐴃𐴟𐴕𐴡𐴃𐴢 𐴔𐴟𐴀𐴏𐴝 𐴋𐴡𐴦𐴌𐴠 𐴇𐴝𐴉𐴝𐴃𐴢 𐴊𐴡𐴥𐴙𐴅𐴧𐴞𐴓𐴢 𐴀𐴝𐴦𐴌 𐴏𐴝𐴘𐴁𐴝𐴥𐴌 𐴇𐴞𐴥𐴔𐴧𐴡𐴃𐴢 𐴕𐴡𐴥 𐴒𐴡𐴌𐴠𐴥.

³³”𐴔𐴝𐴁𐴟𐴊𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ’𐴃𐴡𐴌 𐴄𐴠𐴥𐴚𐴡𐴌 𐴐𐴠𐴕𐴄𐴝𐴥𐴌 𐴑𐴟𐴥𐴓𐴞𐴉𐴠𐴓𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴘 𐴎𐴠 𐴎𐴝𐴒𐴝𐴃𐴢 𐴃𐴞𐴥𐴘𐴝𐴘𐴧𐴡𐴏𐴢 𐴇𐴞𐴥𐴘𐴝𐴕 𐴂𐴝𐴑 𐴎𐴝𐴒𐴝.³⁴𐴁𐴠𐴐𐴡𐴥𐴑, 𐴀𐴝𐴀𐴛 𐴀𐴝𐴣𐴀𐴌 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴀𐴞𐴅𐴞𐴤𐴂𐴡𐴃𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴎𐴠 𐴎𐴟𐴓𐴟𐴥𐴔 𐴀𐴡𐴥𐴑𐴧𐴡𐴓𐴢 𐴀𐴡𐴥𐴌 𐴇𐴞𐴥𐴀𐴕 𐴊𐴠𐴙𐴑𐴧𐴞𐴥. 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴊𐴟𐴑𐴧𐴡𐴥𐴌 𐴈𐴝𐴣𐴊𐴝𐴕𐴞 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝𐴌𐴠 𐴁𐴝𐴏𐴝𐴘𐴓𐴡𐴘𐴁𐴡𐴓𐴧𐴝 𐴕𐴞𐴏𐴠 𐴀𐴝𐴙𐴐𐴧𐴞𐴤 𐴊𐴠. 𐴘𐴝𐴓𐴝 𐴀𐴝𐴘, 𐴀𐴝𐴀𐴛 𐴃𐴡𐴌𐴠𐴥 𐴀𐴞𐴅𐴞𐴤𐴂𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴟𐴔.‘

³⁵”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴡 𐴔𐴟𐴀𐴏𐴝, 𐴎𐴞𐴁𐴝𐴤𐴌𐴠 𐴀𐴞𐴥𐴃𐴝𐴌𐴝 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴕𐴑𐴝𐴌 𐴒𐴡𐴌𐴞𐴥𐴊𐴞𐴓𐴢, ’𐴃𐴡𐴌𐴠𐴥 𐴇𐴡𐴕𐴠 𐴇𐴝𐴥𐴑𐴞𐴔 𐴀𐴠𐴊𐴧𐴠 𐴁𐴞𐴏𐴝𐴌𐴇𐴝𐴌 𐴁𐴝𐴕𐴝𐴘𐴧𐴠𐴥؟‘ 𐴎𐴠 𐴉𐴞𐴥𐴌𐴞𐴏𐴃𐴝𐴘𐴠 𐴎𐴡𐴓𐴠𐴌 𐴊𐴠 𐴎𐴝𐴥𐴋𐴧𐴗𐴝𐴃𐴢 𐴔𐴟𐴀𐴏𐴝𐴌𐴠 𐴊𐴝𐴈𐴝𐴤 𐴊𐴞𐴥𐴓𐴢 𐴇𐴠𐴥 𐴉𐴞𐴥𐴌𐴞𐴏𐴃𐴝𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝 𐴕𐴞𐴎𐴠 𐴀𐴞𐴥𐴁𐴝𐴌𐴠 𐴇𐴝𐴥𐴑𐴞𐴔 𐴀𐴠𐴊𐴧𐴠 𐴌𐴠𐴇𐴝𐴥𐴘-𐴒𐴡𐴌𐴡𐴤𐴘𐴝 𐴁𐴝𐴕𐴝𐴘 𐴊𐴞𐴉𐴠𐴍𐴝𐴥𐴘𐴧𐴠.³⁶𐴀𐴞𐴥𐴁𐴝𐴘𐴠 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴅𐴞𐴤𐴂𐴡𐴃𐴧𐴟 𐴕𐴠𐴦𐴓𐴝𐴘 𐴀𐴝𐴙𐴕𐴧𐴞𐴤𐴓𐴢, 𐴀𐴝𐴦𐴌 𐴀𐴞𐴅𐴞𐴤𐴂𐴢 𐴀𐴡𐴃𐴢, 𐴕𐴞𐴓𐴢 𐴊𐴡𐴌𐴞𐴘𐴝𐴃𐴢, 𐴀𐴠𐴊𐴧𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴉𐴝𐴥𐴕 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴧𐴠.

³⁷”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴡 𐴔𐴟𐴀𐴏𐴝, 𐴎𐴞𐴁𐴝𐴤𐴘𐴠 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴙𐴓𐴢 𐴊𐴠, ’𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴁𐴟𐴥𐴃𐴡𐴃𐴧𐴟 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴀𐴠𐴥𐴎𐴧𐴡𐴕 𐴕𐴡𐴁𐴞 𐴃𐴟𐴓𐴞𐴤𐴁𐴡.‘ ³⁸𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴞𐴁𐴝𐴤 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴝𐴣𐴀𐴌𐴝𐴌 𐴑𐴡𐴗𐴔 𐴎𐴡𐴔𐴝 𐴀𐴡𐴥𐴀𐴙𐴓𐴢 𐴊𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢; 𐴇𐴠𐴥𐴍𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴞𐴥𐴁𐴝 𐴓𐴧𐴡𐴥𐴘 𐴑𐴟𐴀𐴃𐴡𐴌 𐴉𐴝𐴀𐴌𐴡𐴌 𐴖𐴡𐴌𐴠 𐴈𐴡𐴃𐴝𐴤 𐴈𐴡𐴀𐴙𐴓𐴢 𐴊𐴠 𐴉𐴞𐴥𐴌𐴞𐴏𐴃𐴝 𐴖𐴝 𐴘𐴡𐴥 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴉𐴡𐴀𐴣𐴏𐴝𐴘 𐴁𐴡𐴓𐴧𐴝 𐴀𐴞𐴥𐴁𐴝𐴘𐴠 𐴎𐴞𐴕𐴊𐴝 𐴑𐴝𐴓𐴝𐴔 𐴉𐴝𐴀𐴙𐴓𐴢.

³⁹”𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴔𐴝𐴙𐴕𐴃𐴡 𐴕𐴡𐴥 𐴏𐴝𐴀, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴅𐴞𐴤𐴂𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘 𐴁𐴡𐴓𐴧𐴝 𐴊𐴞𐴓𐴠-𐴊𐴞𐴓𐴠 𐴔𐴡𐴕 𐴒𐴡𐴌𐴞𐴥,⁴⁰𐴀𐴝𐴌𐴡𐴕𐴡𐴌𐴠 𐴈𐴡𐴀𐴙𐴓𐴢 𐴊𐴠, ’𐴀𐴝𐴣𐴀𐴌𐴝𐴌 𐴀𐴝𐴒𐴠-𐴀𐴝𐴒𐴠 𐴎𐴝𐴘 𐴁𐴡𐴓𐴧𐴝 𐴀𐴝𐴣𐴀𐴌𐴝𐴓𐴧𐴝 𐴊𐴠𐴁𐴡𐴃𐴝 𐴀𐴡𐴥𐴑𐴧𐴡𐴓𐴢 𐴁𐴝𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌𐴠 𐴀𐴞𐴅𐴞𐴤𐴂𐴢 𐴊𐴠𐴐𐴡𐴃𐴧𐴟 𐴕𐴠𐴦𐴓𐴝𐴘 𐴀𐴝𐴙𐴕𐴧𐴠𐴤 𐴊𐴠 𐴔𐴟𐴀𐴏𐴝𐴌 𐴇𐴝𐴥𐴓𐴡𐴃𐴢 𐴑𐴞𐴦 𐴀𐴡𐴥𐴘𐴒𐴞𐴘𐴡𐴘 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞.‘ ⁴¹𐴃𐴡𐴥𐴘 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴒𐴡𐴌𐴟𐴌-𐴏𐴡𐴥𐴀𐴌 𐴋𐴡𐴥𐴙𐴓𐴧𐴝 𐴀𐴠𐴒𐴧𐴗𐴝𐴤 𐴔𐴟𐴃𐴧𐴞 𐴁𐴝𐴕𐴝𐴘 𐴘𐴞𐴥𐴁𐴝𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴏𐴞𐴎𐴡𐴌 𐴖𐴡𐴌𐴠 𐴑𐴟𐴥𐴐𐴞-𐴀𐴝𐴥𐴐𐴞 𐴒𐴡𐴙𐴅𐴧𐴠𐴥.⁴²𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴔𐴟𐴑 𐴉𐴞𐴥𐴌𐴝𐴘𐴉𐴠𐴓𐴝𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴀𐴝𐴏𐴔𐴝𐴕𐴡𐴌 𐴃𐴝𐴌𐴝 𐴀𐴡𐴥𐴑𐴧𐴡𐴓𐴢 𐴉𐴟𐴣𐴎𐴞𐴃𐴡𐴥 𐴀𐴠𐴌𐴞𐴊𐴞𐴉𐴠𐴥𐴓𐴝𐴘𐴧𐴠, 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴢 𐴎𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤,’𐴀𐴡𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡𐴀𐴝𐴣𐴀𐴌 𐴇𐴝𐴣𐴏𐴠 𐴅𐴝𐴕𐴟𐴖𐴝𐴌 𐴑𐴟𐴌𐴁𐴝𐴕𐴞 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴙𐴅𐴧𐴞𐴥𐴓𐴝 𐴕𐴞𐴥𐴑𐴞؟⁴³𐴃𐴟𐴣𐴀𐴝𐴥𐴌𐴝 𐴃𐴡 𐴔𐴡𐴓𐴠𐴑 𐴊𐴠𐴁𐴡𐴃𐴝𐴌 𐴄𐴝𐴔𐴁𐴟𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴌𐴞𐴉𐴝𐴕 𐴊𐴠𐴁𐴡𐴃𐴝𐴌 𐴏𐴡𐴥𐴁𐴞 𐴀𐴠𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴓𐴡𐴘𐴎𐴝𐴘𐴃𐴝𐴥,𐴎𐴞𐴀𐴕 𐴃𐴟𐴣𐴀𐴝𐴥𐴌𐴝 𐴉𐴟𐴣𐴎𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴝𐴕𐴝𐴀𐴘𐴓𐴝.𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴁𐴞𐴓𐴡𐴕𐴡𐴌 𐴀𐴡𐴑𐴟𐴓𐴡𐴌 𐴎𐴝𐴒𐴝𐴃𐴢 𐴁𐴡𐴕𐴊𐴞𐴃𐴢 𐴊𐴞𐴉𐴠𐴍𐴝𐴥𐴘𐴧𐴟𐴔.‘

⁴⁴”𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴓𐴧𐴝𐴌 𐴇𐴝𐴥𐴎𐴞𐴌𐴞𐴌 𐴄𐴝𐴔𐴁𐴟 𐴀𐴝𐴐𐴧𐴞𐴥𐴓𐴢; 𐴇𐴞𐴥𐴘𐴝𐴕𐴡𐴌𐴠 𐴀𐴟𐴕𐴊𐴞𐴓𐴧𐴝 𐴕𐴡𐴔𐴟𐴕𐴝 𐴔𐴡𐴎𐴞𐴕 𐴁𐴝𐴕𐴝 𐴒𐴞𐴀𐴓𐴢, 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴁𐴝𐴕𐴝𐴘 𐴁𐴡𐴓𐴧𐴝 𐴀𐴝𐴓𐴧𐴝𐴘𐴠 𐴔𐴟𐴀𐴏𐴝𐴌𐴠 𐴊𐴝𐴈𐴝𐴤𐴘𐴊𐴞 𐴇𐴡𐴥𐴑𐴟𐴔 𐴒𐴡𐴙𐴅𐴧𐴞𐴥𐴓𐴢.⁴⁵𐴄𐴝𐴔𐴁𐴟 𐴇𐴞𐴥𐴘𐴝𐴕 𐴉𐴝𐴘 𐴁𐴝𐴦𐴊𐴠, 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴘𐴠𐴈𐴡𐴥𐴐𐴟𐴖𐴝𐴌 𐴏𐴡𐴥𐴊𐴧𐴝𐴌𐴞𐴌 𐴃𐴡𐴓𐴠 𐴃𐴝𐴥𐴑𐴞𐴃𐴠 𐴇𐴞𐴥𐴘𐴝𐴕𐴡𐴌𐴠 𐴕𐴞𐴎𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴣𐴀𐴌𐴝𐴌 𐴀𐴠 𐴔𐴟𐴓𐴧𐴟𐴑𐴡𐴃𐴢 𐴀𐴝𐴙𐴕𐴧𐴞𐴤𐴓𐴢. 𐴇𐴠𐴥𐴣𐴃𐴧𐴠 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌 𐴔𐴟𐴀𐴕𐴃𐴟 𐴀𐴡𐴙𐴕𐴧𐴡 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌𐴠 𐴕𐴠𐴦𐴓𐴝𐴘 𐴊𐴞𐴀𐴓𐴢. 𐴇𐴞𐴥𐴘𐴝𐴕 𐴊𐴝𐴖𐴟𐴊𐴡𐴌 𐴎𐴡𐴁𐴝𐴕𐴝 𐴉𐴡𐴙𐴅𐴧𐴡𐴕𐴃𐴡 𐴀𐴠 𐴔𐴟𐴓𐴧𐴟𐴑𐴡𐴃𐴢 𐴀𐴝𐴐𐴧𐴞𐴥𐴓𐴢.⁴⁶𐴊𐴝𐴖𐴟𐴊𐴠 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴢 𐴉𐴝𐴘𐴧𐴡𐴌𐴠 𐴘𐴝𐴑𐴟𐴁𐴡𐴌 𐴀𐴝𐴓𐴧𐴝 𐴃𐴝𐴥𐴑𐴞 𐴁𐴡𐴓𐴧𐴝 𐴀𐴠𐴥𐴑𐴧𐴝𐴕 𐴎𐴝𐴒𐴝 𐴁𐴝𐴕𐴝𐴘𐴁𐴝𐴥𐴌 𐴀𐴠𐴎𐴝𐴎𐴡𐴃𐴢 𐴔𐴝𐴙𐴒𐴧𐴞𐴥𐴓𐴢.⁴⁷𐴔𐴡𐴕𐴃𐴡𐴌 𐴀𐴞𐴥𐴁𐴝𐴓𐴧𐴝 𐴒𐴡𐴥𐴌 𐴏𐴡𐴥𐴓𐴡𐴔𐴝𐴕𐴠 𐴀𐴠𐴥𐴕𐴝 𐴁𐴝𐴕𐴝𐴘𐴧𐴠𐴥.

⁴⁸”𐴇𐴝𐴥𐴓𐴠𐴑𐴠, 𐴀𐴝𐴓𐴧𐴝 𐴃𐴝𐴥𐴓𐴝 𐴀𐴞𐴕𐴏𐴝𐴥𐴕𐴡𐴌 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴒𐴡𐴥𐴌𐴡𐴃𐴢 𐴕𐴡 𐴃𐴝𐴥𐴑𐴠. 𐴕𐴡𐴁𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌,⁴⁹𐴔𐴝𐴁𐴟𐴊𐴠 𐴉𐴡𐴥𐴌𐴔𐴝𐴌 𐴊𐴠,’𐴀𐴝𐴏𐴔𐴝𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴃𐴡𐴑𐴃𐴡𐴥,𐴀𐴝𐴦𐴌 𐴎𐴡𐴁𐴞𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴉𐴡𐴦 𐴌𐴝𐴑𐴞𐴥𐴁𐴝𐴌 𐴁𐴝𐴚𐴒𐴟𐴥.𐴃𐴟𐴘 𐴀𐴝𐴣𐴀𐴌 𐴓𐴧𐴝 𐴇𐴡𐴕 𐴑𐴞𐴏𐴞𐴥𐴔𐴡𐴌 𐴒𐴡𐴥𐴌 𐴁𐴝𐴕𐴝𐴘𐴁𐴞𐴥؟𐴀𐴝𐴀𐴛 𐴀𐴝𐴌𐴝𐴔 𐴒𐴡𐴌𐴞𐴥𐴁𐴝𐴌 𐴎𐴝𐴒𐴝 𐴇𐴡𐴍𐴠𐴥 𐴀𐴡𐴥𐴘𐴁𐴡؟⁵⁰𐴀𐴞𐴀𐴕 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌 𐴕𐴞𐴎𐴡𐴌 𐴀𐴝𐴥𐴃𐴠 𐴁𐴝𐴕𐴝𐴘𐴧𐴞𐴥 𐴊𐴠 𐴕𐴡 𐴕𐴠𐴥؟‘

⁵¹”𐴀𐴡𐴥 𐴀𐴟𐴎𐴧𐴡𐴃𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢! 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴀𐴠𐴊𐴧𐴠 𐴈𐴝𐴕 𐴃𐴡 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌 𐴇𐴞𐴥𐴀𐴕𐴡𐴌 𐴋𐴡𐴥𐴙𐴓𐴧𐴝. 𐴃𐴟𐴣𐴀𐴝𐴥𐴌𐴝 𐴇𐴝𐴥𐴔𐴞𐴐𐴝 𐴂𐴝𐴑-𐴌𐴟𐴀𐴌𐴠 𐴀𐴡𐴀𐴣𐴓𐴞 𐴌𐴝𐴑𐴡𐴥, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴒𐴡𐴙𐴃𐴧𐴡𐴥.⁵²𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴇𐴡𐴕 𐴕𐴡𐴁𐴞 𐴖𐴝𐴌𐴠 𐴎𐴟𐴓𐴟𐴥𐴔 𐴕𐴡𐴥 𐴒𐴡𐴌𐴠𐴥 𐴊𐴠 𐴀𐴝𐴏𐴠𐴤؟ 𐴀𐴞𐴥𐴃𐴝𐴌𐴝 𐴃𐴡 𐴀𐴟𐴘𐴃𐴝𐴌𐴝𐴤𐴌𐴠 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝𐴙𐴓𐴢 𐴎𐴠𐴃𐴝𐴌𐴝𐴤 𐴀𐴞𐴕𐴏𐴝𐴥𐴉𐴖𐴝𐴓𐴝 𐴖𐴝 𐴀𐴝𐴘𐴁𐴝𐴤𐴌 𐴀𐴝𐴒𐴟𐴕 𐴈𐴡𐴃𐴝𐴤 𐴈𐴡𐴀𐴙𐴓𐴢. 𐴀𐴝𐴦𐴌 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴞 𐴔𐴝𐴌𐴞𐴉𐴠𐴥𐴓𐴝𐴘𐴧𐴡.⁵³𐴃𐴟𐴣𐴀𐴝𐴥𐴌𐴝 𐴃𐴡 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴝 𐴊𐴞𐴦𐴘𐴝 𐴐𐴡𐴥𐴌𐴞𐴘𐴡𐴃𐴢 𐴉𐴝𐴀𐴘𐴓𐴝, 𐴔𐴡𐴕𐴃𐴡𐴌 𐴃𐴡𐴀 𐴇𐴞𐴥𐴀𐴕 𐴀𐴝𐴔𐴡𐴥𐴓𐴢 𐴕𐴡𐴥 𐴒𐴡𐴌𐴡𐴤.“

𐴀𐴠𐴏𐴄𐴞𐴥𐴉𐴠𐴕𐴡𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴙𐴅𐴧𐴠𐴥

⁵⁴𐴇𐴞𐴥𐴀𐴕 𐴉𐴟𐴥𐴕𐴞 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴠𐴔𐴁𐴡𐴥𐴌 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴌𐴝𐴑 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴀𐴟𐴓𐴋𐴝 𐴊𐴝𐴃𐴠-𐴊𐴝𐴃𐴢 𐴑𐴞𐴌𐴑𐴞𐴌𐴝𐴃𐴢 𐴊𐴡𐴙𐴅𐴧𐴠.⁵⁵𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴘𐴧𐴡𐴌𐴠 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴘𐴧𐴠𐴥 𐴌𐴝𐴥𐴌 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴊𐴠𐴙𐴑𐴧𐴠𐴥. 𐴀𐴝𐴌𐴡𐴤 𐴊𐴠𐴙𐴑𐴧𐴠𐴥 𐴊𐴠, 𐴀𐴞𐴏𐴝𐴤 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴃𐴞𐴥𐴘𐴝𐴘𐴧𐴝 𐴀𐴝𐴏𐴠𐴤.⁵⁶𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴝𐴀𐴛 𐴊𐴠𐴑𐴞𐴥𐴌 𐴊𐴠, 𐴀𐴝𐴏𐴔𐴝𐴕 𐴑𐴟𐴥𐴓𐴝 𐴀𐴝𐴦𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴃𐴞𐴥𐴘𐴝𐴘𐴧𐴝 𐴀𐴝𐴏𐴠𐴤.“

⁵⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴈𐴝𐴕 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴀𐴝𐴦𐴌 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴒𐴟𐴎𐴡𐴌𐴝𐴕 𐴔𐴝𐴌𐴞 𐴁𐴠𐴒𐴧𐴟𐴥𐴕𐴠 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴎𐴝𐴥𐴂𐴢 𐴔𐴝𐴙𐴅𐴧𐴠.⁵⁸𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴐𐴡𐴥𐴀𐴌𐴡𐴌 𐴁𐴝𐴀𐴌𐴠 𐴓𐴡𐴘𐴎𐴝𐴘 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴝𐴃𐴢 𐴊𐴡𐴙𐴅𐴧𐴠; 𐴀𐴝𐴦𐴌 𐴒𐴡𐴁𐴝𐴤 𐴒𐴟𐴥𐴕𐴠 𐴕𐴞𐴎𐴡𐴌 𐴇𐴡𐴦𐴌𐴏𐴟𐴖𐴡𐴌 𐴑𐴟𐴥𐴓𐴞𐴉𐴠𐴓𐴝𐴘 𐴏𐴝𐴥𐴀𐴟𐴓𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴅𐴟𐴖𐴝𐴕 𐴔𐴝𐴕𐴟𐴥𐴙𐴐𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴌𐴝𐴙𐴑𐴧𐴠𐴥.⁵⁹𐴀𐴞𐴥𐴃𐴝𐴌𐴝 𐴀𐴠𐴏𐴄𐴞𐴥𐴉𐴠𐴕𐴡𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴘𐴡𐴥𐴒𐴧𐴗𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴊𐴟𐴖𐴝 𐴒𐴡𐴌𐴠𐴥𐴌, ”𐴀𐴡𐴥 𐴔𐴝𐴓𐴞𐴑 𐴀𐴞𐴏𐴝𐴤, 𐴀𐴝𐴣𐴀𐴌 𐴌𐴟𐴀𐴌𐴠 𐴑𐴡𐴁𐴟𐴓𐴢 𐴒𐴡𐴌𐴡𐴤.“⁶⁰𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴍𐴟𐴥 𐴉𐴠𐴥𐴓𐴝𐴘 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴀𐴞𐴃𐴝𐴌𐴝𐴤𐴌 𐴀𐴠 𐴒𐴟𐴕𐴝𐴤 𐴕𐴡 𐴊𐴡𐴥𐴙𐴅𐴧𐴡.“ 𐴇𐴞𐴥𐴘𐴝𐴕 𐴈𐴡𐴀𐴘𐴢 𐴘𐴡𐴥𐴒𐴧𐴗𐴝 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴙𐴅𐴧𐴠𐴥.

The Word for the World International

https://app.library.bible/content/87faca8b51c22590