Read 𐴈𐴝𐴔𐴡𐴥𐴓𐴢 6

𐴈𐴝𐴔𐴡𐴥𐴓𐴢6

𐴇𐴝𐴥𐴣𐴃𐴢 𐴎𐴡𐴕 𐴔𐴡𐴊𐴡𐴃𐴒𐴝𐴥𐴌 𐴁𐴝𐴏𐴞𐴥𐴓𐴡𐴘𐴧𐴠

¹𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴎𐴠𐴣𐴃𐴧𐴠𐴥 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴡𐴥𐴌, 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴎𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴒𐴞𐴌𐴞𐴥𐴑 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴀𐴞𐴥𐴃𐴝𐴌𐴝 𐴇𐴞𐴁𐴌𐴟𐴤 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴊𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝 𐴐𐴠𐴥𐴑𐴝𐴘𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴡𐴃𐴧𐴞𐴥 𐴊𐴞𐴕 𐴈𐴝𐴥𐴕𐴝 𐴁𐴝𐴍𐴞𐴊𐴞𐴁𐴝𐴐𐴧𐴡𐴥𐴃𐴢 𐴀𐴞𐴥𐴃𐴝𐴌𐴝𐴌 𐴌𐴝𐴌𐴞 𐴀𐴡𐴥𐴑𐴧𐴡𐴓𐴠 𐴕𐴡 𐴉𐴝𐴘𐴃𐴡.²𐴃𐴡𐴥𐴘 𐴁𐴝𐴌𐴡𐴥 𐴎𐴡𐴕 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴌 𐴈𐴝𐴔 𐴁𐴝𐴊𐴢 𐴊𐴞 𐴈𐴝𐴥𐴕𐴝 𐴁𐴝𐴍𐴞𐴊𐴞𐴘𐴝𐴃𐴢 𐴓𐴝𐴒𐴞 𐴃𐴝𐴥𐴑𐴡𐴕 𐴀𐴝𐴣𐴀𐴌𐴝𐴓𐴧𐴝 𐴄𐴞𐴥𐴑 𐴕𐴡.³𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴝𐴥𐴣𐴃𐴢 𐴎𐴡𐴕 𐴀𐴞𐴎𐴧𐴡𐴃𐴊𐴝𐴥𐴌 𐴔𐴝𐴕𐴟𐴥𐴙𐴐𐴢 𐴁𐴝𐴏𐴡𐴥, 𐴎𐴠𐴃𐴝𐴌𐴝𐴤 𐴂𐴝𐴑-𐴌𐴟𐴀 𐴓𐴡𐴥𐴘 𐴀𐴠𐴊𐴧𐴠 𐴁𐴟𐴊𐴧𐴞𐴥 𐴓𐴡𐴥𐴘 𐴉𐴟𐴌𐴝𐴘𐴧𐴝. 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴈𐴝𐴔𐴡𐴌 𐴎𐴞𐴔𐴧𐴝 𐴒𐴝𐴥𐴕 𐴒𐴡𐴏𐴝𐴥𐴘𐴊𐴞𐴘𐴟𐴔,⁴𐴀𐴝𐴦𐴌 𐴀𐴝𐴣𐴀𐴌𐴝 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴓𐴝𐴒𐴞 𐴃𐴝𐴥𐴑𐴞𐴘𐴟𐴔.“

⁵𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴇𐴠𐴥 𐴈𐴡𐴃𐴝𐴤𐴃𐴢 𐴌𐴝𐴎𐴞 𐴀𐴡𐴥𐴘𐴧𐴠. 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴠𐴏𐴄𐴞𐴥𐴉𐴠𐴕𐴡𐴌𐴠 𐴁𐴝𐴏𐴞𐴥𐴓𐴡𐴘𐴧𐴠, 𐴎𐴞𐴁𐴝𐴤 𐴀𐴞𐴔𐴝𐴕𐴠 𐴀𐴠𐴊𐴧𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝, 𐴀𐴝𐴌𐴡𐴤 𐴉𐴞𐴓𐴞𐴥𐴂𐴢 𐴀𐴡𐴌𐴠, 𐴂𐴡𐴌𐴡𐴑𐴡𐴥𐴌𐴝𐴏𐴢 𐴀𐴡𐴌𐴠, 𐴕𐴞𐴑𐴝𐴥𐴕𐴡 𐴀𐴡𐴌𐴠, 𐴃𐴞𐴔𐴡𐴕 𐴀𐴡𐴌𐴠, 𐴂𐴝𐴌𐴔𐴠𐴥𐴕𐴝𐴏𐴢 𐴀𐴡𐴌𐴠, 𐴀𐴠𐴊𐴧𐴠 𐴀𐴠𐴕𐴄𐴞𐴘𐴡𐴑𐴡𐴌 𐴕𐴞𐴑𐴡𐴥𐴓𐴝𐴏𐴢 𐴀𐴡𐴌𐴠. 𐴇𐴠𐴥 𐴕𐴞𐴑𐴡𐴥𐴓𐴝𐴏𐴢 𐴀𐴠𐴥𐴎𐴧𐴡𐴕 𐴁𐴠𐴘𐴡𐴇𐴟𐴥𐴊𐴞 𐴊𐴠 𐴀𐴡𐴥𐴘𐴓𐴠 𐴘𐴡 𐴘𐴡𐴇𐴟𐴥𐴊𐴞𐴌 𐴊𐴡𐴥𐴌𐴔𐴡 𐴔𐴝𐴙𐴕𐴃𐴡.⁶𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴔𐴟𐴀𐴕𐴃𐴟 𐴇𐴝𐴥𐴎𐴞𐴌 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴊𐴟𐴖𐴝 𐴒𐴡𐴌𐴞𐴥 𐴃𐴝𐴌𐴝𐴥𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥𐴘𐴠.

⁷𐴀𐴝𐴓𐴧𐴝𐴌 𐴑𐴝𐴓𐴝𐴔 𐴉𐴡𐴥𐴓𐴝𐴃𐴢 𐴀𐴝𐴐𐴧𐴞𐴥𐴓𐴢. 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴊𐴡𐴓𐴢 𐴁𐴞𐴐𐴞𐴤𐴒𐴡𐴌𐴞 𐴁𐴝𐴌𐴝𐴤𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴘𐴡𐴥 𐴁𐴡𐴀𐴗𐴃𐴢 𐴎𐴡𐴕𐴠 𐴇𐴠𐴥 𐴀𐴞𐴔𐴝𐴕 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥.

𐴀𐴠𐴏𐴄𐴞𐴥𐴉𐴠𐴕𐴡𐴌 𐴒𐴠𐴌𐴠𐴉𐴃𐴝𐴌𐴞

⁸𐴀𐴠𐴏𐴄𐴞𐴥𐴉𐴠𐴕 𐴈𐴡𐴀 𐴊𐴠 𐴘𐴡𐴥𐴒𐴧𐴗𐴝 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴠 𐴀𐴠𐴊𐴧𐴠 𐴃𐴝𐴦𐴑𐴡𐴃𐴠 𐴉𐴟𐴌𐴝𐴘𐴧𐴝 𐴀𐴝𐴙𐴐𐴧𐴞𐴤𐴓𐴢, 𐴘𐴡𐴥𐴒𐴧𐴗𐴝𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴋𐴡𐴣𐴀𐴌-𐴋𐴡𐴣𐴀𐴌 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴃𐴡.⁹𐴓𐴠𐴑𐴞𐴕 𐴀𐴠𐴑 𐴊𐴞𐴕، 𐴀𐴝𐴎𐴝𐴊𐴢-𐴉𐴝𐴘𐴧𐴝-𐴔𐴝𐴙𐴕𐴐𐴡𐴥𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴈𐴡𐴀 𐴊𐴠 𐴇𐴞𐴥𐴘𐴝𐴕𐴡𐴌 𐴇𐴡𐴦𐴎𐴧𐴡𐴕 𐴔𐴝𐴙𐴕𐴐𐴠𐴥 𐴀𐴠𐴏𐴄𐴞𐴥𐴉𐴠𐴕𐴡𐴌 𐴀𐴟𐴓𐴋𐴝 𐴀𐴡𐴥𐴘 𐴘𐴡𐴥𐴒𐴧𐴗𐴝 𐴓𐴧𐴡𐴥𐴘 𐴃𐴡𐴌𐴑𐴝𐴃𐴡𐴌𐴑𐴞 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴃𐴝𐴌𐴝 𐴀𐴝𐴐𐴧𐴞𐴥𐴓𐴢 𐴊𐴠, 𐴑𐴟𐴌𐴠𐴕𐴞𐴌, 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴞𐴘𐴝𐴌, 𐴑𐴞𐴓𐴞𐴐𐴞𐴥𐴘𐴝𐴌 𐴀𐴠𐴊𐴧𐴠 𐴀𐴠𐴐𐴞𐴥𐴘𐴝 𐴀𐴠𐴓𐴝𐴑𐴝𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢.¹⁰𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴂𐴝𐴑-𐴌𐴟𐴀𐴌 𐴊𐴞𐴦𐴘𐴝 𐴒𐴞𐴘𐴝𐴕𐴠 𐴈𐴡𐴘𐴧𐴠𐴥 𐴊𐴠 𐴈𐴡𐴃𐴝𐴤𐴌𐴠 𐴀𐴞𐴥𐴃𐴝𐴌𐴝 𐴎𐴞𐴃𐴞 𐴕𐴡𐴥 𐴉𐴝𐴌𐴠.

¹¹𐴇𐴠𐴥𐴃𐴡𐴓𐴧𐴝 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠 𐴉𐴝𐴥𐴕 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕 𐴔𐴝𐴙𐴕𐴐𐴡𐴥𐴌𐴠 𐴀𐴠𐴀𐴕 𐴇𐴡𐴘 𐴁𐴡𐴓𐴧𐴝 𐴁𐴞𐴥𐴌𐴝𐴘𐴧𐴠, 𐴑𐴞 𐴈𐴡𐴘𐴓𐴠𐴥, ”𐴀𐴝𐴣𐴀𐴌𐴝 𐴀𐴠𐴏𐴄𐴞𐴥𐴉𐴠𐴕𐴠 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴔𐴟𐴀𐴏𐴝𐴌 𐴀𐴟𐴓𐴋𐴝 𐴑𐴟𐴉𐴠𐴥𐴌𐴞 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀𐴌 𐴊𐴠 𐴉𐴟𐴥𐴙𐴕𐴧𐴞.“

¹²𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴏𐴑𐴝𐴘𐴊𐴞𐴘𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴠𐴏𐴄𐴞𐴥𐴉𐴠𐴕𐴡𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌𐴠 𐴊𐴡𐴥𐴌𐴞 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴀𐴝𐴙𐴕𐴧𐴠𐴤.¹³𐴀𐴞𐴥𐴃𐴝𐴌𐴝 𐴎𐴠𐴃𐴝𐴌𐴝𐴤𐴌𐴠 𐴔𐴞𐴏𐴝𐴥 𐴒𐴡𐴁𐴝𐴤 𐴃𐴞𐴥𐴘𐴝𐴒𐴝𐴌𐴝𐴘𐴧𐴠 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴕𐴞𐴃𐴧𐴞 𐴀𐴠 𐴂𐴝𐴑 𐴎𐴝𐴒𐴝𐴌 𐴀𐴠𐴊𐴧𐴠 𐴐𐴡𐴥𐴌𐴞𐴘𐴡𐴃𐴡𐴌 𐴇𐴠𐴥𐴓𐴝𐴉𐴢 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀.¹⁴𐴀𐴝𐴣𐴀𐴌𐴝 𐴘𐴡𐴒𐴧𐴗𐴝𐴥𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌 𐴊𐴠 𐴉𐴟𐴥𐴙𐴕𐴧𐴞, 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞𐴘𐴠 𐴀𐴠 𐴎𐴝𐴒𐴝 𐴘𐴝𐴀𐴕𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘𐴁𐴡, 𐴀𐴝𐴦𐴌 𐴔𐴟𐴀𐴏𐴝𐴘𐴠 𐴀𐴝𐴣𐴀𐴌𐴝𐴌𐴠 𐴊𐴞𐴀𐴓𐴢 𐴊𐴠 𐴌𐴡𐴏𐴡𐴥𐴔 𐴀𐴡𐴥𐴑𐴧𐴡𐴓𐴢 𐴁𐴡𐴊𐴡𐴓𐴞𐴉𐴠𐴥𐴓𐴝𐴘𐴁𐴡.“

¹⁵𐴇𐴠𐴥𐴣𐴃𐴧𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴘𐴡𐴥𐴒𐴧𐴗𐴝𐴌 𐴇𐴞𐴥𐴑𐴧𐴝 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴘𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴘𐴡𐴥𐴒𐴧𐴗𐴝𐴌 𐴏𐴞𐴘𐴝𐴥𐴌𐴝 𐴉𐴞𐴥𐴌𐴞𐴏𐴃𐴝𐴌 𐴏𐴞𐴘𐴝𐴥𐴌𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴒𐴞𐴘𐴡𐴘.

The Word for the World International

https://app.library.bible/content/87faca8b51c22590