Read 𐴈𐴝𐴔𐴡𐴥𐴓𐴢 8

𐴈𐴝𐴔𐴡𐴥𐴓𐴢8

¹𐴀𐴠𐴏𐴄𐴞𐴥𐴉𐴠𐴕𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠 𐴊𐴠 𐴇𐴞𐴥𐴘𐴝𐴕𐴡𐴃𐴢 𐴏𐴝𐴥𐴀𐴟𐴓𐴢 𐴉𐴟𐴌𐴝𐴉𐴟𐴌𐴞 𐴌𐴝𐴎𐴞 𐴀𐴝𐴐𐴧𐴞𐴥𐴓𐴢. 𐴎𐴡𐴔𐴝𐴥𐴃𐴡𐴌 𐴖𐴡𐴌𐴠 𐴏𐴝𐴥𐴀𐴟𐴓𐴡𐴌 𐴎𐴟𐴓𐴟𐴥𐴔
𐴇𐴠𐴥 𐴊𐴞𐴕، 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴎𐴡𐴔𐴝𐴥𐴃𐴡𐴌 𐴖𐴡𐴌𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴎𐴟𐴓𐴟𐴥𐴔 𐴐𐴟𐴥𐴌𐴟 𐴀𐴡𐴥𐴘𐴧𐴠, 𐴀𐴝𐴦𐴌 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴁𐴝𐴊𐴠 𐴀𐴝𐴌𐴒𐴟𐴥𐴕 𐴁𐴠𐴒𐴧𐴟𐴥𐴕 𐴘𐴡𐴇𐴟𐴥𐴊𐴞𐴘𐴝 𐴀𐴠𐴊𐴧𐴠 𐴏𐴝𐴔𐴝𐴥𐴌𐴞𐴘𐴝 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘𐴒𐴞𐴘𐴡𐴘.²𐴇𐴡𐴊𐴟𐴥𐴕 𐴊𐴞𐴕𐴊𐴝𐴥𐴌 𐴔𐴝𐴕𐴟𐴥𐴙𐴐𐴠 𐴀𐴠𐴏𐴄𐴞𐴥𐴉𐴠𐴕𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴀𐴞𐴥𐴃𐴝𐴌𐴝 𐴁𐴞𐴓𐴝𐴑 𐴒𐴡𐴌𐴞𐴥-𐴒𐴡𐴌𐴞𐴥 𐴘𐴡𐴥𐴒𐴧𐴗𐴝𐴓𐴧𐴝 𐴁𐴞𐴐𐴞𐴤 𐴇𐴝𐴙𐴕𐴊𐴠𐴤.³𐴀𐴝𐴌 𐴏𐴝𐴥𐴀𐴟𐴓𐴠 𐴎𐴡𐴔𐴝𐴥𐴃𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴝𐴥𐴌 𐴑𐴟𐴐𐴞𐴥𐴐𐴠, 𐴒𐴡𐴥𐴌𐴠-𐴒𐴡𐴥𐴌𐴠 𐴒𐴡𐴥𐴓𐴞 𐴔𐴡𐴌𐴡𐴃𐴉𐴟𐴀𐴝𐴙𐴕 𐴀𐴠𐴊𐴧𐴠 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴡𐴌𐴠 𐴄𐴝𐴕𐴞 𐴀𐴝𐴕𐴞𐴤 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠.

𐴏𐴝𐴔𐴝𐴥𐴌𐴞𐴘𐴝𐴃𐴢 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴃𐴡𐴁𐴡𐴓𐴞𐴑

⁴𐴎𐴠 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘𐴒𐴞𐴘𐴠𐴒𐴡𐴘, 𐴀𐴞𐴥𐴃𐴝𐴌𐴝 𐴎𐴝𐴒𐴝-𐴎𐴝𐴒𐴝 𐴎𐴝𐴘 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.⁵𐴀𐴝𐴦𐴌 𐴉𐴞𐴓𐴞𐴥𐴂𐴠 𐴕𐴞𐴏𐴠 𐴏𐴝𐴔𐴝𐴥𐴌𐴞𐴘𐴝𐴌 𐴀𐴠𐴑𐴧𐴝𐴥𐴕 𐴐𐴡𐴥𐴀𐴌𐴡𐴃𐴢 𐴎𐴝𐴘, 𐴔𐴝𐴙𐴕𐴐𐴡𐴥𐴌𐴠 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.⁶𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴉𐴞𐴓𐴞𐴥𐴂𐴡𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴀𐴠𐴊𐴧𐴠 𐴀𐴞𐴥𐴁𐴝𐴘𐴠 𐴊𐴝𐴈𐴝𐴤𐴘𐴃𐴡 𐴊𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴝𐴌𐴡𐴤 𐴊𐴞𐴥𐴘𐴝𐴕𐴡𐴌 𐴏𐴝𐴥𐴀𐴣𐴃𐴠 𐴉𐴟𐴥𐴙𐴕𐴃𐴡.⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴡𐴃𐴧𐴟 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴢 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴒𐴟𐴎𐴡𐴌𐴝𐴕 𐴔𐴝𐴌𐴞 𐴕𐴠𐴦𐴙𐴓𐴧𐴞𐴥𐴓𐴢, 𐴀𐴝𐴦𐴌 𐴁𐴡𐴀𐴗𐴃𐴢 𐴎𐴡𐴕 𐴔𐴝𐴎𐴟𐴌 𐴀𐴠𐴊𐴧𐴠 𐴓𐴠𐴚 𐴒𐴡𐴔 𐴀𐴡𐴥𐴀𐴙𐴓𐴢.⁸𐴇𐴠𐴥𐴃𐴡𐴓𐴧𐴝 𐴇𐴠𐴥 𐴐𐴡𐴥𐴀𐴌𐴡𐴃𐴢 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴝𐴐𐴧𐴞𐴥𐴓𐴢.

⁹𐴘𐴝𐴥𐴌 𐴀𐴝𐴒𐴠 𐴇𐴠𐴥 𐴐𐴡𐴥𐴀𐴌𐴡𐴃𐴢 𐴏𐴝𐴥𐴘𐴔𐴡𐴕 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴅𐴝𐴊𐴟 𐴊𐴝𐴈𐴝𐴤𐴘 𐴏𐴝𐴔𐴝𐴥𐴌𐴞𐴘𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴃𐴝𐴦𐴅𐴟𐴂𐴢 𐴒𐴡𐴌𐴞𐴥 𐴌𐴝𐴑𐴞𐴥𐴃𐴡, 𐴀𐴝𐴦𐴌 𐴊𐴝𐴁𐴞 𐴒𐴡𐴙𐴃𐴧𐴡𐴥 𐴊𐴠, 𐴀𐴝𐴀𐴛 𐴘𐴡𐴥 𐴀𐴠𐴥𐴎𐴧𐴡𐴕 𐴋𐴡𐴣𐴀𐴌 𐴔𐴝𐴕𐴟𐴥𐴙𐴐𐴢.¹⁰𐴒𐴡𐴌𐴞𐴁𐴢 𐴃𐴟𐴖𐴝𐴚𐴒𐴡𐴌 𐴁𐴠𐴒𐴧𐴟𐴥𐴕𐴠 𐴘𐴡𐴥𐴒𐴧𐴗𐴝𐴌 𐴈𐴡𐴃𐴝𐴤 𐴊𐴞𐴥𐴘𐴝𐴕 𐴊𐴞𐴥 𐴉𐴟𐴥𐴙𐴕𐴃𐴡 𐴀𐴝𐴦𐴌 𐴈𐴡𐴘𐴃𐴡𐴤 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴀𐴡 𐴑𐴟𐴊𐴟𐴌𐴟𐴃𐴢, 𐴎𐴞𐴘𐴝𐴥𐴕𐴡𐴌𐴠 𐴋𐴡𐴣𐴀𐴌 𐴑𐴟𐴊𐴟𐴌𐴟𐴃𐴢 𐴁𐴡𐴓𐴞 𐴎𐴝𐴕𐴝 𐴎𐴝.“¹¹𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌 𐴈𐴡𐴃𐴝𐴤𐴃𐴢 𐴀𐴠𐴃𐴡𐴓𐴧𐴝𐴤 𐴊𐴞𐴥𐴘𐴝𐴕 𐴊𐴞𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴅𐴝𐴊𐴟 𐴊𐴝𐴈𐴝𐴤𐴘 𐴁𐴞𐴐𐴞𐴤 𐴊𐴠𐴌𐴞 𐴓𐴡𐴥𐴃𐴞 𐴃𐴝𐴦𐴅𐴟𐴂𐴢 𐴒𐴡𐴌𐴞𐴥 𐴌𐴝𐴙𐴑𐴧𐴞𐴥𐴓𐴢.¹²𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴉𐴞𐴓𐴞𐴥𐴂𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴀𐴠𐴊𐴧𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴠𐴥 𐴊𐴠 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴀𐴞𐴥𐴃𐴝𐴌𐴝 𐴔𐴡𐴌𐴡𐴃𐴉𐴟𐴀𐴝𐴙𐴕 𐴔𐴝𐴘𐴝𐴉𐴟𐴀𐴝𐴙𐴕 𐴊𐴟𐴕𐴞𐴥 𐴒𐴟𐴥𐴕𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥.¹³𐴏𐴝𐴥𐴘𐴔𐴡𐴕 𐴕𐴞𐴎𐴠 𐴘𐴡𐴥 𐴀𐴞𐴔𐴝𐴕 𐴀𐴝𐴕𐴞𐴤 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥. 𐴘𐴡𐴥𐴒𐴧𐴗𐴝 𐴉𐴞𐴓𐴞𐴥𐴂𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴎𐴝𐴘𐴃𐴡, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴊𐴝𐴈𐴝𐴤𐴘𐴃𐴡 𐴊𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴋𐴡𐴣𐴀𐴌-𐴋𐴡𐴣𐴀𐴌 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥 𐴘𐴡𐴥𐴒𐴧𐴗𐴝 𐴃𐴝𐴦𐴅𐴟𐴂𐴢 𐴀𐴡𐴥𐴘𐴎𐴝𐴘𐴃𐴡𐴘.

¹⁴𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴏𐴠𐴤 𐴊𐴠 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴎𐴠𐴃𐴧𐴡𐴥𐴃𐴢 𐴏𐴝𐴔𐴝𐴥𐴌𐴞𐴘𐴝𐴌 𐴔𐴝𐴙𐴕𐴐𐴠𐴥 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥 𐴊𐴠 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴉𐴞𐴃𐴡𐴌𐴡𐴌𐴠 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌𐴠 𐴃𐴝𐴌𐴝𐴥𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠.¹⁵𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕 𐴉𐴡𐴀𐴣𐴏𐴞𐴘𐴡𐴌𐴠 𐴃𐴝𐴌𐴝𐴥 𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴃𐴝𐴌𐴝𐴥 𐴂𐴝𐴑-𐴌𐴟𐴀 𐴉𐴝𐴦;¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴌𐴝𐴥𐴌 𐴖𐴡𐴌𐴠 𐴂𐴝𐴑-𐴌𐴟𐴀 𐴇𐴠𐴥𐴃𐴟𐴕 𐴉𐴡𐴙𐴅𐴧𐴡𐴕𐴃𐴡 𐴕𐴟𐴥 𐴀𐴝𐴘𐴧𐴠𐴤; 𐴃𐴝𐴌𐴝𐴥 𐴐𐴟𐴥𐴊𐴟 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴥𐴙𐴓𐴢 𐴊𐴠.¹⁷𐴁𐴝𐴦𐴊𐴠 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴘𐴠 𐴃𐴝𐴌𐴝𐴥𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥𐴘𐴠, 𐴃𐴡𐴥𐴘 𐴃𐴝𐴌𐴝𐴥 𐴂𐴝𐴑-𐴌𐴟𐴀 𐴉𐴝𐴘𐴧𐴠𐴥.

¹⁸𐴏𐴝𐴥𐴘𐴔𐴡𐴕𐴠 𐴊𐴠𐴑𐴠𐴥𐴌 𐴊𐴠, 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴝𐴥𐴃𐴢 𐴊𐴞𐴓𐴠 𐴂𐴝𐴑-𐴌𐴟𐴀 𐴔𐴞𐴓𐴠𐴌, 𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴃𐴝𐴌𐴝𐴥𐴌𐴠 𐴄𐴞𐴛𐴝 𐴊𐴞𐴦¹⁹𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴠𐴥 𐴘𐴡𐴥 𐴀𐴠 𐴑𐴠𐴥𐴔𐴡𐴃𐴝 𐴒𐴝𐴥𐴕 𐴊𐴡𐴦, 𐴎𐴠𐴀𐴕𐴠 𐴀𐴝𐴀𐴛 𐴎𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥 𐴘𐴡𐴥𐴒𐴧𐴗𐴝𐴘𐴠 𐴂𐴝𐴑-𐴌𐴟𐴀 𐴉𐴝𐴦.“

²⁰𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴄𐴞𐴛𐴝 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴊𐴡𐴥𐴚𐴐𐴡 𐴀𐴡𐴥𐴘𐴎𐴡𐴒𐴧𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴃𐴡 𐴀𐴝𐴓𐴧𐴝𐴌 𐴇𐴝𐴥𐴊𐴞𐴘𐴝 𐴄𐴞𐴛𐴝 𐴊𐴞𐴦 𐴑𐴞𐴕𐴝 𐴎𐴝 𐴁𐴡𐴓𐴞 𐴄𐴝𐴥𐴀𐴙𐴅𐴧𐴡.²¹𐴈𐴝𐴔 𐴘𐴝𐴀𐴕𐴡𐴃𐴢 𐴕𐴡 𐴃𐴟𐴣𐴀𐴝𐴥𐴣𐴌 𐴇𐴡𐴕𐴡𐴤 𐴇𐴞𐴥𐴏𐴧𐴝 𐴀𐴝𐴏𐴠𐴤 𐴀𐴝𐴦𐴌 𐴕𐴡 𐴇𐴡𐴕𐴡𐴤 𐴁𐴡𐴌𐴝𐴃𐴢 𐴀𐴝𐴏𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴃𐴟𐴣𐴀𐴝𐴥𐴣𐴌 𐴊𐴞𐴓𐴢 𐴏𐴡𐴥𐴘𐴧𐴞 𐴕𐴡.²²𐴇𐴠𐴥𐴃𐴡𐴓𐴧𐴝 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴀𐴠 𐴈𐴡𐴥𐴌𐴝𐴉𐴞𐴃𐴧𐴟 𐴃𐴡𐴖𐴝𐴥 𐴒𐴡𐴌𐴡𐴤, 𐴀𐴝𐴦𐴌 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴡𐴤, 𐴀𐴡𐴥𐴘𐴃𐴡𐴉𐴝𐴌𐴠 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴣𐴌 𐴊𐴞𐴓𐴡𐴌 𐴀𐴠 𐴈𐴡𐴥𐴌𐴝𐴉𐴢 𐴁𐴝𐴥𐴉𐴝𐴕𐴞 𐴔𐴝𐴉𐴢 𐴒𐴡𐴌𐴞𐴥𐴊𐴞𐴁𐴡.²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴊𐴠𐴑𐴞𐴥𐴌 𐴊𐴠, 𐴃𐴟𐴀𐴛 𐴓𐴝𐴓𐴡𐴥𐴏𐴠 𐴁𐴡𐴥𐴌𐴝 𐴀𐴝𐴦𐴌 𐴒𐴟𐴕𐴝𐴤𐴌 𐴑𐴡𐴁𐴎𐴝𐴃𐴢 𐴀𐴝𐴏𐴡𐴤.“

²⁴𐴇𐴠𐴥𐴃𐴟𐴕𐴡𐴃𐴢 𐴏𐴝𐴥𐴘𐴔𐴡𐴕𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴓𐴧𐴝 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴡𐴤, 𐴎𐴠𐴀𐴕𐴠 𐴃𐴟𐴀𐴛 𐴈𐴡𐴘𐴧𐴡𐴥 𐴊𐴠 𐴈𐴠𐴥𐴕𐴃𐴟 𐴀𐴠𐴑𐴧𐴝𐴥𐴕 𐴀𐴟𐴥𐴊𐴧𐴗𐴝 𐴀𐴝𐴣𐴀𐴌 𐴖𐴡𐴌𐴠 𐴕𐴡.“

²⁵𐴃𐴝𐴌𐴉𐴡𐴌𐴠 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥 𐴁𐴝𐴦𐴊𐴠, 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴀𐴟𐴎𐴟 𐴌𐴡𐴖𐴝𐴕𐴝 𐴓𐴡𐴘𐴧𐴠𐴥, 𐴀𐴝𐴦𐴌 𐴉𐴡𐴣𐴃𐴡𐴃𐴢 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴡𐴌 𐴁𐴡𐴀𐴗𐴃𐴧𐴝𐴕 𐴉𐴝𐴌𐴝𐴃𐴢 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴢.

𐴉𐴞𐴓𐴞𐴥𐴂𐴢 𐴀𐴠𐴊𐴧𐴠 𐴀𐴠𐴎𐴧𐴡𐴕 𐴀𐴞𐴃𐴟𐴥𐴂𐴞𐴘𐴝 𐴊𐴠𐴐𐴞𐴥

²⁶𐴀𐴠𐴑 𐴊𐴞𐴕، 𐴔𐴝𐴁𐴟𐴊𐴡𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴉𐴞𐴓𐴞𐴥𐴂𐴡𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴟𐴍𐴞𐴤 𐴊𐴡𐴀𐴙𐴕 𐴔𐴞𐴥𐴑𐴧𐴝 𐴌𐴝𐴏𐴃𐴝 𐴀𐴟𐴁𐴝𐴤𐴃𐴢 𐴎𐴡𐴦, 𐴎𐴞𐴁𐴝𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴒𐴝𐴎𐴝 𐴐𐴡𐴥𐴀𐴌𐴡𐴃𐴢 𐴉𐴡𐴙𐴅𐴧𐴠𐴥.“ 𐴇𐴠𐴥 𐴌𐴝𐴏𐴃𐴝 𐴖𐴝 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴝𐴐𐴧𐴞𐴥𐴓𐴢.²⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝 𐴀𐴟𐴍𐴞𐴤 𐴌𐴡𐴖𐴝𐴕𐴝 𐴓𐴡𐴘𐴧𐴠𐴥, 𐴀𐴝𐴦𐴌 𐴎𐴝𐴘𐴃𐴠-𐴎𐴝𐴘𐴃𐴠 𐴉𐴡𐴣𐴃𐴡𐴃𐴢 𐴔𐴝𐴥𐴎𐴠 𐴀𐴞𐴃𐴟𐴥𐴂𐴞𐴘𐴝 𐴊𐴠𐴐𐴡𐴌 𐴑𐴝𐴕𐴊𐴠𐴏𐴢 𐴌𐴝𐴕𐴞𐴌 𐴀𐴠𐴑 𐴋𐴡𐴣𐴀𐴌 𐴀𐴟𐴎𐴞𐴌 𐴓𐴡𐴘 𐴊𐴡𐴓𐴝 𐴀𐴡𐴥𐴘𐴧𐴠, 𐴘𐴡𐴥𐴒𐴧𐴗𐴝 𐴀𐴝𐴐𐴧𐴞𐴥𐴓𐴢 𐴀𐴞𐴥𐴎𐴝𐴌𐴝, 𐴀𐴝𐴦𐴌 𐴌𐴝𐴕𐴞𐴌 𐴃𐴝𐴔𐴝𐴥𐴔 𐴊𐴡𐴥𐴕-𐴊𐴡𐴓𐴡𐴃𐴡𐴌 𐴎𐴞𐴔𐴧𐴝𐴊𐴝𐴌. 𐴘𐴡𐴥𐴒𐴧𐴗𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴙𐴐𐴧𐴞𐴤𐴓𐴢 𐴊𐴠 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝.²⁸𐴘𐴡𐴥𐴒𐴧𐴗𐴝 𐴕𐴞𐴎𐴡𐴌 𐴒𐴟𐴥𐴌𐴝-𐴒𐴝𐴌𐴞𐴥𐴃𐴢 𐴁𐴡𐴀𐴘𐴢 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴦𐴌𐴒𐴡𐴥𐴘 𐴊𐴠 𐴉𐴡𐴣𐴃𐴡𐴃𐴢 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴑𐴞𐴃𐴝𐴁𐴢 𐴃𐴠𐴓𐴝𐴖𐴡𐴃𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.²⁹𐴇𐴠𐴥𐴃𐴟𐴕𐴡𐴃𐴢 𐴂𐴝𐴑-𐴌𐴟𐴀𐴘𐴠 𐴉𐴞𐴓𐴞𐴥𐴂𐴡𐴌𐴠 𐴈𐴡𐴀𐴌 𐴊𐴠, ”𐴇𐴠𐴥 𐴒𐴟𐴥𐴌𐴝-𐴒𐴝𐴌𐴞𐴥 𐴒𐴝𐴥𐴕𐴡𐴌 𐴋𐴝𐴥𐴑𐴠 𐴎𐴝𐴘 𐴇𐴞𐴥𐴘𐴝𐴕𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴎𐴝𐴦𐴃𐴢 𐴊𐴡𐴥𐴌𐴡.“

³⁰𐴃𐴡𐴥𐴘 𐴉𐴞𐴓𐴞𐴥𐴂𐴢 𐴊𐴟𐴣𐴌𐴞 𐴒𐴟𐴥𐴌𐴝-𐴒𐴝𐴌𐴞𐴥𐴌 𐴋𐴝𐴥𐴑𐴠 𐴒𐴞𐴦𐴘𐴠𐴥 𐴌𐴝𐴥𐴌 𐴉𐴟𐴥𐴕𐴠𐴌 𐴊𐴠, 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴑𐴞𐴃𐴝𐴁𐴢 𐴃𐴠𐴓𐴝𐴖𐴡𐴃𐴢 𐴒𐴡𐴌𐴠𐴥𐴌. 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴎𐴞𐴀𐴕 𐴃𐴠𐴓𐴝𐴖𐴡𐴃𐴢 𐴒𐴡𐴌𐴡𐴤𐴌 𐴇𐴞𐴥𐴀𐴕 𐴁𐴟𐴎𐴡𐴥𐴌 𐴕𐴠𐴥؟“

³¹𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴇𐴡𐴕𐴡𐴤𐴑𐴞𐴘𐴠 𐴁𐴟𐴎𐴝𐴥𐴘 𐴕𐴡 𐴊𐴞𐴓𐴠𐴥 𐴀𐴝𐴀𐴛 𐴑𐴠𐴀𐴕𐴒𐴡𐴌𐴞 𐴁𐴟𐴎𐴞𐴥 𐴉𐴝𐴙𐴅𐴧𐴟𐴔؟“ 𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴉𐴞𐴓𐴞𐴥𐴂𐴡𐴌𐴠 𐴖𐴡𐴌𐴠 𐴀𐴟𐴍𐴞𐴤 𐴘𐴡𐴥𐴒𐴧𐴗𐴝𐴌 𐴉𐴟𐴥𐴖𐴝𐴣𐴃𐴞 𐴁𐴡𐴘𐴃𐴡𐴥 𐴀𐴝𐴌𐴡𐴏𐴢 𐴒𐴡𐴙𐴅𐴧𐴠𐴥.

³²𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴎𐴠 𐴇𐴞𐴥𐴏𐴧𐴝 𐴒𐴝𐴥𐴕 𐴃𐴠𐴓𐴝𐴖𐴡𐴃𐴢 𐴒𐴡𐴌𐴠𐴥𐴌 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴘𐴝𐴀𐴕,”𐴎𐴡𐴦𐴌𐴝𐴥𐴘 𐴁𐴡𐴓𐴧𐴝 𐴁𐴠𐴥𐴌𐴝𐴏𐴡𐴥𐴀𐴓𐴡𐴌𐴠 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴓𐴡𐴘𐴎𐴝 𐴎𐴝,𐴀𐴞𐴥𐴁𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴓𐴡𐴘𐴎𐴝 𐴒𐴞𐴘𐴠𐴥;𐴀𐴝𐴦𐴌 𐴕𐴞𐴎𐴡𐴌 𐴑𐴠𐴣𐴐𐴢 𐴈𐴝𐴍𐴡𐴘𐴝𐴌 𐴔𐴟𐴀𐴕𐴃𐴟 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴏𐴡𐴥𐴀𐴘𐴠 𐴎𐴠𐴕𐴊𐴞𐴓𐴧𐴝 𐴕𐴞𐴎𐴝𐴥𐴔 𐴀𐴡𐴥𐴘 𐴃𐴝𐴥𐴑𐴠,𐴇𐴠𐴥𐴕𐴊𐴞𐴓𐴧𐴝 𐴀𐴞𐴥𐴁𐴝𐴘𐴠 𐴘𐴡𐴥 𐴕𐴞𐴎𐴡𐴌 𐴔𐴟𐴑 𐴕𐴡𐴥 𐴑𐴟𐴥𐴓𐴠.³³𐴀𐴞𐴥𐴁𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴞𐴥𐴘𐴝𐴕𐴡𐴌 𐴇𐴡𐴕𐴡𐴤 𐴁𐴞𐴏𐴝𐴌 𐴕𐴡𐴥 𐴉𐴝𐴦.𐴇𐴡𐴕𐴠 𐴀𐴞𐴥𐴁𐴝𐴌 𐴕𐴡𐴏𐴡𐴥𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴘𐴢 𐴉𐴝𐴌𐴞𐴁𐴡𐴥؟𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴟𐴕𐴞𐴘𐴝𐴙𐴃𐴧𐴟 𐴀𐴞𐴥𐴁𐴝𐴌 𐴎𐴝𐴕 𐴓𐴡𐴘𐴉𐴠𐴥𐴓𐴝𐴒𐴞𐴓𐴢.“

³⁴𐴇𐴠𐴥 𐴀𐴟𐴎𐴞𐴌𐴒𐴗𐴝𐴥𐴘𐴠 𐴉𐴞𐴓𐴞𐴥𐴂𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴠𐴀𐴌𐴁𐴝𐴕𐴞 𐴒𐴡𐴥𐴌𐴞 𐴀𐴝𐴣𐴀𐴌𐴠𐴥 𐴈𐴡𐴀, 𐴕𐴡𐴁𐴞𐴘𐴠 𐴀𐴞𐴀𐴕 𐴇𐴝𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴊𐴠, 𐴕𐴞𐴎𐴡𐴌 𐴕𐴠𐴥 𐴕𐴝𐴥𐴑𐴞 𐴀𐴡𐴙𐴕𐴧𐴡 𐴎𐴡𐴕 𐴀𐴡𐴌؟“³⁵𐴇𐴠𐴥𐴃𐴟𐴕𐴡𐴃𐴢 𐴉𐴞𐴓𐴞𐴥𐴂𐴠 𐴈𐴡𐴃𐴝𐴤 𐴈𐴡𐴖𐴝𐴤 𐴏𐴝𐴥𐴃𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴂𐴝𐴑-𐴑𐴝𐴓𐴝𐴔𐴡𐴌 𐴇𐴠𐴥 𐴇𐴞𐴥𐴏𐴧𐴝 𐴒𐴝𐴥𐴕 𐴓𐴡𐴥𐴘 𐴐𐴟𐴥𐴌𐴟 𐴒𐴡𐴌𐴞𐴥 𐴘𐴡𐴥𐴒𐴧𐴗𐴝𐴌𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴠𐴥.

³⁶𐴀𐴞𐴥𐴃𐴝𐴌𐴝 𐴌𐴝𐴏𐴃𐴝 𐴁𐴝𐴥𐴘 𐴎𐴝𐴘𐴃𐴠-𐴎𐴝𐴘𐴃𐴠 𐴉𐴝𐴕𐴞𐴥 𐴀𐴝𐴏𐴠𐴤 𐴊𐴠 𐴀𐴠𐴑𐴧𐴝𐴥𐴕 𐴎𐴝𐴒𐴝𐴃𐴢 𐴉𐴡𐴀𐴣𐴙𐴐𐴧𐴠. 𐴀𐴟𐴎𐴞𐴌𐴒𐴗𐴝𐴥𐴘𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴠𐴍𐴠𐴥 𐴉𐴝𐴕𐴞𐴥 𐴀𐴝𐴏𐴠𐴤, 𐴘𐴝𐴓𐴝 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖𐴝𐴃𐴧𐴟 𐴀𐴝𐴣𐴀𐴌𐴠𐴥 𐴑𐴞𐴘𐴠𐴥 𐴀𐴡𐴀𐴣𐴓𐴞 𐴉𐴝𐴌𐴞𐴁𐴡𐴥؟“³⁷𐴉𐴞𐴓𐴞𐴥𐴂𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴀𐴛 𐴉𐴟𐴌𐴝 𐴊𐴞𐴓𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤 𐴊𐴠 𐴀𐴡𐴥𐴘𐴓𐴠, 𐴓𐴡𐴘 𐴉𐴝𐴌𐴞𐴁𐴝𐴥.“ 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴞𐴔𐴝𐴕 𐴀𐴝𐴕𐴞𐴤 𐴊𐴠, 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝.“³⁸𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴒𐴟𐴥𐴌𐴝-𐴒𐴝𐴌𐴞𐴥 𐴃𐴞𐴥𐴘𐴝𐴒𐴝𐴌𐴝𐴘𐴃𐴡 𐴇𐴡𐴥𐴑𐴟𐴔 𐴊𐴞𐴥𐴘𐴠, 𐴃𐴝𐴌𐴉𐴡𐴌𐴠 𐴉𐴞𐴓𐴞𐴥𐴂𐴢 𐴀𐴠𐴊𐴧𐴠 𐴇𐴠𐴥 𐴀𐴟𐴎𐴞𐴌, 𐴃𐴝𐴌𐴝𐴥 𐴊𐴟𐴕𐴞𐴥 𐴎𐴡𐴕 𐴉𐴝𐴕𐴞𐴥𐴃𐴢 𐴓𐴝𐴙𐴔𐴧𐴠𐴥, 𐴀𐴝𐴦𐴌 𐴉𐴞𐴓𐴞𐴥𐴂𐴠 𐴘𐴡𐴥𐴒𐴧𐴗𐴝𐴌𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴠.³⁹𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴉𐴝𐴕𐴞𐴥𐴃𐴧𐴟 𐴀𐴟𐴙𐴄𐴧𐴠𐴥𐴒𐴝𐴘, 𐴔𐴝𐴓𐴞𐴑𐴡𐴌 𐴌𐴟𐴀𐴘𐴠 𐴁𐴝𐴥𐴚𐴒𐴡𐴌𐴞 𐴉𐴞𐴓𐴞𐴥𐴂𐴡𐴌𐴠 𐴓𐴡𐴘𐴒𐴞𐴘𐴠𐴥𐴒𐴡𐴘. 𐴇𐴠𐴥 𐴀𐴟𐴎𐴞𐴌𐴒𐴗𐴝𐴥𐴘𐴠 𐴉𐴞𐴓𐴞𐴥𐴂𐴡𐴌𐴠 𐴀𐴝𐴌 𐴕𐴡𐴥 𐴊𐴠𐴑𐴠𐴥, 𐴓𐴠𐴑𐴞𐴕 𐴑𐴟𐴥𐴐𐴞 𐴒𐴡𐴌𐴞𐴥-𐴒𐴡𐴌𐴞𐴥 𐴕𐴞𐴎𐴡𐴌 𐴏𐴡𐴉𐴡𐴥𐴌 𐴎𐴝𐴌𐴞 𐴌𐴝𐴙𐴑𐴧𐴞𐴥𐴓𐴢.⁴⁰𐴔𐴡𐴕𐴃𐴡𐴌 𐴉𐴞𐴓𐴞𐴥𐴂𐴠 𐴕𐴞𐴎𐴡𐴌𐴠𐴥 𐴀𐴝𐴏𐴊𐴡𐴊𐴢 𐴐𐴡𐴥𐴀𐴌𐴡𐴃𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴀𐴞𐴥𐴁𐴝 𐴈𐴠𐴥𐴕𐴃𐴟 𐴓𐴡𐴥𐴃𐴞 𐴑𐴝𐴘𐴏𐴝𐴥𐴌𐴞𐴘𐴝𐴃𐴢 𐴉𐴡𐴀𐴣𐴏𐴠 𐴉𐴡𐴙𐴅𐴧𐴡𐴕𐴃𐴡 𐴐𐴡𐴥𐴀𐴌 𐴁𐴠𐴒𐴧𐴟𐴥𐴕𐴡𐴃𐴢 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590