𐴈𐴝𐴔𐴡𐴥𐴓𐴢5
𐴀𐴝𐴕𐴝𐴕𐴞𐴘𐴝𐴏𐴢 𐴀𐴠𐴊𐴧𐴠 𐴏𐴝𐴉𐴞𐴥𐴌𐴝
1𐴓𐴠𐴑𐴞𐴕 𐴀𐴝𐴕𐴝𐴕𐴞𐴘𐴝𐴏𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴘𐴡𐴥 𐴕𐴞𐴎𐴡𐴌 𐴁𐴡𐴖𐴢 𐴏𐴝𐴉𐴞𐴥𐴌𐴝 𐴓𐴧𐴡𐴥𐴘 𐴀𐴠𐴑𐴧𐴝𐴥𐴕 𐴎𐴝𐴒𐴝 𐴁𐴠𐴙𐴐𐴧𐴠𐴥.2𐴘𐴡𐴥𐴒𐴧𐴗𐴝𐴘𐴠 𐴁𐴠𐴏𐴝𐴌 𐴊𐴝𐴔𐴡𐴃𐴧𐴟 𐴑𐴠𐴏𐴧𐴟𐴥 𐴄𐴞𐴛𐴝 𐴕𐴞𐴎𐴡𐴌 𐴓𐴧𐴝 𐴌𐴝𐴑𐴞𐴥𐴊𐴞𐴘𐴠, 𐴎𐴞𐴘𐴝𐴥𐴕𐴡𐴌 𐴁𐴝𐴦𐴁𐴟𐴃𐴠 𐴘𐴡𐴥𐴒𐴧𐴗𐴝𐴌 𐴁𐴡𐴖𐴢 𐴖𐴠𐴥 𐴘𐴡𐴥 𐴉𐴟𐴌𐴝𐴉𐴟𐴌𐴞 𐴎𐴝𐴕𐴠, 𐴁𐴝𐴦𐴊𐴠 𐴀𐴝𐴌𐴒𐴟𐴥𐴕 𐴀𐴝𐴕𐴞𐴤 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴌𐴝𐴙𐴑𐴧𐴠𐴥𐴒𐴝𐴘.3𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴕𐴝𐴕𐴞𐴘𐴝𐴏𐴢, 𐴐𐴡𐴥𐴘𐴃𐴝𐴕𐴠 𐴃𐴟𐴣𐴀𐴝𐴥𐴣𐴌 𐴊𐴞𐴓𐴢 𐴀𐴠𐴀𐴕𐴒𐴡𐴌𐴞 𐴑𐴞𐴘𐴝𐴥 𐴑𐴡𐴁𐴎𐴝 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴃𐴟𐴣𐴀𐴝𐴥𐴣𐴌𐴠 𐴂𐴝𐴑-𐴌𐴟𐴀𐴌 𐴇𐴝𐴣𐴏𐴠 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴖𐴝𐴤 𐴁𐴝𐴘𐴧𐴠𐴥, 𐴀𐴝𐴦𐴌 𐴎𐴝𐴒𐴝 𐴁𐴠𐴏𐴝𐴌 𐴊𐴝𐴔𐴡𐴃𐴧𐴟 𐴑𐴠𐴏𐴧𐴟𐴥 𐴄𐴞𐴛𐴝 𐴕𐴞𐴎𐴡𐴌 𐴓𐴧𐴝 𐴌𐴝𐴑𐴞𐴥𐴊𐴞𐴘𐴝 𐴁𐴝𐴘𐴧𐴠𐴥؟4𐴎𐴝𐴒𐴝 𐴇𐴞𐴥𐴘𐴝𐴕 𐴁𐴠𐴏𐴞𐴁𐴝𐴥𐴌 𐴀𐴝𐴒𐴠 𐴘𐴡𐴥 𐴑𐴞𐴥 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴕𐴟 𐴀𐴝𐴐𐴧𐴞𐴥𐴓𐴢 𐴕𐴠𐴥؟ 𐴀𐴝𐴦𐴌 𐴇𐴞𐴥𐴘𐴝𐴕 𐴁𐴠𐴏𐴞 𐴁𐴝𐴦𐴊𐴠 𐴘𐴡 𐴑𐴞𐴥 𐴄𐴞𐴛𐴝 𐴒𐴟𐴥𐴕 𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴡𐴃𐴢 𐴕𐴟 𐴀𐴝𐴐𐴧𐴞𐴥𐴓𐴢 𐴕𐴠𐴥؟ 𐴃𐴟𐴀𐴛 𐴀𐴠 𐴈𐴝𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴑𐴞𐴘𐴝𐴥 𐴃𐴟𐴣𐴀𐴝𐴥𐴣𐴌 𐴊𐴞𐴓𐴡𐴃𐴢 𐴕𐴞𐴘𐴡𐴃𐴢 𐴒𐴡𐴙𐴅𐴧𐴡𐴥؟ 𐴃𐴟𐴀𐴛 𐴀𐴞𐴕𐴏𐴝𐴥𐴕𐴡𐴌𐴠 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴘𐴧𐴡𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝 𐴌𐴠.“5𐴈𐴡𐴃𐴝𐴤 𐴇𐴞𐴥𐴀𐴕 𐴉𐴟𐴥𐴕𐴞 𐴔𐴡𐴃𐴧𐴡𐴌 𐴀𐴝𐴕𐴝𐴕𐴞𐴘𐴝𐴏𐴢 𐴊𐴡𐴌𐴡𐴤𐴃𐴒𐴡𐴌𐴞 𐴉𐴡𐴌𐴞 𐴔𐴡𐴌𐴞𐴒𐴞𐴘𐴡𐴥𐴘. 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴇𐴠𐴥 𐴇𐴝𐴥𐴓𐴡𐴃𐴧𐴝𐴕 𐴉𐴟𐴥𐴙𐴕𐴧𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴁𐴞𐴐𐴞𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘.6𐴃𐴝𐴌𐴉𐴡𐴌𐴠 𐴅𐴟𐴖𐴝𐴕 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢 𐴀𐴟𐴍𐴞𐴤 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌 𐴒𐴝𐴦𐴃𐴢 𐴇𐴡𐴇𐴡𐴥𐴕 𐴏𐴡𐴓𐴝𐴘𐴧𐴠𐴥, 𐴀𐴝𐴦𐴌 𐴁𐴝𐴀𐴌𐴠 𐴓𐴡𐴘𐴎𐴝𐴘 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.7𐴃𐴞𐴕 𐴒𐴡𐴥𐴕𐴋𐴝 𐴀𐴝𐴥𐴕𐴞𐴑 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴌 𐴁𐴡𐴖𐴢 𐴏𐴝𐴉𐴞𐴥𐴌𐴝 𐴁𐴟𐴥𐴃𐴡𐴌𐴠 𐴀𐴝𐴙𐴐𐴧𐴠𐴥, 𐴔𐴡𐴕𐴃𐴡𐴌 𐴎𐴞𐴀𐴕 𐴀𐴡𐴥𐴘𐴧𐴠 𐴇𐴞𐴥𐴀𐴕 𐴇𐴞𐴥𐴁𐴝𐴘𐴠 𐴕𐴡 𐴎𐴝𐴕𐴠.8𐴉𐴞𐴃𐴡𐴌𐴠 𐴇𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴝𐴣𐴀𐴌𐴠𐴥 𐴈𐴡𐴀𐴏𐴝𐴘, 𐴃𐴟𐴀𐴛 𐴀𐴠𐴊𐴧𐴠 𐴃𐴟𐴣𐴀𐴝𐴥𐴣𐴌 𐴇𐴡𐴥𐴐𐴡𐴔𐴠 𐴎𐴝𐴒𐴝 𐴒𐴝𐴥𐴕 𐴀𐴠 𐴊𐴡𐴌𐴠 𐴁𐴠𐴙𐴐𐴧𐴡𐴥 𐴊𐴠 𐴕𐴠𐴥؟“𐴇𐴞𐴥𐴁𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴅𐴞𐴦, 𐴇𐴠𐴥 𐴊𐴡𐴌𐴠 𐴁𐴠𐴙𐴐𐴧𐴞𐴥 𐴊𐴠.“9𐴃𐴡𐴥𐴘 𐴉𐴞𐴃𐴡𐴌𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴁𐴟𐴊𐴡𐴌 𐴌𐴟𐴀𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴑𐴞𐴘𐴝𐴥 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕 𐴌𐴝𐴎𐴞 𐴀𐴡𐴥𐴘𐴧𐴡؟ 𐴏𐴡𐴀, 𐴃𐴟𐴣𐴀𐴝𐴥𐴣𐴌 𐴇𐴡𐴥𐴐𐴡𐴔𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴞𐴥 𐴀𐴝𐴙𐴐𐴧𐴠𐴥 𐴊𐴠 𐴀𐴞𐴥𐴃𐴝𐴌𐴝 𐴊𐴟𐴖𐴝𐴌𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴏𐴠𐴤, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴣𐴌𐴠 𐴘𐴡𐴥 𐴃𐴟𐴓𐴞𐴤 𐴁𐴝𐴀𐴌𐴠 𐴓𐴡𐴘𐴎𐴝𐴘𐴁𐴡𐴥𐴘.“10𐴇𐴞𐴥𐴁𐴝 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴉𐴞𐴃𐴡𐴌𐴡𐴌 𐴄𐴠𐴥𐴚𐴡𐴃𐴢 𐴊𐴡𐴌𐴡𐴤𐴃𐴒𐴡𐴌𐴞 𐴉𐴡𐴌𐴞 𐴔𐴡𐴌𐴞𐴒𐴞𐴘𐴡𐴥𐴘. 𐴀𐴝𐴦𐴌 𐴅𐴟𐴖𐴝𐴕 𐴉𐴟𐴀𐴝𐴙𐴕 𐴕𐴟𐴥𐴕𐴠 𐴁𐴟𐴥𐴃𐴡𐴌𐴠 𐴀𐴝𐴀𐴘𐴢 𐴊𐴠𐴑𐴠𐴥𐴌 𐴊𐴠, 𐴇𐴞𐴥𐴁𐴝 𐴔𐴡𐴌𐴝, 𐴃𐴡𐴥𐴘 𐴇𐴞𐴥𐴁𐴝𐴌𐴠 𐴁𐴝𐴀𐴌𐴠 𐴓𐴡𐴘𐴎𐴝𐴘 𐴇𐴡𐴥𐴐𐴡𐴔𐴡𐴌 𐴋𐴝𐴥𐴑𐴠 𐴒𐴡𐴥𐴌𐴞 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.11𐴇𐴠𐴥𐴃𐴡𐴓𐴧𐴝 𐴉𐴟𐴌𐴝 𐴎𐴡𐴔𐴝𐴥𐴃𐴡𐴃𐴢 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴇𐴞𐴥𐴀𐴕 𐴉𐴟𐴥𐴙𐴕𐴧𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴋𐴡𐴦𐴌 𐴒𐴡𐴥𐴓𐴞𐴒𐴞𐴘𐴡𐴘.
𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴠𐴊𐴧𐴠 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝
12𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴁𐴡𐴀𐴗𐴃𐴢 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴠𐴊𐴧𐴠 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴃𐴡, 𐴀𐴝𐴦𐴌 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴁𐴠𐴒𐴧𐴟𐴥𐴕 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴏𐴡𐴥𐴓𐴡𐴔𐴝𐴕𐴡𐴌 𐴁𐴝𐴦𐴕𐴋𐴝𐴃𐴢 𐴎𐴡𐴔𐴝 𐴀𐴡𐴥𐴘𐴃𐴡.13𐴔𐴝𐴙𐴕𐴐𐴠𐴥 𐴀𐴞𐴥𐴃𐴝𐴌𐴝𐴌𐴠 𐴁𐴞𐴐𐴞𐴤 𐴀𐴞𐴎𐴧𐴡𐴃𐴢 𐴒𐴡𐴙𐴃𐴧𐴡𐴥, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌 𐴊𐴡𐴓𐴡𐴃𐴢 𐴐𐴝𐴥𐴔𐴞𐴓𐴢 𐴀𐴡𐴥𐴘 𐴁𐴡𐴓𐴧𐴝 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴇𐴞𐴥𐴔𐴧𐴡𐴃𐴢 𐴕𐴡 𐴒𐴡𐴙𐴃𐴧𐴡𐴥.14𐴃𐴡𐴀 𐴔𐴝𐴓𐴞𐴑𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴊𐴠 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴔𐴝𐴘𐴝𐴉𐴟𐴀𐴝𐴙𐴕 𐴀𐴠𐴊𐴧𐴠 𐴔𐴡𐴌𐴡𐴃𐴉𐴟𐴀𐴝𐴙𐴕 𐴓𐴡𐴘 𐴀𐴞𐴥𐴃𐴝𐴌𐴝𐴌 𐴊𐴡𐴓𐴢 𐴓𐴝𐴒𐴝𐴃𐴝𐴌 𐴁𐴝𐴌𐴝𐴤𐴃𐴢 𐴀𐴝𐴐𐴧𐴞𐴥𐴓𐴢.15𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴒𐴡𐴌𐴠𐴥𐴌 𐴊𐴠 𐴈𐴝𐴔𐴡𐴌 𐴎𐴡𐴌𐴞𐴘𐴝, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴕𐴞𐴤 𐴌𐴝𐴏𐴃𐴝-𐴌𐴝𐴏𐴃𐴝 𐴒𐴝𐴊𐴞𐴌 𐴖𐴡𐴌𐴠 𐴀𐴠𐴊𐴧𐴠 𐴇𐴝𐴥𐴙𐴄𐴧𐴝𐴌 𐴖𐴡𐴌𐴠 𐴕𐴠𐴍𐴝𐴘 𐴌𐴝𐴑𐴞𐴥𐴃𐴡, 𐴎𐴠𐴀𐴕𐴠 𐴉𐴞𐴃𐴡𐴌 𐴇𐴠𐴥 𐴁𐴡𐴓𐴞 𐴎𐴝𐴘𐴓𐴠𐴥 𐴀𐴞𐴥𐴁𐴝𐴌 𐴏𐴝𐴥𐴁𐴝 𐴀𐴞𐴥𐴃𐴝𐴌𐴝 𐴑𐴠𐴏𐴧𐴟𐴥 𐴔𐴝𐴕𐴟𐴥𐴙𐴐𐴡𐴌 𐴖𐴡𐴌𐴠 𐴉𐴡𐴌𐴠.16𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴘𐴡𐴥 𐴔𐴝𐴙𐴕𐴐𐴠𐴥 𐴉𐴟𐴥𐴖𐴝𐴣𐴃𐴞 𐴁𐴞𐴘𐴝𐴌𐴝𐴙𐴔𐴧𐴝 𐴀𐴠𐴊𐴧𐴠 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴙𐴕𐴃𐴡𐴤, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴒𐴡𐴔 𐴒𐴡𐴌𐴝𐴥 𐴎𐴝𐴘𐴃𐴡.𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴖𐴡𐴌𐴠 𐴎𐴟𐴓𐴟𐴥𐴔
17𐴁𐴝𐴦𐴊𐴠 𐴁𐴡𐴌𐴡 𐴀𐴞𐴔𐴝𐴔 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤 𐴏𐴝𐴊𐴟𐴑𐴝𐴥𐴘 𐴉𐴞𐴥𐴌𐴑𐴝𐴌 𐴔𐴝𐴕𐴟𐴥𐴙𐴐𐴢, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴌𐴞𐴐𐴠𐴥 𐴉𐴟𐴌𐴝𐴘𐴧𐴝 𐴀𐴡𐴥𐴘𐴒𐴞𐴘𐴡𐴘.18𐴀𐴞𐴥𐴃𐴝𐴌𐴝 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴐𐴡𐴥𐴌𐴑𐴝𐴌𐴞 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴠.19𐴔𐴡𐴕𐴃𐴡𐴌 𐴌𐴝𐴙𐴃𐴧𐴝 𐴔𐴝𐴁𐴟𐴊𐴡𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴎𐴞𐴘𐴡𐴥𐴓𐴡𐴌 𐴊𐴡𐴌𐴡𐴎𐴝 𐴑𐴟𐴥𐴓𐴞 𐴀𐴞𐴥𐴃𐴝𐴌𐴝𐴌𐴠 𐴁𐴝𐴀𐴌𐴠 𐴕𐴠𐴦𐴓𐴝𐴘 𐴀𐴝𐴕𐴞𐴤 𐴈𐴡𐴀𐴌 𐴊𐴠,20”𐴎𐴡𐴦, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴞𐴥𐴘𐴝𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠 𐴕𐴡𐴘𐴝 𐴎𐴞𐴕𐴊𐴞𐴒𐴞𐴌 𐴈𐴡𐴃𐴝𐴤 𐴁𐴠𐴒𐴧𐴟𐴥𐴕 𐴁𐴡𐴘𐴧𐴝𐴕 𐴒𐴡𐴌𐴡𐴤𐴒𐴡𐴘.“21𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴁𐴞𐴀𐴕𐴧𐴝 𐴏𐴡𐴥𐴀𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴒𐴡𐴥𐴓𐴞 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.𐴁𐴡𐴌𐴡 𐴀𐴞𐴔𐴝𐴔𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴠 𐴇𐴠𐴥𐴍𐴠 𐴉𐴡𐴀𐴣𐴏𐴞, 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴢 𐴄𐴞𐴥𐴘𐴝𐴌𐴠 𐴔𐴞𐴥𐴄𐴞𐴚 𐴒𐴡𐴌𐴞𐴥 𐴁𐴡𐴓𐴧𐴝 𐴋𐴝𐴙𐴑𐴧𐴠𐴥, 𐴘𐴝𐴥𐴕𐴞 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴔𐴟𐴌𐴟𐴁𐴧𐴞 𐴁𐴠𐴒𐴧𐴟𐴥𐴕 𐴀𐴡𐴌𐴠. 𐴃𐴝𐴌𐴉𐴡𐴌𐴠 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴎𐴞𐴘𐴡𐴥𐴓𐴡𐴃𐴧𐴟 𐴃𐴝𐴌𐴝𐴥𐴌 𐴇𐴝𐴣𐴏𐴠 𐴀𐴝𐴕𐴝𐴤 𐴎𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴉𐴡𐴀𐴣𐴏𐴝𐴘𐴧𐴠.22𐴓𐴠𐴑𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴇𐴠𐴥𐴍𐴠 𐴀𐴝𐴀𐴘𐴢, 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴎𐴞𐴘𐴡𐴥𐴓𐴢-𐴈𐴝𐴥𐴕𐴝𐴃𐴢 𐴓𐴡𐴦𐴃𐴢 𐴕𐴡𐴥 𐴉𐴝𐴦. 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴖𐴝𐴦𐴉𐴠𐴏𐴢 𐴎𐴝𐴘 𐴈𐴡𐴥𐴁𐴡𐴌 𐴊𐴞𐴥𐴘𐴠 𐴊𐴠,23”𐴀𐴝𐴣𐴀𐴌𐴝 𐴎𐴞𐴘𐴡𐴥𐴓𐴢-𐴈𐴝𐴥𐴕𐴝 𐴒𐴝𐴥𐴕 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴄𐴝𐴓𐴝 𐴔𐴝𐴙𐴅𐴧𐴝 𐴀𐴠𐴊𐴧𐴠 𐴊𐴡𐴌𐴡𐴎𐴝 𐴀𐴡𐴥𐴑𐴧𐴡𐴓𐴡𐴃𐴢 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴝 𐴓𐴡𐴦𐴃𐴢 𐴉𐴝𐴘𐴧𐴞𐴥, 𐴔𐴡𐴕𐴃𐴡𐴌 𐴊𐴡𐴌𐴡𐴎𐴝 𐴑𐴟𐴥𐴙𐴓𐴧𐴞 𐴌𐴝𐴥𐴌, 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤𐴑𐴞𐴘𐴡𐴌𐴠 𐴓𐴡𐴦𐴃𐴢 𐴕𐴡𐴥 𐴉𐴝𐴘.“24𐴇𐴞𐴥𐴘𐴝𐴕 𐴉𐴟𐴥𐴕𐴞 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴡𐴌 𐴔𐴝𐴎𐴞𐴥𐴘𐴠 𐴀𐴠𐴊𐴧𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴘𐴝𐴦 𐴑𐴞𐴦 𐴀𐴡𐴥𐴘𐴁𐴡 𐴇𐴡𐴘 𐴁𐴟𐴊𐴧𐴞𐴥 𐴇𐴝𐴥𐴌𐴝𐴘𐴧𐴝 𐴀𐴡𐴥𐴘𐴒𐴞𐴓𐴒𐴡𐴘.25𐴇𐴠𐴥𐴃𐴟𐴕𐴡𐴃𐴢 𐴀𐴠𐴎𐴧𐴡𐴕𐴠 𐴀𐴝𐴀𐴘𐴢 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴎𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴃𐴟𐴣𐴀𐴝𐴥𐴌𐴝 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴓𐴝, 𐴀𐴞𐴥𐴃𐴝𐴌𐴝 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴞𐴥𐴘𐴝𐴘 𐴔𐴝𐴙𐴕𐴐𐴡𐴥𐴌𐴠 𐴃𐴝𐴦𐴓𐴞𐴔 𐴊𐴠𐴌.“26𐴃𐴡𐴥𐴘 𐴇𐴠𐴥 𐴔𐴝𐴎𐴞𐴥 𐴖𐴝𐴘𐴠 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴘𐴎𐴝𐴘 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴖𐴝𐴦𐴉𐴠𐴏𐴢 𐴀𐴝𐴙𐴕𐴧𐴠𐴤, 𐴓𐴠𐴑𐴞𐴕 𐴁𐴡𐴓𐴝𐴎𐴟𐴌𐴞 𐴒𐴡𐴌𐴞𐴥 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴌𐴝𐴥 𐴔𐴝𐴙𐴕𐴐𐴠𐴥 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴞𐴁𐴡𐴥 𐴁𐴡𐴥𐴓𐴞 𐴋𐴡𐴦𐴌𐴝𐴀𐴙𐴓𐴢.27𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴀𐴝𐴕𐴞𐴤, 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴒𐴝𐴌𐴝𐴘𐴧𐴠. 𐴁𐴡𐴌𐴡 𐴀𐴞𐴔𐴝𐴔𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠,28”𐴀𐴝𐴣𐴀𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠 𐴕𐴝𐴔𐴠 𐴃𐴝𐴦𐴓𐴞𐴔 𐴕𐴡 𐴊𐴞 𐴁𐴡𐴓𐴧𐴝 𐴈𐴡𐴌𐴝𐴒𐴡𐴌𐴞 𐴀𐴟𐴥𐴣𐴐𐴞𐴘𐴝𐴌𐴞 𐴊𐴞𐴥𐴓𐴝𐴔, 𐴔𐴡𐴕𐴃𐴡𐴌 𐴃𐴡𐴀 𐴀𐴟𐴥𐴊𐴧𐴗𐴝 𐴊𐴠 𐴃𐴟𐴣𐴀𐴝𐴥𐴌𐴝𐴌 𐴃𐴝𐴦𐴓𐴞𐴔 𐴓𐴡𐴘 𐴅𐴠𐴌𐴟𐴥𐴏𐴝𐴓𐴠𐴔 𐴁𐴡𐴥𐴌𐴝𐴘𐴉𐴠𐴓𐴝𐴘𐴧𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌𐴠 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴓𐴡𐴖𐴢 𐴖𐴡𐴥𐴌 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴝𐴘𐴃𐴡 𐴏𐴡𐴀𐴌.“29𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌𐴠 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴞𐴕𐴏𐴝𐴥𐴕𐴡𐴌 𐴇𐴡𐴥𐴑𐴟𐴔 𐴔𐴝𐴕𐴝𐴌 𐴃𐴟𐴥𐴖𐴝𐴌𐴡 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴔𐴝𐴕𐴡𐴕 𐴉𐴡𐴥𐴌𐴡𐴏𐴢.30𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝𐴘𐴠 𐴀𐴞𐴏𐴝𐴤𐴌𐴠 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴑𐴟𐴥𐴌𐴟𐴐𐴡𐴃𐴢 𐴄𐴝𐴑𐴞 𐴔𐴝𐴌𐴞𐴉𐴠𐴥𐴓𐴝𐴘𐴓𐴝.31𐴀𐴞𐴥𐴁𐴝𐴌𐴠 𐴀𐴝𐴓𐴧𐴝𐴘𐴠 𐴏𐴡𐴥𐴊𐴧𐴝𐴌 𐴀𐴠𐴊𐴧𐴠 𐴕𐴠𐴅𐴝𐴃𐴊𐴡𐴘𐴝 𐴀𐴞𐴥𐴏𐴝𐴉𐴠 𐴕𐴞𐴎𐴡𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴁𐴝𐴥𐴌 𐴃𐴡𐴑𐴧𐴝 𐴊𐴞𐴦𐴘𐴠𐴥, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌𐴠 𐴃𐴡𐴖𐴝𐴥 𐴒𐴡𐴌𐴞𐴥𐴁𐴝𐴌 𐴀𐴠𐴊𐴧𐴠 𐴒𐴟𐴕𐴝𐴤 𐴔𐴝𐴉𐴢 𐴉𐴝𐴘𐴁𐴝𐴌 𐴔𐴡𐴑𐴝 𐴊𐴞𐴦 𐴉𐴝𐴌𐴠.32𐴀𐴝𐴣𐴀𐴌𐴝 𐴕𐴞𐴎𐴠 𐴇𐴞𐴥𐴀𐴕𐴡𐴌 𐴒𐴡𐴁𐴝𐴤 𐴀𐴝𐴏𐴞𐴤 𐴀𐴝𐴦𐴌 𐴂𐴝𐴑-𐴌𐴟𐴀 𐴘𐴡𐴥 𐴀𐴝𐴏𐴠𐴤, 𐴎𐴞𐴁𐴝𐴤𐴌𐴠 𐴀𐴝𐴓𐴧𐴝𐴘𐴠 𐴀𐴟𐴘𐴃𐴝𐴌𐴝𐴤𐴌𐴠 𐴊𐴞𐴦𐴘𐴠𐴥 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥.“33𐴇𐴞𐴥𐴘𐴝𐴕 𐴉𐴟𐴥𐴕𐴞 𐴃𐴝𐴌𐴝𐴥𐴃𐴧𐴟 𐴁𐴞𐴐𐴞𐴤 𐴒𐴟𐴐𐴧𐴝𐴤 𐴀𐴟𐴙𐴄𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴔𐴡𐴕𐴠𐴈𐴡𐴀𐴙𐴓𐴢.34𐴔𐴡𐴕𐴃𐴡𐴌 𐴒𐴝𐴔𐴝𐴓𐴞𐴘𐴠𐴓𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴉𐴠𐴥𐴌𐴡𐴐𐴞 𐴎𐴞𐴁𐴝𐴤 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴞𐴎𐴧𐴡𐴃𐴢 𐴒𐴡𐴙𐴃𐴧𐴡𐴥, 𐴘𐴡𐴥𐴒𐴧𐴗𐴝𐴘𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴃𐴞𐴥𐴘𐴝𐴘 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴀𐴠𐴏𐴧𐴝𐴥𐴃𐴡𐴓𐴧𐴝 𐴁𐴝𐴀𐴌𐴠 𐴕𐴠𐴦𐴓𐴝𐴘 𐴌𐴝𐴑𐴞𐴥𐴃𐴡.35𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤𐴌𐴠 𐴎𐴞𐴘𐴝𐴥𐴕 𐴒𐴡𐴙𐴃𐴧𐴡𐴥 𐴏𐴡𐴀𐴌 𐴇𐴞𐴥𐴘𐴝𐴕 𐴀𐴟𐴥𐴣𐴐𐴞𐴘𐴝𐴌𐴠 𐴒𐴡𐴙𐴅𐴧𐴡𐴥.36𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴦𐴌 𐴇𐴡𐴦𐴊𐴧𐴞𐴕 𐴀𐴝𐴒𐴠 𐴃𐴠𐴘𐴟𐴥𐴊𐴝𐴏𐴢 𐴈𐴡𐴀 𐴊𐴠 𐴀𐴞𐴥𐴃𐴠 𐴀𐴟𐴍𐴞𐴤, 𐴕𐴞𐴎𐴠 𐴀𐴠𐴒𐴧𐴗𐴝𐴤 𐴏𐴡𐴥𐴊𐴧𐴝𐴌 𐴇𐴡𐴘 𐴊𐴝𐴁𐴞 𐴒𐴡𐴙𐴅𐴧𐴞𐴥𐴓𐴢; 𐴀𐴝𐴦𐴌 𐴃𐴡𐴑𐴡𐴌𐴞𐴁𐴝𐴕 𐴏𐴝𐴙𐴌 𐴐𐴡𐴥𐴃𐴢 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌 𐴁𐴡𐴥𐴚𐴡𐴃𐴢 𐴐𐴡𐴥𐴌𐴞𐴑 𐴀𐴡𐴥𐴀𐴙𐴓𐴢. 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴘𐴠 𐴀𐴝𐴦𐴌 𐴀𐴞𐴥𐴃𐴝𐴌 𐴓𐴧𐴡𐴥𐴘 𐴁𐴡𐴥𐴚 𐴀𐴡𐴥𐴀𐴙𐴓𐴢 𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘𐴒𐴞𐴓𐴒𐴡𐴘 𐴀𐴝𐴦𐴌 𐴑𐴠𐴏𐴧𐴟𐴥 𐴀𐴡𐴥𐴘 𐴕𐴡𐴥 𐴉𐴝𐴌𐴠.37𐴀𐴞𐴥𐴃𐴠 𐴁𐴝𐴦𐴊𐴠, 𐴒𐴝𐴓𐴞𐴓𐴡𐴌 𐴘𐴡𐴇𐴟𐴥𐴊𐴝𐴘𐴠 𐴔𐴝𐴕𐴟𐴥𐴙𐴐𐴢 𐴏𐴠𐴌𐴝𐴥𐴚 𐴒𐴡𐴌𐴝𐴥 𐴎𐴝𐴌 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴟𐴍𐴞𐴤 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴕𐴞𐴎𐴡𐴌 𐴇𐴞𐴥𐴑𐴧𐴝 𐴒𐴡𐴌𐴞𐴥𐴉𐴠𐴓𐴝𐴙𐴓𐴢. 𐴀𐴞𐴥𐴃𐴝𐴌𐴠 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴘𐴠, 𐴀𐴝𐴦𐴌 𐴀𐴞𐴥𐴃𐴝𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴡𐴥 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘𐴒𐴞𐴓𐴒𐴡𐴘.38𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴀𐴠𐴇𐴡𐴥𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤𐴃𐴧𐴟 𐴊𐴟𐴌𐴠𐴥 𐴃𐴝𐴥𐴙𐴑𐴧𐴡; 𐴀𐴞𐴃𐴝𐴌𐴝𐴤 𐴎𐴡𐴒𐴧𐴡𐴥𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴞𐴃𐴝𐴌𐴝𐴤𐴌 𐴀𐴠𐴌𐴝𐴊𐴝 𐴀𐴠𐴊𐴧𐴠 𐴈𐴝𐴔 𐴀𐴞𐴕𐴏𐴝𐴥𐴕𐴡𐴌 𐴃𐴡𐴌𐴉𐴡𐴥𐴃𐴧𐴟 𐴊𐴠 𐴀𐴡𐴥, 𐴃𐴡𐴥𐴀𐴘𐴓𐴠 𐴇𐴞𐴥𐴀𐴕 𐴃𐴡 𐴕𐴝𐴐𐴢 𐴀𐴡𐴥𐴘𐴎𐴝𐴘𐴁𐴡𐴘.39𐴔𐴡𐴕𐴃𐴡𐴌 𐴎𐴡𐴊𐴞 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴊𐴠 𐴀𐴡𐴥, 𐴃𐴟𐴣𐴀𐴝𐴥𐴌𐴝 𐴀𐴞𐴃𐴝𐴌𐴝𐴤𐴌𐴠 𐴁𐴡𐴕 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴝𐴥. 𐴎𐴡𐴊𐴞 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴀𐴟𐴓𐴋𐴝 𐴓𐴝𐴌𐴝𐴥𐴘-𐴒𐴡𐴌𐴡𐴤𐴘𐴝 𐴄𐴡𐴥𐴀𐴌𐴞𐴁𐴝 𐴊𐴠 𐴁𐴝𐴕𐴝𐴤.“40𐴃𐴝𐴌𐴝𐴥 𐴒𐴝𐴔𐴝𐴓𐴞𐴘𐴠𐴓𐴡𐴌 𐴁𐴟𐴊𐴧𐴞𐴥 𐴊𐴡𐴥𐴙𐴅𐴧𐴠, 𐴀𐴝𐴦𐴌 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴁𐴟𐴥𐴃𐴡𐴌𐴠 𐴔𐴝𐴃𐴝𐴘𐴧𐴡𐴌𐴠 𐴏𐴡𐴀𐴣𐴑 𐴔𐴝𐴌𐴝 𐴁𐴝𐴘𐴧𐴠𐴥. 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴀𐴞𐴏𐴝𐴤𐴌 𐴕𐴝𐴔𐴠 𐴇𐴡𐴕𐴡𐴤 𐴈𐴡𐴃𐴝𐴤 𐴕𐴡 𐴈𐴡𐴘𐴃𐴡𐴤, 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴌𐴞𐴊𐴞𐴉𐴠𐴥𐴓𐴝𐴘𐴧𐴠.41𐴀𐴞𐴥𐴃𐴝𐴌𐴝 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴧𐴟 𐴎𐴝𐴘𐴁𐴝𐴐𐴧𐴡𐴥𐴃𐴢 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴏𐴝𐴤𐴌 𐴖𐴝𐴏𐴃𐴠𐴥 𐴁𐴠𐴀𐴞𐴎𐴧𐴡𐴃𐴢 𐴀𐴡𐴥𐴘𐴁𐴝𐴌 𐴓𐴝𐴦𐴘𐴠𐴑 𐴒𐴡𐴙𐴕𐴧𐴠𐴥.42𐴀𐴝𐴦𐴌 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥 𐴊𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴠𐴊𐴧𐴠 𐴒𐴡𐴥𐴌𐴠-𐴒𐴡𐴥𐴌𐴠 𐴎𐴝𐴘-𐴎𐴝𐴘 𐴓𐴝𐴒𐴝𐴃𐴝𐴌 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴀𐴠𐴊𐴧𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴑𐴞, 𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.
The Word for the World International