Read 𐴈𐴝𐴔𐴡𐴥𐴓𐴢 4

𐴈𐴝𐴔𐴡𐴥𐴓𐴢4

𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴢 𐴀𐴡𐴃𐴢

¹𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴘𐴧𐴝𐴕 𐴒𐴡𐴌𐴠𐴥𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴏𐴡𐴥𐴊𐴧𐴝𐴌, 𐴀𐴠𐴊𐴧𐴠 𐴏𐴝𐴊𐴟𐴑𐴝𐴥𐴘 𐴀𐴡𐴥𐴑𐴧𐴡𐴓𐴢 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.²𐴃𐴝𐴌𐴝𐴥 𐴁𐴞𐴐𐴞𐴤 𐴁𐴠𐴎𐴝𐴌 𐴀𐴡𐴥𐴘𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴔𐴝𐴙𐴕𐴐𐴡𐴥𐴌𐴠 𐴃𐴝𐴦𐴓𐴞𐴔 𐴊𐴠𐴌, 𐴀𐴝𐴦𐴌 𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴃𐴡𐴁𐴡𐴓𐴞𐴑 𐴒𐴡𐴌𐴠𐴥𐴌.³𐴃𐴡𐴥𐴘 𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴃𐴝𐴌𐴉𐴡𐴌 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴎𐴞𐴘𐴡𐴥𐴓𐴡𐴃𐴢 𐴌𐴝𐴙𐴑𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴓𐴝 𐴇𐴝𐴥𐴣𐴎𐴢 𐴀𐴡𐴥𐴘𐴒𐴞𐴓𐴒𐴡𐴘.⁴𐴔𐴡𐴕𐴃𐴡𐴌 𐴁𐴡𐴘𐴧𐴝𐴕 𐴉𐴟𐴥𐴙𐴕𐴧𐴠 𐴊𐴠 𐴈𐴠𐴥𐴕𐴃𐴟 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤𐴓𐴢, 𐴀𐴝𐴦𐴌 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴡𐴥𐴘 𐴃𐴡𐴑𐴡𐴌𐴞𐴁𐴝𐴕 𐴉𐴝𐴣𐴏𐴢 𐴀𐴝𐴥𐴎𐴝𐴌 𐴀𐴡𐴥𐴘𐴧𐴠.

⁵𐴃𐴝𐴌𐴉𐴡𐴌 𐴊𐴞𐴕، 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴢, 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴡𐴔𐴝 𐴀𐴡𐴥𐴘𐴧𐴠.⁶𐴇𐴠𐴥𐴍𐴠 𐴁𐴡𐴌𐴡 𐴀𐴞𐴔𐴝𐴔 𐴇𐴝𐴥𐴕𐴝𐴕 𐴀𐴝𐴐𐴧𐴞𐴥𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴑𐴝𐴥𐴘𐴧𐴝𐴉𐴝𐴏𐴢, 𐴘𐴡𐴇𐴝𐴥𐴕𐴧𐴝, 𐴀𐴠𐴊𐴧𐴠 𐴀𐴝𐴓𐴠𐴑𐴏𐴎𐴠𐴕𐴊𐴝𐴌 𐴀𐴡𐴥 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴁𐴡𐴌𐴡 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌 𐴀𐴡𐴙𐴕𐴧𐴡 𐴀𐴠𐴒𐴝𐴕𐴝-𐴒𐴟𐴙𐴐𐴧𐴞𐴥 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴐𐴧𐴞𐴥𐴓𐴢.⁷𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴔𐴝𐴎𐴠𐴥 𐴃𐴞𐴥𐴘𐴝𐴒𐴝𐴌𐴝𐴘 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴈𐴝𐴔 𐴘𐴝𐴀𐴕 𐴑𐴞𐴘𐴡𐴥𐴌 𐴃𐴝𐴦𐴑𐴡𐴃𐴠 𐴘𐴝𐴥 𐴇𐴝𐴌 𐴕𐴝𐴔𐴠 𐴒𐴡𐴙𐴅𐴧𐴡𐴥 𐴊𐴠𐴥؟“

⁸𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴘 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴡𐴥 𐴔𐴝𐴕𐴟𐴥𐴙𐴐𐴡𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢,⁹𐴀𐴝𐴣𐴀𐴌𐴝 𐴀𐴠𐴑 𐴓𐴠𐴚 𐴔𐴝𐴕𐴟𐴥𐴙𐴐𐴡𐴌𐴠 𐴁𐴝𐴥𐴓𐴝𐴘 𐴒𐴡𐴙𐴅𐴧𐴞𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴎𐴠𐴃𐴧𐴡𐴥𐴃𐴢 𐴘𐴡𐴥𐴒𐴧𐴗𐴝 𐴑𐴠𐴀𐴕𐴠 𐴒𐴡𐴔 𐴀𐴡𐴥𐴘𐴧𐴠 𐴈𐴡𐴀𐴘𐴢 𐴀𐴝𐴣𐴀𐴌𐴝𐴌𐴠 𐴎𐴠𐴌𐴝𐴥 𐴒𐴡𐴌𐴝𐴥 𐴎𐴝𐴌,¹⁰𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴘𐴝𐴀𐴕 𐴎𐴝𐴕𐴞𐴓𐴡 𐴊𐴠 𐴑𐴞, 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴕𐴝𐴏𐴝𐴥𐴌𐴞, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝𐴘𐴓𐴝 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴀𐴞𐴥𐴁𐴝𐴌 𐴕𐴝𐴔𐴠 𐴁𐴠 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴉𐴟𐴌𐴝𐴉𐴟𐴌𐴞 𐴒𐴡𐴔 𐴀𐴡𐴥𐴘 𐴀𐴠𐴍𐴠𐴥 𐴃𐴟𐴣𐴀𐴝𐴥𐴌𐴝𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴀𐴝𐴏𐴠𐴤.¹¹𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,’𐴎𐴠 𐴉𐴝𐴃𐴧𐴡𐴥𐴌 𐴃𐴟𐴣𐴀𐴝𐴥𐴌𐴝 𐴔𐴞𐴏𐴃𐴞𐴥𐴌𐴞 𐴀𐴡𐴥𐴑𐴧𐴡𐴓𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴞𐴥𐴓𐴝,𐴘𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴎𐴡𐴌𐴟𐴌𐴞 𐴉𐴝𐴃𐴧𐴡𐴥𐴌 𐴀𐴡𐴥𐴘𐴀𐴝𐴙𐴐𐴧𐴠.‘

¹²𐴕𐴠𐴅𐴝𐴃𐴢 𐴀𐴝𐴌 𐴇𐴡𐴕𐴡𐴤𐴑𐴞𐴘𐴡𐴌 𐴇𐴝𐴣𐴏𐴠 𐴉𐴝𐴦 𐴕𐴡 𐴎𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴡𐴌 𐴕𐴞𐴏𐴠 𐴀𐴞𐴕𐴏𐴝𐴥𐴕𐴡𐴌𐴠 𐴀𐴝𐴌 𐴇𐴡𐴕𐴡𐴤 𐴕𐴝𐴔 𐴊𐴞𐴦𐴘𐴝 𐴕𐴡𐴥 𐴎𐴝 𐴎𐴞𐴘𐴝𐴥𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴣𐴀𐴌𐴝 𐴕𐴠𐴅𐴝𐴃𐴢 𐴉𐴝𐴘 𐴉𐴝𐴙𐴃𐴧𐴝𐴔.“

¹³𐴎𐴠𐴣𐴃𐴧𐴠𐴥 𐴃𐴝𐴌𐴝𐴥 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌 𐴇𐴞𐴥𐴔𐴧𐴡𐴃𐴢 𐴊𐴠𐴙𐴑𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴁𐴠-𐴀𐴠𐴓𐴡𐴥𐴔𐴊𐴝𐴌 𐴀𐴠𐴊𐴧𐴠 𐴃𐴡𐴌𐴁𐴞𐴘𐴡𐴃𐴢 𐴏𐴝𐴥𐴌𐴝 𐴔𐴝𐴕𐴟𐴥𐴙𐴐𐴢 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥, 𐴃𐴝𐴌𐴝𐴥 𐴀𐴝𐴔𐴧𐴟𐴥𐴑 𐴀𐴡𐴥𐴘𐴒𐴞𐴘𐴡𐴘; 𐴃𐴝𐴌𐴉𐴡𐴌𐴠 𐴃𐴝𐴌𐴝𐴥 𐴀𐴡𐴥𐴃𐴢 𐴉𐴝𐴘𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.¹⁴𐴀𐴝𐴦𐴌 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴀𐴓𐴢, 𐴘𐴡𐴥𐴒𐴧𐴗𐴝𐴌𐴠 𐴎𐴠𐴃𐴧𐴡𐴥𐴃𐴢 𐴃𐴝𐴌𐴝𐴥 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘𐴧𐴝 𐴊𐴠𐴑𐴠𐴥𐴌, 𐴃𐴝𐴌𐴝𐴥𐴃𐴧𐴟 𐴀𐴞𐴥𐴃𐴝𐴌𐴝𐴌 𐴇𐴠𐴥𐴓𐴝𐴉𐴢 𐴈𐴡𐴘𐴁𐴝𐴥𐴌 𐴇𐴡𐴕𐴡𐴤 𐴈𐴡𐴃𐴝𐴤 𐴕𐴟 𐴀𐴝𐴐𐴧𐴞𐴥𐴓𐴢.¹⁵𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴧𐴟 𐴁𐴝𐴀𐴌𐴠 𐴕𐴠𐴦𐴓𐴞 𐴎𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴡𐴌𐴠 𐴃𐴝𐴌𐴝𐴥 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴁𐴞𐴘𐴝𐴏𐴝𐴕𐴝 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠,¹⁶𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴀𐴠 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤𐴌𐴠 𐴓𐴡𐴥𐴘 𐴑𐴞𐴦 𐴒𐴡𐴙𐴃𐴧𐴝𐴥𐴔؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴃𐴝𐴌𐴝𐴤 𐴎𐴠 𐴋𐴡𐴣𐴀𐴌 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴒𐴡𐴙𐴅𐴧𐴠𐴥, 𐴇𐴞𐴥𐴘𐴝𐴕 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴎𐴝𐴕𐴠, 𐴀𐴝𐴦𐴌 𐴀𐴝𐴣𐴀𐴌𐴝 𐴃𐴡 𐴇𐴞𐴥𐴘𐴝𐴕 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴕𐴡 𐴉𐴝𐴙𐴅𐴧𐴟𐴔.¹⁷𐴔𐴡𐴕𐴃𐴡𐴌 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴔𐴝𐴙𐴕𐴐𐴡𐴥𐴌 𐴁𐴟𐴥𐴃𐴡𐴌𐴠 𐴀𐴝𐴌 𐴕𐴡 𐴉𐴡𐴥𐴓𐴠 𐴉𐴝𐴥𐴕, 𐴀𐴠 𐴕𐴝𐴔𐴠 𐴇𐴡𐴕𐴡𐴤𐴑𐴞𐴘𐴡𐴌𐴠 𐴀𐴝𐴌 𐴇𐴡𐴕𐴡𐴤 𐴈𐴡𐴃𐴝𐴤 𐴕𐴡 𐴇𐴡𐴘 𐴁𐴡𐴓𐴧𐴝 𐴀𐴝𐴣𐴀𐴌𐴝 𐴀𐴞𐴃𐴝𐴌𐴝𐴤𐴌𐴠 𐴈𐴡𐴌𐴝𐴒𐴡𐴌𐴞 𐴀𐴟𐴥𐴣𐴐𐴞𐴘𐴝𐴌𐴞 𐴊𐴞𐴥.“

¹⁸𐴁𐴝𐴦𐴊𐴠 𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴔𐴝𐴃𐴝𐴘 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴀𐴞𐴏𐴝𐴤𐴌 𐴕𐴝𐴔𐴠 𐴀𐴝𐴌 𐴁𐴞𐴓𐴑𐴟𐴥𐴓𐴢 𐴑𐴠𐴏𐴧𐴟𐴥 𐴕𐴡 𐴈𐴡𐴘𐴃𐴡𐴤 𐴀𐴠𐴊𐴧𐴠 𐴇𐴡𐴕𐴡𐴤 𐴃𐴝𐴦𐴓𐴞𐴔 𐴕𐴡 𐴊𐴞𐴃𐴡.¹⁹𐴔𐴡𐴕𐴃𐴡𐴌 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴘𐴠 𐴃𐴝𐴌𐴝𐴥𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴉𐴝𐴥𐴘𐴏𐴠𐴓𐴝 𐴒𐴡𐴌𐴡𐴤, 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴇𐴡𐴕 𐴕𐴝𐴥𐴕 𐴏𐴡𐴥𐴘𐴧𐴞, 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴉𐴟𐴥𐴕𐴝 𐴕𐴠𐴥 𐴕𐴝𐴥𐴑𐴞 𐴀𐴝𐴓𐴧𐴝𐴌 𐴈𐴡𐴃𐴝𐴤 𐴉𐴟𐴥𐴕𐴝؟²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴎𐴞𐴀𐴕 𐴊𐴠𐴙𐴑𐴧𐴞𐴥 𐴀𐴠𐴊𐴧𐴠 𐴉𐴟𐴥𐴙𐴕𐴧𐴞 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤 𐴁𐴡𐴕 𐴒𐴡𐴌𐴞𐴥 𐴕𐴡 𐴉𐴝𐴙𐴅𐴧𐴟𐴔.“

²¹𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴀𐴝𐴌𐴡𐴤 𐴊𐴡𐴥𐴔𐴑𐴞 𐴀𐴡𐴥𐴑𐴧𐴡𐴓𐴢 𐴊𐴞 𐴁𐴝𐴦𐴊𐴠 𐴀𐴠𐴌𐴞𐴊𐴞𐴉𐴠𐴥𐴓𐴝𐴘𐴧𐴠. 𐴔𐴝𐴕𐴟𐴥𐴙𐴐𐴡𐴓𐴧𐴝 𐴁𐴡𐴥𐴓𐴞 𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴏𐴝𐴥𐴣𐴎𐴝 𐴊𐴞𐴥𐴁𐴝𐴌 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥 𐴕𐴡𐴥 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴘𐴝𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠 𐴇𐴞𐴥𐴘𐴝𐴕𐴡𐴌 𐴎𐴡𐴌𐴞𐴘𐴝 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴖𐴡𐴌𐴠 𐴒𐴡𐴔 𐴒𐴡𐴌𐴠𐴥 𐴊𐴠 𐴑𐴠𐴌𐴝𐴔𐴡𐴃𐴧𐴝𐴕 𐴒𐴡𐴌𐴝𐴥 𐴒𐴞𐴥𐴘𐴠, 𐴘𐴡𐴥𐴒𐴧𐴗𐴝𐴃𐴧𐴟 𐴏𐴝𐴓𐴞𐴐𐴢 𐴁𐴡𐴏𐴡𐴥𐴌𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴁𐴡𐴐𐴢 𐴀𐴡𐴥𐴘𐴧𐴠.

𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴠 𐴇𐴞𐴥𐴔𐴧𐴡𐴃𐴡𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴠𐴥

²³𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌𐴠 𐴀𐴠𐴌𐴞𐴊𐴞𐴘𐴠𐴥 𐴔𐴡𐴃𐴧𐴡𐴌, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌𐴠 𐴎𐴞𐴀𐴕 𐴈𐴡𐴘𐴧𐴠𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴎𐴝𐴕𐴝𐴘𐴧𐴠𐴥.²⁴𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴀𐴠𐴑𐴃𐴡𐴉𐴝𐴥𐴑 𐴀𐴡𐴥𐴘 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴁𐴝𐴏𐴢 𐴃𐴟𐴓𐴞𐴤 𐴊𐴟𐴖𐴝 𐴒𐴡𐴌𐴠𐴥𐴌 𐴊𐴠, ”𐴘𐴝 𐴔𐴝𐴓𐴞𐴑, 𐴀𐴝𐴏𐴔𐴝𐴕, 𐴎𐴡𐴁𐴞𐴕، 𐴊𐴡𐴌𐴞𐴘𐴝 𐴀𐴠𐴊𐴧𐴠 𐴇𐴞𐴥𐴀𐴕𐴡𐴌 𐴁𐴟𐴥𐴃𐴡𐴌𐴠 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴃𐴟𐴀𐴛 𐴀𐴠𐴥𐴕𐴝 𐴉𐴡𐴘𐴊𐴝 𐴒𐴡𐴙𐴅𐴧𐴡𐴥.²⁵𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴒𐴟𐴓𐴝𐴔 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴊𐴝𐴖𐴟𐴊𐴡𐴌 𐴔𐴟𐴑𐴠𐴥 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴈𐴡𐴀𐴘𐴓𐴝 𐴊𐴠,’𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴑𐴞𐴘𐴝𐴥 𐴌𐴝𐴑 𐴀𐴡𐴥𐴘𐴧𐴠؟𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴁𐴠𐴇𐴝𐴌 𐴏𐴝𐴙𐴓𐴢 𐴑𐴞𐴘𐴝𐴥 𐴒𐴡𐴌𐴠𐴥𐴌؟²⁶𐴊𐴟𐴕𐴞𐴘𐴝𐴙𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴢 𐴃𐴡𐴘𐴧𐴝𐴌 𐴀𐴡𐴥𐴘𐴧𐴠,𐴀𐴝𐴦𐴌 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴢 𐴉𐴟𐴥𐴖𐴝𐴣𐴃𐴞 𐴔𐴞𐴓𐴞 𐴎𐴡𐴔𐴝 𐴀𐴡𐴥𐴘𐴧𐴠𐴔𐴝𐴁𐴟𐴊𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴡𐴀𐴏𐴞𐴤𐴌 𐴀𐴟𐴓𐴋𐴝.‘

²⁷𐴃𐴟𐴣𐴀𐴝𐴥𐴣𐴌 𐴂𐴝𐴑 𐴒𐴟𐴓𐴝𐴔 𐴀𐴞𐴏𐴝𐴤, 𐴎𐴞𐴁𐴝𐴤𐴌𐴠 𐴃𐴟𐴀𐴛 𐴁𐴝𐴏𐴞𐴥𐴓𐴡𐴘𐴓𐴝, 𐴀𐴞𐴥𐴁𐴝𐴌 𐴀𐴟𐴓𐴋𐴝 𐴈𐴠𐴥𐴌𐴟𐴊𐴠 𐴀𐴠𐴊𐴧𐴠 𐴂𐴡𐴕𐴃𐴞𐴘𐴟𐴏𐴢 𐴉𐴞𐴓𐴝𐴃𐴠 𐴁𐴠𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴉𐴟𐴥𐴖𐴝𐴣𐴃𐴞 𐴀𐴠 𐴐𐴡𐴥𐴀𐴌𐴡𐴃𐴢 𐴎𐴡𐴔𐴝 𐴀𐴡𐴥𐴀𐴙𐴓𐴢,²⁸𐴀𐴟𐴀𐴙𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴎𐴞𐴀𐴕 𐴀𐴡𐴥𐴘𐴁𐴝𐴌 𐴉𐴝𐴥𐴘𐴏𐴠𐴓𐴝 𐴃𐴟𐴀𐴛 𐴀𐴝𐴒𐴠 𐴓𐴡𐴥𐴃𐴞 𐴕𐴞𐴎𐴡𐴌 𐴑𐴟𐴊𐴟𐴌𐴟𐴃𐴠 𐴀𐴠𐴊𐴧𐴠 𐴔𐴡𐴕𐴐𐴝𐴥𐴘𐴠 𐴒𐴡𐴌𐴞𐴥 𐴌𐴝𐴙𐴑𐴧𐴞𐴥𐴓𐴝.²⁹𐴘𐴝𐴓𐴝, 𐴀𐴡𐴥 𐴔𐴝𐴁𐴟𐴊𐴢, 𐴀𐴞𐴥𐴃𐴝𐴌𐴝𐴌 𐴊𐴡𐴥𐴔𐴑𐴞𐴌𐴠 𐴏𐴡𐴀, 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌 𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴕𐴊𐴞𐴓𐴧𐴝 𐴃𐴡𐴖𐴉𐴞𐴥𐴑 𐴊𐴡𐴦 𐴊𐴠 𐴑𐴞, 𐴀𐴞𐴥𐴃𐴝𐴌𐴝 𐴎𐴠𐴕 𐴉𐴟𐴌𐴝𐴉𐴟𐴌𐴞 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴃𐴟𐴣𐴀𐴝𐴥𐴣𐴌 𐴑𐴝𐴓𐴝𐴔 𐴈𐴡𐴀𐴘𐴢 𐴉𐴝𐴌𐴠.³⁰𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴢 𐴁𐴝𐴌𐴡𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴣𐴌 𐴂𐴝𐴑 𐴒𐴟𐴓𐴝𐴔 𐴀𐴞𐴏𐴝𐴤𐴌 𐴕𐴝𐴔𐴠 𐴀𐴞𐴥𐴃𐴝𐴌𐴝 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴌𐴞𐴥 𐴉𐴝𐴌𐴠, 𐴀𐴝𐴦𐴌 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘 𐴉𐴝𐴌𐴠.“

³¹𐴀𐴞𐴥𐴃𐴝𐴌𐴝𐴃𐴧𐴟 𐴊𐴟𐴖𐴝 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠 𐴌𐴝𐴥𐴌, 𐴀𐴞𐴥𐴃𐴝𐴌𐴝 𐴎𐴠 𐴎𐴝𐴒𐴝 𐴒𐴝𐴥𐴕𐴡𐴃𐴢 𐴎𐴡𐴔𐴝 𐴀𐴝𐴐𐴧𐴞𐴥𐴓𐴢 𐴇𐴞𐴥𐴘𐴝𐴕 𐴇𐴝𐴉𐴞 𐴀𐴟𐴙𐴄𐴧𐴠𐴥. 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴔𐴞𐴓𐴞𐴎𐴟𐴥𐴓𐴞 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴃𐴧𐴡𐴥

³²𐴃𐴝𐴔𐴝𐴥𐴔 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴊𐴞𐴓𐴠 𐴔𐴡𐴕𐴠 𐴀𐴠𐴑 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴕𐴞𐴎𐴡𐴌 𐴏𐴞𐴎𐴡𐴌𐴠 𐴕𐴞𐴎𐴡𐴌 𐴁𐴡𐴓𐴞 𐴊𐴝𐴁𐴞 𐴕𐴡 𐴒𐴡𐴙𐴃𐴧𐴡𐴥, 𐴁𐴡𐴥𐴓𐴑𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴔𐴞𐴓𐴞𐴎𐴟𐴥𐴓𐴞 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴃𐴧𐴡𐴥.³³𐴀𐴝𐴦𐴌 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴋𐴡𐴣𐴀𐴌 𐴑𐴟𐴊𐴟𐴌𐴟𐴃𐴡𐴌 𐴏𐴝𐴥𐴀𐴣𐴃𐴠 𐴒𐴡𐴁𐴝𐴤 𐴊𐴞𐴥𐴘𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴀𐴡𐴥𐴊𐴡𐴌𐴁𐴝𐴀𐴌𐴝 𐴀𐴝𐴐𐴧𐴞𐴥𐴓𐴢.³⁴𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴎𐴧𐴡𐴕 𐴀𐴡𐴥 𐴔𐴟𐴀𐴃𐴝𐴐𐴡𐴃𐴢 𐴕𐴟 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴝𐴌𐴝𐴤 𐴎𐴝𐴒𐴝-𐴎𐴡𐴁𐴞𐴕𐴡𐴌 𐴘𐴝𐴥 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴇𐴞𐴥𐴀𐴕 𐴁𐴠𐴏𐴞𐴘𐴡𐴌𐴠 𐴄𐴞𐴛𐴝-𐴉𐴡𐴘𐴐𐴝𐴤 𐴉𐴝𐴘𐴃𐴡 𐴊𐴠 𐴇𐴞𐴥𐴀𐴕 𐴀𐴝𐴙𐴕𐴃𐴡𐴤,³⁵𐴀𐴝𐴦𐴌 𐴀𐴝𐴕𐴞𐴤𐴘𐴡𐴌𐴠 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴌𐴝𐴑𐴞𐴥𐴃𐴡, 𐴁𐴝𐴦𐴊𐴠 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴎𐴡𐴌𐴟𐴌𐴡𐴃𐴢 𐴔𐴡𐴎𐴞𐴕 𐴁𐴝𐴍𐴞𐴊𐴞𐴘𐴝 𐴎𐴝𐴘𐴃𐴡.

³⁶𐴇𐴠𐴥𐴍𐴠 𐴓𐴠𐴀𐴜𐴞𐴌 𐴈𐴝𐴥𐴀𐴕𐴊𐴝𐴕𐴡𐴃𐴧𐴟 𐴘𐴟𐴏𐴟𐴥𐴉𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤 𐴏𐴝𐴥𐴘𐴉𐴌𐴟𐴏𐴢 𐴋𐴞𐴘𐴝𐴃𐴢 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢, 𐴎𐴞𐴁𐴝𐴤𐴌 𐴕𐴝𐴔 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴁𐴝𐴥𐴌𐴕𐴝𐴁𐴝𐴏𐴢 𐴊𐴞𐴥𐴘𐴠 𐴎𐴞𐴘𐴝𐴥𐴕𐴡𐴌 𐴃𐴡𐴌𐴅𐴟𐴔𐴝 𐴀𐴡𐴥𐴙𐴓𐴊𐴠, 𐴅𐴡𐴏𐴁𐴝-𐴊𐴡𐴦𐴘𐴝.³⁷𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴎𐴝𐴒𐴝 𐴀𐴠𐴑𐴧𐴝𐴥𐴕 𐴁𐴠𐴏𐴞, 𐴄𐴞𐴛𐴝 𐴒𐴟𐴥𐴕 𐴀𐴝𐴕𐴞𐴤 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴌𐴝𐴙𐴑𐴧𐴠𐴥𐴒𐴝𐴘.

The Word for the World International

https://app.library.bible/content/87faca8b51c22590