Read 𐴈𐴝𐴔𐴡𐴥𐴓𐴢 3

𐴈𐴝𐴔𐴡𐴥𐴓𐴢3

𐴀𐴠𐴎𐴧𐴡𐴕 𐴓𐴠𐴚 𐴔𐴝𐴕𐴟𐴥𐴙𐴐𐴢 𐴒𐴡𐴔 𐴀𐴡𐴥𐴘𐴧𐴠

¹𐴀𐴠𐴑 𐴊𐴞𐴕 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝 𐴊𐴟𐴖𐴝𐴌 𐴀𐴡𐴑𐴃𐴡𐴥𐴃𐴢, 𐴘𐴝𐴥𐴕𐴞 𐴃𐴞𐴕 𐴕𐴗𐴝𐴥 𐴁𐴝𐴥𐴎𐴠, 𐴖𐴡𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴎𐴝𐴦𐴌.²𐴇𐴠𐴥𐴍𐴠 𐴀𐴠𐴥𐴎𐴧𐴡𐴕 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴓𐴠𐴚 𐴔𐴝𐴕𐴟𐴥𐴙𐴐𐴡𐴌𐴠 𐴔𐴝𐴙𐴕𐴐𐴠𐴥 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴐𐴟𐴥𐴕𐴊𐴡𐴌 𐴕𐴝𐴔𐴡𐴌 𐴊𐴡𐴌𐴡𐴎𐴝𐴃𐴢 𐴀𐴝𐴕𐴞𐴤 𐴉𐴡𐴃𐴧𐴞𐴥 𐴊𐴞𐴕 𐴁𐴟𐴀𐴝𐴥𐴒𐴝𐴌𐴝𐴘 𐴌𐴝𐴑𐴞𐴥𐴃𐴡, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴒𐴡𐴥𐴓𐴠 𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴥𐴌𐴝𐴃𐴢 𐴔𐴝𐴒𐴞 𐴉𐴝𐴌𐴠.³𐴘𐴡𐴥𐴒𐴧𐴗𐴝𐴘𐴠 𐴎𐴠𐴣𐴃𐴧𐴠𐴥 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴠𐴌 𐴊𐴠 𐴊𐴠𐴙𐴑𐴧𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴥𐴌𐴝𐴃𐴢 𐴔𐴝𐴙𐴒𐴧𐴠𐴥.⁴𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴘𐴠 𐴘𐴡𐴥𐴒𐴧𐴗𐴝𐴌 𐴀𐴟𐴎𐴟 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌 𐴇𐴞𐴥𐴑𐴧𐴝 𐴏𐴡𐴀!“⁵𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴑𐴠𐴏𐴧𐴟𐴥 𐴉𐴝𐴘𐴁𐴝𐴌 𐴀𐴝𐴐𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴀𐴟𐴎𐴟 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴀𐴘𐴢 𐴃𐴝𐴥𐴙𐴑𐴧𐴞𐴓𐴢.

⁶𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴃𐴧𐴟 𐴃𐴡 𐴐𐴟𐴥𐴕𐴝-𐴐𐴝𐴣𐴊𐴞 𐴕𐴝𐴥𐴘, 𐴔𐴡𐴕𐴃𐴡𐴌 𐴎𐴞𐴘𐴝𐴥𐴕 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴣𐴌𐴠 𐴊𐴞𐴦𐴌. 𐴕𐴝𐴏𐴝𐴥𐴌𐴞 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴀𐴟𐴍𐴞𐴤 𐴀𐴝𐴥𐴣𐴍𐴡!“⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌 𐴊𐴠𐴕 𐴀𐴝𐴥𐴃𐴧𐴝𐴕 𐴊𐴡𐴥𐴌𐴞 𐴘𐴡𐴥𐴒𐴧𐴗𐴝𐴌𐴠 𐴃𐴟𐴙𐴓𐴧𐴠𐴥, 𐴀𐴝𐴦𐴌 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴘𐴡𐴥𐴒𐴧𐴗𐴝𐴌 𐴄𐴠𐴥𐴚𐴠 𐴀𐴠𐴊𐴧𐴠 𐴏𐴟𐴓𐴒𐴞𐴌𐴝𐴤𐴘𐴠 𐴁𐴡𐴓𐴢 𐴉𐴝𐴘𐴧𐴠𐴥.⁸𐴘𐴡𐴥𐴒𐴧𐴗𐴝 𐴉𐴝𐴥𐴓𐴢 𐴔𐴝𐴌𐴞 𐴃𐴞𐴥𐴘𐴝𐴘 𐴀𐴝𐴥𐴣𐴍𐴝𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴠𐴊𐴧𐴠 𐴉𐴝𐴥𐴓𐴢 𐴔𐴝𐴌𐴞-𐴔𐴝𐴌𐴞 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘.⁹𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝 𐴀𐴝𐴥𐴣𐴍𐴠𐴌 𐴊𐴠 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴠𐴥𐴌 𐴊𐴠 𐴊𐴠𐴑𐴞𐴥,¹⁰𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠, 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴐𐴟𐴥𐴕𐴊𐴡𐴌 𐴕𐴝𐴔𐴡𐴌 𐴊𐴡𐴌𐴡𐴎𐴝𐴃𐴢 𐴁𐴡𐴀𐴘𐴢 𐴇𐴡𐴥𐴌𐴝𐴃𐴢 𐴔𐴝𐴒𐴞𐴃𐴡𐴥. 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴎𐴞𐴘𐴝𐴥𐴕 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴃𐴝𐴦𐴅𐴟𐴂𐴢 𐴀𐴠𐴊𐴧𐴠 𐴀𐴝𐴔𐴧𐴟𐴥𐴑 𐴀𐴡𐴥𐴘𐴒𐴞𐴘𐴡𐴘.

𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴉𐴞𐴃𐴡𐴌𐴡𐴌 𐴃𐴡𐴁𐴡𐴓𐴞𐴑

¹¹𐴘𐴡𐴥𐴒𐴧𐴗𐴝 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌 𐴉𐴞𐴏𐴝𐴥 𐴊𐴡𐴥𐴌𐴞 𐴀𐴝𐴐𐴧𐴞𐴥𐴓𐴢. 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴀𐴞𐴥𐴃𐴝𐴌𐴝𐴌 𐴀𐴞𐴥𐴣𐴘𐴡𐴃𐴢 𐴊𐴟𐴣𐴌𐴞 𐴒𐴞𐴦𐴘𐴠𐴥, 𐴎𐴠 𐴎𐴝𐴒𐴝 𐴒𐴝𐴥𐴕𐴡𐴌𐴠 𐴏𐴡𐴥𐴓𐴡𐴔𐴝𐴕𐴡𐴌 𐴁𐴝𐴦𐴕𐴋𐴝 𐴈𐴡𐴀.¹²𐴇𐴞𐴥𐴘𐴝𐴕 𐴊𐴠𐴑𐴞𐴥 𐴉𐴞𐴃𐴡𐴌𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴘𐴝𐴀𐴕𐴡𐴌 𐴖𐴡𐴌𐴠 𐴃𐴝𐴦𐴅𐴟𐴂𐴢 𐴑𐴞𐴘𐴝𐴥 𐴀𐴡𐴥𐴘𐴧𐴡؟ 𐴀𐴝𐴣𐴀𐴌𐴝 𐴘𐴡𐴒𐴧𐴗𐴝𐴥𐴌𐴠 𐴀𐴝𐴣𐴀𐴌𐴝𐴌 𐴃𐴝𐴦𐴑𐴡𐴃𐴠 𐴘𐴝𐴥 𐴊𐴞𐴕𐴊𐴝𐴥𐴌𐴞𐴘𐴠 𐴀𐴝𐴥𐴣𐴍𐴝𐴙𐴌 𐴉𐴝𐴥𐴚𐴒𐴡𐴌𐴞 𐴑𐴞𐴘𐴝𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴇𐴞𐴥𐴑𐴧𐴝 𐴏𐴟𐴑 𐴋𐴡𐴣𐴀𐴌 𐴒𐴡𐴌𐴞𐴥 𐴏𐴝𐴀𐴘𐴢 𐴃𐴝𐴥𐴙𐴑𐴧𐴡؟¹³𐴀𐴞𐴁𐴌𐴝𐴇𐴞𐴥𐴔 𐴀𐴡𐴌, 𐴀𐴞𐴏𐴝𐴈𐴝𐴥𐴑 𐴀𐴡𐴌, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴀𐴝𐴓𐴧𐴝 𐴘𐴠, 𐴘𐴝𐴥𐴕𐴞 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌 𐴒𐴟𐴓𐴝𐴔 𐴀𐴞𐴏𐴝𐴤𐴌𐴠 𐴔𐴡𐴈𐴞𐴥𐴔𐴝 𐴊𐴞𐴦𐴘𐴠𐴥. 𐴃𐴟𐴣𐴀𐴝𐴥𐴌𐴝 𐴊𐴠 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴊𐴡𐴥𐴌𐴞 𐴊𐴞𐴥𐴓𐴝, 𐴀𐴝𐴦𐴌 𐴉𐴞𐴓𐴝𐴃𐴠 𐴀𐴞𐴥𐴁𐴝𐴌𐴠 𐴀𐴠𐴌𐴞𐴊𐴞 𐴁𐴡𐴓𐴧𐴝 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥 𐴁𐴝𐴦𐴊𐴠 𐴘𐴡 𐴃𐴟𐴣𐴀𐴝𐴥𐴌𐴝 𐴘𐴡𐴥𐴒𐴧𐴗𐴝𐴌 𐴔𐴟𐴀𐴕𐴃𐴟 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴞𐴥𐴓𐴝.¹⁴𐴃𐴟𐴣𐴀𐴝𐴥𐴌𐴝 𐴇𐴠𐴥 𐴂𐴝𐴑 𐴀𐴠𐴊𐴧𐴠 𐴀𐴞𐴕𐴏𐴝𐴥𐴉𐴖𐴝𐴓𐴝 𐴖𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴀𐴠𐴎𐴧𐴡𐴕 𐴑𐴟𐴥𐴕𐴞𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴠𐴌𐴞𐴊𐴞 𐴁𐴡𐴓𐴧𐴝 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴝.¹⁵𐴃𐴟𐴣𐴀𐴝𐴥𐴌𐴝 𐴎𐴞𐴕𐴊𐴞𐴒𐴞𐴌 𐴔𐴝𐴓𐴞𐴑𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴓𐴝, 𐴓𐴠𐴑𐴞𐴕 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥. 𐴀𐴝𐴣𐴀𐴌𐴝 𐴇𐴞𐴥𐴘𐴝𐴕𐴡𐴌 𐴒𐴡𐴁𐴝𐴤 𐴀𐴝𐴏𐴞𐴤.¹⁶𐴀𐴞𐴏𐴝𐴤𐴌 𐴕𐴝𐴔𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴁𐴡𐴓𐴢 𐴉𐴝𐴘𐴧𐴠𐴥, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴊𐴠𐴑𐴡𐴥𐴌 𐴀𐴝𐴦𐴌 𐴏𐴞𐴕𐴡𐴥. 𐴀𐴞𐴏𐴝𐴤𐴌 𐴀𐴟𐴏𐴞𐴥𐴓𐴝𐴘𐴠 𐴎𐴠 𐴀𐴞𐴔𐴝𐴕 𐴀𐴝𐴘𐴧𐴠𐴤 𐴇𐴞𐴥𐴘𐴝𐴕𐴠 𐴘𐴡𐴒𐴧𐴗𐴝𐴥𐴌𐴠 𐴉𐴟𐴌𐴝𐴉𐴟𐴌𐴞 𐴒𐴡𐴔 𐴒𐴡𐴙𐴅𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴊𐴠𐴑𐴡𐴥𐴌.

¹⁷”𐴘𐴝𐴓𐴝, 𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴀𐴝𐴀𐴛 𐴎𐴝𐴕𐴞 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴕𐴡 𐴁𐴟𐴎𐴞𐴥 𐴇𐴞𐴥𐴘𐴝𐴕 𐴒𐴡𐴙𐴅𐴧𐴞𐴥𐴓𐴝.¹⁸𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴇𐴞𐴥𐴘𐴝𐴕 𐴓𐴡𐴥𐴘 𐴖𐴝𐴀𐴕 𐴉𐴟𐴌𐴝 𐴒𐴡𐴙𐴅𐴧𐴠𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴃𐴝𐴔𐴝𐴥𐴔 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴔𐴟𐴑𐴠𐴥 𐴀𐴝𐴒𐴠 𐴓𐴡𐴥𐴃𐴞 𐴁𐴡𐴘𐴧𐴝𐴕 𐴒𐴡𐴙𐴅𐴧𐴞𐴥𐴓𐴢, 𐴑𐴞 𐴈𐴡𐴘𐴓𐴠𐴥, 𐴀𐴞𐴥𐴁𐴝𐴌 𐴔𐴡𐴀𐴏𐴞𐴤𐴘𐴠 𐴊𐴟𐴑 𐴉𐴝𐴘𐴁𐴡.¹⁹𐴇𐴠𐴥𐴃𐴡𐴓𐴧𐴝 𐴃𐴡𐴖𐴝𐴥 𐴒𐴡𐴌𐴡𐴤, 𐴀𐴝𐴦𐴌 𐴀𐴝𐴓𐴧𐴝𐴌 𐴀𐴟𐴎𐴟 𐴉𐴞𐴥𐴌𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴒𐴟𐴕𐴝𐴤 𐴉𐴟𐴣𐴏𐴞𐴥𐴉𐴠𐴓𐴝 𐴎𐴝. 𐴃𐴡𐴥𐴘 𐴔𐴝𐴁𐴟𐴊𐴡𐴌 𐴃𐴡𐴌𐴉𐴡𐴥𐴃𐴧𐴟 𐴉𐴡𐴄𐴉𐴡𐴙𐴄𐴧𐴝 𐴒𐴡𐴌𐴞𐴥𐴁𐴝𐴌 𐴀𐴡𐴑𐴃𐴡𐴥 𐴀𐴝𐴘𐴁𐴡𐴤,²⁰𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴞𐴏𐴝𐴤 𐴌𐴠, 𐴘𐴝𐴥𐴕𐴞 𐴔𐴡𐴀𐴏𐴞𐴤𐴌𐴠 𐴊𐴞𐴉𐴠𐴍𐴝𐴥𐴘𐴁𐴡, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴒𐴠 𐴓𐴡𐴥𐴃𐴞 𐴁𐴝𐴏𐴞𐴥𐴓𐴡𐴖𐴝 𐴒𐴞𐴥𐴘𐴠.²¹𐴇𐴝𐴥𐴀𐴌 𐴑𐴠𐴏𐴧𐴟𐴥 𐴕𐴡𐴘𐴝 𐴒𐴡𐴌𐴞 𐴁𐴝𐴕𐴝𐴘𐴁𐴝𐴥𐴌 𐴀𐴡𐴑𐴃𐴡𐴥 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴀𐴞𐴏𐴝𐴤𐴃𐴧𐴟 𐴀𐴝𐴏𐴔𐴝𐴕𐴡𐴃𐴢 𐴃𐴝𐴥𐴑𐴝 𐴉𐴡𐴌𐴞𐴁𐴡𐴥, 𐴎𐴠𐴕𐴊𐴞𐴓𐴧𐴝 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴂𐴝𐴑 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴔𐴟𐴑𐴠𐴥 𐴁𐴡𐴀𐴗𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴈𐴡𐴀𐴙𐴓𐴢.²²𐴔𐴟𐴀𐴏𐴝𐴘𐴠 𐴈𐴡𐴀𐴙𐴓𐴢 𐴊𐴠, ’𐴃𐴟𐴣𐴀𐴝𐴥𐴌𐴝𐴌 𐴔𐴝𐴁𐴟𐴊𐴢 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴁𐴟𐴥𐴃𐴡𐴃𐴧𐴟 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴀𐴠𐴥𐴎𐴧𐴡𐴕 𐴕𐴡𐴁𐴞 𐴃𐴟𐴓𐴞𐴤𐴁𐴡; 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴈𐴡𐴀 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴥𐴕𐴝 𐴉𐴡𐴌𐴞𐴁𐴡𐴥.²³𐴀𐴝𐴦𐴌 𐴀𐴠𐴀𐴕 𐴀𐴡𐴥𐴘𐴁𐴡, 𐴎𐴠𐴦𐴕𐴞𐴑𐴞 𐴇𐴠𐴥 𐴕𐴡𐴁𐴞𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴕𐴞𐴁𐴡, 𐴀𐴞𐴥𐴃𐴝𐴌𐴠 𐴀𐴝𐴓𐴧𐴝𐴌 𐴕𐴞𐴎𐴡𐴌 𐴁𐴡𐴕𐴊𐴝𐴃𐴧𐴟 𐴀𐴠𐴑𐴧𐴟𐴖𐴝𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝 𐴎𐴝𐴘𐴁𐴡.‘

²⁴”𐴁𐴠𐴐𐴡𐴥𐴑, 𐴏𐴠𐴥𐴔𐴟𐴀𐴠𐴓𐴡𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴎𐴠𐴊𐴟𐴥𐴕 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴑𐴝𐴓𐴝𐴔 𐴈𐴡𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴠 𐴊𐴞𐴕 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴘𐴡𐴥 𐴁𐴡𐴘𐴧𐴝𐴕 𐴒𐴡𐴙𐴅𐴧𐴞𐴥𐴓𐴢.²⁵𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴎𐴠 𐴌𐴝𐴎𐴞𐴕𐴝𐴔𐴝 𐴒𐴡𐴙𐴅𐴧𐴞𐴥𐴓𐴢 𐴇𐴞𐴥𐴘𐴝𐴕𐴡𐴌 𐴉𐴟𐴀𐴝𐴙𐴕. 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴈𐴡𐴀𐴙𐴓𐴢 𐴊𐴠, ’𐴃𐴡𐴌 𐴕𐴡𐴏𐴡𐴥𐴓𐴡𐴌 𐴊𐴟𐴖𐴝𐴌𐴝 𐴊𐴟𐴕𐴞𐴘𐴝𐴙𐴌 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴠 𐴌𐴝𐴇𐴝𐴥𐴔𐴡𐴃𐴢 𐴉𐴝𐴘𐴁𐴡.‘ ²⁶𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴒𐴟𐴓𐴝𐴔 𐴀𐴞𐴏𐴝𐴤𐴌𐴠 𐴁𐴝𐴏𐴞𐴥, 𐴀𐴝𐴒𐴡𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴟𐴌𐴝𐴙𐴌 𐴌𐴝𐴏𐴃𐴝𐴃𐴧𐴟 𐴉𐴞𐴥𐴌𐴝𐴘 𐴌𐴝𐴇𐴝𐴥𐴔𐴡𐴃𐴢 𐴊𐴠𐴦.“

The Word for the World International

https://app.library.bible/content/87faca8b51c22590