Read 𐴈𐴝𐴔𐴡𐴥𐴓𐴢 2

𐴈𐴝𐴔𐴡𐴥𐴓𐴢2

𐴂𐴝𐴑-𐴌𐴟𐴀 𐴀𐴝𐴙𐴐𐴧𐴠𐴥

¹𐴎𐴠𐴣𐴃𐴧𐴠𐴥 𐴂𐴠𐴕𐴄𐴞𐴑𐴡𐴏𐴢 𐴀𐴞𐴊𐴡𐴌 𐴊𐴞𐴕 𐴀𐴝𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴀𐴠𐴑 𐴎𐴝𐴒𐴝𐴃𐴢 𐴎𐴡𐴔𐴝 𐴀𐴝𐴐𐴧𐴞𐴥𐴓𐴢.²𐴀𐴝𐴦𐴌 𐴀𐴝𐴏𐴞𐴔𐴁𐴞𐴃𐴢 𐴀𐴝𐴏𐴔𐴝𐴕𐴡𐴃𐴧𐴟 𐴋𐴡𐴣𐴀𐴌 𐴃𐴟𐴖𐴝𐴥𐴕𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴠 𐴒𐴡𐴥𐴌𐴡𐴃𐴢 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢 𐴇𐴞𐴥𐴘𐴝𐴕 𐴇𐴠𐴥 𐴀𐴝𐴁𐴝𐴏𐴠 𐴁𐴡𐴥𐴌𐴞𐴒𐴞𐴘𐴠𐴥𐴒𐴡𐴘.³𐴀𐴞𐴥𐴃𐴝𐴌𐴝 𐴀𐴡𐴦𐴙𐴕𐴡𐴌 𐴎𐴞𐴓𐴇𐴝𐴌 𐴋𐴡𐴥𐴙𐴓𐴧𐴝 𐴑𐴠𐴏𐴧𐴟𐴥 𐴊𐴠𐴙𐴑𐴧𐴠𐴥, 𐴎𐴞𐴘𐴝𐴥𐴕 𐴎𐴞𐴌𐴡𐴌 𐴏𐴟𐴥𐴌𐴡𐴃𐴢. 𐴇𐴞𐴥𐴘𐴝𐴕 𐴁𐴝𐴥𐴑-𐴁𐴝𐴥𐴑 𐴀𐴡𐴥𐴘 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥 𐴀𐴠𐴑𐴎𐴡𐴕𐴡𐴌 𐴖𐴡𐴌𐴠 𐴁𐴡𐴙𐴐𐴧𐴠𐴥.⁴𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴇𐴠𐴥 𐴌𐴟𐴀𐴌 𐴊𐴞𐴦𐴘𐴝 𐴃𐴡𐴖𐴉𐴞𐴥𐴑𐴠 𐴀𐴝𐴓𐴡𐴑-𐴀𐴝𐴓𐴡𐴑 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠.

⁵𐴇𐴠𐴥𐴣𐴃𐴧𐴠 𐴊𐴟𐴕𐴞𐴘𐴝𐴙𐴌 𐴇𐴝𐴥𐴀𐴌 𐴊𐴠𐴐𐴡𐴌 𐴊𐴞𐴕𐴊𐴝𐴥𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴃𐴝𐴥𐴑𐴞𐴃𐴡.⁶𐴎𐴠𐴣𐴃𐴧𐴠𐴥 𐴇𐴠𐴥 𐴀𐴝𐴁𐴝𐴏𐴢 𐴏𐴗𐴝𐴥 𐴉𐴟𐴥𐴕𐴝 𐴒𐴞𐴥𐴘𐴠, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴃𐴝𐴌𐴝𐴥𐴌 𐴕𐴞𐴎𐴡𐴌-𐴕𐴞𐴎𐴡𐴌 𐴎𐴟𐴁𐴝𐴕𐴠 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴠 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴉𐴟𐴥𐴕𐴞, 𐴃𐴝𐴌𐴝𐴥 𐴁𐴟𐴊𐴧𐴞𐴥 𐴇𐴝𐴥𐴌𐴝𐴘𐴧𐴝 𐴀𐴡𐴥𐴘𐴒𐴞𐴓𐴒𐴡𐴘.⁷𐴃𐴝𐴌𐴝𐴥 𐴀𐴝𐴔𐴧𐴟𐴥𐴑 𐴀𐴠𐴊𐴧𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴈𐴡𐴀𐴌 𐴊𐴠, ”𐴏𐴡𐴀, 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢 𐴊𐴠 𐴕𐴡𐴥 𐴕𐴠𐴥؟⁸𐴃𐴡𐴥𐴘 𐴀𐴝𐴣𐴀𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴑𐴞𐴘𐴝𐴥 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌 𐴔𐴝𐴦𐴘𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴉𐴟𐴥𐴕𐴞𐴌؟⁹𐴀𐴝𐴣𐴀𐴌𐴝 𐴃𐴡 𐴂𐴝𐴌𐴃𐴞𐴘𐴞, 𐴔𐴠𐴊𐴞𐴘𐴞, 𐴀𐴠𐴊𐴧𐴠 𐴀𐴠𐴓𐴝𐴔𐴞 𐴀𐴡𐴥𐴑𐴧𐴡𐴓𐴢, 𐴀𐴝𐴦𐴌 𐴔𐴠𐴏𐴡𐴂𐴡𐴥𐴄𐴡𐴔𐴞𐴘𐴝𐴌, 𐴘𐴡𐴇𐴟𐴥𐴊𐴞𐴘𐴝𐴌, 𐴑𐴝𐴂𐴧𐴝𐴊𐴡𐴥𐴑𐴞𐴘𐴝𐴌, 𐴂𐴡𐴕𐴃𐴟𐴏𐴢 𐴀𐴡𐴌, 𐴀𐴠𐴊𐴧𐴠 𐴀𐴠𐴐𐴞𐴥𐴘𐴝𐴌 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴢,¹⁰𐴀𐴝𐴌𐴡𐴤, 𐴉𐴠𐴌𐴒𐴞𐴘𐴝𐴌, 𐴂𐴝𐴔𐴂𐴟𐴥𐴓𐴞𐴘𐴝𐴌, 𐴀𐴞𐴅𐴞𐴤𐴂𐴢 𐴀𐴡𐴌, 𐴀𐴠𐴊𐴧𐴠 𐴑𐴟𐴌𐴠𐴕𐴞𐴌 𐴋𐴝𐴥𐴑𐴡𐴌 𐴓𐴞𐴀𐴁𐴞𐴘𐴝𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴢. 𐴀𐴝𐴦𐴌 𐴌𐴡𐴔𐴡𐴃𐴧𐴟 𐴘𐴡𐴥 𐴇𐴡𐴊𐴟𐴥𐴕 𐴀𐴝𐴏𐴞𐴤.¹¹𐴀𐴠𐴍𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴏𐴠𐴤 𐴀𐴝𐴦𐴌 𐴘𐴡𐴇𐴟𐴥𐴊𐴞𐴌 𐴊𐴡𐴥𐴌𐴔𐴡𐴃𐴢 𐴉𐴝𐴌𐴝𐴤𐴘𐴧𐴠 𐴊𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴏𐴠𐴤. 𐴇𐴠𐴥𐴕𐴊𐴞𐴓𐴧𐴝, 𐴑𐴠𐴌𐴠𐴃𐴞 𐴀𐴠𐴊𐴧𐴠 𐴀𐴝𐴌𐴡𐴁𐴢 𐴑𐴡𐴗𐴔 𐴀𐴡𐴥 𐴀𐴝𐴏𐴠𐴤. 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴊𐴠 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌 𐴕𐴞𐴎𐴡𐴌-𐴕𐴞𐴎𐴡𐴌 𐴎𐴟𐴁𐴝𐴕𐴠 𐴀𐴝𐴓𐴧𐴝𐴌 𐴁𐴞𐴐𐴞𐴤 𐴋𐴡𐴣𐴀𐴌-𐴋𐴡𐴣𐴀𐴌 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴊𐴠 𐴉𐴟𐴥𐴕𐴞𐴌!“¹²𐴃𐴝𐴌𐴝𐴥 𐴁𐴠𐴒𐴧𐴟𐴥𐴕 𐴀𐴝𐴔𐴧𐴟𐴥𐴑 𐴀𐴠𐴊𐴧𐴠 𐴁𐴟𐴊𐴧𐴞𐴥 𐴇𐴝𐴥𐴌𐴝𐴘𐴧𐴝 𐴀𐴡𐴥𐴘 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴞𐴀𐴕 𐴑𐴞𐴘𐴡𐴥𐴓𐴧𐴝 𐴀𐴡𐴥𐴘𐴃𐴡𐴉𐴝𐴌𐴠؟“

¹³𐴔𐴡𐴕𐴃𐴡𐴌 𐴇𐴡𐴊𐴟𐴥𐴕𐴠 𐴃𐴠𐴥𐴐𐴠𐴌𐴝𐴘 𐴈𐴡𐴀𐴌 𐴊𐴠, ”𐴀𐴞𐴃𐴝𐴌𐴝𐴤 𐴐𐴡𐴥𐴌𐴝𐴁𐴢 𐴇𐴝𐴥𐴘 𐴄𐴟𐴀𐴓𐴢 𐴀𐴡𐴥𐴘𐴒𐴞𐴘𐴡𐴘 𐴊𐴠!“

𐴂𐴠𐴕𐴄𐴞𐴑𐴡𐴏𐴢 𐴀𐴞𐴊𐴡𐴃𐴢 𐴉𐴞𐴃𐴡𐴌𐴡𐴌 𐴁𐴡𐴘𐴧𐴝𐴕

¹⁴𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴁𐴝𐴑𐴞 𐴀𐴠𐴒𐴝𐴌𐴡 𐴎𐴡𐴕 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴓𐴡𐴥𐴘 𐴃𐴞𐴥𐴘𐴝𐴘 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴘𐴧𐴝𐴕 𐴒𐴡𐴌𐴠𐴥𐴌 𐴊𐴠, ”𐴀𐴡𐴥 𐴘𐴡𐴇𐴟𐴥𐴊𐴞𐴘𐴝𐴌 𐴔𐴝𐴕𐴟𐴥𐴙𐴐𐴢 𐴀𐴠𐴊𐴧𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴃𐴝𐴥𐴑𐴡 𐴊𐴠 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴇𐴞𐴥𐴘𐴝𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴟𐴎𐴝𐴥𐴘 𐴊𐴞𐴥; 𐴀𐴝𐴣𐴀𐴌 𐴈𐴡𐴃𐴝𐴤 𐴒𐴟𐴥𐴕 𐴊𐴞𐴥𐴘𐴝𐴕 𐴊𐴞𐴥 𐴉𐴟𐴥𐴕𐴡.¹⁵𐴃𐴟𐴣𐴀𐴝𐴥𐴌𐴝 𐴄𐴝𐴥𐴀𐴌𐴡𐴌 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴀𐴞𐴃𐴝𐴌𐴝𐴤 𐴕𐴞𐴐𐴝𐴥 𐴇𐴝𐴥𐴘 𐴄𐴟𐴀𐴓𐴢 𐴀𐴡𐴥𐴘𐴧𐴠 𐴊𐴠 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴙𐴅𐴧𐴡𐴤 𐴃𐴡 𐴁𐴞𐴀𐴕𐴧𐴝𐴌 𐴕𐴡𐴖 𐴖𐴝 𐴀𐴠𐴥𐴕𐴝 𐴁𐴝𐴙𐴅𐴧𐴠𐴥.¹⁶𐴁𐴡𐴥𐴓𐴑𐴠 𐴘𐴝𐴀𐴕 𐴀𐴡𐴥𐴙𐴓𐴊𐴠 𐴖𐴝𐴀𐴕, 𐴎𐴞𐴘𐴝𐴥𐴕 𐴕𐴡𐴁𐴞 𐴘𐴡𐴖𐴠𐴥𐴓𐴡𐴌 𐴀𐴝𐴥𐴃𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢, 𐴑𐴞 𐴈𐴡𐴘𐴓𐴠𐴥¹⁷’𐴀𐴝𐴓𐴧𐴝𐴘𐴠 𐴉𐴡𐴥𐴌𐴔𐴝𐴌 𐴊𐴠, 𐴀𐴝𐴀𐴛 𐴀𐴝𐴇𐴠𐴥𐴌𐴞 𐴎𐴡𐴁𐴝𐴕𐴝𐴃𐴢 𐴀𐴠𐴕𐴊𐴞𐴓𐴧𐴝 𐴒𐴡𐴙𐴅𐴧𐴟𐴥𐴔:𐴀𐴝𐴀𐴛 𐴀𐴝𐴣𐴀𐴌 𐴌𐴟𐴀 𐴉𐴡𐴃𐴧𐴞𐴥 𐴀𐴞𐴕𐴏𐴝𐴥𐴕𐴡𐴌 𐴖𐴡𐴌𐴠 𐴋𐴝𐴥𐴓𐴞𐴊𐴞𐴘𐴟𐴔.𐴃𐴟𐴣𐴀𐴝𐴥𐴌𐴝𐴌 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴠 𐴀𐴠𐴊𐴧𐴠 𐴎𐴠𐴥𐴌𐴉𐴟𐴀𐴝𐴙𐴕 𐴊𐴠 𐴀𐴝𐴣𐴀𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥𐴁𐴡,𐴃𐴟𐴣𐴀𐴝𐴥𐴌𐴝𐴌 𐴅𐴟𐴖𐴝𐴕 𐴔𐴝𐴙𐴕𐴐𐴠𐴥 𐴊𐴡𐴌𐴐𐴡𐴥𐴕 𐴊𐴠𐴑𐴞𐴥𐴁𐴡,𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴁𐴟𐴌𐴝𐴤 𐴔𐴝𐴙𐴕𐴐𐴠𐴥 𐴐𐴡𐴥𐴂𐴧𐴡𐴕 𐴊𐴠𐴑𐴞𐴥𐴁𐴡.¹⁸𐴀𐴝𐴣𐴀𐴌 𐴒𐴟𐴓𐴝𐴔 𐴀𐴠𐴊𐴧𐴠 𐴁𐴝𐴣𐴊𐴞 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴘𐴡𐴥𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴀𐴝𐴣𐴀𐴌 𐴌𐴟𐴀 𐴋𐴝𐴥𐴓𐴞𐴊𐴞𐴘𐴟𐴔,𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥𐴁𐴡.¹⁹𐴀𐴝𐴦𐴌 𐴀𐴝𐴀𐴛 𐴖𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴧𐴟𐴔,𐴀𐴝𐴦𐴌 𐴕𐴞𐴏𐴠 𐴎𐴡𐴁𐴞𐴕𐴡𐴃𐴢 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴧𐴟𐴔.𐴘𐴝𐴥𐴕𐴞 𐴓𐴡𐴖𐴢, 𐴀𐴡𐴦𐴙𐴕 𐴀𐴠𐴊𐴧𐴠 𐴊𐴟𐴥𐴖𐴝𐴣𐴌 𐴔𐴞𐴘𐴟𐴥𐴓𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴧𐴟𐴔.²⁰𐴔𐴝𐴁𐴟𐴊𐴡𐴌 𐴇𐴠𐴥 𐴋𐴡𐴣𐴀𐴌 𐴀𐴠𐴊𐴧𐴠 𐴔𐴡𐴈𐴞𐴥𐴔𐴝 𐴀𐴡𐴓𐴝 𐴊𐴞𐴕 𐴀𐴝𐴘𐴁𐴝𐴤𐴌 𐴀𐴝𐴒𐴠,𐴁𐴠𐴙𐴓𐴢 𐴀𐴝𐴕𐴊𐴝𐴤𐴌 𐴀𐴡𐴥𐴘𐴎𐴝𐴘𐴁𐴡𐴘,𐴀𐴝𐴦𐴌 𐴏𐴝𐴕 𐴓𐴡𐴖𐴢 𐴖𐴡𐴥𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴎𐴝𐴘𐴁𐴡𐴘.²¹𐴀𐴝𐴦𐴌 𐴀𐴠𐴀𐴕 𐴀𐴡𐴥𐴘𐴁𐴡, 𐴎𐴠𐴦𐴕𐴞𐴑𐴞 𐴔𐴝𐴁𐴟𐴊𐴡𐴌 𐴕𐴝𐴔 𐴓𐴡𐴘𐴁𐴡,𐴀𐴞𐴥𐴃𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡.‘

²²”𐴀𐴡𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴢, 𐴈𐴡𐴃𐴝𐴤 𐴀𐴞𐴀𐴕 𐴉𐴟𐴥𐴕𐴡: 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞, 𐴎𐴞𐴁𐴝𐴤𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴑𐴠𐴌𐴝𐴔𐴡𐴃𐴢, 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴠𐴊𐴧𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟; 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴃𐴡 𐴇𐴞𐴥𐴘𐴝𐴕 𐴎𐴝𐴕𐴡.²³𐴀𐴝𐴓𐴧𐴝, 𐴎𐴞𐴁𐴝𐴤𐴘𐴠 𐴔𐴟𐴀𐴔𐴡𐴌 𐴇𐴝𐴥𐴓𐴡𐴃𐴢 𐴎𐴝𐴕𐴠, 𐴀𐴞𐴥𐴁𐴝𐴘𐴠 𐴀𐴝𐴒𐴠 𐴓𐴡𐴥𐴃𐴞 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴏𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞 𐴁𐴡𐴓𐴧𐴝. 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴥𐴁𐴝𐴌𐴠 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴝 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴁𐴝𐴥𐴘𐴓𐴝.²⁴𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴔𐴡𐴦𐴃𐴡𐴌 𐴊𐴟𐴑𐴡𐴃𐴧𐴟 𐴀𐴝𐴎𐴝𐴊𐴢 𐴒𐴡𐴌𐴞𐴥 𐴀𐴝𐴁𐴝𐴌 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴦𐴃𐴠 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴑𐴡𐴁𐴎𐴝𐴃𐴢 𐴌𐴝𐴑𐴞𐴥 𐴕𐴡𐴥 𐴉𐴝𐴌𐴠.²⁵𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴊𐴝𐴖𐴟𐴊𐴠 𐴃𐴡 𐴀𐴠𐴕𐴊𐴞𐴓𐴧𐴝 𐴈𐴡𐴀𐴙𐴓𐴢, 𐴑𐴞 𐴈𐴡𐴘𐴓𐴠𐴥,’𐴀𐴝𐴀𐴛 𐴔𐴝𐴓𐴞𐴑𐴡𐴌𐴠 𐴀𐴝𐴣𐴀𐴌 𐴔𐴟𐴀𐴕𐴃𐴟 𐴇𐴝𐴥𐴔𐴞𐴐𐴝 𐴊𐴠𐴑𐴞𐴥𐴃𐴝𐴔,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴝𐴣𐴀𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴀𐴝𐴏𐴠𐴤,𐴎𐴠𐴀𐴕𐴠 𐴀𐴝𐴀𐴛 𐴕𐴡 𐴇𐴝𐴉𐴞.²⁶𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌 𐴊𐴞𐴓𐴢 𐴑𐴟𐴥𐴐𐴞 𐴀𐴡𐴥𐴘𐴧𐴠,𐴀𐴝𐴦𐴌 𐴀𐴝𐴣𐴀𐴌 𐴎𐴞𐴌𐴠 𐴑𐴟𐴥𐴐𐴞𐴌 𐴈𐴡𐴃𐴝𐴤 𐴈𐴡𐴀𐴌.𐴀𐴝𐴣𐴀𐴌 𐴒𐴝𐴦𐴌 𐴇𐴝𐴘𐴧𐴝 𐴘𐴡𐴥 𐴀𐴝𐴐𐴝𐴤𐴘𐴠 𐴁𐴝𐴏𐴞 𐴃𐴝𐴥𐴑𐴞𐴁𐴡,²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴀𐴝𐴣𐴀𐴌 𐴌𐴟𐴀𐴌𐴠 𐴉𐴝𐴃𐴝𐴓𐴉𐴟𐴌𐴡𐴃𐴢 𐴉𐴠𐴥𐴓𐴝𐴘 𐴕𐴡 𐴌𐴝𐴑𐴞𐴥𐴁𐴝,𐴀𐴝𐴦𐴌 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴂𐴝𐴑𐴎𐴡𐴕𐴡𐴌 𐴒𐴝𐴦𐴌 𐴇𐴝𐴘𐴧𐴝𐴌𐴠 𐴉𐴡𐴣𐴏𐴞𐴃𐴡𐴥 𐴕𐴡 𐴊𐴞𐴁𐴝.²⁸𐴃𐴟𐴀𐴛 𐴀𐴝𐴣𐴀𐴌𐴠𐴥 𐴎𐴞𐴕𐴊𐴞𐴒𐴞𐴌 𐴌𐴝𐴏𐴃𐴝 𐴊𐴝𐴈𐴝𐴤𐴘𐴧𐴡;𐴃𐴟𐴀𐴛 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴣𐴌 𐴇𐴝𐴥𐴎𐴞𐴌𐴞 𐴓𐴡𐴥𐴘 𐴉𐴟𐴌𐴝𐴉𐴟𐴌𐴞 𐴑𐴟𐴥𐴐𐴞 𐴒𐴡𐴌𐴞𐴥𐴁𐴝.‘

²⁹”𐴁𐴝𐴥𐴘𐴧𐴝𐴙𐴕, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴉𐴊𐴝𐴊𐴝 𐴊𐴝𐴖𐴟𐴊𐴡𐴌 𐴁𐴝𐴦𐴁𐴟𐴃𐴠 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴀𐴘𐴢 𐴉𐴝𐴙𐴅𐴧𐴟𐴔 𐴊𐴠 𐴑𐴞, 𐴀𐴞𐴥𐴁𐴝 𐴔𐴡𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴀𐴓𐴢; 𐴀𐴞𐴥𐴁𐴝𐴌 𐴈𐴡𐴁𐴡𐴌 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠𐴍𐴠𐴥 𐴀𐴝𐴏𐴠𐴤.³⁰𐴀𐴞𐴥𐴁𐴝 𐴃𐴡 𐴀𐴠𐴥𐴒𐴧𐴗𐴝 𐴕𐴡𐴁𐴞 𐴀𐴝𐴐𐴧𐴞𐴥𐴓𐴢; 𐴀𐴞𐴥𐴁𐴝𐴘𐴠 𐴎𐴝𐴙𐴕𐴃𐴡 𐴊𐴠, 𐴀𐴝𐴓𐴧𐴝𐴘𐴠 𐴈𐴡𐴏𐴡𐴥𐴔 𐴇𐴝𐴥𐴘 𐴀𐴞𐴥𐴁𐴝 𐴓𐴧𐴡𐴥𐴘 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴑𐴞, 𐴀𐴞𐴥𐴁𐴝𐴌 𐴕𐴡𐴏𐴡𐴥𐴓𐴡𐴃𐴧𐴟 𐴀𐴠𐴑𐴎𐴡𐴕𐴡𐴌𐴠 𐴀𐴞𐴥𐴁𐴝𐴌 𐴃𐴡𐴑𐴃𐴡𐴥𐴃𐴢 𐴁𐴟𐴀𐴝𐴥𐴒𐴝𐴌𐴝𐴘𐴁𐴡.³¹𐴔𐴟𐴀𐴕𐴃𐴟 𐴑𐴞𐴦 𐴀𐴡𐴥𐴘𐴁𐴡 𐴊𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴉𐴝𐴌𐴞 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ’𐴀𐴞𐴥𐴁𐴝𐴌𐴠 𐴕𐴡 𐴉𐴝𐴃𐴝𐴓𐴉𐴟𐴌𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠, 𐴀𐴝𐴦𐴌 𐴕𐴡 𐴀𐴞𐴥𐴁𐴝𐴌 𐴇𐴝𐴘𐴧𐴝 𐴉𐴡𐴣𐴙𐴐𐴧𐴠𐴥.‘³²𐴀𐴝𐴓𐴧𐴝𐴘𐴠 𐴇𐴠𐴥 𐴀𐴞𐴏𐴝𐴤𐴌𐴠 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴇𐴞𐴥𐴘𐴝𐴕𐴡𐴌 𐴒𐴡𐴁𐴝𐴤 𐴀𐴝𐴏𐴞𐴤.³³𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴌𐴠 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴁𐴝𐴥𐴌 𐴃𐴡𐴑𐴧𐴝 𐴊𐴞𐴦𐴘𐴝 𐴒𐴞𐴘𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴁𐴝𐴉𐴡𐴌 𐴃𐴡𐴌𐴉𐴡𐴥𐴃𐴧𐴟 𐴖𐴝𐴦𐴊𐴝 𐴒𐴡𐴙𐴅𐴧𐴝𐴥 𐴂𐴝𐴑-𐴌𐴟𐴀 𐴉𐴝𐴀𐴙𐴓𐴢; 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴊𐴠𐴑𐴡𐴥𐴌 𐴀𐴠𐴊𐴧𐴠 𐴉𐴟𐴥𐴕𐴡𐴌 𐴇𐴞𐴥𐴀𐴕 𐴀𐴞𐴥𐴁𐴝𐴘𐴠 𐴋𐴝𐴥𐴓𐴞𐴊𐴞𐴘𐴠 𐴊𐴠.³⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴝𐴖𐴟𐴊𐴢 𐴕𐴞𐴎𐴠 𐴃𐴡 𐴀𐴝𐴏𐴔𐴝𐴕𐴡𐴃𐴢 𐴕𐴡𐴥 𐴀𐴟𐴍𐴠𐴤, 𐴔𐴡𐴕𐴃𐴡𐴌 𐴃𐴡𐴀 𐴀𐴞𐴥𐴁𐴝 𐴕𐴞𐴎𐴠 𐴈𐴡𐴘𐴧𐴠𐴥 𐴊𐴠,’𐴔𐴝𐴁𐴟𐴊𐴠 𐴀𐴝𐴣𐴀𐴌 𐴔𐴝𐴓𐴞𐴑𐴡𐴌𐴠 𐴈𐴡𐴀𐴌 𐴊𐴠,𐴀𐴝𐴣𐴀𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴧𐴡𐴥,³⁵𐴎𐴠𐴃𐴟𐴑𐴧𐴟𐴥𐴕 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠𐴃𐴟𐴣𐴀𐴝𐴥𐴣𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴝𐴘.‘

³⁶”𐴇𐴠𐴥𐴃𐴡𐴓𐴧𐴝 𐴃𐴝𐴔𐴝𐴥𐴔 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴘𐴝𐴀𐴕 𐴉𐴝𐴑𐴧𐴝𐴒𐴡𐴌𐴞 𐴎𐴝𐴕𐴞𐴓𐴡 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝𐴘𐴓𐴝 𐴊𐴠 𐴇𐴠𐴥 𐴀𐴞𐴏𐴝𐴤𐴌𐴠 𐴀𐴝𐴓𐴧𐴝𐴘𐴠 𐴔𐴝𐴓𐴞𐴑 𐴀𐴠𐴊𐴧𐴠 𐴔𐴡𐴀𐴏𐴞𐴤 𐴁𐴝𐴕𐴝𐴘𐴧𐴠𐴥.“

³⁷𐴇𐴞𐴥𐴘𐴝𐴕 𐴉𐴟𐴥𐴕𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴞𐴓𐴡𐴃𐴢 𐴏𐴠𐴥𐴓𐴢 𐴔𐴝𐴙𐴅𐴧𐴠 𐴉𐴝𐴥𐴕 𐴓𐴝𐴙𐴒𐴧𐴠𐴥; 𐴀𐴞𐴥𐴃𐴝𐴌𐴝 𐴉𐴞𐴃𐴡𐴌𐴡𐴌𐴠 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴈𐴡𐴀𐴌 𐴊𐴠, ”𐴁𐴝𐴥𐴘𐴧𐴝𐴙𐴕, 𐴀𐴝𐴣𐴀𐴌𐴝 𐴑𐴞𐴦 𐴒𐴡𐴙𐴃𐴧𐴝𐴥𐴔؟“

³⁸𐴉𐴞𐴃𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴃𐴡𐴖𐴝𐴥 𐴒𐴡𐴌𐴡𐴤, 𐴀𐴝𐴦𐴌 𐴒𐴟𐴕𐴝𐴤𐴌 𐴔𐴝𐴉𐴢 𐴉𐴝𐴘 𐴁𐴡𐴓𐴧𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖𐴢; 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴇𐴝𐴥𐴊𐴞𐴘𐴝 𐴀𐴞𐴥𐴏𐴝𐴉𐴠 𐴂𐴝𐴑-𐴌𐴟𐴀 𐴉𐴝𐴘𐴁𐴝.³⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴖𐴝𐴦𐴊𐴝 𐴃𐴡 𐴃𐴟𐴣𐴀𐴝𐴥𐴌𐴝𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴡𐴌 𐴓𐴧𐴝, 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴊𐴟𐴌𐴠𐴥 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴓𐴧𐴝—𐴎𐴠𐴃𐴡𐴥 𐴎𐴡𐴕𐴡𐴌𐴠 𐴀𐴝𐴣𐴀𐴌𐴝𐴌 𐴔𐴝𐴁𐴟𐴊𐴢 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴇𐴞𐴥𐴑𐴧𐴝 𐴋𐴝𐴑𐴞𐴁𐴡𐴥.“

⁴⁰𐴉𐴞𐴃𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀𐴘𐴢 𐴕𐴡𐴏𐴞𐴥𐴘𐴡𐴃𐴢 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴌𐴡𐴏𐴢 𐴒𐴡𐴌𐴠𐴥𐴌 𐴊𐴠, ”𐴀𐴠 𐴎𐴡𐴁𐴝𐴕𐴝𐴌 𐴁𐴝𐴥𐴀𐴣𐴌𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴞𐴎𐴡𐴌𐴠𐴥 𐴁𐴝𐴏𐴝𐴘 𐴌𐴝𐴑𐴞𐴥𐴘𐴡.“⁴¹𐴎𐴠𐴊𐴟𐴥𐴕𐴠 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥; 𐴇𐴠𐴥 𐴊𐴞𐴕 𐴀𐴞𐴥𐴃𐴝𐴌𐴝𐴌 𐴊𐴡𐴓𐴡𐴃𐴢 𐴃𐴡𐴑𐴡𐴌𐴞𐴁𐴝𐴕 𐴃𐴞𐴕 𐴀𐴝𐴥𐴎𐴝𐴌 𐴔𐴝𐴕𐴟𐴥𐴙𐴐𐴢 𐴐𐴝𐴥𐴔𐴞𐴓𐴢 𐴒𐴡𐴌𐴝𐴥 𐴒𐴞𐴥𐴀𐴓𐴢.

⁴²𐴃𐴝𐴌𐴝𐴥 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴃𐴧𐴟 𐴇𐴝𐴥𐴔𐴞𐴐𐴝 𐴃𐴝𐴦𐴓𐴞𐴔 𐴉𐴟𐴥𐴙𐴕𐴃𐴡, 𐴀𐴝𐴌 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴁𐴡𐴥𐴚 𐴒𐴡𐴥𐴌𐴞 𐴌𐴟𐴄𐴞 𐴈𐴝𐴥𐴘𐴃𐴡 𐴀𐴠𐴊𐴧𐴠 𐴊𐴟𐴖𐴝 𐴒𐴡𐴙𐴃𐴧𐴡𐴥.

𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌 𐴎𐴞𐴕𐴊𐴞𐴒𐴞

⁴³𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴋𐴡𐴦𐴌𐴝𐴘𐴃𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴁𐴡𐴀𐴗𐴃𐴢 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴃𐴡.⁴⁴𐴃𐴝𐴔𐴝𐴥𐴔 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴀𐴠𐴑 𐴎𐴝𐴒𐴝𐴃𐴢 𐴃𐴝𐴥𐴑𐴞𐴃𐴡, 𐴀𐴝𐴦𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴔𐴞𐴓𐴞𐴎𐴟𐴥𐴓𐴞 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴃𐴧𐴡𐴥.⁴⁵𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴔𐴝𐴓𐴏𐴝𐴥𐴔𐴝𐴕𐴝 𐴀𐴠𐴊𐴧𐴠 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴀𐴡𐴥𐴑𐴧𐴡𐴓𐴢 𐴁𐴠𐴏𐴞𐴘𐴡𐴌𐴠 𐴉𐴡𐴃𐴧𐴞𐴥 𐴎𐴡𐴕𐴡𐴌𐴠 𐴎𐴡𐴌𐴟𐴌𐴡𐴃𐴢 𐴔𐴡𐴎𐴞𐴕 𐴁𐴝𐴍𐴞𐴊𐴞𐴃𐴡.⁴⁶𐴀𐴝𐴦𐴌 𐴉𐴡𐴃𐴧𐴞𐴥 𐴊𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴎𐴡𐴔𐴝 𐴀𐴡𐴥𐴘𐴃𐴡, 𐴀𐴝𐴦𐴌 𐴒𐴡𐴥𐴌𐴠-𐴒𐴡𐴥𐴌𐴠 𐴌𐴟𐴄𐴞 𐴁𐴝𐴥𐴚𐴒𐴞 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴠𐴊𐴧𐴠 𐴊𐴞𐴓𐴡𐴌 𐴀𐴠𐴈𐴠𐴥𐴓𐴝𐴏𐴠 𐴈𐴝𐴥𐴕𐴝 𐴈𐴝𐴥𐴘𐴃𐴡.⁴⁷𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴃𐴝𐴥𐴑𐴞𐴃𐴡, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴓𐴡𐴥𐴘 𐴁𐴡𐴕𐴞 𐴃𐴝𐴥𐴑𐴞𐴃𐴡. 𐴎𐴝𐴌𐴝𐴤 𐴕𐴠𐴅𐴝𐴃𐴢 𐴉𐴝𐴘𐴃𐴡, 𐴃𐴝𐴌𐴝𐴥𐴌𐴠 𐴔𐴝𐴓𐴞𐴑𐴠 𐴉𐴡𐴃𐴧𐴞𐴥 𐴊𐴞𐴕 𐴀𐴞𐴥𐴃𐴝𐴌𐴝𐴌 𐴊𐴡𐴓𐴡𐴃𐴢 𐴐𐴝𐴥𐴔𐴞𐴓𐴢 𐴒𐴡𐴙𐴃𐴧𐴡𐴥.

The Word for the World International

https://app.library.bible/content/87faca8b51c22590