Read 𐴈𐴝𐴔𐴡𐴥𐴓𐴢 27

𐴈𐴝𐴔𐴡𐴥𐴓𐴢27

𐴂𐴝𐴥𐴀𐴟𐴓𐴢 𐴌𐴡𐴔𐴡𐴓𐴧𐴝 𐴁𐴝𐴐𐴝𐴥 𐴓𐴡𐴥𐴘𐴧𐴠

¹𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝𐴌𐴠 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴀𐴞𐴄𐴝𐴓𐴞𐴃𐴢 𐴓𐴡𐴘𐴎𐴝 𐴉𐴡𐴌𐴞𐴁𐴡𐴥 𐴁𐴡𐴥𐴓𐴞 𐴉𐴝𐴥𐴘𐴏𐴠𐴓𐴝 𐴀𐴡𐴥𐴘𐴒𐴞𐴘𐴡𐴘, 𐴂𐴝𐴥𐴀𐴟𐴓𐴡𐴌𐴠 𐴀𐴠𐴊𐴧𐴠 𐴀𐴝𐴌 𐴇𐴡𐴦𐴎𐴧𐴡𐴕 𐴇𐴡𐴊𐴞𐴌𐴠 𐴁𐴝𐴀𐴣𐴐𐴧𐴝𐴌 𐴄𐴠𐴀𐴌𐴝𐴚 𐴈𐴡𐴀 𐴊𐴠 𐴘𐴞𐴥𐴁𐴝𐴌 𐴀𐴠𐴑 𐴐𐴝𐴥𐴀𐴂𐴡𐴌 𐴀𐴝𐴥𐴃𐴡𐴃𐴢 𐴊𐴞𐴦𐴘𐴝 𐴒𐴞𐴘𐴠𐴥, 𐴎𐴞𐴁𐴝𐴤𐴌 𐴕𐴝𐴔 𐴅𐴟𐴓𐴞𐴀𐴟𐴏𐴢.²𐴀𐴝𐴣𐴀𐴌𐴝 𐴀𐴝𐴊𐴠𐴌𐴝𐴔𐴞𐴃𐴞𐴘𐴝 𐴐𐴡𐴥𐴀𐴌𐴡𐴌 𐴀𐴠𐴑𐴧𐴝𐴥𐴕 𐴎𐴝𐴀𐴣𐴏𐴡𐴃𐴢 𐴀𐴟𐴍𐴞𐴤 𐴎𐴝𐴦𐴃𐴢 𐴊𐴡𐴙𐴅𐴧𐴞, 𐴎𐴞𐴘𐴝𐴥𐴕 𐴀𐴠𐴐𐴞𐴥𐴘𐴝 𐴀𐴠𐴓𐴝𐴑𐴝𐴌 𐴀𐴝𐴓𐴡𐴑-𐴀𐴝𐴓𐴡𐴑 𐴒𐴝𐴥𐴣𐴄𐴢 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴐𐴧𐴞𐴥𐴓𐴢. 𐴀𐴝𐴦𐴌 𐴔𐴝𐴑𐴠𐴊𐴡𐴥𐴕𐴞𐴘𐴝 𐴀𐴠𐴓𐴝𐴑𐴝𐴌 𐴃𐴞𐴏𐴡𐴥𐴓𐴡𐴕𐴞𐴑𐴝 𐴐𐴡𐴥𐴀𐴌𐴡𐴌 𐴀𐴝𐴌𐴞𐴏𐴃𐴝𐴌𐴑𐴟𐴏𐴢 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.

³𐴃𐴝𐴌𐴉𐴡𐴌 𐴊𐴞𐴕 𐴀𐴝𐴣𐴀𐴌𐴝 𐴏𐴞𐴥𐴊𐴡𐴕𐴡𐴃𐴢 𐴉𐴡𐴀𐴣𐴙𐴐𐴧𐴞, 𐴀𐴝𐴦𐴌 𐴅𐴟𐴓𐴞𐴘𐴟𐴏𐴠 𐴂𐴝𐴥𐴀𐴟𐴓𐴡𐴌𐴠 𐴔𐴠𐴀𐴌𐴁𐴝𐴕𐴞 𐴒𐴡𐴌𐴞𐴥 𐴕𐴞𐴎𐴡𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴎𐴝𐴘𐴁𐴝𐴌 𐴀𐴠𐴎𐴝𐴎𐴡𐴃𐴢 𐴊𐴞𐴘𐴠𐴥, 𐴎𐴠𐴀𐴕𐴠 𐴀𐴞𐴥𐴁𐴝𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴌𐴞𐴥 𐴉𐴝𐴌𐴠.⁴𐴀𐴝𐴣𐴀𐴌𐴝 𐴈𐴠𐴥𐴕𐴃𐴟 𐴁𐴝𐴐𐴝𐴥 𐴓𐴡𐴥𐴘𐴧𐴞, 𐴀𐴝𐴦𐴌 𐴁𐴡𐴘𐴧𐴝𐴌 𐴀𐴝𐴣𐴀𐴌𐴝𐴌 𐴀𐴟𐴓𐴋𐴝 𐴁𐴝𐴀𐴌 𐴊𐴠 𐴇𐴠𐴥𐴃𐴡𐴓𐴧𐴝 𐴏𐴝𐴥𐴘𐴉𐴌𐴟𐴏𐴡𐴌 𐴎𐴠 𐴁𐴡𐴓𐴞 𐴁𐴡𐴘𐴧𐴝𐴌 𐴕𐴡 𐴁𐴝𐴀𐴌 𐴇𐴠𐴥 𐴁𐴡𐴓𐴞 𐴒𐴞𐴦𐴘𐴞𐴥.⁵𐴁𐴝𐴦𐴊𐴠 𐴑𐴞𐴓𐴞𐴐𐴞𐴥𐴘𐴝𐴌 𐴀𐴠𐴊𐴧𐴠 𐴂𐴝𐴔𐴂𐴟𐴥𐴓𐴞𐴘𐴝𐴌 𐴊𐴡𐴙𐴅𐴧𐴝 𐴁𐴝𐴥𐴘 𐴎𐴝𐴘𐴃𐴠-𐴎𐴝𐴘𐴃𐴠 𐴀𐴝𐴣𐴀𐴌𐴝 𐴓𐴟𐴏𐴞𐴥𐴘𐴝 𐴀𐴠𐴓𐴝𐴑𐴝𐴌 𐴔𐴞𐴌𐴝 𐴐𐴡𐴥𐴀𐴌𐴡𐴃𐴢 𐴓𐴝𐴙𐴔𐴧𐴞𐴥.⁶𐴇𐴠𐴥𐴍𐴠 𐴇𐴠𐴥 𐴐𐴝𐴥𐴀𐴂𐴢 𐴂𐴗𐴝𐴥𐴘𐴠 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴞𐴘𐴝 𐴐𐴡𐴥𐴀𐴌𐴡𐴌 𐴀𐴠𐴑𐴧𐴝𐴥𐴕 𐴎𐴝𐴀𐴣𐴏𐴢 𐴉𐴝𐴀𐴙𐴓𐴢 𐴎𐴞𐴘𐴝𐴥𐴕 𐴀𐴞𐴄𐴝𐴓𐴞 𐴊𐴠𐴐𐴡𐴃𐴢 𐴎𐴝𐴦𐴌. 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴇𐴞𐴥𐴘𐴝𐴕𐴡𐴃𐴢 𐴃𐴟𐴙𐴓𐴧𐴠𐴥.⁷𐴀𐴝𐴣𐴀𐴌𐴝𐴌 𐴎𐴝𐴀𐴣𐴏𐴢 𐴁𐴡𐴀𐴗𐴃𐴢 𐴊𐴞𐴕 𐴉𐴝𐴥𐴕 𐴀𐴝𐴏𐴃𐴠𐴤-𐴀𐴝𐴏𐴃𐴠𐴤 𐴏𐴡𐴓𐴞 𐴁𐴝𐴦𐴊𐴠 𐴁𐴞𐴐𐴞𐴤 𐴊𐴟𐴑𐴧𐴡𐴥𐴌 𐴏𐴝𐴥𐴀𐴣𐴃𐴠 𐴑𐴝𐴕𐴞𐴊𐴝𐴏𐴢 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴙𐴐𐴧𐴞. 𐴁𐴡𐴘𐴧𐴝𐴌𐴠 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴌𐴝𐴌𐴠 𐴀𐴝𐴦𐴌 𐴔𐴟𐴀𐴔𐴧𐴞𐴑𐴧𐴝 𐴎𐴝𐴘𐴃𐴡 𐴕𐴡 𐴊𐴠𐴌, 𐴀𐴝𐴣𐴀𐴌𐴝 𐴏𐴝𐴥𐴓𐴔𐴡𐴕 𐴐𐴡𐴥𐴀𐴌𐴡𐴌 𐴔𐴟𐴀𐴕𐴃𐴟 𐴑𐴠𐴌𐴠𐴃𐴢 𐴋𐴞𐴘𐴝𐴌 𐴎𐴠 𐴁𐴡𐴓𐴞 𐴁𐴡𐴘𐴧𐴝𐴌 𐴕𐴡 𐴁𐴝𐴀𐴌 𐴇𐴠𐴥 𐴁𐴡𐴓𐴞 𐴒𐴞𐴦𐴘𐴞𐴥.⁸𐴀𐴝𐴦𐴌 𐴊𐴡𐴙𐴅𐴧𐴝𐴌 𐴇𐴝𐴣𐴏𐴝 𐴊𐴡𐴥𐴌𐴞 𐴊𐴟𐴑𐴧𐴡𐴥𐴌 𐴏𐴝𐴥𐴀𐴣𐴃𐴠 𐴏𐴡𐴓𐴞-𐴏𐴡𐴓𐴞 𐴀𐴠𐴑𐴧𐴝𐴥𐴕 𐴎𐴝𐴒𐴝𐴃𐴢 𐴉𐴡𐴀𐴣𐴙𐴐𐴧𐴞 𐴎𐴞𐴘𐴝𐴥𐴕𐴡𐴌 𐴕𐴝𐴔 𐴀𐴡𐴥𐴙𐴓𐴊𐴠 𐴈𐴠𐴥𐴉𐴝𐴎𐴡𐴃𐴞 𐴒𐴝𐴥𐴣𐴄𐴢 𐴀𐴡𐴥𐴑𐴧𐴡𐴓𐴢. 𐴇𐴞𐴥𐴘𐴝𐴕 𐴓𐴝𐴏𐴞𐴥𐴘𐴝 𐴄𐴡𐴀𐴕𐴡𐴌 𐴋𐴝𐴥𐴑𐴠 𐴀𐴝𐴐𐴧𐴞𐴥𐴓𐴢.

⁹𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴁𐴡𐴀𐴗𐴃𐴢 𐴊𐴞𐴕 𐴒𐴟𐴎𐴡𐴌𐴞 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴎𐴝𐴘𐴁𐴝𐴌 𐴏𐴡𐴉𐴡𐴥𐴌 𐴇𐴡𐴥𐴃𐴝𐴌𐴝 𐴀𐴡𐴥𐴘𐴀𐴝𐴙𐴐𐴧𐴠, 𐴀𐴝𐴦𐴌 𐴑𐴡𐴉𐴧𐴝𐴌𐴝𐴌 𐴊𐴞𐴕 𐴀𐴡𐴥 𐴎𐴠𐴃𐴧𐴡𐴥𐴃𐴢 𐴉𐴝𐴌𐴝𐴤𐴘𐴒𐴞𐴘𐴡𐴘, 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴀𐴟𐴥𐴣𐴐𐴞𐴘𐴝𐴌𐴞 𐴊𐴞𐴥𐴘𐴠,¹⁰”𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴊𐴠𐴑𐴞𐴥𐴌 𐴊𐴠 𐴀𐴝𐴒𐴠 𐴎𐴝𐴘 𐴀𐴝𐴣𐴀𐴌𐴝𐴌 𐴀𐴠 𐴏𐴡𐴉𐴡𐴥𐴌 𐴇𐴡𐴥𐴃𐴝𐴌𐴝 𐴀𐴡𐴥𐴘𐴁𐴡, 𐴀𐴝𐴦𐴌 𐴁𐴞𐴐𐴞𐴤 𐴇𐴡𐴥𐴃𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥𐴘𐴁𐴡, 𐴏𐴞𐴌𐴞𐴥𐴉𐴢 𐴔𐴝𐴓𐴏𐴝𐴥𐴔𐴝𐴕𐴝 𐴀𐴠𐴊𐴧𐴠 𐴎𐴝𐴀𐴣𐴏𐴢 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴌 𐴎𐴝𐴕 𐴀𐴟𐴥𐴊𐴧𐴗𐴝.“¹¹𐴔𐴡𐴕𐴃𐴡𐴌 𐴐𐴝𐴥𐴀𐴂𐴠 𐴂𐴝𐴥𐴀𐴟𐴓𐴡𐴌 𐴈𐴡𐴃𐴝𐴤𐴌 𐴃𐴟𐴥𐴖𐴝𐴌𐴡 𐴎𐴝𐴀𐴣𐴏𐴢-𐴏𐴡𐴓𐴡𐴘𐴝𐴌 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴒𐴞𐴌𐴡𐴥𐴏𐴡𐴌 𐴈𐴡𐴃𐴝𐴤 𐴉𐴟𐴥𐴙𐴕𐴧𐴞𐴓𐴢.¹²𐴇𐴠𐴥 𐴎𐴝𐴀𐴣𐴏𐴢 𐴒𐴝𐴥𐴣𐴄𐴢 𐴄𐴝𐴕 𐴐𐴞𐴥𐴃𐴑𐴝𐴓𐴢 𐴈𐴝𐴍𐴝𐴘𐴃𐴠𐴥 𐴐𐴟𐴥𐴀𐴘𐴊𐴝 𐴕𐴡 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴎𐴡𐴕𐴠 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠, 𐴈𐴠𐴥𐴕𐴃𐴟 𐴎𐴝𐴘 𐴇𐴡𐴕𐴡𐴤 𐴁𐴡𐴃𐴠 𐴉𐴡𐴕𐴞𐴏𐴢 𐴒𐴝𐴥𐴣𐴍𐴡𐴃𐴢 𐴉𐴡𐴀𐴣𐴏𐴞 𐴐𐴞𐴥𐴃𐴑𐴝𐴓𐴢 𐴈𐴝𐴍𐴝𐴘 𐴁𐴡𐴓𐴧𐴝. 𐴇𐴠𐴥 𐴒𐴝𐴥𐴣𐴄𐴢 𐴄𐴝𐴕 𐴀𐴡𐴥𐴙𐴓𐴊𐴠 𐴑𐴠𐴌𐴠𐴃𐴢 𐴋𐴞𐴘𐴝𐴌 𐴎𐴝𐴀𐴣𐴏𐴢 𐴒𐴝𐴥𐴣𐴄𐴢, 𐴎𐴞𐴘𐴝𐴥𐴕𐴡𐴌 𐴔𐴟𐴦 𐴒𐴝𐴥𐴕 𐴊𐴡𐴀𐴘𐴕𐴝𐴓𐴞 𐴉𐴡𐴏𐴞𐴥𐴔 𐴀𐴠𐴊𐴧𐴠 𐴀𐴟𐴃𐴧𐴡𐴌𐴝𐴓𐴞 𐴉𐴡𐴏𐴞𐴥𐴔 𐴔𐴞𐴥𐴑𐴧𐴝.

𐴊𐴡𐴙𐴅𐴧𐴝𐴃𐴢 𐴃𐴟𐴖𐴝𐴥𐴕

¹³𐴎𐴠𐴣𐴃𐴧𐴠𐴥 𐴊𐴡𐴀𐴘𐴕𐴝𐴓𐴞 𐴁𐴡𐴘𐴧𐴝𐴌 𐴀𐴝𐴏𐴃𐴠𐴤-𐴀𐴝𐴏𐴃𐴠𐴤 𐴁𐴝𐴀𐴃𐴢 𐴊𐴡𐴙𐴅𐴧𐴠, 𐴀𐴞𐴥𐴃𐴝𐴌𐴝 𐴁𐴝𐴥𐴉𐴠𐴌 𐴊𐴠 𐴀𐴞𐴥𐴃𐴝𐴌𐴝𐴌 𐴕𐴞𐴘𐴡𐴃𐴢 𐴉𐴟𐴌𐴝 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥; 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴡𐴌 𐴕𐴡𐴒𐴡𐴓𐴢 𐴃𐴟𐴓𐴞𐴤𐴉𐴠𐴓𐴝𐴘 𐴑𐴠𐴌𐴠𐴃𐴢 𐴋𐴞𐴘𐴝𐴌 𐴏𐴡𐴌 𐴁𐴝𐴥𐴘 𐴒𐴞𐴦𐴘𐴠𐴥.¹⁴𐴔𐴡𐴕𐴃𐴡𐴌 𐴇𐴡𐴃𐴟𐴥𐴕 𐴀𐴝𐴥𐴕𐴞𐴑 𐴁𐴝𐴦𐴊𐴠, 𐴇𐴠𐴥 𐴎𐴝𐴒𐴝𐴃𐴧𐴟 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴃𐴟𐴖𐴝𐴥𐴕𐴞 𐴁𐴡𐴘𐴧𐴝𐴌 𐴐𐴟𐴥𐴌𐴟 𐴀𐴡𐴥𐴘𐴧𐴠, 𐴎𐴞𐴁𐴝𐴤𐴌𐴠 𐴘𐴡𐴌𐴝𐴑𐴞𐴓𐴡 𐴋𐴝𐴑𐴠.¹⁵𐴎𐴝𐴀𐴣𐴏𐴢 𐴏𐴝𐴥𐴕𐴡𐴌𐴠 𐴎𐴠𐴃𐴧𐴡𐴥𐴃𐴢 𐴇𐴠𐴥 𐴁𐴡𐴘𐴧𐴝𐴌𐴠 𐴉𐴝𐴘𐴧𐴠𐴥 𐴀𐴝𐴦𐴌 𐴇𐴞𐴥𐴘𐴝𐴕 𐴁𐴡𐴘𐴧𐴝𐴌𐴡𐴌 𐴎𐴡𐴌𐴞𐴘𐴝 𐴔𐴟𐴀𐴔𐴧𐴞𐴑𐴧𐴝 𐴎𐴝𐴘 𐴕𐴡 𐴉𐴝𐴌𐴠𐴌, 𐴀𐴝𐴣𐴀𐴌𐴝 𐴑𐴟𐴐𐴞𐴥𐴐𐴢 𐴒𐴡𐴌𐴝𐴥 𐴁𐴡𐴕 𐴒𐴡𐴌𐴞𐴥 𐴁𐴡𐴘𐴧𐴝𐴌 𐴎𐴞𐴑𐴧𐴝𐴥 𐴁𐴝𐴀𐴌 𐴇𐴞𐴥𐴑𐴧𐴝 𐴎𐴝𐴀𐴣𐴏𐴢 𐴏𐴝𐴥𐴕 𐴎𐴝𐴘𐴃𐴡 𐴊𐴞𐴘𐴞𐴥.¹⁶𐴀𐴝𐴦𐴌 𐴎𐴝𐴘𐴃𐴠-𐴎𐴝𐴘𐴃𐴠 𐴀𐴠𐴒𐴧𐴗𐴝𐴤 𐴑𐴝𐴖𐴟𐴊𐴝 𐴕𐴝𐴔𐴡𐴌 𐴒𐴟𐴌𐴝 𐴋𐴞𐴘𐴝𐴌 𐴎𐴠 𐴁𐴡𐴓𐴞 𐴁𐴡𐴘𐴧𐴝𐴌 𐴕𐴡 𐴁𐴝𐴀𐴌 𐴇𐴠𐴥 𐴁𐴡𐴓𐴞 𐴒𐴞𐴦𐴘𐴞𐴥, 𐴀𐴝𐴦𐴌 𐴁𐴞𐴐𐴞𐴤 𐴔𐴡𐴐𐴑𐴞𐴓𐴡𐴌 𐴏𐴝𐴥𐴀𐴣𐴃𐴠 𐴀𐴝𐴣𐴀𐴌𐴝 𐴎𐴝𐴀𐴣𐴏𐴡𐴌 𐴕𐴡𐴦 𐴒𐴝𐴥𐴕 𐴁𐴝𐴏𐴝𐴘 𐴉𐴝𐴙𐴅𐴧𐴞𐴥.¹⁷𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴕𐴡𐴦 𐴒𐴝𐴥𐴕 𐴎𐴝𐴀𐴣𐴏𐴡𐴌 𐴖𐴡𐴌𐴠 𐴃𐴟𐴓𐴞𐴤𐴘𐴡𐴌𐴠 𐴌𐴡𐴏𐴞𐴥 𐴓𐴡𐴥𐴘 𐴎𐴝𐴀𐴣𐴏𐴡𐴌 𐴏𐴝𐴘𐴌𐴡𐴥𐴑𐴟𐴓𐴃𐴟 𐴁𐴠𐴌𐴝𐴤𐴘 𐴁𐴝𐴣𐴊𐴞𐴥 𐴀𐴠𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴢 𐴏𐴝𐴥𐴕 𐴏𐴝𐴌𐴃𐴞𐴏𐴡𐴌 𐴔𐴠𐴍𐴞𐴌 𐴏𐴡𐴌𐴡𐴃𐴢 𐴁𐴝𐴎𐴞𐴥𐴁𐴡 𐴁𐴡𐴥𐴓𐴞 𐴋𐴡𐴦𐴌𐴠 𐴎𐴝𐴀𐴣𐴏𐴡𐴌 𐴐𐴡𐴥𐴌 𐴒𐴝𐴥𐴕 𐴓𐴝𐴔𐴝𐴘𐴉𐴠𐴥𐴓𐴝𐴘 𐴁𐴡𐴘𐴧𐴝𐴌 𐴎𐴞𐴑𐴧𐴝𐴥 𐴁𐴝𐴀𐴌 𐴇𐴞𐴥𐴑𐴧𐴝 𐴎𐴝𐴀𐴣𐴏𐴢 𐴏𐴝𐴥𐴕 𐴎𐴝𐴘𐴃𐴡 𐴊𐴞𐴘𐴠𐴥.¹⁸𐴁𐴝𐴦𐴊𐴠 𐴃𐴟𐴖𐴝𐴥𐴕𐴡𐴌 𐴎𐴡𐴌𐴞𐴘𐴝 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴌𐴝 𐴁𐴞𐴐𐴞𐴤 𐴀𐴠𐴥𐴣𐴏𐴑𐴝 𐴇𐴝𐴥𐴙𐴌, 𐴀𐴞𐴥𐴃𐴝𐴌𐴝 𐴃𐴝𐴌𐴉𐴡𐴌 𐴊𐴞𐴕 𐴎𐴝𐴀𐴣𐴏𐴡𐴌 𐴔𐴝𐴓𐴏𐴝𐴥𐴔𐴝𐴕𐴝 𐴀𐴡𐴥𐴑𐴧𐴡𐴓𐴢 𐴉𐴠𐴥𐴓𐴝𐴘𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.¹⁹𐴃𐴞𐴏𐴝𐴥𐴌𐴝 𐴊𐴞𐴕 𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴢 𐴏𐴡𐴓𐴝 𐴊𐴠 𐴏𐴝𐴥𐴘𐴏𐴝𐴔𐴝𐴕𐴝 𐴀𐴡𐴥𐴑𐴧𐴡𐴓𐴢 𐴕𐴞𐴎𐴡𐴌 𐴀𐴝𐴥𐴃𐴠 𐴉𐴠𐴥𐴓𐴝𐴘𐴊𐴞𐴘𐴠.²⁰𐴁𐴡𐴀𐴗𐴃𐴢 𐴊𐴞𐴕 𐴓𐴡𐴥𐴃𐴞 𐴎𐴠𐴃𐴧𐴡𐴥𐴃𐴢 𐴁𐴠𐴙𐴓𐴢 𐴀𐴡𐴥 𐴊𐴝𐴈𐴝𐴤 𐴕𐴡 𐴎𐴝𐴌, 𐴃𐴝𐴌𐴝 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴊𐴝𐴈𐴝𐴤 𐴕𐴡 𐴎𐴝𐴌, 𐴀𐴝𐴦𐴌 𐴓𐴝𐴒𐴝𐴃𐴝𐴌 𐴎𐴟𐴌𐴠𐴏𐴟𐴥𐴌𐴠 𐴃𐴟𐴖𐴝𐴥𐴕 𐴀𐴡𐴥 𐴁𐴝𐴀𐴃𐴢 𐴀𐴝𐴐𐴧𐴞𐴥𐴓𐴢, 𐴃𐴡𐴥𐴘 𐴀𐴝𐴣𐴀𐴌𐴝 𐴁𐴝𐴏𐴞𐴁𐴝𐴥𐴌 𐴀𐴝𐴐𐴝𐴤 𐴉𐴠𐴥𐴓𐴝𐴘𐴊𐴞𐴘𐴞.

²¹𐴎𐴝𐴀𐴣𐴏𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴁𐴡𐴀𐴗𐴃𐴢 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴖𐴝𐴀𐴐𐴧𐴝 𐴊𐴠 𐴇𐴠𐴥𐴃𐴡𐴓𐴧𐴝, 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴃𐴞𐴥𐴘𐴝𐴘 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴣𐴀𐴌 𐴁𐴟𐴊𐴧𐴞𐴥 𐴒𐴝𐴥𐴕 𐴊𐴡𐴥𐴌𐴞 𐴑𐴠𐴌𐴠𐴃𐴢 𐴋𐴞𐴘𐴝𐴃𐴧𐴟 𐴎𐴝𐴀𐴣𐴏𐴢 𐴓𐴡𐴥𐴘 𐴕𐴟 𐴀𐴝𐴘𐴧𐴡𐴤𐴕 𐴀𐴝𐴐𐴧𐴞𐴥𐴓𐴢, 𐴃𐴡𐴥𐴘 𐴀𐴠 𐴔𐴡𐴏𐴞𐴁𐴡𐴃𐴢 𐴀𐴠𐴊𐴧𐴠 𐴇𐴡𐴥𐴃𐴞𐴃𐴧𐴟 𐴁𐴝𐴏𐴞𐴃𐴝𐴥.²²𐴔𐴡𐴕𐴃𐴡𐴌 𐴘𐴝𐴓𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴔𐴧𐴡𐴃𐴢 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴌 𐴎𐴝𐴕 𐴕𐴡 𐴎𐴝𐴘𐴁𐴡; 𐴏𐴞𐴌𐴞𐴥𐴉𐴢 𐴎𐴝𐴀𐴣𐴏𐴢 𐴏𐴝𐴕 𐴇𐴡𐴥𐴃𐴞 𐴀𐴡𐴥𐴘𐴁𐴡 𐴊𐴠.²³𐴀𐴝𐴀𐴛 𐴎𐴞𐴁𐴝𐴤𐴌 𐴔𐴝𐴕𐴟𐴥𐴙𐴐𐴢 𐴀𐴠𐴊𐴧𐴠 𐴎𐴞𐴁𐴝𐴤𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥, 𐴇𐴠𐴥 𐴀𐴝𐴓𐴧𐴝𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝𐴘𐴠 𐴒𐴠𐴓𐴢 𐴊𐴠 𐴌𐴝𐴙𐴃𐴧𐴝 𐴀𐴝𐴣𐴀𐴌 𐴋𐴝𐴥𐴑𐴡𐴃𐴧𐴟 𐴃𐴞𐴥𐴘𐴝𐴘𐴧𐴡𐴌𐴠²⁴𐴈𐴡𐴘𐴧𐴠𐴥 𐴊𐴠, ’𐴂𐴝𐴥𐴀𐴟𐴓𐴢, 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴃𐴟𐴣𐴀𐴝𐴥𐴣𐴃𐴧𐴟 𐴑𐴝𐴥𐴘𐴏𐴝𐴌𐴡𐴌 𐴔𐴟𐴀𐴕𐴃𐴟 𐴈𐴝𐴥𐴔𐴝𐴈𐴝 𐴃𐴞𐴥𐴘𐴝 𐴉𐴡𐴌𐴞𐴁𐴡𐴥. 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴎𐴝𐴦𐴌, 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴣𐴌 𐴖𐴝𐴏𐴃𐴠𐴥 𐴔𐴠𐴀𐴌𐴁𐴝𐴕𐴞 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴎𐴝𐴕 𐴁𐴝𐴏𐴝𐴘 𐴌𐴝𐴙𐴑𐴧𐴠𐴥.‘²⁵𐴇𐴠𐴥𐴃𐴡𐴓𐴧𐴝, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴇𐴞𐴥𐴔𐴧𐴡𐴃𐴢 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴃𐴧𐴟 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴏𐴠𐴤 𐴊𐴠, 𐴀𐴝𐴣𐴀𐴌𐴠𐴥 𐴎𐴠𐴀𐴕 𐴈𐴡𐴘𐴧𐴠𐴥 𐴇𐴠𐴥𐴀𐴕 𐴀𐴡𐴥𐴘𐴁𐴡.²⁶𐴓𐴠𐴑𐴞𐴕 𐴀𐴝𐴣𐴀𐴌𐴝𐴃𐴧𐴟 𐴇𐴡𐴕𐴡𐴤 𐴋𐴞𐴘𐴝𐴃𐴢 𐴀𐴡𐴦𐴎𐴝𐴒𐴡𐴥𐴘 𐴉𐴡𐴌𐴞𐴁𐴡𐴥.“

²⁷𐴃𐴟𐴖𐴝𐴥𐴕𐴡𐴌 𐴏𐴡𐴙𐴊𐴧𐴡𐴥 𐴊𐴞𐴕𐴡𐴃𐴢 𐴊𐴞𐴕 𐴀𐴝𐴊𐴝𐴤 𐴌𐴝𐴙𐴃𐴧𐴝, 𐴀𐴝𐴣𐴀𐴌𐴝 𐴎𐴝𐴀𐴣𐴏𐴢 𐴓𐴡𐴥𐴘 𐴁𐴝𐴥𐴀𐴘𐴢 𐴀𐴝𐴊𐴠𐴌𐴞𐴘𐴝 𐴊𐴡𐴙𐴅𐴧𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴞𐴤 𐴌𐴝𐴥𐴌, 𐴎𐴝𐴀𐴣𐴏𐴡𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴄𐴝𐴥𐴀𐴙𐴅𐴧𐴠 𐴊𐴠, 𐴀𐴞𐴥𐴃𐴝𐴌𐴝 𐴑𐴟𐴓𐴡𐴌 𐴋𐴝𐴥𐴑𐴠 𐴉𐴡𐴀𐴣𐴏𐴠𐴌 𐴁𐴡𐴥𐴓𐴞.²⁸𐴀𐴞𐴥𐴃𐴝𐴌𐴝 𐴉𐴝𐴕𐴞𐴥𐴌 𐴃𐴡𐴓𐴝 𐴔𐴝𐴙𐴂𐴧𐴠𐴥 𐴌𐴝𐴥𐴌 𐴀𐴝𐴐𐴞𐴤 𐴀𐴝𐴥𐴃𐴢 𐴔𐴟𐴌 𐴓𐴡𐴦𐴃𐴢 𐴉𐴝𐴀𐴙𐴓𐴢, 𐴘𐴝𐴥𐴌 𐴇𐴡𐴃𐴟𐴥𐴕 𐴁𐴝𐴦𐴊𐴠 𐴀𐴝𐴁𐴝𐴌 𐴔𐴝𐴙𐴂𐴧𐴠𐴥 𐴌𐴝𐴥𐴌 𐴇𐴝𐴥𐴙𐴄𐴢 𐴀𐴝𐴥𐴃𐴢 𐴔𐴟𐴌 𐴓𐴡𐴦𐴃𐴢 𐴉𐴝𐴀𐴙𐴓𐴢.²⁹𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴢 𐴏𐴝𐴥𐴕 𐴐𐴞𐴥𐴓𐴡𐴃𐴢 𐴊𐴟𐴥𐴐𐴢 𐴈𐴝𐴥𐴘𐴁𐴡 𐴁𐴡𐴥𐴓𐴞 𐴋𐴡𐴦𐴌𐴠 𐴎𐴝𐴀𐴣𐴏𐴡𐴌 𐴉𐴝𐴏𐴞𐴥𐴓𐴡𐴃𐴧𐴟 𐴏𐴝𐴙𐴌𐴒𐴗𐴝𐴥 𐴕𐴡𐴒𐴡𐴓𐴢 𐴔𐴝𐴙𐴅𐴧𐴠𐴥 𐴀𐴝𐴦𐴌 𐴊𐴞𐴕𐴡𐴌 𐴉𐴡𐴀𐴌 𐴉𐴝𐴥𐴍𐴞 𐴁𐴡𐴓𐴧𐴝 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.³⁰𐴃𐴝𐴌𐴉𐴡𐴌𐴠 𐴏𐴠𐴥𐴌𐴝𐴙𐴚𐴒𐴝 𐴒𐴟𐴥𐴕𐴠 𐴎𐴝𐴀𐴣𐴏𐴡𐴃𐴧𐴟 𐴊𐴝𐴥𐴘𐴎𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴠, 𐴀𐴝𐴒𐴞𐴓𐴡𐴃𐴧𐴟 𐴕𐴡𐴒𐴡𐴓𐴢 𐴔𐴝𐴌𐴠 𐴉𐴝𐴥𐴕 𐴒𐴡𐴌𐴞𐴥 𐴎𐴝𐴀𐴣𐴏𐴡𐴌 𐴖𐴡𐴃𐴧𐴟𐴥 𐴕𐴡𐴦 𐴒𐴝𐴥𐴕 𐴊𐴡𐴙𐴅𐴧𐴝𐴃𐴢 𐴓𐴝𐴔𐴝𐴘𐴉𐴠𐴥𐴓𐴝𐴘𐴧𐴠.³¹𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴠 𐴐𐴝𐴥𐴀𐴂𐴡𐴌𐴠 𐴀𐴠𐴊𐴧𐴠 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴎𐴝𐴀𐴣𐴏𐴡𐴌 𐴖𐴡𐴌𐴠 𐴕𐴡 𐴃𐴝𐴥𐴑𐴠, 𐴃𐴟𐴣𐴀𐴝𐴥𐴌𐴝 𐴁𐴝𐴏𐴞 𐴕𐴡 𐴉𐴝𐴌𐴞𐴁𐴝𐴥.“³²𐴃𐴡𐴥𐴘 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴕𐴡𐴦𐴌 𐴌𐴡𐴏𐴞𐴥 𐴒𐴟𐴥𐴕 𐴈𐴝𐴍𐴞𐴊𐴞𐴘𐴠𐴥, 𐴎𐴠𐴀𐴕𐴠 𐴇𐴞𐴥𐴘𐴝𐴕 𐴉𐴝𐴕𐴞𐴥𐴃𐴢 𐴉𐴡𐴌𐴞𐴎𐴝𐴒𐴡𐴥𐴘.

³³𐴁𐴞𐴀𐴕𐴧𐴝 𐴉𐴡𐴀𐴌 𐴉𐴝𐴥𐴍𐴞𐴁𐴝𐴌 𐴀𐴠𐴑𐴧𐴝𐴥𐴒𐴡𐴌𐴞 𐴀𐴝𐴒𐴠, 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴈𐴝𐴥𐴕𐴝 𐴇𐴝𐴥𐴘 𐴁𐴡𐴓𐴧𐴝 𐴀𐴠𐴀𐴕 𐴈𐴡𐴀𐴘𐴢 𐴀𐴝𐴌𐴡𐴏𐴢 𐴒𐴡𐴙𐴅𐴧𐴠𐴥, ”𐴃𐴟𐴣𐴀𐴝𐴥𐴌𐴝 𐴑𐴠𐴏𐴧𐴟𐴥 𐴕𐴝 𐴇𐴝𐴥𐴘 𐴓𐴝𐴒𐴝𐴃𐴝𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴡𐴤 𐴊𐴠 𐴀𐴝𐴙𐴅𐴧𐴝 𐴏𐴡𐴙𐴊𐴧𐴡𐴥 𐴊𐴞𐴕 𐴀𐴡𐴥𐴘𐴧𐴠.³⁴𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴎𐴝𐴕𐴠 𐴁𐴝𐴏𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴑𐴠𐴏𐴧𐴟𐴥 𐴈𐴝𐴥𐴕𐴝 𐴈𐴡𐴥𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴌 𐴔𐴝𐴃𐴝𐴥𐴌 𐴀𐴠𐴑𐴧𐴝𐴥𐴕 𐴏𐴟𐴓𐴢 𐴀𐴟𐴥𐴊𐴧𐴗𐴝 𐴕𐴡 𐴉𐴡𐴌𐴞𐴁𐴡𐴥.“³⁵𐴈𐴡𐴃𐴝𐴤 𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴂𐴝𐴥𐴀𐴟𐴓𐴠 𐴌𐴟𐴄𐴞 𐴓𐴡𐴦𐴘𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴁𐴝𐴦𐴊𐴠 𐴁𐴝𐴥𐴚𐴒𐴞 𐴈𐴝𐴥𐴀𐴃𐴢 𐴊𐴡𐴙𐴅𐴧𐴠.³⁶𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴇𐴞𐴥𐴔𐴧𐴡𐴃𐴢 𐴉𐴝𐴘𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴕𐴞𐴎𐴠 𐴘𐴡𐴥 𐴈𐴝𐴥𐴕𐴝 𐴈𐴝𐴥𐴘𐴧𐴠.³⁷𐴎𐴝𐴀𐴣𐴏𐴡𐴌 𐴖𐴡𐴌𐴠 𐴀𐴝𐴣𐴀𐴌𐴝 𐴑𐴟𐴓𐴠𐴇𐴝𐴓𐴠 𐴊𐴟𐴘 𐴐𐴡𐴥𐴀 𐴇𐴡𐴥𐴙𐴃𐴧𐴡𐴌-𐴏𐴡𐴥 𐴎𐴡𐴕 𐴀𐴝𐴐𐴧𐴞𐴥𐴓𐴝𐴔.³⁸𐴁𐴠𐴒𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴇𐴝𐴥𐴘 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝 𐴒𐴞𐴣𐴘𐴟 𐴀𐴡𐴥𐴑𐴧𐴡𐴓𐴢 𐴊𐴡𐴙𐴅𐴧𐴝𐴃𐴢 𐴉𐴠𐴥𐴓𐴝𐴘𐴊𐴞 𐴎𐴝𐴀𐴣𐴏𐴡𐴌 𐴀𐴟𐴎𐴡𐴥𐴕 𐴈𐴡𐴔 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

𐴎𐴝𐴀𐴣𐴏𐴢 𐴏𐴝𐴥𐴕 𐴁𐴝𐴥𐴚𐴒𐴞𐴒𐴞𐴘𐴡𐴘

³⁹𐴁𐴞𐴀𐴕𐴧𐴝 𐴉𐴡𐴀𐴌 𐴉𐴝𐴥𐴙𐴄𐴧𐴠 𐴌𐴝𐴥𐴌, 𐴀𐴞𐴥𐴃𐴝𐴌𐴝 𐴎𐴝𐴒𐴝 𐴒𐴝𐴥𐴕 𐴏𐴞𐴕𐴞𐴥 𐴕𐴡𐴥 𐴉𐴝𐴌𐴠, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴊𐴡𐴙𐴅𐴧𐴝𐴌 𐴀𐴠𐴀𐴕 𐴀𐴠𐴑𐴧𐴝𐴥𐴕 𐴀𐴝𐴃𐴝𐴌𐴞 𐴊𐴠𐴙𐴑𐴧𐴞𐴥𐴓𐴢, 𐴎𐴞𐴘𐴝𐴥𐴕𐴡𐴌 𐴏𐴡𐴌 𐴁𐴝𐴓𐴟 𐴀𐴡𐴓𐴝. 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠, 𐴎𐴡𐴊𐴞 𐴉𐴝𐴙𐴓𐴧𐴠 𐴎𐴝𐴀𐴣𐴏𐴢 𐴏𐴝𐴥𐴕 𐴇𐴠𐴥𐴍𐴠 𐴖𐴡𐴌𐴠 𐴃𐴟𐴓𐴞𐴤𐴊𐴞 𐴁𐴡𐴓𐴧𐴝.⁴⁰𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴕𐴡𐴒𐴡𐴓𐴢 𐴓𐴟𐴕 𐴈𐴝𐴍𐴞 𐴊𐴡𐴙𐴅𐴧𐴝𐴃𐴢 𐴉𐴠𐴥𐴓𐴝𐴘𐴊𐴞𐴘𐴠, 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴏𐴟𐴥𐴖𐴝𐴕𐴡𐴌 𐴌𐴡𐴏𐴞𐴥 𐴒𐴟𐴥𐴕 𐴀𐴡𐴥 𐴑𐴟𐴥𐴓𐴞𐴉𐴠𐴓𐴝𐴘𐴧𐴠. 𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴡𐴌 𐴐𐴡𐴥𐴌 𐴒𐴝𐴥𐴕 𐴁𐴡𐴘𐴧𐴝𐴌𐴡𐴃𐴢 𐴃𐴟𐴓𐴞𐴤𐴊𐴞𐴘𐴠, 𐴁𐴝𐴦𐴊𐴠 𐴎𐴝𐴀𐴣𐴏𐴢 𐴏𐴝𐴥𐴕 𐴇𐴠𐴥 𐴏𐴡𐴌𐴡𐴌 𐴇𐴞𐴥𐴑𐴧𐴝 𐴎𐴝𐴦𐴃𐴢 𐴊𐴡𐴙𐴅𐴧𐴠.⁴¹𐴔𐴡𐴕𐴃𐴡𐴌 𐴎𐴝𐴀𐴣𐴏𐴢 𐴏𐴝𐴥𐴕 𐴎𐴝𐴘𐴃𐴠-𐴎𐴝𐴘𐴃𐴠 𐴊𐴟𐴘 𐴊𐴡𐴌𐴞𐴘𐴝𐴌 𐴔𐴟𐴊𐴝𐴌 𐴔𐴠𐴍𐴞𐴌 𐴏𐴡𐴌𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘, 𐴀𐴝𐴦𐴌 𐴎𐴝𐴀𐴣𐴏𐴡𐴌 𐴀𐴝𐴒𐴞𐴓𐴢 𐴀𐴠𐴀𐴕 𐴁𐴝𐴎𐴞𐴥𐴒𐴞𐴘𐴡𐴘, 𐴀𐴠𐴁𐴧𐴠 𐴕𐴡 𐴓𐴡𐴌𐴠𐴌, 𐴀𐴝𐴦𐴌 𐴒𐴡𐴙𐴌𐴡𐴌 𐴎𐴡𐴌𐴞𐴘𐴝 𐴉𐴝𐴏𐴞𐴥𐴓𐴡𐴃𐴧𐴟 𐴁𐴝𐴥𐴚𐴒𐴞 𐴒𐴟𐴌𐴞𐴒𐴝𐴌𐴝 𐴀𐴡𐴥𐴘𐴎𐴝𐴃𐴢 𐴊𐴡𐴙𐴅𐴧𐴠.

⁴²𐴉𐴡𐴥𐴗𐴏𐴢 𐴏𐴟𐴥𐴕𐴠 𐴇𐴡𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴕𐴞𐴘𐴡𐴃𐴢 𐴒𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴇𐴝𐴥𐴣𐴏𐴟𐴌𐴞 𐴊𐴝𐴥𐴘𐴎𐴝𐴘𐴒𐴡𐴘 𐴕𐴡 𐴉𐴝𐴌𐴠.⁴³𐴔𐴡𐴕𐴃𐴡𐴌 𐴐𐴝𐴥𐴀𐴂𐴡𐴃𐴧𐴟 𐴂𐴝𐴥𐴀𐴟𐴓𐴡𐴌 𐴎𐴝𐴕 𐴁𐴝𐴏𐴝𐴘𐴃𐴡𐴥 𐴔𐴡𐴕𐴠𐴈𐴡𐴀𐴙𐴓𐴢, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴉𐴡𐴥𐴗𐴏𐴢 𐴏𐴟𐴕𐴡𐴌𐴠 𐴀𐴞𐴥𐴃𐴝𐴌𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴙𐴃𐴧𐴡𐴥 𐴕𐴡𐴥 𐴊𐴠𐴥. 𐴀𐴞𐴥𐴁𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴎𐴠𐴃𐴝𐴌𐴝𐴤 𐴇𐴝𐴥𐴣𐴏𐴟𐴌𐴞 𐴉𐴝𐴌𐴠 𐴀𐴝𐴒𐴠 𐴀𐴞𐴥𐴃𐴝𐴌𐴝 𐴉𐴝𐴕𐴞𐴥𐴃𐴢 𐴎𐴝𐴥𐴂𐴢 𐴔𐴝𐴌𐴞 𐴑𐴟𐴓𐴡𐴌 𐴖𐴡𐴌𐴠 𐴎𐴝𐴘 𐴁𐴡𐴓𐴧𐴝,⁴⁴𐴀𐴝𐴦𐴌 𐴁𐴝𐴑𐴞 𐴒𐴟𐴥𐴕𐴠 𐴃𐴡𐴃𐴧𐴝𐴤 𐴘𐴝𐴥 𐴎𐴝𐴀𐴣𐴏𐴡𐴌 𐴁𐴝𐴥𐴣𐴒𐴝𐴏𐴟𐴥𐴌𐴝 𐴀𐴡𐴥𐴑𐴧𐴡𐴓𐴢 𐴊𐴡𐴥𐴌𐴞𐴘𐴡𐴌𐴠 𐴇𐴠𐴥𐴍𐴠 𐴎𐴝𐴘𐴁𐴡𐴘 𐴓𐴧𐴝. 𐴃𐴡𐴥𐴘 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴈𐴠𐴥𐴉𐴝𐴎𐴡𐴃𐴡𐴌 𐴏𐴝𐴥𐴀𐴣𐴃𐴠 𐴁𐴠𐴒𐴧𐴟𐴥𐴕 𐴑𐴟𐴓𐴡𐴃𐴢 𐴉𐴡𐴀𐴣𐴙𐴐𐴧𐴞.

The Word for the World International

https://app.library.bible/content/87faca8b51c22590