Read 𐴈𐴝𐴔𐴡𐴥𐴓𐴢 26

𐴈𐴝𐴔𐴡𐴥𐴓𐴢26

𐴂𐴝𐴥𐴀𐴟𐴓𐴠 𐴀𐴝𐴒𐴠𐴌𐴞𐴂𐴝𐴌 𐴔𐴟𐴀𐴕𐴃𐴟 𐴕𐴞𐴎𐴡𐴌 𐴏𐴡𐴥𐴉𐴝𐴘 𐴊𐴞𐴥𐴘𐴠

¹𐴀𐴝𐴒𐴠𐴌𐴞𐴂𐴝𐴘𐴠 𐴂𐴝𐴥𐴀𐴟𐴓𐴡𐴌𐴠 𐴈𐴡𐴀𐴌 𐴊𐴠, ”𐴃𐴡𐴌𐴠𐴥 𐴕𐴞𐴎𐴡𐴌 𐴏𐴡𐴥𐴉𐴝𐴘 𐴊𐴞𐴥𐴁𐴝𐴌 𐴀𐴠𐴎𐴝𐴎𐴡𐴃𐴢 𐴊𐴞𐴘𐴝 𐴒𐴞𐴘𐴠𐴥.“ 𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴠 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴕𐴞𐴎𐴡𐴌 𐴏𐴡𐴥𐴉𐴝𐴘 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠 𐴊𐴠:²”𐴀𐴡𐴥 𐴁𐴝𐴀𐴣𐴐𐴧𐴝 𐴀𐴝𐴒𐴠𐴌𐴞𐴂𐴝, 𐴀𐴝𐴙𐴅𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴔𐴟𐴀𐴕𐴃𐴟 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴣𐴀𐴌 𐴖𐴡𐴌𐴠 𐴎𐴠 𐴀𐴠𐴓𐴎𐴝𐴔 𐴓𐴝𐴒𐴝𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴀𐴟𐴓𐴋𐴝 𐴀𐴝𐴣𐴀𐴌 𐴏𐴡𐴥𐴉𐴝𐴘 𐴊𐴞𐴥 𐴉𐴝𐴌𐴞𐴌 𐴊𐴠 𐴇𐴞𐴥𐴘𐴝𐴕 𐴀𐴝𐴀𐴛 𐴁𐴝𐴥𐴒𐴧𐴞𐴃𐴧𐴝 𐴁𐴡𐴥𐴓𐴞 𐴄𐴝𐴥𐴀𐴌𐴞𐴌.³𐴈𐴝𐴥𐴀𐴏𐴒𐴡𐴌𐴞 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴝𐴀𐴛 𐴎𐴝𐴕𐴞, 𐴃𐴟𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴌𐴡𐴏𐴡𐴥𐴔𐴡𐴌 𐴀𐴠𐴊𐴧𐴠 𐴃𐴡𐴌𐴑𐴝𐴃𐴡𐴌𐴑𐴞𐴌 𐴏𐴟𐴥𐴖𐴝𐴓𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴞𐴐𐴞𐴤𐴒𐴡𐴌𐴞 𐴎𐴝𐴕𐴡. 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴒𐴟𐴥𐴕 𐴉𐴟𐴥𐴕𐴡.“

⁴𐴃𐴝𐴔𐴝𐴥𐴔 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴃𐴡 𐴎𐴝𐴕𐴠, 𐴀𐴝𐴣𐴀𐴌 𐴕𐴞𐴎𐴡𐴌 𐴑𐴡𐴗𐴔𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴀𐴠𐴊𐴧𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴣𐴀𐴌 𐴎𐴞𐴕𐴊𐴞𐴒𐴞𐴌 𐴏𐴡𐴓𐴝𐴏𐴡𐴓𐴢 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴇𐴡𐴕𐴊𐴞𐴓𐴧𐴝 𐴀𐴝𐴐𐴧𐴞𐴥𐴓𐴢.⁵𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴠𐴥 𐴁𐴞𐴐𐴞𐴤 𐴊𐴠𐴌𐴞 𐴓𐴡𐴥𐴃𐴞 𐴏𐴞𐴕𐴠𐴥, 𐴎𐴡𐴊𐴞 𐴀𐴞𐴥𐴃𐴝𐴌𐴝𐴃𐴧𐴟 𐴒𐴡𐴁𐴝𐴤 𐴊𐴞𐴥𐴃𐴡 𐴔𐴡𐴕𐴠𐴈𐴡𐴀, 𐴊𐴞 𐴉𐴝𐴌𐴞𐴁𐴡𐴥, 𐴑𐴞 𐴈𐴡𐴘𐴓𐴠𐴥, 𐴀𐴝𐴀𐴛 𐴀𐴝𐴣𐴀𐴌𐴝𐴌 𐴊𐴡𐴥𐴌𐴔𐴡𐴌 𐴀𐴠𐴁𐴧𐴠 𐴈𐴡𐴌𐴝 𐴉𐴞𐴥𐴌𐴑𐴝 𐴉𐴠𐴥𐴌𐴡𐴐𐴞 𐴔𐴡𐴎𐴞𐴕 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴧𐴞𐴥.⁶𐴀𐴝𐴦𐴌 𐴘𐴝𐴓𐴝 𐴀𐴝𐴣𐴀𐴌𐴠𐴥 𐴀𐴠𐴃𐴡𐴓𐴧𐴝𐴤 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴎𐴠 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢 𐴇𐴠𐴥 𐴖𐴝𐴦𐴊𐴝𐴌 𐴖𐴡𐴌𐴠 𐴀𐴝𐴀𐴛 𐴀𐴝𐴐𐴝𐴤 𐴌𐴝𐴑𐴞𐴥.⁷𐴀𐴝𐴣𐴀𐴌𐴝𐴌 𐴁𐴝𐴌𐴡𐴥 𐴈𐴝𐴥𐴀𐴕𐴊𐴝𐴕𐴡𐴌 𐴔𐴝𐴕𐴟𐴥𐴙𐴐𐴠 𐴃𐴡 𐴇𐴠𐴥 𐴖𐴝𐴦𐴊𐴝𐴌𐴠 𐴉𐴝𐴘𐴁𐴝𐴌 𐴀𐴝𐴐𐴝𐴤𐴘𐴠 𐴊𐴞𐴓𐴔𐴡𐴕 𐴊𐴞 𐴌𐴝𐴘𐴃𐴠 𐴊𐴞𐴕𐴠 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴙𐴃𐴧𐴡𐴥. 𐴀𐴡𐴥 𐴁𐴝𐴀𐴣𐴐𐴧𐴝, 𐴀𐴝𐴣𐴀𐴌𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴇𐴠𐴥 𐴀𐴝𐴐𐴝𐴤𐴌 𐴎𐴡𐴌𐴞𐴘𐴝 𐴀𐴠𐴓𐴎𐴝𐴔 𐴊𐴠𐴌 𐴊𐴠.⁸𐴀𐴝𐴓𐴧𐴝𐴘𐴠 𐴔𐴡𐴌𐴝𐴌𐴠 𐴎𐴞𐴕𐴊𐴝 𐴒𐴡𐴌𐴠𐴥 𐴊𐴠 𐴇𐴞𐴥𐴘𐴝𐴕 𐴑𐴞𐴘𐴝𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴁𐴞𐴐𐴧𐴝𐴥𐴐𐴢 𐴕𐴡 𐴓𐴝𐴒𐴠𐴌؟

⁹𐴀𐴝𐴒𐴠 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴄𐴝𐴥𐴀𐴙𐴃𐴧𐴝𐴔 𐴊𐴠, 𐴎𐴠𐴀𐴕𐴠 𐴉𐴝𐴌𐴞 𐴇𐴠𐴥𐴀𐴕𐴠 𐴀𐴝𐴣𐴀𐴃𐴧𐴟 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞𐴌 𐴕𐴝𐴔𐴡𐴌 𐴀𐴟𐴓𐴋𐴝 𐴒𐴡𐴌𐴡𐴤𐴕 𐴉𐴡𐴥𐴌𐴡𐴏𐴢.¹⁰𐴇𐴠𐴥𐴕𐴊𐴞𐴓𐴧𐴝 𐴀𐴝𐴀𐴛 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴡𐴙𐴅𐴧𐴞𐴥 𐴘𐴡𐴥. 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴑𐴠𐴥𐴔𐴡𐴃𐴝 𐴉𐴝𐴘𐴧𐴡𐴌𐴠 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴓𐴝𐴔, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴎𐴠𐴣𐴃𐴧𐴠𐴥 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴉𐴝𐴥𐴘𐴏𐴠𐴓𐴝 𐴒𐴡𐴌𐴠𐴥 𐴇𐴠𐴥𐴣𐴃𐴧𐴠 𐴀𐴝𐴀𐴛 𐴘𐴡𐴥 𐴁𐴟𐴥𐴄𐴢 𐴊𐴞𐴥𐴃𐴝𐴔.¹¹𐴁𐴞𐴐𐴞𐴤 𐴄𐴝𐴙𐴔𐴡𐴃𐴢 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴏𐴝𐴥𐴣𐴎𐴝 𐴊𐴞𐴥 𐴁𐴡𐴓𐴧𐴝 𐴉𐴡𐴃𐴧𐴞𐴥 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴎𐴝𐴘𐴃𐴝𐴔, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴁𐴡𐴓𐴝𐴎𐴟𐴌𐴞 𐴑𐴟𐴉𐴠𐴥𐴌𐴞 𐴒𐴡𐴌𐴝𐴥 𐴁𐴝𐴘𐴃𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴃𐴧𐴝𐴥𐴔. 𐴀𐴝𐴀𐴛 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴁𐴞𐴐𐴞𐴤 𐴌𐴝𐴑 𐴀𐴝𐴐𐴧𐴞𐴥𐴓𐴝𐴔 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴡𐴙𐴕𐴧𐴡 𐴔𐴟𐴓𐴧𐴟𐴑𐴡𐴌 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴡𐴃𐴢 𐴀𐴟𐴥𐴊𐴧𐴗𐴝 𐴎𐴝𐴘-𐴎𐴝𐴘 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴒𐴡𐴙𐴃𐴧𐴝𐴥𐴔.

𐴂𐴝𐴥𐴀𐴟𐴓𐴠 𐴕𐴞𐴎𐴡𐴌 𐴊𐴞𐴓𐴢 𐴁𐴡𐴊𐴡𐴓𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥

¹²”𐴇𐴠𐴥𐴣𐴃𐴧𐴠 𐴀𐴠𐴑 𐴊𐴞𐴕 𐴀𐴝𐴀𐴛 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴊𐴞𐴥𐴑𐴝𐴌 𐴀𐴠𐴊𐴧𐴠 𐴇𐴡𐴥𐴑𐴟𐴔 𐴉𐴝𐴘𐴧𐴡𐴌𐴠 𐴊𐴝𐴔𐴝𐴥𐴏𐴑𐴝𐴏𐴡𐴃𐴢 𐴎𐴝𐴙𐴌 𐴊𐴠 𐴀𐴡𐴑𐴃𐴡𐴥𐴃𐴢,¹³𐴀𐴡𐴥 𐴁𐴝𐴀𐴣𐴐𐴧𐴝, 𐴊𐴟𐴀𐴣𐴙𐴅𐴧𐴝 𐴒𐴡𐴥𐴌𐴞 𐴀𐴝𐴀𐴛 𐴉𐴡𐴣𐴃𐴡𐴃𐴢 𐴔𐴝𐴥𐴎𐴠 𐴀𐴝𐴏𐴔𐴝𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴉𐴡𐴀𐴌 𐴊𐴠𐴙𐴑𐴧𐴞𐴥, 𐴎𐴞𐴁𐴝𐴤 𐴁𐴠𐴙𐴓𐴡𐴌 𐴃𐴟𐴥𐴖𐴝𐴌𐴡 𐴉𐴡𐴀𐴌, 𐴘𐴞𐴥𐴁𐴝 𐴀𐴝𐴣𐴀𐴌 𐴀𐴠𐴊𐴧𐴠 𐴀𐴝𐴣𐴀𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌 𐴏𐴝𐴘𐴌𐴡𐴥𐴔𐴞𐴑𐴧𐴝𐴃𐴧𐴟 𐴏𐴡𐴔𐴑𐴝𐴃𐴢 𐴊𐴡𐴙𐴅𐴧𐴠.¹⁴𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴔𐴠𐴍𐴞𐴃𐴢 𐴉𐴡𐴌𐴞𐴒𐴞𐴘𐴞𐴥𐴒𐴡𐴘, 𐴀𐴝𐴣𐴀𐴌𐴠𐴥 𐴇𐴞𐴁𐴌𐴟𐴤 𐴎𐴟𐴁𐴝𐴕𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌 𐴊𐴠 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞, ’𐴏𐴝𐴥𐴀𐴟𐴓𐴢, 𐴏𐴝𐴥𐴀𐴟𐴓𐴢, 𐴃𐴟𐴘 𐴀𐴝𐴣𐴀𐴌𐴠𐴥 𐴑𐴞𐴘𐴡𐴥𐴓𐴧𐴝 𐴎𐴟𐴓𐴟𐴥𐴔 𐴒𐴡𐴌𐴡𐴤𐴌؟ 𐴀𐴝𐴥𐴙𐴓𐴧𐴝 𐴏𐴟𐴥𐴖𐴝𐴣𐴌 𐴀𐴟𐴓𐴋𐴝 𐴓𐴝𐴃𐴞𐴥 𐴔𐴝𐴌𐴝 𐴃𐴡𐴌 𐴓𐴧𐴝 𐴀𐴝𐴏𐴝𐴤𐴕 𐴕𐴡.‘¹⁵𐴇𐴠𐴥𐴃𐴟𐴕𐴡𐴃𐴢 𐴀𐴝𐴀𐴛 𐴉𐴟𐴏𐴝𐴥𐴌 𐴒𐴡𐴙𐴅𐴧𐴞𐴥 𐴊𐴠, ’𐴔𐴝𐴓𐴞𐴑, 𐴃𐴟𐴀𐴛 𐴇𐴡𐴕؟‘ 𐴔𐴝𐴓𐴞𐴑𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ’𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴏𐴝𐴤, 𐴎𐴞𐴁𐴝𐴤𐴌𐴠 𐴃𐴟𐴘 𐴎𐴟𐴓𐴟𐴥𐴔 𐴒𐴡𐴌𐴡𐴤𐴌.¹⁶𐴀𐴠𐴇𐴡𐴥𐴕 𐴀𐴟𐴄𐴢, 𐴃𐴡𐴌 𐴄𐴠𐴥𐴚𐴠 𐴃𐴞𐴥𐴘𐴝. 𐴀𐴝𐴀𐴛 𐴃𐴡𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴀𐴡𐴥𐴘𐴧𐴞 𐴊𐴠, 𐴃𐴡𐴌𐴠𐴥 𐴈𐴝𐴥𐴀𐴊𐴠𐴔 𐴀𐴠𐴊𐴧𐴠 𐴒𐴡𐴁𐴝𐴤 𐴁𐴝𐴕𐴝𐴘 𐴁𐴡𐴓𐴧𐴝; 𐴏𐴞𐴌𐴞𐴥𐴉𐴢 𐴎𐴞𐴀𐴕 𐴊𐴠𐴙𐴑𐴧𐴡𐴥𐴏𐴢 𐴇𐴞𐴥𐴀𐴕𐴡𐴓𐴧𐴝 𐴕𐴡 𐴁𐴡𐴥𐴓𐴑𐴠 𐴔𐴟𐴀𐴕𐴃𐴟 𐴀𐴝𐴀𐴛 𐴃𐴡𐴌𐴠𐴥 𐴎𐴞𐴀𐴕 𐴊𐴝𐴈𐴝𐴤𐴘𐴧𐴟𐴔 𐴇𐴞𐴥𐴀𐴕𐴡𐴓𐴧𐴝 𐴘𐴡𐴥.¹⁷𐴀𐴝𐴀𐴛 𐴃𐴡𐴌𐴠𐴥 𐴃𐴡𐴌 𐴑𐴡𐴗𐴔𐴡𐴃𐴧𐴟 𐴁𐴝𐴏𐴝𐴘 𐴌𐴝𐴑𐴞𐴥𐴘𐴟𐴔, 𐴀𐴝𐴦𐴌 𐴎𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴝𐴀𐴛 𐴃𐴡𐴌𐴠𐴥 𐴊𐴞𐴉𐴠𐴍𐴝𐴥𐴙𐴌, 𐴀𐴞𐴥𐴃𐴝𐴌𐴝𐴃𐴧𐴟 𐴘𐴡𐴥 𐴁𐴝𐴏𐴝𐴘 𐴌𐴝𐴑𐴞𐴥𐴘𐴟𐴔.¹⁸𐴃𐴟𐴘 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴑𐴟𐴥𐴓𐴞𐴊𐴞𐴁𐴞, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴝𐴕𐴊𐴝𐴤𐴌𐴡𐴃𐴧𐴟 𐴉𐴡𐴀𐴌𐴡𐴌 𐴀𐴟𐴎𐴟 𐴉𐴞𐴥𐴌𐴞 𐴀𐴝𐴘𐴧𐴠𐴤, 𐴀𐴠𐴊𐴧𐴠 𐴐𐴡𐴥𐴘𐴃𐴝𐴕𐴡𐴌 𐴑𐴡𐴁𐴎𐴝𐴃𐴧𐴟 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤. 𐴃𐴡𐴥𐴘 𐴀𐴞𐴥𐴃𐴝𐴌𐴝 𐴒𐴟𐴕𐴝𐴤𐴌 𐴔𐴝𐴉𐴢 𐴉𐴝𐴘𐴁𐴡, 𐴀𐴝𐴦𐴌 𐴎𐴝𐴌𐴝𐴤 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴠 𐴃𐴝𐴌𐴝𐴥𐴌 𐴁𐴟𐴥𐴃𐴡𐴌𐴠 𐴎𐴝𐴒𐴝 𐴉𐴝𐴘𐴁𐴡.‘

𐴘𐴡𐴇𐴟𐴥𐴊𐴞𐴌 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞𐴌 𐴇𐴝𐴣𐴏𐴠 𐴂𐴝𐴥𐴀𐴟𐴓𐴡𐴌 𐴒𐴡𐴁𐴝𐴤

¹⁹”𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴀𐴣𐴐𐴧𐴝 𐴀𐴝𐴒𐴠𐴌𐴞𐴂𐴝, 𐴀𐴝𐴏𐴔𐴝𐴕𐴡𐴃𐴧𐴟 𐴊𐴡𐴌𐴐𐴡𐴥𐴕𐴡𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴠𐴥 𐴎𐴞𐴀𐴕 𐴈𐴡𐴖𐴝𐴤 𐴒𐴞𐴥𐴘𐴠, 𐴀𐴝𐴀𐴛 𐴇𐴞𐴥𐴀𐴕𐴡𐴌 𐴕𐴝𐴉𐴡𐴥𐴌𐴔𐴝𐴕𐴞 𐴕𐴡𐴥 𐴒𐴡𐴌𐴞𐴥.²⁰𐴏𐴝𐴥𐴃𐴡𐴃𐴢 𐴎𐴠𐴃𐴝𐴌𐴝𐴤 𐴊𐴝𐴔𐴝𐴥𐴏𐴑𐴝𐴏𐴡𐴃𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝 𐴌𐴠, 𐴁𐴝𐴦𐴊𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴠𐴊𐴧𐴠 𐴘𐴡𐴇𐴟𐴥𐴊𐴞𐴘𐴝𐴌 𐴀𐴝𐴒𐴝𐴒𐴟𐴌𐴝𐴃𐴢, 𐴀𐴝𐴦𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴘𐴡𐴥 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴝𐴀𐴛 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥 𐴊𐴠 𐴑𐴞, 𐴀𐴞𐴥𐴃𐴝𐴌𐴝𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥 𐴀𐴝𐴓𐴧𐴝𐴌 𐴀𐴟𐴎𐴟 𐴉𐴞𐴥𐴌𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴃𐴡𐴖𐴝𐴥𐴌 𐴓𐴝𐴦𐴘𐴠𐴑 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.²¹𐴇𐴞𐴥𐴘𐴝𐴕𐴡𐴓𐴧𐴝 𐴁𐴡𐴥𐴓𐴞 𐴇𐴡𐴊𐴟𐴥𐴕 𐴘𐴡𐴇𐴟𐴥𐴊𐴞𐴘𐴠 𐴀𐴝𐴣𐴀𐴌𐴠𐴥 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴧𐴟 𐴊𐴡𐴥𐴌𐴞𐴉𐴠𐴓𐴝𐴙𐴓𐴢 𐴀𐴝𐴦𐴌 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢.²²𐴔𐴡𐴕𐴃𐴡𐴌 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴔𐴡𐴊𐴡𐴃𐴢 𐴒𐴡𐴙𐴅𐴧𐴠𐴥, 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴞𐴥𐴘𐴝𐴘 𐴋𐴡𐴣𐴀𐴌-𐴐𐴡𐴥𐴣𐴍𐴡 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴀𐴡𐴥𐴑𐴧𐴡𐴓𐴢 𐴊𐴞𐴌. 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴔𐴟𐴀𐴏𐴝𐴘𐴠 𐴎𐴞𐴀𐴕 𐴉𐴟𐴌𐴝 𐴀𐴡𐴥𐴘𐴁𐴡 𐴁𐴡𐴥𐴓𐴞 𐴈𐴡𐴘𐴧𐴠𐴥 𐴇𐴞𐴥𐴀𐴕𐴡𐴌 𐴁𐴝𐴀𐴌𐴠 𐴀𐴝𐴀𐴛 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴈𐴡𐴘𐴧𐴞𐴥 𐴊𐴠 𐴕𐴝𐴥𐴘;²³𐴑𐴞 𐴈𐴡𐴘𐴓𐴠𐴥, 𐴔𐴡𐴀𐴏𐴞𐴤𐴃𐴧𐴟 𐴊𐴟𐴑 𐴉𐴝𐴦 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠 𐴉𐴡𐴀𐴘𐴓𐴝 𐴎𐴡𐴕 𐴀𐴡𐴥𐴘𐴧𐴡𐴌𐴠 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴕𐴟𐴌𐴡𐴌 𐴈𐴡𐴥𐴁𐴡𐴌 𐴊𐴞𐴥𐴘𐴝 𐴉𐴡𐴌𐴞𐴁𐴡𐴥.“

𐴂𐴝𐴥𐴀𐴟𐴓𐴠 𐴀𐴝𐴒𐴠𐴌𐴞𐴂𐴝𐴌𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴃𐴡𐴤 𐴀𐴝𐴂𐴞𐴥𐴓𐴢 𐴒𐴡𐴙𐴅𐴧𐴠𐴥

²⁴𐴂𐴝𐴥𐴀𐴟𐴓𐴠 𐴎𐴠𐴃𐴧𐴡𐴥𐴃𐴢 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴕𐴞𐴎𐴡𐴌 𐴏𐴡𐴥𐴉𐴝𐴘 𐴊𐴠𐴥𐴌, 𐴉𐴞𐴏𐴃𐴝𐴏𐴠 𐴒𐴡𐴎𐴒𐴡𐴏𐴝𐴘 𐴈𐴡𐴀𐴌 𐴊𐴠, ”𐴇𐴠𐴥𐴘 𐴂𐴝𐴥𐴀𐴟𐴓𐴢, 𐴃𐴟𐴘 𐴉𐴡𐴦𐴓𐴢 𐴀𐴡𐴥𐴘𐴒𐴞𐴘𐴡𐴏𐴒𐴡𐴘! 𐴁𐴞𐴐𐴞𐴤 𐴀𐴠𐴓𐴡𐴥𐴔 𐴇𐴝𐴥𐴏𐴞𐴓𐴢 𐴒𐴡𐴌𐴡𐴤𐴕𐴠 𐴃𐴡𐴌𐴠𐴥 𐴉𐴡𐴦𐴓𐴢 𐴁𐴝𐴕𐴝𐴘𐴉𐴠𐴥𐴓𐴝𐴌.“

²⁵𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴞𐴎𐴧𐴡𐴃𐴊𐴝𐴥𐴌 𐴉𐴞𐴏𐴃𐴝𐴏𐴢, 𐴀𐴝𐴀𐴛 𐴉𐴡𐴦𐴓𐴢 𐴕𐴡𐴥 𐴀𐴡𐴥𐴘, 𐴀𐴝𐴀𐴛 𐴎𐴞𐴀𐴕 𐴈𐴡𐴀𐴙𐴌 𐴇𐴞𐴥𐴀𐴕 𐴏𐴡𐴥𐴘𐴧𐴞 𐴀𐴝𐴦𐴌 𐴁𐴟𐴎𐴡𐴥𐴕𐴡𐴌 𐴈𐴡𐴃𐴝𐴤.²⁶𐴁𐴝𐴀𐴣𐴐𐴧𐴝𐴘𐴠 𐴃𐴡 𐴀𐴞𐴀𐴕𐴡𐴌 𐴁𐴝𐴦𐴁𐴟𐴃𐴠 𐴎𐴝𐴕𐴠, 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴇𐴞𐴥𐴔𐴧𐴡𐴃𐴢 𐴒𐴡𐴥𐴌𐴞 𐴈𐴡𐴃𐴝𐴤 𐴈𐴡𐴀𐴘𐴢 𐴉𐴝𐴌𐴞𐴌 𐴊𐴠. 𐴀𐴝𐴀𐴛 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥 𐴊𐴠, 𐴀𐴠 𐴈𐴡𐴃𐴝𐴤 𐴀𐴞𐴀𐴕 𐴀𐴠𐴑𐴧𐴝𐴥𐴕 𐴀𐴡𐴥 𐴀𐴞𐴥𐴁𐴝𐴘𐴠 𐴕𐴡 𐴎𐴝𐴕𐴠 𐴊𐴠 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴀𐴕 𐴃𐴡 𐴇𐴡𐴕𐴡𐴤 𐴀𐴠𐴑 𐴑𐴟𐴕𐴝𐴃𐴢 𐴀𐴡𐴥𐴘𐴧𐴠 𐴊𐴠 𐴕𐴡.²⁷𐴀𐴡𐴥 𐴁𐴝𐴀𐴣𐴐𐴧𐴝 𐴀𐴝𐴒𐴠𐴌𐴞𐴂𐴝, 𐴃𐴟𐴀𐴛 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤 𐴕𐴠𐴥؟ 𐴀𐴝𐴀𐴛 𐴎𐴝𐴕𐴞 𐴃𐴟𐴀𐴛 𐴒𐴡𐴌𐴡𐴤.“

²⁸𐴇𐴠𐴥𐴃𐴟𐴕𐴡𐴃𐴢 𐴀𐴝𐴒𐴠𐴌𐴞𐴂𐴝𐴘𐴠 𐴂𐴝𐴥𐴀𐴟𐴓𐴡𐴌𐴠 𐴈𐴡𐴀𐴌 𐴊𐴠, ”𐴃𐴟𐴘 𐴀𐴝𐴣𐴀𐴌𐴠𐴥 𐴀𐴠𐴁𐴧𐴠 𐴈𐴡𐴔 𐴄𐴝𐴙𐴔𐴡𐴌 𐴁𐴟𐴥𐴃𐴡𐴌𐴠 𐴀𐴞𐴏𐴝𐴤𐴘𐴞 𐴁𐴝𐴕𐴝𐴘 𐴉𐴝𐴌𐴞𐴁𐴞𐴥 𐴁𐴡𐴥𐴓𐴞 𐴄𐴝𐴥𐴀𐴙𐴅𐴧𐴡𐴏𐴢 𐴕𐴞𐴥𐴑𐴞؟“

²⁹𐴂𐴝𐴥𐴀𐴟𐴓𐴠 𐴈𐴡𐴀𐴌 𐴊𐴠, ”𐴈𐴡𐴔 𐴄𐴝𐴙𐴔𐴡𐴃𐴢 𐴀𐴡𐴥𐴑 𐴘𐴝𐴥 𐴓𐴝𐴔𐴁𐴝 𐴄𐴝𐴙𐴔 𐴀𐴡𐴃𐴢, 𐴀𐴝𐴀𐴛 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴞𐴥 𐴊𐴠, 𐴏𐴞𐴌𐴞𐴥𐴉𐴢 𐴃𐴟𐴀𐴛 𐴕𐴡 𐴁𐴡𐴥𐴓𐴑𐴠 𐴎𐴠𐴃𐴝𐴌𐴝𐴤 𐴀𐴝𐴙𐴅𐴧𐴝 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴠𐴌 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴀𐴡𐴥 𐴎𐴠𐴕 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴀𐴡𐴥, 𐴔𐴡𐴕𐴃𐴡𐴌 𐴀𐴠 𐴏𐴞𐴥𐴘𐴡𐴓𐴢 𐴏𐴝𐴥𐴌𐴝.“

³⁰𐴇𐴠𐴥𐴃𐴟𐴕𐴡𐴃𐴢 𐴁𐴝𐴀𐴣𐴐𐴧𐴝 𐴀𐴟𐴍𐴞𐴤𐴒𐴞𐴘𐴡𐴘 𐴀𐴝𐴦𐴌 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴇𐴝𐴥𐴑𐴞𐴔, 𐴁𐴝𐴌𐴕𐴞𐴏𐴢, 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴁𐴡𐴘𐴍𐴡𐴥𐴑𐴡𐴃𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴘𐴡𐴥 𐴀𐴟𐴍𐴞𐴤𐴒𐴞𐴘𐴡𐴘.³¹𐴀𐴞𐴥𐴃𐴝𐴌𐴝 𐴈𐴠𐴥𐴕𐴃𐴟 𐴕𐴠𐴦𐴓𐴞 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴔𐴡𐴌𐴝 𐴉𐴡𐴌𐴠 𐴊𐴠 𐴏𐴝𐴥𐴣𐴎𐴝𐴌 𐴓𐴝𐴦𐴘𐴠𐴑 𐴘𐴝𐴥 𐴎𐴞𐴘𐴡𐴥𐴓𐴢 𐴈𐴝𐴍𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡𐴥 𐴒𐴡𐴌𐴠𐴥.“

³²𐴀𐴝𐴒𐴠𐴌𐴞𐴂𐴝𐴘𐴠 𐴉𐴞𐴏𐴃𐴝𐴏𐴡𐴌𐴠 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴑𐴝𐴥𐴘𐴏𐴝𐴌𐴡𐴌𐴠 𐴀𐴝𐴂𐴞𐴥𐴓𐴢 𐴕𐴡 𐴒𐴡𐴙𐴃𐴧𐴡𐴥 𐴁𐴡𐴥𐴓𐴞, 𐴀𐴞𐴁𐴝𐴤𐴌𐴠 𐴀𐴠𐴌𐴞𐴊𐴞𐴘𐴝 𐴎𐴝𐴘𐴃𐴡.“

The Word for the World International

https://app.library.bible/content/87faca8b51c22590