Read 𐴈𐴝𐴔𐴡𐴥𐴓𐴢 28

𐴈𐴝𐴔𐴡𐴥𐴓𐴢28

𐴂𐴝𐴥𐴀𐴟𐴓𐴢 𐴔𐴠𐴓𐴞𐴃𐴞 𐴋𐴞𐴘𐴝𐴃𐴢

¹𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴈𐴠𐴥𐴉𐴝𐴎𐴡𐴃𐴡𐴌 𐴏𐴝𐴥𐴀𐴣𐴃𐴠 𐴑𐴟𐴓𐴡𐴌 𐴖𐴡𐴌𐴠 𐴉𐴡𐴀𐴣𐴙𐴐𐴧𐴞, 𐴀𐴝𐴣𐴀𐴌𐴝 𐴎𐴝𐴕𐴞 𐴉𐴝𐴙𐴅𐴧𐴞𐴥 𐴊𐴠, 𐴇𐴠𐴥 𐴋𐴞𐴘𐴝 𐴖𐴝𐴌 𐴕𐴝𐴔 𐴀𐴡𐴥𐴙𐴓𐴊𐴠 𐴔𐴠𐴓𐴞𐴃𐴞.²𐴇𐴠𐴥 𐴋𐴞𐴘𐴝𐴌 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴠 𐴀𐴝𐴣𐴀𐴌𐴝𐴌𐴠 𐴀𐴡𐴥𐴊𐴡𐴌𐴁𐴝𐴀𐴌𐴝 𐴔𐴠𐴀𐴌𐴁𐴝𐴕𐴞 𐴒𐴡𐴙𐴅𐴧𐴞𐴥𐴓𐴢. 𐴇𐴞𐴥𐴘𐴝𐴓𐴝 𐴎𐴡𐴥𐴌 𐴊𐴠𐴥𐴌 𐴊𐴠 𐴀𐴠𐴊𐴧𐴠 𐴄𐴝𐴥𐴕𐴋𐴝 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠, 𐴀𐴞𐴥𐴃𐴝𐴌𐴝 𐴀𐴡𐴦𐴙𐴕 𐴎𐴡𐴓𐴝𐴘 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥.³𐴂𐴝𐴥𐴀𐴟𐴓𐴠 𐴎𐴠𐴃𐴧𐴡𐴥𐴃𐴢 𐴀𐴠𐴑 𐴃𐴝𐴌𐴝 𐴉𐴟𐴥𐴖𐴝𐴕𐴝 𐴊𐴝𐴌𐴒𐴗𐴝𐴤 𐴊𐴡𐴓𐴝 𐴒𐴡𐴌𐴞𐴥 𐴀𐴡𐴦𐴙𐴕𐴡𐴃𐴢 𐴊𐴞𐴘𐴠𐴥, 𐴃𐴡𐴥𐴘 𐴒𐴡𐴌𐴡𐴔𐴠 𐴀𐴠𐴒𐴧𐴗𐴝𐴤 𐴁𐴞𐴐𐴢 𐴀𐴡𐴓𐴝 𐴇𐴝𐴥𐴉𐴢 𐴕𐴠𐴦𐴓𐴞 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴀𐴝𐴥𐴃𐴢 𐴏𐴝𐴥𐴘 𐴇𐴡𐴦𐴣𐴌𐴞 𐴊𐴡𐴙𐴅𐴧𐴠.⁴𐴇𐴠𐴥𐴍𐴞𐴘𐴝𐴌 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴠 𐴎𐴠𐴃𐴧𐴡𐴥𐴃𐴢 𐴂𐴝𐴥𐴀𐴟𐴓𐴡𐴌 𐴀𐴝𐴥𐴃𐴡𐴃𐴢 𐴇𐴝𐴥𐴉𐴧𐴗𐴝 𐴓𐴡𐴄𐴑𐴞 𐴃𐴝𐴥𐴙𐴑𐴧𐴠 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴁𐴠𐴐𐴡𐴥𐴑, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴑𐴟𐴥𐴕𐴞; 𐴀𐴞𐴁𐴝𐴤 𐴊𐴡𐴌𐴞𐴘𐴝𐴃𐴧𐴟 𐴁𐴝𐴏𐴞𐴓𐴠𐴥 𐴘𐴡 𐴀𐴞𐴕𐴏𐴝𐴥𐴉𐴞 𐴕𐴝𐴔𐴡𐴌 𐴊𐴠𐴁𐴡𐴃𐴝𐴘𐴠 𐴀𐴞𐴁𐴝𐴤𐴌𐴠 𐴁𐴝𐴏𐴞𐴃𐴡𐴥 𐴕𐴡 𐴊𐴠𐴥𐴌.“⁵𐴓𐴠𐴑𐴞𐴕 𐴂𐴝𐴥𐴀𐴟𐴓𐴠 𐴇𐴝𐴥𐴉𐴧𐴗𐴝 𐴎𐴝𐴥𐴌𐴞 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴠, 𐴀𐴝𐴦𐴌 𐴀𐴞𐴥𐴁𐴝𐴌 𐴇𐴡𐴕𐴡𐴤 𐴇𐴡𐴥𐴃𐴞 𐴕𐴡𐴥.⁶𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴄𐴝𐴥𐴀𐴙𐴅𐴧𐴠 𐴊𐴠, 𐴀𐴞𐴥𐴁𐴝𐴌 𐴒𐴝𐴦 𐴉𐴟𐴥𐴓𐴞𐴎𐴝𐴘𐴁𐴡𐴘, 𐴀𐴝𐴌𐴕𐴡𐴥𐴘𐴓𐴠 𐴀𐴝𐴃𐴞𐴥𐴑𐴧𐴝 𐴉𐴡𐴌𐴞 𐴔𐴡𐴌𐴞𐴎𐴝𐴘𐴁𐴡𐴥𐴘, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴇𐴡𐴃𐴟𐴥𐴕 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴁𐴝𐴦𐴊𐴠 𐴊𐴠𐴑𐴠𐴥𐴌 𐴊𐴠, 𐴀𐴞𐴥𐴁𐴝𐴃𐴧𐴟 𐴑𐴠𐴏𐴧𐴟𐴥 𐴕𐴡 𐴀𐴡𐴥𐴌, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴔𐴡𐴕 𐴁𐴡𐴊𐴡𐴓𐴞 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴀𐴠𐴒𐴧𐴗𐴝𐴤 𐴊𐴠𐴁𐴡𐴃𐴝!“

⁷𐴇𐴠𐴥 𐴎𐴝𐴒𐴝𐴌 𐴋𐴝𐴥𐴑𐴠 𐴇𐴠𐴥 𐴋𐴞𐴘𐴝𐴌 𐴀𐴠𐴁𐴧𐴠 𐴋𐴡𐴣𐴀𐴌 𐴔𐴝𐴕𐴟𐴥𐴙𐴐𐴡𐴌 𐴎𐴡𐴁𐴞𐴕 𐴀𐴡𐴥𐴑𐴧𐴡𐴓𐴢 𐴀𐴝𐴐𐴧𐴞𐴥𐴓𐴢. 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴕𐴝𐴔 𐴀𐴡𐴥𐴙𐴓𐴊𐴠 𐴉𐴟𐴁𐴞𐴓𐴞. 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴃𐴞𐴕 𐴊𐴞𐴕 𐴉𐴝𐴥𐴕 𐴀𐴝𐴣𐴀𐴌𐴝𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴙𐴅𐴧𐴠𐴥.⁸𐴀𐴝𐴦𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴉𐴟𐴁𐴞𐴓𐴞𐴌 𐴁𐴝𐴉𐴢 𐴒𐴝𐴦𐴃𐴎𐴡𐴌𐴠 𐴀𐴠𐴊𐴧𐴠 𐴒𐴝𐴦𐴓𐴝𐴔𐴝𐴕𐴞𐴘𐴠 𐴁𐴞𐴏𐴝𐴥𐴕𐴝𐴃𐴢 𐴉𐴡𐴌𐴞 𐴀𐴝𐴐𐴧𐴞𐴥𐴓𐴢. 𐴂𐴝𐴥𐴀𐴟𐴓𐴠 𐴀𐴞𐴥𐴁𐴝𐴌𐴠 𐴏𐴝𐴘𐴃𐴡𐴥 𐴁𐴟𐴥𐴃𐴡𐴌𐴠 𐴒𐴞𐴦𐴘𐴠𐴥, 𐴀𐴝𐴦𐴌 𐴊𐴟𐴖𐴝 𐴒𐴡𐴌𐴞𐴥 𐴁𐴝𐴦𐴊𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥 𐴀𐴞𐴥𐴁𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.⁹𐴘𐴝𐴥𐴌𐴁𐴝𐴦𐴊𐴠, 𐴇𐴠𐴥 𐴋𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴁𐴝𐴑𐴞 𐴁𐴞𐴘𐴝𐴌𐴝𐴙𐴔𐴧𐴝 𐴁𐴠𐴒𐴧𐴟𐴥𐴕 𐴂𐴝𐴥𐴀𐴟𐴓𐴡𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴘𐴠.¹⁰𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌𐴠 𐴁𐴡𐴀𐴗𐴃𐴢 𐴋𐴡𐴥𐴙𐴓𐴧𐴝 𐴃𐴡𐴌𐴞𐴑𐴝𐴘𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴠𐴥; 𐴀𐴝𐴦𐴌 𐴀𐴝𐴣𐴀𐴌𐴝 𐴈𐴠𐴥𐴕𐴃𐴟 𐴁𐴝𐴐𐴝𐴥 𐴓𐴡𐴥𐴘 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴡𐴥𐴘𐴧𐴞 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴝𐴣𐴀𐴌𐴝𐴃𐴧𐴟 𐴏𐴡𐴉𐴡𐴥𐴌𐴡𐴓𐴧𐴝 𐴓𐴝𐴒𐴠 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴞𐴥𐴃𐴝𐴌𐴝 𐴎𐴝𐴀𐴣𐴏𐴡𐴃𐴢 𐴁𐴡𐴥𐴌𐴞𐴊𐴞𐴘𐴠.

𐴂𐴝𐴥𐴀𐴟𐴓𐴢 𐴌𐴡𐴔𐴡𐴃𐴢 𐴉𐴡𐴀𐴣𐴙𐴐𐴧𐴠

¹¹𐴃𐴞𐴕 𐴔𐴝𐴐𐴢 𐴁𐴝𐴦𐴊𐴠 𐴀𐴝𐴣𐴀𐴌𐴝 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴞𐴘𐴝 𐴐𐴡𐴥𐴀𐴌𐴡𐴌 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴁𐴝𐴐𐴝𐴥 𐴓𐴡𐴥𐴘𐴧𐴞, 𐴎𐴞𐴘𐴝𐴥𐴕 𐴉𐴟𐴌𐴝 𐴐𐴞𐴥𐴃𐴑𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴇𐴠𐴥 𐴋𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢. 𐴇𐴠𐴥 𐴎𐴝𐴀𐴣𐴏𐴢 𐴏𐴝𐴥𐴕𐴡𐴌𐴠 ”𐴎𐴡𐴦𐴣𐴙𐴑𐴧𐴝 𐴊𐴠𐴁𐴡𐴃𐴝,“ 𐴁𐴡𐴓𐴞 𐴈𐴡𐴘𐴃𐴡𐴤.¹²𐴀𐴝𐴦𐴌 𐴏𐴞𐴌𐴝𐴑𐴟𐴏𐴝 𐴐𐴡𐴥𐴀𐴌𐴡𐴃𐴢 𐴎𐴝𐴀𐴣𐴏𐴢 𐴏𐴝𐴥𐴕 𐴁𐴝𐴣𐴊𐴞𐴥𐴘𐴡𐴌𐴠 𐴇𐴠𐴥𐴍𐴠 𐴃𐴞𐴕 𐴊𐴞𐴕 𐴃𐴝𐴥𐴙𐴑𐴧𐴞.¹³𐴀𐴝𐴣𐴀𐴌𐴝 𐴈𐴠𐴥𐴕𐴃𐴟 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴁𐴝𐴐𐴝𐴥 𐴓𐴡𐴥𐴘 𐴌𐴠𐴒𐴞𐴘𐴡𐴕 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴙𐴐𐴧𐴞. 𐴀𐴠𐴑 𐴊𐴞𐴕 𐴁𐴝𐴦𐴊𐴠 𐴊𐴡𐴀𐴘𐴕𐴝𐴓𐴞 𐴁𐴡𐴘𐴧𐴝𐴌 𐴁𐴝𐴀𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴃𐴝𐴌𐴉𐴡𐴌 𐴊𐴞𐴕 𐴂𐴟𐴃𐴠𐴓𐴞 𐴄𐴡𐴀𐴕𐴡𐴃𐴢 𐴉𐴡𐴀𐴣𐴙𐴐𐴧𐴞.¹⁴𐴇𐴠𐴥𐴍𐴠 𐴀𐴝𐴣𐴀𐴌𐴝 𐴇𐴡𐴦𐴎𐴧𐴡𐴕 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴓𐴡𐴦𐴃𐴢 𐴉𐴝𐴘𐴧𐴞𐴥, 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠𐴑 𐴇𐴝𐴥𐴉𐴃𐴝 𐴃𐴝𐴥𐴑𐴞𐴃𐴡 𐴊𐴝𐴖𐴡𐴃𐴢 𐴊𐴞𐴀𐴓𐴢. 𐴇𐴠𐴥𐴀𐴕𐴒𐴡𐴌𐴞 𐴀𐴝𐴣𐴀𐴌𐴝 𐴌𐴡𐴔𐴡𐴃𐴢 𐴉𐴡𐴀𐴣𐴙𐴐𐴧𐴞𐴒𐴡𐴘.¹⁵𐴇𐴠𐴥𐴍𐴞𐴘𐴝𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴠 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴌𐴝 𐴀𐴝𐴘𐴧𐴞𐴤𐴌 𐴊𐴠 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴔𐴞𐴓𐴃𐴡 𐴇𐴡𐴊𐴟𐴥𐴕 𐴀𐴝𐴂𐴧𐴞𐴘𐴟𐴏𐴡𐴌 𐴁𐴝𐴎𐴝𐴌 𐴈𐴡𐴀 𐴊𐴠 𐴇𐴞𐴥𐴘𐴝𐴕𐴡𐴌 𐴇𐴠𐴥𐴊𐴧𐴟𐴌 𐴀𐴝𐴙𐴐𐴧𐴠𐴥, 𐴀𐴝𐴌 𐴇𐴡𐴊𐴟𐴥𐴕 𐴃𐴞𐴕𐴁𐴡𐴀𐴍𐴞𐴚 𐴈𐴡𐴀 𐴊𐴠 𐴇𐴞𐴥𐴘𐴝𐴕𐴡𐴌 𐴇𐴠𐴥𐴊𐴧𐴟𐴌 𐴀𐴝𐴙𐴐𐴧𐴠𐴥. 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌𐴠 𐴊𐴠𐴑𐴞𐴥 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴇𐴞𐴥𐴔𐴧𐴡𐴃𐴢 𐴉𐴝𐴘𐴧𐴠𐴥.¹⁶𐴀𐴝𐴣𐴀𐴌𐴝 𐴌𐴡𐴔𐴡𐴃𐴢 𐴉𐴡𐴀𐴣𐴏𐴞 𐴁𐴝𐴦𐴊𐴠 𐴂𐴝𐴥𐴀𐴟𐴓𐴡𐴌𐴠 𐴕𐴞𐴎𐴡𐴃𐴧𐴟 𐴔𐴡𐴕𐴠𐴈𐴡𐴀 𐴊𐴠 𐴇𐴠𐴥𐴍𐴠 𐴃𐴝𐴥𐴑𐴞 𐴁𐴡𐴓𐴧𐴝 𐴀𐴠𐴎𐴝𐴎𐴡𐴃𐴢 𐴊𐴞𐴘𐴝 𐴒𐴞𐴘𐴠𐴥. 𐴀𐴞𐴥𐴁𐴝𐴌𐴠 𐴀𐴠𐴎𐴧𐴡𐴕 𐴉𐴡𐴥𐴗𐴏𐴠 𐴉𐴝𐴀𐴌𐴝 𐴊𐴞𐴥𐴃𐴡.

𐴌𐴡𐴔𐴡𐴃𐴢 𐴂𐴝𐴥𐴀𐴟𐴓𐴡𐴌 𐴃𐴡𐴁𐴡𐴓𐴞𐴑

¹⁷𐴃𐴞𐴕 𐴊𐴞𐴕 𐴁𐴝𐴦𐴊𐴠, 𐴂𐴝𐴥𐴀𐴟𐴓𐴠 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴔𐴝𐴃𐴝𐴘𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴎𐴡𐴔𐴝 𐴀𐴡𐴥𐴘𐴧𐴠, 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴎𐴡𐴊𐴞 𐴀𐴝𐴀𐴛 𐴀𐴝𐴣𐴀𐴌𐴝𐴌 𐴑𐴡𐴗𐴔𐴡𐴌 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴌𐴡𐴏𐴡𐴥𐴔 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝 𐴑𐴠𐴏𐴧𐴟𐴥 𐴕𐴡 𐴒𐴡𐴙𐴓𐴧𐴠𐴥 𐴘𐴡, 𐴃𐴡𐴀 𐴀𐴝𐴣𐴀𐴌𐴠𐴥 𐴇𐴡𐴊𐴞𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴌𐴡𐴔𐴞 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴝 𐴒𐴞𐴥𐴘𐴠.¹⁸𐴌𐴡𐴔𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴣𐴀𐴌𐴠𐴥 𐴎𐴠𐴌𐴝𐴥 𐴒𐴡𐴌𐴞𐴥 𐴁𐴝𐴦𐴊𐴠 𐴀𐴠𐴌𐴞𐴊𐴞𐴃𐴡 𐴔𐴡𐴕𐴠𐴈𐴡𐴀𐴙𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴝𐴣𐴀𐴃𐴧𐴟 𐴔𐴡𐴌𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡𐴥 𐴉𐴝𐴦.¹⁹𐴔𐴡𐴕𐴃𐴡𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴃𐴧𐴡𐴥𐴃𐴢 𐴇𐴞𐴥𐴘𐴝𐴕𐴡𐴃𐴢 𐴁𐴝𐴎𐴝𐴥 𐴊𐴞𐴥𐴘𐴠, 𐴀𐴝𐴀𐴛 𐴔𐴡𐴅𐴁𐴟𐴌 𐴀𐴡𐴥𐴘 𐴑𐴝𐴥𐴘𐴏𐴝𐴌𐴡𐴌𐴠 𐴀𐴝𐴂𐴞𐴥𐴓𐴢 𐴒𐴡𐴙𐴅𐴧𐴞𐴥, 𐴇𐴝𐴥𐴓𐴠𐴑𐴠 𐴇𐴞𐴥𐴘𐴝𐴕𐴡𐴌 𐴔𐴝𐴀𐴕𐴞 𐴀𐴝𐴣𐴀𐴃𐴧𐴟 𐴕𐴞𐴎𐴡𐴌 𐴑𐴡𐴗𐴔𐴡𐴌 𐴀𐴟𐴓𐴋𐴝 𐴀𐴠𐴓𐴎𐴝𐴔 𐴓𐴝𐴒𐴝𐴘𐴁𐴝𐴥𐴌 𐴕𐴞𐴘𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴕𐴡.²⁰𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴝𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴇𐴡𐴘 𐴁𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴃𐴝𐴘𐴧𐴞𐴥 𐴊𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴎𐴠 𐴀𐴝𐴐𐴝𐴤 𐴌𐴝𐴑𐴠𐴥 𐴇𐴠𐴥 𐴀𐴝𐴐𐴝𐴤𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌𐴠𐴥 𐴀𐴠 𐴏𐴞𐴥𐴘𐴡𐴓𐴢 𐴓𐴡𐴥𐴘 𐴁𐴝𐴣𐴊𐴝𐴤 𐴒𐴞𐴥𐴘𐴠.“

²¹𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴣𐴌 𐴁𐴝𐴦𐴁𐴟𐴃𐴠 𐴘𐴡𐴇𐴟𐴥𐴊𐴞𐴘𐴝𐴃𐴧𐴟 𐴇𐴡𐴕𐴡𐴤 𐴐𐴠𐴣𐴍𐴞𐴥 𐴕𐴡𐴥 𐴉𐴝𐴘, 𐴀𐴝𐴦𐴌 𐴈𐴠𐴥𐴕𐴃𐴟 𐴎𐴠 𐴁𐴝𐴥𐴘𐴧𐴝𐴙𐴕 𐴀𐴠𐴍𐴠𐴥 𐴀𐴝𐴙𐴐𐴧𐴞𐴤𐴓𐴢 𐴀𐴞𐴥𐴃𐴝𐴌𐴝𐴃𐴧𐴟 𐴘𐴡𐴥 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴣𐴌 𐴁𐴝𐴦𐴁𐴟𐴃𐴠 𐴕𐴡 𐴇𐴡𐴕𐴡𐴤 𐴈𐴡𐴥𐴁𐴡𐴌 𐴊𐴞𐴥𐴘𐴠, 𐴀𐴝𐴦𐴌 𐴕𐴡 𐴇𐴡𐴕𐴡𐴤 𐴈𐴡𐴥𐴌𐴝𐴉𐴢 𐴈𐴡𐴘𐴧𐴠𐴥.²²𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴃𐴧𐴟 𐴃𐴟𐴣𐴀𐴝𐴥𐴣𐴌 𐴌𐴝𐴘 𐴀𐴡𐴥𐴑𐴧𐴡𐴓𐴢 𐴉𐴟𐴥𐴙𐴕𐴃𐴡 𐴔𐴡𐴕𐴠𐴈𐴡𐴀𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴎𐴝𐴕𐴞 𐴊𐴠, 𐴉𐴡𐴃𐴧𐴞𐴥 𐴎𐴝𐴒𐴝𐴌 𐴔𐴝𐴙𐴕𐴐𐴠𐴥 𐴀𐴠 𐴉𐴞𐴥𐴌𐴑𐴝𐴌 𐴀𐴟𐴓𐴋𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀.“

²³𐴃𐴡𐴥𐴘 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴢 𐴓𐴡𐴥𐴘 𐴔𐴞𐴓𐴞 𐴁𐴡𐴓𐴧𐴝 𐴀𐴠𐴒𐴧𐴗𐴝𐴤 𐴊𐴞𐴕 𐴄𐴞𐴥𐴑 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴠𐴊𐴧𐴠 𐴀𐴝𐴌𐴡𐴤 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴃𐴝𐴥𐴑𐴠 𐴊𐴠 𐴎𐴝𐴒𐴝 𐴇𐴞𐴥𐴘𐴝𐴕𐴡𐴃𐴢 𐴀𐴝𐴙𐴐𐴧𐴠𐴥. 𐴃𐴝𐴌𐴉𐴡𐴌𐴠 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌𐴠 𐴁𐴞𐴀𐴕𐴧𐴝𐴃𐴧𐴟 𐴓𐴡𐴥𐴃𐴞 𐴇𐴝𐴥𐴣𐴎𐴞𐴕𐴧𐴝 𐴉𐴡𐴙𐴅𐴧𐴡𐴕𐴃𐴡 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴁𐴟𐴎𐴝𐴥𐴙𐴓𐴢 𐴀𐴠𐴊𐴧𐴠 𐴒𐴡𐴁𐴝𐴤 𐴊𐴞𐴥𐴓𐴢, 𐴀𐴝𐴦𐴌 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴧𐴟 𐴊𐴝𐴈𐴝𐴤𐴘 𐴊𐴞𐴥𐴊𐴞 𐴀𐴞𐴥𐴃𐴝𐴌𐴝𐴌𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴀𐴞𐴔𐴝𐴕 𐴀𐴝𐴕𐴝𐴤 𐴁𐴝𐴘𐴃𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢.²⁴𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴑𐴞𐴘𐴠𐴥-𐴑𐴞𐴘𐴠𐴥 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴔𐴡𐴕𐴃𐴡𐴌 𐴀𐴝𐴌𐴒𐴟𐴥𐴕𐴠 𐴀𐴠𐴑𐴞𐴕 𐴕𐴡𐴥 𐴒𐴡𐴌𐴠𐴥.²⁵𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠𐴃𐴧𐴡𐴥𐴃𐴢 𐴀𐴡𐴁𐴡𐴕𐴝𐴁𐴡𐴕𐴞 𐴉𐴡𐴘𐴊𐴝 𐴀𐴡𐴥𐴘𐴧𐴠, 𐴂𐴝𐴥𐴀𐴟𐴓𐴡𐴌 𐴀𐴠 𐴈𐴡𐴃𐴝𐴤 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴎𐴝𐴦𐴃𐴢 𐴊𐴡𐴙𐴅𐴧𐴠, 𐴑𐴞 𐴈𐴡𐴘𐴓𐴠𐴥, ”𐴂𐴝𐴑-𐴌𐴟𐴀𐴘𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴀𐴝𐴥𐴃𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴏𐴡𐴥𐴘𐴧𐴞 𐴈𐴡𐴃𐴝𐴤 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥,²⁶𐴀𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌 𐴇𐴝𐴣𐴏𐴠 𐴎𐴝𐴘 𐴈𐴡𐴀𐴒𐴡𐴘 𐴊𐴠,’𐴃𐴟𐴣𐴀𐴝𐴥𐴌𐴝 𐴈𐴝𐴕𐴠 𐴉𐴟𐴥𐴕𐴝𐴃𐴢 𐴃𐴝𐴥𐴑𐴞𐴁𐴝 𐴔𐴡𐴕𐴃𐴡𐴌 𐴕𐴡 𐴁𐴟𐴎𐴞𐴥𐴁𐴝,𐴃𐴟𐴣𐴀𐴝𐴥𐴌𐴝 𐴏𐴟𐴑𐴠𐴤 𐴏𐴝𐴀𐴃𐴢 𐴃𐴝𐴥𐴑𐴞𐴁𐴝 𐴔𐴡𐴕𐴃𐴡𐴌 𐴕𐴡 𐴏𐴞𐴕𐴞𐴥𐴁𐴝.²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴃𐴡 𐴊𐴡𐴌𐴡𐴤 𐴀𐴡𐴥𐴘𐴒𐴞𐴘𐴡𐴘,𐴀𐴞𐴥𐴃𐴝𐴌𐴝𐴌 𐴈𐴝𐴕 𐴁𐴡𐴥𐴌 𐴀𐴡𐴥𐴘𐴒𐴞𐴘𐴡𐴘,𐴀𐴝𐴦𐴌 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴏𐴟𐴑 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴏𐴟𐴑𐴠𐴤 𐴊𐴠𐴑𐴞𐴥𐴃𐴡,𐴈𐴝𐴕𐴠 𐴉𐴟𐴥𐴕𐴞𐴃𐴡,𐴕𐴞𐴎𐴡𐴌 𐴊𐴞𐴓𐴠 𐴁𐴟𐴎𐴞𐴥 𐴀𐴝𐴣𐴀𐴌 𐴇𐴝𐴣𐴏𐴠 𐴉𐴞𐴥𐴌𐴞 𐴀𐴝𐴘𐴃𐴡𐴤,𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴙𐴃𐴧𐴝𐴥𐴔.‘

²⁸”𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌 𐴊𐴠 𐴑𐴞, 𐴀𐴝𐴓𐴧𐴝𐴌 𐴀𐴠 𐴕𐴠𐴅𐴝𐴃𐴡𐴌 𐴈𐴡𐴥𐴁𐴡𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴉𐴡𐴀𐴣𐴏𐴝 𐴒𐴞𐴥𐴘𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴉𐴟𐴥𐴕𐴞𐴁𐴡.“²⁹𐴂𐴝𐴥𐴀𐴟𐴓𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴈𐴡𐴘𐴧𐴠𐴥 𐴌𐴝𐴥𐴌, 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴉𐴡𐴤𐴏𐴡𐴃𐴢 𐴁𐴞𐴐𐴞𐴤 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥 𐴒𐴞𐴦𐴘𐴠𐴥𐴒𐴡𐴘.

³⁰𐴂𐴝𐴥𐴀𐴟𐴓𐴢 𐴉𐴟𐴌𐴝 𐴊𐴟𐴘 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴕𐴞𐴎𐴡𐴌 𐴁𐴝𐴥𐴌𐴝 𐴒𐴡𐴥𐴌𐴡𐴃𐴢 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴎𐴠𐴃𐴡𐴥 𐴎𐴡𐴕 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴘𐴃𐴡𐴤 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴥𐴁𐴝𐴘𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴌𐴞𐴥,³¹𐴉𐴟𐴌𐴝𐴉𐴟𐴌𐴞 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴇𐴡𐴕𐴡𐴤 𐴁𐴝𐴎𐴝𐴥 𐴏𐴝𐴥𐴌𐴝 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥 𐴀𐴠𐴊𐴧𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴃𐴝𐴦𐴓𐴞𐴔 𐴊𐴞𐴃𐴡.

The Word for the World International

https://app.library.bible/content/87faca8b51c22590