Read 𐴈𐴝𐴔𐴡𐴥𐴓𐴢 20

𐴈𐴝𐴔𐴡𐴥𐴓𐴢20

𐴂𐴝𐴥𐴀𐴟𐴓𐴢 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴢 𐴀𐴠𐴊𐴧𐴠 𐴒𐴞𐴌𐴞𐴏𐴡𐴃𐴢 𐴒𐴞𐴦𐴘𐴠𐴥

¹𐴇𐴝𐴥𐴚𐴒𐴝𐴔𐴝 𐴁𐴡𐴕 𐴀𐴡𐴥𐴘𐴎𐴝𐴘𐴒𐴡𐴘 𐴁𐴝𐴦𐴊𐴠, 𐴂𐴝𐴥𐴀𐴟𐴓𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝 𐴁𐴝𐴘𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴔𐴧𐴡𐴃𐴢 𐴊𐴞𐴥 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴊𐴝𐴘 𐴓𐴡𐴘 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴢 𐴎𐴝𐴘 𐴁𐴡𐴓𐴧𐴝 𐴁𐴝𐴐𐴝𐴥 𐴓𐴡𐴥𐴘𐴧𐴠.²𐴇𐴠𐴥𐴍𐴠 𐴉𐴡𐴀𐴣𐴏𐴞 𐴁𐴝𐴦𐴊𐴠, 𐴇𐴠𐴥𐴍𐴞𐴘𐴝𐴌 𐴀𐴠𐴓𐴝𐴑𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘-𐴎𐴝𐴘 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴇𐴞𐴥𐴔𐴧𐴡𐴃𐴢 𐴊𐴞𐴥 𐴁𐴝𐴦𐴊𐴠 𐴒𐴞𐴌𐴞𐴏𐴡𐴃𐴢 𐴀𐴝𐴙𐴐𐴧𐴠𐴥.³𐴀𐴞𐴥𐴁𐴝 𐴇𐴠𐴥𐴍𐴠 𐴃𐴞𐴕 𐴔𐴝𐴐𐴢 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴏𐴞𐴀𐴌𐴞𐴘𐴝 𐴔𐴟𐴓𐴧𐴟𐴑𐴡𐴃𐴢 𐴎𐴝𐴘𐴁𐴝𐴌 𐴀𐴝𐴒𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴇𐴠𐴥𐴓𐴝𐴉𐴢 𐴏𐴝𐴙𐴓𐴢 𐴒𐴟𐴥𐴌𐴝𐴘𐴧𐴠 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴞𐴥𐴁𐴝 𐴔𐴝𐴑𐴠𐴊𐴡𐴥𐴕𐴞𐴘𐴝 𐴁𐴝𐴥𐴘 𐴖𐴝𐴦𐴉𐴠𐴏𐴢 𐴎𐴝𐴘𐴃𐴡𐴒𐴡𐴥𐴘 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥.⁴𐴂𐴝𐴥𐴀𐴟𐴓𐴡𐴌 𐴉𐴟𐴥𐴖𐴝𐴣𐴃𐴞 𐴇𐴡𐴦𐴎𐴧𐴡𐴕 𐴏𐴝𐴥𐴀𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠, 𐴁𐴠𐴌𐴞𐴘𐴝𐴃𐴧𐴟 𐴂𐴟𐴌𐴟𐴏𐴡𐴌 𐴉𐴟𐴖𐴝 𐴏𐴡𐴂𐴠𐴥𐴃𐴝𐴌, 𐴃𐴞𐴏𐴡𐴥𐴓𐴡𐴕𐴞𐴑𐴝𐴃𐴧𐴟 𐴀𐴝𐴌𐴞𐴏𐴃𐴝𐴌𐴑𐴟𐴏𐴢 𐴀𐴠𐴊𐴧𐴠 𐴏𐴠𐴥𐴑𐴟𐴕𐴊𐴟𐴏𐴢, 𐴊𐴝𐴌𐴁𐴞𐴘𐴝𐴃𐴧𐴟 𐴒𐴝𐴘𐴟𐴏𐴢, 𐴃𐴞𐴔𐴡𐴥𐴃𐴞, 𐴀𐴠𐴐𐴞𐴥𐴘𐴝𐴃𐴧𐴟 𐴃𐴟𐴑𐴞𐴑𐴟𐴏𐴢 𐴀𐴠𐴊𐴧𐴠 𐴃𐴡𐴌𐴡𐴉𐴞𐴥𐴔𐴡𐴏𐴢.⁵𐴀𐴞𐴥𐴃𐴝𐴌𐴝 𐴀𐴝𐴒𐴠 𐴕𐴠𐴦𐴓𐴞 𐴎𐴝𐴘 𐴃𐴡𐴌𐴝𐴏𐴡𐴃𐴢 𐴀𐴝𐴣𐴀𐴌𐴝𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴃𐴝𐴥𐴙𐴑𐴧𐴞𐴓𐴢.⁶𐴐𐴟𐴥𐴄𐴝𐴌-𐴏𐴝𐴥𐴌𐴝 𐴌𐴟𐴄𐴞𐴌-𐴀𐴞𐴊𐴢 𐴁𐴝𐴦𐴊𐴠 𐴀𐴝𐴣𐴀𐴌𐴝 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴉𐴞𐴓𐴞𐴤𐴂𐴧𐴞𐴃𐴧𐴟 𐴁𐴝𐴐𐴝𐴥 𐴓𐴡𐴥𐴘𐴧𐴞, 𐴀𐴝𐴦𐴌 𐴉𐴝𐴣𐴏𐴢 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴃𐴡𐴌𐴝𐴏𐴡𐴃𐴢 𐴉𐴡𐴀𐴣𐴙𐴐𐴧𐴞; 𐴇𐴠𐴥𐴍𐴠 𐴀𐴝𐴣𐴀𐴌𐴝 𐴇𐴝𐴥𐴣𐴃𐴢 𐴊𐴞𐴕 𐴃𐴝𐴥𐴙𐴑𐴧𐴞𐴓𐴝𐴔.

𐴃𐴡𐴌𐴝𐴏𐴡𐴃𐴢 𐴂𐴝𐴥𐴀𐴟𐴓𐴡𐴌 𐴀𐴝𐴇𐴠𐴥𐴌𐴞𐴁𐴝𐴌 𐴎𐴝𐴦

⁷𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕، 𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴇𐴝𐴥𐴘 𐴁𐴡𐴓𐴧𐴝 𐴎𐴡𐴔𐴝 𐴀𐴡𐴥𐴘𐴧𐴞, 𐴂𐴝𐴥𐴀𐴟𐴓𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴖𐴝𐴀𐴎𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴃𐴝𐴌𐴉𐴡𐴌 𐴊𐴞𐴕 𐴌𐴡𐴖𐴝𐴕𐴝 𐴀𐴡𐴥𐴘𐴁𐴝𐴌 𐴕𐴞𐴘𐴡𐴃𐴠 𐴀𐴝𐴊𐴝𐴤 𐴌𐴝𐴙𐴃𐴢 𐴉𐴡𐴙𐴅𐴧𐴡𐴕𐴃𐴡 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.⁸𐴀𐴝𐴣𐴀𐴌𐴝 𐴖𐴡𐴌𐴡𐴌 𐴄𐴝𐴓𐴝𐴌 𐴎𐴠 𐴑𐴝𐴔𐴝𐴥𐴌𐴝𐴃𐴢 𐴉𐴟𐴥𐴖𐴝𐴣𐴃𐴞 𐴎𐴡𐴔𐴝 𐴀𐴡𐴥𐴘𐴧𐴞, 𐴇𐴠𐴥𐴍𐴠 𐴁𐴞𐴐𐴞𐴤 𐴏𐴠𐴌𐴝𐴑 𐴀𐴡𐴥𐴑𐴧𐴡𐴓𐴢 𐴎𐴡𐴓𐴝𐴃𐴢 𐴀𐴝𐴐𐴧𐴞𐴥𐴓𐴢.⁹𐴀𐴠𐴎𐴧𐴡𐴕 𐴅𐴟𐴖𐴝𐴕 𐴔𐴝𐴕𐴟𐴥𐴙𐴐𐴢 𐴎𐴝𐴕𐴝𐴥𐴓𐴝𐴌 𐴋𐴝𐴥𐴑𐴠 𐴒𐴡𐴥𐴌𐴞 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴌 𐴕𐴝𐴔 𐴀𐴡𐴥𐴙𐴓𐴊𐴠 𐴀𐴠𐴃𐴟𐴑𐴟𐴏𐴢. 𐴂𐴝𐴥𐴀𐴟𐴓𐴡𐴌 𐴖𐴝𐴀𐴎𐴢 𐴎𐴠𐴃𐴡𐴥 𐴓𐴝𐴔𐴁𐴝 𐴀𐴡𐴥𐴌, 𐴔𐴝𐴕𐴟𐴥𐴙𐴐𐴧𐴗𐴝 𐴇𐴠𐴥𐴃𐴡 𐴒𐴟𐴥𐴔𐴡𐴃𐴢 𐴉𐴡𐴌𐴝𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴝𐴇𐴠𐴥𐴌𐴞𐴃𐴢 𐴔𐴟𐴌 𐴒𐴟𐴥𐴔𐴡𐴃𐴢 𐴉𐴡𐴌𐴞 𐴘𐴡𐴥𐴒𐴧𐴗𐴝 𐴃𐴞𐴕 𐴄𐴝𐴓𐴝𐴌 𐴖𐴡𐴃𐴧𐴟𐴥 𐴔𐴠𐴍𐴞𐴃𐴢 𐴉𐴡𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌𐴠 𐴃𐴟𐴙𐴓𐴧𐴠𐴥 𐴌𐴝𐴥𐴌 𐴔𐴡𐴌𐴝 𐴓𐴡𐴦𐴃𐴢 𐴉𐴝𐴘𐴧𐴠𐴥.¹⁰𐴂𐴝𐴥𐴀𐴟𐴓𐴢 𐴕𐴞𐴏𐴠 𐴎𐴝𐴘 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴉𐴡𐴌𐴞 𐴀𐴝𐴣𐴎𐴝 𐴔𐴝𐴌𐴞 𐴊𐴡𐴥𐴌𐴞 𐴈𐴡𐴀𐴌 𐴊𐴠, ”𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴘𐴡𐴒𐴧𐴗𐴝𐴥𐴃𐴧𐴟 𐴀𐴝𐴙𐴅𐴧𐴡𐴤 𐴉𐴡𐴌𐴝𐴕 𐴀𐴝𐴏𐴠𐴤.“¹¹𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴀𐴝𐴁𐴝𐴌 𐴖𐴡𐴌𐴡𐴌 𐴄𐴝𐴓𐴝𐴃𐴢 𐴎𐴝𐴘 𐴌𐴟𐴄𐴞 𐴁𐴝𐴥𐴚𐴒𐴞 𐴈𐴝𐴥𐴘𐴧𐴠, 𐴀𐴝𐴦𐴌 𐴉𐴡𐴥𐴎𐴡𐴌 𐴉𐴝𐴥𐴍𐴠 𐴉𐴡𐴙𐴅𐴧𐴡𐴕𐴃𐴡 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴈𐴡𐴀𐴘𐴢 𐴁𐴝𐴦𐴊𐴠 𐴈𐴠𐴥𐴕𐴃𐴟 𐴒𐴞𐴦𐴘𐴠𐴥𐴒𐴡𐴘.¹²𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴅𐴟𐴖𐴝𐴕 𐴉𐴟𐴖𐴝 𐴖𐴝𐴌𐴠 𐴒𐴡𐴥𐴌𐴡𐴃𐴢 𐴎𐴞𐴕𐴊𐴝 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴣𐴙𐴄𐴧𐴝 𐴕𐴡𐴥 𐴑𐴟𐴥𐴐𐴞 𐴀𐴡𐴥𐴘𐴧𐴠 𐴊𐴠.

𐴃𐴡𐴌𐴝𐴏𐴡𐴃𐴧𐴟 𐴔𐴞𐴓𐴠𐴃𐴡𐴏𐴡𐴃𐴢 𐴏𐴡𐴉𐴡𐴥𐴌

¹³𐴀𐴝𐴣𐴀𐴌𐴝 𐴀𐴝𐴒𐴠 𐴕𐴠𐴦𐴓𐴞 𐴎𐴝𐴘 𐴎𐴝𐴀𐴣𐴏𐴡𐴃𐴢 𐴀𐴟𐴍𐴞𐴤 𐴀𐴝𐴏𐴡𐴏𐴢 𐴐𐴡𐴥𐴀𐴌𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴌𐴡𐴖𐴝𐴕𐴝 𐴀𐴡𐴥𐴘𐴧𐴞, 𐴎𐴠𐴕𐴃𐴟𐴥 𐴂𐴝𐴥𐴀𐴟𐴓𐴡𐴌𐴠 𐴃𐴟𐴓𐴞𐴤 𐴓𐴡𐴘𐴧𐴟𐴔 𐴈𐴡𐴀𐴘𐴢 𐴕𐴞𐴘𐴡𐴃𐴢 𐴒𐴡𐴙𐴅𐴧𐴞𐴥. 𐴀𐴞𐴥𐴁𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴀𐴠𐴕𐴃𐴠𐴎𐴝𐴔 𐴀𐴠𐴃𐴡𐴓𐴧𐴝𐴤 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴇𐴠𐴥𐴍𐴠 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴎𐴝𐴘𐴁𐴝𐴌 𐴕𐴞𐴘𐴡𐴃𐴢 𐴒𐴡𐴙𐴅𐴧𐴞𐴥𐴓𐴢.¹⁴𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴝𐴏𐴡𐴏𐴡𐴃𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌𐴠 𐴎𐴝𐴀𐴣𐴏𐴡𐴃𐴢 𐴃𐴟𐴓𐴞𐴤 𐴓𐴡𐴦𐴘𐴢 𐴔𐴞𐴃𐴟𐴓𐴠𐴕 𐴐𐴡𐴥𐴀𐴌𐴡𐴃𐴢 𐴀𐴝𐴙𐴐𐴧𐴞𐴤.¹⁵𐴀𐴝𐴦𐴌 𐴈𐴠𐴥𐴕𐴃𐴟 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴎𐴝𐴘 𐴃𐴝𐴌𐴉𐴡𐴌 𐴊𐴞𐴕 𐴑𐴞𐴘𐴡𐴏𐴢 𐴋𐴞𐴘𐴝𐴌 𐴔𐴟𐴀𐴕𐴃𐴟 𐴉𐴡𐴀𐴣𐴙𐴐𐴧𐴞, 𐴘𐴝𐴥𐴌 𐴃𐴝𐴌𐴉𐴡𐴌 𐴊𐴞𐴕 𐴏𐴝𐴥𐴔𐴡𐴏𐴢 𐴋𐴞𐴘𐴝𐴃𐴢 𐴀𐴝𐴙𐴐𐴧𐴞𐴤, 𐴁𐴝𐴦𐴊𐴠 𐴘𐴝𐴥𐴌 𐴃𐴝𐴌𐴉𐴡𐴌 𐴊𐴞𐴕 𐴔𐴞𐴓𐴠𐴃𐴟𐴏𐴢 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴙𐴐𐴧𐴞.¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴥𐴀𐴟𐴓𐴠 𐴀𐴝𐴒𐴠 𐴓𐴡𐴥𐴃𐴞 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠, 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴎𐴝𐴘𐴁𐴝𐴐𐴧𐴡𐴥𐴃𐴢 𐴀𐴞𐴥𐴉𐴞𐴏𐴝𐴏𐴡𐴃𐴢 𐴕𐴡 𐴒𐴡𐴥𐴓𐴞𐴁𐴡, 𐴎𐴠𐴀𐴕𐴠 𐴀𐴞𐴥𐴁𐴝𐴃𐴧𐴟 𐴀𐴠𐴐𐴞𐴥𐴘𐴝𐴃𐴢 𐴄𐴝𐴙𐴔 𐴈𐴝𐴍𐴝 𐴕𐴡 𐴉𐴡𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴉𐴡𐴀𐴣𐴏𐴞 𐴁𐴡𐴓𐴧𐴝 𐴊𐴟𐴖𐴝𐴊𐴞 𐴒𐴡𐴙𐴅𐴧𐴞𐴥𐴓𐴢, 𐴉𐴝𐴌𐴞𐴓𐴠𐴥, 𐴂𐴠𐴕𐴄𐴞𐴑𐴡𐴏𐴡𐴌 𐴊𐴞𐴕.

𐴀𐴞𐴥𐴉𐴞𐴏𐴝𐴏𐴡𐴌 𐴔𐴟𐴌𐴟𐴁𐴧𐴞-𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴂𐴝𐴥𐴀𐴟𐴓𐴡𐴌 𐴑𐴟𐴥𐴊𐴝 𐴇𐴝𐴥𐴉𐴞𐴎𐴢

¹⁷𐴔𐴞𐴓𐴠𐴃𐴟𐴏𐴡𐴃𐴧𐴟 𐴂𐴝𐴥𐴀𐴟𐴓𐴠 𐴀𐴞𐴥𐴉𐴞𐴏𐴝𐴏𐴡𐴃𐴢 𐴈𐴡𐴥𐴁𐴡𐴌 𐴊𐴞𐴉𐴠𐴍𐴝𐴥𐴘 𐴎𐴡𐴔𐴝𐴥𐴃𐴡𐴌 𐴔𐴟𐴌𐴟𐴁𐴧𐴞-𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘𐴧𐴠𐴥.¹⁸𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴃𐴡 𐴎𐴝𐴕𐴡, 𐴀𐴝𐴀𐴛 𐴀𐴠𐴐𐴞𐴥𐴘𐴝𐴃𐴢 𐴀𐴝𐴙𐴐𐴧𐴞𐴤 𐴊𐴠 𐴉𐴡𐴀𐴘𐴓𐴝 𐴊𐴞𐴕 𐴓𐴡𐴥𐴃𐴞 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴇𐴝𐴥𐴀𐴌 𐴀𐴡𐴑𐴃𐴡𐴥 𐴑𐴠𐴀𐴕𐴒𐴡𐴌𐴞 𐴈𐴝𐴍𐴝𐴀𐴘𐴓𐴝𐴔.¹⁹𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴏𐴝𐴙𐴓𐴡𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌 𐴖𐴡𐴌𐴠 𐴎𐴠 𐴔𐴡𐴏𐴞𐴁𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴝𐴙𐴐𐴧𐴞𐴤𐴓𐴢, 𐴇𐴞𐴥𐴀𐴕 𐴀𐴝𐴀𐴛 𐴉𐴟𐴌𐴝𐴉𐴟𐴌𐴞 𐴕𐴡𐴌𐴡𐴔𐴡𐴌 𐴏𐴝𐴥𐴀𐴣𐴃𐴠 𐴀𐴠𐴊𐴧𐴠 𐴏𐴟𐴑𐴡𐴌 𐴉𐴝𐴕𐴞𐴥 𐴁𐴝𐴥𐴐𐴝𐴘-𐴁𐴝𐴥𐴐𐴝𐴘 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥 𐴔𐴝𐴓𐴞𐴑𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴅𐴧𐴞𐴥.²⁰𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴓𐴧𐴝 𐴉𐴝𐴥𐴘𐴊𐴝 𐴀𐴡𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴈𐴡𐴃𐴝𐴤 𐴃𐴟𐴣𐴀𐴝𐴥𐴌𐴝𐴃𐴧𐴟 𐴓𐴟𐴑𐴝𐴘 𐴕𐴡𐴥 𐴌𐴝𐴑𐴞𐴥, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌𐴠 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴀𐴠𐴊𐴧𐴠 𐴒𐴡𐴥𐴌𐴠-𐴒𐴡𐴥𐴌𐴠 𐴃𐴝𐴦𐴓𐴞𐴔 𐴊𐴞𐴘𐴞𐴥.²¹𐴀𐴝𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴒𐴞𐴌𐴞𐴥𐴑 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴌𐴝𐴒𐴡𐴌𐴞 𐴎𐴝𐴕𐴝𐴘𐴊𐴞𐴘𐴞𐴥 𐴊𐴠, 𐴀𐴞𐴥𐴃𐴝𐴌𐴝𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥 𐴀𐴝𐴓𐴧𐴝𐴌 𐴀𐴟𐴎𐴟 𐴉𐴞𐴥𐴌𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴝𐴤 𐴉𐴡𐴌𐴞𐴁𐴡𐴥.

²²”𐴀𐴝𐴦𐴌 𐴀𐴠𐴇𐴡𐴥𐴕, 𐴂𐴝𐴑-𐴌𐴟𐴀𐴌 𐴈𐴡𐴃𐴝𐴤 𐴔𐴡𐴎𐴞𐴕 𐴀𐴝𐴀𐴛 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴝𐴙𐴌, 𐴇𐴠𐴥𐴍𐴠 𐴀𐴝𐴣𐴀𐴌 𐴖𐴡𐴌𐴠 𐴑𐴞𐴦 𐴒𐴟𐴎𐴡𐴌𐴞𐴁𐴡𐴥 𐴀𐴝𐴀𐴛 𐴇𐴡𐴘 𐴕𐴡 𐴉𐴝𐴌𐴞.²³𐴀𐴝𐴀𐴛 𐴏𐴞𐴌𐴞𐴥𐴉𐴢 𐴘𐴝𐴀𐴕 𐴎𐴝𐴕𐴞, 𐴂𐴝𐴑-𐴌𐴟𐴀𐴘𐴠 𐴀𐴝𐴣𐴀𐴌𐴠𐴥 𐴉𐴡𐴃𐴧𐴞𐴥 𐴐𐴡𐴥𐴀𐴌𐴡𐴃𐴢 𐴎𐴝𐴕𐴝𐴘𐴊𐴠𐴌 𐴊𐴠 𐴑𐴞, 𐴎𐴞𐴘𐴡𐴥𐴓𐴢 𐴀𐴠𐴊𐴧𐴠 𐴔𐴡𐴏𐴞𐴁𐴡𐴃𐴢 𐴀𐴝𐴣𐴀𐴌 𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴀𐴝𐴏𐴠𐴤.²⁴𐴇𐴝𐴥𐴙𐴌! 𐴀𐴝𐴀𐴛 𐴀𐴝𐴣𐴀𐴌 𐴎𐴝𐴕𐴡𐴌𐴠 𐴕𐴞𐴎𐴡𐴌 𐴓𐴧𐴝 𐴇𐴡𐴕𐴡𐴤 𐴔𐴟𐴙𐴓𐴧𐴡 𐴁𐴡𐴓𐴞 𐴕𐴡 𐴄𐴝𐴥𐴀𐴌𐴞; 𐴀𐴝𐴣𐴀𐴌 𐴏𐴞𐴌𐴞𐴥𐴉𐴢 𐴕𐴞𐴘𐴡𐴃𐴢 𐴀𐴡𐴥𐴙𐴓𐴊𐴠, 𐴃𐴡𐴁𐴡𐴓𐴞𐴑𐴡𐴌 𐴈𐴝𐴔 𐴀𐴠𐴊𐴧𐴠 𐴎𐴠 𐴎𐴞𐴔𐴧𐴝𐴊𐴝𐴌𐴞 𐴔𐴝𐴓𐴞𐴑 𐴀𐴞𐴏𐴝𐴤𐴃𐴧𐴟 𐴀𐴝𐴀𐴛 𐴉𐴝𐴘𐴧𐴞𐴥 𐴇𐴞𐴥𐴘𐴝𐴕 𐴀𐴝𐴊𐴝𐴘 𐴒𐴡𐴌𐴡𐴤𐴕, 𐴘𐴝𐴥𐴕𐴞 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴌 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴒𐴡𐴁𐴝𐴤 𐴊𐴡𐴥𐴕.

²⁵”𐴘𐴝𐴓𐴝 𐴀𐴝𐴀𐴛 𐴎𐴝𐴕𐴞, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤𐴌 𐴇𐴝𐴣𐴏𐴠 𐴀𐴝𐴀𐴛 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴔𐴟𐴑 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝.²⁶𐴇𐴠𐴥𐴃𐴡𐴓𐴧𐴝 𐴀𐴝𐴙𐴅𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴌 𐴓𐴡𐴖𐴢 𐴖𐴡𐴥𐴌 𐴎𐴞𐴔𐴧𐴝 𐴀𐴝𐴀𐴛 𐴕𐴡.²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴝𐴓𐴧𐴝𐴌 𐴉𐴟𐴌𐴝𐴉𐴟𐴌𐴞 𐴔𐴡𐴕𐴐𐴝𐴥𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴁𐴡𐴘𐴧𐴝𐴕 𐴒𐴡𐴙𐴃𐴧𐴠𐴤 𐴉𐴞𐴏𐴧𐴝𐴥 𐴕𐴡𐴥 𐴔𐴝𐴌𐴞.²⁸𐴇𐴠𐴥𐴃𐴡𐴓𐴧𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴀𐴟𐴥𐴣𐴐𐴞𐴘𐴝𐴌 𐴀𐴝𐴦𐴌 𐴂𐴝𐴑-𐴌𐴟𐴀𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴎𐴝𐴥𐴑 𐴎𐴞𐴁𐴝𐴤𐴌 𐴏𐴝𐴀𐴏𐴞𐴃𐴝-𐴒𐴡𐴌𐴡𐴤𐴘𐴝 𐴁𐴝𐴕𐴝𐴘𐴧𐴠𐴥 𐴘𐴞𐴥𐴁𐴝 𐴒𐴟𐴣𐴍𐴝𐴌𐴠 𐴓𐴡𐴥𐴘 𐴘𐴡𐴥 𐴀𐴟𐴥𐴣𐴐𐴞𐴘𐴝𐴌. 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴡𐴌 𐴏𐴡𐴌𐴡𐴘𐴝 𐴁𐴡𐴕𐴡, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴉𐴟𐴖𐴝𐴌 𐴓𐴡𐴖𐴢 𐴓𐴡𐴘 𐴑𐴞𐴕𐴧𐴠𐴥.²⁹𐴀𐴝𐴀𐴛 𐴎𐴝𐴕𐴞, 𐴀𐴝𐴀𐴛 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴇𐴡𐴥𐴃𐴝𐴌𐴕𐴝𐴑 𐴌𐴝𐴚𐴑𐴟𐴣𐴙𐴌 𐴀𐴡𐴥𐴑𐴧𐴡𐴓𐴢 𐴀𐴝𐴘𐴁𐴡𐴤, 𐴀𐴝𐴦𐴌 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴎𐴝𐴥𐴑𐴡𐴌𐴠 𐴇𐴡𐴥𐴃𐴞 𐴒𐴡𐴌𐴞𐴥𐴁𐴡.³⁰𐴀𐴠𐴁𐴧𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴀𐴟𐴥𐴊𐴧𐴗𐴝 𐴑𐴠𐴏𐴧𐴟𐴥 𐴔𐴝𐴕𐴟𐴥𐴙𐴐𐴢 𐴀𐴟𐴍𐴞𐴤 𐴁𐴝𐴥𐴀𐴣𐴌𐴝-𐴁𐴝𐴥𐴀𐴣𐴌𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴘𐴁𐴡𐴤, 𐴎𐴠𐴀𐴕𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴇𐴞𐴥𐴑𐴧𐴝 𐴒𐴡𐴌𐴞𐴥𐴉𐴠𐴓𐴝𐴘 𐴉𐴝𐴌𐴠.³¹𐴇𐴠𐴥𐴃𐴡𐴓𐴧𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡! 𐴔𐴡𐴕𐴡𐴃𐴢 𐴌𐴝𐴑𐴞𐴥𐴘𐴡 𐴊𐴠, 𐴃𐴞𐴕 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴌𐴝𐴘𐴃𐴠 𐴊𐴞𐴕𐴠 𐴏𐴟𐴑𐴡𐴌 𐴉𐴝𐴕𐴞𐴥 𐴁𐴝𐴥𐴐𐴝𐴘-𐴁𐴝𐴥𐴐𐴝𐴘 𐴃𐴟𐴣𐴀𐴝𐴥𐴌𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴌𐴝𐴥 𐴁𐴡𐴕 𐴕𐴡𐴥 𐴒𐴡𐴌𐴞𐴥.

³²”𐴘𐴝𐴓𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴓𐴧𐴝𐴌 𐴀𐴝𐴥𐴃𐴡𐴃𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴌𐴝𐴇𐴝𐴥𐴔𐴡𐴃𐴞 𐴑𐴝𐴓𐴝𐴔𐴡𐴃𐴢 𐴒𐴡𐴏𐴝𐴥𐴘𐴊𐴞𐴌. 𐴇𐴠𐴥 𐴑𐴝𐴓𐴝𐴔𐴠 𐴃𐴟𐴣𐴀𐴝𐴥𐴌𐴝𐴌 𐴌𐴟𐴀𐴈𐴝𐴥𐴕𐴞 𐴃𐴡𐴌𐴑𐴞 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥, 𐴀𐴝𐴦𐴌 𐴂𐴝𐴑 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴐𐴝𐴥𐴔𐴞𐴓𐴢 𐴒𐴡𐴌𐴞𐴥 𐴔𐴞𐴌𐴝𐴏𐴢 𐴊𐴞𐴦 𐴉𐴝𐴌𐴞𐴁𐴡𐴥.³³𐴀𐴝𐴀𐴛 𐴃𐴡 𐴇𐴡𐴕𐴡𐴤𐴑𐴞𐴘𐴡𐴌 𐴐𐴟𐴥𐴕𐴝-𐴐𐴝𐴣𐴊𐴞𐴌, 𐴘𐴝𐴥 𐴇𐴡𐴦𐴌𐴏𐴟𐴖𐴡𐴌𐴡𐴌 𐴓𐴝𐴓𐴡𐴥𐴏𐴢 𐴕𐴡𐴥 𐴒𐴡𐴌𐴞𐴥.³⁴𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴊𐴠 𐴎𐴝𐴕𐴡, 𐴀𐴝𐴣𐴀𐴌 𐴀𐴠 𐴀𐴝𐴥𐴃𐴢 𐴀𐴞𐴀𐴕𐴠 𐴈𐴝𐴔 𐴒𐴡𐴌𐴞𐴥 𐴀𐴝𐴣𐴀𐴌 𐴀𐴠𐴊𐴧𐴠 𐴀𐴝𐴣𐴀𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴙𐴅𐴧𐴞𐴥.³⁵𐴀𐴝𐴀𐴛 𐴒𐴡𐴙𐴅𐴧𐴞𐴥 𐴊𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴓𐴡𐴘 𐴃𐴟𐴣𐴀𐴝𐴥𐴌𐴝𐴌𐴠 𐴊𐴝𐴈𐴝𐴤𐴘𐴧𐴞 𐴊𐴠 𐴑𐴞, 𐴇𐴠𐴥𐴕𐴊𐴞𐴓𐴧𐴝 𐴊𐴡𐴌𐴡𐴤𐴔𐴡𐴌𐴡 𐴔𐴠𐴀𐴕𐴧𐴡𐴃𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴝𐴣𐴀𐴌𐴝𐴃𐴧𐴟 𐴑𐴡𐴔𐴎𐴟𐴌 𐴀𐴡𐴥𐴑𐴧𐴡𐴓𐴡𐴌𐴠 𐴔𐴡𐴊𐴡𐴃𐴢 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴀𐴝𐴦𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴀𐴠 𐴈𐴡𐴃𐴝𐴤 𐴔𐴡𐴕𐴡𐴃𐴢 𐴌𐴝𐴑𐴝𐴤 𐴉𐴡𐴌𐴞𐴁𐴡𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝 𐴕𐴞𐴎𐴠 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥, ’𐴓𐴡𐴖𐴝𐴌 𐴃𐴟𐴥𐴖𐴝𐴌𐴡 𐴊𐴞𐴦𐴘𐴝 𐴁𐴞𐴐𐴞𐴤 𐴔𐴟𐴁𐴝𐴌𐴠𐴑.‘ “

³⁶𐴇𐴞𐴥𐴀𐴕 𐴈𐴡𐴘𐴧𐴝𐴤 𐴀𐴡𐴥𐴘 𐴁𐴝𐴦𐴊𐴠, 𐴂𐴝𐴥𐴀𐴟𐴓𐴠 𐴀𐴝𐴣𐴍𐴟𐴥 𐴉𐴠𐴥𐴓𐴝𐴘 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞 𐴊𐴟𐴖𐴝 𐴒𐴡𐴙𐴅𐴧𐴠𐴥.³⁷𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴂𐴝𐴥𐴀𐴟𐴓𐴡𐴌𐴠 𐴏𐴞𐴁𐴞 𐴊𐴡𐴥𐴌𐴞 𐴁𐴞𐴐𐴞𐴤 𐴇𐴝𐴙𐴕𐴊𐴠𐴤, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴀𐴝𐴂𐴧𐴝𐴤 𐴊𐴞𐴥𐴘𐴠.³⁸𐴈𐴝𐴥𐴀𐴏𐴒𐴡𐴌𐴞 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴌 𐴔𐴟𐴑 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴡 𐴈𐴡𐴘𐴧𐴠𐴥 𐴊𐴠 𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕 𐴀𐴡𐴥𐴘𐴧𐴠. 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴎𐴝𐴀𐴣𐴏𐴡𐴌 𐴇𐴠𐴥𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴁𐴝𐴌𐴝𐴤𐴘𐴊𐴞𐴘𐴠.

The Word for the World International

https://app.library.bible/content/87faca8b51c22590