Read 𐴈𐴝𐴔𐴡𐴥𐴓𐴢 19

𐴈𐴝𐴔𐴡𐴥𐴓𐴢19

𐴀𐴞𐴥𐴉𐴞𐴏𐴝𐴏𐴡𐴃𐴢 𐴂𐴝𐴥𐴀𐴟𐴓𐴢

¹𐴀𐴝𐴂𐴡𐴥𐴓𐴡𐴏𐴢 𐴑𐴡𐴥𐴌𐴞𐴕𐴡𐴃𐴢 𐴃𐴝𐴥𐴑𐴞𐴃𐴠, 𐴂𐴝𐴥𐴀𐴟𐴓𐴢 𐴀𐴠𐴐𐴞𐴥𐴘𐴝 𐴀𐴠𐴓𐴝𐴑𐴝 𐴁𐴝𐴥𐴘 𐴏𐴡𐴉𐴡𐴥𐴌 𐴒𐴡𐴌𐴞𐴥 𐴀𐴞𐴥𐴉𐴞𐴏𐴝𐴏𐴡𐴃𐴢 𐴀𐴝𐴙𐴐𐴧𐴠𐴥. 𐴇𐴠𐴥𐴍𐴠 𐴀𐴞𐴥𐴁𐴝𐴘𐴠 𐴇𐴡𐴦𐴎𐴧𐴡𐴕 𐴀𐴟𐴔𐴧𐴡𐴃𐴢 𐴓𐴡𐴦𐴃𐴢 𐴉𐴝𐴀𐴙𐴓𐴢.²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤 𐴊𐴠 𐴀𐴡𐴑𐴃𐴡𐴥𐴃𐴢 𐴂𐴝𐴑-𐴌𐴟𐴀 𐴉𐴝𐴀𐴘𐴓𐴝 𐴕𐴠𐴥؟“
𐴀𐴞𐴥𐴃𐴝𐴌𐴝 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴕𐴡𐴥 𐴉𐴝𐴘, 𐴀𐴝𐴣𐴀𐴌𐴝 𐴃𐴡 𐴂𐴝𐴑-𐴌𐴟𐴀 𐴀𐴝𐴏𐴠𐴤 𐴁𐴡𐴥𐴓𐴞 𐴀𐴟𐴥𐴊𐴧𐴗𐴝 𐴕𐴡𐴥 𐴉𐴟𐴥𐴕𐴞.“

³𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴠 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴇𐴝𐴌 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴡𐴥 𐴊𐴠𐴥؟“
𐴀𐴞𐴥𐴃𐴝𐴌𐴝 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴘𐴝𐴇𐴝𐴥𐴘𐴝𐴌 𐴁𐴝𐴥𐴂𐴄𐴞𐴏𐴔𐴝.“

⁴𐴂𐴝𐴥𐴀𐴟𐴓𐴠 𐴈𐴡𐴀𐴌 𐴊𐴠, ”𐴁𐴠𐴐𐴡𐴥𐴑 𐴘𐴝𐴇𐴝𐴥𐴘𐴝𐴘𐴠 𐴃𐴡𐴖𐴝𐴥𐴌 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴠. 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴃𐴡 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴙𐴓𐴢, ’𐴀𐴝𐴀𐴛 𐴁𐴝𐴦𐴊𐴠 𐴀𐴝𐴘𐴁𐴡𐴤 𐴊𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴘𐴡, 𐴘𐴝𐴥𐴕𐴞 𐴀𐴞𐴏𐴝𐴤𐴌 𐴖𐴡𐴌𐴠.‘“⁵𐴈𐴡𐴃𐴝𐴤 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥.⁶𐴀𐴝𐴦𐴌 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥𐴘𐴠 𐴌𐴝𐴥𐴌, 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴂𐴝𐴑-𐴌𐴟𐴀 𐴀𐴝𐴙𐴐𐴧𐴠𐴥, 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.⁷𐴀𐴞𐴥𐴃𐴝𐴌𐴝 𐴃𐴡𐴑𐴡𐴌𐴞𐴁𐴝𐴕 𐴁𐴝𐴌𐴡𐴥 𐴎𐴡𐴕 𐴁𐴠𐴍𐴝𐴀𐴙𐴕 𐴀𐴝𐴐𐴧𐴞𐴥𐴓𐴢.

⁸𐴘𐴝𐴥𐴌𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴎𐴝𐴘 𐴃𐴞𐴕 𐴔𐴝𐴐𐴢 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴃𐴡𐴏𐴑𐴝𐴌𐴝 𐴀𐴡𐴥𐴑𐴧𐴡𐴓𐴢 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌𐴠 𐴁𐴡𐴍𐴝𐴘𐴁𐴝𐴥𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢.⁹𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴇𐴡𐴦𐴎𐴧𐴡𐴕𐴡𐴌 𐴊𐴞𐴓𐴢 𐴊𐴡𐴌𐴡𐴤 𐴀𐴡𐴥𐴘𐴒𐴞𐴓𐴒𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴔𐴝𐴕 𐴕𐴟 𐴀𐴝𐴕𐴞𐴤 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴔𐴝𐴓𐴞𐴑𐴡𐴌 𐴃𐴡𐴌𐴞𐴑𐴝𐴌 𐴁𐴝𐴦𐴁𐴟𐴃𐴠 𐴒𐴞𐴉𐴡𐴃𐴢 𐴀𐴡𐴥𐴑𐴧𐴡𐴓𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠. 𐴇𐴠𐴥𐴃𐴡𐴓𐴧𐴝 𐴂𐴝𐴥𐴀𐴟𐴓𐴢 𐴀𐴞𐴥𐴃𐴝𐴌𐴝𐴃𐴧𐴟 𐴏𐴞𐴥𐴌𐴝 𐴀𐴡𐴥𐴘𐴒𐴞𐴓𐴒𐴡𐴘 𐴀𐴝𐴦𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴘𐴎𐴝𐴘 𐴃𐴟𐴌𐴝𐴕𐴟𐴏𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌 𐴔𐴡𐴌𐴑𐴡𐴏𐴡𐴃𐴢 𐴉𐴡𐴃𐴧𐴞𐴥 𐴊𐴞𐴕 𐴃𐴡𐴏𐴑𐴝𐴌𐴝 𐴒𐴡𐴙𐴃𐴧𐴡𐴥.¹⁰𐴇𐴠𐴥𐴕𐴊𐴞𐴓𐴧𐴝 𐴊𐴟𐴘 𐴁𐴡𐴏𐴡𐴥𐴌 𐴉𐴝𐴥𐴕 𐴀𐴡𐴥𐴖𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴀𐴠𐴐𐴞𐴥𐴘𐴝𐴃𐴢 𐴃𐴝𐴥𐴑𐴞𐴃𐴡 𐴊𐴠 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴒𐴞𐴌𐴞𐴥𐴑 𐴁𐴠𐴒𐴧𐴟𐴥𐴕𐴠 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴉𐴟𐴥𐴕𐴞 𐴉𐴝𐴙𐴅𐴧𐴞𐴥𐴓𐴢.

𐴏𐴠𐴑𐴞𐴜𐴝𐴌 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢

¹¹𐴀𐴝𐴓𐴧𐴝𐴘𐴠 𐴂𐴝𐴥𐴀𐴟𐴓𐴡𐴌 𐴊𐴟𐴖𐴝𐴌𐴝 𐴀𐴠𐴕𐴊𐴞𐴓𐴧𐴝 𐴃𐴝𐴦𐴅𐴟𐴙𐴂𐴧𐴝 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴒𐴡𐴙𐴃𐴧𐴡𐴥,¹²𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴁𐴝𐴌 𐴕𐴟𐴔𐴧𐴝𐴓𐴢 𐴀𐴠𐴊𐴧𐴠 𐴒𐴝𐴦𐴌 𐴖𐴡𐴌𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴒𐴝𐴦𐴃𐴢 𐴁𐴝𐴎𐴝𐴥𐴘 𐴁𐴞𐴘𐴝𐴌𐴝𐴙𐴔𐴧𐴝𐴌 𐴇𐴝𐴣𐴏𐴠 𐴓𐴡𐴘𐴎𐴝𐴘𐴓𐴠𐴥, 𐴀𐴞𐴥𐴃𐴝𐴌𐴝𐴌 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴀𐴡𐴥𐴘𐴎𐴝𐴘𐴃𐴡𐴘 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴞𐴎𐴝𐴘𐴃𐴡𐴥𐴘.

¹³𐴇𐴡𐴦𐴎𐴧𐴡𐴕 𐴘𐴡𐴇𐴟𐴥𐴊𐴞 𐴎𐴠𐴃𐴝𐴌𐴝𐴤 𐴎𐴝𐴒𐴝-𐴎𐴝𐴒𐴝 𐴎𐴝𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴃𐴡, 𐴀𐴞𐴥𐴃𐴝𐴌𐴝 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴈𐴡𐴘𐴧𐴠𐴥 𐴊𐴠, ”𐴀𐴝𐴣𐴀𐴌𐴝 𐴃𐴡𐴌𐴠𐴥 𐴀𐴞𐴏𐴝𐴤𐴌 𐴕𐴝𐴔𐴠 𐴕𐴠𐴦𐴓𐴞𐴀𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴌, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴂𐴝𐴥𐴀𐴟𐴓𐴠 𐴃𐴡𐴁𐴡𐴓𐴞𐴑 𐴒𐴡𐴌𐴠𐴥.“¹⁴𐴏𐴠𐴑𐴞𐴜𐴝 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴘𐴡𐴇𐴟𐴥𐴊𐴞𐴌 𐴋𐴡𐴣𐴀𐴌 𐴀𐴞𐴔𐴝𐴔𐴡𐴌 𐴇𐴝𐴥𐴣𐴃𐴧𐴗𐴝 𐴉𐴟𐴖𐴝𐴘𐴠 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴃𐴧𐴡𐴥.¹⁵𐴀𐴠𐴑𐴁𐴝𐴌 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴏𐴝𐴤𐴌𐴠 𐴃𐴡 𐴀𐴝𐴀𐴛 𐴏𐴞𐴕𐴞𐴥, 𐴀𐴝𐴦𐴌 𐴂𐴝𐴥𐴀𐴟𐴓𐴡𐴌𐴠 𐴘𐴡𐴥 𐴏𐴞𐴕𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴇𐴡𐴕؟“¹⁶𐴇𐴠𐴥𐴃𐴟𐴕𐴡𐴃𐴢 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴉𐴝𐴘𐴧𐴠𐴥 𐴀𐴞𐴥𐴃𐴠 𐴀𐴞𐴥𐴃𐴝𐴌𐴝 𐴇𐴝𐴥𐴣𐴃𐴢 𐴀𐴡𐴥 𐴎𐴡𐴕𐴡𐴌 𐴖𐴡𐴌𐴠 𐴎𐴝𐴥𐴂𐴢 𐴔𐴝𐴙𐴅𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴎𐴞𐴃𐴞 𐴀𐴠𐴀𐴕 𐴇𐴝𐴥𐴔𐴓𐴝 𐴒𐴡𐴙𐴅𐴧𐴠𐴥, 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴎𐴡𐴈𐴡𐴥𐴔 𐴉𐴝𐴘 𐴒𐴡𐴥𐴌 𐴒𐴝𐴥𐴕𐴡𐴃𐴧𐴟 𐴁𐴞𐴘𐴡𐴏𐴧𐴡𐴌 𐴊𐴝𐴥𐴘𐴒𐴞𐴘𐴠𐴒𐴡𐴘.

¹⁷𐴃𐴡𐴥𐴘 𐴀𐴞𐴥𐴉𐴞𐴏𐴝𐴏𐴡𐴃𐴢 𐴃𐴝𐴥𐴑𐴡𐴘𐴝 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴒𐴞𐴌𐴞𐴥𐴑 𐴁𐴠𐴒𐴧𐴟𐴥𐴕𐴠 𐴎𐴠𐴃𐴧𐴡𐴥𐴃𐴢 𐴀𐴠 𐴈𐴡𐴥𐴁𐴡𐴌 𐴘𐴝𐴀𐴕 𐴉𐴝𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴋𐴡𐴦𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔𐴡𐴌 𐴔𐴡𐴈𐴞𐴥𐴔𐴝 𐴀𐴡𐴥𐴘𐴧𐴠.¹⁸𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴊𐴠 𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴝𐴀𐴘𐴢 𐴕𐴞𐴎𐴡𐴌-𐴕𐴞𐴎𐴡𐴌 𐴈𐴡𐴥𐴌𐴝𐴉𐴞 𐴀𐴡𐴥𐴑𐴧𐴡𐴓𐴢 𐴐𐴞𐴥𐴑𐴝𐴌 𐴒𐴡𐴌𐴞𐴥 𐴎𐴝𐴇𐴠𐴥𐴌 𐴒𐴡𐴙𐴅𐴧𐴞𐴥𐴓𐴢.¹⁹𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕 𐴎𐴠𐴃𐴝𐴌𐴝𐴤 𐴀𐴝𐴒𐴠 𐴅𐴝𐴊𐴟𐴒𐴡𐴌 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌-𐴕𐴞𐴎𐴡𐴌 𐴑𐴞𐴃𐴝𐴁𐴢 𐴀𐴡𐴥𐴑𐴧𐴡𐴓𐴢 𐴀𐴝𐴕𐴞𐴤𐴘𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴒𐴡𐴌𐴞𐴥 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴉𐴟𐴌𐴝𐴃𐴢 𐴊𐴞𐴉𐴠𐴥𐴓𐴝𐴘𐴧𐴠. 𐴀𐴞𐴥𐴃𐴝𐴌𐴝 𐴇𐴠𐴥 𐴑𐴞𐴃𐴝𐴁𐴢 𐴂𐴟𐴥𐴕𐴡𐴌 𐴊𐴝𐴔 𐴇𐴞𐴥𐴏𐴝𐴉𐴢 𐴒𐴡𐴙𐴅𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴔𐴟𐴄𐴔𐴝𐴄𐴢 𐴉𐴡𐴕𐴎𐴝𐴙𐴐𐴢 𐴀𐴝𐴥𐴎𐴝𐴌 𐴊𐴞𐴕𐴝𐴥𐴌 𐴀𐴡𐴥𐴘𐴧𐴠.²⁰𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴁𐴞𐴐𐴞𐴤𐴒𐴡𐴌𐴞 𐴉𐴡𐴥𐴓𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴊𐴞𐴓𐴢 𐴎𐴞𐴃𐴝𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴞𐴥𐴉𐴞𐴏𐴝𐴏𐴡𐴃𐴢 𐴇𐴝𐴥𐴚𐴒𐴝𐴔𐴝

²¹𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥𐴘 𐴁𐴝𐴦𐴊𐴠, 𐴂𐴝𐴥𐴀𐴟𐴓𐴠 𐴔𐴝𐴑𐴠𐴊𐴡𐴥𐴕𐴞𐴘𐴝 𐴀𐴠𐴊𐴧𐴠 𐴀𐴝𐴑𐴝𐴘𐴝 𐴀𐴠𐴓𐴝𐴑𐴝 𐴁𐴝𐴥𐴘 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴝𐴘𐴃𐴡 𐴕𐴞𐴘𐴡𐴃𐴢 𐴒𐴡𐴙𐴅𐴧𐴠𐴥. 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴇𐴠𐴥𐴍𐴠 𐴎𐴝𐴘 𐴁𐴝𐴦𐴊𐴠 𐴀𐴝𐴣𐴀𐴃𐴧𐴟 𐴌𐴡𐴔 𐴐𐴡𐴥𐴀𐴌𐴡𐴃𐴢 𐴀𐴡𐴥 𐴎𐴝𐴦 𐴉𐴡𐴌𐴞𐴁𐴡𐴥.“²²𐴃𐴡𐴥𐴘 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴊𐴟𐴘 𐴎𐴡𐴕 𐴔𐴡𐴊𐴡𐴃𐴒𐴝𐴥𐴌 𐴀𐴡𐴌𐴠, 𐴘𐴝𐴥𐴕𐴞 𐴃𐴞𐴔𐴡𐴥𐴃𐴞𐴌𐴠 𐴀𐴠𐴊𐴧𐴠 𐴀𐴠𐴌𐴝𐴏𐴃𐴟𐴏𐴡𐴌𐴠 𐴀𐴞𐴥𐴁𐴝𐴌 𐴀𐴝𐴒𐴠 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴢 𐴊𐴞𐴉𐴠𐴍𐴝𐴥𐴘𐴧𐴠, 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴀𐴠𐴐𐴞𐴥𐴘𐴝 𐴀𐴠𐴓𐴝𐴑𐴝𐴃𐴢 𐴇𐴡𐴦𐴊𐴧𐴞𐴕 𐴃𐴝𐴥𐴘𐴒𐴞𐴓𐴒𐴡𐴘.

²³𐴇𐴠𐴥 𐴀𐴡𐴑𐴃𐴡𐴥𐴃𐴢 𐴔𐴝𐴓𐴞𐴑𐴡𐴌 𐴃𐴡𐴌𐴞𐴑𐴝𐴌 𐴁𐴝𐴦𐴁𐴟𐴃𐴠 𐴋𐴡𐴣𐴀𐴌 𐴇𐴝𐴥𐴚𐴒𐴝𐴔𐴝 𐴀𐴟𐴙𐴄𐴧𐴠𐴥.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴍𐴠 𐴊𐴞𐴔𐴞𐴃𐴠𐴌𐴞𐴘𐴟𐴏𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴌𐴟𐴉𐴝𐴌 𐴁𐴝𐴙𐴕𐴧𐴝 𐴀𐴝𐴐𐴧𐴞𐴥𐴓𐴢, 𐴎𐴠𐴦𐴕𐴞𐴑𐴞 𐴊𐴠𐴜𐴞 𐴀𐴝𐴌𐴃𐴠𐴔𐴞𐴏𐴡𐴌 𐴒𐴟𐴌𐴝-𐴒𐴟𐴌𐴝 𐴔𐴡𐴕𐴊𐴞𐴌 𐴀𐴡𐴥𐴑𐴧𐴡𐴓𐴢 𐴁𐴝𐴕𐴝𐴘𐴃𐴡𐴥, 𐴀𐴝𐴦𐴌 𐴇𐴠𐴥 𐴈𐴝𐴔𐴠 𐴔𐴞𐴏𐴃𐴞𐴥𐴌𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴞𐴐𐴞𐴤 𐴉𐴝𐴥𐴘𐴊𐴝𐴘 𐴀𐴝𐴙𐴕𐴃𐴡𐴤.²⁵𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴊𐴧𐴠 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔𐴡𐴌 𐴀𐴡𐴙𐴕𐴧𐴡 𐴔𐴞𐴏𐴃𐴞𐴥𐴌𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴥𐴖𐴝𐴣𐴃𐴞 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴁𐴝𐴥𐴘𐴧𐴝𐴙𐴕, 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴣𐴀𐴌𐴝 𐴀𐴠 𐴈𐴝𐴔𐴡𐴌 𐴎𐴡𐴌𐴞𐴘𐴝 𐴁𐴝𐴥𐴓𐴝 𐴀𐴝𐴔𐴡𐴊𐴡𐴕𐴞 𐴉𐴝𐴙𐴌.²⁶𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴀𐴡𐴥 𐴊𐴠𐴑𐴡𐴥𐴌 𐴀𐴠𐴊𐴧𐴠 𐴉𐴟𐴥𐴕𐴡𐴌, 𐴂𐴝𐴥𐴀𐴟𐴓𐴠 𐴏𐴞𐴌𐴞𐴥𐴉𐴢 𐴀𐴞𐴥𐴉𐴞𐴏𐴝𐴏𐴡𐴃𐴢 𐴕𐴡 𐴁𐴡𐴥𐴓𐴑𐴠 𐴉𐴟𐴌𐴝 𐴀𐴠𐴐𐴞𐴥𐴘𐴝𐴌 𐴁𐴞𐴐𐴞𐴤 𐴔𐴝𐴙𐴕𐴐𐴡𐴥𐴌𐴠 𐴀𐴟𐴥𐴊𐴧𐴗𐴝 𐴁𐴞𐴥𐴌𐴝𐴘𐴉𐴠𐴓𐴝𐴘𐴧𐴠 𐴊𐴠. 𐴀𐴞𐴥𐴁𐴝𐴘𐴠 𐴈𐴡𐴀 𐴊𐴠, 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴊𐴠𐴁𐴡𐴃𐴝 𐴀𐴡𐴥𐴑𐴧𐴡𐴓𐴢 𐴑𐴠𐴏𐴧𐴟𐴥 𐴕𐴡.²⁷𐴇𐴞𐴥𐴘𐴝𐴕𐴡𐴌 𐴎𐴡𐴌𐴞𐴘𐴝 𐴏𐴞𐴌𐴞𐴥𐴉𐴢 𐴀𐴝𐴣𐴀𐴌𐴝𐴌 𐴈𐴝𐴔𐴡𐴌 𐴖𐴡𐴌𐴠 𐴁𐴡𐴊𐴕𐴝𐴔 𐴀𐴝𐴘𐴁𐴡𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴔𐴟𐴈𐴝𐴥𐴕 𐴊𐴠𐴜𐴞 𐴀𐴝𐴌𐴃𐴠𐴔𐴞𐴏𐴡𐴌 𐴔𐴡𐴕𐴊𐴞𐴌𐴡𐴌 𐴀𐴞𐴎𐴧𐴡𐴃𐴡𐴌 𐴇𐴝𐴥𐴕𐴞 𐴘𐴡𐴥 𐴀𐴡𐴥𐴘𐴁𐴡 𐴀𐴝𐴦𐴌 𐴇𐴞𐴥𐴁𐴝𐴌 𐴔𐴟𐴈𐴝𐴥𐴕𐴒𐴞𐴌𐴞 𐴘𐴡𐴥 𐴕𐴝𐴐𐴢 𐴀𐴡𐴥𐴘𐴎𐴝𐴘𐴁𐴡𐴘, 𐴎𐴞𐴁𐴝𐴤𐴌𐴠 𐴀𐴠𐴐𐴞𐴥𐴘𐴝𐴌 𐴀𐴠𐴊𐴧𐴠 𐴉𐴟𐴌𐴝 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴉𐴟𐴣𐴎𐴝 𐴒𐴡𐴌𐴠𐴥.“

²⁸𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴐𐴞𐴤 𐴒𐴟𐴐𐴧𐴝𐴤 𐴀𐴟𐴙𐴄𐴧𐴠𐴥, 𐴀𐴝𐴦𐴌 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠 ”𐴀𐴞𐴥𐴉𐴞𐴐𐴞𐴀𐴡𐴥𐴓𐴡𐴌 𐴊𐴠𐴜𐴞 𐴀𐴝𐴌𐴃𐴠𐴔𐴞𐴏𐴢 𐴔𐴟𐴈𐴝𐴥𐴕.“²⁹𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴒𐴟𐴣𐴍𐴝 𐴐𐴡𐴥𐴀𐴌 𐴒𐴝𐴥𐴕 𐴀𐴡𐴓𐴎𐴡𐴥𐴓𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘. 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴒𐴝𐴘𐴟𐴏𐴢 𐴀𐴠𐴊𐴧𐴠 𐴀𐴝𐴌𐴞𐴏𐴃𐴝𐴌𐴑𐴟𐴏𐴢 𐴕𐴝𐴔𐴡𐴌 𐴎𐴠 𐴊𐴟𐴘 𐴎𐴡𐴕 𐴔𐴝𐴑𐴠𐴊𐴡𐴥𐴕𐴞𐴀𐴡𐴓𐴢 𐴂𐴝𐴥𐴀𐴟𐴓𐴡𐴌 𐴉𐴟𐴥𐴖𐴝𐴣𐴃𐴞 𐴏𐴡𐴉𐴡𐴥𐴌𐴡𐴃𐴢 𐴎𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘 𐴉𐴟𐴥𐴖𐴝𐴣𐴃𐴞 𐴀𐴠𐴑𐴧𐴟 𐴊𐴟𐴣𐴌𐴠, 𐴔𐴟𐴅𐴞𐴓𐴞𐴥𐴐𐴢 𐴒𐴡𐴌𐴠𐴥 𐴊𐴠 𐴎𐴝𐴒𐴝 𐴒𐴝𐴥𐴕𐴡𐴃𐴢 𐴒𐴞𐴦𐴘𐴠𐴥.³⁰𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴢 𐴔𐴝𐴕𐴟𐴥𐴙𐴐𐴡𐴌 𐴋𐴝𐴀𐴘𐴡𐴌 𐴔𐴟𐴀𐴕𐴃𐴟 𐴎𐴝𐴘𐴃𐴡 𐴏𐴝𐴘𐴧𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴌𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴎𐴝𐴘𐴃𐴡 𐴕𐴡𐴥 𐴊𐴠.³¹𐴀𐴠𐴐𐴞𐴥𐴘𐴝𐴌 𐴇𐴡𐴦𐴎𐴧𐴡𐴕 𐴀𐴠𐴓𐴝𐴑𐴝𐴘𐴞 𐴎𐴞𐴔𐴧𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴂𐴝𐴥𐴀𐴟𐴓𐴡𐴌 𐴊𐴟𐴏𐴃𐴡𐴥, 𐴀𐴞𐴥𐴃𐴝𐴌𐴝 𐴘𐴡𐴥 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴠𐴑𐴧𐴝𐴥𐴕 𐴈𐴡𐴥𐴁𐴡𐴌 𐴉𐴡𐴀𐴣𐴏𐴝𐴘 𐴁𐴞𐴐𐴞𐴤 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴢 𐴊𐴠, 𐴀𐴞𐴥𐴁𐴝 𐴎𐴠𐴕 𐴔𐴟𐴅𐴞𐴓𐴞𐴥𐴐𐴢 𐴒𐴡𐴌𐴠𐴥 𐴊𐴠 𐴎𐴝𐴒𐴝 𐴒𐴝𐴥𐴕𐴡𐴃𐴢 𐴕𐴡 𐴎𐴝𐴦.

³²𐴇𐴠𐴥𐴍𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴒𐴟𐴎𐴡𐴌𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴇𐴡𐴊𐴟𐴥𐴕𐴠 𐴘𐴝𐴀𐴕 𐴈𐴡𐴀𐴘𐴢 𐴒𐴟𐴎𐴡𐴌𐴠𐴌 𐴀𐴝𐴦𐴌 𐴇𐴡𐴊𐴟𐴥𐴕𐴠 𐴖𐴝𐴀𐴕 𐴈𐴡𐴀𐴘𐴢 𐴒𐴟𐴎𐴡𐴌𐴠𐴌. 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴃𐴝𐴌𐴝 𐴇𐴠𐴥𐴍𐴠 𐴑𐴞𐴘𐴡𐴥𐴓𐴧𐴝 𐴎𐴡𐴔𐴝 𐴀𐴡𐴥𐴘𐴧𐴠 𐴊𐴠 𐴀𐴟𐴥𐴊𐴧𐴗𐴝 𐴇𐴡𐴘 𐴕𐴡 𐴉𐴝𐴌𐴠.³³𐴇𐴡𐴊𐴟𐴥𐴕 𐴘𐴡𐴇𐴟𐴥𐴊𐴞𐴘𐴠 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴡𐴌𐴠 𐴔𐴝𐴕𐴟𐴥𐴙𐴐𐴡𐴌 𐴋𐴝𐴀𐴘𐴢 𐴖𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴝𐴘 𐴀𐴞𐴥𐴃𐴝𐴌𐴝𐴌 𐴔𐴟𐴀𐴕𐴃𐴟 𐴊𐴞𐴥𐴘𐴠; 𐴘𐴡𐴥𐴒𐴧𐴗𐴝𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴥𐴃𐴠 𐴀𐴞𐴐𐴝𐴥𐴌𐴝 𐴒𐴡𐴌𐴞𐴥 𐴕𐴞𐴎𐴝𐴥𐴔 𐴀𐴡𐴥𐴘𐴃𐴡 𐴈𐴡𐴘𐴧𐴠𐴥, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝𐴘𐴠 𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴏𐴡𐴥𐴉𐴝𐴘 𐴊𐴞𐴥 𐴉𐴝𐴌𐴠.³⁴𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴠𐴃𐴧𐴡𐴥𐴃𐴢 𐴘𐴡𐴥𐴒𐴧𐴗𐴝 𐴘𐴡𐴇𐴟𐴥𐴊𐴞 𐴊𐴠 𐴇𐴞𐴥𐴘𐴝𐴕 𐴀𐴡𐴥𐴃𐴢 𐴉𐴝𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴠𐴑 𐴀𐴝𐴁𐴝𐴏𐴠 𐴊𐴟𐴘 𐴒𐴡𐴥𐴕𐴋𐴝 𐴉𐴡𐴙𐴅𐴧𐴡𐴕𐴃𐴡 𐴀𐴠𐴕𐴊𐴞𐴓𐴧𐴝 𐴒𐴟𐴎𐴡𐴌𐴝𐴃𐴢 𐴀𐴝𐴐𐴧𐴞𐴥𐴓𐴢, ”𐴀𐴞𐴥𐴉𐴞𐴐𐴞𐴀𐴡𐴥𐴓𐴡𐴌 𐴊𐴠𐴜𐴞 𐴀𐴝𐴌𐴃𐴠𐴔𐴞𐴏𐴢 𐴔𐴟𐴈𐴝𐴥𐴕.“

³⁵𐴁𐴝𐴦𐴊𐴠 𐴀𐴝𐴇𐴠𐴥𐴌𐴞𐴃𐴢, 𐴐𐴡𐴥𐴀𐴌𐴡𐴌 𐴑𐴠𐴌𐴝𐴕𐴞𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴕𐴞𐴎𐴝𐴥𐴔 𐴔𐴝𐴥𐴌𐴝𐴘 𐴈𐴡𐴀𐴌 𐴊𐴠, ”𐴀𐴡𐴥 𐴀𐴞𐴥𐴉𐴞𐴐𐴞𐴀𐴡𐴥𐴓𐴢, 𐴀𐴠 𐴈𐴡𐴃𐴝𐴤 𐴘𐴝𐴀𐴕 𐴃𐴡 𐴁𐴠𐴒𐴧𐴟𐴥𐴕𐴠 𐴎𐴝𐴕𐴠, 𐴀𐴞𐴥𐴉𐴞𐴏𐴝𐴏𐴢 𐴀𐴡𐴥𐴙𐴓𐴊𐴠 𐴔𐴟𐴈𐴝𐴥𐴕 𐴊𐴠𐴜𐴞 𐴀𐴝𐴌𐴃𐴠𐴔𐴞𐴏𐴡𐴌 𐴔𐴡𐴕𐴊𐴞𐴌𐴡𐴌 𐴀𐴠𐴊𐴧𐴠 𐴏𐴡𐴥𐴁𐴞 𐴖𐴝𐴀𐴕𐴡𐴌 𐴏𐴡𐴥𐴣𐴓𐴡𐴘𐴝, 𐴎𐴞𐴘𐴝𐴥𐴕 𐴀𐴝𐴏𐴔𐴝𐴕𐴡𐴃𐴧𐴟 𐴉𐴡𐴙𐴅𐴧𐴠𐴥.³⁶𐴇𐴠𐴥𐴃𐴡𐴓𐴧𐴝, 𐴀𐴞𐴀𐴕 𐴎𐴠𐴃𐴧𐴡𐴥𐴃𐴢 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴕𐴡 𐴉𐴝𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴑𐴞𐴒𐴡𐴃𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴕𐴞𐴎𐴝𐴥𐴔 𐴀𐴡𐴥𐴕 𐴏𐴝𐴥, 𐴀𐴝𐴦𐴌 𐴁𐴝𐴥𐴚𐴒𐴡𐴌𐴞 𐴑𐴠𐴏𐴧𐴟𐴥 𐴕𐴡 𐴒𐴡𐴌𐴡𐴤𐴕 𐴏𐴝𐴥.³⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴢 𐴎𐴞𐴀𐴕𐴡𐴌𐴠 𐴀𐴠𐴍𐴠𐴥 𐴀𐴝𐴙𐴕𐴧𐴡𐴤, 𐴀𐴞𐴥𐴃𐴝𐴌𐴝 𐴕𐴡 𐴔𐴡𐴕𐴊𐴞𐴌𐴡𐴃𐴧𐴟 𐴋𐴝𐴈𐴝𐴛𐴃𐴞 𐴒𐴡𐴙𐴅𐴧𐴠𐴥 𐴀𐴝𐴦𐴌 𐴕𐴡 𐴀𐴝𐴣𐴀𐴌𐴝𐴌 𐴊𐴠𐴜𐴞𐴌 𐴑𐴟𐴉𐴠𐴥𐴌𐴞 𐴒𐴡𐴙𐴅𐴧𐴠𐴥.³⁸𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴊𐴞𐴔𐴞𐴃𐴠𐴌𐴞𐴘𐴟𐴏𐴡𐴃𐴧𐴟 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴏𐴝𐴥𐴀𐴣𐴃𐴞 𐴔𐴞𐴏𐴃𐴞𐴥𐴌𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴇𐴡𐴕𐴡𐴤𐴑𐴞𐴘𐴡𐴌 𐴀𐴟𐴓𐴋𐴝 𐴐𐴠𐴥𐴑𐴝𐴘𐴡𐴃𐴢 𐴃𐴝𐴥𐴑𐴠, 𐴀𐴝𐴊𐴝𐴓𐴡𐴃𐴢 𐴀𐴡𐴥𐴑𐴧𐴡𐴓𐴢 𐴃𐴡 𐴑𐴟𐴥𐴓𐴝 𐴀𐴝𐴏𐴠𐴤, 𐴀𐴝𐴦𐴌 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴏𐴠𐴤. 𐴇𐴠𐴥𐴍𐴠 𐴎𐴝𐴘 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴓𐴧𐴝 𐴀𐴠𐴎𐴧𐴡𐴕𐴠 𐴔𐴡𐴦𐴊𐴧𐴞𐴔𐴝 𐴒𐴡𐴌𐴡𐴥𐴗𐴑𐴒𐴡𐴘.³⁹𐴔𐴡𐴕𐴃𐴡𐴌 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴘𐴝𐴦𐴌 𐴃𐴟𐴥𐴖𐴝𐴌𐴡 𐴑𐴠𐴏𐴧𐴟𐴥 𐴒𐴡𐴙𐴃𐴧𐴡𐴥 𐴏𐴡𐴀, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴑𐴝𐴦𐴕𐴟𐴕𐴞 𐴔𐴟𐴅𐴞𐴓𐴞𐴥𐴐𐴡𐴃𐴢 𐴉𐴝𐴥𐴘𐴏𐴠𐴓𐴝 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.⁴⁰𐴀𐴝𐴙𐴅𐴧𐴝 𐴀𐴡𐴥𐴘𐴧𐴠 𐴊𐴠 𐴇𐴝𐴥𐴚𐴒𐴝𐴔𐴝𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴉𐴡𐴌𐴞𐴁𐴝𐴤𐴌 𐴋𐴡𐴦𐴌 𐴀𐴝𐴏𐴠𐴤. 𐴎𐴡𐴊𐴞 𐴉𐴡𐴌𐴠, 𐴀𐴝𐴣𐴀𐴌𐴝 𐴀𐴠 𐴇𐴝𐴥𐴚𐴒𐴝𐴔𐴝𐴌 𐴇𐴡𐴕𐴡𐴤 𐴖𐴝𐴅𐴝𐴤 𐴊𐴝𐴈𐴝𐴤𐴘 𐴕𐴡 𐴉𐴝𐴙𐴅𐴧𐴟𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴀𐴕𐴡𐴌 𐴃𐴡 𐴇𐴡𐴕𐴡𐴤 𐴒𐴡𐴔 𐴖𐴝𐴅𐴝𐴤 𐴕𐴝𐴥𐴘.“⁴¹𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴔𐴟𐴅𐴞𐴓𐴞𐴥𐴐𐴢 𐴇𐴡𐴥𐴃𐴡𐴔 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.

The Word for the World International

https://app.library.bible/content/87faca8b51c22590