Read 2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 11

2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢11

𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴔𐴞𐴏𐴝𐴥 𐴏𐴝𐴥𐴇𐴝𐴁𐴞 𐴀𐴡𐴥𐴑𐴧𐴡𐴓𐴢

¹𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥𐴌 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴑𐴠𐴏𐴧𐴟𐴥 𐴁𐴠𐴑𐴟𐴉𐴝𐴘𐴌𐴠 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥𐴁𐴝; 𐴁𐴠𐴐𐴡𐴥𐴑 𐴃𐴟𐴣𐴀𐴝𐴥𐴌𐴝 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤𐴌 𐴀𐴡𐴥.²𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴓𐴧𐴝𐴌 𐴋𐴡𐴥𐴙𐴓𐴧𐴝 𐴒𐴝𐴘𐴌𐴡𐴃𐴢 𐴀𐴝𐴏𐴠𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴒𐴗𐴝𐴥 𐴇𐴡𐴥𐴐𐴡𐴔 𐴓𐴡𐴥𐴘 𐴎𐴟𐴌𐴝𐴒𐴝𐴃𐴝𐴤 𐴒𐴡𐴌𐴞𐴥𐴉𐴠𐴓𐴝𐴘𐴞, 𐴘𐴝𐴥𐴕𐴞 𐴔𐴡𐴀𐴏𐴞𐴤 𐴓𐴧𐴡𐴥𐴘, 𐴎𐴠𐴀𐴕𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴥𐴁𐴝𐴌 𐴀𐴝𐴥𐴃𐴡𐴃𐴢 𐴂𐴝𐴑 𐴇𐴡𐴙𐴕𐴧𐴝 𐴀𐴞𐴥𐴏𐴝𐴉𐴠 𐴃𐴟𐴓𐴞𐴤𐴊𐴞 𐴉𐴝𐴌𐴞.³𐴓𐴠𐴑𐴞𐴕 𐴀𐴝𐴀𐴛 𐴋𐴡𐴦𐴌𐴝𐴙𐴌 𐴊𐴠 𐴑𐴞, 𐴎𐴠𐴕𐴊𐴞𐴓𐴧𐴝 𐴇𐴝𐴥𐴉𐴠 𐴕𐴞𐴎𐴡𐴌 𐴏𐴝𐴓𐴝𐴥𐴑𐴞 𐴓𐴡𐴥𐴘 𐴇𐴝𐴥𐴖𐴝𐴌𐴠 𐴒𐴟𐴕𐴝𐴤𐴃𐴢 𐴉𐴠𐴥𐴓𐴝𐴘𐴧𐴠, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴊𐴠𐴔𐴝𐴑𐴡𐴌𐴠 𐴘𐴡𐴥 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴀𐴏𐴞𐴤 𐴓𐴧𐴡𐴥𐴘 𐴎𐴠 𐴀𐴞𐴔𐴝𐴕𐴊𐴝𐴌𐴞 𐴀𐴠𐴊𐴧𐴠 𐴂𐴝𐴑 𐴃𐴝𐴦𐴓𐴟𐴑𐴝𐴃𐴢 𐴀𐴝𐴏𐴠𐴤 𐴇𐴞𐴥𐴘𐴝𐴕𐴡𐴃𐴧𐴟 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴘𐴁𐴡𐴥𐴘.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴝𐴀𐴘𐴢 𐴀𐴝𐴌 𐴀𐴠𐴒𐴧𐴗𐴝𐴤 𐴀𐴞𐴏𐴝𐴤𐴌 𐴃𐴡𐴁𐴡𐴓𐴞𐴑 𐴒𐴡𐴌𐴠𐴥, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴝𐴣𐴀𐴌𐴝 𐴃𐴡𐴁𐴡𐴓𐴞𐴑 𐴕𐴡𐴥 𐴒𐴡𐴌𐴞𐴥, 𐴘𐴝𐴥𐴃𐴡 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴌𐴟𐴀 𐴉𐴡𐴦 𐴎𐴞𐴁𐴝𐴤 𐴃𐴟𐴣𐴀𐴝𐴥𐴌𐴝 𐴉𐴝𐴘𐴧𐴡𐴥 𐴊𐴠 𐴀𐴞𐴥𐴁𐴝 𐴓𐴧𐴡𐴥𐴘 𐴀𐴝𐴓𐴡𐴑, 𐴘𐴝𐴥 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴑𐴟𐴥𐴐𐴈𐴡𐴥𐴁𐴡𐴌 𐴉𐴡𐴦 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥 𐴊𐴠 𐴇𐴞𐴥𐴘𐴝𐴕 𐴓𐴡𐴥𐴘 𐴀𐴝𐴓𐴡𐴑, 𐴇𐴞𐴥𐴀𐴕 𐴃𐴡 𐴃𐴟𐴣𐴀𐴝𐴥𐴌𐴝 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤.

⁵𐴀𐴝𐴀𐴛 𐴃𐴡 𐴕𐴞𐴎𐴡𐴌𐴠𐴥 𐴇𐴠𐴥 ”𐴁𐴝𐴌𐴞𐴥𐴑 𐴏𐴝𐴥𐴇𐴝𐴁𐴞“ 𐴈𐴡𐴖𐴝𐴤 𐴎𐴝 𐴊𐴠 𐴀𐴞𐴥𐴃𐴝𐴌𐴝𐴌 𐴃𐴟𐴥𐴖𐴝𐴌𐴡 𐴇𐴡𐴕𐴡𐴤 𐴈𐴡𐴔 𐴕𐴡 𐴄𐴝𐴥𐴀𐴌𐴞.⁶𐴎𐴡𐴊𐴞 𐴀𐴝𐴀𐴛 𐴐𐴟𐴥𐴕𐴊𐴡𐴌𐴒𐴡𐴌𐴞 𐴁𐴡𐴘𐴧𐴝𐴕 𐴊𐴞 𐴕𐴡 𐴎𐴝𐴕𐴞𐴓𐴠𐴥 𐴘𐴡, 𐴀𐴠𐴓𐴡𐴥𐴔𐴡𐴌 𐴇𐴞𐴥𐴑𐴧𐴝𐴃𐴧𐴟 𐴃𐴡 𐴀𐴝𐴀𐴛 𐴇𐴠𐴥𐴕𐴊𐴞𐴓𐴧𐴝 𐴕𐴡. 𐴇𐴞𐴥𐴘𐴝𐴕 𐴃𐴡 𐴀𐴝𐴣𐴀𐴌𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴔𐴝𐴥𐴎𐴠 𐴉𐴟𐴌𐴝𐴉𐴟𐴌𐴞𐴌 𐴏𐴝𐴥𐴀𐴣𐴃𐴠 𐴃𐴟𐴣𐴀𐴝𐴥𐴌𐴝𐴌𐴠 𐴊𐴝𐴈𐴝𐴤𐴘𐴧𐴞.⁷𐴃𐴟𐴣𐴀𐴝𐴥𐴌𐴝𐴌 𐴃𐴡𐴑𐴧𐴝 𐴁𐴝𐴌𐴞𐴥 𐴁𐴡𐴓𐴧𐴝 𐴀𐴝𐴀𐴛 𐴕𐴞𐴌𐴡𐴥𐴐𐴢 𐴀𐴡𐴥𐴘 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴔𐴝𐴦𐴕𐴝 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥 𐴊𐴠 𐴇𐴞𐴥𐴘𐴝𐴕 𐴑𐴞𐴥 𐴀𐴝𐴀𐴛 𐴒𐴟𐴕𐴝𐴤 𐴒𐴡𐴙𐴅𐴧𐴞𐴥 𐴊𐴠 𐴕𐴠𐴥؟⁸𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴡𐴥𐴓𐴞 𐴀𐴝𐴀𐴛 𐴀𐴡𐴙𐴕𐴧𐴡 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴝𐴔 𐴒𐴡𐴙𐴐𐴧𐴞𐴥, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥 𐴀𐴞𐴥𐴃𐴝𐴌𐴝𐴌𐴠 𐴓𐴟𐴄𐴢 𐴒𐴡𐴙𐴅𐴧𐴞𐴥.⁹𐴀𐴝𐴦𐴌 𐴎𐴠𐴣𐴃𐴧𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴔𐴟𐴀𐴃𐴝𐴐𐴡𐴃𐴢 𐴉𐴡𐴙𐴅𐴧𐴞𐴥𐴓𐴝𐴔, 𐴇𐴠𐴥𐴣𐴃𐴧𐴠 𐴀𐴝𐴀𐴛 𐴇𐴡𐴕𐴡𐴤𐴑𐴞𐴘𐴡𐴓𐴧𐴝 𐴎𐴟𐴓𐴝𐴂𐴢 𐴕𐴡𐴥 𐴀𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴧𐴟 𐴀𐴝𐴙𐴐𐴧𐴞𐴤𐴓𐴢 𐴊𐴠 𐴁𐴝𐴥𐴘𐴧𐴝𐴙𐴕 𐴕𐴟𐴥𐴕𐴠 𐴀𐴝𐴣𐴀𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝𐴉𐴟𐴌𐴞 𐴉𐴟𐴌𐴝 𐴒𐴡𐴙𐴅𐴧𐴞𐴥𐴓𐴢. 𐴀𐴝𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴕𐴞𐴎𐴡𐴌𐴠𐴥 𐴃𐴟𐴣𐴀𐴝𐴥𐴌𐴝𐴓𐴧𐴝 𐴎𐴟𐴓𐴝𐴂𐴢 𐴕𐴡 𐴀𐴡𐴥𐴘 𐴉𐴝𐴥𐴕 𐴒𐴡𐴙𐴅𐴧𐴞𐴥𐴓𐴝𐴔, 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴝𐴥𐴃𐴢 𐴃𐴝𐴥𐴑𐴞𐴘𐴟𐴔 𐴀𐴡𐴥.¹⁰𐴔𐴡𐴀𐴏𐴞𐴤𐴌 𐴎𐴠 𐴏𐴡𐴥𐴘𐴧𐴞 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤, 𐴀𐴝𐴀𐴛 𐴇𐴞𐴥𐴘𐴝𐴕𐴡𐴌 𐴈𐴡𐴏𐴡𐴥𐴔 𐴇𐴝𐴥𐴘 𐴈𐴡𐴀𐴙𐴌, 𐴀𐴝𐴑𐴝𐴘𐴝𐴌 𐴀𐴠𐴓𐴝𐴑𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴝𐴣𐴀𐴌𐴠𐴥 𐴀𐴠 𐴁𐴡𐴌𐴝𐴥𐴘 𐴒𐴡𐴌𐴝𐴥𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴁𐴡𐴕 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴡𐴥.¹¹𐴇𐴞𐴥𐴘𐴝𐴕 𐴑𐴞𐴘𐴡𐴥𐴓𐴧𐴝 𐴈𐴡𐴀𐴙𐴌؟ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴕𐴡 𐴒𐴡𐴌𐴞𐴥 𐴊𐴠 𐴕𐴠𐴥؟ 𐴀𐴝𐴓𐴧𐴝𐴘𐴠 𐴎𐴝𐴕𐴠, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥.

¹²𐴔𐴡𐴕𐴃𐴡𐴌 𐴀𐴝𐴀𐴛 𐴎𐴞𐴘𐴝𐴥𐴕 𐴒𐴡𐴌𐴞𐴥𐴌 𐴇𐴞𐴥𐴘𐴝𐴕 𐴒𐴡𐴌𐴝𐴥𐴃𐴢 𐴃𐴝𐴥𐴙𐴑𐴧𐴟𐴔, 𐴎𐴠𐴀𐴕𐴠 𐴀𐴝𐴀𐴛 𐴀𐴟𐴘𐴃𐴝𐴌𐴝𐴤𐴌𐴠 𐴔𐴡𐴦𐴗𐴑𐴝 𐴉𐴝𐴘𐴃𐴡 𐴕𐴡 𐴊𐴞, 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝 𐴒𐴡𐴙𐴅𐴧𐴞𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴙𐴅𐴧𐴠𐴥 𐴈𐴡𐴀𐴘𐴢 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴁𐴡𐴌𐴝𐴁𐴡𐴌 𐴀𐴡𐴥𐴘𐴁𐴝𐴌 𐴔𐴡𐴦𐴗𐴑𐴝 𐴃𐴟𐴖𐴝𐴌.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴃𐴡 𐴔𐴞𐴏𐴝𐴥 𐴏𐴝𐴥𐴇𐴝𐴁𐴞, 𐴀𐴠𐴊𐴧𐴠 𐴉𐴡𐴥𐴑𐴧𐴡𐴌𐴝𐴘 𐴒𐴡𐴥𐴌𐴞 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤 𐴕𐴞𐴎𐴡𐴌𐴠𐴥 𐴔𐴡𐴀𐴏𐴞𐴤𐴌 𐴏𐴝𐴥𐴇𐴝𐴁𐴞 𐴀𐴞𐴥𐴏𐴝𐴉𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴁𐴠𐴥𐴃𐴢 𐴊𐴡𐴥𐴌𐴠.¹⁴𐴃𐴝𐴦𐴅𐴟𐴂𐴢 𐴀𐴡𐴥𐴘𐴁𐴝𐴌 𐴑𐴠𐴏𐴧𐴟𐴥 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴘𐴃𐴝𐴕 𐴕𐴞𐴎𐴠 𐴘𐴡𐴥 𐴃𐴡 𐴕𐴟𐴌𐴝𐴕𐴞 𐴉𐴞𐴥𐴌𐴞𐴏𐴃𐴝 𐴀𐴞𐴥𐴏𐴝𐴉𐴠 𐴁𐴠𐴥𐴃𐴢 𐴊𐴡𐴥𐴌𐴠.¹⁵𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌 𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴈𐴝𐴥𐴀𐴊𐴠𐴔 𐴀𐴞𐴥𐴏𐴝𐴉𐴠 𐴁𐴠𐴥𐴃𐴢 𐴊𐴡𐴥𐴌𐴠 𐴊𐴠 𐴇𐴞𐴥𐴘𐴝𐴕 𐴋𐴡𐴣𐴀𐴌 𐴈𐴡𐴃𐴝𐴤 𐴕𐴡. 𐴀𐴞𐴥𐴃𐴝𐴌𐴝𐴌 𐴕𐴡𐴃𐴞𐴎𐴝 𐴀𐴞𐴥𐴃𐴝𐴌𐴝𐴌 𐴈𐴝𐴔 𐴔𐴡𐴎𐴞𐴕 𐴁𐴠 𐴉𐴝𐴘𐴁𐴡.

𐴏𐴝𐴥𐴇𐴝𐴁𐴞 𐴀𐴞𐴥𐴏𐴝𐴉𐴠 𐴂𐴝𐴥𐴀𐴟𐴓𐴡𐴌 𐴊𐴟𐴑-𐴔𐴡𐴏𐴞𐴁𐴡𐴃𐴢

¹⁶𐴀𐴝𐴀𐴛 𐴀𐴝𐴁𐴝𐴌 𐴈𐴡𐴀𐴙𐴌, 𐴀𐴝𐴣𐴀𐴌𐴠𐴥 𐴇𐴡𐴕𐴡𐴤𐴑𐴞𐴘𐴠 𐴁𐴠𐴑𐴟𐴉𐴢 𐴁𐴡𐴓𐴞 𐴕𐴡 𐴁𐴝𐴥𐴙𐴂𐴧𐴡; 𐴔𐴡𐴕𐴃𐴡𐴌 𐴎𐴡𐴊𐴞 𐴁𐴝𐴥𐴉𐴡, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴠𐴥 𐴀𐴠𐴎𐴧𐴡𐴕 𐴁𐴠𐴑𐴟𐴉𐴢 𐴀𐴞𐴥𐴏𐴝𐴉𐴠 𐴀𐴡𐴥𐴘𐴓𐴠 𐴒𐴡𐴏𐴡𐴥, 𐴎𐴠𐴀𐴕𐴠 𐴀𐴝𐴀𐴛 𐴘𐴡𐴥 𐴀𐴠𐴑𐴧𐴝𐴕𐴝𐴥 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴉𐴝𐴌𐴞.¹⁷𐴀𐴝𐴏𐴡𐴥𐴓𐴠 𐴘𐴝𐴓𐴝 𐴀𐴝𐴀𐴛 𐴇𐴠𐴥𐴕𐴊𐴞𐴓𐴧𐴝 𐴁𐴡𐴌𐴝𐴥𐴙𐴌 𐴀𐴠𐴑𐴞𐴕𐴠 𐴎𐴞𐴀𐴕 𐴈𐴡𐴀𐴙𐴌, 𐴇𐴞𐴥𐴀𐴕 𐴔𐴝𐴓𐴞𐴑𐴡𐴌 𐴔𐴡𐴎𐴞𐴕 𐴕𐴡 𐴁𐴡𐴥𐴓𐴑𐴠 𐴀𐴠𐴎𐴧𐴡𐴕 𐴁𐴠𐴑𐴟𐴉𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴈𐴡𐴀𐴙𐴌 𐴊𐴠.¹⁸𐴁𐴡𐴀𐴗𐴃𐴢 𐴎𐴡𐴕𐴠 𐴎𐴠𐴃𐴧𐴡𐴥𐴃𐴢 𐴊𐴟𐴕𐴞𐴘𐴝𐴘𐴁𐴞 𐴔𐴡𐴎𐴞𐴕 𐴁𐴡𐴌𐴝𐴥𐴘 𐴒𐴡𐴌𐴠𐴥𐴌, 𐴀𐴝𐴀𐴛 𐴘𐴡𐴥 𐴁𐴡𐴌𐴝𐴥𐴘 𐴒𐴡𐴙𐴅𐴧𐴟𐴥𐴔.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴒𐴞𐴘𐴝𐴕𐴞 𐴀𐴡𐴥𐴘 𐴁𐴠𐴑𐴟𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤.²⁰𐴏𐴞𐴌𐴞𐴥𐴉𐴢 𐴇𐴞𐴥𐴘𐴝𐴕 𐴕𐴡, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴒𐴟𐴓𐴝𐴔 𐴁𐴝𐴕𐴝𐴘𐴓𐴠𐴤, 𐴃𐴟𐴣𐴀𐴝𐴥𐴌𐴝𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘𐴓𐴠, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴉𐴝𐴥𐴘𐴊𐴝 𐴃𐴟𐴓𐴞𐴤𐴓𐴠, 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴝𐴌𐴞𐴥𐴑 𐴑𐴟𐴥𐴖𐴝𐴓𐴝𐴘𐴓𐴠, 𐴘𐴝𐴥 𐴃𐴟𐴣𐴀𐴝𐴥𐴌𐴝𐴌𐴠 𐴒𐴝𐴓𐴢 𐴏𐴝𐴥𐴘 𐴏𐴟𐴖𐴝𐴌 𐴔𐴝𐴙𐴓𐴧𐴠, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴀𐴡𐴥 𐴃𐴡 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤.²¹𐴀𐴝𐴀𐴛 𐴐𐴡𐴥𐴌𐴔𐴞𐴕𐴊𐴝𐴌 𐴏𐴝𐴥𐴀𐴣𐴃𐴠 𐴘𐴝𐴀𐴕 𐴑𐴡𐴁𐴟𐴓𐴢 𐴇𐴝𐴥𐴙𐴌 𐴊𐴠 𐴑𐴞, 𐴀𐴝𐴣𐴀𐴌𐴝 𐴇𐴞𐴥𐴀𐴕 𐴒𐴡𐴌𐴝𐴥𐴃𐴧𐴟 𐴁𐴞𐴐𐴞𐴤 𐴑𐴡𐴔𐴎𐴟𐴌 𐴀𐴝𐴐𐴧𐴞𐴥𐴓𐴝𐴔.
𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴑𐴞𐴘𐴡𐴥𐴃𐴧𐴟 𐴎𐴠 𐴁𐴝𐴦𐴁𐴟𐴃𐴠 𐴁𐴡𐴌𐴝𐴥𐴘 𐴒𐴡𐴌𐴞𐴥𐴁𐴝𐴌 𐴇𐴞𐴥𐴔𐴧𐴡𐴃𐴢 𐴀𐴝𐴏𐴠𐴤—𐴀𐴠𐴎𐴧𐴡𐴕 𐴁𐴠𐴑𐴟𐴉𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴈𐴡𐴘𐴧𐴟𐴥𐴔 𐴈𐴡𐴘𐴓𐴠𐴥—𐴀𐴝𐴣𐴀𐴃𐴧𐴟 𐴘𐴡𐴥 𐴇𐴠𐴥 𐴁𐴝𐴦𐴁𐴟𐴃𐴠 𐴁𐴡𐴌𐴝𐴥𐴘 𐴒𐴡𐴌𐴞𐴥𐴁𐴝𐴌 𐴇𐴞𐴥𐴔𐴧𐴡𐴃𐴢 𐴀𐴝𐴏𐴠𐴤.²²𐴀𐴞𐴥𐴃𐴝𐴌𐴝 𐴇𐴞𐴁𐴌𐴝𐴕𐴞 𐴊𐴠 𐴕𐴠𐴥؟ 𐴀𐴝𐴀𐴛 𐴘𐴡𐴥 𐴃𐴡 𐴇𐴠𐴥𐴕𐴊𐴞𐴓𐴧𐴝. 𐴀𐴞𐴥𐴃𐴝𐴌𐴝 𐴀𐴞𐴏𐴌𐴝𐴥𐴙𐴓𐴞 𐴊𐴠 𐴕𐴠𐴥؟ 𐴀𐴝𐴀𐴛 𐴘𐴡𐴥 𐴃𐴡 𐴇𐴠𐴥𐴕𐴊𐴞𐴓𐴧𐴝. 𐴀𐴞𐴥𐴃𐴝𐴌𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴢 𐴊𐴠 𐴕𐴠𐴥؟ 𐴀𐴝𐴀𐴛 𐴘𐴡𐴥 𐴃𐴡 𐴇𐴠𐴥𐴕𐴊𐴞𐴓𐴧𐴝.²³𐴀𐴞𐴥𐴃𐴝𐴌𐴝 𐴔𐴡𐴀𐴏𐴞𐴤𐴌 𐴈𐴝𐴥𐴀𐴊𐴠𐴔 𐴊𐴠 𐴕𐴠𐴥؟—𐴀𐴠𐴎𐴧𐴡𐴕 𐴉𐴡𐴦𐴓𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴈𐴡𐴘𐴧𐴟𐴥𐴔 𐴈𐴡𐴘𐴓𐴠𐴥—𐴀𐴝𐴀𐴛 𐴃𐴡 𐴀𐴝𐴌𐴡𐴤 𐴁𐴞𐴐𐴞𐴤: 𐴁𐴞𐴐𐴞𐴤 𐴔𐴠𐴀𐴕𐴧𐴡𐴃𐴢 𐴒𐴡𐴌𐴝𐴥𐴃𐴢 𐴀𐴡𐴥, 𐴎𐴞𐴘𐴡𐴥𐴓𐴢 𐴈𐴝𐴍𐴝𐴃𐴢 𐴀𐴡𐴥, 𐴇𐴝𐴥𐴣𐴊𐴝𐴘 𐴉𐴞𐴍𐴝 𐴇𐴝𐴥𐴃𐴢 𐴀𐴡𐴥, 𐴀𐴝𐴦𐴌 𐴁𐴝𐴌𐴁𐴝𐴥𐴌 𐴔𐴡𐴦𐴃𐴢 𐴓𐴡𐴘 𐴔𐴟𐴑𐴝𐴁𐴠𐴓𐴝 𐴀𐴡𐴥𐴖𐴝𐴃𐴢 𐴀𐴡𐴥.²⁴𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴀𐴛 𐴀𐴠𐴑 𐴈𐴡𐴔 𐴏𐴝𐴓𐴞𐴐𐴧𐴗𐴝𐴌 𐴊𐴡𐴥𐴌𐴠 𐴉𐴝𐴣𐴏𐴢 𐴁𐴝𐴌 𐴊𐴟𐴌𐴝 𐴇𐴝𐴥𐴘𐴧𐴞.²⁵𐴃𐴞𐴕 𐴁𐴝𐴌 𐴀𐴝𐴀𐴛 𐴋𐴝𐴕𐴋𐴝 𐴓𐴡𐴘 𐴉𐴞𐴍𐴝 𐴇𐴝𐴥𐴘𐴧𐴞, 𐴀𐴠𐴑𐴁𐴝𐴌 𐴉𐴝𐴃𐴧𐴡𐴥𐴌 𐴔𐴝𐴌𐴝 𐴇𐴝𐴥𐴘𐴧𐴞; 𐴃𐴞𐴕 𐴁𐴝𐴌 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴎𐴝𐴙𐴌 𐴊𐴠 𐴎𐴝𐴀𐴣𐴏𐴢 𐴁𐴝𐴥𐴚𐴒𐴞 𐴋𐴟𐴉𐴞𐴥𐴒𐴞𐴓𐴒𐴡𐴘, 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴊𐴡𐴙𐴅𐴧𐴝𐴃𐴢 𐴔𐴝𐴎𐴠𐴥 𐴀𐴠𐴑 𐴌𐴝𐴙𐴃𐴢 𐴀𐴠𐴑 𐴊𐴞𐴕 𐴈𐴝𐴍𐴝 𐴉𐴡𐴙𐴅𐴧𐴠𐴥 𐴊𐴠 𐴀𐴝𐴏𐴠𐴤.²⁶𐴀𐴝𐴣𐴀𐴌 𐴀𐴠𐴒𐴝𐴎𐴝𐴥 𐴏𐴡𐴉𐴡𐴥𐴌𐴡𐴃𐴢 𐴀𐴝𐴀𐴛 𐴁𐴡𐴀𐴗𐴃𐴢 𐴋𐴡𐴥𐴙𐴓𐴧𐴝 𐴇𐴡𐴥𐴃𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴉𐴡𐴙𐴅𐴧𐴞𐴥𐴓𐴝𐴔: 𐴇𐴝𐴥𐴓𐴡𐴌 𐴇𐴡𐴥𐴃𐴡𐴌𐴝𐴃𐴢, 𐴋𐴝𐴈𐴝𐴣𐴙𐴄𐴡𐴌 𐴇𐴡𐴥𐴃𐴡𐴌𐴝𐴃𐴢, 𐴕𐴞𐴎𐴡𐴌 𐴑𐴡𐴗𐴔𐴞 𐴔𐴝𐴙𐴕𐴐𐴡𐴥𐴌 𐴇𐴡𐴥𐴃𐴡𐴌𐴝𐴃𐴢, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴡𐴥𐴃𐴡𐴌𐴝𐴃𐴢, 𐴐𐴡𐴥𐴀𐴌𐴡𐴌 𐴇𐴡𐴥𐴃𐴡𐴌𐴝𐴃𐴢, 𐴔𐴡𐴘𐴊𐴝𐴕 𐴀𐴠𐴓𐴝𐴑𐴝𐴌 𐴇𐴡𐴥𐴃𐴡𐴌𐴝𐴃𐴢, 𐴊𐴡𐴙𐴅𐴧𐴝𐴌 𐴇𐴡𐴥𐴃𐴡𐴌𐴝𐴃𐴢, 𐴀𐴠𐴊𐴧𐴠 𐴔𐴞𐴏𐴝𐴥 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴇𐴡𐴥𐴃𐴡𐴌𐴝𐴃𐴢.²⁷𐴀𐴝𐴀𐴛 𐴁𐴞𐴐𐴞𐴤 𐴔𐴠𐴀𐴕𐴧𐴡𐴃𐴢 𐴀𐴠𐴊𐴧𐴠 𐴊𐴟𐴑 𐴀𐴡𐴥𐴑𐴧𐴡𐴓𐴢 𐴒𐴡𐴙𐴅𐴧𐴞𐴥, 𐴀𐴝𐴦𐴌 𐴁𐴡𐴀𐴗𐴃𐴢 𐴌𐴝𐴙𐴃𐴢 𐴀𐴟𐴌𐴒𐴟𐴥𐴔𐴝 𐴈𐴝𐴍𐴝𐴘𐴧𐴞𐴥 𐴊𐴠 𐴀𐴝𐴏𐴠𐴤. 𐴀𐴝𐴀𐴛 𐴁𐴟𐴥𐴑 𐴃𐴞𐴌𐴝𐴥𐴐𐴠 𐴊𐴟𐴑 𐴉𐴝𐴘𐴧𐴞𐴥, 𐴀𐴝𐴦𐴌 𐴀𐴠𐴒𐴝𐴎𐴝𐴥-𐴀𐴠𐴒𐴝𐴎𐴝𐴥 𐴖𐴝𐴀𐴐𐴧𐴝 𐴃𐴝𐴥𐴙𐴑𐴧𐴞 𐴊𐴠 𐴀𐴝𐴏𐴠𐴤. 𐴀𐴝𐴀𐴛 𐴐𐴞𐴥𐴃𐴠 𐴀𐴠𐴊𐴧𐴠 𐴇𐴡𐴦𐴌𐴏𐴟𐴖𐴡𐴌𐴠 𐴘𐴡𐴥 𐴊𐴟𐴑 𐴉𐴝𐴘𐴧𐴞𐴥.²⁸𐴀𐴝𐴌𐴒𐴟𐴥𐴕𐴡𐴌 𐴈𐴡𐴃𐴝𐴤 𐴀𐴠𐴌𐴡, 𐴃𐴝𐴔𐴝𐴥𐴔 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴝𐴏𐴠𐴤 𐴊𐴠 𐴏𐴞𐴕𐴃𐴝𐴁𐴝𐴥𐴉𐴝𐴕𐴞𐴘𐴠 𐴀𐴝𐴣𐴀𐴌𐴠𐴥 𐴉𐴡𐴃𐴧𐴞𐴥 𐴊𐴞𐴕 𐴊𐴝𐴁𐴝𐴃𐴢 𐴃𐴝𐴥𐴑𐴠.

²⁹𐴇𐴡𐴕𐴠 𐴑𐴡𐴔𐴎𐴟𐴌 𐴀𐴡𐴥𐴘𐴓𐴠 𐴀𐴝𐴀𐴛 𐴑𐴡𐴔𐴎𐴟𐴌 𐴕𐴡 𐴀𐴡𐴥𐴘 𐴊𐴠 𐴀𐴝𐴏𐴠𐴤؟ 𐴇𐴝𐴌𐴠𐴤 𐴒𐴟𐴕𐴝𐴤𐴃𐴢 𐴉𐴠𐴥𐴓𐴝𐴘𐴓𐴠 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴕𐴡 𐴉𐴟𐴌𐴠 𐴊𐴠 𐴀𐴝𐴏𐴠𐴤؟³⁰𐴎𐴡𐴊𐴞 𐴁𐴡𐴌𐴝𐴥𐴘 𐴒𐴡𐴌𐴞𐴥𐴁𐴝𐴌 𐴎𐴡𐴌𐴟𐴌 𐴀𐴡𐴥, 𐴀𐴝𐴀𐴛 𐴀𐴟𐴀𐴙𐴕 𐴓𐴡𐴥𐴘 𐴁𐴡𐴌𐴝𐴥𐴘 𐴒𐴡𐴌𐴞𐴥𐴘𐴟𐴔 𐴎𐴞𐴀𐴕 𐴀𐴝𐴣𐴀𐴌 𐴑𐴡𐴔𐴎𐴟𐴌𐴞 𐴓𐴡𐴘 𐴁𐴝𐴎𐴝𐴥 𐴀𐴝𐴏𐴠𐴤.³¹𐴔𐴝𐴓𐴞𐴑 𐴀𐴞𐴏𐴝𐴤𐴌 𐴀𐴝𐴓𐴧𐴝 𐴀𐴠𐴊𐴧𐴠 𐴁𐴝𐴉𐴢, 𐴎𐴞𐴁𐴝𐴤𐴌 𐴃𐴝𐴦𐴌𐴞𐴉𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴀𐴡𐴥𐴖𐴝𐴃𐴢 𐴃𐴝𐴥𐴑𐴞𐴁𐴡, 𐴀𐴞𐴥𐴁𐴝𐴘𐴠 𐴎𐴝𐴕𐴠 𐴀𐴝𐴀𐴛 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴕𐴡.³²𐴊𐴝𐴔𐴝𐴥𐴏𐴑𐴝𐴏𐴡𐴃𐴢 𐴔𐴝𐴥𐴎𐴠, 𐴀𐴝𐴣𐴀𐴌𐴠𐴥 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴡𐴥𐴓𐴞 𐴁𐴝𐴀𐴣𐴐𐴧𐴝 𐴀𐴝𐴌𐴞𐴃𐴝𐴏𐴡𐴌 𐴇𐴝𐴥𐴑𐴞𐴔𐴠 𐴊𐴝𐴔𐴝𐴥𐴏𐴑𐴝𐴏𐴢 𐴐𐴡𐴥𐴀𐴌𐴡𐴌𐴠 𐴉𐴝𐴀𐴌𐴝 𐴊𐴞𐴥 𐴌𐴝𐴙𐴑𐴧𐴞𐴥𐴓𐴢.³³𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴀𐴠𐴒𐴧𐴗𐴝𐴤 𐴓𐴝𐴘𐴡𐴃𐴢 𐴒𐴡𐴥𐴌𐴞 𐴋𐴠𐴁𐴝𐴓𐴡𐴌 𐴀𐴠𐴑𐴧𐴝𐴥𐴕 𐴎𐴝𐴕𐴝𐴥𐴓𐴝 𐴁𐴝𐴥𐴘 𐴕𐴞𐴏𐴠 𐴓𐴝𐴔𐴝𐴘𐴊𐴞𐴘𐴝 𐴒𐴞𐴀𐴓𐴢, 𐴃𐴡𐴥𐴘 𐴀𐴝𐴀𐴛 𐴘𐴡𐴥𐴒𐴧𐴗𐴝𐴌 𐴀𐴝𐴥𐴃𐴡𐴃𐴧𐴟 𐴁𐴝𐴏𐴞𐴒𐴞𐴘𐴞𐴥𐴒𐴡𐴘.

The Word for the World International

https://app.library.bible/content/87faca8b51c22590