Read 2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 10

2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢10

𐴂𐴝𐴥𐴀𐴟𐴓𐴡𐴌 𐴇𐴠𐴥𐴊𐴔𐴡𐴃𐴊𐴝𐴌𐴞𐴌 𐴏𐴡𐴥𐴉𐴝𐴘

¹𐴀𐴝𐴀𐴛 𐴂𐴝𐴥𐴀𐴟𐴓𐴢 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤 𐴎𐴝 𐴊𐴠, 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴔𐴟𐴀𐴝𐴥𐴔𐴟𐴙𐴑𐴧𐴝 𐴀𐴡𐴥𐴘𐴓𐴠 𐴉𐴟𐴣𐴊𐴝 𐴔𐴡𐴕𐴃𐴡𐴌 𐴒𐴝𐴙𐴌𐴇𐴝𐴥𐴎𐴞𐴌 𐴀𐴡𐴥𐴘𐴓𐴠 𐴀𐴝𐴄𐴡𐴑, 𐴀𐴝𐴀𐴛 𐴕𐴞𐴎𐴠 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴀𐴏𐴞𐴤𐴌 𐴐𐴞𐴥𐴊𐴝𐴘𐴞 𐴀𐴠𐴊𐴧𐴠 𐴕𐴡𐴌𐴡𐴔𐴞 𐴓𐴡𐴘 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌.²𐴀𐴝𐴀𐴛 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌 𐴊𐴠 𐴑𐴞, 𐴀𐴝𐴣𐴀𐴃𐴧𐴟 𐴎𐴠𐴕 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴘𐴓𐴠𐴤 𐴀𐴡𐴊𐴧𐴟𐴥𐴌 𐴀𐴝𐴄𐴡𐴑 𐴀𐴡𐴥𐴖𐴝 𐴕𐴡 𐴉𐴡𐴌𐴠 𐴎𐴠𐴊𐴧𐴟𐴥𐴌 𐴀𐴝𐴣𐴀𐴃𐴧𐴟 𐴑𐴠𐴏𐴧𐴟𐴥 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥 𐴁𐴡𐴓𐴞 𐴄𐴝𐴥𐴀𐴌𐴞𐴌, 𐴎𐴠𐴃𐴝𐴌𐴝𐴤 𐴕𐴞𐴥𐴑𐴞 𐴀𐴝𐴣𐴀𐴌𐴝 𐴊𐴟𐴕𐴞𐴘𐴝𐴘𐴁𐴞 𐴕𐴞𐴘𐴡𐴔𐴠 𐴎𐴞𐴕𐴊𐴞𐴒𐴞 𐴈𐴝𐴍𐴝𐴙𐴌 𐴁𐴡𐴓𐴞 𐴁𐴝𐴥𐴉𐴠.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴊𐴟𐴕𐴞𐴘𐴝𐴙𐴃𐴢 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴓𐴠𐴥 𐴘𐴡 𐴃𐴡 𐴀𐴝𐴣𐴀𐴌𐴝 𐴒𐴡𐴌𐴞𐴥 𐴊𐴠 𐴓𐴝𐴌𐴝𐴥𐴘 𐴊𐴟𐴕𐴞𐴘𐴝𐴘𐴁𐴞 𐴕𐴞𐴘𐴡𐴔𐴠 𐴕𐴡.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴓𐴝𐴌𐴝𐴥𐴙𐴌 𐴀𐴝𐴥𐴃𐴞𐴘𐴝𐴌 𐴃𐴡 𐴊𐴟𐴕𐴞𐴘𐴝𐴘𐴁𐴞 𐴒𐴟𐴥𐴕 𐴕𐴡, 𐴔𐴡𐴕𐴃𐴡𐴌 𐴀𐴟𐴀𐴙𐴕 𐴎𐴞𐴀𐴕𐴡𐴃𐴢 𐴑𐴞𐴓𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴥𐴚𐴒𐴞𐴉𐴠𐴓𐴝𐴘 𐴁𐴡𐴓𐴧𐴝 𐴀𐴞𐴓𐴧𐴝𐴘𐴞 𐴑𐴟𐴊𐴟𐴌𐴟𐴃𐴢 𐴀𐴝𐴏𐴠𐴤.⁵𐴀𐴝𐴣𐴀𐴌𐴝 𐴊𐴠𐴔𐴝𐴙𐴑𐴧𐴝 𐴁𐴟𐴎𐴝𐴥𐴌𐴠 𐴀𐴠𐴊𐴧𐴠 𐴇𐴝𐴥𐴀𐴌 𐴀𐴟𐴣𐴏𐴡𐴓𐴢 𐴅𐴞𐴕𐴞𐴥𐴐𐴢 𐴎𐴞𐴀𐴕𐴠 𐴀𐴝𐴓𐴧𐴝𐴌𐴠 𐴏𐴞𐴕𐴝𐴥𐴃𐴢 𐴀𐴡𐴣𐴏𐴝𐴥 𐴀𐴞𐴥𐴏𐴝𐴉𐴠 𐴃𐴞𐴥𐴘𐴝 𐴇𐴞𐴥𐴀𐴕𐴡𐴌𐴠 𐴁𐴝𐴥𐴚𐴒𐴞𐴉𐴠𐴓𐴝𐴘, 𐴀𐴝𐴦𐴌 𐴇𐴝𐴥𐴀𐴌 𐴑𐴞𐴥𐴘𐴝𐴓𐴡𐴌𐴠 𐴑𐴡𐴁𐴎𐴝 𐴒𐴡𐴌𐴞𐴥𐴉𐴠𐴓𐴝𐴘 𐴔𐴡𐴀𐴏𐴞𐴤𐴌 𐴉𐴡𐴥𐴌𐴔𐴝𐴊𐴝𐴌 𐴁𐴝𐴕𐴝𐴘.⁶𐴀𐴝𐴦𐴌 𐴀𐴝𐴣𐴀𐴌𐴝, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴉𐴟𐴌𐴝𐴉𐴟𐴌𐴞 𐴉𐴡𐴥𐴌𐴔𐴝𐴊𐴝𐴌 𐴀𐴡𐴥𐴘𐴎𐴝𐴘𐴁𐴝𐴒𐴡𐴘, 𐴇𐴠𐴥𐴣𐴃𐴧𐴠 𐴇𐴝𐴥𐴀𐴌 𐴕𐴝𐴉𐴡𐴥𐴌𐴔𐴝𐴕𐴞𐴌 𐴏𐴝𐴥𐴣𐴎𐴝 𐴊𐴞𐴥 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴏𐴞𐴤.

⁷𐴃𐴟𐴣𐴀𐴝𐴥𐴌𐴝 𐴃𐴡 𐴁𐴝𐴀𐴌𐴡𐴌 𐴏𐴟𐴥𐴌𐴡𐴃𐴢 𐴀𐴠𐴥𐴕𐴝 𐴏𐴡𐴀𐴌. 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴕𐴞𐴎𐴡𐴌 𐴖𐴡𐴌𐴠 𐴀𐴠𐴕𐴊𐴞𐴓𐴧𐴝 𐴁𐴡𐴥𐴌𐴝𐴐𐴝 𐴀𐴝𐴏𐴠𐴤 𐴊𐴠 𐴑𐴞 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤𐴌, 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴀𐴝𐴁𐴝𐴌 𐴁𐴝𐴥𐴉𐴞𐴏𐴡𐴑 𐴊𐴠 𐴑𐴞, 𐴘𐴡𐴥𐴒𐴧𐴗𐴝 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴌, 𐴇𐴠𐴥𐴕𐴊𐴞𐴓𐴧𐴝 𐴀𐴝𐴣𐴀𐴌𐴝 𐴘𐴡𐴥 𐴃𐴡 𐴔𐴡𐴀𐴏𐴞𐴤𐴌.⁸𐴎𐴡𐴊𐴞 𐴀𐴝𐴀𐴛 𐴀𐴝𐴣𐴀𐴌𐴝𐴌 𐴀𐴝𐴊𐴞𐴥𐴑𐴝𐴌𐴞𐴌 𐴁𐴝𐴦𐴁𐴟𐴃𐴠 𐴀𐴝𐴌𐴡𐴤 𐴑𐴠𐴏𐴧𐴟𐴥 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴘𐴡, 𐴃𐴡𐴀 𐴀𐴝𐴀𐴛 𐴐𐴡𐴥𐴌𐴔𐴞𐴕𐴊𐴝 𐴕𐴡 𐴀𐴡𐴥𐴘𐴧𐴟𐴔—𐴎𐴠 𐴀𐴝𐴊𐴞𐴥𐴑𐴝𐴌 𐴔𐴝𐴓𐴞𐴑𐴠 𐴊𐴞𐴦𐴘𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴕𐴝𐴘𐴃𐴟𐴓𐴞𐴤 𐴁𐴡𐴓𐴧𐴝, 𐴕𐴝𐴐𐴢 𐴒𐴡𐴌𐴞𐴥𐴉𐴠𐴓𐴝𐴘 𐴁𐴡𐴓𐴧𐴝 𐴕𐴡.⁹𐴇𐴞𐴥𐴘𐴝𐴕 𐴀𐴝𐴀𐴛 𐴀𐴠𐴃𐴡𐴓𐴧𐴝𐴤 𐴈𐴡𐴀𐴙𐴌, 𐴎𐴠𐴀𐴕𐴠 𐴀𐴝𐴀𐴛 𐴐𐴠𐴣𐴍𐴞𐴥 𐴓𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴋𐴡𐴦𐴌 𐴓𐴝𐴒𐴝𐴙𐴌 𐴉𐴝𐴥𐴕 𐴕𐴡.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, ”𐴀𐴞𐴥𐴁𐴝𐴌 𐴐𐴠𐴣𐴍𐴞𐴥 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴝𐴄𐴡𐴑 𐴀𐴠𐴊𐴧𐴠 𐴁𐴞𐴐𐴞𐴤 𐴈𐴡𐴌𐴝, 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴕𐴞𐴎𐴠 𐴇𐴝𐴥𐴎𐴞𐴌 𐴃𐴝𐴥𐴑𐴠, 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝 𐴑𐴡𐴔𐴎𐴟𐴌 𐴀𐴝𐴦𐴌 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴒𐴝𐴥𐴘𐴧𐴡𐴃𐴢 𐴕𐴡 𐴒𐴡𐴥𐴓𐴠.“¹¹𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴠 𐴘𐴝𐴀𐴕 𐴁𐴟𐴎𐴞𐴥 𐴓𐴡𐴑 𐴊𐴠 𐴑𐴞, 𐴒𐴝𐴙𐴌𐴇𐴝𐴥𐴎𐴞𐴌𐴞𐴃𐴢 𐴐𐴠𐴣𐴍𐴞𐴥 𐴀𐴡𐴥𐴑𐴧𐴡𐴓𐴡𐴌 𐴏𐴝𐴥𐴀𐴣𐴃𐴠 𐴀𐴝𐴣𐴀𐴌𐴝𐴌 𐴈𐴡𐴃𐴝𐴤 𐴎𐴠𐴕𐴊𐴞𐴓𐴧𐴝, 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴎𐴞𐴌𐴞𐴃𐴢 𐴀𐴡𐴥 𐴒𐴡𐴙𐴅𐴧𐴟𐴥𐴔.

¹²𐴀𐴝𐴣𐴀𐴌𐴝 𐴃𐴡 𐴀𐴟𐴘𐴃𐴝𐴌𐴝𐴤 𐴓𐴧𐴡𐴥𐴘 𐴁𐴝𐴌𐴞𐴥𐴑 𐴑𐴟𐴥𐴖𐴝𐴓𐴝𐴘𐴃𐴡 𐴘𐴝𐴥 𐴕𐴞𐴎𐴡𐴌𐴠𐴥 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴉𐴟𐴥𐴖𐴝𐴕 𐴒𐴡𐴙𐴃𐴧𐴡𐴥 𐴕𐴡 𐴏𐴝𐴀𐴘𐴢 𐴎𐴠𐴃𐴝𐴌𐴝𐴤 𐴕𐴞𐴎𐴡𐴌 𐴕𐴝𐴔 𐴕𐴞𐴎𐴠 𐴒𐴡𐴌𐴠𐴥. 𐴀𐴞𐴥𐴃𐴝𐴌𐴝 𐴕𐴞𐴎𐴠 𐴕𐴞𐴎𐴡𐴌𐴠𐴥 𐴔𐴝𐴉𐴠 𐴊𐴠 𐴀𐴠𐴊𐴧𐴠 𐴕𐴞𐴎𐴠 𐴕𐴞𐴎𐴡𐴌 𐴓𐴧𐴡𐴘 𐴉𐴟𐴥𐴖𐴝𐴕 𐴒𐴡𐴌𐴠𐴥 𐴊𐴠 𐴇𐴞𐴥𐴘𐴝𐴕𐴠 𐴊𐴝𐴈𐴝𐴤 𐴊𐴠 𐴀𐴞𐴥𐴃𐴝𐴌𐴝 𐴑𐴠𐴀𐴕 𐴀𐴡𐴁𐴟𐴎𐴢.¹³𐴀𐴝𐴣𐴀𐴌𐴝 𐴕𐴞𐴘𐴡𐴔𐴡𐴌 𐴁𐴝𐴀𐴌𐴠 𐴁𐴡𐴌𐴝𐴥𐴘 𐴕𐴡 𐴒𐴡𐴙𐴅𐴧𐴟𐴥𐴔, 𐴁𐴡𐴥𐴓𐴑𐴠 𐴀𐴡 𐴐𐴞𐴥𐴔𐴝𐴌 𐴇𐴠𐴥𐴊𐴧𐴟𐴌 𐴒𐴡𐴙𐴅𐴧𐴟𐴥𐴔 𐴎𐴞𐴘𐴝𐴥𐴕 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴓𐴧𐴝 𐴁𐴟𐴖𐴝𐴥𐴘𐴧𐴠, 𐴇𐴠𐴥 𐴐𐴞𐴥𐴔𐴝𐴌 𐴁𐴟𐴥𐴃𐴡𐴌𐴠 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴒𐴡𐴥𐴓𐴝𐴘𐴧𐴝 𐴀𐴝𐴏𐴡𐴤.¹⁴𐴀𐴝𐴣𐴀𐴌𐴝 𐴃𐴡 𐴕𐴞𐴘𐴡𐴔𐴡𐴌 𐴁𐴝𐴀𐴌𐴠 𐴁𐴡𐴌𐴝𐴥𐴘 𐴒𐴡𐴌𐴞𐴥𐴌 𐴊𐴠 𐴕𐴡, 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴕𐴟 𐴀𐴝𐴘𐴃𐴝𐴤𐴔 𐴁𐴡𐴥𐴓𐴞 𐴀𐴡𐴥𐴘𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤𐴌 𐴑𐴟𐴥𐴐𐴈𐴡𐴥𐴁𐴡𐴌 𐴓𐴡𐴘 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴉𐴡𐴙𐴅𐴧𐴡𐴕𐴃𐴡 𐴀𐴝𐴒𐴠 𐴀𐴝𐴣𐴀𐴌𐴝 𐴀𐴠𐴥𐴕𐴝 𐴀𐴝𐴙𐴐𐴧𐴞𐴤.¹⁵𐴀𐴝𐴣𐴀𐴌𐴝 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴔𐴠𐴀𐴕𐴧𐴡𐴃𐴢 𐴓𐴡𐴥𐴘 𐴘𐴡𐴥 𐴁𐴡𐴌𐴝𐴥𐴘 𐴕𐴡 𐴒𐴡𐴌𐴞𐴥, 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴓𐴧𐴠𐴥 𐴃𐴡 𐴐𐴞𐴥𐴔𐴝𐴌 𐴁𐴝𐴀𐴌𐴠 𐴀𐴡𐴥𐴘𐴎𐴝𐴘𐴁𐴡𐴘. 𐴓𐴠𐴑𐴞𐴕 𐴀𐴝𐴣𐴀𐴌𐴝 𐴀𐴝𐴐𐴝𐴤 𐴒𐴡𐴌𐴞𐴥𐴌 𐴊𐴠, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴁𐴝𐴌𐴠𐴥𐴌, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌𐴝𐴌 𐴈𐴝𐴔𐴡𐴌 𐴎𐴝𐴒𐴝 𐴘𐴡𐴥 𐴋𐴡𐴣𐴀𐴌 𐴀𐴡𐴥𐴘𐴎𐴝𐴘𐴁𐴡𐴘;¹⁶𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴁𐴝𐴦𐴊𐴠 𐴀𐴝𐴏𐴠𐴤 𐴊𐴠 𐴀𐴠𐴓𐴝𐴑𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴡𐴥 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴉𐴝𐴌𐴞, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴃𐴧𐴟 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴐𐴞𐴥𐴔𐴝𐴌 𐴁𐴟𐴥𐴃𐴡𐴌𐴠 𐴒𐴡𐴙𐴅𐴧𐴝𐴥 𐴈𐴝𐴔 𐴓𐴡𐴘 𐴁𐴡𐴌𐴝𐴥𐴘 𐴒𐴡𐴙𐴃𐴧𐴡𐴥 𐴔𐴡𐴕 𐴕𐴝𐴥𐴘.¹⁷𐴔𐴡𐴕𐴃𐴡𐴌, ”𐴎𐴠𐴦𐴕𐴞𐴑𐴞 𐴁𐴡𐴌𐴝𐴥𐴘 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴔𐴝𐴁𐴟𐴊𐴡𐴌𐴠 𐴓𐴡𐴥𐴘 𐴁𐴠 𐴁𐴡𐴌𐴝𐴥𐴘 𐴒𐴡𐴌𐴡𐴥𐴗𐴑.“ ¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴞𐴎𐴡𐴌 𐴕𐴝𐴔 𐴕𐴞𐴎𐴠 𐴒𐴡𐴙𐴓𐴧𐴠𐴥 𐴃𐴡 𐴏𐴡𐴥𐴘𐴧𐴞 𐴁𐴡𐴥𐴓𐴞 𐴏𐴝𐴥𐴁𐴟𐴃𐴢 𐴀𐴡𐴥𐴘𐴎𐴝𐴒𐴡𐴘 𐴊𐴠 𐴕𐴡, 𐴁𐴡𐴥𐴓𐴑𐴠 𐴔𐴝𐴁𐴟𐴊𐴠 𐴕𐴝𐴔 𐴒𐴡𐴙𐴓𐴧𐴠𐴥 𐴀𐴠𐴥𐴕𐴝 𐴀𐴡𐴥.

The Word for the World International

https://app.library.bible/content/87faca8b51c22590