Read 2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 12

2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢12

𐴂𐴝𐴥𐴀𐴟𐴓𐴡𐴌 𐴊𐴡𐴌𐴐𐴡𐴥𐴕 𐴀𐴠𐴊𐴧𐴠 𐴎𐴝𐴇𐴠𐴥𐴌𐴞

¹𐴀𐴝𐴣𐴀𐴃𐴧𐴟 𐴁𐴡𐴌𐴝𐴥𐴘 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴉𐴝𐴥𐴘𐴊𐴝 𐴕𐴡 𐴃𐴝𐴥𐴑𐴞𐴓𐴠 𐴘𐴡. 𐴔𐴡𐴕𐴃𐴡𐴌 𐴘𐴝𐴓𐴝 𐴀𐴝𐴀𐴛 𐴔𐴝𐴓𐴞𐴑𐴡𐴌 𐴊𐴞𐴦𐴘𐴝 𐴊𐴡𐴌𐴐𐴡𐴥𐴕 𐴀𐴠𐴊𐴧𐴠 𐴎𐴝𐴇𐴠𐴥𐴌𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴟𐴥𐴔.²𐴀𐴝𐴀𐴛 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴏𐴞𐴕𐴞𐴥 𐴊𐴠 𐴀𐴝𐴏𐴠𐴤, 𐴎𐴞𐴁𐴝𐴤𐴌𐴠 𐴘𐴝𐴦𐴌 𐴏𐴡𐴙𐴊𐴧𐴡𐴥 𐴁𐴡𐴏𐴡𐴥𐴌 𐴀𐴝𐴒𐴠 𐴃𐴞𐴏𐴝𐴥𐴌𐴝 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴝𐴤 𐴒𐴞𐴥𐴀𐴓𐴢. 𐴇𐴞𐴥𐴘𐴝𐴕 𐴅𐴞𐴏𐴞𐴥𐴔𐴡𐴌 𐴏𐴝𐴥𐴀𐴣𐴃𐴠 𐴀𐴡𐴥𐴘𐴧𐴠 𐴕𐴠 𐴘𐴝𐴥 𐴅𐴞𐴏𐴞𐴥𐴔 𐴏𐴝𐴥𐴌𐴝 𐴀𐴡𐴥𐴘𐴧𐴠 𐴀𐴝𐴀𐴛 𐴕𐴡 𐴎𐴝𐴕𐴞, 𐴀𐴝𐴓𐴧𐴝𐴘𐴠 𐴁𐴠 𐴎𐴝𐴕𐴠.³𐴀𐴝𐴀𐴛 𐴎𐴝𐴕𐴞 𐴊𐴠, 𐴇𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴌𐴠—𐴇𐴞𐴥𐴘𐴝𐴕 𐴅𐴞𐴏𐴞𐴥𐴔𐴡𐴌 𐴏𐴝𐴥𐴀𐴣𐴃𐴠 𐴀𐴡𐴥𐴘𐴧𐴠 𐴕𐴠𐴥 𐴘𐴝𐴥 𐴅𐴞𐴏𐴞𐴥𐴔 𐴏𐴝𐴥𐴌𐴝 𐴀𐴡𐴥𐴘𐴧𐴠 𐴀𐴝𐴀𐴛 𐴕𐴡 𐴎𐴝𐴕𐴞, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴎𐴝𐴕𐴠—⁴𐴅𐴡𐴕𐴧𐴡𐴃𐴟𐴓𐴢-𐴉𐴠𐴥𐴌𐴡𐴊𐴟𐴏𐴡𐴃𐴢 𐴃𐴟𐴓𐴝𐴤 𐴒𐴞𐴥𐴀𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴉𐴝𐴌𐴝 𐴕𐴡 𐴎𐴝 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴉𐴟𐴥𐴙𐴕𐴧𐴞𐴓𐴢, 𐴎𐴞𐴀𐴕 𐴇𐴡𐴕𐴡𐴤 𐴔𐴝𐴙𐴕𐴐𐴡𐴥𐴃𐴧𐴟 𐴁𐴡𐴘𐴧𐴝𐴕 𐴒𐴡𐴙𐴃𐴧𐴡𐴥 𐴀𐴠𐴎𐴝𐴎𐴡𐴃𐴢 𐴕𐴝𐴥𐴘.⁵𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌𐴠 𐴓𐴡𐴥𐴘 𐴀𐴝𐴀𐴛 𐴁𐴡𐴌𐴝𐴥𐴘 𐴒𐴡𐴙𐴅𐴧𐴟𐴥𐴔, 𐴔𐴡𐴕𐴃𐴡𐴌 𐴕𐴞𐴎𐴡𐴌𐴠𐴥 𐴓𐴡𐴥𐴘 𐴕𐴡. 𐴀𐴝𐴀𐴛 𐴁𐴡𐴌𐴝𐴥𐴘 𐴒𐴡𐴙𐴅𐴧𐴟𐴥𐴔 𐴊𐴠 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴑𐴡𐴔𐴎𐴟𐴌𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠.⁶𐴎𐴡𐴊𐴞 𐴀𐴝𐴣𐴀𐴃𐴧𐴟 𐴁𐴡𐴌𐴝𐴥𐴘 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴀 𐴘𐴡 𐴀𐴝𐴀𐴛 𐴁𐴠𐴑𐴟𐴉𐴢 𐴕𐴡 𐴀𐴡𐴥𐴘𐴧𐴟𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴏𐴡𐴥𐴘𐴧𐴞 𐴒𐴝𐴥𐴕 𐴁𐴠 𐴈𐴡𐴘𐴧𐴟𐴥𐴔. 𐴔𐴡𐴕𐴃𐴡𐴌 𐴃𐴡𐴀 𐴀𐴝𐴀𐴛 𐴇𐴞𐴥𐴘𐴝𐴕 𐴕𐴡 𐴒𐴡𐴙𐴅𐴧𐴟𐴥𐴔, 𐴎𐴠𐴀𐴕𐴠 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌𐴠𐴥 𐴀𐴝𐴣𐴀𐴃𐴧𐴟 𐴎𐴞𐴀𐴕 𐴊𐴠𐴙𐴑𐴧𐴠𐴥 𐴘𐴝𐴥 𐴉𐴟𐴥𐴙𐴕𐴧𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴁𐴡𐴥𐴓𐴞 𐴕𐴡 𐴄𐴝𐴥𐴀𐴌𐴠.⁷𐴇𐴠𐴥 𐴎𐴝𐴇𐴠𐴥𐴌𐴞 𐴇𐴞𐴥𐴀𐴕𐴡𐴌 𐴀𐴡𐴃𐴞 𐴋𐴡𐴣𐴀𐴌𐴒𐴞𐴌𐴞 𐴓𐴡𐴥𐴘 𐴀𐴝𐴀𐴛 𐴁𐴝𐴌𐴞𐴥𐴑 𐴕𐴡 𐴑𐴟𐴥𐴖𐴝𐴓𐴝𐴘 𐴉𐴝𐴥𐴕 𐴀𐴝𐴣𐴀𐴌 𐴒𐴝𐴦𐴃𐴢 𐴀𐴠𐴒𐴧𐴗𐴝𐴤 𐴑𐴠𐴣𐴍𐴝 𐴒𐴡𐴥𐴓𐴝𐴘 𐴊𐴞𐴥𐴘𐴝 𐴒𐴞𐴥𐴘𐴠; 𐴘𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌𐴠𐴥 𐴊𐴟𐴑 𐴊𐴞 𐴁𐴡𐴓𐴧𐴝 𐴐𐴡𐴥𐴘𐴃𐴝𐴕𐴡𐴌 𐴀𐴠𐴒𐴧𐴗𐴝𐴤 𐴀𐴟𐴏𐴞𐴥𐴓𐴝, 𐴎𐴠𐴀𐴕𐴠 𐴀𐴝𐴣𐴀𐴌𐴠𐴥 𐴀𐴝𐴀𐴛 𐴁𐴝𐴌𐴞𐴥𐴑 𐴕𐴡 𐴑𐴟𐴥𐴖𐴝𐴓𐴝𐴘.⁸𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴃𐴞𐴕 𐴁𐴝𐴌 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴞𐴥𐴓𐴝𐴔, 𐴎𐴠𐴀𐴕𐴠 𐴇𐴠𐴥 𐴑𐴠𐴣𐴍𐴝 𐴖𐴝 𐴀𐴝𐴣𐴀𐴃𐴧𐴟 𐴊𐴟𐴌 𐴀𐴡𐴥𐴘𐴎𐴝𐴒𐴡𐴘.⁹𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥 𐴊𐴠, ”𐴀𐴝𐴣𐴀𐴌 𐴌𐴝𐴇𐴝𐴥𐴔𐴡𐴃𐴢 𐴃𐴡𐴌 𐴓𐴧𐴝 𐴑𐴝𐴉𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴑𐴟𐴊𐴟𐴌𐴟𐴃𐴡𐴌 𐴔𐴡𐴑𐴏𐴡𐴥𐴃𐴢 𐴑𐴡𐴔𐴎𐴟𐴌𐴞𐴃𐴢 𐴔𐴝𐴎𐴠𐴥 𐴉𐴟𐴌𐴝𐴉𐴟𐴌𐴞 𐴉𐴟𐴌𐴝 𐴀𐴡𐴥𐴘𐴎𐴝𐴒𐴡𐴘.“𐴇𐴞𐴥𐴘𐴝𐴕𐴡𐴓𐴧𐴝 𐴀𐴝𐴀𐴛 𐴁𐴞𐴐𐴞𐴤 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴝𐴣𐴀𐴌 𐴑𐴡𐴔𐴎𐴟𐴌𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴁𐴡𐴌𐴝𐴥𐴘 𐴒𐴡𐴙𐴅𐴧𐴟𐴥𐴔, 𐴎𐴠𐴀𐴕𐴠 𐴔𐴡𐴀𐴏𐴞𐴤𐴌 𐴑𐴟𐴊𐴟𐴌𐴟𐴃𐴢 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴃𐴝𐴥𐴑𐴠.¹⁰𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴀𐴛 𐴔𐴡𐴀𐴏𐴞𐴤𐴌 𐴖𐴝𐴏𐴃𐴠𐴥 𐴑𐴡𐴔𐴎𐴟𐴌𐴞𐴃𐴢, 𐴁𐴠𐴀𐴞𐴎𐴧𐴡𐴃𐴞𐴃𐴢, 𐴉𐴠𐴌𐴠𐴐𐴝𐴕𐴞𐴃𐴢, 𐴎𐴟𐴓𐴟𐴥𐴔 𐴀𐴡𐴃𐴢, 𐴀𐴠𐴊𐴧𐴠 𐴔𐴡𐴐𐴑𐴞𐴓𐴢 𐴀𐴡𐴥𐴑𐴧𐴡𐴓𐴡𐴃𐴢 𐴔𐴝𐴥𐴎𐴠 𐴑𐴟𐴥𐴐𐴞. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴀𐴝𐴀𐴛 𐴑𐴡𐴔𐴎𐴟𐴌 𐴀𐴡𐴥𐴘, 𐴇𐴠𐴥𐴣𐴃𐴧𐴠 𐴀𐴝𐴀𐴛 𐴔𐴡𐴎𐴁𐴟𐴃𐴢 𐴀𐴡𐴥𐴘𐴎𐴝𐴘𐴒𐴡𐴘.

𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴡𐴓𐴧𐴝 𐴂𐴝𐴥𐴀𐴟𐴓𐴡𐴌 𐴏𐴞𐴕𐴃𐴝𐴁𐴝𐴥𐴉𐴝𐴕𐴝

¹¹𐴀𐴝𐴀𐴛 𐴁𐴠𐴑𐴟𐴉𐴢 𐴀𐴡𐴥𐴘𐴒𐴞𐴘𐴞𐴒𐴡𐴘 𐴊𐴠 𐴀𐴡𐴥𐴘, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴀𐴠𐴥𐴕𐴝 𐴀𐴝𐴣𐴀𐴌𐴠𐴥 𐴔𐴡𐴅𐴁𐴟𐴌 𐴒𐴡𐴙𐴅𐴧𐴡𐴥. 𐴀𐴝𐴏𐴡𐴥𐴓𐴠 𐴃𐴟𐴣𐴀𐴝𐴥𐴌𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴣𐴀𐴃𐴧𐴟 𐴕𐴝𐴔 𐴉𐴡𐴦𐴕 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴑𐴠𐴏𐴧𐴟𐴥 𐴕𐴡 𐴊𐴠 𐴀𐴡𐴥𐴘𐴓𐴠 𐴘𐴡 𐴃𐴡 ”𐴁𐴝𐴌𐴞𐴥𐴑 𐴏𐴝𐴥𐴇𐴝𐴁𐴞“ 𐴈𐴡𐴖𐴝𐴤 𐴎𐴝 𐴊𐴠 𐴀𐴞𐴥𐴃𐴝𐴌𐴝𐴌 𐴃𐴟𐴥𐴖𐴝𐴌𐴡 𐴇𐴡𐴕𐴡𐴤 𐴔𐴞𐴑𐴧𐴝𐴥𐴃𐴧𐴟 𐴈𐴡𐴔 𐴕𐴡.¹²𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴡 𐴉𐴟𐴌𐴝𐴉𐴟𐴌𐴞 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕, 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝, 𐴀𐴠𐴊𐴧𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴏𐴡𐴥𐴘𐴧𐴞 𐴏𐴝𐴥𐴇𐴝𐴁𐴞𐴌 𐴉𐴡𐴌𐴞𐴏𐴡 𐴊𐴞𐴘𐴝 𐴒𐴞𐴘𐴠𐴥.¹³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴓𐴧𐴝 𐴉𐴟𐴣𐴎𐴝𐴤 𐴕𐴡𐴥 𐴀𐴡𐴥𐴘 𐴊𐴠 𐴇𐴞𐴥𐴘𐴝𐴕 𐴁𐴝𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴌 𐴇𐴡𐴕 𐴔𐴞𐴑𐴧𐴝𐴥𐴃𐴧𐴟 𐴀𐴡𐴙𐴕𐴧𐴡 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴈𐴡𐴔 𐴀𐴡𐴥𐴘𐴧𐴡 𐴊𐴠𐴥؟ 𐴀𐴝𐴣𐴀𐴌 𐴇𐴠𐴥 𐴒𐴡𐴓𐴧𐴡𐴃𐴢 𐴃𐴝𐴥𐴕 𐴔𐴝𐴉𐴢 𐴒𐴡𐴌𐴡𐴤!

¹⁴𐴀𐴝𐴀𐴛 𐴀𐴠 𐴃𐴞𐴏𐴝𐴥𐴌𐴝𐴁𐴝𐴌 𐴀𐴡𐴥 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴘 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴏𐴞𐴤, 𐴀𐴝𐴦𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴓𐴧𐴝 𐴉𐴟𐴣𐴎𐴝𐴤 𐴕𐴡 𐴀𐴡𐴥𐴘𐴧𐴟𐴔; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴏𐴝𐴀𐴙𐴌 𐴊𐴠 𐴕𐴡 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌𐴠 𐴏𐴝𐴀𐴙𐴌 𐴊𐴠. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴉𐴔𐴝𐴦 𐴓𐴧𐴝 𐴎𐴡𐴔𐴝 𐴒𐴡𐴌𐴞𐴥𐴁𐴝𐴌 𐴎𐴞𐴔𐴧𐴝 𐴉𐴟𐴀𐴝𐴙𐴕 𐴊𐴡𐴃𐴧𐴟 𐴕𐴝𐴥𐴘, 𐴔𐴡𐴕𐴃𐴡𐴌 𐴁𐴝𐴉𐴔𐴝𐴦𐴃𐴧𐴟 𐴉𐴟𐴀𐴝𐴙𐴕 𐴊𐴡𐴌 𐴓𐴧𐴝 𐴀𐴝𐴏𐴠𐴤.¹⁵𐴀𐴝𐴀𐴛 𐴁𐴞𐴐𐴞𐴤 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴡𐴥𐴌𐴡𐴏𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴟𐴔, 𐴁𐴡𐴥𐴓𐴑𐴠 𐴕𐴞𐴎𐴡𐴌𐴠𐴥 𐴀𐴟𐴥𐴊𐴧𐴗𐴝. 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴁𐴞𐴐𐴞𐴤 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥, 𐴃𐴟𐴣𐴀𐴝𐴥𐴌𐴝 𐴑𐴞𐴘𐴝𐴥 𐴀𐴝𐴣𐴀𐴌𐴠𐴥 𐴈𐴡𐴔 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤؟¹⁶𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴓𐴧𐴝 𐴉𐴟𐴣𐴎𐴝 𐴕𐴡𐴥 𐴀𐴡𐴥𐴘. 𐴔𐴡𐴕𐴃𐴡𐴌 𐴃𐴡𐴀 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, 𐴀𐴝𐴀𐴛 𐴁𐴡𐴥𐴓𐴠 𐴏𐴝𐴓𐴝𐴥𐴑𐴞 𐴒𐴡𐴥𐴌𐴞 𐴃𐴟𐴣𐴀𐴝𐴥𐴌𐴝𐴌𐴠 𐴉𐴝𐴥𐴕𐴡𐴃𐴢 𐴉𐴠𐴥𐴓𐴝𐴘𐴧𐴞.¹⁷𐴀𐴝𐴀𐴛 𐴑𐴞𐴥 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴧𐴞 𐴊𐴠 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴡𐴌 𐴊𐴟𐴖𐴝𐴌𐴝 𐴃𐴟𐴣𐴀𐴝𐴥𐴌𐴝𐴃𐴧𐴟 𐴉𐴝𐴥𐴘𐴊𐴝 𐴃𐴟𐴙𐴓𐴧𐴞𐴥 𐴊𐴠 𐴕𐴠𐴥؟¹⁸𐴀𐴝𐴀𐴛 𐴃𐴞𐴃𐴟𐴏𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴎𐴝𐴘 𐴁𐴡𐴓𐴧𐴝 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴝𐴔, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴉𐴟𐴥𐴖𐴝𐴣𐴃𐴞 𐴁𐴝𐴥𐴘 𐴖𐴝𐴌𐴠 𐴘𐴡𐴥 𐴊𐴞𐴉𐴠𐴍𐴝𐴥𐴘𐴓𐴝𐴔. 𐴃𐴞𐴃𐴟𐴏𐴠 𐴑𐴞𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴉𐴝𐴥𐴘𐴊𐴝 𐴃𐴟𐴙𐴓𐴧𐴠𐴥 𐴊𐴠 𐴕𐴠𐴥؟ 𐴀𐴝𐴣𐴀𐴌𐴝 𐴊𐴟𐴕𐴞𐴥 𐴎𐴡𐴕 𐴑𐴞𐴥 𐴀𐴠𐴑𐴞𐴤 𐴌𐴟𐴀𐴘𐴠 𐴀𐴠𐴊𐴧𐴠 𐴀𐴠𐴑𐴞𐴤 𐴌𐴝𐴏𐴃𐴝𐴃𐴢 𐴕𐴡 𐴏𐴡𐴓𐴞 𐴕𐴠𐴥؟

¹⁹𐴃𐴟𐴣𐴀𐴝𐴥𐴌𐴝 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴒𐴡𐴔 𐴑𐴟𐴥𐴖𐴝𐴓𐴝𐴙𐴌 𐴁𐴡𐴥𐴓𐴞 𐴄𐴝𐴥𐴀𐴌𐴡𐴌 𐴕𐴞𐴥𐴑𐴞؟ 𐴀𐴝𐴣𐴀𐴌𐴝 𐴎𐴞𐴀𐴕 𐴈𐴡𐴀𐴙𐴌 𐴇𐴞𐴥𐴀𐴕 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌𐴠 𐴔𐴟𐴀𐴕𐴃𐴟 𐴒𐴡𐴌𐴞𐴥 𐴈𐴡𐴀𐴙𐴌 𐴊𐴠. 𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥𐴙𐴓𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴕𐴝𐴘𐴃𐴟𐴓𐴞𐴤 𐴁𐴡𐴓𐴧𐴝.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴋𐴡𐴦𐴌𐴝𐴙𐴌 𐴊𐴠, 𐴀𐴝𐴀𐴛 𐴀𐴝𐴘𐴓𐴠𐴤 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠𐴕𐴊𐴞𐴓𐴧𐴝 𐴏𐴝𐴘𐴃𐴡𐴥 𐴏𐴝𐴀𐴙𐴌 𐴇𐴠𐴥𐴕𐴊𐴞𐴓𐴧𐴝 𐴓𐴡𐴦𐴃𐴢 𐴕𐴡 𐴉𐴝𐴘𐴧𐴟𐴔 𐴁𐴡𐴥𐴓𐴞, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴝𐴣𐴀𐴌𐴠𐴥 𐴎𐴠𐴕𐴊𐴞𐴓𐴧𐴝 𐴏𐴝𐴘𐴃𐴡𐴥 𐴏𐴡𐴀𐴌 𐴇𐴠𐴥𐴕𐴊𐴞𐴓𐴧𐴝 𐴓𐴡𐴦𐴃𐴢 𐴕𐴡 𐴉𐴝𐴘𐴁𐴝. 𐴀𐴝𐴀𐴛 𐴇𐴠𐴥𐴍𐴠 𐴀𐴞𐴀𐴕 𐴓𐴡𐴦𐴃𐴢 𐴉𐴝𐴘𐴧𐴟𐴔 𐴁𐴡𐴓𐴞 𐴋𐴡𐴦𐴌𐴝𐴙𐴌: 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢, 𐴀𐴝𐴓𐴞𐴚𐴝𐴛, 𐴌𐴝𐴑𐴝𐴌𐴝𐴑𐴞, 𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴃𐴟𐴖𐴝, 𐴁𐴡𐴊𐴕𐴝𐴔𐴞, 𐴒𐴞𐴉𐴡𐴃𐴢, 𐴃𐴟𐴑𐴝𐴁𐴧𐴡𐴌𐴞, 𐴀𐴠𐴊𐴧𐴠 𐴒𐴟𐴓𐴔𐴝𐴓𐴢 𐴀𐴡𐴥𐴑𐴧𐴡𐴓𐴢.²¹𐴀𐴝𐴀𐴛 𐴀𐴝𐴌𐴡𐴤 𐴋𐴡𐴦𐴌𐴝𐴙𐴌 𐴊𐴠 𐴑𐴞, 𐴀𐴝𐴀𐴛 𐴀𐴝𐴁𐴝𐴌 𐴀𐴝𐴘𐴓𐴠𐴤 𐴀𐴝𐴣𐴀𐴌 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴌𐴝𐴌 𐴔𐴟𐴀𐴕𐴃𐴟 𐴐𐴡𐴥𐴌𐴔𐴞𐴕𐴊𐴝 𐴀𐴡𐴥𐴖𐴝 𐴁𐴝𐴘𐴁𐴡𐴥, 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕 𐴀𐴟𐴘𐴃𐴝𐴌𐴝𐴤 𐴓𐴧𐴝 𐴀𐴝𐴉𐴏𐴟𐴥𐴏𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥 𐴎𐴠𐴃𐴝𐴌𐴝𐴤 𐴘𐴝𐴦𐴌 𐴀𐴝𐴒𐴠 𐴒𐴟𐴕𐴝𐴤 𐴒𐴡𐴙𐴅𐴧𐴞𐴥𐴓𐴢 𐴀𐴝𐴦𐴌 𐴕𐴞𐴎𐴠 𐴒𐴡𐴙𐴃𐴧𐴡𐴥 𐴊𐴠 𐴕𐴝𐴉𐴝𐴑𐴞, 𐴎𐴠𐴕𐴝𐴤𐴑𐴝𐴌𐴞, 𐴀𐴠𐴊𐴧𐴠 𐴁𐴡𐴊𐴔𐴝𐴐𐴞𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴝.

The Word for the World International

https://app.library.bible/content/87faca8b51c22590