Read 2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 9

2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢9

𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴏𐴡𐴥𐴃𐴑𐴝

¹𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴏𐴡𐴓𐴠𐴌 𐴊𐴠 𐴇𐴠𐴥 𐴇𐴠𐴥𐴊𐴔𐴡𐴃𐴊𐴝𐴌𐴞𐴌 𐴁𐴝𐴦𐴁𐴟𐴃𐴠 𐴃𐴡 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴑𐴞𐴥𐴁𐴝𐴌 𐴎𐴡𐴌𐴟𐴌 𐴕𐴝𐴥𐴘.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴎𐴝𐴕𐴞, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴊𐴡𐴃𐴢 𐴒𐴡𐴌𐴞𐴥𐴁𐴝𐴌 𐴔𐴡𐴕 𐴀𐴝𐴏𐴠𐴤, 𐴎𐴞𐴘𐴝𐴥𐴕𐴡𐴌𐴠 𐴓𐴡𐴥𐴘 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴁𐴝𐴦𐴁𐴟𐴃𐴠 𐴔𐴝𐴑𐴠𐴊𐴡𐴥𐴕𐴞𐴀𐴡𐴓𐴡𐴌 𐴇𐴝𐴣𐴏𐴠 𐴀𐴠𐴀𐴕 𐴈𐴡𐴀𐴘𐴢 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴊𐴠 𐴑𐴞, 𐴀𐴝𐴑𐴝𐴘𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴊𐴞𐴦 𐴁𐴡𐴓𐴧𐴝 𐴒𐴠𐴓𐴢 𐴊𐴠 𐴁𐴡𐴏𐴡𐴥𐴌 𐴓𐴡𐴥𐴃𐴞 𐴃𐴡𐴘𐴧𐴝𐴌 𐴀𐴡𐴥𐴘 𐴃𐴝𐴥𐴙𐴑𐴧𐴠, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴅𐴡𐴏𐴁𐴝𐴘𐴠 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴎𐴡𐴕𐴡𐴌𐴠 𐴅𐴡𐴏𐴁𐴝 𐴊𐴞𐴘𐴠𐴥.³𐴓𐴠𐴑𐴞𐴕 𐴀𐴝𐴀𐴛 𐴇𐴠𐴥 𐴁𐴝𐴥𐴘𐴧𐴝𐴙𐴕 𐴕𐴟𐴥𐴕𐴡𐴌𐴠 𐴀𐴠𐴃𐴡𐴓𐴧𐴝𐴤 𐴊𐴞𐴉𐴠𐴍𐴝𐴥𐴙𐴌, 𐴎𐴠𐴀𐴕𐴠 𐴇𐴞𐴥𐴘𐴝𐴕𐴡𐴌 𐴔𐴟𐴃𐴝𐴓𐴠𐴑 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴓𐴡𐴥𐴘 𐴒𐴡𐴌𐴞𐴥 𐴊𐴠 𐴁𐴡𐴌𐴝𐴥𐴘 𐴔𐴞𐴏𐴝𐴥 𐴕𐴡 𐴄𐴡𐴥𐴀𐴌𐴠, 𐴁𐴡𐴥𐴓𐴑𐴠 𐴀𐴝𐴀𐴛 𐴈𐴡𐴘𐴧𐴞𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴃𐴡𐴘𐴧𐴝𐴌 𐴀𐴡𐴥𐴘 𐴃𐴝𐴥𐴑𐴡.⁴𐴀𐴝𐴌𐴕𐴡𐴥𐴘𐴓𐴠 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴔𐴝𐴑𐴠𐴊𐴡𐴥𐴕𐴞𐴘𐴝𐴌 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴀𐴝𐴀𐴘𐴢 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌𐴠 𐴃𐴡𐴘𐴧𐴝𐴌 𐴓𐴡𐴦𐴃𐴢 𐴕𐴡 𐴉𐴝𐴦, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴀𐴠𐴌𐴡, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴇𐴠𐴥𐴊𐴧𐴟𐴌 𐴁𐴡𐴥𐴌𐴝𐴐𐴝 𐴒𐴡𐴌𐴡𐴤𐴕𐴠 𐴀𐴝𐴣𐴀𐴌𐴝 𐴀𐴟𐴥𐴊𐴧𐴗𐴝 𐴐𐴡𐴥𐴌𐴡𐴔 𐴉𐴝𐴘𐴧𐴟𐴔.⁵𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴁𐴝𐴥𐴙𐴂𐴧𐴞 𐴊𐴠, 𐴇𐴠𐴥 𐴁𐴝𐴥𐴘𐴧𐴝𐴙𐴕 𐴕𐴟𐴥𐴕𐴡𐴌𐴠 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴎𐴝𐴘𐴃𐴡 𐴀𐴝𐴌𐴡𐴏𐴢 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴎𐴠𐴀𐴕𐴠 𐴘𐴝𐴦𐴌 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝 𐴎𐴠 𐴀𐴝𐴘𐴁𐴡𐴌𐴈𐴡𐴃𐴞 𐴇𐴝𐴥𐴊𐴞𐴘𐴝 𐴊𐴞𐴦𐴁𐴝𐴌 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴝, 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝 𐴀𐴝𐴒𐴠 𐴓𐴡𐴥𐴃𐴞 𐴀𐴠𐴕𐴃𐴠𐴎𐴝𐴔 𐴒𐴡𐴌𐴞𐴥 𐴌𐴝𐴑𐴠𐴥. 𐴃𐴡𐴥𐴘 𐴇𐴞𐴥𐴘𐴝𐴕𐴠 𐴊𐴝𐴈𐴝𐴤𐴘𐴁𐴡 𐴊𐴠 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴁𐴡𐴓𐴝𐴎𐴟𐴌𐴞 𐴕𐴡 𐴁𐴡𐴥𐴓𐴑𐴠 𐴔𐴡𐴕𐴠𐴈𐴡𐴀𐴘𐴢 𐴊𐴞𐴦𐴘𐴡𐴥 𐴊𐴠.

⁶𐴈𐴡𐴃𐴝𐴤 𐴀𐴡𐴥𐴙𐴓𐴊𐴠, 𐴎𐴠𐴦𐴕𐴞𐴑𐴞 𐴈𐴡𐴔 𐴓𐴝𐴒𐴝, 𐴀𐴞𐴥𐴃𐴠 𐴈𐴡𐴔 𐴊𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴁𐴞𐴐𐴞𐴤 𐴓𐴝𐴒𐴝, 𐴀𐴞𐴥𐴃𐴠 𐴁𐴞𐴐𐴞𐴤 𐴊𐴝𐴘𐴁𐴡.⁷𐴉𐴡𐴃𐴧𐴞𐴥𐴑𐴞𐴘𐴠 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴡𐴥 𐴊𐴠 𐴔𐴡𐴎𐴞𐴕 𐴊𐴞𐴦𐴘𐴡, 𐴔𐴡𐴕 𐴁𐴡𐴥𐴌𐴒𐴡𐴌𐴞 𐴘𐴝𐴥 𐴁𐴡𐴓𐴝𐴎𐴟𐴌𐴞 𐴕𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴊𐴡𐴦𐴘𐴝𐴌𐴠 𐴀𐴠𐴥𐴕𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥.⁸𐴀𐴝𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴄𐴝𐴓𐴞𐴑𐴧𐴝 𐴌𐴝𐴇𐴝𐴥𐴔𐴡𐴃𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥𐴌 𐴑𐴝𐴦𐴁𐴠𐴓𐴢, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴝𐴥𐴔𐴞𐴐𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴑𐴝𐴉𐴞𐴥 𐴃𐴝𐴥𐴑𐴞𐴘𐴡𐴌𐴠, 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴒𐴡𐴔 𐴈𐴝𐴔𐴡𐴓𐴧𐴝 𐴘𐴡𐴥 𐴀𐴡𐴥𐴊𐴡𐴌𐴁𐴝𐴀𐴌𐴝 𐴃𐴝𐴥𐴑𐴠.⁹𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴀𐴞𐴥𐴁𐴝𐴘𐴠 𐴊𐴞𐴓𐴑𐴟𐴥𐴓𐴝 𐴒𐴡𐴥𐴌𐴞 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴝𐴕 𐴒𐴡𐴙𐴅𐴧𐴠𐴥,𐴀𐴞𐴥𐴁𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴎𐴝𐴌𐴞 𐴃𐴝𐴥𐴑𐴞𐴁𐴡.“

¹⁰𐴎𐴞𐴁𐴝𐴤𐴘𐴠 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌𐴠 𐴁𐴞𐴏𐴢 𐴔𐴞𐴓𐴝𐴘𐴊𐴠 𐴀𐴝𐴦𐴌 𐴇𐴝𐴥𐴘 𐴁𐴡𐴓𐴧𐴝 𐴌𐴟𐴄𐴞 𐴊𐴠𐴦, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴓𐴝𐴒𐴝𐴘 𐴁𐴡𐴓𐴧𐴝 𐴁𐴞𐴏𐴢 𐴔𐴞𐴓𐴝𐴘𐴊𐴞𐴁𐴡 𐴀𐴠𐴊𐴧𐴠 𐴇𐴞𐴥𐴀𐴕 𐴁𐴡𐴌𐴈𐴡𐴃𐴢 𐴒𐴡𐴌𐴞𐴥𐴁𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴉𐴡𐴥𐴏𐴡𐴓𐴢 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤𐴒𐴡𐴌𐴞 𐴊𐴞𐴥𐴁𐴡.¹¹𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴇𐴝𐴥𐴀𐴌 𐴔𐴞𐴑𐴧𐴝𐴥𐴃𐴧𐴟 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴁𐴝, 𐴎𐴠𐴀𐴕𐴠 𐴇𐴝𐴥𐴔𐴞𐴐𐴝 𐴊𐴞𐴓𐴑𐴟𐴥𐴓𐴝 𐴒𐴡𐴥𐴌𐴞 𐴏𐴡𐴥𐴃𐴑𐴝 𐴒𐴡𐴌𐴞𐴥 𐴉𐴝𐴌𐴡, 𐴎𐴞𐴀𐴕𐴡𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌𐴝𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌𐴞𐴘𐴝 𐴀𐴝𐴊𐴝𐴘 𐴀𐴡𐴥𐴌.¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴇𐴠𐴥𐴊𐴔𐴡𐴃𐴊𐴝𐴌𐴞𐴌 𐴈𐴝𐴔𐴠 𐴃𐴡 𐴏𐴞𐴌𐴞𐴥𐴉𐴢 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝𐴉𐴟𐴌𐴞 𐴉𐴟𐴌𐴝 𐴀𐴡𐴥𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴁𐴡𐴀𐴗𐴃𐴢 𐴎𐴡𐴕𐴡𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴀𐴡𐴥𐴊𐴡𐴌𐴁𐴝𐴀𐴌𐴝 𐴐𐴟𐴥𐴑𐴟𐴌𐴞𐴘𐴝 𐴘𐴡𐴥 𐴀𐴝𐴊𐴝𐴘 𐴀𐴡𐴥𐴌.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴇𐴠𐴥𐴊𐴔𐴡𐴃𐴊𐴝𐴌𐴞 𐴓𐴡𐴥𐴘 𐴎𐴞𐴘𐴝𐴥𐴕 𐴏𐴝𐴥𐴁𐴟𐴃𐴢 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕𐴡𐴌 𐴎𐴡𐴌𐴞𐴘𐴝 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴡𐴀𐴏𐴞𐴤𐴌 𐴑𐴟𐴥𐴐𐴈𐴡𐴥𐴁𐴡𐴌𐴡𐴌𐴠 𐴐𐴞𐴥𐴑𐴝𐴌 𐴒𐴡𐴌𐴞𐴥 𐴇𐴞𐴥𐴘𐴝𐴕𐴡𐴌 𐴉𐴡𐴥𐴌𐴔𐴝𐴊𐴝𐴌 𐴀𐴡𐴥𐴘𐴧𐴡, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴁𐴠𐴒𐴧𐴟𐴥𐴕𐴡𐴌𐴠 𐴊𐴞𐴓𐴑𐴟𐴥𐴓𐴝 𐴒𐴡𐴥𐴌𐴞 𐴏𐴡𐴥𐴃𐴑𐴝 𐴒𐴡𐴙𐴅𐴧𐴡𐴥.¹⁴𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴡𐴥𐴊𐴡𐴌𐴁𐴝𐴀𐴌𐴝 𐴌𐴝𐴇𐴝𐴥𐴔𐴡𐴃𐴢 𐴒𐴡𐴙𐴅𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴉𐴟𐴌𐴝𐴕𐴞𐴌 𐴏𐴝𐴥𐴀𐴣𐴃𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴊𐴟𐴖𐴝 𐴒𐴡𐴌𐴠𐴥.¹⁵𐴀𐴝𐴓𐴧𐴝𐴌 𐴐𐴟𐴥𐴑𐴟𐴌 𐴀𐴡𐴥𐴑, 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴉𐴝𐴌𐴝 𐴕𐴡 𐴎𐴝 𐴊𐴠 𐴇𐴝𐴥𐴊𐴞𐴘𐴝𐴓𐴧𐴝.

The Word for the World International

https://app.library.bible/content/87faca8b51c22590