Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 5

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢5

𐴎𐴠𐴕𐴝𐴤𐴑𐴝𐴌𐴞𐴌 𐴁𐴞𐴏𐴝𐴌

¹𐴉𐴟𐴥𐴕𐴝 𐴎𐴝𐴌 𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠𐴕𐴝𐴤𐴑𐴝𐴌𐴞 𐴏𐴡𐴓𐴠𐴌, 𐴀𐴠𐴕𐴊𐴞𐴓𐴧𐴝 𐴎𐴠𐴕𐴝𐴤𐴑𐴝𐴌𐴞 𐴎𐴞𐴀𐴕 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴟𐴥𐴊𐴧𐴗𐴝 𐴕𐴝𐴥𐴘, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴠𐴎𐴧𐴡𐴕𐴠 𐴕𐴞𐴎𐴡𐴌 𐴁𐴝𐴉𐴡𐴌 𐴁𐴡𐴖𐴢 𐴓𐴡𐴘 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴒𐴟𐴥𐴔 𐴎𐴝.²𐴇𐴞𐴥𐴘𐴝𐴕𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴝𐴉𐴏𐴟𐴥𐴏𐴢 𐴈𐴝𐴥𐴘𐴁𐴝 𐴃𐴡𐴥𐴑, 𐴁𐴡𐴥𐴓𐴑𐴠 𐴀𐴝𐴌𐴡𐴤 𐴉𐴡𐴇𐴡𐴥𐴌𐴝𐴘 𐴒𐴡𐴌𐴡𐴤. 𐴎𐴠𐴦𐴕𐴞𐴑𐴞 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴝𐴘 𐴊𐴡𐴕 𐴕𐴟 𐴀𐴝𐴐𐴧𐴞𐴥𐴓𐴢 𐴕𐴠𐴥؟³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴅𐴞𐴏𐴞𐴥𐴔𐴡𐴌 𐴏𐴝𐴥𐴀𐴣𐴃𐴠 𐴇𐴝𐴥𐴎𐴞𐴌 𐴕𐴡 𐴃𐴝𐴥𐴑𐴞𐴓𐴠 𐴘𐴡, 𐴌𐴟𐴀𐴌 𐴏𐴝𐴥𐴀𐴣𐴃𐴠 𐴇𐴝𐴥𐴎𐴞𐴌 𐴀𐴝𐴏𐴞𐴤; 𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌 𐴁𐴞𐴏𐴝𐴌 𐴀𐴝𐴀𐴛 𐴅𐴞𐴏𐴞𐴥𐴔𐴡𐴌 𐴏𐴝𐴥𐴀𐴣𐴃𐴠 𐴇𐴝𐴥𐴎𐴞𐴌 𐴀𐴝𐴏𐴞𐴤 𐴉𐴝𐴥𐴚𐴒𐴡𐴌𐴞 𐴀𐴝𐴒𐴠 𐴓𐴡𐴥𐴃𐴞 𐴒𐴡𐴌𐴞𐴥 𐴌𐴝𐴙𐴑𐴧𐴞𐴥.⁴𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔𐴠 𐴎𐴡𐴔𐴝 𐴀𐴡𐴥𐴘𐴁𐴝, 𐴀𐴝𐴦𐴌 𐴀𐴝𐴀𐴛 𐴌𐴟𐴀𐴌 𐴏𐴝𐴥𐴀𐴣𐴃𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴇𐴝𐴥𐴎𐴞𐴌 𐴀𐴡𐴥𐴘𐴧𐴟𐴔, 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴑𐴟𐴊𐴟𐴌𐴟𐴃𐴢 𐴀𐴡𐴥 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴁𐴡,⁵𐴇𐴠𐴥𐴣𐴃𐴧𐴠 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌𐴠 𐴐𐴡𐴥𐴘𐴃𐴝𐴕𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴡, 𐴎𐴠𐴀𐴕𐴠 𐴀𐴞𐴥𐴃𐴝𐴌 𐴅𐴞𐴏𐴞𐴥𐴔 𐴊𐴡𐴥𐴚𐴐𐴡 𐴀𐴡𐴥𐴘𐴎𐴝𐴒𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌 𐴌𐴟𐴀𐴘𐴠 𐴎𐴠𐴕 𐴔𐴝𐴓𐴞𐴑 𐴀𐴞𐴏𐴝𐴤 𐴀𐴝𐴘𐴁𐴡𐴤 𐴊𐴠 𐴇𐴠𐴥 𐴊𐴞𐴕 𐴕𐴠𐴅𐴝𐴃𐴢 𐴉𐴝.

⁶𐴃𐴟𐴣𐴀𐴝𐴥𐴌𐴝 𐴁𐴡𐴌𐴝𐴥𐴘 𐴒𐴡𐴌𐴡𐴤𐴌 𐴊𐴠 𐴇𐴞𐴥𐴘𐴝𐴕 𐴒𐴡𐴔 𐴕𐴡. 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴀𐴠𐴑𐴧𐴞𐴕𐴞𐴥 𐴒𐴡𐴥𐴌𐴞 𐴐𐴟𐴥𐴄𐴝𐴌𐴠 𐴈𐴝𐴛𐴡𐴌 𐴊𐴡𐴓𐴝 𐴒𐴟𐴣𐴍𐴝 𐴉𐴟𐴥𐴓𐴝𐴘𐴉𐴠𐴓𐴠 𐴊𐴠𐴥؟⁷𐴉𐴟𐴌𐴝𐴕𐴝 𐴐𐴟𐴥𐴄𐴝𐴌 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴕𐴡𐴘𐴝 𐴈𐴝𐴛 𐴀𐴡𐴥𐴘𐴎𐴡𐴒𐴡𐴘, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴝𐴏𐴡𐴥𐴓𐴠 𐴐𐴟𐴥𐴄𐴝𐴌 𐴏𐴝𐴥𐴌𐴝. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴀𐴝𐴣𐴀𐴌𐴝𐴌 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀𐴌𐴠 𐴀𐴝𐴣𐴀𐴌𐴝𐴓𐴧𐴝 𐴑𐴟𐴌𐴁𐴝𐴕𐴞 𐴒𐴡𐴌𐴝𐴥 𐴒𐴞𐴥𐴘𐴠.⁸𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴉𐴟𐴌𐴝𐴕𐴝 𐴐𐴟𐴥𐴄𐴝𐴌, 𐴘𐴝𐴥𐴕𐴞 𐴊𐴟𐴐𐴧𐴡𐴕𐴞𐴌 𐴀𐴠𐴊𐴧𐴠 𐴈𐴡𐴥𐴌𐴝𐴉𐴞𐴌 𐴐𐴟𐴥𐴄𐴝𐴌 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴡𐴌𐴠 𐴐𐴟𐴥𐴄𐴝𐴌 𐴏𐴝𐴥𐴌𐴝 𐴌𐴟𐴄𐴞 𐴓𐴡𐴘 𐴀𐴞𐴊𐴢 𐴒𐴡𐴌𐴞𐴥, 𐴘𐴝𐴥𐴕𐴞 𐴀𐴠𐴈𐴠𐴥𐴓𐴝𐴏𐴠 𐴀𐴠𐴊𐴧𐴠 𐴏𐴡𐴥𐴘𐴧𐴞𐴌 𐴏𐴝𐴥𐴀𐴣𐴃𐴠.

⁹𐴀𐴝𐴣𐴀𐴌 𐴐𐴠𐴣𐴍𐴞𐴥𐴃𐴢 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴙𐴑𐴧𐴞𐴥𐴓𐴝𐴔 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴎𐴠𐴕𐴝𐴤𐴑𐴟𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴃𐴝𐴦𐴓𐴟𐴑𐴝𐴃𐴢 𐴕𐴡 𐴌𐴝𐴙𐴑𐴧𐴡𐴥;¹⁰𐴀𐴝𐴀𐴛 𐴀𐴟𐴘𐴃𐴝𐴌𐴝𐴤 𐴓𐴧𐴡𐴥𐴘 𐴃𐴝𐴦𐴓𐴟𐴑𐴝𐴃𐴢 𐴕𐴡 𐴌𐴝𐴑𐴞𐴥𐴃𐴡 𐴈𐴡𐴘𐴃𐴡𐴤 𐴏𐴝𐴘𐴧𐴞𐴥 𐴊𐴠 𐴕𐴡 𐴎𐴠𐴃𐴝𐴌𐴝𐴤 𐴀𐴠 𐴊𐴟𐴕𐴞𐴘𐴝𐴙𐴌 𐴎𐴠𐴕𐴝𐴤𐴑𐴟𐴌 𐴀𐴡𐴥𐴑𐴧𐴡𐴓𐴢, 𐴓𐴝𐴓𐴡𐴥𐴏𐴁𐴡𐴕 𐴀𐴡𐴥𐴑𐴧𐴡𐴓𐴢, 𐴋𐴝𐴈𐴝𐴣𐴙𐴄𐴢 𐴀𐴡𐴥𐴑𐴧𐴡𐴓𐴢, 𐴘𐴝𐴥 𐴔𐴟𐴃𐴧𐴞-𐴉𐴟𐴣𐴎𐴡𐴘𐴝 𐴀𐴡𐴥𐴑𐴧𐴡𐴓𐴢; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴘𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠 𐴊𐴟𐴕𐴞𐴘𐴝𐴙𐴌 𐴁𐴝𐴀𐴌𐴠 𐴎𐴝𐴦𐴒𐴡𐴥𐴘 𐴉𐴡𐴌𐴞𐴁𐴡𐴥.¹¹𐴁𐴡𐴥𐴓𐴑𐴠 𐴇𐴝𐴥𐴓𐴠𐴑𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴙𐴑𐴧𐴞𐴥𐴓𐴝𐴔 𐴊𐴠, 𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴀𐴞𐴔𐴝𐴕𐴊𐴝𐴥𐴌 𐴑𐴟𐴥𐴖𐴝𐴓𐴝 𐴊𐴠 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴃𐴝𐴦𐴓𐴟𐴑𐴝𐴃𐴢 𐴕𐴡 𐴌𐴝𐴙𐴑𐴧𐴡𐴥 𐴎𐴠𐴦𐴕𐴞𐴑𐴞 𐴎𐴠𐴕𐴝𐴤𐴑𐴟𐴌, 𐴓𐴝𐴓𐴡𐴥𐴏𐴁𐴡𐴕, 𐴔𐴟𐴃𐴧𐴞-𐴉𐴟𐴣𐴎𐴡𐴘𐴝, 𐴁𐴡𐴊𐴕𐴝𐴔-𐴒𐴡𐴌𐴡𐴤𐴘𐴝, 𐴕𐴞𐴐𐴝𐴥𐴑𐴟𐴌, 𐴘𐴝𐴥 𐴄𐴞𐴛𐴝𐴔𐴝𐴌𐴟. 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴀𐴟𐴥𐴊𐴧𐴗𐴝 𐴕𐴝 𐴈𐴝𐴥𐴘𐴧𐴡.

¹²𐴀𐴝𐴣𐴀𐴌𐴠𐴥 𐴑𐴞𐴘𐴠𐴥 𐴉𐴝𐴘𐴧𐴠𐴥 𐴁𐴝𐴀𐴌𐴒𐴗𐴝 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴒𐴡𐴌𐴝𐴥𐴘𐴠؟ 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴃𐴡𐴌𐴞𐴑𐴝𐴌 𐴁𐴟𐴥𐴃𐴡𐴌𐴡𐴌 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴕𐴡 𐴒𐴡𐴌𐴡𐴤 𐴕𐴠𐴥؟¹³𐴔𐴡𐴕𐴃𐴡𐴌 𐴁𐴝𐴀𐴌𐴒𐴗𐴝 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴀𐴝𐴓𐴧𐴝𐴘𐴠 𐴒𐴡𐴌𐴞𐴥𐴁𐴡. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴇𐴠𐴥 𐴁𐴟𐴌𐴝 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴐𐴡𐴥𐴔𐴝𐴎𐴡𐴃𐴧𐴟 𐴕𐴠𐴦𐴓𐴝𐴘𐴊𐴡.“

The Word for the World International

https://app.library.bible/content/87faca8b51c22590