Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 4

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢4

𐴏𐴝𐴥𐴇𐴝𐴁𐴞 𐴒𐴟𐴥𐴕 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤𐴌 𐴈𐴝𐴥𐴀𐴊𐴠𐴔

¹𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴝𐴌𐴠 𐴔𐴡𐴀𐴏𐴞𐴤𐴌 𐴈𐴝𐴥𐴀𐴊𐴠𐴔 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴒𐴟𐴉𐴡𐴕 𐴏𐴡𐴥𐴘𐴧𐴞 𐴀𐴡𐴥𐴑𐴧𐴡𐴓𐴢 𐴎𐴝𐴕𐴝𐴘𐴊𐴞𐴁𐴝𐴌 𐴎𐴞𐴔𐴧𐴝𐴊𐴝𐴌 𐴁𐴡𐴓𐴞 𐴁𐴟𐴎𐴡𐴥𐴗𐴑.²𐴇𐴞𐴥𐴘𐴝𐴕𐴡𐴃𐴢 𐴎𐴡𐴌𐴟𐴌𐴞 𐴀𐴡𐴥𐴙𐴓𐴊𐴠, 𐴎𐴞𐴔𐴧𐴝𐴊𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴌𐴝𐴉𐴟𐴌𐴞 𐴁𐴞𐴐𐴧𐴝𐴥𐴐𐴊𐴝𐴌 𐴓𐴡𐴦𐴃𐴉𐴡𐴕.³𐴀𐴝𐴣𐴀𐴌 𐴁𐴞𐴏𐴝𐴌 𐴃𐴟𐴣𐴀𐴝𐴥𐴌𐴝 𐴒𐴡𐴌𐴡𐴤 𐴘𐴝𐴥 𐴊𐴟𐴕𐴞𐴘𐴝𐴘𐴁𐴞 𐴀𐴝𐴊𐴝𐴓𐴡𐴃𐴠 𐴒𐴡𐴌𐴠𐴥, 𐴇𐴞𐴥𐴘𐴝𐴕 𐴀𐴝𐴣𐴀𐴌 𐴓𐴧𐴝 𐴋𐴡𐴣𐴀𐴌 𐴈𐴡𐴃𐴝𐴤 𐴕𐴡; 𐴀𐴝𐴀𐴛 𐴃𐴡 𐴀𐴝𐴣𐴀𐴌 𐴕𐴞𐴎𐴡𐴌 𐴁𐴞𐴏𐴝𐴌 𐴀𐴟𐴥𐴊𐴧𐴗𐴝 𐴕𐴡 𐴒𐴡𐴌𐴞𐴥.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴣𐴀𐴌 𐴀𐴟𐴓𐴋𐴝 𐴑𐴠𐴏𐴧𐴟𐴥 𐴕𐴡 𐴎𐴝𐴕𐴞; 𐴔𐴡𐴕𐴃𐴡𐴌 𐴇𐴞𐴥𐴘𐴝𐴕𐴠 𐴇𐴡𐴥𐴕𐴡 𐴀𐴝𐴀𐴛 𐴁𐴠𐴈𐴡𐴏𐴟𐴥𐴌 𐴁𐴡𐴥𐴓𐴞 𐴏𐴝𐴥𐴁𐴟𐴃𐴢 𐴕𐴡 𐴒𐴡𐴌𐴠𐴥. 𐴀𐴝𐴣𐴀𐴌 𐴁𐴞𐴏𐴝𐴌 𐴒𐴡𐴌𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴔𐴝𐴓𐴞𐴑𐴠.⁵𐴇𐴠𐴥𐴃𐴡𐴓𐴧𐴝 𐴏𐴡𐴥𐴘𐴧𐴞 𐴀𐴡𐴑𐴃𐴡𐴥 𐴀𐴝𐴘𐴁𐴝𐴤𐴌 𐴀𐴝𐴒𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥𐴌 𐴁𐴞𐴏𐴝𐴌 𐴕𐴡 𐴒𐴡𐴙𐴅𐴧𐴡𐴥; 𐴔𐴝𐴓𐴞𐴑 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴃𐴝𐴥𐴙𐴑𐴧𐴡. 𐴀𐴞𐴥𐴁𐴝𐴘𐴠 𐴃𐴡 𐴎𐴞𐴀𐴕 𐴀𐴝𐴕𐴊𐴝𐴤𐴌𐴡𐴃𐴢 𐴓𐴟𐴑𐴝𐴘𐴧𐴝 𐴀𐴝𐴏𐴠𐴤 𐴇𐴞𐴥𐴀𐴕 𐴉𐴡𐴀𐴌𐴡𐴃𐴢 𐴀𐴝𐴕𐴞𐴤𐴁𐴡, 𐴀𐴝𐴦𐴌 𐴀𐴞𐴕𐴏𐴝𐴥𐴕𐴡𐴌 𐴊𐴞𐴓𐴡𐴌 𐴀𐴠𐴌𐴝𐴊𐴝 𐴀𐴡𐴥𐴑𐴧𐴡𐴓𐴢 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡. 𐴇𐴠𐴥𐴣𐴃𐴧𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴎𐴝𐴌-𐴎𐴝𐴌 𐴃𐴝𐴦𐴌𐴞𐴉𐴢 𐴃𐴠𐴦-𐴃𐴠𐴦 𐴉𐴝𐴘𐴁𐴡.

⁶𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴓𐴝𐴘 𐴓𐴧𐴝 𐴀𐴝𐴀𐴛 𐴀𐴝𐴣𐴀𐴌 𐴕𐴞𐴎𐴡𐴌 𐴀𐴠𐴊𐴧𐴠 𐴀𐴝𐴂𐴡𐴥𐴓𐴡𐴏𐴡𐴌 𐴔𐴠𐴀𐴏𐴝𐴓𐴢 𐴊𐴞𐴥 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴀𐴕 𐴈𐴡𐴘𐴧𐴞𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴃𐴧𐴟 𐴀𐴠 𐴈𐴡𐴃𐴝𐴤𐴌 𐴔𐴝𐴀𐴕𐴞 𐴐𐴞𐴥𐴑𐴡, 𐴑𐴞 𐴈𐴡𐴘𐴓𐴠𐴥, ”𐴎𐴞𐴀𐴕 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴇𐴞𐴥𐴀𐴕𐴡𐴌 𐴁𐴝𐴀𐴌𐴠 𐴕𐴡 𐴎𐴝𐴘𐴧𐴡.“ 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌𐴠 𐴓𐴡𐴥𐴘 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴀𐴟𐴓𐴋𐴝 𐴁𐴡𐴌𐴝𐴥𐴘𐴧𐴠 𐴉𐴟𐴥𐴓𐴞 𐴕𐴡 𐴀𐴟𐴍𐴞𐴤𐴁𐴝.⁷𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴇𐴡𐴕𐴠 𐴁𐴝𐴕𐴝𐴘𐴧𐴠𐴥؟ 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴕𐴡𐴥 𐴉𐴡𐴦 𐴊𐴠 𐴀𐴝𐴏𐴠𐴤؟ 𐴎𐴡𐴊𐴞 𐴉𐴝𐴘𐴧𐴡𐴥 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴘 𐴑𐴠𐴏𐴧𐴟𐴥 𐴕𐴡𐴥 𐴉𐴡𐴦 𐴉𐴝𐴥𐴚𐴒𐴡𐴌𐴞 𐴑𐴞𐴘𐴡𐴥𐴓𐴧𐴝 𐴁𐴡𐴌𐴝𐴥𐴘 𐴒𐴡𐴌𐴡𐴤؟

⁸𐴏𐴝𐴘𐴃𐴠𐴥 𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴒𐴠 𐴓𐴡𐴥𐴃𐴞 𐴁𐴠𐴒𐴧𐴟𐴥𐴕 𐴉𐴝𐴘𐴧𐴡𐴌𐴠 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴒𐴞𐴘𐴡𐴒𐴡𐴘; 𐴀𐴝𐴣𐴀𐴌𐴝 𐴏𐴝𐴥𐴌𐴝 𐴃𐴟𐴣𐴀𐴝𐴥𐴌𐴝 𐴁𐴝𐴀𐴣𐴐𐴧𐴝 𐴀𐴡𐴥𐴘𐴒𐴞𐴘𐴡𐴒𐴡𐴘 𐴉𐴝𐴥𐴕 𐴓𐴝𐴒𐴠𐴌. 𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝 𐴁𐴝𐴀𐴣𐴐𐴧𐴝 𐴀𐴡𐴥𐴘𐴃𐴝 𐴁𐴡𐴥𐴓𐴞 𐴒𐴡𐴔 𐴀𐴡𐴥𐴘𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥 𐴉𐴝𐴙𐴃𐴧𐴝𐴔.⁹𐴀𐴝𐴣𐴀𐴃𐴧𐴟 𐴓𐴝𐴒𐴠 𐴊𐴠, 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴁𐴠𐴒𐴧𐴟𐴥𐴕𐴡𐴌 𐴉𐴞𐴏𐴠𐴤 𐴔𐴝𐴕𐴟𐴥𐴙𐴐𐴢 𐴀𐴟𐴘𐴃𐴝𐴌𐴝𐴤𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴌𐴝𐴙𐴑𐴧𐴠𐴥 𐴎𐴠𐴃𐴝𐴌𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴘𐴒𐴞𐴘𐴡𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴊𐴟𐴕𐴞𐴘𐴝𐴙𐴌, 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴢 𐴀𐴡𐴌, 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴕𐴡𐴎𐴡𐴌𐴡𐴃𐴢 𐴀𐴠𐴑𐴧𐴝𐴥𐴕 𐴃𐴡𐴦𐴣𐴐𐴝𐴤 𐴁𐴡𐴕𐴞𐴒𐴞𐴘𐴞𐴥𐴒𐴡𐴘.¹⁰𐴀𐴝𐴣𐴀𐴌𐴝 𐴃𐴡 𐴔𐴡𐴀𐴏𐴞𐴤𐴌 𐴖𐴝𐴏𐴃𐴠𐴥 𐴁𐴠𐴑𐴟𐴉𐴢 𐴁𐴡𐴕𐴞𐴒𐴞𐴘𐴞𐴥𐴒𐴡𐴘, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘 𐴒𐴞𐴘𐴝𐴕𐴞 𐴀𐴡𐴥𐴘𐴒𐴞𐴘𐴡𐴒𐴡𐴘. 𐴀𐴝𐴣𐴀𐴌𐴝 𐴑𐴡𐴔𐴎𐴟𐴌, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴁𐴡𐴓𐴟𐴖𐴝𐴌. 𐴃𐴟𐴣𐴀𐴝𐴥𐴌𐴝𐴌 𐴁𐴡𐴀𐴗𐴃𐴢 𐴀𐴞𐴎𐴧𐴡𐴃𐴢 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴇𐴡𐴕𐴡𐴤 𐴀𐴞𐴎𐴧𐴡𐴃𐴢 𐴕𐴝𐴥𐴘.¹¹𐴀𐴝𐴣𐴀𐴌𐴝 𐴀𐴝𐴙𐴅𐴧𐴡𐴤 𐴀𐴟𐴥𐴊𐴧𐴗𐴝 𐴁𐴟𐴥𐴑𐴧𐴞 𐴀𐴠𐴊𐴧𐴠 𐴃𐴞𐴌𐴝𐴥𐴐𐴞. 𐴀𐴝𐴣𐴀𐴌𐴝𐴃𐴧𐴟 𐴇𐴡𐴦𐴌𐴏𐴟𐴖𐴡𐴌𐴡𐴌 𐴈𐴡𐴔𐴞 𐴀𐴝𐴏𐴠𐴤, 𐴀𐴝𐴣𐴀𐴌𐴝 𐴉𐴞𐴍𐴝 𐴇𐴝𐴥𐴘, 𐴀𐴝𐴣𐴀𐴌𐴝 𐴁𐴠𐴒𐴡𐴥𐴌,¹²𐴀𐴝𐴣𐴀𐴌𐴝 𐴕𐴞𐴎𐴡𐴌 𐴀𐴝𐴥𐴃𐴠 𐴔𐴠𐴀𐴕𐴧𐴡𐴃𐴢 𐴒𐴡𐴌𐴞𐴥. 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴓𐴧𐴠𐴥 𐴘𐴡 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞. 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴒𐴡𐴙𐴓𐴧𐴠𐴥 𐴘𐴡 𐴀𐴝𐴣𐴀𐴌𐴝 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥.¹³𐴎𐴠𐴣𐴃𐴧𐴠𐴥 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴝𐴌 𐴁𐴡𐴊𐴕𐴝𐴔 𐴒𐴡𐴌𐴠𐴥, 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌𐴠 𐴕𐴡𐴌𐴡𐴔𐴡𐴌 𐴏𐴝𐴥𐴀𐴣𐴃𐴠 𐴎𐴟𐴖𐴝𐴁𐴢 𐴊𐴞. 𐴀𐴝𐴣𐴀𐴌𐴝 𐴃𐴡 𐴊𐴟𐴕𐴞𐴘𐴝𐴙𐴌 𐴇𐴡𐴣𐴏𐴝𐴌𐴝 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴉𐴟𐴥𐴌𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴒𐴞𐴘𐴞𐴒𐴡𐴘, 𐴀𐴠𐴁𐴧𐴠 𐴀𐴝𐴙𐴅𐴧𐴡𐴤 𐴀𐴟𐴥𐴊𐴧𐴗𐴝 𐴇𐴠𐴥𐴕𐴊𐴞𐴓𐴧𐴝.

¹⁴𐴀𐴝𐴀𐴛 𐴀𐴞𐴀𐴕 𐴓𐴠𐴑𐴞𐴥𐴌 𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴐𐴡𐴥𐴌𐴡𐴔 𐴊𐴞𐴥 𐴁𐴡𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴉𐴟𐴀𐴝𐴙𐴕 𐴀𐴞𐴥𐴏𐴝𐴉𐴠 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝.¹⁵𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝𐴊𐴡𐴘𐴝 𐴀𐴝𐴥𐴎𐴝𐴌-𐴀𐴝𐴥𐴎𐴝𐴌 𐴃𐴝𐴥𐴑𐴞𐴓𐴠 𐴘𐴡, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴁𐴝𐴉𐴢 𐴁𐴞𐴐𐴞𐴤 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴡𐴤𐴕𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴏𐴞𐴌𐴞𐴥𐴉𐴢 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢.¹⁶𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴕𐴡𐴔𐴟𐴕𐴝 𐴔𐴡𐴎𐴞𐴕 𐴏𐴡𐴓𐴡.¹⁷𐴇𐴠𐴥 𐴕𐴞𐴘𐴡𐴃𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴞𐴔𐴡𐴥𐴃𐴞𐴌𐴠 𐴊𐴞𐴉𐴠𐴍𐴝𐴥𐴘𐴧𐴞, 𐴎𐴞𐴁𐴝𐴤 𐴔𐴝𐴓𐴞𐴑𐴡𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴀𐴠𐴊𐴧𐴠 𐴁𐴞𐴐𐴧𐴝𐴥𐴐𐴊𐴝𐴌 𐴉𐴟𐴖𐴝. 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌 𐴏𐴡𐴓𐴝𐴏𐴡𐴓𐴢 𐴇𐴡𐴕𐴊𐴞𐴓𐴧𐴝 𐴊𐴠 𐴀𐴝𐴦𐴌 𐴇𐴝𐴥𐴀𐴌 𐴎𐴝𐴒𐴝𐴌 𐴉𐴡𐴃𐴧𐴞𐴥 𐴎𐴡𐴔𐴝𐴥𐴃𐴡𐴃𐴢 𐴀𐴝𐴀𐴛 𐴇𐴡𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴀𐴡𐴥𐴑𐴧𐴡𐴓𐴢 𐴊𐴞 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴘𐴡𐴥𐴒𐴧𐴗𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴕𐴡𐴃𐴢 𐴒𐴡𐴌𐴞𐴥𐴊𐴞𐴁𐴡.

¹⁸𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴌 𐴕𐴟 𐴀𐴝𐴙𐴐𐴧𐴟𐴤𐴔 𐴁𐴡𐴥𐴓𐴞 𐴄𐴝𐴥𐴀𐴌𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴁𐴡𐴌𐴝𐴥𐴘𐴧𐴠 𐴉𐴟𐴥𐴓𐴞 𐴀𐴟𐴙𐴄𐴧𐴠𐴥.¹⁹𐴔𐴝𐴓𐴞𐴑𐴠 𐴏𐴝𐴘𐴓𐴠𐴥, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴇𐴝𐴥𐴌𐴝 𐴀𐴝𐴙𐴐𐴧𐴟𐴤𐴔, 𐴁𐴝𐴦𐴊𐴠 𐴀𐴝𐴀𐴛 𐴁𐴡𐴌𐴝𐴥𐴘𐴧𐴠 𐴉𐴟𐴥𐴓𐴞 𐴀𐴟𐴙𐴄𐴧𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴎𐴝𐴕𐴞𐴓𐴡𐴘𐴧𐴟𐴔 𐴊𐴠 𐴕𐴡 𐴏𐴞𐴌𐴞𐴥𐴉𐴢, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝𐴃𐴧𐴟 𐴑𐴞𐴦 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴀𐴡𐴥 𐴎𐴝𐴕𐴞𐴓𐴡𐴘𐴧𐴟𐴔.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴡 𐴈𐴡𐴃𐴝𐴤𐴁𐴝𐴃𐴧𐴝𐴌𐴝𐴌 𐴖𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴑𐴟𐴊𐴟𐴌𐴟𐴃𐴡𐴌 𐴖𐴡𐴌𐴠.²¹𐴃𐴟𐴣𐴀𐴝𐴥𐴌𐴝 𐴇𐴡𐴕 𐴕𐴝𐴥𐴕 𐴁𐴝𐴏𐴞𐴥𐴁𐴝؟ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴡𐴍𐴞𐴥 𐴓𐴡𐴥𐴘 𐴀𐴝𐴘𐴃𐴝𐴤𐴔 𐴕𐴠𐴥, 𐴕𐴝𐴥𐴑𐴞 𐴔𐴟𐴇𐴝𐴥𐴁𐴧𐴡𐴃𐴢 𐴀𐴠𐴊𐴧𐴠 𐴄𐴝𐴥𐴕𐴋𐴝 𐴔𐴠𐴎𐴝𐴏𐴡𐴌 𐴏𐴝𐴥𐴀𐴣𐴃𐴠 𐴀𐴝𐴘𐴃𐴝𐴤𐴔؟

The Word for the World International

https://app.library.bible/content/87faca8b51c22590