Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 3

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢3

𐴀𐴝𐴓𐴧𐴝𐴌 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴌𐴟𐴀𐴈𐴝𐴥𐴕𐴞 𐴀𐴡𐴓𐴝 𐴔𐴝𐴙𐴕𐴐𐴡𐴥𐴌𐴠 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴈𐴡𐴃𐴝𐴤 𐴈𐴡𐴖𐴝𐴤 𐴉𐴡𐴌𐴠, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴈𐴡𐴀𐴘𐴢 𐴕𐴡𐴥 𐴉𐴝𐴌𐴞, 𐴁𐴡𐴥𐴓𐴑𐴠 𐴀𐴟𐴘𐴃𐴝𐴌𐴝𐴤𐴌𐴠 𐴈𐴡𐴀 𐴉𐴝𐴥𐴚𐴒𐴡𐴌𐴞 𐴈𐴡𐴖𐴝𐴤 𐴉𐴡𐴙𐴅𐴧𐴠𐴥 𐴎𐴠𐴃𐴝𐴌𐴝𐴤 𐴀𐴝𐴙𐴅𐴧𐴡𐴤 𐴊𐴟𐴕𐴞𐴘𐴝𐴘𐴁𐴞, 𐴘𐴝𐴥𐴕𐴞 𐴎𐴠𐴃𐴝𐴌𐴝𐴤 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴝𐴙𐴅𐴧𐴡𐴤 𐴊𐴟𐴊𐴡𐴌 𐴉𐴟𐴀𐴝𐴙𐴕.²𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴊𐴟𐴊𐴢 𐴈𐴝𐴥𐴁𐴝𐴘𐴓𐴝𐴔, 𐴊𐴡𐴌𐴡𐴤 𐴈𐴝𐴥𐴕𐴝 𐴕𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕𐴡𐴌 𐴑𐴝𐴦𐴁𐴠𐴓𐴢 𐴕𐴟 𐴀𐴝𐴐𐴧𐴞𐴥𐴓𐴝. 𐴁𐴠𐴐𐴡𐴥𐴑 𐴀𐴝𐴙𐴅𐴧𐴡𐴤 𐴀𐴟𐴥𐴊𐴧𐴗𐴝 𐴕𐴡𐴥 𐴀𐴡𐴥𐴘𐴧𐴡,³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴙𐴅𐴧𐴡𐴤 𐴊𐴟𐴕𐴞𐴘𐴝𐴘𐴁𐴞. 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠𐴃𐴧𐴡𐴥𐴃𐴢 𐴇𐴝𐴥𐴏𐴡𐴌𐴡𐴃𐴢 𐴀𐴠𐴊𐴧𐴠 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴀𐴝𐴏𐴠𐴤, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴘𐴁𐴞 𐴊𐴠 𐴕𐴡 𐴕𐴠𐴥؟ 𐴃𐴟𐴣𐴀𐴝𐴥𐴌𐴝 𐴀𐴝𐴦𐴔 𐴔𐴝𐴙𐴕𐴐𐴡𐴥𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴏𐴡𐴓𐴡𐴀𐴌 𐴊𐴠 𐴕𐴡 𐴕𐴠𐴥؟⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴀𐴠𐴎𐴧𐴡𐴕𐴠 𐴀𐴠𐴀𐴕 𐴈𐴡𐴀, ”𐴀𐴝𐴀𐴛 𐴂𐴝𐴥𐴀𐴟𐴓𐴡𐴌 𐴀𐴟𐴔𐴧𐴡𐴃𐴢,“ 𐴀𐴝𐴌 𐴀𐴠𐴎𐴧𐴡𐴕𐴠, ”𐴀𐴝𐴀𐴛 𐴀𐴝𐴂𐴡𐴥𐴓𐴡𐴏𐴡𐴌 𐴀𐴟𐴔𐴧𐴡𐴃𐴢,“ 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴘𐴁𐴞 𐴔𐴝𐴕𐴟𐴥𐴙𐴐𐴢 𐴊𐴠 𐴕𐴡 𐴕𐴠𐴥؟

⁵𐴀𐴠𐴀𐴕𐴠, 𐴀𐴝𐴂𐴡𐴥𐴓𐴡𐴏𐴢 𐴇𐴡𐴕؟ 𐴀𐴝𐴦𐴌 𐴂𐴝𐴥𐴀𐴟𐴓𐴢 𐴇𐴡𐴕؟ 𐴊𐴟𐴕𐴞𐴥 𐴎𐴡𐴕 𐴃𐴡 𐴈𐴝𐴥𐴀𐴊𐴠𐴔 𐴀𐴠𐴥𐴕𐴝, 𐴎𐴠𐴃𐴝𐴌𐴝𐴤𐴌 𐴀𐴟𐴏𐴞𐴥𐴓𐴝𐴘𐴠 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤. 𐴔𐴝𐴓𐴞𐴑𐴠 𐴀𐴝𐴣𐴀𐴌𐴝𐴌𐴠 𐴎𐴝𐴌-𐴎𐴝𐴌 𐴎𐴞𐴔𐴧𐴝 𐴃𐴝𐴌𐴠𐴥-𐴃𐴝𐴌𐴠𐴥 𐴊𐴞𐴦𐴘𐴠𐴥.⁶𐴀𐴝𐴀𐴛 𐴁𐴞𐴏𐴢 𐴓𐴝𐴒𐴝𐴘𐴧𐴞𐴥, 𐴀𐴝𐴂𐴡𐴥𐴓𐴡𐴏𐴠 𐴉𐴝𐴕𐴞𐴥 𐴊𐴞𐴦𐴘𐴠𐴥, 𐴔𐴡𐴕𐴃𐴡𐴌 𐴁𐴝𐴌𐴝𐴤𐴘𐴧𐴠 𐴊𐴠 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝 𐴘𐴠.⁷𐴇𐴠𐴥 𐴀𐴞𐴥𐴏𐴝𐴉𐴠 𐴓𐴝𐴒𐴡𐴘𐴝 𐴘𐴡𐴥 𐴑𐴠𐴏𐴧𐴟𐴥 𐴕𐴡, 𐴉𐴝𐴕𐴞𐴥-𐴊𐴡𐴦𐴘𐴝 𐴘𐴡𐴥 𐴑𐴠𐴏𐴧𐴟𐴥 𐴕𐴡, 𐴔𐴡𐴕𐴃𐴡𐴌 𐴀𐴝𐴓𐴧𐴝 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴁𐴝𐴌𐴝𐴤𐴘𐴧𐴠 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥.⁸𐴓𐴝𐴒𐴡𐴘𐴧𐴝𐴌 𐴀𐴠𐴊𐴧𐴠 𐴉𐴝𐴕𐴞𐴥-𐴊𐴡𐴦𐴘𐴝𐴌 𐴔𐴡𐴑𐴏𐴡𐴥𐴃𐴢 𐴀𐴠𐴑 𐴋𐴡𐴙𐴓𐴧𐴝; 𐴔𐴡𐴕𐴃𐴡𐴌 𐴉𐴡𐴃𐴧𐴞𐴥𐴑𐴞𐴘𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴔𐴠𐴀𐴕𐴧𐴡𐴃𐴢 𐴔𐴡𐴎𐴞𐴕 𐴁𐴡𐴐𐴧𐴞𐴥𐴐𐴢 𐴉𐴝𐴘𐴁𐴡.⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴀𐴡𐴥𐴘𐴧𐴞 𐴊𐴠 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴈𐴝𐴔-𐴒𐴡𐴌𐴡𐴤𐴘𐴝; 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴝𐴓𐴧𐴝𐴌 𐴎𐴡𐴁𐴞𐴕، 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴁𐴝𐴕𐴝𐴘𐴧𐴝 𐴁𐴞𐴓𐴧𐴞𐴥𐴚.

¹⁰𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥 𐴊𐴠 𐴃𐴡𐴖𐴉𐴞𐴥𐴑 𐴔𐴡𐴎𐴞𐴕، 𐴀𐴠𐴎𐴧𐴡𐴕 𐴒𐴞𐴘𐴝𐴕𐴞 𐴔𐴞𐴏𐴃𐴞𐴥𐴌𐴞𐴌 𐴋𐴡𐴥𐴙𐴓𐴧𐴝 𐴀𐴝𐴀𐴛 𐴀𐴠𐴑𐴧𐴝𐴥𐴕 𐴁𐴟𐴕𐴞𐴘𐴝𐴊𐴞 𐴋𐴝𐴥𐴙𐴓𐴧𐴞, 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴠 𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴁𐴞𐴓𐴧𐴞𐴥𐴚 𐴃𐴟𐴓𐴠𐴥𐴌. 𐴔𐴡𐴕𐴃𐴡𐴌 𐴕𐴞𐴎𐴠 𐴇𐴡𐴕𐴊𐴞𐴓𐴧𐴝 𐴒𐴡𐴌𐴞 𐴁𐴝𐴕𐴝𐴘𐴃𐴟𐴓𐴠𐴥𐴌 𐴊𐴠 𐴇𐴞𐴥𐴘𐴝𐴕𐴡𐴃𐴢 𐴉𐴡𐴃𐴧𐴞𐴥 𐴀𐴠𐴑𐴎𐴡𐴕𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴀𐴡𐴥𐴖𐴝𐴌 𐴎𐴡𐴌𐴟𐴌.¹¹𐴎𐴠 𐴁𐴟𐴕𐴞𐴘𐴝𐴊𐴞 𐴀𐴝𐴒𐴠 𐴓𐴡𐴥𐴃𐴞 𐴋𐴝𐴥𐴓𐴝 𐴒𐴞𐴥𐴘𐴠, 𐴇𐴠𐴥 𐴁𐴟𐴕𐴞𐴘𐴝𐴊𐴞 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤. 𐴇𐴡𐴕𐴡𐴤𐴑𐴞𐴘𐴠 𐴃𐴡 𐴇𐴞𐴥𐴘𐴝𐴕 𐴁𐴝𐴊𐴠 𐴀𐴝𐴌𐴀𐴠𐴑𐴧𐴝𐴥𐴕 𐴁𐴟𐴕𐴞𐴘𐴝𐴊𐴞 𐴋𐴝𐴥𐴓𐴞 𐴕𐴡 𐴉𐴝𐴌𐴞𐴁𐴡𐴥.¹²𐴇𐴡𐴊𐴟𐴥𐴕𐴠 𐴐𐴟𐴥𐴕𐴝, 𐴌𐴟𐴉𐴝, 𐴊𐴝𐴔𐴞 𐴉𐴝𐴃𐴧𐴡𐴥𐴌, 𐴒𐴝𐴏𐴢, 𐴁𐴡𐴙𐴅𐴧𐴝𐴓𐴢 𐴘𐴝𐴥 𐴕𐴝𐴣𐴌𐴝𐴤 𐴓𐴡𐴥𐴘 𐴇𐴠𐴥 𐴁𐴟𐴕𐴞𐴘𐴝𐴊𐴞𐴌 𐴖𐴡𐴌𐴠 𐴒𐴡𐴥𐴌 𐴁𐴝𐴕𐴝𐴘𐴁𐴡𐴥 𐴊𐴠 𐴃𐴝𐴥𐴑𐴞𐴁𐴡,¹³𐴔𐴡𐴕𐴃𐴡𐴌 𐴉𐴡𐴃𐴧𐴞𐴥 𐴀𐴠𐴑𐴎𐴡𐴕𐴡𐴌 𐴈𐴝𐴔 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴊𐴝𐴈𐴝𐴤 𐴎𐴝𐴘𐴁𐴡 𐴊𐴠 𐴀𐴝𐴏𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴕 𐴀𐴝𐴘𐴓𐴠𐴤 𐴇𐴞𐴥𐴀𐴕 𐴎𐴝𐴇𐴠𐴥𐴌 𐴀𐴡𐴥𐴘𐴎𐴝𐴘𐴁𐴡𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴀𐴡𐴦𐴙𐴕 𐴓𐴡𐴘 𐴁𐴠 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴎𐴝𐴘𐴁𐴡, 𐴀𐴡𐴦𐴘𐴕𐴠 𐴇𐴝𐴌 𐴈𐴝𐴔 𐴇𐴡𐴕𐴊𐴞𐴓𐴧𐴝 𐴊𐴠 𐴏𐴝𐴥𐴁𐴟𐴃𐴢 𐴒𐴡𐴌𐴞𐴥𐴁𐴡.¹⁴𐴇𐴞𐴥𐴘𐴝𐴕𐴡𐴌 𐴖𐴡𐴌𐴠 𐴎𐴠𐴦 𐴎𐴞𐴘𐴝𐴥𐴕 𐴁𐴝𐴕𐴝𐴘𐴧𐴠𐴥 𐴇𐴞𐴥𐴘𐴝𐴕 𐴎𐴡𐴊𐴞 𐴕𐴡 𐴉𐴟𐴌𐴞 𐴄𐴞𐴑𐴞 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴁𐴝𐴕𐴡𐴘𐴝𐴘𐴠 𐴁𐴡𐴐𐴧𐴞𐴥𐴐𐴢 𐴉𐴝𐴘𐴁𐴡.¹⁵𐴔𐴡𐴕𐴃𐴡𐴌 𐴎𐴝𐴌 𐴒𐴝𐴥𐴕 𐴉𐴟𐴌𐴞𐴎𐴝𐴘𐴁𐴡𐴥𐴘, 𐴘𐴡𐴥𐴒𐴧𐴗𐴝𐴃𐴧𐴟 𐴒𐴟𐴕𐴝𐴤𐴌𐴞 𐴀𐴡𐴥𐴘𐴁𐴡. 𐴁𐴠𐴐𐴡𐴥𐴑 𐴘𐴡𐴥𐴒𐴧𐴗𐴝 𐴁𐴝𐴏𐴞𐴎𐴝𐴘𐴁𐴡𐴥𐴘, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴌 𐴇𐴝𐴥𐴓𐴡𐴃𐴢 𐴀𐴠𐴀𐴕 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴁𐴡, 𐴎𐴞𐴁𐴝𐴤𐴘𐴠 𐴀𐴡𐴦𐴙𐴕 𐴉𐴝𐴌𐴝𐴤𐴘 𐴀𐴝𐴙𐴐𐴧𐴠𐴥.

¹⁶𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴒𐴡𐴥𐴌 𐴊𐴠 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴟𐴀 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴠 𐴊𐴠𐴥؟¹⁷𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴝𐴓𐴧𐴝𐴌 𐴒𐴡𐴥𐴌𐴡𐴌𐴠 𐴁𐴡𐴌𐴁𐴝𐴊𐴢 𐴒𐴡𐴌𐴞𐴥𐴉𐴠𐴓𐴠, 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴁𐴡𐴌𐴁𐴝𐴊𐴢 𐴒𐴡𐴌𐴞𐴥𐴉𐴠𐴓𐴝𐴘𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴒𐴡𐴥𐴌 𐴃𐴡 𐴂𐴝𐴑, 𐴀𐴝𐴦𐴌 𐴇𐴠𐴥 𐴒𐴡𐴥𐴌 𐴀𐴡𐴥𐴘𐴓𐴝𐴊𐴠 𐴃𐴟𐴣𐴀𐴝𐴥𐴌𐴝.

¹⁸𐴕𐴞𐴎𐴡𐴌𐴠𐴥 𐴕𐴞𐴎𐴠 𐴉𐴝𐴥𐴑𐴞 𐴕𐴡 𐴊𐴞𐴘𐴡. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴠 𐴅𐴝𐴥𐴈𐴝𐴕𐴡𐴃𐴢 𐴒𐴞𐴘𐴝𐴕𐴞 𐴁𐴡𐴓𐴞 𐴄𐴝𐴥𐴀𐴌𐴠, 𐴘𐴡𐴥𐴒𐴧𐴗𐴝 𐴁𐴠𐴑𐴟𐴉𐴢 𐴁𐴡𐴕𐴡𐴗𐴑, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝 𐴏𐴡𐴥𐴘𐴧𐴞 𐴒𐴞𐴘𐴝𐴕𐴞 𐴀𐴡𐴥𐴘𐴎𐴝𐴒𐴡𐴘.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠 𐴊𐴟𐴕𐴞𐴘𐴝𐴙𐴌 𐴒𐴞𐴘𐴝𐴕-𐴁𐴟𐴊𐴧𐴞𐴥 𐴃𐴡 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴁𐴠𐴑𐴟𐴉𐴝𐴘𐴧𐴞. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴀𐴝𐴓𐴧𐴝𐴘𐴠 𐴒𐴞𐴘𐴝𐴕𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴏𐴝𐴓𐴝𐴥𐴑𐴞𐴌 𐴉𐴝𐴥𐴕𐴡𐴃𐴢 𐴉𐴠𐴥𐴓𐴝.“ ²⁰𐴀𐴠𐴕𐴊𐴞𐴓𐴧𐴝 𐴘𐴡𐴥 𐴀𐴝𐴏𐴠𐴤, ”𐴔𐴝𐴁𐴟𐴊𐴠 𐴒𐴞𐴘𐴝𐴕𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴥𐴉𐴝 𐴁𐴠𐴇𐴝𐴌 𐴊𐴠 𐴎𐴝𐴕𐴠.“ ²¹𐴇𐴠𐴥𐴃𐴡𐴓𐴧𐴝, 𐴈𐴡𐴘𐴃𐴡𐴤 𐴏𐴝𐴀𐴙𐴌 𐴊𐴠, 𐴇𐴡𐴕𐴡𐴤𐴑𐴞𐴘𐴠 𐴔𐴝𐴕𐴟𐴥𐴙𐴐𐴡𐴌𐴠 𐴓𐴡𐴥𐴘 𐴁𐴡𐴌𐴝𐴥𐴘 𐴕𐴡 𐴒𐴡𐴙𐴅𐴧𐴡𐴥. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴒𐴧𐴟𐴥𐴕 𐴃𐴡 𐴃𐴟𐴣𐴀𐴝𐴥𐴌𐴝𐴌:²²𐴂𐴝𐴥𐴀𐴟𐴓𐴢 𐴀𐴡𐴥𐴑, 𐴀𐴝𐴂𐴡𐴥𐴓𐴡𐴏𐴢 𐴀𐴡𐴥𐴑, 𐴑𐴠𐴥𐴉𐴝𐴏𐴢 𐴀𐴡𐴥𐴑, 𐴊𐴟𐴕𐴞𐴘𐴝𐴘 𐴀𐴡𐴥𐴑, 𐴎𐴞𐴕𐴊𐴞𐴒𐴞 𐴀𐴡𐴥𐴑, 𐴔𐴡𐴦𐴃𐴢 𐴀𐴡𐴥𐴑, 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴀𐴡𐴥𐴑 𐴘𐴝𐴥 𐴀𐴝𐴘𐴁𐴡𐴤 𐴊𐴠 𐴇𐴞𐴥𐴀𐴕, 𐴁𐴠𐴒𐴧𐴟𐴥𐴕 𐴃𐴟𐴣𐴀𐴝𐴥𐴌𐴝𐴌,²³𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴔𐴡𐴀𐴏𐴞𐴤𐴌, 𐴀𐴝𐴦𐴌 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌.

The Word for the World International

https://app.library.bible/content/87faca8b51c22590