Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 2

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢2

𐴔𐴡𐴀𐴏𐴞𐴤𐴌 𐴑𐴟𐴌𐴁𐴝𐴕𐴞𐴌 𐴁𐴝𐴦𐴁𐴟𐴃𐴠 𐴀𐴠𐴓𐴝𐴕

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴎𐴠𐴣𐴃𐴧𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴀𐴝𐴓𐴧𐴝𐴌 𐴒𐴟𐴉𐴡𐴕 𐴏𐴡𐴥𐴘𐴧𐴞𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴝𐴔, 𐴀𐴝𐴀𐴛 𐴃𐴡 𐴐𐴟𐴥𐴕𐴊𐴡𐴌-𐴐𐴟𐴥𐴕𐴊𐴡𐴌 𐴈𐴡𐴃𐴝𐴤 𐴘𐴝𐴥 𐴒𐴞𐴘𐴝𐴕𐴞 𐴈𐴡𐴃𐴝𐴤 𐴀𐴠𐴏𐴃𐴠𐴔𐴝𐴓𐴢 𐴕𐴡𐴥 𐴒𐴡𐴌𐴞𐴥.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴕𐴞𐴘𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴀𐴝𐴀𐴛 𐴏𐴞𐴌𐴞𐴥𐴉𐴢 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴀𐴓𐴢 𐴊𐴠 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡 𐴎𐴝𐴕𐴞 𐴁𐴡𐴓𐴧𐴝.³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴑𐴡𐴔𐴎𐴟𐴌 𐴀𐴝𐴐𐴧𐴞𐴥𐴓𐴝𐴔 𐴀𐴠𐴊𐴧𐴠 𐴋𐴡𐴦𐴌𐴠 𐴁𐴞𐴐𐴞𐴤 𐴇𐴝𐴉𐴞𐴃𐴝𐴥𐴔.⁴𐴀𐴝𐴣𐴀𐴌 𐴁𐴡𐴘𐴧𐴝𐴕 𐴀𐴠𐴊𐴧𐴠 𐴃𐴡𐴁𐴡𐴓𐴞𐴑 𐴔𐴝𐴙𐴕𐴐𐴡𐴥𐴌𐴠 𐴁𐴞𐴥𐴌𐴝 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴒𐴞𐴘𐴝𐴕𐴞 𐴈𐴡𐴃𐴝𐴤 𐴓𐴡𐴥𐴘 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴂𐴝𐴑-𐴌𐴟𐴀𐴌 𐴑𐴟𐴊𐴟𐴌𐴟𐴃𐴢 𐴊𐴝𐴈𐴝𐴤𐴘 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴊𐴠,⁵𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴀𐴞𐴕𐴏𐴝𐴥𐴕𐴡𐴌 𐴒𐴞𐴘𐴝𐴕𐴠 𐴕𐴡 𐴀𐴡𐴥𐴘 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴠 𐴄𐴞𐴑𐴞 𐴃𐴝𐴥𐴑𐴠.

𐴀𐴝𐴓𐴧𐴝𐴌 𐴒𐴞𐴘𐴝𐴕

⁶𐴒𐴞𐴘𐴝𐴕𐴞 𐴈𐴡𐴃𐴝𐴤 𐴃𐴡 𐴀𐴝𐴣𐴀𐴌𐴝 𐴀𐴟𐴘𐴃𐴝𐴌𐴝𐴤 𐴓𐴧𐴡𐴥𐴘 𐴈𐴡𐴀𐴘𐴢 𐴎𐴠𐴃𐴝𐴌𐴝𐴤 𐴀𐴞𐴔𐴝𐴕𐴡𐴃𐴢 𐴁𐴝𐴓𐴡𐴑 𐴀𐴡𐴥𐴘𐴧𐴠, 𐴔𐴡𐴕𐴃𐴡𐴌 𐴇𐴠𐴥 𐴒𐴞𐴘𐴝𐴕 𐴀𐴠 𐴅𐴝𐴥𐴈𐴝𐴕𐴡𐴌 𐴘𐴝𐴥 𐴀𐴠 𐴅𐴝𐴥𐴈𐴝𐴕𐴡𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌 𐴕𐴡, 𐴎𐴠𐴃𐴝𐴌𐴝𐴤 𐴁𐴡𐴌𐴁𐴝𐴊𐴢 𐴀𐴡𐴥𐴖𐴝𐴃𐴢 𐴀𐴝𐴏𐴠𐴤.⁷𐴇𐴝𐴥𐴓𐴠𐴑𐴠 𐴀𐴝𐴣𐴀𐴌𐴝 𐴎𐴞𐴀𐴕 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴒𐴟𐴉𐴡𐴕𐴞 𐴒𐴞𐴘𐴝𐴕𐴡𐴌 𐴁𐴝𐴦𐴁𐴟𐴃𐴠, 𐴘𐴝𐴥𐴕𐴞 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘 𐴉𐴡𐴘𐴊𐴝 𐴒𐴡𐴌𐴞𐴥𐴁𐴝𐴌 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴣𐴀𐴌𐴝𐴌 𐴔𐴡𐴈𐴞𐴥𐴔𐴝𐴓𐴧𐴝 𐴄𐴞𐴥𐴑 𐴒𐴡𐴌𐴞𐴥 𐴌𐴝𐴙𐴑𐴧𐴞𐴥𐴓𐴢 𐴊𐴠 𐴇𐴠𐴥 𐴓𐴟𐴑𐴝𐴘𐴧𐴝 𐴒𐴞𐴘𐴝𐴕𐴡𐴌 𐴁𐴝𐴦𐴁𐴟𐴃𐴠.⁸𐴇𐴠𐴥 𐴒𐴞𐴘𐴝𐴕𐴡𐴌𐴠 𐴀𐴠 𐴅𐴝𐴥𐴈𐴝𐴕𐴡𐴌 𐴇𐴡𐴕𐴡𐴤 𐴏𐴡𐴥𐴊𐴧𐴝𐴌𐴠 𐴕𐴡𐴥 𐴁𐴟𐴎𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴁𐴟𐴎𐴞𐴥𐴃𐴡 𐴃𐴡 𐴀𐴞𐴥𐴃𐴝𐴌𐴝 𐴔𐴡𐴈𐴞𐴥𐴔𐴝𐴌 𐴔𐴝𐴓𐴞𐴑𐴡𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞 𐴕𐴡 𐴉𐴠𐴓𐴝𐴘𐴃𐴡.⁹𐴔𐴡𐴕𐴃𐴡𐴌 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠,”𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥,𐴀𐴞𐴥𐴃𐴝𐴌𐴝𐴓𐴧𐴝 𐴀𐴞𐴥𐴁𐴝𐴘𐴠 𐴎𐴞𐴀𐴕 𐴃𐴡𐴘𐴧𐴝𐴌 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥,𐴇𐴞𐴥𐴀𐴕 𐴕𐴡 𐴇𐴡𐴕𐴡𐴤 𐴏𐴟𐴑𐴠𐴤 𐴊𐴠𐴙𐴑𐴧𐴠𐴥,𐴕𐴡 𐴇𐴡𐴕𐴡𐴤 𐴈𐴝𐴕𐴠 𐴉𐴟𐴥𐴙𐴕𐴧𐴠,𐴀𐴝𐴦𐴌 𐴕𐴡 𐴇𐴡𐴕𐴡𐴤 𐴀𐴞𐴕𐴏𐴝𐴥𐴕𐴡𐴌 𐴊𐴞𐴓𐴡𐴃𐴢 𐴀𐴝𐴙𐴐𐴧𐴠𐴥.“

¹⁰𐴀𐴝𐴓𐴧𐴝𐴘𐴠 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴇𐴞𐴥𐴀𐴕 𐴎𐴝𐴇𐴠𐴥𐴌 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴌𐴟𐴀𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴠𐴥, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴓𐴧𐴝𐴌 𐴀𐴠𐴁𐴧𐴠 𐴒𐴟𐴉𐴡𐴕𐴞 𐴒𐴟𐴥𐴕 𐴀𐴟𐴥𐴊𐴧𐴗𐴝.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴕𐴏𐴝𐴥𐴕𐴡𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴕 𐴀𐴝𐴏𐴠𐴤, 𐴎𐴠𐴦𐴕𐴞𐴑𐴞 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴠 𐴊𐴠؟ 𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴌𐴟𐴀𐴘𐴠 𐴀𐴠𐴥𐴕𐴝 𐴕𐴞𐴎𐴡𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴠. 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴀𐴝𐴓𐴧𐴝𐴌 𐴁𐴝𐴥𐴉𐴝𐴕𐴞𐴌𐴠 𐴘𐴡𐴥 𐴀𐴝𐴓𐴧𐴝𐴌 𐴌𐴟𐴀𐴘𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠.¹²𐴀𐴝𐴣𐴀𐴌𐴝 𐴃𐴡 𐴊𐴟𐴕𐴞𐴘𐴝𐴘𐴁𐴞 𐴌𐴟𐴀 𐴉𐴝𐴘𐴧𐴞𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝 𐴉𐴝𐴘𐴧𐴞𐴥 𐴊𐴠 𐴇𐴠𐴥 𐴌𐴟𐴀 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟, 𐴎𐴠𐴀𐴕𐴠 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌𐴠 𐴎𐴠 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴞𐴦𐴘𐴠𐴥 𐴇𐴞𐴥𐴀𐴕𐴡𐴌𐴠 𐴏𐴞𐴕𐴞𐴥 𐴉𐴝𐴌𐴞.¹³𐴀𐴝𐴣𐴀𐴌𐴝 𐴈𐴡𐴀𐴘𐴢 𐴊𐴠 𐴀𐴡𐴥𐴙𐴓𐴊𐴠 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠. 𐴇𐴞𐴥𐴀𐴕 𐴈𐴡𐴘𐴃𐴠𐴤 𐴀𐴝𐴣𐴀𐴌𐴝 𐴎𐴠 𐴓𐴡𐴉𐴎𐴡𐴥 𐴀𐴡𐴥𐴑𐴧𐴡𐴓𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥 𐴇𐴞𐴥𐴀𐴕 𐴀𐴞𐴕𐴏𐴝𐴥𐴕𐴡𐴌 𐴒𐴞𐴘𐴝𐴕𐴠 𐴊𐴞𐴘𐴝 𐴐𐴞𐴥𐴑𐴧𐴝𐴌 𐴕𐴡, 𐴁𐴡𐴥𐴓𐴑𐴠 𐴂𐴝𐴑-𐴌𐴟𐴀𐴌 𐴊𐴞𐴘𐴝 𐴐𐴞𐴥𐴑𐴧𐴝𐴌. 𐴀𐴝𐴣𐴀𐴌𐴝 𐴌𐴟𐴀𐴈𐴝𐴥𐴕𐴞𐴌 𐴇𐴝𐴥𐴑𐴞𐴒𐴡𐴃𐴢 𐴀𐴡𐴥𐴑𐴧𐴡𐴓𐴢 𐴁𐴟𐴎𐴝𐴥𐴘𐴃𐴠 𐴌𐴟𐴀𐴈𐴝𐴥𐴕𐴞𐴌 𐴓𐴡𐴉𐴎𐴡𐴥 𐴀𐴡𐴥𐴑𐴧𐴡𐴓𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥.

¹⁴𐴔𐴡𐴕𐴃𐴡𐴌 𐴎𐴝𐴃𐴧𐴟 𐴂𐴝𐴑-𐴌𐴟𐴀 𐴕𐴝𐴥𐴘, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴓𐴧𐴝𐴌 𐴌𐴟𐴀𐴌 𐴃𐴡𐴌𐴉𐴡𐴥𐴃𐴧𐴟 𐴎𐴞𐴀𐴕 𐴀𐴝𐴘𐴧𐴠𐴤 𐴇𐴞𐴥𐴀𐴕 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴘𐴡𐴥𐴒𐴧𐴗𐴝𐴌 𐴕𐴡𐴎𐴡𐴌𐴡𐴃𐴢 𐴁𐴠𐴑𐴟𐴙𐴂𐴧𐴝. 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴀𐴕𐴡𐴌𐴠 𐴁𐴟𐴎𐴞𐴥 𐴘𐴡𐴥 𐴕𐴡 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴡𐴌𐴠 𐴉𐴡𐴌𐴡𐴥𐴑 𐴒𐴡𐴌𐴞𐴥 𐴉𐴝𐴌𐴠 𐴊𐴠 𐴏𐴞𐴌𐴞𐴥𐴉𐴢 𐴇𐴠𐴥 𐴌𐴟𐴀𐴌 𐴊𐴟𐴖𐴝𐴌𐴝.¹⁵𐴎𐴝𐴃𐴧𐴟 𐴂𐴝𐴑-𐴌𐴟𐴀 𐴀𐴝𐴏𐴠𐴤 𐴘𐴡𐴥𐴒𐴧𐴗𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴉𐴡𐴌𐴡𐴥𐴑 𐴒𐴡𐴌𐴞𐴥 𐴏𐴝𐴀, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴌𐴠 𐴇𐴡𐴕𐴡𐴤𐴑𐴞𐴘𐴠 𐴉𐴡𐴌𐴡𐴥𐴑 𐴒𐴡𐴌𐴞𐴥 𐴕𐴡 𐴉𐴝𐴌𐴠,¹⁶𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴔𐴝𐴁𐴟𐴊𐴡𐴌 𐴊𐴠𐴔𐴝𐴑𐴡𐴌𐴠 𐴇𐴡𐴕𐴠 𐴎𐴝𐴙𐴕𐴧𐴠𐴥,𐴎𐴠𐴀𐴕 𐴕𐴞𐴥𐴑𐴞 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴁𐴟𐴊𐴧𐴞𐴥 𐴊𐴞𐴥 𐴉𐴝𐴙𐴃𐴧𐴡؟“ 𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴃𐴧𐴟 𐴃𐴡 𐴔𐴡𐴀𐴏𐴞𐴤𐴌 𐴊𐴠𐴔𐴝𐴑 𐴀𐴝𐴏𐴠𐴤.

The Word for the World International

https://app.library.bible/content/87faca8b51c22590