Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 1

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢1

𐴏𐴡𐴥𐴓𐴝𐴔

¹𐴀𐴝𐴀𐴛 𐴂𐴝𐴥𐴀𐴟𐴓𐴢, 𐴎𐴞𐴁𐴝𐴤𐴌𐴠 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴠𐴥𐴒𐴧𐴗𐴝 𐴏𐴝𐴥𐴇𐴝𐴁𐴞 𐴀𐴡𐴥𐴘 𐴁𐴡𐴓𐴧𐴝 𐴋𐴝𐴑𐴝 𐴒𐴞𐴘𐴠𐴥. 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴣𐴀𐴌𐴝𐴌 𐴁𐴝𐴥𐴘 𐴏𐴡𐴥𐴏𐴄𐴞𐴕𐴠𐴏𐴢 𐴀𐴡𐴥 𐴀𐴝𐴏𐴠𐴤.

²𐴑𐴡𐴥𐴌𐴞𐴕 𐴐𐴡𐴥𐴀𐴌𐴡𐴃𐴢 𐴀𐴝𐴓𐴧𐴝𐴌 𐴎𐴠 𐴎𐴡𐴔𐴝𐴥𐴃𐴢 𐴀𐴝𐴏𐴠𐴤 𐴘𐴞𐴥𐴁𐴝𐴌 𐴇𐴝𐴣𐴏𐴠 𐴓𐴠𐴑𐴞𐴥𐴌, 𐴎𐴠𐴃𐴝𐴌𐴝𐴤𐴌𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴂𐴝𐴑 𐴒𐴡𐴌𐴝𐴥 𐴒𐴞𐴥𐴘𐴠 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴘 𐴁𐴡𐴓𐴧𐴝 𐴋𐴝𐴑𐴝 𐴒𐴞𐴘𐴠𐴥. 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴘𐴡𐴥 𐴓𐴠𐴑𐴞𐴥𐴌, 𐴎𐴠 𐴇𐴝𐴥𐴀𐴌 𐴎𐴝𐴒𐴝𐴌 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔 𐴓𐴡𐴖𐴢, 𐴎𐴞𐴁𐴝𐴤 𐴀𐴞𐴥𐴃𐴝𐴌𐴝𐴌 𐴀𐴡𐴥 𐴔𐴝𐴓𐴞𐴑 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴀𐴡𐴥 𐴔𐴝𐴓𐴞𐴑.

³𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴃𐴡𐴌𐴉𐴡𐴥𐴃𐴧𐴟 𐴌𐴝𐴇𐴝𐴥𐴔𐴡𐴃𐴢 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴕𐴝𐴎𐴞𐴓𐴢 𐴀𐴡𐴥𐴑.

𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴁𐴡𐴌𐴈𐴡𐴃𐴢

⁴𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌 𐴀𐴝𐴓𐴧𐴝𐴌𐴠 𐴇𐴝𐴥𐴔𐴞𐴐𐴝 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴌𐴝𐴇𐴝𐴥𐴔𐴡𐴃𐴢 𐴒𐴡𐴙𐴅𐴧𐴠𐴥,⁵𐴑𐴞 𐴈𐴡𐴘𐴓𐴠𐴥, 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴃𐴟𐴣𐴀𐴝𐴥𐴌𐴝 𐴃𐴝𐴔𐴝𐴥𐴔 𐴈𐴡𐴃𐴝𐴤𐴁𐴝𐴃𐴧𐴝𐴌𐴝𐴘𐴠 𐴀𐴠𐴊𐴧𐴠 𐴒𐴞𐴘𐴝𐴕𐴠 𐴇𐴝𐴥𐴀𐴌 𐴔𐴞𐴑𐴧𐴝𐴥𐴃𐴧𐴟 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴒𐴞𐴘𐴡𐴒𐴡𐴘,⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴀𐴝𐴣𐴀𐴌𐴝 𐴊𐴞𐴘𐴞𐴥 𐴊𐴠 𐴒𐴡𐴁𐴝𐴤 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴒𐴝𐴣𐴙𐴃𐴧𐴝𐴥 𐴀𐴝𐴏𐴠𐴤.⁷𐴇𐴠𐴥𐴃𐴡𐴓𐴧𐴝 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴎𐴝𐴇𐴠𐴥𐴌𐴞𐴓𐴧𐴝 𐴊𐴞𐴓𐴔𐴡𐴕 𐴊𐴞 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴀𐴝𐴏𐴡𐴤, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴡𐴤 𐴕𐴞𐴘𐴝𐴔𐴡𐴃𐴡𐴌 𐴈𐴡𐴔𐴞 𐴕𐴝𐴥𐴘.⁸𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴇𐴠𐴥𐴌𐴞 𐴉𐴡𐴙𐴅𐴧𐴡𐴕𐴃𐴡 𐴔𐴡𐴎𐴁𐴟𐴃𐴢 𐴀𐴡𐴥 𐴌𐴝𐴑𐴞𐴥𐴁𐴡, 𐴘𐴝𐴥𐴕𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴝𐴘𐴁𐴡𐴤 𐴊𐴠 𐴊𐴞𐴕𐴡𐴃𐴢 𐴁𐴠𐴈𐴡𐴏𐴟𐴥𐴌 𐴀𐴡𐴥𐴘𐴁𐴝.⁹𐴀𐴝𐴓𐴧𐴝 𐴃𐴡 𐴁𐴞𐴐𐴧𐴝𐴥𐴐𐴊𐴝𐴌, 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴃𐴟𐴣𐴀𐴝𐴥𐴌𐴝𐴌𐴠 𐴕𐴞𐴎𐴡𐴌 𐴉𐴟𐴖𐴝 𐴓𐴧𐴡𐴘 𐴃𐴝𐴦𐴓𐴟𐴑𐴝𐴃𐴢 𐴌𐴝𐴑𐴞𐴥 𐴁𐴡𐴓𐴧𐴝 𐴋𐴝𐴙𐴑𐴧𐴠𐴥, 𐴘𐴝𐴥𐴕𐴞 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴓𐴡𐴘.

𐴎𐴡𐴔𐴝𐴥𐴃𐴡𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞

¹⁰𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴀𐴠𐴑 𐴏𐴡𐴥𐴓𐴧𐴟𐴑 𐴀𐴡𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴉𐴝𐴀𐴄𐴝-𐴉𐴝𐴀𐴄𐴞 𐴕𐴡 𐴃𐴝𐴥𐴑𐴠, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌 𐴔𐴡𐴕 𐴀𐴠𐴊𐴧𐴠 𐴌𐴝𐴘 𐴎𐴠𐴕 𐴉𐴟𐴌𐴝𐴉𐴟𐴌𐴞 𐴀𐴠𐴑 𐴋𐴡𐴙𐴓𐴧𐴝 𐴀𐴡𐴥.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴑𐴝𐴓𐴡𐴖𐴞𐴌 𐴒𐴡𐴥𐴌𐴡𐴌 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴠𐴥 𐴈𐴡𐴥𐴁𐴡𐴌 𐴊𐴞𐴥𐴘𐴠 𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴁𐴡𐴥𐴓𐴠 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴏𐴡𐴓𐴠𐴌.¹²𐴀𐴝𐴀𐴛 𐴈𐴡𐴘𐴃𐴝𐴥𐴔 𐴏𐴝𐴀𐴙𐴌 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴑𐴞𐴘𐴠𐴥 𐴈𐴡𐴀 𐴊𐴠, ”𐴀𐴝𐴀𐴛 𐴂𐴝𐴥𐴀𐴟𐴓𐴡𐴌 𐴀𐴟𐴔𐴧𐴡𐴃𐴢,“ 𐴑𐴞𐴘𐴠𐴥 𐴈𐴡𐴀 𐴊𐴠, ”𐴀𐴝𐴀𐴛 𐴀𐴝𐴂𐴡𐴥𐴓𐴡𐴏𐴡𐴌 𐴀𐴟𐴔𐴧𐴡𐴃𐴢,“ 𐴑𐴞𐴘𐴠𐴥 𐴈𐴡𐴀 𐴊𐴠, ”𐴀𐴝𐴀𐴛 𐴑𐴠𐴥𐴉𐴝𐴏𐴢 𐴀𐴡𐴌 𐴀𐴟𐴔𐴧𐴡𐴃𐴢,“ 𐴀𐴝𐴌 𐴑𐴞𐴘𐴠𐴥 𐴈𐴡𐴀 𐴊𐴠, ”𐴀𐴝𐴀𐴛 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢.“

¹³𐴔𐴡𐴀𐴏𐴞𐴤 𐴑𐴞𐴥 𐴉𐴝𐴀𐴄𐴢-𐴉𐴝𐴀𐴄𐴢 𐴀𐴡𐴥𐴘𐴒𐴞𐴘𐴡𐴘؟ 𐴂𐴝𐴥𐴀𐴟𐴓𐴡𐴌𐴠 𐴑𐴞𐴥 𐴃𐴟𐴣𐴀𐴝𐴥𐴌𐴝𐴓𐴧𐴝 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴘𐴠؟ 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴂𐴝𐴥𐴀𐴟𐴓𐴡𐴌 𐴕𐴝𐴔𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴡𐴥؟¹⁴𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴑𐴌𐴞𐴏𐴂𐴟𐴏𐴢 𐴀𐴠𐴊𐴧𐴠 𐴒𐴝𐴘𐴟𐴏𐴡𐴌𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴡𐴌𐴠 𐴁𐴝𐴥𐴂𐴄𐴞𐴏𐴔𐴝 𐴕𐴡𐴥 𐴊𐴞𐴥.¹⁵𐴇𐴠𐴥𐴃𐴡𐴓𐴧𐴝 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴕𐴝𐴔𐴠 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴠𐴥 𐴁𐴡𐴥𐴓𐴞 𐴇𐴡𐴘 𐴕𐴡 𐴉𐴝𐴌𐴞𐴁𐴡𐴥.¹⁶𐴁𐴠𐴐𐴡𐴥𐴑, 𐴀𐴝𐴀𐴛 𐴀𐴠𐴏𐴄𐴠𐴉𐴝𐴥𐴕𐴝𐴏𐴡𐴌 𐴒𐴡𐴥𐴌𐴡𐴌 𐴔𐴝𐴙𐴕𐴐𐴡𐴥𐴌𐴠 𐴘𐴡𐴥 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴓𐴝𐴔, 𐴘𐴝𐴥𐴌𐴁𐴝𐴦𐴊𐴠 𐴀𐴝𐴌 𐴇𐴝𐴌𐴠𐴤 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴞 𐴀𐴝𐴣𐴀𐴃𐴧𐴟 𐴔𐴡𐴕𐴡𐴃𐴢 𐴕𐴡 𐴀𐴟𐴍𐴠𐴤𐴌.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴃𐴡 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴃𐴡 𐴕𐴡, 𐴁𐴡𐴥𐴓𐴑𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥, 𐴀𐴝𐴦𐴌 𐴇𐴞𐴥𐴘𐴝𐴕 𐴀𐴡𐴥 𐴏𐴝𐴓𐴝𐴥𐴑𐴞 𐴈𐴡𐴃𐴝𐴤 𐴓𐴡𐴥𐴘 𐴒𐴡𐴙𐴃𐴧𐴡𐴥 𐴕𐴡, 𐴎𐴠𐴀𐴕𐴠 𐴔𐴡𐴀𐴏𐴞𐴤 𐴑𐴟𐴥𐴌𐴟𐴐𐴡𐴌 𐴖𐴡𐴌𐴠 𐴑𐴟𐴌𐴁𐴝𐴕𐴞 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴇𐴡𐴕𐴡𐴤 𐴀𐴝𐴏𐴡𐴥𐴌 𐴏𐴝𐴥𐴌𐴝 𐴕𐴡.

𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴢 𐴀𐴠𐴊𐴧𐴠 𐴒𐴞𐴘𐴝𐴕

¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴑𐴟𐴥𐴌𐴟𐴐𐴡𐴌 𐴈𐴡𐴥𐴁𐴡𐴌 𐴃𐴡 𐴎𐴠𐴃𐴝𐴌𐴝𐴤 𐴊𐴡𐴥𐴚𐴐𐴡 𐴀𐴡𐴥𐴘𐴎𐴝𐴌𐴒𐴡𐴘 𐴀𐴞𐴥𐴃𐴝𐴌𐴝𐴓𐴧𐴝 𐴁𐴠𐴑𐴟𐴙𐴂𐴧𐴝 𐴈𐴡𐴥𐴁𐴡𐴌, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤 𐴕𐴠𐴅𐴝𐴃𐴢 𐴉𐴝𐴙𐴌, 𐴀𐴝𐴣𐴀𐴌𐴝𐴓𐴧𐴝 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴢.¹⁹𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴀𐴝𐴀𐴛 𐴒𐴞𐴘𐴝𐴕𐴞 𐴀𐴡𐴥𐴑𐴧𐴡𐴓𐴡𐴌 𐴒𐴞𐴘𐴝𐴕𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘𐴧𐴟𐴔,𐴀𐴝𐴦𐴌 𐴁𐴟𐴊𐴧𐴞𐴥𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴁𐴟𐴊𐴧𐴞𐴥𐴌𐴠 𐴁𐴠𐴇𐴝𐴌 𐴒𐴡𐴌𐴞𐴥𐴊𐴞𐴘𐴟𐴔.“

²⁰𐴃𐴡𐴥𐴘 𐴒𐴞𐴘𐴝𐴕𐴞 𐴔𐴝𐴕𐴟𐴥𐴙𐴐𐴢 𐴇𐴡𐴍𐴠𐴥؟ 𐴀𐴝𐴓𐴠𐴔 𐴇𐴡𐴍𐴠𐴥؟ 𐴀𐴠 𐴅𐴝𐴥𐴈𐴝𐴕𐴡𐴌 𐴁𐴝𐴌𐴝𐴤𐴁𐴝𐴌𐴞-𐴊𐴡𐴥𐴘𐴝 𐴇𐴡𐴍𐴠𐴥؟ 𐴀𐴝𐴓𐴧𐴝𐴘𐴠 𐴀𐴠 𐴊𐴟𐴕𐴞𐴘𐴝𐴙𐴌 𐴒𐴞𐴘𐴝𐴕𐴡𐴌𐴠 𐴁𐴠𐴑𐴟𐴉𐴢 𐴁𐴡𐴓𐴞 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥 𐴊𐴠 𐴕𐴡 𐴕𐴠𐴥؟²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴒𐴞𐴘𐴝𐴕𐴠 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠, 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴠 𐴀𐴞𐴥𐴃𐴝𐴌𐴝𐴌 𐴒𐴞𐴘𐴝𐴕𐴠 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥 𐴕𐴡 𐴉𐴝𐴌𐴠 𐴉𐴝𐴥𐴕. 𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴃𐴧𐴟 𐴘𐴝𐴀𐴕 𐴉𐴡𐴏𐴡𐴥𐴕 𐴓𐴝𐴙𐴒𐴧𐴠𐴥, 𐴑𐴞 𐴈𐴡𐴘𐴓𐴠𐴥, 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝 𐴊𐴠 𐴈𐴡𐴥𐴁𐴡𐴌𐴡𐴌𐴠 𐴁𐴠𐴑𐴟𐴉𐴢 𐴄𐴝𐴥𐴀𐴌𐴝 𐴎𐴝 𐴊𐴠 𐴇𐴞𐴥𐴘𐴝𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴀𐴞𐴔𐴝𐴕 𐴀𐴝𐴕𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴕𐴠𐴅𐴝𐴃𐴢 𐴊𐴡𐴕.²²𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴁𐴞 𐴒𐴡𐴌𐴠𐴥, 𐴀𐴝𐴦𐴌 𐴒𐴞𐴌𐴞𐴥𐴑 𐴀𐴡𐴥𐴑𐴧𐴡𐴓𐴠 𐴒𐴞𐴘𐴝𐴕𐴡𐴌 𐴃𐴝𐴓𐴝𐴐𐴢 𐴒𐴡𐴌𐴠𐴥,²³𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴔𐴡𐴀𐴏𐴞𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴀𐴓𐴢 𐴊𐴠 𐴇𐴞𐴥𐴘𐴝𐴕𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥, 𐴎𐴞𐴘𐴝𐴥𐴕𐴡𐴌𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴝𐴌𐴞 𐴕𐴡 𐴉𐴝𐴌𐴠 𐴀𐴝𐴦𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴁𐴠𐴑𐴟𐴙𐴂𐴧𐴝 𐴈𐴡𐴥𐴁𐴡𐴌 𐴁𐴡𐴥𐴓𐴞 𐴄𐴝𐴥𐴀𐴌𐴠,²⁴𐴓𐴠𐴑𐴞𐴕 𐴎𐴠𐴃𐴝𐴌𐴝𐴤𐴌𐴠 𐴀𐴝𐴓𐴧𐴝𐴘𐴠 𐴋𐴝𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑 𐴘𐴝𐴥 𐴒𐴞𐴌𐴞𐴥𐴑, 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴢 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴒𐴞𐴘𐴝𐴕.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴁𐴠𐴑𐴟𐴉𐴝𐴘𐴧𐴞 𐴈𐴡𐴀 𐴊𐴠 𐴇𐴞𐴥𐴘𐴝𐴕 𐴃𐴡 𐴀𐴞𐴕𐴏𐴝𐴥𐴕𐴡𐴌 𐴒𐴞𐴘𐴝𐴕𐴡𐴌 𐴃𐴟𐴥𐴖𐴝𐴌𐴡 𐴒𐴞𐴘𐴝𐴕𐴞, 𐴀𐴝𐴦𐴌 𐴀𐴝𐴓𐴧𐴝𐴌 𐴑𐴡𐴔𐴎𐴟𐴌𐴞 𐴈𐴡𐴀 𐴊𐴠 𐴇𐴞𐴥𐴘𐴝𐴕 𐴃𐴡 𐴀𐴞𐴕𐴏𐴝𐴥𐴕𐴡𐴌 𐴁𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴡𐴓𐴟𐴖𐴝𐴌.

²⁶𐴁𐴝𐴥𐴘𐴧𐴝𐴙𐴕, 𐴁𐴝𐴥𐴉𐴞𐴏𐴡, 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴙𐴑𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢 𐴃𐴟𐴣𐴀𐴝𐴥𐴌𐴝 𐴇𐴡𐴕𐴊𐴞𐴓𐴧𐴝 𐴀𐴝𐴐𐴧𐴞𐴥𐴓𐴝. 𐴀𐴞𐴕𐴏𐴝𐴥𐴕𐴡𐴌 𐴕𐴡𐴎𐴡𐴌𐴡𐴃𐴢 𐴃𐴡 𐴃𐴟𐴣𐴀𐴝𐴥𐴌𐴝 𐴁𐴡𐴀𐴗𐴃𐴢 𐴎𐴡𐴕 𐴒𐴞𐴘𐴝𐴕𐴞 𐴕𐴟 𐴀𐴝𐴐𐴧𐴞𐴥𐴓𐴝, 𐴁𐴡𐴀𐴗𐴃𐴢 𐴎𐴡𐴕 𐴃𐴝𐴦𐴑𐴡𐴃𐴖𐴝𐴓𐴝 𐴕𐴟 𐴀𐴝𐴐𐴧𐴞𐴥𐴓𐴝, 𐴀𐴝𐴦𐴌 𐴁𐴡𐴀𐴗𐴃𐴢 𐴎𐴡𐴕 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴈𐴝𐴥𐴀𐴕𐴊𐴝𐴕𐴡𐴌 𐴀𐴡𐴥 𐴕𐴟 𐴀𐴝𐴐𐴧𐴞𐴥𐴓𐴝,²⁷𐴔𐴡𐴕𐴃𐴡𐴌 𐴒𐴞𐴘𐴝𐴕𐴞 𐴒𐴟𐴥𐴕𐴡𐴌𐴠 𐴐𐴡𐴥𐴌𐴡𐴔 𐴊𐴞𐴥 𐴁𐴡𐴓𐴧𐴝 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘𐴧𐴠 𐴁𐴠𐴑𐴟𐴉𐴢 𐴄𐴝𐴥𐴀𐴌𐴠 𐴊𐴠 𐴇𐴞𐴥𐴀𐴕𐴡𐴌𐴠 𐴁𐴝𐴏𐴞𐴥𐴓𐴡𐴘𐴧𐴠, 𐴀𐴝𐴦𐴌 𐴁𐴡𐴓𐴟𐴖𐴝𐴌 𐴒𐴟𐴥𐴕𐴡𐴌𐴠 𐴐𐴡𐴥𐴌𐴡𐴔 𐴊𐴞𐴥 𐴁𐴡𐴓𐴧𐴝 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘𐴧𐴠 𐴑𐴡𐴔𐴎𐴟𐴌 𐴄𐴝𐴥𐴀𐴌𐴠 𐴊𐴠 𐴇𐴞𐴥𐴀𐴕𐴡𐴌𐴠 𐴁𐴝𐴏𐴞𐴥𐴓𐴡𐴘𐴧𐴠.²⁸𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘𐴧𐴠 𐴕𐴞𐴌𐴡𐴥𐴐𐴢 𐴀𐴠𐴊𐴧𐴠 𐴁𐴠𐴇𐴝𐴌 𐴄𐴝𐴥𐴀𐴌𐴠 𐴊𐴠 𐴇𐴞𐴥𐴀𐴕 𐴀𐴡𐴌𐴠, 𐴘𐴝𐴥𐴕𐴞 𐴎𐴞𐴀𐴕 𐴕𐴝𐴥𐴘 𐴇𐴞𐴥𐴀𐴕𐴡𐴌𐴠 𐴁𐴝𐴏𐴞𐴥𐴓𐴡𐴘𐴧𐴠 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝,²⁹𐴎𐴠𐴀𐴕𐴠 𐴇𐴡𐴕𐴡𐴤 𐴔𐴡𐴕𐴞𐴐𐴧𐴡𐴥𐴘𐴠 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴕𐴡 𐴉𐴝𐴌𐴠.³⁰𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴎𐴡𐴌𐴞𐴘𐴝 𐴁𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴀𐴝𐴏𐴡𐴤, 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴒𐴞𐴘𐴝𐴕; 𐴀𐴞𐴥𐴁𐴝 𐴀𐴝𐴣𐴀𐴌𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞, 𐴂𐴝𐴑𐴞, 𐴀𐴠𐴊𐴧𐴠 𐴀𐴝𐴎𐴝𐴊𐴞.³¹𐴇𐴠𐴥𐴃𐴡𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤 𐴊𐴠 𐴔𐴡𐴎𐴞𐴕، ”𐴎𐴠𐴦𐴕𐴞𐴑𐴞 𐴁𐴡𐴌𐴝𐴥𐴘 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴔𐴝𐴁𐴟𐴊𐴡𐴌𐴠 𐴓𐴡𐴥𐴘 𐴁𐴠 𐴁𐴡𐴌𐴝𐴥𐴘 𐴒𐴡𐴌𐴡𐴥𐴗𐴑.“

The Word for the World International

https://app.library.bible/content/87faca8b51c22590