Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 15

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢15

𐴔𐴡𐴌𐴝𐴃𐴧𐴟 𐴔𐴡𐴀𐴏𐴞𐴤𐴌 𐴎𐴞𐴕𐴊𐴝

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴎𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴝𐴔 𐴇𐴞𐴥𐴘𐴝𐴕 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴌, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥 𐴀𐴝𐴦𐴌 𐴎𐴞𐴘𐴝𐴥𐴕𐴡𐴃𐴢 𐴃𐴟𐴣𐴀𐴝𐴥𐴌𐴝 𐴓𐴝𐴒𐴞 𐴀𐴝𐴏𐴡𐴤.²𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴝𐴔 𐴊𐴠 𐴑𐴝𐴓𐴝𐴔 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴊𐴡𐴥𐴌𐴞 𐴀𐴝𐴏𐴡𐴤 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝 𐴃𐴡 𐴇𐴞𐴥𐴘𐴝𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴕𐴠𐴅𐴝𐴃𐴢 𐴉𐴡𐴀𐴌, 𐴀𐴝𐴌𐴕𐴡𐴥𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴀𐴝𐴕𐴝𐴤 𐴁𐴠𐴇𐴝𐴌 𐴀𐴡𐴥𐴘𐴒𐴞𐴘𐴡𐴘.

³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴉𐴡𐴀𐴣𐴏𐴝𐴘𐴧𐴞 𐴊𐴠 𐴀𐴡𐴥𐴙𐴓𐴊𐴠 𐴀𐴟𐴀𐴙𐴕 𐴎𐴞𐴀𐴕 𐴀𐴝𐴀𐴛 𐴉𐴝𐴘𐴧𐴞𐴥 𐴊𐴠 𐴈𐴠𐴥𐴕𐴃𐴟 𐴁𐴞𐴐𐴞𐴤 𐴊𐴡𐴌𐴇𐴝𐴌𐴞 𐴒𐴟𐴥𐴕, 𐴑𐴞 𐴈𐴡𐴘𐴓𐴠𐴥, 𐴔𐴡𐴀𐴏𐴞𐴤 𐴂𐴝𐴑-𐴑𐴝𐴓𐴝𐴔 𐴔𐴡𐴎𐴞𐴕 𐴀𐴝𐴣𐴀𐴌𐴝𐴌 𐴒𐴟𐴕𐴝𐴤 𐴓𐴧𐴝 𐴁𐴡𐴥𐴓𐴞 𐴔𐴡𐴙𐴅𐴧𐴞𐴥𐴓𐴢,⁴𐴀𐴞𐴥𐴁𐴝𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥 𐴒𐴞𐴥𐴀𐴓𐴢, 𐴀𐴝𐴦𐴌 𐴂𐴝𐴑-𐴑𐴝𐴓𐴝𐴔𐴡𐴌 𐴈𐴡𐴃𐴝𐴤 𐴔𐴡𐴎𐴞𐴕 𐴀𐴞𐴥𐴁𐴝𐴌𐴠 𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠,⁵𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴑𐴠𐴥𐴉𐴝𐴏𐴢 𐴀𐴡𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴃𐴝𐴌𐴉𐴡𐴌𐴠 𐴁𐴝𐴌𐴡𐴥 𐴎𐴡𐴕 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴀𐴡𐴌𐴠.⁶𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴠𐴑𐴁𐴝𐴌𐴡𐴃𐴢 𐴉𐴝𐴣𐴏𐴢 𐴐𐴡𐴥𐴃𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴎𐴠𐴃𐴝𐴌𐴝𐴤𐴌 𐴁𐴟𐴥𐴃𐴡𐴃𐴧𐴟 𐴑𐴠𐴏𐴧𐴟𐴥 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘 𐴊𐴠 𐴀𐴡𐴥𐴘𐴓𐴠 𐴘𐴡, 𐴓𐴠𐴑𐴞𐴕 𐴁𐴞𐴐𐴞𐴤 𐴎𐴡𐴕 𐴀𐴝𐴙𐴅𐴧𐴡𐴤 𐴁𐴝𐴏𐴞 𐴀𐴝𐴏𐴠𐴤.⁷𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴘𐴝𐴑𐴟𐴁𐴡𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴁𐴝𐴦𐴊𐴠 𐴃𐴝𐴔𐴝𐴥𐴔 𐴏𐴝𐴥𐴇𐴝𐴁𐴞 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠;⁸𐴀𐴝𐴦𐴌 𐴁𐴠𐴒𐴧𐴟𐴥𐴕𐴡𐴌 𐴉𐴞𐴏𐴠𐴤, 𐴀𐴝𐴀𐴛 𐴀𐴠𐴥𐴎𐴧𐴡𐴕 𐴁𐴠𐴄𐴝𐴙𐴔𐴧𐴝 𐴎𐴡𐴌𐴔𐴡𐴌 𐴇𐴝𐴣𐴏𐴠 𐴘𐴡𐴥 𐴀𐴞𐴥𐴁𐴝𐴘𐴠 𐴊𐴝𐴈𐴝𐴤𐴊𐴞𐴘𐴠.

⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴁𐴟𐴥𐴃𐴡𐴃𐴧𐴟 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴠𐴁𐴧𐴠 𐴕𐴞𐴌𐴡𐴥𐴐𐴧𐴗𐴝; 𐴀𐴝𐴣𐴀𐴌𐴠𐴥 𐴏𐴝𐴥𐴇𐴝𐴁𐴞 𐴈𐴡𐴘𐴁𐴝𐴥𐴌 𐴀𐴟𐴥𐴊𐴧𐴗𐴝 𐴓𐴝𐴦𐴘𐴠𐴑 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴡𐴌𐴠 𐴎𐴟𐴓𐴟𐴥𐴔 𐴒𐴡𐴙𐴃𐴧𐴝𐴥𐴔.¹⁰𐴔𐴡𐴕𐴃𐴡𐴌 𐴘𐴝𐴓𐴝 𐴀𐴝𐴀𐴛 𐴎𐴞𐴘𐴝𐴥𐴕 𐴀𐴡𐴥𐴘𐴧𐴞 𐴇𐴞𐴥𐴘𐴝𐴕 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴠 𐴀𐴡𐴥𐴘𐴧𐴞 𐴊𐴠; 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴥𐴁𐴝𐴘𐴠 𐴎𐴠 𐴌𐴝𐴇𐴝𐴥𐴔𐴡𐴃𐴢 𐴒𐴡𐴙𐴅𐴧𐴠𐴥 𐴇𐴞𐴥𐴘𐴝𐴕 𐴁𐴠𐴇𐴝𐴌 𐴀𐴡𐴥𐴘 𐴕𐴡𐴥 𐴎𐴝𐴒𐴡𐴘; 𐴀𐴝𐴀𐴛 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴔𐴠𐴀𐴕𐴧𐴡𐴃𐴢 𐴒𐴡𐴙𐴅𐴧𐴞𐴥, 𐴇𐴝𐴥𐴓𐴠𐴑𐴠 𐴀𐴝𐴀𐴛 𐴒𐴡𐴙𐴅𐴧𐴞𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴖𐴡𐴌𐴠 𐴀𐴝𐴓𐴧𐴝𐴌 𐴎𐴠 𐴌𐴝𐴇𐴝𐴥𐴔𐴡𐴃𐴢 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕𐴠 𐴒𐴡𐴙𐴅𐴧𐴠𐴥 𐴊𐴠.¹¹𐴇𐴞𐴥𐴘𐴝𐴕 𐴀𐴝𐴀𐴛 𐴒𐴡𐴙𐴅𐴧𐴞𐴥 𐴀𐴡𐴥𐴑 𐴘𐴝𐴥 𐴀𐴞𐴥𐴃𐴝𐴌𐴝 𐴒𐴡𐴙𐴅𐴧𐴠𐴥, 𐴀𐴝𐴣𐴀𐴌𐴝 𐴃𐴡 𐴖𐴝𐴀𐴕𐴡𐴌 𐴁𐴝𐴦𐴁𐴟𐴃𐴠 𐴀𐴠𐴥𐴕𐴝 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥, 𐴎𐴞𐴘𐴝𐴥𐴕𐴡𐴌 𐴖𐴡𐴌𐴠 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤.

𐴇𐴝𐴥𐴣𐴐𐴡𐴌𐴡𐴌 𐴊𐴞𐴕𐴡𐴌 𐴁𐴝𐴦𐴁𐴟𐴃𐴠

¹²𐴔𐴡𐴀𐴏𐴞𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕𐴡𐴌 𐴃𐴡 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴇𐴡𐴊𐴟𐴥𐴕𐴠 𐴑𐴠𐴀𐴕𐴒𐴡𐴌𐴞 𐴈𐴡𐴀 𐴊𐴠, 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴥𐴣𐴐𐴡𐴌 𐴕𐴝𐴥𐴘؟¹³𐴔𐴡𐴕𐴃𐴡𐴌 𐴎𐴡𐴊𐴞 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴥𐴣𐴐𐴡𐴌 𐴕𐴡 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴃𐴡 𐴔𐴡𐴀𐴏𐴞𐴤𐴌𐴠 𐴘𐴡𐴥 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡𐴥 𐴎𐴝.¹⁴𐴀𐴝𐴦𐴌 𐴎𐴡𐴊𐴞 𐴔𐴡𐴀𐴏𐴞𐴤𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡𐴥 𐴎𐴝 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴌𐴝𐴌 𐴃𐴡𐴁𐴡𐴓𐴞𐴑 𐴃𐴡 𐴁𐴠𐴇𐴝𐴌 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴀𐴡𐴥 𐴁𐴠𐴇𐴝𐴌.¹⁵𐴇𐴞𐴥𐴘𐴝𐴕 𐴁𐴝𐴦𐴊𐴠 𐴘𐴡, 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴔𐴞𐴏𐴝𐴥 𐴒𐴡𐴁𐴝𐴤 𐴄𐴡𐴥𐴀𐴙𐴅𐴧𐴞; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥 𐴊𐴠 𐴑𐴞, 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤𐴌𐴠 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥. 𐴓𐴠𐴑𐴞𐴕 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝 𐴊𐴠 𐴇𐴞𐴥𐴘𐴝𐴕 𐴎𐴡𐴊𐴞 𐴏𐴡𐴥𐴘𐴧𐴞 𐴕𐴡, 𐴃𐴡𐴥𐴀𐴘𐴓𐴠 𐴃𐴡 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤𐴌𐴠 𐴘𐴡𐴥 𐴎𐴞𐴕𐴊𐴝 𐴕𐴡𐴥 𐴒𐴡𐴌𐴠𐴥.¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡 𐴎𐴝𐴘𐴓𐴠𐴥, 𐴃𐴡𐴥𐴀𐴘𐴓𐴠 𐴔𐴡𐴀𐴏𐴞𐴤𐴌𐴠 𐴘𐴡𐴥 𐴃𐴡 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡𐴥 𐴎𐴝.¹⁷𐴀𐴝𐴦𐴌 𐴎𐴡𐴊𐴞 𐴔𐴡𐴀𐴏𐴞𐴤𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡𐴥 𐴎𐴝 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴁𐴠𐴇𐴝𐴌; 𐴃𐴟𐴣𐴀𐴝𐴥𐴌𐴝 𐴀𐴝𐴙𐴅𐴧𐴡𐴤 𐴕𐴞𐴎𐴡𐴌 𐴒𐴟𐴕𐴝𐴤𐴌 𐴃𐴡𐴓𐴠 𐴀𐴝𐴏𐴡𐴤.¹⁸𐴇𐴠𐴥𐴀𐴕 𐴀𐴡𐴥𐴘𐴓𐴠, 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴡𐴥𐴘 𐴎𐴠𐴃𐴝𐴌𐴝𐴤 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴘𐴡𐴥 𐴊𐴡𐴥𐴚𐴐𐴡 𐴀𐴡𐴥𐴘𐴒𐴞𐴘𐴡𐴘.¹⁹𐴎𐴡𐴊𐴞 𐴀𐴝𐴣𐴀𐴌𐴝 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴝𐴐𐴝𐴤 𐴌𐴝𐴙𐴑𐴧𐴞𐴥 𐴊𐴠 𐴏𐴞𐴌𐴞𐴥𐴉𐴢 𐴀𐴠 𐴎𐴞𐴕𐴊𐴞𐴒𐴞𐴓𐴧𐴝 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴀𐴝𐴣𐴀𐴌𐴝 𐴁𐴡𐴊𐴕𐴡𐴏𐴞𐴥𐴉𐴢 𐴀𐴡𐴓𐴝.

²⁰𐴔𐴡𐴕𐴃𐴡𐴌 𐴁𐴠𐴐𐴡𐴥𐴑, 𐴔𐴡𐴀𐴏𐴞𐴤𐴌𐴠 𐴃𐴡 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠. 𐴎𐴞𐴘𐴝𐴥𐴕𐴠 𐴉𐴝𐴑𐴧𐴝 𐴒𐴡𐴌𐴠𐴥 𐴊𐴠, 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘𐴁𐴡.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴊𐴟𐴖𐴝𐴌𐴝 𐴔𐴡𐴦𐴃𐴢 𐴀𐴝𐴙𐴐𐴧𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴊𐴟𐴖𐴝𐴌𐴝 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴥𐴣𐴐𐴡𐴌 𐴀𐴡𐴥 𐴀𐴝𐴙𐴐𐴧𐴠𐴥.²²𐴎𐴠𐴕𐴊𐴞𐴓𐴧𐴝 𐴀𐴝𐴊𐴡𐴔𐴡𐴌 𐴉𐴟𐴀𐴝𐴙𐴕 𐴀𐴞𐴥𐴏𐴝𐴉𐴠 𐴁𐴠𐴒𐴧𐴟𐴥𐴕 𐴔𐴡𐴙𐴅𐴧𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌𐴠 𐴘𐴡𐴥 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘𐴁𐴡 𐴎𐴠𐴃𐴝𐴌𐴝𐴤 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢.²³𐴓𐴠𐴑𐴞𐴕 𐴁𐴝𐴌𐴞-𐴁𐴝𐴌𐴞 𐴔𐴡𐴎𐴞𐴕: 𐴀𐴠𐴁𐴧𐴠 𐴀𐴝𐴒𐴠 𐴔𐴡𐴀𐴏𐴞𐴤𐴌𐴠 𐴒𐴡𐴌𐴝𐴥 𐴒𐴞𐴥𐴘𐴠, 𐴘𐴝𐴥𐴌𐴁𐴝𐴦𐴊𐴠 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴌𐴝𐴥 𐴎𐴝𐴘𐴁𐴡 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴀𐴝𐴘𐴁𐴡𐴤.²⁴𐴘𐴝𐴥𐴌𐴁𐴝𐴦𐴊𐴠 𐴀𐴝𐴇𐴠𐴥𐴌𐴡𐴃𐴢 𐴀𐴝𐴘𐴁𐴡𐴤; 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴇𐴡𐴥𐴑𐴟𐴔𐴡𐴃𐴢, 𐴇𐴝𐴥𐴀𐴌 𐴀𐴝𐴊𐴞𐴥𐴑𐴝𐴌, 𐴀𐴠𐴊𐴧𐴠 𐴇𐴝𐴥𐴀𐴌 𐴃𐴝𐴦𐴑𐴡𐴃𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘 𐴁𐴝𐴦𐴊𐴠 𐴀𐴝𐴓𐴧𐴝 𐴁𐴝𐴉𐴡𐴌 𐴀𐴝𐴥𐴃𐴡𐴃𐴢 𐴌𐴝𐴙𐴅𐴧𐴡 𐴒𐴡𐴏𐴝𐴥𐴘 𐴊𐴞𐴥𐴉𐴠𐴓𐴝𐴘𐴁𐴡.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤𐴃𐴧𐴟 𐴀𐴡𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴎𐴠𐴃𐴡𐴥𐴊𐴞𐴕 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌 𐴃𐴝𐴔𐴝𐴥𐴔 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴁𐴝𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴠.²⁶𐴀𐴝𐴇𐴠𐴥𐴌𐴞 𐴊𐴟𐴐𐴧𐴡𐴕, 𐴎𐴞𐴘𐴝𐴥𐴕𐴡𐴌𐴠 𐴉𐴝𐴥𐴕𐴝 𐴒𐴡𐴌𐴞𐴥𐴉𐴠𐴓𐴝 𐴎𐴝𐴘𐴁𐴡 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴔𐴡𐴦𐴃𐴢.²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠, ”𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴞𐴥𐴁𐴝𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴠.“ 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴘𐴠, ”𐴇𐴝𐴥𐴀𐴌 𐴑𐴠𐴏𐴧𐴟𐴥,“ 𐴀𐴞𐴥𐴁𐴝𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠 𐴈𐴡𐴀 𐴊𐴠 𐴇𐴞𐴥𐴘𐴝𐴕𐴠 𐴏𐴝𐴥𐴁𐴟𐴃𐴢 𐴀𐴡𐴥 𐴊𐴠, 𐴎𐴞𐴁𐴝𐴤𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴔𐴡𐴀𐴏𐴞𐴤𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴠 𐴀𐴞𐴥𐴁𐴝 𐴇𐴠𐴥𐴍𐴠 𐴐𐴝𐴥𐴔𐴞𐴓𐴢 𐴕𐴝𐴥𐴘.²⁸𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴠𐴃𐴧𐴡𐴥𐴃𐴢 𐴀𐴞𐴥𐴁𐴝𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠, 𐴃𐴡𐴥𐴘 𐴉𐴟𐴖𐴝 𐴕𐴞𐴎𐴠 𐴘𐴡𐴥 𐴀𐴟𐴁𐴝𐴤𐴌 𐴃𐴡𐴓𐴠 𐴀𐴡𐴥𐴘𐴎𐴝𐴘𐴁𐴡𐴘 𐴎𐴞𐴁𐴝𐴤𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴞𐴥𐴁𐴝𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴠, 𐴎𐴠𐴀𐴕𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴀𐴝𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴡𐴥.

²⁹𐴀𐴝𐴌𐴕𐴡𐴥𐴘𐴓𐴠, 𐴎𐴠𐴃𐴝𐴌𐴝𐴤 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖𐴢, 𐴀𐴞𐴥𐴃𐴝𐴌𐴝 𐴑𐴞𐴦 𐴒𐴡𐴌𐴞𐴥𐴁𐴡؟ 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴡𐴊𐴞 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡 𐴎𐴝𐴘𐴁𐴡 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴑𐴞𐴘𐴝𐴥 𐴔𐴝𐴙𐴕𐴐𐴠𐴥 𐴀𐴞𐴥𐴃𐴝𐴌𐴝𐴓𐴧𐴝 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖؟³⁰𐴀𐴝𐴦𐴌 𐴀𐴝𐴣𐴀𐴌𐴝 𐴘𐴡𐴥 𐴑𐴞𐴘𐴝𐴥 𐴇𐴝𐴥𐴀𐴌 𐴀𐴡𐴑𐴃𐴡𐴥𐴃𐴢 𐴇𐴡𐴥𐴃𐴡𐴌𐴝𐴃𐴢 𐴉𐴡𐴌𐴝𐴃𐴢 𐴃𐴝𐴥𐴑𐴞؟³¹𐴁𐴝𐴥𐴘𐴧𐴝𐴙𐴕, 𐴔𐴡𐴀𐴏𐴞𐴤 𐴀𐴞𐴏𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴃𐴟𐴣𐴀𐴝𐴥𐴌𐴝𐴌𐴠 𐴓𐴡𐴥𐴘 𐴀𐴝𐴣𐴀𐴃𐴧𐴟 𐴎𐴠 𐴁𐴡𐴌𐴝𐴥𐴘 𐴀𐴝𐴏𐴠𐴤, 𐴀𐴝𐴀𐴛 𐴇𐴞𐴥𐴘𐴝𐴕𐴡𐴌 𐴈𐴡𐴏𐴡𐴥𐴔 𐴇𐴝𐴥𐴘 𐴈𐴡𐴀𐴙𐴌, 𐴀𐴝𐴀𐴛 𐴉𐴡𐴃𐴧𐴞𐴥 𐴊𐴞𐴕 𐴔𐴡𐴌𐴞𐴎𐴝𐴘𐴒𐴡𐴥𐴘.³²𐴀𐴞𐴥𐴉𐴞𐴏𐴝𐴏𐴡𐴃𐴢 𐴀𐴝𐴣𐴀𐴃𐴧𐴟 𐴅𐴡𐴚𐴒𐴡𐴓𐴞 𐴅𐴝𐴕𐴟𐴖𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴎𐴠 𐴓𐴝𐴌𐴝𐴥𐴘 𐴒𐴡𐴌𐴝𐴥 𐴉𐴡𐴙𐴅𐴧𐴠𐴥, 𐴇𐴞𐴥𐴘𐴝𐴕 𐴎𐴡𐴊𐴞 𐴊𐴟𐴕𐴞𐴘𐴝𐴘𐴁𐴞 𐴕𐴞𐴘𐴡𐴃𐴠 𐴒𐴡𐴙𐴅𐴧𐴞𐴥 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴑𐴞𐴦 𐴉𐴝𐴥𐴘𐴊𐴝؟ 𐴎𐴡𐴊𐴞 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴕𐴡 𐴎𐴝𐴘𐴁𐴡 𐴊𐴠 𐴀𐴡𐴥𐴘𐴓𐴠,”𐴃𐴡𐴥𐴀𐴘𐴓𐴠 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴈𐴝𐴥𐴀𐴉𐴞𐴘𐴝 𐴒𐴡𐴌𐴞𐴥,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴝𐴙𐴓𐴧𐴝 𐴃𐴡 𐴔𐴡𐴌𐴞 𐴎𐴝𐴘𐴧𐴟𐴔𐴁𐴡𐴥𐴘.“

³³𐴉𐴝𐴥𐴑𐴞 𐴕𐴝 𐴇𐴝𐴥𐴘𐴧𐴡. ”𐴈𐴡𐴥𐴌𐴝𐴉𐴢 𐴏𐴝𐴥𐴀𐴣𐴃𐴞𐴘𐴠 𐴒𐴡𐴔 𐴀𐴝𐴊𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴞𐴒𐴞𐴍𐴞𐴉𐴠𐴥𐴓𐴠.“³⁴𐴏𐴡𐴥𐴘𐴧𐴞 𐴀𐴟𐴥𐴣𐴐𐴡𐴃𐴢 𐴀𐴝𐴘𐴧𐴡𐴤, 𐴀𐴝𐴦𐴌 𐴒𐴟𐴕𐴝𐴤 𐴒𐴡𐴌𐴝𐴥 𐴁𐴡𐴕 𐴒𐴡𐴌𐴡𐴤. 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴀𐴝𐴏𐴠𐴤 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌𐴠 𐴕𐴡 𐴏𐴞𐴕𐴠𐴥. 𐴀𐴠 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴐𐴡𐴥𐴌𐴡𐴔 𐴊𐴞𐴥 𐴁𐴡𐴓𐴧𐴝.

³⁵𐴀𐴡𐴥𐴘𐴃𐴡𐴉𐴝𐴌𐴠 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴡𐴤, ”𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴑𐴠𐴀𐴕𐴒𐴡𐴌𐴞 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘𐴁𐴡؟ 𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴕𐴊𐴞𐴓𐴧𐴝 𐴅𐴞𐴏𐴞𐴥𐴔 𐴃𐴝𐴥𐴑𐴞𐴁𐴡؟“³⁶𐴀𐴡𐴥 𐴉𐴡𐴦𐴓𐴢! 𐴎𐴠 𐴁𐴞𐴏𐴢 𐴓𐴝𐴒𐴡𐴏𐴢 𐴘𐴞𐴥𐴁𐴝 𐴕𐴡 𐴔𐴡𐴙𐴓𐴧𐴠 𐴃𐴡 𐴏𐴝𐴌𐴝 𐴕𐴡 𐴉𐴟𐴥𐴍𐴠.³⁷𐴓𐴝𐴒𐴝𐴘𐴃𐴠𐴥 𐴃𐴡 𐴉𐴡𐴌𐴠 𐴁𐴡𐴕𐴞𐴁𐴡𐴥 𐴊𐴠 𐴏𐴝𐴌𐴝 𐴓𐴝𐴒𐴡𐴏𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴏𐴞𐴌𐴞𐴥𐴉𐴢 𐴁𐴞𐴏𐴢 𐴀𐴠𐴥𐴕𐴝, 𐴀𐴡𐴥𐴘𐴃𐴡𐴉𐴝𐴌𐴠 𐴘𐴞𐴥𐴁𐴝 𐴒𐴞𐴣𐴘𐴟𐴌 𐴘𐴝𐴥 𐴀𐴡𐴙𐴕𐴧𐴡 𐴑𐴠𐴏𐴧𐴟𐴥𐴌.³⁸𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴉𐴡𐴏𐴡𐴥𐴕 𐴔𐴡𐴎𐴞𐴕 𐴘𐴞𐴥𐴁𐴝𐴌𐴠 𐴀𐴠𐴑𐴧𐴝𐴥𐴕 𐴒𐴝𐴦 𐴊𐴠𐴦. 𐴀𐴞𐴥𐴁𐴝𐴘𐴠 𐴉𐴡𐴃𐴧𐴞𐴥 𐴁𐴞𐴏𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴎𐴝𐴃𐴢 𐴔𐴡𐴎𐴞𐴕 𐴒𐴝𐴦 𐴊𐴠𐴦.³⁹𐴇𐴝𐴥𐴀𐴌 𐴅𐴞𐴏𐴞𐴥𐴔 𐴀𐴠𐴑 𐴋𐴡𐴙𐴓𐴧𐴝 𐴕𐴡, 𐴀𐴞𐴕𐴏𐴝𐴥𐴕𐴡𐴌 𐴅𐴞𐴏𐴞𐴥𐴔 𐴀𐴠𐴑 𐴋𐴡𐴥𐴙𐴓𐴧𐴝, 𐴅𐴝𐴕𐴟𐴖𐴝𐴌𐴡𐴌 𐴅𐴞𐴏𐴞𐴥𐴔 𐴀𐴠𐴑 𐴋𐴡𐴥𐴙𐴓𐴧𐴝, 𐴉𐴝𐴙𐴑𐴡𐴌 𐴅𐴞𐴏𐴞𐴥𐴔 𐴀𐴠𐴑 𐴋𐴡𐴥𐴙𐴓𐴧𐴝, 𐴀𐴝𐴦𐴌 𐴔𐴝𐴏𐴡𐴌 𐴅𐴞𐴏𐴞𐴥𐴔 𐴀𐴠𐴑 𐴋𐴡𐴥𐴙𐴓𐴧𐴝.⁴⁰𐴇𐴠𐴥𐴕𐴊𐴞𐴓𐴧𐴝, 𐴀𐴝𐴏𐴔𐴝𐴕𐴞 𐴅𐴞𐴏𐴞𐴥𐴔 𐴀𐴡𐴥 𐴀𐴝𐴏𐴠𐴤, 𐴀𐴝𐴦𐴌 𐴊𐴟𐴕𐴞𐴘𐴝𐴘𐴁𐴞 𐴅𐴞𐴏𐴞𐴥𐴔 𐴀𐴡𐴥 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴝𐴏𐴔𐴝𐴕𐴞 𐴅𐴞𐴏𐴞𐴥𐴔𐴡𐴌 𐴐𐴝𐴥𐴀𐴕 𐴀𐴠𐴑 𐴋𐴡𐴥𐴙𐴓𐴧𐴝, 𐴀𐴝𐴦𐴌 𐴊𐴟𐴕𐴞𐴘𐴝𐴘𐴁𐴞 𐴅𐴞𐴏𐴞𐴥𐴔𐴡𐴌 𐴐𐴝𐴥𐴀𐴕 𐴀𐴠𐴑 𐴋𐴡𐴥𐴙𐴓𐴧𐴝.⁴¹𐴁𐴠𐴙𐴓𐴡𐴌 𐴐𐴝𐴥𐴀𐴕 𐴀𐴠𐴑 𐴋𐴡𐴥𐴙𐴓𐴧𐴝, 𐴏𐴝𐴕𐴡𐴌 𐴐𐴝𐴥𐴀𐴕 𐴀𐴠𐴑 𐴋𐴡𐴥𐴙𐴓𐴧𐴝, 𐴃𐴝𐴌𐴝 𐴀𐴡𐴥𐴑𐴧𐴡𐴓𐴡𐴌 𐴐𐴝𐴥𐴀𐴕 𐴀𐴠𐴑 𐴋𐴡𐴥𐴙𐴓𐴧𐴝, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴠𐴑 𐴃𐴝𐴌𐴝𐴌 𐴐𐴝𐴥𐴀𐴕 𐴀𐴝𐴌𐴀𐴠𐴑 𐴃𐴝𐴌𐴝𐴌 𐴐𐴝𐴥𐴀𐴕 𐴓𐴡𐴥𐴘 𐴀𐴟𐴥𐴊𐴧𐴗𐴝 𐴉𐴡𐴌𐴡𐴥𐴑.

⁴²𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴥𐴣𐴐𐴡𐴌 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝. 𐴇𐴝𐴘𐴧𐴝 𐴔𐴠𐴍𐴞𐴃𐴢 𐴊𐴞𐴦𐴘𐴝 𐴎𐴝 𐴊𐴠 𐴃𐴡 𐴉𐴝𐴥𐴕𐴝 𐴀𐴡𐴥 𐴊𐴠 𐴅𐴞𐴏𐴞𐴥𐴔 𐴀𐴞𐴥𐴏𐴝𐴉𐴠, 𐴔𐴡𐴕𐴃𐴡𐴌 𐴃𐴟𐴓𐴝𐴤 𐴎𐴝𐴘𐴁𐴡 𐴊𐴠 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴅𐴞𐴏𐴞𐴥𐴔 𐴀𐴞𐴥𐴏𐴝𐴉𐴠.⁴³𐴔𐴠𐴍𐴞𐴃𐴢 𐴊𐴞𐴦𐴁𐴝𐴐𐴧𐴡𐴥𐴃𐴢 𐴇𐴞𐴥𐴘𐴝𐴕𐴡𐴌 𐴇𐴡𐴕𐴡𐴤 𐴑𐴡𐴊𐴡𐴌 𐴕𐴡 𐴃𐴝𐴥𐴑𐴠, 𐴔𐴡𐴕𐴃𐴡𐴌 𐴇𐴞𐴥𐴘𐴝𐴕𐴡𐴌𐴠 𐴃𐴟𐴓𐴝𐴤 𐴎𐴝𐴘𐴁𐴡 𐴊𐴠 𐴀𐴞𐴎𐴧𐴡𐴃𐴢 𐴀𐴡𐴃𐴢. 𐴔𐴠𐴍𐴞𐴃𐴢 𐴊𐴞𐴦𐴁𐴝𐴐𐴧𐴡𐴥𐴃𐴢 𐴇𐴞𐴥𐴘𐴝𐴕 𐴑𐴡𐴔𐴎𐴟𐴌, 𐴔𐴡𐴕𐴃𐴡𐴌 𐴇𐴞𐴥𐴘𐴝𐴕𐴡𐴌𐴠 𐴃𐴟𐴓𐴝𐴤 𐴎𐴝𐴘𐴁𐴡 𐴊𐴠 𐴃𐴝𐴦𐴑𐴡𐴃𐴢 𐴀𐴡𐴃𐴢;⁴⁴𐴇𐴞𐴥𐴘𐴝𐴕𐴡𐴌𐴠 𐴔𐴠𐴍𐴞𐴃𐴢 𐴊𐴞𐴦𐴘𐴝 𐴎𐴝 𐴊𐴠 𐴀𐴞𐴕𐴏𐴝𐴥𐴕𐴞 𐴅𐴞𐴏𐴞𐴥𐴔 𐴀𐴞𐴥𐴏𐴝𐴉𐴠, 𐴔𐴡𐴕𐴃𐴡𐴌 𐴃𐴟𐴓𐴝𐴤 𐴎𐴝𐴘𐴁𐴡 𐴊𐴠 𐴌𐴟𐴀𐴈𐴝𐴥𐴕𐴞𐴌 𐴅𐴞𐴏𐴞𐴥𐴔 𐴀𐴞𐴥𐴏𐴝𐴉𐴠.
𐴎𐴠𐴕𐴊𐴞𐴓𐴧𐴝 𐴀𐴞𐴕𐴏𐴝𐴥𐴕𐴞 𐴅𐴞𐴏𐴞𐴥𐴔 𐴀𐴝𐴏𐴠𐴤, 𐴇𐴠𐴥𐴕𐴊𐴞𐴓𐴧𐴝 𐴌𐴟𐴀𐴈𐴝𐴥𐴕𐴞𐴌 𐴅𐴞𐴏𐴞𐴥𐴔 𐴀𐴡𐴥 𐴀𐴝𐴏𐴠𐴤.⁴⁵𐴇𐴠𐴥𐴃𐴡𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠, ”𐴉𐴡𐴀𐴘𐴓𐴝 𐴔𐴝𐴕𐴟𐴥𐴙𐴐𐴢 𐴀𐴝𐴊𐴡𐴔 𐴎𐴞𐴕𐴊𐴝 𐴎𐴝𐴕𐴊𐴝𐴥𐴌 𐴀𐴡𐴥𐴘𐴀𐴝𐴙𐴐𐴧𐴠.“ 𐴀𐴝𐴦𐴌 𐴀𐴝𐴇𐴠𐴥𐴌𐴞 𐴀𐴝𐴊𐴡𐴔 𐴎𐴞𐴕𐴊𐴞𐴒𐴞-𐴊𐴡𐴦𐴘𐴝 𐴌𐴟𐴀 𐴀𐴡𐴥𐴘𐴀𐴝𐴙𐴐𐴧𐴠.⁴⁶𐴀𐴝𐴒𐴠 𐴃𐴡 𐴅𐴞𐴏𐴞𐴥𐴔 𐴌𐴟𐴀𐴈𐴝𐴥𐴕𐴞𐴌 𐴒𐴝𐴥𐴕 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴞𐴕𐴏𐴝𐴥𐴕𐴞 𐴒𐴝𐴥𐴕 𐴀𐴝𐴙𐴐𐴧𐴠𐴥 𐴊𐴠, 𐴘𐴝𐴥𐴌𐴁𐴝𐴦𐴊𐴠 𐴌𐴟𐴀𐴈𐴝𐴥𐴕𐴞𐴌 𐴒𐴝𐴥𐴕.⁴⁷𐴉𐴡𐴀𐴘𐴓𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴙𐴓𐴊𐴠 𐴔𐴠𐴍𐴞𐴌, 𐴘𐴝𐴥𐴕𐴞 𐴔𐴠𐴍𐴞 𐴓𐴡𐴘 𐴁𐴝𐴕𐴝𐴘𐴧𐴝; 𐴊𐴟𐴏𐴝𐴥𐴌𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴙𐴓𐴊𐴠 𐴀𐴝𐴏𐴔𐴝𐴕𐴞.⁴⁸𐴔𐴝𐴕𐴟𐴥𐴙𐴐𐴢 𐴔𐴠𐴍𐴞𐴌𐴒𐴗𐴝𐴥 𐴎𐴠𐴕𐴊𐴞𐴓𐴧𐴝, 𐴊𐴟𐴕𐴞𐴘𐴝𐴙𐴌 𐴀𐴞𐴥𐴃𐴝𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝; 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴝𐴏𐴔𐴝𐴕𐴞 𐴖𐴝 𐴎𐴠𐴕𐴊𐴞𐴓𐴧𐴝, 𐴀𐴝𐴏𐴔𐴝𐴕𐴞 𐴀𐴞𐴥𐴃𐴝𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝.⁴⁹𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴝 𐴔𐴠𐴍𐴞𐴌 𐴒𐴗𐴝𐴌 𐴏𐴞𐴘𐴝𐴥𐴌𐴝-𐴏𐴟𐴥𐴌𐴡𐴃𐴢 𐴉𐴝𐴘𐴧𐴞𐴥, 𐴇𐴠𐴥𐴕𐴊𐴞𐴓𐴧𐴝 𐴀𐴝𐴣𐴀𐴌𐴝 𐴀𐴝𐴏𐴔𐴝𐴕𐴞 𐴖𐴝𐴌 𐴏𐴞𐴘𐴝𐴥𐴌𐴝-𐴏𐴟𐴥𐴌𐴡𐴃𐴢 𐴀𐴡𐴥 𐴉𐴝𐴘𐴧𐴟𐴔.

⁵⁰𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴈𐴡𐴘𐴃𐴝𐴥𐴔 𐴏𐴝𐴀𐴙𐴌 𐴊𐴠 𐴑𐴞, 𐴅𐴞𐴏𐴞𐴥𐴔 𐴀𐴠𐴊𐴧𐴠 𐴓𐴡𐴖𐴢 𐴖𐴠𐴥 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴔𐴞𐴌𐴝𐴏𐴢 𐴉𐴝𐴘 𐴕𐴡 𐴉𐴝𐴌𐴠; 𐴇𐴠𐴥𐴕𐴊𐴞𐴓𐴧𐴝, 𐴉𐴝𐴥𐴕𐴝 𐴀𐴡𐴥 𐴊𐴠 𐴇𐴞𐴥𐴀𐴕𐴠 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴇𐴞𐴥𐴀𐴕 𐴔𐴞𐴌𐴝𐴏𐴢 𐴉𐴝𐴘 𐴕𐴡 𐴉𐴝𐴌𐴠.⁵¹𐴉𐴟𐴥𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴒𐴟𐴉𐴡𐴕𐴞 𐴎𐴝𐴕𐴝𐴘𐴊𐴞𐴌, 𐴑𐴞 𐴈𐴡𐴘𐴓𐴠𐴥, 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕 𐴔𐴡𐴦𐴃𐴡𐴌 𐴒𐴟𐴥𐴔 𐴕𐴡 𐴎𐴝𐴘𐴧𐴟𐴔, 𐴓𐴠𐴑𐴞𐴕 𐴁𐴠𐴒𐴧𐴟𐴥𐴕 𐴁𐴡𐴊𐴡𐴓𐴞 𐴎𐴝𐴘𐴧𐴟𐴔𐴁𐴡𐴥𐴘.⁵²𐴇𐴞𐴥𐴘𐴝𐴕 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠, 𐴏𐴟𐴑𐴡𐴌 𐴁𐴝𐴙𐴓𐴉𐴝𐴃𐴝 𐴉𐴞𐴥𐴌𐴝𐴘𐴁𐴝𐴐𐴧𐴡𐴃𐴢, 𐴀𐴝𐴇𐴠𐴥𐴌𐴞 𐴐𐴞𐴥𐴛𐴝 𐴔𐴝𐴃𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴡𐴥𐴘𐴁𐴡. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴞𐴥𐴛𐴝 𐴔𐴝𐴃𐴞𐴓𐴠𐴥 𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴢 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴇𐴝𐴥𐴓𐴡𐴃𐴡𐴃𐴢 𐴀𐴟𐴍𐴞𐴤𐴎𐴝𐴘𐴁𐴡𐴘, 𐴀𐴝𐴦𐴌 𐴀𐴝𐴣𐴀𐴌𐴝 𐴁𐴡𐴊𐴡𐴓𐴞 𐴎𐴝𐴘𐴧𐴟𐴔𐴁𐴡𐴥𐴘.⁵³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴝𐴥𐴕𐴝 𐴀𐴡𐴥 𐴊𐴠 𐴇𐴝𐴘𐴧𐴝 𐴘𐴝𐴀𐴕𐴡𐴃𐴢 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴑𐴠𐴏𐴧𐴟𐴥 𐴉𐴞𐴕𐴊𐴝𐴤𐴌 𐴎𐴡𐴌𐴟𐴌, 𐴀𐴝𐴦𐴌 𐴀𐴠 𐴔𐴡𐴌𐴡𐴕𐴞 𐴇𐴝𐴘𐴧𐴝 𐴘𐴝𐴀𐴕𐴡𐴃𐴢 𐴀𐴡𐴔𐴡𐴌𐴡𐴕𐴞 𐴑𐴠𐴏𐴧𐴟𐴥 𐴉𐴞𐴕𐴊𐴝𐴤𐴌 𐴎𐴡𐴌𐴟𐴌.⁵⁴𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴉𐴝𐴥𐴕𐴝 𐴀𐴡𐴥 𐴊𐴠 𐴇𐴝𐴘𐴧𐴝 𐴘𐴝𐴀𐴕𐴡𐴃𐴢 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴑𐴠𐴏𐴧𐴟𐴥 𐴉𐴞𐴕𐴊𐴝𐴤 𐴎𐴝𐴘𐴁𐴡, 𐴀𐴝𐴦𐴌 𐴔𐴡𐴌𐴡𐴕𐴞 𐴇𐴝𐴘𐴧𐴝 𐴘𐴝𐴀𐴕𐴡𐴃𐴢 𐴀𐴡𐴔𐴡𐴌𐴡𐴕𐴞 𐴑𐴠𐴏𐴧𐴟𐴥 𐴉𐴞𐴕𐴊𐴝𐴤 𐴎𐴝𐴘𐴁𐴡, 𐴃𐴡𐴥𐴘 𐴁𐴝𐴦𐴊𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠 𐴀𐴠 𐴈𐴡𐴃𐴝𐴤 𐴉𐴟𐴌𐴝 𐴀𐴡𐴥𐴘𐴁𐴡, ”𐴔𐴡𐴦𐴃𐴡𐴌𐴠 𐴎𐴞𐴃𐴞 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.“ ⁵⁵”𐴀𐴡𐴥 𐴔𐴡𐴦𐴃𐴢, 𐴃𐴡𐴌 𐴉𐴡𐴥𐴃𐴝 𐴇𐴡𐴍𐴠𐴥؟𐴀𐴡𐴥 𐴔𐴡𐴦𐴃𐴢, 𐴃𐴡𐴌 𐴐𐴟𐴥𐴔 𐴇𐴡𐴍𐴠𐴥؟“

⁵⁶𐴔𐴡𐴦𐴃𐴡𐴌 𐴐𐴟𐴥𐴔 𐴀𐴡𐴥𐴙𐴓𐴊𐴠 𐴒𐴟𐴕𐴝𐴤, 𐴀𐴝𐴦𐴌 𐴒𐴟𐴕𐴝𐴤𐴌 𐴁𐴡𐴓𐴢 𐴀𐴡𐴥𐴙𐴓𐴊𐴠 𐴐𐴡𐴥𐴌𐴞𐴘𐴡𐴃𐴢.⁵⁷𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌 𐴀𐴡𐴥𐴑, 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝𐴌𐴠 𐴉𐴡𐴥𐴃𐴝 𐴊𐴝𐴕 𐴒𐴡𐴙𐴅𐴧𐴠𐴥.

⁵⁸𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴔𐴡𐴎𐴁𐴟𐴃𐴢 𐴀𐴡𐴥 𐴀𐴝𐴦𐴌 𐴃𐴡𐴥𐴌𐴡𐴑 𐴊𐴡𐴥𐴌𐴞 𐴃𐴝𐴥𐴑𐴡. 𐴔𐴝𐴓𐴞𐴑𐴡𐴌 𐴈𐴝𐴔 𐴇𐴝𐴥𐴔𐴞𐴐𐴝 𐴁𐴞𐴐𐴞𐴤𐴒𐴡𐴌𐴞 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴃𐴟𐴣𐴀𐴝𐴥𐴌𐴝𐴌 𐴔𐴠𐴀𐴕𐴧𐴡𐴃𐴢 𐴁𐴠𐴉𐴡𐴥𐴎𐴟𐴓𐴢 𐴕𐴡.

The Word for the World International

https://app.library.bible/content/87faca8b51c22590