Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 16

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢16

𐴏𐴝𐴣𐴊𐴝 𐴃𐴟𐴓𐴝𐴤𐴌 𐴁𐴝𐴦𐴁𐴟𐴃𐴠

¹𐴘𐴝𐴓𐴝 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴏𐴝𐴣𐴊𐴝 𐴃𐴟𐴓𐴝𐴤𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴃𐴟𐴣𐴀𐴝𐴥𐴌𐴝 𐴀𐴟𐴕𐴊𐴞𐴓𐴧𐴝 𐴒𐴡𐴌𐴡𐴤 𐴎𐴠𐴕𐴊𐴞𐴓𐴧𐴝 𐴀𐴝𐴀𐴛 𐴒𐴝𐴓𐴝𐴃𐴞𐴥𐴘𐴝𐴌 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴓𐴝𐴔.²𐴉𐴡𐴃𐴧𐴞𐴥 𐴇𐴝𐴥𐴉𐴃𐴝𐴌 𐴐𐴟𐴥𐴌𐴟𐴌 𐴊𐴞𐴕، 𐴉𐴡𐴃𐴧𐴞𐴥𐴑𐴞𐴘𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴀𐴝𐴔𐴡𐴊𐴡𐴕𐴞 𐴔𐴡𐴎𐴞𐴕 𐴑𐴠𐴏𐴧𐴟𐴥 𐴄𐴞𐴛𐴝 𐴀𐴝𐴓𐴡𐴑 𐴒𐴡𐴌𐴞𐴥 𐴎𐴡𐴔𐴝 𐴌𐴝𐴑𐴞𐴥𐴘𐴡, 𐴎𐴠𐴀𐴕𐴠 𐴀𐴝𐴀𐴛 𐴀𐴝𐴘𐴓𐴠𐴤 𐴏𐴝𐴣𐴊𐴝 𐴃𐴟𐴓𐴝𐴤 𐴕𐴡 𐴉𐴡𐴌𐴠.³𐴀𐴝𐴀𐴛 𐴇𐴠𐴥𐴍𐴠 𐴀𐴝𐴘𐴓𐴠𐴤, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤𐴌𐴠 𐴁𐴝𐴏𐴞𐴥𐴓𐴡𐴘𐴁𐴝 𐴀𐴞𐴥𐴃𐴝𐴌𐴝𐴌 𐴀𐴝𐴥𐴃𐴡𐴃𐴢 𐴐𐴠𐴣𐴍𐴞𐴥 𐴊𐴞𐴦 𐴀𐴞𐴥𐴃𐴝𐴌𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴥𐴊𐴞𐴘𐴝 𐴀𐴡𐴥𐴑𐴧𐴡𐴓𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴉𐴡𐴀𐴣𐴏𐴝𐴘𐴃𐴡 𐴊𐴞𐴉𐴠𐴍𐴝𐴥𐴘𐴧𐴟𐴔.⁴𐴀𐴝𐴦𐴌 𐴎𐴡𐴊𐴞 𐴀𐴝𐴣𐴀𐴃𐴧𐴟 𐴘𐴡𐴥 𐴎𐴝𐴦 𐴉𐴡𐴌𐴠, 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴎𐴝𐴘𐴁𐴡.

𐴂𐴝𐴥𐴀𐴟𐴓𐴡𐴌 𐴏𐴡𐴉𐴡𐴥𐴌𐴡𐴌 𐴕𐴞𐴘𐴡𐴃𐴢

⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴔𐴝𐴑𐴠𐴊𐴡𐴥𐴕𐴞𐴘𐴝 𐴁𐴝𐴥𐴘 𐴏𐴡𐴉𐴡𐴥𐴌 𐴒𐴡𐴌𐴞𐴥 𐴁𐴝𐴦𐴊𐴠 𐴀𐴝𐴙𐴐𐴧𐴟𐴤𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴔𐴝𐴑𐴠𐴊𐴡𐴥𐴕𐴞𐴘𐴝 𐴁𐴝𐴥𐴘 𐴏𐴡𐴉𐴡𐴥𐴌 𐴒𐴡𐴙𐴅𐴧𐴟𐴥𐴔.⁶𐴀𐴡𐴥𐴘𐴃𐴡𐴉𐴝𐴌𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴇𐴡𐴦𐴊𐴧𐴞𐴕 𐴃𐴝𐴥𐴑𐴞𐴘𐴟𐴔, 𐴘𐴝𐴥 𐴉𐴟𐴌𐴝 𐴐𐴞𐴥𐴃𐴑𐴝𐴓𐴢 𐴀𐴟𐴥𐴊𐴧𐴗𐴝 𐴈𐴝𐴍𐴝𐴘𐴧𐴟𐴥𐴔, 𐴎𐴠𐴀𐴕𐴠 𐴀𐴝𐴀𐴛 𐴎𐴠𐴍𐴠𐴥 𐴎𐴝𐴘𐴧𐴟𐴔 𐴇𐴠𐴥 𐴏𐴡𐴉𐴡𐴥𐴌𐴡𐴃𐴢 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴌𐴡𐴖𐴝𐴕𐴝 𐴒𐴡𐴌𐴞𐴥𐴊𐴞 𐴉𐴝𐴌𐴡.⁷𐴀𐴝𐴀𐴛 𐴀𐴠𐴇𐴡𐴥𐴕 𐴎𐴝𐴘𐴁𐴝𐴌 𐴉𐴡𐴣𐴃𐴡𐴃𐴢 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴔𐴞𐴓𐴃𐴡 𐴕𐴡 𐴏𐴝𐴀𐴙𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴑𐴠𐴏𐴧𐴟𐴥 𐴄𐴝𐴙𐴔 𐴈𐴝𐴍𐴝𐴘 𐴁𐴡𐴓𐴧𐴝 𐴀𐴝𐴐𐴝𐴤 𐴒𐴡𐴌𐴞𐴥𐴌, 𐴎𐴡𐴊𐴞 𐴔𐴝𐴓𐴞𐴑𐴠 𐴀𐴠𐴎𐴝𐴎𐴡𐴃𐴢 𐴊𐴠.⁸𐴔𐴡𐴕𐴃𐴡𐴌 𐴀𐴝𐴀𐴛 𐴀𐴞𐴥𐴉𐴞𐴏𐴝𐴏𐴡𐴃𐴢 𐴂𐴠𐴕𐴄𐴞𐴑𐴡𐴏𐴢 𐴀𐴞𐴊𐴢 𐴉𐴡𐴙𐴅𐴧𐴡𐴕𐴃𐴡 𐴃𐴝𐴥𐴑𐴞𐴘𐴟𐴔,⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴝𐴥𐴌 𐴀𐴡𐴥 𐴊𐴠 𐴈𐴝𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴣𐴀𐴌 𐴓𐴧𐴝 𐴀𐴠𐴑𐴧𐴝𐴥𐴕 𐴁𐴡𐴥𐴋𐴧𐴝 𐴊𐴡𐴌𐴡𐴎𐴝 𐴑𐴟𐴥𐴙𐴓𐴧𐴠, 𐴀𐴝𐴦𐴌 𐴔𐴟𐴈𐴝𐴥𐴓𐴠𐴉𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴁𐴞𐴐𐴞𐴤 𐴀𐴝𐴏𐴠𐴤.

¹⁰𐴎𐴡𐴊𐴞 𐴃𐴞𐴔𐴡𐴥𐴃𐴞 𐴀𐴝𐴘𐴧𐴠𐴤, 𐴏𐴝𐴘𐴧𐴡𐴥, 𐴘𐴡𐴥𐴒𐴧𐴗𐴝 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴇𐴡𐴕𐴡𐴤 𐴋𐴡𐴦𐴌 𐴏𐴝𐴥𐴌𐴝 𐴃𐴝𐴥𐴑𐴞 𐴉𐴝𐴌𐴠 𐴉𐴝𐴥𐴕, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴘𐴡𐴥 𐴔𐴝𐴓𐴞𐴑𐴡𐴌 𐴈𐴝𐴔 𐴀𐴠𐴥𐴕𐴝 𐴒𐴡𐴌𐴠𐴥𐴌.¹¹𐴇𐴠𐴥𐴃𐴡𐴓𐴧𐴝 𐴇𐴡𐴕𐴡𐴤𐴑𐴞𐴘𐴠 𐴘𐴡𐴥𐴒𐴧𐴗𐴝𐴌𐴠 𐴇𐴠𐴥𐴑𐴝𐴌𐴡𐴃𐴢 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴏𐴡𐴉𐴡𐴥𐴌𐴡𐴃𐴢 𐴌𐴡𐴖𐴝𐴕𐴝 𐴒𐴡𐴌𐴞𐴥𐴊𐴞𐴘𐴡, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴘𐴁𐴡𐴤 𐴁𐴡𐴥𐴓𐴞 𐴀𐴝𐴐𐴝𐴤 𐴒𐴡𐴌𐴞𐴥𐴌.

¹²𐴘𐴝𐴓𐴝 𐴀𐴝𐴣𐴀𐴌𐴝𐴌 𐴁𐴝𐴥𐴘 𐴀𐴝𐴂𐴡𐴥𐴓𐴡𐴏𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴀𐴝𐴀𐴛 𐴘𐴡𐴥𐴒𐴧𐴗𐴝𐴌𐴠 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴉𐴟𐴥𐴖𐴝𐴣𐴃𐴞 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴘 𐴁𐴡𐴓𐴧𐴝 𐴁𐴞𐴐𐴞𐴤𐴒𐴡𐴌𐴞 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴃𐴧𐴟 𐴀𐴠𐴇𐴡𐴥𐴕 𐴀𐴝𐴘𐴁𐴝𐴤𐴌 𐴇𐴡𐴕𐴡𐴤 𐴔𐴡𐴕 𐴕𐴝𐴥𐴘; 𐴀𐴡𐴕𐴠 𐴔𐴡𐴦𐴗𐴑𐴝 𐴉𐴝𐴘𐴓𐴠 𐴀𐴝𐴘𐴁𐴡𐴤.

𐴀𐴝𐴇𐴠𐴥𐴌𐴞 𐴀𐴝𐴌𐴡𐴏𐴢 𐴀𐴠𐴊𐴧𐴠 𐴏𐴡𐴥𐴓𐴝𐴔 𐴀𐴡𐴥𐴑𐴧𐴡𐴓𐴢

¹³𐴀𐴟𐴥𐴣𐴐𐴞𐴘𐴝𐴌 𐴀𐴡𐴥; 𐴀𐴞𐴔𐴝𐴕𐴡𐴃𐴢 𐴊𐴡𐴌𐴡𐴤𐴒𐴡𐴌𐴞 𐴃𐴝𐴥𐴑𐴡; 𐴇𐴞𐴥𐴔𐴧𐴡𐴃𐴢 𐴌𐴝𐴑𐴡𐴥; 𐴔𐴡𐴎𐴁𐴟𐴃𐴢 𐴀𐴡𐴥.¹⁴𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴒𐴡𐴌𐴡𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴔𐴟𐴇𐴝𐴥𐴁𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴒𐴡𐴌𐴡𐴤.

¹⁵𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴠𐴏𐴄𐴠𐴉𐴝𐴥𐴕𐴝𐴏𐴡𐴌 𐴒𐴡𐴥𐴌 𐴄𐴞𐴥𐴘𐴝 𐴀𐴡𐴥𐴙𐴓𐴊𐴠 𐴀𐴝𐴑𐴝𐴘𐴝 𐴀𐴠𐴓𐴝𐴑𐴝𐴌 𐴉𐴡𐴀𐴘𐴓𐴝 𐴀𐴞𐴔𐴝𐴕𐴊𐴝𐴥𐴌, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴊𐴔𐴡𐴃𐴡𐴃𐴢 𐴕𐴞𐴎𐴡𐴌𐴠𐴥 𐴒𐴡𐴏𐴝𐴥𐴘𐴊𐴞𐴘𐴠. 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴞𐴐𐴞𐴤𐴒𐴡𐴌𐴞 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌,¹⁶𐴃𐴟𐴣𐴀𐴝𐴥𐴌𐴝 𐴘𐴡𐴥 𐴕𐴞𐴎𐴡𐴌𐴠𐴥 𐴀𐴞𐴥𐴃𐴝𐴌𐴝𐴌 𐴋𐴡𐴥𐴙𐴓𐴧𐴝 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡; 𐴇𐴠𐴥𐴕𐴊𐴞𐴓𐴧𐴝, 𐴎𐴠𐴃𐴡𐴥 𐴎𐴡𐴕 𐴇𐴠𐴥 𐴈𐴝𐴔𐴡𐴃𐴢 𐴀𐴠𐴊𐴧𐴠 𐴔𐴠𐴀𐴕𐴧𐴡𐴃𐴡𐴃𐴢 𐴐𐴡𐴥𐴌𐴞𐴑 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴘𐴡𐴥 𐴒𐴡𐴏𐴝𐴥𐴘𐴊𐴡.¹⁷𐴀𐴝𐴀𐴛 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴞, 𐴀𐴠𐴏𐴄𐴠𐴉𐴝𐴥𐴕𐴝𐴏𐴢, 𐴉𐴡𐴌𐴃𐴟𐴥𐴕𐴝𐴃𐴟𐴏𐴢, 𐴀𐴠𐴊𐴧𐴠 𐴀𐴝𐴑𐴝𐴘𐴞𐴑𐴟𐴏𐴢 𐴀𐴝𐴙𐴐𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴃𐴡𐴌𐴉𐴡𐴥𐴃𐴧𐴟 𐴎𐴞𐴘𐴝𐴥𐴕 𐴀𐴟𐴕𐴝 𐴀𐴝𐴐𐴧𐴞𐴥𐴓𐴢 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝 𐴉𐴟𐴌𐴝 𐴒𐴡𐴙𐴅𐴧𐴠𐴥.¹⁸𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴌𐴟𐴀𐴌𐴠 𐴉𐴡𐴄𐴉𐴡𐴙𐴄𐴧𐴝 𐴒𐴡𐴙𐴅𐴧𐴠𐴥. 𐴇𐴠𐴥𐴃𐴡𐴓𐴧𐴝, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴙𐴕𐴐𐴡𐴥𐴌𐴠 𐴑𐴡𐴊𐴡𐴌 𐴒𐴡𐴌𐴞𐴥𐴘𐴡.

¹⁹𐴀𐴠𐴐𐴞𐴥𐴘𐴝 𐴀𐴠𐴓𐴝𐴑𐴝𐴌 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴠 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴓𐴝𐴔 𐴎𐴝𐴕𐴝𐴌. 𐴀𐴠𐴑𐴟𐴥𐴘𐴓𐴝 𐴀𐴠𐴊𐴧𐴠 𐴂𐴌𐴞𐴏𐴞𐴥𐴓𐴝𐴘𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴓𐴞𐴑𐴡𐴌 𐴕𐴝𐴔𐴠 𐴊𐴞𐴓𐴡𐴃𐴧𐴟 𐴏𐴡𐴥𐴓𐴝𐴔 𐴎𐴝𐴕𐴝𐴌; 𐴇𐴠𐴥𐴕𐴊𐴞𐴓𐴧𐴝, 𐴀𐴞𐴥𐴃𐴝𐴌𐴝𐴌 𐴒𐴡𐴥𐴌𐴡𐴃𐴢 𐴎𐴡𐴔𐴝 𐴀𐴡𐴥 𐴊𐴠 𐴎𐴡𐴔𐴝𐴥𐴃𐴠 𐴘𐴡𐴥 𐴎𐴝𐴕𐴝𐴌.²⁰𐴃𐴝𐴔𐴝𐴥𐴔 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴓𐴝𐴔 𐴎𐴝𐴕𐴝𐴌. 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴂𐴝𐴑 𐴊𐴞𐴓𐴠 𐴀𐴝𐴂𐴧𐴝𐴤 𐴊𐴞𐴥 𐴏𐴡𐴥𐴓𐴝𐴔 𐴎𐴝𐴕𐴡.

²¹𐴀𐴠 𐴏𐴡𐴥𐴓𐴝𐴔𐴧𐴗𐴝 𐴀𐴝𐴀𐴛 𐴂𐴝𐴥𐴀𐴟𐴓𐴢 𐴕𐴞𐴎𐴡𐴌 𐴀𐴝𐴥𐴃𐴡𐴌 𐴓𐴠𐴑𐴝𐴥.

²²𐴎𐴠𐴦𐴕𐴞𐴑𐴞 𐴔𐴝𐴓𐴞𐴑𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴕𐴡 𐴒𐴡𐴌𐴠𐴥, 𐴀𐴞𐴥𐴃𐴝𐴌 𐴖𐴡𐴌𐴠 𐴒𐴡𐴎𐴧𐴡𐴁𐴢 𐴉𐴡𐴌𐴡𐴗𐴑. 𐴀𐴡𐴥 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑, 𐴀𐴝𐴘𐴧𐴡𐴤.

²³𐴔𐴝𐴓𐴞𐴑 𐴀𐴞𐴏𐴝𐴤𐴌 𐴌𐴝𐴇𐴝𐴥𐴔𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴝𐴌𐴞 𐴃𐴝𐴥𐴑𐴡𐴗𐴑.

²⁴𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌 𐴔𐴟𐴇𐴝𐴥𐴁𐴧𐴡𐴃𐴢 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞 𐴎𐴝𐴌𐴞 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.

The Word for the World International

https://app.library.bible/content/87faca8b51c22590