Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 14

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢14

𐴒𐴝𐴁𐴞 𐴎𐴟𐴁𐴝𐴕 𐴀𐴠𐴊𐴧𐴠 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴝𐴥

¹𐴔𐴟𐴇𐴝𐴥𐴁𐴧𐴡𐴃𐴡𐴌 𐴉𐴞𐴏𐴝𐴥 𐴊𐴡𐴌𐴡, 𐴀𐴝𐴦𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴌𐴟𐴀𐴈𐴝𐴥𐴕𐴞𐴌 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴘𐴡𐴥 𐴁𐴞𐴐𐴞𐴤𐴒𐴡𐴌𐴞 𐴀𐴝𐴎𐴧𐴟 𐴒𐴡𐴌𐴡𐴤, 𐴈𐴝𐴥𐴀𐴏𐴒𐴡𐴌𐴞 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥𐴁𐴝𐴌 𐴕𐴞𐴘𐴝𐴔𐴡𐴃𐴢 𐴀𐴡𐴓𐴧𐴝.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴘𐴡𐴥𐴒𐴧𐴗𐴝𐴘𐴠 𐴔𐴝𐴕𐴟𐴥𐴙𐴐𐴡𐴌 𐴇𐴝𐴣𐴏𐴠 𐴈𐴡𐴀 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴈𐴡𐴀 𐴊𐴠. 𐴘𐴡𐴥𐴒𐴧𐴗𐴝𐴌 𐴈𐴡𐴃𐴝𐴤 𐴃𐴡 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴁𐴟𐴎𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴒𐴟𐴉𐴡𐴕 𐴈𐴡𐴃𐴝𐴤 𐴈𐴡𐴀 𐴊𐴠 𐴀𐴡𐴥𐴙𐴓𐴊𐴠 𐴌𐴟𐴀𐴌 𐴁𐴡𐴓𐴠.³𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴁𐴠 𐴈𐴡𐴀, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴃𐴡𐴌𐴑𐴞 𐴀𐴡𐴥, 𐴁𐴡𐴓𐴢 𐴉𐴝𐴦, 𐴀𐴠𐴊𐴧𐴠 𐴃𐴡𐴏𐴡𐴥𐴓𐴧𐴞 𐴉𐴝𐴦.⁴𐴎𐴠𐴦𐴕𐴞𐴑𐴞 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌𐴠𐴥 𐴁𐴠 𐴃𐴡𐴌𐴑𐴞 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴎𐴡𐴔𐴝𐴥𐴃𐴡𐴌𐴠 𐴁𐴠 𐴃𐴡𐴌𐴑𐴞 𐴒𐴡𐴌𐴠𐴥.⁵𐴀𐴝𐴀𐴛 𐴏𐴝𐴀𐴘𐴢 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴁𐴠𐴒𐴧𐴟𐴥𐴕𐴠 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴔𐴡𐴕𐴃𐴡𐴌 𐴁𐴠𐴦𐴐𐴇𐴞𐴥𐴏𐴧𐴝 𐴘𐴝𐴀𐴕 𐴏𐴝𐴀𐴘𐴢 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴡𐴤. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴎𐴡𐴊𐴞 𐴎𐴡𐴔𐴝𐴥𐴃𐴡𐴌 𐴃𐴡𐴌𐴑𐴞𐴓𐴧𐴝 𐴇𐴞𐴥𐴀𐴕 𐴁𐴝𐴥𐴚𐴒𐴞 𐴕𐴡 𐴊𐴠𐴥, 𐴃𐴡𐴥𐴀𐴘𐴓𐴠 𐴃𐴡 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥 𐴀𐴞𐴥𐴁𐴝 𐴘𐴡𐴥𐴒𐴧𐴗𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌.

⁶𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴎𐴡𐴊𐴞 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀𐴘𐴢, 𐴔𐴡𐴕𐴃𐴡𐴌 𐴇𐴞𐴥𐴀𐴕𐴡𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴏𐴡𐴥𐴘𐴧𐴞𐴌 𐴎𐴝𐴇𐴠𐴥𐴌𐴞𐴌 𐴈𐴡𐴃𐴝𐴤, 𐴘𐴝𐴥 𐴎𐴝𐴕𐴑𐴝𐴌𐴞𐴌 𐴈𐴡𐴃𐴝𐴤, 𐴘𐴝𐴥 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴈𐴡𐴃𐴝𐴤, 𐴘𐴝𐴥 𐴃𐴝𐴦𐴓𐴞𐴔𐴡𐴌 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡 𐴈𐴡𐴀𐴘𐴢, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴃𐴧𐴟 𐴑𐴞𐴦 𐴉𐴝𐴥𐴘𐴊𐴝 𐴉𐴝𐴘𐴁𐴝؟⁷𐴑𐴞 𐴁𐴝𐴐𐴞𐴤 𐴑𐴞 𐴁𐴞𐴕𐴝, 𐴇𐴠𐴥 𐴎𐴝𐴕 𐴏𐴝𐴥𐴌𐴝 𐴅𐴞𐴕𐴞𐴥𐴐𐴢 𐴇𐴞𐴥𐴀𐴕𐴡𐴃𐴧𐴟 𐴎𐴡𐴊𐴞 𐴀𐴝𐴁𐴝𐴏𐴢 𐴕𐴠𐴦𐴙𐴓𐴃𐴠 𐴀𐴝𐴓𐴡𐴑-𐴀𐴝𐴓𐴡𐴑 𐴀𐴝𐴁𐴝𐴏𐴢 𐴕𐴡 𐴕𐴠𐴦𐴙𐴓𐴃𐴡, 𐴃𐴡𐴥𐴀𐴘𐴓𐴠 𐴁𐴝𐴐𐴞𐴤𐴃𐴢 𐴘𐴝𐴥 𐴁𐴞𐴕𐴝𐴃𐴢 𐴑𐴞𐴦 𐴁𐴝𐴎𐴝𐴌 𐴊𐴠 𐴇𐴞𐴥𐴘𐴝𐴕 𐴑𐴠𐴀𐴕𐴒𐴡𐴌𐴞 𐴏𐴞𐴕𐴝𐴥 𐴎𐴝𐴘𐴃𐴡؟⁸𐴐𐴞𐴥𐴛𐴝𐴘𐴠 𐴎𐴡𐴊𐴞 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴐𐴞𐴥𐴛𐴝𐴌 𐴀𐴝𐴁𐴝𐴏𐴢 𐴕𐴡 𐴊𐴠, 𐴃𐴡𐴥𐴀𐴘𐴓𐴠 𐴓𐴝𐴌𐴝𐴥𐴘 𐴓𐴧𐴝 𐴇𐴡𐴕𐴠 𐴃𐴡𐴘𐴧𐴝𐴌 𐴀𐴡𐴥𐴘𐴁𐴡؟⁹𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴎𐴡𐴊𐴞 𐴀𐴡𐴙𐴕𐴧𐴡 𐴎𐴡𐴕𐴠 𐴕𐴡 𐴁𐴟𐴎𐴠𐴥 𐴊𐴠 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴈𐴡𐴀𐴌 𐴊𐴠 𐴇𐴞𐴥𐴀𐴕 𐴑𐴠𐴀𐴕𐴒𐴡𐴌𐴞 𐴁𐴟𐴎𐴝𐴥 𐴎𐴝𐴘𐴁𐴡؟ 𐴃𐴟𐴣𐴀𐴝𐴥𐴌𐴝 𐴃𐴡 𐴁𐴡𐴘𐴧𐴝𐴌 𐴓𐴡𐴘 𐴈𐴡𐴃𐴝𐴤 𐴈𐴡𐴀𐴌 𐴉𐴝𐴥𐴕 𐴀𐴡𐴥𐴘𐴁𐴡.¹⁰𐴁𐴠𐴐𐴡𐴥𐴑, 𐴊𐴟𐴕𐴞𐴘𐴝𐴙𐴃𐴢 𐴔𐴝𐴎𐴠𐴥 𐴁𐴠𐴐𐴝𐴤𐴁𐴞𐴐𐴞𐴤 𐴎𐴟𐴁𐴝𐴕 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴀𐴠𐴑𐴒𐴗𐴝𐴥 𐴘𐴡𐴥 𐴔𐴝𐴀𐴕𐴞 𐴏𐴝𐴥𐴌𐴝 𐴕𐴡.¹¹𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴀𐴝𐴀𐴛 𐴎𐴠 𐴎𐴟𐴁𐴝𐴕 𐴈𐴡𐴀𐴌 𐴇𐴠𐴥 𐴎𐴟𐴁𐴝𐴕 𐴕𐴡 𐴁𐴟𐴎𐴞𐴥, 𐴃𐴡𐴥𐴀𐴘𐴓𐴠 𐴃𐴡 𐴈𐴡𐴀𐴌 𐴊𐴠 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴀𐴝𐴀𐴛 𐴁𐴞𐴊𐴠𐴐𐴡𐴥𐴙𐴃𐴧𐴝𐴌 𐴋𐴡𐴥𐴙𐴓𐴧𐴝, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴇𐴝𐴣𐴏𐴠 𐴁𐴞𐴊𐴠𐴐𐴡𐴥𐴙𐴃𐴧𐴝𐴌 𐴋𐴡𐴥𐴙𐴓𐴧𐴝.¹²𐴈𐴡𐴃𐴝𐴤 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝𐴓𐴧𐴝 𐴘𐴡𐴥 𐴇𐴝𐴥𐴍𐴠. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴌𐴟𐴀𐴈𐴝𐴥𐴕𐴞𐴌 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴞𐴐𐴞𐴤 𐴀𐴝𐴎𐴧𐴟 𐴀𐴝𐴏𐴠𐴤, 𐴃𐴟𐴣𐴀𐴝𐴥𐴌𐴝 𐴀𐴟𐴕𐴊𐴞𐴓𐴧𐴝 𐴕𐴞𐴘𐴝𐴔𐴡𐴃𐴡𐴓𐴧𐴝 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴢 𐴒𐴡𐴌𐴡𐴤, 𐴎𐴞𐴀𐴕𐴠 𐴎𐴡𐴔𐴝𐴥𐴃𐴡𐴌𐴠 𐴃𐴡𐴌𐴑𐴞 𐴒𐴡𐴌𐴠𐴥.

¹³𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴀𐴕 𐴁𐴝𐴥𐴚𐴒𐴞𐴊𐴞 𐴉𐴝𐴌𐴞 𐴁𐴡𐴓𐴧𐴝 𐴊𐴟𐴖𐴝 𐴒𐴡𐴌𐴡𐴥𐴗𐴑.¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴝𐴀𐴛 𐴒𐴝𐴁𐴞 𐴎𐴟𐴁𐴝𐴕𐴠 𐴊𐴟𐴖𐴝 𐴒𐴡𐴌𐴞𐴥, 𐴃𐴡𐴥𐴀𐴘𐴓𐴠 𐴃𐴡 𐴀𐴝𐴣𐴀𐴌 𐴌𐴟𐴀𐴘𐴠 𐴀𐴠𐴥𐴕𐴝 𐴒𐴡𐴌𐴠𐴥𐴌, 𐴔𐴡𐴕𐴃𐴡𐴌 𐴀𐴝𐴣𐴀𐴌 𐴔𐴡𐴕𐴠 𐴑𐴠𐴏𐴧𐴟𐴥 𐴕𐴡 𐴒𐴡𐴌𐴠𐴥𐴌.¹⁵𐴃𐴡𐴥𐴀𐴘𐴓𐴠 𐴀𐴝𐴣𐴀𐴃𐴧𐴟 𐴑𐴞𐴦 𐴒𐴡𐴌𐴝𐴥𐴌 𐴎𐴡𐴌𐴟𐴌؟ 𐴀𐴝𐴀𐴛 𐴌𐴟𐴀𐴌 𐴏𐴝𐴥𐴀𐴣𐴃𐴠 𐴘𐴡𐴥 𐴊𐴟𐴖𐴝 𐴒𐴡𐴙𐴅𐴧𐴟𐴥𐴔, 𐴔𐴡𐴕𐴡𐴌 𐴏𐴝𐴥𐴀𐴣𐴃𐴠 𐴘𐴡𐴥 𐴊𐴟𐴖𐴝 𐴒𐴡𐴙𐴅𐴧𐴟𐴥𐴔. 𐴀𐴝𐴀𐴛 𐴌𐴟𐴀𐴌 𐴏𐴝𐴥𐴀𐴣𐴃𐴠 𐴘𐴡𐴥 𐴏𐴠𐴀𐴌 𐴒𐴝𐴘𐴧𐴟𐴥𐴔, 𐴔𐴡𐴕𐴡𐴌 𐴏𐴝𐴥𐴀𐴣𐴃𐴠 𐴘𐴡𐴥 𐴏𐴠𐴀𐴌 𐴒𐴝𐴘𐴧𐴟𐴥𐴔.¹⁶𐴀𐴝𐴌𐴕𐴡𐴥𐴘𐴓𐴠, 𐴎𐴡𐴊𐴞 𐴃𐴟𐴀𐴛 𐴏𐴞𐴌𐴞𐴥𐴉𐴢 𐴌𐴟𐴀𐴌 𐴏𐴝𐴥𐴀𐴣𐴃𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴐𐴝𐴥𐴊𐴝𐴌𐴝𐴕 𐴔𐴝𐴕𐴟𐴥𐴙𐴐𐴠 𐴃𐴟𐴣𐴀𐴝𐴥𐴣𐴌 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴝𐴥𐴃𐴢 ”𐴀𐴝𐴦𐴔𐴞𐴕“ 𐴑𐴠𐴀𐴕𐴒𐴡𐴌𐴞 𐴈𐴡𐴀𐴘𐴢 𐴉𐴝𐴌𐴞𐴁𐴡𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴃𐴡 𐴃𐴟𐴀𐴛 𐴑𐴞𐴦 𐴈𐴡𐴀𐴌 𐴊𐴠 𐴕𐴡 𐴁𐴟𐴎𐴠𐴥𐴌.¹⁷𐴁𐴠𐴐𐴡𐴥𐴑 𐴃𐴟𐴀𐴛 𐴐𐴟𐴥𐴕𐴊𐴡𐴌𐴒𐴡𐴌𐴞 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴡𐴤𐴌, 𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴎𐴡𐴕 𐴃𐴡𐴌𐴑𐴞 𐴕𐴡 𐴀𐴡𐴥𐴌.

¹⁸𐴀𐴝𐴀𐴛 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴈𐴡𐴀𐴘𐴢.¹⁹𐴔𐴡𐴕𐴃𐴡𐴌 𐴎𐴡𐴔𐴝𐴥𐴃𐴡𐴃𐴢 𐴔𐴝𐴥𐴎𐴠 𐴒𐴝𐴁𐴞 𐴎𐴟𐴁𐴝𐴕𐴠 𐴊𐴡𐴐𐴢 𐴀𐴝𐴥𐴎𐴝𐴌 𐴈𐴡𐴃𐴝𐴤 𐴈𐴡𐴖𐴝𐴤𐴌 𐴃𐴟𐴥𐴖𐴝𐴌𐴡, 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴀𐴛 𐴁𐴟𐴎𐴝𐴥 𐴎𐴝 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴉𐴝𐴣𐴏𐴢 𐴏𐴝𐴥𐴕 𐴈𐴡𐴃𐴝𐴤 𐴈𐴡𐴖𐴝𐴤 𐴁𐴝𐴏𐴞𐴥𐴘𐴟𐴔.

²⁰𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕, 𐴁𐴟𐴎𐴝𐴥𐴃𐴢 𐴉𐴟𐴀𐴝𐴙𐴕 𐴕𐴡 𐴁𐴡𐴙𐴕𐴧𐴡. 𐴁𐴟𐴌𐴝𐴙𐴃𐴢 𐴒𐴟𐴌𐴝 𐴉𐴟𐴀𐴝𐴙𐴕 𐴁𐴡𐴕𐴡, 𐴔𐴡𐴕𐴃𐴡𐴌 𐴁𐴟𐴎𐴝𐴥𐴃𐴢 𐴁𐴝𐴓𐴡𐴑 𐴀𐴡𐴥.²¹𐴐𐴡𐴥𐴌𐴞𐴘𐴡𐴃𐴡𐴃𐴢 𐴀𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤, 𐴔𐴝𐴁𐴟𐴊𐴠 𐴉𐴡𐴥𐴌𐴔𐴝𐴌 𐴊𐴠,”𐴔𐴝𐴙𐴕𐴐𐴡𐴥𐴌 𐴀𐴡𐴏𐴞𐴕 𐴎𐴟𐴁𐴝𐴕𐴠𐴀𐴠𐴊𐴧𐴠 𐴁𐴞𐴊𐴠𐴐𐴡𐴥𐴙𐴃𐴧𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴑𐴠𐴥𐴀𐴝𐴀𐴛 𐴀𐴠 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤𐴌 𐴇𐴝𐴣𐴏𐴠 𐴈𐴡𐴃𐴝𐴤 𐴈𐴡𐴘𐴧𐴟𐴥𐴔,𐴀𐴝𐴦𐴌 𐴃𐴡𐴀 𐴀𐴟𐴥𐴊𐴧𐴗𐴝 𐴀𐴞𐴃𐴝𐴌𐴝𐴤 𐴀𐴝𐴣𐴀𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴕𐴞𐴁𐴡.“

²²𐴇𐴞𐴥𐴘𐴝𐴕𐴠 𐴁𐴟𐴎𐴝𐴥 𐴎𐴝𐴌 𐴊𐴠, 𐴒𐴝𐴁𐴞 𐴎𐴟𐴁𐴝𐴕 𐴀𐴡𐴥𐴑𐴧𐴡𐴓𐴢 𐴀𐴡𐴥𐴙𐴓𐴊𐴠 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕, 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴡. 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴝𐴥 𐴀𐴡𐴥𐴙𐴓𐴊𐴠 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴀𐴡𐴓𐴧𐴝, 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴡.²³𐴇𐴠𐴥𐴃𐴡𐴓𐴧𐴝 𐴎𐴡𐴊𐴞 𐴉𐴟𐴌𐴝 𐴎𐴡𐴔𐴝𐴥𐴃𐴢 𐴀𐴠𐴑 𐴎𐴝𐴒𐴝𐴃𐴢 𐴎𐴡𐴔𐴝 𐴀𐴡𐴥𐴘 𐴁𐴠𐴒𐴧𐴟𐴥𐴕𐴠 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴀𐴝𐴦𐴌 𐴇𐴠𐴥𐴍𐴠 𐴁𐴝𐴀𐴌𐴒𐴗𐴝 𐴔𐴝𐴕𐴟𐴥𐴙𐴐𐴢 𐴘𐴝𐴥 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴀𐴝𐴘𐴧𐴠𐴤, 𐴀𐴞𐴥𐴃𐴝𐴌𐴝 𐴑𐴞𐴥 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴦𐴓𐴢 𐴕𐴡 𐴈𐴡𐴘𐴁𐴡𐴤 𐴕𐴠𐴥؟²⁴𐴔𐴡𐴕𐴃𐴡𐴌 𐴎𐴡𐴊𐴞 𐴁𐴠𐴒𐴧𐴟𐴥𐴕𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴡𐴤, 𐴀𐴝𐴦𐴌 𐴇𐴠𐴥𐴍𐴠 𐴇𐴡𐴕𐴡𐴤 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴘𐴝𐴥 𐴁𐴝𐴀𐴌𐴒𐴗𐴝 𐴔𐴝𐴕𐴟𐴥𐴙𐴐𐴢 𐴀𐴝𐴘𐴧𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴊𐴟𐴖𐴝𐴌𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴒𐴟𐴕𐴝𐴤𐴒𐴝𐴌 𐴊𐴠 𐴏𐴝𐴥𐴁𐴟𐴃𐴢 𐴉𐴝𐴘𐴁𐴡, 𐴀𐴝𐴦𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴊𐴟𐴖𐴝𐴌𐴝 𐴘𐴡𐴥𐴒𐴧𐴗𐴝𐴌 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝𐴘𐴁𐴡.²⁵𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴘𐴡𐴥𐴒𐴧𐴗𐴝𐴌 𐴊𐴞𐴓𐴡𐴌 𐴒𐴟𐴉𐴡𐴕𐴞 𐴀𐴡𐴥𐴑𐴧𐴡𐴓𐴢 𐴎𐴝𐴇𐴠𐴥𐴌 𐴀𐴡𐴥𐴘𐴎𐴝𐴘𐴁𐴡𐴘; 𐴀𐴝𐴦𐴌 𐴘𐴡𐴥𐴒𐴧𐴗𐴝𐴘𐴠 𐴇𐴠𐴥𐴣𐴃𐴧𐴠 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞 𐴀𐴝𐴓𐴧𐴝𐴌𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥𐴁𐴡 𐴀𐴝𐴦𐴌 𐴈𐴡𐴘𐴁𐴡𐴤 𐴊𐴠, ”𐴀𐴝𐴓𐴧𐴝 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴃𐴟𐴣𐴀𐴝𐴥𐴌𐴝𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴀𐴝𐴏𐴠𐴤.“

𐴇𐴝𐴥𐴀𐴌 𐴑𐴠𐴏𐴧𐴟𐴥 𐴕𐴞𐴘𐴡𐴔-𐴕𐴞𐴘𐴡𐴔𐴠 𐴀𐴡𐴥𐴕 𐴎𐴡𐴌𐴟𐴌

²⁶𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴡𐴥𐴀𐴘𐴓𐴠 𐴑𐴞𐴦 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥؟ 𐴃𐴟𐴣𐴀𐴝𐴥𐴌𐴝 𐴎𐴠𐴣𐴃𐴧𐴠𐴥 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴀𐴡𐴥, 𐴇𐴠𐴥𐴣𐴃𐴧𐴠 𐴃𐴡 𐴃𐴟𐴣𐴀𐴝𐴥𐴌𐴝 𐴑𐴞𐴘𐴡𐴥𐴃𐴧𐴟 𐴏𐴠𐴀𐴌 𐴃𐴝𐴥𐴑𐴠, 𐴑𐴞𐴘𐴡𐴥𐴃𐴧𐴟 𐴃𐴝𐴦𐴓𐴞𐴔 𐴃𐴝𐴥𐴑𐴠, 𐴑𐴞𐴘𐴡𐴥𐴃𐴧𐴟 𐴖𐴝𐴈𐴞𐴤 𐴃𐴝𐴥𐴑𐴠, 𐴑𐴞𐴘𐴡𐴥𐴃𐴧𐴟 𐴒𐴝𐴁𐴞 𐴎𐴟𐴁𐴝𐴕 𐴃𐴝𐴥𐴑𐴠, 𐴀𐴝𐴦𐴌 𐴑𐴞𐴘𐴡𐴥𐴃𐴧𐴟 𐴇𐴠𐴥 𐴎𐴟𐴁𐴝𐴕 𐴁𐴝𐴥𐴚𐴒𐴞 𐴊𐴞𐴥𐴁𐴝𐴌 𐴃𐴝𐴥𐴑𐴠. 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴡𐴔𐴝𐴥𐴃𐴡𐴌 𐴃𐴡𐴌𐴑𐴞𐴓𐴧𐴝 𐴀𐴡𐴥𐴖𐴝𐴌 𐴎𐴡𐴌𐴟𐴌.²⁷𐴎𐴡𐴊𐴞 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀, 𐴊𐴟𐴘 𐴎𐴡𐴕𐴠 𐴘𐴝𐴥 𐴁𐴞𐴐𐴞𐴤𐴃𐴧𐴟 𐴁𐴞𐴐𐴞𐴤 𐴃𐴞𐴕 𐴎𐴡𐴕𐴠 𐴈𐴡𐴀𐴗𐴑; 𐴀𐴞𐴥𐴃𐴝𐴌𐴝 𐴀𐴠𐴑𐴎𐴡𐴕 𐴀𐴠𐴑𐴎𐴡𐴕 𐴒𐴡𐴌𐴞 𐴈𐴡𐴀𐴗𐴑, 𐴀𐴝𐴦𐴌 𐴀𐴝𐴌 𐴀𐴠𐴑𐴎𐴡𐴕𐴠 𐴇𐴞𐴥𐴀𐴕 𐴁𐴝𐴥𐴚𐴒𐴞𐴊𐴡𐴖𐴑;²⁸𐴔𐴡𐴕𐴃𐴡𐴌 𐴎𐴡𐴊𐴞 𐴁𐴝𐴥𐴚𐴒𐴞𐴊𐴡𐴘𐴝 𐴕𐴡 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝 𐴎𐴡𐴔𐴝𐴥𐴃𐴡𐴃𐴢 𐴕𐴞𐴎𐴝𐴥𐴔 𐴔𐴝𐴥𐴌𐴞 𐴃𐴝𐴥𐴑𐴡𐴗𐴑; 𐴀𐴝𐴦𐴌 𐴕𐴞𐴎𐴡𐴌 𐴓𐴧𐴡𐴘 𐴀𐴠𐴊𐴧𐴠 𐴀𐴝𐴓𐴧𐴝 𐴓𐴧𐴡𐴘 𐴈𐴡𐴀𐴗𐴑.

²⁹𐴇𐴠𐴥𐴕𐴊𐴞𐴓𐴧𐴝, 𐴎𐴠𐴃𐴝𐴌𐴝𐴤 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴈𐴡𐴃𐴝𐴤 𐴈𐴡𐴀 𐴀𐴞𐴥𐴃𐴝𐴌𐴝 𐴊𐴟𐴘 𐴎𐴡𐴕𐴠 𐴘𐴝𐴥 𐴃𐴞𐴕 𐴎𐴡𐴕𐴠 𐴈𐴡𐴀𐴗𐴑, 𐴀𐴝𐴦𐴌 𐴀𐴝𐴌𐴒𐴟𐴥𐴕𐴠 𐴇𐴞𐴥𐴀𐴕 𐴃𐴝𐴊𐴝𐴌𐴡𐴃𐴢 𐴒𐴡𐴌𐴞𐴥 𐴏𐴡𐴗𐴀𐴑.³⁰𐴔𐴡𐴕𐴃𐴡𐴌 𐴎𐴡𐴊𐴞 𐴇𐴠𐴥𐴍𐴠 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠 𐴊𐴠 𐴀𐴠𐴥𐴎𐴧𐴡𐴕𐴡𐴌 𐴇𐴝𐴣𐴏𐴠 𐴇𐴡𐴕𐴡𐴤 𐴖𐴝𐴈𐴞𐴤 𐴀𐴝𐴘𐴧𐴠𐴤, 𐴃𐴡𐴥𐴀𐴘𐴓𐴠 𐴀𐴝𐴒𐴠 𐴓𐴡𐴥𐴃𐴞 𐴎𐴠𐴦𐴕𐴞𐴑𐴞 𐴈𐴡𐴀𐴌 𐴘𐴡𐴥𐴒𐴧𐴗𐴝 𐴕𐴞𐴎𐴝𐴥𐴔 𐴀𐴡𐴥𐴘𐴎𐴡𐴒𐴧𐴡𐴘.³¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴠 𐴀𐴠𐴑𐴎𐴡𐴕 𐴀𐴠𐴑𐴎𐴡𐴕 𐴒𐴡𐴌𐴞 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥, 𐴎𐴠𐴀𐴕𐴠 𐴁𐴠𐴒𐴧𐴟𐴥𐴕𐴠 𐴐𐴞𐴥𐴑𐴠 𐴀𐴝𐴦𐴌 𐴁𐴠𐴒𐴧𐴟𐴥𐴕𐴠 𐴅𐴡𐴏𐴁𐴝 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥.³²𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴌𐴟𐴀 𐴃𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴡𐴁𐴎𐴝𐴃𐴢 𐴀𐴠𐴥𐴕𐴝 𐴃𐴝𐴥𐴑𐴠.³³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝 𐴃𐴡 𐴐𐴟𐴥𐴑𐴐𐴝𐴑𐴡𐴌 𐴀𐴝𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴐𐴝𐴥𐴕𐴃𐴞𐴌, 𐴎𐴠𐴕𐴊𐴞𐴓𐴧𐴝 𐴕𐴞𐴑𐴞 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴃𐴝𐴔𐴝𐴥𐴔 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴃𐴢 𐴀𐴝𐴏𐴠𐴤.

³⁴𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝𐴥𐴃𐴡𐴃𐴢 𐴕𐴞𐴎𐴝𐴥𐴔 𐴔𐴝𐴥𐴌𐴞 𐴃𐴝𐴥𐴑𐴡𐴗𐴑; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴔𐴝𐴃𐴞𐴁𐴝𐴥𐴌 𐴀𐴠𐴎𐴝𐴎𐴡𐴃𐴢 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝 𐴉𐴡𐴥𐴌𐴔𐴝𐴊𐴝𐴌 𐴃𐴝𐴥𐴑𐴡𐴗𐴑, 𐴎𐴠𐴕𐴊𐴞𐴓𐴧𐴝 𐴐𐴡𐴥𐴌𐴞𐴘𐴡𐴃𐴠 𐴘𐴡𐴥 𐴈𐴡𐴀.³⁵𐴎𐴡𐴊𐴞 𐴀𐴞𐴥𐴃𐴝𐴌𐴝𐴃𐴧𐴟 𐴑𐴠𐴏𐴧𐴟𐴥 𐴐𐴞𐴥𐴑𐴞𐴃𐴡 𐴔𐴡𐴕𐴠𐴈𐴡𐴀, 𐴃𐴡𐴥𐴀𐴘𐴓𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴃𐴧𐴟 𐴒𐴡𐴥𐴌𐴡𐴃𐴢 𐴔𐴝𐴥𐴎𐴠 𐴉𐴟𐴏𐴝𐴥𐴌 𐴒𐴡𐴌𐴡𐴥𐴗𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴘𐴝𐴉𐴟𐴀𐴝𐴙𐴕 𐴎𐴡𐴔𐴝𐴥𐴃𐴡𐴃𐴢 𐴔𐴝𐴃𐴡𐴕 𐴃𐴡 𐴐𐴡𐴥𐴌𐴔𐴡𐴌 𐴈𐴡𐴃𐴝𐴤.

³⁶𐴀𐴝𐴓𐴧𐴝𐴌 𐴑𐴝𐴓𐴝𐴔 𐴑𐴞 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴢 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴙𐴓𐴧𐴠𐴥 𐴊𐴠𐴥؟ 𐴀𐴝𐴦𐴌 𐴕𐴝𐴥𐴑𐴞 𐴇𐴞𐴥𐴀𐴕 𐴏𐴞𐴌𐴞𐴥𐴉𐴢 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴉𐴡𐴀𐴣𐴙𐴐𐴧𐴠 𐴊𐴠𐴥؟³⁷𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴕𐴞𐴎𐴡𐴌𐴠𐴥 𐴕𐴡𐴁𐴞 𐴘𐴝𐴥 𐴌𐴟𐴀𐴈𐴝𐴥𐴕𐴞 𐴀𐴡𐴓𐴝 𐴔𐴝𐴕𐴟𐴥𐴙𐴐𐴢 𐴁𐴡𐴥𐴓𐴞 𐴄𐴝𐴥𐴀𐴌𐴠, 𐴘𐴡𐴥𐴒𐴧𐴗𐴝𐴃𐴧𐴟 𐴘𐴝𐴀𐴕 𐴔𐴝𐴕𐴞 𐴓𐴡𐴖𐴝 𐴉𐴡𐴌𐴞𐴁𐴡𐴥 𐴊𐴠 𐴑𐴞, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴎𐴞𐴀𐴕 𐴓𐴠𐴑𐴞𐴥𐴌 𐴇𐴞𐴥𐴀𐴕 𐴔𐴝𐴓𐴞𐴑𐴡𐴌 𐴇𐴡𐴥𐴑𐴟𐴔.³⁸𐴔𐴡𐴕𐴃𐴡𐴌 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴔𐴝𐴕𐴞 𐴕𐴡 𐴓𐴡𐴖𐴢, 𐴘𐴡𐴥𐴒𐴧𐴗𐴝𐴌𐴠 𐴘𐴡𐴥 𐴔𐴝𐴕𐴞 𐴓𐴡𐴖𐴝 𐴕𐴡 𐴎𐴝𐴘𐴁𐴡.

³⁹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴞𐴐𐴞𐴤𐴒𐴡𐴌𐴞 𐴀𐴝𐴎𐴧𐴟 𐴒𐴡𐴌𐴡𐴤, 𐴀𐴝𐴦𐴌 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴕𐴡 𐴈𐴡𐴘𐴃𐴡𐴤 𐴔𐴝𐴕𐴝𐴥 𐴕𐴡 𐴒𐴡𐴙𐴅𐴧𐴡𐴥.⁴⁰𐴔𐴡𐴕𐴃𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴏𐴡𐴥𐴘𐴧𐴞𐴒𐴡𐴌𐴞 𐴀𐴠𐴊𐴧𐴠 𐴕𐴞𐴘𐴡𐴔𐴠-𐴕𐴞𐴘𐴡𐴔𐴠 𐴒𐴡𐴌𐴝𐴥𐴌 𐴎𐴡𐴌𐴟𐴌.

The Word for the World International

https://app.library.bible/content/87faca8b51c22590