Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 11

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢11

¹𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴕𐴡𐴔𐴟𐴕𐴝 𐴔𐴡𐴎𐴞𐴕 𐴏𐴡𐴓𐴡, 𐴎𐴠𐴕𐴊𐴞𐴓𐴧𐴝 𐴀𐴝𐴀𐴛 𐴔𐴡𐴀𐴏𐴞𐴤𐴌 𐴕𐴡𐴔𐴟𐴕𐴝 𐴔𐴡𐴎𐴞𐴕 𐴏𐴡𐴓𐴞.

𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥𐴁𐴝𐴌 𐴕𐴞𐴘𐴡𐴔

²𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴣𐴀𐴌𐴠𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴘𐴝𐴦𐴊𐴢 𐴌𐴝𐴑𐴡𐴥 𐴀𐴠𐴊𐴧𐴠 𐴎𐴠 𐴃𐴝𐴦𐴓𐴞𐴔 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴊𐴞𐴘𐴞𐴥 𐴇𐴞𐴥𐴀𐴕 𐴔𐴡𐴎𐴁𐴟𐴃𐴡𐴌 𐴏𐴝𐴥𐴀𐴣𐴃𐴠 𐴊𐴡𐴥𐴌𐴞 𐴀𐴝𐴏𐴡𐴤.³𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴁𐴝𐴃𐴝𐴓𐴝𐴘𐴊𐴞𐴃𐴡 𐴏𐴝𐴀𐴙𐴌, 𐴑𐴞 𐴈𐴡𐴘𐴓𐴠𐴥, 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴉𐴡𐴃𐴧𐴞𐴥 𐴔𐴡𐴌𐴡𐴃𐴉𐴟𐴖𐴝𐴌 𐴔𐴝𐴃𐴝𐴥, 𐴔𐴡𐴌𐴡𐴃𐴉𐴟𐴖𐴝 𐴀𐴡𐴥𐴙𐴓𐴊𐴠 𐴔𐴝𐴘𐴝𐴉𐴟𐴖𐴝𐴌 𐴔𐴝𐴃𐴝𐴥, 𐴀𐴝𐴦𐴌 𐴀𐴝𐴓𐴧𐴝 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤𐴌 𐴔𐴝𐴃𐴝𐴥.⁴𐴎𐴠 𐴔𐴡𐴌𐴡𐴃𐴉𐴟𐴖𐴝𐴘𐴠 𐴕𐴞𐴎𐴡𐴌 𐴔𐴝𐴃𐴝𐴥 𐴒𐴟𐴥𐴌𐴞𐴊𐴞 𐴊𐴟𐴖𐴝 𐴒𐴡𐴌𐴠𐴥 𐴘𐴝𐴥 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥, 𐴀𐴞𐴥𐴃𐴠 𐴕𐴞𐴎𐴡𐴌 𐴔𐴝𐴃𐴝𐴥𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴠𐴥.⁵𐴀𐴝𐴦𐴌 𐴎𐴠 𐴔𐴝𐴘𐴝𐴉𐴟𐴖𐴝𐴘𐴠 𐴀𐴟𐴙𐴊𐴧𐴝 𐴔𐴝𐴃𐴝𐴥 𐴊𐴟𐴖𐴝 𐴒𐴡𐴌𐴠𐴥 𐴘𐴝𐴥 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥, 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴝𐴃𐴝𐴥𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌 𐴔𐴝𐴃𐴝𐴥 𐴀𐴠𐴣𐴌𐴝𐴘𐴧𐴝 𐴔𐴝𐴃𐴝𐴥 𐴓𐴡𐴥𐴘 𐴀𐴠𐴑 𐴋𐴡𐴙𐴓𐴧𐴝 𐴀𐴡𐴥𐴘𐴎𐴝𐴒𐴡𐴘.⁶𐴎𐴠 𐴔𐴝𐴘𐴝𐴉𐴟𐴖𐴝𐴘𐴠 𐴕𐴞𐴎𐴡𐴌 𐴔𐴝𐴃𐴝𐴥 𐴒𐴟𐴥𐴌𐴞 𐴕𐴡 𐴌𐴝𐴑𐴠𐴥, 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌 𐴏𐴟𐴓𐴢 𐴈𐴝𐴍𐴞𐴉𐴠𐴥𐴓𐴡𐴗𐴑, 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴞𐴎𐴡𐴌 𐴏𐴟𐴓𐴢 𐴈𐴝𐴍𐴞𐴉𐴠𐴥𐴓𐴝𐴘𐴃𐴠 𐴘𐴝𐴥 𐴔𐴝𐴃𐴝𐴥 𐴀𐴠𐴣𐴌𐴝𐴘𐴉𐴠𐴥𐴓𐴝𐴘𐴃𐴠 𐴇𐴡𐴕𐴡𐴤 𐴔𐴝𐴘𐴝𐴉𐴟𐴖𐴝𐴃𐴧𐴟 𐴁𐴠𐴀𐴞𐴎𐴧𐴡𐴃𐴞 𐴓𐴝𐴒𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴝𐴃𐴝𐴥 𐴒𐴟𐴥𐴌𐴞 𐴌𐴝𐴑𐴡𐴥𐴗𐴑.

⁷𐴇𐴡𐴕𐴡𐴤 𐴔𐴡𐴌𐴡𐴃𐴉𐴟𐴖𐴝𐴃𐴧𐴟 𐴕𐴞𐴎𐴡𐴌 𐴔𐴝𐴃𐴝𐴥 𐴒𐴟𐴥𐴌𐴞 𐴌𐴝𐴑𐴝𐴤𐴌 𐴎𐴡𐴌𐴟𐴌 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴏𐴟𐴥𐴌𐴡𐴃𐴢 𐴀𐴠𐴊𐴧𐴠 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴀𐴡𐴥; 𐴔𐴡𐴕𐴃𐴡𐴌 𐴔𐴝𐴘𐴝𐴉𐴟𐴖𐴝𐴌 𐴊𐴟𐴖𐴝𐴌𐴝 𐴎𐴝𐴇𐴠𐴥𐴌 𐴀𐴡𐴥 𐴊𐴠 𐴀𐴡𐴥𐴙𐴓𐴊𐴠 𐴔𐴡𐴌𐴡𐴃𐴉𐴟𐴖𐴝𐴌 𐴔𐴡𐴈𐴞𐴥𐴔𐴝.⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴌𐴡𐴃𐴉𐴟𐴖𐴝 𐴃𐴡 𐴔𐴝𐴘𐴝𐴉𐴟𐴖𐴝𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴔𐴝𐴘𐴝𐴉𐴟𐴖𐴝 𐴀𐴠𐴥𐴕𐴝 𐴔𐴡𐴌𐴡𐴃𐴉𐴟𐴖𐴝𐴃𐴧𐴟 𐴀𐴝𐴙𐴐𐴧𐴠𐴥;⁹𐴔𐴡𐴌𐴡𐴃𐴉𐴟𐴖𐴝𐴌𐴠 𐴃𐴡 𐴔𐴝𐴘𐴝𐴉𐴟𐴖𐴝𐴓𐴧𐴝 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴕𐴡, 𐴁𐴡𐴥𐴓𐴑𐴠 𐴔𐴝𐴘𐴝𐴉𐴟𐴖𐴝𐴌𐴠 𐴀𐴠𐴥𐴕𐴝 𐴔𐴡𐴌𐴡𐴃𐴉𐴟𐴖𐴝𐴓𐴧𐴝 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠.¹⁰𐴇𐴞𐴥𐴘𐴝𐴕𐴡𐴓𐴧𐴝 𐴔𐴝𐴘𐴝𐴉𐴟𐴖𐴝𐴃𐴧𐴟 𐴕𐴞𐴎𐴡𐴌 𐴔𐴝𐴃𐴝𐴥𐴃𐴢 𐴀𐴝𐴊𐴞𐴥𐴑𐴝𐴌𐴡𐴌 𐴔𐴝𐴌𐴇𐴝𐴤 𐴃𐴝𐴥𐴑𐴝𐴌 𐴎𐴡𐴌𐴟𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴃𐴡 𐴏𐴝𐴀𐴘𐴢 𐴃𐴝𐴥𐴙𐴑𐴧𐴠.¹¹𐴁𐴠𐴐𐴡𐴥𐴑, 𐴔𐴝𐴓𐴞𐴑𐴡𐴌 𐴁𐴟𐴥𐴃𐴡𐴌𐴠, 𐴔𐴡𐴌𐴡𐴃𐴉𐴟𐴖𐴝 𐴔𐴝𐴘𐴝𐴉𐴟𐴖𐴝𐴃𐴧𐴟 𐴀𐴝𐴎𐴝𐴊𐴢 𐴕𐴡, 𐴀𐴝𐴦𐴌 𐴔𐴝𐴘𐴝𐴉𐴟𐴖𐴝 𐴔𐴡𐴌𐴡𐴃𐴉𐴟𐴖𐴝𐴃𐴧𐴟 𐴀𐴝𐴎𐴝𐴊𐴢 𐴕𐴡.¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴕𐴞𐴑𐴞 𐴔𐴡𐴌𐴡𐴃𐴉𐴟𐴖𐴝𐴃𐴧𐴟 𐴔𐴝𐴘𐴝𐴉𐴟𐴖𐴝 𐴀𐴝𐴙𐴐𐴧𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴔𐴡𐴌𐴡𐴃𐴉𐴟𐴖𐴝𐴌 𐴎𐴡𐴌𐴔𐴡 𐴀𐴡𐴥 𐴊𐴠 𐴘𐴡𐴥 𐴔𐴝𐴘𐴝𐴉𐴟𐴖𐴝 𐴃𐴧𐴟. 𐴔𐴡𐴕𐴃𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴝𐴘𐴧𐴠𐴤 𐴊𐴠 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟.

¹³𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴁𐴝𐴥𐴉𐴞𐴏𐴡: 𐴔𐴝𐴘𐴝𐴉𐴟𐴀𐴝𐴙𐴕 𐴊𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴟𐴙𐴊𐴧𐴝 𐴔𐴝𐴃𐴝𐴥 𐴊𐴟𐴖𐴝 𐴒𐴡𐴌𐴝𐴥 𐴑𐴞𐴥 𐴄𐴞𐴥𐴑؟¹⁴𐴉𐴞𐴥𐴃𐴡𐴌𐴡𐴃𐴠 𐴘𐴡𐴥 𐴑𐴞𐴥 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴕𐴡 𐴐𐴞𐴥𐴑𐴝 𐴕𐴠𐴥, 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴠 𐴏𐴟𐴓𐴢 𐴓𐴝𐴔𐴁𐴝 𐴌𐴝𐴑𐴡𐴥𐴕 𐴐𐴡𐴥𐴌𐴔𐴡𐴌 𐴈𐴡𐴃𐴝𐴤 𐴊𐴠𐴥؟¹⁵𐴔𐴡𐴕𐴃𐴡𐴌 𐴔𐴝𐴘𐴝𐴉𐴟𐴀𐴝𐴙𐴕 𐴊𐴠 𐴏𐴟𐴓𐴢 𐴓𐴝𐴔𐴁𐴝 𐴌𐴝𐴑𐴡𐴥𐴕 𐴀𐴡𐴥𐴙𐴓𐴊𐴠 𐴕𐴞𐴎𐴡𐴌 𐴓𐴧𐴝 𐴀𐴠𐴑𐴧𐴝𐴥𐴕 𐴀𐴞𐴎𐴧𐴡𐴙𐴃𐴧𐴝 𐴈𐴝𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴥𐴌𐴞 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴠𐴥𐴕𐴝 𐴀𐴞𐴥𐴃𐴝𐴌𐴝𐴌𐴠 𐴏𐴟𐴓𐴢 𐴇𐴞𐴥𐴀𐴕 𐴊𐴞𐴦𐴘𐴝 𐴒𐴞𐴘𐴠𐴥.¹⁶𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴞𐴀𐴕𐴡𐴌 𐴁𐴝𐴦𐴁𐴟𐴃𐴠 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥𐴃𐴡 𐴏𐴝𐴀, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴎𐴟𐴖𐴝𐴁𐴢 𐴀𐴡𐴥𐴙𐴓𐴊𐴠, 𐴀𐴝𐴣𐴀𐴌𐴝𐴃𐴧𐴟 𐴀𐴞𐴀𐴕 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴕𐴞𐴘𐴡𐴔 𐴕𐴝𐴥𐴘, 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴘𐴡𐴥 𐴕𐴝𐴥𐴘.

𐴔𐴝𐴓𐴞𐴑 𐴀𐴞𐴏𐴝𐴤𐴌 𐴀𐴝𐴇𐴠𐴥𐴌𐴞 𐴈𐴝𐴥𐴕𐴝

¹⁷𐴀𐴝𐴀𐴛 𐴘𐴝𐴓𐴝 𐴎𐴠 𐴇𐴡𐴥𐴑𐴟𐴔 𐴊𐴞𐴘𐴟𐴔, 𐴇𐴞𐴥𐴀𐴕𐴡𐴌 𐴔𐴟𐴃𐴝𐴓𐴠𐴑 𐴀𐴝𐴣𐴀𐴌 𐴃𐴡𐴌𐴉𐴡𐴥𐴃𐴧𐴟 𐴃𐴟𐴣𐴀𐴝𐴥𐴌𐴝𐴓𐴧𐴝 𐴇𐴡𐴕𐴡𐴤 𐴃𐴝𐴦𐴌𐴞𐴉𐴢 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴎𐴡𐴔𐴝 𐴀𐴡𐴥𐴖𐴝𐴘𐴠 𐴉𐴝𐴥𐴘𐴊𐴝𐴌 𐴃𐴟𐴥𐴖𐴝𐴌𐴡 𐴓𐴟𐴏𐴧𐴝𐴥𐴕 𐴁𐴞𐴐𐴞𐴤 𐴒𐴡𐴌𐴠𐴥.¹⁸𐴐𐴟𐴥𐴌𐴟𐴌 𐴒𐴝𐴥𐴕 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴀𐴛 𐴉𐴟𐴥𐴕𐴞𐴌 𐴊𐴠, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴎𐴡𐴔𐴝𐴥𐴃𐴢 𐴀𐴞𐴥𐴏𐴝𐴉𐴠 𐴎𐴡𐴔𐴝 𐴀𐴡𐴥, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴃𐴝𐴥𐴑𐴠. 𐴀𐴝𐴀𐴛 𐴇𐴞𐴥𐴘𐴝𐴕 𐴑𐴠𐴏𐴧𐴟𐴥 𐴁𐴝𐴥𐴑 𐴁𐴞𐴐𐴧𐴝𐴥𐴐𐴢 𐴀𐴡𐴥 𐴒𐴡𐴌𐴞𐴥.¹⁹𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴀𐴡𐴥𐴕 𐴎𐴡𐴌𐴟𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴇𐴡𐴕𐴃𐴝𐴌𐴝𐴤 𐴏𐴡𐴥𐴘𐴧𐴞𐴃𐴢 𐴀𐴝𐴏𐴠𐴤 𐴊𐴠 𐴇𐴞𐴥𐴘𐴝𐴕 𐴎𐴝𐴇𐴠𐴥𐴌 𐴀𐴡𐴥𐴘𐴎𐴝𐴒𐴡𐴘.²⁰𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌 𐴊𐴠, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴎𐴡𐴔𐴝 𐴀𐴡𐴥, 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴘𐴝𐴊𐴒𐴝𐴌𐴞𐴌 𐴈𐴝𐴥𐴕𐴝 𐴈𐴝𐴥𐴘𐴁𐴡𐴓𐴧𐴝 𐴎𐴡𐴔𐴝 𐴀𐴡𐴥 𐴊𐴠 𐴕𐴡,²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴝𐴥𐴘𐴁𐴝𐴐𐴧𐴡𐴃𐴢 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴒𐴠 𐴎𐴝𐴌-𐴎𐴝𐴌 𐴈𐴝𐴥𐴕𐴝 𐴃𐴠𐴦-𐴃𐴠𐴦 𐴓𐴡𐴦𐴘𐴢 𐴈𐴝𐴥𐴀𐴃𐴢 𐴊𐴡𐴥𐴌𐴡; 𐴇𐴠𐴥𐴃𐴡𐴓𐴧𐴝, 𐴇𐴡𐴊𐴟𐴥𐴕 𐴁𐴟𐴥𐴑𐴧𐴞 𐴃𐴝𐴥𐴘𐴎𐴝𐴒𐴡𐴘 𐴀𐴝𐴌 𐴇𐴡𐴊𐴟𐴥𐴕 𐴄𐴟𐴀𐴓𐴢 𐴀𐴡𐴥𐴘𐴎𐴝𐴒𐴡𐴘.²²𐴃𐴟𐴣𐴀𐴝𐴥𐴌𐴝𐴃𐴧𐴟 𐴑𐴞𐴥 𐴈𐴝𐴥𐴀𐴉𐴞𐴘𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴒𐴡𐴥𐴌 𐴕𐴝𐴥𐴘؟ 𐴕𐴝𐴥𐴑𐴞 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴡𐴌𐴠 𐴇𐴠𐴥𐴑𐴝𐴌𐴡𐴃𐴢 𐴒𐴡𐴌𐴡𐴤𐴌 𐴊𐴠 𐴀𐴝𐴦𐴌 𐴎𐴠𐴃𐴝𐴌𐴝𐴤𐴃𐴧𐴟 𐴑𐴠𐴏𐴧𐴟𐴥 𐴕𐴝𐴥𐴘 𐴀𐴞𐴥𐴃𐴝𐴌𐴝𐴌𐴠 𐴐𐴡𐴥𐴌𐴡𐴔 𐴊𐴡𐴥𐴌 𐴊𐴠𐴥؟ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴑𐴞𐴦 𐴈𐴡𐴘𐴃𐴝𐴥𐴔؟ 𐴃𐴟𐴣𐴀𐴝𐴥𐴌𐴝𐴌 𐴃𐴝𐴦𐴌𐴞𐴉𐴢 𐴒𐴡𐴙𐴃𐴧𐴝𐴥𐴔 𐴕𐴠𐴥؟ 𐴇𐴞𐴥𐴘𐴝𐴕𐴡𐴌 𐴔𐴟𐴃𐴝𐴓𐴠𐴑 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴃𐴝𐴦𐴌𐴞𐴉𐴢 𐴕𐴡 𐴒𐴡𐴙𐴅𐴧𐴟𐴥𐴔.

²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠 𐴃𐴝𐴦𐴓𐴞𐴔 𐴊𐴞𐴘𐴞𐴥, 𐴇𐴞𐴥𐴀𐴕 𐴔𐴝𐴓𐴞𐴑𐴡𐴌 𐴃𐴡𐴌𐴉𐴡𐴥𐴃𐴧𐴟 𐴉𐴝𐴘𐴧𐴞𐴥 𐴊𐴠, 𐴑𐴞 𐴈𐴡𐴘𐴓𐴠𐴥, 𐴎𐴠 𐴌𐴝𐴙𐴃𐴧𐴝 𐴔𐴝𐴓𐴞𐴑 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞𐴘𐴝 𐴒𐴞𐴥𐴀𐴓𐴢, 𐴇𐴠𐴥 𐴌𐴝𐴙𐴃𐴡𐴃𐴢 𐴀𐴞𐴥𐴁𐴝𐴘𐴠 𐴌𐴟𐴄𐴞 𐴓𐴡𐴦𐴘𐴢²⁴𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴁𐴝𐴥𐴚𐴒𐴞 𐴈𐴡𐴘𐴧𐴠𐴥 𐴊𐴠, ”𐴘𐴝𐴀𐴕 𐴀𐴝𐴣𐴀𐴌 𐴒𐴝𐴦, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴓𐴧𐴝. 𐴀𐴝𐴣𐴀𐴌𐴠𐴥 𐴔𐴡𐴕𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞𐴥𐴘𐴡.“²⁵𐴇𐴠𐴥𐴕𐴊𐴞𐴓𐴧𐴝, 𐴈𐴝𐴥𐴕𐴝 𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴉𐴞𐴘𐴝𐴓𐴝 𐴘𐴡𐴥 𐴓𐴡𐴦𐴘𐴢 𐴈𐴡𐴘𐴧𐴠𐴥 𐴊𐴠, ”𐴀𐴝𐴣𐴀𐴌 𐴓𐴡𐴖𐴢 𐴓𐴡𐴘 𐴀𐴡𐴥𐴘𐴁𐴡 𐴊𐴠 𐴕𐴡𐴘𐴝 𐴌𐴝𐴎𐴞𐴕𐴝𐴔𐴝𐴌 𐴕𐴞𐴐𐴝𐴥𐴕 𐴀𐴡𐴥𐴙𐴓𐴊𐴠 𐴀𐴠 𐴉𐴞𐴘𐴝𐴓𐴝. 𐴃𐴟𐴣𐴀𐴝𐴥𐴌𐴝 𐴎𐴠𐴃𐴡𐴥𐴁𐴝𐴌 𐴉𐴞𐴀𐴁𐴝, 𐴀𐴝𐴣𐴀𐴌𐴠𐴥 𐴔𐴡𐴕𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴉𐴞𐴀𐴘𐴡.“²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴡𐴥𐴁𐴝𐴌 𐴃𐴟𐴣𐴀𐴝𐴥𐴌𐴝 𐴀𐴠 𐴌𐴟𐴄𐴞 𐴈𐴝𐴥𐴘𐴁𐴝 𐴀𐴠𐴊𐴧𐴠 𐴀𐴠 𐴉𐴞𐴘𐴝𐴓𐴝𐴃𐴧𐴟 𐴉𐴞𐴀𐴁𐴝, 𐴇𐴠𐴥𐴃𐴡𐴁𐴝𐴌 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴔𐴡𐴦𐴃𐴡𐴌 𐴀𐴠𐴓𐴝𐴕 𐴒𐴡𐴌𐴡𐴤𐴌 𐴊𐴠, 𐴎𐴠𐴃𐴡𐴥𐴊𐴞𐴕 𐴕𐴞𐴥𐴑𐴞 𐴀𐴞𐴥𐴁𐴝 𐴕𐴟𐴥 𐴀𐴝𐴘𐴧𐴠𐴤.

²⁷𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴕𐴝𐴓𐴝𐴦𐴘𐴠𐴑 𐴀𐴝𐴇𐴝𐴥𐴓𐴝𐴑𐴠 𐴔𐴝𐴓𐴞𐴑𐴡𐴌 𐴌𐴟𐴄𐴞 𐴈𐴝𐴥𐴀 𐴘𐴝𐴥 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝𐴃𐴧𐴟 𐴉𐴞𐴀𐴘𐴠, 𐴘𐴡𐴥𐴒𐴧𐴗𐴝 𐴔𐴝𐴓𐴞𐴑𐴡𐴌 𐴒𐴝𐴦 𐴀𐴠𐴊𐴧𐴠 𐴓𐴡𐴖𐴢 𐴖𐴡𐴥𐴌 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴞𐴁𐴡.²⁸𐴔𐴡𐴕𐴃𐴡𐴌 𐴉𐴡𐴃𐴧𐴞𐴥𐴑𐴞𐴘𐴠 𐴇𐴠𐴥 𐴌𐴟𐴄𐴞 𐴈𐴝𐴥𐴘𐴁𐴝𐴌 𐴀𐴠𐴊𐴧𐴠 𐴉𐴞𐴘𐴝𐴓𐴝𐴃𐴧𐴟 𐴉𐴞𐴀𐴁𐴝𐴌 𐴀𐴝𐴒𐴠 𐴕𐴞𐴎𐴡𐴌𐴠𐴥 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴞𐴥 𐴏𐴡𐴗𐴀𐴑.²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴔𐴡𐴀𐴏𐴞𐴤𐴌 𐴒𐴝𐴦𐴌𐴠 𐴕𐴡 𐴏𐴞𐴕𐴞𐴥 𐴇𐴠𐴥 𐴌𐴟𐴄𐴞 𐴈𐴝𐴥𐴀 𐴀𐴠𐴊𐴧𐴠 𐴉𐴞𐴘𐴝𐴓𐴝𐴃𐴧𐴟 𐴉𐴞𐴀𐴘𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴀𐴕 𐴈𐴡𐴥𐴀𐴕𐴠 𐴀𐴠𐴊𐴧𐴠 𐴉𐴞𐴀𐴘𐴡𐴕𐴠 𐴕𐴞𐴎𐴡𐴌 𐴖𐴡𐴌𐴠 𐴏𐴝𐴥𐴣𐴎𐴝 𐴀𐴝𐴕𐴞𐴤𐴁𐴡.³⁰𐴇𐴠𐴥𐴃𐴡𐴓𐴧𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴁𐴡𐴀𐴗𐴃𐴢 𐴎𐴡𐴕 𐴑𐴡𐴔𐴎𐴟𐴌 𐴀𐴠𐴊𐴧𐴠 𐴁𐴞𐴘𐴝𐴌𐴝𐴙𐴔𐴧𐴝 𐴀𐴝𐴏𐴠𐴤, 𐴀𐴝𐴦𐴌 𐴁𐴡𐴀𐴗𐴃𐴢 𐴎𐴡𐴕 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴘𐴡𐴥 𐴀𐴝𐴏𐴠𐴤.³¹𐴎𐴡𐴊𐴞 𐴀𐴝𐴣𐴀𐴌𐴝 𐴕𐴞𐴎𐴡𐴌 𐴁𐴞𐴏𐴝𐴌 𐴕𐴞𐴎𐴠 𐴏𐴡𐴥𐴘𐴧𐴞𐴒𐴡𐴌𐴞 𐴒𐴡𐴙𐴃𐴧𐴝𐴥𐴔, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝𐴌 𐴁𐴞𐴏𐴝𐴌 𐴒𐴡𐴌𐴝𐴥 𐴕𐴡 𐴉𐴡𐴙𐴃𐴧𐴡.³²𐴔𐴡𐴕𐴃𐴡𐴌 𐴔𐴝𐴓𐴞𐴑𐴠 𐴀𐴝𐴣𐴀𐴌𐴝𐴌𐴠 𐴁𐴞𐴏𐴝𐴌 𐴒𐴡𐴌𐴞𐴥 𐴃𐴡𐴌𐴁𐴞𐴘𐴡𐴃𐴢 𐴒𐴡𐴌𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴘𐴡𐴥 𐴊𐴟𐴕𐴞𐴘𐴝𐴙𐴌 𐴉𐴟𐴥𐴖𐴝𐴣𐴃𐴞 𐴈𐴡𐴏𐴟𐴥𐴌𐴁𐴡𐴕 𐴕𐴡 𐴄𐴡𐴥𐴀𐴌𐴞.

³³𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴈𐴝𐴥𐴘𐴃𐴡 𐴎𐴡𐴔𐴝 𐴀𐴡𐴥, 𐴀𐴝𐴌 𐴀𐴠𐴎𐴧𐴡𐴕𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥𐴘𐴡.³⁴𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴁𐴟𐴥𐴑 𐴓𐴝𐴒𐴠, 𐴘𐴡𐴥𐴒𐴧𐴗𐴝𐴘𐴠 𐴒𐴡𐴥𐴌𐴡𐴃𐴧𐴟 𐴈𐴝𐴥𐴕𐴝 𐴇𐴝𐴥𐴘 𐴎𐴝𐴘𐴧𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴞 𐴁𐴡𐴓𐴧𐴝 𐴎𐴡𐴔𐴝 𐴀𐴡𐴥𐴘𐴧𐴡 𐴉𐴝𐴥𐴕 𐴕𐴡.
𐴀𐴝𐴦𐴌 𐴁𐴝𐴊𐴁𐴝𐴑𐴞 𐴔𐴝𐴦𐴔𐴠𐴓𐴝 𐴒𐴟𐴥𐴕𐴡𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴇𐴠𐴥𐴍𐴠 𐴀𐴝𐴘𐴓𐴠𐴤 𐴈𐴡𐴘𐴧𐴟𐴥𐴔.

The Word for the World International

https://app.library.bible/content/87faca8b51c22590