Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 12

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢12

𐴌𐴟𐴀𐴈𐴝𐴥𐴕𐴞𐴌 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴌𐴟𐴀𐴈𐴝𐴥𐴕𐴞𐴌 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴀𐴝𐴀𐴛 𐴕𐴡 𐴏𐴝𐴀𐴘𐴢 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴀𐴡𐴎𐴝𐴕𐴝 𐴃𐴝𐴥𐴑𐴡.²𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴊𐴞𐴕𐴞 𐴀𐴝𐴐𐴧𐴞𐴥𐴓𐴝, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴟𐴒𐴝 𐴔𐴟𐴃𐴧𐴞𐴌 𐴀𐴟𐴎𐴟 𐴎𐴠𐴦 𐴎𐴠𐴕𐴊𐴞𐴓𐴧𐴝 𐴓𐴡𐴘𐴎𐴝𐴘𐴃𐴡𐴥 𐴇𐴠𐴥𐴕𐴊𐴞𐴓𐴧𐴝 𐴎𐴝𐴘𐴃𐴝𐴒𐴡𐴥𐴘.³𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌 𐴊𐴠 𐴑𐴞, 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌 𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴠 𐴈𐴡𐴃𐴝𐴤 𐴈𐴡𐴀, 𐴀𐴞𐴥𐴃𐴠 𐴀𐴠𐴕𐴊𐴞𐴓𐴧𐴝 𐴕𐴡 𐴈𐴡𐴀 𐴊𐴠, ”𐴀𐴞𐴏𐴝𐴤𐴌 𐴖𐴡𐴌𐴠 𐴓𐴝𐴀𐴕𐴡𐴃𐴢 𐴀𐴡𐴥𐴑,“ 𐴀𐴝𐴦𐴌 𐴂𐴝𐴑-𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴢 𐴏𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴕𐴡 𐴉𐴝𐴌𐴞𐴁𐴡𐴥 𐴊𐴠 𐴑𐴞, ”𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴝𐴓𐴞𐴑.“

⁴𐴕𐴞𐴘𐴝𐴔𐴡𐴃𐴢 𐴃𐴡 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴊𐴠𐴦 𐴊𐴠 𐴀𐴡𐴥𐴙𐴓𐴊𐴠 𐴀𐴠𐴑𐴞𐴤 𐴌𐴟𐴀 𐴘𐴠.⁵𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥𐴁𐴝𐴌 𐴃𐴡𐴌𐴞𐴑𐴝 𐴘𐴡𐴥 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴠𐴑𐴞𐴤 𐴔𐴝𐴓𐴞𐴑 𐴀𐴡𐴌𐴠.⁶𐴇𐴠𐴥𐴕𐴊𐴞𐴓𐴧𐴝, 𐴈𐴝𐴔 𐴀𐴡𐴥 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴠𐴑𐴞𐴤 𐴀𐴝𐴓𐴧𐴝𐴘𐴠 𐴁𐴠 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴈𐴝𐴔 𐴒𐴡𐴌𐴠𐴥.

⁷𐴔𐴡𐴕𐴃𐴡𐴌 𐴎𐴡𐴕-𐴎𐴡𐴕𐴡𐴌 𐴇𐴝𐴣𐴏𐴠 𐴌𐴟𐴀𐴌 𐴎𐴝𐴇𐴠𐴥𐴌𐴞 𐴁𐴠𐴒𐴧𐴟𐴥𐴕𐴡𐴌 𐴉𐴝𐴥𐴘𐴊𐴝𐴓𐴧𐴝 𐴁𐴠 𐴀𐴡𐴥.⁸𐴇𐴠𐴥 𐴌𐴟𐴀𐴌 𐴊𐴟𐴖𐴝𐴌𐴝 𐴑𐴞𐴘𐴡𐴥𐴌𐴠 𐴒𐴞𐴘𐴝𐴕𐴞 𐴈𐴡𐴃𐴝𐴤 𐴈𐴡𐴘𐴁𐴝𐴥𐴌 𐴃𐴡𐴖𐴉𐴞𐴥𐴑 𐴊𐴞𐴦𐴘𐴝 𐴎𐴝; 𐴇𐴠𐴥 𐴀𐴠𐴑𐴞𐴤 𐴌𐴟𐴀𐴌 𐴊𐴟𐴖𐴝𐴌𐴝 𐴀𐴝𐴌 𐴑𐴞𐴘𐴡𐴥𐴌𐴠 𐴀𐴝𐴇𐴡𐴓𐴠 𐴈𐴡𐴃𐴝𐴤 𐴈𐴡𐴘𐴁𐴝𐴥𐴌 𐴃𐴡𐴖𐴉𐴞𐴥𐴑 𐴊𐴞𐴦𐴘𐴝 𐴎𐴝.⁹𐴑𐴞𐴘𐴡𐴥𐴌𐴠 𐴇𐴠𐴥 𐴌𐴟𐴀𐴌 𐴊𐴟𐴖𐴝𐴌𐴝 𐴀𐴞𐴔𐴝𐴕 𐴊𐴞𐴦𐴘𐴝 𐴎𐴝, 𐴀𐴝𐴌 𐴑𐴞𐴘𐴡𐴥𐴌𐴠 𐴇𐴠𐴥 𐴀𐴠𐴑𐴞𐴤 𐴌𐴟𐴀𐴌 𐴊𐴟𐴖𐴝𐴌𐴝 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴞𐴥𐴁𐴝𐴌 𐴕𐴞𐴘𐴝𐴔𐴡𐴃𐴢 𐴊𐴞𐴦𐴘𐴝 𐴎𐴝.¹⁰𐴑𐴞𐴘𐴡𐴥𐴌𐴠 𐴑𐴠𐴌𐴝𐴔𐴡𐴃𐴢 𐴒𐴡𐴌𐴞𐴥𐴁𐴝𐴌, 𐴑𐴞𐴘𐴡𐴥𐴌𐴠 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴈𐴡𐴃𐴝𐴤 𐴈𐴡𐴘𐴁𐴝𐴥𐴌, 𐴑𐴞𐴘𐴡𐴥𐴌𐴠 𐴌𐴟𐴀 𐴀𐴡𐴥𐴑𐴧𐴡𐴓𐴢 𐴉𐴡𐴌𐴡𐴥𐴑 𐴒𐴡𐴌𐴞𐴥𐴁𐴝𐴌, 𐴑𐴞𐴘𐴡𐴥𐴌𐴠 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴘𐴁𐴝𐴥𐴌, 𐴀𐴠𐴊𐴧𐴠 𐴑𐴞𐴘𐴡𐴥𐴌𐴠 𐴇𐴠𐴥 𐴎𐴟𐴁𐴝𐴕 𐴁𐴝𐴥𐴚𐴒𐴞𐴊𐴞𐴁𐴝𐴌 𐴃𐴡𐴖𐴉𐴞𐴥𐴑 𐴀𐴡𐴥𐴑𐴧𐴡𐴓𐴢 𐴊𐴞𐴦𐴘𐴝 𐴎𐴝.¹¹𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥𐴙𐴓𐴊𐴠 𐴇𐴠𐴥 𐴀𐴠𐴑𐴞𐴤 𐴀𐴠𐴊𐴧𐴠 𐴀𐴠𐴑𐴒𐴗𐴝𐴥 𐴌𐴟𐴀𐴌 𐴈𐴝𐴔. 𐴀𐴞𐴥𐴁𐴝𐴘𐴠 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴎𐴝𐴌𐴠𐴥 𐴎𐴠 𐴕𐴞𐴘𐴝𐴔𐴡𐴃𐴢 𐴊𐴞𐴦𐴃𐴡 𐴔𐴡𐴕𐴠𐴈𐴡𐴀 𐴇𐴠𐴥 𐴕𐴞𐴘𐴝𐴔𐴡𐴃𐴢 𐴊𐴠𐴦.

𐴀𐴠𐴑𐴧𐴝𐴥𐴕 𐴒𐴝𐴦 𐴔𐴡𐴕𐴃𐴡𐴌 𐴁𐴞𐴐𐴞𐴤 𐴇𐴞𐴥𐴏𐴧𐴝

¹²𐴎𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴒𐴝𐴦𐴃𐴢 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴝𐴏𐴠𐴤 𐴀𐴝𐴦𐴌 𐴇𐴞𐴥𐴏𐴧𐴝 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴓𐴡𐴥𐴘 𐴀𐴠𐴑𐴧𐴝𐴥𐴕 𐴒𐴝𐴦 𐴁𐴡𐴕𐴠, 𐴔𐴡𐴀𐴏𐴞𐴤 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑 𐴘𐴝𐴥 𐴒𐴞𐴌𐴞𐴥𐴑, 𐴒𐴟𐴓𐴝𐴔 𐴀𐴡𐴥𐴑 𐴘𐴝𐴥 𐴁𐴠𐴒𐴟𐴓𐴝𐴔, 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴃𐴡 𐴀𐴠𐴑 𐴒𐴝𐴦 𐴀𐴡𐴥𐴘 𐴁𐴡𐴓𐴧𐴝 𐴀𐴠𐴑𐴞𐴤 𐴌𐴟𐴀𐴌 𐴊𐴟𐴖𐴝𐴌𐴝 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴧𐴞𐴥, 𐴀𐴝𐴦𐴌 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴀𐴠𐴑𐴞𐴤 𐴌𐴟𐴀 𐴉𐴝𐴘𐴧𐴞𐴥.¹⁴𐴒𐴝𐴦𐴃𐴢 𐴃𐴡 𐴇𐴞𐴥𐴏𐴧𐴝 𐴀𐴠𐴑𐴧𐴝𐴥𐴕 𐴀𐴝𐴏𐴠𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴁𐴞𐴐𐴞𐴤.

¹⁵𐴄𐴠𐴥𐴚𐴡𐴌 𐴉𐴝𐴃𐴝𐴘𐴠 𐴎𐴡𐴊𐴞 𐴈𐴡𐴀, ”𐴀𐴝𐴀𐴛 𐴀𐴝𐴥𐴃𐴢 𐴕𐴡 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴒𐴝𐴦𐴌 𐴇𐴞𐴥𐴏𐴧𐴝 𐴕𐴡,“ 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴒𐴝𐴦𐴌 𐴇𐴞𐴥𐴏𐴧𐴝 𐴕𐴡 𐴊𐴠 𐴇𐴠𐴥𐴀𐴕 𐴕𐴡.¹⁶𐴀𐴝𐴦𐴌 𐴎𐴡𐴊𐴞 𐴈𐴝𐴕𐴠 𐴈𐴡𐴀, ”𐴀𐴝𐴀𐴛 𐴏𐴟𐴑 𐴕𐴡 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴒𐴝𐴦𐴌 𐴇𐴞𐴥𐴏𐴧𐴝 𐴕𐴡,“ 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴒𐴝𐴦𐴌 𐴇𐴞𐴥𐴏𐴧𐴝 𐴕𐴡 𐴊𐴠 𐴇𐴠𐴥𐴀𐴕 𐴕𐴡.¹⁷𐴒𐴟𐴣𐴍𐴝 𐴒𐴝𐴦 𐴎𐴡𐴊𐴞 𐴏𐴟𐴑 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴉𐴟𐴥𐴙𐴕𐴃𐴡 𐴇𐴡𐴕𐴃𐴟𐴤؟ 𐴀𐴝𐴦𐴌 𐴎𐴡𐴊𐴞 𐴒𐴟𐴣𐴍𐴝 𐴒𐴝𐴦 𐴈𐴝𐴕 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴉𐴟𐴥𐴀𐴟𐴛 𐴉𐴝𐴙𐴃𐴧𐴡 𐴇𐴡𐴕𐴃𐴟𐴤؟¹⁸𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴃𐴡 𐴇𐴞𐴥𐴏𐴧𐴝 𐴇𐴞𐴥𐴀𐴕 𐴉𐴡𐴃𐴧𐴞𐴥 𐴀𐴠𐴑𐴧𐴝𐴥𐴕𐴡𐴌𐴠 𐴒𐴝𐴦𐴌 𐴁𐴟𐴥𐴃𐴡𐴌𐴠 𐴖𐴡𐴀𐴣𐴃𐴢-𐴖𐴡𐴀𐴣𐴃𐴢 𐴌𐴝𐴙𐴑𐴧𐴠𐴥 𐴎𐴞𐴘𐴡𐴥𐴣𐴃𐴢-𐴎𐴞𐴘𐴡𐴥𐴣𐴃𐴢 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴞𐴥𐴁𐴝𐴃𐴧𐴟 𐴔𐴡𐴕𐴠𐴈𐴡𐴘𐴧𐴠𐴥.¹⁹𐴎𐴡𐴊𐴞 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴒𐴝𐴦 𐴇𐴡𐴍𐴠𐴥 𐴀𐴡𐴥𐴘𐴃𐴡؟²⁰𐴔𐴡𐴕𐴃𐴡𐴌 𐴘𐴝𐴓𐴝 𐴃𐴡 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴝𐴏𐴠𐴤, 𐴓𐴠𐴑𐴞𐴕 𐴒𐴝𐴦 𐴀𐴝𐴏𐴠𐴤 𐴊𐴠 𐴀𐴠𐴑𐴧𐴝𐴥𐴕.

²¹𐴇𐴠𐴥𐴃𐴡𐴓𐴧𐴝 𐴏𐴟𐴑𐴠𐴤 𐴀𐴝𐴥𐴃𐴡𐴌𐴠 𐴈𐴡𐴀𐴘𐴢 𐴕𐴡 𐴉𐴝𐴌𐴞𐴁𐴡𐴥 𐴊𐴠, ”𐴀𐴝𐴣𐴀𐴃𐴧𐴟 𐴃𐴡𐴌 𐴎𐴡𐴌𐴟𐴌 𐴕𐴝𐴥𐴘,“ 𐴀𐴝𐴦𐴌 𐴔𐴝𐴃𐴝𐴥𐴘𐴠 𐴄𐴠𐴥𐴚𐴡𐴌 𐴉𐴝𐴃𐴝𐴌𐴠 𐴈𐴡𐴀𐴘𐴢 𐴕𐴡 𐴉𐴝𐴌𐴞𐴁𐴡𐴥 𐴊𐴠, ”𐴀𐴝𐴣𐴀𐴃𐴧𐴟 𐴃𐴡𐴌 𐴎𐴡𐴌𐴟𐴌 𐴕𐴝𐴥𐴘.“²²𐴇𐴝𐴥𐴓𐴠𐴑𐴠, 𐴒𐴝𐴦𐴌 𐴎𐴠 𐴇𐴞𐴥𐴏𐴧𐴝 𐴒𐴟𐴥𐴕 𐴏𐴝𐴘𐴃𐴠𐴥 𐴑𐴡𐴔𐴎𐴟𐴌, 𐴇𐴞𐴥𐴀𐴕 𐴀𐴝𐴌𐴡𐴤 𐴁𐴞𐴐𐴞𐴤 𐴎𐴡𐴌𐴟𐴌𐴞,²³𐴀𐴝𐴦𐴌 𐴒𐴝𐴦𐴌 𐴎𐴠 𐴇𐴞𐴥𐴏𐴧𐴝 𐴒𐴟𐴥𐴕𐴡𐴌𐴠 𐴀𐴝𐴣𐴀𐴌𐴝 𐴈𐴡𐴔 𐴀𐴞𐴎𐴧𐴡𐴃𐴞 𐴁𐴡𐴓𐴞 𐴄𐴝𐴥𐴀𐴌𐴞, 𐴇𐴞𐴥𐴀𐴕𐴡𐴌𐴠 𐴀𐴝𐴣𐴀𐴌𐴝 𐴀𐴝𐴌𐴡𐴤 𐴁𐴞𐴐𐴞𐴤 𐴀𐴞𐴎𐴧𐴡𐴃𐴢 𐴊𐴞. 𐴎𐴠 𐴇𐴞𐴥𐴏𐴧𐴝 𐴒𐴟𐴥𐴕𐴡𐴌𐴠 𐴀𐴝𐴣𐴀𐴌𐴝 𐴐𐴡𐴥𐴌𐴡𐴔𐴠 𐴓𐴟𐴑𐴝𐴘 𐴌𐴝𐴑𐴞𐴥, 𐴇𐴞𐴥𐴀𐴕𐴡𐴌𐴠 𐴁𐴞𐴐𐴞𐴤 𐴎𐴡𐴃𐴧𐴡𐴕𐴠 𐴒𐴟𐴥𐴌𐴞 𐴌𐴝𐴑𐴞𐴥,²⁴𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴀𐴝𐴓𐴟𐴑𐴝𐴘𐴧𐴝 𐴇𐴞𐴥𐴏𐴧𐴝 𐴒𐴟𐴥𐴕𐴡𐴌𐴠 𐴎𐴡𐴃𐴧𐴡𐴕 𐴒𐴡𐴌𐴞𐴥𐴁𐴝𐴌 𐴎𐴡𐴌𐴟𐴌 𐴕𐴝𐴥𐴘. 𐴀𐴝𐴓𐴧𐴝𐴘𐴠 𐴃𐴡 𐴒𐴝𐴦𐴌𐴠 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞𐴥-𐴒𐴡𐴌𐴞𐴥 𐴔𐴞𐴓𐴝𐴘 𐴁𐴝𐴕𐴝𐴘𐴧𐴠𐴥, 𐴎𐴠𐴀𐴕 𐴕𐴞𐴥𐴑𐴞 𐴎𐴠 𐴇𐴞𐴥𐴏𐴧𐴝 𐴒𐴟𐴥𐴕 𐴈𐴡𐴔 𐴀𐴞𐴎𐴧𐴡𐴃𐴞 𐴇𐴞𐴥𐴀𐴕𐴡𐴌𐴠 𐴀𐴝𐴌𐴡𐴤 𐴁𐴞𐴐𐴞𐴤 𐴀𐴞𐴎𐴧𐴡𐴃𐴢 𐴊𐴞𐴘𐴝 𐴉𐴡𐴌𐴠;²⁵𐴎𐴠𐴀𐴕𐴠 𐴒𐴝𐴦𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴕𐴝-𐴀𐴠𐴑𐴃𐴡𐴉𐴝𐴥𐴑𐴞 𐴕𐴡 𐴃𐴝𐴥𐴑𐴠, 𐴁𐴡𐴥𐴓𐴑𐴠 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴠 𐴎𐴠𐴕 𐴀𐴠𐴑𐴧𐴝𐴥𐴕𐴡𐴓𐴧𐴝 𐴀𐴠𐴑𐴧𐴝𐴥𐴕𐴠 𐴑𐴞𐴥𐴘𐴝𐴓𐴢 𐴌𐴝𐴑𐴠𐴥.²⁶𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝𐴘𐴠 𐴊𐴟𐴑 𐴉𐴝𐴘𐴓𐴠, 𐴇𐴞𐴥𐴘𐴝𐴕𐴡𐴌 𐴉𐴟𐴥𐴖𐴝𐴣𐴃𐴞 𐴇𐴞𐴥𐴏𐴧𐴝 𐴁𐴠𐴒𐴧𐴟𐴥𐴕𐴠 𐴊𐴟𐴑 𐴉𐴝𐴦. 𐴀𐴝𐴦𐴌 𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝𐴘𐴠 𐴀𐴞𐴎𐴧𐴡𐴃𐴢 𐴉𐴝𐴘𐴓𐴠, 𐴇𐴞𐴥𐴘𐴝𐴕𐴡𐴌 𐴉𐴟𐴥𐴖𐴝𐴣𐴃𐴞 𐴇𐴞𐴥𐴏𐴧𐴝 𐴁𐴠𐴒𐴧𐴟𐴥𐴕 𐴑𐴟𐴥𐴐𐴞 𐴀𐴡𐴥.

²⁷𐴃𐴡𐴥𐴘 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴔𐴡𐴀𐴏𐴞𐴤𐴌 𐴒𐴝𐴦, 𐴀𐴝𐴦𐴌 𐴉𐴡𐴃𐴧𐴞𐴥 𐴎𐴡𐴕 𐴇𐴞𐴥𐴘𐴝𐴕𐴡𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢.²⁸𐴀𐴝𐴓𐴧𐴝𐴘𐴠 𐴎𐴡𐴔𐴝𐴥𐴃𐴡𐴃𐴢 𐴀𐴝𐴓𐴡𐴑-𐴀𐴝𐴓𐴡𐴑 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴃𐴟𐴙𐴓𐴧𐴠𐴥: 𐴀𐴠𐴑 𐴕𐴡𐴔𐴁𐴡𐴥𐴌𐴡𐴃𐴢 𐴏𐴝𐴥𐴇𐴝𐴁𐴞 𐴀𐴡𐴥𐴑𐴧𐴡𐴓𐴢, 𐴊𐴟𐴘 𐴕𐴡𐴔𐴁𐴡𐴥𐴌𐴡𐴃𐴢 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢, 𐴃𐴞𐴕 𐴕𐴡𐴔𐴁𐴡𐴥𐴌𐴡𐴃𐴢 𐴀𐴟𐴏𐴃𐴝𐴃𐴢 𐴀𐴡𐴥𐴑𐴧𐴡𐴓𐴢. 𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴟𐴘𐴃𐴝𐴌𐴝𐴤𐴌𐴠 𐴃𐴟𐴙𐴓𐴧𐴠𐴥 𐴎𐴠𐴃𐴝𐴌𐴝𐴤𐴃𐴧𐴟 𐴑𐴠𐴌𐴝𐴔𐴡𐴃𐴢 𐴒𐴡𐴌𐴞𐴥𐴁𐴝𐴌, 𐴎𐴠𐴃𐴝𐴌𐴝𐴤𐴃𐴧𐴟 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴞𐴥𐴁𐴝𐴌, 𐴎𐴠𐴃𐴝𐴌𐴝𐴤𐴃𐴧𐴟 𐴔𐴡𐴊𐴡𐴃𐴢 𐴒𐴡𐴌𐴞𐴥𐴁𐴝𐴌, 𐴎𐴠𐴃𐴝𐴌𐴝𐴤𐴃𐴧𐴟 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥𐴁𐴝𐴌, 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤𐴃𐴧𐴟 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴘𐴁𐴝𐴥𐴌 𐴕𐴞𐴘𐴝𐴔𐴡𐴃𐴢 𐴀𐴝𐴏𐴠𐴤.²⁹𐴁𐴠𐴒𐴧𐴟𐴥𐴕 𐴑𐴞𐴥 𐴏𐴝𐴥𐴇𐴝𐴁𐴞 𐴕𐴠𐴥؟ 𐴁𐴠𐴒𐴧𐴟𐴥𐴕 𐴑𐴞𐴥 𐴕𐴡𐴁𐴞 𐴕𐴠𐴥؟ 𐴁𐴠𐴒𐴧𐴟𐴥𐴕 𐴑𐴞𐴥 𐴀𐴟𐴏𐴃𐴝𐴃𐴢 𐴕𐴠𐴥؟ 𐴁𐴠𐴒𐴧𐴟𐴥𐴕 𐴑𐴞𐴥 𐴑𐴠𐴌𐴝𐴔𐴡𐴃𐴢 𐴒𐴡𐴌𐴡𐴤𐴘𐴝 𐴕𐴠𐴥؟³⁰𐴁𐴠𐴒𐴧𐴟𐴥𐴕𐴡𐴃𐴧𐴟 𐴑𐴞𐴥 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴞𐴥𐴁𐴝𐴌 𐴕𐴞𐴘𐴝𐴔𐴡𐴃𐴢 𐴀𐴝𐴏𐴠𐴤؟ 𐴁𐴠𐴒𐴧𐴟𐴥𐴕𐴠 𐴑𐴞𐴥 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴀؟ 𐴁𐴠𐴒𐴧𐴟𐴥𐴕𐴠 𐴑𐴞𐴥 𐴎𐴟𐴁𐴝𐴕 𐴁𐴝𐴥𐴚𐴒𐴞𐴊𐴞 𐴉𐴝𐴌𐴠؟³¹𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴞𐴘𐴝𐴔𐴡𐴃𐴢 𐴀𐴟𐴀𐴙𐴕𐴡𐴓𐴧𐴝 𐴁𐴞𐴐𐴞𐴤𐴒𐴡𐴌𐴞 𐴀𐴝𐴎𐴧𐴟 𐴒𐴡𐴌𐴡𐴤, 𐴎𐴞𐴀𐴕 𐴋𐴡𐴣𐴀𐴌.
𐴃𐴡𐴀 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴤 𐴁𐴞𐴐𐴞𐴤 𐴁𐴝𐴥𐴓𐴝 𐴀𐴠𐴑𐴧𐴝𐴥𐴕 𐴌𐴝𐴏𐴃𐴝 𐴊𐴝𐴈𐴝𐴤𐴘 𐴊𐴞𐴥𐴌.

The Word for the World International

https://app.library.bible/content/87faca8b51c22590