Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 10

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢10

𐴔𐴟𐴃𐴧𐴞 𐴉𐴟𐴣𐴎𐴝𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴕𐴡 𐴏𐴝𐴀𐴘𐴢 𐴃𐴟𐴣𐴀𐴝𐴥𐴌𐴝 𐴘𐴝𐴀𐴕𐴡𐴌 𐴀𐴡𐴎𐴝𐴕𐴝 𐴃𐴝𐴥𐴑𐴡, 𐴑𐴞 𐴈𐴡𐴘𐴓𐴠𐴥, 𐴀𐴝𐴣𐴀𐴌𐴝𐴌 𐴃𐴝𐴔𐴝𐴥𐴔 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴔𐴞𐴘𐴟𐴥𐴓𐴝𐴌 𐴏𐴝𐴥𐴘𐴧𐴝𐴌 𐴃𐴡𐴓𐴠 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴊𐴡𐴙𐴅𐴧𐴝 𐴉𐴝𐴌𐴝𐴤𐴘 𐴒𐴞𐴀𐴓𐴢.²𐴀𐴞𐴥𐴃𐴝𐴌𐴝 𐴔𐴟𐴀𐴏𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘 𐴁𐴡𐴓𐴧𐴝 𐴁𐴠𐴒𐴧𐴟𐴥𐴕𐴠 𐴔𐴞𐴘𐴟𐴥𐴓𐴝𐴃𐴢 𐴀𐴠𐴊𐴧𐴠 𐴊𐴡𐴙𐴅𐴧𐴝𐴃𐴢 𐴁𐴝𐴥𐴂𐴄𐴞𐴏𐴔𐴝 𐴓𐴡𐴥𐴙𐴓𐴢;³𐴁𐴠𐴒𐴧𐴟𐴥𐴕𐴠 𐴀𐴠𐴑𐴞𐴤 𐴒𐴝𐴁𐴞 𐴈𐴝𐴥𐴕𐴝 𐴈𐴝𐴥𐴀𐴙𐴓𐴢,⁴𐴀𐴠𐴊𐴧𐴠 𐴁𐴠𐴒𐴧𐴟𐴥𐴕𐴠 𐴀𐴠𐴑𐴞𐴤 𐴒𐴝𐴁𐴞 𐴉𐴝𐴕𐴞𐴥 𐴈𐴝𐴥𐴀𐴙𐴓𐴢. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴉𐴝𐴕𐴞𐴥 𐴈𐴝𐴥𐴘𐴃𐴡 𐴊𐴠 𐴀𐴡𐴥𐴙𐴓𐴊𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴎𐴝𐴘𐴃𐴡 𐴊𐴠 𐴒𐴝𐴁𐴞 𐴐𐴞𐴥𐴓𐴢 𐴘𐴞𐴥𐴁𐴝 𐴃𐴧𐴟, 𐴇𐴠𐴥 𐴐𐴞𐴥𐴓𐴢 𐴓𐴗𐴝𐴥 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.⁵𐴔𐴡𐴕𐴃𐴡𐴌 𐴃𐴡𐴀 𐴀𐴞𐴥𐴃𐴝𐴌𐴝 𐴁𐴠𐴦𐴐𐴁𐴝𐴥𐴑 𐴓𐴡𐴥𐴘 𐴀𐴝𐴓𐴧𐴝 𐴑𐴟𐴥𐴐𐴞 𐴕𐴟 𐴀𐴝𐴐𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴌 𐴓𐴝𐴐𐴢 𐴀𐴡𐴥𐴑𐴧𐴡𐴓𐴢 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘𐴒𐴞𐴓𐴒𐴡𐴘.

⁶𐴇𐴞𐴥𐴀𐴕 𐴀𐴝𐴣𐴀𐴌𐴝𐴓𐴧𐴝 𐴏𐴠𐴥𐴁𐴡𐴑 𐴁𐴡𐴙𐴕𐴧𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝𐴃𐴧𐴟 𐴁𐴟𐴌𐴝 𐴈𐴝𐴔 𐴒𐴡𐴙𐴃𐴧𐴡𐴥 𐴊𐴞𐴓𐴔𐴡𐴕 𐴕𐴡 𐴃𐴝𐴥𐴑𐴠 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴐𐴧𐴞𐴥𐴓𐴢.⁷𐴃𐴟𐴣𐴀𐴝𐴥𐴌𐴝 𐴔𐴟𐴃𐴧𐴞 𐴉𐴟𐴣𐴎𐴝 𐴕𐴡 𐴒𐴡𐴙𐴅𐴧𐴡𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴒𐴡𐴙𐴅𐴧𐴞𐴥𐴓𐴢. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴈𐴝𐴥𐴕𐴝-𐴉𐴞𐴕𐴝 𐴈𐴝𐴥𐴘𐴃𐴡 𐴁𐴡𐴀𐴘𐴢 𐴕𐴝𐴏𐴞𐴃𐴡𐴥 𐴀𐴟𐴙𐴄𐴧𐴠𐴥.“ ⁸𐴀𐴝𐴘𐴧𐴡𐴤 𐴀𐴝𐴣𐴀𐴌𐴝 𐴎𐴠𐴕𐴝𐴤 𐴕𐴡 𐴒𐴡𐴌𐴞𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴒𐴡𐴌𐴞𐴥 𐴀𐴠𐴑 𐴊𐴞𐴕𐴡𐴃𐴢 𐴀𐴠𐴑𐴧𐴟𐴌𐴞 𐴃𐴞𐴕 𐴀𐴝𐴥𐴎𐴝𐴌 𐴔𐴝𐴕𐴟𐴥𐴙𐴐𐴢 𐴔𐴡𐴌𐴞𐴒𐴞𐴥𐴓𐴒𐴡𐴘;⁹𐴀𐴝𐴣𐴀𐴌𐴝 𐴔𐴝𐴓𐴞𐴑𐴡𐴌𐴠 𐴀𐴠𐴕𐴃𐴝𐴥𐴕 𐴕𐴡 𐴒𐴡𐴌𐴞𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴇𐴝𐴥𐴉𐴢 𐴀𐴡𐴥𐴑𐴧𐴡𐴓𐴡𐴌 𐴇𐴡𐴣𐴌𐴝𐴕 𐴇𐴝𐴥𐴘 𐴔𐴡𐴌𐴞𐴒𐴞𐴥𐴓𐴒𐴡𐴘;¹⁰𐴐𐴠𐴥𐴑𐴝𐴘𐴡𐴃𐴢 𐴕𐴡 𐴒𐴡𐴌𐴞𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴇𐴝𐴥𐴓𐴝𐴑-𐴒𐴡𐴌𐴡𐴤𐴘𐴝 𐴉𐴞𐴥𐴌𐴞𐴏𐴃𐴝𐴘𐴠 𐴇𐴝𐴥𐴓𐴝𐴑 𐴒𐴡𐴌𐴞𐴥𐴉𐴠𐴓𐴝𐴙𐴓𐴢.

¹¹𐴔𐴝𐴙𐴕𐴐𐴠𐴥 𐴏𐴠𐴥𐴁𐴡𐴑 𐴇𐴝𐴥𐴏𐴞𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴡𐴥𐴘𐴧𐴠 𐴊𐴠, 𐴀𐴝𐴦𐴌 𐴀𐴝𐴣𐴀𐴌𐴝 𐴀𐴝𐴇𐴠𐴥𐴌𐴞 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌 𐴕𐴡𐴏𐴞𐴥𐴘𐴡𐴃𐴡𐴓𐴧𐴝 𐴇𐴞𐴥𐴀𐴕 𐴓𐴠𐴑𐴝𐴥 𐴒𐴞𐴥𐴘𐴠.¹²𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴃𐴞𐴥𐴘𐴝𐴘𐴧𐴝 𐴀𐴝𐴏𐴠𐴤 𐴁𐴡𐴥𐴓𐴞 𐴄𐴝𐴥𐴀𐴌𐴠, 𐴀𐴞𐴥𐴃𐴠 𐴀𐴟𐴥𐴣𐴐𐴞𐴘𐴝𐴌 𐴃𐴡𐴥𐴑, 𐴎𐴠𐴀𐴕𐴠 𐴉𐴡𐴌𐴞 𐴕𐴡 𐴎𐴝𐴒𐴡𐴥𐴘.¹³𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴀𐴠𐴕𐴃𐴝𐴥𐴕𐴡𐴃𐴢 𐴕𐴡𐴥 𐴉𐴡𐴌𐴡, 𐴎𐴞𐴀𐴕 𐴀𐴞𐴕𐴏𐴝𐴥𐴕𐴡𐴓𐴧𐴝 𐴀𐴝𐴦𐴔𐴉𐴝𐴥𐴔 𐴕𐴡. 𐴀𐴝𐴓𐴧𐴝 𐴃𐴡 𐴁𐴞𐴐𐴧𐴝𐴥𐴐𐴊𐴝𐴌; 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴡 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴀𐴠𐴕𐴃𐴝𐴥𐴕𐴡𐴃𐴢 𐴉𐴡𐴙𐴃𐴧𐴡 𐴕𐴡 𐴊𐴞𐴁𐴡; 𐴁𐴡𐴥𐴓𐴑𐴠 𐴀𐴠𐴕𐴃𐴝𐴥𐴕𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴈𐴠𐴥𐴕𐴃𐴟 𐴕𐴠𐴦𐴓𐴞𐴀𐴝𐴘𐴁𐴝𐴥𐴌 𐴉𐴡𐴣𐴃𐴢 𐴀𐴡𐴥 𐴔𐴞𐴓𐴝𐴘𐴊𐴞𐴁𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥 𐴉𐴝𐴌𐴡.

¹⁴𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴀𐴡𐴥 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴔𐴟𐴃𐴧𐴞 𐴉𐴟𐴣𐴎𐴝𐴃𐴧𐴟 𐴊𐴝𐴥𐴘𐴎𐴡𐴒𐴡𐴘.¹⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴇𐴡𐴓𐴁𐴡𐴕 𐴁𐴡𐴓𐴞 𐴁𐴟𐴎𐴞𐴥 𐴈𐴡𐴃𐴝𐴤 𐴀𐴞𐴀𐴕 𐴈𐴡𐴀𐴙𐴌. 𐴀𐴝𐴀𐴛 𐴈𐴡𐴀𐴙𐴌 𐴊𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴁𐴝𐴥𐴉𐴞𐴏𐴡.¹⁶𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴌𐴝𐴇𐴝𐴥𐴔𐴡𐴃𐴡𐴌 𐴉𐴞𐴘𐴝𐴓𐴝𐴃𐴧𐴟 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴇𐴝𐴥𐴘, 𐴀𐴝𐴣𐴀𐴌𐴝 𐴑𐴞𐴥 𐴔𐴡𐴀𐴏𐴞𐴤𐴌 𐴓𐴡𐴖𐴢 𐴖𐴡𐴥𐴃𐴢 𐴐𐴡𐴥𐴌𐴞𐴑 𐴀𐴡𐴥𐴘 𐴕𐴡 𐴎𐴝𐴘𐴒𐴡𐴥𐴘 𐴕𐴠𐴥؟ 𐴀𐴝𐴦𐴌 𐴎𐴠𐴣𐴃𐴧𐴠𐴥 𐴌𐴟𐴄𐴞 𐴁𐴝𐴥𐴚𐴒𐴞 𐴇𐴝𐴥𐴘, 𐴀𐴝𐴣𐴀𐴌𐴝 𐴑𐴞𐴥 𐴔𐴡𐴀𐴏𐴞𐴤𐴌 𐴒𐴝𐴦𐴃𐴢 𐴐𐴡𐴥𐴌𐴞𐴑 𐴀𐴡𐴥𐴘 𐴕𐴡 𐴎𐴝𐴘𐴒𐴡𐴥𐴘 𐴕𐴠𐴥؟¹⁷𐴌𐴟𐴄𐴞 𐴀𐴝𐴏𐴠𐴤 𐴊𐴠 𐴃𐴡 𐴀𐴠𐴑𐴒𐴗𐴝𐴥, 𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴁𐴞𐴐𐴞𐴤 𐴊𐴠 𐴀𐴡𐴥𐴘𐴓𐴠 𐴘𐴡 𐴀𐴝𐴣𐴀𐴌𐴝 𐴀𐴠𐴑 𐴒𐴝𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴃𐴡 𐴇𐴠𐴥 𐴀𐴠𐴑𐴒𐴗𐴝𐴥 𐴌𐴟𐴄𐴞 𐴀𐴠𐴥𐴕𐴝 𐴇𐴝𐴥𐴘.

¹⁸𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴁𐴝𐴦𐴁𐴟𐴃𐴠 𐴁𐴝𐴥𐴉𐴞𐴏𐴡: 𐴎𐴠𐴃𐴝𐴌𐴝𐴤 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴈𐴝𐴥𐴀, 𐴀𐴞𐴥𐴃𐴝𐴌𐴝 𐴑𐴞𐴥 𐴑𐴟𐴌𐴁𐴝𐴕𐴞-𐴒𐴝𐴥𐴣𐴃𐴢 𐴐𐴡𐴥𐴌𐴞𐴑 𐴀𐴡𐴥𐴘 𐴕𐴡 𐴎𐴝𐴒𐴡𐴥𐴘 𐴕𐴠𐴥؟¹⁹𐴇𐴞𐴥𐴘𐴝𐴕 𐴓𐴡𐴥𐴘 𐴑𐴞𐴥 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴈𐴡𐴘𐴃𐴡𐴤 𐴏𐴝𐴀𐴙𐴌 𐴊𐴠, 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴌 𐴑𐴞𐴔𐴡𐴃𐴢 𐴀𐴝𐴏𐴠𐴤, 𐴘𐴝𐴥 𐴔𐴟𐴃𐴧𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴔𐴡𐴃𐴢 𐴀𐴝𐴏𐴠𐴤؟²⁰𐴕𐴡, 𐴁𐴡𐴥𐴓𐴑𐴠 𐴈𐴡𐴘𐴃𐴡𐴤 𐴏𐴝𐴀𐴙𐴌 𐴊𐴠, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴞𐴀𐴕 𐴑𐴟𐴌𐴁𐴝𐴕𐴞 𐴊𐴠 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴠𐴊𐴠 𐴕𐴡 𐴁𐴡𐴥𐴓𐴑𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴊𐴠 𐴊𐴠. 𐴀𐴝𐴦𐴌 𐴀𐴝𐴀𐴛 𐴕𐴡 𐴏𐴝𐴀𐴘𐴢 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴡𐴕𐴡𐴤 𐴃𐴝𐴦𐴓𐴟𐴑𐴝𐴃𐴢 𐴌𐴝𐴑𐴡𐴥.²¹𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴉𐴞𐴘𐴝𐴓𐴝𐴃𐴧𐴟 𐴀𐴠𐴊𐴧𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴉𐴞𐴘𐴝𐴓𐴝𐴃𐴧𐴟 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴇𐴝𐴥𐴘 𐴕𐴡 𐴉𐴝𐴌𐴞𐴁𐴝𐴥. 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴔𐴠𐴏𐴡𐴃𐴢 𐴀𐴠𐴊𐴧𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴔𐴠𐴏𐴡𐴃𐴢 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴐𐴡𐴥𐴌𐴞𐴑 𐴀𐴡𐴥𐴘 𐴕𐴡 𐴉𐴝𐴌𐴞𐴁𐴝𐴥.²²𐴕𐴝𐴥𐴑𐴞 𐴀𐴝𐴣𐴀𐴌𐴝 𐴔𐴝𐴓𐴞𐴑𐴡𐴌𐴠 𐴒𐴝𐴘𐴌𐴡𐴃𐴢 𐴃𐴟𐴓𐴞𐴤𐴊𐴞𐴌 𐴊𐴠𐴥؟ 𐴀𐴝𐴣𐴀𐴌𐴝 𐴑𐴞𐴥 𐴀𐴞𐴥𐴁𐴝𐴌 𐴃𐴟𐴥𐴖𐴝𐴌𐴡 𐴁𐴡𐴓𐴟𐴖𐴝𐴌؟

𐴁𐴠𐴒𐴧𐴟𐴥𐴕 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥𐴘 𐴁𐴡𐴓𐴧𐴝 𐴒𐴡𐴌𐴡𐴤

²³𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴝𐴤 𐴊𐴠 𐴃𐴝𐴥𐴑𐴞𐴃𐴡 𐴉𐴝𐴌𐴠, ”𐴀𐴝𐴣𐴀𐴌 𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴘𐴠𐴏𐴢,“ 𐴄𐴞𐴥𐴑 𐴈𐴡𐴃𐴝𐴤, 𐴔𐴡𐴕𐴃𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥𐴘𐴠 𐴔𐴝𐴕𐴟𐴥𐴙𐴐𐴡𐴌𐴠 𐴉𐴝𐴥𐴘𐴊𐴝 𐴕𐴡 𐴒𐴡𐴌𐴠𐴥. 𐴀𐴝𐴀𐴛 𐴘𐴡𐴥 𐴈𐴡𐴀𐴘𐴢 𐴉𐴝𐴙𐴅𐴧𐴟𐴔, ”𐴀𐴝𐴣𐴀𐴌 𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴘𐴠𐴏𐴢,“ 𐴔𐴡𐴕𐴃𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥𐴘𐴠 𐴃𐴡 𐴔𐴝𐴕𐴟𐴥𐴙𐴐𐴡𐴌𐴠 𐴃𐴡𐴌𐴑𐴞 𐴕𐴡 𐴒𐴡𐴌𐴠𐴥.²⁴𐴇𐴡𐴕𐴡𐴤𐴑𐴞𐴘𐴠 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴕𐴡 𐴃𐴟𐴖𐴝𐴘𐴧𐴡𐴥, 𐴁𐴡𐴥𐴓𐴑𐴠 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴉𐴝𐴥𐴘𐴊𐴝 𐴃𐴟𐴖𐴡.

²⁵𐴒𐴟𐴏𐴧𐴡𐴌 𐴁𐴝𐴎𐴝𐴌𐴡𐴃𐴢 𐴎𐴞𐴀𐴕 𐴁𐴠𐴏𐴠 𐴇𐴞𐴥𐴀𐴕 𐴈𐴝𐴥𐴘𐴧𐴡; 𐴇𐴠𐴥𐴓𐴡𐴔𐴡𐴌 𐴖𐴝𐴏𐴃𐴠𐴥 𐴇𐴡𐴕𐴡𐴤 𐴏𐴟𐴥𐴖𐴝𐴓𐴢 𐴕𐴡 𐴒𐴡𐴙𐴅𐴧𐴡𐴥;²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴊𐴟𐴕𐴞𐴘𐴝𐴘 𐴀𐴠𐴊𐴧𐴠 𐴊𐴟𐴕𐴞𐴘𐴝𐴙𐴃𐴢 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴔𐴝𐴁𐴟𐴊𐴡𐴌.“

²⁷𐴎𐴡𐴊𐴞 𐴇𐴡𐴕𐴡𐴤 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴈𐴝𐴥𐴕𐴝𐴌 𐴊𐴝𐴖𐴡𐴃𐴢 𐴊𐴠 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴇𐴠𐴥 𐴊𐴝𐴖𐴡𐴃𐴢 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝𐴌 𐴔𐴟𐴀𐴕𐴃𐴟 𐴎𐴞𐴀𐴕 𐴊𐴠𐴦 𐴇𐴞𐴥𐴀𐴕 𐴈𐴝𐴥𐴘𐴉𐴠𐴓𐴝𐴘𐴧𐴡; 𐴇𐴠𐴥𐴓𐴡𐴔𐴡𐴌 𐴖𐴝𐴏𐴃𐴠𐴥 𐴇𐴡𐴕𐴡𐴤 𐴏𐴟𐴥𐴖𐴝𐴓𐴢 𐴕𐴡 𐴒𐴡𐴙𐴅𐴧𐴡𐴥.²⁸𐴔𐴡𐴕𐴃𐴡𐴌 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴀𐴕 𐴈𐴡𐴀, ”𐴒𐴟𐴏𐴧𐴡 𐴀𐴞𐴀𐴕 𐴔𐴟𐴃𐴧𐴞𐴌𐴠 𐴂𐴠𐴦𐴐𐴢 𐴒𐴡𐴙𐴅𐴧𐴝𐴥,“ 𐴃𐴡𐴥𐴀𐴘𐴓𐴠 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴃𐴝𐴓𐴝𐴘𐴊𐴞𐴘𐴠𐴥 𐴘𐴡𐴥𐴒𐴧𐴗𐴝𐴌 𐴖𐴝𐴏𐴃𐴠𐴥 𐴀𐴠𐴊𐴧𐴠 𐴇𐴠𐴥𐴓𐴡𐴔𐴡𐴌 𐴖𐴝𐴏𐴃𐴠𐴥 𐴇𐴞𐴥𐴀𐴕 𐴕𐴝 𐴈𐴝𐴥𐴘𐴧𐴡;²⁹𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴕𐴞𐴎𐴡𐴌 𐴇𐴠𐴥𐴓𐴡𐴔𐴡𐴌 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴘𐴡𐴥𐴒𐴧𐴗𐴝𐴌. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴇𐴠𐴥𐴓𐴡𐴔𐴠 𐴑𐴞𐴘𐴝𐴥 𐴀𐴝𐴣𐴀𐴌 𐴀𐴝𐴎𐴝𐴊𐴞𐴌 𐴉𐴝𐴥𐴘𐴏𐴠𐴓𐴝 𐴒𐴡𐴙𐴃𐴧𐴡𐴥؟³⁰𐴎𐴡𐴊𐴞 𐴀𐴝𐴀𐴛 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴇𐴝𐴥𐴘, 𐴃𐴡𐴥𐴀𐴘𐴓𐴠 𐴎𐴞𐴀𐴕𐴡𐴓𐴧𐴝 𐴀𐴝𐴀𐴛 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴑𐴞𐴘𐴝𐴥 𐴀𐴝𐴣𐴀𐴌 𐴁𐴡𐴊𐴕𐴝𐴔 𐴀𐴡𐴥𐴘𐴃𐴡؟

³¹𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴈𐴡𐴥𐴀 𐴘𐴝𐴥 𐴉𐴞𐴘𐴡𐴤, 𐴘𐴝𐴥 𐴀𐴡𐴙𐴕𐴧𐴡 𐴑𐴠𐴏𐴧𐴟𐴥 𐴒𐴡𐴌𐴡𐴤, 𐴁𐴠𐴒𐴧𐴟𐴥𐴕 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴀𐴡𐴥𐴘 𐴁𐴡𐴓𐴧𐴝 𐴒𐴡𐴌𐴞𐴥𐴘𐴡.³²𐴇𐴡𐴕𐴡𐴤𐴑𐴞𐴘𐴡𐴓𐴧𐴝 𐴀𐴡𐴣𐴏𐴝𐴥 𐴕𐴡 𐴁𐴡𐴙𐴕𐴧𐴡; 𐴘𐴡𐴇𐴟𐴥𐴊𐴞𐴓𐴧𐴝 𐴀𐴡𐴥𐴑 𐴘𐴝𐴥 𐴒𐴞𐴌𐴞𐴥𐴑 𐴀𐴡𐴓𐴧𐴝, 𐴀𐴝𐴦𐴌 𐴘𐴝𐴥 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴢 𐴀𐴡𐴓𐴧𐴝,³³𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴕𐴞𐴥𐴑𐴞 𐴀𐴝𐴀𐴛 𐴘𐴡𐴥 𐴇𐴝𐴥𐴀𐴌 𐴃𐴡𐴌𐴞𐴑𐴝𐴘𐴠 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴑𐴟𐴥𐴐𐴞 𐴒𐴡𐴌𐴞𐴥𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥. 𐴀𐴝𐴀𐴛 𐴕𐴞𐴎𐴡𐴌 𐴉𐴝𐴥𐴘𐴊𐴝𐴘 𐴕𐴡 𐴃𐴟𐴖𐴝𐴘 𐴁𐴞𐴐𐴞𐴤 𐴎𐴡𐴕𐴡𐴌 𐴉𐴝𐴥𐴘𐴊𐴝𐴘 𐴃𐴟𐴖𐴝𐴘, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴕𐴠𐴅𐴝𐴃𐴢 𐴉𐴝.

The Word for the World International

https://app.library.bible/content/87faca8b51c22590