ZACARIAS1
1Chupaam i ruwaxaaq poh ree rukab' haab' rokiik chi reyil ar Persia i Dario, xq'orob'jik ruum i Dios i Zacarías rak'uun i Berequías, eh riih i Iddo, eh je' wili i xq'orarik reh:2Re' hin i Dios ma' k'isiin ta xchalik nujosq'iil chikinaah taq aamaam awati't.3Je' wili cha q'or taq keh i tinamit:
Re' i QaJaaw Dios nim rajaawriik, je' wili xuq'or: chi kiyot' i kik'ux, kinkinimaj wo' chik ruka'peech, re' hin nee wo' chik i nutob'eej taqe, inki i Dios.4Mo'-oq je' taq akab' aamaam awati't. Re' keh je' wo' naq wili i xq'orarik keh kuum taqe i jalal nuq'oral: Re' i QaJaaw Dios nim rajaawriik je' wili i ruq'or, chajal taq wach ana'ojb'al cha kanaa' taq rub'aan chu'nchel i ma' holohik taj, inki. Eh re' keh xama' xkaaj ta wo' kib'iram i xnuq'or keh, inki i QaJaaw Dios.5Eh re' taq aamaam awati't, ruch'ihil taqe i jalal nuq'oral wihinaq taqe chaloq re' re', xa xikimik wo' reje, ma' k'achalkeeb' ta chik yu'naak.6Eh re' i nuk'uhb'aal i nuq'oral i xnuq'or keh taqe i waj kamanoom wihinaq taqe chaloq najtir, xkiq'or wo' cho keh taq aamaam awati't.
Awach i xi k'amwik naah xintohq'ik wo' chik kinimam, ruum xkireq chi riij chi re' hin i Dios nim wajaawriik, eh xnuq'o'reej wo' taqe chi korik ruuk' inki a'n ruuk' inkiq'or, inki i QaJaaw Dios. Re' taqe i kawáyu xk'uhtjik reh parusaq wiriik i Zacarías7Re' i Zacarías i jalal ruq'oral i Dios rak'uun i Berequías, riih i Iddo. Eh pan kijib' ru ka'winaq rub'eeh i rujunlaaj poh ree rukab' haab' rokiik chi reyil i Dario noq re' i QaJaaw Dios xuq'oreej parusaq wiriik i Zacarías.8Eh re' Zacarías je' wili i xuq'or: Re' QaJaaw Dios xuk'uhtaaj weh panusaq wiriik, jinaj i winaq iqlik chi riij i kawáyu kaq riij, ar pa'lik wach k'ixkaab' chi kixilak i chee' wahut. Eh wilik taqe i kawáyu pa'alkeeb' cho chi riij, wilik i kaq kiij, wilik rep rep paam i kiij, eh wilik i saq kiij.9Eh re' hin xnupaqaaj b'ila' chik reh i chi je' wili ánjel k'utaaj i rub'an wuuk':
Jaaw ¿Chib'ih rub'anam taqe i k'ahchi' wilom kiwach wili? kinki.
Eh re' ánjel je' wili i xuq'or weh:
Re' hin neenuq'or aweh chib'ih rub'anam taqe i re', inki.10Eh re' i winaq iqlik chi riij i kawáyu wilik chi kixilak i chee' wahut, je' wili i xuq'or cho weh:
Re' taqe i k'ahchi' awilom kiwach wili re' i QaJaaw Dios xtaaq'anik cho keh, reh chi naa kib'ehum naah chu'nchel i wach ak'al.11Chu'nchel i iqilkeeb' chi riij i kawáyu je' wili i xkiq'or cho reh i ánjel:
Re' hoj xqab'ehuj chik cho naah chu'nchel i wach ak'al, eh chu'nchel i tinamit k'acharik inki a'n parukorkiil, pansuqkiil k'uxliis, inki taqe.12Eh re' i ruánjel i QaJaaw Dios je' wili xuq'or:
QaJaaw Dios, re' hat lajeeb' ru kajwinaq haab' chik rutohq'iik cho aye'em aajosq'iil chikinaah i aj Jerusaleem, i aj Judá. ¿Kojaruuj i naawisaj aajosq'iil chikinaah, eh kojaruuj inaketelaaj cho kiwach? inki.13Re' i QaJaaw Dios ruuk' holohik laj q'orik xuq'oreej i ánjel k'utaaj i rub'an wuuk', suuqb'ik ruk'ux ruuk' taqe i xuq'or i QaJaaw Dios.14Chi riij i re' xuq'or weh i ánjel i hin chi naa nuq'orom rib'iral i xuq'or i Dios q'e' nim rajaawriik. Chaq'or keh chi je' wili i xuq'or i Dios:
Re' hin ma' k'isiin ta nuk'ax taqe i aj Jerusaleem, je' wo' taqe i aj Sión, tiko'q keh, inki.15Re' hin chikinaah chik i tokoom tinamit, ma' xinkinimaj taj yohb'aal wach i nujosq'iil, ruum noq xa k'isiin wo' naq i nujosq'iil chikinaah i nutinamiit. Re' chik i keh xiqopwik wach i nujosq'iil, ruuk' i kiyiib' wach na'ojb'al, inki.16Je' aj re', noq re' i QaJaaw Dios je' wili i xuq'or: Re' hin naa wo' chik nuketelaam kiwach i aj Jerusaleem, naa wo' nuye'em q'ab' chi naa rukorjiik i kitinamiit, eh chi naa rukorjiik aha' wilik taqe i yojinaq reh i nupaat, inki.17Eh re' i ánjel je' wili i xuq'or weh: Re' hat cha q'or rib'iral i xuq'or i QaJaaw Dios chi je' wili: Re' hin naa wo' chik nuye'em chib'ih keh i nutinamiit. Eh naa wo' chik nuye'em rukowiil kik'ux i aj Sión, eh naa wo' chik nuq'orom chi re' taqe i aj Jerusaleem nusik'im cho kiwach chi nutinamiit taqe, inki. Re' taqe i kijib' chi uk'aa', eh re' taqe i kijib' chi aj sehk xk'uhtjik reh parusaq wiriik i Zacarías18Re' hin wilik wo' chik i xk'uhtjik weh panusaq wiriik, xwilow chik inche wach i kijib' chi ruk'aa' chikop.19Re' hin xnupahqaaj b'ila' reh i ánjel k'utaaj i rub'an wuuk' chi je' wili:
¿Chib'ih rub'anam i kijib' chi uk'aa' re' re'? kinki reh.
Eh je' wili i xuq'or weh:
Re' taqe i kijib' chi uk'aa' re' re' kijalwaach i kijib' chi tinamit kow kiib'. Re' i xtukinik kiwach i rutinamiit i Dios, re' taqe i aj Judá, aj Israel, aj Jerusaleem, inki.20Eh re' i QaJaaw Dios i kijib' chik aj sehk xuk'uhtaaj weh panusaq wiriik.21Re' hin xnupahqaaj b'ila' reh i ánjel chi je' wili:
¿Chib'ih i xchalik kian i kijib' chi aj sehk re' re'? kinki reh.
Eh je' wili i xuq'or weh:
Re' kijib' chi uk'aa' xawilow kiwach kijal waach i kijib' chi tinamit xtukinik kiwach i nutinamiit korehtaal xkian reh. Eh re' taqe i kijib' chi aj sehk re' re', kijalwaach i naa ruchaliik chi kiyohb'eesjiik chi rusachariik kiwach i kijib' chi tinamit re' re', ruum re' keh je' naa ruuk' uk'aa' xkitukej wach i nutinamiit, Judá, inki i QaJaaw Dios. Re' i Zacarías xk'uhtjik reh parusaq wiriik jinaj i pajb'al k'ahaam1Jinaj wo' chik i xk'uhtjik weh panusaq wiriik, jinaj chik winaq xwilow wach ruyohq'eem jinaj i pajb'al k'ahaam.2¿Aha' tiooj i hat? kinki reh.
Re' reh je' wili xuq'or weh:
Re' hin ojik i nub'an chupajariik i tinamit Jerusaleem, nab'al reh nik' nimaal rooq, eh nik' nimaal wach, inki.3Eh re' i ánjel k'utaaj i rub'an wuuk' xooj reje, eh jinaj chik i ánjel xk'ulik k'ulwoq reh.4Je' wili i xuq'or:
Hiy chi jumehq'iil chareq wach b'eeh ak'un ruyohq'eem i pajb'al k'ahaam, je' wili i neenaq'or reh: Re' i Jerusaleem, ma' k'isa i tinamit, ma' k'isa i kichikoop naa ruwihiik chupaam, ruum i re' ma' naa ta chik ruwihiik koraal tz'aq chi junsuut.5Re' i QaJaaw Dios je' wili i ruq'or: Re' hin, je' naa hin q'aaq' chi junsuut i Jerusaleem, eh chupaam i tinamit re' re' naa nuk'uhtaam i runimaal nuwach inki i Dios, inki ánjel.6Re' i QaJaaw Dios je' wili i xuq'or keh i tinamit: Re' hin xnutukej taq awach xa aha' yuuq'. Eh yu'naak eleen taq chaloq chupaam i ye'aab' wilik pantz'eet reh i rookb'aal q'iij.7Re' taq i hat aj Sión wilkaat taq ponoq Babilonia eleen taq chaloq ti sutinoq taq chaloq pana ye'aab', inki.8Re' i QaJaaw Dios nim rajaawriik, i xtaaq'anik weh chuq'orariik taq aweh chib'ih i naakik'ulum i nimaq taq tinamit xiq'uchwik i chib'ih taq aweh, je' wili xuq'or:
Awach imb'anik ti' k'axik taq aweh i hat je' naa re' i rutiyoxil naq'nuwach inki a'n ti' k'axik reh.9Re' hin naa nuye'em i ti' k'axik chikinaah, eh re' chik kimoso naa rutaaq'aniik keh, inki Ruuk' i re' nee taq i nanaab'eej chi re' i QaJaaw Dios nim rajaawriik xtaaq'anik cho weh.10Re' i QaJaaw Dios je' wilik i xuq'or: Re' taq i hat aj Jerusaleem ti tz'uyinoq taq ruum i rusuqkiil taq ak'ux, ruum re' i hin naa nuchaliik taq chi wihik chaxilak, inki.11Eh chupaam taqe i q'iij re' re', ma' k'isiin i tinamit naakinimaniik reh i QaJaaw Dios, je' wili i naa ruq'orom keh: Re' taq i hat naa akahniik taq chi nutinamiit, inko'q keh. Chi je' re' nee taq i nanaab'eej chi re' i QaJaaw Dios nim rajaawriik xtaaq'anik cho weh i hin.12Re' i QaJaaw Dios, naa wo' chik ruchopom naah i tinamit Judá, eh naa rukahniik chupaam i rusantolaj ye'aab', Eh naa wo' chik rusik'im wach i Jerusaleem.13Chu'nchel ta naq i tinamit neentz'aplojik i kichii' chuwach QaJaaw Dios, ruum re' reh naa rukanaam chaloq i rusantolaj ye'aab', eh naa ruchaliik chi wihik panqaxilak, inki. Re' i Zacarías xk'uhtjik reh parusaq wiriik i Josué kajaaw i k'amal kib'eeh aj tiij1Re' i QaJaaw Dios xuk'uhtaaj weh panusaq wiriik, i Josué kajaaw i k'amal kib'eeh aj tiij pa'lik i koq chuwach i ruánjel i QaJaaw Dios. Eh re' i aj yahm parusak'aaj q'ab' i ánjel pa'lik i koq chukojariik ru mahk i Josué.2Eh re' i ruánjel i QaJaaw Dios je' wili i xuq'or reh i aj yahm: Re' ta naq i QaJaaw Dios xsik'wik cho kiwach i aj Jerusaleem neenq'ilwik aweh. Re' winaq wili xko'ljik chuwach i ti' k'axik, je' rukab' noq inehteesjik iloq i ju'sii' wach q'aaq'.3Eh re' i Josué ch'uwa' chik inche wach i ruso' rukojom, noq pa'lik i koq chuwach i ruánjel i QaJaaw Dios.4Eh re' i ánjel je' wili i xuq'or keh i wilkeeb' ruuk': Chawesaj taq chi riij i ruch'uwa' wach so' i Josué, eh je' wili i xuq'or reh: Re' hin xwesaj chik chawiij ach'uwa' wach so', rehtaliil chi xwesaj chik aamahk. Yu'naak saq chik wach aso' xkojarik rehtalil chi naa rusuuqb'iik ak'ux, inki.5Re' i ánjel je' wili i xuq'or: Chab'ak' taq i saq itz'ihy wach naah, inki. Eh xkib'ak' wo' hoq i saq itz'ihy wach naah i Josué. Xkikoj jinaj i holohik itz'ihy chi riij, re' ruuk' i reh ninq'iij. Eh re' i ruánjel i QaJaaw xa xkahnik wo' chi pa'lik ar noq xwilow.6Eh re' i ruánjel i QaJaaw Dios je' wili i xuq'or reh i Josué:7Re' i QaJaaw Dios nim rajaawriik je' wili xuq'or aweh:
Re' hat naa ak'amam i nub'eeh, eh naa a'nam i ruq'or taqe i nuk'uhb'aal. Eh wila' xa a'n taqe re', re' hat naa akahniik chi ilil reh i nupaat. Naa nuye'em aaye'aab' ayu' chi kixilak i nuánjel wilkeeb' panukamaj.8Re' hat Josué, je' wo' taqe awuch k'amal kib'eeh aj tiij chab'iraj taq chi korik i naa nuq'orom ruum re' hat, hat kajaaw i k'amal kib'eeh aj tiij. Chi chawunchelaal taq i hat xa hat taq rehtalil jinaj i q'orol reh i nuq'oral naa nutaq'aam chaloq, re' i je' naa kore' naa rutoxliniik chaloq.9Eh re' hin xnuyeew chuwach i Josué jinaj ab'aj wuqtaq wilik wii' i ruperpeer wach, re' hin naa nutz'ihb'aniik wach. Eh xa ruuk' i jinaj q'iij naa nusacham wach chu'nchel i kimahk i wilkeeb' chupaam i tinamit wili.10Eh noq naa ruponiik i q'iij re' re' suq taq chik naa awihiik, naa taq chik a'nam awa' ahaa' pankomonil, eh naa ruwihiik taq atik re' ruuk' i uuva re' ruuk' i higo, inki i QaJaaw Dios nim rajaawriik. Re' Zacarías xk'uhtjik reh i ye'aab' kantela oro, ruch'ihil i ka'iwal chi olivo1Re' i ánjel xub'an ruk'utaaj wuuk', xsutinik wo' chik chaloq noq xwilow, xiruksaj, je' rukab' noq inukteesjik i koq jino'q i suq suq ruwiriik, xupahqaaj weh chi je' wilik.2¿Chib'ih jariik i k'ahchi' awilom wach? inki weh.
Re' hin je' wili ruchaq'weesjiik xnub'an:
Jinaj i ye'aab' kantela re' ruuk' i oro wuquub' i ye'aab' saqumb'al wilik chinaah k'ahchi' wilom wach, kinki reh.
Eh chinaah wilik i ye'aab' aseite, wuquub' i hoop paam ch'ihch' i nik'ik wii' i raseitehiil.3Eh k'ul tar pantaq rucheel i ye'aab' kantela wilik i ju' i juniwal chi olivo juniwal i wilik parusak'aaj, eh juniwal i wilik parutz'eet, kinki reh.4Eh re' hin xnupahqaaj reh chi je' wili i ánjel k'utaaj i rub'an wuuk':
Jaaw, ¿chib'ih iraaj ruq'orom i k'ahchi' wilom wach re' re'? kinki reh.5Re' i ánjel je' wili xuq'or weh:
¿Mi ma' aweht'al re' chib'ih iraaj ruq'orom taqe re'? inki weh.
Jaaw ma' weht'al taj, kinki reh,6Re' i ruánjel i QaJaaw Dios je' wili i xuq'or weh:
Re' i wili i rehtalil i xuq'or i QaJaaw Dios reh i Zorobabel, chi je' wili:
Re' hat ma' re' ta ruuk' q'aq'inik, ma' re' ta ruuk' awansil naa a'nam i nukamaj, ruuk' la' i rajaawriik i Wuxlab'al inki i QaJaaw Dios nim rajaawriik.7Re' ti' k'axik atoob' ta je' najtiil naah i yuuq', re' i Zorobabel ma' k'axik ta noq neerukuy rik'teesjiik. Eh korehtaal i rukoj i tz'apaab' wach ab'aj reh ruyejeb'jiik i rupaat i Dios, kow naakik'erem kichii', chi je' wili: Yohb'aal inche wach holwochiil i xb'aan wili, inko'q taqe.8Eh re' i ruánjel i QaJaaw Dios xq'orik wo' chik wuuk' noq xb'iraj, je' wili i xuq'or weh:9Re' i Zorobabel naa rutik'aniik ruyejeb'jiik i rupaat i QaJaaw Dios, eh re' wo' i reh naa rukuxisaniik wach ruyejeb'jiik, ruuk' i re' naa taq anab'eem i hat chi re' i QaJaaw Dios xtaaq'anik cho weh i hin taq awuuk'.10Eh re' i ma' xkichop ta kik'ux reh rutik'ib'jiik i paat re' re', naa rusuuqb'iik kik'ux noq naakilom chi re' i Zorobabel naa rukuxisaniik reh. Eh chi riij i re' je' wili i xuq'or ruánjel i QaJaaw Dios:
Re' i wuquub' chi saqumb'al k'ahchi' awilom wach, rehtalil chi re' i QaJaaw Dios i rilow chu'nchel i wach ak'al, inki.11Re' hin xnupahqaaj b'ila' chik reh i ánjel chi je' wili:
Raaj i ka'iwal chi ruche'el olivo wilkeeb' pantaq rucheel i ye'aab' kantela ¿Chib'ih iraaj ruq'orom? kinki reh.12Eh xnupahqaaj wo' reh chi je' wili:
Raaj ki'ib' chi q'ab' olivo wilik cho chikinaah i ki'ib' chi hoop paam ch'ihch' re' ruuk' i oro ik'tesb'al i raseitehiil taqe i saqumb'al, ¿chib'ih iraaj ruq'orom? kinki reh.13Re' i ánjel xupaqaaj weh chi je' wili:
¿Mi korik chi ma' aweht'al taj chib'ih iraaj ruq'orom? inki.
Korik jaaw ma' weht'al taj, kinki reh.14Re' reh je' wili xuq'or weh:
Re' i ki'ib' chi q'ab' olivo wili kehtalil i ki'ib' sik'ooj cho kiwach chub'anariik i rukamaj i QaJaaw Dios ehchan reh chu'nchel i wach ak'al, inki weh. Re' i Zacarías xk'uhtjik reh parusaq wiriik i junb'oht chi huuj1Re' hin i xk'uhtjik weh panusaq wiriik, i jumb'oht chi huuj b'ehik i rub'an panteew k'ultar tz'ihb'amaj wach.2Eh re' i ánjel xupahqaaj weh chi je' wili:
¿Chib'ih jariik i k'ahchi' awilom wach? inki.
Re' hin k'ahchi' wilom wach i junb'oht chi huuj lajeeb' b'ara rooq, eh ho'oob' b'ara i runimaal wach, kinki reh.3Eh je' wili i xuq'or weh:
Chuwach i huuj re' re' tz'ihb'amaj chi naa kiye'ariik panti' k'axik i tinamit chi junsuut i wach ak'al. Juntar tz'ihb'amaj wii' chi naa rusachariik kiwach i aj jileq', eh chi juntar tz'ihb'amaj chi naa rusachariik kiwach taqe inki q'or i b'ih i QaJaaw Dios chi xama' xta rub'ehel.4Re' hin naa nuye'em i ti' k'axik pankipaat taqe i kib'anik i leq' je' wo' pankipaat taqe i kiq'orik reh i nub'ihnaal chi xama' xta rub'ehel. Re' i ti' k'axik re' re' ar naa ruwihiik korehtaal insahchik wach chu'nchel chib'ih keh, inki i QaJaaw Dios nim rajaawriik, inki. Re' i Zacarías xk'uhtjik reh parusaq wiriik jinaj ixoq k'ahchi' rupajariik pan chakach5Re' i ánjel k'utaaj i rub'an wuuk' xelik chaloq chi jumehq'iil noq xwilow, je' wili i xuq'or weh:
Chakoj rehtaal i k'ahchi' awilom wach re' re', inki weh.6Re' hin xnupahqaaj b'ila' reh chi je' wili:
Raaj i re' ¿chib'ih iraaj ruq'orom? kinki reh.
Re' reh je' wili i xuq'or weh:
Re' chakach re' re' rehtalil i pajb'al reh i kimahk i tinamit chi junsuut i wach ak'al, inki.7Eh re' i chakach re' re' plomo ch'ihch' i tz'apb'al naah. Noq xkiteh johtoq naah i chakach jinaj chik ixoq tzunlik chupaam noq xwilow.8Re' ixoq rehtalil i yiib' wach na'ojb'al imb'aan, inki weh.
Eh re' i ánjel xumihnaaj chik qohoq ixoq panchakach, xutz'ap wo' chik naah ruuk' i tz'apb'al naah plomo ch'ihch'.9Eh jinaj wo' chik i xwilow wach panusaq wiriik, ki'ib' chik taqe ixoq xi k'uloq, wilik kixiik' je' rukab' i ruxiik' i nimlaj chikop rupinik chik inki a'n xkichop johtoq panteew i chakach reh pajb'al.10Re' hin xnupahqaaj reh i ánjel chi je' wili:
¿Aha' inkik'am reje i chakach pajb'al? kinki reh.11Re' reh je' wili xuq'or weh:
Ar xkik'am reje chupaam i ye'aab' Sinar. Eh ar naa kiyejaam jinaj i paat ye'aab' reh. Noq kiyejaam chik naakiye'em chinaah jinaj i ye'aab' reh, inki weh. Re' i Zacarías xk'uhtjik reh parusaq wiriik i kijib' chi kareta reh q'aq'inik1Re' hin jinaj wo' chik i xk'uhtjik weh panusaq wiriik, kijib' chik i kareta reh q'aq'inik xwilow wach. Ar chik xi elik chaloq chi xilak i yuuq' q'an ch'ihch' korjinaq wii'.2Re' peet kareta kaq chik kiij i kawáyu i nqerinik reh. Re' i rukab' kareta q'eq chik kiij i kawáyu i nqerinik reh.3Re' i roox kareta saq chik kiij i kawáyu inqerinik reh. Re' i rukaaj kareta q'eq saq chik paam i kiij i kawáyu inqerinik reh.4Eh re' i ánjel k'utaaj i rub'an wuuk', xnupahqaaj b'ila' reh chi je' wili:
¿Chib'ih iraaj ruq'orom i k'ahchi' wilom wach? kinki reh.5Re' i ánjel je' chik wili i xuq'or weh:
Re' taqe i kijib' chi kareta re' re', kehtalil i kijib' chi uxlab'al xa kiooj chub'anariik i rukamaj i Dios, ehchan reh chu'nchel i wach ak'al.6Re' i kareta qeremaj kuum i q'eq kiij kawáyu naa rojiik pantz'eet reh i rookb'aal q'iij. Eh re' i kareta qeremaj kuum i saq kiij kawáyu, naa rojiik parelb'aal q'iij. Re' taqe qeremaj kuum i kawáyu q'eq saq paam i kiij naa rojiik pansak'aaj reh i rookb'aal i q'iij, inki.7Re' i kawáyu q'eq saq paam i kiij xankaaj chik ojik chi junsuut i wach ak'al. Eh je' chik wili i xq'orarik keh ruum i ánjel:
Hiy taq chab'ehuj paam i tinamit i wach ak'al ki uchjik, eh xiooj wo' hoq.8Eh re' ánjel kow chik xuq'or weh chi je' wili:
Chakoj rehtaal taqe i xiooj pantz'eet reh i rookb'aal i q'iij, xooj kijot'isaj wach i rujosq'iil i QaJaaw Dios ar, inki. Re' i q'orik chi riij noq xkojarik ru corona i Josué kajaaw k'amal kib'eeh i aj tiij9Re' i QaJaaw Dios je' wili i xuq'or weh:10Re' hat inchol amalom tumiin re' ruuk' i oro, re' ruuk' i plata xkik'am chaloq i xi elik cho Babilonia, re' i Heldai, re' i Tobías, re' i Jedaías. Eh xa chupaam wo' hoq i q'iij re' re' nee tiooj chupaam i rupaat i Josías rak'uun i Sofonías.11Eh ruuk' i oro, i plata neenamol wach neenayejaa' taqe i corona, jinaj i corona neena koj wach naah i kajaaw i k'amal kib'eeh i aj tiij, Josué rub'ihnaal, rak'uun i Josadac.12Chaq'or reh chi je' wili: Re' i QaJaaw Dios nim rajaawriik je' wili i xuq'or,
re' jinaj i je' rutoxl inkiq'or reh, je' kore' naa rutoxliniik chaloq, re' reh naa ruyej-aniik reh i rupaat i QaJaaw Dios.13Re' reh naa ruyej-aniik i rupaat i QaJaaw, eh naa ruk'ulum i runimaal wach, na' tz'uhnoq chupaam i ruye'aab' chi reyil, re' chik i reh naa rub'aniik i taaq'anik. Re' reh naa rukahniik chi k'amal kib'eeh aj tiij. Re' i ki'ib' wach chi kamanik re' re' naa rub'anam pansuqkiil k'uxliis.14Re' taqe i corona naa ayejaam naa rukahniik chupaam i rupaat i QaJaaw Dios, reh chi naa rukahniik chi rehtalil i Heldai, i Tobías, i Jedaías, i Josías, i rak'uun i Sofonías, inki.15Eh re' taqe i aj Israel wilkeeb' chi najt, naa kichaliik chi to'ooj chuyejeb'jiik i rupaat i QaJaaw Dios. Ruuk' taqe i re' naa taq anab'eem chi re' i Dios nim rajaawriik xtaaq'anik cho weh taq chaxilak. Re' taqe i wili naa rub'aan wila' xanimaj taq, xab'iraj taq, wila' xa a'n taq i ruq'or i ruk'uhb'aal i QaJaaw Dios. Re' taqe i aj Israel ma' korik ta keh i kitiij xkian chi ma' kianam ta kiwa' kihaa'1Noq kijib' chik haab'rokiik chi reyil i Dario, pan kijib' rub'eeh i rub'eleej poh Quisleu, re' i QaJaaw Dios wilik i ruk'uhb'aal xuq'or reh i Zacarías.2Eh chupaam i q'iij re' re', re' i wilkeeb' pan tinamit Bet-el kitaq'aam chik reje i Sarezer, ruch'ihil i Regem-melec, eh k'ih i winaq xooj chikiij, chupahqaljiik i rotob'il i QaJaaw Dios.3Re' keh je' wili i xkiq'or keh i jalal ruq'oral i Dios, keh i k'amal kib'eeh aj tiij, kikamanik parupaat i QaJaaw Dios nim rajaawriik: ¿Kojaruuj inqakanaa' rukojariik i qa q'eq so'? ¿Kojaruuj inqakanaa' rub'aan i qatiij chi ma' qa'nam ta qawa' qahaa' inqa a'n chupaam i roo' poh reh i ju'jun chi haab'? inki taqe.4Je' re' noq re' i QaJaaw nim rajaawriik, je' wili i xuq'or weh:5Chaq'or keh i tinamit i wilkeeb' ayu', keh i k'amal kib'eeh aj tiij chi re' hin je' wili i xnuq'or: Re' taq i hat i na a'n taq aatiij chi ma' a'nam ta taq awa' ahaa', eh xtib'ik taq ak'ux, chupaam i roo' poh, i ruwuuq poh reh i ju'jun chi haab', chuwach lajeeb' ru kajwinaq haab'. ¿Mi loq'oomb'al weh taq i na a'n re'?6Eh noq i na a'n taq awa' ahaa', mi ma' xa re' wo' taq re' hat inanujisaj taq awiib'. ¿Mi ma' xa aweh wo' taq re' hat inkamanik? inki, tiko'q taq keh.7¿Mi ma' re' wo' taqe re' i q'orik wili xuq'or i QaJaaw Dios najtir q'iij ruuk' kichii' i jalal ruq'oral noq re' taqe i aj Jerusaleem ko wilkeeb' cho pansuqkiil k'uxliis, noq ko wilik naq patineel chupaam, noq ko wilik patineel chupaam taqe ye'aab' wili chi junsuut, je' wo' hoq i ye'aab' Neguev, i ye'aab' wilik wach k'ixkaab'? Re' taqe i aj Israel ma' xkaaj ta kinimam i Dios ruum i re' xi k'amarik reje pan tokoom tinamit8Re' i QaJaaw Dios je' wili i xuq'or reh i Zacarías jalal ruq'oral:9Re' taqe i wili i nuq'or i hin chi naa taq a'nam: Korik-oq taq wach ak'ux, eh xa hat-oq taq atoob', k'ul taq chaketelaaj awach.10Maa a'n taq ti' k'axik keh ixoq kamnaq kib'ahiil, i ma' xta kituut kajaaw, taqe i tokoom tinamit wilkeeb' taq chaxilak. Maa kapaaj taq chi neena a'n i ti' k'axik keh aawas achaaq', inki Dios.11Xa re' la' re' taqe i tinamit ma' xkaaj ta rub'aan, xkiq'eb' chi riij kik'ux rub'aan, xa je' ti chik ma' xkib'iraj xkian kiib'.12Eh xkikowb'isaj i kánima, xa je' chik kowiil ab'aj diamante, re' xkaaj chi ma' xkib'iraj taj i kitijiik xb'aan, je' wo' hoq i ruq'or i ruk'uhb'aal QaJaaw Dios nim rajaawriik re' xuq'or rib'iral ruuk' i ruxlab'al, eh ruuk' kichii' taqe i jalal ruq'oral i wihinaq taqe chaloq pampeet.
Ruum aj re', re' i QaJaaw Dios ma' k'isiin ta xchalik rujosq'iil.13Je' wili i xuq'or: Nik' wach noq ma' xinkinimaj i keh noq xnuk'uhb'alej taqe, je' wo' re' i hin ma' naa ta wo' b'iram taqe noq naa kipahqaam i wotob'il.14Xnutukej la' kiwach xa aha' pantaq tokoom tinamit ma' keht'al ta naq. Eh re' i tinamit xi elik reje wii' xkahnik chi ma' xta wilik chupaam. Xa je' chik jinaj chiq yuuq' ma' jino'q chik patineel chupaam tinamit re' re' xiik' naq naah howochiil, eh re' keh xkikanaa' chi xan tz'irik chik paam, inki i QaJaaw Dios nim rajaawriik. Re' i QaJaaw Dios xuq'or chi naa ruko'leem i rutinamiit, eh chi naa wo' chik ruk'amam taqe Jerusaleem1Re' i QaJaaw Dios nim rajaawriik je' wili i xuq'or weh:2Re' i tinamit wilkeeb' Sión q'e' nim kiwach chi weh hin, ruum i re' ma' k'isiin ta xchalik nujosq'iil chikinaah inixowanik kiwach.3Re' hin naa wo' chik wojiik chi wihik ar Jerusaleem,
re' i tinamit re' re', korik wach ruk'ux naa kiq'orom reh. Eh re' naa ruwihiik wii' i nuloq'laj paat i hin santo laj yuuq' i naa kiq'orom reh, nim rajaawriik.4Re' taqe mama' winaq, taqe i ati't ixoq,
naa wo' chik kitzunaam kiib' chupaam taqe i b'eeh reh i tinamit Jerusaleem. Re' keh xa ruuk' chik kikarote naakitoob'eem kiib', ruum korehtaal kiponik chi ma' naa ta chik kikuyum i b'ehik.5Je' wo' taqe i kok' ak'un, i kok' xq'un, naa wo' kinujisam paam i b'eeh, eh naa kia'nam kik'onik ar.6Eh na' ponoq i q'iij re' re',
re' taq i hat nik' taq k'ihaal i naa taq ako'leem awiib' i hat taq nutinamiit, ma' k'isiin ta k'axkiil rub'aan taqe re' naa awilom. Xa re' la' chi nuwach i hin, i hin Dios nim wajaawriik, ma' k'axik ta noq naa nub'anam.7Re' hin naa nuko'leem taqe i nutinamiit pan kiq'ab' i tinamit wilkeeb' reje parelb'aal q'iij,
naa wo' nuko'leem pan kiq'ab' i nimaq tinamit wilkeeb' reje panrookb'aal q'iij.8Eh naa wo' chik nuk'amam taqe chaloq chi patinik Jerusaleem, naa wo' chik kikahniik chi nutinamiit. Re' hin naa nukahniik chi ki Dios, eh re' rukorkiil, re' rub'ehel naa nub'anam kuuk', inki i QaJaaw Dios.9Re' i QaJaaw Dios nim rajaawriik je' wili i xuq'or:
Re' taq i hat chakowej taq awiib' chi rutinamiit i paat, chab'iraj taq chib'ih jariik i xiik' naah loq'il kiq'orom chaloq taqe i jalal nuq'oral xa re' wo' noq xtohq'ik cho rokiik i peet ab'aj reh raa' i nupaat.10Eh noq majaa' inkitoq'aa' cho rukorb'eesjiik i nupaat, ma' intojarik ta naq kikamaj taqe i winaq. Ma' intojarik ta wo' naq i riij i kikamaj taqe i kawáyu. Re' taqe i tinamit ma' xta naq rusuqkiil kik'ux chikiwach, kuum taqe i nixowanik kiwach, xa re' la' re' wo' hin xin ye'wik q'ab' chi k'ul ma' nkaaj ta kiwach.11Re' hin je' re' i xnub'an kuuk' i aj Israel noq xub'an, xa re' la' yu'naak ma' je' ta chik re' i naa nub'anam kuuk' nik' k'ihaal i koxikahnik, inki QaJaaw Dios nim wajaawriik.12Re' hin naa nuye'em i suq kiil k'uxliis chi kixilak, re' i ki uuva naa ruwachiniik, naa ruwachiniik i chib'ih keh naakitikiim, naa nuye'em i jab' chinaah. Re' hin naa nuye'em keh chu'nchel i re' i ruqox i nutinamiit koxikahnik.13Re' taq i hat aj Judá, i aj Israel, xkian taq ti' k'axik aweh, i nimaq tinamit. Eh re' hin naa taq kaat nuko'leem, eh awuum taq i hat naa nuye'em i wotob'il chikinaah i tokoom tinamit, mat yo'jik taq, cha chop taq ak'ux.14Re' i QaJaaw Dios nim rajaawriik je' wili i xuq'or: Noq xkuksaj cho wach i nujosq'iil taq aamaam awati't najtir q'iij xnuq'or chi naa nuye'em taqe chutojariik i kimahk, eh xnub'an wo' hoq ma' xnusutej ta chi riij i nuq'oral.15Raaj i yu'naak xchalik panuk'ux chi naa nub'anam otob'il aweh taq i hat aj Judá, aj Jerusaleem, ruum aj re' mat yo'jik taq.16Re' taq i hat je' wili i ruk'ul chi naa taq a'nam: Re' chi k'ul taq naa aq'orom i korik chawach, eh re' taqe i q'atal q'orik kiq'at i q'orik parub'ehel, ma' toq'aa' wo' taq peleto kuuk' taqe i q'atal q'orik pan kiye'aab'.17Eh ma' ruk'ul taj chi awach taq aweh i neerukapaaj rujot'ariik i ras ruchaaq', eh ma' awach ta taq aweh i nee ruq'or i korik wila' ma' korik wo' hoq ruum re' taqe re' ma' imponik ta chi nuwach i hin, inki i QaJaaw Dios nim rajaawriik.18Re' i QaJaaw Dios nim rajaawriik je' wili i xuq'or weh:19Re' taqe i tiij imb'aan rajlaal haab' chi ma' b'anooj ta wi'k haa', re' imb'aan chupaam i rukaaj poh, chupaam i roo' poh, eh chupaam i ruwuuq poh, chupaam i ru lajeeb' poh, naa rusutiniik chi jinaj rusuqkiil k'uxliis. Jinaj ninq'iij taq cha weh i hat taq aj Judá. Chak'ax taq i korik, i suq kiil k'uxliis, inki.20Re' i QaJaaw Dios nim rajaawriik je' wili i xuq'or:
Naa ruponiik i q'iij chi ma' k'isiin tokoom tinamit naa kichaliik ayu' chupaam taq aatinamiit.21Re' taqe i tokoom tinamit k'ul naa kiq'orom chikiwach chi je' wili: Taq taq qapahqaaj i rotob'il i QaJaaw Dios nim rajaawriik, inko'q taqe. Eh re' taqe junch'uq je' wili i naa kiq'orom: Naa wo' rojiik qasik'im i hoj, inko'q taqe.22Eh ma' k'isiin wo' taqe i naa kichaliik pankok' tinamit, pantaq nimaq tinamit, naa kichaliik ayu' Jerusaleem chupahqaljiik i wotob'il i hin.23Chupaam taqe ponoq i q'iij re' re', laj taq chi winaq reh reh wach kitinamitaal naa kichopom chi ruso' jino'q i aj Judío, je' wili i naa kiq'orom: Re' hoj ma' k'isiin ta nqaaj ojik taq chawiij ruum xqib'iraj rib'iral chi ar wilik i k'achlik Dios, inko'q taqe, inki i Dios. Re' tojb'al kimahk i tinamit wilkeeb' chi ruka'jaah i tinamit Israel1Re' i QaJaaw Dios xuq'or reh i Zacarías i ti' k'axik xuk'ul koq'uun i tinamit Hadrac, i tinamit Damasco, je' wili xuq'or: Re' taqe i tinamit wilkeeb' paruyuq'ul i Siria re' wo' ruuk' i nutinamiit. Je' wo' hoq jar ch'uq chi kiib' i aj Israel.2Je' wo' i tinamit Hamat re' ruuk' i nutinamiit, re' i wilik chi kika'jaah i tinamit Tiro, i Sidón, weht'al chib'ih jariik imb'aan ar.3Re' i tinamit Tiro xkiyejaa' kinajt naah paat ko'lenb'al kiib', xkimol wach i plata chi je' i molarik wach pooq, eh xkimol wach i oro chi je' inmolarik wach ch'uwa' pantaq b'eeh.4Eh re' hin i Dios naa nuq'uchum keh chu'nchel i re', naa nukutum pam palaw i kib'ehomal, eh naa nuk'atam i kitinamiit.5Eh noq naakilom chi je' re' i aj Ascalón naa kiyo'jiik. Eh re' taqe i aj Gaza, naa wo' kik'ulum i ti' i keh, re' naq i ch'iklik wii' kik'ux i aj Ecrón ma' naa ta rojiik eloq wach. Re' taqe i aj Gaza naa rukimiik kireey, eh re' Ascalón naa rukahniik chi ma' xta chik tinamit chupaam.6Eh Asdod tokoom tinamit chik taqe i naa nuye'em chi patinik ar, ruuk' i re' naa wesam i runimaal kiwach i aj filisteo.7Re' hin ma' naa ta chik nuye'em q'ab' chi naa kik'uxum i kik', i tiwik ma' toob' ta chi k'uxarik. Re' la' chik i hin naakiin kiloq'em, eh re' i naa kikahniik re' chik i keh naa ruk'amwiik kib'eeh i aj Judá. Eh re' taqe i aj Ecrón naa kikahniik chi je' kikab' i aj jebuseo.8Re' hin naa nuwihiik kuuk' i aj Israel, naa nuko'leem taqe pan kiq'ab' i nixowanik kiwach. Eh ma' xta chik naa kuuchjiik kuum i aj ixowaal, ruum re' hin naa nucha'jiniik keh, inki i QaJaaw Dios. Re' i ruq'orariik chi naa ruk'uliik jinaj i xti manlik reey chikinaah i aj Israel9Suuqb'oq taq ak'ux i hat i wilkaat taq pantinamiit Sión. Eh titz'uyinoq taq ruum i rusuqkiil ak'ux i wilkaat taq Jerusaleem, ruum k'isiin ma' k'uloq taq aareey. Re' reh xa atoob' wach ruk'ux, iqlik chi riij jinaj i k'isa b'uurux, rak'uun jinaj ati't b'uurux.10Re' reey re' re' naa rusachwiik wach i kikareta reh q'aq'inik i aj Efraín, je' wo' hoq i ki kawáyu i kiflecha i aj Jerusaleem. Eh naa ruq'orom rib'iral chi naa ruwihiik i suq kiil k'uxliis chupaam i ju'jun seht chi tinamit. Naa ruwihiik rajaawriik chi taaq'anik, chi chii' i palaw, eh konaa ruponiik chi chii' i palaw jinaj, naa ruponiik i chi junsuut i wach ak'al.11Re' taq i hat aj Jerusaleem, ruum chi xayeew taq rajaawriik i xqayejaa' wach noq xa chihkaaj taq i kik', re' hin je' naa pan chaam laj jul ma' xta ha' chupaam naawisam taqe chaloq aatinamiit k'amooj taqe reje pan tokoom tinamit.12Re' taq i hat aj Israel i ti' taq wilkaat ponoq pan tokoom tinamit, ko ch'iklik taq ak'ux chi naa taq kaat nuko'leem, ti sutinoq taq cho wuuk'. Re' hin xiik' chik naah i wotob'il naa nuye'em taq cha naah.13Re' taq i hat aj Judá je' taq hat flecha, re' taq i hat aj Efraín je' taq hat i q'as ju' ch'ihch'. Eh re' taq i hat aj Sión je' taq hat ch'ihch' k'ul q'as re' taq i hat naa taq a'nam i q'aq'inik kuuk' i aj Grecia, inki i QaJaaw Dios.14Re' i QaJaaw Dios naa ruk'amwiik kib'eeh, je' rukab' i ruch'aab' kahoq noq naa kikutum i kiflecha. Re' i QaJaaw Dios naa ruxulem i tuun je' rukab' i kowlaj teew inchalik pansak'aaj reh i rookb'aal q'iij noq naa kojiik chi q'aq'inik.15Re' i QaJaaw Dios nim rajaawriik naa ruko'liniik reh i rutinamiit. Eh naakiyeq'em panak'al ab'aj naakikutariik wii' naa kisacham wach taqe i nixowanik kiwach, naakichihkaam i rukik'eel, naa kuk'em i je' rukab' noq inuuk'jik i k'ahlaj ha', je' rukab' noq imolarik i kik' chupaam i nimlaj kulk noq inkichihkaaj chinaah i rukaa' i artaal.16Eh chupaam i q'iij re' re', re' i QaJaaw Dios naa ruko'liniik keh, je' rukab' noq i ruko'leej taqe i rutentzuun i cha'jen tentzun. Eh noq wilkeeb' chik pan kitinamiit naa ruye'ariik kiloq'il, chi je' kikab' i k'ih tz'aaq ab'aj inokik chuwach i corona.17Re' i QaJaaw Dios naa ruye'em i rotob'il chikinaah i tinamit re' re'. Re' i ki trigo naa ruwachiniik, re' i ki uuva naa ruye'em i riis. Eh re' taqe i k'ijolaq, re' taqe i q'ahxoq, naa rusuuqb'iik kik'ux. Re' i Dios xuq'or chi naa wo' chik resam chaloq panti' k'axik i rutinamiit Israel1Chapahqaaj taq reh i QaJaaw Dios i jab' i rub'an koq'uun, re' reh nee ruyeew chaloq i kahoq, ruch'ihil i kowlaj jab', reh chi neenraaxb'ik kiwach i ch'ahn wilkeeb' taq panaye'aab'.2Xa re' la' mapahqaaj taq keh i tiyoox, ruum xama' nee ta wo' inkiyeew. Re' taqe i aj q'iij xa chukul q'orik taqe, xan kixohk'reej inkiq'or, re' i rusuqkiil k'uxliis inkiyeew xama' xta ruk'am chaloq. Ruum aj re', re' i tinamit je' kikab' i tentzun k'axik wilkeeb', ajwaal wach jino'q i cha'jen keh.3Re' i QaJaaw Dios je' wili xuq'or: Re' hin xchalik nuk'aah chikinaah naa nuye'em taqe chutojariik i kimahk kicha'jinik keh i nutinamiit. Re' hin kincha'jinik keh i nutentzuun noq wilkeeb', naa nuye'em kikowiil i aj Judá chi je' kikowiil i kawáyu kiooj panq'aq'inik, inki.4Eh chi kixilak i aj Judá naa reliik reje i naa rukahniik chi je' rukab' ab'aj rukowiil i rutz'ukaal i paat, chi je' rukab' i chee' reh itz'ihy naah paat, eh chi je' rukab' i q'as ju' ch'ihch' reh q'aq'inik. Eh naa rukahniik chi taaq'anik chi junsuut i wach ak'al.5Re' taqe i aj Israel naakikowem kiib' je' kikab' i soldado noq inkiye'q' panak'al i nixowanik kiwach. Eh naakiq'atam wach taqe i aj ixowaal ruum re' i QaJaaw Dios naa rutoob'iniik keh. Re' i naa kichaliik chi riij i kawáyu chi q'aq'inik kuuk', xa naakik'uhtaam kik'ixb'ilaal.6Re' i hin naa nuye'em kikowiil i aj Judá, naa nuko'leem taqe i riih rumaam i José. Eh naa wo' chik nusutem taqe chaloq pan kitinamiit, ruum naa nuketelaam kiwach, xa je' ma' jank'al ta taqe nukanaa', naab'iram i kitiij, re' chik i hin naa nukahniik chi kaJaaw chi ki Dios.7Re' taqe i aj Efraín, naa nukanaam taqe chi je' kowlaj soldado, naa rusuqb'iik kik'ux, je' rukab' noq insuuqb'ik ruk'ux i nuk'inik reh i riis uuva. Eh re' taqe i kak'uun kixq'uun naa wo' rusuuqb'iik kik'ux i keh, naa wo' rusuuqb'iik kik'ux wuuk' i hin, inki.8Re' hin naa numolom kiwach naa wo' chik nusutem taqe chaloq, naa wo' chik nuko'leem taqe chuwach i ti' k'axik. Eh naa wo' chik nuk'ihaaxb'isam taqe, je' rukab' noq xi wihik cho pampeet.9Korik, re' hin xnutukej kiwach pantaq tokoom tinamit, atoob' ta chi najt wilkeeb' ponoq naa nuk'uliik cho pankik'ux, eh naa wo' chik kisutiniik chaloq kuch'ihil taqe i kak'uun kixq'uun.10Eh naa wo' chik wesam taqe chaloq Egipto, je' wo' i wilkeeb' ponoq ar Asiria. Ar chik naa nuk'amam taqe reje Galaad, Líbano, eh xama' naa ta chik rumanlojiik i kiye'aab' ar ruum naa kik'ihaaxb'iik.11Re' hin naa nutob'eem taqe noq naakik'iik cho chupaam i palaw wilik ar Egipto, eh naa nuchiqsam taqe i nim ha'. Ruuk' i re' naa wesam i runimaal kiwach i aj Asiria, naa wesam i kajaawriik i aj Egipto chikinaah.12Eh re' hin naa nuye'em rukowiil kik'ux i nutinamiit, eh panub'ihnaal i hin naakib'eeh, re' hin naa nucha'jiniik keh, inki i QaJaaw Dios.1Re' taq i hat aj Líbano, cha yejaa' taq awiib' chuk'ulariik i ti' k'axik, je' rukab' noq ink'ahtik i chee' i chakaltee'.2Ti oq'oq taq ruum sahchik kiwach taq i k'amal ab'eeh, je' rukab' noq insahchik kiwach i chee' sohchaj, i chee' chakaltee' q'e' holohaq. Tioq'oq taq i hat aj Basán ruum sahchik kiwach i k'amal taq ab'eeh, je' rukab' noq insahchik kiwach i nimaq taq tz'inuj, taqe i ch'ahn.3Re' taqe i cha'jen tinamit inchol koq'iim, ruum xsacharik chik wach i kitinamiit. Re' keh naa koq'iim je' rukab' noq i ruk'er chii' i rak'uun i kaq b'ahlam, ruum re' rax chee' wilik chi chii' i nim ha' Jordán xsacharik chik wach. Re' i xq'orarik chikiij i ki'ib' chi aj cha'joom4Re' i waJaaw i nuDios je' wili i xuq'or weh: Re' hat cha'jen reh i nutentzuun sik'ooj chik wach chi naa kikanteesjiik.5Re' i kiloq'wik reh taqe i nutentzuun, kikansaj, eh inkikapaaj chi ma' xta kimahk. Eh re' taqe i kik'ayinik reh je' wili inkiq'or: Inqat'iosej reh i QaJaaw ruum k'ahchi' qab'ehomriik, inki taqe. Xanaah re', re' taqe i tentzun ni xata re' i cha'jen keh inketelinik kiwach.6Re' hin ma' naa ta wo' nuketelaam kiwach i tinamit wilkeeb' ar. Naa la' nuye'em q'ab' chi naa rub'aan ti' k'axik keh, ruum i kas kichaaq', naa nuq'asam pan kiq'ab' i reey, korehtaal insacharik kiwach. Eh re' hin ma' naa ta taqe nuko'leem pan kiq'ab', inki i QaJaaw Dios.7Re' hin, xtohq'ik nuye'em nuk'ux chi kicha'jaljiik i tentzuun sik'ooj kiwach chi naa kikanteesjiik, xnub'an wo' hoq je' rukab' i xuq'or weh. Eh ki'ib' i karote xnusik', re' jinaj wihik panotob'il i rub'ihnaal xnukoj, eh re' jinaj wihik pan jinaj wach k'uxliis i rub'ihnaal.8Eh re' hin xachuwach ixib' poh xwisaj taqe reje ixib' chi aj cha'jen tentzun ruum xama' nukuy ta naq chik i kimahk inki a'n inkixow wo' nuwach i hin.9Re' hin je' wili i xnuq'or keh i tentzun: Ma' jaruuj chik naa nukahniik chi cha'jen taq aweh. Awach i naa rukimiik kimoq. Awach i naa rukanteesjiik, kanteesjoq. Wila' wilik i xi kahnik chi k'achalkeeb' inchol kik'uxum kiib' chikiwach, kinki keh.10Eh xnuchop i nukarote wihik panotob'il i rub'ihnaal nutoq panyejaal, rehtalil chi xyoj wach i ruyejaam cho wach i Dios chi naa rub'anam kuuk' chu'nchel i tinamit.11Chupaam i q'iij re' re' xyoj wach aha' naq wilik i ruyejaam cho wach i Dios chi naa rub'anam kuuk' i tinamit, eh re' taqe i aj k'aay tentzun k'achi' kilwiik weh xkireq chi riij chi re' i nub'an re' i Dios inq'orik weh.12Eh re' hin je' wili i xnuq'or keh: Wila' ruyeew riib' kinatoj taq, eh wila' ma' chih cha kanaa' taq chi je' re', kinki. Re' keh xinkitoj wo' hoq, lajeeb' ru ka'winaq chi tumiin re' ruuk' i plata xkiyeew weh.13Eh re' i QaJaaw Dios je' wili i xuq'or weh: Chak'am reje i tumiin re' re', re' i ruk'ihaal tz'aaq' i xinkiloq' wii' hiy chayeew chupaam i kaxa molb'al tumiin, inki. Re' hin xnuk'am wo' reje i lajeeb' ru ka'winaq chi tumiin, xnuyeew chupaam i kaxa wilik parupaat i QaJaaw Dios.14Eh xnutoq wo' chik i rukab' nukarote, re' i wihik pan jinaj wach k'uxliis i rub'ihnaal. Re' re' rehtalil chi ma' naa ta chik kiwihik pan jinaj wach k'uxliis i aj Judá kuuk' i aj Israel.15Re' i QaJaaw Dios je' wili i xuq'or weh: Okeen wo' chik chi cha'jinik tentzun, xa re' la' ma' nee ta chik i nacha'jeej taqe chi korik.16Re' hin naa nukojom jino'q cha'jen keh i tinamit wili, eh ma' naa ta kicha'jaljiik chi korik. Eh ni xata naa rumolom kiwach inutentzuun kitukem kiib'. Eh ma' naa ta riqomaam taqe ti' wilkeeb', ma' naa ta ruye'em kiwa' i kinuhmik. Naa la' rik'sam taqe chi ti' k'axik, naa rub'anam keh je' rukab' noq kik'uxarik i q'ina' laj tentzun.17Eh q'e' ti' i naakik'ulum i ma' holohik ta rucha'jaljiik i nutentzuun inki a'n eh inkiq'eb' kahnoq. Eh noq naawisam i kajaawriik, naa nuyok'om iloq i rusak'aaj kiq'ab', naa nukanaam chi mutz'lik inaq' kiwach, eh xama' xta chik kikamaj naa nukanaam taqe, inki i QaJaaw Dios. Re' ruq'orariik chi naa keliik cho panti' k'axik i aj Israel, eh chi naa wo' chik kichaliik Jerusaleem1Re' i QaJaaw Dios nim rajaawriik i xyej-anik reh i taxaaj, i wach ak'al, i xye'wik taqe paruye'aab', i xye' wik ruxlab'al i winaq, je' wili i ruq'or chikiij i aj Israel:2Re' hin naa nuye'em kajaawriik i aj Jerusaleem, je' naa jinaj kulk chi k'ahlaj ha' naa ruxohk'risam taqe wii' i tinamit wilik chi kijunsuut, noq naa naq chik kikotem riij i tinamit Jerusaleem i tinamit Judá re' chik i keh, naa ruchaliik kiyo'jiik.3Eh chupaam i q'iij re' re', re' hin naa nukojom taqe i aj Jerusaleem chi je' jinaj ahl laj ab'aj chi keh i tinamit. Xa awach pa' i tinamit naa rujilim i koq riib' chub'anariik keh i aj Jerusaleem, re' chik i keh naa rub'aan keh, atoob' ta chu'nchel wo' naq i tokoom tinamit naakimolom cho kiib' chinaah.4Re' hin naa nuye'em q'ab' chi naa ruchaliik kiyo'jiik taqe i kikawayu, eh re' taqe i iqilkeeb' chi riij naa nuyojom i kina'ojb'al. Re' i kikawayu reh i q'aq'inik i tokoom tinamit, naa nukanaam taqe chi moywach. Eh re' taqe i aj Judá re' hin naa nucha'jiniik keh.5Eh noq naakilom chi je' re' i k'amal kib'eeh i aj Judá, je' wili i naa kiq'orom: Korik noq re' i QaJaaw Dios wilik kuuk' i aj Jerusaleem, re' reh inye'wik rukowiil kik'ux, inko'q taqe.6Chupaam i q'iij re' re' naa nukanaam taqe i k'amal kib'eeh i aj Judá chi je' kikab' i nah wach q'aaq' xa kaq lak'ik chik wach, eh je' kikab' i xaq q'aaq' ink'atwik reh i chiq k'im. Re' keh k'ul naa kik'atam i tinamit wilik chi kijunsuut, eh naa wo' chik kik'achariik pansuqkiil k'uxliis ar pan tinamit Jerusaleem.7Eh re' hin i Dios peet naa nuko'leem taqe i aj Judá, reh chi neenye'arik kiloq'il taqe i xikin riih rumaam i reey David. Reh chi re' taqe i aj Jerusaleem ma' nee ta inkinimb'isaj kiwach chikinaah i aj Judá.8Chupaam q'iij re' re', re' hin, i Dios naa nuko'leem taqe i aj Jerusaleem. Re' taqe i ma' xta rukowiil kik'ux chi kixilak, naa nuye'em rukowiil kik'ux je' rukab' i rukowiil ruk'ux noq xub'an i reey David. Re' taqe i xikin riih rumaam naa kikahniik chi je' nukab' i hin, hin Dios, eh chi je' kikab' i ánjel ink'amwik kib'eeh.9Eh chupaam q'iij re' re', re' hin naa nusacham kiwach chu'nchel i tokoom tinamit, naa kichaliik chi peleto kuuk' i nutinamiit Jerusaleem.10Eh naa nuye'em keh i holohik laj na'ojb'al, reh chi naa kianam otob'il, eh naa kianam kitiij i xikin riih rumaam i reey David, je' wo' taqe aj Jerusaleem. Eh naakilom wach taqe i naakitoq'wiik reh chi q'as ju' ch'ihch', naa koq'iim, je' rukab' noq inoq'ik ixoq noq inkimik i rak'uun xa jinaj wo' chi riib' chuwach. Je' rukab' noq inoq'ik ixoq ruum i ruti'kiil ruk'ux chi riij i rukimiik i peet rak'uun.11Eh chupaam i q'iij re' re', jinaj i runimaal ti'kiil k'uxliis naa ruwihiik Jerusaleem. Je' rukab' i ruti'kiil kik'ux i aj Hadad-rimón, re' i wilkeeb' wach k'ixkaab' Meguido.12Eh ruum i ruti'kiil kik'ux naa koq'iim taqe i xikin riih rumaam i reey David, naa koq'iim i kehk'een, je' wo' taqe i kak'uun kixq'uun. Naa wo' koq'iim taqe i xikin riih rumaam i Natán, naa wo' koq'iim i kehk'een, je' wo' taqe kak'uun kixq'uun.13Eh naa koq'iim i xikin riih rumaam i Leví, naa koq'iim i kehk'een, je' wo' taqe i kak'uun kixq'uun. Naa koq'iim i riih rumaam i Semei, naa koq'iim i kehk'een, je' wo' taqe i kak'uun kixq'uun.14Chi kunchelaal i patineel, naa koq'iim ruum i ruti'kiil kik'ux, je' chi kehk'een, je' chi kak'uun kixq'uun, inki Dios.1Chupaam i q'iij re' re', naa ruwihiik i je' jinaj k'achlik rooq ha', eh re' re' naa rutz'ajwiik reh i kimahk i kiyiib' wach na'ojb'al taqe i xikin riih rumaam i reey David, je' wo' taqe i aj Jerusaleem.2Eh chupaam i tinamit Israel naa nusacham kiwach chu'nchel i tiyoox, ma' naa ta chik ruq'orariik kib'iral. Eh naa wesam taqe i jalal nuq'oral inki a'n kiib', ma' holohik taj i kina'ojb'al, naa wesam chu'nchel i ma' holohik taj imb'aan chi kixilak i nutinamiit.3Wila' ko wilik i xraaj rik'sam riib' chi jalal nuq'oral, neeruk'uhb'alej irutuutrajaaw, i ruk'ul chi je' wili ineenq'orarik reh: Re' hat naa akimiik ruum k'ahchi' achukum i q'orik, ruq'oral tii chik i Dios i naa q'or i naa a'n awiib' inuchjoq. Xa re' wo' taqe i rutuut rajaaw naa rukansaniik reh noq naa rik'sam riib' chi q'orol nuq'oral.4Eh re' taqe i jalal nuq'oral inki a'n kiib' naa ruchaliik kik'ixiik noq naa kiq'orom inaakilom pan kisaq wiriik. Atoob' ta wo' naq inche kikoj chikiij i re' ruuk' i kiso' taqe i jalal nuq'oral.5Je' la' wili i naa kiq'orom chi kiju'junaal: Re' hin ma' hin ta jalal ruq'oral i Dios, re' hin xa hin wo' cho ab'ixoom panuk'isinal, inko'q taqe.6Eh naa rupahqaljiik reh chi je' wili: Wila' je' re' ¿chib'ih reet noq yok'k'eel aq'ab'? inuchjoq. Re' reh je' wili i naa ruq'orom: Re' wili chupaam i rupaat i jinaj i wamigo xkian cho weh, inko'q, inki Dios.7Eh je' wo' chik wili i xuq'or: Re' hin naa nuye'em q'ab' chi naa rukanteesjiik i cha'jen keh i nutentzuun, naa nuq'asam pankimik intowik weh. Naakikansam incha'jinik keh inutentzuun. Eh re' keh naa kitukem kiib' re' hin naa wo' nuk'uhtaam i nujosq'iil chikinaah i nutentzuun.8Eh je' wili i naa ruk'ulariik chupaam i tinamit re' re' ik'inaq chi yejaal i tinamit naa kikanteesjiik, ma' manlik ta chik yejaal i naa kikahniik, inki i QaJaaw Dios.9Eh nik' chik k'ihaal i naa kikahniik, naa wik'sam taqe pan q'aaq' je' rukab' noq i nik'ib'jik ruuk' q'aaq' i plata, i oro. Noq naa kiin kiq'oreem re' hin naab'iram taqe, eh je' wili i naa nuq'orom keh: Re' taq i hat, hat taq nutinamiit kinko'q keh. Eh re' keh je' wili i naa kiq'orom: Re' i k'achlik Dios i QaJaaw inko'q taqe chi wiij, inki i Dios. Re' noq xiko'ljik chi korik i aj Jerusaleem1Re' taq i hat aj Jerusaleem ponik reh i q'iij chuwach i QaJaaw Dios, chi panaq'awach taq i hat naa ruye'em keh i tokoom i chib'ih taq aweh.2Re' i QaJaaw Dios naa ruk'amam taqe chaloq i tokoom tinamit chi peleto taq awuuk' i hat, hat taq aj Jerusaleem. Eh naa kichopom naah aatinamiit, naa kelq'aam taq paam apaat, eh naa kichopom taq awehk'een. Eh yejaal taq aatinamiit naa kik'amam reje pan tokoom tinamit, xa re' chik i ruqox naa kikanaam taq panatinamiit.3Xa re' la' re' i QaJaaw Dios jumehq'iil naa rutoq'aam peleto kuuk' i tinamit re' re'. Naa rub'anam i je' rukab' i rub'an paruq'ijil i q'aq'inik.4Eh chupaam i q'iij re' re', re' i QaJaaw Dios naa ruk'uliik qajoq chinaah i yuuq' olivo, re' i wilik reje parelb'aal q'iij chuk'ulwaach i Jerusaleem.
Re' i yuuq' re' re', naa ruch'aqiik panyejaal, naa rutik'am cho chi korkiil ireelb'aalq'iij i naa ruponiik chi korkiil i rookb'aal q'iij. Eh jinaj i k'ixkaab' naa ruye'em riib' panyejaal, yejaal i yuuq' naa rojiik pantz'eet reh i rookb'aal q'iij, yejaal i naa rojiik pansak'aaj reh i rookb'aal q'iij.5Eh re' taq i hat naa taq amolom chi elik wach i k'ixkaab' naa ruwihiik chi kixilak i kiib' chi yuuq', naa ruponiik kopan i ye'aab' Azal.
Eh naa taq amolom chi elik, je' rukab' i xkian taq aamaam awati't, noq xub'an jinaj i yihk, noq xwihik cho chi reyil i Uzías Judá. Naa aj ruk'uliik iloq re' i waJaaw i nuDios, ruch'ihil taqe i rusantolaj ánjel.6Eh chupaam i q'iij re' re', ma' naa ta chik rusihq'iniik i q'iij, ma' naa ta chik ruye'em i k'uxik.7Eh ma' naa ta chik rusihq'iniik i q'iij, eh ma' naa ta chik rilariik wach i q'equm aq'ab', ruum noq ru orahiil naq chik i q'equm aq'ab' xasaqum wo' naa rukahniik. Eh xa re' wo' Dios i nab'inik reh nik' wach noq naa rub'anam i re'.8Eh jinaj k'achlik rooq ha' naa ruwihiik Jerusaleem, naa rub'eeh rooq paruq'ijil jab', je' wo' pansiq'jil. Eh yejaal i rooq narojiik chupaam i kamnaq palaw, wilik reje pareelb'aal i q'iij. Eh yejaal i naa rojiik chupaam i palaw Mediterráneo, wilik reje parookb'aal q'iij.9Eh chupaam i q'iij re' re', re' i QaJaaw Dios naa ruwihiik chi reyil chinaah chu'nchel i tinamit sut i wach ak'al. Xti xa re' wo' reh naa ruye'ariik runimaal wach i rub'ihnaal.10Eh naa rukahniik chi xa k'ixkaab' chik i yuuq', naa rutohq'iik reje Geba, naa ruponiik Rimón wilik pansak'aaj reh i Jerusaleem. Re' i Jerusaleem naa ruwihiik chinaah i yuuq', naa ruwihiik runimaal wach, eh wilik inaakipatiniik ar. Ar naa rutohq'iik reje pan i ookb'al Benjamín rub'ihnaal, naa ruponiik pan i ookb'al wilik pantz'u'k, re' i xwihik cho wii' ookb'al reh najt naah tz'aq wilik Hananeel, naa ruponiik inyitz'arik wii' i ru-uuva i reey.11Eh noq naa wo' chik kitoq'aam k'achariik i tinamit ar Jerusaleem ma' naa ta chik rusachariik kiwach kuum i aj ixowaal, ma' xta chik naa kuuchjiik.12Re' i QaJaaw Dios naa ruye'em i ti' k'axik chikinaah chu'nchel i nimaq tinamit naa kichaliik chi peleto kuuk' i aj Jerusaleem. Atoob' ta kok'achalkeeb' wo' naq taqe i aj ixowaal re' re', naa ruq'ahiik i kiti'jolal, je' wo' naq' kiwach, je' wo' i kaaq'.13Eh chupaam i q'iij re' re', re' i QaJaaw Dios naa ruye'em i runimaal yo'jik chikinaah, xama' keht'al ta chik i naa kianam, k'ul naa kitoq'aam peleto chikiwach.14Re' taqe i aj Judá naakik'ulb'ilem taqe i aj ixowaal ar Jerusaleem, naa kiq'uchum chib'ih jariik i naa kik'amam chaloq i tinamit naa kichaliik chi kika'jaah naa kiq'uchum i ki plata, i ki oro, i kiholohaq so'.15Eh re' ti' k'axik naa ruchaliik chikinaah i tinamit naa wo' ruchaliik chikinaah i kikawayu, i kib'uruux, i kicameyo. Eh naa wo' ruchaliik chikinaah i kichikoop naa rukamaniik keh panq'aq'inik i aj ixowaal.16Eh nik' kik'ihaal i naakiko'leem kiib' panq'aq'inik kuuk' i aj Jerusaleem, rajlaal i haab' naa kojiik ar Jerusaleem chi looq'jiik i xti manlik Reey, re' wo' hoq i QaJaaw Dios nim rajaawriik. Ar naa rojiik kininq'ijeem i kok' perpat.17Eh wila' wilik junch'uq-oq keh i tinamit re' re' ma' ta nakojiik Jerusaleem chi looq'jiik i QaJaaw Dios nim rajaawriik, re' xti manlik Reey, re' i QaJaaw Dios ma' naa ta chik ruye'em i jab' chinaah i kitik.18Wila' ma' xiooj i aj Egipto Jerusaleem chi looq'jiik i QaJaaw Dios rajlaal i haab', ma' naa ta chik ruye'em chee jab' chikinaah, naa ruye'em i ti' k'axik chikinaah, je' rukab' naa ruye'em chikinaah i nimaq tinamit ma' naa ta rojiik kininq'ijeem i kok' perpat.19Re' i aj taqe i ti' k'axik wili naa ruchaliik chikinaah i aj Egipto, je' wo' chikinaah i nimaq tinamit ma' naa ta kojiik chuninq'ijiik i kok' perpat.20Eh chupaam i q'iij re' re', re' taqe i kok' kampano chi kalaq i kawáyu je' wili i naa rutz'ihb'jiik chikiwach: Re' wili q'asamaj chik pan q'ab' i QaJaaw Dios inko'q. Eh q'asamaj wo' pan q'ab' i QaJaaw Dios i nimaq xun inkamanik parupaat i Dios. Je' wo' i nimaq kulk kikamanik wach artaal.21Eh chu'nchel i nimaq xun wilkeeb' Jerusaleem, wilkeeb' Judá q'asamaj pan q'ab' i QaJaaw Dios nim rajaawriik, reh chi chupaam taqe i xun re' re', naakichaq'sam taqe i chikop naa kik'amam cho chi mayiij i tinamit. Eh chupaam taqe i q'iij re' re', ma' naa ta chik rub'aan i k'aay chupaam i rupaat i QaJaaw Dios nim rajaawriik.
Re' i QaJaaw Dios nim rajaawriik, je' wili xuq'or: chi kiyot' i kik'ux, kinkinimaj wo' chik ruka'peech, re' hin nee wo' chik i nutob'eej taqe, inki i Dios.4Mo'-oq je' taq akab' aamaam awati't. Re' keh je' wo' naq wili i xq'orarik keh kuum taqe i jalal nuq'oral: Re' i QaJaaw Dios nim rajaawriik je' wili i ruq'or, chajal taq wach ana'ojb'al cha kanaa' taq rub'aan chu'nchel i ma' holohik taj, inki. Eh re' keh xama' xkaaj ta wo' kib'iram i xnuq'or keh, inki i QaJaaw Dios.5Eh re' taq aamaam awati't, ruch'ihil taqe i jalal nuq'oral wihinaq taqe chaloq re' re', xa xikimik wo' reje, ma' k'achalkeeb' ta chik yu'naak.6Eh re' i nuk'uhb'aal i nuq'oral i xnuq'or keh taqe i waj kamanoom wihinaq taqe chaloq najtir, xkiq'or wo' cho keh taq aamaam awati't.
Awach i xi k'amwik naah xintohq'ik wo' chik kinimam, ruum xkireq chi riij chi re' hin i Dios nim wajaawriik, eh xnuq'o'reej wo' taqe chi korik ruuk' inki a'n ruuk' inkiq'or, inki i QaJaaw Dios. Re' taqe i kawáyu xk'uhtjik reh parusaq wiriik i Zacarías7Re' i Zacarías i jalal ruq'oral i Dios rak'uun i Berequías, riih i Iddo. Eh pan kijib' ru ka'winaq rub'eeh i rujunlaaj poh ree rukab' haab' rokiik chi reyil i Dario noq re' i QaJaaw Dios xuq'oreej parusaq wiriik i Zacarías.8Eh re' Zacarías je' wili i xuq'or: Re' QaJaaw Dios xuk'uhtaaj weh panusaq wiriik, jinaj i winaq iqlik chi riij i kawáyu kaq riij, ar pa'lik wach k'ixkaab' chi kixilak i chee' wahut. Eh wilik taqe i kawáyu pa'alkeeb' cho chi riij, wilik i kaq kiij, wilik rep rep paam i kiij, eh wilik i saq kiij.9Eh re' hin xnupaqaaj b'ila' chik reh i chi je' wili ánjel k'utaaj i rub'an wuuk':
Jaaw ¿Chib'ih rub'anam taqe i k'ahchi' wilom kiwach wili? kinki.
Eh re' ánjel je' wili i xuq'or weh:
Re' hin neenuq'or aweh chib'ih rub'anam taqe i re', inki.10Eh re' i winaq iqlik chi riij i kawáyu wilik chi kixilak i chee' wahut, je' wili i xuq'or cho weh:
Re' taqe i k'ahchi' awilom kiwach wili re' i QaJaaw Dios xtaaq'anik cho keh, reh chi naa kib'ehum naah chu'nchel i wach ak'al.11Chu'nchel i iqilkeeb' chi riij i kawáyu je' wili i xkiq'or cho reh i ánjel:
Re' hoj xqab'ehuj chik cho naah chu'nchel i wach ak'al, eh chu'nchel i tinamit k'acharik inki a'n parukorkiil, pansuqkiil k'uxliis, inki taqe.12Eh re' i ruánjel i QaJaaw Dios je' wili xuq'or:
QaJaaw Dios, re' hat lajeeb' ru kajwinaq haab' chik rutohq'iik cho aye'em aajosq'iil chikinaah i aj Jerusaleem, i aj Judá. ¿Kojaruuj i naawisaj aajosq'iil chikinaah, eh kojaruuj inaketelaaj cho kiwach? inki.13Re' i QaJaaw Dios ruuk' holohik laj q'orik xuq'oreej i ánjel k'utaaj i rub'an wuuk', suuqb'ik ruk'ux ruuk' taqe i xuq'or i QaJaaw Dios.14Chi riij i re' xuq'or weh i ánjel i hin chi naa nuq'orom rib'iral i xuq'or i Dios q'e' nim rajaawriik. Chaq'or keh chi je' wili i xuq'or i Dios:
Re' hin ma' k'isiin ta nuk'ax taqe i aj Jerusaleem, je' wo' taqe i aj Sión, tiko'q keh, inki.15Re' hin chikinaah chik i tokoom tinamit, ma' xinkinimaj taj yohb'aal wach i nujosq'iil, ruum noq xa k'isiin wo' naq i nujosq'iil chikinaah i nutinamiit. Re' chik i keh xiqopwik wach i nujosq'iil, ruuk' i kiyiib' wach na'ojb'al, inki.16Je' aj re', noq re' i QaJaaw Dios je' wili i xuq'or: Re' hin naa wo' chik nuketelaam kiwach i aj Jerusaleem, naa wo' nuye'em q'ab' chi naa rukorjiik i kitinamiit, eh chi naa rukorjiik aha' wilik taqe i yojinaq reh i nupaat, inki.17Eh re' i ánjel je' wili i xuq'or weh: Re' hat cha q'or rib'iral i xuq'or i QaJaaw Dios chi je' wili: Re' hin naa wo' chik nuye'em chib'ih keh i nutinamiit. Eh naa wo' chik nuye'em rukowiil kik'ux i aj Sión, eh naa wo' chik nuq'orom chi re' taqe i aj Jerusaleem nusik'im cho kiwach chi nutinamiit taqe, inki. Re' taqe i kijib' chi uk'aa', eh re' taqe i kijib' chi aj sehk xk'uhtjik reh parusaq wiriik i Zacarías18Re' hin wilik wo' chik i xk'uhtjik weh panusaq wiriik, xwilow chik inche wach i kijib' chi ruk'aa' chikop.19Re' hin xnupahqaaj b'ila' reh i ánjel k'utaaj i rub'an wuuk' chi je' wili:
¿Chib'ih rub'anam i kijib' chi uk'aa' re' re'? kinki reh.
Eh je' wili i xuq'or weh:
Re' taqe i kijib' chi uk'aa' re' re' kijalwaach i kijib' chi tinamit kow kiib'. Re' i xtukinik kiwach i rutinamiit i Dios, re' taqe i aj Judá, aj Israel, aj Jerusaleem, inki.20Eh re' i QaJaaw Dios i kijib' chik aj sehk xuk'uhtaaj weh panusaq wiriik.21Re' hin xnupahqaaj b'ila' reh i ánjel chi je' wili:
¿Chib'ih i xchalik kian i kijib' chi aj sehk re' re'? kinki reh.
Eh je' wili i xuq'or weh:
Re' kijib' chi uk'aa' xawilow kiwach kijal waach i kijib' chi tinamit xtukinik kiwach i nutinamiit korehtaal xkian reh. Eh re' taqe i kijib' chi aj sehk re' re', kijalwaach i naa ruchaliik chi kiyohb'eesjiik chi rusachariik kiwach i kijib' chi tinamit re' re', ruum re' keh je' naa ruuk' uk'aa' xkitukej wach i nutinamiit, Judá, inki i QaJaaw Dios. Re' i Zacarías xk'uhtjik reh parusaq wiriik jinaj i pajb'al k'ahaam1Jinaj wo' chik i xk'uhtjik weh panusaq wiriik, jinaj chik winaq xwilow wach ruyohq'eem jinaj i pajb'al k'ahaam.2¿Aha' tiooj i hat? kinki reh.
Re' reh je' wili xuq'or weh:
Re' hin ojik i nub'an chupajariik i tinamit Jerusaleem, nab'al reh nik' nimaal rooq, eh nik' nimaal wach, inki.3Eh re' i ánjel k'utaaj i rub'an wuuk' xooj reje, eh jinaj chik i ánjel xk'ulik k'ulwoq reh.4Je' wili i xuq'or:
Hiy chi jumehq'iil chareq wach b'eeh ak'un ruyohq'eem i pajb'al k'ahaam, je' wili i neenaq'or reh: Re' i Jerusaleem, ma' k'isa i tinamit, ma' k'isa i kichikoop naa ruwihiik chupaam, ruum i re' ma' naa ta chik ruwihiik koraal tz'aq chi junsuut.5Re' i QaJaaw Dios je' wili i ruq'or: Re' hin, je' naa hin q'aaq' chi junsuut i Jerusaleem, eh chupaam i tinamit re' re' naa nuk'uhtaam i runimaal nuwach inki i Dios, inki ánjel.6Re' i QaJaaw Dios je' wili i xuq'or keh i tinamit: Re' hin xnutukej taq awach xa aha' yuuq'. Eh yu'naak eleen taq chaloq chupaam i ye'aab' wilik pantz'eet reh i rookb'aal q'iij.7Re' taq i hat aj Sión wilkaat taq ponoq Babilonia eleen taq chaloq ti sutinoq taq chaloq pana ye'aab', inki.8Re' i QaJaaw Dios nim rajaawriik, i xtaaq'anik weh chuq'orariik taq aweh chib'ih i naakik'ulum i nimaq taq tinamit xiq'uchwik i chib'ih taq aweh, je' wili xuq'or:
Awach imb'anik ti' k'axik taq aweh i hat je' naa re' i rutiyoxil naq'nuwach inki a'n ti' k'axik reh.9Re' hin naa nuye'em i ti' k'axik chikinaah, eh re' chik kimoso naa rutaaq'aniik keh, inki Ruuk' i re' nee taq i nanaab'eej chi re' i QaJaaw Dios nim rajaawriik xtaaq'anik cho weh.10Re' i QaJaaw Dios je' wilik i xuq'or: Re' taq i hat aj Jerusaleem ti tz'uyinoq taq ruum i rusuqkiil taq ak'ux, ruum re' i hin naa nuchaliik taq chi wihik chaxilak, inki.11Eh chupaam taqe i q'iij re' re', ma' k'isiin i tinamit naakinimaniik reh i QaJaaw Dios, je' wili i naa ruq'orom keh: Re' taq i hat naa akahniik taq chi nutinamiit, inko'q keh. Chi je' re' nee taq i nanaab'eej chi re' i QaJaaw Dios nim rajaawriik xtaaq'anik cho weh i hin.12Re' i QaJaaw Dios, naa wo' chik ruchopom naah i tinamit Judá, eh naa rukahniik chupaam i rusantolaj ye'aab', Eh naa wo' chik rusik'im wach i Jerusaleem.13Chu'nchel ta naq i tinamit neentz'aplojik i kichii' chuwach QaJaaw Dios, ruum re' reh naa rukanaam chaloq i rusantolaj ye'aab', eh naa ruchaliik chi wihik panqaxilak, inki. Re' i Zacarías xk'uhtjik reh parusaq wiriik i Josué kajaaw i k'amal kib'eeh aj tiij1Re' i QaJaaw Dios xuk'uhtaaj weh panusaq wiriik, i Josué kajaaw i k'amal kib'eeh aj tiij pa'lik i koq chuwach i ruánjel i QaJaaw Dios. Eh re' i aj yahm parusak'aaj q'ab' i ánjel pa'lik i koq chukojariik ru mahk i Josué.2Eh re' i ruánjel i QaJaaw Dios je' wili i xuq'or reh i aj yahm: Re' ta naq i QaJaaw Dios xsik'wik cho kiwach i aj Jerusaleem neenq'ilwik aweh. Re' winaq wili xko'ljik chuwach i ti' k'axik, je' rukab' noq inehteesjik iloq i ju'sii' wach q'aaq'.3Eh re' i Josué ch'uwa' chik inche wach i ruso' rukojom, noq pa'lik i koq chuwach i ruánjel i QaJaaw Dios.4Eh re' i ánjel je' wili i xuq'or keh i wilkeeb' ruuk': Chawesaj taq chi riij i ruch'uwa' wach so' i Josué, eh je' wili i xuq'or reh: Re' hin xwesaj chik chawiij ach'uwa' wach so', rehtaliil chi xwesaj chik aamahk. Yu'naak saq chik wach aso' xkojarik rehtalil chi naa rusuuqb'iik ak'ux, inki.5Re' i ánjel je' wili i xuq'or: Chab'ak' taq i saq itz'ihy wach naah, inki. Eh xkib'ak' wo' hoq i saq itz'ihy wach naah i Josué. Xkikoj jinaj i holohik itz'ihy chi riij, re' ruuk' i reh ninq'iij. Eh re' i ruánjel i QaJaaw xa xkahnik wo' chi pa'lik ar noq xwilow.6Eh re' i ruánjel i QaJaaw Dios je' wili i xuq'or reh i Josué:7Re' i QaJaaw Dios nim rajaawriik je' wili xuq'or aweh:
Re' hat naa ak'amam i nub'eeh, eh naa a'nam i ruq'or taqe i nuk'uhb'aal. Eh wila' xa a'n taqe re', re' hat naa akahniik chi ilil reh i nupaat. Naa nuye'em aaye'aab' ayu' chi kixilak i nuánjel wilkeeb' panukamaj.8Re' hat Josué, je' wo' taqe awuch k'amal kib'eeh aj tiij chab'iraj taq chi korik i naa nuq'orom ruum re' hat, hat kajaaw i k'amal kib'eeh aj tiij. Chi chawunchelaal taq i hat xa hat taq rehtalil jinaj i q'orol reh i nuq'oral naa nutaq'aam chaloq, re' i je' naa kore' naa rutoxliniik chaloq.9Eh re' hin xnuyeew chuwach i Josué jinaj ab'aj wuqtaq wilik wii' i ruperpeer wach, re' hin naa nutz'ihb'aniik wach. Eh xa ruuk' i jinaj q'iij naa nusacham wach chu'nchel i kimahk i wilkeeb' chupaam i tinamit wili.10Eh noq naa ruponiik i q'iij re' re' suq taq chik naa awihiik, naa taq chik a'nam awa' ahaa' pankomonil, eh naa ruwihiik taq atik re' ruuk' i uuva re' ruuk' i higo, inki i QaJaaw Dios nim rajaawriik. Re' Zacarías xk'uhtjik reh i ye'aab' kantela oro, ruch'ihil i ka'iwal chi olivo1Re' i ánjel xub'an ruk'utaaj wuuk', xsutinik wo' chik chaloq noq xwilow, xiruksaj, je' rukab' noq inukteesjik i koq jino'q i suq suq ruwiriik, xupahqaaj weh chi je' wilik.2¿Chib'ih jariik i k'ahchi' awilom wach? inki weh.
Re' hin je' wili ruchaq'weesjiik xnub'an:
Jinaj i ye'aab' kantela re' ruuk' i oro wuquub' i ye'aab' saqumb'al wilik chinaah k'ahchi' wilom wach, kinki reh.
Eh chinaah wilik i ye'aab' aseite, wuquub' i hoop paam ch'ihch' i nik'ik wii' i raseitehiil.3Eh k'ul tar pantaq rucheel i ye'aab' kantela wilik i ju' i juniwal chi olivo juniwal i wilik parusak'aaj, eh juniwal i wilik parutz'eet, kinki reh.4Eh re' hin xnupahqaaj reh chi je' wili i ánjel k'utaaj i rub'an wuuk':
Jaaw, ¿chib'ih iraaj ruq'orom i k'ahchi' wilom wach re' re'? kinki reh.5Re' i ánjel je' wili xuq'or weh:
¿Mi ma' aweht'al re' chib'ih iraaj ruq'orom taqe re'? inki weh.
Jaaw ma' weht'al taj, kinki reh,6Re' i ruánjel i QaJaaw Dios je' wili i xuq'or weh:
Re' i wili i rehtalil i xuq'or i QaJaaw Dios reh i Zorobabel, chi je' wili:
Re' hat ma' re' ta ruuk' q'aq'inik, ma' re' ta ruuk' awansil naa a'nam i nukamaj, ruuk' la' i rajaawriik i Wuxlab'al inki i QaJaaw Dios nim rajaawriik.7Re' ti' k'axik atoob' ta je' najtiil naah i yuuq', re' i Zorobabel ma' k'axik ta noq neerukuy rik'teesjiik. Eh korehtaal i rukoj i tz'apaab' wach ab'aj reh ruyejeb'jiik i rupaat i Dios, kow naakik'erem kichii', chi je' wili: Yohb'aal inche wach holwochiil i xb'aan wili, inko'q taqe.8Eh re' i ruánjel i QaJaaw Dios xq'orik wo' chik wuuk' noq xb'iraj, je' wili i xuq'or weh:9Re' i Zorobabel naa rutik'aniik ruyejeb'jiik i rupaat i QaJaaw Dios, eh re' wo' i reh naa rukuxisaniik wach ruyejeb'jiik, ruuk' i re' naa taq anab'eem i hat chi re' i QaJaaw Dios xtaaq'anik cho weh i hin taq awuuk'.10Eh re' i ma' xkichop ta kik'ux reh rutik'ib'jiik i paat re' re', naa rusuuqb'iik kik'ux noq naakilom chi re' i Zorobabel naa rukuxisaniik reh. Eh chi riij i re' je' wili i xuq'or ruánjel i QaJaaw Dios:
Re' i wuquub' chi saqumb'al k'ahchi' awilom wach, rehtalil chi re' i QaJaaw Dios i rilow chu'nchel i wach ak'al, inki.11Re' hin xnupahqaaj b'ila' chik reh i ánjel chi je' wili:
Raaj i ka'iwal chi ruche'el olivo wilkeeb' pantaq rucheel i ye'aab' kantela ¿Chib'ih iraaj ruq'orom? kinki reh.12Eh xnupahqaaj wo' reh chi je' wili:
Raaj ki'ib' chi q'ab' olivo wilik cho chikinaah i ki'ib' chi hoop paam ch'ihch' re' ruuk' i oro ik'tesb'al i raseitehiil taqe i saqumb'al, ¿chib'ih iraaj ruq'orom? kinki reh.13Re' i ánjel xupaqaaj weh chi je' wili:
¿Mi korik chi ma' aweht'al taj chib'ih iraaj ruq'orom? inki.
Korik jaaw ma' weht'al taj, kinki reh.14Re' reh je' wili xuq'or weh:
Re' i ki'ib' chi q'ab' olivo wili kehtalil i ki'ib' sik'ooj cho kiwach chub'anariik i rukamaj i QaJaaw Dios ehchan reh chu'nchel i wach ak'al, inki weh. Re' i Zacarías xk'uhtjik reh parusaq wiriik i junb'oht chi huuj1Re' hin i xk'uhtjik weh panusaq wiriik, i jumb'oht chi huuj b'ehik i rub'an panteew k'ultar tz'ihb'amaj wach.2Eh re' i ánjel xupahqaaj weh chi je' wili:
¿Chib'ih jariik i k'ahchi' awilom wach? inki.
Re' hin k'ahchi' wilom wach i junb'oht chi huuj lajeeb' b'ara rooq, eh ho'oob' b'ara i runimaal wach, kinki reh.3Eh je' wili i xuq'or weh:
Chuwach i huuj re' re' tz'ihb'amaj chi naa kiye'ariik panti' k'axik i tinamit chi junsuut i wach ak'al. Juntar tz'ihb'amaj wii' chi naa rusachariik kiwach i aj jileq', eh chi juntar tz'ihb'amaj chi naa rusachariik kiwach taqe inki q'or i b'ih i QaJaaw Dios chi xama' xta rub'ehel.4Re' hin naa nuye'em i ti' k'axik pankipaat taqe i kib'anik i leq' je' wo' pankipaat taqe i kiq'orik reh i nub'ihnaal chi xama' xta rub'ehel. Re' i ti' k'axik re' re' ar naa ruwihiik korehtaal insahchik wach chu'nchel chib'ih keh, inki i QaJaaw Dios nim rajaawriik, inki. Re' i Zacarías xk'uhtjik reh parusaq wiriik jinaj ixoq k'ahchi' rupajariik pan chakach5Re' i ánjel k'utaaj i rub'an wuuk' xelik chaloq chi jumehq'iil noq xwilow, je' wili i xuq'or weh:
Chakoj rehtaal i k'ahchi' awilom wach re' re', inki weh.6Re' hin xnupahqaaj b'ila' reh chi je' wili:
Raaj i re' ¿chib'ih iraaj ruq'orom? kinki reh.
Re' reh je' wili i xuq'or weh:
Re' chakach re' re' rehtalil i pajb'al reh i kimahk i tinamit chi junsuut i wach ak'al, inki.7Eh re' i chakach re' re' plomo ch'ihch' i tz'apb'al naah. Noq xkiteh johtoq naah i chakach jinaj chik ixoq tzunlik chupaam noq xwilow.8Re' ixoq rehtalil i yiib' wach na'ojb'al imb'aan, inki weh.
Eh re' i ánjel xumihnaaj chik qohoq ixoq panchakach, xutz'ap wo' chik naah ruuk' i tz'apb'al naah plomo ch'ihch'.9Eh jinaj wo' chik i xwilow wach panusaq wiriik, ki'ib' chik taqe ixoq xi k'uloq, wilik kixiik' je' rukab' i ruxiik' i nimlaj chikop rupinik chik inki a'n xkichop johtoq panteew i chakach reh pajb'al.10Re' hin xnupahqaaj reh i ánjel chi je' wili:
¿Aha' inkik'am reje i chakach pajb'al? kinki reh.11Re' reh je' wili xuq'or weh:
Ar xkik'am reje chupaam i ye'aab' Sinar. Eh ar naa kiyejaam jinaj i paat ye'aab' reh. Noq kiyejaam chik naakiye'em chinaah jinaj i ye'aab' reh, inki weh. Re' i Zacarías xk'uhtjik reh parusaq wiriik i kijib' chi kareta reh q'aq'inik1Re' hin jinaj wo' chik i xk'uhtjik weh panusaq wiriik, kijib' chik i kareta reh q'aq'inik xwilow wach. Ar chik xi elik chaloq chi xilak i yuuq' q'an ch'ihch' korjinaq wii'.2Re' peet kareta kaq chik kiij i kawáyu i nqerinik reh. Re' i rukab' kareta q'eq chik kiij i kawáyu i nqerinik reh.3Re' i roox kareta saq chik kiij i kawáyu inqerinik reh. Re' i rukaaj kareta q'eq saq chik paam i kiij i kawáyu inqerinik reh.4Eh re' i ánjel k'utaaj i rub'an wuuk', xnupahqaaj b'ila' reh chi je' wili:
¿Chib'ih iraaj ruq'orom i k'ahchi' wilom wach? kinki reh.5Re' i ánjel je' chik wili i xuq'or weh:
Re' taqe i kijib' chi kareta re' re', kehtalil i kijib' chi uxlab'al xa kiooj chub'anariik i rukamaj i Dios, ehchan reh chu'nchel i wach ak'al.6Re' i kareta qeremaj kuum i q'eq kiij kawáyu naa rojiik pantz'eet reh i rookb'aal q'iij. Eh re' i kareta qeremaj kuum i saq kiij kawáyu, naa rojiik parelb'aal q'iij. Re' taqe qeremaj kuum i kawáyu q'eq saq paam i kiij naa rojiik pansak'aaj reh i rookb'aal i q'iij, inki.7Re' i kawáyu q'eq saq paam i kiij xankaaj chik ojik chi junsuut i wach ak'al. Eh je' chik wili i xq'orarik keh ruum i ánjel:
Hiy taq chab'ehuj paam i tinamit i wach ak'al ki uchjik, eh xiooj wo' hoq.8Eh re' ánjel kow chik xuq'or weh chi je' wili:
Chakoj rehtaal taqe i xiooj pantz'eet reh i rookb'aal i q'iij, xooj kijot'isaj wach i rujosq'iil i QaJaaw Dios ar, inki. Re' i q'orik chi riij noq xkojarik ru corona i Josué kajaaw k'amal kib'eeh i aj tiij9Re' i QaJaaw Dios je' wili i xuq'or weh:10Re' hat inchol amalom tumiin re' ruuk' i oro, re' ruuk' i plata xkik'am chaloq i xi elik cho Babilonia, re' i Heldai, re' i Tobías, re' i Jedaías. Eh xa chupaam wo' hoq i q'iij re' re' nee tiooj chupaam i rupaat i Josías rak'uun i Sofonías.11Eh ruuk' i oro, i plata neenamol wach neenayejaa' taqe i corona, jinaj i corona neena koj wach naah i kajaaw i k'amal kib'eeh i aj tiij, Josué rub'ihnaal, rak'uun i Josadac.12Chaq'or reh chi je' wili: Re' i QaJaaw Dios nim rajaawriik je' wili i xuq'or,
re' jinaj i je' rutoxl inkiq'or reh, je' kore' naa rutoxliniik chaloq, re' reh naa ruyej-aniik reh i rupaat i QaJaaw Dios.13Re' reh naa ruyej-aniik i rupaat i QaJaaw, eh naa ruk'ulum i runimaal wach, na' tz'uhnoq chupaam i ruye'aab' chi reyil, re' chik i reh naa rub'aniik i taaq'anik. Re' reh naa rukahniik chi k'amal kib'eeh aj tiij. Re' i ki'ib' wach chi kamanik re' re' naa rub'anam pansuqkiil k'uxliis.14Re' taqe i corona naa ayejaam naa rukahniik chupaam i rupaat i QaJaaw Dios, reh chi naa rukahniik chi rehtalil i Heldai, i Tobías, i Jedaías, i Josías, i rak'uun i Sofonías, inki.15Eh re' taqe i aj Israel wilkeeb' chi najt, naa kichaliik chi to'ooj chuyejeb'jiik i rupaat i QaJaaw Dios. Ruuk' taqe i re' naa taq anab'eem chi re' i Dios nim rajaawriik xtaaq'anik cho weh taq chaxilak. Re' taqe i wili naa rub'aan wila' xanimaj taq, xab'iraj taq, wila' xa a'n taq i ruq'or i ruk'uhb'aal i QaJaaw Dios. Re' taqe i aj Israel ma' korik ta keh i kitiij xkian chi ma' kianam ta kiwa' kihaa'1Noq kijib' chik haab'rokiik chi reyil i Dario, pan kijib' rub'eeh i rub'eleej poh Quisleu, re' i QaJaaw Dios wilik i ruk'uhb'aal xuq'or reh i Zacarías.2Eh chupaam i q'iij re' re', re' i wilkeeb' pan tinamit Bet-el kitaq'aam chik reje i Sarezer, ruch'ihil i Regem-melec, eh k'ih i winaq xooj chikiij, chupahqaljiik i rotob'il i QaJaaw Dios.3Re' keh je' wili i xkiq'or keh i jalal ruq'oral i Dios, keh i k'amal kib'eeh aj tiij, kikamanik parupaat i QaJaaw Dios nim rajaawriik: ¿Kojaruuj inqakanaa' rukojariik i qa q'eq so'? ¿Kojaruuj inqakanaa' rub'aan i qatiij chi ma' qa'nam ta qawa' qahaa' inqa a'n chupaam i roo' poh reh i ju'jun chi haab'? inki taqe.4Je' re' noq re' i QaJaaw nim rajaawriik, je' wili i xuq'or weh:5Chaq'or keh i tinamit i wilkeeb' ayu', keh i k'amal kib'eeh aj tiij chi re' hin je' wili i xnuq'or: Re' taq i hat i na a'n taq aatiij chi ma' a'nam ta taq awa' ahaa', eh xtib'ik taq ak'ux, chupaam i roo' poh, i ruwuuq poh reh i ju'jun chi haab', chuwach lajeeb' ru kajwinaq haab'. ¿Mi loq'oomb'al weh taq i na a'n re'?6Eh noq i na a'n taq awa' ahaa', mi ma' xa re' wo' taq re' hat inanujisaj taq awiib'. ¿Mi ma' xa aweh wo' taq re' hat inkamanik? inki, tiko'q taq keh.7¿Mi ma' re' wo' taqe re' i q'orik wili xuq'or i QaJaaw Dios najtir q'iij ruuk' kichii' i jalal ruq'oral noq re' taqe i aj Jerusaleem ko wilkeeb' cho pansuqkiil k'uxliis, noq ko wilik naq patineel chupaam, noq ko wilik patineel chupaam taqe ye'aab' wili chi junsuut, je' wo' hoq i ye'aab' Neguev, i ye'aab' wilik wach k'ixkaab'? Re' taqe i aj Israel ma' xkaaj ta kinimam i Dios ruum i re' xi k'amarik reje pan tokoom tinamit8Re' i QaJaaw Dios je' wili i xuq'or reh i Zacarías jalal ruq'oral:9Re' taqe i wili i nuq'or i hin chi naa taq a'nam: Korik-oq taq wach ak'ux, eh xa hat-oq taq atoob', k'ul taq chaketelaaj awach.10Maa a'n taq ti' k'axik keh ixoq kamnaq kib'ahiil, i ma' xta kituut kajaaw, taqe i tokoom tinamit wilkeeb' taq chaxilak. Maa kapaaj taq chi neena a'n i ti' k'axik keh aawas achaaq', inki Dios.11Xa re' la' re' taqe i tinamit ma' xkaaj ta rub'aan, xkiq'eb' chi riij kik'ux rub'aan, xa je' ti chik ma' xkib'iraj xkian kiib'.12Eh xkikowb'isaj i kánima, xa je' chik kowiil ab'aj diamante, re' xkaaj chi ma' xkib'iraj taj i kitijiik xb'aan, je' wo' hoq i ruq'or i ruk'uhb'aal QaJaaw Dios nim rajaawriik re' xuq'or rib'iral ruuk' i ruxlab'al, eh ruuk' kichii' taqe i jalal ruq'oral i wihinaq taqe chaloq pampeet.
Ruum aj re', re' i QaJaaw Dios ma' k'isiin ta xchalik rujosq'iil.13Je' wili i xuq'or: Nik' wach noq ma' xinkinimaj i keh noq xnuk'uhb'alej taqe, je' wo' re' i hin ma' naa ta wo' b'iram taqe noq naa kipahqaam i wotob'il.14Xnutukej la' kiwach xa aha' pantaq tokoom tinamit ma' keht'al ta naq. Eh re' i tinamit xi elik reje wii' xkahnik chi ma' xta wilik chupaam. Xa je' chik jinaj chiq yuuq' ma' jino'q chik patineel chupaam tinamit re' re' xiik' naq naah howochiil, eh re' keh xkikanaa' chi xan tz'irik chik paam, inki i QaJaaw Dios nim rajaawriik. Re' i QaJaaw Dios xuq'or chi naa ruko'leem i rutinamiit, eh chi naa wo' chik ruk'amam taqe Jerusaleem1Re' i QaJaaw Dios nim rajaawriik je' wili i xuq'or weh:2Re' i tinamit wilkeeb' Sión q'e' nim kiwach chi weh hin, ruum i re' ma' k'isiin ta xchalik nujosq'iil chikinaah inixowanik kiwach.3Re' hin naa wo' chik wojiik chi wihik ar Jerusaleem,
re' i tinamit re' re', korik wach ruk'ux naa kiq'orom reh. Eh re' naa ruwihiik wii' i nuloq'laj paat i hin santo laj yuuq' i naa kiq'orom reh, nim rajaawriik.4Re' taqe mama' winaq, taqe i ati't ixoq,
naa wo' chik kitzunaam kiib' chupaam taqe i b'eeh reh i tinamit Jerusaleem. Re' keh xa ruuk' chik kikarote naakitoob'eem kiib', ruum korehtaal kiponik chi ma' naa ta chik kikuyum i b'ehik.5Je' wo' taqe i kok' ak'un, i kok' xq'un, naa wo' kinujisam paam i b'eeh, eh naa kia'nam kik'onik ar.6Eh na' ponoq i q'iij re' re',
re' taq i hat nik' taq k'ihaal i naa taq ako'leem awiib' i hat taq nutinamiit, ma' k'isiin ta k'axkiil rub'aan taqe re' naa awilom. Xa re' la' chi nuwach i hin, i hin Dios nim wajaawriik, ma' k'axik ta noq naa nub'anam.7Re' hin naa nuko'leem taqe i nutinamiit pan kiq'ab' i tinamit wilkeeb' reje parelb'aal q'iij,
naa wo' nuko'leem pan kiq'ab' i nimaq tinamit wilkeeb' reje panrookb'aal q'iij.8Eh naa wo' chik nuk'amam taqe chaloq chi patinik Jerusaleem, naa wo' chik kikahniik chi nutinamiit. Re' hin naa nukahniik chi ki Dios, eh re' rukorkiil, re' rub'ehel naa nub'anam kuuk', inki i QaJaaw Dios.9Re' i QaJaaw Dios nim rajaawriik je' wili i xuq'or:
Re' taq i hat chakowej taq awiib' chi rutinamiit i paat, chab'iraj taq chib'ih jariik i xiik' naah loq'il kiq'orom chaloq taqe i jalal nuq'oral xa re' wo' noq xtohq'ik cho rokiik i peet ab'aj reh raa' i nupaat.10Eh noq majaa' inkitoq'aa' cho rukorb'eesjiik i nupaat, ma' intojarik ta naq kikamaj taqe i winaq. Ma' intojarik ta wo' naq i riij i kikamaj taqe i kawáyu. Re' taqe i tinamit ma' xta naq rusuqkiil kik'ux chikiwach, kuum taqe i nixowanik kiwach, xa re' la' re' wo' hin xin ye'wik q'ab' chi k'ul ma' nkaaj ta kiwach.11Re' hin je' re' i xnub'an kuuk' i aj Israel noq xub'an, xa re' la' yu'naak ma' je' ta chik re' i naa nub'anam kuuk' nik' k'ihaal i koxikahnik, inki QaJaaw Dios nim wajaawriik.12Re' hin naa nuye'em i suq kiil k'uxliis chi kixilak, re' i ki uuva naa ruwachiniik, naa ruwachiniik i chib'ih keh naakitikiim, naa nuye'em i jab' chinaah. Re' hin naa nuye'em keh chu'nchel i re' i ruqox i nutinamiit koxikahnik.13Re' taq i hat aj Judá, i aj Israel, xkian taq ti' k'axik aweh, i nimaq tinamit. Eh re' hin naa taq kaat nuko'leem, eh awuum taq i hat naa nuye'em i wotob'il chikinaah i tokoom tinamit, mat yo'jik taq, cha chop taq ak'ux.14Re' i QaJaaw Dios nim rajaawriik je' wili i xuq'or: Noq xkuksaj cho wach i nujosq'iil taq aamaam awati't najtir q'iij xnuq'or chi naa nuye'em taqe chutojariik i kimahk, eh xnub'an wo' hoq ma' xnusutej ta chi riij i nuq'oral.15Raaj i yu'naak xchalik panuk'ux chi naa nub'anam otob'il aweh taq i hat aj Judá, aj Jerusaleem, ruum aj re' mat yo'jik taq.16Re' taq i hat je' wili i ruk'ul chi naa taq a'nam: Re' chi k'ul taq naa aq'orom i korik chawach, eh re' taqe i q'atal q'orik kiq'at i q'orik parub'ehel, ma' toq'aa' wo' taq peleto kuuk' taqe i q'atal q'orik pan kiye'aab'.17Eh ma' ruk'ul taj chi awach taq aweh i neerukapaaj rujot'ariik i ras ruchaaq', eh ma' awach ta taq aweh i nee ruq'or i korik wila' ma' korik wo' hoq ruum re' taqe re' ma' imponik ta chi nuwach i hin, inki i QaJaaw Dios nim rajaawriik.18Re' i QaJaaw Dios nim rajaawriik je' wili i xuq'or weh:19Re' taqe i tiij imb'aan rajlaal haab' chi ma' b'anooj ta wi'k haa', re' imb'aan chupaam i rukaaj poh, chupaam i roo' poh, eh chupaam i ruwuuq poh, chupaam i ru lajeeb' poh, naa rusutiniik chi jinaj rusuqkiil k'uxliis. Jinaj ninq'iij taq cha weh i hat taq aj Judá. Chak'ax taq i korik, i suq kiil k'uxliis, inki.20Re' i QaJaaw Dios nim rajaawriik je' wili i xuq'or:
Naa ruponiik i q'iij chi ma' k'isiin tokoom tinamit naa kichaliik ayu' chupaam taq aatinamiit.21Re' taqe i tokoom tinamit k'ul naa kiq'orom chikiwach chi je' wili: Taq taq qapahqaaj i rotob'il i QaJaaw Dios nim rajaawriik, inko'q taqe. Eh re' taqe junch'uq je' wili i naa kiq'orom: Naa wo' rojiik qasik'im i hoj, inko'q taqe.22Eh ma' k'isiin wo' taqe i naa kichaliik pankok' tinamit, pantaq nimaq tinamit, naa kichaliik ayu' Jerusaleem chupahqaljiik i wotob'il i hin.23Chupaam taqe ponoq i q'iij re' re', laj taq chi winaq reh reh wach kitinamitaal naa kichopom chi ruso' jino'q i aj Judío, je' wili i naa kiq'orom: Re' hoj ma' k'isiin ta nqaaj ojik taq chawiij ruum xqib'iraj rib'iral chi ar wilik i k'achlik Dios, inko'q taqe, inki i Dios. Re' tojb'al kimahk i tinamit wilkeeb' chi ruka'jaah i tinamit Israel1Re' i QaJaaw Dios xuq'or reh i Zacarías i ti' k'axik xuk'ul koq'uun i tinamit Hadrac, i tinamit Damasco, je' wili xuq'or: Re' taqe i tinamit wilkeeb' paruyuq'ul i Siria re' wo' ruuk' i nutinamiit. Je' wo' hoq jar ch'uq chi kiib' i aj Israel.2Je' wo' i tinamit Hamat re' ruuk' i nutinamiit, re' i wilik chi kika'jaah i tinamit Tiro, i Sidón, weht'al chib'ih jariik imb'aan ar.3Re' i tinamit Tiro xkiyejaa' kinajt naah paat ko'lenb'al kiib', xkimol wach i plata chi je' i molarik wach pooq, eh xkimol wach i oro chi je' inmolarik wach ch'uwa' pantaq b'eeh.4Eh re' hin i Dios naa nuq'uchum keh chu'nchel i re', naa nukutum pam palaw i kib'ehomal, eh naa nuk'atam i kitinamiit.5Eh noq naakilom chi je' re' i aj Ascalón naa kiyo'jiik. Eh re' taqe i aj Gaza, naa wo' kik'ulum i ti' i keh, re' naq i ch'iklik wii' kik'ux i aj Ecrón ma' naa ta rojiik eloq wach. Re' taqe i aj Gaza naa rukimiik kireey, eh re' Ascalón naa rukahniik chi ma' xta chik tinamit chupaam.6Eh Asdod tokoom tinamit chik taqe i naa nuye'em chi patinik ar, ruuk' i re' naa wesam i runimaal kiwach i aj filisteo.7Re' hin ma' naa ta chik nuye'em q'ab' chi naa kik'uxum i kik', i tiwik ma' toob' ta chi k'uxarik. Re' la' chik i hin naakiin kiloq'em, eh re' i naa kikahniik re' chik i keh naa ruk'amwiik kib'eeh i aj Judá. Eh re' taqe i aj Ecrón naa kikahniik chi je' kikab' i aj jebuseo.8Re' hin naa nuwihiik kuuk' i aj Israel, naa nuko'leem taqe pan kiq'ab' i nixowanik kiwach. Eh ma' xta chik naa kuuchjiik kuum i aj ixowaal, ruum re' hin naa nucha'jiniik keh, inki i QaJaaw Dios. Re' i ruq'orariik chi naa ruk'uliik jinaj i xti manlik reey chikinaah i aj Israel9Suuqb'oq taq ak'ux i hat i wilkaat taq pantinamiit Sión. Eh titz'uyinoq taq ruum i rusuqkiil ak'ux i wilkaat taq Jerusaleem, ruum k'isiin ma' k'uloq taq aareey. Re' reh xa atoob' wach ruk'ux, iqlik chi riij jinaj i k'isa b'uurux, rak'uun jinaj ati't b'uurux.10Re' reey re' re' naa rusachwiik wach i kikareta reh q'aq'inik i aj Efraín, je' wo' hoq i ki kawáyu i kiflecha i aj Jerusaleem. Eh naa ruq'orom rib'iral chi naa ruwihiik i suq kiil k'uxliis chupaam i ju'jun seht chi tinamit. Naa ruwihiik rajaawriik chi taaq'anik, chi chii' i palaw, eh konaa ruponiik chi chii' i palaw jinaj, naa ruponiik i chi junsuut i wach ak'al.11Re' taq i hat aj Jerusaleem, ruum chi xayeew taq rajaawriik i xqayejaa' wach noq xa chihkaaj taq i kik', re' hin je' naa pan chaam laj jul ma' xta ha' chupaam naawisam taqe chaloq aatinamiit k'amooj taqe reje pan tokoom tinamit.12Re' taq i hat aj Israel i ti' taq wilkaat ponoq pan tokoom tinamit, ko ch'iklik taq ak'ux chi naa taq kaat nuko'leem, ti sutinoq taq cho wuuk'. Re' hin xiik' chik naah i wotob'il naa nuye'em taq cha naah.13Re' taq i hat aj Judá je' taq hat flecha, re' taq i hat aj Efraín je' taq hat i q'as ju' ch'ihch'. Eh re' taq i hat aj Sión je' taq hat ch'ihch' k'ul q'as re' taq i hat naa taq a'nam i q'aq'inik kuuk' i aj Grecia, inki i QaJaaw Dios.14Re' i QaJaaw Dios naa ruk'amwiik kib'eeh, je' rukab' i ruch'aab' kahoq noq naa kikutum i kiflecha. Re' i QaJaaw Dios naa ruxulem i tuun je' rukab' i kowlaj teew inchalik pansak'aaj reh i rookb'aal q'iij noq naa kojiik chi q'aq'inik.15Re' i QaJaaw Dios nim rajaawriik naa ruko'liniik reh i rutinamiit. Eh naakiyeq'em panak'al ab'aj naakikutariik wii' naa kisacham wach taqe i nixowanik kiwach, naakichihkaam i rukik'eel, naa kuk'em i je' rukab' noq inuuk'jik i k'ahlaj ha', je' rukab' noq imolarik i kik' chupaam i nimlaj kulk noq inkichihkaaj chinaah i rukaa' i artaal.16Eh chupaam i q'iij re' re', re' i QaJaaw Dios naa ruko'liniik keh, je' rukab' noq i ruko'leej taqe i rutentzuun i cha'jen tentzun. Eh noq wilkeeb' chik pan kitinamiit naa ruye'ariik kiloq'il, chi je' kikab' i k'ih tz'aaq ab'aj inokik chuwach i corona.17Re' i QaJaaw Dios naa ruye'em i rotob'il chikinaah i tinamit re' re'. Re' i ki trigo naa ruwachiniik, re' i ki uuva naa ruye'em i riis. Eh re' taqe i k'ijolaq, re' taqe i q'ahxoq, naa rusuuqb'iik kik'ux. Re' i Dios xuq'or chi naa wo' chik resam chaloq panti' k'axik i rutinamiit Israel1Chapahqaaj taq reh i QaJaaw Dios i jab' i rub'an koq'uun, re' reh nee ruyeew chaloq i kahoq, ruch'ihil i kowlaj jab', reh chi neenraaxb'ik kiwach i ch'ahn wilkeeb' taq panaye'aab'.2Xa re' la' mapahqaaj taq keh i tiyoox, ruum xama' nee ta wo' inkiyeew. Re' taqe i aj q'iij xa chukul q'orik taqe, xan kixohk'reej inkiq'or, re' i rusuqkiil k'uxliis inkiyeew xama' xta ruk'am chaloq. Ruum aj re', re' i tinamit je' kikab' i tentzun k'axik wilkeeb', ajwaal wach jino'q i cha'jen keh.3Re' i QaJaaw Dios je' wili xuq'or: Re' hin xchalik nuk'aah chikinaah naa nuye'em taqe chutojariik i kimahk kicha'jinik keh i nutinamiit. Re' hin kincha'jinik keh i nutentzuun noq wilkeeb', naa nuye'em kikowiil i aj Judá chi je' kikowiil i kawáyu kiooj panq'aq'inik, inki.4Eh chi kixilak i aj Judá naa reliik reje i naa rukahniik chi je' rukab' ab'aj rukowiil i rutz'ukaal i paat, chi je' rukab' i chee' reh itz'ihy naah paat, eh chi je' rukab' i q'as ju' ch'ihch' reh q'aq'inik. Eh naa rukahniik chi taaq'anik chi junsuut i wach ak'al.5Re' taqe i aj Israel naakikowem kiib' je' kikab' i soldado noq inkiye'q' panak'al i nixowanik kiwach. Eh naakiq'atam wach taqe i aj ixowaal ruum re' i QaJaaw Dios naa rutoob'iniik keh. Re' i naa kichaliik chi riij i kawáyu chi q'aq'inik kuuk', xa naakik'uhtaam kik'ixb'ilaal.6Re' i hin naa nuye'em kikowiil i aj Judá, naa nuko'leem taqe i riih rumaam i José. Eh naa wo' chik nusutem taqe chaloq pan kitinamiit, ruum naa nuketelaam kiwach, xa je' ma' jank'al ta taqe nukanaa', naab'iram i kitiij, re' chik i hin naa nukahniik chi kaJaaw chi ki Dios.7Re' taqe i aj Efraín, naa nukanaam taqe chi je' kowlaj soldado, naa rusuqb'iik kik'ux, je' rukab' noq insuuqb'ik ruk'ux i nuk'inik reh i riis uuva. Eh re' taqe i kak'uun kixq'uun naa wo' rusuuqb'iik kik'ux i keh, naa wo' rusuuqb'iik kik'ux wuuk' i hin, inki.8Re' hin naa numolom kiwach naa wo' chik nusutem taqe chaloq, naa wo' chik nuko'leem taqe chuwach i ti' k'axik. Eh naa wo' chik nuk'ihaaxb'isam taqe, je' rukab' noq xi wihik cho pampeet.9Korik, re' hin xnutukej kiwach pantaq tokoom tinamit, atoob' ta chi najt wilkeeb' ponoq naa nuk'uliik cho pankik'ux, eh naa wo' chik kisutiniik chaloq kuch'ihil taqe i kak'uun kixq'uun.10Eh naa wo' chik wesam taqe chaloq Egipto, je' wo' i wilkeeb' ponoq ar Asiria. Ar chik naa nuk'amam taqe reje Galaad, Líbano, eh xama' naa ta chik rumanlojiik i kiye'aab' ar ruum naa kik'ihaaxb'iik.11Re' hin naa nutob'eem taqe noq naakik'iik cho chupaam i palaw wilik ar Egipto, eh naa nuchiqsam taqe i nim ha'. Ruuk' i re' naa wesam i runimaal kiwach i aj Asiria, naa wesam i kajaawriik i aj Egipto chikinaah.12Eh re' hin naa nuye'em rukowiil kik'ux i nutinamiit, eh panub'ihnaal i hin naakib'eeh, re' hin naa nucha'jiniik keh, inki i QaJaaw Dios.1Re' taq i hat aj Líbano, cha yejaa' taq awiib' chuk'ulariik i ti' k'axik, je' rukab' noq ink'ahtik i chee' i chakaltee'.2Ti oq'oq taq ruum sahchik kiwach taq i k'amal ab'eeh, je' rukab' noq insahchik kiwach i chee' sohchaj, i chee' chakaltee' q'e' holohaq. Tioq'oq taq i hat aj Basán ruum sahchik kiwach i k'amal taq ab'eeh, je' rukab' noq insahchik kiwach i nimaq taq tz'inuj, taqe i ch'ahn.3Re' taqe i cha'jen tinamit inchol koq'iim, ruum xsacharik chik wach i kitinamiit. Re' keh naa koq'iim je' rukab' noq i ruk'er chii' i rak'uun i kaq b'ahlam, ruum re' rax chee' wilik chi chii' i nim ha' Jordán xsacharik chik wach. Re' i xq'orarik chikiij i ki'ib' chi aj cha'joom4Re' i waJaaw i nuDios je' wili i xuq'or weh: Re' hat cha'jen reh i nutentzuun sik'ooj chik wach chi naa kikanteesjiik.5Re' i kiloq'wik reh taqe i nutentzuun, kikansaj, eh inkikapaaj chi ma' xta kimahk. Eh re' taqe i kik'ayinik reh je' wili inkiq'or: Inqat'iosej reh i QaJaaw ruum k'ahchi' qab'ehomriik, inki taqe. Xanaah re', re' taqe i tentzun ni xata re' i cha'jen keh inketelinik kiwach.6Re' hin ma' naa ta wo' nuketelaam kiwach i tinamit wilkeeb' ar. Naa la' nuye'em q'ab' chi naa rub'aan ti' k'axik keh, ruum i kas kichaaq', naa nuq'asam pan kiq'ab' i reey, korehtaal insacharik kiwach. Eh re' hin ma' naa ta taqe nuko'leem pan kiq'ab', inki i QaJaaw Dios.7Re' hin, xtohq'ik nuye'em nuk'ux chi kicha'jaljiik i tentzuun sik'ooj kiwach chi naa kikanteesjiik, xnub'an wo' hoq je' rukab' i xuq'or weh. Eh ki'ib' i karote xnusik', re' jinaj wihik panotob'il i rub'ihnaal xnukoj, eh re' jinaj wihik pan jinaj wach k'uxliis i rub'ihnaal.8Eh re' hin xachuwach ixib' poh xwisaj taqe reje ixib' chi aj cha'jen tentzun ruum xama' nukuy ta naq chik i kimahk inki a'n inkixow wo' nuwach i hin.9Re' hin je' wili i xnuq'or keh i tentzun: Ma' jaruuj chik naa nukahniik chi cha'jen taq aweh. Awach i naa rukimiik kimoq. Awach i naa rukanteesjiik, kanteesjoq. Wila' wilik i xi kahnik chi k'achalkeeb' inchol kik'uxum kiib' chikiwach, kinki keh.10Eh xnuchop i nukarote wihik panotob'il i rub'ihnaal nutoq panyejaal, rehtalil chi xyoj wach i ruyejaam cho wach i Dios chi naa rub'anam kuuk' chu'nchel i tinamit.11Chupaam i q'iij re' re' xyoj wach aha' naq wilik i ruyejaam cho wach i Dios chi naa rub'anam kuuk' i tinamit, eh re' taqe i aj k'aay tentzun k'achi' kilwiik weh xkireq chi riij chi re' i nub'an re' i Dios inq'orik weh.12Eh re' hin je' wili i xnuq'or keh: Wila' ruyeew riib' kinatoj taq, eh wila' ma' chih cha kanaa' taq chi je' re', kinki. Re' keh xinkitoj wo' hoq, lajeeb' ru ka'winaq chi tumiin re' ruuk' i plata xkiyeew weh.13Eh re' i QaJaaw Dios je' wili i xuq'or weh: Chak'am reje i tumiin re' re', re' i ruk'ihaal tz'aaq' i xinkiloq' wii' hiy chayeew chupaam i kaxa molb'al tumiin, inki. Re' hin xnuk'am wo' reje i lajeeb' ru ka'winaq chi tumiin, xnuyeew chupaam i kaxa wilik parupaat i QaJaaw Dios.14Eh xnutoq wo' chik i rukab' nukarote, re' i wihik pan jinaj wach k'uxliis i rub'ihnaal. Re' re' rehtalil chi ma' naa ta chik kiwihik pan jinaj wach k'uxliis i aj Judá kuuk' i aj Israel.15Re' i QaJaaw Dios je' wili i xuq'or weh: Okeen wo' chik chi cha'jinik tentzun, xa re' la' ma' nee ta chik i nacha'jeej taqe chi korik.16Re' hin naa nukojom jino'q cha'jen keh i tinamit wili, eh ma' naa ta kicha'jaljiik chi korik. Eh ni xata naa rumolom kiwach inutentzuun kitukem kiib'. Eh ma' naa ta riqomaam taqe ti' wilkeeb', ma' naa ta ruye'em kiwa' i kinuhmik. Naa la' rik'sam taqe chi ti' k'axik, naa rub'anam keh je' rukab' noq kik'uxarik i q'ina' laj tentzun.17Eh q'e' ti' i naakik'ulum i ma' holohik ta rucha'jaljiik i nutentzuun inki a'n eh inkiq'eb' kahnoq. Eh noq naawisam i kajaawriik, naa nuyok'om iloq i rusak'aaj kiq'ab', naa nukanaam chi mutz'lik inaq' kiwach, eh xama' xta chik kikamaj naa nukanaam taqe, inki i QaJaaw Dios. Re' ruq'orariik chi naa keliik cho panti' k'axik i aj Israel, eh chi naa wo' chik kichaliik Jerusaleem1Re' i QaJaaw Dios nim rajaawriik i xyej-anik reh i taxaaj, i wach ak'al, i xye'wik taqe paruye'aab', i xye' wik ruxlab'al i winaq, je' wili i ruq'or chikiij i aj Israel:2Re' hin naa nuye'em kajaawriik i aj Jerusaleem, je' naa jinaj kulk chi k'ahlaj ha' naa ruxohk'risam taqe wii' i tinamit wilik chi kijunsuut, noq naa naq chik kikotem riij i tinamit Jerusaleem i tinamit Judá re' chik i keh, naa ruchaliik kiyo'jiik.3Eh chupaam i q'iij re' re', re' hin naa nukojom taqe i aj Jerusaleem chi je' jinaj ahl laj ab'aj chi keh i tinamit. Xa awach pa' i tinamit naa rujilim i koq riib' chub'anariik keh i aj Jerusaleem, re' chik i keh naa rub'aan keh, atoob' ta chu'nchel wo' naq i tokoom tinamit naakimolom cho kiib' chinaah.4Re' hin naa nuye'em q'ab' chi naa ruchaliik kiyo'jiik taqe i kikawayu, eh re' taqe i iqilkeeb' chi riij naa nuyojom i kina'ojb'al. Re' i kikawayu reh i q'aq'inik i tokoom tinamit, naa nukanaam taqe chi moywach. Eh re' taqe i aj Judá re' hin naa nucha'jiniik keh.5Eh noq naakilom chi je' re' i k'amal kib'eeh i aj Judá, je' wili i naa kiq'orom: Korik noq re' i QaJaaw Dios wilik kuuk' i aj Jerusaleem, re' reh inye'wik rukowiil kik'ux, inko'q taqe.6Chupaam i q'iij re' re' naa nukanaam taqe i k'amal kib'eeh i aj Judá chi je' kikab' i nah wach q'aaq' xa kaq lak'ik chik wach, eh je' kikab' i xaq q'aaq' ink'atwik reh i chiq k'im. Re' keh k'ul naa kik'atam i tinamit wilik chi kijunsuut, eh naa wo' chik kik'achariik pansuqkiil k'uxliis ar pan tinamit Jerusaleem.7Eh re' hin i Dios peet naa nuko'leem taqe i aj Judá, reh chi neenye'arik kiloq'il taqe i xikin riih rumaam i reey David. Reh chi re' taqe i aj Jerusaleem ma' nee ta inkinimb'isaj kiwach chikinaah i aj Judá.8Chupaam q'iij re' re', re' hin, i Dios naa nuko'leem taqe i aj Jerusaleem. Re' taqe i ma' xta rukowiil kik'ux chi kixilak, naa nuye'em rukowiil kik'ux je' rukab' i rukowiil ruk'ux noq xub'an i reey David. Re' taqe i xikin riih rumaam naa kikahniik chi je' nukab' i hin, hin Dios, eh chi je' kikab' i ánjel ink'amwik kib'eeh.9Eh chupaam q'iij re' re', re' hin naa nusacham kiwach chu'nchel i tokoom tinamit, naa kichaliik chi peleto kuuk' i nutinamiit Jerusaleem.10Eh naa nuye'em keh i holohik laj na'ojb'al, reh chi naa kianam otob'il, eh naa kianam kitiij i xikin riih rumaam i reey David, je' wo' taqe aj Jerusaleem. Eh naakilom wach taqe i naakitoq'wiik reh chi q'as ju' ch'ihch', naa koq'iim, je' rukab' noq inoq'ik ixoq noq inkimik i rak'uun xa jinaj wo' chi riib' chuwach. Je' rukab' noq inoq'ik ixoq ruum i ruti'kiil ruk'ux chi riij i rukimiik i peet rak'uun.11Eh chupaam i q'iij re' re', jinaj i runimaal ti'kiil k'uxliis naa ruwihiik Jerusaleem. Je' rukab' i ruti'kiil kik'ux i aj Hadad-rimón, re' i wilkeeb' wach k'ixkaab' Meguido.12Eh ruum i ruti'kiil kik'ux naa koq'iim taqe i xikin riih rumaam i reey David, naa koq'iim i kehk'een, je' wo' taqe i kak'uun kixq'uun. Naa wo' koq'iim taqe i xikin riih rumaam i Natán, naa wo' koq'iim i kehk'een, je' wo' taqe kak'uun kixq'uun.13Eh naa koq'iim i xikin riih rumaam i Leví, naa koq'iim i kehk'een, je' wo' taqe i kak'uun kixq'uun. Naa koq'iim i riih rumaam i Semei, naa koq'iim i kehk'een, je' wo' taqe i kak'uun kixq'uun.14Chi kunchelaal i patineel, naa koq'iim ruum i ruti'kiil kik'ux, je' chi kehk'een, je' chi kak'uun kixq'uun, inki Dios.1Chupaam i q'iij re' re', naa ruwihiik i je' jinaj k'achlik rooq ha', eh re' re' naa rutz'ajwiik reh i kimahk i kiyiib' wach na'ojb'al taqe i xikin riih rumaam i reey David, je' wo' taqe i aj Jerusaleem.2Eh chupaam i tinamit Israel naa nusacham kiwach chu'nchel i tiyoox, ma' naa ta chik ruq'orariik kib'iral. Eh naa wesam taqe i jalal nuq'oral inki a'n kiib', ma' holohik taj i kina'ojb'al, naa wesam chu'nchel i ma' holohik taj imb'aan chi kixilak i nutinamiit.3Wila' ko wilik i xraaj rik'sam riib' chi jalal nuq'oral, neeruk'uhb'alej irutuutrajaaw, i ruk'ul chi je' wili ineenq'orarik reh: Re' hat naa akimiik ruum k'ahchi' achukum i q'orik, ruq'oral tii chik i Dios i naa q'or i naa a'n awiib' inuchjoq. Xa re' wo' taqe i rutuut rajaaw naa rukansaniik reh noq naa rik'sam riib' chi q'orol nuq'oral.4Eh re' taqe i jalal nuq'oral inki a'n kiib' naa ruchaliik kik'ixiik noq naa kiq'orom inaakilom pan kisaq wiriik. Atoob' ta wo' naq inche kikoj chikiij i re' ruuk' i kiso' taqe i jalal nuq'oral.5Je' la' wili i naa kiq'orom chi kiju'junaal: Re' hin ma' hin ta jalal ruq'oral i Dios, re' hin xa hin wo' cho ab'ixoom panuk'isinal, inko'q taqe.6Eh naa rupahqaljiik reh chi je' wili: Wila' je' re' ¿chib'ih reet noq yok'k'eel aq'ab'? inuchjoq. Re' reh je' wili i naa ruq'orom: Re' wili chupaam i rupaat i jinaj i wamigo xkian cho weh, inko'q, inki Dios.7Eh je' wo' chik wili i xuq'or: Re' hin naa nuye'em q'ab' chi naa rukanteesjiik i cha'jen keh i nutentzuun, naa nuq'asam pankimik intowik weh. Naakikansam incha'jinik keh inutentzuun. Eh re' keh naa kitukem kiib' re' hin naa wo' nuk'uhtaam i nujosq'iil chikinaah i nutentzuun.8Eh je' wili i naa ruk'ulariik chupaam i tinamit re' re' ik'inaq chi yejaal i tinamit naa kikanteesjiik, ma' manlik ta chik yejaal i naa kikahniik, inki i QaJaaw Dios.9Eh nik' chik k'ihaal i naa kikahniik, naa wik'sam taqe pan q'aaq' je' rukab' noq i nik'ib'jik ruuk' q'aaq' i plata, i oro. Noq naa kiin kiq'oreem re' hin naab'iram taqe, eh je' wili i naa nuq'orom keh: Re' taq i hat, hat taq nutinamiit kinko'q keh. Eh re' keh je' wili i naa kiq'orom: Re' i k'achlik Dios i QaJaaw inko'q taqe chi wiij, inki i Dios. Re' noq xiko'ljik chi korik i aj Jerusaleem1Re' taq i hat aj Jerusaleem ponik reh i q'iij chuwach i QaJaaw Dios, chi panaq'awach taq i hat naa ruye'em keh i tokoom i chib'ih taq aweh.2Re' i QaJaaw Dios naa ruk'amam taqe chaloq i tokoom tinamit chi peleto taq awuuk' i hat, hat taq aj Jerusaleem. Eh naa kichopom naah aatinamiit, naa kelq'aam taq paam apaat, eh naa kichopom taq awehk'een. Eh yejaal taq aatinamiit naa kik'amam reje pan tokoom tinamit, xa re' chik i ruqox naa kikanaam taq panatinamiit.3Xa re' la' re' i QaJaaw Dios jumehq'iil naa rutoq'aam peleto kuuk' i tinamit re' re'. Naa rub'anam i je' rukab' i rub'an paruq'ijil i q'aq'inik.4Eh chupaam i q'iij re' re', re' i QaJaaw Dios naa ruk'uliik qajoq chinaah i yuuq' olivo, re' i wilik reje parelb'aal q'iij chuk'ulwaach i Jerusaleem.
Re' i yuuq' re' re', naa ruch'aqiik panyejaal, naa rutik'am cho chi korkiil ireelb'aalq'iij i naa ruponiik chi korkiil i rookb'aal q'iij. Eh jinaj i k'ixkaab' naa ruye'em riib' panyejaal, yejaal i yuuq' naa rojiik pantz'eet reh i rookb'aal q'iij, yejaal i naa rojiik pansak'aaj reh i rookb'aal q'iij.5Eh re' taq i hat naa taq amolom chi elik wach i k'ixkaab' naa ruwihiik chi kixilak i kiib' chi yuuq', naa ruponiik kopan i ye'aab' Azal.
Eh naa taq amolom chi elik, je' rukab' i xkian taq aamaam awati't, noq xub'an jinaj i yihk, noq xwihik cho chi reyil i Uzías Judá. Naa aj ruk'uliik iloq re' i waJaaw i nuDios, ruch'ihil taqe i rusantolaj ánjel.6Eh chupaam i q'iij re' re', ma' naa ta chik rusihq'iniik i q'iij, ma' naa ta chik ruye'em i k'uxik.7Eh ma' naa ta chik rusihq'iniik i q'iij, eh ma' naa ta chik rilariik wach i q'equm aq'ab', ruum noq ru orahiil naq chik i q'equm aq'ab' xasaqum wo' naa rukahniik. Eh xa re' wo' Dios i nab'inik reh nik' wach noq naa rub'anam i re'.8Eh jinaj k'achlik rooq ha' naa ruwihiik Jerusaleem, naa rub'eeh rooq paruq'ijil jab', je' wo' pansiq'jil. Eh yejaal i rooq narojiik chupaam i kamnaq palaw, wilik reje pareelb'aal i q'iij. Eh yejaal i naa rojiik chupaam i palaw Mediterráneo, wilik reje parookb'aal q'iij.9Eh chupaam i q'iij re' re', re' i QaJaaw Dios naa ruwihiik chi reyil chinaah chu'nchel i tinamit sut i wach ak'al. Xti xa re' wo' reh naa ruye'ariik runimaal wach i rub'ihnaal.10Eh naa rukahniik chi xa k'ixkaab' chik i yuuq', naa rutohq'iik reje Geba, naa ruponiik Rimón wilik pansak'aaj reh i Jerusaleem. Re' i Jerusaleem naa ruwihiik chinaah i yuuq', naa ruwihiik runimaal wach, eh wilik inaakipatiniik ar. Ar naa rutohq'iik reje pan i ookb'al Benjamín rub'ihnaal, naa ruponiik pan i ookb'al wilik pantz'u'k, re' i xwihik cho wii' ookb'al reh najt naah tz'aq wilik Hananeel, naa ruponiik inyitz'arik wii' i ru-uuva i reey.11Eh noq naa wo' chik kitoq'aam k'achariik i tinamit ar Jerusaleem ma' naa ta chik rusachariik kiwach kuum i aj ixowaal, ma' xta chik naa kuuchjiik.12Re' i QaJaaw Dios naa ruye'em i ti' k'axik chikinaah chu'nchel i nimaq tinamit naa kichaliik chi peleto kuuk' i aj Jerusaleem. Atoob' ta kok'achalkeeb' wo' naq taqe i aj ixowaal re' re', naa ruq'ahiik i kiti'jolal, je' wo' naq' kiwach, je' wo' i kaaq'.13Eh chupaam i q'iij re' re', re' i QaJaaw Dios naa ruye'em i runimaal yo'jik chikinaah, xama' keht'al ta chik i naa kianam, k'ul naa kitoq'aam peleto chikiwach.14Re' taqe i aj Judá naakik'ulb'ilem taqe i aj ixowaal ar Jerusaleem, naa kiq'uchum chib'ih jariik i naa kik'amam chaloq i tinamit naa kichaliik chi kika'jaah naa kiq'uchum i ki plata, i ki oro, i kiholohaq so'.15Eh re' ti' k'axik naa ruchaliik chikinaah i tinamit naa wo' ruchaliik chikinaah i kikawayu, i kib'uruux, i kicameyo. Eh naa wo' ruchaliik chikinaah i kichikoop naa rukamaniik keh panq'aq'inik i aj ixowaal.16Eh nik' kik'ihaal i naakiko'leem kiib' panq'aq'inik kuuk' i aj Jerusaleem, rajlaal i haab' naa kojiik ar Jerusaleem chi looq'jiik i xti manlik Reey, re' wo' hoq i QaJaaw Dios nim rajaawriik. Ar naa rojiik kininq'ijeem i kok' perpat.17Eh wila' wilik junch'uq-oq keh i tinamit re' re' ma' ta nakojiik Jerusaleem chi looq'jiik i QaJaaw Dios nim rajaawriik, re' xti manlik Reey, re' i QaJaaw Dios ma' naa ta chik ruye'em i jab' chinaah i kitik.18Wila' ma' xiooj i aj Egipto Jerusaleem chi looq'jiik i QaJaaw Dios rajlaal i haab', ma' naa ta chik ruye'em chee jab' chikinaah, naa ruye'em i ti' k'axik chikinaah, je' rukab' naa ruye'em chikinaah i nimaq tinamit ma' naa ta rojiik kininq'ijeem i kok' perpat.19Re' i aj taqe i ti' k'axik wili naa ruchaliik chikinaah i aj Egipto, je' wo' chikinaah i nimaq tinamit ma' naa ta kojiik chuninq'ijiik i kok' perpat.20Eh chupaam i q'iij re' re', re' taqe i kok' kampano chi kalaq i kawáyu je' wili i naa rutz'ihb'jiik chikiwach: Re' wili q'asamaj chik pan q'ab' i QaJaaw Dios inko'q. Eh q'asamaj wo' pan q'ab' i QaJaaw Dios i nimaq xun inkamanik parupaat i Dios. Je' wo' i nimaq kulk kikamanik wach artaal.21Eh chu'nchel i nimaq xun wilkeeb' Jerusaleem, wilkeeb' Judá q'asamaj pan q'ab' i QaJaaw Dios nim rajaawriik, reh chi chupaam taqe i xun re' re', naakichaq'sam taqe i chikop naa kik'amam cho chi mayiij i tinamit. Eh chupaam taqe i q'iij re' re', ma' naa ta chik rub'aan i k'aay chupaam i rupaat i QaJaaw Dios nim rajaawriik.
Bible Society in Guatemala