HAGEO1
1Wilik-oq chik rukab' haab' rokiik chi reyil Persia i reey Dario, pank'amb'al rub'eeh i ruwaaq poh, re' i QaJaaw Dios ruuk' chii' i jalal ruq'oral Hageo rub'ihnaal xuq'oreej i wilik chi ajaab'esil Judá Zorobabel rub'ihnaal, rak'uun i Saltiel. Eh xuq'oreej i kajaaw i k'amal kib'eeh aj tiij Josué rub'ihnaal rak'uun i Josadac.2Eh je' wili i xuq'or i QaJaaw Dios nim rajaawriik reh i Hageo: Re' i tinamit wili inkiq'or noq komajaa' i rureq i q'iij chi naa kiyejaam aha' wilik i yojeel taqe reh i nupaat, inki.3Xchalik i Hageo xuq'or wo' keh i tinamit i xq'orarik reh ruum i QaJaaw Dios, je' wili i xuq'or:4¿Mi ruq'ijil taq cha weh re' i hat chi k'acharik taq chik i na a'n chupaam i holohaq paat, eh ma' nakapaaj ta taq ruyejeb'jiik taqe i yojinaq reh i rupaat i Dios?5Re' i QaJaaw Dios nim rajaawriik je' wili i xuq'or taq cha weh: Chakapaaj taq riij mi ruk'ul taq i k'ahchi' kaat chi je' re'.6Eh nim wo' naq taq i atik i na a'n, xama' xta wo' taq inamol, i na a'n wo' naq taq awa' xama' ti nujik ta wo' taq, i na a'n wo' naq taq ahaa' xama' nik'ik ta wo' taq aachiqchi'iil, i nab'ur wo' naq taq awiib' xama' tiq'ixiinb'ik ta wo' taq. Eh re' taq i tz'aaq akamaj xa q'e' i nik'ik, xa je' pan hoop laj koxtaal taq inayeew.7Re' hin, hin Dios nim wajaawriik, i nuq'or wo' chik taq aweh chi chakapaaj taq mi ruk'ul taq i na a'n weh chi je' re'.8Hiy la' taq johtoq pantaq rax chee' chak'am taq chaloq taqe i chee' reh chinee taq inayejaa' taqe i yojinaq reh i nupaat, reh chinee suuqb'ik nuk'ux, eh ar taq nee kinaloq'ej.9Re' taq i hat k'ih naq i chib'ih taq aweh inasik', eh xa k'isiin wo' taq inareq. Eh re' inamol taq panapaat, xa ruuk' i junhuup chi wuxlaab' inwesaj taq chawach. ¿Chib'ih reet noq i nub'an taq aweh chi je' re'? Ruum re' taq i hat xa re' taq apaat i hat xayejaa', eh re' i nupaat i hin ma' nakapaaj ta taq ruyejeb'jiik, inki Dios.10Eh awuum taq i hat ma' nuyeew ta chik i jab' chinaah i wach ak'al, eh ruum i re' ma' wachinik ta chik taq atik.11Re' wo' hin xinq'ilwik reh i jab' chi ma' xub'an ta chik chinaah i wach ak'al, chinaah taq i aa-tik wilkeeb' wataq yuuq' k'ixkaab'. Eh ma' xnuyeew ta chik i jab' chinaah taq aa-trigo, chinaah taq aa-uuva, chinaah taq aa-oliva. Xkikuy kihaa' taqe i chikop, je' wo' i tinamit, ruch'ihil taqe i kamanoom, inki i Dios.12Re' i Hageo jalal ruq'oral i Dios xuq'or keh chu'nchel i xq'orarik reh ruum i Dios. Eh noq xrib'iraj i Zorobabel taqe re', re' rak'uun i Salatiel, ruch'ihil i Josué k'amal kib'eeh aj tiij rak'uun i Josadac, kuch'ihil taqe i tinamit ma' k'isiin ta xkiyohleej wach i QaJaaw Dios, xkian i xuq'or.13Re' i Hageo jalal ruq'oral i Dios xub'an ruk'utaaj kuuk' i tinamit parub'ihnaal i QaJaaw Dios, je' wili i xuq'or keh: Re' i QaJaaw Dios je' wili i xuq'or: Re' hin xti korik chi naa nuwihiik kuuk', inki.14Eh ruuk' i re', re' i QaJaaw Dios xuyeew rukowiil ruk'ux i Zorobabel rak'uun i Salatiel ajaab'ees ar Judá, eh xuyeew rusuqkiil ruk'ux i Josué rak'uun Josadac kajaaw i k'amal kib'eeh aj tiij, eh xuyeew wo' rusuqkiil kik'ux i tinamit. Ruum i re' xi okik chi rutinamiit i yojinaq taqe reh i rupaat i Dios, inki.15Eh xkitoq'aa' kamanik pan kijib' ru ka'winaq rub'eeh i ruwaaq poh, ree rukab' haab' rokiik chi reyil i Dario ar Judá.1Eh pan jinaj ru ka'winaq rub'eeh i ruwuuq poh ree rukab' haab' re' re', re' i QaJaaw Dios je' wili i xuq'or reh i Hageo jalal ruq'oral:2Re' hat naa a'nam ak'utaaj ruuk' i wilik chi ajaab'esil ar Judá Zorobabel rub'ihnaal rak'uun i Salatiel, je' wo' ruuk' i kajaaw i k'amal kib'eeh aj tiij Josué rub'ihnaal rak'uun i Josadac, je' wo' kuuk' i tinamit, je' wili i naa aq'orom keh:3¿Mi ko wilik taq jino'q chaxilak i ilwinaq chaloq i nupaat noq xkorjik cho pampeet chi xiik' naah holwochiil? ¿Mi ma' nakoj taq rehtaal re' i nupaat yu'naak chi ma' je' ta chik holwochiil noq xkorjik cho pampeet?4Re' hat Zorobabel chakowej ak'ux je' wo' hat Josué kajaaw k'amal kib'eeh aj tiij chakowej wo' ak'ux. Eh chawunchelaal taq i hat wilkaat taq paruyuq'ul i Judá chakowej wo' taq ak'ux chi kamanik, re' hin neekinwihik taq awuuk' cha toob'jiik, inki i QaJaaw Dios nim rajaawriik.5Je' rukab' i xnuq'or taq cha weh noq xatwisaj taq chaloq Egipto, chi naa taq nuwihiik awuuk', eh yu'naak xa wilkiin wo' taq awuuk', ruum aj re' maa yohb'isaj taq awiib'.6Re' hin ilook' i rureq i q'iij chi naa nuk'uyu'sam i taxaaj, i wach ak'al, i palaw, ruch'ihil i ye'aab' chiq yuuq'.7Eh naa wo' kib'arb'otiik chi nuwach chu'nchel i nimaq tinamit, eh naa kik'amam chaloq i kib'ehomal chupaam i nupaat, ar naaruwihiik chi manlik inuloq'il, inki i QaJaaw Dios nim rajaawriik.8Chu'nchel i plata, i oro re' hin kinehchanik reh.9Re' i nupaat naarukorjiik ruka'peech xiik' chik naah holwochiil chuwach i wilik naq cho pampeet. Eh naa nuye'em i suq laj wihik chupaam i ye'aab' wili, inki i QaJaaw Dios nim rajaawriik. Re' i QaJaaw Dios xuq'il taqe i tinamit yiib' wach kina'ojb'al10Eh kijib'-oq chik ru ka'winaq rub'eeh i rub'eleej poh, re' rukab' haab' rokiik chi reyil i Dario, re' i QaJaaw Dios xuq'oreej wo' chik i Hageo i jalal ruq'oral.11Xuq'or reh chi parub'ihnaal i reh nim rajaawriik chupahqaaj keh i k'amal kib'eeh aj tiij chib'ih inkikapaaj chiriij taqe i k'uhb'aal wili.12Eh re' Hageo je' wili i xuq'or: Re' jino'q i winaq nee ruk'am reje i mayijimaj tiwik rub'otom pan itz'ihy, nenik'ik jurinoq chinaah i kaxlanwi'k, chinaah i riis uuva, chinaah i Aseite, oon chinaah i k'uxb'al wi'k. ¿Mi neenkahnik chi kuxisamaj chik taqe re'? inki. Ma' nee ta inkuxeesjik xa ruum i re', inki taqe i k'amal kib'eeh aj tiij.13Eh re' i Hageo xupahqaaj wo' chik keh chi je' wili: Qaq'or chi wilik jino'q i neerutz'aj i kamnaq, eh nee wo' chik i rutz'aj jino'q keh i chib'ih jariik i xqaq'or, ¿Mi neenkahnik chi ch'uwa' wach? inki. Re' re' ra'j neenkahnik chi ch'uwa' wach re', inki taqe i k'amal kib'eeh aj tiij.14Re' i Hageo je' wili i xuq'or: Re' i QaJaaw Dios nim rajaawriik je' wili i xuq'or: Je' wo' re' taqe i tinamit wili chu'nchel inkiyeew chi kimayiij chi nuwach, chu'nchel inki a'n xiik' naah ch'uwa'iil wach.15Je' re' noq yu'naak johtoq chi qawach noq komajaa' i ntohq'ik taq ayejaam i nupaat cha kapaaj taq riij chi korik chib'ih taq i na a'nam re' re'.16Eh noq inakapaaj taq i hat chi naa taq amolom juninaq-oq koxtaal i wach taq atrigo xalajeeb' wo' tii koxtaal taq inamol. Eh noq inakapaaj taq i hat chi naa taq areqem lajeeb'-oq roxk'ahl ikom i riis taq aa-uuva, xa juninaq wo' tii ikom taq inareq.17Re' hin xnusach wach taq i aa-tik inakamaneej wach, ruuk' yab'ilaal, ruuk' saqb'och. Eh re' taq i hat xama' xinanimaj ta wo' taq ruka' pech, inki QaJaaw Dios.18Chakoj taq rehtaal chi yu'naak kijib' ru ka'winaq ruk'amam rub'eeh i rub'eleej poh xtohq'ik taq akojom i raa' ch'ikaab' reh i nupaat.19Ruum aj re' yu'naak taq johtoq chawach naarunujiik taq inamol wii' i wach taq atik. Yu'naak ma' rub'an ta wach i uuva, i higo, i granado, i olivo, yu'naak taq johtoq chawach naa taq kaat nukuxisam, inki i QaJaaw Dios.20Re' i QaJaaw Dios chupaam wo' q'iij re' re' xuq'oreej i Hageo jalal ruq'oral, je' wili i xuq'or reh:21Re' hin i nuq'or aweh chi cha q'or reh i Zorobabel wilik chi ajaab'esil ar Judá chi re' hin naanuk'uyu'sam i taxaaj, i wach ak'al.22Re' hin naawisam taqe pan kiye'aab' i wilkeeb' chi reyil, naa wo' wisam i kajaawriik i nimaq taq tinamit, naanusacham kiwach. Eh na naanusacham wach i kikareta, eh chi naa rukanteesjiik i kikawayu, je' wo' taqe i iqilkeeb' chiriij, re' keh xak'ul naa kikansam kiib' chikiwach ruuk' q'aslaj ch'ihch'.23Re' i QaJaaw Dios nim rajaawriik je' wili i xuq'or: Eh chupaam taqe i q'iij na' k'ularoq taqe i re', re' hat Zorobabel rak'uun i Salatiel waj kamanoom re' hin naanucha'jiniik aweh, je' rukab' noq inchajaljik jino'q ilopq'aaq' kojb'al ehtalil, ruum re' wo' hin xin sik'wik chaawach, inki.
Bible Society in Guatemala