Basahin ang ROMANOS 1

ROMANOS1

¹Re' hin i Pablo, hin raj tahqaneel i Jesucristo, xusik' cho nuwach i Dios chi q'orariik rib'iral i ak' k'uhb'aal.²Re' wo' ruq'orom cho rib'iral i Dios pampeet, re' i xkitz'ihb'aj chaloq pan santo laj huuj taqe i jalal ruq'oral.³Eh xq'orik cho chi riij i QaJaaw Jesucristo, Rak'uun i Dios, re' xk'ulik chi xa je' winaq, xk'ulik aasjoq wach ak'al chi xikin riih rumaam i reey David.⁴Re' Jesucristo xti xk'utinik chi manlik Rak'uun i Dios, ruum wilik rusantohiil, wilik rajaawriik, ruum chi xwukteesjik wo' chik cho ruum i Dios chi k'achlik wach.

⁵Parub'ihnaal i Jesucristo, xirupab'aa' chi hin raj tahqaneel. Eh xirutaq'aaj chupaam nimaq taq tinamit chuq'orariik keh chi kinimaj i Jesucristo, eh chi ki a'n iraaj i reh.⁶Eh re' taq i hat, i hat taq patim Roma, hat wo' taq haa' chi kixilak i nimaq taq tinamit re' re'. Xanimaj wo' taq chik i Jesucristo,⁷eh xatruk'ax wo' taq, reh chi xatkahnik taq chi rak'uun rixq'uun i Jesucristo, reh chi xatrukoj taq haa' chi rutinamiit. Re' ta wo' naq i otob'il, i suq laj k'uxliis chuyeew taq chaaweh i QaJaaw Dios, je' wo' i QaJaaw Jesucristo. Re' Pablo iraaj cho ojik Roma

⁸Re' hin peet inwaaj nut'iosem ree nuDios parub'ihnaal i Jesucristo taq chawiij cha ju'junaal, ruum xa aha' yuuq' wilik rib'iral chi nayeew taq ak'ux chunimjiik i Jesucristo.⁹Re' Dios, i k'ahchi' nub'anam i rukamaj chu'nchel wánima ruuk' i ruq'orariik rib'iral i ruk'uhb'aal i Rak'uun, reht'al chi xa kok' xilak i nub'an reje nutiij taq chawiij.¹⁰Eh re' i nupahqaaj i hin panutiij ree Dios chi eliik re' chi korehtaal i ruyeew q'ab' weh chi nee kinooj taq chawula'jiik, wila' je' re' iraaj i reh,¹¹ruum re' hin q'e' nwaaj wilom taq awach. Chi je' re', nee taq tinuk'uhb'alej chi korik, reh chi nee taq inachop ak'ux chi nimanik.¹²Iraaj ruq'orom chi k'ul naaqaye'em rukowiil qak'ux chi qawach ruuk' i nimanik k'ahchi' kiin i hin eh ruuk' i nimanik taq k'ahchi' kaat i hat.

¹³Hermano, re' hin inwaaj chi nee taq inaweht'aliij chi k'ih pech naq inupab'aa' nub'eeh chi ojik taq cha wilariik, eh xakomajaa' ta wo' ruyee riib' chi nuwach. Re' inooj nub'an taq awuuk' re' chi wilik neekinimanik ree Dios, je' rukab' noq xponik nuq'or i ak' k'uhb'aal pan tokoom tinamit, wilik xinimanik reh.¹⁴Re' hin komajaa' i nuq'or i ak' k'uhb'aal keh aj griego, keh ma' re' ta taqe aj griego, keh i wilik kina'ojb'al, keh ma' xta kina'ojb'al.¹⁵Je' re' noq, xa nwotow chik ojik taq awuuk' i hat taq aj Roma, reh i ruq'orariik rukorkiil taq aweh i ak' k'uhb'aal ree ko'lemb'al iib'. Re' rajaawriik i ak' k'uhb'aal

¹⁶Re' hin ma' kink'ixik ta chuq'orariik i ak' k'uhb'aal, ruum re' re' i rajaawriik i Dios, ko'lemb'al kiib' i naakinimaniik reh. Eh peet q'orarik keh i aj judío, eh yu'naak k'ahchi' wo' ruq'orariik keh i ma' re' ta taqe aj judío.¹⁷Re' ak' k'uhb'aal wili ink'uhtanik qeh nik' wach noq qoh ruko'leej i Dios. Eh xa ruum chi korik wach qak'ux chi nimanik qoh ruko'leej, ruum je' wili i ruq'or pan santo laj huuj: Re' korik wach ruk'ux chi nimanik wilik ruk'achariik chi juneliik, inki. Re' tinamit wach ak'al pamahk wilik

¹⁸Eh re' Dios kopan taxaaj i ruyeew chaloq i rijosq'iil chikinaah i yiib' wach kina'ojb'al ma' korik ta wach kik'ux. Eh ruuk' i yiib' wach nkian inkitz'ap naah i korik re' nkaaj chi ma' neht'aljik taj.¹⁹Eh aha' wilik taqe i korik eht'alimaj chi riij i Dios, re' keh keht'al wo' naq, ruum k'uhtamaj wo' naq cho keh pampeet ruum i Dios.²⁰Noq inqilow wach chu'nchel i ruyejaam chaloq, inqanab'eej wach chi re' reh Dios. Eh noq xutz'uhkrisaj chaloq i wach ak'al xk'utinik wo' hoq chi wilik rajaawriik. Ruum aj re', re' tinamit re' re' i ma' nata kiko'leem kiib' chuwach.²¹Re' keh keht'al wo' naq chi wilik i Dios, xa re' la' xama' inkiyeew ta ruloq'il chi re' reh Dios. Eh ma' nkit'iosej ta reh i rotob'il. Xa re' la' chik i kisahchel laj na'ojb'al inki a'n, eh xkahnik chi q'equm paam i kikapeb'aal.²²Re' keh wilik kina'ojb'al inki a'n kiib'. Xanaah re', xa meem wo' taqe,²³ruum ma' re' taj i Dios k'achlik chi juneliik xkiyeew ruloq'il. Re' la' chik inche rujalwaach i winaq xakimik reh xkiyeew ruloq'il, i kijalwaach taqe i tz'ikin kirupinik, i kijalwaach i chikop kijib' kooq, i chikop xa kijukem kiib' noq kib'ehik.

²⁴Ruum aj re', re' Dios xuq'eb' taqe chupaam i ruk'axariik wach i ch'uwa' wach na'ojb'al wilik cho pan kánima. Eh k'ul xtohq'ik kia'nam i re' ma' re' chikiwach korehtaal xkik'uhtaaj ruk'ixb'ilaal i kiti'jolal.²⁵Ma' re' ta chik runimjiik i korik i laj i Dios inki a'n. Re' la' chik i ma' korik taj inkinimaj. Eh re' chik xkiyeew ruloq'il taqe i rutz'uhkrisam chaloq i Dios. Eh ma' re' ta chik i Dios xkiyeew ruloq'il, re' i xtz'uhkrisanik reh taqe re', re' i Dios wilik chi juneliik. Je' ta wo' naq re'.

²⁶Ruum aj re', re' Dios xuq'eb' taqe chupaam i k'ixb'ilaal chi b'anarik. Je' naa re' wo' re' inki a'n i kehk'een xkikanaa' rub'aan i kanamaj chikinaah. Ma' nkaaj ta chik wirik kuuk' i kib'ahiil, kuuk' la' chik i kuch ixoq inkaaj wirik.²⁷Eh je' wo' chik re' inki a'n taqe winaq, xkikanaa' rub'aan i kanamaj chikinaah. Ma' nkaaj ta chik wirik kuuk' i kehk'een, eh xa kiqop chik chub'anariik i yiib' wach na'ojb'al, kuuk' chik i kuch winaq inkaaj wirik. Xak'ul chik inki a'n chikiwach i k'ixb'ilaal chi b'anarik. Ruum i re', inye'arik i ti' k'axik chikinaah ruum i Dios ruum i kisahchel laj na'ojb'al.

²⁸Ruum chi ma' xkaaj ta kikojom chi ki Dios, i k'achlik Dios, xikanab'jik ruum i Dios chupaam i kisahchel laj kapeew, reh chi xkian i ma' ruk'ul ta chi b'anarik:²⁹Xa ma' tiklik ta kib'anik, yiib' wach i kina'ojb'al, aj k'axal wach b'ehomal taqe, aj kaqwachineel taqe, aj kansan kas kichaaq' taqe, sik'il peleto taqe, aj jot'ool taqe, ma' tiklik ta kib'anik, aj molol wach k'utaaj taqe.³⁰Ch'oolen kas kichaaq' taqe, inkixow wach i k'achlik Dios, xa q'e' kichaq'wik, q'et q'et taqe, xa nim kiwach inki a'n kiib', xa re' yu' inkitz'aq wach ru mahk i kas kichaaq', ma' nkinimaj taj i kituut kajaaw.³¹Ma' nkireq ta chi riij i korik, ma' nkian taj inkiq'or chi naa kianam, ma' nkikuy ta ru mahk kas kichaaq', ma' awach taj inkiketelaaj wach.³²Re' keh keht'al wo' naq chi re' Dios ruq'orom chaloq chi awach i kib'anik reh taqe na'ojb'al re' re', i ruk'ul chi naa kikimiik. Eh ma' manlik ta keh chi xa re' keh kib'anik, insuuqb'ik la' wo' kik'ux chi riij awach inkilow chub'aan taqe i re'. Re' Dios ko parub'ehel i rub'an i q'ataj q'orik

¹Ruum aj re', ma' xta chik neenako'leej wii' awiib' hat, i ti q'atwik q'orik chikinaah tokoom, atoob' ta naq wilik ana'ojb'al. Noq inaq'at q'orik chikinaah tokoom i hat, xa re' hat i nayeew awiib' panti' k'axik, ruum i na a'n wo' aweh inki a'n i keh.²Re' hoj qeht'al chi re' Dios ko parub'ehel i ruq'at i q'orik chikinaah i kib'anik reh i yiib' wach na'ojb'al re' re'.³Eh re' hat i ti q'atwik q'orik chikinaah tokoom, eh i na a'n wo' aweh i ma' toob' taj inki a'n i keh, maakapaaj i hat chi naa ako'leem awiib' chuwach i ti' k'axik naa ruye'em chaloq i Dios.⁴Re' hat ma' imponik ta panaq'awach i rotob'il, i ruk'axb'al, i q'unil wach ruk'ux i Dios. Eh ma' nakoj ta rehtaal chi ruuk' naq i rotob'il i Dios, k'ahchi' kaat ruye'em chi naa ayot'om ak'ux chuwach chi riij amahk eh re' naq chik i reh neenanimaj.⁵Xa re' la' re' hat inakowb'isaj anaah. Ma' nawaaj ta ayot'om ak'ux chi riij amahk, ruum aj re', re' hat xa cha wib'il awiib' k'ahchi' amolom wach cha naah i ti' k'axik na' chureq ruq'ijil, noq naa rub'anam i q'ataj q'orik i Dios parub'ehel.⁶Re' noq rutojom reh i ju'jun re' q'oreel chib'ih i xub'an chib'ih i xuq'or.⁷Eh naa ruye'em keh i juneliik k'acharik awach i k'ahchi' kikuyum rub'anariik i holohik laj na'ojb'al, k'ahchi' kisik'im chi naa ruye'ariik kiloq'il, chi naa ruye'ariik i kik'axb'aal.⁸Eh re' Dios ruuk' rujosq'iil naa ruye'em taqe panti' k'axik i xa q'et q'et taqe, re' taqe i ma' nkaaj ta rub'anariik i korik, re' chik i yiib' wach inki a'n.⁹Eh chu'nchel i kib'anik reh i yiib' wach na'ojb'al, jinaj runimaal ti' k'axik naa ruye'ariik chikinaah ruum i Dios, peet taqe aj judío, je' wo' taqe i ma' re' ta aj judío.¹⁰Eh re' taqe i kib'anik reh i holohik laj na'ojb'al, naa ruye'ariik keh ruum i Dios i kiloq'il, i rusuqkiil k'uxliis. Re' taqe i aj judío naa ruye'ariik keh chi peet, eh naa wo' ruye'ariik keh i ma' re' ta taqe aj judío,¹¹ruum re' Dios reh ma' awach taj i tokoom rilariik i rub'an. Xa jinaj la' wach rilariik i rub'an.

¹²Eh chu'nchel i ximahkunik chi ma' xq'orarik ta keh i najtir k'uhb'aal ma' naa ta ruq'atariik i q'orik chikinaah. Eh re' taqe aj judío i ximahkunik, keht'al i ruq'or i najtir k'uhb'aal, re' wo' k'uhb'aal naa ruq'atwiik q'orik chikinaah,¹³ruum ma' nee ta kikahnik chi ma' ta chih kimahk i xa re' rib'irjiik i k'uhb'aal inki a'n re' la' taqe i kinimanik reh i ruq'or i k'uhb'aal kikahnik chi ma' xta chik kimahk.¹⁴Raaj taqe i ma' re' ta aj judío, i ma' keht'al taj ruq'or i najtir k'uhb'aal, xa pankik'ux inchalik runimjiik i k'uhb'aal. Eh xa kik'uhb'aal kiib', ruum inkik'raaj pankik'ux i holohik, i ma' holohik taj.¹⁵Re' keh inkik'uhtaaj chi tz'ihb'amaj pan kánima i rukamaj k'uhb'aal. Eh wilik pech noq re' kikapeew naa rukojwiik kimahk oon re' kikapeew naa ruk'uhtaniik reh chi ma' xta kimahk.¹⁶Re' na' chub'an i q'ataj q'orik i Dios parub'ihnaal i Jesucristo na' chuteh wach inki a'n chi q'eeqmaal i tinamit, je' rukab' i ruq'or i ak' k'uhb'aal i nuq'or rib'iral i hin. Re' taqe aj judío keht'al chib'ih ruq'or i najtir k'uhb'aal

¹⁷Eh re' hat inaq'or awiib' chi hat aj judío. Ruum i re', inach'ikaa' ak'ux ruuk' i najtir k'uhb'aal, xa nim chik awach i na a'n awiib' chi re' Dios ehchan aweh.¹⁸Re' hat aweht'al aha' wilik iraaj i Dios chi naa a'nam. Eh re' k'uhb'aal re' re' ink'uhtanik aweh chi naa asik'im wach i ma' xta reet chi b'anarik.¹⁹Ruum aj re', q'e' naa niimb'isaj awiib' chuq'orariik chi nee na a'n ruk'uhtjiik kib'eeh i je' taqe moywach eh chi hat kisaqumaal i panq'equm k'acharik inki a'n²⁰Eh inaq'or chi naa a'n kitijiik i ma' xta kina'ojb'al, je' wo' hoq i ma' nkireq ta rukorkiil i korik, eh inaq'or chi re' najtir k'uhb'aal ink'uhtanik aweh chi nareq ana'ojb'al, chi nareq chi riij i korik.²¹Eh wila' neena a'n kitijiik taqe tokoom, ¿chib'ih reet noq ma' peet inatijej awiib' i hat? Wila' naq'or chi ma' toob' taj i leq', ¿chib'ih reet noq ko na a'n wo' aweh i leq' i hat?²²Wila' naq'or chi ma' toob' taj i ch'uwa'risanik wach kaxáro, ¿chib'ih reet noq inach'uwa'risaj wach aakaxáro i hat? Eh wila' nawixowaaj kiwach i tiyoox, ¿chib'ih reet noq tiooj chi i leq' chupaam paat kiwihik wii'?²³Re' hat xa nim chik awach i na a'n awiib', ruum aweht'al i najtir k'uhb'aal. Ruum chi ma' nanimaj taj ma' nayeew ta ruloq'il i k'achlik Dios.²⁴Xti korik wo' i ruq'or i tz'ihb'amaj pan santo laj huuj chi je' wili: Ruum taq ayiib' wach na'ojb'al i na a'n i hat taq aj judío, inkib'aj i Dios i ma' re' ta taqe aj judío, inki.

²⁵Xti korik noq awach neenpoch'arik naah i ruk'achab' rehtalil chi aj Judío, neen kamanik reh wila' runimaj i najtir k'uhb'aal. Eh wila' ma' runimaj i k'uhb'aal re' re', neenkahnik chi xa je' ma' xb'aan ta reh i re'.²⁶Raaj wila' re' i ma' poch'ooj ta naah i ruk'achab' neerub'an runimjiik i ruq'or i najtir k'uhb'aal, neenkojarik paruman ruum i Dios chi je' poch'ooj naah i ruk'achab', atoob' ta naq ma' b'anooj ree reh.²⁷Eh awach i runimaj i k'uhb'aal, atoob' ta ma' poch'ooj naah i ruk'achab', re' reh naa ruq'atwiik q'orik chinaah i b'anooj reh i re', ruum re' i poch'ooj naah i ruk'achab' xa rehtalil naq chib'ih ruq'or i najtir k'uhb'aal, eh ma' xub'an ta runimjiik.²⁸Re' i manlik aj judío ma' xata neeruk'uhtaaj riib' chi je' tii chik aj judío xa ruum ta chi poch'ooj naah i ruk'achab' rehtalil chi aj judío, eh ma' xata wo' wach ruti'jolal naa ruk'utiniik.²⁹Re' i manlik aj judío xti re' wo' cho paránima, re' manlik ehtalil re' i re' runimjiik i Dios. Ma' re' taj i xa tz'ihb'amaj panhuuj, panuxlab'al la'. Eh re' imb'anik reh i re' re', Dios neenkojwik reh paruman, ma' re' ta taqe xa tinamit.

¹Eh ¿chib'ih jariik i runimaal wach i aj judío? ¿Chib'ih jariik i rutiq wach chi neenpoch'arik naah i ruk'achab'?²Xiik' la' naah nimaal wach jino'q i aj judío, k'ih wach chihreet. Peet, ruum chi re' Dios keh i aj judío xuq'or i ruk'uhb'aal chi peet.³¿Eh wila' wilik taqe aj judío ma' xkinimaj taj i ruk'uhb'aal i Dios? ¿Mi ruum i re', ma' nee ta rub'an i Dios i ruq'orom cho rib'iral?⁴Ra'j xti ma' chih ta re' ruum re' Dios korik inq'orik, atoob' ta chu'nchel i tinamit chukul q'orik taqe. Eh tz'ihb'amaj wo' chaloq chi je' wili:
Re' hat naa aq'oriik chi korik wach ak'ux, ruuk' i re', naaweliik korik noq naakiq'atam q'orik cha naah, inki.

⁵Eh wi ta ruum i qayeb'ee wach na'ojb'al inwihik i rukorkiil wach ruk'ux i Dios, ¿chib'ih naq i neenqaq'or? ¿Mi neenqaq'or chi ma' rub'ehel taj i rub'an i Dios noq qohruyeew chutojariik i qamahk? (Re' hin ma' pan k'ayeew ta wach q'orik k'ahchi' taq kaat nuq'oreem)⁶Ra'j xti ma' ruyee ta riib' re' chi neenqaq'or i je' re', wi ta ma' korik wach ruk'ux i Dios, ¿nik' naq wach noq neeruq'at i q'orik chikinaah i tinamit wach ak'al?⁷Raaj wi ta ruum i chukuj q'orik i nub'an i hin je' rukab' inatz'aq taq wach chi wiij, q'e' neenye'arik ruloq'il i korik i ruq'or i Dios, ¿chib'ih chik reet noq inq'atarik i q'orik chi nunaah i hin chi hin aj mahk?⁸Wi ta ruum i chukuj q'orik neenkan i holohik. ¿Chib'aaj wo' reet noq ma' neenb'aan re' i yiib' wach na'ojb'al? Wilik i kiq'orik reh chi je' re' i tijinik i nub'an i hin, xa b'anb'al weh inki a'n Re' taqe re' i ruk'ul chi naa kiye'ariik pantojb'al mahk ruum i Dios. Chi qunchelaal hoj aj mahk

⁹¿Chib'ih i naa qaq'orom chi riij i re'? ¿Mi q'e' chihooj re' i qana'ojb'al i hoj, chuwach i kina'ojb'al i keh? Ra'j xti ma' chih ta re', ruum xqaq'or chik chi, chi qunchelaal hoj aj mahk, chi je' taqe aj judío, chi je' taqe ma' re' ta aj judío.¹⁰Je' rukab' i tz'ihb'amaj chaloq chi je' wili: Ma' awach ta jino'q i korik wach ruk'ux, Jinaj ta naq reje.¹¹Ma' awach ta jino'q inreqwik chi riij i korik. Ma' awach ta jino'q iraaj rusik'im i Dios.¹²Chi kunchelaal xkichop q'ab' rub'aan i yeb'ee wach na'ojb'al. Ma' awach ta keh imb'anik reh i holohik laj na'ojb'al jinaj ta naq reje.¹³Re' q'orik i nelik cho pan kalaq xa je' chik chuhiil i ruti'jolal i kamnaq ma' tz'aplik ta naah parujuleel. Eh aj chukul q'orik taqe je' ti'kiil i rutiiw i aaq' i rub'an i kiq'oral.¹⁴Eh xa re' i b'ajooj wilik pan kichii', ma' tiklik ta k'isinoq kiq'orik.¹⁵Eh xama' ahl ta kooq kiq'ab' chukanteesjiik kas kichaaq'.¹⁶Eh aha' yuuq' kiooj k'oloq, xanoq wo' sachooj eh ti' k'axik inki a'n reh i kas kichaaq'.¹⁷Eh ma' keht'al taj i wihik pansuqkiil k'uxliis.¹⁸Eh ma' inkiyohleej ta wach i Dios, inki pan santo laj huuj.

¹⁹Re' hoj qeht'al chi chu'nchel i ruq'or i k'uhb'aal, keh i wilkeeb' chi ri'sil i rajaawriik i k'uhb'aal i ruq'or, reh chi ma' nee ta nkiq'or chi ma' xta kimahk. Eh naab'al reh chi chu'nchel i tinamit naa ruq'atariik i q'orik chikinaah ruum i Dios.²⁰Re' Dios ma' awach ta jino'q i neeruq'or reh chi ma' xta ru mahk xa ruum ta chi runimaj i najtir k'uhb'aal, ruum re' k'uhb'aal re' re' xa re' tii ruyeew qeh chi naab'jik chi hoj aj mahk. Xa ruum i ruye'ariik k'uxliis chi nimanik inkan i ko'lemb'al iib'

²¹Eh yu'naak, manqakapaaj chik i ruq'or i najtir k'uhb'aal, ruum re' Dios xuyeew chik qeh chi naab'jik nik' wach noq nakooj ruko'leem. Re' i xuq'or cho rib'iral i najtir k'uhb'aal, re' wo' xkiq'or cho rib'iral taqe jalal ruq'oral i Dios²²Re' Dios qoh ruko'leej xa ruum chi qaye'em qak'ux chunimjiik i Jesucristo. Je' wo' re' kiko'ljiik i rub'an chi kunchel, ruum ma' awach taj i tokoom rilariik i rub'an.²³Ruum chi chu'nchel i tinamit ximahkunik, ma' inkireq taj i ruloq'il i Dios.²⁴Eh re' Dios xa ruum i rotob'il xa chi kooch xuko'leej taqe chuwach i mahk ruuk' i ko'lemb'al iib' inkan ruuk' i runimjiik i QaJaaw Jesucristo.²⁵Re' i xutaq'aaj chaloq i Dios chi jilow mayiij, re' rukik'eel xuchihkaaj chi kuyb'al ree mahk. Eh xa ruum i ruye'ariik k'uxliis chi nimanik inkan i kuyb'al mahk. Ruuk' i re', xuk'uhtaaj i Dios chi korik wach ruk'ux, ruum ma' xuyeew ta taqe chutojariik i kimahk kianam chaloq,²⁶xa ruum chi wilik i q'unil ruuk', je' re' i k'ahchi' rub'anam i Dios yu'naak, i ruk'uhtaaj chi korik wach ruk'ux, ruum i ruko'leej taqe chuwach i mahk awach i kiye'em kik'ux chunimjiik i Jesucristo.

²⁷¿Aha' wilik inqanimb'isaj naq cho wii' qawach? Xsahchik wach ¿Chib'ih reet noq xsahchik wach? Ma' ruum taj i runimjiik i ruq'or i najtir k'uhb'aal, xa ruum la' chi nqayeew qak'ux chunimjiik i Jesucristo.²⁸Eh noq xooj kuxoq xqareq chi riij chi xa re' wo' Dios neenko'linik ree winaq noq ruye'em ruk'ux chunimjiik i Jesucristo. Eh ma' ruum taj chi rub'aan ruq'or i najtir k'uhb'aal.²⁹Eh ¿chib'ih i neenqaq'or chi riij i wili? ¿Mi xa re' wo' taqe aj judío i ruk'ax i Dios? Ma' chih taj, xti korik la' wo' chi ruk'ax taqe haa' i nimaq taq tinamit ma' re' ta taqe aj judío,³⁰ruum re' Dios xa jinaj wo' hoq. Xa re' wo' reh inko'linik keh chuwach i mahk awach taqe inkiyeew kik'ux chunimjiik i Jesucristo, atoob' ta aj judío atoob' ta ma' aj judío.³¹Eh wila' je' re', ¿mi nqesaj rajaawriik i najtir k'uhb'aal ruum i runimjiik i Jesucristo? Ra'j xti ma' chih ta re' Ruuk' la' re' inqamanaa' wach i ruye'ariik rajaawriik i k'uhb'aal re' re'. Re' ruk'amariik naah i nimanik xub'an i Abraham

¹Yu'naak chi riij chik i Abraham xikin cho qamaam naa nuq'oriik. ¿Mi wilik i xureq i reh ruuk' i xub'an?²Xti korik ta chi xye'arik rukorkiil wach ruk'ux i Abraham ruuk' taqe holohik xub'an chi rib'il riib' wilik naq rub'ehel chi xuyeew runimaal wach chi rib'il riib', atoob' ta ma' chuwach naq i Dios.³Eh pan santo laj huuj i ruq'or chi re' Abraham xuyeew ruk'ux chunimjiik i Dios. Ruum aj re', xk'ularik ruum i Dios chi korik wach ruk'ux, inki.⁴Eh awach jino'q i neerub'an i kamanik, re' rutojb'aal neenye'arik reh ma' xata naa rukochem, rub'ehel la' chi naa ruk'ulum, ruum rutojom chik riij.⁵Raaj jino'q i ruyeew ruk'ux chunimjiik i Dios inko'linik chuwach i mahk, neenk'ularik ruum i Dios chi korik wach ruk'ux, atoob' ta ma' xtaj i otob'il neerub'an.⁶Re' reey David q'orinaq wo' cho chi riij i wili chi atoob' reh i awach ink'ularik ruum i Dios chi korik wach ruk'ux, ruum re' Dios ma' i rukoj ta paruman taqe rub'anam chaloq.⁷Eh xuq'or chi:
atoob' reh awach i kuyuuj i sachooj chik chi jumpech chu'nchel i ru mahk ruum i Dios ma' ye'arik ta chutojariik i ru mahk.⁸Atoob' reh awach i ma' xta k'isinoq i yiib' wach na'ojb'al i rub'an. Eh ma' xta k'isinoq ru mahk neenkan ruum i QaJaaw Dios inki.

⁹Eh ¿mi xa keh i poch'ooj naah i kik'achab' oon keh wo' haa' i ma' poch'ooj ta naah i kik'achab' inq'orarik? ma' chih taj. Keh la' wo' haa' i ma' b'anooj ta keh i re', ruum xnuq'or chi re' Dios xuk'ul i Abraham chi korik wach ruk'ux, ruum xuyeew ruk'ux chi nimanik.¹⁰Eh ¿jank'al ink'ularik i Abraham ruum i Dios chi korik wach ruk'ux? Chanab'eej taq noq komajaa' impoch'arik naah i ruk'achab' noq xk'ularik chi korik wach ruk'ux ruum i Dios.¹¹Eh re' Abraham ko xam chik chi xpoch'arik naah i ruk'achab', rehtalil chi k'uluuj chik ruum i Dios chi korik wach ruk'ux, ruum xuyeew cho ruk'ux chunimjiik i Dios. Ruum i re' xkahnik chi kaa' ki'sil taqe inkiyeew kik'ux chunimjiik i Dios, atoob' ta ma' poch'ooj ta naah i ruk'achab'. Re' keh kik'ulariik chi korik wach kik'ux, ruum inkiyeew kik'ux chunimjiik i Dios.¹²Eh re' Abraham korik wo' chi kaa' ki'sil taqe i poch'ooj naah i kik'achab' ma' xata ruum chi poch'ooj naah i kik'achab' ruum la' chi nkiyeew kik'ux chunimjiik i Dios je' rukab' i runimjiik i Dios xub'an i Abraham noq komajaa' ta imb'aan reh i re'. Re' kooch ruq'orom cho rib'iral i Dios neenk'ularik, xa ruum i ye'ej k'uxliis chi nimanik

¹³Re' Dios ma' ruum taj chi re' Abraham xunimaj i najtir k'uhb'aal xuq'or cho reh i chi naa ruye'em reh chi kikooch chu'nchel i wach ak'al, je' wo' keh taqe i riih rumaam. Xa ruum la' chi xuyeew ruk'ux chunimjiik i Dios.¹⁴Eh wi ta xa re' taqe i kinimanik reh i k'uhb'aal re' re' naa kik'ulwiik reh i kooch, xama' xta naq i rutiq wach i ruye'ariik k'uxliis chunimjiik i Jesucristo. Eh xama' xta naq neenokik wii' i kooch i ruq'orom chaloq i Dios,¹⁵ruum re' k'uhb'aal re' re' inye'wik panti' k'axik wila' ma' xnimjik i ruq'or. Raaj i ma' choplik ta naah ruum i k'uhb'aal, ma' xta wo' neenq'ehb'ik wii' chuwach i k'uhb'aal.¹⁶Ruum aj re', ajwaal wach chi keh taqe i riih rumaam i Abraham chi peet naakiye'em kik'ux chi nimanik, reh chi neen kik'ul i kooch. Eh re' i re' ma' xata keh i kinimanik reh i najtir k'uhb'aal, keh la' wo' chu'nchel i kiye'em kik'ux chi nimanik, je' rukab' runimjiik i Dios xub'an chee Abraham. Re' reh xkahnik chi qamaam qati't i hoj i qaye'em qak'ux chi nimanik,¹⁷je' rukab' i ruq'or i tz'ihb'amaj chaloq, re' q'orooj cho reh i Abraham ruum i Dios chi je' wili: Re' hin xinpab'anik aweh chi hat kaa' ki'sil i nimaq taq tinamit naakinimaniik weh, i nuchjik. Ra'j i Dios wili, i xunimaj chaloq i Abraham, re' Dios inye'wik kik'achariik ruka'peech taqe kamnaq eh i rutz'uhkrisaj wo' taqe i xa chib'ih jariik komajaa' ta nilarik kiwach.

¹⁸Eh atoob' ta ma' uyub'jik ta naq chik iraaj i q'orooj cho reh i Abraham ruum i Dios, re' reh xunimaj, eh xuyeew ruk'ux chi ruyub'jiik, eh korehtaal wo' xk'ihaaxb'ik taqe i rak'uun rixq'uun. Eh xkahnik chi kaa' ki'sil taqe i xinimanik reh i Dios, je' rukab' i xq'orarik cho reh pampeet chi je' wili: Je' re' k'ihaal taqe awiih aamaam naa ruponiik, i nuchjik.¹⁹Re' Abraham xuyeew ruk'ux ruuk' i Dios chi naa ruye'ariik reh i xq'orarik cho rib'iral reh pampeet. Ma' re' ta nkiwii' chi k'isiin chik ma' jinajsiento haab' i wilik reh. Eh xakimik chik keh kikab'cheel ruuk' i rehk'een, Sara rub'ihnaal, q'e' chik taqe rijib' chi naa ruwihiik kak'uun kixq'uun.²⁰Re' Abraham ma' xuq'or taj chi ma' naa ta ruye'ariik reh ruum i Dios i rukooch q'orooj cho rib'iral reh, xuyeew la' ruk'ux chi ruyub'jiik, eh chi naa ruye'ariik reh. Ruuk' i re', xuyeew ruloq'il i Dios.²¹Re' Abraham reht'al i reh chi korik chi re' Dios wilik rajaawriik chuye'ariik aha' wilik i ruq'or rib'iral.²²Ruum chi xuyeew ruk'ux chunimjiik i Dios, xk'ularik ruum i Dios chi korik wach ruk'ux.

²³Eh ma' xata chi riij i Abraham inq'orik i tz'ihb'amaj cho rehtalil pan santo laj huuj chi xk'ularik chi korik wach ruk'ux.²⁴Inq'orik la' wo' chiqiij i hoj i tz'ihb'amaj cho rehtalil. Eh xa ruum chi k'ahchi' qaye'em qak'ux chi nimanik, qoh rukoj wo' haa' paruman i Dios chi korik wach qak'ux. Je' re' i rub'an quuk' i qohnimanik ree Dios, i x-uksanik wo' chik cho reh i QaJaaw Jesucristo chi k'achlik wach,²⁵re' i xq'ahteesjik pankimik ruum taqe qamahk, eh xwukteesjik wo' chik chaloq chi k'achlik wach, reh chi xojruko'leej chuwach i mahk. Hoj ko'limaj chuwach i mahk

¹Re' i Dios xa ruum inqayeew qak'ux chi nimanik, qoh ruko'leej chuwach i mahk, eh chi xa parub'ihnaal i QaJaaw Jesucristo wilkooj chik pansuqkiil k'uxliis ruuk' i Dios.²Eh xa ruum chi nqayeew qak'ux chunimjiik i Jesucristo, inqa a'n rusuqkiil i rotob'il i Dios. Eh ma' xta chik i rub'an wii' kiib' qak'ux, insuuqb'ik la' qak'ux chi ruyub'jiik i ruloq'il i Dios naaqehtriik.³Insuuqb'ik la' wo' qak'ux noq inchalik ti' k'axik chi qanaah, ruum re' hoj qeht'al chi re' ti' k'axik i ruyeew ruman rukowiil qak'ux, reh chi neenqakuy rik'teesjiik.⁴Eh qakuyum-oq chik rik'teesjiik ti' k'axik qoh elik korik, eh xa re' chik i ruyub'jiik i rotob'il i Dios inqa a'n.⁵Eh re' i uy-inik inqa a'n wili, ma' re' ta sub'al qaq'iij, ruum re' Dios ruye'em pan qánima chi manlik i ruk'axb'al, re' inqik'raaj ruum i Santolaj Uxlab'al ruye'em qeh i Dios.

⁶Eh noq re' hoj ma' nqa a'n ta naq ruko'ljiik qiib chi qib'il qiib' re' i Jesucristo, paruq'ijil xk'ulik ruyee riib' chi kimik chiqiij i hoj, i hoj aj mahk.⁷Xti korik noq ma' awach taj ineeruyee riib' pankimik chi jilow jino'q i korik wach ruk'ux. Ru q'iij wilik oon wo' naq inchel ineruyee riib' pankimik chi jilow jino'q winaq q'e' atoob'.⁸Raaj i Dios reh xti xuk'uhtaaj chaloq chi q'e' qohruk'ax, ma' re' ta nkiwii' chi ko hoj naq cho aj mahk, xuyeew la' cho chi kimik i Jesucristo quum i hoj.⁹Eh yu'naak hoj chik ko'limaj chuwach i mahk ruum i ti'laj kimik xuk'ul i Jesucristo. Ruum aj re', parub'ihnaal i reh, na qako'ljiik chuwach i rujosq'iil i Dios.¹⁰Re' hoj, noq ko nqixowaaj naq cho wach i Dios, re' reh xojruk'am ruuk' panotob'il ruuk' i rukimiik i Rak'uun. Mi kore' ta chik i yu'naak ma' nee qoh ruk'am ruuk' i Dios panotob'il ruum hoj chik ko'limaj, ruum xk'aach wo' chik cho ruka'peech i Rak'uun.¹¹Eh ma' xata re' wili xub'an i Dios, i ruyeew la' wo' rusuqkiil qak'ux parub'ihnaal i QaJaaw Jesucristo, ruum xa re' wo' reh xkojwik qeh panotob'il ruuk' i Dios. Re' rutijiik riij i xub'an i Adán i xub'an i Jesucristo

¹²Eh xa ruum i jinaj chi peet winaq, Adán rub'ihnaal, xokik i mahk wach ak'al. Re' mahk xa xutiq chik cho riib' kuuk' i tinamit, eh ruum i re', xtohq'ik i kimik, je' re' noq chu'nchel chik kikimik, ruum chu'nchel ximahkunik.¹³Eh noq re' Dios komajaa' naq i ruyeew i najtir k'uhb'aal, xak'ahchi' wo' naq chik i mahk wach ak'al. Xa re' la', ma' kiye'ariik ta naq chutojariik i kimahk, ruum komajaa' naq chih i k'uhb'aal.¹⁴Xa re' la' re' kimik xanoq wo' xtohq'ik chaloq paruq'ijil i Adán. Eh xa ko je' wo' re' noq xye'arik cho reh i k'uhb'aal i Moisés, atoob' ta re' kimahk taqe re', ma' je' ta rukab' i ru mahk i Adán, ruum re' reh ma' xunimaj taj i xq'orarik reh ruum i Dios. Eh re' Adán i rujalwaach i xk'ulik iloq koq'uun, re' i Jesucristo.

¹⁵Eh re' mahk xub'an i Adán, ma' eliik ta wach ruuk' i qakooch xuyeew i Dios. Korik noq ruum i ru mahk i jinaj chi winaq, ma' k'isiin i xikimik. Raaj i qakooch i rusiij qeh i Dios parub'ihnaal i jinaj chi winaq, re' i Jesucristo, xti xiik' wo' chik naah nimaal wach. Eh xa ruum i reh, ma' k'isiin i naa kireqem i ko'lb'al kiib'.¹⁶Eh re' mahk xub'an i Adán, ma' eliik ta wach ruuk' i qakooch xuyeew i Dios, ruum xa ruum i jinaj chi mahk xub'an, xchalik i tojb'al mahk chikinaah i tinamit. Eh ruum i loq'laj qakooch xuyeew i Dios, ma' k'isiin tinamit xi kahnik chi ko'limaj chik taqe chuwach i mahk.¹⁷Eh wila' re' kimik xtohq'ik chaloq xa ruum i mahk xub'an Adán, xti rub'ehel chi re' Dios, ruuk' i runimaal rotob'il, xa chi siih nee rukanaa' chi ma' xta chik kimahk i naakinimaniik reh. Eh naa ruye'em kajaawriik chupaam i jinaj ak'laj k'acharik parub'ihnaal i jinaj chi winaq, re' i Jesucristo.

¹⁸Eh nik' wach noq xub'an chaloq i mahk i Adán, re' xk'amwik cho reh i tojb'al mahk chikinaah chu'nchel i tinamit, je' wo' chik re' i xk'ulik rub'an i Jesucristo ruuk' i rukorkiil wach ruk'ux, xuyeew keh i juneliik k'acharik i kinimanik reh, eh xrisaj chikinaah i tojb'al mahk.¹⁹Eh xa ruum i jinaj chi winaq ma' xnimanik taj, ma' k'isiin i xi kahnik chi aj mahk taqe. Eh re' chik i winaq jinaj reh, re' i Jesucristo, ruum chi xnimanik, ma' k'isiin i naa ruko'leem chuwach i kimahk.

²⁰Eh noq wilik chik i najtir i k'uhb'aal, ruum chi ma' xb'aan ta runimjiik, xutiq cho riib' i mahk. Eh noq yohb'aal chik wach i mahk imb'aan, xiik' chik naah i rotob'il i Dios xuyeew chaloq.²¹Eh nik' wach noq xwihik cho rajaawriik i mahk, i xk'amwik cho reh i kimik, je' wo' chik re' noq xwihik rajaawriik i rotob'il i Dios chi qako'ljiik chuwach i mahk eh naa wo' ruye'em qeh i juneliik k'acharik parub'ihnaal i QaJaaw Jesucristo. Re' noq hoj chik kamnaq chuwach i mahk, re' chik i Jesucristo inye'wik qak'achariik

¹Eh ¿chib'ih i neenqaq'or chi riij i re'? ¿Mi ko naaqa'nam i mahk, reh chi re' Dios xiik' chik naah i rotob'il nee ruyeew qeh?²Ra'j xti ma' chih ta re', ruum re' hoj, hoj chik kamnaq chuwach i mahk. Ma' nee ta chik i ruyee riib' chi neqoh-ooj chi qawach chub'anariik i mahk.³Re' taq i hat aweht'al taq chik chi ruum i ruqajiik qahaa' panha', qoh okik pan jinaj wach k'uxliis ruuk' i QaJaaw Jesucristo, eh qoh-ehtrik wo' haa' i rukimiik.⁴Eh ruum i ruqajiik qahaa' panha', qoh-ehtrik haa' i rumuhqiik i QaJaaw Jesucristo, qoh kimik chuwach i mahk. Eh qoh-ehtrik wo' haa' i ruwuktiik cho ruka'peech, je' rukab' noq xwukteesjik cho ruuk' i rajaawriik Ajaab'ees Dios, i ruk'ul chi naa qawihiik chupaam i jinaj i ak' k'acharik.

⁵Wila' xoj-ehtrik haa' i rukimiik i Jesucristo, je' wo' chik re' noq naaqehtriik haa' i wuktik chaloq chi k'achlik qawach.⁶Re' hoj qeht'al chik chi re' taqe i ma' holohik ta laj na'ojb'al inqa a'n junkojariik haa' wach kuruus xb'aan ruuk' i Jesucristo, reh chi xsahchik wach i mahk pan qánima, reh chi ma' re' ta chik i mahk neenqakamaneej wach,⁷ruum awach inkimik chuwach i mahk, ma' xta chik rajaawriik i mahk chinaah.⁸Eh wila' xoj-ehtrik haa' i hoj i rukimiik i Jesucristo, ch'iklik wo' qak'ux chi naa qak'achariik ruuk' i reh chupaam i jinaj chik ak'laj k'acharik.⁹Re' hoj qeht'al chi re' Jesucristo xwukteesjik wo' chik chaloq ruum i Dios, eh ma' jaruuj chik naa rukimiik. Re' kimik ma' xta chik rajaawriik chinaah,¹⁰Eh noq xkimik i Jesucristo, xa junriim xkimik, reh chi xusach wach i mahk. Eh noq xk'aach wo' chik cho ruka'peech, reh chik ye'b'al ruloq'il i Dios i ruk'achariik.¹¹Eh re' taq i hat chanab'eej taq chi hat taq chik kamnaq chuwach i mahk. Eh re' taq aak'achariik ye'b'al chik ruloq'il i Dios, reh chi naa taq awihiik pan jinaj wach k'uxliis ruuk' i Jesucristo.

¹²Eh maayeew taq chik q'ab' reh i mahk chi nee ruyeew i rajaawriik chinaah taq ati'jolal i xa sahchik wach reh. Eh maayeew taq q'ab' reh i mahk chi nee taq tirumin chub'anariik i ruk'ax taq wach ati'jolal.¹³Eh re' taq i hat xat kimik taq chi chuwach i mahk, xat k'aach wo' chik taq ruka'peech, ruum aj re' maa kemelej taq chik aawooq aq'ab' reh i rub'anariik i mahk. Chaq'asaj la' taq awiib' ree Dios chi manlik, reh i rub'anariik i imponik chuwach i reh.¹⁴Eh re' mahk ma' nee ta chik i ruyeew i rajaawriik taq cha naah, ruum ma' re' ta chik i najtir k'uhb'aal taq inanimaj, chi ri'sil la' i rotob'il i Dios taq chik wilkaat. Jinaj jalwaach q'orik chi riij i wihik pankowlaj kamanik

¹⁵Eh ¿chib'ih jariik i neenqaq'or? ¿Mi ruk'ul chi neenqa a'n i mahk, ruum chi ri'sil chik i rotob'il i Dios wilkooj, eh chi ma' re' ta chik i najtir k'uhb'aal inchopwik qanaah? Ra'j xti ma' ruk'ul ta chi qeh re'¹⁶Re' taq i hat aweht'al taq chi re' i ruq'asaj riib' chi kamanik ruuk' i rupatroon re' wo' re' naa runimam. Eh je' wo' re' taq ineenak'ul i hat wila' xanimaj taq i rukamaj i mahk kimik i ruk'am taq chaaweh. Eh wila' re' Dios taq xanimaj, k'acharik i ruk'am taq chaaweh.¹⁷Re' taq i hat noq xub'an, re' naq taq i mahk iminwik aweh chub'anariik i re' ma' re'. Raaj yu'naak ma' chih ta chik. Re' hin inut'iosej ree Dios chi xanimaj taq chu'nchel awánima i korik laj k'uhb'aal xk'uhtjik taq chaaweh.¹⁸Hat taq chik ko'limaj chuwach i mahk. Eh yu'naak, re' chik i korik laj k'acharik i nayeew taq ak'ux chub'aan.¹⁹Re' hin ma' pan k'ayeew ta wach q'orik k'ahchi' taq nuq'orom aweh i wili, ruum komajaa' taq neenareq chi riij. Eh noq xub'an chaloq, aq'asam naq taq chaawiib' chub'anariik i yeb'ee wach na'ojb'al, chub'anariik iraaj ma' raaj b'anarik. Je' wo' chik re' noq chaq'asaj taq awiib' yu'naak chub'anariik i korik, reh chi nee taq ti k'acharik pan santohiil chuwach i Dios.

²⁰Noq kore' naq i mahk inchopwik taq anaah, ma' nakapaaj ta naq taq rub'aan i holohik laj k'acharik.²¹Eh ¿chib'ih taq jariik i xak'ax ruuk' i rub'anariik i re' ma' re' xa a'n taq chaloq re' re'? ma' xtaj. Tik'ixik la' taq chik ruum yu'naak, ruum xareq taq chi riij chi pankimik naq taq k'ahchi' kaat ruk'amam.²²Raaj yu'naak, hat taq chik ko'limaj chuwach i mahk, parukamaj chik i Dios taq xaq'asaj awiib'. Re' wili ra'j wilik taq re' i neenak'ax ruuk', ruum ruuk' i re' naa taq areqem i santo laj k'acharik chuwach i Dios, ruum i re' ruye'ariik taq aweh i juneliik k'acharik.²³Ruum re' tojb'al i ruyeew i mahk, re' i kimik. Raaj i qakooch i ruyeew i Dios reh, re' i juneliik k'acharik naaqehtriik parub'ihnaal i QaJaaw Jesucristo, i qaj Ko'loom. Jinaj i jalwaach q'orik imb'aan chi riij i kaxáro

¹Re' taq i hat hermano, aweht'al taq chib'ih i ruq'or i k'uhb'aal. Eh inareq wo' taq chi riij chi re' k'uhb'aal re' re' xa re' wo' wilik rajaawriik chinaah i winaq noq ko k'achlik.²Re' ixoq kaxáro chik k'ulamaj wach ruuk' i rub'ahiil, wilik rajaawriik i k'uhb'aal chinaah. Raaj wila' xkimik i rub'ahiil, re' k'uhb'aal xk'ulanik wach ma' xta chik rajaawriik chinaah ixoq.³Re' ixoq neenk'amarik ruum tokoom winaq chi ko k'achlik i rub'ahiil, nee ruch'uwa'risaj wach i rukaxarohiil. Eh raaj wi xkimik i rub'ahiil, neenkahnik chi ma' xta chik rajaawriik i k'uhb'aal chinaah. Ruuk' i re', neeruyee riib' chi nee wo' chik i rub'an kaxáro, eh ma' nee ta ruch'uwa'risaj wach i rukaxarohiil.

⁴Je' wo' re' taq i hat yu'naak loq'laj hermano, xat kimik taq chik chuwach i najtir k'uhb'aal, eh ruum i rukimiik i Jesucristo tokoom chik inehchanik taq aweh. Re' chik i Jesucristo inehchanik taq aweh, re' i xwukteesjik cho ruum i Dios chi k'achlik wach. Ruuk' i re', neenqa a'n i holohik parukamaj i Dios,⁵ruum noq ko k'acharik naq inqa a'n chupaam i mahk, re' k'uhb'aal re' re' iminwik naq qeh chuk'axariik wach i yiib' wach na'ojb'al. Eh re' naq i yiib' wach inqa a'n ineesanik qeh ruuk' i Dios.⁶Raaj yu'naak hoj chik kamnaq chuwach i k'uhb'aal re' re', i xwihik cho rajaawriik chi qanaah. Eh hoj chik ko'limaj chuwach i najtir k'uhb'aal tz'ihb'amaj chaloq: Yu'naak re' chik i rukamaj i Dios inqa a'n chupaam i ak'laj k'acharik i ruyeew qeh i Santolaj Uxlab'al. Re' i mahk eh re' k'uhb'aal

⁷¿Mi neenqaq'or chi mahk chi b'anarik taqe i ruq'or i najtir k'uhb'aal? Ra'j xti ma' chih ta re', re' hin re' k'uhb'aal re' re' xk'uhtanik weh chib'ih jariik i mahk chi b'anarik. Eh ma' xweht'aliij ta naq chi ma' toob' ta ruk'axariik wach i tokoom aj eh wi ta ma' ruq'or i k'uhb'aal re' re' chi je' wili: Maak'ax wach i tokoom aj eh, inki.⁸Noq xweht'aliij chib'ih ruq'or i k'uhb'aal re' re', ar x-uhtik wach i mahk wuuk', ruum xtohq'ik nuk'axam wach ma' toob' ta naq chi k'axarik wach. Eh noq komajaa' ta nqeht'aliij i k'uhb'aal, re' mahk kamnaq naq chi qawach.

⁹Eh pampeet i hin ma' weht'al ta naq chib'ih ruq'or i najtir k'uhb'aal, xa k'acharik naq weh. Eh noq weht'aliij i ruq'or i k'uhb'aal, xutoq'aa' qopik wach i rukamaj i mahk wuuk'.¹⁰Eh re' k'uhb'aal i kimik i xuk'am cho weh i hin. Xanaah re', re' naq i k'uhb'aal re' re' naa ruye'wiik nuk'achariik, eh noq xooj kuxoq pankimik xiruyeew,¹¹ruum re' mahk, re' k'uhb'aal xkamanik reh chi jot'b'al weh. Eh re' wo' chik i k'uhb'aal xukoj noq xuk'am chaloq i kimik chi nunaah.

¹²Xti korik noq re' najtir k'uhb'aal xiik' naah loq'il, ruum ruuk' i Dios inchalik. Eh re' taqe taaq'anik i rub'an looq' wo' hoq, rub'ehel wo' hoq.¹³Eh ¿mi neerub'an chi neenuq'or chi re' i wilik ruloq'il re' re' naa ruye'wiik weh pankimik? Ra'j xti ma' chih ta re'. Ruum re' xk'amwik cho reh i kimik re' mahk, reh chi xk'utinik chi re' re' i mahk, re' i k'uhb'aal wilik naq ruloq'il xukoj noq xuk'am chaloq i kimik chi nunaah. Eh re' k'uhb'aal re' re' xk'uhtanik qeh chi xiik' naah yib'kiil wach i mahk.

¹⁴Re' hoj qeht'al chi re' najtir k'uhb'aal uxlab'imaj cho ruum i Dios. Eh re' hin xa nuna'ojb'al naq wiib'. Ruum aj re', hin naq k'ayimaj chub'anariik i mahk.¹⁵Re' hin ma' nureq ta naq chi riij chib'ih jariik i nub'an, ruum ma' re' ta chik inche nub'an aha' naq wilik inwaaj rub'aan, aha' wilik inwixowaaj naq wach, re' chik inche re' i nub'an chaloq.¹⁶Eh wila' re' i nub'an chaloq aha' naq wilik i ma' nwaaj ta naq, ruuk' i nub'an cho re' re', inureq wo' naq chi riij chi re' k'uhb'aal ma' xta reet i ruq'or.¹⁷Je' re' noq, ma' re' taj i hin kinb'anik naq cho reh i yiib' wach na'ojb'al, re' la' i mahk inchopwik naq nunaah iminwik cho weh chub'aan,¹⁸ruum re' hin weht'al chi ma' xtaj i holohik i nub'an naq. Re' la' i mahk i ruk'ax wach i nuti'jolal i nub'an chaloq. Atoob' ta nukapaaj wo' naq cho rub'aan i holohik laj, xama' xnub'an ta wo' hoq.¹⁹Xti ma' xnub'an taj i holohik laj na'ojb'al inwaaj naq rub'aan. Re' la' chik yiib' wach na'ojb'al xnub'an, re' i ma' nwaaj ta naq rub'aan.²⁰Eh wi re' xnub'an chaloq i ma' nwaaj ta naq rub'aan, ma' re' ta chik i hin kinb'anik reh, re' la' i mahk wilik cho pan wánima xminwik weh chub'aan.

²¹Re' hin i nukoj rehtaal chi je' wili i xnuk'ul: Noq inwaaj naq rub'aan i holohik laj na'ojb'al, xa re' chik i yiib' wach i rumin riib' chi nuwach.²²Eh xti mponik wo' naq rusuqkiil pan wánima i ruq'or i ruk'uhb'aal i Dios.²³Xa re' la', re' hin inwik'raaj chi wilik inq'ilwik weh chi ma' nub'an ta naq cho rukapeb'jiik i holohik chi b'anarik. Re' inq'ilwik cho weh re' re', re' i mahk wilik naq cho pan wánima, i je' naq hin ruye'em prexo.

²⁴Re' hin xti q'e' naq ti' wilkiin cho wii'. Eh ma' nureq ta naq chi riij awach naa ruko'liniik weh chuwach i kimik.²⁵Re' hin inut'iosej reh i Dios chi riij i QaJaaw Jesucristo. Ruum yu'naak, xnureq chik chi riij chi ruk'ul chi naa nunimam i ruk'uhb'aal i Dios. Xa re' la' chik imb'anik wee hin, re' i nuti'jolal i ruk'laa' wo' naq chik i mahk. Re' holohik laj k'acharik iraaj i Ruxlab'al i Dios

¹Je' re' noq yu'naak, ma' xta chik i tojb'al mahk chikinaah i wilkeeb' ruuk' i Jesucristo. Re' taqe i ma' k'acharik ta chik inki a'n je' rukab' iraaj i kiti'jolal, k'acharik la' chik inki a'n je' rukab' iraaj i Santolaj Uxlab'al,²ruum re' i rajaawriik i Santolaj Uxlab'al inye'wik k'acharik parub'ihnaal i Jesucristo, qoh ruko'leej chuwach i rajaawriik i mahk, je' wo' chuwach i kimik.³Eh re' i ma' xub'an ta rub'aan i najtir k'uhb'aal ruum ma' xta rajaawriik chub'aan. Ruum aj re', re' i Dios xutaq'aaj chaloq i Rak'uun chi je' ruwii' winaq aj mahk. Eh xuyeew panti' k'axik i Rak'uun chi jilow mayiij reh i rutojariik riij i mahk, reh i rusachariik wach i mahk i ruk'ax wach i qati'jolal.⁴Re' Dios je' re' i xub'an ruuk' i Rak'uun, reh chi naa qa'nam i korik je' rukab' i ruq'or i k'uhb'aal. Re' i hoj i ma' k'acharik ta chik inqa a'n pamahk je' rukab' inqaaj i hoj. K'acharik la' chik inqa a'n je' rukab' iraaj i Santolaj Uxlab'al.

⁵Eh re' taqe i k'ahchi' keeb' aha' wilik i ruk'ax wach i kiti'jolal, xa re' wo' re' inkikapaaj rub'aan. Eh re' taqe i k'ahchi' keeb' aha' wilik iraaj i Santolaj Uxlab'al, xa re' wo' re' inkikapaaj rub'aan.⁶Eh re' rub'anariik i ruk'ax wach i ti'jolal, kimik i ruk'am chaloq. Eh re' i rub'anariik iraaj i Santolaj Uxlab'al, k'acharik, eh rusuqkiil k'uxliis i ruk'am chaloq.⁷Re' inkiyeew kik'ux chub'anariik i ruk'ax wach i kiti'jolal, inkixowaaj wach i Dios, ruum ma' nkaaj ta kinimam, eh ma' nee ta wo' kichol runimjiik i ruq'or i ruk'uhb'aal.⁸Re' taqe inkik'ax wach chub'anariik iraaj i kiti'jolal, ma' jaruuj neen kiyeew rusuqkiil ruk'ux i Dios.

⁹Re' taq i hat yu'naak, ma' re' ta chik taq i na a'n i ruk'ax taq wach ati'jolal. Re' la' chik taq i na a'n iraaj i Santolaj Uxlab'al, wila' wilik taq awuuk' i Santolaj Ruxlab'al i Dios. Eh awach i ma' xta ruuk' i Santolaj Ruxlab'al i Jesucristo, ma' re' ta reh i Jesucristo.¹⁰Eh wila' re' chik i Jesucristo wilik taq panawánima, k'achlik taq awánjel at'iosil, ruum re' Dios hat taq chik ruko'leem chuwach i mahk, atoob' ta re' taq ati'jolal naa rukimiik, ruum je' re' i ye'ooj cho chinaah ruum i raa' ri'sil i mahk.¹¹Eh wila' re' Santolaj Ruxlab'al i Dios, i x-uksanik cho reh i Jesucristo chi k'achlik wach, wilik taq panawánima, re' wo' chik i reh naa ruksaniik cho reh taq ati'jolal i hat chi k'achlik wach ruuk' i Santolaj Ruxlab'al wilik taq panawánima.

¹²Re' taq i hat hermano, wilik jinaj ihq ye'ooj wach qanaah taq awuuk' reh chi naaqa'nam. Xa re' la', ma' re' ta chik naaqa'nam i ruk'ax wach i qati'jolal,¹³ruum wila' re' taq i na a'n i ruk'ax wach taq ati'jolal, akimiik taq i naa areqem. Raaj wila' ruuk' i Santolaj Uxlab'al xasach taq wach i ruk'ax wach taq ati'jolal, naa taq ruwihiik ak'achariik.

¹⁴Chu'nchel i re', re' i Santolaj Ruxlab'al i Dios ink'amwik kib'eeh eh manlik taqe rak'uun rixq'uun i Dios.¹⁵Re' taq i hat, ma' awach ta chik neeminwik taq aweh chub'aan i mahk, ruum re' i Santolaj Ruxlab'al i Dios taq ak'ulum ma' re' ta yo'jik i ruk'am taq chaaweh. Re' reh inkojwik taq aweh chi rak'uun rixq'uun i Dios. Eh ruum wo' i Uxlab'al inqaq'or johtoq ree Dios chi je' wili: Hat loq'laj waJaaw, qohki reh.¹⁶Eh re' i Santolaj Uxlab'al i rub'an jinaj wach ruuk' i qánjel qat'iosil i hoj re' inq'orik reh chi hoj chik manlik rak'uun rixq'uun i Dios.¹⁷Eh ruum chi hoj rak'uun rixq'uun i Dios, naa wo' qehtriik haa' i kooch ruq'orom cho rib'iral. Re' kooch re' re', chi riij i Jesucristo naaqehtriik, wila' xti korik chi k'ahchi' qakuyum i ti' k'axik yu'naak je' rukab' i ruk'ulum chaloq i Jesucristo. Chi je' re', naa wo' qehtriik i runimaal ruloq'il. Re' i ruloq'il i Dios naa qak'ulum na' chub'an

¹⁸Re' hin i nuq'or panuk'ux chi re' taqe ti' k'axik k'ahchi' qak'ulum pan qak'achariik yu'naak xama' xta tz'aaq, ruum ma' jaruuj neeruq'at wach i ruloq'il i Dios naa qak'ulum na' chub'an.¹⁹Eh chu'nchel i rutz'uhkrisam chaloq i Dios xa kiook chik iil chi ruyub'jiik jaruuj imponik ruq'ijil chuwach i Dios noq naa ruye'em kiloq'il rak'uun rixq'uun.²⁰Re' taqe rutz'uhkrisam chaloq i Dios ma' tiklik ta chik kib'anik. Xa re' la' ma' xata pankik'ux inchalik, re' la' Dios xkananik chikinaah chi je' re'. Xa re' la' ko ye'ooj wo' q'ab' keh chi naa kiko'leem kiib',²¹korehtaal kiko'ljik chuwach i mahk i minwik keh chub'anariik i re' ma' re', je' wo' chuwach i kimik chalik reh chikinaah, reh chi naa kehtriik haa' i loq'laj ko'linik i ruyeew i Dios keh rak'uun rixq'uun.²²Re' hoj qeht'al chi chu'nchel i rutz'uhkrisam chaloq i Dios k'ahchi' kik'iik chi ti. Je' rukab' i ti' k'axik i ruk'ul ixoq noq ink'ulik ruk'ux.²³Eh ma' xata re' taqe i re' k'ahchi' kik'iik chi ti' k'axik. Je' wo' i hoj, i ye'ooj chik qeh i Santolaj Uxlab'al chi je' pee raa' ri'sil i qakooch naa qak'ulum. Inyot'ik i qánima ruum i ruyub'jiik jaruuj i rumanaa' wach i Dios chi naa kooj rukojom chi hoj manlik rak'uun rixq'uun, eh jaruuj i rujal wach i qati'jolal chi jumpech.²⁴Re' hoj, hoj chik ko'limaj xa re' la', kok'ahchi' quy-eem jaruuj i rumanaa' wach i qako'ljiik i Dios. Qaq'or chi re' hoj k'ahchi' chik qilom wach aha' wilik inquy-eej, ma' ruman ta chik chi nequy-eej.²⁵Raaj wila' re' i k'ahchi' quy-eem komajaa' ta naa qilom wach, ajwaal wach chi naa qakuyum ruyub'jiik.

²⁶Re' hoj, re' wo' i Santolaj Uxlab'al intoob'inik qeh ruuk' i ruk'isinal qak'ux, ruum re' hoj xa chi qib'il qiib' ma' qohchol ta rupahqaljiik reh i Dios chib'ih inqaaj. Eh re' i Santolaj Uxlab'al i wilik pan qánima, ruuk' i ruyot'kiil ruk'ux, i rupahqaaj i rotob'il i Dios chiqiij. Re' ma' nee ta nqa a'n ruq'orariik i hoj.²⁷Eh re' Dios ineht'alinik reh qánima, reht'al wo' hoq iraaj rupahqaam i Santolaj Uxlab'al. Ruum re' i Santolaj Uxlab'al i rupahqaaj i rotob'il i Dios chiqiij i hoj, i hoj chik santo laj raj nimaneel. Ma' k'axik ta noq qoh elik korik

²⁸Eh re' hoj qeht'al wo' hoq chi chu'nchel i chib'ih jariik wilik inkamanik chi toob'al keh i kik'axwik ree Dios, re' taqe i xusik' cho kiwach chi rak'uun rixq'uun taqe, je' rukab' i xraaj i reh.²⁹Eh re' Dios, awach taqe i xanoq wo' xreht'aliij cho kiwach chi naa kinimaniik reh, xanoq wo' taqe xupab'aa' chaloq chi naa kireqem chi je' ruwii' i Santolaj Rak'uun, reh chi re' i Rak'uun naa ruk'amwiik kib'eeh i ruk'ihaal hermano.³⁰Eh re' i xipa'ab'jik cho pampeet ruum i Dios, xuyuq'eej wo' taqe ruuk' chi rak'uun rixq'uun. Eh re' taqe i xuyuq'eej ruuk' re' re', xukanaa' taqe chi ma' xta chik kimahk, eh xuyeew q'ab' keh chi xiehtrik i ruloq'il i reh.

³¹¿Chib'ih jariik i neenqaq'or chi riij i wili? wila' re' Dios wilik quuk' chi qatoob'jiik, re' taqe i ki-ixowanik qawach ma' xta nee qoh kuchej³²Eh re' Dios ma' xuketelaaj ta wach i Rak'uun, xuyeew la' pankimik chiqiij i hoj. Eh wila' xuyeew i Rak'uun, ¿ra'j naa chik re' aha' wilik ajwaal wach chi qeh ma' nee ruyeew cho qeh parub'ihnaal i Rak'uun?³³Eh ¿awach chik neentz'aqwik kimahk i sik'ooj cho kiwach ruum i Dios? Ma' awach ta chik, ruum re' wo' i Dios xkananik keh chi ma' xta chik kimahk.³⁴¿Awach chik neen ye'wik keh pantojb'al mahk? Ma' awach ta chik, ruum re' i Jesucristo xuyeew riib' pankimik chi riij i qamahk. Eh xwukteesjik wo' chik chaloq chi k'achlik wach. Eh yu'naak wilik cho parusak'aaj q'ab' i Ajaab'ees Dios chupahqaljiik i koq i rotob'il i Dios chiqiij.³⁵Eh ¿mi wilik jino'q neenesanik qeh chuwach i ruk'axb'al i Jesucristo? Ma' awach taj, ni xata re' i ti' k'axik, ni xata re' ruti'kiil qak'ux, ni xata re' ixowaal, ni xata re' wi'jaleel, ni xata re' neb'a'il, ni xata re' yohb'aal, ni xata re' kimik.³⁶Je' rukab' i tz'ihb'amaj cho pan santo laj huuj, chi je' wili:
Re' hoj xa pankimik wo' wilkooj chu'nchel q'iij, ruum chi tiqanimaj. Je' rukab' imb'aan keh i tentzun noq kik'amarik reje pankanteesb'al inki a'n qeh, inki.

³⁷Eh ruuk' chu'nchel i ti' k'axik inqak'ul re' re', ma' k'axik ta noq qoh ik'ik chupaam, eh qoh elik korik, ruum qohrutoob'eej i Jesucristo, ixk'axwik qeh.

³⁸Re' hin weht'al chi ma' awach ta neenesanik qeh ruuk' i ruk'axb'al i Dios. Ni xata re' kimik, ni xata re' i neenqak'ul, ni xata re' taqe ánjel, ni xata re' taqe wilik kajaawriik kitaaq'anik cho panuxlab'al, ni xata re' taqe i k'ahchi' ruk'ulariik yu'naak, ni xata re' taqe naa ruk'ulariik na' chub'an,³⁹ni xata re' taqe i wilkeeb' cho pan taxaaj, ni xata re' taqe wilkeeb' wach ak'al, eh ni xata re' taqe xa chib'ih jariik rutz'uhkrisam chaloq i Dios neenkian qehteesjiik chuwach i ruk'axb'al i Dios, re' i xuk'uhtaaj qeh ruuk' i xuk'ul chiqiij i QaJaaw Jesucristo. Re' Dios xsik'wik cho kiwach taqe aj Israel

¹Re' hin i nuq'or i korik parub'ihnaal i Jesucristo, ma' kinchukwik ta q'orik. Eh re' Santolaj Uxlab'al inq'orik panuk'ux chi re' wili i korik.²Re' hin jinaj i runimaal rutz'irkiil nuwach wilik. Eh wilik i ti' inwik'raaj cho pan wánima chi eliik³chikiij taqe i was nuchaaq' eliik wach qati'jolal kuuk'. Re' hin nee naq inuk'ulaa' chi neekinye'arik panti' k'axik, ro'q ta naq neenukanaa' runimjiik i Jesucristo, ruuk' tee re' neenkireq ko'lemb'al kiib'.⁴Re' keh aj Israel taqe, re' Dios xukoj taqe chi rak'uun rixq'uun, xuk'uhtaaj wo' naq i ruloq'il keh. Re' reh xuk'uhb'alej wo' naq taqe ruuk' i najtir k'uhb'aal. Xuq'or keh nik' wach i loq'inik naa kianam, eh chi wilik i naa ruye'em keh⁵Re' keh re' wo' naq ruuk' taqe i peet cho aj nimaneel. Eh chi kixilak i keh xelik chaloq i Jesucristo xk'ulik aasjoq. Eh re' reh wilik rajaawriik chinaah chu'nchel i chib'ih jariik wilik, ruum re' reh i Dios. Re' ta naq i reh neenye'arik ruloq'il chi juneliik. Je' ta wo' naq re'.

⁶Ma' re' ta chi ma' xooj ta eloq wach i ruq'orom chaloq i Dios ruum ma' chu'nchel taj i aj Israel xinimanik reh. Ruum re' i ruq'orom cho rib'iral i Dios ma' xata keh i aj Israel, keh la' wo' taqe ma' re' ta aj Israel.⁷Eh re' Abraham ma' xq'orarik ta reh chi kuuk' ta chu'nchel i rak'uun rixq'uun i naa ruk'ihaaxb'iik i riih rumaam. Je' la' wili i xq'orarik reh ruum i Dios: Ruuk' awak'uun, Isaac, naa ruk'ihaaxb'iik taqe i awiih aamaam, i nuchjik.⁸Re' wili iraaj ruq'orom chi re' taqe rak'uun rixq'uun i Abraham ma' chu'nchel ta manlik rak'uun rixq'uun i Dios, xa re' la' wo' taqe manlik rak'uun rixq'uun i Dios aha' wilik i ruq'orom chaloq i reh,⁹ruum re' i Abraham je' wili i xq'orarik reh ruum i ruánjel i Dios: Je' yu' pan jinaj haab' naa wo' chik nuk'uliik awuuk', eh re' awehk'een, i Sara, aasjinaq chik jinaj k'isa rak'uun, na' kink'oloq i nuchjik.

¹⁰Eh ma' xata re' wili, ko wilik la' iraaj q'orarik chi riij. Re' i ki'ib' chi rak'uun i qatuu Rebeca, xa jinaj i kajaaw, Isaac rub'ihnaal, re' i xikin cho qamaam.¹¹Eh noq komajaa'-oq ki-aasjik i ki'ib' chi rak'uun i Rebeca, noq komajaa' chih i holohik i yeb'ee wach inki a'n ma' ruum taj chib'ih i holohik xkian, ruum la' chi xsik'arik kiwach ruum i Dios inki a'n i re'.¹²Eh re' Dios xuq'or reh i Rebeca chi je' wilik: Re' awak'uun naa raasjiik chi peet, raj kamanoom awak'uun naa raasjiik ko xam naa rukahniik wii', i nuchjik.¹³Eh je' wo' re' i ruq'orom chaloq i Dios, re' i tz'ihb'amaj cho pan santo laj huuj chi je' wili: Re' Jacob xti q'e' nuk'ax, eh re' Esaú ma' xnuk'ax taj, inki.

¹⁴Eh ¿mi ruum i re' neenqaq'or chi re' Dios ma' rub'ehel ta imb'anik? Ra'j ti ma' chih ta re' rub'ehel la' i rub'an,¹⁵ruum re' reh je' wili i ruq'orom cho reh i Moisés: Re' hin neenuketelaaj wach awach inwaaj nuketelaam wach panuk'ux i hin, inki.¹⁶Je' re' noq, ma' re' taj i winaq q'oreel reh chi neensik'arik wach ruum i Dios ma' ruum ta chi nee ta ruchop ruk'ux chub'anariik i xa chib'ih jariik, xa ruum la' chi nketeljik wach ruum i Dios.¹⁷Eh tz'ihb'amaj wo' pan santo laj huuj chi re' Dios je' wili i ruq'orom cho reh i kireey i aj Egipto: Re' hin xinkojwik aweh chi reey chinaah i tinamit, re' nwaaj i hin chi awuuk' i hat naa nuk'uhtaam i wajaawriik, reh chi naa ruq'orariik wib'iral chi junsuut i wach ak'al, inki.¹⁸Re' Dios neeruketelaaj wach awach iraaj ruketelaam wach paruk'ux i reh. Eh awach iraaj rukowb'isam i ránima i reh, nee wo' rukoowb'isaj i ránima.

¹⁹Eh wila' re' Dios inkowb'isanik ree ránima i winaq ¿chib'ih chik reet noq nee ruq'or reh chi wilik ru mahk, wila' ma' awach neenq'atwik wach iraaj rub'anam i Dios? tiko'q naak.²⁰¿Chib'ih awajaawriik i hat chi neenawech'uj riij ree Dios chib'ih raaj rub'anam? Chakoj rehtaal chi re' jino'q ak'al xun ma' nee ta ruq'or reh chi je' wili awach xtz'aqwik reh: ¿Chib'ih reet noq je' wili nutz'aqariik xa a'n? ma' inko'q ta reh.²¹¿Mi ma' re', re' aj tz'aqal xun wilik rajaawriik chinaah i ch'uwa'. Wila' raaj i reh, ruuk' i ch'uwa' re' re' neeruyejaa' jino'q i xun nim wach neen kamanik wii'. Eh wiraaj nee wo' ruyejaa' jino'q i xun xama' nim ta wach neen kamanik wii'?

²²Eh re' Dios je' wo' re' i rub'an. Iraaj ta ruk'uhtaam i rujosq'iil ruuk' i rajaawriik, jumehq'iil naq xuyeew taqe pantojb'al mahk awach taqe i ruk'ul chi naa ruye'em pantojb'al mahk, re' taqe i naa naq rusacham kiwach. Najt la' xukuy cho rilariik chib'ih jariik inki a'n²³Eh re' Dios xraaj wo' cho ruk'uhtaam quuk' i hoj i chi naa kooj ruko'leem, xuketelaaj qawach, eh xanoq wo' pampeet xojrupab'aa' chaloq, reh chi naa qak'achariik ruuk'.²⁴Re' Dios je' wili rusik'ariik cho qawach xub'an: Wilik i xusik' cho kiwach chi kixilak aj judío. Eh wilik xusik' cho kiwach chi kixilak i ma' re' ta taqe aj judío.

²⁵Je' rukab' i tz'ihb'amaj chaloq chupaam i ruhuuj i Oseas, re' i xuq'or i Dios chi je' wili:
Awach naq taqe i ma' re' ta nutinamiit, naa nukojom taqe chi nutinamiit. Eh awach taqe i ma' nuk'ax ta naq taqe, q'e' chik naa nuk'axam taqe, inki.²⁶Chupaam wo' ye'aab' re' re' xq'orarik keh ruum i Dios chi je' wili: Re' taq i hat, ma' hat ta taq nutinamiit, ar xq'orarik keh chi je' wili: Hat taq wak'uun wixq'uun i hin k'achlik Dios, inki.

²⁷Re' Isaías reh je' wili i xuq'or cho chikiij aj Israel: Atoob' ta xiik' naah kik'ihaal taqe rak'uun rixq'uun i Israel, je' kik'ihaal saniib' chii' palaw, xama' q'e' ta k'ih nakiko'ljiik chi kixilak,²⁸ruum re' QaJaaw naa taqe ruye'em pantojb'al mahk chu'nchel i tinamit, eh naa rub'anam chi jumehq'iil, inki.²⁹Eh re' wo' Isaías xq'orik cho reh chi je' wili: Wi ta ma' xukanaa' kiib' ixib'-oq i qak'uun qixq'uun i QaJaaw Dios nim rajaawriik, yu'naak i hoj sahchinaq naq chik qawach, je' rukab' noq xsacharik cho kiwach taqe aj Sodoma, taqe aj Gomorra, inki. Re' taqe aj judío ma' xkinimaj taj i ak' k'uhb'aal

³⁰¿Chib'ih jariik i naa qaq'orom chi riij i wili? Re' i naa qaq'orom re' chi xa ruum chi xkiyeew kik'ux chunimjiik i Jesucristo taqe i ma' re' ta aj judío xiko'ljik chuwach i mahk ruum i Dios, ro'q ta ma' k'ahchi' ta naq kikapaam rusik'ariik i ko'lemb'al kiib'.³¹Re' taqe aj Israel keh, i k'ahchi' naq kinimam i ruq'or i najtir k'uhb'aal reh chi naa naq kiko'ljiik chuwach i mahk, ma' xkireq taj i ko'lb'al kiib'.³²¿Chib'ih reet? Ma' xkireq taj, ruum ma' xkisik' taj ruuk' i ruye'ariik kik'ux chunimjiik i Jesucristo. Ruuk' la' chik inchee, runimjiik i najtir k'uhb'aal naa kireqem ko'lemb'al kiib' pankik'ux i keh. Ruuk' i xkian re' re' xiq'ehb'ik, je' xkitoxk'iij i nah kooq chuwach ab'aj toxk'b'al oqis,³³je' rukab' i tz'ihb'amaj cho pan santo laj huuj, chi riij i Jesucristo, re' xuq'or i Dios chi je' wili: Re' hin jinaj ab'aj inanukojom ar Sión. Awach i ma' naa ta runimaniik reh je' naa naruutoxk'iim i rooq chinaah. Eh awach i naa runimaniik reh, naa ruye'ariik reh i q'orooj rib'iral reh, inki.

¹Hat taq nuhermano, re' hin q'e' naq inwotow pan wánima, eh i nupahqaaj reh i QaJaaw Dios chi re' taqe i aj Israel neenkireq i ko'lemb'al kiib'.²Re' hin i nuq'or i korik chi re' keh q'e' wo' naq inkaaj rub'anariik iraaj i Dios. Xa re' la', xama' nkireq ta wo' chi riij nik' wach rub'anariik.³Re' keh ma' nkinimaj taj chi re' Dios ineesanik iloq reh i mahk paránima. Eh xa chi kutkeel naq inkaaj kisik'im i ko'lemb'al kiib'. Eh ma' inkaaj ta kianam i korik i ruq'or i Dios.⁴Xanaah re', re' i ruq'or i najtir k'uhb'aal ar xk'ulik kuxoq wach i noq xk'ulik i Jesucristo, reh i kiko'ljiik awach taqe inkiyeew kik'ux chunimjiik.

⁵Eh re' Moisés je' wili rutz'ihb'aam cho chi riij i k'uhb'aal: Re' naa ruko'ljiik, koruman chi naa rub'anam chu'nchel i ruq'or i k'uhb'aal. Ruuk' i re', naa ruwihiik ruk'achariik, inki.⁶Raaj i ko'linik iib' chuwach i mahk xa ruum i ye'ej k'uxliis chunimjiik i Dios, je' wili i ruq'or: Maa q'or i hat chi je' wili: ¿Awach ineenjohtik pan taxaaj chuq'orob'jiik i Jesucristo? mat ko'q taq, (ruum re' q'orik re' re', je' naa qahteesb'al wo' chik cho reh i Jesucristo)⁷Eh maa q'or wo' taq chi je' wili: ¿Awach ineenqajik qohoq pankijuleel kamnaq? mat ko'q taq, (ruum re' q'orik re' re', je' naa kore' naa ruktiik chaloq i Jesucristo) inki.⁸Eh pan santo laj huuj je' wili ruq'or: Re' ruq'oral i Dios ma' najt ta taq awuuk' wilik chi aachii' taq wilik, eh panawánima taq wilik, inki. Re' wili chi riij i ye'ej k'uxliis chunimjiik i Jesucristo inq'orik re' k'ahchi' qaq'orom rib'iral i hoj yu'naak.⁹Wila' re' hat xaq'or ruuk' aachii' chi re' Jesucristo i QaJaaw, eh wi xanimaj chu'nchel awánima chi re' Dios x-uksanik cho reh i Jesucristo chi k'achlik wach, naa areqem ko'lemb'al awiib'¹⁰Eh ajwaal wach chi chu'nchel i ánima naa runimjiik chi re' Dios inko'linik chuwach i mahk, eh ruuk' chi'is inq'orarik rib'iral i Jesucristo, reh chi neenkan i ko'lemb'al iib'.

¹¹Eh i ruq'or wo' chi je' wili pan santo laj huuj: Awach i ruyeew ruk'ux chunimjiik i reh, ma' nee ta inchukarik reh i q'orik, naa la' ruye'ariik reh i q'orooj rib'iral reh, inki.¹²Ruum re' Dios xa jinaj wach kilariik i rub'an, chi je' taqe aj judío, chi je' taqe ma' re' ta aj judío, ruum xa jinaj chi QaJaaw inehchanik keh. Eh awach taqe inkipahqaaj i rotob'il i Dios, i ruyeew wo' cho keh,¹³ruum pan santo laj huuj je' wili ruq'or: Chu'nchel i neenkipahqaaj kuyb'al kimahk parub'ihnaal i QaJaaw naa kireqem ko'lemb'al kiib', inki.

¹⁴Eh ¿nik' wach noq neenkipahqaaj kuyb'al kimahk wila' komajaa' inkinimaj? Eh ¿nik' wach noq neenkinimaj wila' ma' awach aj uuk' kib'iram rib'iral? Eh ¿nik' wach noq neenkib'iraj rib'iral wila' ma' awach inq'orik keh i ruk'uhb'aal i QaJaaw?¹⁵Eh ¿nik' wach noq nee kiooj chuq'orariik rib'iral i k'uhb'aal wila' ma' awach xtaaq'anik reje keh? Je' rukab' i ruq'or pan santo laj huuj chi je' wili: Ma' k'isiin ta loq'il noq awach inooj chuq'orariik rib'iral i ak' k'uhb'aal, re' inye'wik rusuqkiil k'uxliis inki.

¹⁶Xa re' la' ma' chu'nchel ta nkaaj runimjiik i ak' k'uhb'aal ree ko'lemb'al iib'. Je' rukab' i rutz'ihb'aam cho paruhuuj i Isaías chi je' wili: Jaaw, ma' awach taj iraaj runimam i k'uhb'aal k'ahchi' qaq'orom rib'iral, inki.¹⁷Eh xa ruum ib'irinik imb'aan inchoparik k'uxliis chi nimanik. Eh re' inib'irjik re' wo' ruk'uhb'aal i Jesucristo.

¹⁸Re' hin inupech'uj chi je' wili: ¿Mi korik ta wo' hoq chi ma' xkib'iraj taj i ruk'uhb'aal i Dios i aj Israel? Ma' korik taj, ruum pan santo laj huuj i ruq'or chi je' wili:
Re' taqe q'orol reh i ruk'uhb'aal i Dios xa aha' ta chik yuuq' ma' xi ponik chuq'orariik, korehtaal xkib'iraj i tinamit sut i wach ak'al, inki.¹⁹Eh inupech'uj wo' chik chi je' wili: ¿Mi ma' ta wo' xkireq cho chi riij i wili aj Israel? Re' Moisés xuq'or cho keh pampeet i xuq'or i Dios chi je' wili: Re' hin naa taq nuye'em ru kaqiil wach ak'ux chikiij i ma' re' ta naq taqe nutinamiit. Eh naa wuksam cho wach aajosq'iil chinaah jinaj tinamit i ma' nkaaj ta kireqem chi riij i nuk'uhb'aal, inki.

²⁰Re' Isaías xuq'or wo' chi je' wili:
Re' taqe i ma' k'ahchi' ta naq kiin kisik'im re' chik i keh xireqwik weh. Eh xnuk'uhtaaj wo' wiib' keh taqe i ma' kinkikapaaj ta naq, inki Dios, inki.

²¹Eh chikiij i aj Israel, je' wili xuq'or: Eliik wo' naq he'lik i nuq'ab' chi kuyub'jiik taqe tinamit i ma' kinimanik taj, eh yiib' wach i kina'ojb'al, inki Dios, inki. Re' tinamit Israel sik'ooj cho kiwach ruum i Dios

¹Re' i hin inupech'uj chi je' wili: ¿Mi xuq'eb' chi riij ruk'ux i Dios chi jumpech i rutinamiit? Ra'j xti ma' chih ta re', Chawil taq i hin, hin wo' aj Israel, hin cho riih rumaam Abraham, hin aj pan tinamit Benjamín.²Re' Dios ma' xuq'eb' ta chi riij ruk'ux i rutinamiit ruum xanoq wo' pampeet rusik'im cho kiwach. ¿Mi aweht'al taq re' hat i ruq'or pan santo laj huuj chi riij i Elías jalal ruq'oral i Dios? Xujal ree Dios i parutiij xkian i aj Israel, je' wili i xuq'or:³QaJaaw Dios, re' taqe aj Israel kuxik kikansam taqe jalal aq'oral. Eh xkiyoj taqe a-artaal, ach wo' re' hin k'achalkiin, eh kinkaaj wo' kiin kikansam hin, inki.⁴Eh re' Dios je' wili i xuq'or reh: Re' hin ko wuquub' miil chik chi winaq i xnukanaa' iloq chi looq'en weh. Re' taqe i ma' xkixuk'aa' ta kiib' chulooq'jiik i tiyoox, Baal, inki.⁵Je' wo' re' yu'naak i re' Dios kokiib' ixib' chik i xukanaa' iloq, re' rusik'im cho kiwach chi kixilak i aj Israel ruuk' i rotob'il.⁶Re' keh xa ruum i rotob'il i Dios xsik'arik cho kiwach, ma' ruum taj i kia'nam kiq'orom chaloq. Sik'arik la' cho kiwach ruum re' i Dios xti korik chi q'e' atoob'.

⁷Re' taqe i aj Israel ma' xkireq taj i ko'lemb'al kiib' i k'ahchi' kisik'im. Eh re' taqe i sik'ooj cho kiwach ruum i Dios, ra'j xkireq re' i ko'lemb'al kiib'. Eh re' chik taqe junch'uq xkikowb'isaj i kánima,⁸je' rukab' i ruq'or pan santo laj huuj chi je' wili: Re' taqe re' xikanab'jik ruum i Dios chi ma' xkireq ta chi riij i korik, eh chi je' ma' ki ilwik taj, chi je' ma' ki-ib'irinik taj. Eh je' re' xi kahnik chi jumpech, inki.⁹Eh re' reey David je' wili i xuq'or cho parutiij: QaJaaw Dios, re' kininq'iij i tinamit wili nee ta naq inasutej chi q'eb'al keh, eh chi q'eb'al kiib' reh chi nee taqe nayeew chi tojariik i kimahk.¹⁰Eh nee ta naq nakanaa' chi je' b'urlik inaq'kiwach, reh chi ma' nee ta ki-ilwik. Eh nee ta nakanaa' taqe chi je' k'utz k'utz kijurub' chi ri'sil i kimahk, inki. Re' kiko'ljiik taqe i ma' re' ta aj judío xub'an i Dios

¹¹Re' hin inupech'uj chi je' wili: ¿Mi xiq'ehb'ik chi jumpech i aj judío noq ma' xkinimaj taj i Jesucristo? Ra'j xti ma' chih ta re'. Ruum la' i kiq'etwachiil taqe aj judío, xkireq ko'lemb'al kiib' taqe i ma' re' ta aj judío. Reh chi re' taqe i aj Judío naa kaajwaam runimjiik i Jesucristo.¹²Eh wila' ruum i chi ma' xinimanik taj i aj Judío xchalik otob'il chinaah i tinamit. Eh wila' ruum i re' xkinimaj i Jesucristo i ma' re' ta taqe aj judío, ra'j naa chik ma' neen kik'ul re' i rotob'il i Dios taqe aj judío noq neenkinimaj i Jesucristo.

¹³Eh re' taq i hat, i ma' hat ta taq aj judío, inwaaj k'utaaj taq awuuk': Ruum re' Dios xtaaq'anik reje weh chuq'orariik i ruq'oral taq aweh, re' hin i nuyeew rajaawriik i rukamaj ruye'em chi nunaah.¹⁴Chi je' re', chi xilak i nutinamiit aj judío eliik wach qati'jolal kuuk', neel oon naq i ruq'or kik'ux runimjiik i Jesucristo je' rukab' i runimjiik k'ahchi' taq kaat i hat, reh chi neenkireq ko'lemb'al ree kánima.¹⁵Eh wila' ruum chi ma' xikojarik ta paruman taqe aj judío xkian i okik panotob'il ruuk' i Dios taqe ma' re' ta aj judío. ¿Ra'j naa chik ma' xiik' naah loq'il re' wila' re' taqe i aj judío naakiko'ljiik ruum i Dios? Re' k'acharik inki a'n chi je' kamnaq naa kireqem i juneliik k'acharik.

¹⁶Wila' looq' chuwach i Dios i peet kaxlanwi'k inehteesjik iloq ruuk' i q'oor, looq' wo' chu'nchel i ruqox chuwach i reh. Wila' looq' chuwach i Dios i raa' jino'q i chee', looq' wo' chuwach chu'nchel i q'ab' i chee'.¹⁷Re' taqe aj judío, i ma' xkaaj ta runimjiik i Jesucristo, xb'aan keh je' rukab' noq inyok'arik iloq i q'ab' i ruche'el i til olivo. Eh noq xanimaj taq i Jesucristo i hat, i ma' hat ta taq aj judío, xb'aan taq aweh je' rukab' noq inlecheb'jik i koq i tokoom olivo chuwach i xti til olivo.¹⁸Re' taq i hat, maaq'or chi nim taq awach chikiwach i aj judío, re' taqe i je' raa' til olivo. K'oloq taq panak'ux noq ma' re' ta taq i hat i raa' ri'sil i nimanik, xa je' la' taq hat q'ab' i olivo. Re' i olivo ma' re' taj i q'ab' inye'wik ruk'achariik i raa', re' la' i raa' inye'wik ruk'achariik i q'ab'.

¹⁹Re' taq i hat neena naq'or taq chi je' wili: Aha' wilik taqe aj judío, i je' kiyok'arik q'ab' ruche'el olivo xb'aan, re' chik i hoj naa qakahniik chi kijilow, tiko'q naa taq.²⁰Hoo', je' re' xb'aan keh, ruum ma' xkinimaj taj i Jesucristo. Eh re' taq i hat xa ruum chi nachop taq ak'ux wilkaat taq chi manlik. Eh ma' ruk'ul ta chi nee taq inanimb'isaj awach, chayohleej la' taq i Dios.²¹Eh wila' ma' xkuyarik kimahk ruum i Dios taqe aj judío, i je' taqe q'ab' til olivo, ma' nee ta wo' rukuy taq amahk i Dios i hat wila' xaq'ehtaaj taq awiib' chuwach.

²²Chawil taq re', re' Dios xiik' naah i rotob'il, eh xiik' wo' naah i rujosq'iil, xuk'uhtaaj cho chikinaah i ma' xkaaj ta runimjiik i Jesucristo. Eh awuuk' taq i hat q'e' atoob'. Re' rotob'il re' re' eliik naa ruwihiik taq awuuk' wila' xak'am taq naah. Eh wila' xakanaa' wo' chik taq i runimjiik i Jesucristo, ma' naa ta taq kaat rukojom paruman.²³Eh wila' re' taqe aj judío xkijal wach i kina'ojb'al nee wo' naq chik kikojariik paruman. Nee naq imb'aan keh je' rukab' noq inlecheb'jik i koq i q'ab' i ruche'el olivo chuwach i runimaal, re' Dios wilik rajaawriik chi kikojariik paruman.²⁴Wila' re' taq i hat, i ma' hat ta taq aj judío, xanimaj taq i Jesucristo. Xb'aan taq aweh i je' rukab' noq inlecheb'jik i koq i q'ab' i tokoom olivo chuwach i ruche'el i til olivo. ¿Ra'j naa chik re' taqe aj judío ma' neekikojariik paruman ruum i Dios wila' xkinimaj i Jesucristo? Re' keh nee wo' imb'aan keh je' rukab' noq inlecheb'jik i koq q'ab' i til olivo chuwach i runimaal. Kora'j naakiko'ljiik chi manlik re' taqe aj judío

²⁵Re' hin hermano, ma' inwaaj taj chi ma' nee ta taq inanab'eej aha' wilik i ma' eht'alimaj ta naq chaloq, reh chi ma' nee ta taq inaq'or chi wilik taq ana'ojb'al cha wib'il awiib': Re' taqe aj judío k'ih taqe i ma' xkaaj ta runimjiik i Jesucristo, kore' naakinimaniik noq okinaq-oq chik taqe chunimjiik i Jesucristo i ma' re' ta taqe aj judío.²⁶Eh ma' k'isiin taqe aj judío naakiko'ljiik, ruum je' wili i ruq'or pan santo laj huuj:
Re' aj Ko'loom pan tinamit Sión naa ruchaliik, eh re' reh naa resaniik reh i yiib' wach na'ojb'al wilik pan kánima taqe aj judío.²⁷Re' i nuyejaam cho wach kuuk' naa rojiik eloq wach noq naa wesam i mahk wilik pan kánima, inki.

²⁸Re' taqe aj judío, ma' xkaaj ta kinimam i ak' k'uhb'aal, xi kahnik chi aj ixowan wach i Dios. Reh chi xye'arik q'ab' taq aweh i hat chi xanimaj taq i Jesucristo, i ma' hat ta taq aj judío. Atoob' ta nkixowaaj wach i Dios taqe aj judío, ko najawjik wo' kiwach yu'naak, ruum xanoq wo' pampeet sik'ooj cho kiwach i kimaam kati't.²⁹Eh aha' wilik i ruyeew i Dios, ma' nee ta chik i ruq'uch ruka'peech. Eh ma' nee ta wo' i rusutej chi riij i ruq'oral awach iraaj rusik'im wach paruk'ux i reh.

³⁰Chawil taq i hat, i ma' hat ta taq aj judío, ma' nawaaj ta naq taq animam i Dios najtir. Raaj yu'naak, noq xkiq'etwachej kiib' taqe aj judío chunimjiik i Dios, re' chik taq i hat xuketelaaj chaawach.³¹Re' taqe aj judío keh, xik'u'loq ayu' chi ma' nkaaj ta kinimam i Dios. Reh chi re' chik taq i hat xuketelaaj taq chaawach i Dios. Eh je' wo' chik re' noq naa ruketeljiik kiwach i keh yu'naak.³²Re' Dios, chu'nchel xuyeew q'ab' keh chi xkikowb'isaj i kánima. Je' re' xb'aan keh ruum i Dios, re' raaj i reh chi junketeljiik wo' chik kiwach naa rub'anam.³³Xti Yohb'aal inche wach i rotob'il i Dios, re' i runa'ojb'al i rukapeew ma' awach neenreqwik chi riij. Ma' awach ta i neerub'an ruch'ob'ariik rub'ehel i ruyejaa' wach. Eh ma' awach ta neenreqwik chi riij i rub'an i reh.³⁴Ruum aj re', je' wili i ruq'or pan santo laj huuj: ¿Mi wilik jino'q ineht'alinik reh i wilik cho paruk'ux i QaJaaw Dios? Eh ¿mi koruman chi wilik neenkojwik runa'ojb'al?³⁵¿Mi wilik sihwinaq cho chib'ih reh i QaJaaw Dios, reh chi neenye'arik jilow reh ruum i reh? inki.³⁶Ruum chu'nchel i chib'ih jariik wilik, re' wo' Dios xtz'uhkrisanik cho reh, re' wo' reh i ehchan reh, re' reh inye'wik reh, nee ta naq inye'arik ruloq'il i Dios chi juneliik Je' ta wo' naq re'. Re' aj nimaneel inchol ruq'asam i ruk'achariik ree Dios chi korik

¹Je' re' noq i hat taq loq'laj hermano, re' hin i nupahqaaj taq otob'il aweh parub'ihnaal i Dios inketelinik wachiis, chi chaq'asaj taq awiib' chi k'achlik mayiij, santohimaj je' rukab' imponik chuwach i Dios. Re' i wili i korik laj loq'inik taq naa a'nam.²Eh maa a'n taq chik aweh i yiib' wach na'ojb'al imb'aan wach ak'al. Chajal la' taq wach akapeew, reh, chi nee nooj jaljoq wach taq ak'achariik, eh nee taq inooj areq chi riij aha' wilik iraaj i Dios. Eh nee taq i na a'n rub'aan, imponik chuwach i Dios, je' wo' hoq i korik.

³Re' Dios ruuk' i rotob'il xuyeew chi nunaah i kamanik wili, reh chi naa nuq'orom taq aweh chawuncheel chi ma' ta naq awach jino'q taq aweh ineerukapaaj chi xiik' naah nimaal rajaawriik. K'acharoq la' parukorkiil re' q'oreel i runa'ojb'al ye'ooj reh ruum i Dios ruuk' i nimanik k'ahchi' rub'anam.⁴Chakoj taq rehtaal re' qati'jolal xa jinaj noq wilik, eh k'ih wach ruchopom wii' riib'. Eh re' taqe re', reh reh wach kikamanik wii' chi kiju'junaal.⁵Je' wo' re' noq wilkooj i hoj. Atoob' ta xiik' naah qak'ihaal, xa je' la' jinaj chik qati'jolal noq wilkooj ruuk' i Jesucristo. Ruuk' i re', qohkahnik chi xa jinaj chik qawach chiquncheel, je' rukab' noq wilik i qati'jolal.

⁶Re' Dios, xa reh reh wach i rukamaj xuyeew qeh chi qaju'junaal re' q'oreel chi jariik i ruk'ul chi qeh. Je' re' noq, wila' xuyeew qeh i Dios chi naa qaq'orom i ruk'uhb'aal, qa a'n ruq'orariik re' q'oreel i rukowiil qak'ux chi nimanik.⁷Wila' xuyeew qeh chi naa qatoob'eem tokoom, qa a'n wo' hoq. Awach i ye'ooj reh chi naa rub'anam i tijinik, chub'an wo' chu'nchel ruk'ux.⁸Awach i ye'arik reh ye'ej rukowiil k'uxliis, chub'aan wo' hoq. Awach i ye'ooj reh chi naa rusihim chib'ih reh i ras ruchaaq', marupixpuuj wach. Awach i ye'ooj rajaawriik chi k'amal b'eeh, chub'an wo' hoq. Awach i ye'ooj reh chi naa rutoob'iniik suq-oq ruk'ux chub'anariik. Re' i ruk'ul chi naa kianam taqe aj nimaneel

⁹Eh xti korik-oq taq aweh i k'axooj cha a'n. Eh chaq'eb' taq chi riij ak'ux i yiib' wach na'ojb'al, re' chik i holohik laj na'ojb'al taq cha a'n.¹⁰Re' taq i hat inchol taq ak'axam awiib' chawach je'-oq taq jinaj atuut awajaaw. K'ul taq chawaaj awiib', eh k'ul wo' taq chakoj awiib' chawach.¹¹Maak'ay taq wach rub'anariik i rukamaj i QaJaaw, xti chu'nchel-oq la' taq ak'ux chub'anariik.¹²Xa suq-oq taq ak'ux chi ruyub'jiik i naa taq ruye'em aweh i Dios. Chakowej taq ak'ux chukuyariik ti' k'axik. Eh maakanaa' wo' taq rub'aan atiij.¹³Eh chatoob'eej wo' taq ruuk' i kineb'a'il taqe i re' ruuk' i rutinamiit i Dios. Eh chak'ul wo' taqe cho panotob'il wila' xiooj k'oloq taq chawula'jiik.¹⁴Chapahqaaj taq i rotob'il i Dios chikiij i ki-ixowanik taq awach, ma' re' ta kib'ajariik taq naa a'nam i hat.¹⁵Suq-oq taq ak'ux haa' i hat kuuk' i suq kik'ux. Eh tioq'oq taq haa' i hat kuuk' i oq'ik inki a'n ruum i ruti'kiil kik'ux.¹⁶Tik'acharoq taq pan jinaj wach k'uxliis chawach. Mo'q xa nim taq awach neena a'n awiib'. Jinaj-oq la' taq awach kuuk' i xama' nim ta kiwach. Eh maa kapaaj taq chi wilik taq ana'ojb'al cha wib'il awiib'.

¹⁷Eh wila' awach xb'anik ti' k'axik taq aweh, maaq'aj taq wach reh. Chayeew la' taq ak'ux chuk'uhtjiik i holohik laj na'ojb'al chikiwach chu'nchel taq aawas achaaq'.¹⁸Re' taq i hat, ko aha' pa' ruyee riib' taq chawach, cha chop taq ak'ux chi k'acharik pansuqkiil k'uxliis chi kixilak taqe aawas achaaq'.¹⁹Re' taq i hat loq'laj hermano, maaq'aj taq wach i neenb'aan taq aweh. Chakanaa' la' taq chi re' Dios nee ruyeew i chee rujosq'iil, ruum tz'ihb'amaj chaloq chi je' wili i ruq'or i Dios: Re' hin naa nuq'atwiik q'orik chinaah i ju'jun. Eh re' hin naa nuq'ajwiik wach reh i rub'an, inki.²⁰Je' re' noq wila' re' i nixowanik awach inuhmik, chayeew ruwa', wila' chiqiij chii', chayeew ruhaa'. Wila' je' re' i xa a'n reh ma' k'isiin ta neenchalik rukaaqb'iik i wach ruum i ruk'ixiik.

²¹Eh maayeew taq q'ab' reh i yiib' wach na'ojb'al chi nee ruq'at taq awach, chaq'at la' taq wach i reh ruuk' i rub'anariik otob'il.

¹Hermano, re' taq i hat chawunchelaal inchol taq animam taqe q'atal q'orik kojooj chinaah i tinamit, ruum chu'nchel i q'atal q'orik re' wo' Dios inkojwik keh. Eh awach taqe i ye'ooj pan kiye'aab' chi q'ataj q'orik, re' wo' Dios inye'wik q'ab' keh.²Awach taqe i ma' nkaaj ta kinimam inkiq'or i q'atal q'orik, ma' k'ahchi' ta kinimam i rukanaam i Dios. Eh re' taqe i ma' kinimanik taj, naakiye'ariik chi tojariik i kimahk.³Re' taqe q'atal q'orik ma' re' ta yohb'isan keh i ma' xta kimahk, xa re' la' wo' taqe i wilik kimahk inkiyohb'isaj. Wila' re' taq i hat inawaaj chi ma' nee ta taq tikiyohb'isaj taqe q'atal q'orik, ti k'acharoq taq parukorkiil, eh re' keh neekiq'orik chi holohik taq ana'ojb'al,⁴ruum re' keh parukamaj i Dios wilkeeb', reh chi neenkian otob'il taq aweh. Raaj wila' yiib' taq wach tib'anik, ra'j ti yo'joq taq re', ruum re' taqe q'atal q'orik xti korik chi neenkian ti' k'axik taq aweh, ruum re' keh parukamaj i Dios wilkeeb', reh chi neen kiyeew chutojariik i kimahk i yiib' wach kina'ojb'al.⁵Je' re' noq, ajwaal wach kinimjiik taqe q'atal q'orik, ma' xata ruum chi kiye'wik pantojb'al mahk, ruum la' rukapeewjiik riij chi ajwaal wach chi naa kinimjiik.⁶Ruum wo' re', i na a'n taq i tooj, ruum re' taqe q'atal q'orik raj kamanoom i Dios noq wilkeeb', eh xa re' wo' re' i kikamaj chu'nchel q'iij.⁷Je' re' noq, chatoj taq chu'nchel aak'aas. Aha' wilik iraaj tojarik riij, chatoj taq riij. Eh awach iraaj nimjik, cha nimaj taq, eh chayeew wo' taq kiloq'il.

⁸Eh mo'-oq awach aj uuk' neen wihik taq ak'aas. Re' taq aak'aas i hat, re' chi k'ul taq naa ak'axam awiib' chawach, ruum awach inkik'ax i kas kichaaq', xkinimaj chik taqe i ruq'or i najtir k'uhb'aal.⁹Re' taqe k'uhb'aal je' wili ruq'or: Maa ch'uwa'risaj wach aakaxaro, maakansaj aawas achaaq', maak'ax wach chib'ih reh aawas achaaq', inki. Eh re' k'uhb'aal wili, ruch'ihil i k'uhb'aal junch'uq chik, inooj eloq chi xa jinaj wach i ruq'or, je' wili ruq'or: Chak'ax taq aawas achaaq' je' rukab' noq inak'ax taq awiib' i hat, inki.¹⁰Awach i wilik k'axooj ruuk', ma' xtaj i yiib' wach neerub'an reh i kas ruchaaq'. Awach i wilik k'axooj ruuk' k'ahchi' rub'anam i ruq'or i najtir k'uhb'aal.

¹¹Ruuk' taqe i kore' xqaq'or wili, nee taq inakoj rehtaal chi jariik taqe ruk'axkiil i q'iij wilkooj wii'. Eh chanab'eej taq noq manlik i wirik xqa a'n, na'lojoq qeh, ruum re' Dios xailook' chik i rumanaa' wach qako'ljiik, ma' je' ta rukab' noq xqanimaj chaloq i k'uhb'aal pampeet.¹²Eh chi qeh i hoj je' ach k'isiin ma' nsaq'ik, ach k'isiin ma' nqilow wach i saqum. Ruum aj re' qakanaa' rub'aan i yiib' wach na'ojb'al, re' i ruk'am chaloq i q'equm. Re' la' chik qa a'n i holohik laj na'ojb'al, i ruk'am chaloq i saqum. Qatiq'aa' taq qiib' chi korik.¹³Eh qoh k'acharoq taq chi je' rukab' i wihik parusaqumaal i q'iij. Maan qa a'n i xohk'rik, maan qa a'n i ninq'ijinik. Eh maan qa a'n i k'oyomal, maan qa a'n i ma' tob'laj tuskil. Maan qa a'n i peleto, i kaqwachiil.¹⁴Re' taq i hat, inchol taq a tiq'aam awiib' chi korik ruuk' i ruk'uhb'aal i QaJaaw Jesucristo. Eh maa a'n taq chik i yiib' wach na'ojb'al i ruk'ax taq wach ati'jolal. Maach'olej taq aahermano

¹Re' taq i hat, chak'ul taq cho chi korik taqe aahermano komajaa' ta kow kik'ux. Eh matoq'aa' taq awech'um riij keh inkiq'or,²ruum wilik taqe i kikapeb'inik reh chi xa chu'nchel neen k'uxarik. Eh re' taqe i komajaa' ta kow kik'ux, inkikapaaj chi xa re' i chaaj i ruk'ul chi neenkik'ux.³Awach i xa chu'nchel i k'uxb'al wi'k ruk'ux, ma' ruk'ul ta chi neenkixowaaj wach i tokoom. Eh awach i xak'utlik wach i rik'ux, ma' ruk'ul ta chi neeruch'olej i xa chu'nchel rik'ux, ruum re' Dios xukoj wo' taqe chi rak'uun rixq'uun i kik'uxwik reh taqe re'.⁴¿Chib'ih awajaawriik i hat chi nee nakoj ru mahk aahermano ruuk' i xa chib'ih jariik i ruk'ux? Re' reh, re' wo' Dios inehchanik reh. Re' i hat ma' xta nawaaj reh mi holohik oon ma' holohik taj i rub'an, re' la' Dios nim rajaawriik neentoob'inik reh chi ma' nee tanq'ehb'ik.

⁵Eh Wilik wo' taqe i hermano kiq'orik reh chi xa k'utlik wach i q'iij wilik ruloq'il. Eh wilik wo' chik kiq'orik reh chi xa eliik wach ruloq'il chu'nchel i q'iij. Eh aha' wilik i ma' xta reet noq i rukapaaj i ju'jun, ch'iklik-oq ruk'ux ruuk' i k'ahchi' runimam.⁶Eh re' taqe inkiyeew ruloq'il jino'q i q'iij, inki a'n chi loq'oomb'al reh i Dios. Eh re' taqe i xa chu'nchel i k'uxb'al wi'k inkik'ux, inki a'n chi loq'oomb'al reh i Dios, eh reh wo' Dios inkit'iosej. Eh re' taqe i ma' chu'nchel taj i k'uxb'al wi'k inkik'ux, inki a'n wo' chi loq'oomb'al reh i Dios, eh inkit'iosej wo' reh i Dios.

⁷Ma' jino'q qeh i hoj xa re' reh q'oreel chinaah i ruk'achariik, eh ni xata re' reh q'oreel chinaah i rukimiik.⁸Eh wila' ko k'achalkooj, hoj reh QaJaaw. Eh wila' xoj kimik xa hoj wo' reh QaJaaw. Je' re' noq, atoob' ta k'achalkooj, atoob' ta hoj chik kamnaq, xa hoj wo' reh QaJaaw.⁹Ruum i wili xkimik i Jesucristo, eh xk'aach wo' chik cho ruka'peech: Reh chi xkahnik chi wilik rajaawriik chikinaah taqe kamnaq, chikinaah taqe k'achalkeeb'.

¹⁰¿Chib'ih reet noq inach'olej awuch aj nimaneel? ¿Chib'ih reet noq ma' imponik ta panaq'awach awuch aj nimaneel? ¿Mi ma' aweht'al re' hat chi naaqojiik pa'lojoq chuwach i Dios noq naa ruq'atam i q'orik chi qanaah?¹¹Eh pan santo laj huuj tz'ihb'amaj chaloq chi je' wili i ruq'orom i Dios:
Re' hin xti korik i nuq'or chi, chi nuwach i hin, naakixuk'aam kiib' i tinamit, eh naa kiye'em nuloq'il, inki.

¹²Re' hoj chi qaju'junaal naa qaq'asam chuwach i Dios chib'ih jariik taqe ixqa a'n.

¹³Ruum aj re', re' taq i hat, ma' ch'olej taq awiib' chawach. Chawik'raaj la' taq awiib', reh chi ma' xta nee taq inayoj wii' kik'ux taq aahermano, eh ma' xta wo' taq nee naq'eb' wii' pamahk.¹⁴Re' hin, ruum chi nuye'em nuk'ux chunimjiik i QaJaaw Jesucristo, weht'al chi ma' xtaj i k'uxb'al wi'k mahk chi k'uxarik. Eh wila' awach inkapeb'inik reh chi wilik i k'uxb'al wi'k mahk chi k'uxarik, mahk wo' chi neeruk'ux i reh.¹⁵Raaj wila' ruum i k'uxb'al awa' inak'ux neenyoj rik'ux aahermano, ruuk' i na a'n re' re', ma' k'ahchi' ta ak'axam. Ruum aj re', ma' ruk'ul taj chi ruum i k'uxb'al awa' nee inayoj rik'ux aahermano, ruum re' reh, re' Jesucristo xkimik chi riij chi ko'lemb'al reh.¹⁶Mayeew q'ab' chi nee tiq'orarik chi re' chi ma' re' ruum i rub'anariik inakapaaj i hat chi ma' xta reet chi b'anarik.¹⁷Chakoj taq rehtaal chi re' runimaal rajaawriik i Dios ma' ruum ta wi'k ha' neenkan. Ruum la' rub'anariik i korik, i wihik pan chaq'lamiil, i wihik pansuqkiil k'uxliis i ruyeew i Santolaj Uxlab'al neenkan.¹⁸Ruum aj re', awach i je' re' runimjiik i Jesucristo, i rub'an re' re' imponik chuwach i Dios, eh inkiq'or wo' tinamit chi holohik i runa'ojb'al.

¹⁹Je' re' noq, inchol qasik'im chu'nchel ink'amwik qeh pansuqkiil k'uxliis. Ruuk' i re', k'ul neenqayeew rukowiil qak'ux chi qawach.²⁰Re' i hat, maa sach wach i rukamaj i Dios ruum i k'uxb'al awa' inak'ux. Xti korik noq chu'nchel i xa chib'ih jariik chi k'uxb'al wi'k ma' mahk ta chi k'uxarik. Re' mahk chi b'anarik re' chi neenayoj rik'ux aahermano ruuk' i k'uxb'al awa' neenak'ux, re' ma' toob' ta chi k'uxarik chi ree reh.²¹Re' hat, ma' xta reet chi ma' nee ta nak'ux i tiwik, chi ma' nee ta inawuk'ej i vino wila' ruuk' i re' neenayoj rik'ux aahermano. Eh ma' xta wo' hoq i ma' holohik taj nee i na a'n chi q'eb'al reh pamahk aahermano.²²Eh wila' ch'iklik ak'ux chi re' holohik k'ahchi' kaat, xa re'-oq i hat tinaab'inik reh, chayeew pan q'ab' i Dios. Eh atoob' reh awach i ch'iklik ruk'ux chi ma' xta k'ahchi' ruq'ehb'iik wii' chub'anariik i rukapaaj i reh chi ma' xta reet chi b'anarik²³Eh awach i ma' ch'iklik ta rik'ux mi mahk oon ma' mahk ta chi k'uxarik i xa chib'ih jariik, eh wila' xik'ux, mahk i rub'an, ruum ma' ch'iklik ta rik'ux chi ma' xta reet i rub'an. Je' re' noq, aha' wilik imb'aan chi ma' ch'iklik ta k'uxliis, mahk chuwach i Dios. Ponoq panaq'awach aahermano, ma' awutkeel ta naa ak'axam awiib'

¹Re' hoj i kow chik qak'ux panqanimaniik, inchol qakuyum kimahk i komajaa' kow kik'ux pan kinimaniik. Ma' ruk'ul taj chi xa re' neenqa a'n aha' wilik imponik chi qawach i hoj.²Chi qunchelaal la' inchol qa'nam imponik chikiwach taqe i qahermano. Re' i holohik qa a'n reh chi neen kamanik chi toob'al keh.³Chawil taq i xub'an i Jesucristo reh ma' xub'an taj imponik chuwach i reh. Re' la' reh xk'ulwik reh i ruq'or i tz'ihb'amaj chaloq chi je' wili: Re' taqe kib'ajwik aweh, chi nunaah i hin xkik'saj i kik'aah, inki.⁴Eh chu'nchel i q'orik xtz'ihb'jik cho pan santo laj huuj najtir tiijb'al qeh noq xkanab'jik. Eh yu'naak ar chik inqareq rukowiil qak'ux chunimjiik i Jesucristo, eh i rusuqb'isaj wo' qak'ux chi ruyub'jiik i naa qak'ulum.⁵Eh re' Dios, re' inye'wik reh i kowiil k'uxliis, rusuqkiil k'uxliis, toob'inoq taq chaaweh, reh chi k'ul taq nee ti k'acharik pan jinaj wach k'uxliis, je' rukab' i xk'ulik ruk'uhtaaj i Jesucristo,⁶reh chi chawunchelaal taq jinaj taq wach ak'ux chuye'ariik ruloq'il i Dios, re' i rajaaw i QaJaaw Jesucristo. Re' ak' k'uhb'aal xq'orarik keh i ma' re' ta taqe aj judío

⁷Re' taq i hat hermano, panotob'il taq chak'ul chaxilak taqe aahermano, je' rukab' noq xatruk'ul taq panotob'il i Jesucristo i hat, reh chi neenye'arik ruloq'il i Ajaab'ees Dios.⁸Re' Jesucristo xk'ulik chub'anariik otob'il keh aj judío, reh chi xk'ulik resaj wach i ruq'orom cho rib'iral i Dios najtir keh i qamaam qati't. Eh xk'ulik ruk'uhtaaj i Jesucristo chi re' Dios korik chi rub'an i ruq'or.⁹Reh chi naa kiye'em ruloq'il i Dios taqe i ma' re' ta aj judío ruuk' i ruketeljiik kiwach xb'aan, reh chi xooj eloq wach i tz'ihb'amaj chaloq pan santo laj huuj chi je' wili:
Re' hin naa kaat nuloq'em chi kixilak i ma' re' ta aj judío, ruuk' i rutz'uuyjiik awach, inki.¹⁰Eh wilik wo' chik i ruq'or wii' chi je' wili: Suuqb'oq taq ak'ux i hat, i ma' hat ta taq aj judío, kuuk' taqe i rutinamiit i Dios inki.¹¹Eh wilik wo' chik i ruq'or wii' chi je' wili: Chaloq'ej taq i QaJaaw Dios chawunchelaal taq i hat, i wilkaat taq panimaq tinamit, i pankok' tinamit chaloq'ej taq inki.¹²Re' Isaías reh, je' wili i rutz'ihb'aam chaloq: Naa raasjiik jinaj i aj Ko'loom chi kixilak i riih rumaam i Isaí. Eh naa ruwihiik rajaawriik chikinaah i ma' re' ta taqe aj judío. Eh ruuk' i reh, naakich'ikaam kik'ux, inki.

¹³Re' ta naq i Dios inye'wik ch'ikaab' k'uxliis, suq kiil k'uxliis, neen ye'wik taq aweh i k'acharik pansuqkiil chunimjiik i reh, reh chi ruuk' i rajaawriik i Santolaj Uxlab'al, nee ruyeew taq rukowiil ak'ux chi ruyub'jiik i ch'iklik taq reje wii' ak'ux. Re' Pablo xuq'or i ru ak' k'uhb'aal i Jesucristo

¹⁴Hat taq nuhermano, re' hin weht'al chi korik chi re' taq i hat q'e' taq hat atoob', eh chi wilik taq ana'ojb'al chi manlik, eh chi tichol taq rukojariik ana'ojb'al chawach.¹⁵Eh chupaam i huuj wili, xinq'orik taq reje awuuk', ruum re' hin xuyeew wajaawriik i Dios reh chi ma' nee ta nsahchik taq panak'ux i xnuq'or taq aweh.¹⁶Re' hin k'ahchi' nub'anam i rukamaj i Jesucristo toob'al keh i ma' re' ta taqe aj judío, k'ahchi' nuq'orom rib'iral i ak' k'uhb'aal i ruyeew i Dios. Ruuk' i re', naakik'ulariik ruum i Dios taqe i ma' re' ta aj judío chi jilow mayiij santohimaj ruum i Santolaj Uxlab'al.

¹⁷Ruum chi nunimaj i Jesucristo, wilik rub'ehel chi weh chi nuyeew runimaal wach i rukamaj i Dios k'ahchi' kiin.¹⁸Re' hin ma' xta chik jino'q i tokoom i nuq'or. Xa re' la' wo' nuchop nuk'ux chi naa nuq'orom i xub'an i Jesucristo. Eh re' ruq'orariik keh i ma' re' ta taqe aj judío chi kinimaj i Dios. Re' taqe i xnub'an wili, xooj eloq wach ruuk' taqe i xnuq'or, taqe i xnub'an,¹⁹ruuk' i rajaawriik i Santolaj Uxlab'al xnuk'uhtaaj taqe i nimaq kiwach ma' ilooj taj. Eh xnub'an wo' ruq'orariik i ak' k'uhb'aal, ar Jerusaleem xnutoq'aa' reje. Eh xa aha' ta chik yuuq' ma' xinik'ik reje chuq'orariik korehtaal ximponik paruyuq'ul Ilírico.²⁰Je' re' noq, xnuchop reje nuk'ux chuq'orariik rib'iral i ko'lemb'al iib' aha' ma' ib'irimaj ta naq wii' rib'iral i Jesucristo. Re' xwaaj i hin chi ma' xi nokik ta chuq'orariik aha' q'orooj chik wii' rib'iral i Jesucristo.²¹Eh ar xooj eloq wach tz'ihb'amaj cho chi riij i Jesucristo chi je' wili: Re' taqe ma' kib'iram ta rib'iral, re' keh naa kilwiik wach. Eh re' taqe i ma' kib'iram ta cho rib'iral chi jumpech, re' keh naa kireqem chi riij i ruq'oral, inki. Re' Pablo xutaq'aaj ruq'orariik chi k'ahchi' rukapaam ojik Roma

²²Re' hin, hermano, k'ih pech naq wajwaam ojik taq chaq'orob'jiik. Xa re' la', komajaa' ta ruyee riib' chi nuwach, ruum ko lahtz' nuwach chub'anariik i rukamaj i Dios ayu'.²³Eh yu'naak xnukohlaaj chik wach i rukamaj i Dios chupaam taqe ye'aab' ayu'. Eh ruum chi najtir naq inutoq'aa' wajwaam ojik taq chaq'orob'jiik,²⁴yu'naak k'ahchi' nupab'aam nub'eeh chi naa wik'iik ponoq taq chaq'orob'jiik noq naa wojiik España. Eh qaye'em-oq chik rusuqkiil qak'ux chi qawach taq awuuk', inwaaj naq i hin chi nee taq kinatoob'eej ree wojiik España.²⁵Xa re' la', yu'naak ko naa pee wojiik cho Jerusaleem chukanab'jiik k'isiin i tumiin toob'al keh taqe i hermano wilkeeb' paneb'a'il ar,²⁶ruum re' taqe hermano wilkeeb' i Macedonia, ruch'ihil taqe wilkeeb' Acaya, xkichop kik'ux chi q'asanik tumiin, reh chi naa kitaq'aam reje chi toob'al keh hermano wilkeeb' paneb'a'il ar Jerusaleem.²⁷Re' q'asanik tumiin xkian i ma' re' ta taqe aj judío, pankik'ux xchalik. Eh ma' xta reet i xkikapaaj rub'aan re' re', ruum re' taqe aj judío kinimanik reh i Jesucristo, xa kuum i keh xiehtrik haa' i runimjiik i Jesucristo i ma' re' ta taqe aj judío. Je' re' noq, re' keh xti ruk'ul chi ruuk' i chib'ih wilik keh naakitoob'eem reje taqe aj judío.²⁸Eh nukohlaam-oq chik i nutaqariik, nuq'asam-oq chik keh i tumiin xmolarik cho wach, kora'j nawojiik i España re'. Eh noq ojik-oq i nub'an ar, naawik'iik ponoq taq chaq'orob'jiik ar Roma.²⁹Re' hin weht'al chi xiik' naah i rotob'il i ak' k'uhb'aal i ruyeew Jesucristo neenqak'ul taq awuuk' noq nee kinooj k'oloq taq chaxilak.

³⁰Hat taq nuhermano, i nupahqaaj taq otob'il aweh parub'ihnaal i QaJaaw Jesucristo, eh je' wo' ruuk' i k'axaj iib' i ruyeew qeh i Santolaj Uxlab'al, chi kinatoob'eej tii taq panatiij chuwach i Dios.³¹Reh chi ma' xta neekinkuchej taqe i ma' re' ta aj nimaneel wilkeeb' ar Judea, eh chi suq ta naq kik'ux taqe hermano wilkeeb' Jerusaleem noq neen kik'ul i toob'al keh naa nuk'amam reje.³²Chi je' re', suq suq nuk'ux noq nee kinooj k'oloq taq chaq'orob'jiik wila' je' re' i xraaj i Dios. Noq neenqilow qawach taq awuuk', neenhi'lik i wánima taq chakapeeb'jiik.

³³Re' ta naq i Dios inye'wik suq kiil k'uxliis wih-oq taq panawánima chawuncheel. Je' ta wo' naq re'. Re' i rutaq'ab'jiik rusuqkiil kik'ux chi kiju'junaal taqe i hermano

¹Re' hin, hermano, inwoqxa'neej taq aweh i qahermana, Febe, re' k'ahchi' chub'aan i rukamaj Dios kuuk' taqe i aj nimaneel wilkeeb' Cencrea.²Chak'ul taq cho panotob'il i qahermana re' re' parub'ihnaal i QaJaaw, je' rukab' i ruk'ul chi b'anarik chi kixilak i santo laj aj nimaneel. Chatoob'eej taq ruuk' i ajwaal wach chi reh, ruum re' reh ma' k'isiin taqe i rutoob'eem chaloq, eh hin wo' rutoob'eem haa' i hin.

³Eh chayeew taq rusuqkiil ruk'ux weh i qahermana Priscila ruch'ihil i rub'ahiil Aquila rub'ihnaal, re' taqe wuch kamanoom chuq'orariik i ruq'oral i Jesucristo.⁴Re' keh xkiyeew kiib' pankimik ruum i nuko'ljiik i hin. Inut'iosej keh i xkian weh re' re'. Eh ma' xata re' hin kint'iosinik reh, int'ioosjik la' wo' keh kuum i taqe aj nimaneel ma' re' ta taqe aj judío.⁵Eh chayeew taq rusuqkiil kik'ux weh taqe i hermano inkimol kiib' chulooq'jiik i Dios parupaat i Aquila i Priscila. Chayeew taq rusuqkiil ruk'ux weh i Epeneto, re' i naah wamigo. Re' reh i peet xnimanik reh i Jesucristo ar Acaya.⁶Chayeew wo' taq rusuqkiil ruk'ux weh i hermana María, re' reh xiik' naah i kamanik rub'anam taq chaxilak.⁷Eh Chayeew taq rusuqkiil ruk'ux weh i qahermano Andrónico, i qahermano Junias, wuch aj Judío taqe, hoj junwihiik chi prexohjik kuuk', eht'alimaj kiwach chi raj tahqaneel i Jesucristo taqe. Eh peet xkinimaj i Jesucristo chi nuwach i hin.⁸Chayeew wo' taq rusuqkiil ruk'ux weh i qahermano Amplias, re' i naah wamigo parub'ihnaal i QaJaaw.⁹Chayeew taq rusuqkiil ruk'ux weh i qahermano Urbano, i quch kamanoom chuq'orariik i ruq'oral i Jesucristo. Eh chayeew wo' taq rusuqkiil ruk'ux weh i qahermano Estaquis, i re' naah wamigo.¹⁰Chayeew taq rusuqkiil ruk'ux weh i qahermano Apeles, ruye'em ruk'ux chunimjiik i Jesucristo. Eh chayeew wo' taq rusuqkiil kik'ux taqe i awach reh i qahermano Aristóbulo.¹¹Chayeew taq rusuqkiil ruk'ux weh i qahermano Herodión, wuch aj Judío. Eh chayeew wo' taq rusuqkiil kik'ux taqe i awach reh i qahermano Narciso, re' i xkiyeew kik'ux chunimjiik i Jesucristo.¹²Chayeew taq rusuqkiil ruk'ux weh i qahermana Trifena, i qahermana Trifosa, raj kamanoom taqe i Jesucristo. Eh chayeew wo' taq rusuqkiil ruk'ux weh i qahermana, Pérsida, i ruyeew ruk'ux chub'anariik i rukamaj i Jesucristo.¹³Chayeew taq rusuqkiil ruk'ux weh i qahermano Rufo, i loq'laj aj nimaneel parub'ihnaal Jesucristo. Eh chayeew wo' taq rusuqkiil ruk'ux weh i rutuut i Rufo, re' je' wo' nutuut i hin noq wilik.¹⁴Chayeew taq rusuqkiil ruk'ux weh i Asíncrito, i Flegonte, i Hermes, i Patrobas, i Hermas, eh je' wo' taqe i hermano inkimol kiib' kuuk' noq inkiloq'ej i Dios.¹⁵Chayeew taq rusuqkiil ruk'ux weh i Filólogo, i Julia, i Nereo, haa' ranaab', ruch'ihil i Olimpas. Eh chayeew wo' taq rusuqkiil kik'ux weh chu'nchel i hermano inkimol kiib' kuuk' chi looq'jiik i Dios.

¹⁶Re' taq hat hermano, k'ul taq chayeew rusuqkiil ak'ux chawach ruuk' santo laj tz'ub'uuj. Eh chu'nchel i kinimanik ree Jesucristo wilkeeb' ayu' inkitaq'aaj taq reje rusuqkiil ak'ux.

¹⁷Hermano, re' hin i nupahqaaj taq otob'il aweh chi chakoj taq kehtaal awach kib'anik reh i yojoj k'uxliis, eh inkitoq'aa' taqchi' taq chaxilak. Re' taqe re' inkixowaaj wach i ak' k'uhb'aal hat taq tijimaj cho wii', ma' ruk'ul ta taq cha weh chi nee taq inamin awiib' kuuk'.¹⁸Ruum re' taqe re' ma' nkian taj iraaj i QaJaaw Jesucristo. Re' la' inki a'n i rootwaaj i kiti'jolal i keh. Eh ruuk' tii chik holohaq q'orik noq i nib'irjik, inkijot' i kikapeb'aal taqe komajaa' kow kik'ux chunimjiik i Jesucristo.¹⁹Chu'nchel kieht'alinik reh chi re' taq i hat xanimaj taq chik i Dios. Ruum i re', q'e' insuuqb'ik nuk'ux taq chawiij. Eh re' hin inwaaj chi nee taq inak'uhtaaj chi wilik taq ana'ojb'al chub'aan otob'il, ma' re' ta chub'aan i yeb'ee wach na'ojb'al.²⁰Eh re' Dios inye'wik reh i suq kiil k'uxliis, naa rusacham wach chi jumehq'iil i rajaawriik i aj Yahm, je' naa naa ayeq'em taq panawooq i hat, ruum re' chik taq i hat naa ruye'em awajaawriik i Dios. Re' ta naq i QaJaaw Jesucristo toob'inoq taq chaaweh.

²¹Eh i rutaq'aaj wo' reje rusuqkiil taq ak'ux i Timoteo, i wuch kamanoom parukamaj i Dios. Eh re' taqe i wuch aj Judío, re' Lucio, re' Jason, eh re' Sosípater, inkitaq'aaj wo' reje rusuqkiil taq ak'ux i keh.

²²Re' hin, Tercio k'ahchi' nutz'ihb'aniik ree huuj wili i naa rutaq'aam taq reje aweh i Pablo, i nutaq'aaj wo' taq reje rusuqkiil ak'ux i hin parub'ihnaal i QaJaaw Jesucristo.

²³Eh i rutaq'aaj taq reje rusuqkiil ak'ux i Gayo, re' i nupatal. Eh i ruyeew i rupaat chi molb'al kiib' i aj nimaneel. Irutaq'aaj wo' taq rusuqkiil ak'ux i Erasto, re' i molwik reh i rutumiin i kumitaat pan tinamit ayu'. Irutaq'aaj wo' taq rusuqkiil ak'ux i hermano, Cuarto rub'ihnaal.

²⁴Re' ta naq i rotob'il i QaJaaw Jesucristo wih-oq taq awuuk' chawunchelaal. Je' ta wo' naq re'. Rulooq'jiik i Dios xkuxik wii' wach rutz'ihb'jiik i huuj wili

²⁵Eh qayeew taq ruloq'il i Dios, i wilik rajaawriik chuye'ariik taq rukowiil ak'ux, je' rukab' i ruq'or i ak' k'uhb'aal xnuq'or taq aweh, re' wo' i xatnuk'uhb'alej taq wii' nik' wach runimjiik i Jesucristo. Re' wili jinaj wach i ruq'or ruuk' i ruk'uhtaam chaloq i Dios najtir q'iij chi riij i ma' eht'alimaj ta naq ruyejaam cho wach noq komajaa' chii wilik.²⁶Eh xye'arik chik chi naab'jik xa ruum i kitz'ihb'aam chaloq taqe jalal ruq'oral i Dios, je' rukab' i xq'orarik keh ruum i Dios wilik chi juneliik. Re' i wili, ke'lik naq chaloq, eh xye'arik chik keh chi naab'jik chu'nchel i nimaq taq tinamit, reh chi neenkinimaj i Jesucristo.²⁷Xa re' wo' jinaj chi Dios, i xti wilik runa'ojb'al, i ruk'ul chi neenye'arik ruloq'il chi juneliik parub'ihnaal i Jesucristo. Je' ta wo' naq re'.

Bible Society in Guatemala

https://app.library.bible/content/695aa4b9f902778f