Read 1 CORINTIOS 1

1 CORINTIOS1

¹Re' hin i Pablo, re' Dios xraaj chi xirupab'aa' chi hin jinaj raj tahqaneel i Jesucristo, wuch'ihil i hermano Sóstenes.²Eh xnutz'ihb'aaj reje huuj wili aweh taq i hat i tinimanik taq ree Dios wilkaat taq Corinto, re' i aasantoheem taq chik awiib' parub'ihnaal i Jesucristo, eh xusik' taq chaawach chi hat taq rusantolaj tinamiit. Haa' chu'nchel i wilkeeb' cho xa aha' yuuq' kiq'orik rib'iral i QaJaaw Jesucristo, QaJaaw i hoj, eh kaJaaw wo' i keh.³Re' ta naq i QaJaaw Dios, i QaJaaw Jesucristo chuyeew taq chaaweh i rotob'il, je' wo' hoq i wihik pansuqkiil k'uxliis. Xa ruum i Jesucristo ink'ularik i rotob'il i Dios

⁴Re' hin xa eliik k'ahchi' nut'iosem ree Dios taq chawiij i hat, ruum re' reh xuyeew taq chaaweh i rotob'il xa ruum i Jesucristo.⁵Eh xa ruum i reh, re' Dios xiik' naah i rotob'il xuyeew taq chaaweh. Yu'naak tichol taq chik ruq'orariik i ruq'oral i Dios, eh wilik taq chik ana'ojb'al.⁶Eh re' k'uhb'aal taq ab'iram chi riij i Jesucristo k'ahchi' taq chik animam chi korik.⁷Eh re' Dios ruye'em taq chik chaaweh chu'nchel i rotob'il ajwaal taq wach cha weh. Yu'naak xa re' taq chik naa awuy-eem jaruuj ink'ulik ruka'peech i QaJaaw Jesucristo.⁸Chi je' re' ma' jaruuj taq neenyoj ak'ux chi nimanik korehtaal taq akimiik. Eh ma' awach ta neenkojwik taq amahk chuwach i reh na' k'oloq ruka'peech.⁹Re' Dios i rub'an aha' wilik taqe ruq'or. Eh re' wo' reh xsik'wik taq awach chi xat okik taq pan jinaj wach k'uxliis ruuk' i Rak'uun, re' i QaJaaw Jesucristo. Re' taqe komoon aj nimaneel ma' jinaj ta wach kik'ux

¹⁰Hat taq nuhermano, re' hin i nupahqaaj taq otob'il aweh parub'ihnaal i QaJaaw Jesucristo: Cha a'n taq jinaj wach aq'oral, cha a'n taq jinaj wach ak'ux. Mo'q chih i ch'aqaj iib' taq chawach tiwih-oq taq pansuqkiil k'uxliis. Jinaj-oq taq wach akapeew, k'ul taq chawaaj awiib' chawach.¹¹Re' hin i nuq'or taq reje aweh i wili, hermano, ruum jinaj keh i re' ruuk' i awach reh i Cloé xq'orik weh chi wilik b'ila' choqinik iib' taq chaxilak.¹²Re' hin i nuq'or taq reje aweh chi reh reh b'ila' taq wach inaq'or chi je' wili: Re' hin re' Pablo intijinik weh. Re' hin re' Apolos intijinik weh, re' hin re' Pedro intijinik weh, re' hin re' Jesucristo intijinik weh tiki b'ila' taq.¹³¿Chib'ih reet noq inaq'or taq chi je' re'? ¿Mi k'ih elinaq re' i Jesucristo? ¿Mi re' re' hin i Pablo i xinye'arik wach kuruus reh taq ako'ljiik? ¿Mi panub'ihnaal re' hin xqajik taq ahaa'? Ma' chih taj.

¹⁴Inut'iosej ree Dios chi re' hin ma' awach ta jino'q taq aweh i hat i xnuqasaj cho ruhaa'. Xa re' wo' Crispo nuqasam cho ruhaa' ruch'ihil i Gayo.¹⁵Ruum aj re', ma' awach ta jino'q taq aweh i hat neen q'orik reh chi panub'ihnaal i hin xqajik ruhaa'.¹⁶Eh xnuqasaj wo' kihaa' taqe i awach reh i Estéfanas. Xa re' wo' taqe re' xnuqasaj cho kihaa', ma' nk'ulik ta panuk'ux mi wilik chik jino'q tokoom xnuqasaj ruhaa'.¹⁷Re' Jesucristo ma' re' ta chi qasanik ha' xirutaq'aaj, chuq'orariik la' rib'iral i ak' k'uhb'aal xirutaq'aaj. Xa re' la' ma' k'uhtb'al ta reh chi wilik ta nuna'ojb'al, eh chi ruuk' tee re' neenwesaj rajaawriik i xuk'am chaloq i rukimiik i Jesucristo xuk'ul wach kuruus. Re' i rajaawriik i runa'ojb'al i Dios re' i Jesucristo

¹⁸Re' k'uhb'aal chi riij i kimik xuk'ul i Jesucristo wach kuruus xa memil laj na'ojb'al chi keh i ojik inki a'n pantojb'al mahk. Re' i k'uhb'aal wili re' i rajaawriik i Dios chi qee hoj i k'ahchi' qareqem i ko'lemb'al qiib'.¹⁹Eh tz'ihb'amaj wo' chi je' wili i ruq'orom chaloq i Dios: Naa nusacham wach i kina'ojb'al i wilik kina'ojb'al. Eh naa nuyojom wach i kikapeew i nimaq wach kikapeb'aal, inki.

²⁰Eh ¿chib'ih xooj kahnoq wii' i wilik runa'ojb'al i rub'an riib', je' wo' hoq imb'anik tijinik, je' wo' hoq inchol ruwech'jiik riij taqe i na'ojb'al xa reh ayu' wach ak'al? ma' xtaj, ruum re' Dios chu'nchel i xa na'ojb'al ayu' wach ak'al xusutej chi xa memil laj na'ojb'al²¹Re' taqe yiib' wach i kina'ojb'al ma' inkireq ta chi riij i runa'ojb'al i Dios xa ruuk' i kina'ojb'al i keh, ni xata ruuk' i xa chib'ih jariik inki a'n Je' re' noq, re' Dios re' chik xiko'leej taqe awach inkiyeew kik'ux chunimjiik i ruk'uhb'aal, atoob' ta re' k'uhb'aal wili xa je' memil laj na'ojb'al noq inkikapaaj.

²²Re' taqe aj judío keh nimaq wach ma' ilooj taj inkipahqaaj reh chi neenkinimaj. Eh re' taqe i ma' re' ta aj judío, xa re' i nimaq wach na'ojb'al inkisik'.²³Eh re' i hoj, re' i Jesucristo i xye'arik wach kuruus inqaq'or rib'iral. Eh re' re' k'ixb'ilaal chi q'orarik noq inkiq'or taqe aj judío. Eh chi keh taqe ma' re' ta aj judío, xa memil laj na'ojb'al.

²⁴Eh chi keh i sik'ooj cho kiwach, atoob' ta aj judío, atoob' ma' aj judío, re' Jesucristo rajaawriik i Dios, eh chi re' reh ink'uhtanik reh i runa'ojb'al i Dios.²⁵Eh re' rumemil laj na'ojb'al i Dios noq inkikapaaj i tinamit, re' re' q'e' nim rajaawriik chuwach i xa runa'ojb'al winaq. Eh re' i xub'an i Dios, i xama' xta kamaj chi keh i tinamit, eh re' re' xti nim wach chuwach i neerukapaaj i xa winaq.

²⁶Hermano, chanab'eej taq chi re' i Dios sik'wik taq chaawach, atoob' ta xama' k'ih ta taq aweh i wilik runa'ojb'al noq inkiq'or i tinamit. Eh xama' k'ih ta wo' taq aweh i wilik kajaawriik, eh xama' k'ih ta wo' taq aweh re' ruuk' nimaq kiwach.²⁷Xti korik noq re' Dios xsik'wik cho kiwach i ma' xta kina'ojb'al chi keh i tinamit, xa k'uhtb'al kik'ixb'ilaal i wilik kina'ojb'al. Eh re' wo' Dios xsik'wik cho kiwach i ma' xta kajaawriik chi keh i tinamit, xa k'uhtb'al kik'ixb'ilaal i wilik kajaawriik.²⁸Re' Dios xsik'wik cho kiwach i ma' ajwaal ta kiwach, i ma' xta kajaawriik ma' imponik ta panaq' kiwach i tinamit, sahchb'al wach i kajaawriik i nimaq wach kajaawriik.²⁹Ruum aj re', ma' ruk'ul taj chi awach jino'q i xa nee runimb'isaj riib' chuwach i Dios.³⁰Eh re' taq i hat, re' Dios xkojwik taq aweh chunimjiik i Jesucristo. Eh re' wo' reh xpa'ab'jik cho ruum i Dios chi kojol qana'ojb'al, x-esanik qeh chuwach i mahk, eh xuyeew qasantohiil, xojruko'leej wo' hoq.³¹Eh tz'ihb'amaj wo' chaloq chi je' wili: Wila' awach iraaj runimb'isam wach chi rib'il riib', chunimb'isaj wach chi runimjiik i QaJaaw Jesucristo, inki. Re' ruq'orariik i ruk'uhb'aal i Jesucristo xkimik wach kuruus

¹Hermano, re' hin noq xponik nuq'or taq aweh i korik ma' eht'alimaj ta naq i ruyejaam cho wach i Dios, ma' ruuk' ta nimaq wach na'ojb'al xnuq'or taq aweh, eh ma' ruuk' ta wo' nimaq wach q'orik.²Eh noq xinwihik taq cho chaxilak, ma' xta chik jino'q i tokoom xwaaj nunab'eem, xa re' wo' hoq i Jesucristo xkimik wach kuruus xnuq'or taq rib'iral aweh.³Eh noq xinooj k'oloq taq chawach, xa ruk'ay chik i wooq nuq'ab', xa kinb'arb'otik chik ruum nuyo'jiik.⁴Eh noq xnuq'or taq aweh i ruk'uhb'aal i Dios, ma' re' ta ruuk' ruq'oral jino'q wilik runa'ojb'al xatnuq'o'reej taq wii'. Ruuk' la' i Santolaj Uxlab'al eh ruuk' i rajaawriik i Dios xnuq'or taq aweh.⁵Eh reh chi re' chik i rajaawriik i Dios q'oreel taq cha naah ruuk' taq animaniik, eh ma' re' ta chik i runa'ojb'al winaq wach ak'al taq i naa animam. Re' Dios xuyeew cho chi naab'jik i runa'ojb'al ruuk' i ruSantolaj Uxlab'al

⁶Re' hoj korik noq ruuk' nimaq wach na'ojb'al inqaq'oreej taqe i kowjinaq chik kik'ux chi nimanik. Xa re' la' ma' re' ta wo' na'ojb'al ayu' wach ak'al. Eh ma' re' ta kina'ojb'al i wilik kajaawriik, ruum re' i kina'ojb'al i keh xa sahchik wach reh.⁷Re' inqaq'or wili re' i runa'ojb'al i Dios ma' eht'alimaj ta naq chaloq. Re' i ke'lik naq chaloq, re' i ruyejaam cho wach noq komajaa' i rutz'uhkrisaj chaloq i wach ak'al, reh chi ruuk' i re' naa ruye'em runimaal qawach.⁸Re' na'ojb'al wili, ma' jino'q keh i wilik kajaawriik chikinaah i tinamit wach ak'al xireqwik cho chi riij. Wi ta xkireq cho chi riij, ma' xkikansaj ta naq cho wach kuruus i QaJaaw Jesucristo, i wilik ruloq'il.⁹Je' rukab' i ruq'or i tz'ihb'amaj chaloq chi je' wili:
Re' taqe na'ojb'al wili ruyejaam cho wach i Dios chi keh i kik'axwik reh, re' i ma' awach ta ilwinaq ib'irinaq cho reh, eh ni xata kapeb'imaj chaloq, inki.

¹⁰Ra'j taqe i na'ojb'al wili, xuyeew qeh chi naab'jik i Dios ruuk' i Santolaj Ruxlab'al. Re' Santolaj Ruxlab'al reh i rupech'ib'eej cho chu'nchel, reht'al nare' wo' hoq i ruchamiil paam i runa'ojb'al i Dios.¹¹¿Mi wilik jino'q neenab'inik reh rukapaaj cho paránima i tokoom? Ma' awach taj. Xa re' wo' hoq i ránjel rut'iosil i reh i naab'inik reh chib'ih i rukapaaj. Je' wo' re' i Dios xa re' wo' i ruSantolaj Uxlab'al ineht'alinik reh chib'ih rukapaaj i reh.¹²Eh re' hoj, ma' re' taj i uxlab'al xa reh ayu' wach ak'al xqak'ul pan qánima. Re' la' i Santolaj Ruxlab'al i Dios xuyeew qeh xqak'ul pan qánima, reh chi neenqareq chi riij taqe i runa'ojb'al i Dios xuyeew qeh chi naab'jik.

¹³Re' hoj inqach'ob' rub'ehel taqe i na'ojb'al wili ruuk' taqe q'orik xuk'uhtaaj qeh i Santolaj Uxlab'al. Eh ma' ruuk' ta q'orik xa reh ayu' wach ak'al inqaq'or. Eh inqach'ob' rub'ehel taqe i ma' nilarik ta wach keh taqe i k'ahchi' kinimaniik panuxlab'al.

¹⁴Eh re' i ma' re' ta aj nimaneel ma' ruk'ul ta paránima taqe i na'ojb'al i ruyeew i Santolaj Uxlab'al, ruum xa memil laj na'ojb'al noq i rukapaaj. Eh ma' nee ta wo' rureq chi riij, ruum re' taqe wili, kore' i Santolaj Uxlab'al imb'anik toob'inik noq inreqarik chi riij.¹⁵Eh re' i wilik Ruxlab'al i Dios ruuk', chu'nchel i xa chib'ih jariik i wilik i rureq chi riij. Eh chib'ih jariik i wilik cho paránima i reh, ma' awach ta neenreqwik chi riij.¹⁶Pan santo laj huuj je' wili i ruq'or: ¿Mi wilik i naab'inik reh i rukapeew i Dios? ¿Mi wilik intijinik reh? inki. Raaj i hoj, i qohnimanik chik reh i Jesucristo, inqareq chik chi riij i rukapeew i reh. Quch kamanoom qiib' parukamaj i Dios

¹Eh re' hin hermano, ma' je' ta taq tiq'orob'jik aj nimaneel kow ruk'ux xnub'an. Xa je' la' taq tiq'orob'jik ma' re' ta aj nimaneel xnub'an, ruum ko je' taq hat ha'lak'un ruuk' taq animaniik.²Re' taq atijiik xnub'an ma' kow ta wach, xa je' lecha i xnuyeew taq aweh chi uuk'jik, ruum kow ta taq aatijiik xnub'an, ma' xareq ta naq taq chi riij. Eh xakomajaa' wo' inareq taq chi riij yu'naak,³ruum xa ko ana'ojb'al wo' taq awiib' Ko wilik i kaqwachinik iib', i peletohinik iib' taq chaxilak. Xa ko ana'ojb'al wo' taq awiib' noq ink'utinik, ruum ko na a'n wo' taq aweh inki a'n taqe yiib' wach i kina'ojb'al.⁴Eh wilik inq'orik reh taq chaxilak chi je' wili: Re' hin re' i Pablo intijinik weh, re' hin, re' Apolos intijinik weh, inki. Ruuk' i re' ink'utinik chi xa ko ana'ojb'al wo' taq awiib'.

⁵¿Mi wilik wajaawriik re' hin i Pablo? ¿Mi wilik rajaawriik re' Apolos? Re' hoj, xa hoj q'orol reh i k'uhb'aal xqaq'or taq aweh, reh chi xatnimanik taq. Eh chi qaju'junaal xqa a'n i rukamaj i QaJaaw re' q'oreel nik' wach i xuk'uhtaaj qeh.⁶Re' i ak' k'uhb'aal re' hin ximponik ch'ikanoq reh taq awuuk' je' intikarik tik xnub'an. Eh re' Apolos je' naa kojooj ruha'iil xub'an. Eh re' ixk'isanik reh re' i QaJaaw Dios.⁷Je' re' noq, ni xata re' i hin i xintikwik reh i, eh ni xata re' i je' kojooj ruha'iil xub'an, wilik qajaawriik. Xa re' la' wo' Dios wilik rajaawriik, re' i xk'isanik reh.⁸Re' hin, i je' intikarik tik xnub'an i ak' k'uhb'aal, re' i je' kojooj ruha'iil xub'an, xa hoj wo' raj kamanoom i Dios. Xa re' la', re' Dios naa ruye'wiik jilow qeh i k'ahchi'kooj.⁹Ruum re' hoj, quch kamanoom qiib' parukamaj i Dios. Re' taq i hat je' taq akab' i ye'aab' intikarik wii' tik. Eh k'ahchi' taq rub'anam awuuk' i Dios je' rukab' noq inyejeb'jik jino'q i paat.

¹⁰Re' hin, re' Dios xye'wik q'ab' weh chi re' hin ximponik ch'ikanoq ruq'orariik taq aweh i ak' k'uhb'aal, je' rukab' noq i rukoj i raa' i paat i aj tz'aqool. Xa re' la' wi wilik chik i xkaaj kich'ikaam chinaah i xponik nuch'ikaa' i hin, kikapaaj chi korik nik' wach ruch'ikib'jiik naa kianam.¹¹Eh re' jino'q i paat ch'ikamaj chik i raa' ma' awach ta chik neench'ikanik reh jino'q chinaah. Je' wo' re' i ak' k'uhb'aal ma' awach ta chik neench'ikanik reh chinaah, ruum re' i Jesucristo i raa' ri'sil¹²Eh wila' awach ch'ikanik reh i tokoom chinaah i k'uhb'aal re' re', neerub'an je' rukab' i rub'an i yej-an paat i rutiq johtoq naah i paat ruuk' oro, ruuk' plata, ruuk' holohaq ab'aj ruuk' chee', ruuk' k'im, ruuk' kaxlan aaj.¹³Re' i rukamaj i Dios i rub'an i ju'jun kore' naa ruk'utiniik chi korik na' k'oloq rub'an i q'ataj q'orik i Jesucristo, ruum re' reh je' naa ruuk' q'aaq' naa ruk'uliik iloq ruuk' i re', naa runik'ib'jiik i ju'jun nik' wach i kamanik xub'an.¹⁴Eh wila' re' i paat i ruyejaa' i neerukuy ransil i q'aaq', nee wo' ruk'ul i rutojb'aal. Je' wo' re' awach i xub'an i rukamaj i Dios chi korik naa wo' ruk'ulum i rutojb'aal.¹⁵Raaj wila' ma' re' rub'aan i rukamaj i Dios xub'an, naa ruk'ulum reh je' rukab' i nee ruk'ul i aj yej-an paat xa re' yu' neenk'ahtik i rupaat, neeruq'eb' i rukamaj, atoob' ta wo' naq neeruko'leej riib' i reh, nee nelik cho rajimam riib' pan q'aaq'.

¹⁶Eh raaj taq i hat, ¿mi ma' aweht'al taq re' chi hat taq rupaat i Dios, chi re' Ruxlab'al i Dios patim taq panawánima?¹⁷Eh wila' awach xsachwik wach i rupaat i Dios, re' wo' Dios naa rusachwiik wach i reh, ruum re' i rupaat i Dios k'ahchi' nuq'orom wili santo, re' taq i hat.

¹⁸Eh maa awach taq aweh i rujot' riib': Wila' awach taq chaxilak i rukapaaj chi wilik runa'ojb'al re' ruuk' i xa na'ojb'al ayu' wach ak'al i ruk'ul chi xa je' ma' xta runa'ojb'al chub'an riib'. Chi je' re', nenooj rureq i na'ojb'al inchalik ruuk' i Dios.

¹⁹Ruum re' i xa na'ojb'al ayu' wach ak'al memil chuwach i Dios. Ruum je' wili i ruq'or i tz'ihb'amaj chaloq: Re' taqe i wilik kina'ojb'al inki a'n kiib' insacharik wach i kina'ojb'al ruum i Dios ruuk' i kitehwachiil inki a'n inki.²⁰Eh je' wo' chik wili i ruq'or pan santo laj huuj: Re' QaJaaw Dios reht'al chi re' kikapeew i wilik kina'ojb'al inki a'n kiib' xa memil laj kapeew, inki.²¹Je' re' noq, ma' awach taq aweh i nee runimb'isaj wach xa ruum i runimjiik i jino'q winaq, ruum chu'nchel i xa chib'ih jariik ruye'em i Dios toob'al taq aweh.²²Re' i hin i Pablo, re' Apolos, re' Pedro, re' Cefas xa hoj raj kamanoom i Dios. Re' wach ak'al, re' k'acharik, re' kimik, re' taqe i q'iij wilkooj wii', re' taqe i q'iij chalik reh, ruye'em taq chaaweh i Dios chi toob'al taq aweh,²³ruum re' taq i hat re' chik i Jesucristo inehchanik taq aweh. Eh re' i Jesucristo re' Dios inehchanik reh. Re' rukamaj i Dios xkian taqe aj tahqaneel

¹Re' taq i hat, inchol taq anab'eem chi re' hoj xa hoj raj to'ool i Jesucristo. Eh ye'ooj chi qanaah chi naa qaq'orom rib'iral i ko'lb'al iib' ruyejaam cho wach i Dios, re' ma' eht'alimaj ta naq najtir.²Eh re' jino'q i sik'ooj wach chub'aan i rukamaj i Dios inchol ruk'uhtaam chi korik wach ruk'ux.³Eh re' hin, ma' xta nwaaj reh mi holohik oon ma' holohik taq nee ti q'orik chi wiij, oon chi neenq'atarik i q'orik chi nunaah. Eh ni xata re' hin neekinq'orik reh mi holohik oon ma' holohik taj i k'ahchi' kiin.⁴Ruum ach ta naq inche inwik'raaj chi ma' xta numahk, ma' ruum tee re' xata chik korik wach nuk'ux. Re' i naa ruq'atwiik q'orik chi nunaah re' i QaJaaw Jesucristo.⁵Je' re' noq ma' awach taq aq'at q'orik chinaah chi komajaa' ruq'ijil, chawuy-eej pee taq chi kore' QaJaaw Jesucristo naa ruk'uliik q'atwoq i q'orik. Re' reh naa risam cho wach saqum imb'aan panq'equm, eh naa rutehem wach inkapeepjik pan ánima, eh naa ruye'em rutojb'aal i ju'jun re' i ruk'ul chi reh.

⁶Hat taq nuhermano, re' hin i nuq'or taq reje aweh nik' wach i nuna'ojb'al i hin, eh nik' wach i runa'ojb'al i Apolos, reh chi nee taq i nak'am naah, k'axb'al taq aweh. Chi je' re', ma' nee ta taq inakapaaj tokoom chi riij i tz'ihb'amaj panhuuj, reh chi ma' nee ta taq inaq'or chi q'e' chihooj i rukamaj i jinaj, eh re' jinaj ma' tz'e'waach taj.⁷Raaj i hat, ¿awach inye'wik runimaal awach noq inakapaaj? ¿chib'ih reet noq inanimb'isaj awiib'? ¿Mi wilik naq chib'ih aweh wi ta ma' xuyeew aweh i Dios? Eh wila' re' reh xye'wik chib'ih aweh, ¿chib'ih reet noq inanimb'isaj awiib'?

⁸Re' taq i hat, xa je' chik taq hat b'ehoom, xa je' chik wilik taq chib'ih cha weh i na a'n awiib'. Eh xa je' chik taq hat reey i na a'n awiib', xa je' chik ma' xta hoj kamaj taq aweh. Xti korik ta wo' naq chi hat taq reey, nee naq qoh-ehtrik haa' taq awajaawriik⁹Re' hin i nukapaaj chi re' Dios je' cho k'ahchi'kooj rukanaam i chi ma' xta qajaawriik i hoj, i hoj raj tahqaneel i Jesucristo. Imb'aan qeh je' rukab' imb'aan reh jino'q prexo naa rukanteesjiik. Iruyeeqab' i Dios chi nk'uhtjik qak'ixb'ilaal, qoh kahnik chi kise'lb'aal taqe ánjel, je' wo' taqe tinamit ayu' wach ak'al.¹⁰Re' hoj ma' xta qana'ojb'al noq inkiq'or i tinamit ruum i runimjiik i Jesucristo. Eh re' taq i hat, inkiq'or taq chi wilik taq ana'ojb'al. Re' hoj, ma' xta rukowiil qak'ux noq inkiq'or, re' taq i hat, kow taq ak'ux noq inkiq'or. Re' hoj, inkixow qa wach, re' taq i hat, nkiyeew taq aloq'il.¹¹Eh re' hoj yu'naak xama' qakanaam ta wo' hoq i kuyuj qawa' qahaa', xa ruuk' ti' k'axik inqakoj qaso', inki a'n ti' k'axik qeh, eh ma' xta qapaat aha' nee qoh patinik wii'.¹²Eh chayeew i kamanik inqa a'n korehtaal qoh q'uhtik sik'b'al tz'aaq chib'ih qeh, re' tinamit qohkib'aj, eh re' hoj inqapahqaaj i rotob'il i Dios chikiij. Eh inqakuy i rixowjiik qawach inki a'n¹³Noq ma' holohik ta kiq'orik chiqiij, inqachaq'weej taqe ruuk' holohaq q'orik. Eh xa ko je' wo' re' inki a'n qeh yu'naak, xa je' hoj sohk' panaq'kiwach, xama' xta qoh okik wii' chikiwach.

¹⁴Hermano, re' hin inutz'ihb'aaj taq reje aweh taqe wili, ma' re' ta k'uhtb'al taq ak'ixb'ilaal, kojb'al la' taq ana'ojb'al, ruum je' taq hat wak'uun noq wilkaat.¹⁵Eh wilik ta nare' inche lajeeb'-oq miil i neekitijinik taq aweh ruuk' i runimjiik i Jesucristo, k'oloq taq panak'ux chi ma' k'ih ta taq i jilow awajaaw noq wilik, ruuk' i runimjiik i Jesucristo, xa re' wo' hin, ruum re' i hin xinq'orik taq aweh chi peet i ak' k'uhb'aal.¹⁶Je' re' noq i nupahqaaj taq otob'il aweh chi chak'am taq naah i nuna'ojb'al i hin.¹⁷Ruum i wili xnutaq'aaj taq reje awuuk' i Timoteo korik wach ruk'ux, q'e' nuk'ax. Je' wak'uun noq wilik ruuk' i runimjiik i Jesucristo. Re' reh nee nq'orik ponoq taq aweh nik' wach runimjiik i Jesucristo k'ahchi' kiin. Eh je' wo' re' inuk'uhtaaj keh i aj nimaneel xa aha' yuuq'.

¹⁸Wilik ju'jun taq chaxilak i xa nimaq chik kiwach inki a'n kiib'. Noq inkikapaaj i keh chi ma' naa ta wojiik taq chaq'orob'jiik.¹⁹Re' hin naa taq wojiik chaq'orob'jiik chi jumehq'iil wila' je' re' xraaj i QaJaaw. Ar aj naawilom re' i kichol rub'aan taqe i nimaq kiwach inki a'n kiib' re' re'. Eh mo'q xa re' kichol ruq'orariik i neenooj b'iraj keh,²⁰ruum re' runimaal rajaawriik i Dios ma' nkan ta xa ruum ta chi nchol q'orik jino'q ruuk' la' wo' i rajaawriik i Dios neenkan.²¹Eh ¿Mi nawaaj taq chi nee kinooj k'oloq taq awuuk' pan josq'iil? oon ¿inawaaj taq chi nee kinooj k'oloq taq awuuk' panotob'il? Q'ataj q'orik chinaah i xb'anik ree nimlaj mahk

¹Eh wilik rib'iral i k'oyomal taq chaxilak, jinaj b'ila' wilik ar k'ahchi' rixooqb'eem i rukab' rutuut. Re' yiib' wach na'ojb'al re' re' nimlaj mahk chi b'anarik ni xata chi kixilak i ma' re' ta aj nimaneel imb'aan.²Eh re' taq i hat xanaa niimb'isaj taq chik awach, xanaah re', i ruk'ul naq chi natiib'isaj taq ak'ux chi riij imb'aan re' re'. Re' winaq imb'anik reh i mahk re' re', xti ruk'ul chi nee taq inawesaj reje chaxilak.³Korik noq re' hin, atoob' ta ma' wilkiin taq ponoq chaxilak, wilkiin la' ponoq ar panuxlab'al. Eh je' naa wilkiin taq ponoq chaxilak, ruum xnuq'at chik reje q'orik chinaah imb'anik reh i mahk re' re'.⁴Noq nee taq inamol awiib' i hat chi looq'jiik i Dios, re' hin neekinwihik taq awuuk' panuxlab'al, eh neen wihik taq awuuk' i rajaawriik i QaJaaw Jesucristo.⁵Eh re' i winaq imb'anik reh i mahk re' re', i ruk'ul chi nee taq inaq'asaj pan q'ab' i aj Yahm, reh chi neenik'ik chi ti' k'axik. Eh wila' xujal wach i runa'ojb'al, neenko'ljik i ránjel rut'iosil na' k'oloq ruka'peech i QaJaaw Jesucristo.

⁶Re' taq i hat, maa niimb'isaj taq awach ruuk' mahk i rub'an winaq re' re'. ¿Mi ma' aweht'al taq re' hat noq atoob' ta xa k'isiin i ch'amb'esb'al ruq'oril kaxlanwi'k neenokik, nee ruch'aamb'isaj k'ih-oq i q'oor?⁷Eh cha kanaa' taq rub'aan i mahk, re' i je' q'aah laj ch'amb'esb'al ruq'oril kaxlanwi'k, je'-oq taq hat kaxlanwi'k kore' xkorjik ma' kojooj ta ch'amb'esb'al reh. Ruum re' i Jesucristo, xkanteesjik chik quum i hoj chi jilow mayiij reh i runinq'ijiik i elik chaloq Egipto.⁸Eh inchol qaninq'ijeem i ruuk' suq kiil k'uxliis, eh ruuk' nimanik chi korik, re' je' rukab' i kaxlanwi'k ma' kojooj ta ch'amb'esb'al reh. Eh ma' nee ta inqaninq'ijeej wach ruuk' rub'anariik i ma' tob'laj na'ojb'al, je' rukab' i q'aah laj ch'amb'esb'al ruq'oril kaxlanwi'k.

⁹Chupaam i nuhuuj xnutz'ihb'aaj pampeet, xnuq'or taq reje aweh chi maa a'n taq jinaj wach ak'ux kuuk' i kib'anik reh i k'oyomal.¹⁰Eh ma' xnuq'or ta taq reje aweh panhuuj chi ma' naa ta taq aq'oreem taqe i aj k'oyomal, taqe i aj k'axal wach b'ehomal, taqe i aj jileq', taqe i looqen tiyoox wilkeeb' wach ak'al. Qaq'or chi ma' nee ta naq'oreej taq chi jumpech i ruk'ul naq chi nee taq ti elik reje ayu' wach ak'al.¹¹Re' xnuq'or taq reje aweh re' chi ma' nee ta taq i na a'n jinaj wach ak'ux kuuk' i xa nkikoj kiib' chi hermano b'anal k'oyomal, aj k'axal wach b'ehomal, aj looq'en tiyoox, aj molol-oq wach k'utaaj, aj xohk'reel, eh ajileq' taqe. Re' taqe re', ma' ruk'ul ta taq cha weh chi nee taq i na a'n awa' kuuk'.¹²Chakoj taq rehtaal noq re' hin, ma' ruk'ul ta chi neenuq'at q'orik chikinaah i ma' re' ta taqe aj nimaneel. Re' keh, kore' wo' Dios naa ruq'atwiik q'orik chikinaah.¹³Ruum re' taqe i ma' re' ta aj nimaneel re' Dios naa ruq'atwiik i q'orik chikinaah. Eh re' taq i hat cha q'at taq i q'orik chikinaah i aj nimaneel inki a'n kiib'. Chawesaj taq cho chaxilak i winaq imb'anik reh i mahk. Re' i peleto imb'aan injalarik chikiwach i q'atal q'orik ma' re' ta taqe aj nimaneel

¹Eh noq wilik taq apeleto chawach ruuk' awuch aj nimaneel, ¿chib'ih reet noq inooj taq ajal kuuk' i q'atal q'orik ma' re' taqe aj nimaneel? ¿Mi ma' ruk'ul naq re' chi ruuk' i q'atal q'orik aj nimaneel neenooj taq ajal?²¿Mi ma' aweht'al taq re' hat chi re' taq hat aj nimaneel naa aq'atwiik q'orik chikinaah i tinamit? Eh wila' re' taq i hat naa aq'atwiik q'orik chikinaah i tinamit, ¿chib'ih reet noq ma' nee taq tichol ruyejeb'jiik i ma' k'axik ta ruyejeb'jiik?³¿Mi ma' re', re' hoj naa qaq'atwiik q'orik chikinaah ánjel? Wila' je' re', ¿chib'ih reet noq ma' neenqa a'n ruyejeb'jiik chi qawach inqak'ul pan qak'achariik?⁴Eh noq wilik taq apeleto i hat chawach chi riij ink'ularik ayu' wach ak'al, ¿chib'ih reet noq kuuk' taqe q'atal q'orik ma' re' ta taqe aj nimaneel inooj taq ajal?⁵Re' i wili i nuq'or taq reje aweh reh chi neenchalik taq ak'ixiik: ¿Mi ma' chih taq jino'q chaxilak re' i hat i neerub'an ruyejeb'jiik parukorkiil nik' wilik taq apeleto chawach i hat?⁶Eh re' i peleto taq i na a'n chawach kuuk' taq awuch aj nimaneel, kuuk' chik inche taqe i q'atal q'orik ma' re' ta taqe aj nimaneel inooj taq ajal.⁷Eh wi xa re' peleto taq i na a'n chawach, k'ixb'ilaal taq cha weh. ¿Mi ma' chihooj naq re' chi xakuy naq taq ruk'ulariik i ti' k'axik inki a'n taq aweh? ¿Mi ma' chihooj naq re' chi xakuy naq taq kimahk i kielq'anik taq chib'ih aweh?⁸Raaj i wili, re' chik inche taq i hat tib'anik reh i ma' re' ta rub'ehel, inooj inchi taq awelq'aaj i chib'ih keh taq awuch aj nimaneel.

⁹¿Mi ma' aweht'al taq re' hat chi re' taqe i ma' korik ta wach kik'ux ma' naa ta kokiik pa runimaal rajaawriik i Dios? Eh ni xata re' i taqe aj k'oyomal, taqe i looq'en tiyoox, taqe inkich'uwareej wach kikaxaro, taqe i kimahkunik ruuk' kuch winaq, naa kokiik ar.¹⁰Eh ma' jaruuj wo' naa kokiik ar taqe ajileq', taqe k'axal wach b'ehomal, taqe aj xohk'reel, taqe aj molol wach k'utaaj, taqe q'uchul chib'ih keh kas kichaaq'.¹¹Eh wilik wo' naq taq chaxilak i hat i je' re' i kina'ojb'al. Raaj yu'naak tz'ajooj chik iloq taq amahk, eh aq'asam taq chik awiib' chub'anariik iraaj i Dios. Hat taq chik ko'limaj chuwach i mahk parub'ihnaal i QaJaaw Jesucristo, parub'ihnaal i Santolaj ruxlab'al i qaDios. Re' qati'jolal inchol ruwihiik rusantohiil

¹²Eh wilik inq'orik reh chi je' wili: chu'nchel i ruk'ul chi neenub'an inki. Ma' je' taj ruum ma' chu'nchel ta atoob' chi b'anarik. Chawil taq i hin i ruk'ul wo' naq chi nee nub'an chu'nchel, xa re' la', ma' jino'q keh i re' xata chik neenuyeew nuk'ux chub'aan.¹³Eh wilik wo' kiq'orik reh chi re' qawa' qahaa' reh i qapaam, eh re' qapaam ye'aab' qawa' qahaa', inki taqe. Korik chi je' re' xa re' la' re' re' naa rusacham wach i Dios kab'chel. Eh ma' korik taj chi re' qati'jolal b'anb'al k'oyomal, ruum re' qati'jolal reh i QaJaaw Jesucristo naa rukamaniik, eh naa rukamaniik i QaJaaw reh i qati'jolal.¹⁴Eh re' Dios xruksaj wo' chik chaloq i QaJaaw Jesucristo, je' wo' chik re' na' qoh ruksaj chaloq i Dios i hoj chi k'achlik qawach ruuk' i runimaal rajaawriik.

¹⁵¿Mi ma' aweht'al taq re' hat chi re' i qati'jolal i hoj, i hoj chik aj nimaneel, jilow ruti'jolal i Jesucristo noq wilik? Eh wila' je' re', ¿mi neeruyee riib' chi re' i jilow ruti'jolal i Jesucristo chi neenqak'ulaa' i koq wach ruuk' jino'q i k'oyoom laj ixoq? Ra'j xti ma' jaruuj neeruyee riib' re'¹⁶¿Mi ma' aweht'al taq re' hat chi re' i winaq i mahkunik ruuk' i k'oyoom laj ixoq i rub'an jinaj wach i kiti'jolal kikab'cheel? ruum pan santo laj huuj i ruq'or chi je' wili: Re' taqe ki'ib' inkik'ulaa' kiwach inkahnik chi xa jinaj i chik taqe, inki.¹⁷Eh awach i ruk'ulaa' riib' ruuk' i Jesucristo, inkahnik chi xa jinaj chik wach ruuk' panuxlab'al.

¹⁸Re' taq i hat, chaq'eb' taq chi riij ak'ux i k'oyomal. Korik noq xa chib'ih naa chik jariik i mahk neerub'an winaq xa re' la', ma' re' taj i ruti'jolal i ruyeew pamahk. Raaj awach imb'anik reh i k'oyomal, re' i ruti'jolal i ruyeew pamahk.¹⁹¿Mi ma' aweht'al taq re' hat chi re' taq ati'jolal rupaat i Santolaj Uxlab'al? re' i ruye'em taq panawánima i Dios. Iraaj ruq'orom chi re' taq ati'jolal ma' aweh ta taq cha wib'il awiib',²⁰ruum re' Dios xiik' naah k'ihaal xatruloq' taq wii'. Ruum aj re', inchol taq aye'em ruloq'il i Dios ruuk' taq ati'jolal jumpa'liik ruum reh wo' hoq i Dios. Kojooj na'ojb'al chi riij i kaxárohiil

¹Hermano, re' xapahqaaj taq cho weh panhuuj chi riij i kaxárohiil. Re' hin i nuq'or taq reje aweh chi ma' xta naq reet chi reh i winaq chi ma' nee ta rub'an kaxáro.²Xa re' la' ruum i k'oyomal imb'aan, ajwaal wach chi re' i ju'jun chi winaq naa rusik'im rehk'een. Eh je' wo' hoq i ju'jun chi ixoq ajwaal wach chi naa ruwihiik rub'ahiil.³Re' i b'ahiilb'ees inchol ruch'ikaam ruk'ux i rehk'een, je' wo' hoq i ehk'eenb'ees inchol wo' ruch'ikaam ruk'ux i rub'ahiil, je' rukab' i kanamaj chikinaah ruum i kaxárohiil.⁴Re' i ehk'eenb'ees, ma' re' ta chik i reh q'oreel chinaah i ruti'jolal, re' la' chik i rub'ahiil q'oreel chinaah. Eh je' wo' hoq i b'ahiilb'ees, ma' re' ta wo' chik i reh q'oreel chinaah i ruti'jolal, re' la' chik i rehk'een q'oreel chinaah.⁵Eh maanijisaj taq awiib' chawach, wila' komajaa' pee taq chik naa aq'o'reem awiib' ruum i rub'aan taq atiij chu'nchel ak'ux, ko naa taq a'nam jinaj wach ak'ux pan kiib'al. Chi riij i re', nee wo' chik taq inaq'oreej awiib', ruum wi ma' xa a'n taq i je' re' eh mo'q xa a'n taq rukuyariik awiib', yohb'aal mat ruq'eb' taq pan k'oyomal i aj Yahm.

⁶Re' taqe xnuq'or taq reje aweh wili xa kojb'al taq ana'ojb'al ma' re' ta jino'q k'uhb'aal.⁷Re' hin inwaaj naq chi chu'nchel i winaq ma' nee ta nkian kaxáro, nee kikahnik chi je' rukab' i hin. Xa re' la' ma' nee ta rub'an, ruum re' Dios reh reh wach i kooch ruye'em cho chinaah i ju'jun ma' eliik ta wach i xuyeew chi qanaah.

⁸Re' hin i nuq'or reje keh i komajaa' inki a'n kaxáro, je' wo' keh ixoq kamnaq kib'ahiil: Chi ma' xta naq reet chi nee kikahnik chi kutkeel, je' rukab' i hin.⁹Raaj wila' ma' neenkikuy i wihik chi kutkeel, inchol kianam kaxáro, ruum ma' xta reet chi neenkian kaxáro chuwach chi neenkiq'eb' kiib' pan k'oyomal.

¹⁰Eh re' taqe kianam chik kaxáro, i nutaq'aaj reje ruq'orariik chi re' taqe ixoq mankikanaa' chik kib'ahiil. Re' wili ma' xata nuq'oral i hin, ruk'uhb'aal la' i QaJaaw.¹¹Eh wila' xukanaa' i rub'ahiil, marub'an chik kaxáro chi jumpech, oon chuq'unej wo' chik wach i rub'ahiil. Je' wo' re' i b'ahiilb'ees, ma' ruk'ul ta chi nee rukanaa' i rehk'een.

¹²Re' hin kinq'orik taq reje aweh i wili, ma' re' ta ruk'uhb'aal i QaJaaw: chi wila' wilik jino'q i hermano taq chaxilak ma' re' ta aj nimaneel i rehk'een, ma' ruch'aq irukaxaro ruuk', wila' re' i rehk'een i ruk'ul wach i k'acharik ruuk' chi je' re'.¹³Eh wila' wilik jino'q i hermana ma' re' ta aj nimaneel i rub'ahiil, eh i ruk'ul-oq ruk'ux i k'acharik chi je' re' ruuk' i rehk'een, re' hermana re' re' maa rukanaa' i rub'ahiil,¹⁴ruum re' jino'q i b'ahiilb'ees ma' re' ta aj nimaneel inehtrik i rotob'il i Dios chi riij i rehk'een. Eh re' ehk'eenb'ees ma' re' ta aj nimaneel inehtrik wo' hoq i rotob'il i Dios chi riij i rub'ahiil. Eh wi ta ma' je' re', yiib' naq wach i kina'ojb'al taq awak'uun awixq'uun raaj i wili, rutinamiit Dios chik taqe.¹⁵Eh wila' re' b'ahiilb'ees oon ehk'eenb'ees ma' re' ta aj nimaneel inkaaj kich'aqam kiib', inchol kich'aqam kiib'. Ruum re' winaq aj nimaneel re' ixoq aj nimaneel ma' b'ak'lik ta ar chi jumpech, yuuq'imaj la' taqe ruum i Dios chi k'acharik pansuqkiil k'uxliis.¹⁶Eh re' hat ehk'eenb'ees, ma' ch'aq ab'ahiil, ¿chib'ih neenanab'eej i hat ruq'iij awuum i hat nee rureq ko'lemb'al riib'? ¿Chib'ih neenanab'eej i hat b'ahiilb'ees, ru q'iij awuum i hat nee rureq ko'lb'al riib' awehk'een?

¹⁷Xa nik' pa' wach noq wilik i ju'jun, xa re' la' chub'aan i rotob'il i QaJaaw Jesucristo ruk'ulum noq xsik'arik cho wach ruum i Dios pampeet. Re' k'uhb'aal wili i nuq'or keh chu'nchel i ju'jun ch'uq chi aj nimaneel.¹⁸Wila' xsik'arik cho wach ruum i Dios chi xpoch'arik naah i ruk'achab' kahnoq chi poch'ooj naah i ruk'achab'. Eh wila' xsik'arik cho wach ruum i Dios chi ma' poch'ooj ta naah i ruk'achab', kahnoq chi ma' poch'ooj ta naah i ruk'achab',¹⁹ruum re' re' ma' xta q'orik reh mi poch'ooj naah i ruk'achab', oon ma' poch'ooj ta naah i ruk'achab'. Re' i xti ajwaal wach re' chi naa runimam taqe ruq'or i ruk'uhb'aal i Dios.²⁰Re' ju'jun, inchol rukahniik chi je' rukab' noq wilik cho pampeet noq xsik'arik cho wach ruum i Dios.²¹Eh wi hat k'ayimaj pankowlaj kamanik noq xusik' chaawach i Dios, mat kapeb'ik ruum i re', wila' xuyee riib' chi neenawesaj iloq awiib' pan q'ab' inchopwik anaah, chawesaj iloq awiib',²²Eh re' i choplik naah pankowlaj kamanik noq xsik'arik cho wach chunimjiik i Jesucristo, yu'naak tehlik chik wach chub'anariik i rukamaj i QaJaaw. Eh re' i ma' xta chopol naah noq xsik'arik cho wach, yu'naak re' chik i QaJaaw Jesucristo inchopwik naah.²³Chanab'eej taq chi re' Dios k'ih taq xatruloq' wii'. Ruum aj re', maayeew taq chik q'ab' keh i tokoom chi nee wo' chik taq tikimin chub'anariik i mahk.²⁴Re' taq i hat hermano, maakanaa' taq chik i nimanik nik' wach i xa a'n taq cho pampeet noq xusik' taq chaawach i Dios.

²⁵Eh chikiij ma' naa ta kia'nam kaxáro, re' QaJaaw ma' xtaj k'uhb'aal ruq'orom weh chi riij. Re' hin ruum chi xnuk'ul chik i rotob'il i QaJaaw xa panuk'ux inchalik chi naa nukojom kina'ojb'al, naa nuq'orom chi inchol chi neekinimjik.²⁶Noq i nukapaaj i hin chi ma' xta naq reet chi ma' nee ta inki a'n kaxáro taqe i komajaa' inki a'n kaxáro, ruum i k'axik ink'ularik chupaam i k'acharik yu'naak.²⁷Wila' wilik awehk'een, maakapaaj chik ruch'aqariik awiib' ruuk'. Eh wila' ma' chi awehk'een, maakapaaj rusik'ariik chi jumpech.²⁸Wila' xa a'n kaxáro, ma' re' ta mahk i neena a'n. Eh wila' xub'an kaxáro i q'ahxoq, ma' re' ta wo' mahk i neerub'an. Xa re' la' re' taqe inki a'n kaxáro ti' naakik'iik wii', re' hin ma' nwaaj ta naq chi je' re' ineenkik'ul.

²⁹Hermano, re' inwaaj nuq'orom re' wili: Re' k'acharik ayu' xama' najt ta chik naa rub'aan. Ruum aj re', awach i kaxáro taqe xa je'-oq ma' chi kehk'een, xa je'-oq ma' chi kib'ahiil kian kiib'.³⁰Eh awach taqe oq'ik inki a'n manki k'uhtaaj chi oq'ik inki a'n Awach taqe i suq kik'ux, xa je'-oq ti' kik'ux kian kiib'. Eh awach taqe inkiloq' chib'ih keh, xa je'-oq ma' xta chib'ih keh kian kiib'.³¹Eh awach taqe i k'ahchi' kianam rusuqkiil i chib'ih jariik wilik wach ak'al, xa je'-oq ma' k'ahchi' kianam rusuqkiil kian kiib', ruum re' ruholwochiil i wach ak'al wili xa sahchik wach reh.

³²Re' hin inwaaj naq taq ako'ljiik chuwach i tiqajik taq wii' kapeew. Re' i ko rutkeel riib', re' iraaj i QaJaaw i ruyeew ruk'ux chub'aan, eh i rusik' chi riij nik' wach noq neeruloq'ej i QaJaaw.³³Eh re' jino'q winaq rub'anam chik kaxáro inqaaj wo' kapeew chi riij i xa chib'ih jariik wilik ayu' wach ak'al chi k'axb'al ree rehk'een.³⁴Ki'ib' wach i na'ojb'al wilik, re' ixoq ma' kaxáro taj i ruyeew ruk'ux chub'aan iraaj i QaJaaw i ruq'asaj riib' reh chi korik reh chi rureq rukorkiil wach ruk'ux. Eh re' ixoq rub'anam chik kaxáro, inqaaj kapeew chi riij i xa chib'ih jariik wilik ayu' wach ak'al chi k'axb'al reh i rub'ahiil.³⁵Re' hin i nuq'or taq reje aweh i wili toob'al taq aweh. Ma' re' ta q'ilb'al taq aweh i nub'an, ruum inwaaj naq chi holohik taq nee ti wihik. Chi je' re', nee naq taq inaq'asaj awiib' chi manlik parukamaj i QaJaaw.

³⁶Wila' wilik i ajaab'ees i rukapaaj chi ma' xta reet chi neerub'an kaxáro i rixq'uun ruuk' i k'ijool k'ahchi' ruq'uniniik reh, chub'an kaxáro, wila' i rukapaaj chi rub'ehel i neerub'an. Ruum ma' mahk taj chi neerub'an kaxáro i rixq'uun.³⁷Eh wila' wilik chik jino'q i xukapaaj riij chi korik i chi ma' nee ta rub'an kaxáro i rixq'uun, ma' xta reet i neerub'an, ruum re' reh q'oreel chib'ih pa' neraaj rub'anam ma' awach ta neeminwik reh chupaam.³⁸Je' re' noq awach ma' nee ta ruyeew pan kaxáro i rixq'uun, ma' xta reet i neerub'an. Eh wi ma' xuyeew pan kaxáro i rixq'uun, xiik' wo' naah chihojal neerub'an.

³⁹Re' ixoq rub'anam kaxáro choplik naah ruum i k'uhb'aal ruuk' i rub'ahiil noq ko k'achlik i rub'ahiil. Eh wila' xkimik reje i rub'ahiil, neeruyee riib' chi xa awach pa' jino'q i aj nimaneel neerub'an wii' kaxáro chuwach i QaJaaw.⁴⁰Atoob' ta nukapaaj naq i hin chi q'e' naq suq neen wihik ixoq kamnaq rub'ahiil wila' ma' xub'an chik kaxáro. Eh re' hin i nukapaaj chi wilik wuuk' i Ruxlab'al i Dios ruuk' ruq'orariik taq reje aweh wili. Re' wi'k ha' inye'arik chi mayiij chikiwach i tiyoox

¹Re' hin wilik inwaaj nuq'orom taq reje aweh, chi riij i wi'k ha' inye'arik chi mayiij chikiwach i tiyoox. Korik chi re' hoj wilik qana'ojb'al chiquncheel. Xa re' la' re' i na'ojb'al xan sahchik wach. Re' k'axaj iib', inye'wik rukowiil qak'ux panqanimaniik.²Eh awach i rukapaaj chi wilik runa'ojb'al, iraaj ruq'orom chi komajaa' runab'eej aha' wilik i na'ojb'al iraaj eht'aljik.³Eh awach ink'axwik ree Dios chi korik, re' Dios reht'al wach chi re' re' rak'uun rixq'uun.

⁴Eh chi riij i ruk'uxariik i wi'k inye'arik chi mayiij chikiwach i tiyoox kapeeb'jik riij iraaj. Re' hoj qeht'al chi re' jino'q i tiyoox ma' xta rajaawriik ayu' wach ak'al. Eh qeht'al wo' hoq chi xa jinaj wo' Dios xa re' wo' reh wilik rajaawriik.⁵Atoob' ta naq inche wilik i kikojariik chi dios chi je' pan taxaaj chi je' wach ak'al wilkeeb', (re' taqe junch'uq k'ih inkikoj chi ki dios, inkikoj chi kajaaw)⁶Eh re' hoj, xa jinaj chi Ajaab'ees Dios inqayeew rajaawriik ma' xta chik jino'q chuwach i reh, ruum xa re' wo' reh xyej-anik reh chu'nchel chib'ih jariik i wilik. Eh re' wo' reh xyej-anik qee hoj, eh xa jinaj wo' hoq inehchanik qeh, re' i QaJaaw Jesucristo, xa ruum i reh xtz'uhkrik chu'nchel chib'ih wilik. Eh xa ruum i reh k'achalkooj i hoj.

⁷Xa re' la', ma' chu'nchel ta kieht'alinik reh chi re' taqe i tiyoox ma' xta kajaawriik. Wilik i okrinaq taqe chi kilooq'jiik. Eh noq inkik'ux i wi'k mayijimaj chikiwach i tiyoox, inkikapaaj chi, chi rulooq'jiik inki a'n Eh xanaah re' ruum chi ma' kow ta kik'ux inkikapaaj chi nkich'uwa'reej wach i kinimaniik.⁸Xanaah re', ma' ruum ta wo' naq i qawa' qahaa' nee qoh ponik chuwach i Dios. Wi xqak'ux qeh i mayijimaj wi'k, ma' nee ta qohkahnik chi q'e' hoj chihooj laj aj nimaneel. Eh wi ma' xqak'ux qeh, ma' nee ta wo' qohkahnik chi ma' hoj ta chihooj laj aj nimaneel.⁹Re' taq i hat, neerub'an chi nee taq inak'ux aweh. Xa re' la', chawik'raaj taq awiib' mo'-oq ruum i re' taq nee naq'eb' pamahk taqe i komajaa' ta kow kik'ux chi nimanik,¹⁰ruum wi re' hat aweht'al chi ma' toob' ta chi k'uxarik taqe i re', eh inatzunaa'-oq awiib' chi wi'k nah mexa pan kiye'aab' i tiyoox, eh qaq'or chi xatrilow jino'q hermano komajaa' kow ruk'ux chi nimanik, nee wo' chik iraaj ruk'uxum ree reh i wi'k ha' mayijimaj chikiwach taqe tiyoox.¹¹Eh wila' xak'ux aweh i hat, ruuk' i re' nee naq'eb' pamahk aahermano komajaa' kow ruk'ux, re' i xuloq' i Cristo ruuk' i rukimiik wach kuruus.¹²Noq inatiib'isaj taq kik'ux taqe hermano komajaa' kow kik'ux, chuwach i Jesucristo taq k'ahchi' amahkuniik.¹³Ruum aj re', re' hin wi ruum i nuwa' nuhaa' neenuq'eb' pamahk i nuhermano, ma' xta reet chi ma' nee ta nuk'ux chi jumpech i mayijimaj tiwik, reh chi ma' nee ta nuyeew pamahk i nuhermano. Re' jino'q i raj tahqaneel i Jesucristo i ruk'ul chi naa rutojariik

¹Re' hin, hin aj tahqaneel, neenub'an chib'ih inwaaj, ruk'ul wo' chi weh chi nee kintoob'jik, xwilow wo' wach i QaJaaw Jesucristo. Eh ruum i nukamaj xnub'an taq awuuk' hat taq chik reh i Cristo²Wila' re' taqe junch'uq ma' kinkikoj ta chi hin raj tahqaneel i Jesucristo, ma' xta q'orik reh. Cha weh taq i hat hin raj tahqaneel, ruum re' hin xinq'orik taq aweh i ruk'uhb'aal, eh yu'naak k'ahchi' taq chik animam.

³Re' taqe wili i nuq'or chi ko'lb'al wiib' chikiwach i kiwech'inik weh chi riij i k'ahchi' kiin:⁴Re' hin i ruk'ul wo' chi weh chi neenkisiij nuwa' nuhaa' taqe i hermano⁵Eh ruk'ul wo' naq chi weh hin chi neenusik' wehk'een re' ruuk' i aj nimaneel, reh chi nee naq inuk'am chi wiij parukamaj i QaJaaw, je' rukab' inki a'n taqe aj tahqaneel junch'uq, eh je' wo' rukab' inki a'n taqe ruchaaq' i QaJaaw, ruch'ihil i Cefas⁶Eh re' hin, ruch'ihil i Bernabé ruk'ul wo' naq chi nee qoh kik'uxlaaj taqe i aj nimaneel⁷Eh ma' jino'q rukoj riib' chi soldado hiil neerutoj chi rutkeel i k'uxumb'al riib'. Ma' jino'q i rutik ru-uuva chi ma' ta neeruk'ux ree wach, ma' jino'q i ruk'isaj rutentzuun, chi ma' ta neeruk'ej reh i lecha i ruyitz'.

⁸Re' wili ma' xata hin kinq'orik reh je' la' wo' re' i ruq'or i najtir k'uhb'aal⁹Chupaam i huuj re' re' je' wili i ruq'or: Maab'ak' i ju' i b'ooyax i k'ahchi' ruyeq'em parooq i trigo re' reh kamanik i rub'an, inki. Ruuk' i q'orik wili ma' xa re' i b'ooyax ti' riik'raaj i Dios¹⁰Chiqiij la' wo' hoj inq'orik ruum q'e' ti' qoh rik'raaj, ruum re' k'uhb'aal toob'al qeh noq xtz'ihb'jik chaloq. Je' re' noq awach i rab'ixeej wach i ye'aab', awach i ruch'ey i rutrigo ch'iklik ruk'ux chi naa runik'eem i wach i rutik.¹¹Eh wila' re' hoj xponik qatik taq panawánima i ak' k'uhb'aal, ruk'ul naq chi qeh chi nee taq qoh awunej k'isinoq i chib'ih taq i wilik aweh¹²Wila' re' chik taqe tokoom kib'anik rusuqkiil taq i naa kamaneej wach, ra'j naa chik re' hoj ma' ruk'ul chi nee taq i nayeew qeh.
Xa re' la', re' hoj ma' qapahqaaj ta taq aweh. Najtir la' nqatoq'aa' cho rukuyariik aha' naq wilik i ajwaal wach chi qeh, re' xqaaj chi ma' awach ta taq aweh xwech'inik qeh chi riij i ruq'orariik i ru ak' k'uhb'aal i Jesucristo.¹³Re' taq i hat aweht'al taq chi re' taqe i xi kamanik cho parupaat i Dios re' wo' i mayiij xik'acharik cho wii'. Eh chi re' taqe i kikamanik wach artaal re' wo' i mayiij xi k'acharik cho wii'¹⁴Eh re' i QaJaaw Jesucristo ruq'orom wo' chaloq chi re' taqe i naa kiq'oriik rib'iral i ak' k'uhb'aal ruuk' wo' i kikamaj re' re' naakik'aach.¹⁵Raaj i hin, ma' xta inuk'ulum cho chi riij i rukamaj i Dios. Re' taqe q'orik wili xnutz'ihb'aaj taq reje aweh ma' re' ta pahqb'al chib'ih weh taq aweh. Ma' xta la' naq reet chi peet ta neekinkimik chuwach chi awach neenq'uchwik reh i ch'iklik reje wii' nuk'ux.

¹⁶Chi wee hin i ruq'orariik i ak' k'uhb'aal ma' re' ta reh nimb'esb'al nuwach, ruum re' hin kanamaj chi nunaah chi naa nub'anam ruq'orariik. Eh q'e' naq ti' ineenuk'ul wi ta ma' neenuq'or rib'iral i ak' k'uhb'aal¹⁷Ruum aj re', wi xnub'an chu'nchel nuk'ux, naa nuk'ulum nutojb'aal chi riij i nukamaj wili. Eh wila' kow ruq'orariik xnub'an, xanaa wo' nub'anam ruq'orariik, ruum re' i Dios xkananik chi nunaah.¹⁸Eh re' nutojb'aal i nuk'ul i hin re' rusuqkiil nuk'ux chi ma' k'ahchi' ta nupahqaam nutojb'aal chuq'orariik rib'iral i ak' k'uhb'aal. Chi ma' k'ahchi' ta nupahqaam taq tz'aaq aweh i nukamaj, atoob' ta ruk'ul wo' naq chi weh.

¹⁹Ma' re' ta nkiwii' chi ma' awach ta chopwinaq nunaah, nuye'em la' wiib' pankowlaj kamanik chu'nchel aj uuk', reh chi neenkinimaj i Jesucristo ruk'ihaal-oq chi qas qachaaq'.²⁰Noq kinwihik chi kixilak taqe aj judío, je' hin jinaj aj judío i nub'an wiib' kuuk', re' nwaaj chi neenkinimaj i Jesucristo taqe i kinimanik ree najtir k'uhb'aal. Re' hin i nub'an jinaj nuwach kuuk' chunimjiik i k'uhb'aal re' re', atoob' ta ma' re' taj i k'uhb'aal re' re' inchopwik nunaah i hin.²¹Noq kinwihik chi kixilak i ma' kinimanik ta reh i najtir k'uhb'aal, je' ma' nunimaj taj i hin i nub'an wiib', re' inwaaj chi neenkinimaj i Jesucristo. Atoob' ta re' hin korik chi wilik wuuk' i ruk'uhb'aal i Dios, ruum i nunimaj i ruk'uhb'aal i Jesucristo.²²Eh noq kinwihik chi kixilak i ma' kow ta kik'ux chi nimanik, xa je' ma' kow ta nuk'ux i nub'an wiib' haa' i hin kuuk', re' inwaaj chi neenkowjik kik'ux. Re' hin xa chu'nchel aj uuk' i nub'an jinaj wach nuk'ux, re' inwaaj chi wilik i neenkireq ko'lemb'al kiib'.²³Eh chu'nchel i wili i nub'an i hin ruum i ruq'orariik rib'iral i ak' k'uhb'aal, reh chi nee wo' nureq ko'lemb'al wiib' i hin.

²⁴Re' taq i hat aweht'al taq chi re' taqe i kiokik chi pajaj ajiim pank'onb'al junokiik wo' naq taqe chi pajaj ajiim eh xa jinaj wo' hoq ink'ulwik reh i kooch. Chachop wo' taq ak'ux i hat chi nimanik korehtaal taq neenak'ul aakooch.²⁵Eh re' taqe inkichop kik'ux chi ajiim, inkikanaa' rub'aan i ma' suq ta rub'an keh. Re' keh je' re' inki a'n xa ruum i rehchaljiik i corona i xaq chee' ruyej-aal xa re' yu' inchiqik. Raaj i hoj inqachop qak'ux, reh chi neenqehchaaj qakooch ma' jaruuj naa rusahchiik wach.²⁶Eh re' hin, ma' nee ta naq kinajiminik chi ma' weht'al taj aha' ojik i nub'an wii'. Eh ma' nee ta wo' naq i nub'an i sak'aaw chi ma' awach taj i k'ahchi' wilom wach.²⁷Re' hin, je' nukab' jino'q i aj pajal ajiim chub'anariik i rukamaj i Dios inuq'uhtisaj i nuti'jolal chi peet ookresb'al reh. Eh noq wilik chik taqe i nukojom kina'ojb'al, ma' waaj taj chi nee ruq'or weh i Dios chi ma' xinelik ta korik. Kojooj na'ojb'al chi ma' toob' taj i loq'inik tiyoox

¹Hermano, re' hin inwaaj chi nee taq inanab'eej chi re' taqe i qamaam qati't xye'arik chaloq i rumuuj i suutz' chikinaah ruum i Dios noq xi elik chaloq Egipto. Eh xuteh kib'eeh noq xi-ik'ik panyejaal i kaq palaw.²Ruuk' i re' je' naa xqajik kihaa' pan suutz', je' wo' chupaam i kaq palaw. Ruum i re', xkaaj chi re' i Moisés xkahnik chi k'amal kib'eeh.³Eh chi kunchelaal wo' xkik'ux cho keh i k'uxumb'al, maná rub'ihnaal, re' xye'arik cho keh pan taxaaj.⁴Eh chi kunchelaal wo' xkuk'ej keh i ha' pan saqrehp xelik chaloq ruum i ma' ilooj taj xub'an i Dios. Eh re' ab'aj rehtalil i Jesucristo, re' i xtoob'inik keh pan kib'eeh.⁵Xa re' la' chik imb'anik reh, xiik' naah k'ihaal chi kixilak xkiq'eb' chi riij kik'ux i Dios. Ruum i re', ar xikimik chupaam i ye'aab' chiq yuuq'.

⁶Chu'nchel i wili xk'ularik k'uhtb'al reh chi qawach i hoj yu'naak, reh chi ma' nee ta nqak'ax wach aha' wilik i ma' toob' taj xkik'ax cho wach i keh.⁷Re' taq i hat, maaloq'ej taq aweh i tiyoox, je' rukab' i xkian i ju'jun chi kixilak i keh, je' rukab' i ruq'or pan santo laj huuj chi je' wili: Re' tinamit xkitzunaa' kiib' chi wi'k chi uk'ik, eh noq xkikohlaaj, xkitoq'aa' soon, chi looq'jiik i tiyoox inki.⁸Manqa a'n taq qeh i hoj i k'oyomal, je' rukab' i xkian chaloq i ju'jun chi kixilak i keh. Eh ruum i xkian re' re' ixib' ru ka'winaq miil i xikimik chuwach i jinaj chi q'iij.⁹Eh manqayeew i rujosq'iil i Qajaaw i hoj, je' rukab' noq xkiyeew cho rujosq'iil i keh, ruum i xkian re' re' xuyeew q'ab' i Dios chi xiti'arik kuum i aaq', eh xikimik.¹⁰Eh maa ch'olej taq i Dios, je' rukab' i xkian chaloq i ju'jun chi kixilak i keh xkian i ch'olinik. Ruum i re', xutaq'aaj chaloq jinaj i ruánjel i Dios, xi k'ulik kanteesjoq.

¹¹Re' taqe ti' k'axik xkik'ul chaloq i qamaam qati't kojb'al qana'ojb'al i hoj, eh xkahnik rehtalil pan santo laj huuj tiijb'al qee i hoj i k'acharik inqa a'n chupaam taqe i tz'apaab' wach q'iij wili.¹²Je' re' noq, awach i kow ruk'ux chi nimanik, inchol riik'raam riib' chi manq'ehb'ik chik pamahk.¹³Re' taq i hat majaa' taq inchalik cha naah jino'q pajarik xiik' naah ti'kiil re' ta ruuk' i ma' nkuyjik taj. Eh re' taq i hat, chayeew taq ak'ux ruuk' i Dios, re' reh ma' nee ta taq tiruq'eb' chupaam i pajarik, nee la' taq tiresaj chupaam i nim wach pajarik.

¹⁴Je' re' noq re' taq i hat nuloq'laj hermano, maaloq'ej taq chik chi jumpech i tiyoox.¹⁵Re' hin je' wili taq aq'orob'jiik i nub'an, ruum wilik taq ana'ojb'al cha sik' taq chi riij i nuq'or.¹⁶Eh noq inqapahqaaj i rotob'il i Dios noq inquk'ej i loq'laj riis uuva wilik pan kulk, rehtalil chi qoh okik pan jinaj wach k'uxliis ruuk' i rukik'eel i Jesucristo. Eh noq inqach'aq chi qawach i kaxlanwi'k rehtalil chi qoh okik pan jinaj wach k'uxliis ruuk' i ruti'jolal i Jesucristo xhopib'ik chiqiij¹⁷Atoob' ta xiik' naah qak'ihaal chi aj nimaneel, xa jinaj chi kaxlanwi'k inqamolej wach ruk'uxariik, k'uhtb'al reh chi xa jinaj chik qawach chunimjiik i Jesucristo.

¹⁸Chakoj taq rehtaal inki a'n chaloq i aj Israel. Awach taqe kik'uxwik reh i joximaj chikop kiye'ariik chi mayiij nah artaal, kikochinik wo' haa' i mayiij re' re'.¹⁹Ruuk' taqe i nuq'or wili, ma' k'ahchi' ta nuq'orom chi wilik ta rajaawriik i tiyoox, eh chi wilik ta rajaawriik i tiwik inye'arik chi mayiij chuwach i tiyoox, atoob' ta nare' nche sik'oj wach tiwik.²⁰Re' i nuq'or taq aweh i hin re' chi, noq inkiyeew chikop chi mayiij chuwach i tiyoox taqe ma' kinimanik ta ree Dios, keh i ma' tob'laj uxlab'al inkiyeew ma' re' ta ree k'achlik Dios inkiyeew. Eh re' hin ma' nwaaj ta chi nee taq ti okik haa' chi kilooq'jiik taqe ma' tob'laj uxlab'al.²¹Eh ma' nee ta rub'an chi nee taq inawuk'ej aweh i wilik pan i kulk, re' rujalwaach i rukik'eel i Jesucristo, wila' ko naawuk'ej taq i mayijimaj chikiwach i ma' tob'laj uxlab'al. Eh ma' nee ta wo' rub'an chi nee taq inak'ux aweh i kaxlanwi'k, re' rujalwaach i ruti'jolal i Jesucristo, wila' ko nak'ux taq aweh i mayijimaj chikiwach i ma' toob' laj uxlab'al.²²Re' hoj, ma' ruyee ta riib' chi neenqayeew rujosq'iil i Dios ruuk' i loq'inik tiyoox, ruum re' hoj ma' xta qajaawriik chuwach i reh. Chu'nchel i naa a'nam cha a'n chi loq'oomb'al reh i QaJaaw

²³Wilik inq'orik reh. Chu'nchel i ruk'ul chi b'anarik, xa re' la' ma' chu'nchel ta atoob' chi b'anarik. Eh ma' chu'nchel ta wo' ruyeew rukowiil qak'ux.²⁴Ma' xata re' hoj naa qak'axam qiib, naa la' wo' qak'axam i tokoom.

²⁵Re' taq i hat neeruyee riib' chi nee taq inak'ux i xa chib'ih jariik tib'kaal ink'ayjik pank'ayb'al reh. Ma' ko ta ruman chi nee taq inapech'uj aha' xchalik, reh chi ma' nee ta taq intukinik wach akapeb'aal,²⁶ruum chu'nchel i wach ak'al reh i QaJaaw, eh je' wo' chu'nchel i wilkeeb' chupaam.

²⁷Eh wi xatruyuq'eej taq ruuk' jino'q i ma' re' ta aj nimaneel, eh wi xawaaj taq ojik, hiy taq. Chak'ux taq xa chib'ih pa' jariik i neeruyee taq aweh. Ma' ko ta ruman chi nee taq inapech'uj aha' xchalik reh chi ma' nee ta intukinik wach taq akapeb'aal.²⁸Raaj wila' xq'orarik taq aweh chi je' wili: Re' tiwik wili i naa taq ak'uxum xye'arik chi mayiij chuwach i tiyoox, inko'q taq aweh, eh ruum chi ma' toob' ta chi k'uxarik noq i rukapaaj i reh, ma' k'ux taq. Ruum reh i Dios chu'nchel i wach ak'al, je' wo' hoq i wilkeeb' chupaam²⁹Re' hin ma' chi riij ta taq akapeb'aal i hat i nuq'or, chi riij la' i rukapeb'aal i k'ahchi' ruq'oriik taq aweh. Eh wilik naa nee nq'orik reh chi je' wili: ¿Chib'ih reet noq tokoom naa ruwech'iniik riij i naa nub'anam i hin?³⁰Eh wila' nut'iosej ree Dios i nuk'ux, ¿chib'ih chik reet noq nee kinkich'olej ruum i ruk'uxariik? inko'q naak.

³¹Eh wi xa a'n taq awa' ahaa', eh xa chib'ih-oq chik jariik taq i xawaaj a'nam, ma' xta reet cha a'n taq chu'nchel chi loq'oomb'al ree Dios.³²Maa a'n taq i yiib' wach na'ojb'al chi yojb'al kik'ux taqe aj judío, je' wo' taqe i ma' re' ta aj judío, je' wo' taqe i kinimanik ree Dios.³³Chakoj taq rehtaal i nub'an i hin ma' xata re' i nuyeew nuk'ux chub'anariik imponik chi nuwach i hin. Re' la' nub'an imponik chikiwach taqe was nuchaaq', reh chi neenkireq i ko'lemb'al kiib'.

¹Chatijej taq awiib' wuuk', je' rukab' i hin k'ahchi' nutijem wiib' ruuk' i Jesucristo. Re' i q'orik chi riij i rub'urariik wach kinaah ixoq, je' wo' taqe i winaq

²Re' hin, hermano, q'e' taq insuuqb'ik nuk'ux chawiij, ruum ma' jaruuj kinsahchik taq panak'ux, eh k'ahchi' taq ak'amam naah taqe i nuk'uhtaam taq aweh.³Xa re' la', inwaaj chi nee taq inareq chi riij chi re' i Jesucristo i K'amal rub'eeh i ju'jun chi winaq. Eh re' b'ahiilb'ees k'amal rub'eeh i rehk'een, re' i Dios K'amal rub'eeh i Jesucristo.⁴Eh wi xub'ur wach i naah i winaq noq neerub'an rutiij, oon noq nee ruq'or i k'uhb'aal ye'ooj reh ruum i Dios, neeresaj i ruloq'il i naah.⁵Raaj wi ma' xub'ur wach i naah ixoq noq neerub'an rutiij, oon noq nee ruq'or i k'uhb'aal ye'ooj reh ruum i Dios, neeresaj ruloq'il i naah. Eliik naq wach ruuk' chi johyamaj iloq i rismaal i naah,⁶ruum wi ma' rub'ur wach i naah ixoq, ma' xta reet chi neenyok'ariik iloq i rismaal i naah chi jumpech. Raaj wila' rukapaaj ixoq chi k'ixb'ilaal chi reh chi neenjohyjik iloq i rismaal i naah, chub'ur wach i naah.

⁷Re' winaq ma' ruk'ul ta chi nee rub'ur wach i naah, ruum re' reh i rujalwaach i Dios, eh re' wo' reh ink'uhtanik reh i ruloq'il i Dios. Eh re' ixoq ink'uhtanik i ruloq'il i winaq,⁸ruum re' i peet winaq ma' ruuk' taj ixoq xtz'uhkrik chaloq ruuk' la' i winaq xtz'uhkrik chaloq i peet ixoq.⁹Eh re' winaq ma' re' ta toob'en reh ixoq noq xtz'uhkresjik chaloq re' la' ixoq xtz'uhkresjik chaloq chi toob'en reh i winaq.¹⁰Ruum i wili, eh k'uhtb'al reh chikiwach taqe ánjel, chi re' ixoq koruman chi naa ruye'em wach naah jinaj rehtalil chi wilik rajaawriik i winaq chinaah.¹¹Eh chuwach i Qajaaw ma' nee ta nk'acharik i ehk'eenb'ees wila' ma' chih i b'ahiilb'ees. Eh ma' nee ta nk'acharik i b'ahiilb'ees wila' ma' chih i ehkeenb'ees¹²Korik chi re' i peet ixoq ruuk' i winaq xelik noq xyejeb'jik chaloq, chi riij i re', ruuk' chik ixoq inaasjik i winaq. Eh chi winaq chi ixoq re' Dios xtz'uhkrisanik reh, je' wo' chu'nchel xa chib'ih jariik.

¹³Chakapaaj taq riij ar i hat chawach, mi ma' xta reet chi re' ixoq chi ma' rub'urum ta wach i naah noq neerub'an rutiij chuwach i Dios.¹⁴Re' wo' i ruk'ul chi reh i ju'jun chi k'achareel ink'uhtanik reh chi qawach noq jinaj k'ixb'ilaal chi re' winaq neeruchaamb'isaj i rismaal i naah.¹⁵Raaj chi reh ixoq, xiik' naah loq'il chi neeruk'isaj i rismaal i naah, ruum re' ruchamiil i rismaal i naah ixoq jilow rub'urb'aal wach i naah noq wilik.¹⁶Ruuk' chu'nchel i re', wila' awach iraaj ruwech'um riij i na'ojb'al wili, chunab'eej chi ni xata re' hoj, ni xata re' taqe i ju'jun ch'uq chi aj nimaneel okrinaq taqe chub'aan i tokoom na'ojb'al. Re' Santolaj ruwa' i QaJaaw ree xq'eq ma' parub'ehel ta nkik'ux

¹⁷Re' i nutz'ihb'aaj taq reje aweh wili, ma' re' ta rusuqkiil taq ak'ux i naa nuye'em, ruum re' taq i moloj awiib' i na a'n ma' re' ta b'ila' suq kiil k'uxliis i ruk'am taq chaaweh, ti' k'axik b'ila' ruk'am taq cho cha naah.¹⁸Re' peet inwaaj nuq'orom taq aweh chi re' taq i hat noq inamol b'ila' taq awiib' chulooq'jiik i Dios, wilik b'ila' ixowanik iib' taq chaxilak. Eh re' hin i nunimaj k'isiin chi je' taq re' i na a'n.¹⁹Korik noq ajwaal wo' wach noq wilik i neenkisaj iloq kiib' taq chaxilak, eh neenkitzub'aa' kiib' pankeh. Ruuk' i re' neeneht'aljik awach taqe manlik aj nimaneel.²⁰Xanaah re', ruuk' i ch'aqaj iib' imb'aan taq chaxilak, ma' re' ta chik parub'ehel taq inak'ux i Santolaj ruwa' i QaJaaw ree xq'eq noq inamol taq awiib',²¹ruum noq i na a'n taq awa' wilik i peet inkitoq'aa' taq chaxilak, eh inkiq'or chi re' re' i Santolaj ruwa' i QaJaaw. Xanaah re', wilik i kikahnik chi ma' nkian ta kiwa', eh wilik inkitoq'aa' xohk'rik.²²¿Mi ma' xta taq apaat re' neena a'n taq cho wii' awa' ahaa'? ¿Chib'ih reet noq ma' imponik ta taq panaq'awach i kinimanik ree Dios, eh inak'uhtaaj taq kik'ixb'ilaal i ma' xta kiwa' kihaa'? ¿Chib'ih taq inawaaj chi nee taq i nuq'or aweh? ¿Mi nawaaj taq re' chi neenuyeew rusuqkiil taq ak'ux? Ra'j xti ma' chih ta re'. Re' Santolaj ruwa' i QaJaaw ree xq'eq rub'anam chaloq (Mat 26.26-29; Mar 14.22-25; Luc 22.14-20)

²³Re' hin re' wo' QaJaaw xk'uhtanik weh i k'uhb'aal wili, re' i nuq'or taq reje aweh chi je' wili: Chi chupaam aq'ab' noq ach k'isiin ma' nchoparik i QaJaaw Jesucristo, xuchop i kaxlanwi'k.²⁴Eh noq rut'iosem chik ree Dios xuch'uy keh i kab'laj chi raj tahqaneel, eh je' wili i xuq'or: Re' kaxlanwi'k wili rujalwaach i nuti'jolal naa ruye'ariik pan ti'laj kimik taq chawiij, jarpech taq naa ak'uxum aweh, re' i nukimiik naa ruk'uliik taq panak'ux, inki.²⁵Eh noq kuxinaq chik i Santolaj wi'k ree xq'eq, xuchop chaloq i nimlaj kulk, je' wili i xuq'or: Re' ha' wilik chupaam i kulk wili rujalwaach i nukik'eel naa ruchihkiik, reh chi naa rojiik eloq wach i ak' k'uhb'aal ruyejaam cho wach i Dios. Jarpech taq naa awuk'em aweh, re' i nukimiik naa ruk'uliik taq panak'ux, inki.²⁶Eh jarpech taq naa ak'uxum aweh i kaxlanwi'k, naa awuk'em taq aweh i ha' pan i kulk korehtaal i ruk'uliik ruka'peech i QaJaaw Jesucristo. Re' ti' laj kimik xuk'ul k'ahchi' taq aq'orom rib'iral. Re' Santolaj wi'k ree xq'eq parub'ehel naa ruk'uxariik

²⁷Eh xa awach pa' i ma' parub'ehel ta neeruk'ux reh i kaxlanwi'k neeruk'ej reh i ha' wilik pan kulk reh ixq'eq jinaj runimaal mahk k'ahchi' rub'anam chi riij i ruti'jolal i QaJaaw Jesucristo, je' wo' chi riij i rukik'eel.²⁸Ruum aj re', re' ju'jun inchol riik'raam cho paruk'ux chi peet mi ruyee riib' chi neeruk'ux i kaxlanwi'k, mi nee ruyee riib' chi nee ruk'ej reh i ha' i wilik chupaam i kulk.²⁹Raaj wi ma' rureq chi riij chi re' i k'ahchi' ruk'uxum ruch'ihil i k'ahchi' ruk'em rujalwaach i ruti'jolal i QaJaaw Jesucristo, xa tojb'al ru mahk i k'ahchi' ruyuq'eem cho chinaah.³⁰Ruum aj re', ma' k'isiin taqe i wilkeeb' taq chaxilak i yowaab' taqe, eh wilik taqe i xa nkik'ay chik, eh wilik taqe i kikimiik.³¹Eh wila' peet xqik'raaj qiib' chi nee ruyeew riib' chi neenqak'ux i kaxlanwi'k, eh neenquk'ej qeh i wilik pan kulk ma' nee ta inq'atarik i q'orik chi qanaah.³²Eh atoob' ta korik chi nee qoh rik'saj chi ti' k'axik i QaJaaw Jesucristo, tiijb'al qeh i rub'an. Re' raaj i reh chi ma' nee ta qohruyeew pantojb'al mahk haa' i hoj kuuk' i yiib' wach i kina'ojb'al.

³³Eh re' taq i hat nuhermano, noq naa taq amolom awiib' chuk'uxariik i Santolaj wi'k ree xq'eq je' rukab' i ruk'uxum chaloq i QaJaaw, ko naa taq awuy-eem awiib' noq naa taq ak'uxum.³⁴Eh wi awach taq aweh i xa nuhmik chik, chub'an cho ruwa' ruhaa' parupaat, reh chi re' Dios ma' nee ta ruyeew i ti' k'axik taq cha naah ruuk' i moloj iib' re' re'. Re' chik taq aak'axkiil junch'iht xapahqaaj taq cho weh, ko naa chik qayejaam wach na' kinponoq taq chawula'jiik. Reh reh wach i kooch i ruyeew i Santolaj Uxlab'al

¹Hat taq nuhermano, re' hin ma' inwaaj ta chi ma' nee ta taq inaweht'aliij taqe i kooch i ruyeew i Ruxlab'al i Dios.²Re' taq i hat aweht'al taq noq komajaa' naq taq hat cho aj nimaneel, xa pamemil naq taq timinarik chi kilooq'jiik taqe i tiyoox ma' kiq'orik taj.³Eh inwaaj chi nee taq inaweht'aliij chi ma' jino'q i k'amooj rub'eeh ruum i Santolaj Uxlab'al ma' holohik ta nee nq'orik chi riij i Jesucristo. Eh ma' jino'q wo' neenq'orik chi re' i Jesucristo i QaJaaw wila' ma' k'amooj rub'eeh ruum i Santolaj Uxlab'al.

⁴Re' hoj, i hoj aj nimaneel, xa reh reh wach rukamaj i Dios neenye'arik qeh chi qakooch. Eh re' inye'wik reh xa re' wo' jinaj chi Santolaj Uxlab'al.⁵Korik chi xa reh reh wach i kamanik imb'aan xa re' la' re' QaJaaw Jesucristo xa jinaj wo' hoq.⁶Re' ju'jun chi aj nimaneel, xa reh reh wach i rajaawriik nee ruk'ul chub'aan i rukamaj i Dios, chu'nchel i re', re' jinaj chi Dios inye'wik reh.⁷Re' Dios i ruk'uhtaaj i rajaawriik i Ruxlab'al ruuk' i ju'jun reh i rub'aan jino'q kamanik toob'al keh i aj nimaneel.⁸Wilik taqe inye'arik kina'ojb'al chi q'orik ruum i Santolaj Uxlab'al. Eh wilik inye'arik kajaawriik ruum i Santolaj Uxlab'al chi kiq'orik chi riij i nimaq wach na'ojb'al.⁹Wilik inkik'ul rukowiil kik'ux ruuk' i Santolaj Uxlab'al, eh wilik inkik'ul kajaawriik ruuk' i Santolaj Uxlab'al reh k'achrisanik yowaab'.¹⁰Wilik inye'arik kajaawriik chub'aan taqe i ma' ilooj taj. Eh wilik inki a'n ruq'orariik i ruk'uhb'aal i Dios. Wilik neenkeht'aliij wach i atoob'laj Uxlab'al, eh i ma' tob'laj uxlab'al. Eh wilik inye'arik keh i q'orik pan tokoom q'orik, wilik inye'arik keh ruch'ob'ariik rub'ehel inq'orarik pan tokoom q'orik.¹¹Eh chu'nchel i wili xa re' wo' jinaj chi Santolaj Uxlab'al inch'aqwik cho chinaah i ju'jun chi aj nimaneel chi naa kianam re' q'oreel i ruk'ul chi keh paruk'ux i reh. Xa jinaj chik qawach ruuk' i Jesucristo

¹²Re' qati'jolal jumpa'liik, atoob' ta xiik' naah k'ihaal inchopiin reh, xa jinaj chi ti'jolal noq wilik chu'nchel. Je' re' noq wilik i Jesucristo quuk' i hoj i qohnimanik reh.¹³Ruum xa parub'ihnaal i jinaj chi Santolaj Uxlab'al xqajik qahaa', chi je' hoj aj judío, chi je' ma' hoj ta aj judío, chi je' hoj k'ayimaj pankamanik, chi je' ma' hoj k'ayimaj pankamanik. Eh chi qunchelaal xye'arik qeh i jinaj chi Santolaj Uxlab'al, eh xa jinaj chik qawach.

¹⁴Eh re' qati'jolal reh ma' xata wo' jinaj wach inchopiin reh, k'ih b'uhr la' wach choplik wii'.¹⁵Eh nee ta ruq'or chi je' wili i qooq: Re' hin, ma' hin ta q'ab'iis, ma' hin ta ruman wach, inko'q taj. Ma' ruum ta naq i re' neenkahnik chi ma' paruman ta wach qati'jolal.¹⁶Eh nee ta ruq'or chi je' wili i qaxikin: Re' hin, ma' hin ta naq'wachiis, ma' hin ta paruman wach, inko'q taj. Ma' ruum ta naq i re' neenkahnik chi ma' paruman ta wach qati'jolal.¹⁷Eh naq'qawach ta chu'nchel i qati'jolal jarub' ruchopom wii' riib', ma' nee ta naq qoh-ib'irinik. Eh qaxikin ta chu'nchel i qati'jolal, ma' nee ta naq qoh-uhtz'inik.¹⁸Re' la' Dios inye'wik paruye'aab' chu'nchel inchopiin ree qati'jolal aha' ajwaal wach paruk'ux i reh.¹⁹Wi ta xa jinaj wach ruchopom wii' riib' i qati'jolal, ma' xta wo' naq qati'jolal chi jumpech.²⁰Xti korik noq k'ih b'uhr wach ruchopom wii' riib' i qati'jolal. Eh xa jinaj chi ti'jolal inooj ruk'ul wii' riib' chu'nchel.

²¹Re' naq'qawach ma' nee ta ruq'or reh i qaq'ab' chi je' wili: Re' hat ma' xta tikamanik wii' weh. Eh re' qanaah ma' nee ta ruq'or reh taqe i qooq chi je' wili: Re' taq i hat ma' xta taq tikamanik wii' weh, ma' inko'q taj.²²Chakoj la' taq rehtaal noq re' i kichopiin ree qati'jolal i xa je' cho ma' xta kikamanik wii' noq kik'utinik, re' taqe re' i xiik' naah kamaneel qeh.²³Eh re' taqe i kichopiin ree qati'jolal i xama' q'e' ta nqak'ax, re' taqe re' inqatiq'aa' chi korik. Eh re' taqe kichopiin ree qati'jolal i xama' holohik ta noq inqaq'or, re' taqe re' xa holohik chik rutiq'ib'jiik inqa a'n.²⁴Eh re' taqe kichopiin ree qati'jolal i wilik kiholwochiil, ma' koruman ta chik chi neenb'aan holohik reh. Re' Dios xuyejaa' i qati'jolal, eh re' taqe i kichopinik reh i ma' nqak'ax taj, re' chik taqe re' xkik'ul kiloq'il.²⁵Ruuk' i re', ma' pareh ta wilkeeb' reje nik' nimaal inchopiin reh i qati'jolal. K'ul la' inkitoob'eej kiib' chikiwach taqe inchopinik reh i qati'jolal.²⁶Wila' xtib'ik jino'q keh inchopiin ree qati'jolal, chi kunchelaal wo' ki-ik'ik chi ti'. Eh wila' wilik keh inchopiin ree qati'jolal ink'axarik chi korik, kiehtrik wo' haa' i k'axb'al re' re' taqe ruk'u'liil.

²⁷Je' wo' re' noq wilkooj i hoj, i hoj jilow ruti'jolal i Jesucristo, hoj wo' jilow i ruchopom wii' riib' i ruti'jolal, ruum ruye'em qakamaj chi qaju'junaal.²⁸Re' Dios chi kixilak i aj nimaneel: Peet, xupab'aa' taqe aj tahqaneel rukab', xupab'aa' taqe jalal ruq'oral i reh, roox, xupab'aa' taqe aj tijoom. Eh xupab'aa' wo' taqe i kib'anik ree i ma' ilooj taj xupab'aa' wo' taqe i ki k'achrisanik yowaab' xupab'aa' wo' taqe i kib'anik toob'inik je' wo' taqe i kik'amwik b'eeh eh xupab'aa' wo' taqe i kiq'orik pan tokoom q'orik.²⁹Eh ma' chu'nchel ta i kiokik chi aj tahqaneel, ma' chu'nchel ta kiokik chi aj jalal ruq'oral i Dios, ma' chu'nchel ta kiokik chi aj tijoom, ma' chu'nchel ta kib'anik ree ma' ilooj taj.³⁰Eh ma' chu'nchel ta ye'ooj kajaawriik chi k'achrisanik, ma' chu'nchel ta kichol q'orik pan tokoom q'orik. Eh ma' chu'nchel ta kichol ruch'ob'ariik rub'ehel taqe inq'orarik pan tokoom q'orik.³¹Re' taq i hat, i ruk'ul naq chi nee ta ruq'or taq ak'ux rub'aan i xiik' naah chihojal i rusiij i Dios. Re' K'axooj
Re' hin jinaj chik i na'ojb'al q'e' chihooj inwaaj nuk'uhtaam taq aweh.

¹Qaq'or chi nee ta kinchol i q'orik jar b'uhr wach, kiq'orik wii' i tinamit, eh nee ta kinchol kiq'oral taqe ánjel. Wila' ma' chih i k'axooj wuuk', xa je' naq nukab' i q'ajb'anik i rub'an ch'ihch' noq inq'ojarik wach, xama' xta rub'ehel i choqik i rub'an.²Eh nee ta naa re' kinchol ruq'orariik i k'uhb'aal, eh nee ta nweht'aliij taqe i na'ojb'al ma' eht'alimaj taj, nee ta kinchol rub'aan chu'nchel i chib'ih jariik, eh nuye'em ta naa re' nuk'ux chi nimanik, reh chi neenub'an rujalariik kiye'aab' yuuq', wila' ma' chih i k'axooj wuuk', xama' xta neekinokik wii'.³Eh nee ta nupuhkaaj chu'nchel i chib'ih weh keh i neb'aa', nee ta naq i nuyeew chi k'atarik pan q'aaq' i nuti'jolal, wila' ma' chih i k'axooj wuuk', xama' xta neerutiq weh i neenub'an.⁴Re' wilik k'axooj ruuk' neerukuy ruk'ulariik i ti' neenb'aan reh, xa atoob' wach ruk'ux ma' awach taj ineerukaqwachej, ma' q'et q'et taj, xama' nim ta wach i rub'an riib'.⁵Re' wilik k'axooj ruuk', ma' rub'an taj i re' ma' re', ree ras ruchaaq' ma' xata chi rutkeel i ruk'ax riib' ma' ink'atzk'otik taj ma' ruq'aj ta wach i yiib' wach imb'aan reh.⁶Re' wilik k'axooj ruuk', ma' insuuqb'ik ta ruk'ux noq imb'aan i ma' ruk'ul ta chi b'anarik, insuuqb'ik la' ruk'ux noq imb'aan i korik.⁷Re' wilik k'axooj ruuk', i rukuy nik' nimaal i ti' imb'aan reh inimanik, inuy-inik, chu'nchel i rukuy.

⁸Re' k'axaj iib' ma' jaruuj naa rusahchiik wach. Re' taqe aj jalal ruq'oral i Dios, naakimayam i jalaj q'orik. Eh re' kiq'orik pan tokoom q'orik naakimayam, re' taqe na'ojb'al naa rusahchiik wach.⁹Re' hoj yu'naak xa k'isiin tii nqareq chi riij. Eh xak'isiin inqach'ob' rub'ehel i ruk'uhb'aal i Dios.¹⁰Kore' na' manlojoq wach quuk' i rukamaj i Dios, naa aj rusahchiik wach re' i ma' manlik ta wach imb'aan yu'naak.¹¹Re' hin noq ko hin cho k'isaak'un, re' nuq'oral, re' nukapeb'aal, re' nuna'ojb'al xa je' rukab' i reh jino'q k'isaak'un. Eh noq xinwinaaqb'ik xnukanaa' i je' runa'ojb'al k'isaak'un.¹²Re' k'ahchi' qilom yu'naak chi riij i Dios xa je' rukab' noq inqatz'ehtaaj qiib' pan lemow nay nay wach. Pan jinaj ponoq q'iij ko ra'j naa qilom chi korik re'. Eh re' i xa k'isiin inureq chi riij yu'naak, kopan jinaj q'iij i nunab'eej chi korik, je' rukab' noq xunab'eej cho nuwach i Dios i hin.¹³Eh ixib' wach i ma' naa ta rusahchiik kiwach: Re' ye'ej k'uxliis chunimjiik i Dios, re' ch'iklik reje wii' qak'ux, re' k'axaj iib', eh re' i xti nim wach chi xilak ixib' wili re' k'axaj iib'. Re' q'orik pan tokoom q'orik

¹Re' taq i hat hermano, cha k'ax taq awiib'. Eh cha pahqaaj taq i kooch i ruyeew i Santolaj Uxlab'al, eh re' i xti ajwaal wach chi xilak re', re' chi nee taq inaq'or i ruk'uhb'aal i Dios.²Eh awach inq'orik pan tokoom q'orik, reh i Dios i rub'an, ma' re' ta reh jino'q winaq, eh ma' awach taj inreqwik chi riij i tokoom q'orik i ruq'or. Ruuk' la' i rajaawriik i Santolaj Uxlab'al i ruch'ob' rub'ehel i ma' nkan ta naq chi riij.³Eh awach inq'orik rib'iral i ruk'uhb'aal i Dios, reh i ruch aj nimaneel i ruq'or, kojb'al kina'ojb'al, ye'b'al rukowiil kik'ux, ye'b'al rusuqkiil kik'ux.⁴Eh awach inq'orik pan tokoom q'orik, xa re' reh i ruyeew rukowiil ruk'ux chi rib'il riib'. Eh awach inq'orik rib'iral i ruk'uhb'aal i Dios, re' taqe i aj nimaneel i ruyeew rukowiil kik'ux.⁵Re' hin inwaaj naq chi chawuncheel taq neetichol q'orik pan tokoom q'orik. Eh re' xti nwaaj i hin re' chi nee taq inaq'or i ruk'uhb'aal i Dios, ruum re' re' xiik' naah chihojal chuwach i q'orik pan tokoom q'orik, ma' xta reet i q'orik pan tokoom q'orik noq wilik neench'ob'wik rub'ehel chib'ih i ruq'or, reh chi neenkowjik kik'ux i aj nimaneel.

⁶Hat taq nuhermano wila' re' hin xinooj taq chawula'jiik, eh pan tokoom q'orik taq neetinuq'o'reej, ¿Chib'ih taq neerutiq aweh wila' ma' xnuq'or taq aweh i ruk'uhtaam chaloq i Dios, wi ma' xnuq'or taq aweh i k'uhb'aal, wi ma' xatnutijej taq?⁷Je' naa re' wo' taqe q'oojb'al ehteesb'al tz'uuy, je' rukab' i xuul, i arpa wila' ma' reh reh wach i q'ajb'anik inki a'n noq inq'ojarik wach oon inxuuljik, ma' jaruuj neenkan chi riij chib'ih tz'uyil i k'ahchi' rub'aan.⁸Eh je' wo' hoq wila' ma' re' ruxuljiik i tuun reh q'aq'inik neenb'aan, ma' awach taj ineeruyejaa' riib' chi ojik panq'aq'inik.⁹Je' wo' re' ineenk'ularik taq awuuk' i hat wila' ma' pana q'oral taq xaq'or chib'ih taq inawaaj aq'orom re' ruuk' inkan chi riij, ¿nik' wach noq neenreqarik chi riij i k'ahchi' taq aq'orom? Xa ma' xta neerutiq xa panteew taq neenkahnik aq'oral¹⁰Xti korik chi re' taqe i tinamit sut i wach ak'al xata wo' jar b'uhr wach i kiq'oral kiq'orik wii', xa re' la' inkireq wo' chi riij chib'ih inkiq'or chikiwach.¹¹Raaj wila' ma' nureq chi riij i ruq'oral jino'q ineenq'oriin weh pan tokoom q'orik, xa je' hin aj tokoom tinamit nee kinkahnik wii' chuwach eh je' wo' reh xa je' aj tokoom tinamit neenkahnik wii' chi nuwach.¹²Ruum chi re' taq i hat q'e' taq inawaaj chi nee taq ruyeew chaakooch i Dios panuxlab'al, cha chop taq ak'ux chi re' taq neen wihik awuuk' inye'wik rukowiil kik'ux taqe i aj nimaneel.

¹³Awach i ye'ooj chi rukooch i q'orik pan tokoom q'orik, chupahqaaj ree Dios parutiij chi neenchol ruch'ob'ariik rub'ehel i xuq'or pan tokoom q'orik.¹⁴Wila' re' hin pan tokoom q'orik xnub'an nutiij, iraaj ruq'orom chi xa re' i wánjel nut'iosil inwolik chi tiij. Eh re' tiij re' re', ma' xta xutiq weh, ruum xama' xnureq ta wo' chi riij.¹⁵¿Eh chaaj wo' naa nub'anam re'? Xa re' wo' chi naa nub'anam nutiij ruuk' i wánjel nut'iosil, eh ajwaal wach chi neenureq chi riij i nuq'or. Nee wo' nub'an nutz'uuy ruuk' i wánjel nut'iosil, eh ajwaal wach chi naa nureqem chi riij chib'ih i ruq'or i nutz'uyej.¹⁶Wi xa re' hat ruuk' awánjel at'iosil tinaab'inik reh i ruq'orob'jiik i Dios, i t'iosinik i na a'n, pan tokoom q'orik. Eh re' i k'ahchi' rib'iriniik aweh mo'-oq aha' rutijem riib'. ¿Nik' wach noq nee ruq'or je' ta naq re' wila' ma' rureq chi riij naq'or?¹⁷Re' t'iosinik i na a'n ree Dios i hat pan tokoom q'orik ma' xta reet xa re' la' re' i x-ib'irinik aweh ma' xye'arik ta rukowiil ruk'ux ruum ma' xureq ta chi riij.¹⁸Re' hin inut'iosej ree Dios, ruum q'e' kinchol q'orik pan tokoom q'orik taq chawach i hat.¹⁹Eh noq wilkiin chi kixilak aj nimaneel, re' hin imponik chi nuwach ruq'orariik xa ho'oob' chi q'orik re' ruuk' i neenkan chi riij, reh chi neenub'an kik'uhb'aljiik, chuwach chi neenuq'or lajeeb'-oq miil chi q'orik pan tokoom q'orik ma' inkan ta chi riij.

²⁰Hermano, mo'-oq je' kikapeew ha'lak'un taq akapeew. Xa je'-oq la' taq hat ha'lak'un, reh chi ma' nee ta chik taq i na a'n i ma' holohik taj. Eh kow-oq la' taq ak'ux chukapeb'jiik riij i holohik.²¹Chupaam i k'uhb'aal tz'ihb'amaj chaloq chi je' wili i xuq'or i Dios chikiij aj Israel: Re' hin pan tokoom q'orik naa nuq'o'reem taqe i tinamit wili. Eh tokoom tinamit naa kik'uliik q'oroq kuuk', eh ni xata chi je' re' naa kinkinimam, inki.²²Re' q'orik pan tokoom q'orik xa ehtalil chikiwach i ma' re' ta aj nimaneel, ma' re' ta ehtalil chikiwach i aj nimaneel. Eh re' ruq'orariik i ruk'uhb'aal i Dios jinaj ehtalil chi keh i aj nimaneel ma' re' ta ehtalil chikiwach i ma' re' ta aj nimaneel.²³Eh qaq'or chi amolom taq awiib' pan jino'q paat, eh pantokoom-oq q'orik k'ahchi' taq aloq'em i Dios, eh xokik-oq i koq jino'q xa ib'iroom oon jino'q i ma' re' ta aj nimaneel wila' ma' xureq chi riij chib'ih taq inaq'or, nee taq i ruq'or aweh chi xak'ul taq awahqalil.²⁴Eh wila' chawunchelaal re' ruk'uhb'aal i Dios taq inaq'or, eh neenokik i koq jino'q i ma' re' ta aj nimaneel oon jino'q i xa aj ib'iroom, noq neerib'iraj, nee naq i rureq chi riij chi aj mahk, nee naq rukapaaj riij taqe ma' toob' taj i rub'an.²⁵Chi je' re', nee naq i nelik cho wach saqum chu'nchel i rukapeew wilik cho paránima. Eh nee naq i ruxuk'aa' riib' chupahqaljiik rukuyb'al chuwach i Dios. Eh nee naq i rureq chi riij chi wilik taq chaxilak i Dios chi manlik.

²⁶Hat taq nuhermano, noq nee taq inamol awiib', reh reh taq wach i naa a'nam, wilik i aj tz'uuy, wilik i aj Tijineel, wilik inchol q'orik pan tokoom q'orik, wilik i rich'ob' rub'ehel inq'orarik pan tokoom q'orik, wilik inkiq'or rub'ehel i k'uhtamaj keh. Re' taqe re' ma' xta reet xa re' la' cha a'n taq chi ye'b'al taq rukowiil ak'ux.²⁷Eh awach inkaaj q'orik pan tokoom q'orik, xa ki'ib' oon xa ixib' peet i kiq'oroq. Eh ko neerukohlaaj q'orik i jinaj, tiklik i koq i jinaj, eh jinaj neenjalwik i kiq'oral.²⁸Eh wila' ma' chih jalal kiq'oral, chihooj chi ma' awach taj ineenq'orik pan tokoom q'orik xa chi q'uun la' kiq'o'reej i Dios pan tokoom q'orik.²⁹Je' wo' taqe i kiq'orik ree ruk'uhb'aal i Dios. Xa ki'ib' oon xa ixib' ineekiq'orik. Eh re' taqe ruk'ihaal aj nimaneel kikapaaj riij mi ma' xta reet i xq'orarik.³⁰Eh wila' awach i tzunlik ar xk'uhtjik reh ruum i Dios jino'q k'uhb'aal, ajwaal wach chi peet naa ruq'oriik nee pee rumay q'orik i awach naq i q'orik i rub'an.³¹Chi je' re' chi kiju'junaal neenkiq'or i k'uhb'aal kiq'orom chaloq i jalal ruq'oral i Dios. Ruuk' i re', neenkitijej keh chikuncheel, neenkojarik kina'ojb'al.³²Re' Ruxlab'al i Dios xwihik kuuk' i jalal ruq'oral i Dios, wilik wo' kuuk' i kiq'orik i ruq'oral i Dios.³³Re' Dios reh ma' re' ta yojoj k'uxliis i ruk'am chaloq, wihik la' pansuqkiil k'uxliis i ruk'am chaloq, je' rukab' i k'acharik inki a'n taqe santo laj aj nimaneel.³⁴Re' taqe ehk'eenb'ees ma' ruk'ul ta chi neenkitoq'aa' pech'inik noq amolom taq awiib', ruum re' keh ma' ye'ooj ta q'ab' keh chi naa kiq'oriik. Re' keh inchol kinimam i kib'ahiil je' rukab' i ruq'or i ruk'uhb'aal i Dios.³⁵Wila' wilik inkaaj keht'aliim, kipech'uj ponoq ree kib'ahiil chi kiju'junaal pankipaat, ruum re' jino'q i ehk'eenb'ees, ma' ruk'ul ta chi chib'ih jariik ineerutoq'aa' rupech'um noq amolom taq awiib'.

³⁶Chakoj taq rehtaal noq ma' re' ta taq awuuk' i hat xtohq'ik cho ruq'orariik i ruq'oral i Dios chi peet. Eh maakapaaj taq chi xa re' taq i hat xatk'ulwik ree ruq'oral i Dios.³⁷Wila' awach taq aweh i rukapaaj chi jalal ruq'oral i Dios, eh irik'raaj-oq chi wilik i Ruxlab'al i Dios ruuk', nee ruq'or noq korik chi re' ruk'uhb'aal i QaJaaw i xnutz'ihb'aaj taq reje aweh panhuuj.³⁸Eh wila' xuq'or chi ma' re' ta ruk'uhb'aal i QaJaaw i xnutz'ihb'aaj taq reje aweh, je' wo' reh, ma' nee ta wo' nimjik chi aj jalal ruq'oral i Dios.

³⁹Re' taq i hat nuhermano, nee ta naq i ruq'or taq ak'ux ruq'orariik i ruk'uhb'aal i Dios. Eh maaq'il taq awach iraaj q'orik pan tokoom q'orik.⁴⁰Xa re' la', chu'nchel taq i naa a'nam, parukorkiil, eh tuslik wach rub'anariik taq cha a'n. Re' i ruwuktiik chaloq i Jesucristo chi k'achlik wach

¹Hermano, re' hin inwaaj chi neen k'ulik taq panak'ux nik' wach noq xak'ul taq panawánima i ak' k'uhb'aal nuq'orom taq chaaweh. Eh yu'naak xakok'ahchi' wo' taq animam.²Ruum wo' k'uhb'aal wili, hat taq ko'limaj wila' ma' xakanaa' taq chik runimjiik. Eh wila' xakanaa' taq runimjiik, xama' xta nki chi xanimaj taq cho pampeet.

³Re' i peet xnub'an taq awuuk' re' chi xnuyeew taq chaaweh chi naab'jik i xk'uhtjik cho wee hin. Re' chi re' Jesucristo xkimik ruum qamahk, je' rukab' i ruq'or cho pan santo laj huuj.⁴Eh re' Jesucristo xkimuq'aa', eh paroox q'iij xk'aach wo' chik chaloq, je' rukab' i ruq'or cho pan santo laj huuj.⁵Eh chi xuk'uhtaaj riib' chuwach i Cefas, chi riij i re', xuk'uhtaaj wo' chik riib' chikiwach kab'laj chi raj tahqaneel.⁶Eh koq'uun chik, xuk'uhtaaj riib' chikiwach i ma' xata ho'oob' siento chi hermano. Eh yu'naak ko k'ih k'achaach re' ruuk' taqe re', wilik wo' i xikimik reje.⁷Chi riij i re', xuk'uhtaaj riib' chuwach i Jacobo, xuk'uhtaaj wo' chik riib' chikiwach chu'nchel i raj tahqaneel.⁸Eh noq ma' xta chik ayu' xuk'uhtaaj riib' chi nuwach i hin koq'uun, atoob' ta xa je' naq nukab' jino'q k'isa ha'lak'un ma' manlik ta wach ruq'ijil noq inaasjik.

⁹Ruum re' hin q'e' k'isiin nuwach chikiwach taqe raj tahqaneel i Jesucristo. Eh ma' ruk'ul ta naq chi hin raj tahqaneel, ruum xnub'an cho ti' k'axik keh i kinimanik reh i Dios.¹⁰Eh xa ruum rotob'il i Dios je' wili noq wilkiin. Eh re' rotob'il xub'an wuuk', ma' xooj ta chi re' chi ma' re', ruum re' hin xiik' naah i rukamaj i Dios xnub'an chuwach i xkian i junch'uq chi aj tahqaneel. Atoob' ta ma' re' hin ximb'anik, re' la' Dios xtoob'inik weh chub'aan.¹¹Ma' xta q'orik reh mi re' hin, oon re' keh xiq'orik. Re' xti ajwaal wach re' chi xqaq'or taq chaaweh i ak' k'uhb'aal, re' xanimaj taq chik i hat. Re' kiwuktiik chaloq chi k'achlik kiwach taqe kamnaq

¹²Eh wila' inqaq'or pan qak'uhb'aal chi re' Jesucristo xk'aach wo' chik chaloq, ¿chib'ih reet noq wilik kiq'orik reh taq chaxilak chi ma' naa ta chik kik'aach cho ruka'peech taqe kamnaq?¹³Wi ta korik chi ma' naa ta chik kik'aach chee kamnaq, iraaj ruq'orom chi ma' xk'aach ta wo' naq chik chee Jesucristo.¹⁴Eh wi ta ma' k'aach cho ruka'peech i Jesucristo, re' k'uhb'aal k'ahchi' qaq'orom xama' xta naq kamaj. Eh re' i nimanik k'ahchi' taq kaat xama' xta naq neerutiq taq aweh.¹⁵Wi ta korik chi ma' naa ta chik kik'aach chaloq i kamnaq, nee naq qohkahnik chi hoj chukul q'orik chuwach i Dios, ruum k'ahchi' qaq'orom chi re' Dios x-uksanik cho reh i Jesucristo chi k'achlik wach.¹⁶Wi ta korik chi ma' naa ta chik kik'aach cho ruka'peech i kamnaq, re' Jesucristo ma' xk'aach ta naq chik cho ruka'peech.¹⁷Eh wi ta ma' xk'aach cho ruka'peech i Jesucristo, re' i nimanik k'ahchi' taq kaat ma' xta naq neen kamanik taq wii' aweh, eh xa kopan amahk wo' naq taq wilkaat.¹⁸Eh re' i kikimik reje chi k'ahchi' kinimam i Jesucristo nee naq insahchik kiwach chi jumpech.¹⁹Wi ta xa re' chupaam i qak'achariik ayu' wach ak'al i ruch'ikaa' qak'ux i runimjiik i Jesucristo, xa re' naq i hoj xiik' naah ti'kiil i naa qak'ulum chikiwach chu'nchel i tinamit.

²⁰Raaj i wili xti korik chi xk'aach wo' chik chaloq Jesucristo re' reh peet k'aach chaloq, k'uhtb'al reh chi naa wo' chik kik'aach chee kamnaq.²¹Re' kimik xa ruum i ru mahk jinaj chi winaq xtohq'ik chaloq, je' wo' chik re' i kiwuktiik chee kamnaq chi k'achlik kiwach xa ruum wo' chik i jinaj chi winaq, re' i Jesucristo.²²Eh xa ruum i ru mahk Adán kikimik chu'nchel i tinamit, je' wo' chik re' noq naa ruwihiik kik'achariik chu'nchel i kinimanik ree Jesucristo.²³Xa re' la', tuslik wach naa rub'anam: Peet, re' i Jesucristo xk'aach wo' chik chaloq. Eh na' k'oloq ruka'peech i Jesucristo, re' chik i xinimanik reh naakik'aach chaloq.²⁴Eh naa rusahchiik wach i wach ak'al, noq re' Jesucristo ruqasam chik i kajaawriik pan q'ab' i ajaab'ees Dios. Re' noq rusacham chik wach i kajaawriik i xa reh reh wach kajaawriik chi taaq'anik.

²⁵Ruum re' Jesucristo ajwaal wach chi naa ruwihiik i rajaawriik chi taaq'anik korehtaal inkuxik ruyeq'em taqe parooq i ki-ixowanik wach.²⁶Eh re' i aj ixowaal naa rusachariik wach pan kuxesb'al poo wach, re' i kimik,²⁷ruum tz'ihb'amaj cho pan santo laj huuj chi re' Dios naa ruye'em ri'si rooq i Jesucristo chu'nchel. Noq xuq'or i Dios chi chu'nchel xuyeew ri'si rooq i Jesucristo, ma' raaj ta ruq'orom chi xuyeew riib' i reh ri'si rooq, ruum re' wo' reh xye'wik ri'si rooq i chu'nchel i re'.²⁸Eh noq kuxinaq chik ruye'ariik ri'si rooq i Jesucristo chu'nchel i xa chib'ih jariik, re' i Jesucristo Ak'uunb'ees naa wo' ruq'asam riib' ri'si rooq i Dios, re' i xye' wik ri'si rooq chu'nchel i xa chib'ih jariik. Eh re' chik Dios q'oreel chinaah chu'nchel.

²⁹Eh wila' ma' naakik'aach cho ruka'peech kamnaq, ¿chib'ih reet noq wilik ju'jun taq chaxilak inqajik kihaa' pankib'ihnaal kamnaq? ¿Chib'ih neerutiq keh chi neenqajik kihaa' pankib'ihnaal i kamnaq wila' ma' naa kik'aach chaloq?³⁰Eh ¿chib'aaj wo' rutiq qeh re' hoj chi nqayeew panyohb'aal i qakach'ariik ruum i ruq'orariik rib'iral i ak' k'uhb'aal?³¹Re' hin hermano, korik i nuq'or taq aweh chi xa chu'nchel q'iij nuye'em wiib' pankimik. Xa re' la' inwik'raaj wo' i rusuqkiil nuk'ux taq i nayeew, ruuk' i runimjiik QaJaaw Jesucristo.³²Re' hin xnukuy ransil i ti' k'axik xkian cho weh i aj Éfeso, re' taqe i je' josq'laj chikop. Eh ¿chib'ih jariik i xutiq weh i re' wila' korik chi ma' naa ta chik kik'aach chaloq kamnaq? Ruuk' i re', i ruk'ul naq chi neenqaq'or i inq'orarik wili: Qa a'n qawa' qahaa' ruum i iqal kab'iij-oq qoh kimik inki.

³³Re' taq i hat, maayeew taq awiib' chi jot'arik. Je' rukab' inq'orarik chi je' wili: Re' runimjiik i yiib' wach taqchi' inyojwik wach i holohik laj na'ojb'al, inki.³⁴Eh re' i holohik laj na'ojb'al taq cha a'n, maa a'n taq chik i mahk, ruum wilik i wilkeeb' taq chaxilak xa je' ma' keht'al ta wach i Dios. Re' wili taq i nuq'or reje aweh, reh chi nee taq tik'ixik chub'aan.³⁵Eh wilik naak i neenpahqanik reh chi je' wili: ¿Nik' chik wach noq naa wo' chik kik'aach chaloq i kamnaq? Eh ¿nik' chik wach ruwii' i kiti'jolal na' kiwuktoq chaloq? inko'q naak.³⁶Ma' xta taq ana'ojb'al ¿Mi ma' nakoj rehtaal re' noq intikarik i ja', q'ahik i rub'an panak'al, eh xa re' chik i ralaas impoq' chaloq?³⁷Eh aha' wilik intikarik panak'al ma' re' taj i k'isa mu'uun chik impoq' chaloq. Re' la' inaq'wach i ja' intikarik, atoob' ta i ja' trigo oon xa chib'ih chik ija'iil.³⁸Eh re' chik i Dios inyej-anik reh nik' wach ruwii' tik, re' ju'jun chi ija'iil i ruyejaa' chi mu'uun re' q'oreel nik' wach iraaj i reh paruk'ux.

³⁹Eh re' i ti'jolal ma' eliik ta wach: Tokoom i qati'jolal i hoj, tokoom i kiti'jolal taqe chikop kijib' kooq, tokoom i kiti'jolal taqe kok' tz'ikin kirupik pan taxaaj, eh tokoom kiti'jolal taqe kar.⁴⁰Je' wo' re' noq wilik i kiti'jolal i wilkeeb' pan taxaaj, je' wo' i wilkeeb' wach ak'al. Tokoom ruholwochiil i kiti'jolal i wilkeeb' pan taxaaj, tokoom ruholwochiil i kiti'jolal i wilkeeb' wach ak'al.⁴¹Re' rusaqumaal i q'iij ma' eliik ta wach ruuk' i rusaqumaal i poh je' wo' ruuk' i kisaqumaal taqe ch'umiil. Eh re' ju'jun chi ch'umiil reh reh wach i kisaqumaal.

⁴²Je' wo' re' noq naakik'aach cho ruka'peech taqe kamnaq: Re' ti'jolal xmuq'ub'jik panak'al re' ruuk' i xa q'ahik xub'an ar, eh na' eloq wo' chik cho panak'al chi k'achlik wach, ma' jaruuj chik naa ruq'ahiik.⁴³Eh re' i xmuq'ub'jik chi xama' xta tz'aaq wilik chik ruloq'il na' wuktoq cho ruka'peech. Eh re' i xama' xta rukowiil noq xmuq'ub'jik wilik chik rukowiil na' wuktoq cho ruka'peech.⁴⁴Re' i ti'jolal imuq'ub'jik re' ruuk' i xa aj ayu' wach ak'al, re' chik ruuk' i pan taxaaj ti'jolal noq naa ruwuktiik chaloq ruka'peech. Re' i ti'jolal re' ruuk' i xa aj wach ak'al naa rusutiniik chi aj pan taxaaj.

⁴⁵Eh pan santo laj huuj i ruq'or chi je' wili: Re' Adán peet winaq, i xa ak'al xkorb'eesjik wii', ye'arik ruk'achariik, inki. Raaj i Adán jinaj chik re' i xk'ulik koq'uun, pan taxaaj xchalik, re' inye'wik k'acharik.⁴⁶Eh ma' xye'arik ta cho qeh chi peet i qati'jolal inchalik pan taxaaj, re' la' peet xye'arik qati'jolal i xa ayu' ti'jolal. Chi riij i re', pan taxaaj chik naa ruchaliik i qati'jolal naa ruye'em qee Dios.⁴⁷Re' Adán, i peet winaq, xa ak'al xkorb'eesjik cho wii' xa aj wach ak'al wo' hoq. Eh re' chik i rukab' winaq, re' i Jesucristo, pan taxaaj chik xchalik i reh.⁴⁸Re' ti'jolal xa ayu' wach ak'al je' wo' ruwii' i ruti'jolal i winaq aj wach ak'al. Eh re' ti'jolal i naa rojiik pan taxaaj, je' wo' ruwii' i ruti'jolal i xchalik pan taxaaj.⁴⁹Re' hoj, yu'naak je' qawii' i winaq xa aj wach ak'al. Eh pan jinaj poo q'iij, re' qati'jolal naa rukahniik chi je' ruwii' i ruti'jolal i winaq xchalik pan taxaaj.

⁵⁰Hat taq hermano, re' hin nuq'or taq aweh chi re' qati'jolal wili ma' re' tee re' naa rokiik pa runimaal rajaawriik i Dios. Ruum re' i ti'jolal wili xanaa wo' ruq'ahiik, ma' re' tee re' naa rokiik haa' chi k'acharik ruuk' i ma' jaruuj naa ruq'ahiik.⁵¹Eh jinaj i ma' eht'alimaj taj naa nuq'orom taq aweh: Re' chi ma' chiquncheel taj i hoj, hoj chik kamnaq na' k'oloq ruka'peech i Jesucristo. Xa re' la', chi qunchelaal, naa rujalariik qawach,⁵²xa ruuk' i jumuutz' i junteeh chi naq'wachiis, re' noq ach re' naa ruxuljiik chee tuun. Eh noq naa ruxuljiik chee tuun re' re', naakiwuktiik chaloq kamnaq, reh chi ma' naa ta chik kikimiik chi jumpech. Eh re' hoj i maa jaa' qoh kimik, xa chi jumehq'iil naa rujalariik qawach.⁵³Re' qati'jolal wili, i xa q'ahik reh, ajwaal wach chi naa rusutiniik chi re' ruuk' i ma' naa ta ruq'ahiik. Eh re' qati'jolal wili, i xakimik reh, ajwaal wach chi naa rusutiniik chi re' ruuk' i ma' jaruuj chik naa rukimiik.

⁵⁴Eh noq sutimaj chik chi ak' ti'jolal i qati'jolal i xa q'ahik reh, eh noq sutimaj-oq chik chi ak' ti'jolal i qati'jolal xakimik reh, ar aj narojiik eloq wach re' i ruq'or pan santo laj huuj chi je' wili: Yu'naak aj re' xsacharik wach chi jumpech i rajaawriik i kimik ruum i manlik aj Ko'loom.⁵⁵Kimik ¿aha' wilik yu'naak awajaawriik inakoj naq reh ikaansanik? kimik ¿aha' wilik yu'naak inakoj naq reh i b'anb'al ti' k'axik? inki.⁵⁶Re' i rukoj chi b'anb'al ti' k'axik i kimik, re' mahk. Eh re' i najtir k'uhb'aal inye'wik rajaawriik i mahk.⁵⁷Re' hoj yu'naak qat'iosej ree Dios noq re' reh i ruyeew ko'lemb'al qeh parub'ihnaal i QaJaaw Jesucristo, eh re' kimik ma' xta chik rajaawriik chi qanaah.

⁵⁸Eh re' taq i hat nuhermano, q'e' taq ti nuk'ax, kow-oq ta ak'ux chi nimanik, maa awach ink'uyu'sanik taq aweh. Chayeew la' taq ak'ux chub'aan i rukamaj i QaJaaw, ruum re' taq i hat aweht'al taq chi re' rukamaj i QaJaaw taq k'ahchi' kaat naa taq ak'ulum jilow. Re' moloj wach tumiin xb'aan toob'al keh i hermano

¹Eh chi riij i moloj wach tumiin toob'al keh i hermano i wilkeeb' Jerusaleem, chamol taq wach je' rukab' inutaq'aam reje ruq'orariik keh i ju'jun ch'uq chi aj nimaneel wilkeeb' Galacia.²Re' taq i hat cha ju'junaal, chu'nchel tominku' taq neenawisaj k'isinoq ruuk' taq atumiin neenareq chupaam i xamano. Re' tumiin re' re', nee taq inamol pareh, chi je' re', ma' xta chik moloj tumiin neenb'aan noq neekimponik taq chawula'jiik i hin.³Eh noq naa nuponiik taq awuuk', naa nutaq'aam taqe reje hermano i neenasik' taq kiwach. Neenqayeew reje kihuuj, reh chi neenkiq'asaj ponoq keh i hermano wilkeeb' Jerusaleem i tumiin naa taq amolom wach.⁴Eh wila' xti ajwaal wach chi nee kinooj haa' i hin, nee wo' kinooj chikiij. Re' Pablo k'ahchi' ruyejaam wach i rojiik chi b'ehik

⁵Eh noq naa wojiik, peet naawik'iik ponoq Macedonia, noq hin chik ik'inaq reje ar kora'j nawojiik k'oloq taq awuuk' ar re' pan tinamit Corinto.⁶Re' hin k'ahchi' nukapaam chi naa nukahniik taq k'isinoq awuuk', ar ta b'ila' naa wik'sam iq'ilej. Eh noq nee kinelik reje ar re' chik taq i hat neetitoob'inik reje weh, aha' chik nee kinooj.⁷Re' hin ma' inwaaj taj chi xa q'e' neekinik'ik reje taq cha wilariik. Inwaaj la' wihik taq awuuk' jarub'-oq q'iij wila' je' re' xraaj wuuk' i QaJaaw.⁸Xa re' la', ko naa pee wik'sam reje i ninq'iij i Pentecostes ayu' Éfeso,⁹ruum koruyee riib' chi neenub'an i rukamaj i QaJaaw ayu'. Eh ko wilik naakinimaniik reh i ruq'oral, atoob' ta ma' k'isiin taqe ki-ixowanik nuwach.

¹⁰Wila' xponik taq awuuk' i Timoteo, chak'ul taq pansuqkiil, reh chi neen wihik pansuqkiil taq chaxilak, ruum re' reh re' wo' rukamaj i QaJaaw k'ahchi' rub'anam, je' rukab' i nub'an i hin.¹¹Eh ma' ta naq awach taq aweh i ma' neemponik panaq'wach i Timoteo. Chatoob'eej la' taq cho pansuqkiil k'uxliis noq neenchalik chi wilariik, ruum re' hin k'ahchi' wuy-eem ayu' wuch'ihil taqe hermano.

¹²Eh re' i hermano Apolos, toq' toq' naq xnub'an reh chi nee inooj taq cha wilariik ruch'ihil taqe hermano. Eh re' reh ma' xuk'ulaa' ta weh chi xooj, neena nooj chaloq taq cha wilariik ko jaruuj pa' ruyee riib' chuwach. Ye'ej suq kiil k'uxliis xkuxik wii' wach rutz'ihb'jiik i huuj wili

¹³Re' taq i hat, xa eliik-oq na'lik taq aweh, eh korik-oq wach taq ak'ux chi nimanik. Matyo'jik taq, eh kow-oq taq ak'ux.¹⁴Eh chib'ih pa' jariik taq inawaaj a'nam, chu'nchel taq cha a'n ruuk' k'axooj.

¹⁵Hermano, aweht'al taq i hat noq re' taqe awach reh i qajaa Estéfanas i xi okik chi peet chunimjiik i ak' k'uhb'aal ar Acaya. Yu'naak i keh kiye'em kik'ux chi kitoob'jiik taqe aj nimaneel.¹⁶Eh i nupahqaaj taq otob'il aweh tinimanoq taq chikiwach awach taqe i je' kikab' i keh. Eh tinimanoq wo' taq chikiwach i kitoob'inik parukamaj i Dios.

¹⁷Re' hin q'e' xsuuqb'ik nuk'ux noq xk'ulik chi nuq'orob'jiik i hermano Estéfanas, ruch'ihil i hermano Fortunato, ruch'ihil i hermano Acaico. Re' keh xi k'ulik b'anoq taq ajilow chawuncheel,¹⁸reh i ruye'ariik rukowiil nuk'ux, je' rukab' noq naa rojiik kiye'em rukowiil taq ak'ux i hat. Re' taqe i hermano je' kikab' i keh, i ruk'ul taqe chi neenak'ax.

¹⁹Re' taqe aj nimaneel wilkeeb' Asia xkitaq'aaj taq rusuqkiil ak'ux. Eh xutaq'aaj wo' taq rusuqkiil ak'ux i Aquila, je' wo' Priscila i rehk'een. Eh re' taqe i hermano inkimol kiib' parupaat inkitaq'aaj wo' taq reje rusuqkiil ak'ux parub'ihnaal i QaJaaw.²⁰Inkitaq'aaj wo' taq rusuqkiil ak'ux chu'nchel hermano wilkeeb' ayu'. Eh re' taq i hat ar, k'ul wo' taq chayeew rusuqkiil ak'ux chawach ruuk' i santo laj tz'ub'uuj.²¹Re' hin i Pablo, ruuk' nuq'ab' xnutz'ihb'aaj taq reje aweh i rusuqkiil taq ak'ux wili.

²²Awach i ma' ruk'ax taj i QaJaaw Jesucristo, taq chaxilak naa ruye'ariik panti' k'axik. Re' QaJaaw Jesucristo k'ulik eloq reh.

²³Eliik ta naq nee ruyeew taq cho cha naah i rotob'il i QaJaaw Jesucristo.²⁴Chawunchelaal taq i hat q'e' taq ti nuk'ax parub'ihnaal i QaJaaw Jesucristo. Je' ta wo' naq re'.

Bible Society in Guatemala

https://app.library.bible/content/695aa4b9f902778f