Read NUMEROS 1

NUMEROS1

¹Re' QaJaaw Dios xuq'oreej i Moisés chinaah i chiq yuuq' Sinaí chupaam i santo laj itz'ihy naah paat molb'al iib', chupaam i k'amb'al rub'eeh i rukab' poh reh i rukab' haab' keliik chee i aj Israel pan tinamit Egipto, je' wili i xuq'or reh:²Re' hat awuch'ihil i Aarón naa taq awik'sam jinaj i tz'ihb' chikinaah i tinamit Israel, chi kich'uhqaal taq naa a'nam, eh chupaam i ju'jun chi paat taq naa atz'ihb'aam i kib'ihnaal i ju'jun chi winaq nab'al reh jarub' chi kiib'.³Re' taqe i aj juninaq haab', je' wo' taqe ik'inaq juninaq haab' re' taqe i manlik chik chi nee kiooj panq'aq'inik akab'cheel taq ruuk' i Aarón naa apech'em je' rukab' imb'aan pankuartel.⁴Eh jinaj i k'amal kib'eeh naa taq apab'aam i wilkeeb' chupaam i ju'jun ch'uq chi tinamit.⁵Re' i k'amal kib'eeh naakitowiik taq aweh chupaam i ju'jun ch'uq chi tinamit, je' wili i kib'ihnaal:
Re' taqe riih rumaam Rubén. Re' i Elisur rak'uun i Sedeur naa ruk'atwiik kib'eeh.

⁶Eh re' taqe i riih rumaam Simeón. Re' Selumiel rak'uun i Zurisadai i naa ruk'atwiik kib'eeh.

⁷Eh re' taqe i riih rumaam i Judá. Re' i Naasón rak'uun i Aminadab naa ruk'amwiik kib'eeh.

⁸Eh re' taqe i riih rumaam Isacar, re' Natanael rak'uun i Zuar, naa ruk'amwiik kib'eeh.

⁹Eh re' taqe i riih rumaam i Zabulón, reh Eliab, rak'uun i Helón naa ruk'amwiik kib'eeh.

¹⁰Eh re' taqe i riih rumaam i José, re' i Elisama rak'uun Amiud naa ruk'amwiik kib'eeh. Eh re' taqe i riih rumaam i Efraín, re' i Gamaliel rak'uun Pedasur naa ruk'amwiik kib'eeh. Eh re' wo' re' naa ruk'amwiik kib'eeh i riih rumaam Manasés.

¹¹Eh re' taqe i riih rumaam i Benjamín, re' i Abidán rak'uun i Gedioni, naa ruk'amwiik kib'eeh.

¹²Eh re' taqe i riih rumaam Dan, re' i Ahiezer rak'uun i Amisadai naa ruk'amwiik kib'eeh.

¹³Eh re' taqe i riih rumaam Aser, re' Pagiel rak'uun i Ocrán naa ruk'amwiik kib'eeh.

¹⁴Eh re' taqe riih rumaam i Gad re' Eliasaf rak'uun i Deuel naa rukahniik chi k'amal kib'eeh.

¹⁵Eh re' taqe riih rumaam Neftalí re' i Ahira rak'uun i Enán naa ruk'amwiik kib'eeh.

¹⁶Re' taqe i wili kib'ihnaal i xsik'arik i kiwach i chi k'amal kib'eeh chupaam i kitinamiit i ju'jun ch'uq chi aj Israel reh chi kiju'junaal xkik'am chee kitinamiit.

¹⁷Eh re' i Moisés, ruch'ihil i Aarón xkitaq'aaj ruk'amariik taqe i winaq xipa'ab'jik chi k'amal b'eeh, re' xq'orarik i kib'ihnaal.¹⁸Eh xkimol wach chu'nchel i tinamit chupaam i k'amb'al rub'eeh i rukab' poh. Eh chi ch'uhqaal xkiyeew re' q'oreel awach i kituut kajaaw, eh xi ajaljik, xi tz'ihb'jik i kib'ihnaal taqe i aj juninaq haab', je' wo' taqe i ik'inaq juninaq haab'.¹⁹Eh re' i Moisés xrajlaaj wo' taqe chinaah i chiq yuuq' Sinaí xub'an wo' hoq i xq'orarik reh ruum i QaJaaw Dios.

²⁰Re' chi kixilak i riih rumaam Rubén, re' peet cho rak'uun i Israel, xi ajaljik pankipaat. Eh xtz'ihb'jik i kib'ihnaal chi kiju'junaal taqe i winaq wilik keh i juninaq haab', je' wo' taqe ik'inaq juninaq haab', re' taqe i manlik chik chi nakojiik panq'aq'inik.²¹Re' i tz'ihb'jik i kib'ihnaal re' re' xi ponik waq'iib' roxk'ahl miil ruuk' hoob' siento chi winaq.

²²Eh chi kixilak i riih rumaam Semeón xi ponik tz'ihb'joq pankipaat ruuk' i kituut kajaaw chu'nchel i winaq wilik keh juninaq haab', je' wo' taqe ik'inaq juninaq haab'. Re' taqe i manlik nakojiik panq'aq'inik.²³Re' taqe i xtz'ihb'jik i kib'ihnaal re' re' xi ponik b'elejlaj roxk'ahl miil ruuk' ixib' Siento chi winaq manlik nakojiik panq'aq'inik.

²⁴Eh chi kixilak i riih rumaam i Gad, xi ponik wo' tz'ihb'joq pankipaat ruuk' i kituut kajaaw, chu'nchel winaq wilik keh juninaq haab', je' wo' taqe ik'inaq juninaq haab'.²⁵Re' taqe i xtz'ihb'jik i kib'ihnaal re' re' xi ponik hoob'roxk'ahl miil ruuk' waqiib' siento, ruuk' lajeeb' roxk'ahl chi winaq manlik chik chi nakojiik panq'aq'inik.

²⁶Eh chi kixilak i riih rumaam Judá xi ponik tz'ihb'joq pankipaat ruuk' i kituut kajaaw chu'nchel i wilik keh juninaq haab', je' wo' taqe ik'inaq juninaq haab'.²⁷Re' taqe i tz'ihb'jik i kib'ihnaal re' re' xi ponik kajlaj rukajwinaq miil ruuk' waqiib' siento chi winaq manlik nakojiik panq'aq'inik.

²⁸Eh chi kixilak i riih rumaam Isacar xi ponik tz'ihb'joq pankipaat ruuk' i kituut kajaaw chu'nchel i winaq wilik keh i juninaq haab', je' wo' taqe ik'inaq juninaq haab'.²⁹Re' taqe i xi ponik tz'ihb'joq i kib'ihnaal re' re' xi ponik kajlaj roxk'ahl miil ruuk' kijib' siento chi winaq manlik naa kojiik panq'aq'inik.

³⁰Eh chi kixilak i riih rumaam Zabulón xi ponik tz'ihb'joq pankipaat ruuk' i kituut kajaaw chu'nchel i winaq wilik keh i juninaq haab', je' wo' taqe ik'inaq juninaq haab'.³¹Re' taqe i xtz'ihb'jik i kib'ihnaal re' re' xi ponik wuqlaj roxk'ahl miil ruuk' kijib' siento chi winaq manlik chik chi nakojiik panq'aq'inik.

³²Eh kitz'ihb'aaj wo' hoq chi kixilak i riih rumaam i José, je' wo' chi kixilak riih rumaam Efraín xi ponik ka'winaq miil ruuk' hoob' siento chi winaq i manlik chik naa kojiik panq'aq'inik.³³Re' taqe i xi ponik tz'ihb'joq i xi ajaljik chi kixilak i riih rumaam Efraín, xi ponik ka'winaq miil ruuk' hoob' siento chi winaq.³⁴Eh chi kixilak i riih rumaam Manasés xi ponik tz'ihb'joq i xi ajaljik chupaam i kipaat ruuk' i kituut kajaaw taqe i winaq wilik keh i juninaq haab', je' wo' taqe ik'inaq juninaq haab'.³⁵Eh re' taqe i tz'ihb'jik i kib'ihnaal xi ponik kab'laj ru ka'winaq miil ruuk' kiib' siento chi winaq i manlik naa kojiik panq'aq'inik.

³⁶Eh chi kixilak i riih rumaam Benjamín xi ponik tz'ihb'joq pankipaat, ruuk' i kituut kajaaw chu'nchel i winaq wilik keh i juninaq haab', je' wo' taqe ik'inaq juninaq haab'.³⁷Re' taqe i xi tz'ihb'jik i kib'ihnaal re' re' xi ponik ho'lajuuj ru ka'winaq miil ruuk' kijib' siento, chi winaq i manlik chik chi naa kojiik panq'aq'inik.

³⁸Eh chi kixilak i riih rumaam i Dan xi ponik tz'ihb'joq pankipaat ruuk' i kituut kajaaw chu'nchel i winaq wilik keh i juninaq haab', je' wo' taqe ik'inaq juninaq haab'.³⁹Eh re' taqe i tz'ihb'jik i kib'ihnaal re' re' xi ponik kiib' ru kajwinaq miil ruuk' wuquub' siento chi winaq i manlik naa kojiik panq'aq'inik.

⁴⁰Eh chi kixilak i riih rumaam Aser xi ponik tz'ihb'joq pankipaat ruuk' i kituut kajaaw, chu'nchel i winaq wilik keh i juninaq haab', je' wo' taqe ik'inaq juninaq haab'. Re' taqe i manlik chi nee kiooj panq'aq'inik.⁴¹Re' taqe i tz'ihb'jik i kib'ihnaal re' re' xi ponik jinaj roxk'ahl miil ruuk' hoob' siento chi winaq.

⁴²Eh chi kixilak i riih rumaam Neftalí xi ponik tz'ihb'joq i kib'ihnaal ruuk' i kituut kajaaw pankipaat chu'nchel i winaq wilik keh i juninaq haab', je' wo' taqe ik'inaq juninaq haab'. Re' taqe i manlik chi nakojiik panq'aq'inik.⁴³Re' tz'ihb'jik i kib'ihnaal re' re' xi ponik oxlaj roxk'ahl miil ruuk' kijib' siento chi winaq.

⁴⁴Re' taqe i winaq wili xi ajaljik ruum i Moisés ruch'ihil i Aarón kuch'ihil taqe i kab'laj chi k'amal b'eeh, ju'jun k'amal kib'eeh i ju'jun ch'uq chi riih rumaam i Israel.⁴⁵Eh chu'nchel i winaq xi ponik tz'ihb'joq i kib'ihnaal chi kixilak i aj Israel re' wilik keh i juninaq haab', je' wo' taqe ik'inaq juninaq haab' manlik naa kojiik panq'aq'inik.⁴⁶Xiponik waqiib' siento miil ruuk' ixib' miil ruuk' hoob' siento ruuk' lajeeb' roxk'ahl chi manlik. Re' i kipa'ab'jik taqe i aj Levíta

⁴⁷Eh re' taqe i aj Levíta keh ma' xtz'ihb'jik taj i kib'ihnaal chi kixilak i kuch aj Israel jun ch'uq.⁴⁸Ruum re' i QaJaaw Dios je' wili i xuq'or cho reh i Moisés pampeet:⁴⁹Noq naa atz'ihb'aam, noq naa awajlaam taqe i aj Israel ma' naa ta kojom haa' taqe i, riih rumaam Leví.⁵⁰Re' taqe i aj Levíta naa apab'aam chub'anariik i kamanik chupaam i santo laj itz'ihy naah paat moloj wii' k'uhb'aal. Eh re' keh naa kilwiik reh, naakik'amwiik reje reh chu'nchel inkamanik parukamaj i Dios. Eh noq naa rujaljiik ruye'aab' i santo laj itz'ihy naah paat i Dios re' wo' keh naakik'amwiik reje reh. Eh chi junsuut i santo laj itz'ihy naah paat naa kiyejaam reje ki-itz'ihy naah paat i keh.⁵¹Eh noq neenjalarik ruye'aab' i santo laj itz'ihy naah paat molooj wii' i k'uhb'aal re' wo' taqe i aj Levíta naakiyojwiik reje reh. Eh re' wo' chik i keh naakiyej-aniik reh aha' naa rukorjiik. Eh wila' awach i tokoom tz'a'inik reh i santo laj itz'ihy naah paat xa chupaam i jumehq' re' re' naa rukanteesjiik.⁵²Eh re' taqe i riih rumaam Israel naa kiyejaam i ki-itz'ihy naah paat chi kich'uhqaal je' rukab' inki a'n i soldado, eh kuch'ihil taqe i ki soldado, eh ruuk' i koq i kipaat naakijosam ju' chee' i itz'ihy kehtalil.⁵³Eh re' taqe i aj Levíta keh chi junsuut i santo laj itz'ihy naah paat moloj wii' i k'uhb'aal naa kiwihiik. Re' keh naa kicha'jiniik reh, reh chi ma' nee ta nchalik rujosq'iil i Dios chikinaah i aj Israel, inki.

⁵⁴Eh re' taqe i aj Israel xkian wo' chu'nchel i aha' wilik i xuq'or i QaJaaw Dios, reh i Moisés. Re' i QaJaaw Dios xuq'or chi ch'uhqaal naa kiwihiik i aj Israel

¹Re' i QaJaaw Dios je' wili i xuq'or reh i Moisés, i Aarón:²Re' taqe i aj Israel naakiyejaam i ki-itz'ihy naah paat chi junsuut i santo laj itz'ihy naah paat molb'al iib', xa re' la' najt k'isinoq naakijilim reje. Eh chi kich'uhqaal nakijosam taxaaj itz'ihy k'uhtb'al reh awach chee kituut kajaaw.

³Re' taqe i riih rumaam i Judá ar panreelb'aal i q'iij naa kiyejaam i ki-itz'ihy naah paat. Eh naakijosam taxaaj itz'ihy kehtalil, eh re' i Naasón rak'uun i Aminadab naa ruk'amwiik kib'eeh i ki soldado.⁴Eh re' i xi tz'ihb'jik xi ponik kajlaj ru kajwinaq miil ruuk' waqiib' siento chi soldado.⁵Eh chi kicheel i re' naa kiyejaam i ki-itz'ihy naah paat taqe i riih rumaam i Isacar, re' Natanael rak'uun i Zuar, naa ruk'amwiik kib'eeh i ki soldado.⁶Eh re' i xi tz'ihb'jik xi ponik kajlaj roxk'ahl miil ruuk' kijib' siento chi soldado.⁷Eh chi kicheel i riih rumaam i Isacar naa kiyejaam i ki-itz'ihy naah paat i riih rumaam Zabulón rak'uun i Eliab rak'uun i Helón naa ruk'amwiik kib'eeh i ki soldado.⁸Eh re' i xi tz'ihb'jik xi ponik wuqlajroxk'ahl miil ruuk' kijib' siento chi soldado.⁹Eh chi kixilak i riih rumaam Judá ox ch'uq chi tinamit i naakimolom kiib' naakimanlojiik jinaj siento miil ruuk' waqiib' ro'k'ahl miil ruuk' kijib' siento chi soldado. Re' taqe re' naa kojiik chi peet b'eeh chikiwach i aj Israel.

¹⁰Eh re' taqe i riih ruum i Rubén pansak'aaj reh i rookb'aal q'iij naakiyejaam i ki-itz'ihy naah paat. Eh nakijosam taxaaj i itz'ihy kehtalil, eh re' Elisur rak'uun i Sedeur naa ruk'amwiik kib'eeh i ki soldado.¹¹Eh re' i xi tz'ihb'jik xi ponik waqiib' roxk'ahl miil ruuk' hoob' siento chi soldado¹²Chucheel i riih rumaam i Rubén naa kiyejaam i ki-itz'ihy naah paat i riih rumaam i Simeón. Eh re' i Selumiel rak'uun Zurisadai naa ruk'amwiik kib'eeh i ki soldado.¹³Eh re' i xi tz'ihb'jik i xi ponik b'elejlaj roxk'ahl miil ruuk' ixib' siento chi soldado¹⁴Eh chi kicheel wo' i koq i re' xkiyejaa' i ki-itz'ihy naah paat taqe i riih rumaam i Gad, eh re' i Eliasaf rak'uun i Reuel xk'amwik kib'eeh i ki soldado.¹⁵Eh re' i xi tz'ihb'jik xi ponik hoob' roxk'ahl miil ruuk' i waqiib' siento ruuk' lajeeb' roxk'ahl chi soldado¹⁶Eh chi kixilak i riih rumaam i Rubén oxch'uq chi tinamiit i naakimolom kiib', naakiponiik jinaj siento miil ruuk' junlaj roxk'ahl miil ruuk' kijib' siento ruuk' lajeeb' roxk'ahl chi soldado, re' taqe re' nakojiik chi peet b'eeh reh i ruka'chuuq.

¹⁷Chi riij taqe re' xam taqe reje b'eeh i aj Levíta panyejaal kajch'uq chi tinamit naa kik'amam reje i santo laj itz'ihy naah paat molb'al iib'. Eh tuslik kiwach noq naa kojiik, eh reh reh wach itz'ihy kehtalil, naa kik'amam reje.

¹⁸Eh re' taqe i riih rumaam Efraín panookb'al q'iij reje naa kiyejaam i ki-itz'ihy naah paat, ar naakijosam taxaaj i itz'ihy kehtalil, eh re' Elisama rak'uun i Amiud i k'amal kib'eeh i ki soldado.¹⁹Eh re' i xi tz'ihb'jik chi kixilak xi ponik ka'winaq miil ruuk' hoob' siento chi soldado²⁰Eh chi kicheel i riih rumaam Efraín naa kiyejaam i ki-itz'ihy naah paat taqe i riih rumaam Manasés. Eh re' i Gamaliel rak'uun i Pedasur, i k'amal kib'eeh i ki soldado.²¹Re' taqe i xi tz'ihb'jik xi ponik kab'laj ru ka'winaq miil ruuk' kiib' siento chi soldado re' i Gamaliel xk'amwik kib'eeh.²²Eh chi kicheel wo' i riih rumaam i Manasés naa kiyejaam i ki-itz'ihy naah paat i riih rumaam Benjamín. Eh re' i Abidán rak'uun i Gedioni i k'amal kib'eeh i ki soldado.²³Eh re' i xitzi'hb'jik xi ponik ho'lajuuj ru ka'winaq miil ruuk' kijib' siento chi soldado²⁴Eh chi kixilak i riih rumaam Efraín naakimolom kiib' ox ch'uq chi tinamit naakimanlojiik jinaj siento miil ruuk' waxiqiib' miil ruuk' jinaj siento chi soldado chi kunchelaal re' i naa kojiik chi peet b'eeh reh paroox ch'uq.

²⁵Eh re' taqe i riih rumaam i Dan pantz'eet reh i rookb'aal i q'iij naa kiyejaam ki-itz'ihy naah paat, ar naakijosam taxaaj i itz'ihy kehtalil, eh re' Ahiezer rak'uun i Amisadai i k'amal kib'eeh i ki soldado.²⁶Eh re' i xi tz'ihb'jik xi ponik kiib' rukaj k'ahl miil ruuk' wuquub' siento chi soldado²⁷Eh chi kicheel wo' i riih rumaam i Dan, naa kiyejaam i ki-itz'ihy naah paat i riih ruum i Aser. Eh re' i Pagiel rak'uun i Ocrán i k'amal kib'eeh i ki soldado.²⁸Eh re' i xi tz'ihb'jik xi ponik jinaj roxk'ahl miil ruuk' hoob' siento chi soldado²⁹Eh chi kicheel wo' i riih rumaam i Dan naa kiyejaam i ki-itz'ihy naah paat taqe i riih rumaam Neftalí. Eh re' i Ahira rak'uun i Enán i k'amal kib'eeh i ki soldado.³⁰Eh re' i xi tz'ihb'jik xi ponik oxlaj roxk'ahl miil ruuk' kijib' siento chi soldado³¹Eh re' taqe i riih rumaam i Dan xi tz'ihb'jik xi ponik jinaj siento miil ruuk' wuqlaj roxk'ahl miil ruuk' waqiib' siento chi soldado Re' naa kojiik chi xam b'eeh, chi riij i kitz'ihy kehtalil.

³²Eh chu'nchel i aj Israel xi tz'ihb'jik xi ponik waqiib' siento miil ruuk' ixib' miil ruuk' hoob' siento ruuk' lajeeb' roxk'ahl chi soldado³³Xa re' la' nik' wach i xuq'or i QaJaaw Dios reh i Moisés chi ma' naa ta rajaljiik haa' taqe i aj Levíta ma' xi ajaljik ta wo' taqe haa'.

³⁴Re' taqe i aj Israel xkian wo' chu'nchel i xuq'or i QaJaaw Dios reh i Moisés, chi kich'uhqaal wo' hoq xkiyejaa' i ki-itz'ihy naah paat, eh kijosaj wo' taxaaj i itz'ihy kehtalil. Eh xkib'esaj wo' reje chi kich'uhqaal i kitinamiit kuch'ihil taqe awach keh. Re' i ruk'ul chi naa kianam i aj Levíta

¹Eh chupaam i q'iij noq xq'orob'jik i Moisés ruum i QaJaaw Dios chinaah i yuuq' Sinaí wilik taqe rak'uun i Aarón, je' wo' hoq i Moisés.²Re' i Aarón je' wili i kib'ihnaal taqe i rak'uun. Nadab b'ih i aasb'ees, eh Abiú, Eliazar, Itamar.³Eh kikajcheel xipa'ab'jik xikuxeesjik ruuk' aseite reh chi xi kahnik chi k'amal kib'eeh aj tiij.⁴Xa re' la' re' Nadab re' Abiú xikimik ruum tokoom inaq'wach q'aaq' i xkikoj chi k'atb'al kimayiij chuwach i QaJaaw Dios chupaam i ye'aab' chiq yuuq Sinaí. Eh ruum chi ma' xta kak'uun, xa re' chik i Eliazar Itamar xi kahnik chi kamanik chi k'amal kib'eeh aj tiij. Eh re' i Aarón i kajaaw ink'amwik kib'eeh.

⁵Eh re' i QaJaaw Dios je' wili i xuq'or reh i Moisés:⁶Re' hat cha taq'aaj kik'amariik i aj Levíta reh chi nee kipa'ab'jik chi k'amal kib'eeh aj tiij, eh neenkitow i Aarón re' i kajaaw k'amal kib'eeh aj tiij.⁷Eh naa kitowom i Aarón noq naa rub'anam i kamanik kuuk' chu'nchel i aj Israel panookb'al reh i nuSanto laj itz'ihy naah paat molb'al iib'. Eh naa wo' kitowiik chub'aan i kamanik chupaam i rusanto laj itz'ihy naah paat i Dios.⁸Eh re' keh naa kicha'jiniik reh i chu'nchel i kikamanik chupaam i nuSanto laj itz'ihy naah paat molb'al iib'. Eh naa wo' kitowiik chub'aan i kamanik naa rub'aan kuuk' chu'nchel i aj Israel chupaam i santo laj ye'aab'.⁹Eh naa aq'asam taqe i aj Levíta reh i Aarón ruch'ihil taqe i rak'uun, reh chi naa kitowom chub'anariik i kamanik kuuk' i aj Israel.¹⁰Eh re' hat naa apab'aam i Aarón ruch'ihil taqe i rak'uun chi k'amal kib'eeh aj tiij. Ruum wila' awach i xub'an i rukamaj i k'amal kib'eeh aj tiij chi ma' pab'amaj taj naa rukanteesjiik. Re' i QaJaaw Dios xuq'or chi re' taqe i aj Levíta re' reh inehchanik keh

¹¹Re' i QaJaaw Dios je' wili xuq'or reh i Moisés:¹²Re' hin xnusik' kiwach i aj Levíta chi kixilak i aj Israel chi jilow i peet kak'uun i aj Israel, ruum aj re', re' hin kinehchanik keh i aj Levíta.¹³Re' taqe i aj Levíta re' hin kinehchanik keh, ruum re' taqe i ki-aasjik chi peet re' hin kinehchanik keh xaruchaliik chi je' re' noq kuxik taqe nukansam i peet kak'uun i aj Egipto. Eh xnuko'leej kiij chi weh taqe i peet kak'uun i aj Israel. Eh chi peet kak'uun i tinamit, eh chi peet kak'uun i chikop re' hin kinehchanik keh, hin Dios inki. Re' i kajaljiik i aj Levíta

¹⁴Re' i QaJaaw Dios je' wili i xuq'or reh i Moisés chupaam i chiq yuuq' Sinaí:¹⁵Re' hat chawik'saj jinaj i tz'ihb' chikinaah i aj Levíta ajlaamb'al keh jarub' chi kiib' pankipaat, eh chi kich'uhqaal. Eh naa awajlaam taqe i kok' kak'uun wilik jinaj poh keh, eh ik'inaq taqe jinaj poh, inki.¹⁶Eh re' i Moisés xik'saj wo' hoq i tz'ihb' ajlaamb'al keh i aj Levíta je' rukab' i xq'orarik reh ruum i QaJaaw Dios.

¹⁷Re' taqe i rak'uun i Leví je' wili i kib'ihnaal: Gersón, i Coat, i Merari.

¹⁸Eh re' taqe rak'uun i Gersón je' wili kib'ihnaal: Libni, Simei.

¹⁹Eh re' taqe i rak'uun i Coat je' wili i kib'ihnaal: Amram, Izahar, Hebrón, Uziel.

²⁰Eh re' taqe rak'uun i Merari je' wili i kib'ihnaal: Mahli, Musi, re' taqe i riih rumaam Leví chi kich'uhqaal ruuk' i kituut kajaaw pankipaat.

²¹Eh re' Gersón rumaam rati't taqe chaloq i riih rumaam Libni je' wo' taqe i riih rumaam Simei.²²Chu'nchel i winaq xi tz'ihb'jik, ruuk' i kituut kajaaw pankipaat xi okik haa' i kok' kak'uun kore' jinaj poh wilik keh xi ponik wuquub' miil ruuk' hoob' siento chikuncheel.²³Eh re' taqe i riih rumaam i Gersón panookb'al reh i q'iij naa kiyejaam reje i ki-itz'ihy naah paat chi riij reje i santo laj itz'ihy naah paat.²⁴Eh re' taqe i riih rumaam i Gersón, re' i Eliasaf rak'uun i Lael k'amal kib'eeh.²⁵Eh re' taqe i riih rumaam Gersón kicha'jinik reh i santo laj itz'ihy naah paat molb'al iib', je' wo' hoq i tz'uhuum b'urb'al naah taqe i chib'ih jariik. Eh je' wo' hoq i itz'ihy wilik i koq chii' tz'ahp panookb'al reh i santo laj itz'ihy naah paat molb'al iib'.²⁶Eh re' wo' keh naa kicha'jiniik reh i itz'ihy kojooj chi chii' i paat, je' wo' hoq i itz'ihy wilik panookb'al reh i chii' i wilik chi junsuut i santo laj itz'ihy naah paat. Re' wo' keh naa kichajinik reh i artaal, je' wo' taqe i k'ahaam, inkamanik ar.

²⁷Eh re' i Coat re' chaloq i rumaam rati't, Amram, i Ishar, i Hebrón, je' wo' hoq i Uziel.²⁸Eh chu'nchel winaq xi tz'ihb'jik ruuk' i kituut kajaaw, eh xi okik haa' taqe i kok' ak'un kore' jinaj poh i wilik keh xi ponik waxiqiib' miil ruuk' waqiib' siento. Eh re' taqe i re' kicha'jinik reh i santo laj ye'aab'.²⁹Eh re' taqe i riih rumaam i Coat chucheel i santo laj itz'ihy naah paat pansak'aaj reh i rookb'aal i q'iij naa kiyejaam i ki-itz'ihy naah paat.³⁰Eh re' taqe i k'ih ch'uq re' re', re' i Elizafán rak'uun i Uziel k'amal kib'eeh.³¹Eh re' keh naa kicha'jiniik reh i loq'laj kaxa moloj wii' i k'uhb'aal, i mexa, i ye'aab' kantela, i artaal, chu'nchel i xa chib'ih jariik kuxisamaj i kikamanik chupaam i rukamaj i Dios, i itz'ihy tasb'al.

³²Eh re' i xti manlik k'amal kib'eeh i aj Levíta re' Eleazar, re' rak'uun i Aarón k'amal kib'eeh aj tiij. Re' k'amal kib'eeh re' re' incha'jinik keh, i kicha'jinik reh i santo laj itz'ihy naah paat.

³³Eh re' taqe i riih rumaam i Merari, re' Mahlita, re' i Musita.³⁴Eh chu'nchel i winaq i xi tz'ihb'jik, xi okik haa' i kok' ak'un jinaj poh i wilik keh xi ponik waqiib' miil ruuk' kiib' siento.³⁵Eh re' i k'amal kib'eeh taqe i re', re' Zuriel rak'uun i Abihail, eh parucheel i santo laj itz'ihy naah paat pantz'eet reh i rookb'aal i q'iij naa kiyejaam i ki-itz'ihy naah paat.³⁶Eh re' taqe i riih rumaam i Merari naa kicha'jiniik reh taqe i rutz'ilomaal i santo laj itz'ihy naah paat, taqe ruche'el, taqe i ch'iklik wii' taqe i rooq, taqe i kulk, je' wo' chu'nchel i xa chib'ih jariik inkamanik ar.³⁷Eh re' wo' keh naa kicha'jiniik reh i chee' koralimaj wii' riij i paat, taqe i ch'iklik wii' taqe i kok' chee' tikooj panak'al, taqe i k'ahaam b'ak'lik wii' i santo laj itz'ihy naah paat.

³⁸Eh re' i Moisés, i Aarón i taqe i rak'uun i Aarón chuwach i santo laj itz'ihy naah paat molb'al iib', parelb'aal q'iij reje naa kiyejaam i ki-itz'ihy naah paat. Eh re' keh naa kicha'jiniik reh i santo laj ye'aab' pankib'ihnaal i aj Israel. Eh awach i xub'an i rukamaj i k'amal kib'eeh i aj tiij chi ma' pab'amaj taj i ruk'ul chi naa rukanteesjiik.

³⁹Eh noq re' i Moisés, i Aarón xkik'saj i tz'ihb' xi ponik kiib' ru ka'winaq miil chu'nchel i winaq xi ajaljik haa' taqe kok' ak'un jinaj poh i wilik keh. Re' i rutojariik kiij taqe i peet ak'un

⁴⁰Re' i QaJaaw Dios je' wili i xuq'or reh i Moisés:
Re' hat cha tz'ihb'aaj i kib'ihnaal chu'nchel i peet kak'uun i aj Israel, eh naa taqe akojom haa' i kok' ak'un kore' jinaj poh i wilik keh.⁴¹Eh re' taqe i aj Levíta nee nakanaa' taqe chi weh chi jilow taqe i peet kak'uun i aj Israel. Eh re' i kichikoop i aj Levíta nee nakanaa' taqe chi weh chi jilow i peet rak'uun i kichikoop i aj Israel. Re' wili re' hin i Dios kinq'orik reh, inki.

⁴²Eh re' i Moisés xutz'ihb'aaj wo' kib'ihnaal chu'nchel i peet kak'uun i aj Israel, je' rukab' i xq'orarik reh ruum i QaJaaw Dios.⁴³Eh chu'nchel i peet kak'uun i aj Israel xi tz'ihb'jik xi okik haa' taqe i kok' ak'un kore' wilik keh i jinaj poh xi ponik kiib' ru ka'winaq miil ruuk' kiib' siento ruuk' oxlaj rukaj winaq.

⁴⁴Re' i QaJaaw Dios je' wili i xuq'or reh i Moisés:⁴⁵Eh re' taqe i aj Levíta naa taqe akanaam chi weh jilow taqe i peet kak'uun i aj Israel. Eh re' i kichikoop i aj Levíta naa taqe akanaam chi weh chi jilow i peet rak'uun kichikoop taqe i aj Israel. Xti korik chi hin kinehchanik keh i aj Levíta i hin, hin Dios.⁴⁶Xa re' la' re' taqe i peet kak'uun i aj Israel xiik' naah kik'ihaal chikiwach i aj Levíta. Re' taqe i kiib' siento ruuk' oxlaj ru kajwinaq chi aj Israel xik'ik chinaah i aj Levíta koruman chi naa rutojariik i kolb'al kiib'.⁴⁷Eh re' hat koruman chi naa apahqaam i ho'oob' chi tumiin re' ruuk' i plata je' rukab' i rupajariik i tumiin imb'aan parupaat i QaJaaw chi tojb'al riij i ju'jun chi winaq re' re'.⁴⁸Eh naa aye'em i tumiin re' re' reh i Aarón, eh keh i rak'uun chi tojb'al kiij aj Israel, inki i QaJaaw Dios.

⁴⁹Eh re' Moisés xumol wo' hoq i tumiin kuuk' i aj Israel tojb'al riij i ko'lemb'al keh i peet kak'uun i aj Israel nik' k'ihaal i ki-ik'ik chikinaah i aj Levíta.⁵⁰Re' i Moisés xuk'ul kuuk' i aj Israel jinaj miil ruuk' ixib' siento ruuk' hoob' ru kajwinaq chi tumiin re' ruuk' i plata, je' rukab' rupajariik i tumiin imb'aan parupaat i Dios.⁵¹Eh re' i Moisés xuq'asaj i tumiin re' re' reh i Aarón, keh i rak'uun, je' wo' rukab' i xq'orarik reh ruum i Dios. Re' i kikamaj naa kianam i aj Levíta

¹Re' i QaJaaw Dios je' wo' chik wili i xuq'or reh i Moisés, i Aarón:²Re' hat naa atz'ihb'aam naa awajlaam pankipaat kuuk' i kituut kajaaw chu'nchel i riih rumaam i Coat re' ruuk' taqe i aj Levíta.³Naa rukuxiik taqe awajlaam i winaq wilik keh i lajeeb' ru ka'winaq haab', eh komponik lajeeb' roxk'aahl haab' i wilik keh. Eh re' taqe i nee ruk'ul chi naakikamaniik chupaam i santo laj itz'ihy naah paat molb'al iib'.

⁴Re' kamanik naa kianam taqe i riih rumaam i Coat chupaam i santo laj itz'ihy naah paat molb'al iib', q'e' looq', re' taqe wili:⁵Noq naakijalam kiye'aab' i aj Israel, re' i Aarón, re' taqe i rak'uun naakesaniik reh i itz'ihy tasb'al wilik panookb'al reh itz'ihy naah paat, eh naa kikojom chib'urb'al naah i loq'laj kaxa moloj wii' i k'uhb'aal.⁶Eh chinaah i itz'ihy re' re' naa kikojom jinaj i ch'ub'ik wach tz'uhuum. Eh chinaah i re' naa kikojom jinaj i itz'ihy raxmuqik inka'yik, xa junsahl chuwii'. Eh naa kikojom i chee' k'amb'al reh iloq laj kaxa.⁷Eh naa kihe'em wach itz'ihy rax muqik inka'yik chinaah i mexa, eh chinaah i re' naakiye'em taqe i pulato, taqe i nimaq cucharo, taqe i kulk, taqe i xaro ye'aab' reh i riis uuva inye'arik chi mayiij. Eh naakiye'em chinaah i kaxlanwi'k chi juneliik.⁸Eh chinaah chu'nchel i re' naa kitz'apam naah chi kaq itz'ihy, eh naa wo' chik kitz'apam naah ruuk' i ch'ub'ik wach tz'uhuum. Eh naa kikojom i chee' tehlb'al reh.⁹Eh naa kik'amam chaloq itz'ihy rax muqik inka'yik naakib'urum chinaah i ye'aab' kantela, taqe i saqumb'al, taqe i lach' kinaah ch'ihch', taqe i kok' pulato, taqe i kulk inkamanik chi ye'aab' aseite reh i saqumb'al.¹⁰Eh chu'nchel i re' naakib'urum chupaam jinaj i ch'ub'ik wach tz'uhuum, eh naa kikojom ruche'el k'amb'al reje reh.

¹¹Eh naa kib'urum itz'ihy rax muqik inka'yik chinaah i artaal oro. Naakib'urum chupaam taqe i ch'ub'ik wach tz'uhuum, eh naa kikojom ruche'el k'amb'al reje reh.¹²Eh naakimolom wach i kulk, je' wo' chu'nchel i chib'ih jariik inkamanik parusanto laj itz'ihy naah paat i Dios. Eh naakib'otom chupaam itz'ihy rax muqik inka'yik, naakib'otom chupaam i ch'ub'ik wach tz'uhuum, naa kikojom ruche'el k'amb'al reje reh.¹³Eh re' i artaal naakijuxum i q'ina', i chaaj chinaah. Chi riij i re' naakitz'apam naah ruuk' itz'ihy rax muqik inka'yik.¹⁴Eh naakiye'em chinaah i artaal chu'nchel inkamanik reh loq'inik. Re' taqe i ye'aab' naah wach q'aaq, taqe i lach' ch'ihch', taqe i likb'al, taqe i nimaq kulk. Eh chu'nchel i re' naakitz'apam naah ruuk' i ch'ub'ik wach tz'uhuum, eh naa kikojom ruche'el k'amb'al reje reh.¹⁵Eh noq re' i Aarón, eh taqe i rak'uun kib'otom chik wach chu'nchel i q'e' looq' kikamanik wii', noq kiyejaam chik kiib' reh i ruk'amariik, re' taqe i riih rumaam i Coat naakik'amwiik reje reh chu'nchel i re'. Xa re' la' ma' naa ta kitz'a'am ruuk' kiqab' taqe i wilik ruloq'il reh chi ma' nee ta kikimik. Eh chu'nchel i kikamanik chupaam i santo laj itz'ihy naah paat molb'al iib', naa kik'amam reje.¹⁶Eh re' i Eliazar i rak'uun i Aarón i k'amal kib'eeh aj tiij naa rucha'jiniik reh i aseite inkamanik reh saqumb'al, i insensia q'e' ink'ohnik, i chi naq'wach inkiyeew chi kimayiij elik. Eh re' wo' reh naa rucha'jiniik reh aseite inkamanik chi kuxesb'al, je' wo' hoq itz'ihy naah paat, chu'nchel i wilik chupaam, taqe i kikamanik chupaam, inki QaJaaw Dios.

¹⁷Eh re' i QaJaaw Dios je' wili i xuq'or reh i Moisés, i Aarón:¹⁸Re' taq i hat ma' naa ta taq aye'em q'ab' chi naa rusahchiik kiwach taqe i riih rumaam i Coat chi kixilak i aj Levíta.¹⁹Eh reh chi ma' nee ta inkitz'aj i wilik kiloq'il, eh chi ma' nee ta kikimik je' taq wili i naa a'nam: Re' hat Moisés awuch'ihil i Aarón awuch'ihil taqe rak'uun naa taq awokiik chupaam i santo laj ye'aab', re' taq i hat naa aq'oriik keh i riih rumaam i Coat chib'ih i naa kianam, chib'ih i naa kik'amam reje.²⁰Chi je' re', re' keh ma' nee ta nkijil i koq kiib' chi rilariik taqe i wilik kiloq'il, eh ma' nee ta wo' kikimik, inki i Dios.

²¹Eh re' i QaJaaw Dios je' wili i xuq'or reh i Moisés:²²Re' hat naa awik'sam i tz'ihb' pankipaat chi kich'uhqaal ruuk' i kituut kajaaw taqe i riih rumaam Gersón.²³Naa rukuxiik awajlaam taqe i winaq wilik keh i lajeeb' ru ka'winaq haab', eh koneen ponik lajeeb' roxk'ahl haab'. Re' taqe i nee ruk'ul chi neenkian i kamanik chi k'amal b'eeh aj tiij chupaam i santo laj itz'ihy naah paat molb'al iib'.

²⁴Eh re' i kamanik naa kianam taqe i riih rumaam i Gersón re' taqe wili:²⁵Naa kik'amam reje i santo laj itz'ihy naah paat molb'al iib', ruch'ihil itz'ihy tasb'al, ruch'ihil imb'urarik wii' naah i xa chib'ih jariik, ruch'ihil i ch'ub'ik wach tz'uhuum b'urb'al naah taqe i naa ruk'amariik reje, ruch'ihil itz'ihy wilik chi tasb'al panookb'al reh i santo laj itz'ihy naah paat molb'al iib'.²⁶Eh re' wo' keh naakik'amwiik reje reh taqe itz'ihy tasb'al reje chi' paat, je' wo' hoq itz'ihy wilik panookb'al reh i chi' paat, re' sutimaj wii' riij itz'ihy naah paat, i artaal, taqe i k'ahaam imb'ak'arik wii' taqe itz'ihy je' wo' i chu'nchel inkamanik taq aweh reh nukamaj panupaat.²⁷Eh re' hat naa akojwiik keh pankikamaj taqe i riih rumaam i Gersón, eh re' i Aarón, re' taqe i rak'uun naa ruch'ob'wiik rub'ehel keh naa rucha'jiniik keh ruuk' chu'nchel i naa kianam, eh chib'ih i naa kik'amam reje.²⁸Re' taqe wili i kamanik naa kianam i riih rumaam i Gersón chupaam i santo laj itz'ihy naah paat molb'al iib'. Eh re' i naa rukahniik chi k'amal kib'eeh re' Itamar rak'uun i Aarón k'amal kib'eeh aj tiij.

²⁹Eh naa wo' atz'ihb'aam, taqe pankipaat ruuk' i kituut kajaaw chu'nchel i riih rumaam i Merari.³⁰Eh naa rukuxiik taqe awajlaam i winaq wilik keh i lajeeb' ru ka'winaq haab', eh komponik lajeeb' roxk'ahl haab'. Re' taqe i ruk'ul chi nee kikamanik chupaam i santo laj itz'ihy naah paat molb'al iib'.³¹Re' i kikamaj naa kianam, re' i ruk'amariik taqe reje i rutz'ilomaal i santo laj itz'ihy naah paat molb'al iib', ruch'ihil taqe i ruq'e'liik i santo laj itz'ihy naah paat, ruch'ihil taqe i rooq, ruch'ihil taqe i ch'ikaab' reh.³²Eh re' wo' keh naakik'amwiik reje taqe i chee' kotimaj wii' riij i chii' i paat i molarik wii' iib', i ch'iklik wii', taqe i k'ahaam inkamanik chi b'ak'b'al, taqe i kok' chee' kib'ak'ariik wii' naa wo' kik'amam reje chu'nchel i naa rukamaniik taq aweh. Eh re' hat naa aach'ob'wik rub'ehel keh chi kiju'junaal chib'ih i naa kik'amam reje.³³Re' taqe i wili i kamanik naa kianam i riih rumaam i Merari chupaam i santo laj itz'ihy naah paat molb'al iib'. Eh re' i naa rukahniik chi k'amal kib'eeh, re' Itamar i rak'uun i Aarón i k'amal kib'eeh aj tiij, inki Dios.

³⁴Eh re' Moisés, re' i Aarón ruch'ihil taqe i k'amal kib'eeh i tinamit, xkik'saj i tz'ihb' chikinaah chi kiju'junaal pankipaat ruuk' i kituut kajaaw taqe riih rumaam i Coat³⁵Eh xkajlaaj wo' taqe i winaq wilik keh i lajeeb' ru ka'winaq haab', eh ko xi ponik lajeeb' roxk'ahl haab'. Re' taqe i ruk'ul chi naakokiik chi kamanik chupaam i santo laj itz'ihy naah paat molb'al iib'.³⁶Eh chu'nchel i winaq xkajlaaj xi ponik kiib' miil ruuk' wuquub' siento ruuk' lajeeb' roxk'ahl chu'nchel.³⁷Je' re' k'ihaal xi ponik taqe i riih rumaam i Coat. Re' taqe i ruk'ul chi naakokiik chi kamanik chupaam i santo laj itz'ihy naah paat molb'al iib'. Je' k'ihaal i xkitz'ihb'aaj i xkajlaaj i Moisés ruch'ihil i Aarón, je' wo' rukab' xq'orarik reh i Moisés ruum i QaJaaw Dios.

³⁸Eh xkajlaaj wo' taqe i riih rumaam i Gersón chi kich'uhqaal ruuk' i kituut kajaaw pankipaat.³⁹Re' taqe i wilik keh i lajeeb' ru ka'winaq haab', eh ko xi ponik lajeeb' roxk'ahl haab'. Re' i ruk'ul chi naakokiik chi kamanik chupaam i santo laj itz'ihy naah paat molb'al iib'.⁴⁰Eh re' i xi tz'ihb'jik re' re' xi ponik kiib' miil ruuk' waqiib' siento ruuk' lajeeb' ru ka'winaq chu'nchel.⁴¹Je' re' kik'ihaal i riih rumaam i Gersón xi ajaljik re' taqe i ruk'ul chi naakokiik chi kamanik chupaam i santo laj itz'ihy naah paat molb'al iib'. Eh re' i Moisés, i Aarón xi ajlanik reh je' rukab' i xuq'or i QaJaaw Dios.

⁴²Eh re' taqe i riih rumaam i Merari i xi tz'ihb'jik chi kich'uhqaal ruuk' i kituut kajaaw pankipaat.⁴³Eh re' taqe i wilik keh i lajeeb' ru ka'winaq haab' ko xi ponik lajeeb' roxk'ahl haab'. Re' taqe i ruk'ul chi naakokiik chi kamanik chupaam i santo laj itz'ihy naah paat molb'al iib'.⁴⁴Re' xitz'ihbjik xi ponik ixib' miil ruuk' kiib' siento chu'nchel.⁴⁵Je' re' kik'ihaal xi ponik chu'nchel i riih rumaam i Merari. Re' taqe i ruk'ul chi naakokiik chi kamanik chupaam i santo laj itz'ihy naah paat. Re' wo' hoq i Moisés, re' i Aarón xitz'ihb'anik keh, je' rukab' i xuq'or i QaJaaw Dios reh i Moisés.

⁴⁶Eh re' i Moisés, re' i Aarón, k'uch'ihil i k'amal b'eeh chi kixilak i aj Israel, kuxik kitz'ihb'aam chi ch'uhqaal ruuk' i kituut kajaaw pankipaat taqe i aj Levíta.⁴⁷Re' taqe i wilik keh i lajeeb' ru ka'winaq haab', ko xi ponik lajeeb' roxk'ahl haab' re' taqe i ruk'ul chi neekiokik chub'aan i kamanik chupaam i santo laj itz'ihy naah paat molb'al iib'.⁴⁸Eh re' taqe i xi tz'ihb'jik re' re' xi ponik waxiqiib' miil ruuk' hoob' siento ruuk' kajwinaq chu'nchel.⁴⁹Re' tz'ihb' wili xb'aan wo' hoq je' rukab' i ruq'orom i QaJaaw Dios reh i Moisés. Eh chi kiju'junaal wo' xq'orarik keh chib'ih i naa kianam, eh chib'ih jariik i naa kik'amam reje, je' rukab' i ruq'or i QaJaaw Dios reh i Moisés. Re' kehteesjiik pankeh i ch'uwa' kiwach

¹Re' i QaJaaw Dios je' wili xuq'or reh Moisés:²Re' hat cha q'or keh i aj Israel chi kesaj cho chupaam i kiye'aab' taqe i wilik i rax q'aah chikiij, taqe i nelik i ruha'iil i kik'achab', taqe inkich'uwa'risaj kiib' ruuk' i rutz'a'jiik i kamnaq.³Naakesam cho chupaam i kiye'aab' wilik wii' i ki-itz'ihy naah paat chi winaq chi ixoq. Chi je' re' ma' nee ta inch'uwa'rik paam i kiye'aab', re' i kinwihik wii' hin chi kixilak, inki Dios.

⁴Eh re' taqe i aj Israel xkian wo' hoq i xq'orarik reh i Moisés ruum i Dios, xkesaj wo' cho chupaam i kiye'aab' chu'nchel taqe i wilik ruch'uwa'iil kiwach. Re' k'uhb'aal chi riij jino'q i mahk, eh jino'q i ma' holohik taj imb'aan

⁵Re' i QaJaaw Dios je' wili xuq'or reh Moisés:⁶Re' hat cha q'or keh i aj Israel noq re' jino'q i winaq, oon jino'q ixoq ma' korik ta wach ruk'ux ruuk' i QaJaaw Dios, i rub'an jino'q i ma' holohik ta chi b'anarik reh jino'q i tokoom iraaj ruq'orom chi ruq'eb' riib' pamahk,⁷xa re' la' koruman chi rupahqaam kuyb'al ru mahk reh i Dios, je' wo' reh i ras ruch'aaq' chi riij i mahk xub'an. Eh naa ruye'em jilow chib'ih xmahkunik wii' kojuninaq chik naa rik'sam naah i siento naa ruye'em reh chi jilow awach i xujot'.⁸Eh wila' kamnaq chik i xujot', eh wi ma' awach chik i k'achlik reh, ma' awach ta chik neenk'ulwik reh i jilow i xmahkunik wii'. Re' naa ruye'em chi jilow i xmahkunik wii' nee ruk'am cho reh i QaJaaw, eh nee ruk'ul i k'amal kib'eeh aj tiij naa ruq'asam chi rumayiij imas tentzun i k'amal kib'eeh aj tiij pahqb'al rukuyb'al kimahk i xb'anik jot'ooj.

⁹Eh chu'nchel i mayiij naa kiq'asam reh i Dios i aj Israel naa kiq'asam reh i k'amal kib'eeh aj tiij, eh naa wo' rukahniik reh.¹⁰Eh chu'nchel i xa chib'ih jariik i neenq'ahteesjik reh i QaJaaw Dios i naa ruk'amariik reje reh i k'amal kib'eeh aj tiij, reh wo' hoq i k'amal kib'eeh aj tiij naa rukahniik, inki. Re' k'uhb'aal inkahnik chinaah imb'anik i q'aab'

¹¹Re' i QaJaaw Dios je' wili xuq'or reh Moisés:¹²Re' hat cha q'or keh i aj Israel taqe q'orik wili, qaq'or chi wilik jino'q ixoq k'ahchi' ruk'atam rooq i rub'ahiil ruuk' tokoom winaq,¹³xub'an-oq i k'oyomal ruuk' i tokoom winaq chi ma' reht'al i rub'ahiil. Atoob' ta neeruch'uwarisaj riib' ruuk' i k'oyomal. Eh wila' ma' xkan chi riij chi korik chi je' re' i k'ahchi' rub'anam, xanaa wo' rukahniik panq'equm wila' ma' xkan chi k'ahchi' chi k'oyomal.¹⁴Eh wila' je' re', re' rub'ahiil neentohq'ik ruq'ab'um i rehk'een. Eh re' i b'ahiilb'ees wilik naapech neerukapaaj chi re' i rehk'een k'ahchi' ruch'uwa'risam wach i rukaxaro chi xama' xta wo' k'ahchi' rub'anam.¹⁵Re' winaq re' re' koruman chi naa ruk'amam i rehk'een chuwach i k'amal kib'eeh aj tiij naa ruk'amam reje haa' chi rumayiij chi riij i rehk'een ik'inaq kijib' libra chi ke'emaj cabada. Xa re' la' ma' naa ta rukojom aseite ruuk', eh ma' naa ta wo' rukojom insensia ruuk', ruum re' mayiij re' re' naab'al reh mi xub'an i mahk i rehk'een, oon ma' xub'an taj.

¹⁶Eh re' k'amal kib'eeh aj tiij naa ruq'orom reh i ehk'eenb'ees chi naa rujilim i koq riib' reh chi naa ruq'asam i koq chuwach i QaJaaw.¹⁷Eh re' i k'amal kib'eeh aj tiij naa ruchopom cho k'isinoq i ha' kuxisamaj chupaam ak'al kulk, eh naa ruye'em chupaam i ha' re' re' k'isinoq i pooq wilik chupaam i santo laj itz'ihy naah paat.¹⁸Re' i k'amal kib'eeh aj tiij naa rupab'aam i koq chuwach i QaJaaw Dios ehk'eenb'ees re' re', eh naa resam i b'urb'al wach i naah, eh naa ruye'em pan q'ab' xye'arik chi mayiij chi riij i q'aab' imb'aan reh. Eh re' i k'amal kib'eeh aj tiij naa ruchopom pan kulk i k'ah laj ha' re' ink'amwik chaloq i ti' k'axik.¹⁹Eh re' i k'amal kib'eeh aj tiij naa ruq'orom reh i ehk'eenb'ees chi chuq'or i xti korik, naa rupahqaam chi je' wili: Mi ma' k'ahchi' ak'atam rooq ab'ahiil, mi ma' xat wirik ruuk' i jino'q tokoom winaq ma' xta neenak'ul noq neenawuk'ej i ha' wili ink'amwik chee ti' k'axik.²⁰Eh wila' korik chi xak'at rooq ab'ahiil, wila' korik chi xwirik awuuk' jino'q i tokoom winaq, eh xach'uwa'reej awiib' ruuk' taqe i yiib' wach na'ojb'al re' re'.²¹Re' i k'amal kib'eeh aj tiij, je' wili i naa ruq'orom reh i ehk'eenb'ees re' re': Re' hat naa rusipjiik apaam, naa roq'taam riib' i nah atuuq, ma' naa ta chik aawak'unaniik. Re' i QaJaaw Dios naa ruye'wiik chee ti' k'axik cha naah re' re'.²²Re' taqe i tojb'al mahk wili naa ruchaliik cha naah noq naa awuk'em i k'ahlaj ha' wili ink'amwik cho reh i ti' k'axik inko'q. Eh re' ixoq je' wili i naa ruq'orom: I ruk'ul chi je' re' i naa nuk'ulum, inko'q wixub'an i mahk.

²³Eh re' i k'amal kib'eeh aj tiij naa rutz'ihb'aam panhuuj i ti' k'axik wili, eh naa wo' chik rutz'ajam iloq ruuk' i k'ahlaj ha'.²⁴Chi riij i re' naa ruye'em reh chi uuk'jik reh chi neenk'aahb'ik cho chupaam.²⁵Re' i k'amal kib'eeh aj tiij naa ruk'ulum pan q'ab' ixoq i mayiij xuyeew chi riij i q'aab' xb'aan reh naa ruq'asam pan q'ab' i QaJaaw Dios, chi riij i re' naa ruq'asam wach artaal.²⁶Eh re' i k'amal kib'eeh aj tiij naa ruchopom chaloq i ke'emaj mayiij xq'ahteesjik reh chi riij ixoq naa ruk'atam wach artaal.
Eh naa ruye'em reh chi uuk'jik i k'ahlaj ha' ixoq.²⁷Wila' korik chi xuk'at rooq i rub'ahiil ruuk' tokoom winaq, re' ha' re' re' ink'amwik cho ti' k'axik, naa ruk'ahb'iik cho chupaam, eh naa rusipjiik, i paam, naa roq'taam riib' i nah rutuuq, ma' naa ta chik ruwihiik ruha'lak'uun. Eh re' ixoq re' re' naa ruk'ulum i ti' k'axik chi kixilak i rutinamiit.²⁸Eh wila' re' ixoq re' re' ma' xuch'uwa'reej ta wach i rukaxarohiil, eh ma' xta wo' jino'q i mahk xub'an konee wo' inwihik ruha'lak'uun.

²⁹Re' taqe wili i k'uhb'aal inkahnik chinaah ixoq inq'aab'jik, oon neeruk'at rooq i rub'ahiil ruuk' tokoom winaq.³⁰Re' wo' wili i k'uhb'aal inkahnik chinaah i b'ahiilb'ees ruq'ab'aj i rehk'een. Ruum i re', re' b'ahiilb'ees koruman chi naa ruk'amam chee rehk'een chuwach i QaJaaw Dios. Eh re' i k'amal kib'eeh aj tiij naa rub'anam ruuk' ixoq nik' wach i ruq'or i k'uhb'aal wili.³¹Eh wila' re' ixoq i ruk'at rooq i rub'ahiil re' wo' reh naa rutojwiik riij i ru mahk, eh re' i rub'ahiil neenkahnik chi ma' xta ru mahk, inki i QaJaaw Dios. Re' i k'uhb'aal naa rukahniik chikinaah i naa kiq'asam kiib' chi je' Nazareo

¹Re' i QaJaaw Dios je' wili xuq'or reh i Moisés:²Re' hat cha q'or keh i aj Israel taqe i q'orik wili: Wila' re' jino'q i winaq, oon jino'q ixoq iraaj ruq'asam riib' chi kamanik reh i Dios chi je' jino'q Nazareo.³Re' reh ma' nee ta rub'an chi nee ruk'ej reh i vino, taqe k'ahlaj ha', je' wo' hoq i ch'amlaj ha', eh ni xata re' riis i uuva neeruk'ej, ni xata naa ruk'uxum reh i uuva kore' xsik'arik, ni xata re' i najtir insik'arik.⁴Eh nik' najtiil naa rub'anam chi je' Nazareo ma' naa ta ruk'uxum reh taqe i xa chib'ih jariik inkorjik ruuk' uuva ni xata re' i riij, ni xata re' naq' naa ruk'uxum.⁵Eh ma' naa ta wo' ruyok'om i rismaal i naah, naa la' rukanaam chi naa ruk'ihiik. Konaa chik ruponiik i q'iij nik' najtiil xuq'at noq xkahnik chi je' Nazareo, noq xuq'asaj riib' reh i QaJaaw Dios, korehtaal i rub'an i xuq'or.⁶Eh nik' najtiil naa ruwihiik chi je' re', ma' naa ta rujilim i koq riib' ruuk' jino'q i kamnaq.⁷Atoob' ta re' rajaaw oon rutuut, oon re' i jino'q i ras winaq oon jino'q ranaab' neenkimik ma' ruk'ul ta chi nee rutz'a'j i koq, reh chi ma' nee ta ruch'uwa'reej riib'. Ruum re' reh ruq'asam riib' reh i Dios, korehtaal i rub'an aha' wilik i xuq'or.⁸Eh nik' najtiil naa rub'anam chi je' Nazareo iraaj ruq'orom chi ruq'asam riib' reh i Dios.

⁹Eh wila' xkimik jino'q ma' najta chucheel i je' Nazareo ch'uwa'rik-oq wach i riis maal i naah xk'ihik noq xuq'asaj riib' reh i QaJaaw Dios paruwuuq q'iij naa rujoyom i rismaal naah, chupaam wo' i ruq'ijil i saqb'eesb'al riib'.¹⁰Eh chupaam i ruwahxaaq q'iij naa ruk'amam reje reh i k'amal kib'eeh aj tiij i kiib' chi kok' paloma, oon kib'-oq chi kok' mukur panookb'al reh i santo laj itz'ihy naah paat molb'al iib'.¹¹Re' i k'amal kib'eeh aj tiij jinaj keh i kok' chikop re' re' naa ruq'asam chi mayiij chi riij i mahk. Eh re' jinaj naa ruk'atam chi mayiij pahqb'al kuyb'al ru mahk i xuch'uwa'risaj riib' ruum i rutz'a'jiik i kamnaq, chupaam i junk'aam re' re' naa wo' chik rusaaqb'iik wach i rismaal i naah.¹²Kore' chik naa rutoq'aam ruq'asam riib' chuwach i QaJaaw Dios. Eh aha' wilik i xub'an cho pampeet ruum re' i rismaal i naah ruq'asam reh i QaJaaw Dios xch'uwa'rik chik wach. Eh naa ruk'amam reje jinaj i tentzun jinaj haab' i wilik reh, reh chi naa ruq'asam chi mayiij chi riij i ru mahk.

¹³Eh noq neenkuxik wach i junch'iht chi q'asanik iib' reh i Dios chi je' Nazareo naa rojiik panookb'al reh i santo laj itz'ihy naah paat molb'al iib'.¹⁴Eh naa ruq'asam chi rumayiij jinaj tentzun jinaj haab' wilik reh, eh jinaj ixoq tentzun jinaj haab' i wilik reh manlik wach kiti'jolal. Eh naa ruq'asam chi rumayiij jinaj imas tentzun manlik wach ruti'jolal k'amb'al riib' panotob'il ruuk' i Dios.¹⁵Eh naa wo' ruq'asam jinaj chakach chi kaxlanwi'k ma' kojooj ta ch'amb'esb'al reh korjinaq ruuk' i holohik arina, xilakimaj ruuk' aseite. Je' wo' hoq i suq laj kaxlanwi'k ma' kojooj ta ch'amb'esb'al reh xilakimaj ruuk' aseite, ruch'ihil i rumayiij xa chi naq'wach ruch'ihil i riis uuva.¹⁶Re' i k'amal kib'eeh aj tiij naa ruq'asaniik reh chuwach i QaJaaw Dios chi mayiij chi riij i mahk, eh naa wo' ruq'asam i k'atoj mayiij.¹⁷Eh re' imas tentzun naa ruq'asam chi mayiij k'amb'al iib' panotob'il ruuk' i Dios junye'ariik ruuk' i jinaj chakach chi kaxlanwi'k ma' kojooj ta ch'amb'esb'al reh. Eh naa wo' ruq'asam i mayiij xa chi naq'wach, je' wo' hoq i riis uuva.¹⁸Eh re' naa rub'anam chi je' Nazareo naa rujohyam i rismaal i naah panookb'al reh i santo laj itz'ihy naah paat molb'al iib', eh naa ruchopom chaloq i rismaal i naah, ruq'asam naq reh i QaJaaw naa rukutum wach q'aaq' naa ruqopiik chi ri'sil i mayiij k'amal iib' panotob'il ruuk' i Dios.¹⁹Eh re' i k'amal kib'eeh aj tiij naa ruk'amam chaloq i raa' tileb' imas tentzun noq chaq'inaq chik, eh naa ruk'amam cho jino'q i kaxlanwi'k ma' kojooj ta ch'amb'esb'al reh wilik pank'isa chakach, ruch'ihil i suq laj kaxlanwi'k ma' kojooj ta ch'amb'esb'al reh naa ruye'em pan q'ab' i je' Nazareo noq rujoyom chik i rismaal naah.²⁰Re' i k'amal kib'eeh aj tiij xub'an i ninq'iij xuq'asaj i mayiij chuwach i QaJaaw Dios, re' i rutib'kaal chi' ruk'ux i chikop, ruch'ihil i raa' tileb'. Eh re' i mayiij re' re' wilik rusantohiil naa rukahniik chi reh i k'amal kib'eeh aj tiij. Eh re' i je' Nazareo neerub'an chi nee ruk'ej i riis uuva.

²¹Re' i k'uhb'aal wili inkahnik chinaah i naa ruq'asam riib' chi je' Nazareo. Re' taqe i wili mayiij naa ruq'asam ma' xta chik jino'q mayiij neenpahqaljik reh chi ma' nee ta rukuy ruye'ariik. Xa re' la' inchol rub'anam aha' wilik i ruq'orom noq naa rukuxiik wach nik' najtiil xub'an chi je' Nazareo, inki i QaJaaw Dios. Re' i kuxisanik naa kianam i k'amal kib'eeh aj tiij

²²Re' i QaJaaw Dios je' wili xuq'or reh i Moisés:²³Re' hat cha q'or reh i Aarón, ruch'ihil taqe i rak'uun, noq naa kikuxisam taqe i aj Israel je' wili naa kiq'orom:

²⁴Re' ta naq i Dios neentoob'inik, neencha'jinik taq aweh.²⁵Eh suq ta naq taq awilariik neerub'an i QaJaaw Dios, eh nee ta naq i ruketelaaj taq awach.²⁶Re' ta naq i QaJaaw Dios neenilwik taq aweh, neen ye'wik ataq weh i suq kiil k'uxliis, inko'q taqe.

²⁷Chi je' re', re' taqe i k'amal kib'eeh aj tiij panub'ihnaal naa kikuxisam taqe i aj Israel. Eh re' hin naa wo' nukuxisam taqe, inki i QaJaaw Dios. Re' i mayiij xye'arik noq xq'ahteesjik pan q'ab' i Dios i santo laj itz'ihy naah paat

¹Eh noq xukohlaaj rukorb'eesjiik i santo laj itz'ihy naah paat i Moisés xukuxisaj ruuk' aseite, xukuxisaj wo' taqe chu'nchel i wilkeeb' chupaam. Eh xukuxisaj wo' ruuk' i aseite i artaal, ruch'ihil taqe i kulk inkamanik ar.²Eh re' taqe i k'amal kib'eeh i ju'jun ch'uq chi aj Israel, re' taqe i xitowik haa' chi tz'ihb' noq xb'aan i ajlanik xponik kiq'asaj i kimayiij chuwach i QaJaaw Dios.³Re' kimayiij xkiq'asaj waqiib' chi kareta tz'aplik naah, eh kab'laj i b'ooyax, ju'jun chi kareta i xkiq'asaj i kiib' chi k'amal b'eeh. Eh ju'jun i b'ooyax xkiq'asaj chi kiju'junaal, ar xkiq'asaj chi kimayiij chuwach i santo laj itz'ihy naah paat.

⁴Chi riij i re', re' i QaJaaw Dios je' wili i xuq'or reh i Moisés:⁵Chak'ul keh taqe i kareta taqe b'ooyax reh chi neen kamanik chi k'amb'al reje reh i ruche'el i santo laj itz'ihy naah paat molb'al iib'. Eh nee nach'aq chikinaah i aj Levíta, re' q'oreel chib'ih i ihq naa kik'amam reje, inki.

⁶Eh re' i Moisés xuk'ul wo' taqe i kareta, taqe i b'ooyax, eh xuch'aq keh i aj Levíta.⁷Re' i Moisés kiib' i kareta, kijib' i b'ooyax xuyeew keh i riih rumaam Gersón. Re' i ajwaal wach chi keh reh i kikamaj.⁸Eh kijib' wo' i kareta, eh waxiqiib' i b'ooyax xuyeew keh i riih rumaam Merari re' i ajwaal wach chi keh reh i kikamaj. Eh re' intaaq'anik keh, re' i Tamar rak'uun i Aarón i k'amal kib'eeh aj tiij.⁹Eh re' taqe i riih rumaam Coat ma' xye'arik ta kikareta, je' wo' kib'ooyax chi k'amb'al kihq xa nah kitileb' xkik'am reje ruum wilik rusantohiil i kik'amooj.

¹⁰Eh re' taqe i k'amal kib'eeh i ju'jun ch'uq chi aj Israel noq xkuxeesjik i artaal ruuk' aseite xkik'am reje i kimayiij xponik kiyeew chinaah i artaal.¹¹Re' i QaJaaw Dios je' wili i xuq'or reh i Moisés: Re' ju'jun chi q'iij, ju'jun chi k'amal kib'eeh i ju'jun ch'uq chi aj Israel naa ruchaliik chuye'ariik i rumayiij kuxesb'al reh i artaal, inki.

¹²Pan peet q'iij re' i Naasón rak'uun i Aminadab xuq'asaj i rumayiij re' k'amal kib'eeh i jun ch'uq chi tinamit riih rumaam Judá.¹³Re' i mayiij xuq'asaj jinaj i nimlaj pulato re' ruuk' i plata ik'inaq ixib' libra rahliil. Eh jinaj i nimlaj kulk re' ruuk' i plata achk'isiin ma' kiib' libra rahliil, je' rukab' i pajooj imb'aan chupaam i santo laj itz'ihy naah paat. Eh kab'chel i re' nujinaq chi holohik laj arina xilakimaj ruuk' aseite reh mayiij.¹⁴Eh xuq'asaj wo' chi rumayiij jinaj cucharo oro kijib' onse rahliil nujinaq chi insensia.¹⁵Xuq'asaj wo' hoq chi k'atoj mayiij jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.¹⁶Eh xuq'asaj wo' hoq i jinaj imas kaprax pahqb'al kuyb'al mahk.¹⁷Eh pantz'apaab' wach xuq'asaj i mayiij k'amb'al iib' panotob'il ruuk' i Dios kiib' i b'ooyax ho'oob' imas tentzun, ho'oob' imas kaprax, eh ho'oob' i tentzun ju'jun haab' i wilik ke. Re' taqe wili i mayiij xuq'asaj i Naasón rak'uun i Aminadab.

¹⁸Eh parukab' q'iij re' i Natanael rak'uun i Zuar xuq'asaj i rumayiij re' k'amal kib'eeh i ju'jun ch'uq chi tinamit riih rumaam Isacar.¹⁹Re' i xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahlil, eh jinaj i nimlaj kulk re' ruuk' i plata k'isiin ma' kiib' libra i rahlil, je' rukab' i pajooj imb'aan chupaam i santo laj itz'ihy naah paat. Eh kab'chel i re' nujinaq chi holohik laj arina reh mayiij xilakimaj ruuk' aseite.²⁰Eh xuq'asaj chi rumayiij jinaj i nimlaj cucharo re' ruuk' i oro kijib' onse rahliil nujinaq chi insensia.²¹Xuq'asaj chi k'atoj mayiij i jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.²²Eh xuq'asaj wo' i jinaj imas kaprax pahqb'al kuyb'al mahk.²³Eh pantz'apaab' wach xuq'asaj i mayiij k'amb'al iib' panotob'il ruuk' i Dios kiib' i b'ooyax, ho'oob' imas tentzun, eh ho'oob' imas kaprax, ho'oob' tentzun ju'jun haab' i wilik keh. Re' taqe i wili mayiij xuq'asaj i Natanael rak'uun i Zuar.

²⁴Eh paroox q'iij re' i Eliab rak'uun i Helón xuq'asaj i rumayiij re' i k'amal kib'eeh i jun ch'uq chi riih rumaam Zabulón.²⁵Re' xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahlil. Eh jinaj i nimlaj kulk re' ruuk' i plata k'isiin ma' kiib' libra rahliil je' rukab' i pajooj imb'aan pan santo laj itz'ihy naah paat. Eh kab'chel i re' nujinaq chi holohik arina reh mayiij xilakimaj ruuk' aseite.²⁶Eh xuq'asaj wo' chi mayiij jinaj i nimlaj cucharo re' ruuk' i oro kijib' libra rahliil nujinaq chi insensia.²⁷Eh xuq'asaj wo' chi k'atoj mayiij i jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.²⁸Eh xuq'asaj wo' jinaj imas kaprax chi mayiij pahqb'al kuyb'al mahk.²⁹Eh pantz'apaab' wach xuq'asaj i mayiij i k'amb'al iib' panotob'il ruuk' i QaJaaw Dios kiib' i b'ooyax, ho'oob' imas tentzun, eh ho'oob' imas kaprax, ho'oob' tentzun ju'jun haab' i wilik keh. Re' taqe wili i xuq'asaj chi rumayiij i Eliab rak'uun i Helón.

³⁰Eh parukaaj q'iij re' i Elisur rak'uun i Sedeur xuq'asaj i rumayiij re' i k'amal kib'eeh i jun ch'uq chi riih rumaam Rubén.³¹Re' xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahlil, jinaj i nimlaj kulk re' ruuk' i plata k'isiin ma' kiib' libra rahlil, je' rukab' i pajooj imb'aan pan santo laj itz'ihy naah paat. Eh kab'chel i re' nujinaq chi holohik laj arina reh mayiij xilakimaj ruuk' aseite.³²Eh xuq'asaj chi rumayiij jinaj i nimlaj cucharo re' ruuk' i oro kijib' libra i rahliil nujinaq chi insensia.³³Eh xuq'asaj chi k'atoj mayiij jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.³⁴Eh xuq'asaj wo' hoq i jinaj imas kaprax chi mayiij pahqb'al kuyb'al mahk.³⁵Eh pantz'apaab' wach xuq'asaj i mayiij i k'amal iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe i wili xuq'asaj chi rumayiij i Elisur rak'uun i Sedeur.

³⁶Eh paroo' q'iij re' i Selumiel rak'uun i Zurisadai xuq'asaj i rumayiij re' i k'amal kib'eeh i junch'uq chi riih rumaam i Simeón.³⁷Re' i xuq'asaj chi rumayiij jinaj i nimlaj pulato re' ruuk' i plata, ik'inaq ixib' libra rahlil, jinaj i nimlaj kulk re' ruuk' i plata k'isiin ma' kiib' libra rahlil, je' rukab' i pajooj imb'aan pan santo laj itz'ihy naah paat. Eh kab'chel i re' nujinaq taqe chi holohik laj arina reh i mayiij xilakimaj ruuk' aseite.³⁸Eh xuq'asaj wo' chi rumayiij i jinaj i nimlaj cucharo re' ruuk' i oro kijib' libra rahliil nujinaq chi insensia.³⁹Eh xuq'asaj wo' chi k'atoj mayiij jinaj i k'isa imas wakax, jinaj imas tentzun, eh jinaj i tentzun jinaj i haab' wilik reh.⁴⁰Eh xuq'asaj wo' hoq jinaj imas kaprax chi mayiij pahqb'al kuyb'al mahk.⁴¹Eh xuq'asaj i mayiij k'amb'al iib' panotob'il ruuk' i QaJaaw Dios kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe wili xuq'asaj chi rumayiij i Selumiel rak'uun i Zurisadai.

⁴²Paruwaaq q'iij re' Eliasaf rak'uun i Deuel xuq'asaj i rumayiij, re' i k'amal kib'eeh i junch'uq chi riih rumaam Gad.⁴³Re' xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahlil, jinaj i nimlaj kulk re' ruuk' i plata k'isiin ma' kiib' libra rahlil, je' rukab' i pajooj imb'aan chupaam i rusanto laj itz'ihy naah paat i QaJaaw Dios. Eh kab'chel i re' nujinaq chi holohik laj arina reh mayiij xilakimaj ruuk' aseite.⁴⁴Eh xuq'asaj wo' chi rumayiij jinaj i nimlaj cucharo re' ruuk' i oro kijib' libra rahliil nujinaq chi insensia.⁴⁵Eh xuq'asaj wo' chi rumayiij jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.⁴⁶Eh xuq'asaj wo' hoq jinaj imas kaprax chi mayiij pahqb'al kuyb'al chi riij i mahk.⁴⁷Eh xuq'asaj i mayiij k'amal iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe wili xuq'asaj chi rumayiij i Eliasaf rak'uun i Deuel.

⁴⁸Eh paruwuuq q'iij, re' i Eliasama rak'uun i Amiud xuq'asaj i rumayiij re' i k'amal kib'eeh i jun ch'uq chi riih rumaam Efraín.⁴⁹Re' i xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahliil, jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam i santo laj itz'ihy naah paat. Eh kab'chel i re' nujinaq chi holohik arina reh mayiij xilakimaj ruuk' aseite.⁵⁰Eh xuq'asaj chi rumayiij jinaj i nimlaj cucharo re' ruuk' i oro kijib' onse rahliil, nujinaq chi insensia.⁵¹Xuq'asaj wo' chi k'atoj mayiij i k'isa imas wakax, jinaj imas tentzun, jinaj tentzun, jinaj haab' i wilik reh.⁵²Eh xuq'asaj wo' hoq jinaj imas kaprax chi mayiij pahqb'al kuyb'al mahk.⁵³Eh xuq'asaj i mayiij k'amb'al iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe i re' xuq'asaj chi rumayiij i Elisama rak'uun i Amiud.

⁵⁴Eh paruwaxaaq q'iij re' i Gamaliel rak'uun i Pedasur xuq'asaj i rumayiij re' i k'amal kib'eeh i junch'uq chi riih rumaam Manasés.⁵⁵Re' xuq'asaj chi rumayiij, jinaj i nimlaj pulato re' ruuk' i plata ik'inaq ixib' libra rahliil, jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam santo laj itz'ihy naah paat. Eh kab'chel i re' nujinaq chi holohik arina reh mayiij xilakimaj ruuk' aseite reh mayiij.⁵⁶Eh xuq'asaj wo' chi rumayiij jinaj i nimlaj cucharo re' ruuk' i oro kijib' onse rahliil, nujinaq chi insensia.⁵⁷Eh xuq'asaj wo' chi k'atoj mayiij jinaj i k'isa imas wakax, jinaj imas tentzun, eh jinaj i tentzun jinaj haab' i wilik reh.⁵⁸Eh xuq'asaj jinaj imas kaprax chi mayiij pahqb'al kuyb'al mahk.⁵⁹Eh xuq'asaj i mayiij k'amb'al iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax ho'oob' tentzun, ju'jun haab' i wilik keh. Re' taqe wili i xuyeew chi rumayiij i Gamaliel rak'uun i Pedasur.

⁶⁰Eh parub'eleej q'iij re' i Abidán rak'uun i Gedioni xuq'asaj i rumayiij re' i k'amal kib'eeh i jun ch'uq chi riih rumaam Benjamín.⁶¹Re' i xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahliil, jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam santo laj itz'ihy naah paat. Eh kab'chel i re' nujinaq chi holohik arina reh mayiij xilakimaj ruuk' aseite.⁶²Eh xuq'asaj chi rumayiij jinaj i nimlaj cucharo re' ruuk' i oro kijib' onse rahliil nujinaq chi insensia.⁶³Eh xuq'asaj wo' chi k'atoj mayiij jinaj k'isa imas wakax, jinaj imas tentzun, jinaj tentzun jinaj haab' i wilik reh.⁶⁴Eh xuq'asaj i jinaj imas kaprax chi mayiij pahqb'al kuyb'al mahk.⁶⁵Eh xuq'asaj i mayiij k'amb'al iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe wili xuq'asaj chi rumayiij i Abidán rak'uun i Gedioni.

⁶⁶Eh parulajeeb' q'iij re' i Ahiezer rak'uun i Amisadai xuq'asaj i rumayiij, re' k'amal kib'eeh i jun ch'uq chi riih rumaam Dan.⁶⁷Re' xuq'asaj chi rumayiij jinaj i nimlaj pulato re' ruuk' i plata ik'inaq ixib' libra rahliil jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam i santo laj itz'ihy naah paat. Eh kab'chel i re' nujinaq taqe chi holohik arina reh mayiij xilakimaj ruuk' aseite.⁶⁸Eh xuq'asaj wo' chi rumayiij jinaj i nimlaj cucharo re' ruuk' i oro kijib' onse rahliil nujinaq chi insensia.⁶⁹Eh xuq'asaj wo' chi k'atoj mayiij jinaj i k'isa imas wakax, jinaj imas tentzun, eh jinaj tentzun jinaj haab' wilik reh.⁷⁰Eh xuq'asaj wo' hoq jinaj imas kaprax chi mayiij pahqb'al kuyb'al i mahk.⁷¹Eh xuq'asaj i mayiij k'amb'al iib' panotob'il ruuk' i Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe wili xuyeew chi rumayiij i Ahiezer rak'uun i Amisadai.

⁷²Eh pan rujunlaaj q'iij re' i Pagiel rak'uun Ocrán xuq'asaj i rumayiij, re' i k'amal kib'eeh i jun ch'uq chi riih rumaam Aser.⁷³Re' xuq'asaj chi rumayiij jinaj i nimlaj pulato. Re' ruuk' i plata ik'inaq ixib' libra rahliil, jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam i Santo laj itz'ihy naah paat. Eh kab'chel i re' nujinaq chi holohik arina reh mayiij xilakimaj ruuk' aseite.⁷⁴Eh xuq'asaj chi rumayiij jinaj i nimlaj cucharo re' ruuk' i oro kijib' onse rahliil nujinaq chi insensia.⁷⁵Eh xuq'asaj wo' chi k'atoj mayiij jinaj imas wakax, jinaj imas tentzun, eh jinaj tentzun jinaj haab' i wilik reh.⁷⁶Eh xuq'asaj wo' hoq jinaj imas kaprax chi mayiij pahqb'al kuyb'al mahk.⁷⁷Eh xuq'asaj chi mayiij k'amb'al iib' panotob'il ruuk' i Dios kiib' i b'ooyax, ho'oob' imas tentzun, ho'oob' imas kaprax, eh ho'oob' tentzun, ju'jun haab' i wilik keh. Re' taqe wili i xuq'asaj chi rumayiij i Pagiel rak'uun Ocrán.

⁷⁸Eh parukab'laaj q'iij re' i Ahira rak'uun i Enán xuq'asaj i rumayiij, re' i k'amal kib'eeh i junch'uq chi riih rumaam Neftalí.⁷⁹Re' xuyeew chi rumayiij jinaj i nimlaj pulato re' ruuk' i plata ik'inaq ixib' libra rahliil, jinaj i nimlaj kulk re' ruuk' i plata k'isiin ma' kiib' libra rahliil, je' rukab' i pajooj imb'aan chupaam i santo laj itz'ihy naah paat. Eh kab'chel i re' nujinaq chi holohik laj arina reh i mayiij xilakimaj ruuk' aseite.⁸⁰Eh xuq'asaj wo' chi rumayiij jinaj i nimlaj cucharo re' ruuk' i oro kijib' onse rahliil nujinaq chi insensia.⁸¹Eh xuq'asaj chi k'atoj mayiij jinaj imas wakax, jinaj imas tentzun, jinaj tentzun jinaj haab' i wilik reh.⁸²Eh xuq'asaj wo' hoq jinaj imas kaprax chi mayiij pahqb'al kuyb'al mahk.⁸³Eh xuq'asaj i mayiij k'amb'al iib' panotob'il ruuk' i QaJaaw Dios, kiib' i b'ooyax, ho'oob' imas tentzun, ho'oob' imas kaprax, ho'oob' tentzun, ju'jun haab' i wilik keh. Re' taqe wili xuq'asaj chi rumayiij i Ahira rak'uun i Enán.

⁸⁴Je' wili k'ihaal i mayiij xkiq'asaj k'amal kib'eeh i aj Israel kab'laj ch'uq noq kuxesjik ruuk' aseite i artaal, noq xq'ahtesjik pan q'ab' i QaJaaw Dios, kab'laj i nimaq pulato re' ruuk' i plata. Kab'laj i nimaq kulk re' ruuk' i plata, kab'laj i nimaq cucharo re' ruuk' i oro.⁸⁵Eh re' nimaq pulato re' ruuk' i plata ik'inaq ixib' libra rahliil i ju'jun. Eh re' i nimaq kulk plata k'isiin ma' kiib' libra rahliil i ju'jun. Re' chu'nchel i korjinaq ruuk' plata ik'inaq lajeeb' roxk'ahl libra rahliil, je' rukab' i pajooj imb'aan chupaam i santo laj itz'ihy naah paat.⁸⁶Eh kiq'asaj i kab'laj i nimaq cucharo re' ruuk' i oro, nujinaq chi insensia kijib' onse rahliil i ju'jun, je' rukab' i pajooj imb'aan chupaam i santo laj itz'ihy naah paat, chu'nchel i nimaq cucharo oro ixib' libra rahliil.

⁸⁷Eh re' chikop xkiq'asaj chi k'atoj mayiij kab'laj imas wakax kab'laj imas tentzun, kab'laj tentzun ju'jun haab' i wilik keh ruch'ihil i holohik arina. Eh kab'laj imas kaprax pahqb'al kuyb'al mahk.⁸⁸Re' i chikop xkiyeew chi mayiij k'amb'al iib' panotob'il ruuk' i QaJaaw Dios je' wili i kik'ihaal kijib' ru ka'winaq i b'ooyax, oxk'ahl imas tentzun, oxk'ahl imas kaprax, oxk'ahl i tentzun ju'jun haab' i wilik keh. Re' wili i kimayiij xkiq'asaj noq kuxesjik ruuk' aseite i artaal noq xye'arik pan q'ab' i QaJaaw Dios.

⁸⁹Eh noq re' i Moisés xokik chupaam i santo laj itz'ihy naah paat molb'al iib', chi q'orob'jiik i QaJaaw Dios, eh xrib'iraj chi xq'orob'jik cho ruum i QaJaaw Dios, pankiyejaal i kiib' chi k'achaach wilik kixiik' wilkeeb' chinaah i tz'apb'al naah i loq'laj kaxa i molarik wii' i ruk'uhb'aal i Dios. Re' i ruq'orariik nik' naa ruqopiik taqe i saqumb'al

¹Re' i QaJaaw Dios je' wili xuq'or reh i Moisés:²Re' hat cha q'or reh i Aarón kajaaw i k'amal kib'eeh aj tiij noq naa rutusum wach wuquub' chi saqumb'al ar naakisihq'iniik reje chuwach i ye'aab' kantela wuquub' i naah, inki.³Eh re' i Aarón xub'an wo' hoq i xuq'or QaJaaw Dios reh i Moisés xutus wo' kiwach i saqumb'al reh chi ar sihqinik reje chuwach i ye'aab' kantela.⁴Re' i ye'aab' kantela re' re', oro korjinaq wii' ch'eyooj wach chi korik ruuk' tuhyb'al kalawux xelik johtoq ko chi raa' xponik ko chi ju' tz'apaab' wach ruhtz'ub'aal, xuye'jaa' wo' chi korik je' rukab' i xq'orarik reh i Moisés ruum i QaJaaw Dios. Re' noq xikuxeesjik taqe i aj Levíta

⁵Re' i QaJaaw Dios je' wili xuq'or reh Moisés:⁶Re' hat cha sik' kiwach i aj Levíta chi kixilak i aj Israel nee nasaqb'isaj kiwach.⁷Je' wili i naa a'nam chi saqb'eesb'al kiwach naa achihkaam wach kinaah i ha' inkamanik chi saqb'eesb'al wachiis. Eh naa aq'orom keh chi naa kijoyom chu'nchel i kismaal jun pa'lik. Naa wo' kitz'ajam i kiso' reh chi nee kikahnik chi saq kiwach.⁸Eh chi riij i re' naa kiq'asam chi kimayiij jinaj i k'isa imas wakax. Eh k'isiin i holohik laj arina xilakimaj ruuk' aseite, eh jinaj wo' chik i k'ijol wakax naakiq'aasam chi mayiij pahqb'al kuyb'al mahk.⁹Eh re' naa aq'orom keh i aj Levíta chi naakijilim i koq kiib' chi chii' i santo laj itz'ihy naah paat molb'al iib'. Eh nee wo' namol kiwach i chu'nchel i aj Israel.¹⁰Eh noq kimolom chik kiib' chi nuwach i aj Levíta chu'nchel i aj Israel naakiye'em i kiq'ab' chikinaah i aj Levíta.¹¹Eh re' i Aarón naa ruq'asam, chi nuwach i hin, hin ki Dios taqe i aj Levíta chi jilow kimayiij taqe i aj Israel reh chi naa kianam i nukamaj.¹²Re' taqe i aj Levíta naakiye'em i kiq'ab' wach kinaah taqe i kiib' chi k'ijol wakax, jinaj i naa kiq'asam chi mayiij chi nuwach reh pahqb'al kuyb'al mahk. Eh jinaj i naa kiq'asam chi k'atoj mayiij chi riij i kimahk i aj Levíta.¹³Eh naa aq'asam taqe i aj Levíta chuwach i Aarón, eh chikiwach i rak'uun. Eh noq wilkeeb' chik ar naa kiq'asam chi mayiij chi nuwach i hin, hin Dios.¹⁴Chi je' re' naa taqe awesam chi kixilak i aj Israel taqe aj Levíta reh chi nee kikahnik chi weh taqe.¹⁵Eh chi riij i re', re' taqe i aj Levíta naa rojiik kianam i kikamaj chupaam i santo laj itz'ihy naah paat molb'al iib'. Re' hat inchol asaqb'isam kiwach, eh naa taqe aq'asam chi nuwach chi jinaj nim wach mayiij.¹⁶Re' taqe i aj Levíta xnusik' cho kiwach chi kixilak i aj Israel reh chi naa kianam i nukamaj. Re' hin xnuk'ul chi jilow taqe i peet kak'uun, chu'nchel i aj Israel.¹⁷Ruum chu'nchel i peet kak'uun i aj Israel, je' wo' i peet kak'uun i kichikoop, xa re' wo' noq xi kahnik chi weh noq xnukansaj taqe chaloq chu'nchel i peet kak'uun i aj Egipto, i peet rak'uun i kichikoop. Ar xnuko'leej kiij chi weh taqe chu'nchel i peet kak'uun i aj Israel.¹⁸Je' re' noq yu'naak xnusik' kiwach i aj Levíta chi weh taqe chi kijilow i peet kak'uun i aj Israel.¹⁹Re' hin xnusik' kiwach i aj Levíta chi kixilak i aj Israel xnukoj taqe chi to'ool reh i Aarón, chi to'ool keh i rak'uun reh chi naa kianam i nukamaj chupaam i santo laj itz'ihy naah paat molb'al iib'. Re' chi neenkireq kuyb'al kimahk wuuk' chu'nchel i aj Israel. Reh chi ma' xtaj i ti' k'axik neen kik'ul, neenkijil i koq kiib' ruuk' i santo laj itz'ihy naah paat inki i Dios.

²⁰Eh re' i Moisés, re' i Aarón, eh chu'nchel i aj Israel, xkian wo' kuuk' i aj Levíta i xuq'or i QaJaaw Dios reh i Moisés.²¹Eh re' taqe i aj Levíta xkisaqb'isaj wo' kiib' xkitz'aj wo' hoq i kiso'. Eh re' i Aarón xq'asanik keh chi nimaq wach mayiij chuwach i QaJaaw Dios. Eh xuq'asaj wo' hoq i mayiij chikiij saqb'eesb'al kiwach.²²Eh chi riij taqe re' i aj Levíta xooj wo' kian i rukamaj i Dios chupaam i santo laj itz'ihy naah paat molb'al iib', eh re' i Aarón xk'amwik kib'eeh ruch'ihil taqe i rak'uun. Eh nik' wach i xuq'or Dios reh i Moisés chikiij i aj Levíta je' wo' re' i xb'aan kuuk'. Re' ruq'orariik nik' najtiil naa kianam i rukamaj i Dios i aj Levíta

²³Re' i QaJaaw Dios je' wili xuq'or reh i Moisés:²⁴Re' taqe i aj Levíta noq naakitik'aam i nukamaj chupaam i santo laj itz'ihy naah paat molb'al iib' wilik keh i hoob' ru ka'winaq haab'.²⁵Eh noq naakiponiik lajeeb' roxk'ahl haab' naa wo' chik kikanaam rub'aan i nukamaj ma' jaruuj chik naa kianam chi jumpech.²⁶Eh nee wo' rub'an chi neenkitow i kuch aj Levíta ruuk' i xa chib'ih i kamanik imb'aan chupaam i santo laj itz'ihy naah paat molb'al iib'. Xa re' la' ma' naa ta chik kianam i kamanik je' rukab' inki a'n cho pampeet. Re' hat je' re' ruyejeb'jiik i kikamaj i aj Levíta naa a'nam, inki weh i Dios. Re' runinq'ijiik i elik chaloq Egipto

¹Chupaam i peet poh reh i rukab' haab' keliik chaloq i aj Israel pan tinamit Egipto, re' i QaJaaw Dios je' wili xuq'or reh i Moisés chupaam i ye'aab' chiq yuuq' Sinaí:²Re' taqe i aj Israel koruman chi naa kik'sam i ninq'iij ruum keliik chaloq Egipto chupaam i q'iij nuq'orom chaloq.³Iraaj ruq'orom chi naakik'sam chupaam i ruxq'eqiil i kajlaj rub'eeh i poh wili. Eh naa kianam chu'nchel nik' wach i rub'aan i nuq'orom keh, eh je' wo' rukab' i tz'ihb'amaj rehtaliil chupaam i nuk'uhb'aal, inki.

⁴Je' re' noq re' i Moisés xuq'or keh i aj Israel chi naa kininq'ijeem i keliik chaloq Egipto.⁵Eh re' taqe i aj Israel xkininq'ijeej wo' hoq i keliik chaloq Egipto paruxq'eqiil reh i kajlaj rub'eeh i poh re' re' chupaam i ye'aab' chiq yuuq' Sinaí. Xkian wo' chu'nchel i xuq'or QaJaaw Dios reh i Moisés.

⁶Eh chupaam i q'iij re' re' kiib' ixib' taqe i winaq ma' xkian taj i ninq'iij re' re' ruum ch'uwa' kiwach ruum i rutz'a'jiik i kamnaq. Eh ruum chi ma' xkian tee ninq'iij re' re' xa chupaam wo' q'iij re' re' xiooj ruuk' i Moisés, eh ruuk' i Aarón.⁷Je' wili xkiq'or:
Re' hoj korik chi ch'uwa' qawach, ruum i rutz'a'jiik i kamnaq. Eh ¿Chib'ih reet noq xa ruum i re' ma' xye'arik ta q'ab' qeh chi xqaq'asaj i qamayiij chi kixilak i aj Israel chupaam i ninq'iij ruum i keliik cho Egipto? inki taqe.

⁸Eh re' i Moisés je' wili i xuq'or keh:
Kinawuy-eej pee taq, amb'iraj peet reh i QaJaaw Dios chib'ih pa' nee ruq'or weh taq chawiij, inki.

⁹Eh re' i QaJaaw Dios je' wili i xuq'or reh i Moisés: Re' hat cha q'or keh i aj Israel,¹⁰chi chu'nchel i kak'uun, kiih kimaam i aj Israel ma' xkian taj i ninq'iij xb'aan ruum i keliik cho Egipto ruum i ruch'uwa'iil kiwach ruum i rutz'a'jiik i kamnaq, oon chi wilkeeb' poo panb'iyajo chi najt yuuq koruman chi naa kianam.¹¹Xa re' la' ko paruxq'eqiil reh i kajlaj rub'eeh i rukab' poh reh i rukab' haab' naakininq'ijeem. Eh chi naakik'uxum k'ahlaj rax i chaaj, ruuk' i kaxlanwi'k ma' kojooj ta ch'amb'eesb'al reh.¹²Eh ma' xtaj i rutib'kaal i mayijimaj chikop naakikanaam chi kochi junwaar ta neenkik'ux, eh ma' naa ta wo' kitoqom jino'q i rub'aqil i chikop re' re'. Eh naa wo' kianam i ninq'iij ruum ikeliik cho Egipto je' rukab' rub'aan i nuq'orom keh.¹³Eh awach i xaraaj chi ma' xub'an taj i ninq'iij re' re', eh ma' xta wo' naq ruch'uwa'iil wach, eh ma' xta wo' ponoq panb'iyajo. Re' re' i ruk'ul chi naa rehtesjiik reje chi kixilak i ruch aj Israel, eh naa rutojom i ru mahk. Ruum chi ma' xuq'asaj taj i rumayiij paruq'ijil chi nuwach i hin, hin Dios.

¹⁴Eh re' taqe i tokoom tinamit wilkeeb' taq chaxilak nee wo' rub'an chi neenkininqijeej ikeliik cho Egipto i aj Israel ye'b'al nuloq'il i hin. Xa re' la' koruman chi naa rub'anam nik' wach i rub'aan i ninq'iij nuq'orom. Eh naa rub'aan chu'nchel, je' chi keh i tokoom tinamit, je' wo' taq cha weh i hat i aj Israel, inki. Re' i santo laj itz'ihy naah paat xuyeew cho riib' i suutz' chinaah (Ex 40.34-38)

¹⁵Chupaam i q'iij noq xkorjik i santo laj itz'ihy naah paat re' i moloj wii' i k'uhb'aal, pan q'iij suutz' i ruyeew cho riib' chinaah korehtaal inokik i q'iij. Eh chaq'ab' q'aaq' i ruyeew cho riib' chinaah i paat re' re' korehtaal insaq'ik.¹⁶Eh rajlaal i q'iij i ruyeew cho riib' i suutz' chinaah i santo laj itz'ihy naah paat. Eh chaq'ab' q'aaq' i ruyeew cho riib' chinaah.¹⁷Eh noq re' suutz' i nelik cho chinaah i santo laj itz'ihy naah paat re' taqe i aj Israel inkuksaj chaloq, eh inkuksaj cho chu'nchel i kiye'aab', eh inkichop wo' chik cho kib'eeh. Eh aha' imponik pahoq i suutz' ar inkiyejaa' ki-itz'ihy naah paat i aj i Israel.¹⁸Eh noq inq'orarik keh ruum i QaJaaw Dios i aj Israel chi naa kichopom cho kib'eeh kichalik wo' hoq, eh noq i nq'orarik keh chi naa kikahnik ar, kikahnik wo' ar nik' najtiil i rub'an i suutz' chinaah i santo laj itz'ihy naah paat.¹⁹Eh noq re' i suutz' najt i rub'an chinaah i santo laj itz'ihy naah paat. Re' taqe i aj Israel ma' kielik ta wo' cho ar, xkian wo' hoq je' rukab' i xuq'or i Dios.²⁰Eh noq re' suutz' xama' k'ih ta laj q'iij i rub'an chinaah i santo laj itz'ihy naah paat. Noq inq'orarik keh ruum i QaJaaw Dios chi naa kichopom chee kib'eeh kichalik wo' hoq, eh noq i nq'orarik keh chi konaakikahniik ar, kikahnik wo' hoq.²¹Wilik pech noq xa jinaj aq'ab' i rub'an i suutz' chinaah i santo laj itz'ihy naah paat, eh parusaq'iik i nelik wo' chik. Eh re' taqe i aj Israel inkichop wo' chik cho kib'eeh. Nik' wach inki a'n pan q'iij je' wo' re' inki a'n chaq'ab' noq i nelik chee suutz' inkichop cho kib'eeh.²²Eh wilik pech noq re' suutz' inwihik kiib'-oq q'iij, jino'q poh, oon jino'q haab' chinaah i santo laj itz'ihy naah paat, xama' i kichop ta wo' chaloq i kib'eeh. Eh noq i nelik i suutz' jumehq'iil inkichop chee kib'eeh.²³Eh noq i ruq'or i QaJaaw Dios keh i aj Israel chi konaa kikahniik ko kikahnik wo' hoq. Eh noq inq'orarik keh chi naa kichopom chee kib'eeh kielik wo' chaloq. Eh xkian wo' hoq nik' wach i xuq'or QaJaaw Dios reh i Moisés. Re' ruq'orariik chi xkorjik i kiib' chi tuun re' ruuk' i plata

¹Re' i QaJaaw Dios je' wili i xuq'or reh i Moisés:²Re' hat cha yejaa' kiib' chi tuun re' ruuk' i plata neenach'ey wach ruuk' tuyb'al kalawux. Reh chi neen kamanik aweh molb'al kiwach i tinamit, eh noq neenkijal kiye'aab'.³Eh noq neenxuuljik reje kab'chel i tuun chu'nchel i aj Israel neenkimol kiib' chawach panookb'al reh i santo laj itz'ihy naah paat molb'al iib'.⁴Eh wila' xa jinaj chi tuun i neenxuuljik xa re' taqe i k'amal kib'eeh i ju'jun ch'uq chi aj Israel neenkimol kiib' chawach.⁵Eh noq neenxuuljik i tuun ruch'ihil i kowlaj silk' re' taqe i kiyejaam i ki-itz'ihy naah paat chi korkiil reje ireelb'aalq'iij neenkiyejaa' kiib' chi ojik.⁶Eh parukab' i ruxuljiik i tuun, re' taqe i kiyejaam ki-itz'ihy naah paat pansak'aaj reh i rookb'aal i q'iij neenkiyejaa' kiib' chi ojik. Eh noq neenxuuljik i tuun ruuk' i kowlaj silk' re' i rehtaliil elik reje.⁷Eh noq naakimolom kiib' i tinamit ma' q'e' ta q'as naah noq naruxuljiik i tuun.⁸Eh re' i naakixulem i tuun xa re' taqe i k'amal kib'eeh aj tiij, re' taqe i rak'uun i Aarón. Re' i k'uhb'aal wili aweh taq i hat chi juneliik, eh keh wo' taqe kahnoq awiih aamaam.

⁹Eh re' wo' taqe i tuun wili naa taq axulem ruuk' kowlaj silk' noq naa taq awojiik chi q'aq'inik pan tokoom tinamit kuuk' i aj ixowaal, oon noq neekik'uloq taq panatinamiit i aj ixowaal. Eh re' hin, hin taq aaDios naa taq ak'uliik cho panuk'ux, eh naa taq kaat nuko'leem pan kiq'ab' i aj ixowaal.¹⁰Eh nee wo' inxuuljik taqe i tuun wili noq suq taq ak'ux, re' noq nee taq i na a'n i aninq'iij, noq nee taq i naa ninq'ijeej i ak' poh noq nee taq inaq'asaj ak'atoj mayiij. Eh noq nee taq i naaq'asaj amayiij k'amb'al taq awiib' panotob'il wuuk' i hin. Re' hin nee taq tik'ulik panuk'ux, hin taq aaWaJaaw aaDios, inki. Re' najt laj b'ehik xkian i aj Israel noq xi elik chaloq Sinaí

¹¹Chupaam i juninaq rub'eeh i rukab' poh reh i rukab' haab' kitik'aam cho b'ehik re' i suutz' xelik chinaah i santo laj itz'ihy naah paat moloj wii' i k'uhb'aal.¹²Eh re' taqe i aj Israel xi elik cho chupaam i chiq yuuq' wilik Sinaí. Eh re' i suutz' ink'amwik kib'eeh ar chik xooj pa'lojoq chupaam i ye'aab' chiq yuuq' wilik Parán.¹³Nik' wach i xq'orarik cho reh i Moisés ruum i QaJaaw Dios je' wo' re' chalik xkian.¹⁴Eh re' peet ch'uq xi chalik chi peet b'eeh re' taqe i riih rumaam i Judá peet chikiwach i kitz'ihy kehtalil. Eh re' i Naasón i rak'uun i Aminadab ink'amwik kib'eeh.¹⁵Eh chi riij taqe re' xam taqe chaloq i rukab' ch'uq, re' taqe i riih rumaam Isacar. Re' Natanael rak'uun i Zuar ink'amwik kib'eeh.¹⁶Eh chi riij i re' xam taqe chaloq i roox ch'uq re' taqe i riih rumaam Zabulón, re' Eliab rak'uun i Helón ink'amwik kib'eeh.

¹⁷Eh chi riij i re' xam taqe chaloq i Gersón ruch'ihil i riih rumaam i Merari xkiyoj i santo laj itz'ihy naah paat xkik'am chaloq.

¹⁸Eh chi riij taqe re' xam chaloq i jun ch'uq re' taqe riih rumaam Rubén, peet chikiwach i kitz'ihy kehtalil. Re' Elisur rak'uun i Sedeur ink'amwik kib'eeh.¹⁹Eh chi riij taqe re' xam taqe chaloq i junch'uq, re' taqe riih rumaam Simeón, re' Selumiel rak'uun i Zurisadai ink'amwik kib'eeh.²⁰Eh chi riij taqe re' xam chaloq i junch'uq, re' taqe i riih rumaam i Gad, re' Eliasaf, rak'uun i Reuel ink'amwik kib'eeh.²¹Eh chi riij taqe i re' xam chaloq i junch'uq, re' taqe i riih rumaam i Coat. Re' taqe i kik'amwik reh chu'nchel i wilik kiloq'il i kikamanik parukamaj i Dios. Re' keh korjinaq chik i santo laj itz'ihy naah paat noq kiponik.

²²Eh chi riij taqe re' xam chaloq i junch'uq, re' taqe i riih rumaam Efraín peet chikiwach i kitz'ihy kehtalil. Eh re' i Elisama rak'uun i Amiud ink'amwik kib'eeh.²³Eh chi riij taqe i re' xam chaloq i junch'uq, re' taqe i riih rumaam i Manasés, eh re' i Gamaliel i rak'uun i Pedasur ink'amwik kib'eeh.²⁴Eh chi riij taqe i re' xam chaloq i junch'uq, re' taqe i riih rumaam Benjamín, eh re' Abidán rak'uun i Gedioni ink'amwik kib'eeh.

²⁵Eh chi riij taqe i k'ih ch'uq re' re' xam b'eeh xi kahnik i junch'uq, chi riih rumaam Dan peet chikiwach i ki-itz'ihy kehtalil, eh re' i Ahiezer rak'uun i Amisadai ink'amwik kib'eeh.²⁶Eh chi riij taqe re' xam chaloq i junch'uq, re' taqe i riih rumaam Aser, eh re' Pagiel rak'uun i Ocrán ink'amwik kib'eeh.²⁷Eh chi riij taqe i re' xam chaloq i junch'uq, re' taqe i riih rumaam i Neftalí, eh re' i Ahira rak'uun i Enán ink'amwik kib'eeh.

²⁸Je' aj wili rutusariik kiib' inki a'n chi ch'uhqaal chu'nchel i aj Israel noq inkichop cho i kib'eeh. Re' i Moisés xuq'or reh i rub'aluk chi naa ruch'ihljiik ruum

²⁹Eh pan jinaj q'iij re' i Moisés xuq'oreej i rub'aluk, re' i Hobab rak'uun i Reuel aj Madián:
Re' hoj naaqojiik chupaam i tinamit ruq'orom i QaJaaw chi naa ruye'em qeh. Eh re' hat neerub'an chi nee tiooj chiqij suq nee ti wihik quuk', ruum re' i QaJaaw Dios naakooj rutob'eem, inki.

³⁰Eh re' Hobab je' wili ruchaq' wesjiik xub'an:
Re' hin ma' ruk'ul ta chi nee kinooj taq chawiij naa la' nusutiniik reje panuyuq'ul re' wilkeeb' cho wii' taqe awach weh, inki.

³¹Eh re' i Moisés je' wili ruchaq'weesjiik xub'an:
Maaqoh akanaa' tii re' hat awehtaal aha' nee ruk'ul chi nee qohi'lik chupaam i ye'aab' chiq yuuq', neetikamanik qeh chi k'uhtan qab'eeh.³²Wila' xat'ooj chiqiij nee tiqunej i naa ruye'em qeh i QaJaaw Dios ruuk' i rotob'il, inki.

³³Eh re' taqe i aj Israel xi elik cho chinaah i yuuq' Sinaí ruye'aab' i QaJaaw Dios. Eh ixib' q'iij xib'ehik chaloq peet chikiwach i looq' laj kaxa molik wii' i k'uhb'aal, k'ahchi' keeb' chusik'ariik i ye'aab' aha' naakihi'liik wii'.³⁴Eh xa re' wo' noq inkichop cho kib'eeh pan q'iij re' junsahl chi suutz' i rutaq'aaj chee QaJaaw xanoq wo' ruyeew cho riib' chikinaah.³⁵Eh noq intohq'ik cho kib'esam i loq'laj kaxa molik wii' i k'uhb'aal, re' i Moisés je' wili ruq'or:
QaJaaw Dios qoh atoob'eej chatukej kiwach i ki-ixowanik awach, eh noq neenkilow awajaawriik nee ta naq inkimol chi elik, inki.

³⁶Eh noq inkiyeew chi hi'lik i loq'laj kaxa, re' i Moisés je' wili i ruq'or:
QaJaaw Dios nee ta naq ti chalik wih-oq chi kixilak i aj Israel wili, inki. Re' i QaJaaw Dios xutaq'aaj taqe chaloq i k'oot chi kitiib' i aj Israel

¹Re' taqe i aj Israel kiwech'uj i Dios ruum i wilkeeb' pan k'axkiil. Eh noq xrib'iraj i QaJaaw Dios chi je' re' xchalik rujosq'iil, ruum i re' xutaq'aaj chee q'aaq' chikinaah xq'op ruq'aq'al i chi junsuut i kiye'aab' wilkeeb' wii'.²Eh noq xkilow chi je' re' i tinamit xkipahqaaj kitoob'jiik reh i Moisés. Eh re' i Moisés xupahqaaj i rotob'il i Dios, eh re' i q'aaq' jumehq'iil chuhpik.³Ruum aj re', re' i ye'aab' re' re' Tabera i rub'ihnaal xkahnik ruum re' i QaJaaw Dios ar xuqop cho ruq'aq'al i kiye'aab'.

⁴Eh chi kixilak i aj Israel wilik taqe i tokoom tinamit xi chalik, xa re' suq laj wi'k inkikapaaj. Eh re' taqe i aj Israel xkian jinaj wach kikapeew kuuk' xkitoq'aa' wo' chik oq'ik i keh, je' wili xkiq'or: Awach ta naq neen ye'wik qatiib', inki taqe.⁵Re' hoj ink'ulik cho panqak'ux chi xa chi siih inqak'ux chaloq i suq laj kar ar Egipto je' wo' noq inqak'ux taqe i pepino, taqe melon, taqe puerro, taqe sib'olix, taqe i aanxux.⁶Eh raaj i yu'naak ayu' xakimik chik qeh ruum i qawa' qahaa' xti xa re' wo' chik i maná k'achi' qak'uxum, inki taqe.

⁷Re' i maná q'an tolotaq naq'wach je' naq'wach kulanto je' ruq'olil chee'.⁸Re' taqe i aj Israel imponik kimol i maná, eh inkike'j wach kaa' eh wilik pech noq xan kipuch' naah. Eh i re' inkichaq'saj pan ch'ihch' xun, eh inkiyejaa' chi kaxlanwi'k. Re' rusuqkiil xa je' chik suq kiil ak' laj aseite.⁹Eh pantaq chaq'ab' noq i nqajik chee musjab' chinaah i ye'aab' wilik wii' i ki-itz'ihy naah paat inqajik wo' cho haa' i maná.

¹⁰Re' i Moisés xrib'iraj chi oq'ik inki a'n i aj Israel kuch'ihil taqe awach keh chi chii' i ki-itz'ihy naah paat. Eh re' i QaJaaw Dios ma' k'isiin taj i ruk'aah chikinaah, je' wo' hoq i Moisés ma' suq ta wo' xub'an reh.¹¹Ruum i re' je' wili i xuq'or reh i QaJaaw Dios:
¿Chib'ih reet noq i na a'n ti' k'axik weh i hin, hin awaj kamanoom? ¿Chib'ih jariik i numahk chawach chi xayeew i ihq chi nunaah reh i kik'amariik reje i tinamit wili?¹²¿Hin ta nche kituut kajaaw, noq inaq'or weh chi naa nuk'amam taqe reje chi je' kiq'ahchjik reje kok' ha'lak'un koch'uch' kipaam noq naa nuk'amam taqe reje chupaam i ye'aab' aq'orom i xti korik chi naa aye'em keh i kimaam kati't?¹³Re' hin ma' aha' ta naa nuk'amam cho kitiib' i ruk'ihaal tinamit wili, ruuk' oq'ik k'ahchi' kipahqaam kitiib' weh reh chi naakik'uxum.¹⁴Re' hin ma' nee ta nub'an reje kik'amariik chi wutkeel ruum jinaj ahl laj ihq chi weh.¹⁵Wila' ma' naa awesam chi nunaah i ihq wili inwaaj i hin chi nee nawesaj i nuk'achariik wila' korik chi kinak'ax, chi je' re' ma' nee ta chik kinik'ik chi ti' k'axik, inki i Moisés.

¹⁶Re' i QaJaaw Dios je' wili i xuq'or reh:
Chasik' kiwach i aj Israel i lajeeb' ru kajwinaq chi mama' winaq re' ruuk' taqe i k'amal b'eeh. Re' i aweht'al i hat chi kichol taaq'anik chinaah i tinamit nee nak'am taqe cho awuuk' ar chupaam i santo laj itz'ihy naah paat molb'al iib' neekinkuy-eej chi awuch'ihil taqe.¹⁷Re' hin naa nuqajiik cho chaq'orob'jiik i hat naa nuye'em keh i uxlab'al je' rukab' i xnuyeew aweh i hat chi je' re' naa kaat kito'om chuk'amariik kib'eeh i tinamit reh chi ma' awutkeel ta chik nee nak'am taqe reje.¹⁸Eh neenaq'or keh i tinamit chi kisantoheej kiib'. Re' hin naa nuye'em kitiib'. Ruum re' hin xb'iraj chik koq'iim je' wili inkiq'or: Awach ta naq neen ye'wik qatiib', xti suq wo' naq wilkooj cho ar Egipto, inki taqe. Eh re' hin naa nuye'em kitiib' reh chi naa kik'uxum.¹⁹Re' wili ma' xata jinaj q'iij naa nuye'em kitiib', ma' xata kiib' q'iij, ma' xata hoob' q'iij, ma' xata lajeeb' q'iij, ma' xata juninaq q'iij.²⁰Naa la' nuye'em taqe chuk'uxariik i tiwik chuwach i jinaj poh korehtaal kinujik korehtaal i nelik cho pan kiju'. Ruum ma' ximponik ta panaq' kiwach i hin, eh wilkiin wo' naq chi kixilak xkimol chi oq'ik je' wili inkiq'or: Chib'ih inche reet noq xoj elik cho Egipto suq wo' naq wilkooj ar, inki taqe, inki Dios.

²¹Eh re' i Moisés je' wili ruchaq' wesjiik xub'an:
Re' taqe i tinamit xi chalik chi wiij chi kooq waq'iib' siento miil taqe chu'nchel. Eh inaq'or i hat chi naa aye'em qeh chi k'uxarik i tiwik chuwach i jinaj poh.²²¿Eh aha' neenkan i ma' k'isa tentzun, i ma' k'isa wakax, reh chi neekikanteesjik, eh chi neenmanlojik chi kitiib' chuwach i jinaj poh? Neeta naq inye'arik chi kitiib' chu'nchel i kar wilkeeb' taqe chupaam i palaw xama' nee ta wo' naq i manlojik keh, inki.

²³Eh re' QaJaaw Dios je' wili i ruchaq'weesjiik i Moisés xub'an:
¿Mi nakapaaj re' hat chi ma' xta wajaawriik chub'aan i nuq'or wili? Yu'naak naa awilom i mi nee nub'an, oon ma' nee ta nub'an, inki.

²⁴Re' i Moisés xelik chaloq xuq'or keh i tinamit i xq'orarik reh ruum i QaJaaw Dios, xumol kiwach i lajeeb' ru kajwinaq chi k'amal b'eeh chi kixilak i aj Israel. Eh xutus taqe chi junsuut i santo laj itz'ihy naah paat.²⁵Re' i QaJaaw Dios xqajik cho pan suutz' xk'ulik rub'an ruk'utaaj ruuk' i Moisés, eh xuyeew keh i uxlab'al i lajeeb' ru kajwinaq chi k'amal b'eeh, je' rukab' i uxlab'al wilik ruuk' i Moisés. Eh noq xkik'ul i uxlab'al re' re' xiq'orik chi je' kiq'orik jalal ruq'oral i Dios. Xa re' la' ma' kota chik xkian chi jumpech.

²⁶Eh kiib' taqe i winaq jinaj Eldad i b'ih, eh jinaj i Medad re' ruuk' taqe i lajeeb' ru kajwinaq ma' xiooj taj chupaam i santo laj itz'ihy naah paat xi kahnik chupaam i ki-itz'ihy naah paat i keh, eh ar xkik'ul i uxlab'al re' re'. Eh xiq'orik chi je' kiq'orik i jalal ruq'oral i Dios chupaam i kiye'aab'.²⁷Eh jinaj i k'ijool xooj rajimam riib' ruuk' i Moisés, je' wili i xuq'or reh:
Re' i Eldad, i Medad k'ahchi' kiq'oriik chi je' kiq'orik jalal ruq'oral i Dios chupaam i ki-itz'ihy naah paat, inki.

²⁸Eh re' i Josué rak'uun i Nun, re' i paruk'ijolal xtohq'ik cho ruto'om i Moisés, je' wili xuq'or:
Wajaaw Moisés chaq'il taqe chub'aan reh chi ma' nee ta chik kiq'orik chi je' re', inki.

²⁹Re' i Moisés je' wili i chaq'wik xub'an:
¿Minakapaaj re' hat chi ti' inwik'raaj chi je' re' i k'achi' keeb'? Re' hin q'e' naq neensuuqb'ik nuk'ux chi nee ta ruyeew i Ruxlab'al QaJaaw chikinaah chu'nchel i aj Israel, chu'nchel naq nee kikahnik chi jalal ruq'oral i Dios taqe, inki.

³⁰Eh re' i Moisés ruch'ihil taqe i winaq i k'amal kib'eeh i aj Israel xi sutinik wo' chik chaloq chupaam i ki-itz'ihy naah paat. Re' i QaJaaw Dios xutaq'aaj taqe chaloq i tz'ikin re' ruuk' taqe i k'oot

³¹Re' i QaJaaw Dios xuyeew chaloq i kowlaj teew chi korkiil reje i palaw, eh xuk'am chaloq i ruk'ihaal k'oot, xakirupik chik xi k'ulik qajoq chinaah taqe i ki-itz'ihy naah paat i aj Israel. Eh je' naa jinaj q'iij chi b'ehik i ye'aab' xkitz'ap naah chi junsuut i kiye'aab', eh je' naa jinaj b'ara rupimiil chinaah i wach ak'al i xi wihik wii'.³²Eh re' taqe i aj Israel xkimol chupaam i q'iij re' re', eh ki-ik'ik aq'ab', eh xakok'ahchi' wo' kimolom chi junwaar. Re' taqe i ma' q'e' ta k'ih xkimol lajeeb' tuhb' chi k'oot xkimol, eh tohq'ik kichiqsam wach chi junsuut i ki-itz'ihy naah paat.³³Eh re' taqe i aj Israel xa kore' wo' naq xtohq'ik i koq kik'uxum i k'oot re' re', noq xuyeew chee rujosq'iil i QaJaaw Dios chikinaah. Jinaj iyiib' wach yab'ilaal xutaq'aaj cho chikinaah, eh ma' k'isiin i xikimik.³⁴Ruum aj re', re' ye'aab' re' re' Kibrot-hataava i rub'ihnaal xkikoj ruum ar ximuhq'ik nik' k'ihaal i xikimik, re' taqe i xa re' suq laj wi'k inkikapaaj.

³⁵Eh noq re' taqe i aj Israel xi elik reje chupaam i ye'aab' Kibrot-hataava, ar chik xiooj chupaam i ye'aab' Hazerot, ar xi hi'lik. Re' i María, i Aarón ma' holohik ta xiq'orik chi riij i Moisés

¹Re' María, i Aarón ma' holohik ta xiq'orik chi riij i Moisés ruum chi xuk'am chi rehk'een ixoq aj kusita tokoom tinamit.²Eh je' wili xkiq'or: ¿Mi xa ruuk' re' i Moisés inq'orik QaJaaw Dios? ¿Mi ma' quuk' re' i hoj xq'orik? inki taqe. Eh re' i QaJaaw xrib'iraj i xkiq'or.

³Eh re' i Moisés xa re' wo' reh xti q'e' inlochi'k chikiwach chu'nchel i winaq wilkeeb' wach ak'al.⁴Eh re' i QaJaaw Dios je' wili xuq'or reh i Moisés, reh i Aarón, reh i María: Re' taq i hat aawoxcheel hiy taq chupaam i santo laj itz'ihy naah paat molb'al iib', inki.
Eh xiooj wo' koxcheel.⁵Eh re' i QaJaaw Dios xqajik cho chupaam i junsahl chi suutz' xk'ulik ruyeew riib' chi chii' i santo laj itz'ihy naah paat. Eh chi jumehq'iil xuyuq'eej ruuk' i Aarón, i María.⁶Eh je' wili i xuq'or keh: Chab'iraj taq chi korik i naa nuq'orom aweh: Noq neen wihik jino'q i jalal nuq'oral taq chaxilak re' hin xaparusaq wiriik neeril nuwach, oon xa paruwiriik neenuq'o'reej.⁷Eh ruuk' i waj kamanoom Moisés ma' je' ta re' i nub'an, ruum xa re' wo' reh korik wach ruk'ux wuuk' chikiwach chu'nchel i waj kamanoom.⁸Re' reh xnub'an nuk'utaaj ruuk' chi korik ma' re' ta panjalwaach q'orik kinq'orik ruuk' manlik wach i q'orik i nuq'or reh, hoj k'ulwach ruuk' noq i nub'an nuk'utaaj ruuk'. Eh ¿Nik' wach noq ma' xat yo'jik ta taq noq xa a'n taq i ma' holohik ta laj q'orik chi riij? inki.

⁹Re' i QaJaaw Dios ma' k'isiin ta xchalik i rujosq'iil chikinaah noq xelik reje kuuk'.¹⁰Eh xelik reje i junsahl chi suutz' chi chii' i santo laj itz'ihy naah paat, eh chupaam i jumehq' re' re' xsutinik chi rax q'aah i riij i María, saqreq'ik chik wach chu'nchel i ruti'jolal. Eh noq re' i Aarón i xrilow i María xikoj retaal chi tolin chik rax q'aah i riij.¹¹Re' Aarón je' wili i xuq'or reh i Moisés: Chakuy jaaw maa qohayeew tii chi tojariik i qamahk xqa'an, ruum re' i mahk wili xa qamemil xqa'an wii'.¹²Mayeew q'ab' chi neensalooj taqe iloq i ruti'jolal je' rukab' noq insalooj iloq i ruti'jolal i k'isa ha'lak'un kamnaq noq inasjik ruuk' i rutuut, inki.

¹³Eh re' i Moisés xub'an rutiij chuwach i Dios je' wili xuq'or: QaJaaw Dios cha a'n tii otob'il chak'achrisaj qeh i María, inki.

¹⁴Eh re' i QaJaaw Dios je' wili xuq'or reh i Moisés: Wita neenchuhb'jik i panaq'wach ruum i rajaaw nee naq inchalik ruk'ixiik, nee naq i rukeb'aa' riib' wuquub'-oq q'iij. Ruum aj re' yu'naak koruman chi naa awesam taq reje chaxilak wuq'uub'-oq q'iij, eh chi riij i re' kore' chik neensutinik chaloq, inki.

¹⁵Eh noq xkesaj reje i María chi kixilak chuwach i wuquub' q'iij ma' xkichop ta reje i kib'eeh i aj Israel.¹⁶Xa re' wo' noq xsutinik chee i María chi kixilak xkichop cho kib'eeh ar xi elik chaloq Hazerot ar chik chupaam i ye'aab' chiq yuuq' wilik Parán xikulik hi'loq. Re' taqe i kab'laj xitaq'ab'jik chi rilariik nik' wach wilik i ye'aab' Canaán (Deut 1.19-33)

¹Re' i QaJaaw Dios je' wili xuq'or reh i Moisés:²Re' hat cha taq'aaj taqe kab'laj-oq i winaq wilik kajaawriik, re' taqe k'amal kib'eeh i ju'jun ch'uq chi aj Israel, chi rilariik nik' wach noq wilik i ye'aab' Canaán, re' i naa nuye'em keh i aj Israel.

³Eh nik' wach i xq'orarik reh ruum i QaJaaw Dios i Moisés je' wo' re' xub'an, xutaq'aaj wo' taqe chee ilool noq wilik chupaam i ye'aab' chiq yuuq' Parán. Eh re' wo' taqe i wilik kajaawriik chi k'amal kib'eeh i ju'jun ch'uq chi aj Israel, xutaq'aaj.⁴Je' wili i kib'ihnaal. Chi kixilak junch'uq chi riih rumaam Rubén re' i Samúa rak'uun i Zacuur.⁵Chi kixilak i junch'uq chi riih rumaam Simeón, re' i Safat rak'uun i Horí.⁶Chi kixilak i junch'uq chi riih rumaam Judá re' i Caleb rak'uun i Jefone.⁷Chi kixilak i junch'uq chi riih rumaam Isacar re' Igal i rak'uun i José.⁸Chi kixilak i junch'uq chi riih rumaam Efraín re' Oseas rak'uun i Nun.⁹Chi kixilak i junch'uq chi riih rumaam Benjamín re' i Palti rak'uun i Rafú.¹⁰Chi kixilak i junch'uq chi riih rumaam i Zabulón re' Gadiel rak'uun i Sodi.¹¹Chi kixilak i junch'uq chi riih rumaam i Manasés re' ruuk' riih rumaam i José, re' i Gadi rak'uun i Susi.¹²Chi kixilak i junch'uq chi riih rumaam Dan re' Amiel rak'uun i Gemali.¹³Chi kixilak i junch'uq chi riih rumaam i Aser re' Setur rak'uun i Micael.¹⁴Chi kixilak i junch'uq chi riih rumaam Neftalí re' Nahbi rak'uun i Vapsi.¹⁵Chi kixilak i junch'uq chi riih rumaam i Gad, re' Geuel rak'uun i Maqui.

¹⁶Re' taqe re' kib'ihnaal i winaq xutaq'aaj taqe chaloq i Moisés chi rilariik nik' wach noq wilik i ye'aab' Canaán. Eh re' i Moisés xujal wach i b'ih i Oseas rak'uun i Nun, Josué chik i b'ih xukoj.

¹⁷Eh noq xutaq'aaj taqe chaloq i winaq re' re' i Moisés chi rilariik nik' wach noq wilik i ye'aab' Canaán, je' wili i xuq'or keh:
Hiy taq chupaam i ye'aab' Neguev, johteen taq chupaam i raxchee'.¹⁸Eh xti nee taq inawilow cho chi korik nik' wach noq wilik i tinamit re' re'. Eh nee taq inawilow i wilkeeb' ar mi kow kiib', oon ma' kow ta kiib', mi k'ih taqe, oon ma' k'ih ta taqe.¹⁹Eh nee taq i naa wilow cho chi korik i ye'aab' mi wilik i tinamit chupaam, oon ma' xtaj, mi rax paam ak'al, oon ma' rax ta paam. Eh nee wo' taq i naa wilow taqe i tinamit wilkeeb' chupaam nik' wach i kipaat, mi re' ruuk' xa itz'ihy naah paat, oon re' ruuk' i tz'aq riij.²⁰Eh nee taq inawilow mirub'an i tik chuwach i ye'aab', oon ma' rub'an taj, mi wilik chee' chuwach, oon ma' xtaj. Re' taq i hat mat yo'jik taq chak'am taq cho k'isinoq weh i wach i tik i nelik ar, inki.
Eh noq xi k'ulik taqe i ilool chupaam i ye'aab' re' re' manlik k'achi' reliik i peet wach i uuva.²¹Eh re' taqe i winaq xiooj chi rilariik i ye'aab' ar xkitoq'aa' reje rilariik chupaam i ye'aab' chiq yuuq' wilik ar Zin, xi ponik Rehob, xponik wo' kilow i panookb'al reh i Hamat.²²Ar xijohtik Neguev, korehtaal xi ponik chupaam i tinamit Hebrón. Eh ar patim i winaq Ahimán, je' wo' Sesai, je' wo' Talmai, re' taqe ruuk' riih rumaam Anac. Eh wuquub' chik haab' rukorjiik i tinamit Hebrón noq xkorjik i tinamit Zoán wilik ar Egipto.²³Eh xi ponik chupaam i raasb'al ha' Escol rub'ihnaal ar xkich'uq i jun kuht chi uuva, wilik wo' hoq i wach granado xkisik' reje, ruch'ihil i wach higo, xkitehlaaj reje rij chee' pankib'al.²⁴Re' i ye'aab' re' re' Escol i rub'ihnaal xkikoj ruum ar xkich'uq reje i junkuht chi wach uuva i aj Israel.

²⁵Eh noq re' taqe winaq re' re' xkikohlaaj reje rilariik i ye'aab' Canaán chuwach i ka'winaq q'iij xi sutinik wo' chik reje.²⁶Xiponik chupaam i ye'aab' Cades panchiq yuuq' Parán. Eh ar xponik kireq i Moisés ruch'ihil i Aarón, kuch'ihil taqe i aj Israel. Eh xtohq'ik kik'utjaam keh taqe i re', i xk'ulik kilow. Eh xkik'uhtaaj wo' keh i wach i tik i nelik chupaam i ye'aab' re' re'.²⁷Eh je' wili xkiq'or reh i Moisés:
Re' hoj xponik wo' qilow nik' wach noq wilik i ye'aab' xoj ataq'aaj reje wii'. Xti korik wo' hoq chixiik'naah chihojal, re' nelik wii' i suq atoob'. Re' taqe i wili i wach i tik i nelik ar.²⁸Eh re' taqe i tinamit patim ar kow kiib', re' kipaat re' ruuk' i tz'aq riij. Eh xqilow wo' kiwach i nimaq kooq winaq re' taqe ruuk' i riih rumaam i Anac.²⁹Eh chupaam i ye'aab' Neguev patim taqe i aj Amalec, Chupaam taqe i rax chee' patim taqe i aj heteo, eh re' taqe i aj jebuseo, je' wo' taqe i aj amorreo, eh chi korkiil reje i palaw, chi chii' i nim ha' Jordán patim taqe i aj cananeo.

³⁰Eh re' i Caleb xuq'or keh i tinamit chi kimay peet i q'orik ruuk' i Moisés je' wili i xuq'or:
Re' hin i nuq'or chi nee qohooj chi peleto kuuk', re' chik i hoj nee qoh chopwik naah i ye'aab' re' re', re' hoj neen qa'an rub'aan, inki.

³¹Eh re' taqe i winaq xi ponik haa' je' wili xkiq'or:
Ma' chih taj ma' nee ta ruyeew riib' ruum re' hoj ma' nee ta inqakuy i peleto kuuk' i tinamit re' re'. Ruum re' keh q'e' kow kiib' chi qawach i hoj, inki taqe.

³²Eh re' taqe i winaq re' re' xkiq'or keh taqe i aj Israel chi re' ye'aab' xk'ulik kilow ma' holohik taj, je' wili i xkiq'or:
Re' ye'aab' xponik qilow yiib' wach noq wilik, i rukansaj taqe i rutinamiit. Eh chu'nchel i winaq patim ar xiik' naah ninqaal kooq.³³Eh xqilow wo' kiwach taqe i q'e' nimaq kooq, re' taqe i riih rumaam Anac. Eh noq wilkooj chi kicheel xama' qoh k'utinik ta wo' hoq xa je' hoj kok' q'eq chili'l noq inqik'raaj qiib', inki taqe. Re' taqe i aj Israel ma' holohik ta xiq'orik chi riij i Dios

¹Eh chu'nchel i aj Israel ki-ik'ik aq'ab' chi k'erik kichii' chi oq'ik.²Eh ma' holohik ta xiq'orik chi riij i Moisés, chi riij i Aarón, je' wili i xkiq'or: Xti korik wo' hoq chi ma' xta naq reet chi xoj kimik cho ar Egipto, ma' xta wo' naq reet chi nee qoh kimik ayu' chupaam i chiq yuuq' wili.³¿Chib'ih reet noq qoh ruk'amam reje i QaJaaw Dios chupaam i ye'aab' re' re' xa reh chi nee qoh kimik panq'aq'inik, xa reh chi neen kichop naah i qehk'een i qak'uun qixq'uun taqe i aj ixowaal? Xti ruk'ul wo' naq chik chi nee qoh sutinik reje Egipto, inki taqe.⁴Eh kiq'or chikiwach chi je' wili: Qapab'aa' jino'q i k'amal b'eeh reh chi nee wo' chik qoh sutinik reje Egipto, inki taqe.

⁵Re' i Moisés, ruch'ihil i Aarón xtib'ik kik'ux xkik'utzaa' qohoq kiib' korehtaal xkireq wach ak'al ruuk' i yejal kiwach chikiwach chu'nchel i aj Israel kimolom kiib' ar.⁶Eh re' i Josué, ruch'ihil i Caleb re' taqe ruuk' i xi ponik ilwoq reh i ye'aab' Canaán nik' wach noq wilik, xtib'ik kik'ux xkixih i kiso' chikiij.⁷Eh je' wili xkiq'or reh chu'nchel i aj Israel:
Re' ye'aab' xponik qilowxiik'naah holwochiil.⁸Wila' xojrutoob'eej i QaJaaw Dios nee qoh ruk'am reje chupaam i ye'aab' re' re' neeruq'asaj qeh. Re' ye'aab' re' re' xti nujinaq chi suq atoob'.⁹Xa re' la' re' taq i hat maa q'etwachej taq i QaJaaw Dios, eh matyo'jik taq kuum i tinamit wilkeeb' ar. Xa ma' xta tz'aaq noq naa qa'nam keh xa je' ink'uxarik i kaxlanwi'k, ruum re' keh ma' awach ta naa rutoob'inik keh. Eh re' hoj nakooj rutob'eem i QaJaaw nim rajaawriik. Je' re' noq matyo'jik taq kuum, inki taqe.

¹⁰Eh re' taqe i aj Israel xkaaj naq kikutum chi ab'aj taqe i winaq re' re'. Eh re' i ruloq'il i QaJaaw Dios xuk'uhtaaj cho riib' chikiwach chupaam i santo laj itz'ihy naah paat molb'al iib'.¹¹Re' i QaJaaw Dios je' wili i xuq'or reh i Moisés:
¿Kojaruuj inkimay i ma' holohik ta laj q'orik chi wiij i tinamit re' re'? Re' keh xama' inkinimaj ta wo' hoq chi wilik wajaawriik atoob' ta xkilow wo' naq taqe i ma' ilooj taj xnub'an chikiwach.¹²Re' hin naa nusacham kiwach ruuk' i kaq yab'ilaal reh chi ma' nee ta kiokik, ma' nee ta nkehchaaj i ye'aab' re' re'. Eh re' hat naa nuk'ihaaxb'isam awiih aamaam naakiponiik chi ruk'ihaal tinamit q'e' kow kiib' chikiwach i keh, inki.

¹³Re' i Moisés je' wili i ruchaq'weesjiik i QaJaaw Dios xub'an:
Re' hat Jaaw ruuk' awajaawriik xawesaj taqe chaloq i tinamit wili ar Egipto. Eh noq neenkinab'eej taqe i aj Egipto chi nee nakansaj taqe,¹⁴neenkik'utjaaj reje keh taqe i tinamit wilkeeb' Canaán. Re' keh keht'al wo' hoq chi wilkaat chi kixilak aatinamiit, eh chi re' hat inak'uhtaaj awiib' keh. Eh chi nayeew chee suutz' chikinaah. Eh chi ruuk' i junsahl chi suutz' i nak'am kib'eeh pan q'iij, eh pan chaq'ab' ruuk' i junsahl chi q'aaq' i nak'am kib'eeh.¹⁵Eh wila' xakansaj taqe i tinamit wili xa ruuk' junk'aam. Re' taqe tinamit kib'iram rib'iral chi wilik awajaawriik je' wili i naa kiq'orom:¹⁶Re' Dios ma' xub'an ta kikojariik i aj Israel chupaam i ye'aab' ruq'orom naq i xti korik chi naa ruye'em keh, ruum aj re' xukansaj taqe chupaam i ye'aab' chiq yuuq', inko'q taqe.¹⁷Ruum aj re', QaJaaw Dios, neerub'an chi neenak'uhtaaj chaloq i runimaal awajaawriik, je' rukab' aq'orom chi naa a'nam.¹⁸Aq'orom chi ma' nchalik ta josq'iil chi jumehq'iil, chi ma' k'isiin i ketelinik wachiis awuuk', chi nakuy kimahk i yiib' wach kina'ojb'al, xa re' la' xanaa wo' taqe aye'em chutojariik i kimahk i aj mahk. Eh chi re' i tuutb'ees ajaab'ees i nayeew taqe chutojariik kimahk i keh, je' wo' i kak'uun kixq'uun kiih kimaam.¹⁹Ruum chi re' hat xiik'naah i ketelinik wachiis awuuk' cha kuy kimahk i tinamit wili ruuk' i kiyiib' wach na'ojb'al ruum xa a'n wo' chee q'unil kuuk' noq xawesaj taqe cho Egipto, eh korehtaal xi k'uloq chupaam i ye'aab' wili, inki. Re' QaJaaw Dios xuyeew taqe chutojariik i kimahk i aj Israel

²⁰Eh re' i QaJaaw Dios je' wili ruchaq'weesjiik i Moisés xub'an:
Ma' xta reet neenukuy kimahk, je' rukab' xapahqaaj weh.²¹Xa re' la' xti korik wo' hoq chi re' hin k'achalkiin, eh re' nuloq'il nujinaq chinaah chu'nchel i wach ak'al.²²Xa re' la' re' xi-ilwik reh i nuloq'il i xi-ilwik reh taqe i ma' ilooj taj xnub'an chikiwach i aj Egipto, je' wo' taqe i xnub'an chikiwach chupaam i ye'aab' chiq yuuq'. Re' taqe i xata wo' jarub' pech xinkaaj kinkipajam eh ma' xkib'iraj taj i nuq'oral.²³Ma' jino'q keh naa kianam okik chupaam i ye'aab' nuq'orom rib'iral chi naa nuye'em keh i kimaam kati't. Ma' jino'q keh ma' inkiyeew ta wajaawriik naakokiik ar.²⁴Xa re' la' wo' hoq i waj kamanoom Caleb re' reh tokoom i runa'ojb'al chikiwach i junch'uq re' re', eh kirunimaj chi korik ruum i re' naa nuye'em q'ab' reh chi naa rokiik chupaam i ye'aab' xponik rilow. Eh ar wo' naakipatiniik chi jumpech taqe riih rumaam.²⁵Ruum chi wilik taqe i aj amalec, aj Canaán panab'eeh wach k'ixkaab'. Re' taq i hat ti sutinoq wo' taq chik iqal chupaam i ye'aab' chiq yuuq' ar taq naa awojiik k'oloq chi chii' i kaq palaw, ki uchjik ruum i Dios.

²⁶Eh chi riij i re', re' i QaJaaw Dios je' wili xuq'or reh i Moisés, ruch'ihil i Aarón:

²⁷Eh ¿Konik' chik najtiil naa nukuyum i ma' holohik ta laj q'orik inki a'n chi wiij taqe i awuch aj Israel yiib' wach i kina'ojb'al? Re' hin xata wo' jarpech b'iram chi ma' holohik ta kiq'orik chi wiij.²⁸Je' re' noq re' taq i hat cha q'or taq keh chi re' hin i k'achlik Dios, hin kinq'orik chi naa nuye'em chikinaah aha' wilik i ma' holohik taj inki kapaaj.²⁹Xti korik i nuq'or chi chupaam i ye'aab' chiq yuuq' wili naa kikimiik taqe i k'ijolaq ma' holohik ta kiq'orik chi wiij, re' taqe i wilik juninaq haab' keh je' wo' taqe ik'inaq juninaq haab' ayu' naa rukahniik chi kutlik i kiti'jolal.³⁰Ma' jino'q taq aweh i naa rub'anam okik chupaam i ye'aab' nuq'orom naq taq aweh chi xti korik chi ar naq taq naa apatiniik. Xa re' wo' hoq Caleb rak'uun i Jefone, ruch'ihil i Josué rak'uun i Nun, nakianam okik ar.³¹Eh re' taq i xaq'or i hat chi naa ruchopariik kinaah kuum i nixowanik kiwach re' kak'uun kixq'uun i keh naa nuye'em q'ab' chi naa kokiik chupaam i ye'aab' ma' xponik ta taq panaq'awach i hat, re' keh naa kib'aniik rusuqkiil.³²Re' taq ati'jolal i hat naa rukahniik chi kutulkeeb' chupaam i chiq yuuq' wili.³³Re' taq awak'uun awixq'uun ka'winaq haab' naakib'ehik chupaam i chiq yuuq' wili. Xa chi kib'il kiib' naa kik'amam kib'eeh, eh je' re' i ti' naakik'ulum ruum taq ayiib' wach na'ojb'al i hat. Eh chawunchelaal taq i hat korehtaal inkahnik chi kutlik taq ati'jolal chupaam i chiq yuuq' wili.³⁴Eh re' taq i hat i xponik taq awilow i ye'aab' chuwach i ka'winaq q'iij ka'winaq haab' wo' taq naa atojom taq amahk iraaj ruq'orom chi ju'jun haab' chi riij i ju'jun chi q'iij. Chi je' re' naa taq anab'eem chi ma' holohik taj i chukuj q'orik taq xa a'n³⁵Re' hin i Dios, i nuq'or i korik chi je' re' i naa nub'anam keh i tinamit wili xkian jinaj wach kik'ux chi ma' ximponik ta panaq' kiwach. Ruum i re' ayu' naakikimiik chupaam i ye'aab' wili chiq yuuq, inki Dios. Re' kikimiik taqe i lajeeb' xi ponik ilwoq reh nik' wach noq wilik i ye'aab' Canaán

³⁶Re' taqe i winaq xutaq'aaj chaloq i Moisés chi rilariik nik' wach noq wilik i ye'aab' re' taqe i xi ponik chuq'orariik keh i aj Israel chi ma' holohik taj i ye'aab'. Eh ruum i re' chu'nchel i aj Israel ma' holohik ta xiq'orik chi riij i ye'aab' re' re'.³⁷Eh re' taqe i lajeeb' chi winaq re' re' ma' korik taj i xponik kiq'or chi riij i ye'aab' xk'ulik kilow xye'arik chee kaq yab'ilaal chikinaah ruum i Dios. Eh ruum i re' xikimik.³⁸Xa kiib' chik i kik'uliil noq xi k'ulik ilil ye'aab' xi kahnik chi k'achalkeeb', re' i Caleb rak'uun i Jefone, ruch'ihil i Josué rak'uun i Nun. Re' i aj Israel xb'aan keh chupaam i ye'aab' Horma (Deut 1.41-46)

³⁹Eh noq xuk'uhtjaaj i Moisés keh i aj Israel aha' wilik i xub'an Dios, chi kunchelaal xchalik rutib'iik kik'ux.⁴⁰Eh kowahq'eq chi junwaar xijohtik naah yuuq' pantaq rax chee', je' wili i xkiq'or:
Re' hoj ayu' chik wilkooj ma' xta reet chi nee qoh ooj chupaam i ye'aab' xuq'or i QaJaaw Dios chi naa ruye'em qeh. Xti korik wo' hoq chi xoj mahkunik chuwach, inki taqe.

⁴¹Eh je' wili i xq'orarik keh ruum i Moisés:
¿Chib'ih reet noq ma' xanimaj ta taq aha' wilik taqe i xuq'or i QaJaaw? Ruum i re' ma' naa ta taq aweliik korik.⁴²Maa chop taq reje ak'ux chi ojik chawach ruum i wixatooj taq nee taq inki a'n chaaweh i ki-ixowanik taq awach ruum re' Dios ma' xta taq awuuk' cha toob'jiik.⁴³Re' taqe i aj amalec, taqe i aj Canaán k'ahchi' taq kaat kuy-eem reh i rub'anariik taq aweh. Re' taq i hat ruum chi xaq'eb' taq chi riij ak'ux i QaJaaw Dios re' reh ma' naa ta wo' ruwihiik taq awuuk' chatoob'jiik, inki.

⁴⁴Eh re' taqe i aj Israel xiooj chikiwach xijohtik chinaah inajt naah yuuq' pantaq rax chee', xa re' la' ma' xooj ta chikiij i Moisés. Je' wo' hoq i loq'laj kaxa moloj wii' i k'uhb'aal ma' xi elik ta taqe chupaam i itz'ihy naah paat.⁴⁵Eh noq wilkeeb' chik ar i aj Israel xiqajik chaloq i aj amalec kuch'ihil i aj Canaán chub'anariik keh chupaam i ye'aab' Horma. Re' k'uhb'aal chi riij nik' wach ruye'ariik taqe i mayiij

¹Re' QaJaaw Dios je' wili i xuq'or reh i Moisés:²Re' hat cha q'or keh i aj Israel taqe i q'orik wili. Noq naakokiik chupaam i ye'aab' naa nuye'em keh chi naa kik'achariik ar.³Koruman chi naakiq'aasam chi kik'atoj mayiij jino'q imas wakax, jino'q i tentzuun ye'b'al nuloq'il, reh chi neemponik chi nuwach chi nk'ohnik laj mayiij. Re' i re' naakiq'aasam chi riij chi xooj eloq wach i nuq'orom, oon xa pankik'ux neenchalik, oon neenkiq'asaj chupaam jino'q i nim wach ninq'iij.⁴Eh awach i nee ruk'am chee rumayiij chi nuwach koruman chi naa ruqasam haa' chi kimayiij ik'inaq kijib' libra chi holohik arina, xilakimaj ruuk' i jinaj nimlaj lemeta chi aseite.⁵Eh re' k'atoj mayiij re' re' naa wo' kiq'asam haa' ju'jun i nimlaj lemeta chi riis uuva chi ruk'uliil i ju'jun chi chikop.⁶Eh wila' imas tentzun xkiq'asaj koruman chi naakiq'aasam chiruk'uliil i k'isiin ma' b'elejeeb' libra chi holohik laj arina xilakimaj ruuk' ik'inaq jinaj nimlaj lemeta chi aseite.⁷Eh naa wo' kiq'asam chi kimayiij ik'inaq jinaj nimlaj lemeta chi riis uuva reh chi naa ruponiik chi nk'ohnik laj mayiij chi nuwach.⁸Eh wila' k'isa imas wakax i naa kik'atam chi kimayiij k'amb'al iib' panotob'il, oon reh k'amb'al kiib' panotob'il wuuk' i hin, hin Dios, oon mayiij chi riij chi xooj eloq wach i q'orooj cho rib'iral.⁹Koruman chi naa kiq'asam chiruk'uliil i k'isa imas wakax re' re' ik'inaq oxlaj libra chi holohik laj arina xilakimaj ruuk' i kiib' nimaq lemeta chi aseite.¹⁰Eh koruman wo' hoq chi naa kiq'asam haa' i kiib' nimaq lemeta chi riis uuva reh chi naa ruponiik chi nk'ohnik laj mayiij chi nuwach i hin.¹¹Eh naa wo' kiq'asam haa' taqe i re' noq naakiq'aasam chi kimayiij jino'q imas wakax, eh jino'q imas tentzun, oon jino'q i k'isa tentzun, oon jino'q i k'isa kaprax.¹²Je' taq re' i naa a'nam kuuk' i ju'jun chi chikop naa taq aq'asam chi amayiij kojarub' pa' neemponik taq i naa aq'asam.¹³Eh chawunchelaal taq i hat aj Israel koruman chi je' re' taq i naa a'nam xa jarpech pa' naa taq aq'asam i chikop chi k'atoj mayiij, ink'ohnik imponik chi nuwach i hin.

¹⁴Eh re' taqe i tokoom tinamit xa ik'ik keh, oon patim taq chaxilak wila' xkaaj kiq'asam i chikop chi k'atoj mayiij ink'ohnik imponik chi nuwach i hin, nik' wach ruq'ahteesjik naa taq a'nam amayiij i hat, je' wo' re' i naa kia'nam i keh.¹⁵Re' i k'uhb'aal chi riij i mayiij wili aweh taq i hat keh wo' taqe i aj tokoom tinamit xa ik'ik keh, oon patim taq chaxilak. Eh keh taqe i tuutb'ees ajaab'ees, keh wo' hoq i kiih kimaam naa kiwihiik koq'uun.¹⁶Re' i k'uhb'aal wili naa animam taq i hat, je' wo' taqe i tokoom tinamit, tiko'q keh, inki Dios.

¹⁷Re' i QaJaaw Dios je' wili i xuq'or reh i Moisés:¹⁸Re' hat cha q'or keh i aj Israel taqe i q'orik wili: Noq okinaq chik taqe chupaam i ye'aab' aha' naa nuk'amam taqe reje wii'.¹⁹Noq naa rutohq'iik kianam rusuqkiil i wach i kitik kimu'uun nareliik chupaam i ye'aab' re' re', koruman chi naa kiq'aasam i kimayiij chi nuwach i hin.²⁰Nik' wach noq inkiq'asaj chi kimayiij i peet wach i kitik, naa wo' kiq'asam chi mayiij chi nuwach i peet kaxlanwi'k inki yejaa' ruuk' peet wach i ki trigo.²¹Eh re' kaxlanwi'k juneliik naakiq'aasam chi mayiij i keh, je' wo' taqe i kiih kimaam naa kiwihiik koq'uun.

²²Eh wila' re' keh xa chi ma' keht'al xkikanaa' rub'anariik jino'q keh i xnuq'or, re' i k'uhb'aal xnuq'or reh i Moisés chi naa kianam.²³Eh wila' xa ruchaliik wo' chaloq chi ma' inki a'n ta rub'aan xa re' wo' noq xnuyeew reh i Moisés k'uhb'aal wili, eh xaxikuloq wo' ayu' yu'naak chi ma' inki a'n ta chu'nchel i ruq'or.²⁴Eh wila' xa chi ma' keht'al xkian i mahk re' i tinamit koruman chi naakiq'aasam jinaj i k'isa imas wakax chi k'atoj mayiij ink'ohnik imponik chi nuwach i hin, naa wo' kiq'aasam chi mayiij i xa chi naq'wach ruch'ihil i riis uuva, je' rukab' i ruq'or i k'uhb'aal. Eh naa wo' kiq'aasam jinaj imas kaprax chi riij i mahk.²⁵Eh chi riij i re', re' k'amal b'eeh aj tiij naa ruq'aasam i mayiij pahqb'al kuyb'al kimahk chu'nchel i tinamit Israel. Re' hin naa wo' nukuyum kimahk ruum kiq'aasam chik i kimayiij chi riij i mahk, xa chi ma' keht'al xkian.²⁶Korik noq re' hin naa nukuyum i kimahk chu'nchel i aj Israel, je' wo' taqe i tokoom tinamit patim chi kixilak, ruum xa chi ma' keht'al i xkian i mahk re' re'.

²⁷Eh wila' xa jinaj xb'anik i mahk chi ma' reht'al, ixoq kaprax jinaj haab' i wilik reh naa ruq'aasam chi rumayiij chi riij i ru mahk.²⁸Re' i k'amal kib'eeh aj tiij naa ruq'aasam i mayijimaj chikop chuwach i QaJaaw Dios chi riij i awach xb'anik reh i mahk chi ma' reht'al. Eh noq ruq'asam chik i chikop chi mayiij naa rukuyariik i ru mahk.²⁹Re' i mayiij wili koruman chi naa kiye'em i aj Israel, je' wo' i tokoom tinamit patim chi kixilak, wila' xa chi ma' keht'al ma' xkian taj i ruq'or i k'uhb'aal chi riij i ruye'ariik i mayiij.

³⁰Eh wila' re' jino'q i xaraaj chi ma' xub'an taj i ruq'or i k'uhb'aal re' re', eh ma' xponik ta k'isinoq chi nuwach i xub'an. Re' reh naa rehtesjiik chi kixilak i aj Israel, atoob' ta aj Israel, atoob' ta tokoom tinamit.³¹Re' reh ruum chi ma' xponik ta k'isinoq panaq'wach i nuq'oral ma' xub'an taj i ruq'or i nuk'uhb'aal ruum i re' naa rehtesjiik reje chi kixilak i tinamit, tiko'q keh, inki Dios. Re' tojb'al ru mahk awach inkamanik pan hi'limb'al q'iij

³²Eh noq re' taqe i aj Israel b'ehik inki a'n cho chupaam i ye'aab', jinaj i winaq xkireq chi si'wik i rub'an chupaam i hi'limb'al q'iij.³³Eh re' keh xkik'am reje chuwach i Moisés, chuwach i Aarón, chikiwach i ruk'ihaal tinamit.³⁴Ar xkiyeew pantz'ilom i winaq, ruum komajaa' ta naq i naab'jik chib'ih i naa rub'aan ruuk'.³⁵Eh re' i QaJaaw Dios je' wili i xuq'or reh i Moisés, re' winaq re' re' i ruk'ul chi naa rukanteesjiik najt reje ruuk' i itz'ihy naah paat wilkaat taq wii' chu'nchel i tinamit naakik'utwiik reh chi ab'aj, inki.³⁶Eh xkesaj cho chupaam i ye'aab' wilkeeb' wii' i aj Israel xkikutib'eej chi ab'aj i winaq re' re' korehtaal xkikansaj, je' rukab' i xq'orarik reh i Moisés, ruum i QaJaaw Dios. Re' i rusinchii' i rooq i kiso' i aj Israel

³⁷Re' i QaJaaw Dios je' wili i xuq'or reh i Moisés:³⁸Re' hat cha q'or keh i aj Israel chi re' keh, eh chi re' taqe i kiih kimaam naa kiwihiik na' chub'an koruman chi naa kikojom rusinchii' i rooq i kiso', eh chi xilak i re' naa kikojom i tolotaq rax muq'ik laj nooq'.³⁹Eh noq naakilom wach i rusinchii' i kiso' naa ruk'uliik cho pankik'ux chu'nchel i nuk'uhb'aal nuq'orom keh, eh naa kianam rub'aan. Eh ma' naa ta chik kianam i kiyiib' wach kapeew i keh, eh inkootwaaj rub'aan, ruum i re' ma' korik ta chik wach kik'ux wuuk'.⁴⁰Chi je' re' naa ruk'uliik pankik'ux naa kianam chu'nchel i nuk'uhb'aal nuq'orom keh reh chi naa ruwihiik kisantohiil, eh re' hin naa nukahniik chi ki Dios.⁴¹Re' hin kaJaaw i ki Dios xineesanik cho keh pan tinamit Egipto re' inwaaj i hin chi naa nukahniik chi hin manlik ki Dios, tiko'q keh, inki Dios. Re' i Coré, re' Datán, re' Abiram, xkiq'ehtaaj kiib' chuwach i Dios

¹Jinaj i winaq aj Levíta riih rumaam Coat, re' Coré rak'uun Izhar. Eh ixib' chik taqe i winaq ruch'ihil re' ruuk' taqe i junch'uq chi riih rumaam i Rubén, je' wili i kib'ihnaal: Datán, Abiram, rak'uun taqe i Eliab, eh re' On rak'uun i Pelet.²Re' keh kiib' siento ruuk' lajeeb' roxk'ahl chi winaq taqe chi aj Israel. Re' taqe i winaq re' re' wilik kajaawriik chi kixilak i tinamit kojol taqe na'ojb'al holohik wo' naq kib'iral.³Chu'nchel i re' xkimol kiib', xkichoqej i Moisés ruch'ihil i Aarón je' wili xkiq'or:
Re' hoj xoj q'uhtik taq chik aweh i hat, chu'nchel i tinamit wilik kisantohiil, eh re' i QaJaaw Dios wilik quuk' i hoj chi qunchelaal. Eh ¿Chib'ih reet noq konawaaj taq taaq'anik chi qanaah i hoj, hoj rutinamiit i Dios? inki taqe.

⁴Eh noq xrib'iraj chi je' re' i Moisés xuk'utzaa' qohoq riib' korehtaal xureq wach ak'al ruuk' i yejal wach.⁵Eh je' wili i xuq'or reh i Coré, je' wo' keh taqe i ruch'ihil:
Xa iqal wahq'eq naa ruk'uhtaam qeh i QaJaaw Dios awach i rusik'im kiwach, eh awach i rukuxisam taqe, re' re' naa ruye'em q'ab' chi naa kijilim i koq kiib' chuq'ahteesjiik i mayiij.⁶Re' hat Coré, je' wo' taqe awuch'ihil cha a'n taq i naa nuq'orom aweh chak'am taq chaloq i sansario.⁷Eh i iqal i nayeew i nah wach q'aaq' chupaam, eh naa taq aye'em insensia chinaah, naa taq ak'atam chuwach i QaJaaw. Awach pa' taq aweh i neerusik' wach i reh re' wo' re' rukuxisam chaloq. Re' taq i hat aj Levíta manlik i ma' holohik ta laj na'ojb'al taq xa a'n inki.

⁸Eh re' Moisés je' wili i xuq'or reh i Coré:
Kinab'iraj taq i hat aj Levíta.⁹¿Mi ma' manlik taq aweh re' chi xusik' taq chawach i qaDios chi kixilak i aj Israel reh chi naa taq a'nam i kamanik chuwach? Re' reh xusik' taq awach chi naa taq a'nam i rukamaj chupaam i ru-itz'ihy naah paat, reh chi naa taq a'nam i kamanik kuuk' i tinamit.¹⁰Re' wo' i Dios xpaab'anik aweh i hat, je' wo' taqe chu'nchel awuch aj Levíta chi naa taq a'nam i rukamaj. Xa re' la' re' taq i hat inawaaj taq aq'uchum i kikamaj i k'amal kib'eeh aj tiij.¹¹Re' hat Coré je' wo' chu'nchel awuch'ihil, re' i QaJaaw Dios ma' holohik ta taq ti q'orik chi riij, re' taq i reh xaq'etwachej. Re' taj i Aarón ma' holohik ta taq ti q'orik chi riij ma' xta naq q'orik reh, inki.

¹²Eh chi riij i re', re' i Moisés xutaq'aaj ruk'amariik i Datán, ruch'ihil i Abiram, rak'uun taqe i Eliab, xa re' la' re' keh ma' xkaaj ta chalik, je' wili xkiq'or:
Re' hoj ma' qaaj ta ojik.¹³¿Mi ma' manlik aweh re' i xa a'n qeh chi xoj awesaj cho Egipto re' yohb'aal wii' wach i suq atoob', eh xoj ak'am cho chupaam i ye'aab' wili re' naaqakimiik wii' ruum i rukuyariik i k'uxumb'al qeh? Xanaah re' xa konawaaj wo' chi naa akahniik chi taaq'anik chi qanaah.¹⁴Re' hat ma' re' ta chupaam jino'q i ye'aab' i nelik wii' i suq atoob' xoj ak'am chaloq. Eh ma' nayeew ta qaye'aab', ni xata xayeew qa uuva. Re' hat qoh awaaj ak'amam reje chi je' hoj moywach. Re' hoj ma' jaruuj nee qoh ooj chawiij, inki taqe.

¹⁵Eh re' i Moisés ma' k'isiin xchalik ruk'aah, Je' wili i xuq'or reh i QaJaaw Dios:
Maak'ul keh i kimayiij, re' hin ma' nuq'uchum ta jino'q ki b'uurux, eh ma' awach ta jino'q keh i nub'anam ti k'axik keh, inki.

¹⁶Eh chi riij i re', re' i Moisés je' wili i xuq'or reh i Coré:
Re' hat, i haa' taqe i awuch'ihil iqal taq tiooj chuwach i QaJaaw Dios, eh re' Aarón naa wo' ruwihiik taq awuuk' ar.¹⁷Cha ju'junaal taq naa ak'amam reje asansario naa taq aye'em i insensia chupaam. Re' hat ruch'ihil i Aarón jinaj taq naa aye'em wii' asansario chuwach i QaJaaw, ruuk' kisansario i kiib' siento ruuk' lajeeb' roxk'ahl chi winaq, inki.

¹⁸Eh xkik'am wo' reje i kisansario chi kiju'junaal xkiyeew i naah wach q'aaq' chupaam, je' wo' hoq i insensia, xooj kipab'aa' kiib' panookb'al reh i santo laj itz'ihy naah paat molb'al iib' kuch'ihil Moisés, kuch'ihil i Aarón.¹⁹Re' Coré rumolom wo' chik kiwach chu'nchel i tinamit re' re' panookb'al reh i santo laj itz'ihy naah paat molb'al iib', chi ixob'al wach i Moisés, ruch'ihil i Aarón. Eh re' i QaJaaw Dios xuk'uhtaaj chee ruloq'il chikiwach chu'nchel i tinamit.²⁰Re' i QaJaaw Dios je' wili i xuq'or reh i Moisés, i Aarón.

²¹Re' taq i hat eleen taq chi kixilak i tinamit re' re', ruum re' hin xa chi jumehq'iil naa nusacham kiwach, inki.

²²Eh re' i Moisés, ruch'ihil i Aarón xkik'utzaa' qohoq kiib' korehtaal xkireq wach ak'al ruuk' i yejal kiwach, je' wili xkiq'or:
QaJaaw Dios i re' hat ti ye'wik kik'achariik chu'nchel i tinamit, ¿Mi naa asacham kiwach chu'nchel re' i tinamit ruum aajosq'iil xa ruum i ru mahk i jinaj chi winaq? inki taqe.

²³Eh re' QaJaaw Dios je' wili i xuq'or reh i Moisés.

²⁴Re' hat cha q'or keh chu'nchel i aj Israel chi kieloq reje ruuk' i itz'ihy naah paat wilkeeb' wii' i Coré, Datán, i Abiram.

²⁵Re' i Moisés xooj wo' hoq aha' wilkeeb' wii' i Datán, i Abiram xtahqaljik reje kuum i taqe i k'amal b'eeh chi kixilak i aj Israel.²⁶Re' i Moisés je' wili i xuq'or keh i aj Israel:
Eleen taq reje ruuk' i ki-itz'ihy naah paat i winaq re' re' yiib' wach i kina'ojb'al, eh maa tz'a'j taq i chib'ih keh reh chi ma' nee ta taq tikimik haa' i hat ruum i kimahk i keh, inki.

²⁷Eh re' taqe i aj Israel xi elik wo' chaloq aha' wilik wii' i Coré, i Datán, Abiram. Eh re' Datán, ruch'ihil i Abiram kipab'aa' cho kiib' chi chii' i ki-itz'ihy naah paat kuch'ihil i kehk'een, kuch'ihil taqe i kak'uun kixq'uun.²⁸Re' i Moisés je' wo' chik wili i xuq'or keh.
Ruuk' taqe wili naa nuk'uhtaam taq chawach chi re' Dios wilik rajaawriik intaaq'anik weh ruuk' chu'nchel i nub'an ma' xata panuk'ux i hin inchalik.²⁹Wila' re' taqe i winaq wili xikimik reje parub'ehel je' rukab' noq kikimik taqe reje i tinamit ar neenk'utinik chi ma' re' tee Dios intaaq'anik weh ruuk' taqe i nub'an.³⁰Eh raaj wila' re' i QaJaaw Dios xub'an chaloq ma' jank'al ta nilarik, wixuteh i chii' ak'al, eh nee kib'iq'arik qohoq ruum aak'al chi k'achlik kiwach i winaq wili k'uch'ihil i chu'nchel i chib'ih keh. Ruuk' i re' neenanab'eej taq i hat chi re' taqe i winaq wili xkiq'etwachej i Dios, inki.

³¹Eh xa re' wach xukohlaaj ruq'orariik i Moisés taqe re' intehiwanik i chii' ak'al chi ki'sil taqe winaq re' re'.³²Eh xib'iq'arik qohoq i Coré je' wo' chu'nchel i xkimol kiib' ruuk', xb'iq'arik wo' qohoq chu'nchel i awach keh, je' wo' chu'nchel i chib'ih keh.³³K'achlik wo' kiwach noq xib'iq'arik qohoq paruchamiil i jul, kuch'ihil chu'nchel i chib'ih keh. Chi riij i re' xtz'ahpik wo' chik i chii' aak'al, je' re' noq sacharik kiwach chi kixilak i aj Israel.³⁴Eh ruum chi xkik'er kichii' i xsacharik kiwach re' re', re' taqe i aj Israel wilkeeb' chi kijunsuut, xkimol chi elik, je' wili xkiq'or: Qoh eloq taq ruum nee-oq wo' qoh rub'iq' ak'al i hoj, inki taqe.³⁵Re' i QaJaaw Dios xutaq'aaj wo' chaloq jinaj q'aaq' sachb'al kiwach i kiib' siento ruuk' lajeeb' roxk'ahl chi winaq i xik'atwik reh i insensia.

³⁶Re' i QaJaaw Dios je' wili i xuq'or reh i Moisés:³⁷Re' hat cha q'or reh i Eliazar rak'uun i Aarón k'amal kib'eeh aj tiij chi chesaj chaloq i sansario chi xilak i q'aaq' chukut reje ko wulu' i naah wach q'aaq' wilik chupaam, ruum re' taqe i sansario wilik kisantohiil.³⁸Ruum re' i kisansario taqe winaq re' re' i xikimik ruum i mahk xkian, xkahnik chi kuxisamaj i kisansario ruum xkamanik k'atb'al insensia chi nuwach. Eh re' i sansario chayub' taq wach i ruch'ihch'aal reh chi neen kamanik chib'urb'al wach i artaal rehtalil chikiwach i aj Israel chi ma' toob' taj i xkian i winaq re' re'.

³⁹Eh re' i Eliazar i k'amal kib'eeh aj tiij xponik wo' resaj taqe i sansario re' ruuk' i q'an ch'ihch', xkikanaa' ar i winaq kuxik kikimiik. Eh xuq'or wo' hoq chi kiyub' wach i ruch'ihch'aal i sansario reh chi xkib'ur chuwach i artaal.⁴⁰Re' wili xkahnik chi rehtalil chikiwach i aj Israel chi xa re' wo' taqe i rak'uun i Aarón i ruk'ul chi naa kojiik chi k'atoj insensia chuwach i QaJaaw Dios. Ruum wila' awach chik jino'q i tokoom xooj chuk'atariik i insensia chuwach i QaJaaw Dios nee ruk'ul reh je' rukab' i xuk'ul i Coré, je' wo' rukab' i xkik'ul i ruch'ihil. Eh xub'an wo' chu'nchel i Eliazar i xq'orarik reh ruum i Moisés.

⁴¹Eh chi junwaar chik, chu'nchel i aj Israel xkitoq'aa' kichoqem i Moisés ruch'ihil i Aarón je' wili i xkiq'or reh:
Re' taq i hat k'ahchi' taq akansam i rutinamiit i QaJaaw Dios, inki taqe.

⁴²Re' keh chi kunchelaal xkikotej riij i Moisés ruch'ihil i Aarón reh i kichooqjiik, re' keh xi ilwik reje i wilik wii' santo laj itz'ihy naah paat molb'al iib'. Eh xa chupaam i jumehq' re' re' muhqik naah chi suutz' itz'ihy naah paat molb'al iib', xqajik chee ruloq'il i QaJaaw Dios.⁴³Eh re' i Moisés, i Aarón xooj kipab'aa' kiib' panookb'al reh i santo laj itz'ihy naah paat molb'al iib'.⁴⁴Re' QaJaaw Dios i je' wili i xuq'or reh i Moisés:

⁴⁵Re' taq i hat eleen taq chi kixilak i tinamit re' re' ruum re' hin xa chi jumehq'iil naa nusacham kiwach, inki.
Eh noq xkib'iraj chi je' re' i Moisés, ruch'ihil i Aarón xkik'utzaa' qohoq kiib' korehtaal xkireq wach ak'al ruuk' i yejal kiwach.⁴⁶Eh re' i Moisés je' wili i xuq'or reh i Aarón:
Re' hat chak'am reje asansario, chaham nah wach q'aaq' chupaam re' ruuk' i wilik wach artaal, chayeew insensia chupaam, eh nee tiooj i wilkeeb' wii' i tinamit, neenapahqaaj ree Dios chi neenkuyarik kimahk, ruum re' i rujosq'iil i QaJaaw x-uhtik chik wach, re' kaq yab'ilaal chalik chik chikinaah, inki.

⁴⁷Eh re' i Aarón xub'an wo' hoq i xq'orarik reh ruum i Moisés xooj wo' rajimam riib' aha' kimolom kiib' i tinamit. Eh re' kaq yab'ilaal xutaq'aaj chee i QaJaaw Dios k'ahchi' chik rukansam i tinamit. Re' Aarón xuyeew wo' insensia chupaam i rusansario xupahqaaj ree i Dios chi chukuy i kimahk i tinamit re' re'.⁴⁸Eh jumehq'iil xuyeew riib' pankiyejaal i kamnaq chik taqe kuuk' i kok'achalkeeb', eh re' i kaq yab'ilaal jumehq'iil xpa'lojik.⁴⁹Xa re' la' ruum i yab'ilaal re' re' kamnaq chik taqe i kajlaj miil ruuk' wuquub' siento chi tinamit, eh ma' xi ajaljik ta haa' taqe i xikimik ruum i mahk xub'an i Coré.⁵⁰Eh noq ik'inaq chik chi jumpech i kaq yab'ilaal, re' Aarón xooj wo' chik aha' wilik wii' i santo laj itz'ihy naah paat molb'al iib', xooj wo' chik rureq i Moisés. Re' i rukarote i Aarón toxlinik

¹Re' i QaJaaw Dios je' wili i xuq'or reh i Moisés:²Re' hat cha q'or keh i ju'jun ch'uq chi aj Israel chi kik'am cho ju'jun-oq kikarote i k'amal kib'eeh. Eh kab'laj chi karote i neenkik'am chaloq. Eh re' hat neenatz'ihb'aaj i kib'ihnaal chi kiju'junaal chuwach i kikarote.³Re' i rukarote ink'amwik kib'eeh i junch'uq chi riih rumaam Leví, re' i rub'ihnaal i Aarón neenatz'ihb'aaj chuwach. Ruum koruman chi naa kik'amam cho ju'jun-oq kikarote i k'amal kib'eeh i ju'jun ch'uq chi aj Israel.⁴Re' taqe kab'laj chi karote re' re' naa rojiik aye'em chupaam i santo laj itz'ihy naah paat molb'al iib', chuwach i loq'laj kaxa molik wii' i k'uhb'aal re' inqak'ul wii' qiib' taq awuuk'.⁵Re' hin naa nuye'em q'ab' chi neentoxliniik i rukarote i winaq nusik'im wach. Chi je' re' ma' nee ta chik taq tikichoqej i aj Israel, inki.

⁶Eh re' i Moisés xuq'or wo' keh i aj Israel i xq'orarik reh. Eh re' kab'laj ch'uq chi aj Israel xkik'am wo' chaloq ju'jun i kikarote i ju'jun chi k'amal kib'eeh xponik kab'laj chi karote, chi kixilak i re' wilik i rukarote i Aarón.⁷Eh re' i Moisés xponik ruyeew i kab'laj chi karote re' re' chuwach i QaJaaw chupaam i santo laj itz'ihy naah paat molik wii' k'uhb'aal.⁸Eh chi junwaar i Moisés xokik wo' chik i koq chupaam i santo laj itz'ihy naah paat xponik rureq chi re' i rukarote i Aarón, re' i xuyeew parub'ihnaal i junch'uq chi riih rumaam Leví, xpoq' rutoxl ixmak'inik, q'an laj almendro i xuwachuj.⁹Re' i Moisés xresaj cho chuwach i QaJaaw Dios kab'laj chi karote xuk'uhtaaj keh chu'nchel i aj Israel, eh xkimol, xkik'am wo' chik chi kiju'junaal i kikarote, i xi k'amwik cho reh.¹⁰Re' i QaJaaw Dios, je' wili i xuq'or reh i Moisés: Re' hat cha kanaa' i rukarote i Aarón chuwach i loq'laj kaxa i moloj wii' i k'uhb'aal k'uhtb'al reh chikiwach i aj Israel kiq'etwachinik weh. Je' re' naa a'nam reh chi neenkikanaa' i choqik chi wiij, reh chi ma' nee ta kikimik, inki.

¹¹Eh re' i Moisés xub'an wo' chu'nchel i xq'orarik reh ruum i QaJaaw Dios.¹²Eh re' taqe i aj Israel je' wili i xkiq'or reh i Moisés: Re' hoj, hoj q'ehb'eel naaqakimiik chi qunchelaal.¹³Ruum chu'nchel inkijil i koq kiib' ruuk' i rusanto laj itz'ihy naah paat molb'al iib' i QaJaaw Dios kikimik. ¿Mi naa rukuxiik qakimiik re' hoj? inki taqe. Re' i kikamaj k'amal kib'eeh aj tiij, je' wo' taqe i junch'uq chi aj Levíta

¹Re' i QaJaaw Dios, je' wili i xuq'or reh i Aarón: Wila' awach ch'uwarisanik paam i nuSanto laj itz'ihy naah paat, wach anaah i hat, wach kinaah awak'uun, wach kinaah i riih rumaam i Leví naa rukahniik i mahk. Eh wila' xa a'n taq i mahk ruuk' taq akamaj hat taq k'amal kib'eeh aj tiij wach anaah taq i hat, eh wach kinaah taq awak'uun naa rukahniik.²Eh neerub'an chi neenaq'or keh taqe i re' ruuk' i junch'uq chi riih rumaam i Leví re' ruuk' awach keh chi nee tikitow i hat, ruch'ihil taqe i awak'uun noq nee taq i na a'n i kamanik chuwach i santo laj itz'ihy naah paat i molarik wii' i k'uhb'aal.³Re' taqe re' neerub'an chi nee tikitow, chub'anariik i kamanik chupaam i itz'ihy naah paat. Xa re' la' ma' naa ta kijilim i koq kiib' kuuk' chu'nchel i wilik kisantohiil kikamanik ar, je' wo' ruuk' i artaal. Ruum wixkijil i koq kiib' nee kikimiik i keh, je' wo' taq i hat.⁴Re' keh neerub'an chi nee tikitow chi rub'anariik i kamanik chupaam i santo laj itz'ihy naah paat molb'al iib', xa re' la' ma' jino'q chik i tokoom nerujil i koq riib' taq awuuk'.⁵Eh xa re' wo' hat Aarón, re' taqe i awak'uun naa kib'aniik i kamanik chupaam i nuSanto laj itz'ihy naah paat, je' wo' wach artaal. Chi je' re' ma' nee ta chik inchalik nujosq'iil chikinaah chu'nchel i aj Israel.⁶Re' hin xnusik' kiwach taqe, re' taqe i ma' tokoom ta taq awuuk' i riih rumaam i Leví reh chi nuyeew taq aweh i hat reh chi nee taq tikitob'eej chub'anariik i nukamaj chupaam i nuSanto laj itz'ihy naah paat molb'al iib'.⁷Xa re' wo' hat, re' taqe i awak'uun naa taq akamaniik chi hat taq k'amal kib'eeh aj tiij chuwach i artaal, je' wo' hoq i nukamaj imb'aan i koq kochi juntar i itz'ihy tasb'al, xa re' wo' taq i hat naa ab'aniik reh. Re' hin nuye'em taq q'ab' aweh chi naa taq akamaniik chi hat taq k'amal kib'eeh aj tiij. Eh wila' awach i tokoom xumin i koq riib' chub'aan taqe i kamanik re' re' i ruk'ul chi naa rukanteesjiik, inki.

⁸Re' i QaJaaw Dios, je' wili i xuq'or reh i Aarón, re' hin naa nuye'em panaq'ab' rilariik chu'nchel i mayiij. Eh chu'nchel i mayiij q'e' looq' naakiqasam weh i aj Israel, re' hin naa nuye'em aweh i hat, je' wo' keh awak'uun. Re' wili naa nukanaam chi jinaj k'uhb'aal reh juneliik.⁹Re' taqe i mayiij naa ruk'ahtiik wilik rusantohiil naa nuye'em aweh, je' wo' hoq i peet wach i tik, je' wo' hoq i mayiij tojb'al riij mahk, je' wo' hoq i mayiij pahqb'al kuyb'al mahk noq neenq'ehtjik jino'q i k'uhb'aal, je' re' noq chu'nchel i re' naa rukahniik aweh, eh keh awak'uun.¹⁰Eh re' taq i hat k'amal b'eeh aj tiij re' taqe i mayiij re' re' naa ak'uxlaam taq wii' awiib'. Xa re' la' chupaam jino'q i ye'aab' santo taq naa ak'uxum ruum wilik kisantohiil.

¹¹Eh naa wo' nuye'em aweh chu'nchel i mayiij naa kiq'asam i aj Israel, naa rukahniik cha weh i hat, eh chi keh taqe awak'uun awixq'uun neerub'an chi neenkik'ux keh chu'nchel i wilkeeb' pana paat xa re' la' mi ma' xta ruch'uwa'iil kiwach. Re' wili naa rukahniik chi jinaj k'uhb'aal reh juneliik.¹²Eh naa wo' nuye'em aweh chu'nchel i peet wach i kitik naa kiq'asam chi kimayiij i aj Israel, je' wo' taqe i riis ki uuva, taqe i holohik aseite, taqe i peet wach i ki trigo naa kik'amam chaloq.¹³Chu'nchel i peet wach i kitik naakiq'aasam weh chi kimayiij naa wo' nuye'em aweh. Eh nee wo' rub'an chi neenkik'ux keh chu'nchel i wilkeeb' panapaat, xa re' la' mi ma' chih ruch'uwa'iil kiwach.¹⁴Je' re' noq naa nuye'em aweh chu'nchel i mayiij naa kiq'asam weh i aj Israel.

¹⁵Eh naa wo' nuye'em aweh i peet kak'uun i aj Israel, ruch'ihil i peet rak'uun i kichikoop naa kiq'asam weh chi kimayiij. Xa re' la' re' peet kak'uun i winaq ch'uwa' kiwach koruman chi naa kitojom riij, je' wo' hoq i peet kak'uun i chikop ma' kik'uxarik taj.¹⁶Eh noq naa kitojom riij jinaj poh raasjiik ho'oob' chi tumiin naa kitojom wii' riij re' i rahlil, je' wo' rukab' pajooj imb'aan chupaam i nuSanto laj itz'ihy naah paat.¹⁷Xa re' la' ma' naa ta ye'em q'ab' chi naa rutojiik riij i peet rak'uun i wakax, i peet rak'uun tentzun, i peet rak'uun i kaprax. Ruum re' taqe i chikop re' re' kanamaj chi weh taqe. Re' hat naa akansam taqe, eh re' kikik'eel naa achihkaam chinaah i artaal. Eh re' i kixeb'ohiil naa ak'atam chi nk'ohnik laj mayiij chi nuwach.¹⁸Eh re' i kitib'kaal i chikop, i rutib'kaal i chi' kik'ux, i rusak'aaj kituuq naa kiq'asam chi nuwach chi mayiij naa nuye'em aweh.¹⁹Eh chu'nchel i mayiij naa kiq'asam weh i aj Israel, naa nuye'em aweh i hat, keh awak'uun awixq'uun, keh awiih aamaam. Re' wili ma' naa ta rujaliik wach naa rukahniik chi k'uhb'aal chi juneliik cha weh i hat, chi keh awiih aamaam naa kiwihiik kahnoq chawiij, inki.

²⁰Re' QaJaaw Dios, je' wili i xuq'or reh i Aarón: Re' hat ma' naa ta ruwihiik awak'aal, oon chib'ih aweh Israel, chi je' rukab' taqe i aj Israel wilik chib'ih keh. Xa re' la' wo' hin naa nuwihiik chi akooch ayu' Israel.²¹Eh re' taqe i riih rumaam i Leví naa nuye'em chi kikooch i jinaj naa reliik ruuk' i lajeeb' chib'ih wilik keh i aj Israel chi tojb'al riij i kamanik naa kianam chupaam i santo laj itz'ihy naah paat molb'al iib'.²²Re' taqe i aj Israel ma' naa ta chik kijilim i koq kiib' ruuk' i santo laj itz'ihy naah paat molb'al iib'. Eh wila' xkijil i koq kiib' mahk i neenkian ruum i re' neenchalik i kimik chikinaah.²³Xa re' wo' taqe i aj Levíta naa kib'aniik i kamanik chupaam i santo laj itz'ihy naah paat molb'al iib'. Eh wila' awach i xuch'uwa'reej paam i wach kinaah i aj Levíta naa rukahniik. Re' wili naa rukahniik chi jinaj k'uhb'aal chi keh i tuutb'ees ajaab'ees, chi keh i kiih kimaam. Eh re' taqe i aj Levíta ma' naa ta ruwihiik kak'aal ayu' Israel.²⁴Re' hin naa nuye'em keh chi kikooch i jinaj naa reliik ruuk' i lajeeb' i wach i kitik naakiq'aasam chi kimayiij i aj Israel chi nuwach. Ruum aj re' xnuq'or chi ma' naa ta ruwihiik kiye'aab' ayu' Israel, inki.

²⁵Re' i QaJaaw Dios je' wili i xuq'or reh i Moisés:²⁶Re' hat cha q'or keh i aj Levíta chi noq naakik'ulum reh taqe i aj Israel i ju'jun naa reliik chinaah i lajeeb' i wach i kitik. Re' i naakik'ulum re' re' naa wo' chik kesam i keh i lajeeb' chinaah i jinaj siento reh chi naakiq'aasam chi kimayiij chi nuwach i hin, inki²⁷Eh re' i kimayiij re' re' naa nuk'ulum i hin je' rukab' noq i nuk'ul i kimayiij taqe i aj Israel noq inkiq'asaj i wach i kitik, eh noq inkiq'asaj i riis i ki uuva.²⁸Eh re' taqe i aj Levíta noq naakik'ulum kuuk' i aj Israel i ju'jun naa reliik ruuk' i lajeeb' naa wo' chik kiq'asam weh hin i keh i lajeeb' naa kesam ruuk' i jinaj siento, eh naakiye'em reh i Aarón k'amal kib'eeh aj tiij.²⁹Eh aha' wilik i naakik'ulum inchol kikanaam k'isinoq chi weh i q'e' holohik. Re' re' i naa kiq'asam weh i hin.

³⁰Eh nee wo' naq'or keh i aj Levíta noq kiq'asam chik i xti holohik naa nuk'ulum keh i kimayiij je' rukab' noq i nuk'ul i kimayiij i aj Israel re' peet wach i kitik re' i riis i ki uuva, re' i peet wach i ki trigo.³¹Eh re' taqe i aj Levíta neerub'an chi xa aha' neenkik'ux i keh kuch'ihil taqe i kak'uun kixq'uun ruum re' re' kitojb'aal chi riij i kamanik naa kianam chupaam i santo laj itz'ihy naah paat molb'al iib'.³²Eh wila' re' taqe aj Levíta xkiq'asaj wee hin i xti holohik ma' xta kimahk, eh ma' nee ta nkich'uwa'reej wach i kisantolaj mayiij i aj Israel. Ruum wixkich'uwa'reej wach naa ruchaliik i kimik chikinaah, tiko'q keh, inki Dios. Re' k'uhb'aal chi riij nik' wach noq naakisaqb'isam kiib' taqe i ch'uwa' kiwach

¹Re' i QaJaaw Dios je' wili i xuq'or reh i Moisés, i Aarón:²Re' hin jinaj i k'uhb'aal naa nukanaam keh i aj Israel re' wili: Chaq'or taq keh i aj Israel chi kik'am cho jino'q i kaq riij q'ahxoq wakax manlik wach i ruti'jolal. Eh ma' kojooj ta perper wach chee' rij naah reh kamanik.³Eh re' taq i hat nee taq inaq'asaj reh i Eliazar k'amal kib'eeh aj tiij. Re' reh naa resam reje i q'ahxoq wakax re' re' chi riij taqe i itz'ihy naah paat wilkeeb' wii', eh naa ruq'orom chi naa ruyok'ariik i ralaq chuwach.⁴Eh re' i Eliazar i k'amal kib'eeh aj tiij naa ruchopom cho k'isinoq i kik' ruuk' i ju' q'ab', wuquub' pech naa rukihraam i kik' chinaah i santo laj itz'ihy naah paat molb'al iib'.⁵Eh chi riij i re' naa ruk'ahtiik i q'ahxoq wakax chuwach i Eliazar k'amal kib'eeh aj tiij. Eh naa wo' ruk'atariik i rutz'uhumal riij, i rutib'kaal, i rukik'eel, je' wo' hoq i rusaa'.⁶Eh re' i k'amal kib'eeh aj tiij re' re' naa ruchopom chaloq i juntoq chi chee' chakaltee', i q'ab' i chee' hisopo, i junsahl i kaq itz'ihy naa rukutum chupaam i q'aaq' naa ruk'ahtiik wii' i q'ahxoq wakax.⁷Eh re' Eliazar i k'amal kib'eeh aj tiij naa rutz'ajam taqe ruso', naa rub'anam ritiin junpa'liik. Kora'j naa rokiik re' chupaam i itz'ihy naah paat wilkeeb' wii'. Xa re' la' konaa wo' rukahniik chi ch'uwa' wach korehtaal inokik i q'iij.⁸Eh awach naa ruk'atwiik reh i q'ahxoq wakax naa rukahniik chi ch'uwa' wach naa rutz'ajam taqe ruso', naa rub'anam ritiin jumpa'liik, eh konaa wo' rukahniik chi ch'uwa' wach korehtaal inokik i q'iij.⁹Re' i winaq ma' xta ruch'uwa'iil wach naa rumolwiik reh i ruchajil i q'ahxoq wakax, naa rojiik ruye'em chupaam i ye'aab' saq wach kochiriij taqe reje i itz'ihy naah paat wilkeeb' wii'. Re' i chaaj re' re', naa rukamaniik keh i aj Israel, reh chi naa kikojom ruuk' i haa' inkamanik chi saqb'eesb'al iib' chi riij i mahk.¹⁰Re' i winaq naa rumolwiik reh i ruchajil i q'ahxoq wakax naa rutz'ajam i ruso', eh naa rukahniik chi ch'uwa' wach korehtaal inokik i q'iij. Re' i k'uhb'aal wili naa a'nam taq i hat, i hat taq aj Israel koruman wo' chi naa kianam i tokoom tinamit wilkeeb' taq chaxilak.

¹¹Eh xa awach pa' neentz'a'inik reh i ruti'jolal jino'q i kamnaq, wuquub' q'iij naa rukahniik chi ch'uwa' wach.¹²Eh re' winaq re' re' koruman chi paroox q'iij naa rusaqb'isam riib' ruuk' i haa' re' re', chi je' re' naa rukahniik chi saq wach paruwuuq q'iij. Eh wila' ma' xusaqb'isaj riib' paroox q'iij ma' naa ta rukahniik chi saq wach paruwuuq q'iij.¹³Eh xa awach pa' neentz'a'inik reh i ruti'jolal i kamnaq, wila' ma' xusaqb'isaj riib' re' reh naa ruch'uwa'reem paam i nuSanto laj itz'ihy naah paat i hin i ruum i re' koruman chi naa rehtesjiik reje chi kixilak i aj Israel. Ruum chi ma' xkihrjik ta chinaah i ha' insaqb'isanik wachiis, naa rukahniik chi ch'uwa' wach.

¹⁴Eh re' i wili i k'uhb'aal naa nukanaam chikinaah i wilkeeb' chupaam taqe i itz'ihy naah paat, wila' awach i xkimik chupaam taqe i itz'ihy naah paat, chu'nchel i naa kiwihiik ar, eh chu'nchel i naa kokiik ar, wuquub' q'iij naa kikahniik chi ch'uwa' kiwach ruum i re'.¹⁵Eh re' taqe kulk, chu'nchel i xa chib'ih jariik inkamanik ar ma' tz'apooj ta kinaah naa wo' kikahniik chi ch'uwa' kiwach.

¹⁶Eh pantaq ye'aab' xa aha' wila' awach xtz'a'inik reh ruti'jolal i kamnaq xaxkanteesjik oon xaparub'ehel xkimik, oon xutz'a'j i koq jino'q i rub'aqil i kamnaq, oon rujuleel kamnaq. Re' reh wuquub' q'iij naa rukahniik chi ch'uwa' wach.

¹⁷Re' saq b'eesb'al wach i xuch'uwa'reej riib' naa ruchopariik cho k'isinoq i ruchajil i q'ahxoq wakax kaq riij re' ink'atarik chi riij i mahk. Re' chaaj re' re' naa ruxilaakjiik ruuk' i k'achlik haa' naa ruye'ariik chupaam jino'q i kulk.¹⁸Eh re' i winaq ma' xta ruch'uwa'iil wach nee ruchop i q'ab' chee' hisopo naa rumuhaam chupaam i haa' re' re', naa rukihraam chinaah awach i xuch'uwa'reej riib' ruuk' i rutz'a'jiik i ruti'jolal i xaxkanteesjik, oon xaparub'ehel xkimik, oon xutz'a'j jino'q i b'aaq, oon jino'q i rujuleel i kamnaq. Eh naa wo' rukihraam chinaah i itz'ihy naah paat, eh chikinaah i tinamit ar, je' wo' chikinaah i xa chib'ih jariik i kikamanik ar.¹⁹Eh re' winaq ma' xta ruch'uwa'iil wach naa wo' rukihraam i ha' re' re' paroox q'iij, paruwuuq q'iij chinaah i ch'uwa' wach. Eh paruwuuq q'iij naa rukahniik chi saq wach, eh naa rutz'ajam i ruso', naa rub'anam ritiin jun pa'lik, xa re' la' konaa wo' rukahniik chi ch'uwa' wach korehtaal inokik i q'iij.²⁰Eh awach i ma' xusaqb'isaj riib' xkahnik chi ch'uwa' wach, koruman chi naa rehtesjiik reje chi kixilak i aj Israel. Iraaj ruq'orom chi nee ruch'uwa'risaj paam i rusantolaj ye'aab' i QaJaaw Dios. Eh ruum chi ma' xkihrjik tee ha' insaqb'isanik wach chinaah naa rukahniik chi ch'uwa' wach chi jumpech.²¹Re' i nuk'uhb'aal wili naa rukahniik chi juneliik. Awach i naa rukihraniik i ha' saqb'eesb'al wachiis chinaah i tokoom koruman chi naa rutz'ajam i ruso'. Eh awach i neentz'a'inik reh i ha' saqb'eesb'al wachiis naa rukahniik chi ch'uwa' wach korehtaal inokik i q'iij.²²Eh chu'nchel i xa chib'ih jariik naa rutz'a'am i ch'uwa' wach, re' taqe re' naa wo' kikahniik chi ch'uwa' kiwach. Eh wila' re' ch'uwa' wach xutz'a'j jino'q i winaq, re' re' naa wo' rukahniik chi ch'uwa' wach, tiko'q keh, inki Dios. Re' noq xelik chee ha' pansaq rehp ab'aj

¹Chupaam i peet poh reeh i haab', re' taqe i aj Israel xi ponik chupaam i ye'aab' chiq yuuq' Zin. Eh ar xi kahnik chupaam i tinamit Cades, eh ar xkimik i María, ar wo' xkimuq'aa'.

²Eh ruum chi ma' xkireq ta kihaa' i aj Israel chupaam i ye'aab' re' re' xchalik kijosq'iil chinaah i Moisés, ruch'ihil i Aarón.³Je' wili xkiq'or i tinamit reh i Moisés:
Ma' xta naq reet chi xoj kimik ta haa' kuuk' i tinamit xukansaj i QaJaaw Dios.⁴¿Chib'ih reet noq xoj ak'am taq chaloq i hoj, hoj rutinamiit i QaJaaw Dios chupaam i chiq yuuq' wili? ¿Mi naawaaj taq re' hat chi naaqakimiik chi qunchelaal i hoj, ruch'ihil taqe i qachikoop?⁵¿Chib'ih reet noq xoj awesaj taq cho Egipto, eh ayu' taq chik xoj ak'am chaloq chupaam i ye'aab' wili ma' xta kamaj? Ayu' ma' xta i neenqatik qeh, ma' rub'an taj i higo, i uuva, i granado. Eh ni xata naq ha' i wilik chi neenquk'ej, inki taqe.

⁶Eh re' i Moisés ruch'ihil i Aarón xi elik reje chikiwach i tinamit xiooj panookb'al reh i santo laj itz'ihy naah paat molb'al iib', xkik'utzaa' qohoq kiib' korehtaal xkireq wach ak'al ruuk' i yejal kiwach. Eh re' i ruloq'il i Dios xuk'uhtaaj riib' chikiwach.⁷Re' i QaJaaw Dios, je' wili i xuq'or reh i Moisés:

⁸Re' hat cha chop i karote, eh awuch'ihil i Aarón noq neenamol kiwach i tinamit. Eh chikiwach i keh nee taq inaq'or reh i saq rehp ab'aj chi nee ruyeew chaloq i ha' nee taq inawilow chi nee nelik chaloq i ma' k'isa, ha' eh neenkian kihaa' chu'nchel i tinamit, je' wo' i kichikoop, inki.

⁹Eh re' i Moisés xuchop wo' hoq i karote wilik chuwach i QaJaaw je' rukab' i xq'orarik reh.¹⁰Re' i Moisés, i Aarón xkimol wach i tinamit chuwach i saq rehp ab'aj, re' i Moisés je' wili i xuq'or keh:
Chab'iraj taq i hat i xaq'etwachej taq i Dios: ¿Mi rik'ul re' chi re' hoj naaqesam chee ha' chupaam i saq rehp ab'aj wili reh chi nee taq inqayeew aweh chi uuk'jik?

¹¹Eh noq xukohlaaj ruq'orariik i re' i Moisés xuksaj johtoq i karote, eh ka'pech xuq'oj i koq wach i saq rehp ab'aj ruuk' i karote. Eh yohb'aal wach i ha' xelik cho chupaam, eh re' taqe i aj Israel ruch'ihil i kichikoop xkian kihaa'.¹²Re' i QaJaaw Dios je' wili i xuq'or reh i Moisés, i Aarón:
Ruum chi ma' xanimaj ta taq i xnuq'or aweh, eh ma' xayeew ta taq nuloq'il chikiwach i aj Israel. Re' hin ma' naa ta nuye'em q'ab' chi nataq akojom i koq i tinamit wili chupaam i ye'aab' nuq'orom rib'iral chi naa nuye'em keh, inki.

¹³Re' taqe wili xk'ularik chupaam i ye'aab' xelik wii' i ha' ar Meriba re' i xkichoqej wii' i QaJaaw taqe i aj Israel. Eh re' reh ruuk' taqe i xub'an ar xuk'uhtaaj chikiwach chi wilik i rusantohiil. Re' Edom ma' xuyeew ta q'ab' chi xik'ik paruye'aab' taqe i aj Israel

¹⁴Noq ko wilkeeb' ar Cades, re' i Moisés wilik taqe i raj taqareel xutaq'aaj reje ruuk' i kireey i aj Edom, je' wili i xkiq'or ponoq reh: Re' hoj i hoj aj Israel quuk' qiib' taq awuuk' i hat xoj taq'ab'jik chaloq chuq'orariik aweh, re' hat aweht'al wo' hoq chib'ih i ti' k'axik xoj ik'ik wii'.¹⁵Re' taqe i qamaam qati't najtir xiooj chi patinik ar Egipto najt xi k'acharik ar, eh xi ik'tesjik chi ti' k'axik kuum i aj Egipto, eh je' wo' chik re' i xkian qeh hoj.¹⁶Ruum i re' xqapahqaaj otob'il reh QaJaaw Dios chi naakooj resam cho ar, xub'iraj wo' hoq i xqapahqaaj reh ruuk' oq'ik, xutaq'aaj chaloq jinaj i ánjel xoj resaj wo' cho ar Egipto yu'naak ar chik wilkooj chupaam i tinamit Cades, pank'ula't cho ruuk' aaye'aab'.¹⁷Ruum aj re' xoj chalik chupahqaljiik aweh otob'il reh chi nee nayeew q'ab' qeh chi nee qoh ik'ik paruyuq'ul aatinamiit. Re' hoj ma' nee ta qoh ik'ik chupaam i ye'aab' wilkeeb' wii' i tik mu'uun re' i tikooj wii' taqe i uuva. Eh ma' nee ta wo' i nquk'eej qeh i ha' wilkeeb' chupaam taqe ajul haa'. Eh re' i korik b'eeh neenqak'am ma' nee tan qajal i qab'eeh korehtaal inqaq'at wach i ruyuq'ul aatinamiit, inki taqe.

¹⁸Eh re' i kireey i aj Edom je' wili i xuq'or:
Re' hin ma' nee ta nuyeew q'ab' chi nee taq ti ik'ik paruyuq'ul i nutinamiit. Eh wila' xamin taq chawiib' chi ik'ik, netaq tiooj nuq'at wuch'ihil taqe i nu soldado, inki.

¹⁹Eh re' taqe aj taqareel je' wili i xkiq'or reh:
Chakuy chayeew ti q'ab' qeh re' hoj re' korik b'eeh neenqak'am, eh wila' re' hoj, oon wila' re' taqe i qachikoop xkuk'ej keh i ha' wilkeeb' chupaam taqe ajul haa' nee wo' inqatoj aweh, re' inqaaj re' chi nee nayeew q'ab' qeh chi nee qoh ik'ik chi qooq, inki taqe.

²⁰Eh re' i kireey i aj Edom je' wili i xuq'or: Re' hin.
Xnuq'or taq chik aweh chi ma' nee ta taq ti ik'ik, inki.
Eh xuk'am taqe reje i ru soldado wilik kikanteesb'aal kuuk' xooj chi kiq'atariik i aj Israel.²¹Eh re' Edom ma' xuyeew ta q'ab' chi xik'ik chupaam i ruyuq'ul i rutinamiit. Eh kilow chi je' re' i aj Israel tokoom chik i b'eeh xkik'am reje. Re' noq xkimik i Aarón

²²Eh chu'nchel i tinamit xi elik pan tinamit Cades ar xiooj reje chi korkiil i yuuq' Hor.²³Eh ar pank'ula't reje reh i ruyuq'ul i rutinamiit i Edom, je' wili i xuq'or i QaJaaw Dios reh i Moisés, i Aarón:²⁴Re' i Aarón naa rukimiik ma' naa ta nuye'em q'ab' chi naa rukojom i koq taqe i aj Israel wili chupaam i ye'aab' nuq'orom rib'iral chi naa nuye'em keh ruum akab'cheel taq ma' xanimaj ta taq i nuk'uhb'aal aha' xelik cho wii' i ha' ar Meriba.²⁵Re' hat Moisés chak'am johtoq i Aarón ruch'ihil i rak'uun Eleazar chinaah i yuuq' Hor.²⁶Eh ar neenawesaj i ruso' chi riij re' xukoj noq xkahnik chi k'amal kib'eeh aj tiij, chi riij chik i Eleazar i rak'uun nee nakoj. Re' Aarón ar naa rukimiik chaloq.

²⁷Eh re' i Moisés xub'an wo' hoq nik' wach i xq'orarik reh ruum i QaJaaw Dios. Eh chikiwach i ruk'ihaal tinamit xijohtik johtoq chinaah i yuuq' Hor.²⁸Eh re' Moisés ar xresaj chi riij i ruso' i Aarón re' xukoj noq xkahnik chi k'amal kib'eeh aj tiij, eh chi riij chik i Eleazar xukoj re' i rak'uun i Aarón. Eh chinaah i yuuq' Hor xkimik i Aarón. Re' i Moisés ruch'ihil i Eleazar xiqajik cho ar.²⁹Eh noq xkib'iraj i aj Israel chi xkimik i Aarón i k'amal kib'eeh aj tiij, ma' k'isiin ta xtib'ik kik'ux, lajeeb' ru ka'winaq q'iij xkoq'ej. Re' taqe i aj Israel xkisach wach i tinamit ki-ik'ik wii'

¹Re' i kireey i aj Canaán i wilik chupaam i tinamit Arad wilik Neguev noq xrib'iraj chi ik'ik inki a'n chupaam i b'eeh Atarim taqe i aj Israel. Re' reey re' re' ruch'ihil taqe i aj Canaán Arad xiooj chi kipeletojiik taqe i aj Israel, eh wilik taqe i xkik'am prexo.²Eh re' taqe i aj Israel, je' wili i xkiq'or reh i QaJaaw Dios: Wila' re' hat xoj atoob'eej chi neenqachop naah i tinamit re' re', re' hoj inqaq'or aweh chi neenqasach wach kitinamiit, inki taqe.³Re' i QaJaaw Dios xuyeew wo' keh i aj Israel i xkipahqaaj, xutoob'eej wo' taqe reh chi xkisach wach taqe i aj Canaán, je' wo' kitinamiit. Je' re' noq re' ye'aab' re' re' Horma i rub'ihnaal xkikoj. Re' aaq' q'an ch'ihch' korjinaq wii'

⁴Re' taqe i aj Israel xi elik reje chinaah i yuuq' Hor ar xkik'am reje chi korkiil i kaq palaw, konajt xponik kikotej reh chi ma' xi-ik'ik ta chupaam i ruyuq'ul i Edom. Eh re' taqe i aj Israel chalik ruyojiik kik'ux wach b'eeh.⁵Eh ma' holohik taj xiq'orik chi riij i Dios, je' wili i xkiq'or reh i Moisés:
¿Chib'ih reet noq xoj awesaj chaloq Egipto? ¿Mi xoj ak'am cho chupaam i chiq yuuq' wili reh chi ayu' naaqakimiik? Ayu' ma' xta qawa', qahaa', xoj q'uhtik chik reh i k'uxumb'al wili ruum xama' qoh runujisaj ta wo' hoq, inki taqe.

⁶Eh re' i QaJaaw Dios xutaq'aaj chaloq i ma' k'isa aaq' chi kixilak i aj Israel xi k'uxarik ruum, eh ma' k'isiin i xikimik.⁷Eh re' taqe i aj Israel xiooj ruuk' i Moisés je' wili i xkiq'or reh:
Re' hoj xoj mahkunik ruum ma' holohik ta xoj q'orik chi riij i Dios, je' wo' chawiij i hat. Chakuy cha pahqaaj ree Dios chi neeresaj chi qaxilak i ma' k'isa aaq', inki taqe.
Eh re' i Moisés xupahqaaj wo' reh i QaJaaw Dios chi chukuy kimahk i aj Israel.⁸Eh re' i QaJaaw Dios je' wili i xuq'or reh i Moisés:
Re' hat cha yejaa' jino'q i aaq' re' ruuk' i q'an ch'ihch', eh nee nayeew chi ju' jino'q i chee'. Eh noq neenti'arik jino'q i xa awach ruum i aaq' nee rutz'ehtaaj johtoq i aaq' wilik ju' chee' reh chi ma' neetankimik, inki.

⁹Re' i Moisés xuyejaa' wo' hoq jinaj i aaq' re' ruuk' i q'an ch'ihch'. Xuyeew wo' chi ju' i chee'. Eh noq inti'arik jino'q i xa awach rutz'ehtaaj johtoq i aaq' wilik ju' chee', eh ma' inkimik ta wo' hoq.

¹⁰Eh re' taqe i aj Israel xiooj chikiwach ruuk' i kib'eeh ar chik xooj kiyejaa' ki-itz'ihy naah paat chupaam i ye'aab' Obot.¹¹Noq xi elik chaloq ar, xooj kiyejaa' i ki-itz'ihy naah paat chupaam i ye'aab' Ije-abarim, chupaam i chiq yuuq' wilik reje parelb'aal q'iij reh i ruyuq'ul i tinamit Moab.¹²Eh noq xi elik chaloq ar wach k'ixkaab' Zered chik xponik kiyejaa' i ki-itz'ihy naah paat.¹³Eh noq xi elik chaloq ar, xooj kiyejaa' i ki-itz'ihy naah paat chi juntar i nim ha' Arnón, i nelik chaloq chupaam i ye'aab' chiq yuuq', eh rupuhkaaj reje riib' chupaam i kiye'aab' i aj amorreo. Eh re' i nim ha' Arnón re' re' inkamanik chi q'atb'al paam i kiye'aab' i aj Moab ruuk' i kiye'aab' i aj amorreo.¹⁴Re' q'aq'inik wili xub'an i Dios tz'ihb'amaj rehtalil panhuuj, re' i ruq'or chi je' wili:
Re' QaJaaw Dios xuk'uhtaaj i rajaawriik noq xojrik'saj cho chupaam i kaq palaw, eh noq xoj ik'ik cho chi chii' taqe i rooq i nim ha' Arnón.¹⁵Eh xoj ik'ik wo' chi chii' i raasb'al ha' i rupuhkaaj reje riib' paruyuq'ul i Ar, imponik kopan k'ula't reh i ruyuq'ul i Moab, inki.

¹⁶Eh noq xi elik reje ar xooj kiyejaa' i ki-itz'ihy naah paat chi chii' i jul ha' Beer. Eh ar re' i QaJaaw Dios, je' wili i xuq'or reh i Moisés: Chamol kiwach i aj Israel, re' hin naa nuye'em kihaa', inki.¹⁷Chupaam i q'iij re' re' xkian kitz'uuy i aj Israel je' wili i xkiq'or:
Hat jul ha' chayeew cho qahaa' re' hoj neenqayeew aloq'il ruuk' qatz'uuy.¹⁸Re' i jul ha' re' re', re' taqe i k'amal b'eeh re' taqe i wilik kajaawriik xik'otwik reh ruuk' i kikarote, inki taqe chi tz'uuy. Eh noq xi elik chupaam i chiq yuuq' re' re' i aj Israel ko ar chik xooj kiyejaa' i ki-itz'ihy naah paat chupaam i ye'aab' Matana.¹⁹Eh noq xi elik reje ar ko Nahaliel chik xooj kiyejaa' i ki-itz'ihy naah paat, noq xi elik reje ar ko Bamot chik xooj kiyejaa' i ki-itz'ihy naah paat.²⁰Eh noq xi elik reje ar i aj Israel, ar chik xooj kiyejaa' i ki-itz'ihy naah paat wach k'ixkaab' wilik paruyuq'ul i Moab. Eh ki-ik'ik chinaah i yuuq' Pisga, re' ink'utinik reje wii' i ye'aab' chiq yuuq'. Re' taqe i aj Israel xkiq'at wach i rajaawriik i reey Sehón (Deut 2.26-37)

²¹Re' taqe i aj Israel wilik taqe i taqareel xkitaq'aaj reje ruuk' i Sehón kireey i aj amorreo, je' wili xkiq'or reh:²²Re' hoj xchalik qapahqaaj otob'il aweh re' chi nee ta ti nayeew q'ab' qeh chi nee qoh ik'ik chupaam i aye'aab', re' hoj ma' nee ta qoh ik'ik wilkeeb' wii' atik, taqe tikooj wii' i uuva, eh ma' nee ta wo' quk'ej qeh i ahaa' chupaam taqe ajul haa'. Chi korik b'eeh neenqak'am noq neenqaq'at wach aaye'aab', inki taqe.

²³Eh re' i reey Sehón ma' xuyeew ta q'ab' chi xi-ik'ik chupaam i ruye'aab'. Xumol kiwach i rutinamiit xiooj chi kik'ulariik taqe i aj Israel chupaam i ye'aab' chiq yuuq'. Eh noq xi ponik i aj Israel chupaam i ye'aab' Jahaza xtohq'ik kipletoheem.²⁴Xa re' la' re' taqe i aj Israel xkiko'leej kiib' chi korik xb'aan reh i reey ruch'ihil taqe i rutinamiit. Eh xkichop naah i ruye'aab' ar xutoqaa' reje Arnón kox ponik chi chii' i nim ha' Joboc, koxponik pank'ula't reh i ruyuq'ul i kitinamiit i aj Amón, re' i kotimaj riij chi tz'aq.²⁵Je' re' noq re' taqe i aj Israel xkichop naah chu'nchel i kitinamiit i aj amorreo. Eh re' taqe i wilkeeb' chupaam i tinamit Hesbón xi kahnik wo' chi patinik ar.²⁶Re' Hesbón re' i rutinamiit i Sehón, re' i kireey i aj amorreo. Re' Sehón rub'anam chaloq i q'aq'inik ruuk' i peet kireey i aj Moab ruq'uchum cho reh i ye'aab' re' re' komponik chi chii' i Arnón.²⁷Ruum aj re' inkiq'or pan kitz'uuy i aj tz'uuy chi je' wili:
Kim taq Hesbón cha yejaa' wo' taq chik i tinamit re' re' ruum re' i rutinamiit i reey Sehón.²⁸Xqop jinaj i q'aaq' Hesbón, re' rutinamiit i reey Sehón xkuxik ruk'atam i ye'aab' Ar rub'ihnaal wilik paruyuq'ul i Moab. Eh xkuxik wo' rusacham wach i wilkeeb' chinaah taqe i yuuq' koxponik chi chii' i nim ha' Arnón.²⁹Q'e' ti' i xak'ul i hat tinamit Moab, xsacharik awach i hat naq rutinamiit i tiyoox Quemos i rub'ihnaal. Re' atiyoox re' re' xuyeew q'ab' chi re' taqe i b'ahiilb'ees xkimol chi elik, eh chi re' taqe i ehk'eenb'ees xkahnik pan q'ab' i reey Sehón.³⁰Xsacharik wach i rajaawriik i tinamit Hesbón, je' wo' hoq i Dibón, je' wo' hoq i Nofa, chu'nchel i re' xsahchik kiwach. Re' sachooj xub'an i q'aaq' xponik ko ar Medeba, inki taqe panki tz'uuy. Re' taqe i aj Israel xkiq'at wach i rajaawriik i Og kireey i aj Basán (Deut 3.1-11)

³¹Je' re' noq re' taqe i aj Israel xkichop naah i kitinamiit i aj amorreo.³²Eh re' Moisés wilik taqe i winaq xutaq'aaj reje chi rilariik nik' wach noq wilik i tinamit Jezer. Eh re' taqe i aj Israel xkichop naah i tinamit Jezer, je' wo' taqe i kok' ye'aab' wilik chi junsuut, xkikaaj wo' reje taqe i aj amorreo wilkeeb' ar.³³Chi riij i re', re' taqe i aj Israel xkichop reje i b'eeh inooj ar Basán. Eh re' Og kireey i aj Basán ruch'ihil taqe i ru soldado xiooj chi kipletohjiik i aj Israel chupaam i ye'aab' Edrei.³⁴Eh re' i QaJaaw Dios je' wili i xuq'or reh i Moisés: Re' hat mat yo'jik ruum i reey, re' hin naa nuq'asam panaq'ab' i reh je' wo' chu'nchel i rutinamiit, je' wo' hoq i rak'aal. Naa a'nam ruuk' je' rukab' i xa a'n ruuk' i Sehón kireey i aj amorreo re' taqe i patim chupaam i tinamit Hesbón, inki.

³⁵Je' aj re' noq re' taqe i aj Israel xkikansaj i Og, je' wo' taqe i rak'uun, xk'uxik wo' kikansam i ru soldado chi k'achalkeeb'. Eh re' chik i keh xichopwik naah i ruye'aab'. Re' reey Balac xutaq'aaj ruk'amariik i Balaam

¹Re' taqe i aj Israel xiooj wo' chik chikiwach ar chik xooj kiyejaa' ki-itz'ihy naah paat wach k'ixkaab' Moab, chucheel i nim ha' Jordán chuwach reje i tinamit Jericó.

²Eh noq xrilow i Balac rak'uun i Zipor i kireey i aj Moab chi re' taqe i aj Israel xkian reh taqe i aj amorreo xchalik ruyo'jiik.³Eh ma' k'isiin wo' xchalik kiyo'jiik taqe i aj Moab ruum yohb'aal wach kik'ihaal i aj Israel.⁴Re' taqe i aj Moab, je' wili xkiq'or keh taqe i mama' winaq re' taqe i k'amal b'eeh chi kixilak i aj Madián:
Re' taqe i tinamit Israel wilik naa kianam qeh, naa kisacham wach i qatinamiit, je' rukab' noq i rusach wach i k'im jino'q i b'ooyax, inki taqe.⁵Eh re' reey Balac rak'uun i Zipor xutaq'aaj ruk'amariik i Balaam rak'uun i Beor, ar wilik chupaam i ye'aab' Pator wilik chi chii' i nim ha' Éufrates wilik chupaam i kiye'aab'. Re' Balac je' wili xuq'or reje keh i raj taqareel: Re' taq i hat je' taq wili i neenaq'or reh i Balaam: Ruk'ihaal tinamit xi elik chaloq Egipto xkinujisaj chik paam i nutinamiit ayu' chik taqe patim chi nuwach.⁶Chaloq wuuk' ayu' reh chi nee rupahqaaj i ma' holohik ta chikinaah i tinamit wili, q'e' kow kiib' chi qawach i hoj, nee oon naq inche nub'an keh, eh nee oon naq inche i nub'an reje kehteesjiik panutinamiit. Ruum re' hin weht'al chi re' reh noq i rupahqaaj i holohik inye'arik reh, eh noq i rupahqaaj i ma' holohik taj inye'arik reh, tiko'q taq ponoq reh, inki.

⁷Eh re' taqe k'amal kib'eeh i aj Moab kuch'ihil taqe i k'amal kib'eeh i aj Madián xiooj wo' hoq chi q'orob'jiik i Balaam, eh xkik'am reje i tumiin tojb'al reh i naa ruchaliik rub'anam, xkiq'or wo' reh i Balaam i xuq'or reje i reey Balac.⁸Eh je' wili i xq'orarik keh ruum i Balaam:
Re' taq i hat tikaan pee taq jino'q aq'ab' ayu', ko'qal taq inab'iraj weh ab'eeh chib'ih pa' i nee ruq'or weh i QaJaaw Dios, inki.
Eh re' taqe i aj taqareel xi kahnik wo' cho ruuk' i Balaam.⁹Chupaam aq'ab' re' re' xk'ulik q'orob'joq i Balaam ruum i Dios xpahqaljik reh chi je' wili:
¿Awach taqe i winaq wilkeeb' awuuk'? inki.

¹⁰Re' i Balaam je' wili ruchaq'weesjiik i Dios xub'an:
Re' Balac rak'uun i Zipor kireey i aj Moab xtaaq'anik cho keh wuuk' je' wili xutaq'aaj cho ruq'orariik:¹¹Re' taqe i aj Israel xi elik cho Egipto xkinujisaj chik paam i nutinamiit. Ruum aj re' inwaaj chi nee ti chalik wuuk', k'oloq apahqaaj i ma' holohik taj chikinaah, chi je' re' nee oon naq i nub'an keh, eh nee oon naq inwesaj taqe reje panutinamiit, inki chaloq.

¹²Re' i QaJaaw Dios je' wili i xuq'or reh i Balaam:
Ma' nee ta tiooj, eh ma' nee ta wo' rub'an chi nee naapahq'aaj i ma' holohik taj chikinaah i aj Israel ruum re' hin nuk'uxisam taqe, inki.

¹³Re' Balaam noq xwuktik chi junwaar, je' wili i xuq'or keh i aj taqareel:
Re' taq i hat ti sutinoq taq reje panatinamiit re' hin xuq'or weh i QaJaaw Dios chi ma' ruyee ta riib' chi nee taq kinooj chawiij, inki.

¹⁴Re' taqe i aj taqareel re' re' xi sutinik wo' chik cho ruuk' i Balac je' wili xkiq'or reh:
Re' Balaam ma' xraaj ta chalik chiqiij, inki taqe.

¹⁵Eh re' i Balac wilik wo' chik taqe i k'amal b'eeh xutaq'aaj taqe reje q'e' chik nimaq kiwach chuwach i xutaq'aaj taqe reje pampeet.¹⁶Re' taqe i k'amal b'eeh re' re' xiooj wo' chik chi q'orob'jiik i Balaam, je' wili i xkiq'or reh:
Re' i Balac je' wili i xuq'or cho chawiij: Mansahchik ti paruk'ux chi neenchalik wuuk', inki¹⁷Re' hin neenuyeew runimaal wach, eh neenub'an chu'nchel i nee ruq'or weh. Re' hin inwaaj chi neen k'ulik ru pahq'aaj i ma' holohik taj chinaah taqe i aj Israel wili, inki chaloq, inki taqe.

¹⁸Re' Balaam je' wili i xuq'or keh aj taqareel:
Re' Balac atoob' ta naq nee ruyeew weh chu'nchel i oro i plata nujinaq chupaam i rupaat i rub'an wii' taaq'anik ma' jaruuj neenuq'at wach i xuq'or weh i nuDios, ni xata naq neenub'an jino'q i nim wach na'ojb'al, oon k'isiin wach na'ojb'al.¹⁹Xa re' la' tikaan wo' pee taq jino'q aq'ab' ayu' i iqal taq neenuq'or aweh chib'ih pa' jariik i nee ruq'or weh i QaJaaw Dios, inki.

²⁰Re' Balaam xk'ulik ula'joq ruum i Dios chaq'ab' je' wili i xq'orarik reh:
Wila' re' wo' chik i hat xat chalik kiyuq'eej taqe i winaq wilkeeb' awuuk' neerub'an chi nee tiooj chikiij, xa re' la' neena a'n i neenuq'or aweh i hin, inki. Re' Balaam xq'atarik parub'eeh ruum i ruánjel i QaJaaw Dios

²¹Re' i Balaam xwuktik chi junwaar xukoj rij i rub'uuruux xjohtik chaloq chi riij xchalik chikiij taqe i k'amal kib'eeh i aj Moab.

²²Re' Balaam chalik chi riij ixoq b'uurux ruch'ihil taqe i kiib' chi rumoso. Eh re' i QaJaaw Dios xchalik ruk'ah chinaah i Balaam ruum xchalik wo' chikiij. Ruum i re' xuyeew riib' i ánjel parub'eeh reh chi ma' xik'ik taj.²³Eh re' ixoq b'uurux iqlik wii' i Balaam xrilow chi re' i ruánjel i QaJaaw rutz'apam paam i b'eeh, wilik ruq'aslaj ch'ihch' pan q'ab', re' b'uurux xelik reje pamb'eeh tokoom chik xuk'am reje. Eh noq xrilow chi je' re' i Balaam xtohq'ik ruq'ojom ixoq b'uurux reh chi xuk'am wo' naq chik i korik b'eeh.²⁴Eh chi riij i re', re' i ánjel xchalik rupab'aa' riib' panlahtz' aha' i k'ultar tikooj wii' uuva, k'ultar wo' wilik i tz'aq ab'aj chi chii' i b'eeh.²⁵Eh noq re' ixoq b'uurux xrilow chi wilik wo' chik pamb'eeh i ruánjel i QaJaaw xuyok'aa' i koq riib' wach tz'aq ar xuch'ey i koq i rutuuq i Balaam. Eh re' i Balaam xuq'oj wo' chik ixoq b'uurux.²⁶Eh re' i ruánjel i QaJaaw xchalik wo' chik chi peet b'eeh xupab'aa' riib' aha' i k'isiin wii' wach i b'eeh aha' i ma' xub'an ta chik chi xukotej riij ni xata parusak'aaj ni xata parutz'eet.²⁷Eh noq re' ixoq b'uurux xrilow wach i ruánjel i QaJaaw Dios xupach'aa' riib' wach ak'al. Eh noq xrilow chi je' re' i Balaam xkaqrik xuq'ojib'eej ruuk' q'ab' chee' ixoq b'uurux.²⁸Eh chupaam i jumehq' re' re', re' i QaJaaw Dios xuyeew q'ab' reh ixoq b'uurux chi xq'orik. Eh re' b'uurux, je' wili i xuq'or reh i Balaam:
¿Chib'ih jariik i ti' xnub'an aweh? ruuk' i wili oxpech chik axinaq'oj, inki.

²⁹Re' Balaam je' wili i ruch'aq' wesjiik ixoq b'uurux xub'an: Re' hat xa nujot'ariik i na a'n wilik ta jino'q i nuq'as laj kuchilo wuuk' yu'naak naq neetinukansaj, inki reh.

³⁰Eh re' ixoq b'uurux je' wili ruchaq'weesjiik i Balaam xub'an:
Jank'al kinokik awuuk' xa chi wiij wo' tib'ehik, eh re' hin ma' jank'al ta nub'an aweh i k'ahchi' nub'anam aweh yu'naak, inki. Eh re' Balaam je' wili chaq'wik xub'an:
Korik chi ma' jank'al ta na a'n weh chi je' wili, inki.

³¹Eh re' i QaJaaw Dios xuyeew q'ab' reh i Balaam chi xrilow wach i ánjel chi ruq'atam paam i b'eeh, ruyohq'eem jinaj i ruq'as laj ch'ihch'. Eh noq xrilow chi je' re' i Balaam xuk'utzaa' qohoq riib' korehtaal xureq wach ak'al ruuk' i yejal wach.³²Xa re' la' xpahqaljik reh ruum i ánjel chi je' wili:
¿Chib'ih reet noq oxpech xaq'oj aa ixoq b'uurux? Chanab'eej noq re' hin xin chalik chi rutz'apariik ab'eeh ruum ma' holohik taj inooj a'an.³³Re' ixoq b'uurux oxpech xrilow nuwach noq wilkiin pamb'eeh, eh oxpech xujal rub'eeh, eh wita ma' xujal rub'eeh xat nukansaj naq chik i hat, eh re' reh ma' xnukansaj ta naq.

³⁴Eh re' Balaam je' wili ruchaq'weesjiik i ruánjel i QaJaaw xub'an:
Re' hin korik chi ximahkunik ruum ma' weht'al ta naq chi re' hat titz'apwik paam i nub'eeh. Wila' ma' ruk'ul ak'ux chi naawojiik nee wo' chik kin sutinik reje, inki.

³⁵Eh re' i ruánjel i QaJaaw Dios je' wili i xuq'or:
Neerub'an chi nee taq tiooj chikiij taqe i winaq re' re', xa re' la' xa re' wo' neena a'n i neenuq'or aweh i hin, inki.
Eh re' Balaam xchalik wo' chikiij taqe i aj taqareel re' re'.

³⁶Eh noq xunab'eej i reey Balac chi xk'ulik chik iloq i Balaam xooj chi k'ulariik chupaam i tinamit wilik paruyuq'ul i Moab wilik ma' najt ta chi chii' i nim ha' Arnón, wilik reje pank'ula't reh i ye'aab'.³⁷Je' wili i xuq'or i reey Balac reh i Balaam:
Re' hin ka'pech xnutaq'aaj ak'amariik. ¿Chib'ih reet noq ma' nawaaj ta naq chalik? ¿Mi xakapaaj re' hat chi ma' nee ta nub'an ruye'ariik runimaal awach? inki.

³⁸Eh re' i Balaam je' wili ruchaq'weesjiik xub'an:
Yu'naak ayu' chik wilkiin awuuk' xin chalik cha wilariik, xa re' la' ma' xta wajaawriik chi nee tinuq'o'reej chi wib'il wiib'. Re' hin xa re' wo' neenuq'or aweh i nee ruq'or weh i Dios, inki.

³⁹Chi riij i re', re' i Balaam xooj chi riij i reey Balac ar Quiriat-huzot.⁴⁰Re' Balac ar xutaq'aaj kikanteesjiik taqe ixoq wakax, taqe i tentzun, reh chi xkik'am reje reh i Balaam chi naa ruk'uxum i reh, eh je' wo' taqe k'amal kib'eeh i aj Moab.

⁴¹Eh chi junwaar chik re' Balac xuk'am reje i Balaam xujosaj chinaah i yuuq' Bamot-baal, ar xrilow chaloq aha' kiyejaam ki-itz'ihy naah paat chu'nchel i aj Israel.

¹Eh re' i Balaam je' wili i xuq'or reh i Balac:
Re' hat ayu' naa ayejaam weh i wuquub' chi artaal, eh nee nak'am cho weh i wuquub' chi imas wakax, eh wuquub' chi imas tentzun, inki.

²Eh re' Balac xub'an wo' hoq i xq'orarik reh ruum i Balaam. Eh pankib'al xkik'at i ju'jun chi imas wakax i ju'jun chi imas tentzun chinaah i ju'jun chi artaal.

³Eh re' i Balaam je' wili i xuq'or reh i reey Balac:
Re' hat tikaan pee kahnoq ruuk' i mayiij, re' hin naa wojiik chi rilariik, xk'ulik-oq chi wula'jiik i QaJaaw Dios. Eh xa chib'ih pa' jariik i nee ruyeew weh chi naab'jik neenuq'or aweh, inki.
Eh xooj chinaah jinaj i yuuq' ma' xta ch'ahn chuwach.⁴Eh re' i QaJaaw Dios ar xk'ulik rula'eej i Balaam, re' i Balaam je' wili xuq'or:
Re' hin wuquub' i artaal xnuyeew chi korb'eesjik. Eh chikinaah i ju'jun i artaal ju'jun imas wakax, eh ju'jun imas tentzun xnuk'at chi mayiij, inki.

⁵Re' i QaJaaw Dios xuq'or reh i Balaam i naa ruq'orom, je' wili xuq'or:
Hiy wo' chik aha' wilik chaloq i Balac eh cha q'or reh i xnuq'or aweh, inki.

⁶Eh re' Balaam sutinik wo' reje eh xponik rureq i reey Balac chi pa'lik i koq ruuk' i mayiij k'ahchi' ruk'ahtiik ruch'ihil taqe ar i k'amal kib'eeh i aj Moab.⁷Re' Balaam je' wili i xuq'or parutz'uuy.
Re' i Balac kireey i aj Moab ko ar Aram xutaq'aaj nuk'amariik xinik'ik cho chinaah taqe i yuuq' wilkeeb' chi korkiil reje i reelb'aal q'iij, je' wili i xuq'or: Kim k'oloq apahqaaj i ma' holohik taj chikinaah i aj Israel, re' taqe i riih rumaam i Jacob, inki weh.⁸Eh ¿Nik' wach nupahqaam i hin i ma' holohik taj chikinaah taqe i rukuxisam i Dios? ¿Nik' wach nuq'eb'em i hin i ma' xiq'eb'arik ta ruum i Dios?⁹Ruum re' hin kochinaah i yuuq' wilik wii' taqe nimaq ab'aj inwilow reje. Eh kochinaah taqe inajt kinaah yuuq' wili inwilow reje i tinamit Israel chi sik'ooj kiwach, ma' je' ta kikab' i tokoom i tinamit.¹⁰Re' taqe i riih rumaam i Jacob ma' awach ta neenkuywik kajaljiik, je' kik'ihaal saniib'. Re' hin q'e' naq inwaaj chi nee kinkimik chi je' rukab' noq kikimik taqe i korik wach kik'ux, inki Balaam.

¹¹Eh re' i reey Balac, je' wili i xuq'or reh i Balaam:
¿Chib'ih jariik i k'ahchi' kaat? Re' hin xat nuk'am chaa yu' reh chi naa apahqaam i ma' holohik taj chikinaah i aj Israel, ki-ixowanik nuwach. Eh re' hat holohik chik inchel i k'ahchi' apahqaam chikinaah, inki.

¹²Re' i Balaam je' wili ruchaq'weesjiik xub'an:
Re' hin xnuq'or aweh chi xa re' wo' naa nuq'orom aweh i naa ruq'orom weh i QaJaaw Dios, inki.

¹³Eh re' reey Balac je' wo' chik wili i xuq'or reh i Balaam:
Re' hat taq chi wiij pan jino'q chik tokoom ye'aab' aha' xa re' i chi junsuut i ki-itz'ihy naah paat i aj Israel ink'utinik. Ma' nee ta nawil kiwach chi korik, ar neenapahqaaj i ma' holohik taj chikinaah, inki.

¹⁴Eh re' i Balac xuk'am wo' reje i Balaam chupaam i ye'aab' Zofim wilik chinaah i yuuq' Pisga, eh ar xuyejaa' i wuquub' chi artaal, chinaah i ju'jun chi artaal re' re' xuk'at i ju'jun chi kok' imas wakax, eh ju'jun imas tentzun.¹⁵Eh noq wilkeeb' ar, re' Balaam je' wili i xuq'or reh i reey Balac:
Re' hat tikaan pee kahnoq ruuk' i mayiij, eh re' hin naa rojiik nuqoreem i QaJaaw Dios, inki.

¹⁶Eh re' i QaJaaw Dios xk'ulik wo' chik chi q'orob'jiik i Balaam xuq'or wo' reh i naa ruq'orom. Eh je' wili i xuq'or reh:
Re' hat ti sutinoq wo' chik reje aha' wilik wii' i Balac, re' wo' chik neenaq'or reh i xnuq'or aweh pampeet, inkih.

¹⁷Re' Balaam xsutinik wo' reje ruuk' i reey Balac xponik rureq chi pa'lik i koq ruuk' i mayiij k'ahchi' ruk'ahtiik, eh ruch'ihil taqe i k'amal kib'eeh i aj Moab. Eh re' i Balac xupahqaaj reh i Balaam chi je' wili:
¿Chib'ih xuq'or i QaJaaw? inki.

¹⁸Eh re' i Balaam je' wo' chik wili i xuq'or parutz'uuy:
Re' hat reey Balac rak'uun i Zipor chab'iraj chi korik i naa nuq'orom aweh.¹⁹Re' i QaJaaw Dios ma' re' taj jino'q winaq chi neenchukwik q'orik, eh chi neerujal wach i rukapeb'aal. Aha' wilik i ruq'or inooj eloq wach. Eh noq i ruq'or chi wilik i naa rub'anam i rub'an wo' hoq.²⁰Re' hin xuq'or weh i Dios chi naa nukuxisam i tinamit Israel. Eh re' hin ma' nee ta rub'an chi nee nujal wach i xuq'or weh.²¹Eh ma' xtaj i jot'ooj k'ahchi' keeb' i aj Israel re' taqe i riih rumaam i Jacob. Re' i kaJaaw ki Dios wilik kuuk' chi juneliik, eh inkiloq'ej chi kireey.²²Re' wo' hoq i ki Dios x-esanik cho keh pan tinamit Egipto. Eh xuyeew kikowiil, je' kowiil imas wakax wilik pan raxchee'.²³Eh ma' awach taj i ma' holohik ta nee nq'orik chikiij, ma' jino'q i aj q'iij ma' holohik ta nee nq'orik chikiij i aj Israel. Je' la' wili i ruk'ul chi neen q'orariik chikiij: Chakoj taq rehtaal chi re' Dios ma' k'isiin ta xukuxisaj i tinamit Israel, inko'q taqe.²⁴Re' taqe i aj Israel yohb'aal wach i kijosq'iil, eh ma' naa ta kihi'lik korehtaal inkisach wach i nixowanik kiwach. Eh je' rukab' i rub'an i kaq b'ahlam noq i ruchop i rutiib' korehtaal i rutz'ap wach, eh i ruk'ej haa' i kik', inki.

²⁵Eh re' i reey Balac je' wili xuq'or reh i Balaam:
Ruum chi ma' xuyeew ta riib' chi xapahqaaj i ma' holohik taj chikinaah i aj Israel, maa pahqaaj wo' i holohik chikinaah, inki.

²⁶Re' Balaam je' wili ruchaq'weesjiik xub'an:
Re' hin nuq'orom aweh chi xa re' wo' naa nub'anam i naa ruq'orom weh i QaJaaw Dios, inki.

²⁷Eh re' reey Balac je' wili ruchaq'weesjiik xub'an:
Re' hin i nuq'or aweh chi nee tiooj chi wiij pan jino'q chik ye'aab', ma' nee ta oon naq inchenyoj ruk'ux i Dios chi ar nee napahqaaj i ma' holohik taj chikinaah i aj Israel, inki.

²⁸Je' re' noq re' i Balac xuk'am reje i Balaam kochinaah i yuuq' Peor, re' ink'utinik cho wii' chu'nchel i chiq yuuq'.²⁹Eh ar re' i Balaam, je' wili i xuq'or reh i Balac:
Yu'naak i hat cha yejaa' weh ayu' wuquub'-oq i artaal, eh nee nak'am chaloq i wuquub' chi kok' imas wakax, eh wuquub' imas tentzun, inki.

³⁰Re' reey Balac xub'an wo' hoq i xq'orarik reh ruum i Balaam. Eh chinaah i ju'jun chi artaal xuk'at chi mayiij i ju'jun imas wakax, eh ju'jun imas tentzun.

¹Re' Balaam reht'al chi re' i QaJaaw Dios iraaj chi naa rukuxisam taqe i aj Israel, ma' xoj ta chik ruk'ul ruuk' i Dios chib'ih i naa ruq'orom, je' rukab' i xub'an pampeet, paruka'peech. Xusutej la' riib', xtz'ehtanik reje chupaam i ye'aab' chiq yuuq'.²Eh xrilow reje wach i ki-itz'ihy naah paat i aj Israel, chi ch'uhqaal wilkeeb'. Re' i Ruxlab'al i Dios xchalik chinaah i Balaam.³Je' re' noq xuq'or taqe q'orik wili parutz'uuy:
Re' hin i Balaam, hin rak'uun i Beor, je' naq tz'aplik i naq'nuwach, wilik i xk'uhtjik weh.⁴Eh xb'iraj i ruq'oral i Dios, wilik wo' xuk'uhtaaj weh panusaq wiriik ruuk' i runimaal i rajaawriik. Re' hin xnuloch' wiib' chuwach i QaJaaw, eh xuk'uhtaaj weh i korik.⁵Yohb'aal wach holwochiil taq aapaat itz'ihy naah, eh yohb'aal wach holwochiil i ye'aab' wilkaat taq wii' i hat taq aj Israel.⁶Eh xakilok'ik taq chik aapaat, xa je' chik inloh k'ik reje xaq ipak'. Eh xa je' chik inlohk'ik reje tik, chi chii' i rooq ha', xa je' chik inlohk'ik reje ink'ohnik laj chee', eh xa je' chik inlohk'ik reje chakaltee' chi chii' i ha'.⁷Eh re' taq i hat eliik taq naa ruwihiik ahaa', eh ruuk' i re' naa taq akojom ruha'iil atik. Re' taq aareey yohb'aal wach i rajaawriik, naa ruq'atam wach i rajaawriik i reey Agag, eh naa ruye'ariik runimaal wach i rajaawriik.⁸Re' taq aaDios x-esanik chaaweh Egipto, xuyeew taq aakowiil chi je' kowiil imas wakax wilik pan raxchee'. Ruum aj re' naa taq asacham kiwach i nimaq tinamit ki-ixowanik taq awach, naa taq atoqib'eem i kib'aqil. Eh naa taq aakutib'eem ruuk' taq aaflecha.⁹Noq ti okik taq chi hi'lik i hat aj Israel, je' rukab' noq inokik chi hi'lik i kaq b'ahlam ma' awach ta neenuksanik i koq reh. Re' ta naq i holohik chinaah awach impahqanik i holohik taq cha naah, eh re' ta naq i ma' holohik taj i chinaah awach impahqanik ma' holohik taj taq cha naah, inki, i Balaam. Re' i Balaam xuq'or rib'iral chib'ih i naa ruk'ulariik

¹⁰Eh re' i reey Balac xchalik ruk'aah chinaah i Balaam, xupoq'potej paam i q'ab' je' wili xuq'or reh:
Re' hin xnutaq'aaj ak'amariik reh chi naa apahqaam i ma' holohik ta chikinaah i ki-ixowanik nuwach. Eh re' hat, oxpech chik xapahqaaj i holohik chikinaah.¹¹Ruum aj re' i ruk'ul chi neetisutinik reje panapaat. Re' hin nuq'orom naq chi q'e' naa nuye'em runimaal awach, xa re' la' re' Dios ma' xuyeew ta q'ab' chi xak'ul i runimaal awach, inki.

¹²Eh re' i Balaam je' wili i chaq'wik xub'an:
¿Mi ma' je' wili re' i xnuq'or keh i awaj taqareel xataq'aaj taqe chi nuk'amariik?¹³Chi atoob' ta naq nee ruyeew weh chu'nchel i oro i plata wilik parupaat. Re' hin xama' naa ta wo' nuq'atam wach i nee ruq'or weh i QaJaaw, eh chi ma' jino'q i holohik, eh ma' jino'q i yiib' wach neenub'an xa chi wib'il wiib'. Eh xnuq'or chi aha' wilik i naa ruq'orom weh i QaJaaw xa re' wo' naa nuq'orom.¹⁴Ma' xta reet, re' hin naa nusutiniik reje panutinamiit, xa re' kopeet naa nuq'orom chib'ih i naa rub'anam, na'chub'an i tinamit Israel ruuk' aatinamiit i hat.

¹⁵Re' Balaam xuq'or taqe i q'orik wili parutz'uuy:
Re' hin i Balaam hin rak'uun i Beor, re' hin je' naq tz'aplik i naq'nuwach.¹⁶Eh xb'iraj i ruq'oral i Dios, eh wilik xuk'uhtaaj weh panusaq wiriik ruuk' i runimaal i rajaawriik. Re' hin xnuloch' wiib' chuwach i QaJaaw, eh xuk'uhtaaj weh i korik.¹⁷Re' hin xwilow panusaq wiriik chib'ih i naa rub'aan kuuk' i aj Israel, taqe i riih rumaam i Jacob, naa ruponiik i q'iij noq chi kixilak naa reliik chaloq i jinaj i reey kow naa rutaaq'aniik, je' rukab' i rusaqumaal i ch'umiil. Eh re' reh naa rusacham wach i tinamit Moab, eh je' wo' taqe i riih rumaam i Set.¹⁸Re' taqe i aj Israel naa kichopom naah i tinamit Edom, eh je' wo' i tinamit Seir re' i nixowanik kiwach, eh xti naa ruwihiik kajaawriik.¹⁹Jinaj i xti nim rajaawriik naa ruwihiik, re' ruuk' i riih rumaam i Jacob. Re' re' i naa rusachwiik wach i tinamit nik' nimaal i konaakikahniik chi k'achalkeeb', inki.

²⁰Eh chi riij i re' xrilow wach i tinamit Amalec, je' wili i xuq'or parutz'uuy:
Re' Amalec xti xiik' wo' naq naah nimaal i rajaawriik chi kixilak i tinamit, xa re' la' xanaa wo' rusahchiik wach chi jumpech, inki.

²¹Eh re' Balaam noq xrilow wach i tinamit i Ceneo je' wili i xuq'or parutz'uuy:
Re' i aj Ceneo xti xiik' wo' naq naah kikowiil xkiyejaa' wo' naq i kiye'aab' chupaam taqe i paat ab'aj.²²Xa re' la' noq naa kichaliik i aj Asiria naa ruq'atariik wach i kajaawriik naa kik'amariik reje pan tokoom tinamit, inki.

²³Eh je' wo' chik wili i xuq'or parutz'uuy i Balaam:
Noq naa rub'anam i QaJaaw Dios taqe re' q'eq ti' i naakik'ulum, ma' jino'q chik i naa kikahniik chi k'achalkeeb'.²⁴Eh wilik i naa kichaliik pan barco chupaam i chiq yuuq' Quitim. Naa kisacham wach i aj Asiria. Eh naa rusachariik kiwach i aj Heber. Eh re' taqe i aj Quitim naa wo' rusachariik kiwach noq naa rojiik kuxoq, inki.

²⁵Eh chi riij taqe re', re' Balaam xichop reje i rub'eeh xsutinik wo' chik reje parutinamiit. Eh re' reey Balac xooj wo' reje parupaat. Re' taqe i aj Israel xkiloq'ej i xatz'aqoj tiyoox

¹Re' taqe i aj Israel noq xi okik chi wihik ar Sitim re' taqe i winaq xkitoq'aa' k'oyomal kuuk' taqe ixoq aj Moab.²Re' taqe ixoq re' re' inkiyuq'eej taqe aj Israel chuk'uxariik i mayiij inkiyeew chuwach i tiyoox Baal-peor. Eh inkixuk'aa' kiib' chuwach i tiyoox re' re'.³Je' re' noq xkikanaa' kiib' chi xik'amarik reje chi looq'jiik i tiyoox Baal-peor. Ruum i re', re' QaJaaw ma' k'isiin ta xchalik rujosq'iil chikinaah i aj Israel.⁴Eh re' i QaJaaw Dios, je' wili i xuq'or reh i Moisés:
Re' hat chamol kiwach chu'nchel i winaq k'amal kib'eeh i aj Israel, neenajihk'aaj chi kalaq parusaqumaal i q'iij chi nuwach reh chi neenik'ik i nujosq'iil chikinaah i aj Israel, inki.

⁵Re' i Moisés xuq'or wo' keh i q'atal q'orik chikinaah i ju'jun ch'uq chi aj Israel chi naa kikansam taqe awach i xi k'amarik reje chi looq'jiik i tiyoox Baal-peor.

⁶Eh jinaj i winaq aj Israel xuk'am reje chi riij parupaat jinaj ixoq aj Madián. Chuwach i Moisés, eh chikiwach wo' chu'nchel i aj Israel kimolom kiib' noq oq'ik inki a'n panookb'al reh i santo laj itz'ihy naah paat molb'al iib'.⁷Eh re' Finees i rak'uun i Eleazar, eh riih i Aarón kajaaw i aj tiij noq xrilow chib'ih i xub'an i winaq xelik reje chi kixilak i aj Israel kimolom kiib' ar xooj ruchop i ruq'as laj ch'ihch'.⁸Eh xutahqeej reje i winaq aj Israel aha' wilik i ru-itz'ihy naah paat. Eh ar xusach wach i winaq xrik'saj i ruq'aslaj ch'ihch' chupaam, eh je' wo' re' i xub'an reh ixoq. Ruuk' i re' xhi'lik wach i kaq yab'ilaal k'achi' rukansanik keh i aj Israel.⁹Xa re' la' kamnaq wo' chik taqe i kijib' ru ka'winaq miil chi aj Israel ruum i kaq yab'ilaal.

¹⁰Re' i QaJaaw Dios je' wili xuq'or reh: i Moisés.

¹¹Ruuk' i xub'an i Finees rak'uun i Eleazar re' i rak'uun i Aarón xujot'isaj wach i nujosq'iil chikinaah i aj Israel, ruum re' reh raaj chi xa re' hin nee kinaloq'ej, je' rukab' i nukapaaj i hin ruum aj re' majaa' i nusach kiwach chu'nchel i aj Israel.¹²Je' re' noq cha q'or reh i Finees chi re' hin kinq'orik chi neerub'an chi nee ruk'am riib' panotob'il wuuk'.¹³Re' hin naa nuye'em q'ab' reh chi naa rukahniik chi k'amal kib'eeh aj tiij. Eh naa kikahniik chi k'amal kib'eeh aj tiij taqe i riih rumaam, ruum re' reh iraaj chi xa re' hin naa nulooq'jiik. Ruum chi xuyeew i k'atoj mayiij chikiij i aj Israel, inki.

¹⁴Eh re' i aj Israel xkanteesjik ruch'ihil ixoq aj Madián, Zimri i rub'ihnaal, rak'uun Salu re' i k'amal kib'eeh taqe i riih rumaam i Simeón.¹⁵Eh re' ixoq aj Madián xkanteesjik Cozbi rub'ihnaal, rixq'uun i Zur k'amal kib'eeh i junch'uq chi aj Madián.

¹⁶Re' i QaJaaw Dios je' wili i xuq'or reh Moisés:

¹⁷Re' taq i hat aj Israel, hiy taq chi q'aq'inik kuuk' i aj Madián korehtaal taq i na a'n keh.¹⁸Ruum re' keh xkian taq aweh, ruuk' jot'ooj taq xat kimin chi rulooq'jiik i kitiyoox Baal-peor rub'ihnaal. Re' wo' keh kik'amwik b'eeh ruuk' i ma' holohik taj xub'an ixoq Cozbi re' rixq'uun i k'amal kib'eeh i junch'uq chi aj Madián. Re' ixoq xkanteesjik ruuk' q'aslaj ch'ihch', noq xnutaq'aaj chaloq i runimaal yab'ilaal ruum xaloq'ej taq tiyoox re' re', inki. Re' kajaljiik ruka'peech i aj Israel

¹Noq kamnaq chik taqe i ruk'ihaal chi aj Israel ruum i runimaal yab'ilaal, re' QaJaaw Dios, je' wili i xuq'or reh i Moisés, i Eleazar rak'uun i Aarón kajaaw i k'amal kib'eeh aj tiij:²Re' taq i hat naa taq awik'sam i tz'ihb' ajlaamb'al keh i aj Israel, pankipaat ruuk' i kituut kajaaw, re' taqe i manlik juninaq haab', je' wo' taqe ik'inaq juninaq haab', re' taqe i manlik nee kiooj panq'aq'inik, inki.

³Eh re' i Moisés, i Eleazar re' i k'amal kib'eeh aj tiij xkiq'o'reej taqe i aj Israel wach k'ixkaab' Moab chi chii' i nim ha' Jordán chuwach reje i Jericó, je' wili i xuq'or:⁴Re' taq i hat naa awajlaam taqe i winaq wilik keh i juninaq haab' je' wo' taqe ik'inaq juninaq haab', je' rukab' i xuq'or i Dios reh i Moisés, inki taqe.
Re' taqe i xi ajaljik re' taqe i xi ehteesjik cho Egipto.

⁵Re' i Rubén i peet rak'uun i Israel re' taqe wili i junch'uq chi riih rumaam: Re' taqe riih rumaam Enoc, re' taqe i riih rumaam i Falú.⁶Re' taqe riih rumaam i Hezrón, re' taqe i riih rumaam Carmi.⁷Eh noq xik'ik i tz'ihb' chikinaah taqe i riih rumaam i Rubén xi ponik ka'winaq miil ruuk' ixib' miil ruuk' wuquub' siento ruuk' lajeeb' ru ka'winaq chi kiib'.

⁸Eh re' i riih rumaam i Falú re' Eliab.⁹Re' riih rumaam i Eliab re' Nemuel, re' Datán, eh re' i Abiram. Eh re' i Datán, re' i Abiram xitaqchi'inik keh i aj Israel noq xtohq'ik kiq'etwachem i Moisés, i Aarón. Re' i aj Israel re' re' xkian jinaj wach kik'ux ruuk' i Coré noq xtohq'ik kiwech'um riij chib'ih i rub'an i Dios.¹⁰Eh re' ak'al xtar, eh xib'iq'arik qohoq kiib' chi winaq re' re', je' wo' hoq i Coré, je' wo' taqe xkian jinaj wach kik'ux kuuk'. Eh re' i xi k'atarik ruum i q'aaq' kiib' siento ruuk' lajeeb' roxk'ahl chi kiib', re' xk'ularik wili kojb'al kina'ojb'al i ruk'ihaal.¹¹Eh re' taqe i riih rumaam i Coré ma' xkuxik ta kikimiik.

¹²Re' taqe junch'uq chi riih rumaam i Simeón re' taqe wili: Re' taqe i riih rumaam i Nemuel i riih rumaam Jemin, re' taqe riih rumaam i Jaquín.¹³Re' taqe riih rumaam i Zera, re' taqe riih rumaam i Saúl.¹⁴Eh noq xik'ik i tz'ihb' chikinaah i riih rumaam i Simeón xi ponik kiib' ru ka'winaq miil ruuk' kiib' siento.

¹⁵Eh re' taqe junch'uq chi riih rumaam i Gad re' taqe wili: Re' taqe i riih rumaam Zefón, re' riih rumaam i Hagui, eh re' i riih rumaam i Suni.¹⁶Re' taqe i riih rumaam i Ozni, eh re' taqe riih rumaam i Eri.¹⁷Re' taqe i riih rumaam i Arod, re' taqe i riih rumaam i Areli.¹⁸Eh noq xik'ik i tz'ihb' chikinaah i riih rumaam Gad xi ponik ka'winaq miil ruuk' hoob' siento chi kunchelaal.

¹⁹Eh re' taqe i riih rumaam i Judá re' i Er, re' Onán xikimik chupaam i tinamit Canaán.²⁰Je' re' noq re' taqe i junch'uq chi riih rumaam i Judá re' taqe wili: Re' riih rumaam i Sela, re' i riih rumaam i Fares, re' riih rumaam i Zera.²¹Eh re' taqe i riih rumaam i Fares, re' i riih rumaam i Hezrón, re' i riih rumaam i Hamul.²²Eh noq xik'ik i tz'ihb' chikinaah i junch'uq chi riih rumaam i Judá xi ponik waqlaj ru kajwinaq miil ruuk' hoob' siento.

²³Eh re' taqe i junch'uq chi riih rumaam i Isacar re' taqe wili: Re' riih rumaam i Tola, re' i riih rumaam Fúa.²⁴Eh re' riih rumaam i Jasub, re' riih rumaam Simrón.²⁵Eh noq xik'ik kajaljiik i riih rumaam i Isacar xi ponik kijib' ru kajwinaq miil ruuk' ixib' siento.

²⁶Re' taqe i junch'uq chi riih rumaam i Zabulón, re' taqe wili: Re' riih rumaam i Sered, re' i riih rumaam i Elón, eh re' riih rumaam i Jahleel.²⁷Eh noq xik'ik i kajaljiik i riih rumaam i Zabulón xi ponik oxk'ahl miil ruuk' hoob' siento.

²⁸Eh re' taqe i junch'uq chi riih rumaam i José re' i junch'uq chi tinamit Manasés, eh re' junch'uq chi tinamit Efraim.²⁹Re' junch'uq chi riih rumaam i Manasés re' taqe wili: Re' taqe i riih rumaam i Maquir, re' taqe i riih rumaam Galaad.³⁰Re' i junch'uq chi riih rumaam i Galaad re' taqe i wili: Re' taqe i riih rumaam i Jezer, re' taqe i riih rumaam i Helec.³¹Eh re' taqe i riih rumaam i Asriel, re' taqe i riih rumaam i Siquem.³²Eh re' taqe i riih rumaam i Semida, re' taqe i riih rumaam i Hefer.³³Eh re' i Zelofehad i rak'uun i Hefer ma' xwihik ta rak'uun xarixq'uun taqe i xwihik, je' wili i kib'ihnaal: Re' Maala, re' Noa, re' Hogla, re' Milcá, re' i Tirsa.³⁴Eh noq xik'ik i tz'ihb' chikinaah junch'uq chi riih rumaam i Manasés xi ponik kab'laj roxk'ahl miil ruuk' wuquub' Siento.

³⁵Re' junch'uq chi riih rumaam i Efraín, re' taqe wili: Re' taqe i riih rumaam i Sutela, re' taqe i riih rumaam i Bequer, re' taqe i riih rumaam i Tahán.³⁶Re' taqe junch'uq chi riih rumaam i Sutela, re' taqe i wili: Re' taqe riih rumaam i Erán.³⁷Eh noq xik'ik i tz'ihb' chikinaah taqe i riih rumaam i Efraín xi ponik kab'laj ru ka'winaq miil ruuk' hoob' siento. Re' taqe i riih rumaam i José wilkeeb' pankipaat.

³⁸Eh re' i junch'uq chi riih rumaam i Benjamín re' taqe wili: Re' taqe i riih rumaam i Bela, re' taqe i riih rumaam i Asbel, re' taqe i riih rumaam i Ahiram.³⁹Re' taqe i riih rumaam i Sufam, re' taqe i riih rumaam i Hufam.⁴⁰Re' taqe i riih rumaam i Bela, re' Ard, re' Naamán, re' taqe i kiih kimaam taqe re'.⁴¹Eh noq xik'ik i tz'ihb' chikinaah taqe i riih rumaam i Benjamín xi ponik hoob' roxk'ahl miil ruuk' waq'iib' siento.

⁴²Re' i junch'uq chi riih rumaam i Dan, re' taqe wili: Re' taqe i riih rumaam i Suham, re' taqe re' i riih rumaam i Dan.⁴³Eh noq xik'ik i tz'ihb' chikinaah taqe i riih rumaam i Dan xi ponik kijib' ru kajwinaq miil ruuk' kijib' siento.

⁴⁴Eh re' junch'uq chi riih rumaam i Aser re' taqe wili: Re' taqe i riih rumaam i Imna, re' taqe i riih rumaam Isúi, re' taqe i riih rumaam i Bería.⁴⁵Re' taqe i riih rumaam i Bería re' taqe i wili: re' taqe i riih rumaam i Heber, re' taqe i riih rumaam i Malquiel.⁴⁶Eh re' Aser xwihik jinaj rixq'uun Sera i rub'ihnaal.⁴⁷Eh noq xik'ik i tz'ihb' chikinaah taqe i riih rumaam i Aser xi ponik oxlaj roxk'ahl miil ruuk' kijib' siento.

⁴⁸Re' i junch'uq chi riih rumaam i Neftalí, re' taqe wili: Re' taqe i riih rumaam i Jahzeel, re' taqe i riih rumaam Guni.⁴⁹Eh re' taqe i riih rumaam i Jezer, re' taqe i riih rumaam i Silem.⁵⁰Eh noq xik'ik i tz'ihb' chikinaah taqe i riih rumaam i Neftalí xi ponik hoob' roxk'ahl miil ruuk' kijib' siento.

⁵¹Eh noq xik'ik i tz'ihb' chikinaah chu'nchel i winaq aj Israel wilik keh juninaq haab', eh ik'inaq juninaq haab', xi ponik waqiib' siento miil ruuk' jinaj miil, ruuk' wuquub' siento ruuk' lajeeb' ru ka'winaq. Re' ruq'orariik nik' wach ruch'aqariik ak'al xkian

⁵²Re' i QaJaaw Dios je' wili i xuq'or reh i Moisés:⁵³Keh taqe i tinamit wili naa ruch'aqiik ak'al re' q'oreel jarub' i xtz'ihb'jik kib'ihnaal.⁵⁴Wila' k'ih chi kiib', chi kich'uhqaal, nim i kiye'aab' naa ruye'ariik. Eh wila' ma' k'ih chi kiib' chi kich'uhqaal, ma' q'e' ta wo' nim i kiye'aab' naa ruye'ariik. Je' re' noq chi kich'uhqaal naa ruch'aqariik kiye'aab' re' q'oreel nik' wach i kajaljiik xb'aan.⁵⁵Eh re' ye'aab' konaa rusik'ariik chi riij noq naa ruchaqariik, eh aha' wilik i naa rukahniik reh i ju'jun ch'uq, re' wo' re' naa ruk'ulum. Re' q'oreel awach chaloq i kimaam kati't.⁵⁶Aha' pa' wilik i neenkahnik keh noq neensik'arik chi riij re' q'oreel mi k'ih chi kiib' nim neenye'arik keh, eh wila' ma' k'ih chi kiib' ma' nim taj i neenye'arik keh. Re' tz'ihb' xb'aan i ajlaamb'al keh taqe i riih rumaam i Leví

⁵⁷Eh re' taqe i junch'uq chi aj Levíta xi tz'ihb'jik re' taqe wili: Re' taqe i riih rumaam i Gersón, re' taqe i riih rumaam i Coat, eh re' taqe i riih rumaam i Merari.⁵⁸Re' taqe riih rumaam i Libni, re' taqe i riih rumaam i Hebrón, re' riih rumaam i Mahli, re' taqe i riih rumaam i Musi, re' taqe riih rumaam i Coré, chu'nchel i re' riih rumaam Leví.
Re' i Coat rajaaw i Amram.⁵⁹Eh re' Amram xub'an kaxáro ruuk' i Jocabed, re' i rixq'uun i Leví x-aasjik noq ko wilik cho Egipto. Eh re' Amram xwihik rak'uun rixq'uun ruuk' i Jocabed je' wili kib'ihnaal: Aarón, Moisés, eh María.⁶⁰Eh re' taqe i rak'uun xwihik i Aarón je' wili i kib'ihnaal: Nadad, Abiú, Eleazar, Itamar.⁶¹Re' Nadad, ruch'ihil Abiú xikimik ruum noq tokoom inaq'wach q'aaq' xkik'at wii' i mayiij chuwach i QaJaaw Dios.⁶²Eh noq xik'ik i tz'ihb' chikinaah chu'nchel i riih rumaam i Leví xkitoq'aa' johtoq i ajlanik ruuk' i ju'jun poh i wilik keh, xkikoj haa' i nimaq winaq, xi ponik ixib' ru ka'winaq miil. Re' taqe re' ma' xajaljik ta haa' chi kixilak i kuch aj Israel, ruum ma' xye'arik ta kiye'aab'.

⁶³Re' taqe i xrajlaaj i Moisés, ruch'ihil i Eleazar k'amal kib'eeh aj tiij noq xkajlaaj chu'nchel i aj Israel wach k'ixkaab' Moab re' i wilik chi chii' i nim ha' Jordán. Re' ye'aab' re' re' ar wilik chi k'ulwaach i tinamit Jericó.⁶⁴Eh re' taqe i re' ma' jino'q keh i xi ajaljik ruum i Moisés ruum i Aarón chupaam i ye'aab' chiq yuuq' ar Sinaí noq xkian i tz'ihb' ar.⁶⁵Ruum i re', re' i QaJaaw Dios ruq'orom chik keh chi naa rukuxiik kikimiik chupaam i ye'aab' chiq yuuq'. Eh xuq'or chi ach wo' re' Caleb, rak'uun i Jefone ruch'ihil i Josué rak'uun i Nun naa kikahniik chi k'achalkeeb'. Re' kikooch xkipahqaaj i rixq'uun i Zelofehad

¹Chi kixilak junch'uq chi riih rumaam i Manasés ho'oob' ixoq xi wihik rixq'uun taqe i Zelofehad je' wili i kib'ihnaal: Maala, Noa, Hogla, Milcá, Tirsa. Re' i Zelofehad rak'uun i Hefer, re' Hofer rak'uun i Galaad, re' Galaad rak'uun i Maquir, re' i Maquir rak'uun i Manasés, re' i Manasés rak'uun i José.²Re' taqe i ho'oob' chi ixoq re' re' xiooj panookb'al reh i santo laj itz'ihy naah paat molb'al iib'. Ar xooj kiq'oreej i Moisés ruch'ihil i Eleazar k'amal kib'eeh aj tiij chikiwach i k'amal b'eeh, eh chikiwach i kimolom kiib' ar, je' wili xkiq'or:³Re' i qajaaw i hoj xkimik chupaam i ye'aab' chiq yuuq', xa re' la' ma' re' ta naq haa' ruuk' i junch'uq i wilkeeb' chi riij i Coré i xkiwech'uj riij i xub'an i Dios. Re' reh ruum i ru mahk xkimik, eh ma' jino'q i rak'uun xwihik.⁴Ma' ruk'ul taj chi neensahchik wach i rub'ihnaal i qajaaw chi xilak i rutinamiit xa ruum chi ma' xwihik ta jino'q rak'uun. Re' hoj, hoj rixq'uun i ruk'ul chi nee taq i nayeew k'isinoq qeh ak'al re' ruuk' kak'aal taqe i ruchaaq' i qajaaw, inki taqe.

⁵Eh re' i Moisés xuq'or reh i QaJaaw Dios i xkipahqaaj i ho'oob' chi ixoq re' re'.⁶Re' i QaJaaw Dios je' wili chaq'wik xub'an:⁷Re' taqe i ho'oob' chi rixq'uun i Zelofehad rub'ehel chi keh inkiq'or. Re' hat i ruk'ul chi naa aye'em k'isinoq keh re' ruuk' i kak'aal taqe ruchaaq' i kajaaw, aha' naq wilik ak'al naa ruye'ariik reh i kajaaw kekeh nee nayeew.⁸Eh cha q'or keh chu'nchel i aj Israel chi awach i winaq xkimik reje chi ma' xwihik ta jino'q rak'uun xarixq'uun i xwihik re' i rak'aal naq i reh i ruk'ul chi keh i rixq'uun naa ruye'ariik.⁹Eh wila' ma' xwihik jino'q rixq'uun i ruk'ul chi reh i ras oon ruchaaq' naa ruye'ariik i rak'aal naq i reh.¹⁰Eh wila' ma' chih i ras, oon ruchaaq' re' i rak'aal naq i reh i ruk'ul chi reh i ras, oon ruchaaq' i rajaaw naa rukahniik.¹¹Eh wila' ma' chih ras, oon ruchaaq' i rajaaw i ruk'ul chi reh jino'q i ma' tokoom ta ruuk'naa ruye'em i rak'aal naq i reh. Re' k'uhb'aal wili i ruk'ul chi naa kianam chi juneliik i aj Israel je' rukab' i xnuq'or reh i Moisés i hin, inki. Re' Josué xpa'ab'jik chi k'amal b'eeh chi jilow i Moisés

¹²Re' i QaJaaw Dios je' wili i xuq'or reh i Moisés:
Re' hat johteen johtoq chinaah i yuuq' Abarim nee nawil reje i ye'aab' xnuyeew keh i aj Israel.¹³Eh noq akohlaam chik rilariik chu'nchel neetikimik neenooj areq taqe aamaam awati't, je' rukab' noq xkimik i Aarón aawas,¹⁴ruum akab'cheel taq ma' xanimaj ta taq i nuq'oral chupaam i ye'aab' chiq yuuq' Zin. Noq re' i tinamit xintohq'ik kiwech'um, re' taq i hat ma' xayeew ta taq nuloq'il chikiwach, noq xkipahqaaj kihaa' weh, inki. Re' xuq'or wili re' xk'ularik noq xelik i ha' chupaam i saq rep ab'aj, wilik chupaam i ye'aab' Cades wilik chupaam i ye'aab' chiq yuuq' Zin.

¹⁵Re' i Moisés je' wili i xuq'or reh i QaJaaw Dios:

¹⁶QaJaaw Dios re' hat ti ye'wik i k'acharik i ruk'ul chi nee nakoj jino'q i winaq chi nujilow reh chi neenkahnik chi k'amal kib'eeh i tinamit wili.¹⁷Reh chi re' winaq re' re' neenk'amwik kib'eeh xa aha' pa' nee kiooj i k'oq, chi je' re' ma' nee ta kikahnik aatinamiit chi je' kikab' i tentzun ma' xta cha'jen keh, inki.

¹⁸Eh re' i QaJaaw Dios je' wili i chaq'weesjik i Moisés xub'an:
Re' Josué i rak'uun i Nun wilik ruuk' i Wuxlab'al chapab'aa' chayeew aq'ab' chinaah.¹⁹Chi riij i re' nee nak'am reje chuwach i Eleazar k'amal kib'eeh aj tiij, neenapab'aa' chuwach, je' wo' chikiwach i chu'nchel i tinamit Israel. Eh re' hat nee nayeew i kamanik chinaah.²⁰Nee nayeew reh awajaawriik i hat reh chi chu'nchel i aj Israel neenkinimaj taqe i nee ruq'or.²¹Eh re' Josué naa rojiik pa'lojoq chuwach Eleazar k'amal kib'eeh aj tiij. Eh re' Eleazar nee rukoj i reh i chi' ruk'ux Urim rub'ihnaal noq neerupahqaaj weh chib'ih i naa rub'anam. Eh re' chik i Josué naa ruq'oriik keh i aj Israel chu'nchel i naa kianam, inki.

²²Eh re' i Moisés xub'an wo' hoq i xq'orarik reh ruum i QaJaaw Dios, xuk'am wo' reje i Josué chuwach i Eleazar k'amal kib'eeh aj tiij, je' wo' chikiwach chu'nchel i aj Israel.²³Eh xuyeew wo' q'ab' wach naah i Josué xupab'aa' chi k'amal b'eeh je' wo' rukab' i xq'orarik reh ruum i QaJaaw Dios. Re' i kimayiij xkiyeew rajlaal q'iij (Ex 29.38-46)

¹Re' QaJaaw Dios je' wili i xuq'or reh i Moisés:²Re' hat cha q'or keh i aj Israel chi juneliik neen kiyeew paruq'ijil i kik'atoj mayiij, je' wo' hoq chi kimayiij i kaxlanwi'k. Re' taqe ink'ohnik laj mayiij re' re' imponik chi nuwach i hin.

³Eh je' wili i neenaq'or keh: Re' taqe wili i k'atoj mayiij naa aq'asam taq reh i QaJaaw Dios chi juneliik, rajlaal q'iij taq naa aq'asam kiib' chi imas tentzun ju'jun haab' i wilik keh, eh manlik wach i kiti'jolal.⁴Jinaj keh imas tentzun naa taq aq'asam wahq'eq, eh jinaj i naa taq aq'asam xq'eq.⁵Eh naa taq aq'asam chi mayiij ruch'ihil i tentzun ik'inaq waxiqiib' libra chi holohik laj arina xilakimaj ruuk' i jinaj nimlaj lemeta chi aseite oliva.⁶Eh re' wo' hoq i mayiij wili ink'atarik chi juneliik chinaah i yuuq' Sinaí. Re' i q'e' ink'ohnik laj mayiij q'e' imponik chuwach i QaJaaw Dios.⁷Eh chi ruk'u'liil i ju'jun chi k'atoj tentzun naa wo' taq aq'asam chi amayiij jinaj nimlaj lemeta chi riis uuva. Re' riis i uuva re' re' naa ruchihkjiik chupaam i santo laj ye'aab' ye'b'al ruloq'il i QaJaaw.⁸Eh re' tentzun naa taq aq'asam chi mayiij xq'eq naa taq aq'asam chiruk'uliil i holohik laj arina ruch'ihil i riis uuva je' wo' k'ihaal i naa taq aq'asam chi ruk'u'liil ak'atoj mayiij naa taq aq'asam wahq'eq. Re' taqe i mayiij re' re' q'e' ink'ohnik imponik chuwach i Dios, tiko'q keh inki. Re' mayiij xkiyeew chupaam i hi'limb'al q'iij

⁹Eh re' i mayiij taq naa aq'asam chupaam taqe i hi'limb'al q'iij kiib' chi imas tentzun aj ju'jun haab' manlik wach i kiti'jolal. Eh naa taq aq'asam i k'isiin ma' b'elejeeb' libra chi holohik laj arina xilakimaj ruuk' aseite, eh riis uuva.¹⁰Re' taqe i k'atoj mayiij wili naa taq aq'asam chupaam taqe i hi'limb'al q'iij naa wo' aq'asam taq chi ruk'u'liil i holohik arina, eh riis uuva naa taq aq'asam rajlaal i q'iij.

¹¹Eh pank'amb'al rub'eeh i ju'jun chi poh kiib' i kok' imas wakax taq naa aq'asam chi k'atoj mayiij chuwach i QaJaaw Dios. Jinaj imas tentzun, eh wuquub' i tentzun ju'jun haab' i wilik keh, eh manlik wach i kiti'jolal.¹²Eh re' ju'jun chi imas wakax naa taq aye'em chi ruk'u'liil i waqiib' libra chi holohik arina xilakimaj ruuk' aseite. Eh re' ju'jun chi imas tentzun, naa taq aq'asam chi ruk'u'liil kijib' libra chi arina, xilakimaj ruuk' aseite.¹³Eh re' i ju'jun chi kok' imas tentzun naa taq aq'asam chi ruk'u'liil i ki'ib' libra chi holohik laj arina, xilakimaj ruuk' aseite. Re' taqe i k'atoj mayiij wili q'e' k'ohnik imponik chuwach i QaJaaw Dios ye'b'al ruloq'il.¹⁴Re' i ju'jun chi imas wakax ruk'u'liil ka'kab' nimaq lemeta chi riis uuva. Eh re' ju'jun chi imas tentzun ruk'u'liil i wilik rukab' nimaq lemeta chi riis uuva. Eh re' ju'jun chi tentzun ruk'uliil i jinaj nimlaj lemeta chi riis uuva. Re' taqe i wili i k'atoj mayiij naa taq aq'asam i ju'jun chi poh reh i haab'.¹⁵Eh chi riij taqe i k'atoj mayiij taq naa aq'asam rajlaal i q'iij ruch'ihil i riis uuva, ko jinaj taq chik imas kaprax naa taq aq'asam chuwach i QaJaaw Dios pahqb'al kuyb'al taq amahk. Re' kimayiij inkiq'asaj i aj Israel chupaam i runinq'ijiik i elik chaloq Egipto (Lev 23.1-44)

¹⁶Chupaam i kajlaj rub'eeh i peet poh reh i haab' naa taq aninq'ijeem aweliik chaloq Egipto ye'b'al ruloq'il i QaJaaw Dios.¹⁷Eh chupaam i ho'lajuuj rub'eeh i poh re' re' naa taq a'nam i nim wach ninq'iij. Eh wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh.¹⁸Eh chupaam i peet q'iij naa taq a'nam jinaj i santo laj moloj iib'. Eh ma' jino'q taq aweh i naa rukamaniik.¹⁹Eh kiib' i kok' imas wakax jinaj imas tentzun, wuquub' tentzun ju'jun haab' i wilik keh, manlik wach kiti'jolal naa taq aq'asam chi k'atoj mayiij chi nuwach i hin.²⁰Eh naa wo' taq aq'asam chi amayiij i holohik laj arina xilakimaj ruuk' aseite. Ik'inaq oxlaj libra chi ruk'u'liil i ju'jun chi kok' imas wakax. Eh k'isiin ma' b'elejeeb' libra arina taq i naa aq'asam chi ruk'u'liil imas tentzun.²¹Eh re' i ju'jun chi tentzun naa wo' taq aq'asam chi ruk'u'liil ik'inaq kijib' libra chi holohik laj arina xilakimaj ruuk' aseite.²²Eh koruman wo' hoq chi naa taq aq'asam chi amayiij i jinaj i kaprax k'amb'al taq awiib' panotob'il wuuk' i hin.²³Re' taqe i mayiij wili naa taq aq'asam noq aq'asam taq chik i k'atoj mayiij pantaq wahq'eq re' inq'ahtesjik chi juneliik.²⁴Re' taqe i k'atoj mayiij re' re' wuquub' q'iij taq naa aq'asam noq k'ahchi' i ninq'iij. Re' taqe i k'atoj mayiij wili naa taq aq'asam chi ye'b'al nuloq'il ink'ohnik laj mayiij q'e' imponik chi nuwach i hin. Eh naa wo' taq aq'asam i k'atoj mayiij rajlaal i q'iij, je' wo' hoq i riis uuva.²⁵Eh paruwuuq q'iij reh i ninq'iij naa wo' taq a'nam i santo laj moloj iib' ye'b'al nuloq'il i hin, eh ma' jino'q taq aweh i naa rukamaniik.

²⁶Eh noq naa taq aninq'ijeem i peet wach taq atik amu'uun, noq naa taq aq'asam chi amayiij chi nuwach i hin, naa taq a'nam i santo laj moloj iib' ye'b'al nuloq'il. Eh chupaam i q'iij re' re' ma' jino'q taq aweh i naa rukamaniik.²⁷Eh naa taq aq'asam chi nk'ohnik amayiij chi nuwach i hin i kiib' chi kok' imas wakax, eh jinaj imas tentzun, eh wuquub' chi tentzun, ju'jun haab' i wilik keh.²⁸Eh chi ruk'u'liil i ju'jun chi imas wakax naa taq aq'asam ik'inaq oxlaj libra chi holohik laj arina xilakimaj ruuk' aseite. Eh chi ruk'u'liil imas tentzun naa taq aq'asam i k'isiin ma' b'elejeeb' libra chi arina, xilakimaj ruuk' aseite.²⁹Eh chi ruk'u'liil i ju'jun chi imas tentzun naa taq aq'asam ik'inaq kijib' libra chi arina xilakimaj ruuk' aseite.³⁰Eh koruman wo' hoq chi naa taq aq'asam chi ak'atoj mayiij jinaj i kaprax pahqb'al taq kuyb'al amahk.³¹Re' k'atoj mayiij wili noq naa taq aq'asam naa wo' taq aq'asam chi ruk'u'liil i arina ruch'ihil i riis uuva. Eh naa wo' taq aq'asam i k'atoj mayiij rajlaal q'iij. Eh re' taqe i chikop naa aq'asam manlik wach i kiti'jolal. Re' runinq'ijiik i ruhuupjiik paam i tuun

¹Re' taq i hat chupaam i k'amb'al rub'eeh i ruwuuq poh naa taq a'nam i santo laj moloj iib', ma' jino'q taq aweh i naa rukamaniik. Eh naa taq aq'orom rib'iral i q'iij re' re' ruuk' i ruhuupjiik paam i tuun.²Re' ink'ohnik laj k'atoj mayiij taq naa aq'asam, re' imponik chi nuwach i hin, jinaj i k'isa imas wakax, jinaj imas tentzun. Eh wuquub' i tentzun ju'jun haab' i wilik keh, manlik wach i kiti'jolal.³Re' i k'isa imas wakax i naa taq aq'asam chi ruk'u'liil ik'inaq oxlaj libra chi holohik laj arina xilakimaj ruuk' aseite. Eh re' imas tentzun naa taq aq'asam chi ruk'u'liil i k'isiin ma' b'elejeeb' libra chi arina xilakimaj ruuk' aseite.⁴Eh re' ju'jun chi kok' imas tentzun naa taq aq'asam chi ruk'u'liil ik'inaq kijib' libra chi holohik laj arina xilakimaj ruuk' aseite.⁵Eh koruman wo' hoq chi naa taq aq'asam chi k'atoj mayiij jinaj kaprax pahqb'al kuyb'al taq amahk.⁶Eh noq aq'asam taq chik ak'atoj mayiij naa taq aye'em rajlaal poh, je' wo' hoq i amayiij naa taq aye'em rajlaal q'iij ruch'ihil taq i wach atik ruch'ihil i riis uuva, je' rukab' i xnuq'or i hin. Re' taqe ink'ohnik laj mayiij wili q'e' imponik chi nuwach i hin.

⁷Eh chupaam i lajeeb' i rub'eeh ruwuuq poh naa taq a'nam i santo laj moloj iib' ye'b'al nuloq'il i hin. Eh chupaam q'iij re' re' naa taq a'nam i tiij chi ma' a'nam ta taq awa', eh ma' jino'q taq aweh i naa rukamaniik.⁸Re' taqe i chikop naa taq aq'asam chi nk'ohnik laj k'atoj mayiij chi nuwach, re' taqe wili: Jinaj i k'isa imas wakax, jinaj imas tentzun eh wuquub' tentzun ju'jun haab' i wilik keh, manlik wach i kiti'jolal.⁹Eh naa wo' taq aq'asam chi amayiij i ik'inaq oxlaj libra chi holohik laj arina xilakimaj ruuk' aseite Chi k'u'liil imas wakax. Eh chi k'u'liil imas tentzun naa taq aq'asam i k'isiin ma' b'elejeeb' libra chi arina.¹⁰Eh chi ruk'u'liil i ju'jun chi tentzun naa taq aq'asam ik'inaq kijib' libra chi arina xilakimaj ruuk' aseite.¹¹Eh naa taq aq'asam chi k'atoj mayiij jinaj imas kaprax chi tojb'al riij taq amahk. Eh naa wo' taq aq'asam i mayiij pahqb'al kuyb'al taq amahk. Eh naa wo' aq'asam taq i k'atoj mayiij rajlaal i q'iij ruch'ihil arina, ruch'ihil i riis uuva.

¹²Eh chupaam i ho'lajuuj rub'eeh i ruwuuq poh naa taq a'nam i santo laj moloj iib'. Chupaam i q'iij re' re' ma' jino'q taq aweh i naa rukamaniik, wuquub' q'iij taq naa a'nam i ninq'iij ye'b'al nuloq'il i hin, hin Dios.¹³Pampeet q'iij naa taq aq'asam chi nk'ohnik laj k'atoj mayiij chi nuwach i oxlaj chi kok' imas wakax. Eh kiib' imas tentzun, eh kajlaj i tentzun ju'jun haab' i wilik keh manlik wach i kiti'jolal.¹⁴Eh naa taq aq'asam chi ruk'u'liil i ju'jun chi imas wakax, waqiib' libra chi holohik laj arina xilakimaj ruuk' aseite. Eh chi ruk'u'liil i ju'jun chi imas tentzun naa taq aq'asam i kijib' libra chi arina xilakimaj ruuk' aseite.¹⁵Eh chi ruk'u'liil i ju'jun chi kok' tentzun naa taq aq'asam kiib' libra chi holohik laj arina xilakimaj ruuk' aseite.¹⁶Koruman wo' hoq chi naa taq aye'em chi amayiij i kaprax chi pahqb'al kuyb'al taq amahk noq aye'em taq chik eqal eqal ak'atoj mayiij ruch'ihil i holohik arina ruch'ihil i riis uuva.

¹⁷Eh parukab' q'iij naa taq aq'asam chi ak'atoj mayiij i kab'laj chi kok' imas wakax, eh kiib' imas tentzun. Eh kajlaj i tentzun ju'jun haab' i wilik keh, manlik wach i kiti'jolal.¹⁸Eh nik' k'ihaal kok' imas wakax, imas tentzun, i kok' tentzun taq naa aaq'asam, je' wo' re' k'ihaal i holohik laj arina, i riis uuva taq naa aq'asam chi kik'u'liil, je' rukab' i ruq'or i nuk'uhb'aal.¹⁹Eh koruman wo' hoq chi naa taq aq'asam chi amayiij jinaj i kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik arina, ruch'ihil i riis taq aa-uuva.

²⁰Eh paroox q'iij naa taq aq'asam chi ak'atoj mayiij i junlaj kok' imas wakax, eh kiib' imas tentzun. Eh kajlaj i tentzun ju'jun haab' i wilik keh manlik wach i kiti'jolal.²¹Eh nik' pa' k'ihaal i kok' imas wakax naa taq aq'asam nik' pa' k'ihaal imas tentzun, eh nik' pa' k'ihaal kok' tentzun, je' wo' re' k'ihaal i holohik laj arina, i riis uuva naa taq aq'asam chi kik'u'liil. Je' rukab' i ruq'or i nuk'uhb'aal.²²Eh koruman chi naa taq aq'asam chi amayiij jinaj i imas kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik arina ruch'ihil i riis uuva.

²³Eh chupaam i rukaaj q'iij naa taq aq'asam chi ak'atoj mayiij i lajeeb' chi kok' imas wakax, eh kiib' imas tentzun, eh kajlaj tentzun i ju'jun haab' i wilik keh manlik wach i kiti'jolal.²⁴Eh nik' pa' k'ihaal i kok' imas wakax taq naa aq'asam, nik' pa' k'ihaal imas tentzun. Eh nik' pa' k'ihaal i kok' tentzun, je' wo' re' k'ihaal i holohik laj arina, je' wo' re' k'ihaal i riis uuva naa taq aq'asam chi kik'u'liil, je' rukab' i ruq'or i nuk'uhb'aal.²⁵Eh naa wo' taq aq'asam chi amayiij jinaj imas kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik laj arina ruch'ihil i riis uuva.

²⁶Eh paroo' q'iij naa taq aq'asam chi ak'atoj mayiij i b'elejeeb' chi kok' imas wakax, eh kiib' imas tentzun, eh kajlaj i tentzun ju'jun haab' i wilik keh manlik wach i kiti'jolal.²⁷Eh nik' pa' k'ihaal i kok' imas wakax taq naa aq'asam, nik' pa' kihaal imas tentzun, nik' pa' k'ihaal i kok' tentzun je' wo' re' k'ihaal i holohik laj arina, i riis uuva naa taq aq'asam chi kik'u'liil, je' rukab' i ruq'or i nuk'uhb'aal.²⁸Eh naa wo' taq aq'asam chi amayiij jinaj imas kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik laj arina, ruch'ihil i riis uuva.

²⁹Eh paruwaaq q'iij naa taq aq'asam chi ak'atoj mayiij i waxiqiib' chi kok' imas wakax, eh kiib' imas tentzun. Eh kajlaj i tentzun, ju'jun haab' wilik keh manlik wach i kiti'jolal.³⁰Re' q'oreel nik' pa' k'ihaal i kok' imas wakax taq naa aq'asam, eh nik' pa' k'ihaal imas tentzun. Eh nik' pa' k'ihaal imas tentzun, je' wo' re' k'ihaal i holohik laj arina, je' wo' re' k'ihaal i riis uuva naa taq aq'asam chi kik'u'liil. Je' rukab' i ruq'or i nuk'uhb'aal.³¹Eh naa wo' taq aq'asam chi amayiij jinaj imas kaprax chi pahqb'al kuyb'al taq amahk, noq aq'asam taq chi eqal eqal ak'atoj mayiij, ruch'ihil i holohik laj arina, ruch'ihil i riis uuva.

³²Eh chupaam i ruwuuq q'iij naa taq aq'asam chi ak'atoj mayiij i wuquub' chi kok' imas wakax, eh kiib' imas tentzun. Eh kajlaj i tentzun ju'jun haab' i wilik keh manlik wach i kiti'jolal.³³Eh nik' pa' k'ihaal i kok' imas wakax taq naa aq'asam, nik' pa' k'ihaal imas tentzun, nik' pa' k'ihaal i kok' tentzun, je' wo' re' k'ihaal i holohik laj arina, i riis uuva naa taq aq'asam chi kik'u'liil. Je' rukab' i ruq'or i nuk'uhb'aal.³⁴Eh naa wo' taq aq'asam chi amayiij jinaj i kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik arina, ruch'ihil i riis uuva.

³⁵Eh paruwahxaaq q'iij naa wo' chik taq a'nam i santo laj moloj iib' ye'b'al nuloq'il i hin, hin Dios. Eh chupaam i q'iij re' re' ma' jino'q taq aweh i naa rukamaniik.³⁶Eh naa taq aq'asam chi ak'atoj mayiij jinaj i k'isa imas wakax, jinaj imas tentzun, eh wuquub' tentzun ju'jun haab' i wilik keh, manlik wach i kiti'jolal. Re' taqe i re' ink'ohnik laj mayiij imponik chi nuwach i hin, hin Dios.³⁷Eh nik' pa' k'ihaal kok' imas wakax, taq naa aq'asam, nik' pa' k'ihaal imas tentzun, nik' pa' k'ihaal i kok' tentzun, je' wo' re' k'ihaal i holohik laj arina, riis uuva, naa taq aq'asam chi kik'u'liil. Je' rukab' i ruq'or i nuk'uhb'aal.³⁸Eh naa wo' taq aq'asam chi amayiij jinaj i kaprax chi pahqb'al kuyb'al taq amahk, noq aq'asam taq chik eqal eqal ak'atoj mayiij ruch'ihil i holohik laj arina, ruch'ihil i riis uuva.

³⁹Re' taqe i k'atoj mayiij naa taq aq'asam weh i hin chupaam i ninq'iij q'e' looq'. Eh naa wo' aye'em taq chi amayiij aq'orom taq, re' noq aye'em taq chik amayiij xa panak'ux taq naa ruchaliik, oon re' ruuk' holohik laj arina, oon i riis uuva, oon re' mayiij k'amb'al taq awiib' panotob'il wuuk', inki.

⁴⁰Eh re' Moisés xuq'or wo' keh i aj Israel chu'nchel i xq'orarik reh ruum i QaJaaw Dios. Re' ruq'orariik chi wilik i naa rub'aan

¹Re' i Moisés xuq'oreej taqe i ju'jun chi k'amal kib'eeh i ju'jun ch'uq chi aj Israel, je' wili i xuq'or keh: Re' QaJaaw Dios je' wili xuq'or:²Wila' awach i xuq'or i xti korik reh i Dios chi wilik i naa rub'anam, chi wilik i naa ruye'em ma' naa ta rukahniik chi je' re' koruman chi naa rub'anam aha' wilik i xuq'or.

³Wila' re' jino'q i k'isa q'ahxoq ko patim nahq'ab' i tuut rajaaw xuq'or i xti korik reh i Dios chi wilik i naa rub'anam chi wilik i naa ruye'em.⁴Koruman chi naa ruye'em aha' wilik i xuq'or chi naa ruye'em, eh chi naa rub'anam aha' wilik i xuq'or wila' reht'al i rajaaw, wila' ma' xq'ilarik chub'aan.⁵Eh raaj wila' re' rajaaw xunab'eej chi wilik i naa rub'anam, chi wilik i naa ruye'em i rixq'uun, eh wila' xuq'il chub'aan, neenkuyarik ru mahk ruum i Dios chi ma' nee ta rub'an aha' wilik i xuq'or.

⁶Eh wila' re' q'ahxoq re' re' xub'an kaxáro noq ruq'orom chik i xti korik reh i Dios chi wilik i naa rub'anam, chi wilik i naa ruye'em,⁷wila' xunab'eej i rub'ahiil, eh ma' xuq'il ta chi riij. Re' q'ahxoq re' re' koruman chi naa rub'anam aha' wilik i xuq'or chi naa rub'anam, chi naa ruye'em.⁸Eh raaj wila' xq'ilarik ruum i rub'ahiil neerub'an chi ma' nee ta rub'an aha' wilik i xuq'or chi ma' nee ta ruyeew aha' wilik i xuq'or chi naa ruye'em, neenkuyarik ru mahk ruum i Dios.

⁹Eh raaj wila' ch'aq kaxáro ixoq, oon kamnaq i rub'ahiil xq'orik i xti korik chi wilik i naa rub'anam, koruman chi naa rub'anam.

¹⁰Eh wila' re' jino'q ixoq parupaat i rub'ahiil wilik noq xuq'or i xti korik reh i Dios chi wilik i naa rub'anam, chi wilik i naa ruye'em.¹¹Eh noq neerunab'eej i rub'ahiil, wila' ma' xq'ilarik chub'aan. Re' ixoq re' re' koruman chi naa rub'anam aha' wilik i xuq'or chi naa rub'anam, eh chi naa ruye'em.¹²Eh raaj wila' q'ilarik ruum i rub'ahiil neerub'an chi ma' nee ta rub'an i xuq'or chi naa rub'anam, eh chi ma' nee ta ruyeew i xuq'or chi naa ruye'em, eh neenkuyarik ru mahk ruum i Dios.

¹³Je' re' noq re' ixoq re' rub'ahiil naa ruq'oriik mineerub'an, oon ma' nee ta rub'an aha' wilik xuq'or i xti korik chi naa rub'anam, oon chi naa ruye'em.¹⁴Eh noq neerunab'eej i rub'ahiil, eh wila' xik'ik kiib' ixib'-oq q'iij chi ma' xta xuq'or reh. Ar naa ruk'utiniik chi k'ahchi' ruye'em q'ab' chi naa rub'anam ixoq aha' wilik xuq'or i xti korik chi naa rub'anam, eh chi naa ruye'em.¹⁵Eh wila' wilik chik q'iij rib'iram noq xuq'il i rehk'een chi riij i naa rub'anam i naa ruye'em. Re' b'ahiilb'ees re' re' wach naah i reh naa ruk'ahniik i ru mahk i rehk'een, inki.

¹⁶Re' i taqe k'uhb'aal wili xuq'or i QaJaaw Dios reh i Moisés chi keh i b'ahiilb'ees chi keh i ehk'eenb'ees, chi keh ajaab'ees, chi keh kixq'uun ko wilik kuuk' pankipaat. Re' noq xkiq'aj wach i aj Israel i xb'aan keh kuum i aj Madián

¹Re' i QaJaaw Dios je' wili xuq'or reh i Moisés:²Re' hat chaq'aj wach keh i aj Madián aha' wilik i xkian reh taqe awuch aj Israel, chi riij i re' kora'j naa akimiik reje re' i hat, inki.

³Eh re' i Moisés je' wili i xuq'or keh i aj Israel:
Re' taq i hat cha chop taq atz'a'aamb'aal hiy taq chi q'aq'inik kuuk' i aj Madián parub'ihnaal i QaJaaw Dios chaq'aj taq wach keh i xkian taq aweh.⁴Eh ju'jun miil i naa awesam kuuk' i ju'jun ch'uq chi aj Israel reh chi nee kiooj chi q'aq'inik kuuk', inki.

⁵Je' re' noq ju'jun miil wo' xelik kuuk' i ju'jun ch'uq chi aj Israel kab'laj miil chu'nchel i xiooj chi q'aq'inik.⁶Re' i Moisés ju'jun miil i xresaj ruuk' i ju'jun ch'uq chi aj Israel xutaq'aaj panq'aq'inik, haa' i Finees rak'uun i Eleazar k'amal kib'eeh aj tiij, eh xuk'am reje taqe i kulk wilik chupaam i santo laj ye'aab' xuyohq'eej reje i tuun reh chi naa ruhuupem paam noq naa rutohq'iik i q'aq'inik.⁷Eh i xkian wo' q'aq'inik kuuk' i aj Madián xkikansaj chu'nchel i winaq, je' rukab' i xuq'or i QaJaaw Dios reh i Moisés.⁸Eh xkikansaj wo' haa' i ho'oob' chi kireey i aj Madián, je' wili kib'ihnaal: Evi, Requem, Zur, Hur, Reba. Eh xkikansaj wo' haa' i Balaam rak'uun i Beor.⁹Re' taqe i aj Israel xkik'am chi prexohjik taqe ixoq aj Madián, haa' i kiha'lak'uun kok' taq. Eh xq'ucharik keh chu'nchel i kichikoop, eh xq'ucharik wo' keh i xa chib'ih jariik k'ih taq tz'aaq' chi keh.¹⁰Eh xk'atarik taqe i kitinamiit i ki-itz'ihy naah paat i aj Madián, je' wo' taqe i patineel wilik chi kijunsuut.¹¹Eh chu'nchel i xq'ucharik keh chi je' kiristianu' chi je' taqe kichikoop.¹²Eh xkik'am reje i chuwach i Moisés, chuwach i Eleazar k'amal kib'eeh aj tiij, eh chikiwach taqe i aj Israel wilkeeb' wach k'ixkaab' Moab re' wilik chi chii' i nim ha' Jordán re' ye'aab' wilik chi k'ulwaach i tinamit Jericó.

¹³Eh re' i Moisés, i Eleazar k'amal kib'eeh aj tiij kuch'ihil taqe chu'nchel i k'amal kib'eeh i aj Israel jumehq'iil xi elik cho chi riij i ki-itz'ihy naah paat chi kik'ulariik taqe i q'aq'ineel.¹⁴Eh re' i Moisés ma' k'isiin ta noq xchalik ruk'aah chikinaah i ink'amwik kib'eeh i ju'jun miil chi soldado, je' wo' chikinaah ink'amwik kib'eeh i ju'jun siento chi soldado¹⁵Je' wili i xuq'or keh:
¿Chib'ih reet noq ma' xkuxik taq akansam taqe ixoq?¹⁶Re' taqe ixoq re' re' xitaqchi'jik ruum i Balaam. Re' keh xk'amwik keh i aj Israel chi ximahkunik chuwach i QaJaaw Dios, xkimin chulooq'jiik taqe i tiyoox Baal-peor. Ruum i re' xutaq'aaj chaloq i runimaal yab'ilaal i Dios chikinaah i rutinamiit.¹⁷Je' re' noq yu'naak inchol taq akansam chu'nchel i kok' ak'un je' wo' taqe ixoq keht'al chik q'orinik winaq.¹⁸Eh re' taqe i kok' q'ahxoq ma' keht'al ta q'orinik winaq ma' nee ta taq inakansaj neerub'an chi nee kikahnik taq awuuk'.¹⁹Eh chawunchelaal taq i hat xponik a'an ikaansanik, je' wo' taq i hat xatz'a'j taq i kamnaq, je' wo' taqe ixoq xak'am taq chaloq tikaan pee taq chi riij i itz'ihy naah paat. Chuwach i wuquub' q'iij. Eh koruman chi naa taq asaqb'isam awiib' chuwach ixib' q'iij chuwach i ruwuuq q'iij.²⁰Eh naa wo' taq asaqb'isam kiwach chu'nchel itz'ihy, je' wo' taqe i xa chib'ih jariik korjinaq ruuk' tz'uhuum, i korjinaq ruuk' rismaal riij kaprax, i korjinaq ruuk' chee', inki Moisés.

²¹Re' i Eleazar i k'amal kib'eeh aj tiij, je' wili i xuq'or keh i xi sutinik cho panq'aq'inik:
Re' wili i k'uhb'aal xuq'or i QaJaaw Dios reh i Moisés:²²Re' taqe i chib'ihjariik re' ruuk' i oro, re' ruuk' plata, re' ruuk' i q'an ch'ihch', re' ruuk' rax ch'ihch', re' ruuk' i loch'ik laj ch'ihch', re' ruuk' plomo.²³Je' re' noq chu'nchel i xa chib'ih jariik ch'ihch' korjinaq wii' neerukuy ransil i q'aaq' ruuk' i re' neensaqb'esjik wach. Eh chi riij i re' neentz'ajarik kiwach ruuk' i ha' inkamanik chi saqb'eesb'al wachiis. Eh re' taqe i xa chib'ihjariik ma' inkikuy ta ransil i q'aaq' xa ruuk' ha' naa rusaqb'esjiik kiwach.²⁴Eh chupaam i ruwuuq q'iij nee taq inatz'aj aso' nee taq ti kahnik chi saq chik taq awach. Chi riij i re' kora'j taq nee ti okik re' chupaam taqe i itz'ihy naah paat, inki.²⁵Re' i QaJaaw Dios je' wili i xuq'or reh i Moisés:²⁶Re' hat, awuch'ihil i Eleazar i k'amal kib'eeh aj tiij kuch'ihil taqe i k'amal kib'eeh ju'jun ch'uq chi aj Israel, nee taq i nawajlaaj chu'nchel i xak'am taq chaloq chi je' kiristianu', chi je' chikop i xaq'uch taq cho keh i aj Madián.²⁷Re' taqe i re' kiib' taq neenawesaj yejaal taq i nee nach'aq chikinaah i xi ponik q'aq'ineel, eh yejaal taq i nee nach'aq chikinaah i junch'uq chi aj Israel.²⁸Eh re' taqe i soldado wilik i naa kiq'asam chi kimayiij chi nuwach i hin re' ruuk' i naakik'ulum, ju'jun i naakesam ruuk' i ho'oob' taq siento chi je' kiristianu', chi je' taqe b'oyax, chi je' taqe b'uurux, chi je' taqe tentzun.²⁹Re' hat naa aq'asam reh i Eleazar i k'amal kib'eeh aj tiij, eh naa ruq'asam weh i hin ruum re' taqe re' wee hin, hin Dios.³⁰Re' i naa aye'em keh i aj Israel wilik, wo' naa kiq'asam weh chi kimayiij, ju'jun i naakesam ruuk' i lajeeb' roxk'ahl, chi je' taqe tinamit, chi je' taqe b'oyax, chi je' taqe b'uurux, chi je' taqe tentzun. Eh naa aq'asam keh i aj Levíta i k'amal kib'eeh aj tiij re' kib'anik i nukamaj chupaam i nuSanto laj itz'ihy naah paat.

³¹Eh re' i Moisés ruch'ihil i Eleazar i k'amal kib'eeh aj tiij xkian wo' hoq aha' wilik i xuq'or i QaJaaw Dios reh i Moisés.³²Re' taqe i soldado noq xponik kian i q'aq'inik je' wili k'ihaal i xkiq'uch chaloq waqiib' siento miil ruuk' ho'lajuuj ru kajwinaq miil chi tentzun.³³Eh kab'laj ru kajwinaq miil chi b'oyax.³⁴Eh jinaj ru kajwinaq miil chi b'uurux.³⁵Eh kab'laj ru ka'winaq miil taqe i q'ahxoq ma' keht'al ta q'orinik winaq.³⁶Re' taqe i xi ponik panq'aq'inik yejaal i xkahnik keh ixib' siento ruuk' wuqlaj ru ka'winaq miil ruuk' hoob' siento chi tentzun chu'nchel.³⁷Eh re' xkiyeew reh i QaJaaw Dios waqiib' siento ruuk' ho'lajuuj ru kajwinaq chi tentzun.³⁸Eh re' i b'oyax xkahnik keh waqlaj ru kajwinaq miil chu'nchel. Eh re' i xkiyeew reh i QaJaaw Dios kab'laj rukaj winaq.³⁹Eh re' b'uurux xkahnik keh i soldado lajeeb' ru ka'winaq miil ruuk' hoob' siento. Eh re' i xkiyeew reh i QaJaaw Dios jinaj rukaj winaq.⁴⁰Eh re' taqe i q'ahxoq xkahnik kuuk' waqlaj miil, eh re' xkiyeew reh i QaJaaw Dios kab'laj ru ka'winaq.⁴¹Eh re' i Moisés xuq'asaj wo' reh i Eleazar i k'amal b'eeh aj tiij aha' wilik i xkiyeew chi kimayiij chuwach i QaJaaw taqe i soldado, je' rukab' i xuq'or i QaJaaw Dios reh i Moisés.

⁴²Eh re' yejaal chik i xresaj iloq i Moisés ruuk' xkahnik keh i xi ponik panq'aq'inik, re' i xkahnik keh i aj Israel.⁴³Re' xkahnik keh, xti manlik yejaal, ixib' siento miil ruuk' wuqlaj ru ka'winaq miil ruuk' ho'oob' siento chi tentzun.⁴⁴Eh waqlaj ru ka'winaq miil i b'oyax.⁴⁵Eh lajeeb' ru ka'winaq miil ruuk' hoob' siento, i b'uurux.⁴⁶Eh waqlaj miil taqe i q'ahxoq.⁴⁷Eh re' yejaal re' re' xkahnik keh i aj Israel, re' i Moisés ju'jun i xesaj iloq ruuk' i ju'jun chi lajeeb' roxk'ahl je' re' i xub'an kuuk' i kiristianu', eh je' wo' kuuk' i chikop xuq'asaj keh i aj Levíta re' kikamanik parusanto laj itz'ihy naah paat i QaJaaw Dios, je' rukab' i xuq'or i QaJaaw Dios reh i Moisés.

⁴⁸Eh re' taqe i ju'jun ink'amwik kib'eeh i ju'jun miil i xi ponik q'aq'ineel, je' wo' taqe i ju'jun ink'amwik kib'eeh i ju'jun siento chi soldado xiooj ruuk' i Moisés.⁴⁹Eh je' wili i xkiq'or reh: Re' hoj, i hoj awaj kamanoom xqajlaaj chik i qa soldado chi qa ju'junaal, eh ma' jino'q i xikimik chaloq.⁵⁰Eh wili taqe i xa chib'ih jariik, oro korjinaq wii' chi ju'junaal re' taqe i reh ralaq q'ab'iis, eh kotokaq ch'ihch' lopq'aaq', ka'xikin. Eh wilik xa chib'ih chik jariik, re' taqe re' xchalik qaq'asaj reh i QaJaaw Dios, tojb'al riij chi xooj ruko'leej, inki taqe.

⁵¹Eh re' i Moisés ruch'ihil i Eleazar i k'amal kib'eeh aj tiij xkik'ul aha' wilik taqe i xkiq'uch chaloq re' re' oro taqe korjinaq wii'.⁵²Re' taqe i oro korjinaq wii' xkiq'asaj i k'amal kib'eeh i ju'jun miil, ju'jun siento chi soldado, ik'inaq kijib' kintaal rahliil.⁵³Eh chi kiju'junaal taqe i soldado xkik'am chaloq aha' wilik i xkiq'uch cho keh i aj ixowaal.⁵⁴Eh re' i Moisés, i Eleazar i k'amal kib'eeh aj tiij xkik'ul taqe i oro korjinaq wii' xkik'am chaloq i k'amal kib'eeh i soldado. Eh xkik'am reje chupaam i rusanto laj itz'ihy naah paat molb'al iib', reh chi ma' naa ta rusahchiik paruk'ux taqe i aj Israel. Re' riih rumaam i Rubén, i riih rumaam i Gad xi okik chi patinik chi chii' i nim ha' Jordán (Deut 3.12-22)

¹Re' taqe i jun ch'uq chi riih rumaam i Rubén, ruch'ihil i riih rumaam i Gad, yohb'aal wach k'ihaal i kichikoop. Eh noq i xkilow chi re' ye'aab' Jezer ruch'ihil i ye'aab' Galaad q'e' holohik chi k'ihteesb'al chikop.²Xiooj ruuk' i Moisés, ruuk' i Eleazar, eh kuuk' taqe i k'amal kib'eeh i tinamit, je' wili i xkiq'or ponoq keh:

³Chakoj taq rehtaal taqe i ye'aab' Atarot, i Dibón, i Jazer, nimra Hesbón, i Eleale, i Sebam, Nebo, eh Beón.⁴Re' taqe i ye'aab' re' re' xuchop naah i QaJaaw Dios chi qeh i hoj, hoj aj Israel. Eh q'e' taqe holohik chi k'ihteesb'al i chikop. Re' hoj, hoj amoso wilik qachikoop.⁵Wila' neena a'n otob'il chayeew qeh i hoj taqe i ye'aab' re' re', maayeew q'ab' chi nee qoh ik'ik chi juntar i nim ha' Jordán, inki taqe.

⁶Eh re' i Moisés, je' wili kichaq'weesjiik xub'an:
¿Mi nawaaj taq kahnik re' hat ayu', eh re' taqe i awuch tinamitaal naa kojiik panq'aq'inik?⁷¿Chib'ih reet noq inawaaj taq ayojom kik'ux awuch aj Israel reh chi ma' nee ta kiooj wih-oq chupaam i ye'aab' naa ruye'ariik keh ruum i QaJaaw Dios?⁸Re' taq i hat inawaaj wo' chik a'nam taq aweh je' rukab' i xkian taq aamaam awati't chupaam i ye'aab' Cades-barnea noq xnutaq'aaj taqe chaloq chi rilariik nik' wach noq wilik i ye'aab' re' re'.⁹Re' keh xi ponik paraasb'al ha' Escol, chi rilariik nik' wach noq wilik i ye'aab'. Eh chi riij i re' xkiyoj ruk'ux taqe i k'uch aj Israel reh chi ma' xi ponik ta chupaam i ye'aab' naa naq ruye'ariik keh ruum i QaJaaw Dios.¹⁰Ruum i xkian re' re' ma' k'isiin ta noq xchalik rujosq'iil i QaJaaw Dios, chikinaah. Eh xuq'or i xti korik, je' wili i xuq'or:¹¹Re' taqe i winaq wilik keh i juninaq haab' je' wo' taqe ik'inaq juninaq haab' ma' naa ta kokiik chupaam i holohik ye'aab', ruum ma' xkian taj i xnuq'or keh. Re' ye'aab' xnuq'or i xti korik reh i Abraham, reh i Isaac, reh i Jacob, chi naa nuye'em keh.¹²Xa re' la' wo' hoq i Caleb rak'uun i Jefone naa rokiik ar, ruch'ihil i kanezeo, ruch'ihil i Josué rak'uun i Num xinkinimaj, inki.¹³Eh chupaam taqe i q'iij re' re' ma' k'isiin ta chalik rujosq'iil i QaJaaw Dios chikinaah i aj Israel. Ruum i re' ka'winaq haab' xuyeew taqe chi b'ehiik chupaam i ye'aab' chiq yuuq' korehtaal xkuxik kikimiik nik' nimaal xkiq'etwachej i Dios ruuk' i kiyiib' wach na'ojb'al.¹⁴Eh yu'naak taq i hat, i hat taq cho kiih kimaam i xib'anik cho reh taqe i yiib' wach na'ojb'al re' re' inawaaj wo' chik taq awuksam cho wach i rujosq'iil i QaJaaw Dios chikinaah taq awuch aj Israel.¹⁵Wila' ma' nawaaj taq animam i QaJaaw Dios re' reh konee wo' chik qoh rukanaa' nik'-oq najtiil chupaam i ye'aab' chiq yuuq'. Eh amahk taq i hat wila' xkuxik kikimiik i qatinamiit Israel, inki.

¹⁶Eh re' taqe i riih rumaam i Rubén, taqe i riih rumaam i Gad je' wili xkiq'or reh i Moisés:
Re' hoj xa re' inqaaj chi chupaam i ye'aab' wili naa q'ayejaam i kiye'aab' i qehk'een, i qak'uun qixq'uun, eh kikoraal i qachikoop.¹⁷Eh re' hoj winaq nee wo' qachop qatz'a'amb'aal reh q'aq'inik nee qoh ooj chi peet b'eeh chikiwach i quch aj Israel korehtaal inqakoj taqe chupaam i kiye'aab' naa kiwihiik wii'. Eh re' qehk'een, taqe i qaha'lak'uun nee kikahnik chupaam i ye'aab' wili, reh chi neenkiko'leej kiib' chikiwach i wilkeeb' chupaam i ye'aab' re' re'.¹⁸Eh re' hoj ma' nee ta qoh sutinik cho chupaam i qaye'aab' wili, wila' komajaa' inkichop naah i kiye'aab' i quch aj Israel.¹⁹Wila' xayeew qeh i ye'aab' wili, wilik reje pareelb'aal q'iij reh i nim ha' Jordán. Re' hoj ma' nee ta chik inqapahqaaj qaye'aab' chi juntar i nim ha' Jordán re' naa kiwihiik wii' i keh, inki taqe.

²⁰Eh re' i Moisés je' wili kichaq' wesjiik xub'an:
Wila' korik taq inaq'or, wila' nee taq inachop reje atz'a'aamb'aal reh q'aq'inik je' rukab' i xuq'or i QaJaaw Dios.²¹Eh wila' chawunchelaal taq i hat naa achopom taq atz'a'aamb'aal noq nee taq i naq'at wach i nim ha' Jordán je' rukab' i ruq'or i QaJaaw Dios. Korehtaal taq i nakaaj reje ar taqe i aj ixowaal.²²Eh noq kehchaam chik i ye'aab' re' re' taqe awuch aj Israel. Eh noq a'nam taq chik i ruq'orom i QaJaaw Dios, eh atoob'eem wo' chik taqe i awuch aj Israel nee wo' chik ti sutinik chaloq. Eh re' i QaJaaw Dios nee ruyeew taq aweh i ye'aab' wili.²³Eh wila' ma' xa a'n taq i je' re' nee taq ti mahkunik chuwach i QaJaaw Dios. Eh re' taq i hat naa taq atojom wach amahk re' re'.²⁴Neerub'an chi nee taq inayejaa' i kiye'aab' awehk'een, taqe i aha'lak'uun, nee wo' rub'an chi nee taq inayejaa' i rukoraal aachikoop. Cha a'n taq i xapahqaaj taq ruuk' aachii'.

²⁵Eh re' taqe riih rumaam i Gad, taqe i riih rumaam i Rubén je' wili i xkiq'or reh i Moisés:
Re' hoj, i hoj amoso naaqanam aha' wilik i xaq'or.²⁶Re' taqe i qehk'een, taqe i qaha'lak'uun, ruch'ihil taqe i qachikoop naa kikahniik ayu' chupaam taqe i tinamit wilkeeb' Galaad.²⁷Eh re' hoj, i hoj amoso neenqachop qatz'a'amb'aal nee qohooj chi peet b'eeh chi q'aq'inik, neen qa'an je' rukab' i xuq'or i QaJaaw, je' rukab' i xaq'or qeh i hat, inki taqe.

²⁸Chi riij i re', re' i Moisés xuq'oreej i Eleazar re' k'amal kib'eeh aj tiij, ruch'ihil i Josué rak'uun i Nun, ruch'ihil taqe i ju'jun chi k'amal kib'eeh i ju'jun ch'uq chi aj Israel, je' wili i xuq'or keh:

²⁹Wila' re' taqe i riih rumaam i Gad, taqe i riih rumaam Rubén, awuch'ihil taq noq nee taq inaq'at wach i nim ha' Jordán, kichopom kitz'a'amb'aal reh ojik chi q'aq'inik, je' rukab' i xuq'or i QaJaaw Dios.
Eh nee taq tikitow korehtaal i nawehchaaj i ye'aab' re' re' taq i hat, kora'j taq nee nayeew chi kiye'aab' re' i tinamit Galaad.³⁰Eh wila' ma' xiooj chi q'aq'inik taq chi awuch'ihil ar Canaán taq nee nayeew kiye'aab' re' wo' taq i naa ak'ulum wii' aaye'aab' i hat, inki.

³¹Re' taqe i junch'uq chi riih rumaam Gad, ruch'ihil i junch'uq chi riih rumaam i Rubén, je' wili i chaq'wik xkian:
Re' hoj, hoj amoso neen qa'an aha' wilik i xuq'or i QaJaaw.³²Re' hoj naaqojiik chi q'aq'inik Canaán reh chi neen qa'an i xuq'or i QaJaaw Dios. Chi je' re' neenqehchaaj i ye'aab' wilik chi korkiil reje ireelb'aalq'iij reh i nim ha' Jordán, inki taqe.

³³Eh re' i Moisés xuch'aq keh i riih rumaam Gad, i riih rumaam Rubén, ruch'ihil i yejaal i ch'uq i riih rumaam Manasés rak'uun i José, i rutinamiit i ye'aab' wilik chi junsuut ruchopom naah i Sehón kireey i aj amorreo, je' wo' hoq i rutinamiit i ye'aab' wilik chi junsuut ruchopom naah i Og kireey i aj Basán.³⁴Re' taqe i junch'uq chi riih rumaam Gad xkiyejaa' wo' chik i tinamit je' wili kib'ihnaal: Dibón, Atarot, Aroer.³⁵Atarot-sofán, Jazer, Jogbeha.³⁶Bet-nimra, Bet-arán, xkikoj ko'lb'al reh taqe i tinamit re' re'. Eh xkiyejaa' wo' hoq rikoraal i kitentzuun.³⁷Eh re' taqe i junch'uq chi riih rumaam i Rubén, xkiyejaa' wo' chik i tinamit, je' wili i kib'ihnaal: Hesbón, Eleale, Quiriataim,³⁸Nebo, Baal-meón, Sibma, eh wilik i kijal waach i rub'ihnaal i tinamit i xkiyejaa', rukapeech.

³⁹Eh re' taqe i junch'uq chi riih rumaam i Maquir re' rak'uun Manasés xkichop naah i ye'aab' Galaad xkikoj reje taqe i aj amorreo wilkeeb' naq ar.⁴⁰Eh re' i Moisés xuch'aq keh i riih rumaam i Maquir i ye'aab' Galaad. Re' keh xi okik chi patinik ar.⁴¹Eh je' wo' hoq i Jair re' ruuk' i riih rumaam Manasés. Wilik taqe i ye'aab' xuchop naah re' patim naq taqe wii' i aj amorreo, Havot-jair i rub'ihnaal xukoj.⁴²Eh re' i Noba xuchop wo' naah i ye'aab' Kenat, je' wo' taqe i ye'aab' wilkeeb' wii' patineel wilik chi junsuut. Re' i ye'aab' re' re' Noba rub'ihnaal xukoj ruum je' re' i rub'ihnaal i winaq re' re'. Re' b'ehik xkian i aj Israel noq xi elik cho Egipto, eh xi k'uloq chii' nim ha' Jordán

¹Re' taqe i aj Israel je' wili noq xi elik cho Egipto, kihiil kihiil chaloq, eh chi kich'uhqaal xi chalik je' rukab' noq kib'ehik taqe i soldado. Re' i Moisés, re' i Aarón xk'amwik cho kib'eeh.²Re' i Moisés xutz'ihb'aaj i keliik chaloq Egipto, eh tuslik rutz'ihb'aam taqe i b'ih i ye'aab' kihi'lik wii' je' rukab' i xq'orarik reh ruum i QaJaaw Dios. Eh je' wili i chalik xkian:

³Noq xi elik cho Egipto i aj Israel q'e' kow kiib', ar xi elik cho chupaam i ye'aab' Ramasés chikiwach chu'nchel i aj Egipto, chupaam i ho'lajuuj rub'eeh i peet poh reh i haab' re' re', chi junwaar reh peet ninq'iij xk'isaj i aj Israel ruum i keliik cho Egipto.⁴Eh noq xi elik chaloq manlik k'achi' kimuq'aam chu'nchel i peet kak'uun i aj Egipto re' i xi kanteesjik ruum i QaJaaw Dios ruuk' i re' xresaj i rajaawriik i kitiyoox i aj Egipto.

⁵Re' taqe i aj Israel noq xi elik cho chupaam i ye'aab' Ramesés, ar chik xk'ulik kiyejaa' i ki-itz'ihy naah paat Sucot.

⁶Eh noq xi elik cho Sucot ar chik xk'ulik kiyejaa' i ki-itz'ihy naah paat, Etam wilik reje pank'ula't reh i ye'aab' chiq yuuq'.

⁷Eh noq xi elik cho Etam xi chalik chupaam i ye'aab' Pi-hahirot wilik reje parelb'aal q'iij reh i Baal-zefón. Eh ar chik xk'ulik kiyejaa' i ki-itz'ihy naah paat chuwach i ye'aab' Migdol.

⁸Eh noq xi elik cho Pi-hahirot xi q'ahxik cho juntar palaw xi k'uloq chupaam i ye'aab' chiq yuuq'. Eh ixib' q'iij xib'ehik panchiq yuuq' wilik ar Etam, eh ar chik xk'ulik kiyejaa' i ki-itz'ihy naah paat chupaam i ye'aab' Mara.

⁹Eh noq xi elik cho ar xi ponik chupaam i ye'aab' Elim re' wilik wii' i kab'laj raasb'al ha', eh re' wilik wii' i lajeeb' ru kajwinaq iwal chi kalaab', eh ar xkiyejaa' i ki-itz'ihy naah paat.

¹⁰Eh noq xi elik cho Elim ar chik xk'ulik kiyejaa' i ki-itz'ihy naah paat, chi chii' i kaq palaw.

¹¹Eh noq xi elik cho chi chii' i kaq palaw ar chik xk'ulik kiyejaa' ki-itz'ihy naah paat chupaam i chiq yuuq' wilik Sin.

¹²Eh noq xi elik cho pan chiq yuuq' Sin, ar chik xk'ulik kiyejaa' i ki-itz'ihy naah paat chupaam i ye'aab' Dofca.

¹³Eh noq xi elik cho Dofca, ar chik xk'ulik kiyejaa' i ki-itz'ihy naah paat chupaam i ye'aab' Alús.

¹⁴Eh noq xi elik cho Alús ar chik xk'ulik kiyejaa' i ki-itz'ihy naah paat chupaam i ye'aab' Refidim, re' i ma' inkireq ta wii' kihaa' i tinamit.

¹⁵Eh noq xi elik cho Refidim, ar chik xk'ulik kiyejaa' ki-itz'ihy naah paat chupaam i ye'aab' chiq yuuq' wilik Sinaí.

¹⁶Eh noq xi elik cho Sinaí ar chik xk'ulik kiyejaa' i ki-itz'ihy naah paat chupaam i ye'aab' Kibrot-hataava.

¹⁷Eh noq xi elik cho Kibrot-hataava, ar chik xk'ulik kiyejaa' i ki-itz'ihy naah paat Hazerot.

¹⁸Eh noq xi elik cho Hazerot, ar chik xk'ulik kiyejaa' i ki-itz'ihy naah paat chupaam i ye'aab' Ritma.

¹⁹Eh noq xi elik cho Ritma, ar chik kiyejaa' i ki-itz'ihy naah paat chupaam i ye'aab' Rimón-peres.

²⁰Eh noq xi elik cho Rimón-peres, ar chik xk'ulik kiyejaa' i ki-itz'ihy naah paat chupaam i ye'aab' Libna.

²¹Eh noq xi elik cho Libna, ar chik xk'ulik kiyejaa' i ki-itz'ihy naah paat chupaam i ye'aab' Rissa.

²²Eh noq xi elik cho Rissa, ar chik xk'ulik kiyejaa' i ki-itz'ihy naah paat chupaam i ye'aab' Ceelata.

²³Eh noq xi elik cho Ceelata, ar chik xk'ulik kiyejaa' ki-itz'ihy naah paat chinaah i yuuq' Sefer.

²⁴Eh noq xi elik cho chinaah i yuuq' Sefer, ar chik xk'ulik kiyejaa' i ki-itz'ihy naah paat chupaam i ye'aab' Harada.

²⁵Eh noq xi elik cho Harada, ar chik xk'ulik kiyejaa' i ki-itz'ihy naah paat chupaam i ye'aab' Macelot.

²⁶Eh noq xi elik cho Macetol, ar chik xk'ulik kiyejaa' i ki-itz'ihy naah paat chupaam i ye'aab' Tahat.

²⁷Eh noq xi elik cho Tahat, ar chik xk'ulik kiyejaa' i ki-itz'ihy naah paat chupaam i ye'aab' Tara.

²⁸Eh noq xi elik cho Tara, ar chik xk'ulik kiyejaa' i ki-itz'ihy naah paat chupaam i ye'aab' Matca.

²⁹Eh noq xi elik cho Matca, ar chik xk'ulik kiyejaa' i ki-itz'ihy naah paat chupaam i ye'aab' Hasmona.

³⁰Eh noq xi elik cho Hasmona, ar chik xk'ulik kiyejaa' i ki-itz'ihy naah paat chupaam i ye'aab' Moserot.

³¹Eh noq xi elik cho Moserot, ar chik xk'ulik kiyejaa' i ki-itz'ihy naah paat chupaam i ye'aab' Bene-jaacán.

³²Eh noq xi elik cho Bene-jaacán, ar chik xk'ulik kiyejaa' i ki-itz'ihy naah paat chupaam i ye'aab' Hor wilik Gidgad.

³³Eh noq xi elik cho Hor wilik Gidgad, ar chik xk'ulik kiyejaa' i ki-itz'ihy naah paat chupaam i ye'aab' Jotbata.

³⁴Eh noq xi elik cho Jotbata, ar chik xk'ulik kiyejaa' i ki-itz'ihy naah paat chupaam i ye'aab' Abrona.

³⁵Eh noq xi elik cho Abrona, ar chik xk'ulik kiyejaa' i ki-itz'ihy naah paat chupaam i ye'aab' Ezión-geber.

³⁶Eh noq xi elik cho Ezión-geber, ar chik kiyejaa' i ki-itz'ihy naah paat chupaam i chiq yuuq' wilik Zin, re' Cades.

³⁷Eh noq xi elik cho Cades, ar chik xk'ulik kiyejaa' i ki-itz'ihy naah paat chinaah i yuuq' Hor wilik pank'ula't ruuk' i Edom.³⁸Eh noq wilkeeb' ar xq'orarik reh i Aarón kajaaw i k'amal kib'eeh aj tiij chi xjohtik chinaah i yuuq' Hor, eh ar xkimik chupaam i k'amb'al rub'eeh i roo' poh reh i ru ka'winaq haab' kielik chee aj Israel ar Egipto.³⁹Eh noq xkimik i Aarón chinaah i yuuq' Hor wilik reh i jinaj Siento ruuk' ixib' ru ka'winaq haab'.

⁴⁰Eh re' i kireey i aj Arad wilkeeb' ar Neguev chupaam i ye'aab' Canaán xrib'iraj rib'iral chi naakik'uliik iloq i aj Israel.

⁴¹Eh re' taqe i aj Israel noq xi elik cho chinaah i yuuq Hor ar chik xk'ulik kiyejaa' i ki-itz'ihy naah paat chupaam i ye'aab' Zalmona.

⁴²Eh noq xi elik cho Zalmona, ar chik xk'ulik kiyejaa' i ki-itz'ihy naah paat chupaam i ye'aab' Punón.

⁴³Eh noq xi elik cho Punón, ar chik xk'ulik kiyejaa' i ki-itz'ihy naah paat chupaam i ye'aab' Obot.

⁴⁴Eh noq xi elik cho Obot, ar chik xk'ulik kiyejaa' i ki-itz'ihy naah paat chupaam i ye'aab' Ije-abarim wilik pank'ula't reh i Moab.

⁴⁵Eh noq xi elik cho Ije-abarim, ar chik xk'ulik kiyejaa' i ki-itz'ihy naah paat chupaam i Dibón-gad.

⁴⁶Eh noq xi elik cho Dibón-gad, ar chik xk'ulik kiyejaa' i ki-itz'ihy naah paat chupaam i ye'aab' Almón-diblataim.

⁴⁷Eh noq xi elik cho Almón-diblataim, ar chik xk'ulik kiyejaa' i ki-itz'ihy naah paat chinaah i yuuq' Abarim wilik reje parelb'aal q'iij reh i Nebo.

⁴⁸Eh noq xi elik cho chinaah i yuuq' Abarim, ar chik xk'ulik kiyejaa' i ki-itz'ihy naah paat wach k'ixkaab' Moab, chi chii' i nim ha' Jordán chuwach i tinamit Jericó.⁴⁹Eh re' i ki-itz'ihy naah paat xkiyejaa' chi chii' i nim ha' Jordán xponik ko chupaam i ye'aab' Bet-jesimot xponik wo' hoq ko Abel-sitim chuwach taqe i k'ixkaab' Moab. Re' ruchopariik naah, re' ruch'aqariik i ye'aab' Canaán

⁵⁰Eh chuwach taqe i kixkaab' Moab chi chii' i nim haa' Jordán, chuwach i tinamit Jericó, re' i QaJaaw Dios xuq'oreej chaloq i Moisés, je' wili i xuq'or reh:⁵¹Re' hat je' wili i cha q'or keh i aj Israel: Noq re' taq i hat neenaq'at wach i nim ha' Jordán noq nee taq ti okik chupaam i ye'aab' Canaán.⁵²Eh naa taq awesam taqe reje chu'nchel i tinamit wilkeeb' ar. Eh nee wo' taq i naa xereb'eej chu'nchel i kitiyoox ab'aj korjinaq wii', i kitiyoox haab'imaj ch'ihch'. Eh chayojib'eej wo' taqe i ye'aab' inki a'n wii' i loq'inik chinaah taqe i yuuq'.⁵³Chawesaj taq reje chu'nchel i wilkeeb' ar re' taq chik i hat nee ti okik chi patinik ar ruum re' ye'aab' re' re' nuye'em taq chik aweh i hat.⁵⁴Eh konee nasik' chi riij noq nee nach'aq keh i ju'jun chi aj Israel. Wila' k'ih chi kiib' nim wo' hoq i kiye'aab' nee nayeew, eh wila' ma' k'ih chi kiib' ma' nim ta wo' hoq i kiye'aab' nee nayeew. Re' i ju'jun ch'uq naa wo' kik'ulum aha' wilik i sik'ooj wach chi keh.⁵⁵Eh wila' ma' xawesaj taq reje chu'nchel i patineel wilkeeb' ar. Re' taqe i naa kikahniik ar naa taq kaat kijot'om je' rukab' noq tirujot' taq i ruxeer chee' panaq'awach, oon je' jino'q k'iix taq pan ati'jolal noq wilkaat taq chik chi patinik chupaam i ye'aab' re' re'.⁵⁶Eh re' hin naa nub'anam taq aweh i hat aha' naq wilik i naa nub'anam kekeh, inki. Re' i ruk'ula'tiil chi junsuut i ye'aab' Canaán

¹Re' i QaJaaw Dios je' wili xuq'or reh i Moisés:²Re' hat cha q'or keh i aj Israel chi je' wili: Re' taq i hat xailook' taq chik ti okik chupaam i ye'aab' Canaán, re' i ye'aab' naa rukahniik taq chi aweh. Eh ayu' imponik taqe i ruk'ula'tiil chi junsuut.

³Pansak'aaj reh i rookb'aal q'iij, naa ruk'ula'teem reje i chiq yuuq wilik Zin paruyuq'ul i Edom. Eh naa rutoq'aam reje chi chii' i kamnaq palaw naa rojiik reje chi korik pantz'eet reh i rookb'aal i q'iij naa ruponiik reje parelb'aal i q'iij.⁴Naa ruponiik kowach yuuq' Acrabim, naa rik'iik ponoq Zin naa ruponiik Cades-barnea. Eh chi riij i re' naa rik'iik Hasar-adar, eh naa ruponiik ko Asmón.⁵Eh naa rik'iik reje Asmón, naa ruponiik chi chii' i nim ha' i nik'ik paruk'ula'tiil i ruyuq'ul i Egipto, ar naa rojiik kuxoq chi chii' i palaw Mediterráneo.

⁶Eh re' i ruk'ula'tiil panookb'al reje i q'iij, ar naa ruponiik chi chii' i palaw Mediterráneo.

⁷Eh re' ruk'ula'tiil pantz'eet reje reh i rookb'aal i q'iij, ar naa rutohq'iik reje chi chii' i palaw Mediterráneo, naa ruponiik chinaah i yuuq' Hor.⁸Eh naa rik'iik ponoq chinaah i yuuq' Hor, eh naa ruponiik ko Hamat, naa ruponiik ko Zadad.⁹Eh naa wo' chik rojiik i k'oq Zifrón, eh naa ruponiik Hazar-enán. Ar naa rojiik kuxoq i ruk'ula'tiil taq aye'aab' pantz'eet reje reh i rookb'aal q'iij.

¹⁰Eh re' ruk'ula'tiil parelb'aal reje reh i q'iij, ar naa reliik reje Hazar-enán, naa rik'iik ponoq Safam.¹¹Eh naa rik'iik ponoq Sefam, naa wo' rik'iik ponoq Ribla re' i wilik reje parelb'aal q'iij reh i ye'aab' Aín rub'ihnaal chi riij i re', re' k'ula't naa ruqajiik qohoq parelb'aal q'iij reje reh i palaw kineret.¹²Eh naa wo' rojiik i k'oq ko chi chii' i nim ha' Jordán ko ar naa rojiik kuxoq wach i nk'uxik wii' wach i kamnaq palaw.
Re' taqe i ye'aab' wili, naa ruk'ula'teem chi junsuut i Canaán, re' taq aye'aab' i hat, inki.

¹³Re' i Moisés je' wili i xuq'or keh i aj Israel: Re' taqe i ye'aab' re' re' naa ruye'em taq aweh i QaJaaw Dios xa re' la' konaa taq asik'im chi riij aha' wilik i naa rehchaam i ju'jun ch'uq. Re' QaJaaw, xuq'or chi re' re' naa ruch'aqariik keh i b'elejeeb' ch'uq ruuk' yejaal i ch'uq chi aj Israel.¹⁴Ruum re' i junch'uq chi riih rumaam Rubén, re' i junch'uq chi riih rumaam Gad, je' wo' hoq i yejaal i ch'uq reh i riih rumaam Manasés xkik'ul chik i kiye'aab' i keh.¹⁵Re' taqe i ka'ch'uq ruuk' i yejaal i ch'uq re' re' xi kahnik chi chii' i nim ha' Jordán ar xkik'ul i kiye'aab', parelb'aal q'iij reje reh i nim ha' re' re'. Re' ye'aab' re' re' ar inkahnik chuwach i tinamit Jericó, inki.

¹⁶Eh re' i QaJaaw Dios je' wo' chik wili i xuq'or reh i Moisés:¹⁷Re' naakich'aqwiik i ye'aab' keh i aj Israel re' i Eleazar k'amal kib'eeh aj tiij, eh re' i Josué rak'uun Nun.¹⁸Eh naa wo' kiyuq'eem chikiij i ju'jun i kik'amwik b'eeh chi kixilak i ju'jun ch'uq chi aj Israel reh chi nee kitowik haa' chuch'aqariik i ye'aab',¹⁹Re' naakiyuq'ub'jiik haa' je' wili i kib'ihnaal:
Re' Caleb rak'uun i Jefone i k'amal b'eeh chi kixilak i junch'uq chi riih rumaam i Judá.

²⁰Re' Semuel rak'uun i Amiud i k'amal kib'eeh i junch'uq chi riih rumaam Simeón.

²¹Re' Elidad rak'uun i Quislón i k'amal kib'eeh i junch'uq chi riih rumaam i Benjamín.

²²Re' i Buqui rak'uun i Jogli i k'amal kib'eeh i junch'uq chi riih rumaam Dan.

²³Re' i Haniel rak'uun i Efod i k'amal kib'eeh i junch'uq chi riih rumaam José, eh k'amal wo' kib'eeh i junch'uq chi riih rumaam i Manasés.²⁴Re' i Kemuel rak'uun i Siftan i k'amal kib'eeh i junch'uq chi riih rumaam i Efraín.

²⁵Re' i Elizafán rak'uun i Parnac i k'amal kib'eeh i junch'uq chi riih rumaam i Zabulón.

²⁶Re' i Paltiel rak'uun i Azán i k'amal kib'eeh i junch'uq chi riih rumaam Isacar.

²⁷Re' i Ahiud rak'uun i Selomi i k'amal kib'eeh i junch'uq chi riih rumaam Aser.

²⁸Re' i Pedael rak'uun i Amiud i k'amal kib'eeh i junch'uq chi riih rumaam Neftalí.

²⁹Re' aj taqe i winaq wili i xupab'aa' i QaJaaw Dios chi naa kich'aqam i ye'aab' Canaán keh i aj Israel. Re' taqe tinamit xye'arik keh i junch'uq chi riih rumaam i Leví

¹Re' i QaJaaw Dios je' wili i xuq'or reh i Moisés wach k'ixkaab' Moab chi chii' i nim ha' Jordán chuk'ulwaach i tinamit Jericó:²Re' hat cha q'or keh i aj Israel chi kiyeew kitinamiit taqe i aj Levíta re' i naa ruye'eariik keh reh chi ar neekik'achariik. Eh re' ye'aab' chi junsuut i kitinamiit, neenye'arik keh chi ye'aab' kichikoop.³Ruum re' taqe i aj Levíta koruman chi chupaam taqe i tinamit re' re' naakipatiniik. Eh re' i ye'aab' chi junsuut naa rukamaniik chi ye'aab' kiwakax, eh chu'nchel i kichikoop.⁴Eh re' i naa kianam wii' kiwa' i kichikoop naakiye'em naa ruponiik hoob' siento b'ara chi junsuut i tz'aq sutimaj wii' riij i tinamit.⁵Eh chi riij i tinamit parelb'aal reje i q'iij naakipajam jinaj miil b'ara eh pantz'eet reje reh i rookb'aal q'iij naakipajam i jinaj miil b'ara.
Eh parookb'aal reje i q'iij naakipajam i jinaj miil b'ara, eh pantz'eet reje reh i rookb'aal i q'iij naakipajam jinaj miil b'ara. Eh re' tinamit panyejaal naa rukahniik, eh naa rukahniik chi ye'aab' kichikoop i chi junsuut.

⁶Eh re' i k'ihset chi tinamit naakiye'em reh taqe i aj Levíta waqiib' seht i naa rukahniik chi ke'emb'al iib'. Reh chi ar neenooj rusik' ko'lemb'al riib' awach i nee rukansaj jino'q i ras ruchaaq'. Eh ko ka'winaq seht chik i naakiye'em chi riij i re'.⁷Eh chu'nchel i tinamit naakiye'em reh taqe i aj Levíta naa ruponiik waxiqiib' roxk'ahl haa' i ye'aab' kichikoop.⁸Re' ye'aab' naakiye'em reh taqe i aj Levíta re' q'oreel nik' nimaal i ye'aab' xkik'ul i ju'jun ch'uq chi aj Israel awach taqe i nim xkik'ul nim wo' naakiye'em. Eh awach taqe i ma' nim ta xkik'ul ma' nim ta wo' hoq i naakiye'em reh taqe i aj Levíta inki. Re' taqe i tinamit ke'emb'al iib' (Deut 19.1-13)

⁹Re' i QaJaaw Dios je' wili i xuq'or reh i Moisés:¹⁰Re' hat cha q'or keh i aj Israel taqe i q'orik wili: Noq hat taq chik ik'inaq chi juntar i nim ha' Jordán, noq wilkaat taq chik chupaam i ye'aab' Canaán,¹¹nee taq inasik' wach i ju'jun seht-oq i tinamit reh chi neen kamanik chi ke'emb'al iib'. Eh chi ar naa rojiik kikeb'aam kiib' taqe i ma' xata nkaaj chi neenkikansaj i kas kichaaq'.¹²Eh chupaam taqe i tinamit re' re' neenkiko'leej kiib' chikiwach taqe awach keh i naa kikansam. Re' keh ma' naa ta kikanteesjiik korehtaal inq'atarik i q'orik chikinaah chikiwach taqe i aj Israel.¹³Eh waqiib' seht keh i tinamit i naa taq aye'em keh i aj Levíta naa taq akanaam chi ke'emb'al iib'.¹⁴Re' taqe tinamit ke'emb'al iib' re' re' ixib' i naa rukahniik chi juntar i nim ha' Jordán, eh ixib' i naa rukahniik Canaán.¹⁵Re' taqe waq seht chi tinamit re' re' naa rukahniik chi ke'emb'al kiib' i aj Israel, je' wo' taqe i tokoom tinamit wilkeeb' taq chaxilak, oon xa ik'ik inki a'n taq chaxilak re' taqe i ma' xata nkaaj chi naa kikansam i kas kichaaq'.

¹⁶Eh wila' awach i xukansaj i ras ruchaaq' ruuk' jino'q ch'ihch', re' re' aj kaansoom. Eh re' i aj kaansoom re' re' naa wo' rukanteesjiik i reh.

¹⁷Eh wila' awach i xukansaj ruuk' ab'aj i ras ruchaaq', re' re' aj kaansoom. Eh re' i aj kaansoom re' re' naa wo' rukanteesjiik i reh.

¹⁸Eh wila' awach i xukansaj ruuk' chee' i ras ruchaaq', re' re' aj kaansoom. Eh re' i aj kaansoom re' re' naa wo' rukanteesjiik i reh.¹⁹Eh awach i naa rukanteesjiik re' i ma' tokoom ta ruuk' naa rukansaniik reh i aj kaansoom re' re', xa aha' pa' nee rureq.

²⁰Eh wila' awach i xumihnaaj jino'q i ras ruchaaq' xa ruum chi rixow wach, eh xukut-oq ruuk' jino'q xa chib'ih jariik, xaraaj chi neerub'an reh,²¹oon ruum chi rixow wach nee ruyeew chi q'ab'iis korehtaal-oq xukansaj. Re' i aj kaansoom re' re' naa wo' rukanteesjiik, i reh re' i ma' tokoom ta ruuk' i naa rukansam naa rukansaniik ree reh, xa aha' pa' nee rureq.

²²Eh wila' awach i xumihnaaj i ras ruchaaq' xa chi ma' reht'al neerub'an, ma' ruum ta chi rixow wach, oon neerukut jino'q i xa chib'ih jariik chinaah ma' xata raaj chi neerub'an,²³oon xa chi ma' reht'al neerukut jino'q ab'aj chinaah, eh xkimik-oq ruum, eh mo'-oq i rixow wach, ma' xata raaj chi neerub'an ti' k'axik reh.²⁴Re' tinamit naa rukahniik chi jilow q'atal q'orik chinaah i naa rub'aniik reh ikaansanik ruuk' i raj ruq'ajam wach i rukimiik i awach reh, je' rukab' i ruq'or i k'uhb'aal wili.²⁵Re' taqe i tinamit naakiko'leem awach i xb'anik ikaansanik chuwach iraaj ruq'ajam wach i rukimiik i awach reh. Eh re' i naa rub'aniik ikaansanik naa wo' chik kitaq'aam reje chupaam i tinamit aha' xponik rukeb'aa' riib'. Eh ar naa ruwihiik korehtaal chik inkimik i kajaaw i k'amal kib'eeh aj tiij re' i kuxisamaj cho ruuk' i aseite.

²⁶Eh wila' xelik cho chupaam i tinamit ke'emb'al iib' i xb'anik ikaansanik.²⁷Eh wila' ma' ar chik wilik eh xkanteesjik-oq ruum awach reh i xukansaj ma' re' ta mahk i neerub'an.²⁸Eh awach i neemb'anik ikaansanik re' chik i reh neenkahnik chupaam i tinamit ke'emb'al iib'. Eh korehtaal chik inkimik i kajaaw i k'amal kib'eeh aj tiij kore' chik naa rusutiniik chupaam i rutinamiit i aj kaansoom re' re'.

²⁹Re' taqe i nuq'or taq aweh wili naa rukahniik chi jinaj k'uhb'aal cha weh taq i hat, chi keh taqe awiih aamaam, xa aha' pa' taq nee ti k'acharik, inki.

³⁰Awach i naa rukansam i ras ruch'aaq', neenq'atarik i q'orik chinaah reh i rukanteesjiik, wila' wilik k'ih-oq xiq'orik reh chi korik chi xub'an ikaansanik. Eh wila' xa jinaj ixq'orik chi xub'an ikaansanik ma' ruk'ul taj chi neenkanteesjik.

³¹Eh ma' rub'an ta chi neentojarik ruuk' tumiin i reliik i aj kaansoom i q'atooj chik i q'orik chinaah reh i rukanteesjiik, koruman la' chi naa rukanteesjiik.

³²Eh wila' re' xukansaj i ras ruchaaq' xooj rukeb'aa' riib' chupaam i tinamit ke'emb'al iib', ma' nee ta rub'an chi neerutoj chi neensutinik cho chi jumehq'iil paru tinamiit, naa la' rukahniik ar korehtaal chik inkimik i kajaaw k'amal kib'eeh aj tiij.

³³Maa ch'uwa'reej taq wach ruuk' kaansanik i ye'aab' naa taq awihiik wii'. Ruum re' imb'anik ikaansanik i ruch'uwa'risaj paam i ye'aab'. Eh ma' nee ta i rub'an chi neerutoj riij i ko'lemb'al riib', naa la' rukanteesjiik chi riij ikaansanik xub'an.

³⁴Maa ch'uwa' risaj taq wach i ye'aab' naa taq aak'achariik wii' re' inaa nuwihiik wii' i hin, ruum re' hin i Dios naa wo' nuwihiik taq chaxilak i hat, hat taq aj Israel, inki. Re' wili i k'uhb'aal chi riij i ye'aab' xkehchaaj ixoq

¹Re' Galaad rak'uun i Maquir, re' Maquir i rak'uun i Manasés, re' i Manasés rak'uun José. Re' taqe i k'amal kib'eeh i kiih kimaam taqe re' xiooj chi q'orob'jiik i Moisés ruch'ihil i k'amal kib'eeh i aj Israel,²je' wili i xkiq'or reh:
Re' QaJaaw Dios xuq'or aweh i hat Moisés chi konaa rusik'ariik chi riij noq naa ach'aqam qeh i ye'aab' aha' wilik i naa rukahniik qeh chi qach'uhqaal i hoj aj Israel. Eh xuq'or wo' aweh chi re' ruye'aab' naq Zelofehad i ma' tokoom ta quuk' naa ruye'ariik keh taqe i rixq'uun.³Xa re' la' chik imb'anik reh wila' xkian kaxáro ruuk' i winaq aj pan tokoom ch'uq chi aj Israel, re' i ye'aab' neenkahnik keh, naa rukahniik chi ma' re' ta chik ruuk' i qa ye'aab' i hoj. Naa la' rukahniik chi re' ruuk' i kiye'aab' aha' nakianam kaxáro. Eh re' i qaye'aab' naaqehchaam i hoj ma' manlik ta chik wach neenkahnik.⁴Eh noq naa ruponiik i haab' reh elik panti' k'axik ayu' Israel. Re' i kiye'aab' taqe i rixq'uun i Zelofehad naa rukahniik keh i jun ch'uq aha' i nakianam wii' kaxáro, ma' re' ta chik ruuk' ye'aab' reh i qach'uhqaal i hoj naa rukahniik inki taqe.

⁵Re' Moisés xuq'or keh i aj Israel chib'ih jariik i xq'orarik reh ruum i QaJaaw Dios, je' wili i xuq'or:
Re' taqe i k'amal kib'eeh i ju'jun ch'uq chi riih rumaam i José rub'ehel chi je' re' inkiq'or.⁶Re' i QaJaaw Dios xuq'or chi naa ruye'em q'ab' chi xa awach aj uuk' naa kianam kaxáro taqe i rixq'uun i Zelofehad, xa re' la' koruman chi re' wo' ruuk' i kitinamiit re' ruuk' i ruch'uhqaal i kajaaw.⁷Eh re' i ye'aab' naakehchaam i ju'jun ch'uq chi aj Israel ma' nee ta rub'an chi neenkahnik keh i tokoom ch'uq. Chu'nchel i aj Israel inchol kik'axam i kiye'aab' chupaam i ruch'uhqaal i kitinamiit.⁸Re' jino'q ixoq neerehchaaj i ruye'aab' inchol rub'anam kaxáro ruuk' i winaq, re' wo' ruuk' i ruch'uhqaal rutinamiit i rajaaw. Je' re' noq re' i ju'jun ch'uq chi aj Israel re' wo' chik i keh naa kehchaniik reh i ye'aab' keh chaloq i kimaam kati't.⁹Ma' jino'q i kiye'aab' naakehchaam tokoom chik ch'uq naa rehchaniik reh. Re' ju'jun chuq chi aj Israel inchol ruk'axam i ruye'aab' aha' wilik wii' inki.

¹⁰Nik' wach i xuq'or i Dios reh i Moisés je' wo' re' i xkian i rixq'uun i Zelofehad.¹¹Je' re' noq re' Maala, re' i Tirsa, re' Hogla, re' i Milcá re' i Noa, re' taqe i rixq'uun i Zelofehad kuuk' i rak'uun i kikaan xkian kaxáro.¹²Xkian wo' kaxáro kuuk' i riih rumaam Manasés, kuuk' riih rumaam i José. Eh re' i kiye'aab' xkehchaaj xkahnik wo' hoq chi reh i ruch'uhqaal i rutinamiit i kajaaw.

¹³Re' taqe i wili i xuq'or, i k'uhb'aal xukanaa' i QaJaaw Dios reh i Moisés, reh chi xuq'or keh i aj Israel ar wach k'ixkaab' Moab chi chii' i nim ha' Jordán chi k'ulwaach i tinamit Jericó.

Bible Society in Guatemala

https://app.library.bible/content/695aa4b9f902778f