Read NEHEMIAS 1

NEHEMIAS1

¹Re' taqe q'orik wili xnutz'ihb'aaj i hin, hin i Nehemías rak'uun i Hacalías, re' noq juninaq haab' chik rokiik chi reyil i Artajerjes chupaam i poh Quisleu re' noq wilkiin chupaam i tinamit Susa, re' wilik wii' chi taaq'anik i reey.²Xponik wuuk' i was Hanani, ruch'ihil taqe i kiib' ixib' i winaq xi elik reje Judá. Eh xnupahqaaj keh nik' wach noq wilkeeb' i aj Judío xi k'amarik reje Babilonia, eh xi sutinik wo' chik cho Jerusaleem. Eh xnupahqaaj wo' hoq nik' wach noq wilik i Jerusaleem.³Eh re' keh je' wili xkiq'or weh: Re' taqe aj Judío xi sutinik cho Jerusaleem ti' i k'achi' kikiik wii' k'ixb'ilaal i k'ahchi' kik'ulum, re' tz'aq kotimaj wii' riij i tinamit Jerusaleem ch'a'lojinaq wach ak'al, eh k'ahtinaq taqe ru puertahiil, inki taqe.

⁴Noq xb'iraj i taqe i q'orik wili, ma' k'isiin ta xtib'ik nuk'ux, xnutzunaa' wiib' chi oq'ik. Eh xnub'an nutiij chuwach i kiib' ixib' q'iij chi ma' nub'anam ta nuwa' nuhaa' chuwach i Dios wilik cho pan taxaaj.⁵Je' wili xnuq'or panutiij: QaJaaw Dios wilkaat pan taxaaj xa re' wo' hat i Dios nim awajaawriik xiik' naah yohb'aalil awach. Ruum re' hat i na a'n chi juneliik i ayejaam wach. Eh inaketelaaj kiwach taqe i kik'axwik aweh, eh inki a'n taqe ruq'or aak'uhb'aal.⁶QaJaaw Dios chab'iraj tii chakoj tii rehtaal chib'ih jariik i nupahqaaj aweh i hin, hin awaj kamanoom. Re' hin chi q'iij chi aq'ab', inupahqaaj kuyb'al kimahk aweh i wuch aj Israel, re' taqe awaj kamanoom. Korik wo' hoq noq ximahkunik chawach i hin, je' wo' taqe i awach weh.⁷Xti korik wo' hoq chi xiik' naah yib'kiil wach qohb'anik chawach. Ma' qa a'n taj i ruq'or taqe aak'uhb'aal je' wo' hoq i qataq'ab'jiik i na a'n, je' wo' hoq i qoh atijeej wii', re' taqe aak'uhb'aal xakanaa' reh i Moisés awaj kamanoom.⁸K'oloq panak'ux i xaq'or reh i Moisés chi wila' re' hoj xoj mahkunik chawach xaq'or chi naa atukem qawach chupaam i ju'jun chi tokoom tinamit.⁹Eh xaq'or wo' hoq chi wila' xojsutinik wo' chik awuuk' wixqanimaj wo' chik taqe aak'uhb'aal, wila' xqa a'n taqe i ruq'or. Xaq'or chi naa wo' chik kooj ak'amam cho chupaam i santo laj tinamit asik'im cho wach chi aa ye'aab', atoob' ta atukem naq chik qawach chupaam taqe i tokoom tinamit wilkeeb' sut i wach ak'al.

¹⁰Je' aj re' noq re' hat QaJaaw Dios maqoh sahchik panak'ux ruum hoj wo' aatinamiit xoj ako'leej chaloq ruuk' i runimaal awajaawriik.¹¹QaJaaw Dios i nupahqaaj aweh chi nee ta tiinab'iraj nutiij nee ta tii nayeew weh i nupahqaaj aweh i hin awaj kamanoom. Re' inqaaj i hoj re' chi naaqaye'em aloq'il, qoh atoob'eej reh chi nee nelik korik chi qawach ineenqapahqaaj ree reey. Neeta naq i ruketelaaj qawach i reey kinki panutiij, chupaam i ye'aab' re' re' i hin, hin naq ye'el ruhaa' i reey. Re' reey Artajerjes xutaq'aaj chee Nehemías Jerusaleem

¹Noq juninaq chik haab' rokiik chi reyil i Artajerjes chupaam i poh Nisán re' hin k'ahchi' nuye'em ruhaa' i reey, re' reh xukoj rehtaal chi q'e' intz'irik nuwach.²Xupahqaaj weh chi je' wili:
¿Chib'ih inak'ul je' nchi q'e' ti' ak'ux, je' nchi hat yowaab', je' nchi wilik ak'axkiil? noq inwil inki.
Noq xuq'or weh chi je' re' i reey yohb'aal wach noq xchalik nuyo'jiik.³Eh re' hin je' wili ruchaq'weesjiik xnub'an:
Qajaaw reey nee ta naq inwihik aak'achariik chi juneliik. Re' hin q'e' ti' nuk'ux ruum re' i tinamit muqulkeeb' wii' i numaam wati't xkiyojib'eej, eh xkik'at taqe i ru puertahiil, ruum taqe re' q'e' ti' nuk'ux, kinki.

⁴Re' reey je' wili i xuq'or weh: ¿Chib'ih inawaaj chi nee tinutob'eej wii'? inki.
Eh re' hin xnub'an nutiij chuwach i Dios wilik pan taxaaj.⁵Je' wili ruchaq'weesjiik i reey xnub'an:
Qajaaw reey wila' ch'iklik ak'ux wuuk' i hin, hin awaj kamanoom chayeew q'ab' weh chi nee kinooj pan tinamit Judá, re' muhqinaq wii' taqe i numaam wati't reh chi neenooj nuyejaa'.

⁶Re' reey tz'unlik chucheel i rehk'een noq xupahqaaj weh chi je' wili:
¿Nik' najtiil inooj a'an jaruuj ti sutinik chaloq? inki.
Re' hin xnuq'or reh i q'iij jaruuj kinsutinik reje, re' reey xuk'ul ruk'ux, xirutaq'aaj wo' cho Judá.⁷Eh je' wo' chik wili i xnuq'or reh i reey:
Wila' nee ruyeew riib' chawach cha tz'ihb'aaj jino'q nuhuuj pankib'ihnaal iwilkeeb' chi taaq'anik chi juntar i nim ha' Éufrates, reh chi neen kiyeew q'ab' weh chi nee kinokik ar, korehtaal neekimponik Judá.⁸Eh xnupahqaaj reh chi naa rutz'ihb'aam jino'q i huuj parub'ihnaal i Asaf, incha'jinik reh i ye'aab' i resaj wii' ruchee' i reey, reh chi neenwesaj i chee' ar, yejeemb'al reh taqe i ru puertahiil i tinamit. Eh reh wo' chi naa nuyejaam i paat naa nuwihiik wii' i hin, je' wo' hoq i tz'aq kotimaj wii' riij i tinamit, eh re' reey xuyeew wo' weh i xnupahqaaj reh, ruum xirutoob'eej i Dios.

⁹Re' hin jumehq'iil xin chalik kuuk' i wilkeeb' chi taaq'anik chi juntar i nim ha' Éufrates, eh xnuq'asaj keh i huuj xutaq'aaj cho weh i reey. Eh re' reh xutaq'aaj cho chi wiij i kajaaw i soldado, je' wo' taqe i soldado rij kawáyu kib'ehik.¹⁰Eh re' Sanbalat, aj pan tinamit Horón, ruch'ihil i Tobías, re' wilik chi taaq'anik ar Amón ma' k'isiin ta xchalik kik'aah noq xkib'iraj chi wilik i xooj k'oloq chi kitoob'jiik taqe i aj Israel. Re' i Nehemías xuyeew rukowiil kik'ux i tinamit chi naa wo' chik kiyejaam i koraal tz'aq

¹¹Noq ixib' chik q'iij nuk'uliik Jerusaleem,¹²xin wuktik chaq'ab' kiib' ixib' taqe i winaq wuch'ihil. Xa re' la' komajaa' naq awach eh i nuq'or i xuq'or weh i Dios, chi naa nub'anam chi toob'al reh i tinamit Jerusaleem. Eh ma' awach ta chik i xchalik rij kawáyu, xa re' wo' chik i hin xin chalik rij kawáyu.¹³Eh chupaam aq'ab' re' re', xoj elik chupaam i puerta wilik reje chi korkiil i k'achlik ha' wilik chuwach i k'ixkaab' Dragón rub'ihnaal, eh xoj ponik chi chii' i puerta i nelik wii' sohk' xwilow chi yojinaq i tz'aq wilik chi junsuut i Jerusaleem. Eh k'atoj taqe i ru puertahiil.¹⁴Chi riij i re' xoj ooj k'oloq i wilik wii' i puerta, wilik wii' i k'achlik ha', xoj ooj k'oloq ruuk' i tz'aq i rumol wii' ruhaa' i reey, xa re' la' ar ma' xub'an ta chik reje ik'ik i nukawayu wilkiin chi riij.¹⁵Noq komajaa' insaq'ik xoj ooj chi chii' i rooq ha' xnukoj rehtaal chi yojinaq i koraal tz'aq, eh xoj sutinik wo' chik chaloq xoj k'ulik wo' chik iloq i wilik wii' i puerta inilwik reje wach k'ixkaab'.

¹⁶Re' taqe i aj taaq'oom ma' keht'al ta naq aha' kinooj, eh chib'ih i k'ahchi' nub'anam. Eh xakomajaa' ta wo' naq i nuq'or keh i aj Judío, keh i k'amal kib'eeh aj tiij, je' wo' keh i nimaq kiwach, eh ni xata re' taqe i kamanoom kieht'alinik reh chib'ih i k'ahchi' kiin.¹⁷Re' hin je' wili i xnuq'or keh:
Re' taq i hat aweht'al taq chib'ih i ti' k'axik k'ahchi' qik'iik wii'. Re' i Jerusaleem xkiyojib'eej, eh xkik'atib'eej taqe i ru puertahiil. Re' hin inwaaj chi nee wo' chik inqayejaa' taq awuuk' i tz'aq sutimaj wii' riij i Jerusaleem, reh chi ma' nee ta qoh kahnik pan k'ixb'ilaal, kinki keh.

¹⁸Eh re' hin xnuk'utjaaj keh nik' wach noq xirutoob'eej i nuDios, xnuk'utjaaj wo' keh chib'ih i xuq'or weh i reey. Re' keh je' wili i xkiq'or:
Neerub'an chi nee qoh okik chi kamanik reh chi nee wo' chik inqayejaa' i qatinamiit, inki taqe.
K'ul xkiyeew rukowiil kik'ux chikiwach noq xi okik chi kamanik.

¹⁹Xa re' la' noq xrib'iraj i Sanbalat aj pan tinamit Horón chi je' re' ruch'ihil i Tobías, wilik chi taaq'anik ar Amón, ruch'ihil i Gesem aj árabe xoj kikaqse'laaj, je' wili xkiq'or qeh:
¿Chib'ih taq aweht'al i hat mi nee taq naq'at wach re' i ruk'uhb'aal i reey panak'ux? inki taqe.

²⁰Eh re' hin je' wili i xnuq'or keh:
Re' Dios wilik pan taxaaj naakooj resam korik. Re' hoj, i hoj raj kamanoom naa wo' chik qayejaam i Jerusaleem. Ma' nee ta i rub'an chi nee taq i namin awiib' quuk' ruum ma' hat ta taq aj ayu' Jerusaleem, ma' re' ta taq i hat q'oreel aweh, kinki keh, inki. Xtohq'ik wo' chik kiyejaam aha' wilik taqe i yojinaq

¹Re' Eliasib kajaaw i k'amal kib'eeh aj tiij, ruch'ihil i k'amal kib'eeh aj tiij junch'uq xkiyejaa' i puerta kiokik wii' i tentzun, eh wilik wo' chik taqe i puerta xkikoj. Eh xkiyejaa' wo' tz'aq kotimaj wii' riij i tinamit, ar xkitoq'aa' reje i wilik wii' inajt naah tz'aq Hamea, eh xponik i wilik wii' inajt naah tz'aq Hananeel.²Eh re' koraal tz'aq wilik chucheel reje re', re' taqe i winaq aj Jericó xiyej-anik reh. Eh re' chucheel reje re' Zacuur xyej-anik reh i rak'uun i Simri.³Re' i nimlaj puerta ink'ayjik wii' kar, re' taqe i riih rumaam i Senaa xiyej-anik reh. Eh xkikoj i chee' pan tz'aq, xkikoj taqe i ru puertahiil, xkikoj taqe i nimaq ch'ihch' chi tz'apb'al riij.⁴Eh re' koraal tz'aq wilik reje chucheel, re' Meremot riih i Cos xyej-anik reh. Eh re' chucheel reje, re' Mesulam rak'uun i Berequías, riih i Mesezabeel xyej-anik reh. Eh re' chucheel reje i re', re' Sadoc rak'uun i Baana xyej-anik reh.⁵Re' koraal tz'aq chucheel reje i re', re' taqe i aj Tecoa xiyej-anik reh. Xa re' la' re' taqe i nimaq kiwach chi kixilak ma' xkaaj ta okik haa' chub'aan i rukamaj i QaJaaw.⁶Eh re' najtir puerta re' Joiada, rak'uun i Paseah, ruch'ihil i Mesulam, rak'uun i Besodías xiyej-anik reh. Xkikoj i chee' pan tz'aq, eh kiyejaa' taqe i ru puertahiil xkikoj taqe nimaq ch'ihch' tz'apb'al riij.⁷Re' koraal tz'aq wilik chucheel reje re', re' i Melatías xyej-anik reh ruch'ihil i winaq aj Gabaón, ruch'ihil i Jodón aj Mizpa. Re' taqe tinamit re' re' wilkeeb' chi ri'sil i kajaawriik i wilkeeb' chi taaq'anik chi juntar i nim ha' Éufrates.⁸Eh re' koraal tz'aq chucheel reje i re', re' i Uziel rak'uun i Harahia aj ch'eyel plata xyej-anik reh, re' Hananías, rak'uun inyej-anik ink'ohnik laj iq'oom xtoob'inik reh, eh re' taqe i kiib' chi winaq re' re' xikuxisanik reh i koraal tz'aq chi riij i Jerusaleem korehtaal xponik kireq i nim wach tz'aq.⁹Eh re' koraal tz'aq chucheel reje i re', re' Refaías rak'uun i Hur xyej-anik reh. Re' winaq re' re' wilik chi taaq'anik chinaah i yejaal i tinamit Jerusaleem.¹⁰Eh re' koraal tz'aq chucheel reje i re', re' Jedaías rak'uun i Harumaf, xyej-anik reh chuwach i rupaat wilik reje. Eh chucheel reje i re', re' Hatús rak'uun i Hasabnías xyej-anik reh.

¹¹Eh re' koraal tz'aq chucheel reje i re', re' Malquías rak'uun i Harim xyej-anik reh, ruch'ihil i Hasub rak'uun i Pahat-moab. Eh xkiyejaa' wo' hoq inajt kinaah tz'aq wilik wii' i horna.¹²Eh re' koraal tz'aq chucheel reje i re', re' Salum rak'uun i Halohes xyej-anik reh. Re' winaq re' re' wilik chi taaq'anik chinaah i yejaal i tinamit Jerusaleem, eh xitowik wo' haa' taqe i rixq'uun.¹³Eh re' puerta inilwik reje wach k'ixkaab', re' Hanún xyej-anik reh, ruch'ihil taqe i wilkeeb' chupaam i ye'aab' Zanoa xkiyejaa' wo' chik chi korik. Eh xkikoj wo' chik taqe i ru puertahiil xkikoj taqe i nimaq ch'ihch' tz'apb'al riij. Eh xkiyejaa' wo' hoq hoob' siento b'ara i koraal tz'aq, xponik chi chii' i puerta i nelik wii' i sohk'.¹⁴Re' Malquías rak'uun i Recab wilik chi taaq'anik chinaah i ye'aab' Bet-haquerem xyej-anik reh i puerta i nelik wii' i sohk', xukoj taqe i puerta, xukoj taqe i nimaq ch'ihch' tz'apb'al riij.

¹⁵Re' Salum rak'uun i Colhoze wilik chi taaq'anik chinaah i ye'aab' Mizpa xyej-anik reh i puerta, xukoj naah xukoj taqe i chee' pan tz'aq xukoj taqe i ru puertahiil, xukoj taqe i nimaq ch'ihch' tz'apb'al riij. Eh xuyejaa' wo' i tz'aq reh i jul ha' Siloe, wilik ma' najt ta ruuk' i rutik wii' ruhtz'uub' i reey. Eh xkiyejaa' wo' koraal tz'aq xponik i wilik wii' i ixkaleria tz'aq reh i rutinamiit i reey David.¹⁶Eh re' koraal tz'aq chucheel reje i re', re' Nehemías rak'uun Azbuc xyej-anik reh. Re' winaq re' re' wilik chi taaq'anik chinaah i yejaal i tinamit Bet-sur. Eh xuyejaa' wo' koraal tz'aq xponik aha' muhqinaq wii' i reey David, xponik wilik wii' i tz'aq molb'al ha', eh xponik wilik wii' i kipaat i soldado.

¹⁷Eh re' koraal tz'aq chucheel reje i re', re' taqe i aj Levíta, ruch'ihil Rehum rak'uun i Bani ixyej-anik reh, re' i wilik reje chucheel i re', re' Hasabías xyej-anik reh, xub'an parub'ihnaal i rutinamiit, re' wilik chi taaq'anik chinaah i yejaal i tinamit Keila.¹⁸Eh re' koraal tz'aq chucheel reje i re', re' taqe kuch'ihil xiyej-anik reh. Re' Bavai rak'uun i Henadad wilik chi taaq'anik chinaah i yejaal i tinamit Keila.¹⁹Eh re' koraal tz'aq chucheel reje i re', re' i Ezer rak'uun i Jesúa xyej-anik reh, re' wilik chi taaq'anik chinaah i tinamit Mizpa. Eh xuyejaa' i koraal tz'aq imponik ko parutz'ukaal i paat inkimol wii' i kamamb'al reh q'aq'inik.²⁰Eh re' koraal tz'aq chucheel reje i re', re' i Baruc rak'uun Zabai kow xkamanik. Wilik wo' chik i koraal tz'aq xuyejaa', ar xutoq'aa' reje pan tz'uk xponik chi chii' i rupuerta i Eliasib re' i kajaaw i k'amal kib'eeh aj tiij.²¹Eh re' koraal tz'aq chucheel reje i re', re' i Meremot rak'uun i Urías riih i Cos xyej-anik reh. Ar xutoq'aa' reje chi chii' i ru puertahiil i rupaat i Eliasib koxponik inkuxik wii' rupaat.

²²Re' koraal tz'aq i chucheel reje re', re' taqe i k'amal kib'eeh aj tiij patim taqe wach k'ixkaab' Jordán xiyej-anik reh.²³Eh re' koraal tz'aq chucheel reje i re', re' Benjamín, i Hasub xiyej-anik reh, re' wilik reje chuwach i kipaat. Re' koraal tz'aq wilik chucheel reje i re', re' Azarías rak'uun i Maasías, riih Ananías xyej-anik reh, ma' najt ta ruuk' rupaat Azarías.²⁴Re' koraal tz'aq wilik chucheel reje i re', re' Binúi rak'uun i Henadad, xyej-anik reh. Ar xutoq'aa' reje ruuk' i rupaat i Hazarias xponik pan tz'uk.²⁵Eh re' koraal tz'aq chucheel reje i re', re' Palal rak'uun i Uzai, xyej-anik reh, re' i koraal tz'aq wilik pan tz'uk, ma' najt ta ruuk' inajt naah tz'aq chuwach i rupaat i reey wilik reje pantehlik, i wilik wii' i kitz'ahpik wii' aj tz'ilom. Re' koraal tz'aq chucheel reje i re', re' Pedaías rak'uun i Faros xyej-anik reh.²⁶Eh re' taqe i kikamanik chupaam i rupaat i Dios, taqe i patim chinaah i yuuq' Ofel xiyej-anik reh i koraal tz'aq xponik chuwach i puerta ki-ik'ik wii' i b'ehlan haa'. Ar xponik chi korkiil reje ireelb'aalq'iij ma' najt ta ruuk' inajt naah tz'aq.²⁷Eh re' koraal tz'aq chucheel reje i re', re' wo' chik taqe i aj Tecoa xiyej-anik reh. Ar xkitoq'aa' reje, chuwach inajt naah tz'aq, eh xponik i wilik wii' i koraal tz'aq Ofel.

²⁸Eh re' re' taqe i k'amal kib'eeh aj tiij xiyej-anik reh i koraal tz'aq, ar xkitoq'aa' reje ruuk' i puerta i kiokik wii' i kawáyu, eh chi kiju'junaal xkiyejaa' i tz'aq chi korkiil i kipaat.²⁹Eh re' koraal tz'aq chucheel reje i re', re' Sadoc rak'uun i Imer xyej-anik reh i tz'aq wilik chuwach i rupaat. Eh chucheel reje i re', re' Semanías rak'uun i Secanías xyej-anik reh, re' incha'jinik reh i puerta wilik reje pareelb'aal q'iij.³⁰Eh re' koraal tz'aq chucheel reje i re', re' Hananías, rak'uun i Selemías xyej-anik reh, ruch'ihil i Hanún, re' ruwaaq i rak'uun i Salaf. Re' koraal tz'aq xkiyejaa' i keh re' i Mesulam rak'uun i Berequías. Re' koraal tz'aq xuyejaa', ar wilik chuwach reje i rupaat.³¹Eh re' koraal tz'aq chucheel reje i re', re' i Malquías rak'uun i aj ch'eyel plata xyej-anik reh, xponik ruuk' i kipaat i kikamanik i parupaat i Dios xponik i wilkeeb' wii' i aj k'aay xponik ruuk' puerta imb'aan wii' q'ataj q'orik. Eh xponik i ruuk' inajt naah tz'aq pan tz'uk imb'aan wii' cha'jinik.³²Eh re' koraal tz'aq chucheel reje i re', re' taqe i aj ch'eyel, plata i aj yakool xiyej-aanik reh. Ar xkitoq'aa' reje ruyejeb'jiik pan tz'uk i wilik wii' inajt naah tz'aq imb'aan wii' i cha'jinik, eh xponik i wilik wii' i puerta ki-ik'ik wii' tentzun. Re' taqe aj Israel ma' xyoj ta kik'ux kuum i aj ixowaal

¹Noq xunab'eej i Sanbalat chi k'ahchi' wo' chik qayejaam chi korik i koraal tz'aq yohb'aal wach noq xchalik ruk'aah, xoj rukaqse'laaj i hoj, hoj aj Judío.²Eh je' wili i xuq'or keh i ruch'ihil, eh keh i ki soldado i aj Samaria:
¿Chib'ih jariik inki a'n i aj Judío ma' xta kikowiil? ¿Mi nkikapaaj re' chi naa wo' chik ruye'ariik i q'ab' keh chi naa kiye'em i kimayiij? ¿Mi neenkiyejaa' re' chuwach i jinaj q'iij i koraal tz'aq? ¿Mi nee wo' chik inkesaj cho pan pooq re' taqe ab'aj xik'ahtik? inki.

³Re' Sanbalat ruch'ihil i Tobías, aj Amón je' wili xuq'or:
Chawil taq i koraal tz'aq k'ahchi' kiyejaam ruuk' ab'aj xa jinaj chi pahar neenq'eb'wik reh wila' xjohtik chinaah, inki taqe. Re' Nehemías xub'an rutiij

⁴Re' hin xnub'an nutiij je' wili xnuq'or: QaJaaw Dios chab'iraj i qab'ajariik inki a'n i, nee ta tii naasutej wach kinaah inki a'n qeh. Eh chayeew q'ab' chi neekik'amarik reje pan tokoom tinamit kuum i aj ixowaal.⁵Maa kuy kimahk ruuk' i kiyiib' wach na'ojb'al, eh mansahchik panak'ux i kimahk. Ruum re' keh k'ahchi' kib'ajam taqe i k'ahchi' kiyej-anik reh i koraal tz'aq, kinki.

⁶Re' hoj xoj ooj chi qawach chi rutinamiit i koraal tz'aq xponik panyejaal i runajtiil naah ruum re' i tinamit xkiyeew kik'ux chi kamanik.⁷Eh re' i Sanbalat, re' Tobías, re' taqe aj árabe, re' taqe aj Amón, re' taqe i aj Asdod ma' k'isiin ta xchalik kik'aah noq xkib'iraj chi k'ahchi' chik ruk'ulum riib' i koraal tz'aq chi riij i Jerusaleem.⁸Eh xkian jinaj wach kik'ux chi xchalik chi q'aq'inik kuuk' i aj Jerusaleem, reh chi naa kiye'em panti' k'axik.⁹Noq xqib'iraj chi je' re' i hoj xqa'an qatiij chuwach i Dios, eh xqakoj taqe aj cha'jen qeh chi q'iij chi aq'ab' ko'lemb'al qiib' chikiwach.¹⁰Eh re' taqe i aj Judá je' wili xkiq'or: Ma' xta chik kaansil taqe aj ihq ko wilik i tz'aq yojinaq ma' nee ta inkikuy rehtesjiik, ruum aj re', re' hoj naa qakanaam ruyejeb'jiik, inki taqe.

¹¹Eh re' taqe i ki-ixowanik qawach je' wili i xkiq'or: inqaaj chi ma' nee ta inkinab'eej chi ma' nee ta qoh kilow xa kowilkooj chik chikinaah noq neenkik'raaj neenqakansaj taqe, eh neenqapab'aa' i kamanik re' re', inki taqe.¹²Xa re' la' re' taqe i aj Judío patim ma' najt ta kuuk' k'ipech xk'ulik kiq'or, qeh chi k'ul naa kokiik cho chi q'aq'inik quuk' taqe i aj ixowaal re' re'.¹³Eh re' hin xnukoj taqe i ju'jun chi patineel wilik kiq'aslaj ch'ihch', wilik kiq'as ju' ch'ihch', wilik kiflecha pan kiq'ab' chupaam i ye'aab' komajaa' injohtik wii' i tz'aq, je' wo' hoq aha' i komajaa' i ruk'ul riib'.¹⁴Eh noq xwilow chi xchalik kiyo'jiik xi wuktik johtoq je' wili i xnuq'or keh k'amal b'eeh, i wilkeeb' chi taaq'anik, i ruqox i tinamit:
Matyo'jik taq kuum k'oloq taq panak'ux chi re' i QaJaaw Dios, inqayohleej wach xiik' naah nimaal i rajaawriik. Naa rub'aniik i peleto taq chawiij, chikiij taq aatinamiit, taqe awak'uun, awixq'uun, chikiij taqe awehk'een, taqe awach aweh taq panapaat, kinki keh.

¹⁵Eh noq re' taqe i ki-ixowanik qawach xkinab'eej chi re' hoj xqanab'eej chib'ih jariik i xkiyejaa' wach chi naa kianam qeh, eh chi xkinab'eej chi re' i Dios xuyoj wach i xkiyejaa' wach, re' hoj chi qunchelaal wo' chik xoj okik chi rutinamiit i koraal tz'aq.¹⁶Chupaam q'iij re' re' yejaal taqe i waj kamanoom xnukoj chi kamanik, eh yejaal taqe i xnukoj chi cha'jinik, kiyohq'eem kiq'as ju' ch'ihch', kipulato ch'ihch', kiflecha, eh kikojom kich'ihch' so'. Re' taqe i k'amal b'eeh xkiyeew kik'ux chi toob'jiik taqe i aj Judá,¹⁷re' taqe i k'ahchi' keeb' chi rutinamiit i koraal tz'aq. Eh re' taqe aj ihq xkichop wo' chik kik'ux chi k'amaj ihq, xa re' la' ruuk' i jinaj kiq'ab' kikamanik, eh ruuk' i kiq'ab' jinaj kichopom i kiq'aslaj ch'ihch'.¹⁸Chu'nchel i k'ahchi' keeb' chi rutinamiit i koraal tz'aq wilik kiq'aslaj ch'ihch' nah kituuq. Eh chi nucheel i hin wilik inxulinik reh i tuun.¹⁹Eh re' hin je' wili i xnuq'or keh i k'amal kib'eeh, keh i aj taaq'oom, keh i tinamit:
Re' kamanik wili nim wach, ma' k'isiin taj iraaj b'anarik. Re' hoj noq k'ahchi'kooj chi rutinamiit i koraal tz'aq najt qaxilak chi qaju'junaal.²⁰Eh aha' neenab'iraj taq chaloq chi neenxuuljik i tuun jumehq'iil taq neenamol awiib' quuk', ruum re' i QaJaaw Dios naa rub'aniik i peleto taq chawiij, kinki keh.

²¹Re' hoj xa re' wach insaq'ik qoh okik chi kamanik, eh korehtaal inokik i q'iij, eh yejaal keh i kamanoom wilik i kiq'aslaj ch'ihch' pan kiq'ab'.²²Eh xnuq'or wo' keh i tinamit chi re' keh haa' i kimoso naa kikahniik Jerusaleem chi cha'jinik chaq'ab', eh chi neenkian i yej-anik tz'aq pan q'iij.

²³Eh ni xata re' hin, ni xata re' taqe i ma' tokoom ta wuuk', ni xata re' taqe i kitowik weh, ni xata re' taqe i aj cha'joom wilkeeb' wuuk', ni xata re' taqe i k'ijolaq wilkeeb' wuuk' inkesaj i kiso' chikiij, xa re' wo' noq inqa'an qitiin noq inqesaj i qaso' chiqiij. Re' k'axkiil xwihik chikiwach i aj Judío

¹Chupaam taqe i q'iij re' re', re' taqe winaq, je' wo' taqe kehk'een xtohq'ik kiwech'um kiib' kuuk' i kuch aj Judío.²Wilik taqe i je' wili i xkiq'or: Re' hoj k'ih taqe i qak'uun qixq'uun, k'uxumb'al qeh inqaaj, naa qasik'im aha' naa ruchaliik qatrigo reh chi ma' nee ta qoh kimik ruum qawa', inki taqe.³Eh wilik i xiq'orik reh chi je' wili: Ruum i wi'jaleel xqayeew chi kemeel i ruhujil i qakaal, i qapaat, xqayeew wo' qatik chi riij i tumiin, inki taqe.⁴Eh wilik i kiq'orik reh chi je' wili: Re' hoj koxqakemelej qatumiin reh chi xqa'an i tooj ruuk' i reey, xqakanaa' ruhujil i qak'aal, eh xqayeew i qatik chi riij.⁵Re' hoj eliik wach qati'jolal kuuk' i b'ehoom. Eh re' taqe i qak'uun, qixq'uun i hoj elik wo' wach ruuk' i kak'uun kixq'uun i keh. Xa re' la' ruum ruti'kiil inqak'ayej chi mosojik i qak'uun qixq'uun kuuk' i keh. Eh wilik taqe i qixq'uun qak'ayem chik keh chi mosojik, yu'naak ma' nee ta chik i ruyee riib' chi neenqaq'uch keh ruum ma' xta chik wilik qeh. Re' i qak'aal, ruch'ihil i qatik qamu'uun tokoom chik inehchanik reh, inki taqe.

⁶Eh noq xb'iraj taqe i xkiq'or, re' hin ma' k'isiin ta noq xchalik nuk'aah.⁷Eh noq nukapaam chik riij chi korik xnuq'il taqe i b'ehomaq, taqe wilkeeb' chi taaq'anik, je' wili xnuq'or keh:
¿Mi holohik re' chi napahqaaj taq tojb'al riij atumiin keh taq aatinamiit? kinki keh.
Eh xnuq'or wo' keh chi naa kimolom kiib' reh chi naa qaq'oriik chi riij i re'.⁸Eh je' wili xnuq'or keh:
Re' hoj xti ko aha' i xuyeew riib' chi qawach xqesaj taqe chaloq i quch tinamitaal aj Judío chi ri'sil i kajaawriik i tokoom tinamit. Eh re' taq i hat yu'naak k'ahchi' wo' taq chik aloq'om reh chi nee wo' chik inqaloq' i hoj, kinki keh.
Re' keh ma' xichaq'wik taj ruum ma' inkireq ta chik chi riij chib'ih i naa kiq'orom.

⁹Re' hin je' wo' chik wili xnuq'or keh:
Re' taq i k'ahchi' kaat re' re' ma' holohik taj, ma' nayohleej ta taq i Dios, k'ahchi' taq a'nam aweh i yiib' wach na'ojb'al inki a'n i tokoom tinamit ki-ixowanik qawach reh chi nee qoh kikaqse'laaj.¹⁰Re' hin, re' taqe i kikamanik chi nuto'ool qaye'em wo' qatumiin i hoj, qaye'em wo' ki trigo chi kemeel i quch aj Judío, xa re' la' re' hoj naa qakuyum kimahk ruuk' i kikemeel re' re'.¹¹Re' hin i nupahqaaj otob'il aweh taq i hat chi yu'naak chaq'asaj taq i ruhujil kak'aal, i kipaat, je' wo' hoq i ki uuva, i ki olivo. Chaq'asaj wo' chik taq keh i rak'uun taq atumiin xkitoj riij taq aweh, je' wo' hoq i trigo, i aseite, riis uuva taq xak'ul.

¹²Eh re' taqe i b'ehoom je' wili chaq'wik xkian:
Re' hoj nee wo' chik inqaq'asaj keh chu'nchel i re', ma' naa ta chik apahqaam keh je' rukab' i xaq'or, inki taqe.
Eh re' hin xnuyuq'eej taqe i k'amal kib'eeh aj tiij chikiwach i keh xkiq'or i xti korik chi naa kia'nam i xkiq'or.¹³Re' hin xnukihraaj wach i nuso', je' wili xnuq'or keh:
Je' wili i naa rub'anam i QaJaaw Dios noq naa risam taqe cho pankipaat, pan kiye'aab' awach taqe i ma' naa ta kianam i xkiq'or korik chi naa kianam. Eh naa ruq'uchariik i chib'ih keh, kinki.
Chu'nchel i kimolom kiib' ar je' wili xkiq'or:
Je' ta naq re', inki taqe, eh xkiloq'ej i Dios. Re' tinamit xkian wo' hoq i xkiq'or.

¹⁴Eh juninaq chik haab' rokiik chi reyil i Artajerjes noq xirupab'aa' chi taaq'anik chinaah i tinamit Judá. Eh xponik kab'laj ru ka'winaq haab' chik rokiik chi reyil, eh chuwach i kab'laj haab' re' re', ni xata re' hin, ni xata re' taqe to'ool weh xqak'ul qatojb'aal, ni xata xqapahqaaj k'uxumb'al qeh.¹⁵Eh re' taqe i aj taaq'oom wihinaq taqe cho chi peet chi nuwach jinaj nimlaj ihq xkiyeew wach naah i tinamit, ruum i iqal i iqal inkipahqaaj ka'winaq chi tumiin re' ruuk' i plata, inki pahqaaj k'uxumb'al keh je' wo' riis uuva. Eh re' taqe i kikamanik kuuk' chu'nchel xkipahqaaj, re' hin ma' je' ta re' i xnub'an, ruum i nuyohleej i Dios.¹⁶Eh xnuyeew wo' nuk'ux chi rutinamiit i koraal tz'aq chi riij i tinamit. Re' hin ma' xnuloq' ta wak'aal. Re' taqe i xitowik weh xkiyeew wo' kik'ux chub'aan i kamanik.¹⁷Eh jinaj siento ruuk' lajeeb' roxk'ahl taqe i aj Judío xi wihik panupaat, eh chi kixilak i re' xi wihik taqe i raj kamanoom ajaab'ees. Eh ma' xwaajlaaj ta taqe haa' i kichalik chupaam i tinamit wilkeeb' chi qajunsuut.¹⁸Eh re' inkiyejaa' chi k'uxumb'al weeh rajlaal i q'iij, inkikansaj jinaj i b'ooyax, waqiib' i tentzun re' ruuk' i sik'ooj kiwach wilik taqe i kixlaan, eh xiik' naah k'ihaal i riis uuva inkik'am cho weh rajlaal lajeeb' q'iij. Atoob' ta yohb'aal wach insahchik ma' nik' ta xnupahqaaj k'uxumb'al weh keh i tinamit ruum weht'al i hin chi yohb'aal wach i ihq wilik chikinaah i tinamit.

¹⁹QaJaaw Dios nee ta tii nakoj paruman aha' wili i holohik xnub'an kuuk' i tinamit wili. Xkiyejaa' naq wach chi naa kianam reh i Nehemías

¹Noq xkib'iraj i Sanbalat, i Tobías, i Gesem, aj árabe, re' taqe i kikomoon i ki-ixowanik, qawach, chi re' hin xnuyejaa' wo' chik i koraal tz'aq chi riij i tinamit chi ma' xta chik k'isinoq tehlik xnukanaa' atoob' ta komajaa' wo' naq i nukoj taqe i ru puertahiil.²Re' Sanbalat, ruch'ihil i Gesem reh xkitaq'aaj cho nuk'amariik, je' wili xkiq'or weh, kim quuk' ayu' reh chi neenqamol qiib' chupaam jino'q keh i ye'aab' wilkeeb' wii' patineel Ono, inki taqe. Re' naq inkaaj chi naa kianam weh.³Eh re' hin wilik taqe i aj taqareel xnutaaq'aaj reje, je' wili xnuq'or keh: Re' hin ma' nee ta ruyeew riib' chi nee taq kinooj awuuk' ruum jinaj i kamanik k'ahchi' kiin q'e' nim wach. Eh wixnukanaa' junk'aam-oq, neenchahmik, kinki reje keh.⁴Eh re' keh kajpech xkitaq'aaj cho nuyuq'ub'jiik, eliik wach i xkiq'or chaloq. Re' hin kajpech xnuchaq'weej taqe, elik wach i xnuq'or reje keh.

⁵Eh paroo' pech re' Sanbalat xutaq'aaj cho wuuk' jinaj i rumoso xuk'am chaloq jinaj i huuj tehlik naah,⁶je' wili i ruq'or chupaam i huuj: Xelik rib'iral, eh xuq'or chi korik i Gesem chi re' hat awuch'ihil taqe aatinamitaal inawaaj b'ila' taq awesam awiib' chi ri'sil i rajaawriik i reey, ruum b'ila' re' k'ahchi' taq ayejaam i koraal tz'aq. Eh re' b'ila' hat inawaaj okik chi reyil.⁷Eh xapab'aa' b'ila' chik taqe i jalal ruq'oral i Dios, reh chi nee ti kipab'aa' chi reyil ar Jerusaleem, reh chi naa kiq'orom chi wilik chik reey ar Judá. Re' re' yohb'aal neemponik rib'iral ruuk' i reey Artajerjes, ruum aj re' ti chaloq wuuk' reh chi neenq'orik chi riij, inki cho weh.

⁸Re' hin je' wili i xnutaq'aaj ruq'orariik reh: Chu'nchel inaq'or re' re' ma' korik taj xa hat ti kapeb'inik reh, kinki reje.⁹Chu'nchel i xkian qeh re' re' xayohb'esb'al qeh, xa re' naq inkaaj chi ma' xqakohlaajta ruyejeb'jiik i koraal tz'aq. Eh re' hin xnub'an nutiij, je' wili xnuq'or:
QaJaaw Dios chayeew tii rukowiil qak'ux reh chi neenqakohlaaj aakamaj, kinki.

¹⁰Chi riij i re' xinooj parupaat i Semaías rak'uun i Delaía, riih i Mehetabel. Re' Semaías rutz'apam riib' parupaat, je' wili xuq'or weh:
Chupaam aq'ab' yu'naak naa kichaliik chakantesjiik, taq qamol qiib' ko chupaam i rupaat i Dios neenqatz'ap taqe ru puertahiil neenqakeb'aa' qiib' ko chupaam, inki.

¹¹Eh re' hin je' wili i xnuq'or reh:
Jino'q winaq je' rukab' i hin, ¿Mi ruk'ul re' chi neenyo'jik? ¿Mi ruk'ul re' chi nenooj nukeb'aa' wiib' chupaam i rupaat i Dios chi ko'lb'al riij i nuk'achariik? Re' hin ma' nee ta nooj nukeb'aa' wiib' ar, kinki reh.

¹²Eh re' hin xnukoj rehtaal chi ma' re' tee Dios xq'orik reh i xuq'or weh. Re' reh xuq'or weh chi je' re' ruum xtojarik ruum i Sanbalat, ruum i Tobías.¹³Re' keh xkitoj xa reh naq chi naa nuyo'jiik, reh naq chi naa numahkuniik. Reh naq chi xelik rib'iral chi ma' holohik taj i k'ahchi' kiin, reh naq chi na nuk'uhtaam nuk'ixb'ilaal.

¹⁴Eh re' hin je' wili xnuq'or: QaJaaw Dios chakoj rehtaal i k'ahchi' keeb' weh i Sanbalat, i Tobías. Ma' nsahchik wo' panak'ux i ma' holohik taj rub'an i Noadías ixoq jalal naq aq'oral, je' wo' xkian i junch'uq chijalal naq aq'oral i k'ahchi' kiin kiyohb'isam, kinki. Re' noq xkikohlaaj ruyejeb'jiik i koraal tz'aq chi riij i tinamit Jerusaleem

¹⁵Re' koraal tz'aq xkuxik ruyejeb'jiik chupaam i ho'oob' ru ka'winaq rub'eeh i poh Elul. Eh kab'laj roxk'ahl q'iij xkikohlaaj wii' ruye'jeb'jiik.¹⁶Eh re' taqe i ki-ixowanik qawach ruch'ihil taqe i tinamit wilkeeb' chi qajunsuut xkib'iraj rib'iral chi xkuxik ruyejeb'jiik i koraal tz'aq yohb'aal wach noq xchalik kiyo'jiik xchalik kik'ixiik ruum xkikoj rehtaal chi re' i QaJaaw Dios xtoob'inik qeh chi rutinamiit.

¹⁷Chupaam taqe q'iij re' re' wilik taqe i k'amal kib'eeh i aj Judá xkitz'ihb'aj reje ruhuuj i Tobías, eh rutaq'aaj wo' chik cho jilow.¹⁸Ruum ma' k'isiin taqe i aj Judá wilkeeb' chi riij i Tobías ruum re' reh rujii' i Secanías, rak'uun i Ara. Eh ruum wo' hoq chi re' Johanán, xuk'am chi rehk'een i rixq'uun i Mesulam, i rak'uun i Berequías.¹⁹Eh inkik'utjaaj wo' chi nuwach i holohik laj na'ojb'al xub'an i Tobías, inkiq'or wo' reh chib'ih taqe nuq'or i hin. Re' Tobías wilik taqe i huuj i rutaq'aaj cho chi yohb'esb'al weh. Re' Nehemías xupab'aa' taqe i kamanoom

¹Noq xqakohlaaj ruyejeb'jiik i koraal tz'aq, qakoj taqe i puerta, xqapab'aa' taqe i cha'jen reh, xqapab'aa' taqe i aj tz'uyineel, je' wo' taqe i aj Levíta.²Eh xnupab'aa' Hanani i nuchaaq' ruch'ihil i Hananías chi re' keh naakilwiik reh i tinamit Jerusaleem. Re' reh kajaaw soldado korik wach ruk'ux chikiwach taqe i junch'uq, eh i ruyohleej i QaJaaw Dios.³Eh je' wili xnuq'or keh: Konaa rutz'aab'iik i q'iij noq naa taq atehem taqe i ru puertahiil i Jerusaleem, eh konaa rokiik i q'iij noq naa taq atz'apam, naa taq alutz'um riij chi korik, naa taq apab'aam i naa kicha'jiniik reh i Jerusaleem.
Eh re' chaq'ab' xa chi' kipaat naa kianam chee cha'jinik, kinki keh.

⁴Re' tinamit wili nim chi korik xa re' la' komajaa' k'ih taqe i tinamit wilkeeb' chupaam, ruum komajaa' inkorjik taqe i paat chupaam i tinamit. Re' taqe i xi sutinik cho Babilonia (Esd 2.1-7)

⁵Re' QaJaaw Dios xuyeew panwánima chi xnumol kiwach i aj taaq'oom chinaah i tinamit, je' wo' taqe i k'amal b'eeh, je' wo' taqe i tinamit, reh chi naa kajaljiik i ju'jun ch'uq chi patineel. Eh xnureq i huuj tz'ihb'amaj wii i kib'ihnaal i ju'jun chi patineel xi sutinik cho chi peet. Je' wili noq tz'ihb'amaj rehtaliil:

⁶Re' taqe wili i aj Israel aasjinaq taqe paruyuq'ul i Judá, re' ruk'amam taqe reje Babilonia i reey Nabucodonosor xi sutinik wo' chik cho Jerusaleem. Eh ar xi kahnik chupaam i kitinamiit chi kiju'junaal paruyuq'ul i Judá.⁷Re' taqe i xk'amwik cho kib'eeh je' wili kib'ihnaal: Zorobabel, Jesúa, Nehemías, Azarías, Raamías, Nahamani, Mardoqueo, Bilsán, Misperet, Bigvai, Nehum, Baana.
Eh je' wili kib'ihnaal i winaq aj Israel xi sutinik wo' chik chaloq.⁸Re' taqe riih rumaam i Paros kiib' miil ruuk' jinaj siento ruuk' kab'laj ru kajwinaq taqe.⁹Re' Taqe i riih rumaam i Sefatías ixib' siento ruuk' kab'laj ru kajwinaq taqe.¹⁰Re' taqe i riih rumaam i Ara waqiib' siento ruuk' kab'laj roxk'aahl taqe.¹¹Re' taqe i riih rumaam i Pahat-moab, re' ruuk' taqe i Jesúa, i Joab kiib' miil ruuk' waxiqiib' siento ruuk' waxaqlaj taqe.¹²Re' taqe i riih rumaam Elam jinaj miil ruuk' kiib' siento ruuk' kajlaj roxk'ahl taqe.¹³Re' taqe i riih rumaam i Zatu waxiqiib' siento ruuk' ho'oob' roxk'ahl taqe.¹⁴Re' taqe i riih rumaam i Zacai wuquub' siento ruuk' oxk'ahl taqe.¹⁵Re' taqe i riih rumaam i Binúi waqiib' siento ruuk' waxiqiib' roxk'ahl taqe.¹⁶Re' taqe i riih rumaam i Bebai waqiib' siento ruuk' waxiqiib' ru ka'winaq taqe.¹⁷Re' taqe i riih rumaam Azgad kiib' miil ruuk' waqiib' siento ruuk' kiib' ru ka'winaq taqe.¹⁸Re' taqe riih rumaam i Adonicam waqiib' siento ruuk' wuquub' ru kajwinaq taqe.¹⁹Re' taqe riih rumaam i Bigvai kiib' miil ruuk' wuquub' siento ruuk' wuquub' ru kajwinaq taqe.²⁰Re' taqe i riih rumaam i Adín waqiib' siento ruuk' ho'lajuuj roxk'ahl taqe.²¹Re' taqe riih rumaam Ater, re' ruuk' taqe aj Ezequías kiib' chik ma' jinaj siento taqe.²²Re' taqe i riih rumaam i Hasum, ixib' siento ruuk' waxiqiib' ru ka'winaq taqe.²³Re' taqe i riih rumaam i Bezai, ixib' siento ruuk' kijib' ru ka'winaq taqe.²⁴Re' taqe i riih rumaam i Harif jinaj siento ruuk' kab'laj taqe²⁵Re' taqe riih rumaam i Gabaón ho'oob' chik ma' jinaj siento taqe.

²⁶Re' taqe i winaq wilkeeb' Belén, i wilkeeb' Netofa, jinaj siento ruuk' kajwinaq ruuk' waxiqiib' taqe.²⁷Re' taqe winaq wilkeeb' Anatot jinaj siento ruuk' waxiqiib' ru ka'winaq taqe.²⁸Re' taqe winaq wilkeeb' Bet-azmavet kiib' roxk'ahl taqe.²⁹Re' winaq wilkeeb' Quiriat-jearim i wilkeeb' Cafira, i wilkeeb' Beerot, wuquub' siento ruuk' ixib' roxk'ahl taqe.³⁰Re' taqe winaq wilkeeb' Ramá, wilkeeb' Geba, waqiib' siento ruuk' jinaj ru ka'winaq taqe.³¹Re' taqe winaq wilkeeb' Micmas jinaj siento ruuk' kiib' ru ka'winaq taqe.³²Re' taqe winaq wilkeeb' Bet-el, i wilkeeb' Hai, jinaj siento ruuk' ixib' ru ka'winaq taqe.³³Re' taqe i winaq wilkeeb' chupaam i tinamit jinaj chik Nebo rub'ihnaal, kab'laj roxk'ahl taqe.³⁴Re' riih rumaam i Elam jinaj chik, jinaj miil ruuk' kiib' siento ruuk' kajlaj roxk'aahl taqe.³⁵Re' taqe riih rumaam i Harim, ixib' siento ruuk' juninaq taqe.³⁶Re' taqe winaq wilkeeb' Jericó, ixib' siento ruuk' hoob' roxk'ahl taqe.³⁷Re' i kiih kimaam i Lod, i Hadid, i Ono, wuquub' siento ruuk' jinaj ru ka'winaq taqe.³⁸Re' taqe i riih rumaam i Senaa, ixib' miil ruuk' b'elejeeb' siento ruuk' lajeeb' ru ka'winaq taqe.

³⁹Re' taqe i k'amal kib'eeh aj tiij riih rumaam taqe Jedaías, ma' tokoom ta taqe cho ruuk' i Jesúa, b'elejeeb' siento ruuk' oxlaj ru kajwinaq taqe.⁴⁰Re' taqe i riih rumaam i Imer, jinaj miil ruuk' kab'laj roxk'ahl taqe.⁴¹Re' taqe riih rumaam i Pasur, jinaj miil ruuk' kiib' siento ruuk' wuquub' roxk'ahl taqe.⁴²Re' taqe riih rumaam i Harim jinaj miil ruuk' wuqlaj taqe.

⁴³Re' taqe i aj Levíta i re' taqe riih rumaam i Jesúa, i riih rumaam i Cadmiel, i riih rumaam i Hodavías, kajlaj ru kajwinaq taqe.

⁴⁴Re' taqe i aj tz'uuy riih rumaam i Asaf, jinaj siento ruuk' waxiqiib' roxk'ahl taqe.

⁴⁵Re' taqe i kicha'jinik reh taqe i puerta, re' i taqe i riih rumaam i Salum, re' taqe riih rumaam i Ater, taqe riih rumaam i Talmón, taqe i riih rumaam, Acub taqe i riih rumaam i Hatita, taqe riih rumaam i Sobai, jinaj siento ruuk' waxaqlaj ru ka'winaq taqe.

⁴⁶Re' taqe i kikamanik chupaam i rupaat i Dios, re' taqe i riih rumaam i Ziha, taqe i riih rumaam i Hasufa, taqe riih rumaam i Tabaot.⁴⁷Re' taqe i kiih kimaam i Queros, i Siaha, i Padón.⁴⁸Re' kiih kimaam i Lebana, i Hagaba, i Salmai.⁴⁹Re' kiih kimaam i Hanán, i Gidel, i Gahar.⁵⁰Re' kiih kimaam i Reaía, i Rezín i Necoda.⁵¹Re' kiih kimaam i Gazam, i Uza, i Paseah.⁵²Re' taqe i kiih kimaam i Besai, i Mehunim, i Nefisesim.⁵³Re' taqe i kiih kimaam i Bacbuc, i Hacufa, i Harhur.⁵⁴Re' taqe kiih kimaam i Bazlut, i Mehida, i Harsa.⁵⁵Re' taqe i kiih kimaam i Barcos, i Sisara, i Tema.⁵⁶Re' taqe kiih kimaam i Nezía, i Hatifa.

⁵⁷Re' taqe i kiih kimaam i xi kamanik ruuk' i Salomón. Re' taqe i kiih kimaam i Sotai, i Soferet, i Perida.⁵⁸Re' taqe i kiih kimaam i Jaala, i Darcón i Gidel.⁵⁹Re' taqe i kiih kimaam i Sefatías, i Hatil, i Poqueret-hazebaim, i Amón.

⁶⁰Je' re' noq chu'nchel i xi kamanik chupaam i rupaat i Dios, i kiih kimaam i xi kamanik ruuk' i Salomón, ach waxiqiib' ma' kijib' siento taqe.

⁶¹Re' taqe wili i xi chalik chupaam taqe i tinamit Tel-mela, Tel-harsa, Querub, Adón, Imer. Xa re' la' re' taqe re' ma' xkiq'or taj mi re' ruuk' taqe i manlik aj Israel, ruum ma' xkiq'or taj awach chee kimaam kati't.⁶²Re' taqe i kiih kimaam i Delaía, i Tobías, i Necoda waqiib' siento ruuk' kiib' roxk'aahl taqe.⁶³Re' taqe i k'amal kib'eeh aj tiij re' taqe i kiih kimaam i Habaia, i Cos, i Barzilai, re' i xuk'am chi rehk'een jinaj ixoq, re' ruuk' taqe i riih rumaam i Barzilai jinaj chik aj Galaad. Re' ixoq re' re' xukoj i rub'ihnaal chi je' rukab' i kib'ihnaal i keh.⁶⁴Re' taqe re' xsik'arik i kib'ihnaal panhuuj tz'ihb'amaj wii' i kib'ihnaal i k'amal kib'eeh aj tiij, eh ma' xkan taj i kib'ihnaal ar ruum aj re' xi ehteesjik cho chi kixilak.⁶⁵Eh re' aj taq'oom xuq'or chi ma' naa ta kik'uxum keh i k'uxumb'al kuxisamaj, kore' jino'q i k'amal kib'eeh aj tiij naa rusik'wik chi riij chi rukojom i Urim reh chi' ruk'ux, je' wo' hoq i Tumim.

⁶⁶Eh re' i tinamit xkimol cho kiib' xi chalik Jerusaleem kiib' roxk'ahl miil ruuk' ixib' siento ruuk' oxk'ahl taqe.⁶⁷Chi ma' xi ajaljik ta haa' i kimoso winaq, i kimoso ixoq, wuquub' miil ruuk' ixib' siento ruuk' wuqlaj ru ka'winaq taqe. Eh chi kixilak i re' kiib' siento ruuk' hoob' roxk'ahl taqe i aj tz'uyineel chi winaq chi ixoq.⁶⁸Eh wuquub' siento ruuk' waqlaj ru ka'winaq i kikawayu, eh kiib' siento ruuk' hoob' roxk'ahl i ki ixoq kawáyu.⁶⁹Eh kijib' siento ruuk' ho'lajuuj ru ka'winaq kicameyo, eh waqiib' miil ruuk' wuquub' siento ruuk' juninaq kib'uruux.

⁷⁰Eh re' taqe k'amal kib'eeh i ju'jun chi patineel, xkiyeew i kimayiij, reh i kamanik. Eh re' aj taaq'oom xuq'asaj ik'inaq wuqlaj libra chi oro reh i molwik tumiin, lajeeb' roxk'ahl nimaq kulk, eh hoob' siento ruuk' lajeeb' ru ka'winaq i kiso' i k'amal kib'eeh aj tiij.⁷¹Eh re' mayiij xkiyeew reh i molwik tumiin, taqe i k'amal kib'eeh i ju'jun chi patineel ixib' siento ruuk' kab'laj roxk'ahl libra i oro, eh kiib' miil ruuk' waqiib' siento ruuk' kiib' ru kajwinaq libra i plata.

⁷²Eh re' i mayiij xkiyeew i tinamit ixib' siento ruuk' kab'laj roxk'ahl libra i oro, eh kiib' miil ruuk' kijib' siento ruuk' juninaq libra i plata wuquub' rukajwinaq i kiso' i k'amal kib'eeh aj tiij.⁷³Re' taqe i k'amal kib'eeh aj tiij, taqe i aj Levíta, taqe i kicha'jinik reh taqe i ru puertahiil i rupaat i Dios, taqe i aj tz'uyineel, taqe kikamanik chupaam i rupaat i Dios, eh chu'nchel i aj Israel, xi kahnik chi patinik pan kitinamiit. Re' i Esdras xrilow wach i santo laj huuj chikiwach i tinamit

¹Eh chu'nchel i aj Israel xkimol kiib' Jerusaleem chupaam i tehlik wilik reje chuwach i ookb'al i ki-ik'ik wii' i b'ehlan ha'. Eh xkiq'or reh i Esdras aj tz'ihb' chi chuk'am chaloq i huuj tz'ihb'amaj wii' i ruk'uhb'aal i Dios ye'ooj reh i Moisés chi keh i aj Israel.²Eh pank'amb'al rub'eeh i ruwuuq poh re' Esdras i k'amal rub'eeh aj tiij xuk'am chee huuj tz'ihb'amaj wii' i k'uhb'aal, reh chi xrilow wach chikiwach i tinamit chi winaq chi ixoq, eh chikiwach xireqwik chi riij.³Re' Esdras ar wilik chupaam i tehlik wilik reje chupaam ookb'al ki-ik'ik wii' b'ehlan ha', wahq'eq xutoq'aa' korehtaal xponik kab'lajora i q'iij chi rilariik wach i huuj chikiwach chu'nchel i re', chi winaq chi ixoq, eh chikiwach i xireqwik chi riij, xankiyeew chik i kixikin chi rib'irjiik i k'uhb'aal tz'ihb'amaj panhuuj.

⁴Eh re' Esdras ink'uhtanik reh i k'uhb'aal pa'lik chinaah i tusuuj tz'ilom korjinaq chi xa re' wo' kamaj. Re' taqe i winaq pa'alkeeb' i koq parusak'aaj i Esdras, je' wili kib'ihnaal: Matatías, Sema, Anías, Urías, Hilcías, Maasías. Eh re' taqe i pa'alkeeb' i koq parutz'eet je' wili i kib'ihnaal: Pedaías, Misael, Malquías, Hasum, Hasbadana, Zacarías, Mesulam.⁵Re' i Esdras xuteh wach i huuj reh i k'uhb'aal chikiwach i tinamit, eh chu'nchel xi ilwik reh ruum najt naah pa'lik cho wii' i reh. Eh noq xuteh wach i huuj chu'nchel i tinamit xipahik johtoq.⁶Re' Esdras xuloq'ej i QaJaaw Dios nim rajaawriik, chu'nchel i tinamit xkijosaj i kiq'ab' pan taxaaj je' wili xkiq'or: Je' ta naq re', je' ta naq re', inki taqe. Eh xkiloch' kiib' korehtaal xkireq wach ak'al ruuk' i yejal kiwach chulooq'jiik i Dios.

⁷Eh re' taqe aj Levíta i je' wili kib'ihnaal: Jesúa, Bani, Serebías, Jamin, Acub, Sabetai, Hodías, Maasías, Kelita, Azarías, Jozabed, Hanán, Pelaía, k'ahchi' kich'ob'om rub'ehel i k'uhb'aal keh i tinamit. Eh re' tinamit k'ahchi' kib'iram pan kiye'aab'.⁸Re' keh xakow chik inkisilk'aaj noq xkilow wach i huuj ree ruk'uhb'aal i Dios. Eh tixkich'ob' ruhb'ehel reh chi nkireq chi riij chi korik i tinamit.

⁹Eh noq xkib'iraj chib'ih ruq'or i k'uhb'aal xi okik chi oq'ik. Eh re' Nehemías i wilik chi taaq'anik chupaam i tinamit, re' i Esdras k'amal kib'eeh aj tiij, re' aj tz'ihb' taqe i aj Levíta k'ahchi' kich'ob' wiik rub'ehel i k'uhb'aal je' wili xkiq'or reh i tinamit: Mantib'ik taq ak'ux, matoq'ik taq ruum re' q'iij wili xiik' naah loq'il chuwach i QaJaaw Dios.¹⁰Eh je' wo' chik wili i xkiq'or: Chayeew taq runimaal wach i q'iij wili, q'e' looq' chuwach i QaJaaw Dios. Chak'ux taq aweh i suq laj k'uxumb'al chawuk'ej taq aweh i ki'laj riis uuva. Eh chayeew taq k'uxumb'al reh i ma' xta k'uxumb'al reh. Maatib'isaj taq ak'ux, ruum re' i rusuqkiil k'uxliis i ruyeew i QaJaaw Dios re' i re' inye'wik rukowiil qak'ux, inki taqe.

¹¹Re' taqe aj Levíta kiye'em wo' rukowiil kik'ux i tinamit i keh je' wili inkiq'or: Maatib'isaj taq chik ak'ux, ruum re' q'iij wili xiik' naah loq'il chuwach i QaJaaw Dios, inki taqe.

¹²Eh chu'nchel i tinamit xkininq'ijeej wach i q'iij re' re' xi okik chi wi'k chi uk'ik. Xkiyeew wo' ruwa' i ma' xta kiwa' kihaa'. Ma' kisiin ta noq xsuuqb'ik kik'ux ruum xkireq chi riij i xk'uhtjik keh.

¹³Eh chi junwaar xkimol kiib' ruuk' i Esdras re' aj tz'ihb', i aj Levíta, taqe i k'amal kib'eeh aj tiij, je' wo' chu'nchel i k'amal kib'eeh i ju'jun chi patineel, reh chi naa kireqem chi riij i ruq'or chupaam i k'uhb'aal. Re' runinq'ijiik i xaq chee' naah paat

¹⁴Eh xkireq chi tz'ihb'amaj chupaam i k'uhb'aal chi re' i QaJaaw Dios ruq'orom cho reh i Moisés chi re' taqe i aj Israel chupaam i xaq chee' naah kok' paat naakipatiniik noq naa kininq'ijeem i ruwuuq' poh reh i haab'.¹⁵Eh xkitaq'aaj ruq'orariik chupaam taqe i tinamit wilkeeb' Jerusaleem, je' wili i xkiq'or: Yu'naak hiy taq pantaq ch'ahn cha sik' taq xaq olivo i xaq ipak' cha sik' taq chaloq i xa chib'ih chik jariik chi q'ab' chee' i wilik xaq, reh chi neen korjik taqe i kok' xaq chee' naah paat je' rukab' i tz'ihb'amaj rehtaliil chupaam i k'uhb'aal, inki taqe.¹⁶Re' i tinamit xooj wo' kisik' i q'ab' chee', reh chi xkiyejaa' kikok' paat xaq chee' naah, wilik i xkiyejaa' chinaah taqe i paat, wilik xkiyejaa' chupaam taqe i tehlik, wilik chucheel i rupaat i Dios, wilik i xkiyejaa' chuwach i ookb'al i ki-ik'ik wii' i b'ehlan ha', wilik i xkiyejaa' wilik wii' i puerta Efraín, rub'ihnaal.¹⁷Chu'nchel i xi sutinik cho Babilonia xkiyejaa' ki kok' paat xaq chee' naah, chi ri'sil xi wihik noq xkik'saj i ninq'iij. Eh xa re' wo' kikanaam cho rub'aan paruq'ijil chee Josué rak'uun i Nun kore' chik xkian chupaam i q'iij re' re'. Ruum aj re' ma' k'isiin ta xsuuqb'ik kik'ux i tinamit.

¹⁸Re' i Esdras rajlaal q'iij i rilow paam i huuj tz'ihb'amaj wii' ruk'uhb'aal i Dios, pampeet q'iij xutoq'aa' korehtaal xkuxik i ninq'iij. Ruum re' i ninq'iij wuquub' q'iij xkian, eh paruwahxaaq q'iij jinaj nimlaj moloj iib' xkian, je' rukab' i kanamaj chikinaah. Re' taqe aj Israel xkipahqaaj kuyb'aal kimahk

¹Eh pan kijib' ru ka'winaq rub'eeh i poh re' re' xkimol kiib' i aj Israel xkian kitiij chi ma' kianam ta kiwa' kihaa', xkikoj i q'as wach itz'ihy chikiij ruum i ruti'kiil kik'ux, eh xkitukej pooq wach kinaah.²Re' taqe i aj Israel xkesaj kiib' chi kixilak i tokoom tinamit, eh xkipab'aa' kiib' je' wili i xkiq'or: Xoj mahkunik i hoj, eh ximahkunik wo' chee qamaam qati't, inki taqe.³Eh noq pa'alkeeb' pan kiye'aab' ixib' ora x-ilarik wach i ruk'uhb'aal i qaDios chikiwach. Eh chuwach wo' chik ixib' ora xkipahqaaj kuyb'al kimahk, eh xkiloq'ej i qaDios.⁴Eh re' taqe i aj Levíta Jesúa, Bani, Cadmiel, Sebanías, Buni, Serebías, Bani, Quenani kib'ihnaal xijohtik johtoq chinaah inajt naah i ye'aab' kow xkik'er kichii' chulooq'jiik i qaDios.⁵Eh re' taqe i aj Levíta Jesúa, Cadmiel, Bani, Hasabnías, Serebías, Hodías, Sebanías, Petaías kib'ihnaal je' wili xkiq'or reh i tinamit:
Wukteen taq johtoq chayeew taq ruloq'il i QaJaaw Dios xti nim rajaawriik.
Chayeew taq ruloq'il chi juneliik, chayeew taq runimaal wach i loq'laj rub'ihnaal chi juneliik.

⁶Eh re' Esdras je' wili xkiq'or parutiij: Hat QaJaaw, xa re' wo' hat i Dios Re' hat xat yej-anik reh i taxaaj, i ch'umiil wilkeeb' chupaam. Re' hat xatyej-anik reh i wach ak'al, wilkeeb' chupaam. Re' hat xatyej-anik reh i palaw, i wilkeeb' chupaam. Re' hat ti ye'wik kik'achariik taqe i chib'ih jariik, ruum aj re' tikiloq'ej taqe i ch'umiil wilkeeb' pan taxaaj.

⁷QaJaaw Dios re' wo' hat xat sik' wik cho wach i Abram, re' wo' hat xat eesanik cho reh Ur, re' kitinamiit i aj Caldeo, re' wo' hat xat kojwik rub'ihnaal chi Abraham.⁸Re' hat xakoj rehtaal chi korik wach ruk'ux chawach, je' re' noq xayejaa' wach ruuk' i xaq'or reh chi naa aye'em keh i riih rumaam i kiye'aab' i aj cananeo, aj heteo, aj amorreo, ferezeo, aj jebuseo, aj gergeseo. Re' hat xayeew wo' keh ruum re' hat korik wach ak'ux.

⁹Eh xakoj wo' rehtaal i ti' k'axik xkik'ul i qamaam qati't ar Egipto, xab'iraj wo' hoq noq xkipahqaaj awotob'il noq wilkeeb' chi chii' i kaq palaw.¹⁰Eh xa a'n rehtaliil i sahchb'al k'uxliis ruuk' i kireey i aj Egipto je' wo' kuuk' i kikamanik ruuk', je' wo' kuuk' chu'nchel i aj Egipto. Ruum xawil chi k'ahchi' naq kik'sam chi ti' k'axik i qamaam qati't. Eh xk'uloq ayu' yu'naak chi xooj rib'iral chupaam taqe i tinamit chi na a'n taqe i nimaq wach na'ojb'al.¹¹Eh xa ch'aq panyejaal i kaq palaw chikiwach i qamaam qati't, reh chi panchiqiij xi-ik'ik panyejaal. Eh xa tz'ap kinaah pan palaw taqe i aj Egipto k'ahchi' rajiminiik keh. Xiooj qohoq ko paruchamiil i palaw, je' rukab' noq inkutarik qohoq jino'q ab'aj.¹²Noq xib'ehik cho pan q'iij i qamaam qati't, xak'am cho kib'eeh ruuk' i junrahp chi suutz', noq xib'ehik cho chaq'ab' xak'am cho kib'eeh ruuk' i junrahp chi q'aaq' reh chi xkilow chee kib'eeh xi chalik wii'.

¹³Eh chinaah i yuuq' Sinaí xaq'o'reej taqe cho pan taxaaj i qamaam qati't, xaq'or cho keh aak'uhb'aal xatijej taqe, xaq'or keh chib'ih i naa kianam. Eh q'e' holohik aak'uhb'aal xaq'or keh.¹⁴Eh xaq'or wo' keh i k'uhb'aal chi riij i hi'limb'al q'iij q'e' looq' chawach, xaq'or keh aak'uhb'aal xatijej taqe, ruuk' chii' awaj kamanoom Moisés.

¹⁵Eh noq ma' xta naq chik kiwa' xaqasaj chee kiwa' pan taxaaj. Eh noq ma' xta naq chik kihaa' xawesaj chee kihaa' pansaq rehp ab'aj. Xaq'or keh chi naa kokiik chupaam i ye'aab' aq'orom keh chi naa aye'em keh.¹⁶Xa re' la' re' taqe qamaam qati't xkiq'etwachej aak'uhb'aal, xkikowb'isaj i kánima, ma' xkaaj ta kib'iram aak'uhb'aal.¹⁷Eh ma' xkaaj ta kib'iram, ma' xkiyeew ta rajaawriik i sahchb'al k'uxliis xa a'n cho kuuk' pampeet. Xkikowb'isa la' kánima, xkiq'etwachej kiib' chawach xkaaj wo' naq chik kisik'im, k'amal kib'eeh reh chi naa wo' naq chik kik'amariik reje Egipto. Xa re' la' re' hat jinaj Dios kuyuul xakuy kimahk, ruum q'e' hat atoob', hat chaq'laam q'uun inchalik aajosq'iil, hat aj keteloom wachiis, ruum aj re' ma' xakanaa' ta taqe chi kutkeel.

¹⁸Eh xkiyejaa' wo' jinaj i k'isa imas wakax oro, xkikoj chi ki dios, xkiq'or chi re' re' x-esanik cho keh Egipto, re' re' i runimaal mahk xkian.¹⁹Eh re' hat ruum chi ma' k'isiin i ketelinik wachiis awuuk' ma' xakanaa' ta taqe chi kutkeel chupaam i ye'aab' chiq yuuq'. Xak'am la' wo' cho kib'eeh ruuk' i junrahp chi suutz' pan q'iij. Eh xak'am wo' cho kib'eeh ruuk' i junrahp chi q'aaq' chaq'ab', reh chi xkilow chee kib'eeh xi chalik wii'.

²⁰Eh xayeew cho keh aawuxlaab'al reh chi xak'uhtaaj keh i korik. Ma' jaruuj xakanaa' ruye'ariik keh i maná, ma' xakanaa' ta wo' hoq ruye'ariik kihaa'.²¹Ka'winaq haab' taqe xak'uxlaaj chaloq noq xik'ik cho chupaam i ye'aab' chiq yuuq', xayeew keh chu'nchel i ajwaal wach chi keh, ma' nik' ta xi kahnik chi ma' xta kiso', eh ma' xsipjik ta wo' chee kooq chi b'ehik.

²²Eh xaq'asaj wo' pan kiq'ab' i nimaq tinamit. Xkichop naah i tinamit Hesbón, re' wilik wii' chi reyil i Sihón. Eh xkichop naah i tinamit Basán, re' wilik wii' chi reyil i Og.²³Eh xak'ihaaxb'isaj wo' kiih kimaam, korehtaal xi ponik chi je' k'ihaal i ch'umiil pan taxaaj xak'am wo' taqe chaloq chupaam i ye'aab' aq'orom cho rib'iral keh i kimaam kati't.²⁴Re' taqe i aj Israel xayeew q'ab' keh chi xi okik chupaam i ye'aab' Canaán, xkian reh taqe i patim ar ruch'ihil taqe i wilkeeb' chi reyil, xkian reh taqe i aj cananeo. Re' taqe i tinamit wilkeeb' ar xaq'asaj pan kiq'ab' i aj Israel, reh chi re' chik i keh xi kahnik chi taaq'anik chikinaah.²⁵Eh xkichop wo' naah taqe i tinamit kotimaj kiij chi tz'aq, eh xkichop naah taqe i holohaq ye'aab'. Eh xkichop wo' naah i holohaq paat wilik taqe i jul ha' chi chii' re' taqe i tikooj wii' i uuva, i olivo, i tikooj taqe wii' i chee' suq inkiwachuj. Re' keh xkik'ux keh i re', korehtaal xinujik, xiq'inaab'ik.

²⁶Xa re' la' xkijosaj chaajosq'iil, ruum xat kiq'etwachej, ma' xponik ta panaq'kiwach aak'uhb'aal. Eh xkikansaj taqe i jalal aq'oral, xq'orik keh chi naa wo' chik kisutiniik awuuk' eh ma' k'isiin i yiib' wach na'ojb'al xkian chawach.²⁷Ruum aj re', re' hat xaq'asaj taqe pan kiq'ab' i nixowanik kiwach re' i xib'anik ti' k'axik keh. Re' noq ti' chik wilkeeb' xkipahqaaj aweh chi naa taqe atoob'eem. Re' hat kopan taxaaj xab'iraj chee kitiij, ruum q'e' hat aj keteloom wachiis, xataq'aaj ko'len keh pan kiq'ab' i nixowanik kiwach.²⁸Eh noq suq chik wilkeeb' inki a'n wo' chik yiib' wach na'ojb'al chawach. Ruum aj re', re' hat xakanaa' wo' chik taqe pan kiq'ab' i nixowanik kiwach, i xib'anik ti' k'axik keh. Eh inkipahqaaj wo' chik kitoob'jiik aweh. Re' hat ruum chi ma' k'isiin i ketelenik wachiis awuuk', eh k'ih pech xako'leej taqe.²⁹Re' hat xaq'or keh chi naa kianam i ruq'or taqe aak'uhb'aal, re' keh xkiq'ehtaaj kiib' chawach. Eh ma' xkaaj ta kianam i xaq'or, xkiq'eb' chi riij kik'ux aak'uhb'aal. Xanaah re', re' taqe k'uhb'aal xaq'or keh re' naq i re' naa ruye'wiik kik'achariik. Xa re' la' xkikowb'isaj i kánima. Ma' xkaaj ta kib'iram i xaq'or keh.

³⁰Re' hat najt xa a'n iq'unil kuuk', xa k'uhb'aleej taqe ruuk' i Santolaj aaWuxlaab'al, eh ruuk' kichii' taqe i jalal aq'oral, re' keh xama' xkib'iraj ta wo' hoq, ruum aj re' xaq'asaj taqe pan kiq'ab' i tokoom tinamiit.³¹Ruum chi re' hat QaJaaw Dios ma' k'isiin i ketelinik wachiis awuuk', ma' xasach ta kiwach. Eh ma' xakanaa' ta taqe chi kutkeel, ruum re' hat q'e' hat atoob' q'e' nim ak'axb'al.³²QaJaaw Dios nim awajaawriik, xiik' naah nimaal awach, xiik' naahyohb'aaliil awach. Eh i na a'n aha' wilik i ayejaam wach, ruum q'e' nim ak'axb'al. Ma' ta naq neenakana' chi je' re' i ti' k'axik xkik'ul i qareey, i k'amal qab'eeh, taqe i k'amal kib'eeh aj tiij taqe i jalal aq'oral, taqe i qamaam qati't, taqe aatinamiit. Eh xa re' wo' xtohq'ik cho rik'ulariik noq xi wihik chee kireey i aj Siria, eh xk'uloq ayu' yu'naak.³³Ruuk' i ti' k'axik xayeew cho chi qanaah inqilow noq re' hat korik wach ak'ux ruum xa a'n cho quuk' aha' wilik aq'orom chaloq. Eh re' hoj xa re' i yiib' wach na'ojb'al inqa'an.³⁴Re' taqe i qareey, re' taqe i k'amal qab'eeh, re' taqe i k'amal kib'eeh aj tiij, re' taqe i qamaam qati't, ma' xkian taj i ruq'or aak'uhb'aal, ma' xkaaj ta kib'iram i xaq'or keh, ma' xkaaj ta kik'amam naah i xa tijej taqe wii'.³⁵Eh noq wilkeeb' chik pan kajaawriik, noq ma' k'isiin chik i chib'ih keh aye'em, chupaam i ye'aab' xaq'asaj keh i rub'an wii' i tik, re' i keh xama' xkian ta wo' hoq inawaaj i hat, xama' xkikanaa' ta wo' hoq i kiyiib' wach na'ojb'al.

³⁶Chawil yu'naak, re' hoj xa chi mosojik wilkooj chupaam i holohik laj ye'aab' xayeew cho keh i qamaam qati't. Reh chi neen qa'an rusuqkiil i tik mu'uun i nelik chuwach konaa qak'axkilem.³⁷Re' taqe i tik ma' k'isiin wo' naq i kiwach i nelik, xa re' la' chu'nchel inooj keh i qareey xakoj taqe chi taaq'anik chi qanaah, ruum xooj mahkunik chawach. Re' keh inki a'n quuk' chib'ih inkaaj i keh, je' wo' re' inki a'n kuuk' i qachikoop, xiik' naah ti'kiil wilkooj, inki parutiij. Re' tinamit Israel xkiq'or chi naa kianam i ruq'or i k'uhb'aal

³⁸Eh re' taqe i tinamit xkian jinaj wach kik'ux xkik'ulaa' aha' wilik i xkiyejaa' wach i k'amal kib'eeh xkikoj i kib'ihnaal, xkikoj wo' kib'ihnaal taqe i k'amal kib'eeh aj tiij aj Levíta.

¹Re' taqe wili xkikoj kib'ihnaal chupaam, i huuj xqayejaa': Re' hin Nehemías, rak'uun Hacalías, hin aj taq'oom, Sedequías.²Seraías, Azarías, Jeremías,³Pasur, Amarías, Malquías,⁴Hatús, Sebanías, Maluc,⁵Harim, Meremot, Obadías,⁶Daniel, Ginetón, Baruc,⁷Mesulam, Abías, Mejamín,⁸Maazías, Bilgai, Semaías, chu'nchel i wili k'amal kib'eeh aj tiij taqe.

⁹Eh re' taqe wili i aj Levíta xkikoj kib'ihnaal: Jesúa, rak'uun i Azanías, Binúi, re' taqe i riih rumaam i Henadad, Cadmiel.¹⁰Xkiyeew wo' kib'ihnaal i kuch kamanoom, je' wili kib'ihnaal: Sebanías, Hodías, Kelitas, Pelaías, Hanán.¹¹Micaias, Rehob, Hasabías,¹²Zacuur, Serebías, Sebanías,¹³Hodías, Bani, Beninu.

¹⁴Eh xkiyeew wo' kib'ihnaal taqe i k'amal qab'eeh pan qatinamitaal, je' wili kib'ihnaal: Paros, Pahat-moab, Elam, Zatu, Bani,¹⁵Bani, Azgad, Bebai,¹⁶Adonías, Bigvai, Adín,¹⁷Ater, Ezequías, Azur,¹⁸Hodías, Hasum, Bezai,¹⁹Harif, Anatot, Nebai,²⁰Magpías, Mesulam, Hezir,²¹Mesezabeel, Sadoc, Jadúa,²²Pelatías, Hanán, Anaías,²³Oseas, Hananías, Hasub,²⁴Halohes, Pilha, Sobec.²⁵Rehum, Hasabna, Maasías,²⁶Ahías, Hanán, Anán,²⁷Maluc, Harim, Baana.

²⁸Eh re' ruqox i tinamit xaq'or chi naa kianam i ruq'or taqe i k'uhb'aal. Re' taqe i k'amal kib'eeh aj tiij, taqe aj Levíta, taqe i kicha'jinik reh taqe i puerta, taqe kitz'uyinik, taqe i kikamanik chupaam i rupaat i Dios. Je' wo' chu'nchel i xkesaj kiib' chi kixilak i tokoom kitinamiit, reh chi naa kianam i ruq'or i ruk'uhb'aal i Dios, kuch'ihil kehk'een, kak'uun kixq'uun, chu'nchel inkireq chi riij i rub'ehel.²⁹Eh xkian jinaj wach kik'ux kuuk' i kik'uliil kuuk' taqe i' k'amal kib'eeh reh chi xkiq'or i xti korik chi naa kianam i ruq'or i ruk'uhb'aal i Dios xuq'or ruuk' chii' i Moisés re' i raj kamanoom. Eh chinaah kianam chu'nchel i ruq'or i ruk'uhb'aal, i taaq'anik i rub'an, chi naa kianam, eh i ruq'or chi rub'anam i QaJaaw Dios.³⁰Eh xqaq'or wo' hoq chi ma' naa ta qaye'em q'ab' chi naa kianam kaxáro kixq'uun ruuk' i kak'uun i tokoom tinamit ni xata re' i qak'uun i hoj naa kianam kaxáro kuuk' i kixq'uun i keh.³¹Eh xqaq'or chi ma' naa ta qaloq'wiik pan hi'limb'al q'iij, oon chupaam chik jino'q i q'iij wilik rusantohiil i xa chib'ih jariik naa ruk'uliik kik'ayem i tokoom tinamit. Xqaq'or wo' hoq chi rajlaal wuquub' haab' naa qahi'lisam aak'al, ma' naa ta qatikim paam, eh chi naa qakuyum kimahk ruuk' i kik'aas i wilik kik'aas quuk'.

³²Xqayejaa' wo' wach chi rajlaal haab' naaqaye'em i ju'jun chi tumiin reh chi neenkamanik parupaat i Dios.³³Eh naa rukamaniik chi loq'b'al kaxlanwi'k inye'arik chi mayiij rajlaal, chi loq'b'al trigo inye'arik chi mayiij, eh chi loq'b'al reh taqe chikop ink'atarik chi mayiij rajlaal, reh i ninq'iij, reh i hi'limb'al q'iij, reh i ninq'iij i ak' poh, noq imb'aan i ninq'iij wilik i rusantohiil. Eh naa wo' rukamaniik reh i mayiij i qamahk naa rukamaniik reh chu'nchel i kamanik imb'aan parupaat i Dios.

³⁴Eh xqayejaa' wo' wach chi naaqasik'im chi riij nik' wach noq naa kik'amam chee sii' parupaat i Dios taqe aj Levíta, chu'nchel i tinamit re' q'oreel nik' qak'ihaal panqapaat, re' i naa rukamaniik chuwach i haab' re' re', naa ruk'ahtiik chuwach i ru artaal i QaJaaw Dios, je' rukab' i tz'ihb'amaj chupaam i k'uhb'aal.³⁵Eh xqayejaa' wo' wach chi rajlaal haab' naa qak'amam cho parupaat i QaJaaw Dios i peet wach i qatik, je' wo' peet wach chu'nchel i qachee'.³⁶Eh chi naa qak'amam cho parupaat i Dios i peet qak'uun i hoj, je' wo' hoq i peet kak'uun i qawakaax, i peet kak'uun i qatentzuun, je' rukab' i tz'ihb'amaj chupaam i k'uhb'aal. Re' i ruq'or wii' chi naa qak'amam cho parupaat i Dios peet rak'uun i qawakax, i peet rak'uun i qatentzuun, naa qaq'asam keh i k'amal kib'eeh aj tiij kikamanik chupaam i rupaat i Dios.³⁷Eh xqayejaa' wo' wach chi naa qak'amam chaloq i qaq'oor molarik wii' parupaat i Dios ruuk' i peet wach i qatrigo naa qaq'asam keh i k'amal kib'eeh aj tiij, i riis i peet wach i qa uuva, i aseite, peet wach chu'nchel i qachee'. Eh chi naa qak'amam chee ju'jun naaqesam cho ruuk' i lajtaq i wach i qatik, naa qaq'asam keh i aj Levíta, ruum re' i keh kimolwik wach i ju'jun, i nelik ruuk' i lajtaq chupaam taqe i ye'aab' wilkooj wii'.³⁸Eh koruman chi naa ruwihiik jino'q i k'amal kib'eeh aj tiij, re' ruuk' riih rumaam i Aarón, kuuk' i aj Levíta noq naakik'ulum i ju'jun naa reliik ruuk' i lajtaq. Eh re' chik taqe i aj Levíta naakik'amwiik reje parupaat i Dios.³⁹Eh xqaq'or wo' hoq chi chu'nchel i aj Israel, je' wo' taqe i aj Levíta, naa kik'amam reje i trigo, i riis uuva, i aseite chupaam i ye'aab' i molarik wii' taqe i kulk, inkamanik chupaam i rupaat i Dios. Eh chi naa kiwihiik pankikamaj taqe k'amal kib'eeh aj tiij je' wo' taqe i kicha'jinik reh taqe i puerta, taqe i aj tz'uyineel qaq'or chi ma' naa ta qakanaam i rupaat i QaJaaw Dios. Re' taqe i xi kahnik chi patinik Jerusaleem

¹Re' taqe i k'amal kib'eeh i tinamit, xi okik chi patinik Jerusaleem re' i santo laj tinamit. Eh re' ruqox kox kisik' chik chi riij i xelik cho chi kixilak i lajtaq chi patineel reh chi xi chalik chi patinik ar. Eh re' chik taqe i b'elejeeb' chi patineel xi kahnik chupaam i ju'jun ch'uq' chi tinamit.²Eh re' taqe tinamit xkit'iosej keh i ju'jun chi patineel xa pankik'ux xchalik chi xi kahnik chi patinik Jerusaleem.

³Re' taqe i k'amal b'eeh xi patinik Jerusaleem. Eh re' taqe i xi okik chi patinik chupaam i ju'jun chi tinamit wilkeeb' ar Judá pan kiye'aab' wo' xi okik chi patinik. Re' taqe i aj Israel, taqe i k'amal kib'eeh aj tiij, taqe aj Levíta, taqe i kikamanik parupaat i Dios, re' taqe i kiih kimaam rumoso i reey Salomón.

⁴Re' taqe i xi kahnik chi patinik Jerusaleem re' ruuk' taqe i riih rumaam Judá, re' ruuk' riih rumaam Benjamín. Re' taqe i riih rumaam Judá je' wili kib'ihnaal Ataías, rak'uun i Uzías. Re' reh rak'uun i Amarías, re' reh rak'uun i Safatias. Re' reh rak'uun i Mahalaleel.
Re' reh i riih rumaam Fares.⁵Re' i Maasías rak'uun i Baruc. Re' Baruc, rak'uun Colhoze. Re' reh rak'uun i Hazaías. Re' reh rak'uun i Adaías. Re' reh rak'uun i Joiarib. Re' Joiarib rak'uun i Zacarías, re' i rak'uun Siloni.⁶Chu'nchel i riih rumaam i Fares xi kahnik chi patinik Jerusaleem kijib' siento ruuk' waxaqlaj ru kajwinaq taqe, eh kow kiib' chi q'aq'inik.

⁷Re' taqe i riih rumaam Benjamín je' wili kib'ihnaal: Re' i Mesulam. Re' reh rak'uun i Joed. Re' reh rak'uun i Pedaías. Re' reh rak'uun i Colaias. Re' reh rak'uun i Maasías. Re' reh rak'uun Itiel. Re' reh rak'uun i Jesaías.⁸Re' i Gabai, re' i Salai chu'nchel i re' b'elejeeb' siento ruuk' waxiqiib' ru ka'winaq chi kiib'.⁹Re' Joel rak'uun i Zicri k'amal kib'eeh i tinamit, re' rukab' k'amal kib'eeh re' i Judá rak'uun i Senúa.

¹⁰Eh chi kixilak taqe i k'amal kib'eeh aj tiij wilik Jedaías, rak'uun i Joiarib, eh re' Jaquín.¹¹Eh re' Saraias rak'uun i Hilcías. Re' reh rak'uun i Mesulam. Re' reh rak'uun i Sadoc. Re' reh rak'uun i Meraiot. Re' reh rak'uun i Ahitob, re' ixtinim wach k'amal b'eeh parupaat i Dios.¹²Eh re' taqe i ma' tokoom ta kuuk' xib'anik i kamanik parupaat i Dios waxiqiib' siento ruuk' ki-iib' ru ka'winaq taqe. Re' Adaías, re' reh rak'uun i Jeroham. Re' reh rak'uun i Pelalias, re' reh rak'uun i Amsi. Re' reh rak'uun i Zacarías. Re' reh rak'uun i Pasur. Re' reh rak'uun i Malquías.¹³Eh re' taqe i ma' tokoom ta kuuk' i k'amal kib'eeh i kiib' siento ruuk' kiib' roxk'ahl taqe, je' wili i kib'ihnaal: Amasai, rak'uun Azareel. Re' reh rak'uun i Azai. Re' reh rak'uun i Mesilemot. Re' reh rak'uun i Imer.¹⁴Eh re' taqe i ma' tokoom ta kuuk' re' taqe i winaq q'e' kow kiib' chi q'aq'inik, jinaj siento ruuk' waxiqiib' ru ka'winaq taqe. Re' i k'amal kib'eeh re' i Zabdiel rak'uun i Gedolim.

¹⁵Eh chi kixilak i aj Levíta wilkeeb' i je' wili kib'ihnaal: Re' Semaías, rak'uun i Hasub. Re' reh rak'uun i Azricam. Re' reh rak'uun i Hasabías. Re' reh rak'uun i Buni.¹⁶Eh wilkeeb' wo' hoq i Sabetai, Jozabad re' taqe re' i k'amal kib'eeh i aj Levíta, kib'anik i kamanik chi riij i rupaat i Dios.¹⁷Re' Matanías rak'uun i Micaía. Re' reh rak'uun i Zabdi. Re' reh rak'uun i Asaf. Re' i Asaf ink'amwik kib'eeh i kib'anik i tz'uuy t'iosb'al reh i Dios paru orahiil noq imb'aan i tiij. Eh wilik wo' hoq i Bacbuquías, re' intowik reh i Matanías wilik wo' hoq i Abda, rak'uun i Samúa. Re' reh rak'uun i Galal. Re' reh rak'uun i Jedutún.¹⁸Eh chu'nchel i aj Levíta xi kahnik chi patinik chupaam i santo laj tinamit kiib' siento ruuk' kajwinaq ruuk' kijib' taqe.

¹⁹Re' taqe i kicha'jinik reh taqe i puerta je' wili kib'ihnaal: Acub, i Talmón, kuch'ihil taqe i ma' tokoom ta kuuk', jinaj siento ruuk' kab'laj ru kajwinaq taqe.

²⁰Eh re' taqe i ruqox aj Israel, taqe k'amal kib'eeh aj tiij, taqe aj Levíta, ar xiooj chi patinik chupaam taqe i tinamit wilkeeb' ar i Judá. Eh pan kiye'aab' xiooj wih-oq.

²¹Re' taqe i kikamanik parupaat i Dios, ar xi kahnik chi patinik chupaam i ye'aab' Ofel. Eh re' i Zihá, re' Gispa xwihik chi k'amal kib'eeh.²²Eh re' i Uzi rak'uun i Bani xwihik chi k'amal kib'eeh i aj Levíta xi kahnik Jerusaleem. Re' Bani rak'uun i Hasabías. Re' reh rak'uun i Matanías. Re' reh rak'uun i Micaias, riih rumaam i Asaf. Re' taqe keh kitz'uyinik noq imb'aan i loq'inik parupaat i Dios.²³Eh re' reey ruq'orom chi naa ruye'ariik keh i aj tz'uyineel re' re' chib'ih naakik'sam wii' i ju'jun chi q'iij.

²⁴Re' noq inkaaj kiyejaam i xa chib'ih jariik i aj Israel ruuk' i reey, re' i Petaías inq'orik chikiij. Re' Petaías re' re' rak'uun i Mesezabeel riih rumaam Zera rak'uun Judá.

²⁵Re' taqe i wili i tinamit xi kahnik wii' chi patinik taqe i riih rumaam Judá: Re' Quiriat-arba, Dibón, Jecabseel. Wilik taqe i xi kahnik chupaam i kok' ye'aab', wilkeeb' chi junsuut taqe tinamit re' re'.²⁶Eh wilik wo' i xiooj chi patinik chupaam taqe tinamit je' wili kib'ihnaal: Jesúa, Molada, Bet-pelet,²⁷Hazar-sual, Beerseba,²⁸Siclag, Mecona,²⁹En-rimón, Zora, Jarmut.³⁰Eh wilik wo' taqe i xi kahnik chi patinik chupaam taqe i tinamit Zanoa, Adulam, Laquis, Azeca, je' wo' chupaam taqe i kok' ye'aab' wilik chi kijunsuut reje i Beerseba xi ponik kowach k'ixkaab' Hinom.

³¹Re' taqe i riih rumaam i Benjamín ar xi okik chi patinik chupaam taqe i tinamit Geba, Micma, Aia, Bet-el, je' wo' chupaam taqe i kok' ye'aab' wilkeeb' chi junsuut.³²Eh wilik wo' hoq i xi okik chi patinik chupaam taqe tinamit Anatot, Nob, Ananías.³³Eh ar wo' Hazor, Ramá, Gitaim.³⁴Eh je' wo' ar Hadid, Seboim, Nebalat.³⁵Eh je' wo' ar Lod, Ono, eh wach k'ixkaab' wilkeeb' wii' taqe ch'eyel ch'ihch'.

³⁶Eh wilik taqe i aj Levíta xiooj chi patinik Judá, eh wilik i xiooj chi patinik ar Benjamín. Re' taqe i k'amal kib'eeh aj tiij, re' taqe i aj Levíta xi sutinik cho chi riij i Zorobabel

¹Re' taqe i k'amal kib'eeh aj tiij, taqe i aj Levíta xi sutinik cho Jerusaleem chi riij i Zorobabel, rak'uun i Salatiel, kuch'ihil i Jesúa je' wili kib'ihnaal: Seraías, Jeremías, Esdras.²Amarías, Maluc, Hatús,³Secanías, Rehum, Meremot,⁴Iddo, Gineto, Abías,⁵Mijamín, Maadías, Bilga,⁶Semaías, Joiarib, Jedaías,⁷Salú, Amoc, Hilcías, Jedaías. Re' taqe i wili xi wihik cho chi k'amal kib'eeh i aj tiij noq xwihik cho chi rajaaw i k'amal kib'eeh aj tiij i Jesúa.

⁸Re' taqe i aj Levíta je' wili kib'ihnaal: Jesúa, Binúi, Cadmiel, Serebías, Judá, Matanías. Re' keh kik'amwik rub'eeh i tz'uuy noq imb'aan rulooq'jiik i Dios.⁹Eh re' Bacbucías, Uni, re' taqe re' kuch aj tz'uyineel wilik kuuk' chi kitoob'jiik chub'aan i kikamaj.

¹⁰Re' i Jesúa rajaaw Joiacim. Re' Joiacim rajaaw Eliasib. Re' Eliasib rajaaw Joiada.¹¹Re' Joiada rajaaw Jonatán. Re' Jonatán rajaaw Joisda.

¹²Eh noq xwihik chi k'amal kib'eeh aj tiij i Joiacim, re' taqe i k'amal kib'eeh aj tiij kik'amwik kib'eeh i ju'jun chi paat: Re' Meraias ink'amwik kib'eeh i riih rumaam i Seraías, re' Hananías, ink'amwik kib'eeh i riih rumaam i Jeremías.¹³Re' Mesulam ink'amwik kib'eeh i riih rumaam i Esdras. Re' Johanán ink'amwik kib'eeh i riih rumaam i Amarías.¹⁴Re' Jonatán ink'amwik kib'eeh i riih rumaam i Melicú. Re' José ink'amwik kib'eeh i riih rumaam i Sebanías.¹⁵Re' Adna ink'amwik kib'eeh i riih rumaam i Harim. Re' Helcai ink'amwik kib'eeh i riih rumaam i Meraiot.¹⁶Re' Zacarías ink'amwik kib'eeh i riih rumaam i Ido. Re' Mesulam ink'amwik kib'eeh i riih rumaam i Ginetón.¹⁷Re' Zicri ink'amwik kib'eeh i riih rumaam i Abías. Re' Piltai ink'amwik kib'eeh i riih rumaam i Minianim, i riih rumaam i Moadías.¹⁸Re' Samúa ink'amwik kib'eeh i riih rumaam i Bilga. Re' Jonatán ink'amwik kib'eeh i riih rumaam i Semaías.¹⁹Re' Matenai k'amwik kib'eeh i riih rumaam i Joiarib. Re' Uzi ink'amwik kib'eeh i riih rumaam i Jedaías.²⁰Re' Salai ink'amwik kib'eeh i riih rumaam i Salai. Re' Eber ink'amwik kib'eeh i riih rumaam i Amoc.²¹Re' Hasabías, ink'amwik kib'eeh i riih rumaam i Hilcías, re' Natanael ink'amwik kib'eeh i riih rumaam i Jedaías.

²²Eh noq xi wihik Eliasib, i Joiada, i Johanán, i Jadúa, xureq i q'iij noq xokik chi reyil i Dario i aj Persia, xtz'ihb'jik i kib'ihnaal i aj Levíta, kib'ihnaal i k'amal kib'eeh aj tiij reh chi xi kahnik chi k'amal kib'eeh i ju'jun chi patineel.²³Re' taqe i Levíta kik'amwik kib'eeh i ju'jun chi patineel tz'ihb'amaj i kib'ihnaal chupaam i huuj tz'ihb'amaj wii' rehtaliil chib'ih i k'uluuj chaloq korehtaal xureq i q'iij noq xokik chi k'amal kib'eeh aj tiij i Johanán, riih Eliasib.²⁴Eh re' i k'amal kib'eeh i aj Levíta je' wili kib'ihnaal: Hasabías, Serebías, Jesúa, rak'uun Cadmiel. Eh re' taqe i kuch kamanoom peet b'eeh reje chikiwach chi loq'inik chi t'iosinik. Eh junokiik taqe chi tz'uuy noq i rureq i ru orahiil i kokiik chi kamanik, je' rukab' i ruq'orom kahnoq i reey David raj kamanoom i Dios.²⁵Eh re' taqe i xicha'jinik reh taqe puerta je' wili kib'ihnaal: Matanías, Bacbuquiías, Obadías, Mesulam, Talmón, Acub.²⁶Re' taqe i wili xi wihik chi kamanik noq xwihik chi kajaaw k'amal kib'eeh aj tiij i Joiacim, rak'uun i Jesúa, riih i Josadac. Re' noq xwihik chi taaq'anik chinaah i tinamit i Nehemías. Re' noq xwihik i Esdras chi k'amal kib'eeh aj tiij. Xkiq'asaj pan q'ab' i Dios i tz'aq kotimaj wii' riij i tinamit Jerusaleem

²⁷Noq xkiq'asaj pan q'ab' i Dios i tz'aq kotimaj wii' riij i tinamit Jerusaleem, xkitaq'aaj ruk'amariik chu'nchel i aj Levíta wilkeeb' chupaam i ju'jun chi tinamit. Reh chi xi chalik Jerusaleem chi runinq'ijiik i ruq'ahteesjiik pan q'ab' i Dios i koraal tz'aq, ruuk' tz'uuy, ruuk' ruq'ojiik i pulato q'ooj, i arpa, taqe kok' k'ahaam wach q'ooj.²⁸Eh xkimol wo' kiib' Jerusaleem chu'nchel i aj Levíta, re' taqe i aj tz'uyineel, re' taqe i wilkeeb' chi junsuut, je' wo' hoq i xi chalik pankok' ye'aab' wilkeeb' paruyuq'ul i Netofa.²⁹Eh wilik i xi chalik paruyuq'ul i Gilgal, je' wo' chupaam taqe i kok' ye'aab' wilkeeb' ar Geba, eh Azmavet, ruum re' taqe i aj tz'uyineel ar kiyejaam kiye'aab' chi junsuut i Jerusaleem.³⁰Eh re' taqe k'amal kib'eeh aj tiij, taqe aj Levíta xkian je' rukab' i ruq'or i k'uhb'aal xkisantoheej kiib'. Xkisantoheej i tinamit, je' wo' hoq koraal tz'aq, je' wo' taqe i puerta.

³¹Eh nuq'or keh i wilkeeb' chi taaq'anik Judá chi xijohtik chinaah i koraal tz'aq, eh xnuyejaa' i kiib' nimaq ch'uq i aj tz'uyineel. Re' peet ch'uq xib'ehik reje naah tz'aq pansak'aaj xiooj chi korkiil i puerta ki-ik'ik wii' i q'eb'el sohk'.³²Eh chi riij i junch'uq chi aj tz'uyineel xam reje i Osaías, ruch'ihil taqe i yejaal keh i wilkeeb' chi taaq'anik Judá.³³Re' haa' Azarías, i Esdras, i Mesulam.³⁴Re' haa' i Judá, i Benjamín. Semaías, i Jeremías.³⁵Eh wilik wo' taqe i k'amal kib'eeh aj tiij kuch'ihil reje k'ahchi' kixulem reje i kituun, je' wili kib'ihnaal: Re' Zacarías, i rak'uun i Jonatán. Re' reh rak'uun i Semaías. Re' reh rak'uun i Matanías. Re' reh rak'uun i Micaias. Re' reh rak'uun i Zacuur. Re' reh rak'uun i Asaf.³⁶Re' taqe i chaaq'b'ees ojik inki a'n je' wili kib'ihnaal: Semaías, Azareel, Milalai, Gilalai, Maai, Natanael, Judá, Hanani. Re' taqe re' kik'amam reje i kiq'oojb'aal re' ruuk' i ruq'oojb'aal chee reey David. Re' i Esdras i aj tz'ihb' peet b'eeh reje chikiwach.³⁷Eh chi chii' i puerta wilik wii' i k'achlik haa' xiooj reje chikiwach xijohtik wach i ixkaleria chinaah i tz'aq, korehtaal xi ponik i wilik wii' i ruye'aab' i reey David chinaah i paat xub'an wii' i taaq'anik xi ponik chi chii' i puerta wilik reje parelb'aal q'iij, re' ki-ik'ik wii' i aj b'ehlan ha'.

³⁸Eh re' i ruka' ch'uq i aj tz'uyineel xiooj reje pantz'eet xib'ehik reje naah tz'aq. Re' hin, hin xam reje chikiij wuch'ihil taqe i yejaal i tinamit, ar xoj elik reje ruuk' inajt naah tz'aq wilik wii' horna xoj ponik chinaah i nim wach tz'aq.³⁹Eh xoj ik'ik chinaah i puerta Efraín, je' wo' chinaah i najtir puerta, chinaah i puerta inkik'ayej wii' i kar. Eh xoj ik'ik i wilik wii' inajt naah tz'aq Hananeel, eh i wilik wii' inajt naah tz'aq Hamea, je' wo' chinaah i puerta ki-ik'ik wii' i tentzun, xoj ponik ma' najt ta ruuk' i tz'ilom.

⁴⁰Eh re' taqe i ka'ch'uq chi aj tz'uyineel xi ponik chupaam i rupaat i Dios. Eh ximponik wo' hin wuch'ihil taqe i yejaal keh i kitaaq'anik chinaah i tinamit.⁴¹Eh re' taqe i k'amal kib'eeh aj tiij k'ahchi' kixulem i kituun je' wili kib'ihnaal: Eliacim, Maaseías, Miniamín, Micaias, Elioenai, Zacarías, Hananías.⁴²Maasías, Semaías, Eleazar, Uzi, Johanán, Malquías, Elam, Ezer. Re' taqe aj tz'uyineel re' i Izrahías xk'amwik kib'eeh noq xitz'uyinik.

⁴³Eh chupaam i q'iij re' re' ma' k'isa chikop i xq'ahteesjik chi mayiij. Ma' k'isiin ta noq xsuuqb'ik qak'ux chiquncheel ruum re' QaJaaw Dios ma' k'isiin taj i rusuqkiil qak'ux xuyeew. Re' taqe ixoq taqe ha'lak'un ma' k'isiin wo' xsuuqb'ik kik'ux i keh. Re' suq kiil k'uxliis xwihik Jerusaleem x-ib'irjik cho rib'iral chi najt yuuq'. Re' taqe i wach i tik xmolarik wach chi k'uxumb'al keh i aj Levíta

⁴⁴Eh chupaam q'iij re' re' wilik taqe winaq xipa'ab'jik chi rilariik i paat i molarik wii' taqe i mayiij ink'amarik cho parupaat i Dios, je' chi tumiin, je' chi peet kiwach i tik, je' wo' hoq i ju'jun inkesaj ruuk' i lajtaq. Re' keh kik'ulwik reh chu'nchel i mayiij inkik'am cho chupaam i ju'jun chi tinamit, je' wo' rukab' i ruq'or i k'uhb'aal. Eh inkiq'asaj keh i k'amal kib'eeh aj tiij, je' wo' keh i aj Levíta, ruum re' taqe i aj Judá suq kik'ux chikiij.⁴⁵Re' keh xkian i rukamaj i Dios, eh xkian i kikamaj taqe i aj tz'uyineel i kicha'jinik reh taqe i puerta. Xkian nik' wach i ruq'orom kahnoq i reey David, je' wo' hoq i ruq'orom kahnoq i Salomón i rak'uun.⁴⁶Eh najtir chaloq noq xwihik chi reyil i David, noq xwihik cho chi k'amal b'eeh i aj tz'uyineel i Asaf noq inki a'n i loq'inik i t'iosinik reh i Dios, eh xk'uloq ayu' yu'naak.⁴⁷Eh noq wilik parajaawriik i Zorobabel, ruch'ihil i Nehemías, chu'nchel i aj Israel i iqal i iqal inkiq'asaj i k'uxumb'al keh i aj tz'uyineel, je' wo' keh i kicha'jinik reh taqe i puerta, je' wo' keh i aj Levíta. Eh re' taqe aj Levíta xkiyeew wo' kok' taq i chib'ih keh taqe i riih rumaam i Aarón. Re' Nehemías xk'amwik kib'eeh i aj Israel reh chi xi wihik parukorkiil

¹Chupaam q'iij re' re' x-ilarik paam i huuj ree k'uhb'aal ye'ooj ree Moisés chikiwach i tinamit. Eh ar xkan chi tz'ihb'amaj chi re' taqe aj amonita, i aj moabita chi ma' ruyeew ta riib' chi naa kiwihiik chi kixilak i aj Israel rutinamiit i Dios.²Ruum re' taqe aj amonita, taqe aj moabita, ma' xkiyeew ta kiwa' kihaa' i qamaam qati't noq xi-ik'ik pan kitinamiit. Xkitoj la' Balaam chi xupahqaaj i ma' holohik taj chikinaah, xa re' la' re' QaJaaw Dios re' i ma' holohik taj xusutej chiholohik.³Eh noq xkib'iraj chib'ih i ruq'or i k'uhb'aal xkesaj taqe reje i tokoom tinamit chi kixilak i aj Israel.

⁴Eh pampeet noq xwihik chi k'amal kib'eeh aj tiij i Eliasib, re' reh inilwik reh i paat i molarik wii' taqe ink'amarik cho chupaam i rupaat i Dios. Eh re' i Eliasib re' re' ma' tokoom ta ruuk' i Tobías.⁵Eh re' Eliasib xuyeew reh i Tobías chi ruye'aab' jinaj i nimlaj paat re' naq i molarik wii' i mayiij, i insensia, taqe i kulk, taqe ju'jun inkesaj ruuk' i laj taq, taqe i trigo, i riis uuva, i aseite, re' inye'arik keh i aj Levíta, keh i aj tz'uyineel, keh i kicha'jinik reh taqe i puerta, taqe i mayiij inye'arik keh i k'amal kib'eeh aj tiij.⁶Eh noq xk'ularik taqe re' ma' wilkiin ta chik i hin Jerusaleem, ruum xinooj wo' chik ruuk' i reey Artajerjes, re' noq kab'laj ru ka'winaq haab' rokiik chi reyil Babilonia, xa re' la' xama' najt ta wo' xponik nub'an ar, ruum xuyeew wo' chik cho q'ab' weh i reey chi xinsutinik cho Jerusaleem.⁷Noq xink'ulik Jerusaleem xnukoj rehtaal chi ma' holohik taj i xub'an i Eliasib chi xuyeew reh i Tobías i nimlaj paat wilik chucheel i rupaat i Dios.⁸Re' hin ma' xponik ta chi nuwach i xub'an, xnukut taqe cho rij paat chu'nchel i chib'ih reh i Tobías.⁹Eh xnuq'or chi naa kisaqb'isam paam i paat re' re', xnuq'or chi naa wo' chik kiye'em ar taqe i kulk i mayiij, insensia, inkamanik parupaat i Dios.

¹⁰Eh xkiq'or weh chi ma' inye'arik taj i k'uxumb'al keh i aj Levíta. Eh xkiq'or wo' weh chi re' taqe aj Levíta i aj tz'uyineel kib'anik reh i rukamaj i Dios xi elik reje Jerusaleem xiooj pan kiye'aab'.¹¹Re' hin xnuq'il taqe i wilkeeb' chi taaq'anik chinaah i tinamit, je' wili xnuq'or keh: ¿Chib'ih reet noq xakanaa' taq i rupaat i Dios? kinki. Eh xnumol kiwach i k'amal kib'eeh aj tiij, je' wo' taqe aj Levíta, xnukoj wo' chik taqe pankikamaj.¹²Eh chu'nchel i aj Judá xtohq'ik wo' chik kiye'em i ju'jun inkesaj cho ruuk' i lajtaq i trigo i riis uuva, i aseite.¹³Re' hin xnupab'aa' taqe i Selemías k'amal kib'eeh aj tiij i Sadoc i aj tz'ihb', i Pedaías, re' i aj Levíta. Chi re' keh xi ilwik reh taqe paat kimolarik wii' chu'nchel i mayiij. Eh xnupab'aa' wo' hoq i Hanán rak'uun i Zacuur riih i Matanías chi to'ool keh. Re' taqe re' korik wach kik'ux re' keh xich'aqwik i k'uxumb'al keh i kuch kamanoom.

¹⁴QaJaaw Dios mansahchik tii panak'ux taqe i holohik xnub'an re' re'. Eh mansahchik panak'ux chu'nchel i holohik xnub'an chi riij aapaat, chi riij akamaj.

¹⁵Chupaam taqe q'iij re' re' xnukoj rehtaal chi wilik taqe i aj Judá inki a'n i kamanik chupaam i hi'limb'al q'iij. Wilik i xkian yitz'ij uuva, wilik xkian ihq trigo, wilik xkikoj chi ihq i kib'uruux reh i ruk'amariik chaloq i ki trigo, i ki higo, eh chu'nchel i wach i kitik. Re' hin xnuq'il taqe chi ma' naa ta kianam i k'aay chupaam i hi'limb'al q'iij.¹⁶Eh wilik taqe i re' ruuk' i aj Tiro wilkeeb' Jerusaleem, inkik'am taqe chee kar, je' wo' chu'nchel i xa chib'ih jariik chi k'ayil inkik'ayej keh i aj Judío chupaam i hi'limb'al q'iij.¹⁷Re' hin xnuq'il taqe i k'amal b'eeh wilkeeb' Judá, je' wili xnuq'or keh: Re' taq i hat ma' holohik ta taq i k'ahchi' kaat ruum k'ahchi' taq ach'uwa' risam wach i hi'limb'al q'iij.¹⁸¿Mi ma' je' wo' re', re' i xkian taq aamaam awati't najtir? ¿Mi ma' ruum re' taqe re' xuyeew i Dios i ti' k'axik chi qanaah i hoj, chinaah i qatinamiit? ¿Mi konawaaj taq ajosam wach re' i rujosq'iil i Dios chinaah i qatinamiit Israel ruum i ruch'uwa'resjiik wach i hi'limb'al i q'iij? kinki keh.

¹⁹Eh nuq'or wo' keh chi noq k'ahchi' chik i rokiik i q'equm noq ach i iqal i hi'limb'al q'iij jumehq'iil naakitz'apam taqe i puerta reh i Jerusaleem, chi ma' naa ta kitehem korehtaal chik inik'ik i q'iij re' re'. Eh wilik taqe i numoso xnukoj chi cha'jinik chi chii' taqe i puerta, reh chi ma' jino'q i rihqaam ruk'aay naa kikojom i koq chupaam hi'limb'al q'iij.²⁰Eh re' taqe i yakool, taqe i xa reh reh wach kik'aay xkik'saj aq'ab' chi riij i tinamit Jerusaleem, ka'pech, oxpech xkik'ul chi je' re'.²¹Eh re' hin xnuq'il taqe, je' wili xnuq'or keh: ¿Chib'ih reet noq inawik'saj taq aq'ab' chuwach i koraal tz'aq? Wila' xa a'n taq chik chi je' re' naa taq kaat nuchopom, kinki. Noq xkib'iraj chi je' re', ma' kota chik xi ponik aj k'aay pan hi'limb'al q'iij²²Eh xnuq'or keh i aj Levíta chi naa kisaqb'isam kiib', eh chi naa rojiik kicha'jeem i ru puertahiil i tinamit, reh chi ma' awach ta nee ch'uwa'risanik wach i hi'limb'al q'iij.
QaJaaw Dios kink'oloq tii panak'ux, cha kuy tinumahk ruum xiik' naah i ketelinik wachiis awuuk'.

²³Eh chupaam i q'iij re' re' xnukoj rehtaal chi wilik taqe i aj Israel xkian kaxáro kuuk' taqe ixoq aj Asdod, eh kuuk' i aj Amón, kuuk' i aj Moab.²⁴Yejaal i kak'uun kixq'uun kiq'orik pan kiq'oral i aj Asdod, eh pan kiq'oral i tokoom tinamit. Ma' kichol taj i kiq'orik wii' i aj Israel.²⁵Re' hin xnuwech'uj riij kuuk' xnuyuq'eej i ti' k'axik chikinaah. Wilik keh taqe i re' i xnuq'oj taqe, wilik i xnuchuq chikinaah, xnumin taqe chupaam chi xkiq'or i korik parub'ihnaal i Dios chi ma' naa ta chik kiye'em q'ab' chi naa kianam kaxáro kuuk' i kak'uun kixq'uun i tokoom tinamit, ni xata re' keh.²⁶Je' wili i xnuq'or keh: ¿Mi ma' aweht'al taq re' hat chi re' taqe re' xminwik reh pamahk i Salomón najtir? Ma' awach ta chik jino'q i reey xwihik chi je' rukab' i reh, q'e' xk'axarik ruum i Dios, eh re' wo' reh xpaab'anik reh chi reyil chinaah chu'nchel i tinamit Israel. Eh re' taqe ixoq tokoom i kitinamiit ximinwik reh pamahk.²⁷¿Minakapaaj taq re' hat chi xanaa qakanaam chi je' re' taq i yiib' wach mahk k'achi' taq kaat, re' chi k'ahchi' taq ak'amam chi awehk'een i tokoom kitinamiit? kinki keh.

²⁸Re' i Eliasib kajaaw i k'amal kib'eeh aj tiij jinaj i rak'uun Joiada rub'ihnaal, xuk'am chi rehk'een i rixq'uun Sanbalat aj horonita. Ruum i xub'an re' re' xwesaj reje chupaam i rupaat i Dios.

²⁹QaJaaw Dios chakoj rehtaal taqe k'amal kib'eeh aj tiij inkich'uwa' risaj wach i kikamaj inkesaj i rajaawriik i xayejaa' wach kuuk' i k'amal kib'eeh aj tiij, eh kuuk' i aj Levíta.

³⁰Re' xwesaj taqe reje chu'nchel tokoom tinamit chi kixilak i k'amal kib'eeh aj tiij. Eh xnuyeew taqe pankikamaj chi kiju'junaal, i k'amal kib'eeh aj tiij, je' wo' taqe aj Levíta.³¹Eh xnuq'or wo' hoq chi xkik'am chee sii' paruq'ijil reh i mayiij. Eh nuq'or wo' keh i tinamit chi xkik'am chaloq paruq'ijil i peet wach i kitik.
Hat waJaaw nuDios kink'oloq tii panak'ux, chaketelaaj nuwach.

Bible Society in Guatemala

https://app.library.bible/content/695aa4b9f902778f