NAHUM1
1Chupaam i huuj wili xutz'ihb'aaj i Nahúm aj Elcos chib'ih i xk'uhtjik reh parusaq wiriik, ruum i Dios. Re' noq xq'orarik reh chib'ih i ti' k'axik naakik'ulum i aj Nínive.2Re' i QaJaaw Dios iraaj chi xa re' reh naa runimjiik, i ruq'aj wach keh i xa re' i yiib' wach na'ojb'al inki a'n Eh i ruyeew i rujosq'iil chikinaah awach i ki-ixowanik wach.3Re' i QaJaaw Dios ma' jumehq'iil ta inchalik rujosq'iil, xa re' la' wilik rajaawriik. Eh ruyeew taqe chutojariik i kimahk i aj mahk, eh imb'ehik chinaah taqe i kaq suut teew, je' wo' chinaah taqe i suutz'.4Re' reh i ruq'il i palaw, i ruchiqsaj, eh i ruchiqsaj chu'nchel i nim ha'. Eh rukansaj i ch'ahn ar Basán, je' wo' tik wilik chuwach i yuuq' Carmelo. Eh ruchiqsaj taqe i uhtz'ub' ar Líbano.5Eh chuwach i Dios xa kib'arb'otiik chik ruum kiyo'jiik taqe najt kinaah yuuq', taqe i rub'ohl yuuq'. Eh kik'uyu'jik i wach ak'al ruum, eh kib'oqibik, je' wo' chu'nchel i wilkeeb' chupaam.6Eh ¿awach neenkuywik reh i rujosq'iil i Dios? ¿Awach i neeruko'leej riib' chuwach? ruum re' reh je' rukab' i q'aaq' noq ruyeew i rujosq'iil, eh kipaxik taqe ab'aj chuwach.7Re' i QaJaaw Dios xiik' naah rotob'il, ruum i ruyeew rukowiil kik'ux taqe i ti' wilkeeb', eh i ruko'leej taqe i awach i kiye'em kik'ux ruuk'.8Eh noq naa taqe ruye'em panti' k'axik i ma' kinimanik ta reh je' naa narumuq'aam kinaah ruuk' ha'. Eh je' naa pa runimaal q'equm naa kikahniik taqe i ki-ixowanik awach.9Eh raaj taq i hat aj Nínive ¿Chib'ih reet noq inakapaaj taq i ma' holohik taj chi riij i QaJaaw Dios? Re' reh naa rusacham taq awach, xa ruuk' i junriim, ma' kota naa ruk'ihpechem.10Re' taq i hat je' taq akab' i k'iix wilkeeb' pantaq ab'iix, ruuk' taq i na a'n, eh je' wo' taq akab' taqe i xohk'reel, ruum taq i na a'n re' re', naa taq ak'atariik je' rukab' noq ink'ahtik i chiq sohk'.11Eh chaxilak taq i hat wilik inyej-anik wach i yiib' wach na'ojb'al chi riij i QaJaaw Dios, re' jinaj chi aj taq chi' yiib' wach i runa'ojb'al.12Re' i QaJaaw Dios je' wili i xuq'or keh i aj Israel: Atoob' ta xiik' naah kik'ihaal i aj Asiria nee kichalik taq cha naah, re' hin naa nusacham kiwach. Re' hin xatnuyeew taq panti' k'axik, xa re' la' ma' naa ta chik taq kaat nuye'em panti' k'axik.13Re' hin naa wesam taq cha naah i ahl laj ihq, eh naa nuchejem taq awach ruum b'ak'ooj taq awach ruuk' taq i na a'n, inki.14Eh re' i hat kireey i aj Nínive, i ruq'or Dios chi ma' jino'q aawiih aamaam naa rokiik chi reyil chajilow. Eh naa nusacham kiwach pankipaat taq i aatiyoox haab'imaj chee' taqe korjinaq wii', eh ar naa aamuhqiik i hat ruum ayiib' wach aana'ojb'al, inki.15Chab'iraj taq, xk'uloq chik chinaah taqe yuuq' i k'ahchi' cho chuq'orariik rib'iral i suq rib'irjiik re' inq'orik rib'iral i suq kiil k'uxliis. Re' taq i hat aj Judá, xponik chik i q'iij chi naa taq a'nam aninq'iij. Eh ma' jaruuj chik q'iij naa kichopom taq anaah i yiib' wach kina'ojb'al, ruum re' keh xsacharik chik kiwach. Re' aj Nínive xq'orarik chi naa rusachariik kiwach1Re' taq i hat aj Nínive k'ulik chik i rub'an iloq cha naah i sachal taq awach, chakoj taq i aj q'atool chupaam taq ab'eeh. Chab'ak' taq nah atuuq i q'aslaj ch'ihch', cha yejaa' taq awiib' reh i q'aq'inik.2Re' i QaJaaw Dios naa wo' chik ruye'em kiloq'il i aj Israel, re' taqe i riih rumaam i Jacob. Eh naa wo' chik kehchaam i xq'ucharik keh, naa wo' chik rukanaam taqe chi je' rukab' i pampeet, naa wo' chik ruwachiniik i kitik.3Re' taqe i soldado okik keh chi q'aq'inik taq cha naah, xa kaq chik i kipulato ch'ihch', je' wo' kiso', xa kiyejaam chik kiib' reh i q'aq'inik. Eh re' i kikawayu xankaaj chik ojik chi q'aq'inik, re' taqe i kikareta xa nqop chik ruq'aq'al, reh ojik chi q'aq'inik.4Re' taqe i kikareta xak'ul chik kiooj pantaq b'eeh, xa teheeh chik kiwach, xak'ul chik kiooj pantaq k'aayb'al, xa je' chik kikab' i saqumb'al qoplik ruq'aq'al, eh xa je' chik rukab' i ruch'aab' i kahoq inki a'n5Eh re' reey ar Nínive, xuyuq'eej taqe i ru soldado xak'ul chik inkiq'oj kiib' ruum rutehkiil kiwach, eh re' taqe aj ixowaal ruuk' i qamaam chee' ch'ihch' ju' xkik'er i koq i ru puertahiil i tz'aq.6Eh kitehiwanik i koq taqe i puerta wilkeeb' chi' ha'. Eh re' paat wilik wii' i reey ch'alojik wach ak'al.7Eh re' i rehk'een i reey, eh taqe ixoq kikamanik ruuk' xichoparik kuum i aj ixowaal, xasuq chik kioq'ik, xa je' chik kioq'ik paloma, xankituy chik i koq i chi' kik'ux.8Re' i tinamit Nínive je' rukab' noq i nelik chee ha' noq inhop chaloq i molb'al reh, Atoob' ta naq q'oraroq keh chi tipaa' taq ti sutinoq taq kiuchjoq, xama' jino'q wo' chik keh i naa rusutiniik.9Eh naa wo' rukuxiik kelq'aam i plata, i oro. Re' taqe i aj Nínive xti yohb'aal wach kib'ehomal, xa k'axb'al chik wach.10Xa re' la' naa kikahniik chi ma' xta chik wilik keh, xan tz'irik chik kiwach. Eh xanaa chik kib'arb'otik ruum kiyo'jiik, xanaa chik rukarkotiik i pankaa'. Eh xama' xta chik kikowiil, xasaq moq'ik chik naakiponiik.11Eh ¿Chib'ih jariik i xkik'ul i aj Nínive? Re' i je' naq kikowiil i kaq b'ahlam, je' naq kikab' ixoq kaq b'ahlam, i kiye'aab' i kok' rak'uun b'ahlam ma' xta naq inkiyohleej wach, eh ma' awach ta naq inyohb'isanik keh.12Re' taqe i aj Nínive q'e' naq kow inki a'n kiib', xa awach naq inkikansaj, je' rukab' i rub'an i kaq b'ahlam, ruuk' josq'iil i ruchop i rutiib', i ruyeew reh ixoq kaq b'ahlam, je' wo' keh i kok' rak'uun, i runujisaj chi chikop taqe i ruye'aab'.13Re' i QaJaaw Dios nim rajaawriik je' wili xuq'or: Re' hin ma' nuk'ax ta wach i inki a'n i aj Nínive, naa nuk'atam i kikareta naa reliik rusib'eel. Eh naa nusacham kiwach i kow kiib'. Eh naa nusacham kiwach i kielq'anik taq chib'ih aweh. Naa rukahniik chi ma' xta chik taq awaj taqareel, inki.1Re' taq i hat aj Nínive q'e' taq ti' i naa ak'ulum ruum hat taq kansan aawas achaaq', hat taq aj chukul q'orik, ma' jaruuj taq inakanaa' rub'aan i leq'2Eh chalik inki a'n taq cha naah i ki-ixowanik taq awach. Re' keh k'ahchi' cho kiye'em chi tz'uhuum i kikawayu reh i chalik chi jumehq'iil xa kajiim chik chaloq i kikareta.3Eh ma' k'isiin i wilkeeb' rij kawáyu naa kokiik chi q'aq'inik. Xa saq repik chik i reeh i ju' kich'ihch'. Eh naakihopib'iik i tinamit, eh xa aha' naa rukahniik chi tuch'lik i kiti'jolal i kamnaq pantaq b'eeh, naakitoxk'iim i kooq chikinaah.4Re' taqe i aj Nínive, je' re' i naakik'ulum ruum xiik' naah yib'kiil wach i kina'ojb'al. Eh je' taqe k'oyoom laj ixoq, ruum chi xa holohik chik inki a'n kiib' inkijot' i tinamit. Eh je' kikab' i xti manlik aj war, ruuk' i re' inkijot' taqe i tinamit korehtaal i rehchaaj.5Re' i QaJaaw Dios nim rajaawriik, je' wili i xuq'or: Re' taq i hat aj Nínive, naa kaat nukanaam chi t'usulkaat Eh naa nuk'uhtaam taq ak'ixb'ilaal chikiwach i nimaq tinamit.6Eh naa taq kaat nutolem pan chuh laj ch'uwa', naa nuk'uhtaam taq ak'ixb'ilaal, naa taq kaat nukanaam chi xa kise'lb'aal i tinamit.7Eh chu'nchel i naa kilwiik taq aweh naakeliik taq chawach je' wili i naa kiq'orom: Xsacharik kiwach i aj Nínive. ¿Mi ko wilik neenketelinik kiwach? ¿Mi ko wilik neen ye'wik rusuqkiil kik'ux? inko'q taqe.8Re' taq i hat aj Nínive ¿Mi q'e' taq kow awiib' re' chuwach i tinamit Tebas? re' kotimaj riij ruum i nim ha' Nilo, eh inkamanik reh chi je' rukab' i tz'aq ko'lb'al riib'.9Eh re' naq i tinamit Etiopía, re' i Egipto inko'linik reh, xkiyeew cho kik'ux chi ruko'ljiik. Eh xto'arik wo' ruum i tinamit Fut, je' wo' i tinamit Lidia.10Xa re' la' re' taqe i aj Tebas, xa xi k'amarik wo' reje pan tokoom tinamit. Eh re' taqe i kiha'lak'uun xpuch'arik i kinaah xilak taq b'eeh, re' taqe i aj ixowaal xkiq'ijej riij taqe i k'amal b'eeh i lb'al reh awach aj uuk' naa rukahniik chi mosojik. Re' taqe nimaq kiwach chi kixilak i aj Tebas xb'ak'arik kiwach chi karena.11Je' re' i naa ak'ulum taq i hat aj Nínive, xa je' taq chik hat xohk'reel noq naa taq asik'im aha' taq naa akeb'aam awiib', chikiwach i ki-ixowanik taq awach.12Eh chu'nchel i paat inako'leej taq wii' awiib', xanoq wo' naa kich'a'lojik wach ak'al. Je' rukab' noq inch'a'lojik i wach i higo, noq intz'a'jik i koq k'isinoq, eh ink'uxarik i koq.13Re' taq aa soldado naakikahnik chi je' taqe ixoq, ruum naa kiyo'jiik. Naa rukahniik chi tehlik i ookb'al reh taq aatinamiit, ruum naa ruk'ahtiik taq aapuerta, eh ar naa kokiik i ki-ixowanik taq awach.14Re' taq i hat atoob' ta chamol taq ahaa', reh chi wilik taq ahaa' noq nee kichalik taq chi apletojik. Atoob' ta cha yejaa' taq i xaan yejeenb'al taq apaat, inako'leej taq wii' awiib', xama' naa ta wo' taq ako'leem awiib'.15Eh ruuk' q'aaq', ruuk' ch'ihch' k'ulq'as naa rusachariik taq awach. Naa taq rub'aan aweh je' rukab' noq insacharik kiwach i tik kuum i nimaq chili'l. Atoob' ta je' taq ak'ihaal i ma' k'isa nimaq chili'l, xanaa wo' taq kisacham awach i aj ixowaal16Eh yohb'aal chik wach kik'ihaal i aj k'aay kik'ulik taq panatinamiit, ma' xata je' kik'ihaal i ch'umiil i wilkeeb' pan taxaaj. Re' taqe nimaq chili'l inkijal i kiij, eh kirupinik reje.17Re' taqe i k'amal taq ab'eeh, taqe i kitijiniik reh taqe aa soldado kikahnik chi xa je' kikab', i ruk'ihaal nimaq chili'l inkipab'aa' kiib' wataq tz'aq paruq'ijil jab'. Eh noq i rureq ruq'ijil si'q'jil aha' ta wo' kiooj ma' nilarik ta chik kiwach.18Re' taq i hat kireey i aj Asiria ma' xta chik naa kianam i ki-ilwik taq reh aatinamiit, xa je' chik suq kiwiriik naa kikahniik. Eh re' taqe i aa soldado naakimolom chi elik, chi ju' taq yuuq' pantaq raax chee', ma' awach ta chik i naa rumolwiik kiwach.19Re' taq i hat aj Nínive, ma' xta chik riq'omal i ti' k'axik taq naa ak'ulum. Eh chu'nchel i tinamit naakipohq'aam paam i kiq'ab' ruum i rusuqkiil kik'ux na'kib'iraj rib'iral i chi xkisach taq awach, Ruum q'e' taq ti' i naa ak'ulum.
Bible Society in Guatemala