MIQUEAS1
1Re' i ruk'uhb'aal i Dios wili xq'orarik reh i Miqueas aj Moreset. Eh parusaq wiriik xk'uhtjik reh chib'ih i naakik'ulum i aj Samaria, i aj Jerusaleem, re' noq xi wihik cho chi reyil Judá i Jotam, i Acaz, i Ezequías.2Eh re' Miqueas je' wili i xuq'or: Chab'iraj taq i hat chawunchelaal i wilkaat taq chupaam i ye'aab' wili, Chakoj taq rehtaal chi re' i QaJaaw Dios, ko chupaam i rusantolaj paat naa ruq'orom chaloq chi wilik taq amahk.3Re' i QaJaaw Dios ko paruye'aab' naa reliik chaloq naah taq yuuq' naa ruk'uliik iloq noq naa ruye'em i ti' k'axik taq cha naah.4Re' noq naa rub'anam taqe re', je' na naa ruhaab'iik taqe i yuuq' k'ixkaab' chuwach, xa je' chik rukab' i nelik chaloq i kowlaj rooq ha' i nelik chaloq wataq yuuq'.5Ruum taqe kimahk ruum ma' nkinimaj taj i Dios, taqe i riih rumaam i Jacob. ¿Awach aj uum ma' kin nimanik taj i aj Israel? ¿Mi ma' kuum re' i aj Samaria? ¿Awach aj uum inkinloq'ej i tiyoox i aj Judá mi ma' kuum re' i aj Jerusaleem?6Eh re' Dios je' wili xuq'or: Re' hin naa nusacham wach i chib'ih keh i aj Samaria. Re' i kiye'aab' xa tikb'al chik uuva naa rukahniik wii' eh re' tz'aq kotimaj wii' riij naa rukutariik wach ak'al.7Eh naakixereb'iik taqe i kitiyoox, naakik'ahtiik taqe i inki a'n wii' i loq'inik ruch'ihil taqe i kimayiij ar, ruum re' taqe i re' ruuk' kitumiin i k'oyoom laj ixoq korjinaq taqe, naa wo' chik nukanaam chi je' kitumiin k'oyoom laj ixoq, inki.8Re' i Miqueas je' wili xuq'or: Eh ruum taqe naa ruk'ulariik, naa wesam i nuxijab' noq naa nub'eeh, naawisam i nuso' chi wiij. Eh naa nuk'erem nuchii' chi oq'ik, je' rukab' noq i ruk'er chii' i xojb', oon i tuhkur.9Re' hin naa rutib'iik nuk'ux ruum i kiyiib' wach na'ojb'al i aj Samaria je' rukab' i yok'eel. Eh xponik chi kixilak i aj Judá, inki a'n xponik kuuk' i aj Jerusaleem, re' taqe i nutinamiit.10Eh ma' naa ta taq aq'orom rib'iral ar Gat, ma' naa ta taq awoq'iim, xanaa la' taq atolem awiib' panak'al ar Bet-le-afra.11Re' taq i hat aj Safir, naa taq ruk'uhtjiik ak'ixb'ilaal, t'usulkaat taq noq naa ak'amariik reje pan tokoom tinamit. Eh re' taq i hat aj Zaanán ma' naa ta chik taq aweliik reje pana ye'aab'. Eh re' taq i hat aj Bet-sel naa taq awoq'iim ruum ma' awach ta naa rutoob'iniik taq aweh.12Re' taqe i aj Marot, ma' k'isa ti' k'axik i naakik'ulum, xanaa naq chik kaajwaam elik chupaam, xama' naa ta wo' keliik, ruum re' i QaJaaw Dios naruye'wiik chikinaah. Eh korehtaal naa ruponiik Jerusaleem.13Re' taq i hat aj Laquis chach'ilaa' taq aakareta chikiij i kawáyu, reh i runik'ib'jiik elik chuwach i ti' k'axik. Ruum re' taq i hat xat k'amwik kib'eeh i aj Jerusaleem chub'anariik i yiib' wach na'ojb'al, je' wo' noq xkikanaa' runimjiik i Dios i aj Israel.14Re' taq i hat cha kanaa' taq chi jumpech i ye'aab' Moreset-gat, re' tinamit Aczib naa rukahniik chi je' jinaj xirob' chi keh i kireey i aj Israel.15Re' i QaJaaw Dios je' wili i xuq'or: Re' taq i hat aj Maresá wilik chik i chopol naah taq aaye'aab' naa nu taq'aam reje, eh re' taqe i k'amal taq ab'eeh sik'ooj kiwach i hat taq aj Israel, naa rojiik kikeb'aam kiib' paruhopil ab'aj wilik ar Adulam.16Re' taq i hat aj Sión chajohyaaj taq i rismaal aanaah naa rukahniik chi je' rukab' i wach naah i k'ux rehtaliil chi ti' taq ak'ux chikiij aatinamiit q'e' taqe inak'ax. Ruum re' taq i hat naa taq ak'amariik reje pan tokoom tinamit, inki. Re' ti' k'axik naakik'ulum i kib'anik ti' k'axik keh i neb'aa'1Q'e' ti' i naakik'ulum i xa re' i yiib' wach na'ojb'al inkiyejaa' wach, pan kiyokaab'. Eh noq imponik i q'iij inki a'n wo' hoq, ruum inkiq'or chi wilik kajaawriik.2Eh inkik'ax wach aak'al, i paat tokoom ehchan reh, korehtaal inkiq'uch. Eh chi je' ajaab'ees, chi je' ak'uunb'ees inkelq'aaj i chib'ih reh.3Ruum aj re', re' i QaJaaw Dios je' wili i xuq'or: Re' hin wilik i ti' k'axik nuyejaam wach taq cha weh ma' naa ta rik'iik taq chawiij. Eh ma' naa ta chik taq animb'isam awach, ruum chupaam taqe i q'iij re' re' jinaj runimaal ti' k'axik naa ruchaliik taq cha naah.4Eh je' wili i naa kiq'orom taq chawiij i ki-ixowinik taq awach: Yu'naak q'e' ti' i k'ahchi' kik'ulum, ruum xq'ucharik wo' chik keh i xkiq'uch i keh, tokoom chik ehchan reh. Eh ma' jino'q chik naa ruyej-anik reh i ye'aab' xkehchaaj naq xkich'aq wo' chik chikiwach taqe i xiq'uchwik reh, inko'q taqe.5Ruum aj re', re' taq i hat ma' naa ta taq awehtriik haa' chi kixilak i rutinamiit i QaJaaw Dios, noq naa wo' chik ruch'aqariik keh i kiye'aab'.6Re' i tinamit je' wili ix kiq'or: Maa q'or qeh taqe i q'orik i ruq'or i jalal ruq'oral i Dios, ruum re' i Dios ma' nee ta ruk'ul cho qeh i k'ixb'ilaal laj na'ojb'al inqa a'n,7¿Minakapaaj re' hat chi nee qoh ruq'eb' chi riij ruk'ux i hoj, hoj aj Israel? ¿Mi neerub'an re' i je' re' i Dios intoob'inik qeh i hoj rutinamiit? ¿Mi ma' nee taqe rutoob'eej re' i korik wach kik'ux noq inaq'or i hat? inki taqe.8Eh re' i QaJaaw Dios je' wili i xuq'or keh: Re' taq i hat xawixowaaj taq wach i nutinamiit, inaq'uch taq i kiso' k'ih taq tz'aaq i kisutinik cho panq'aq'inik, inakapaaj taq chi ako'leem taq chik awiib'.9Re' ixoq chi xilak i nutinamiit inawesaj taq reje pankipaat, aha' suq naq wilkeeb' wii', re' i kikok' ha'lak'uun inakanaa' taq chi ma' xta ilil keh. Eh ma' nayeew ta taq q'ab' chi kinkiloq'ej.10Re' taq i hat eleen taq reje chupaam i ye'aab' wili, ruum ayu' ma' naa ta taq ahi'liik chuk'ulariik i ti' k'axik, ruum yohb'aal wach i yiib' wach na'ojb'al imb'aan ruum i re' naa rusachariik wach.11Wila' xk'uloq jino'q i chukul q'orik nee ruq'or chi je' wili: chi hoj wach i vino, i k'ahlaj ha' naa ruwihiik, inko'q ra'j re' re' manlik aj k'uhb'alineel chi keh i tinamit, inki Dios.12Eh je' wo' chik wili i xuq'or: Re' hin naa wo' chik numolom kiwach i Israel nik' chik k'ihaal i xi kahnik, je' rukab' noq i molarik kiwach i tentzun ar Bosra. Eh naa wo' chik nuye'em taqe chupaam i ye'aab' nuye'em keh pampeet, eh korehtaal wo' chik kik'ihaaxb'iik ar inki.13Eh re' i QaJaaw Dios naa rutehwiik reje kib'eeh, eh re' keh naakitahqeem reje, korehtaal kielik reje chi kixilak i tinamit i nixowanik kiwach. Eh re' i kireey i QaJaaw naa ruk'amwiik reje kib'eeh chi kunchelaal. Re' iruq'orariiki kimahk i k'amal kib'eeh i tinamit Israel1Re' i Miqueas je' wili i xuq'or: Re' taq i hat i ti k'amwik kib'eeh i aj Israel, chab'iraj taq i naa nuq'orom aweh ¿Mi ma' ruk'ul naq taq cha weh re' chi re' chik nee taq i na a'n i rub'ehel?2Eh re' taq i hat inawixowaaj taq wach i holohik, re' i yiib' wach taq inak'ax wach. Je' nanaach'ol taq i rutz'uhmal i kiij i nutinamiit, eh je' inakanaa' taq wach saqum i kib'aqil ruum i ti' k'axik taq i na a'n keh.3Eh je' nanaak'ux taq chi k'achlik kiwach i nutinamiit, je' nanaach'ol taq i kitz'uhmal, je' nanaapaxej taq i kib'aqil. Eh i na a'n taq keh je' rukab' i na a'n taq reh i tiwik inchaq'teesjik pan xun.4Eh pan jinaj ponoq q'iij nanaq chik aq'oreem taq i QaJaaw Dios, re' reh ma' naa ta taq chik kaat rib'iram. Ma' naa ta chik ruk'uhtaam i rotob'il taq cha naah, ruum xiik' naah yib'kiil wach taq amahk.5Re' QaJaaw Dios je' wili i ruq'or: Re' ink'amwik keh pamahk i nutinamiit re' i jalal nuq'oral inki a'n kiib'. Re' keh inkiq'or rib'iral i rusuqkiil k'uxliis reh inye'wik kiwa', eh re' ma' ye'wik ta kiwa' inkiq'or reh chi naa ruchaliik i q'aq'inik chikinaah.6Re' taq i hat ma' xta chik i naa nuk'uhtaam taq aweh panasaq wiriik, chi riij taqe i naa ruk'ulariik. Eh ma' xta chik taq i naa awilom, naa ruq'equumriik paam taq aana'ojb'al, je' rukab' noq inq'equumbrik i q'iij, inki.7Eh re' naq taqe i aj q'iij, taqe jalal nuq'oral inki a'n kiib' naakik'uhtaam kik'ixb'ilaal, xama' xta chik i naa kiq'orom, noq naakilom chi ma' naa ta chik kichaq'weesjiik ruum i Dios.8Eh re' hin, hin nujinaq ruuk' i ruxlab'al i QaJaaw Dios, i ruyeew nukowiil, i ruk'uhtaaj weh i korik, reh chi neenuq'or keh panaq' kiwach i aj Israel re' taqe i riih rumaam i Jacob chi korik chi ma' nkinimaj ta chik i QaJaaw Dios, chi ma' k'isiin i mahk inki a'n.9Chab'iraj i naa nuq'orom taq i hat k'amal kib'eeh i aj Israel, je' wo' taq i hat i nimaq taq wach ana'ojb'al. Re' taq i hat ma' holohik ta taq inawilow taqe i holohik, re' i holohik re' taq i re' i naasutej chi ma' holohik taj.10Inayeew taq runimaal wach i Sión ruuk' ikaansanik taq i na a'n. Eh re' i Jerusaleem ruuk' taqe i yiib' wach na'ojb'al taq i nayeew runimaal wach.11Eh re' taqe i q'atal q'orik inkik'ul i tumiin chi riij i chukuj q'orik. Re' taqe i k'amal kib'eeh aj tiij koruuk' tumiin inki a'n i k'uhb'alinik. Eh re' taqe i jalal ruq'oral i Dios inki a'n kiib' koruuk' tumiin inkiq'or i k'uhb'aal, eh inkiq'or chi reh i Dios inki a'n je' wili inkiq'or: Re' i QaJaaw Dios wilik quuk' ma' xtaj i yiib' wach neenchalik chi qanaah, inki taqe.12Eh awuum taq i hat i Jerusaleem, i tinamit wilik chinaah i yuuq' Sión naa rukahniik chi ma' xta chik i wilik chupaam xa je' chik jino'q ab'iixb'al, naakich'alojiik i wilkeeb' chupaam. Eh re' yuuq' wilik wii' i rupaat i QaJaaw Dios naa rupoq'iik chaloq i yiib' kiwach ch'ahn chinaah. Re' i QaJaaw Dios xuq'or chi naa wo' chik ruye'em keh i suq laj k'acharik i rutinamiit (Isa 2.1-4)1Eh naa ruponiik i q'iij chi re' xti manlik i rupaat i QaJaaw Dios wilik chinaah i yuuq', re' re' q'e' naa ruwihiik runimaal wach chikiwach chu'nchel i yuuq' najt kinaah, eh ma' k'isiin i tinamit wilkeeb' sut i wach ak'al naa kojiik chi rilariik.2Eh re' i tinamit, je' wili i naa kiq'orom: Kim taq qojohtoq chinaah i yuuq' i wilik wii' i rupaat i QaJaaw re' i ruDios i Jacob, reh chi nee ruk'uhtaaj qeh i rub'eeh, eh naaqak'am naah i nee ruq'or qeh, inko'q taqe. Ruum ar Sión naa reliik chaloq i ruk'uhb'aal i Dios, eh Jerusaleem naa reliik chaloq i ruq'oral.3Re' i QaJaaw Dios naa ruq'atwiik i q'orik chikinaah i tinamit, eh naa ruq'ilim taqe i nimaq tinamit kow kiib', i wilkeeb' chi najt yuuq'. Eh re' kich'ihch' k'ul q'as naakisutem chi reh arado, re' i kich'ihch' q'as ju' macheet chik naakisutem wii'. Eh ma' jino'q chik i tinamit naakikansam kiib' ruuk' ch'ihch', ma' naa ta chik kitijiik reh i q'aq'inik.4Re' i ju'jun chi patineel naa kik'achariik pansuqkiil k'uxliis naa ruwihiik kitik re' ruuk' i uuva, re' ruuk' i higo. Eh ma' awach ta chik naa ruyohb'isaniik keh, ruum je' re' i xuq'or i QaJaaw Dios nim rajaawriik.5Atoob' ta re' taqe i tokoom tinamit re' taqe i kitiyoox neenkinimaj, Eh re' hoj xama' naa ta wo' qakanaam runimjiik i k'achlik Dios re' i QaJaaw. Re' i QaJaaw Dios xuq'or chi naa wo' chik ruko'leem i rutinamiit6Re' i QaJaaw Dios je' wili i xuq'or: Re' hin naa ruponiik i q'iij noq naa numolom kiwach i nutinamiit, re' taqe i xnuq'eb' naq taqe chi riij nuk'ux, i xnutukej kiwach, eh xnutib'isaj kik'ux.7Re' i xkitukej kiib' re' re' je' rukab' noq inkitukej kiib' taqe i tentzun, naa numolom kiwach, naa nukanaam taqe chi jinaj tinamit wilik kajaawriik. Eh re' i Dios nim rajaawriik naa nuwihiik chi reyil chikinaah chi juneliik chinaah i yuuq' Sión.8Re' i hat i Jerusaleem, hat naa acha'jiniik keh, naa aye'em rukowiil kik'ux i wilkeeb' nah yuuq' Sión je' rukab' i rub'an reh i rutentzuun i aj cha'jen tentzun. Re' hat naa akahniik chi chopen naah taqe i tinamit, eh naa wo' chik ruwihiik runimaal wach je' rukab' i pampeet.9Eh yu'naak ¿Chib'ih reet noq inak'er taq aachii', je' rukab' ixoq noq ink'ulik ruk'ux? ¿Mi ruum re' chi xsacharik kiwach taqe aareey? ¿Mi ruum re' chi xsacharik kiwach taqe i kikojwik taq ana'ojb'al?10Ti oq'oq taq, cha k'er taq aachii' i wilkaat taq Sión, je' rukab' noq inoq'ik ixoq noq ink'ulik ruk'ux. Cha yot' taq ak'ux ruum naa taq awehteesjiik reje pana tinamit, naa taq awojiik chi patinik panab'iix, korehtaal taq ti ponik Babilonia. Eh re' hin naa nuko'liik taq aweh, naa wesaniik taq aweh pan kiq'ab' i ki-ixowanik taq awach.11Yu'naak ma' k'isiin i tinamit xkimol kiib' chi naa taq kaat kipletoheem, je' wili inkiq'or: Yu'naak naa qasacham kiwach taqe i aj Jerusaleem ma' xta chik i neenkahnik, inki taqe.12Re' i tinamit re' re' ma' keht'al taj chib'ih i nukapaaj i hin, chib'ih i nuyejaam wach, ma' keht'al taj chi re' hin naa numolwiik kiwach reh kiye'ariik panti' k'axik naa nub'anam keh je' rukab' noq imb'ak'arik paam i trigo reh i rupotz'ariik.13Eh re' taq i hat aj Sión cha yejaa' taq awiib', ruum re' hin naa taq nuye'em akowiil, naa taq nuye'em awansil chi je' jino'q imas wakax, je' naa nanukojom taq aawuk'aa' chi ch'ihch' je' naa nukojom taq awixk'aq chi q'an ch'ihch', reh chi ma' k'isiin i tinamit taq naa asacham kiwach. Eh naa taq aq'uchum i chib'ih keh, weh hin taq chik naa aye'em, inki i Dios. Re' i naa rukahniik chi reyil chinaah i tinamit Israel Belén naa reliik chaloq1Re' taq i hat aj Jerusaleem cha yejaa' taq ko'lb'al awiib' ruum xkikotej taq chik riij aatinamiit. Re' keh ruuk' karote naakiq'ojom noq naakiye'em panti' k'axik ink'amwik qab'eeh i hoj aj Israel.2Eh re' i hat tinamit Belén Efrata ma' re' ta nkiwii' chi q'e' hat k'isiin chikiwach i tinamit wilkeeb' paruyuq'ul i Judá, awuuk' la' hat naa reliik chaloq jinaj i k'amal b'eeh naa rucha'jiniik reh i nutinamiit Israel, re' i xa wilik wo' chaloq najtir q'iij.3Re' i QaJaaw Dios naa pee rukanaam chi naakik'ulum i ti' k'axik i rutinamiit kore' naa risam i ti' k'axik, noq naa rasjiik jinaj i k'ahchi' ruyub'jiik, re' naa rokiik chi reyil. Eh naa rumolom kiwach kuuk' i kuch aj Israel i konaakikahniik chi k'achalkeeb'.4Eh re' i reey re' re' naa rokiik chi cha'jen keh i rutinamiit ruuk' i runimaal i rajaawriik i ruDios. Eh ruuk' i runimaal wach i rub'ihnaal pansuqkiil k'uxliis chik naa kik'achariik i rutinamiit, ruum re' reh naa ruye'em chee rajaawriik chi junsuut i wach ak'al.5Eh re' reh naa ruye'em suq kiil qak'ux i hoj, naakooj ruko'leem pan kiq'ab' i aj Asiria noq naa kichopom naah i paat imb'aan wii' i q'ataj q'orik. Eh re' hoj wuquub' i aj cha'joom naa qataq'aam chi kik'ulb'ejiik, eh waxiqiib' i winaq nimaq wach kina'ojb'al naa qataq'aam reje.6Eh re' taqe i winaq re' re', naa kojiik chi kik'ulb'ejiik i aj Asiria noq ruuk' q'aslaj ch'ihch', naa kia'nam reh i aj Nimrob. Naa koj kiko'leem pan kiq'ab' i aj Asiria naa kokiik cho chi qapletohjik paruk'ula'tiil i qatinamiit, reh chi naa kichopom naah i qa ye'aab'.7Re' taqe i aj Israel ma' naa ta kikanteesjiik, je' mus jab' chi keh i tinamit je' rukab' i jab' noq i rut'aqsaj chaloq i tik mu'uun i rutaq'aaj chaloq i QaJaaw Dios. Re' taqe i ma' kuye-eej taj inkaaj i winaq, re' kuye-eej iraaj i QaJaaw Dios.8Eh re' taqe i aj Israel ma' naa ta kikanteesjiik naa kikahniik chi, q'e' kow kiib' chi kixilak i tinamit. Eh je' kikab' i josq' laj kaq b'ahlam chi kixilak i johsq' laj chikop wilkeeb' pantaq ch'ahn, eh ma' jino'q i naa ruko'leem riib' pan kiq'ab' i aj Israel, je' rukab' i rub'an i kaq b'ahlam noq i ruk'uxib'eej taqe i tentzun ma' jino'q chik i rukanaa'.9Re' taq i hat aj Israel naa taq aq'atam kiwach i ki-ixowanik taq awach, eh naa taq rukuxiik asacham kiwach.10Eh re' i QaJaaw Dios je' wili xuq'or: Re' hin naa ruponiik i q'iij noq naa nuye'em q'ab' chi naa kikanteesjiik taqe aakawayu, eh chi naa rusachariik kiwach i aakareta reh q'aq'inik.11Eh naa nusacham wach taq aatinamiit, eh chi naa kiyojib'eem taq animaq taq paat i naa ko'leej naq taq wii' awiib'.12Naa wo' nusacham kiwach taqe i aj war, je' wo' taqe aj q'iij wilkeeb' taq chaxilak.13Naa wo' nusacham kiwach i tiyoox holohaq ab'aj korjinaq wii', reh chi ma' nee ta chik taq inaloq'ej chi jumpech taq atiyoox xa hat taq titz'awik reh.14Naa wo' rusahchiik kiwach taqe i tiyoox Asera rub'ihnaal je' wo' chu'nchel i tinamit wilkeeb' wii'.15Re' hin ruum i nujosq'iil naa nuye'em taqe chutojariik i kimahk i ju'junseht chi tinamit ma' xkaaj ta kinimam i nuk'uhb'aal, inki Dios. Re' i ti' k'axik xchalik chikinaah i aj Israel ruum i kiyiib' wach na'ojb'al1Eh re' taq i hat aj Israel chab'iraj taq i ruq'or i QaJaaw Dios chi je' wili: chayuq'eej taq awuuk' taqe i yuuq', cha q'or taq chi korik chi wilik taq amahk, ponoq chinaah taqe yuuq' taq aq'oral.2Chab'iraj taq i hat yuuq' k'ixkaab' chi re' i hin Dios k'ahchi' nujosq'iil kuuk' i nutinamiit Israel naa nuq'atam q'orik chikinaah ruum i kimahk inki.3Eh je' wo' chik wili i xuq'or i QaJaaw Dios: hat taq nutinamiit ¿Chib'ih i ma' holohik taj xub'an taq aweh, eh chib'ih taq xat nuch'itaaj wii'? Inwaaj taq chi neenaq'or weh.4Re' hin ma' xta xinq'ehb'ik taq wii' chawach, re' hin xineesanik taq cha weh panti' k'axik Egipto. Re' noq xnutaq'aaj taq reje chawehteesjiik i Moisés i Aarón, i María, reh chi xkik'am taq cha b'eeh.5Re' taq i hat nutinamiit k'oloq taq panak'ux chib'ih xat rutaqchi'ij taq cho wii' i Balac, kireey i aj Moab. Eh chib'ih xat ruchaq'weej wii' i Balaam rak'uun i Beor, eh chib'ih taq i xak'ul noq xat ik'ik taq ar Sitim, eh Gilgal. Re' hin xintoob'inik taq aweh, ruum aj re' ma' xta taq xak'ul, inki Dios. Re' i rupahqaaj i Dios chi naa ruye'ariik reh6¿Chib'ih jariik i ruk'ul chi naaqaye'em reh i QaJaaw Dios, nik' wach rulooq'jiik naa qa'nam? ¿Mi re' chi neenuyeew i k'atoj mayiij chuwach, oon re' chi nee nuk'am reje chi numayiij i peet rak'uun i nuwakax jinaj haab' i wilik reh?7¿Mi neensuuqb'ik ruk'ux re' i QaJaaw noq neenuyeew chi numayiij i ruk'ihaal q'ina' laj imas tentzun? Eh ¿Mi neensuuqb'ik ruk'ux re' chi neenuyeew chi numayiij chuwach i xata wo' jarub' lemeta chi aseite? ¿Mi neerukuy re' i numahk chi neenuyeew chi numayiij chuwach i peet wak'uun?8Re' i QaJaaw Dios ma' re' ta taqe re' iraaj, re' i rupahqaaj aweh i QaJaaw Dios i hat re' taqe i wili: Re' chi naa a'nam taqe i ruk'ul chi b'anarik, eh chi naa ruwihiik i ketelinik wachiis awuuk', re' chi naa aloch'om awiib' chi runimjiik aaDios.9Re' i QaJaaw Dios k'achi' taq kaat ruq'oreem panatinamiit, wilik runa'ojb'al awach inyohlinik reh aab'ihnaal. Eh chakoj taq rehtaal awach inaakiye'ariik chutojariik i kimahk, eh awach naa ruye'wiik keh chutojariik i kimahk.10Re' i yiib' wach runa'ojb'al ma' k'isiin i rub'ehomal wilik xa ruuk' i leq' rureqem tz'aaq, eh re' i rupexu ma' manlik ta impajwik, re' taqe re' ma' imponik ta chi nuwach i hin.11Eh ¿Nik' wach noq neenukuy ru mahk inelq'anik ruuk' i rupexu i rukoj chi pajb'al, eh ma' manlik ta impajwik?12Re' taqe i b'ehomaq wilkeeb' chupaam i tinamit wili inkelq'aaj chib'ih reh i neb'aa', eh xa re' i chukuj q'orik inkaaj, xa re' i rujot'ariik i kitinamiit inki a'n13Re' hin naa taq kaat nuye'em chutojariik taq amahk, eh naa taq nusacham awach ruum taq amahk i na a'n.14Naa wo' naq taq a'nam awa' ahaa' xama' naa ta wo' taq anujiik, xama' naa ta wo' taq amayam i kuyuj wi'k. Eh naa wo' naq taq amolom chib'ih aweh xama' naa ta wo' taq akolom riij, eh wila' xakol taq riij, aj q'aq'ineel naa kisachwik wach.15Eh naa wo' naq taq atikim chib'ih aweh xama' naa ta wo' kiwachiniik, naa wo' naq taq ake'em wach i aseituna xama' xta wo' taq aseite naa awisam. Eh naa wo' naq taq ayeq'em paam i uuva xama' xta wo' taq i riis naa awuk'em.16Ruum xak'am taq naah i ruk'uhb'aal, eh aha' wilik i rub'an i reey Omri rub'ihnaal, je' wo' hoq i rub'an i reey Acab, xa a'n taq aweh inki a'n i keh. Re' hin naa nub'anam ti' k'axik taq aweh, naa taq ak'uhtaam ak'ixb'ilaal taq i hat i aj Jerusaleem, ruum ma' xinanimaj ta taq, inki i Dios. Re' i yiib' wach na'ojb'al xkian i aj Israel1Re' hin q'e' ketel nuwach, ruum je' rukab' i winaq i rusik' i wach i rutik paruq'ijil, ma' xta chik wach noq xponik, rusik' naq chik i wach i ru-uuva sik'ooj chik noq xponik. Eh re' naq i peet wach i rutik xraaj ruk'uxum xama' xureq ta wo' hoq2Re' hin je' re' i k'ahchi' nuk'ulum, ruum ma' xta ketelinik wachiis wach ak'al ruum ma' jino'q chik i korik wach ruk'ux. Xak'ul inkikansaj kiib' chikiwach, k'ul inkikoj xirob' pankib'eeh.3Eh inkik'uhtaaj i yiib' wach na'ojb'al, re' taqe ajaab'ees inkaaj chi wilik i naa ruye'ariik keh chi riij inki a'n Eh re' taqe i q'atal q'orik inkik'ul i tumiin chi riij i chukuj q'orik. Re' taqe wilik kajaawriik, inki a'n i chib'ih inkaaj i keh, eh inkiq'or chi re' re' i korik.4Re' i chihooj runa'ojb'al chi kixilak je' rukab' i k'iix. Eh re' i korik wach kik'ux je' rukab' i koraal k'iix, eh ponik reh q'iij chi naa kiye'ariik panti' k'axik, re' i naa kiq'orom rib'iral aj cha'joom. Ar aj re' ma' naa ta chik kireqem chi riij chib'ih i naa kianam.5Eh ma' nimaj i ruq'or awamigo. Eh ma' naa ta ach'ikaam ak'ux kuuk' i k'amal b'eeh, eh atoob' ta ruuk' awehk'een neena a'n ak'utaaj chawik'raaj awiib' ruuk' i naa aq'orom.6Re' taqe ak'uunb'ees naakixowaam wach i kajaaw, re' taqe ixq'uunb'ees ma' naa ta chik kinimam i kituut. Eh re' taqe i ilib'jeel naakixowaam wach i rutuut i kib'ahiil, re' i naa rixowaniik kiwach i ju'jun, re' taqe i awach keh pankipaat.7Eh re' hin naawuy-eem i rotob'il i QaJaaw Dios, ruuk' i reh naa nuch'ikaam i nuk'ux, ruum weht'al chi re' reh naa ruko'liniik weh, eh naa kiin rib'iram. Re' i QaJaaw Dios xuketelaaj wo' chik kiwach i aj Israel8Re' taq i hat i ti ixowinik taq qawach, ma' nsuuqb'ik taq ak'ux ruuk' i k'ahchi' qak'ulum. Atoob' ta xqaq'eb' q'iib', naa wo' chik qik'raam q'iib'. Atoob' ta panq'equm wilkooj naa wo' chik kooj rusihq'eem, i QaJaaw Dios.9Eh korik chi xoj mahkunik chuwach i QaJaaw Dios, ruum aj re' xanaa chik qakuyum i rujosq'iil, korehtaal i ruq'at i q'orik chi qanaah re' rub'ehel naa rub'anam quuk'. Eh naakooj risam panq'equm, ar naa qilom chi re' reh re' i rikorkiil i rub'an quuk'.10Re' i ki-ixowinik qawach naakilom i keh, ruum i re' naa ruchaliik kik'ixiik, re' i kiq'orik qeh chi je' wili: ¿Aha' wilik i ki Dios inkiq'or? inki taqe. Eh naakilom chi naa rehtesjiik i kajaawriik, naa rub'aan keh je' rukab' noq inye'q'arik paam i ch'uwa' pantaq b'eeh.11Re' taq i hat i aj Jerusaleem naa ruponiik i q'iij chi naa wo' chik ruyejeb'jiik i tz'aq chi riij taq aatinamiit, eh naa wo' chik ruk'ihaaxb'iik taq aa ye'aab'.12Eh chupaam taqe i q'iij re' re', wilik taqe i re' ruuk' taq aatinamiit naa kichaliik Asiria, naa kichaliik Egipto, naa kichaliik chi chii' i nim haa' Nilo, naa kichaliik chi chii' i ha' Éufrates. Eh wilik naa kichaliik chi chii' taqe palaw, naa kichaliik chinaah taqe i yuuq'.13Re' i aj Israel xkahnik chi ma' xta chik i wilik chupaam i kitinamiit, ruum i kimahk xkian. Re' re' i xuk'am chaloq i kiyiib' wach na'ojb'al.14QaJaaw Dios chawil tii aatinamiit, ruuk' awajaawriik, je' rukab' i rub'an cha'jen tentzun i ruyeew taqe i rutentzuun wilik wii' i ch'ahn inkik'ux. Eh chayeew wo' chik taqe aatinamiit chupaam i ye'aab' Basán, chupaam i ye'aab' Galaad. Chayeew wo' chik keh i suq laj wihik, je' rukab' noq xi wihik cho ar pampeet.15Chak'uhtaaj tii chikiwach i ma' ilooj taj je' rukab' i xak'uhtaaj chikiwach i qamaam qati't, noq xawesaj taqe chaloq Egipto.16Eh noq neenkilow taqe i wilkeeb' pan taq nimaq tinamit chi je' re', neenchalik kik'ixiik. Eh neenkikahyeej i ju' kiq'ab', nee kikahnik meem, eh neenkahnik chi tz'aplik i kixikin17Eh nee kikahnik chi xa je' chik rukab' taqe i aaq' noq inkitolej kiib' pampooq, oon je' kikab' taqe i xa chib'ih chik chopkaal noq xakib'arb'otik chik ruum kiyo'jiik noq nee tikisik', ruum xa re' wo' hat, hat qaDios.18¿Mi wilik chik jino'q Dios chi je' rukab' i hat? ma' xtaj, ruum re' hat insahchik panak'ux chi ma' xat kinimaj taj i ruqox aatinamiit wili. Eh i nakuy kimahk, eh xti korik noq inak'uhtaaj qeh aak'axb'al ma' juneliik ta i nayeew aajosq'iil chi qanaah.19QaJaaw Dios, chaketelaaj wo' chik qawach, sahchoq panak'ux i qayiib' wach na'ojb'al. Eh chawesaj reje chi qawach chi jumpech taqe i qamahk, chakut qohoq ko paruchamiil i palaw.20QaJaaw Dios, eliik chayeew qeh awotob'il, i ketelinik wachiis, je' rukab' aq'orom cho keh i qamaam qati't najtir q'iij, re' i Abraham, i Jacob.
Bible Society in Guatemala