Read JOB 1

JOB1

¹Jinaj i winaq Job rub'ihnaal xwihik chaloq paruyuq'ul i Uz. Re' winaq re' re' korik wach ruk'ux, holohik i runa'ojb'al. Eh xuyohleej i Dios, ma' xub'an ta reh i yiib' wach na'ojb'al.²Re' Job wuquub' i rak'uun xwihik, eh ixib' i rixq'uun.³Eh wuquub' miil i rutentzuun, ixib' miil i rucameyo, hoob' siento k'uhl i rub'ooyax, hoob' siento i rub'uuruux. Eh yohb'aal wach k'ihaal i rumoso xwihik. Eh xti xa re' wo' reh xiik' naah b'ehomal chupaam taqe i ye'aab' wilkeeb' reje parelb'aal q'iij.

⁴Re' taqe i rak'uun i Job inki a'n kininq'iij pankipaat chi kiju'junaal. Eh inkiyuq'eej kuuk' ixib' chi kanaab' reh chinki a'n kiwa' kihaa' kuuk'.⁵Eh noq inkikohlaaj i ninq'ijinik, re' Job kowahq'eq inwuktik i rutaq'aaj kik'amariik i rak'uun i rixq'uun i ruq'asaj i k'atoj mayiij pahqb'al kuyb'al kimahk i rak'uun rixq'uun chi kiju'junaal. Ruum re' Job je' wili xuq'or ru q'iij ximahkunik i wak'uun i wixq'uun, xkib'aj-oq i Dios pankik'ux, inki. Re' Dios, re' aj yahm xkian kik'utaaj chi riij i Job

⁶Eh xponik i q'iij chi xooj kimol kiib' i ánjel chuwach i QaJaaw Dios, chi kixilak taqe re' xponik haa' i aj yahm.

⁷Re' i QaJaaw Dios xupahqaaj reh i aj yahm chi je' wili:
¿Aha' chalik i na a'n i hat? inki reh.
Eh re' aj yahm je' wili chaq'wik xub'an:
Re' hin chi junsuut wach ak'al xin chalik eh xnub'ehuj cho paam chu'nchel, inki.

⁸Eh re' i QaJaaw Dios xupahqaaj reh i aj yahm chi je' wili:
¿Mi xawil cho wach i waj kamanoom Job rub'ihnaal? Re' reh ma' awach ta chik jino'q i wilik wach ak'al chi je' rukab' i reh. Re' reh holohik i ruk'achariik, korik wach ruk'ux i ruyohleej nuwach ma' rub'an ta reh i yiib' wach na'ojb'al, inki.

⁹Eh re' aj yahm je' wili ruchaq'weesjiik i QaJaaw Dios xub'an:
¿Xa tan chi raaj i Job noq tiruyohleej?¹⁰Re' Job tiruyohleej ruum re' hat ti cha'jinik reh, je' wo' chib'ih i reh inacha'jeej wo' taqe i rak'uun rixq'uun. Eh i naa kuxisaj wo' ruuk' i rukamaj ruum i re' k'ahchi' ruk'ihaaxb'iik i chib'ih reh chinaah i wach ak'al.¹¹Yu'naak chawesaj chuwach i chu'nchel i chib'ih wilik reh konee aj inawil re' mi ma' neetub'aj panaq'awach, inki aj yahm.

¹²Re' i QaJaaw Dios je' wili ruchaq'weesjiik i aj yahm xub'an:
Ma' xta reet cha a'n chu'nchel chib'ih inawaaj a'nam ruuk' i chib'ih wilik reh i Job. Xa re' la' ma' chih awuchej i reh, inki.
Chi riij i re' xelik chaloq i aj yahm chuwach i QaJaaw Dios. Re' ti' k'axik xuk'ul i Job

¹³Eh pan jinaj q'iij noq k'ahchi' keeb' chi wi'k, k'ahchi' keeb' chi uk'ik riis uuva taqe i rak'uun rixq'uun i Job chupaam i rupaat i peet rak'uun.¹⁴Eh jinaj i winaq xooj k'oloq chi taqarik ruuk' i Job, je' wili i xuq'or reh:
Re' taqe aab'oyaax k'otooj naq paam ak'al inki a'n ruuk' i arado re' taqe aab'uuruux ma' najt ta wi'k inki a'n ar.¹⁵Chi ma' keht'al xiooj k'oloq taqe i aj sabeos, xkelq'aaj taqe b'ooyax, ruch'ihil taqe aab'uuruux, eh xkuxik kikansam kahnoq chi q'aslaj ch'ihch' taqe amoso, ach re' hin ma' xinkikansaj taj ruum aj re' xchalik nuq'or aweh, inki.

¹⁶Eh xakok'ahchi' wo' chi q'orik i winaq re' re' noq xooj wo' chik k'oloq i jinaj i winaq je' wili xuq'or reh i Job:
Xqajik chaloq i q'aaq' pan taxaaj xkuxik ruk'atam aatentzuun, je' wo' taqe incha'jinik keh ach wo' re' hin ma' xi rukansaj taj, ruum aj re' xchalik nuq'or aweh, i xk'ularik, inki.

¹⁷Eh xakok'ahchi' wo' chi q'orik i winaq re' re' noq xooj wo' chik k'oloq jinaj i winaq je' wili i xuq'or reh i Job:
Chi ma' qeht'al xiooj k'oloq oxch'uq i aj Caldeo xkuxik kelq'aam reje i cameyo, eh kuxik kikansam kahnoq taqe amoso. Ach wo' re' hin ma' xinkikansaj taj ruum aj re' xchalik nuq'or aweh xk'ularik, inki.

¹⁸Eh xakok'ahchi' wo' chi q'orik i winaq re' re' noq xooj wo' chik k'oloq jinaj i winaq je' wili i xuq'or reh i Job:
Re' taqe awak'uun awixq'uun noq k'ahchi' keeb' chi wi'k noq k'ahchi' kuk'em i riis uuva chupaam i rupaat i peet awak'uun.¹⁹Jinaj i kowlaj teew xchalik panchiq yuuq' xuq'oj kajchel i rutz'u'kaal i paat, xanoq wo' xq'ehb'ik i paat chikinaah awak'uun awixq'uun. Ach wo' re' hin ma' xin kimik taj ruum aj re' xchalik nuq'or aweh i xk'ularik, inki.

²⁰Eh noq xrib'iraj chi je' re' i Job xpa'lojik johtoq xuxih i ruso' chi riij xujoy i rismaal naah ruum i ruti'kiil ruk'ux. Eh xuxuk'aa' qohoq riib' wach ak'al, chi looq'jiik i QaJaaw Dios.²¹Je' wili xuq'or:
Sonolkiin noq xin-aasjik chinaah i wach ak'al, eh sonolkiin wo' chik noq naaweliik reje chuwach. Re' i QaJaaw Dios xye'wik weh, re' wo' chik i reh x-esanik chi nuwach, loq'imaj ta naq i QaJaaw Dios, inki.

²²Eh ruuk' chu'nchel i ti' k'axik xuk'ul i Job ma' xmahkunik ta chuwach i QaJaaw Dios, ma' xtaj i ma' holohik taj xuq'or chi riij i QaJaaw Dios. Re' aj yahm xupaj wo' chik i Job

¹Exponic wo' chik i q'iij chi xooj kimol kiib' i ánjel chuwach i Dios, chi kixilak taqe re' xponik haa' i aj yahm.²Re' QaJaaw Dios xupahqaaj reh i aj yahm chi je' wili:
¿Aha' chalik i na a'n i hat? inki reh.
Eh re' aj yahm je' wili i chaq'wik xub'an:
Re' hin chi junsuut i wach ak'al xin chalik, xnub'ehuj cho paam chu'nchel, inki.

³Re' i QaJaaw Dios xupahqaaj reh i aj yahm chi je' wili:
¿Mi xawil cho wach i waj kamanoom Job rub'ihnaal? Re' reh ma' awach ta chik jino'q i wilik wach ak'al chi je' rukab' i reh. Re' reh holohik i ruk'achariik, korik wach ruk'ux, ma' rub'an ta reh i yiib' wach na'ojb'al. Atoob' ta re' hat xaq'or weh chi naa nuye'em q'ab' chi naa ruk'ulum i ti' k'axik chi xama' xta rub'ehel.

⁴Re' aj yahm je' wili ruchaq'weesjiik i QaJaaw Dios xub'an:
Noq komajaa' chib'ih i ti' ruk'ul i ruti'jolal i winaq xama' xta wo' nee ruq'or. Atoob' ta neeruq'eb' chu'nchel i chib'ih reh chi ko'lb'al riij i ruk'achariik.⁵Yu'naak chayeew jino'q i yab'ilaal chinaah i ruti'jolal, konee aj inawil re' mi ma' neetub'aj panaq'awach, inki.

⁶Re' QaJaaw Dios je' wili ruchaq'weesjiik i aj yahm xub'an:
Ma' xta reet cha a'n ruuk' chib'ih inawaaj ruuk' i ruti'jolal xa re' la' maa wesaj i ruk'achariik, inki.

⁷Chi riij i re' xelik chaloq i aj yahm chuwach i QaJaaw Dios. Xukoj i yiib' wach raxq'aah chi riij i Job, xelik cho koju' rooq, xponik koyejal naah.⁸Re' Job xooj rutzunaa' riib' panchaaj, eh xuchop chaloq jinaj i ruxeer xoht ruuk' i re' i ruloch i riij.

⁹Eh re' Job je' wili i xq'orarik reh ruum i rehk'een:
¿Mi xakok'ahchi' wo' aye'em ak'ux chi nimanik re'? Chab'aj i Dios reh chi nee ti kimik, inki.

¹⁰Re' Job je' wili ruchaq'weesjiik i rehk'een xub'an:
Re' hat xa je' ti q'orik jino'q ixoq ma' xta runa'ojb'al. Wila' qak'ul i holohik i ruyeew qeh i QaJaaw Dios. ¿Nik' wach noq ma' neenqak'ul i ti' nee ruyeew chi qanaah? inki.
Ruuk' chu'nchel i xuk'ul i Job ma' xmahkunik ta ruuk' i ruq'oral. Re' noq xi ponik taqe ixib' chi ramigo i Job

¹¹Re' Job ixib' i ramigo, re' jinaj Elifaz i rub'ihnaal, aj ar Temán, re' i jinaj Bildad i rub'ihnaal aj ar Sua, re' jinaj Zofar i rub'ihnaal aj ar Naamat. Re' taqe ixib' chi ramigo re' re' xkib'iraj chi re' Job k'ahchi' ruk'ulum i ti' k'axik, junojiik taqe chi rilariik reh chi xooj kiyeew rusuqkiil ruk'ux, eh chi naa kitob'eem.¹²Eh noq xkilow reje wach chi najt i Job ma' xkinab'eej ta wach. Noq xkilow chi re' reh, xkik'er kichii' chi oq'ik. Eh xkixih i kiso' chikiij chi kiju'junaal, xkipukej i pooq pan taxaaj xkipukej wach kinaah ruum i ruti'kiil kik'ux.¹³Eh xooj kitzunaa' kiib' wach ak'al chucheel i Job, wuquub' q'iij, wuquub' aq'ab' xkian ar, ma' jino'q chi q'orik xkiq'or reh ruum xkilow chi xiik' naah ti'kiil wilik. Re' Job xuk'er chii' ruum i ti' k'axik xuk'ul

¹Re' Job xponik i q'iij chi ma' holohik ta xq'orik chi riij i q'iij x-aasjik wii'.²Eh je' wili xuq'or reh i Dios:

³Ma' holohik ta laj aq'ab' xintz'uhkrik wii', ma' holohik ta laj q'iij xin-aasjik wii' ruuk' i nutuut.⁴Xkahnik ta naq chi q'equm aq'ab' i q'iij re' re'. Ma' ta naq xuyeew chaloq i q'iij re' re' i QaJaaw Dios, ma' ta naq xsaq'ik.⁵Xq'equmbrik ta naq wach i q'iij re' re' ruum i runimaal q'equm, xb'urarik ta naq wach chi jumpech ruum i q'eq suutz', i q'iij re' re'.⁶Re' aq'ab' xintz'uhkrik wii' xkahnik ta naq chi q'equm chi jumpech. Re' q'iij xin-aasjik wii' ma' ta naq xokik paruman i q'iij, ree poh, eh ma' ta naq xokik paruman i q'iij ree haab'.⁷Xkahnik ta naq chi intz'irik paam aq'ab' re' re', ma' ta naq xwihik jino'q tz'uuy reh suq kiil k'uxliis chupaam.⁸Xq'orarik ta naq chi ma' holohik taj i q'iij re' re', kuum i ma' holohik ta kiq'orik chi riij i q'iij, re' taqe i wilik kajaawriik chinaah i qamaan k'ap.⁹Eh ma' ta naq xisihq'inik taqe chee ch'umiil chupaam i wahq'eq re' re'. Ma' ta naq xukuhtaaj riib' i q'iij, eh ma' ta naq chik saq'ik chi jumpech.¹⁰Ma' holohik taj aq'ab' re' re' ruum xuyeew q'ab' chi xin-aasjik, ma' ta xuyeew q'ab' chi xin-aasjik ma' k'ahchi' ta naq nuk'ulum i ti' k'axik wili.

¹¹¿Chib'ih inche reet noq ma' xin kimik noq ko hin rihqaam chee nutuut, oon noq kore' k'ahchi' wasjiik?¹²¿Chib'ih inche reet noq xinkik'ul noq xin-aasjik? ¿Chib'ih inche reet noq xuyeew nuch'uuch' i nutuut?¹³Ma' xta naq reet chi xinkimik ma' wilkiin ta naq chik chinaah i wach ak'al, hi'lik naq chik i nub'an yu'naak chi suq suq nuk'ux.¹⁴Wuch'ihil naq taqe i reey, je' wo' taqe i xikojwik na'ojb'al ayu' wach ak'al, wuch'ihil wo' naq taqe i kiyej-anik cho nimaq paat.¹⁵Wuch'ihil wo' naq taqe i wihinaq taqe cho chi ajaab'esil, re' taqe ixkinujisaj i kipaat ruuk' oro, ruuk' plata.¹⁶¿Chib'ih nche reet noq ma' xin kimik noq komajaa' kin-aasjiik, je' rukab' inkik'ul i ha'lak'un i ma' kilow ta wach i q'iij saq'um?¹⁷Re' taqe i yiib' wach kina'ojb'al inkikanaa' rub'aan i ma' holohik taj noq kikimik reje. Eh re' taqe i q'uhtinaq kihi'lik noq kikimik reje.¹⁸Eh ar wo' kiooj hi'loq taqe i wilkeeb' prexo noq kikimik reje, ma' kib'iraj ta chik i ruq'oral i aj cha'jen tz'ilom.¹⁹Eh noq imb'aan reje kimik, jinaj kiwach i wilik kajaawriik kuuk' i ma' xta kajaawriik. Re' taqe moso xaloq'ooj ma' xta chik kajaawriik i kipatroon chikinaah.

²⁰¿Chib'ih reet noq re' Dios i ruyeew rusaquum ink'ulwik reh i ti' k'axik? ¿Chib'ih reet noq i ruyeew ruk'achariik i xa eliik ti' i ránima?²¹Re' taqe i xa nkaaj naq chik kimik, xama' kikimik ta wo' hoq, atoob' ta naq neenkisik' je' rukab' i rusik'ariik jino'q q'e' k'ih tz'aaq.²²Re' keh noq kikimik reje inkireq i rusuqkiil kik'ux.²³¿Chib'ih reet noq re' Dios i ruyeew ruk'achariik i winaq ma' reht'al taj chib'ih i naa ruk'ulum, eh ma' rureq ta chi riij nik' wach noq naa reliik pan ti k'axik?²⁴Re' hin ma' nub'an ta chik nuwa', xa re' chik oq'ik i nub'an, eh ma' nub'an ta chik nuhaa' ruum i ruti'kiil i k'achi' nuk'ulum.²⁵Chu'nchel i ma' waaj ta naq chi naa nuk'ulum i q'e' naq kinyo'jik ruum, re' chik taqe i re' xchalik chi nunaah.²⁶Re' hin ma' xta nuhi'liik ma' suq ta wilkiin, ma' xta rusuqkiil nuk'ux ruum yohb'aal wach i ti' k'axik inchalik chi nunaah, inki Job. Re' peet k'utaaj xub'an i Elifaz ruuk' i Job

¹Re' Elifaz aj pan tinamit Temán, je' wili xuq'or reh i Job:

²Wila' chib'ih i xqaq'or aweh ma' suq ta neerub'an aweh, xa re' la' ma' nee ta rub'an chi ma' nee ta nqaq'or aweh chib'ih inqakapaaj.³Re' hat ma' k'isiin naq taqe i natijej ruuk' i rukorkiil, eh i nayeew naq rukowiil kik'ux i ma' kow ta kik'ux.⁴Eh ruuk' aq'oral i nayeew naq rukowiil kik'ux i xa q'ehb'ik naq chik keh. Inakoj wo' naq kina'ojb'al taqe i k'isiin kik'ux.⁵Eh noq wilkaat panti' k'axik ¿Chib'ih reet noq ma' nakowej ak'ux? ¿Chib'ih reet noq i rub'an kiib' ak'ux?⁶¿Mi ma' korik wach ak'ux re' hat chuwach i Dios? ¿Mi ma' hat raj kamanoom re'? Eh ¿chib'ih reet noq ma' nach'ikaa' ak'ux ruuk' i reh?

⁷Chakapaaj riij, ¿Mi wilik jino'q i korik wach ruk'ux insacharik wach? ¿Mi sacharik wach i ma' xta ru mahk?⁸Re' hin nukojom rehtaal, awach taqe i re' yiib' wach na'ojb'al inkitik, re' wo' chik i re' inkijach.⁹Re' Dios i rub'an cho keh, eh ruuk' i rujosq'iil i rusach kiwach.¹⁰Atoob' ta inkik'er kichii' ruum kijosq'iil je' rukab' i rub'an i kaq b'ahlam, re' Dios naa resaniik i kajaawriik, je' rukab' noq inehteesjik i wach keeh i kok' kaq b'ahlam.¹¹Eh naa kikimiik reje je' rukab' noq kikimik i kaq b'ahlam noq ma' xta chik kitiib', eh naa kitukem kiib' i kak'uun kixq'uun.

¹²Re' hin xk'ulik kiq'or weh jinaj i q'orik, xa q'uun xk'ulik kiq'or weh xa-xkijask'uuj weh.¹³Eh chaq'ab' noq suq kiwiriik chu'nchel i tinamit, wilik i xuk'uhtaaj riib' weh panusaq wiriik, ma' k'isiin ta xinyo'jik ruum.¹⁴Re' hin xchalik nu b'arb'otiik ruum nuyo'jiik, xakib'arb'otik chik chu'nchel i nuti'jolal.¹⁵Eh noq xik'ik ruhupej i nuwach jinaj i teew xipa'lojik taqe i rismaal i wiij.¹⁶Eh jinaj i xupab'aa' riib' chi nuwach, je' yohb'isaneel, xa re' la' ma' nunab'eej ta wach, eh jinaj i kowlaj q'orik xb'iraj, je' wili xuq'or:¹⁷¿Mi neerub'an chi korik wach ruk'ux i winaq chuwach i Dios? ¿Mi neerub'an chi saq wach i ránima chuwach i Dios xtz'uhkrisanik cho reh?¹⁸Ma' chih taj ruum re' Dios ni xata naq ruuk' taqe i ánjel i raj kamanoom i ruch'ikaa' ruk'ux, ruum wilik wo' kiq'ehb'ik wii' chuwach.¹⁹Kore' naa chik re' ruuk' i winaq ma' xta rukowiil neeruch'ikaa' ruk'ux i Dios. Re' winaq xa je' rukab' i paat, ak'al korjinaq wii' xa nah pooq ch'iklik xa re' yu' insacharik wach ruum i mooh.²⁰Re' winaq wahq'eq ko wilik ruk'achariik, eh xq'eq insacharik wach, inkimik reje chi jumpech, ma' awach ta chik inq'orik rib'iral.²¹Re' i ruholwochiil insahchik wach, eh inkimik reje chi jumpech, noq komajaa' i rureq runa'ojb'al inki.

¹Eh je' wo' chik wili i xuq'or i Elifaz reh i Job:
Chak'er aachii' wilik oon inche jino'q i ánjel neen toob'inik aweh.²Re' i min min chub'aan i ruyiib' wach na'ojb'al, re' i k'aah naa rukansaniik reh. Eh re' i ruk'ax wach i tokoom aj eh re' kaqwachiil naa rukansaniik reh.³Re' hin xwilow chi re' min min chub'aan i ruyiib' wach na'ojb'al xb'ehomb'rik, xa re' la' jumehq'iil xsahchik wach i chib'ih reh.⁴Eh re' taqe i rak'uun rixq'uun ma' awach ta intoob'inik keh. Noq kiooj pan q'atb'al q'orik kiye'ariik panti' k'axik ma' awach ta inko'linik keh.⁵Re' i wach i rutik re' taqe i aj wi'jaleel kielq'anik reh, atoob' ta pantaq k'iix wilik inkisik'. Eh re' taqe i chiqiij kichii' kiehchanik reh i rub'ehomal.⁶Re' i yiib' wach ma' panak'al ta nelik chaloq, re' ti' k'axik ma' panak'al ta i nelik chaloq.⁷Re' la' wo' i winaq chi rib'il riib' i ruk'am chaloq i ti' k'axik chinaah, je' rukab' noq impisk'anik johtoq i rukoxb' q'aaq' chi rib'il riib'.⁸Re' tee hin k'ahchi' nuk'ulwiik reh i k'ahchi' ak'ulum i hat, xnukanaa' naq chik pan q'ab' i Dios.⁹Ruum xa re' wo' reh wilik rajaawriik chub'aan taqe i nimaq wach sahchb'al k'uxliis, ma' awach ta neemb'anik reh.¹⁰Re' reh i ruyeew chaloq i jab' chinaah i wach ak'al ruuk' i re' i rut'aqsaj taqe i tik mu'uun.¹¹Eh re' reh i ruyeew runimaal kiwach taqe i xama' nimaq ta kiwach. Eh irutoob'eej taqe i ti' kik'ux.¹²Eh i ruyoj wo' wach i ma' holohik taj inkiyejaa' wach i wilik kina'ojb'al chi jot'ooj, reh chi ma' nooj ta eloq wach inkiyejaa' wach.¹³Eh i ruq'at pan kib'eeh i wilik kina'ojb'al chi jot'ooj ruuk' i yiib' wach inkikapaaj rub'aan. Eh ruyoj wach i ma' holohik taj inki yejaa' wach.¹⁴Atoob' ta pan q'iij wo' naq b'ehik inki a'n xa je' chaq'ab' b'ehik inki a'n xama' inkireq ta wo' chi riij chib'ih i naa kianam.¹⁵Re' wo' Dios inko'linik reh i k'ahchi' rub'aan ti' k'axik reh kuum i yiib' wach kina'ojb'al.¹⁶Ruuk' wo' Dios inkiko'leej kiib' i ma' kow ta kik'ux. Eh ruuk' i re' rutz'ap i kichii' i yiib' wach kina'ojb'al.

¹⁷Atoob' reh i winaq inq'ilarik ruum i Dios. Je' re' noq re' hat Job maa q'eb' chi riij ak'ux i aq'ilariik i rub'an i Dios nim rajaawriik.¹⁸Eh wila' xuyeew q'ab' chi xchalik i ti' k'axik chi qanaah re' wo' reh inye'wik rukowiil qak'ux, wila' xoj ruyeew panti' re' wo' reh neenk'achrisanik qeh.¹⁹Re' reh naa ruko'liniik aweh chupaam i waqiib' chi ti' k'axik naa ruchaliik cha naah, eh re' ruwuuq ti' k'axik ma' xta naa kaat ruchem.²⁰Eh paruq'ijil wi'jaleel re' wo' reh naa ruko'liniik aweh chuwach i kimik. Paruq'ijil q'aq'inik re' wo' reh naa ruko'liniik aweh chuwach i kimik.²¹Eh re' reh neenko'linik aweh noq neenkitz'aq wach i k'utaaj chawiij, eh ma' nee ta tiyo'jik noq neenkaaj kisacham wach i chib'ih aweh.²²Noq neenchalik i wi'jaleel cha naah xama' naa ta wo' rutib'iik ak'ux. Eh ma' naa ta wo' ayo'jiik kuum i josq'laj chikop.²³Re' taqe chikop ma' xta naa kuchem atik amu'uun. Eh naa akahniik pansuqkiil k'uxliis kuuk' i josq'laj chikop.²⁴Eh naa wo' ruwihiik suq kiil k'uxliis panapaat, noq naa rojiik awilom taqe aachikoop manlik kiwach.²⁵Re' hat k'ih awak'uun awixq'uun awiih aamaam naa kiwihiik, je' kik'ihaal i ch'ahn wilkeeb' wataq yuuq k'ixkaab'.²⁶Re' hat konaa arijb'iik noq naa akimiik reje ma' naa ta kimiik noq komajaa' imponik aq'ijil, je' rukab' i trigo konq'aanb'ik noq insik'arik.²⁷Re' hoj ruum taqe i qilom qeht'al chi je' re' ink'ularik. Re' hat chab'iraj, chakoj rehtaal chi je' re' ink'ularik reh chi neen kamanik aweh, inki i Elifaz.

¹Re' Job je' wili ruchaq'weesjiik xub'an.

²Neeta naq impajarik pan jino'q pexu i runimaal ti' k'ahchi' nuk'ulum.³Ma' xata naq je' rahliil i saniib' wilkeeb' chupaam taqe i palaw. Eh ruum ruti'kiil xnuq'or taqe q'orik wili.⁴Eh je' naa re' i QaJaaw Dios nim rajaawriik k'ahchi' rukutwiik weh chi flecha, je' rukiih xokik panuti'jolal. Re' Dios k'achi' kin ruyohb'isam ruum xuyeew taqe i ti' k'axik chi nunaah.⁵¿Mi neeruk'er chii' re' i b'uurux noq wilik ruch'ahn chuwach? ¿Mi nee ruk'er chii re' i b'ooyax noq wilik ruch'ahn chuwach?⁶¿Mi wilik ineeruk'ux i k'uxb'al ruwa' chi ma' xta ratz'amil? ¿Mi suq re' i rusaqiil miloj xa chi rutkeel?⁷Re' i ti' k'axik ma' inwaaj ta naq nuk'ulum, re' chik i re' inuk'ul, ma' nukapaaj ta chik nuwa' nuhaa' ruum.

⁸Neeta naq i rib'iraj chee nutiij i QaJaaw Dios, nee ta naq i ruyeew weh i k'ahchi' nupahqaam reh.⁹Ma' xta naq reet chi nee rusach nuwach i QaJaaw Dios, chi nee ta resaj i nuk'achariik.¹⁰Ruuk' i re' nee naq inch'iklojik nuk'ux nee naq kinhi'lik ruuk' i ti' k'axik k'ahchi' nuk'ulum. Re' hin eliik xnub'an chu'nchel i ruq'or i ruk'uhb'aal i Dios manlik Santo.¹¹Re' hin ma' xta chik wansil inwik'raaj chi neenukuy ransil i ti' k'axik wili. ¿Mi koruk'ul chi neekik'acharik chi je' re'?¹²¿Mi je' kowiil ab'aj re' i nuti'jolal chi neenukuy ransil i ti' k'axik wili? ¿Mi je' kowiil q'an ch'ihch' re'?¹³¿Mi neenukuy ransil chi wib'il wiib' re' i ti' k'axik? Chi ma' awach ta neentoob'inik weh.¹⁴Re' jino'q i k'ahchi' ruk'ulum i ti' k'axik i ruk'ul chi naa rutoob'jiik ruum i ramigo. Atoob' ta naq ma' korik wach ruk'ux ruuk' i Dios nim rajaawriik.¹⁵Eh re' taqe i hat wamigo ma' kinawaaj ta taq kiin atoob'eem, xa je' taq akab' i rooq ha' xa nooj chi qooq.¹⁶Xa je' taq akab' i rooq ha' tz'aplik naah ruum i saq laj suutz', eh ruum i jot'ik laj ha' i rutoy riib'.¹⁷Noq inchalik i tz'a' inhaab'ik, noq intz'ab'ik i q'iij inchiqik i ha'.¹⁸Re' taqe i ki-ik'ik ar kisahchik reh i kib'eeh inooj kisik' kihaa', xama' inkireq ta wo' hoq, xa je' chik panchiq yuuq wilkeeb'.¹⁹Re' taqe i kichalik Temán, je' wo' kichalik Sabá ch'iklik naq kik'ux chi naa kireqem kihaa' ar.²⁰Eh noq xkilow chi je' re' xsahchik kik'ux noq ma' xkireq ta kihaa'.²¹Xti korik i nuq'or taq aweh, chi je' taq akab' i ha' re' re', ruum noq i naa wilow taq i ti' k'axik wilkiin wii' ma' kinatoob'eej ta taq, ayo'jiik taq chik inchalik.²²¿Mi xnuq'or taq aweh re' hin chi chak'am taq chaloq i tumiin reh chi nee taq kinako'leej?²³¿Mi xnuq'or taq aweh re' chi nee taq kinako'leej pan kiq'ab' i ki-ixowanik nuwach? ¿Oon chi nee taq kinako'leej pan kiq'ab' i yiib' wach kina'ojb'al?

²⁴Cha q'or taq weh i numahk re' hin ma' xta neenuq'or. Eh cha q'or taq weh chib'ih xinq'ehb'ik wii'.²⁵Re' hin ma' nee ta nuq'or chi ma' chih taj wila' korik taq i xaq'or. Xa re' la' re' taq i hat k'ahchi' taq akojom numahk chi ma' xta rub'ehel.²⁶¿Chib'ih reet noq i nakoj taq numahk xa ruum taqe i xnuq'or jumehq'iil i ruk'am i teew? Re' i xnuq'or xa ruum chi ma' nureq ta naq chik chi riij chib'ih i naa nub'anam.²⁷Re' taq i hat i naawaaj taq a'nam wuuk' je' rukab' imb'aan keh i ma' xta kituut kajaaw. Je' rukab' noq injot'arik jino'q amígo.

²⁸Yu'naak xti kinawilow taq chi korik chakoj taq rehtaal mi xachukuj q'orik i k'ahchi' nuq'orom taq aweh.²⁹Chakanaa' taq i wech'inik wuuk', ruum re' hin ma' xta numahk, weht'al chi korik wach nuk'ux.³⁰¿Mi hin aj chukul q'orik re'? ¿Mi ma' nukoj rehtaal re' chib'ih nuq'or?¹Re' Job je' wo' chik wili i xuq'or: Re' ruk'achariik i winaq ayu' wach ak'al q'e' k'axik, je' rukab' jino'q i winaq i rik'saj i q'iij pankowlaj kamanik.²Je' rukab' i minooj pankamanik, xa raj chik wihik pan muuj, je' rukab' i moso xaraaj chik chi neenokik i q'iij reh chi neenhi'lik.³Je' re' i ti' k'ahchi' nuk'ulum i hin xata wo' jarub' poh rutohq'iik cho nuk'ulum. Rajlaal aq'ab' k'ahchi' wik'iik chi ti'.⁴Eh noq kinyohkik najt wach aq'ab' inwik'raaj. Kinq'uhtik, k'ul tol kinooj wach nuyokaab' korehtaal i nuk'ul i saq'ik. Ruum i re' je' wili nuq'or panuk'ux, ¿Kojaruuj kinwuktik johtoq? kinki.⁵Eh nujinaq chi haah i nuti'jolal inwik'raaj, nujinaq chi q'aah i wiij k'ahchi' reliik rukik'eel i nuti'kiil.⁶Re' nuk'achariik jumehq'iil k'ahchi' rusahchiik wach, je' rukab' noq inkutarik i chee' kotooj wii' i ruwa' keem.

⁷QaJaaw Dios re' nuk'achariik k'ahchi' rik'iik xa je' nik'ik junhuup chi teew ma' jaruuj chik naa ruwihiik rusuqkiil nuk'ux noq inwik'raaj.⁸Eh noq naa nukimiik reje ma' naa ta chik rilariik nuwach. Noq nanaq chik awaajwaam awilom nuwach, ma' naa ta chik awilom nuwach.⁹Re' nuk'achariik je' nik'ik jinaj suutz' awach inkimik reje ma' jaruuj chik naa rusutiniik chaloq.¹⁰Eh ma' naa ta chik rusutiniik cho parupaat, eh ma' naa ta chik ruchaliik wih-oq chupaam i ruye'aab'.

¹¹Ruum aj re', re' hin k'ahchi' nuq'orom taqe q'orik wili, ma' jaruuj naa numayam ruk'erariik nuchii' ruum i runimaal ti' k'axik k'ahchi' nuk'ulum.¹²¿Hin ta chi josq'laj chikop re' ruuk' i wilkeeb' pan palaw noq je' re' i na a'n cho wuuk'?¹³Re' hin i nukapaaj noq kinyohkik chi naa ruch'iklojiik nuk'ux wach nuyokaab'. Eh chi nanaq nuhi'liik ruuk' i ti' k'achi' nuk'ulum.¹⁴Xa re' la' xama' kinhi'lik ta wo' hoq ruum re' hat wilik wo' chik taqe inak'uhtaaj weh panuwiriik inchalik nuyo'jiik kuum.¹⁵Je' re' noq chi wee hin q'e' naq chihooj chi neenasach nuwach. Eh q'e' naq chihooj chi weh nee kinaakansaj reje.¹⁶Ruum xama' nukuy ta chik, ma' inwaaj ta chik wihik chinaah i wach ak'al wili. Eh kinak'am pansuqkiil k'uxliis re' nuk'achariik xa je' i nik'ik junhuup chi teew.¹⁷Hat nuDios, ¿Chib'ih rub'anam i winaq chi q'e' i naaketelaaj wach? ¿Chib'ih reet noq q'e' ti' inawik'raaj?¹⁸¿Chib'ih reet noq i nayeew ak'ux chi rilariik rajlaal i q'iij? ¿Chib'ih reet noq xak'ahchi' kaat chi rupajariik ruuk' i runimaniik?¹⁹¿Chib'ih reet noq ma' i naa kanaa' ta ruye'ariik chee ti' k'axik chi nunaah? ¿Chib'ih reet noq ma' nayeew ta chik q'ab' chi nub'iq' nuchuhb'?²⁰Wila' wilik numahk, ¿Chib'ih i numahk xnub'an chawach i hat ti-ilwik keh i winaq? ¿Chib'ih reet noq xa chi nunaah i hin i nayeew chee ti' k'axik je' cho k'ahchi' kiin akutum chi flecha? ¿Mi lahtz' i nub'an aweh re'?²¹¿Mi ma' neenajuch re' numahk? ¿Mi ma' neenakuy re' taqe i numahk? Re' hin xa ilook' chik kinooj panak'al. Re' hat nanaq chik awaajwaam rilariik' nuwach, ruum hin chik kamnaq reje, inki Job. Re' Bildad i xuq'or chi korik wach ruk'ux i Dios

¹Re' Bildad aj pan tinamit Sua, je' wili ruchaq'weesjiik i Job xub'an:

²¿Kojaruuj inakanaa' ruq'orariik taqe i k'ahchi' aq'orom? Re' taqe aq'oral inaq'or xa je' inik'ik kaq suut teew.³¿Mi ma' parub'ehel inq'atwik q'orik re' i QaJaaw Dios nim rajaawriik? ¿Mi neerujal wach re' i korik i reh?⁴Re' naa taqe awak'uun awixq'uun ximahkunik chuwach i QaJaaw Dios ruum aj re', re' reh xuyeew taqe chutojariik i kimahk.⁵Eh re' hat cha sik' chu'nchel ak'ux i QaJaaw Dios nim rajaawriik, cha pahqaaj reh chi nee ruketelaaj awach.⁶Wila' korik wach ak'ux, eh saq wach awánima re' reh nee tirib'iraj, eh nee wo' chik i ruyeew rusuqkiil ak'ux panapaat.⁷Eh xiik' chik naah ab'ehomal naa ruye'em i QaJaaw Dios, ma' xata je' rukab' ab'ehomal xwihik cho pampeet.

⁸Yu'naak i hat cha pahqaaj chib'ih jariik i kianam chaloq taqe i aj najtir q'iij reh chi neenatijej aweh i kina'ojb'al i keh.⁹Re' hoj koxoj aasjik wo' tii ma' xta qeht'al re' qak'achariik ayu' wach ak'al xama' najta wo' hoq xa je' rukab' noq inik'ik jino'q imuuj.¹⁰Eh re' taqe i aj najtir q'iij keh wilik taqe i kianam, reh chi neenatijej aweh ma' k'isiin taqe i na'ojb'al neenkik'uhtaaj aweh.

¹¹Chakoj taq rehtaal chi re' i kalaab' ma' ink'ihik taj aha' ma' xta ch'uwa'. Eh ma' k'ihik ta wo' hoq i kaxlan aaj aha' ma' xta wii' ha'.¹²Atoob' ta xa rax rax wo' naq wach xa peet wo' inchiqik chikiwach chu'nchel i ch'ahn atoob' ta komajaa' wo' naq inyok'arik.¹³Je' wo' re' inkik'ul i yiib' wach kina'ojb'al insahchik pankik'ux i Dios, xama' xta chik inkuy-eej.¹⁴Eh ma' xta chik ch'iklik reje wii' kik'ux ma' xta chik inkiko'leej wii' kiib' xa je' naa ruuk' rukeem am inkichop wii' kiib'.¹⁵Noq naa naq kaajwaam kichopom kiib' ruuk' i je' rukeem am ma' naa ta rukuyum ruum xama' kow ta wo' k'isinoq.¹⁶Re' taqe yiib' wach kina'ojb'al je' kikab' i chee' rax rax wach i xaq i rukuy i rutz'a'iil i q'iij, i ruhel reje riib' chinaah i uhtz'ub'.¹⁷Eh ink'ihik reje i raa' xilak taq ab'aj, eh inkib'ak'ej kiib' wataq saqrehp ab'aj.¹⁸Eh wila' awach xchuqwik reh i raa' i chee' re' re' ma' awach ta chik naa runaab'iniik reh chi xwihik chupaam i ye'aab' re' re'.¹⁹Je' re' noq naa rusachariik kiwach i yiib' wach kina'ojb'al, je' rukab' noq inchuqarik i ch'ahn, tokoom ch'ahn chik impoq' cho ar.

²⁰Re' QaJaaw Dios ma' jaruuj nee rukanaa' i korik wach ruk'ux. Eh ma' jaruuj wo' neerutoob'eej i yiib' wach runa'ojb'al.²¹Re' reh naa wo' chik ruye'em rusuqkiil ak'ux, naa wo' chik ak'erem aachii' chi se'eel ruum.²²Eh re' taqe i ki-ixowanik awach naa kik'uhtaam kik'ixb'ilaal. Eh re' taqe i yiib' wach kina'ojb'al naa rusahchiik wach chu'nchel awach keh, inki Bildad. Re' runa'ojb'al, re' i rajaawriik i Dios

¹Re' Job je' wili ruchaq'weesjiik xub'an:

²Re' hin weht'al chi re' re' korik. ¿Mi neerub'an chi re' winaq nee ruq'or reh i Dios chi ma' xta numahk?³Eh awach neraaj ruwech'um i Dios, nee ta inpahqaljik reh jino'q miil i xa chib'ih jariik, ma' jino'q naq i neeruchaq'weej.⁴Re' QaJaaw Dios nim rajaawriik kow riib', eh aj na'ojb'al. Eh ma' jino'q neenq'atwik wach.⁵Eh noq k'ahchi' i rujosq'iil i Dios i resaj paruye'aab' taqe i yuuq', eh ma' awach ta naab'inik reh nik' wach noq i rub'an.⁶Re' reh i ruk'uyu'saj i wach ak'al, eh i rukuyu'saj wo' hoq i ch'iklik wii' i wach ak'al.⁷Re' reh inq'orik ree q'iij noq ma' nelik ta chaloq. Re' reh inq'orik keh i ch'umiil chi ma' kisihq'inik taj.⁸Eh ma' jino'q ixtowik reh noq xuyejaa' i taxaaj. Re' reh wilik rajaawriik chinaah taqe i palaw.⁹Re' reh xyej-anik i juntzuhb' chi ch'umiil Osa, Orión, Pléyades kib'ihnaal. Eh re' reh xyej-anik keh i ch'umiil wilkeeb' pansak'aaj reh i rookb'aal q'iij.¹⁰Re' reh i rub'an taqe i ma' k'isa sachb'al k'uxliis. Ma' awach ta neemb'anik reh i rub'an.¹¹Re' QaJaaw Dios neenik'ik chi nuwach, eh ma' nee ta wilow. Eh neenik'ik ma' najt ta wuuk', eh ma' nee ta nukoj rehtaal.¹²Eh re' Dios wila' xresaj chi qawach i chib'ih qeh ¿Mi neerub'an chi neenqaq'or reh chi ma' chih taj? ¿Mi neenqaq'or reh chi maa rub'an?¹³Eh re' Dios ma' jumehq'iil ta nik'ik rujosq'iil. Korehtaal inkiloch' kiib' chuwach i inkiq'et wachej kiib' chuwach.¹⁴¿Eh aha' neenuk'am chee q'orik i hin reh chi neenuwech'uj i Dios?¹⁵Atoob' ta naq ma' chih numahk, xama' nee ta wo' naq i nu ch'aqweej. Xa re' naq neenupahqaaj reh chi chuketelaaj nuwach, ruum re' reh q'atal q'orik.¹⁶Atoob' ta re' Dios neerib'iraj chib'ih i neenupahqaaj reh, majaa' neenunimaj i hin chi xrib'iraj i nutiij.¹⁷Ruum re' reh yohb'aal wach i ti' k'axik i ruyeew chi nunaah, xa je' chik inchalik teew jab', xutiq naah i nuti'kiil chi xama' xta wo' numahk.¹⁸Juneliik ti' k'axik i ruyeew chi nunaah ma' kiruhi'lisaj ta k'isinoq.¹⁹Wila' inqaaj q'orik chi riij jino'q i xiik' naah i rajaawriik. ¿Mi wilik jino'q neenq'atwik i q'orik chinaah?²⁰Atoob' ta naq neenuq'or i hin chi ma' xta numahk, eh chi korik wach nuk'ux, re' reh nee naq i ruq'or weh chi wilik numahk, eh chi ma' holohik taj i nuna'ojb'al.²¹Re' hin weht'al chi ma' xta numahk, xa re' la' ma' xta nwaaj reh, xinq'uhtik chik chi k'acharik ayu' wach ak'al.²²Chuwach i Dios xa jinaj wach chu'nchel, ruum re' reh nik' wach noq i rusach wach i wilik ru mahk, je' wo' re' noq i rusach wach i ma' xta ru mahk.²³Wila' re' i ma' xta ru mahk inkimik reje ruum i ti' k'axik, noq i nuq'or i hin chi re' Dios inse'lanik, noq i rilow chib'ih i ruk'ul.²⁴Eh re' wo' re' inq'asanik ak'al pan kiq'ab' i yiib' wach kina'ojb'al. Re' wo' reh intz'apwik inaq'kiwach q'atal q'orik. ¿Eh wila' ma' re' reh imb'anik awach chik?²⁵Re' nuk'achariik xa chi jumehq'iil k'ahchi' rusahchiik wach, eh ma' xwihik ta rusuqkiil nuk'ux.²⁶K'ahchi' rojiik i nuk'achariik je' rukab' noq kiooj taqe i barco. Eh je' rukab' noq inrupinik reje i k'uch chinaah i rutiib'.²⁷Eh re' hin noq inwaaj naq nusacham panuk'ux i ti' k'axik k'ahchi' nuk'ulum xasuq naq nuk'ux i nub'an wiib'.²⁸Xa re' la' chu'nchel inuti'kiil inchalik wo' chik nuyo'jiik ruum. Ruum i re' i nukoj rehtaal chi re' Dios ma' runimaj taj chi ma' xta numahk.²⁹Wila' re' reh ruq'or chi wilik numahk, xama' xta chik inki chi re' hin neenuq'or chi ma' xta numahk.³⁰Atoob' ta neenutz'a'j wiib' ruuk' xab'oon, oon ruuk' jino'q i xa chib'ih chik jariik ineesanik ch'uwa' xama' nee ta wo' runimaj i Dios chi ma' xta numahk.³¹Je' naa neekirukut chupaam i jul ch'uwa' paam, eh re' i nuso' nee naq i ruyib'uj ruum i ruch'uwa'iil wach.³²Re' QaJaaw Dios ma' re' ta jino'q xa winaq je' rukab' i hin chi neenuwech'uj, eh chi neenuk'am reje pan q'atb'al q'orik.³³Ma' xta naq reet chi wilik ta chik jino'q i xti wilik rajaawriik chi nee ruq'at i q'orik chi qanaah qakab'cheel.³⁴Reh naq chi neeruq'or reh i Dios chi nee rumay ruye'ariik i ti' k'axik chi nunaah, eh chi neeresaj inuyo'jiik.³⁵Re' hin nee naq kinq'orik chi ma' xta nuyo'jiik, nee naq i nuq'or chi ma' xta numahk. Re' Job xtib'ik ruk'ux chi riij i xuk'ul¹Re' hin xinq'uhtik chik chi k'acharik ayu', naawokiik chi tiij chuwach i Dios naa nuq'orom reh chu'nchel i ruti'kiil nuk'ux.²QaJaaw Dios ma' kinayeew chutojariik inumahk chi xa je' wili, cha q'or weh chib'ih ximahkunik wii' chawach.³¿Mi ruk'ul cha weh re' chi k'ahchi' kiin awik'sam chi ti', ruum hat wo' xatz'uhkrisanik cho weh? ¿Chib'ih reet noq re' chik imponik chawach inki a'n i yiib' wach kina'ojb'al?⁴¿Mi xa je' rukapeew winaq re' akapeew i hat? ¿Mi xa re' wo' naa wilow re' hat aha' wilik i rilow i winaq?⁵¿Mi naa akimiik reje re' hat chi je' rukab' noq inkimik reje i xa winaq? ¿Mi xama' najt rooq re' aak'achariik i hat?⁶Wila' ma' je' akab' winaq ¿Chib'ih reet noq nakoj numahk? ¿Chib'ih reet noq inasik' i ma' holohik taj chi wiij?⁷Re' hat aweht'al chi ma' xta numahk, eh chi ma' awach ta neenko'linik weh panaq'ab'.⁸Eh re' wo' hat xat yej-anik weh ruuk' aq'ab', eh yu'naak ¿Chib'ih reet noq inawaaj asacham nuwach?⁹K'oloq panak'ux chi ruuk' ak'al xinayejaa' ¿Chib'ih reet noq kinawaaj wo' chik asutem lom chi ak'al?¹⁰¿Mi ma' re' hat xatyej-anik weh re' chi je' rukab' noq inkorjik i kexu ruuk' lecha?¹¹Eh re' wo' hat xatkojwik inuti'jolal, je' wo' inutz'uhumal, hat xatiqwik wach taqe i nub'aqil, taqe i wib'otz'aal.¹²Eh re' hat xat ye'wik nuk'achariik xaketelaaj nuwach. Re' wo' hat ticha'jinik weh ruum aj re' ko wilik nuk'achariik.¹³Xa re' la' re' hin i nukoj rehtaal chi wilik i ke'lik cho panawánima chi wiij i hin.¹⁴Re' hat xak'ahchi' akojom wehtaal mi nkimahkunik, reh naq chi nee kinayeew chi tojariik i numahk.¹⁵Eh wila' wilik numahk xa hin wo' q'ehb'eel. Wila' ma' xta numahk xa k'isiin wo' neensuuqb'ik nuk'ux. Ruum yohb'aal wach i ti' k'axik inuk'ul.¹⁶Eh wila' xnunimb'isaj wiib' re' hat neetisachwik nuwach, je' rukab' i rub'an i kaq b'ahlam. Eh neena a'n jino'q i ma' ilooj taj i sachb'al nuwach.¹⁷Wilik taqe i xikojwik numahk, ruum aj re' xjohtik wach aajosq'iil chi nunaah, i na a'n wuuk' je' rukab' noq kiokik chi q'aq'inik i soldado.¹⁸¿Chib'ih reet noq xayeew q'ab' chi xin-aasjik? q'e' naq chihooj chi weh wita xin kimik noq komajaa' kin-aasjik. Chi je' re' ma' awach ta naq xnab'inik nuwach.¹⁹Q'e' naq chihooj chi weh chi xata re' manlik xin-aasjik, eh xinooj ta kimuq'aa', chi je' re' ma' xinwihik ta naq chi jumpech.²⁰Re' nuk'achariik xama' najt ta chik rooq, eh i nupahqaaj aweh chi chayeew q'ab' weh chi nee kink'acharik k'isinoq pansuqkiil k'uxliis.²¹Ruum ilook' kinkimik reje ma' jaruuj chik naa nusutiniik chaloq, chupaam i ye'aab' q'equm paam reh ti'kiil k'uxliis.²²Re' ye'aab' re' re' q'equm paam, xama' paruwii' ta wilik, re' ma' xta wii' saqum, xa juneliik q'equm paam, inki Job. Re' Zofar xuq'or chi wilik ru mahk i Job

¹Re' Zofar aj ar Naamat je' wili ruchaq'weesjiik i Job xub'an:

²¿Mi ma' neerub'an re' chi neen chaq'weesjik i ma' k'isaq'orik xaq'or? ¿Mi neetikahnik chi ma' xta mahk re' ruum xaq'or ruuk' aachii' chi ma' xta aamahk?³¿Mi nakapaaj re' hat chi ruuk' i ma' k'isa q'orik i na a'n, neenatz'ap i qachii'? ¿Mi ma' neenak'uhtaaj ak'ixb'ilaal re' wila' xqach'aqweej taqe aweh i xaq'or?⁴Re' hat inaq'or chi korik wach ak'ux chi nimanik, eh chi saq wach awánima chuwach i Dios.⁵Ma' xta naq reet chi re' i QaJaaw Dios neenchaq'wisanik aweh taqe inaq'or.⁶Re' reh nee naq i ruk'uhtaaj aweh i na'ojb'al k'axik chi reqarik chi riij. Ar naq nee nakoj rehtaal chi ma' yohb'aal ta wach i ti' k'axik xuyeew cha naah, je' naq rukab' i ruk'ul cha weh, chi tojb'al riij amahk.

⁷¿Mi nakapaaj re' hat chi neenareq chi riij i wilik cho paruk'ux i Dios? ¿Mi nakapaaj re' chi nee nareq i rukorkiil wach ruk'ux i QaJaaw Dios nim rajaawriik?⁸¿Nik' wach areqem chi riij i runa'ojb'al i Dios ruum ma' xata je' najtiil paam i taxaaj? ¿Nik' wach areqem i rukorkiil wach ruk'ux i Dios? ruum ma' xata je' chamiil paam i kiye'aab' kamnaq.⁹Ruum xiik' naah nimaal wach chuwach i runimaal i taxaaj, eh chuwach i runimaal i palaw.¹⁰Wila' re' Dios xraaj ruq'atam i q'orik cha naah ¿Mi wilik jino'q nee nq'orik reh chi ma' nee ta rub'an?¹¹Re' i QaJaaw Dios reht'al wach taqe i ma' korik ta wach kik'ux. Eh reht'al awach taqe i yiib' wach kina'ojb'al. ¿Oon inakapaaj i hat chi ma' reht'al taj?¹²Re' meem laj winaq xama' naa ta wo' rureqem runa'ojb'al chi jumpech, je' rukab' i k'isa b'uurux noq inaasjik ma' tijimaj taj.

¹³Re' hat chayeew ak'ux chub'anariik i korik, cha pahqaaj reh i Dios chi nee tirutob'eej.¹⁴Wila' wilik i mahk k'ahchi' kaat cha kanaa' rub'aan. Mayeew q'ab' reh i mahk chi neen wihik panapaat.¹⁵Wila' xa a'n chi je' re' ma' xta neetik'ixik wii' nee ti k'acharik chi suq ak'ux chi ma' xta nee tiyo'jik wii'.¹⁶Re' hat sahchoq panak'ux i ti' k'axik k'ahchi' ak'ulum, chi je' re' neenik'ik i ruti'kiil ak'ux, je' rukab' noq inik'ik i ha'.¹⁷Re' aak'achariik neenkahnik chi xa je' chik saqumaal wach i q'iij noq imponik kab'lajora. Eh re' ruq'equmaal paam i ti' k'axik, neenkahnik chi xa je' chik rukab' i saqum noq insaq'ik.¹⁸Re' hat naa ruch'iklojiik ak'ux panak'achariik ruum wilik i k'ahchi' awuy-eem. Eh re' QaJaaw Dios naa rucha'jiniik aweh noq naa awiriik.¹⁹Eh noq naa ahi'liik ma' xta naa ruyohb'isaniik aweh. Eh ma' k'isiin naa kik'uliik sik'woq aweh reh chi naa a'nam otob'il keh.²⁰Eh re' taqe i yiib' wach kina'ojb'al keh, naa rusahchiik kiwach ma' ha' ta naakiko'leem kiib', xa re' i kimik naakuy-eem, inki i Zofar. Re' Job xuq'or chi re' Dios wilik rajaawriik chinaah chu'nchel chib'ih i wilik

¹Re' i Job je' wili chaq'wik xub'an:

²Korik chi re' taq i hat pankib'ihnaal i tinamit taq ti q'orik, eh inakapaaj taq i hat, chi noq naa taq akimiik i ma' naa ta chik ruwihiik i na'ojb'al.³Xa re' la' re' hin wilik wo' nuna'ojb'al. ¿Mi qajinaq re' i wajaawriik i hin chawach taq i hat? ¿Mi ma' awach chik jino'q re' ineenq'orik reh i xaq'or taq i hat?⁴Noq xub'an chaloq noq i nub'an nutiij kirib'iraj naq i Qajaaw Dios. Atoob' ta korik wo' naq wach nuk'ux, re' taqe wamigo xa hin kikaqse'lb'aal.⁵Awach i rik'raaj chi kow ruk'ux i rixowaaj wach i k'ahchi' ruk'ulum i ti' k'axik. Ma' xta raaj reh chi nee ruyeew ruman i ti' chinaah i k'ahchi' ruk'isimb'iik ruk'ux.⁶Re' taqe aj i leq' juneliik suq kik'ux pankipaat. Re' taqe i ma' holohik ta kiq'orik chi riij i Dios ma' xtaj inkik'ul. Inkikapaaj naq chi chu'nchel wilik pan kiq'ab'.

⁷Re' hat neerub'an chi neenatijej awiib' kuuk' i chikop wilkeeb' pantaq ch'ahn, je' wo' kuuk' i chikop kirupinik pan taxaaj, wilik i neenkik'uhtaaj aweh.⁸Chakoj rehtaal chu'nchel i wilkeeb' wach ak'al, je' wo' hoq i kar wilkeeb' pan palaw. Re' keh wilik i neenatijej kuuk'.⁹¿Mi ko wilik ta wo' hoq i ma' keht'al taj chi re' Dios xye'wik kik'achariik chu'nchel i re'?¹⁰Re' Dios pan q'ab' wilik i kik'achariik chu'nchel i k'achareel wach ak'al.

¹¹Re' hoj pan qachii' inq'ikraaj rusuqkiil chib'ih i suq atoob' inqak'ux. Je' wo' re' i qaxikin i rub'an rib'irjiik i holohik.¹²Re' taqe i mama' winaq wilik kina'ojb'al, ruum chi k'ih chik i kihab'ul wilik chik kina'ojb'al.¹³Xa re' la' re' Dios reh xti xiik' wo' chik naah i runa'ojb'al i rajaawriik. Eh re' i ruyejaa' wach i rub'an wo' hoq.¹⁴Eh re' i ruyoj wach i Dios ma' awach ta chik neenyej-anik reh. Eh noq iraaj rub'anam ti' k'axik reh i winaq, ma' awach ta chik neenko'linik reh pan q'ab'.¹⁵Eh wila' ma' xuyeew chik chaloq i jab', chu'nchel neenchiqik. Eh noq i ruyeew wo' chik chaloq i jab', imb'oqib'ik i yuuq' k'ixkaab'.¹⁶Re' Dios wilik rajaawriik, re' reh q'oreel chinaah chu'nchel. Eh pan q'ab' wilkeeb' i kijot'ariik, je' wo' hoq i kib'anik jot'ooj.¹⁷Eh re' wo' reh ineesanik reh i kajaawriik i kikojwik na'ojb'al, eh i ruyoj wo' kina'ojb'al taqe i q'atal q'orik.¹⁸Re' Dios i resaj wo' taqe pan kajaawriik i reey. Re' wo' reh intaaq'anik reje keh pan tokoom tinamit chi ma' xta wilik keh.¹⁹Eh i resaj wo' pan kajaawriik taqe i k'amal kib'eeh aj tiij. Iresaj wo' pan kajaawriik taqe i ajaab'ees.²⁰Eh i ruq'uch i kiq'oral i kiq'orik reh i korik, eh ruyoj i kikapeb'aal mama' winaq i kikojwik na'ojb'al.²¹Re' Dios i ruyeew wo' q'ab' chi ma' inye'arik ta chik kiloq'il i wilik kajaawriik, i resaj wo' kikowiil i q'e' kow inki a'n kiib'.²²Re' reh i ruyeew wo' chi naab'jik taqe i ma' eht'alimaj taj. Eh i resaj wach saqum i ke'lik cho panq'equm.²³Re' i Dios i ruk'ihaaxb'isaj i tinamit, eh i rusach wo' kiwach. Eh i rutukej kiwach, i rumol wo' chik kiwach.²⁴Eh i rusach kik'ux i k'amal kib'eeh i tinamit. Irusach i kina'ojb'al, je' naa pan jinaj chiq yuuq' i rub'esaj taqe, ruum ma' inkireq ta chik chi riij inki a'n²⁵Je' panq'equm kib'ehik, ma' inkireq ta chi riij aha' ojik inki a'n xa kitakaklanik chik xa je' chik taqe xohk'reel. Re' Job xuko'leej riij i runimaniik¹Chu'nchel i k'ahchi' taq aq'orom re' re' wilom ruuk' naq'nuwach. Eh b'iram ruuk' nuxikin.²Aha' wilik taq aweht'al i hat weht'al wo' hin. Re' hin ma' qajinaq taj i wajaawriik chuwach taq awajaawriik i hat.³Xa re' la' re' hin ruuk' i Dios nim rajaawriik inwaaj nuyejaam wach i wili. Ruuk' i reh naa nuq'oriik.⁴Re' taq i hat inatz'ap taq naah i korik ruuk' i chukuj q'orik taq i na a'n, xa je' taq akab' i rukoj riib' chi aj iq'omaneel, xama' rub'an ta wo' hoq.⁵Ma' xta naq reet chi ma' nee ta taq chik ti q'orik chi jumpech, reh nee naq inak'uhtaaj taq chi wilik ana'ojb'al.⁶Cha a'n taq otob'il chab'iraj taq i naa nuq'orom. Eh ti chakoj taq rehtaal i naa nuq'orom chi ko'lb'al wiib'.⁷¿Mi riko'ljiik riij i Dios k'ahchi' taq kaat ruuk' i chukuj q'orik taq i na a'n? ¿Mi re' reh inq'orik taq aweh re' i jot'ooj taq i na a'n?⁸¿Mi nakapaaj taq re' chi ruuk' taq i na a'n re' re' ruto'ariik taq i Dios i na a'n? ¿Mi nakapaaj taq re' chi ruko'ljiik riij taq k'ahchi' kaat?⁹Eh ¿neetarutz'ir riij i Dios taq ana'ojb'al chih naq taq i neena a'n? ¿Mi nee naq taq inachuk ree q'orik je' rukab' noq inchukarik i q'orik reh i xa winaq?¹⁰Re' hin xti korik i nuq'or taq aweh chi kow taq netiruq'il wila' konasik' taq wach inatob'eej.¹¹Re' taq i hat ma' k'isiin taq neetiyo'jik wila' xakoj taq rehtaal chi wilik ruloq'il.¹²Eh chu'nchel taq anajtir na'ojb'al xama' xta nokik wii', xa je' rukab' noq neenawaaj ako'leem awiib' chi riij i tz'aq ak'al.

¹³Chakanaa' taq i q'orik i hat re' chik i hin naa nuq'oriik, atoob' ta neenchalik i chib'ih jariik chi nunaah, ma' nee ta kinyo'jik.¹⁴Wila' chib'ih i xnuk'ul ank'ul peet. Xa re' la' re' hin naa nuq'orom chib'ih inwaaj nuq'orom.¹⁵Atoob' nee kirukansaj i Dios, xanaa wo' nuye'em nuk'ux ruuk'. Re' hin naa nuq'orom reh i ko'lemb'al wiib'.¹⁶Ruq'iij ruuk' wo' naq i re' nee i nuko'leej wiib' chuwach. Eh jino'q i yiib' wach runa'ojb'al ma' nee ta inq'orik ruuk' i Dios.¹⁷Re' taq i hat xti chab'iraj taq chib'ih i naa nuq'orom, eh chakoj taq rehtaal chi korik.¹⁸Re' hin wilik i naa nuq'orom chi ko'lb'al wiib', ruum weht'al chi ma' xta numahk.¹⁹Eh wila' wilik i xq'orarik reh chi korik chi wilik numahk, ma' xta chik i neenuq'or, i ruk'ul chi nee kinkimik.

²⁰QaJaaw Dios re' hin kiib' wach otob'il i nupahqaaj aweh chi neena a'n cho wuuk' reh chi ma' nee ta nukanaa' aq'orob'jiik.²¹Re' chi chawesaj i ti' k'axik chi nunaah, eh re' chi chawesaj i yo'jik chi nunaah.²²QaJaaw Dios kinaq'oreej hat chi peet, re' hin nee ti nuchaq'weej, oon re' hin nee ti nuq'oreej chi peet, re' hat nee kinaachaq'weej.²³Chaq'or weh, ¿Chib'ih i mahk xnub'an chawach? ¿Chib'ih i ma' holohik taj xnub'an chawach? Inwaaj chi nee nak'uhtaaj chi nuwach chib'ih ximahkunik wii' chawach.²⁴¿Chib'ih reet noq ma' kinawaaj chik kiin awilom? ¿Chib'ih reet noq je' inilarik i nixowanik awach i na a'n weh?²⁵¿Chib'ih reet noq i na a'n ti' k'axik weh? Re' hin, je' hin xaq chee' inkutarik reje wulu' ruum i teew, eh xa je' nukab' i chiq ch'ahn.²⁶¿Chib'ih reet noq i nayeew i ti' k'axik chi nunaah, inaq'or chi wilik numahk? ¿Mi kiina ye'em chutojariik re' numahk nub'anam cho pan wak'uniil?²⁷Je' cho b'ak'alkeeb' kab'chel i wooq ruuk' karena. Ma' xtaj i ruyeew riib' chi nub'an, ruum re' hat eliik k'ahchi' akojom rehtaal chib'ih i nub'an.²⁸Re' hin k'ahchi' rusahchiik wach i nuti'jolal, je' rukab' noq inq'ahik i xa chib'ih jariik. Je' rukab' itz'ihy noq ink'uxarik ruum ruchopkaal, inki Job. Re' Job xureq chi riij chi xama' najt ta rooq i k'acharik¹Re' Job je' wili xuq'or: Re' winaq inaasjik ruuk' i rituut xama' najt ta rooq i ruk'achariik, eh xiik' naah i ti' k'axik i rik'ul.²Re' ruk'achariik, xa je' rukab' noq ink'er i uhtz'ub', eh jumehq'iil inchiqik. Jumehq'iil inooj sahchoq wach, xa je' inik'ik jino'q muuj.³QaJaaw Dios, ¿Chib'ih reet noq xa re' hin kinayeew panti' k'axik, eh inaq'at i q'orik chi nunaah?⁴¿Mi wilik insaqb'isanik wach i ch'uwa' wach? Ma' awach taj.⁵Re' hat Xti korik noq aq'atam riij jarub' haab', jarub' poh ink'acharik i winaq ayu' wach ak'al xa ar wo' naa ruponiik. Eh ma' awach ta neenq'atwik wach.⁶Wila' xakanaa' chi rutkeel nee nelik i ruk'achariik. Je' re' noq kinahi'lisaj k'isinoq reh chi konee nub'an rusuqkiil i nukamaj noq komajaa' kinkimik.

⁷Re' chee' reh noq inyok'arik ma' kimik ta rub'an chi jumpech, i nelik wo' chik chaloq rutoxl.⁸Atoob' ta rijib' chik i raa', atoob' ta k'ahchi' chik ruq'ahiik i raa' i chee'.⁹Noq inqajik chee jab' inraaxb'ik wach. Eh ink'ihaaxb'ik wo' chik i q'ab', kinkahnik chi je' rukab' i chee' kok'ihik i rub'an.¹⁰Eh re' i winaq reh noq inkimik reje insahchik wach chi jumpech ¿Mi eht'alimaj aha' nooj noq inkimik?¹¹Re' ruha'iil i palaw i sahchik wach, eh re' i nim ha' insahchik wo' wach, inchiqik.¹²Je' wo' re' winaq noq inkimik reje ma' naa ta ruwuktiik chaloq noq komajaa' insahchik wach i taxaaj. Ma' naa ta keliik chaloq chupaam i ye'aab' wilkeeb' wii'.¹³Re' hin ma' xta naq reet chi nee nukeb'aa' wiib' pan i kiye'aab' kamnaq, korehtaal naq inik'ik aajosq'iil. Re' naq i hat nee ti q'orik jaruuj nee kink'ulik panak'ux.¹⁴Eh re' winaq noq inkimik ¿Mi nee wo' chik ink'aach cho ruka'peech? Re' hin k'ahchi' wuy-eem nik' chik najtiil naa nuk'ulum i ti' k'axik wili, korehtaal kinko'ljik chupaam.¹⁵Chi je' re' nee naq kinaq'oreej i hat, eh re' hin nee naq tib'iraj, eh nee naq insuuqb'ik ak'ux wuuk', ruum re' wo' hat xatz'uhkrisanik cho weh.¹⁶Re' hat inakoj rehtaal chib'ih taqe i k'ahchi' kiin, ma' nakoj ta rehtaal i numahk.¹⁷Eh nee ta naq insahchik panak'ux chu'nchel i numahk. Nee naq inawesaj chu'nchel i ma' holohik taj i xnub'an.

¹⁸Re' taqe i yuuq' insahchik kiwach noq kib'oqib'ik, eh re' taqe saqrehp ab'aj i kib'oqib'ik pan kiye'aab'.¹⁹Re' taqe ab'aj kik'uhlik ruum i ha' i nik'ik chikinaah. Eh noq i rub'an i kowlaj jab' intz'ajib'ik wach ak'al. Je' wo' re' noq k'ahchi' asacham wach i winaq i hat i wilik naq ch'iklik reje wii' ruk'ux.²⁰Re' hat juneliik i nayeew i ti' k'axik chinaah korehtaal i nelik reje ayu' wach ak'al, noq inkimik reje tokoom chik inilwik.²¹Eh ma' nee ta chik i runab'eej mi xye'arik kiloq'il i rak'uun rixq'uun. Eh wila' xehteesjik kajaawriik i rak'uun rixq'uun ma' naa ta chik runab'eem.²²Eh xa re' wo' hoq i ruti'kiil i ruti'jolal i reh naa rik'raam, ruch'ihil i ruti'kiil i ránima, inki Job. Re' Elifaz xuchaq'weej i Job

¹Re' Elifaz aj ar Temán je' wili ruchaq'weesjiik i Job xub'an:

²Re' wilik runa'ojb'al ma' inq'orik taj je' rukab' inaq'or i hat xama' xta ruk'am chaloq, xa je' rukab' i teew, xa ik'ik i rub'an.³Re' wilik runa'ojb'al ma' nee ta ruq'or i xama' xta rub'ehel, eh ma' nee ta ruko'leej riib' ruuk' i q'orik xama' xta nokik wii'.⁴Ruuk' taqe i k'ahchi' aq'orom i hat ma' k'ahchi' ta ayohleem wach i Dios, k'ahchi' awesam i rajaawriik i tiij.⁵Ruuk' i k'ahchi' aq'orom inak'uhtaaj chi wilik amahk. Ma' k'isiin taqe i q'orik xaq'or xa tz'apb'al naah i ma' holohik taj i na a'n.⁶Eh ma' koruman taj chi re' hin neekinq'orik reh chi wilik amahk. Ruum xa ruuk' aq'oral ink'utinik chi wilik amahk.

⁷¿Mi nakapaaj re' hat chi peet xat-aasjik chuwach i Adán? ¿Mi xa wilkaat wo' chik re' hat noq xikorjik taqe yuuq'?⁸¿Mi aweht'al re' hat chib'ih i rukapaaj i Dios? ¿Mi re' hat ehchan reh re' i na'ojb'al?⁹¿Mi wilik taqe i xa chib'ih jariik aweht'al i hat ma' qeht'al tee hoj? ¿Chib'ih inareq chi riij i hat ma' qareq ta chi riij i hoj?¹⁰Re' hoj qatijem qiib' kuuk' taqe i mama' winaq wilkeeb' chi qaxilak saq chik i kinaah, k'ih chik i kihab'ul chuwach awajaaw i hat.¹¹¿Mi ma' imponik chawach re' chi ruyeew rusuqkiil ak'ux i Dios, eh chi re' hoj ruuk' q'uun laj q'orik tiqaq'o'reej?¹²¿Chib'ih reet noq inchalik aak'aah? ¿Chib'ih reet noq q'e' nayoj awach ruum aak'aah?¹³¿Chib'ih reet noq inchalik ak'aah ruuk' i Dios, eh inaq'or chib'ih jariik inawaaj aq'orom?¹⁴¿Mi wilik jino'q i winaq xti saq wach i ránima, eh ma' k'isinoq ru mahk?¹⁵Ni xata ruuk' taqe i ánjel ch'iklik ruk'ux i Dios, ni xata re' i taxaaj saq wach chi reh.¹⁶¿Mi kore' chik re' i winaq saq wach nee rilow ma' xta runa'ojb'al re' i yiib' wach na'ojb'al i rub'an eliik, je' rukab' noq i nuuk'jik i ha'?

¹⁷Chab'iraj i hat Job i naa nuq'orom aweh naa nuk'utjaam aweh taqe nutijem i wilom chaloq.¹⁸Re' i korik i xkik'uhtaaj qeh taqe aj na'ojb'al re' i kitijem ruuk' i kimaam kati't. Re' keh xkik'utjaaj qeh ma' xkitz'ap ta naah.¹⁹Re' taqe na'ojb'al wili ruuk' i kimaam kati't xkitijej ma' tokoom ta aj uuk' xkitijej ruum ma' xi wihik ta tokoom tinamit chupaam i kiye'aab'.²⁰Re' i winaq yiib' wach i runa'ojb'al, eh q'e' josq' juneliik naa ruwihiik panti' k'axik, re' i ruk'achariik xama' najt ta rooq.²¹Eh xa chib'ih taqe jariik i choqik i rib'iraj inchalik ruyo'jiik. Noq i rik'raaj chi suq wilik kiponik taqe ajileq' inkelq'aaj i chib'ih reh.²²Re' reh reht'al chi ma' nee ta chik ruko'leem riib', ruum k'ahchi' chik kuy-eem reh i rukanteesjiik.²³Re' ruti'jolal naa ruk'uxariik kuum i k'uch, eh reht'al chi naa rusahchiik wach, ma' naa ta chik ruko'leem riib'.²⁴Re' reh yo'jik i rub'an ruum ponik reh i q'iij chi naa ruk'ulum i ti' k'axik, je' rukab' noq inyo'jik i reey xa ojik chik reh chi q'aq'inik.²⁵Je' re' i naa ruk'ulum awach inchalik ruk'aah, awach i runimb'isa riib' chuwach i QaJaaw Dios nim rajaawriik.²⁶Wilik ruq'aslaj ch'ihch' ruuk, yohb'aal wach i ruk'aah iraaj naq ruq'atam wach i Dios.²⁷Xa nim chik wach i rub'an riib', je' naa nujinaq chi q'ina' i wach je' wo' hoq chu'nchel i riij.²⁸Eh naa ruk'achariik chupaam i tinamit ma' xta wilik chupaam, re' paat naa rupatiniik wii' naa rusahchiik wach.²⁹Ma' najt ta chik naa ruwihiik rub'ehomal, ma' naa ta chik ruwachiniik i rutik rumu'uun.³⁰Ma' naa ta ruko'leem riib' chuwach i kimik, naa rusahchiik wach, je' rukab' noq ink'ahtik i ch'ahn ruum i q'aaq', re' i rujosq'iil i Dios naa rusachwiik wach.³¹Ma' ruch'ik'aa' ruk'ux ruuk' i jot'ooj i rub'an, ruum xama' xta naa rokiik wii' xa re' wo' jot'ooj naa ruk'ulum i reh.³²Eh naa rusahchiik wach noq majaa' imponik i ruq'ijil i rukimiik, je' rukab' i q'ab' i chee' noq inchiqik ma' jaruuj, chik inraaxb'ik wach.³³Je' rukab' i wach i uuva ma' inq'aanb'ik tee wach, je' wo' rukab' i ruche'el i olivo inqehb'ik i rixmak'al.³⁴Ruum re' taqe i yiib' wach kina'ojb'al ma' naa ta rukahniik kiih kimaam. Eh naa rukuxiik ruk'ahtiik i chib'ih keh ruum xa ruuk' i leq' kireqem.³⁵Re' taqe re' xa re' i yiib' wach na'ojb'al hamlik cho pankanima. Eh xa re' i yiib' wach inki a'n inkiyeew kik'ux chub'aan i jot'ooj, inki. Re' ruti'kiil ruk'ux i Job

¹Re' Job je' wili ruchaq'weesjiik i Elifaz xub'an:

²Re' hin k'ih pech b'iram i taq inaq'or, noq inakapaaj taq i hat chi rusuqkiil nuk'ux taq i nayeew, xanaah re' hin ch'i'k i rub'an weh.³¿Kojaruuj taq inakanaa' ruq'orariik i xama' xta ruk'am chaloq? ¿Mi re' hin xin ye'wik taq ak'aah re' ruum k'ahchi' taq kiin awech'um?⁴Wita re' taq i hat k'ahchi' ak'ulwiik reh i ti' k'axik k'ahchi' nuk'ulum i hin yu'naak, re' hin nee wo' nanaq i nuq'or i k'ahchi' taq aq'orom i hat. Nee naq inuk'uyu'saj i nunaah nee naq taq tinukaqse'laaj. Eh nee naq taq tinuwech'uj ruuk' taqe i yiib' kiwach q'orik.⁵Re' hin ma' nee ta naq i nub'an i je' re'. Nee la' naq i nuq'unej taq awach i nuyeew rukowiil taq ak'ux, reh chi nee naq ti hi'lik ruuk' taq ati'kiil.

⁶Re' hin atoob' ta neekinq'orik chi riij i nuti'kiil, atoob' ta ma' neekinq'orik chi riij xama' nee ta wo' inhi'lik wach.⁷Re' QaJaaw k'ahchi' kiin rukanaam chi ma' xta chik wansil, eh xirukanaa' chi ma' jino'q chik wamigo.⁸Je' naa xinkiyeew pantz'ilom chu'nchel kiq'orik reh chi wilik numahk inkiq'or chi xk'utiin chi nuwach ruum ximb'aaqriik.⁹Re' QaJaaw Dios ruum i rujosq'iil xiruyeew panti' k'axik, xa ruqirich'eej chik naah i reeh chi nunaah. Eh ma' resaj taj i ti' k'axik chi nunaah, je' cho rixow nuwach.¹⁰Eh re' keh inkimol kiib' chuq'orariik chi wilik numahk, kiyeew chi q'ab'iis i panaq' nuwach kinkib'aj xa re' inkaaj chi nkik'uhtaaj nuk'ixb'ilaal.¹¹Re' QaJaaw Dios xiruq'asaj pan kiq'ab' i i aj chukul q'orik xiruq'asaj pan kiq'ab' i yiib' wach kina'ojb'al.¹²Eh noq suq naq wilkiin xuyeew chee ti' k'axik chi nunaah, je' naa xuchop chi walaq je' naa xiruxereb'eej, je' naa ruuk' flecha k'ahchi' kiin rutz'ehtaam chaloq.¹³Je' naa k'ul kirukut cho ruuk' i ru flecha, je' naa risaj taqe panuti'jolal, je' k'ahchi' rutub'lujiik wach ak'al taqe i weq'saa'.¹⁴Je' na xuhopib'eej i nuti'jolal xiik' naah ti'kiil k'ahchi' kiin rik'sam, je' rukab' i soldado inooj panq'aq'inik imb'aan ti' k'axik reh.¹⁵Eh ruum ruti'kiil nuk'ux xnukoj i q'as wach itz'ihy chi wiij, eh xnupukej pooq wach nunaah.¹⁶Re' naq'nuwach xisipjik chik ruum ma' kinhi'lik ta chi oq'ik, xtohq'ik chik rumooyriik paam.¹⁷Re' hin xa re' ti' k'axik inuk'ul atoob' ta ma' jino'q i nub'anam ti' k'axik reh. Eh chu'nchel nuk'ux i nub'an nutiij chuwach i Dios.

¹⁸Ma' ta naq neenkahnik chi je' re' i ti' k'axik k'ahchi' nuk'ulum, nee ta naq inq'ajarik wach keh i kib'anik ti' k'axik weh.¹⁹Wilik oon naq inche jino'q pan taxaaj i nee nq'orik chi wiij, nee naq i ruq'or chi ma' xta numahk.²⁰Re' i wamigo naq taqe xa re' chik i nub'ajariik inki a'n Eh re' hin naawoq'iim naa nupahqaam nutoob'jiik reh i QaJaaw Dios.²¹Ma' xta naq reet chi wilik ta jino'q i nee nq'orik chi wiij ruuk' i Dios, je' rukab' noq i rupahqaaj i otob'il jino'q i winaq chi riij i ramigo.²²Re' hin xama' k'ih haab' ta chik k'achalkiin, naa nukimiik reje ma' naa ta chik rilariik nuwach chi jumpech, inki.¹Eh je' wo' chik wili i xuq'or: Re' hin xa k'axik chik noq i nelik i wuxlaab', xakimik chik weh k'ahchi' chik kiin ruye-eem i nujuul.²Re' taqe i wilkeeb' wuuk', xa re' i nukaqse'ljiik inki a'n xa re' i ti' k'axik inki a'n weh.

³QaJaaw Dios xa re' wo' hat nee ti q'orik chi ma' xta numahk ruum wii ma' xaq'or i hat ma' awach ta nee nq'orik reh.⁴Re' hat xat b'anik keh chi ma' inkireq ta chi riij chib'ih i k'ahchi' nuk'ulum, ruum aj re' maayeew q'ab' chi neenkian weh.⁵Awach i ruq'asaj i ramigo pan kiq'ab' inixowanik wach, ti' inakik'ulum taqe i rak'uun rixq'uun.

⁶Re' wo' hat xat b'anik reh chi chu'nchel i tinamit ma' holohik ta kiq'orik chi wiij, inkichuhb'aaj panaq' nuwach.⁷Re' hin k'ahchi' rupohyiik paam i naq'nuwach ruum i ti' k'axik k'ahchi' nuk'ulum xan sutik chik inwilow.⁸Re' i korik wach kik'ux insahchik kik'ux ruum i ti' k'ahchi' nuk'ulum. Eh re' i ma' xta ru mahk naa ruq'atam kiwach i yiib' wach kina'ojb'al.⁹Re' korik wach ruk'ux naa rojiik chuwach ruuk' i rukorkiil wach ruk'ux chi ma' xta ru mahk, eh re' saq wach i ránima, naa ruwihiik rukowiil ruk'ux.¹⁰Eh re' taq i hat i q'orik taq i na a'n wuuk' ti q'oroq wo' taq chik wila' wilik taq ana'ojb'al, xa re' la' re' hin i nuq'or taq aweh chi ma' jino'q taq aweh i wilik runa'ojb'al.¹¹Re' hin k'ahchi' rusahchiik wach i nuk'achariik, aha' naq wilik inuyejaa' wach, i nukapaaj rub'aan, ma' naa ta chik nub'anam.¹²Re' taq i hat inaq'or taq chi naaweliik chupaam i ruq'equmaal i ti' k'axik wilkiin wii'. Xa re' la' re' hin weht'al chi ma' korik taj.¹³Re' k'ahchi' wuy-eem i hin xa re' kimik reh chi naa wojiik hi'loq chupaam i q'equm paam ye'aab'.¹⁴Re' hin i nuq'or chi re' i kiye'aab' kamnaq je' cho wajaaw noq wilik, eh re' taqe haah wilkeeb' ar i nuq'or chi je' cho nutuut, chi je' cho wanaab' taqe.¹⁵¿Mi ko wilik ta wo' i naa nuch'ikaam reje wii' nuk'ux? ¿Mi konaa ta wo' ruwihiik rusuqkiil nuk'ux?¹⁶¿Mi naa ta wo' nuk'amam chi wiij i ch'iklik wii' nuk'ux noq naa nukimiik reje? ¿Mi naa ta wo' rojiik chi wiij chi hi'lik chupaam ak'al? Re' Bildad xuq'or chib'ih i naakik'ulum i yiib' wach kina'ojb'al

¹Re' Bildad aj ar Súa je' wili ruchq'aweesjiik i Job xub'an:

²¿Kojaruuj inamay i q'orik? Wila' xayeew axikin chi rib'irjiik i naa qaq'orom, neerub'an chi neenqa a'n qak'utaaj awuuk'.³¿Chib'ih reet noq inaq'or chi je' hoj chikop chi ma' xta qana'ojb'al?⁴¿Mi ruum re' chi k'ahchi' akansam awiib' ruum aajosq'iil naa rukahniik chi ma' xta chik wilik wach ak'al? ¿Mi neen kijal kiye'aab' re' i nimaq taq ab'aj xa ruum aajosq'iil?

⁵Re' i yiib' wach runa'ojb'al naa rusahchiik wach i, naa rukahniik chi je' rukab' noq inchuhpik i saqum, ma' naa ta chik rusihq'iniik i rusaquumb'aal.⁶Je' q'equm naa ruwihiik wii ma' naa ta chik ruwihiik i saqum parupaat.⁷Re' naq i q'e' kow riib' naa ruk'uhliik i ransil, re' wo' hoq i ma' holohik taj i rub'an naa ruq'eb'wiik reh.⁸Re' reh na naa rukojariik xirob' aha' naa rik'iik wii' ar naa ruq'ehb'iik.⁹Naa rukojariik i xirob' parub'eeh, eh ar naa ruq'ehb'iik.¹⁰Re' i je' xirob' naa rukojariik parub'eeh je' naa panke'lik naa ruwihiik chi ma' reht'al naa ruq'ehb'iik ar.¹¹Eh xa aha' narojiik i k'oq naa rub'aan ti' k'axik reh, eh naa ruq'orariik chi naa rub'aan reh.¹²K'ahchi' ruk'uhliik i ransil ruum ma' rub'an ta chik ruwa' ruhaa', xama' rukuy ta chik ruum i ti' k'axik wilik wii'.¹³Re' yab'ilaal wilik wii' pankimik k'ahchi' ruk'amariik ruum. K'ahchi' ruq'ehb'iik taqe i ruti'jolal ruum i raxq'aah chi riij.¹⁴Re' reh parupaat naq ch'iklik ruk'ux, xa re' la' ma' xta wo' chik suq kiil k'uxliis ar, ruum ma' k'isiin taj i ruyo'jiik ruum xailook' chik imponik i ruq'ijil i rukimiik.¹⁵Re' taqe i chib'ih reh, ruch'ihil i rupaat inkiyeew i asufre chinaah inqop ruq'aq'al chi sachb'al wach.¹⁶Re' reh i ruk'ul reh je' rukab' i ruk'ul i chee' noq inchiqik i raa', inchiqik chu'nchel i q'ab'.¹⁷Noq naa rusachariik wach chinaah i wach ak'al, ma' awach ta chik naa ruq'oriik rib'iral.¹⁸Naa rehtesjiik reje pan saqum, naa rukutariik panq'equm, naa rehtesjiik reje chinaah i wach ak'al.¹⁹Ma' jino'q chik i riih rumaam, ma' jino'q chik awach reh naa rukahniik chinaah i wach ak'al.²⁰Eh noq naa kinab'eem i ruk'axkiil i winaq re' re' i wilkeeb' reje pareelb'aal q'iij, je' wo' taqe i wilkeeb' reje parookb'aal q'iij, naa rusahchiik kik'ux.²¹Je' aj re' noq naa rojiik kuxoq i ruk'achariik i yiib' wach runa'ojb'al, re' i ma' inimanik ta ree Dios, inki. Re' Job xuch'ikaa' ruk'ux chi re' Dios naa ruq'oriik chi ma' xta ru mahk

¹Re' Job je' wili i chaq'wik xub'an:

²¿Kojaruuj taq inakanaa' i wech'ik wuuk'? ¿Kojaruuj taq inakanaa' ruye'ariik ruti'kiil nuk'ux ruuk' taq aq'oral?³Re' taq i hat k'ih pech taq kinab'aj, eh ma' tik'ixik ta taq k'isinoq chub'aan.⁴Atoob' ta korik wo' naq chi wilik numahk, xa re' wo' naq i hin naa nutojwiik riij.⁵Re' taq i hat inakapaaj taq chi q'e' nim taq awajaawriik chi nuwach i hin, inaq'or taq chi wilik numahk.⁶Chanaab'eej taq chi re' i QaJaaw Dios xye'wik q'ab' chi je' wili noq wilkiin. Re' reh xye'wik chi nunaah i ti' k'axik wili.⁷Re' hin xak'erik chik nuchii' ruum i ti', xama' awach ta wo' inib'irinik weh. Eh i nupahqaaj wo' naq nutoob'jiik, xama' awach ta wo' intoob'inik weh.⁸Re' Dios xutz'ap paam inub'eeh, reh chi ma' xta chik ineenub'an, xiruyeew panq'equm.⁹Eh xresaj chi nuwach chib'ih naq jariik taqe wilik weh, xresaj wo' hoq inuloq'il.¹⁰Re' reh xirukanaa' chi xama' xta chik nukamaj. Xirukanaa' chi ma' xta chik ch'iklik reje wii' nuk'ux, xa je' chik nukab' i chee' inchuqarik reje.¹¹Re' Dios xuyeew rujosq'iil chi nunaah. K'ahchi' rub'anam weh je' rukab' i rub'an keh inixowanik wach.¹²Ruuk' i ti' k'axik xuyeew chi nunaah, je' naa xutaq'aaj chee ma' k'isa soldado chi nunaah, je' naa xkikotej riij i nupaat.

¹³Eh xuyeew q'ab' chi re' taqe i ma' tokoom ta wuuk' ma' nkaaj ta chik nuwach. Re' taqe i wamigo xinkikanaa' chi wutkeel, xa je' chik ma' keht'al nuwach inki a'n kiib'.¹⁴Re' taqe i awach weh, ruch'ihil taqe wamigo xinkikanaa' chi wutkeel.¹⁵Re' taqe i patim panupaat, taqe i waj poh ixoq, xa je' chik ma' keht'al nuwach inki a'n kiib', xa je' chik hin tokoom tinamit noq inkilow.¹⁶Eh noq inuyuq'eej naq i numoso winaq ma' kiruchaq'weej taj. Atoob' ta nupahqaaj otob'il reh xama' kirunimaj ta wo' hoq.¹⁷Eh re' wehk'een xa chuh chik i nuwach irik'raaj, re' taqe wak'uun wixq'uun ma' nkaaj ta wo' chik nuwach.¹⁸Eh re' taqe i kok' halak'un ma' nkaaj ta nuwach. Eh ma' holohik ta kiq'orik chi wiij.¹⁹Chu'nchel i naah wamigo ma' nkaaj ta chik nuwach. Eh re' taqe i q'e' naq taqe nuk'ax i hin xi kahnik chi ixowan nuwach.²⁰Re' nutz'uhumal xa ruchopom chik riib' ruuk' i nub'aqil, xa ruuk' chik k'axik noq k'achalkiin.²¹Re' taq i hat wamigo chaketelaaj taq nuwach, ruum re' i QaJaaw Dios xye'wik chee ti' k'axik chi nunaah.²²¿Chib'ih reet noq k'ahchi' taq a'nam weh i ti' k'axik taq i hat, je' rukab' i k'ahchi' weh i Dios? ¿Mi ma' manlik re' i ti' k'axik a'nam taq weh?

²³Re' hin ma' xta naq reet chi weh chi awach ta jino'q inen tz'ihb'anik reh taqe i k'ahchi' nuq'orom. Neeta naq i rutz'ihb'aaj pan jino'q huuj.²⁴Eh ma' xta naq reet chi ruuk' q'as ju' ch'ihch' neentz'ihb'jik chuwach jino'q ab'aj i k'ahchi' nuq'orom reh chi neen naq kahnik rehtalil ar chi jumpech.²⁵Re' hin weht'al chi re' aj ko'len weh k'achlik, re' reh naa ruq'oriik chi wiij, reh chi naa nuko'leem wiib' chinaah i wach ak'al.²⁶Atoob' ta re' nuti'jolal wili k'ahchi' ruq'ehb'iik chi kok'lomiil ruum yab'ilaal. Re' hin weht'al chi naawilom wach i Dios ruuk' naq'nuwach.²⁷Xti korik chi re' hin naawilwiik wach ruuk' naq'nuwach, ma' re' ta jino'q tokoom. Atoob' ta ma' xta chik wansil yu'naak.

²⁸Re' taq i hat je' taq wili inaq'or: ¿Nik' wach noq i ruq'or chi hoj qohkojwik ru mahk, eh korik wo' hoq chi wilik ru mahk? tiki taq.²⁹Xa re' la' chawik'raaj taq awiib' ruuk' taq i na a'n chi je' re' ruum re' QaJaaw Dios ruuk' i rujosq'iil i ruyeew taqe chutojariik i kimahk i wilik kimahk. Chi je' re' nee taq inanaab'eej chi re' i Dios inq'atwik q'orik, inki Job. Re' Zofar i xuq'or chi naa ruchaliik i ti' k'axik chikinaah i yiib' wach kina'ojb'al

¹Re' Zofar aj ar Naamat, je' wili ruchaq'weesjiik i Job xub'an:

²Re' hin kinqaaj kapeew ruuk' taqe inaq'or ruum aj re' naa nuchaq'weem aweh.³Ruuk' taqe aq'oral xinab'aj noq xwik'raaj, xa re' la' re' hin weht'al nik' wach naa kaat nuchaq'weem wii'.⁴¿Mi ma' aweht'al re' hat chi xa re' wo' rutz'uhkriik chee winaq ayu' wach ak'al?⁵¿Chi re' i yiib' wach runa'ojb'al xama' najt ta wo' inwihik rusuqkiil ruk'ux xa junk'aam wo' tii?⁶Atoob' ta xiik' naah nimaal i rajaawriik i rub'an riib'. Atoob' ta imponik pan taxaaj i runimaal wach i rub'an riib'.⁷Xa je' insahchik wach i rusaa' i reh noq naa rusahchiik wach. Eh re' ineht'alinik wach je' wili i naa kiq'orom: ¿Aha' inche xooj sahchoq wach? inko'q taqe chi riij.⁸Naa rusahchiik wach je' rukab' noq insahchik wach inilarik wach panwirik, xa je' rukab' noq insahchik wach inilarik wach pansaq wirik.⁹Awach taqe i kieht'alinik wach ma' naa ta chik kilom wach, eh ma' naa ta wo' chik rusutiniik cho parupaat chi jumpech.¹⁰Eh re' taqe i rak'uun rixq'uun naa kipahqaam kiwa' keh i neb'aa', naa wo' chik kisutem taqe i chib'ih jariik relq'aam chaloq i reh.¹¹Eh xti ko parusuqkiil i ruk'ijolal wilik noq naa rukimiik reje.¹²Atoob' ta imponik chuwach rub'aan i yiib' wach na'ojb'al, xa je' chik i suq atoob' noq i rik'raaj.¹³Je' naa ruyeew junk'aam-oq panchii' reh chi rik'raaj rusuqkiil.¹⁴Xa re' la' noq imponik chupaam i xa je' chik rukab' i rukiih i aaq'.¹⁵Yohb'aal wach i rub'ehomal xarelq'aaj ruuk' i tokoom. Xa re' la' naa rehtesjiik chuwach ruum i Dios.¹⁶Eh xanaa rukansam riib' ruuk' i ruyiib' wach na'ojb'al, je' naa ruk'ej reh i rukiih i aaq'.¹⁷Eh xama' naa ta wo' rub'anam rusuqkiil i suq atoob' i nelik chi yohb'aal wach chinaah i wach ak'al.¹⁸Chu'nchel i rukamaj ma' naa ta rub'anam rusuqkiil, ruum chu'nchel relq'aam ruuk' tokoom, naa ruye'em jilow.¹⁹Xukanaa' chi ma' xta wilik keh i neb'aa' xrelq'aaj i chib'ih keh. Eh xuchop kinaah i paat ma' re' tee reh xyej-anik reh.²⁰Ma' inmanlojik ta reh i chib'ih reh koyohb'aal wach, i ruman iraaj.²¹Ma' awach taj i ruko'leej riib' chuwach ruum aj i re' xama' naj ta naa ruwihiik rub'ehomal.²²Eh noq ma' k'isiin chik i wilik reh, naa ruchaliik i ti' k'axik chinaah. Q'e' ti' i naa ruk'ulum pan kiq'ab' i yiib' wach kina'ojb'al.²³Noq yohb'aal chik wach i chib'ih reh wilik. Re' Dios naa ruye'em chee rujosq'iil chinaah, naa ruye'em chutojariik i ru mahk.²⁴Atoob' ta neeruko'leej riib' chuwach i ch'ihch' kantesb'al, re' chik i flecha re' ruuk' i q'an ch'ihch' naa rub'aniik reh.²⁵Je' naa flecha i naa rokiik paruti'jolal, je' naa rik'iik chi juntar, naa rik'iik reqaroq i ránima. Eh yohb'aal wach noq naa ruchaliik ruyo'jiik.²⁶Parunimaal q'equm naa ruwihiik, q'aaq' i naa ruye'ariik cho chinaah ruum i Dios. Junk'ahtiik naa rub'aan ruuk' chu'nchel i chib'ih reh parupaat.²⁷Re' taxaaj naa rureqwiik chi riij chi wilik ru mahk. Eh re' wach ak'al naa kiq'oriik chi korik chi wilik ru mahk.²⁸Eh chu'nchel i rub'ehomal naa rusahchiik wach noq naa ruye'em rujosq'iil i Dios chinaah.²⁹Re' Dios xuq'or chi je' re' i naa ruk'ulum i yiib' wach runa'ojb'al. Q'orooj chi je' re' i naa ruk'ulum noq naa rojiik kuxoq, inki Zofar. Re' i kielik korik, re' i k'axik inchalik chinaah i yiib' wach kina'ojb'al

¹Re' Job je' wili ruchaq'weesjiik xub'an:

²Chab'iraj taq i naa nuq'orom, wila' xinab'iraj taq neench'iklojik nuk'ux.³Chakuy taq rib'irjiik taqe i naa nuq'orom, chi riij i re' nee taq kinakaqse'laaj wila' xawaaj taq.⁴Re' hin ma' re' ta ruuk' jino'q i winaq k'ahchi' kiin chi peleto, ruum aj re' rub'ehel chi ti' nuk'ux.⁵Wila' xakoj taq rehtaal i naa nuq'orom nee taq ti kahnik meem ruum ayo'jiik.⁶Eh noq intohq'ik nukapaam riij i hin i k'ahchi' nuk'ulum, yohb'aal wach inchalik nuyo'jiik, xa kinb'arb'otik chik ruum.

⁷¿Chib'ih reet noq re' taqe i yiib' wach kina'ojb'al najt kik'achariik, korehtaal kirijb'ik, eh yohb'aal wach kib'ehomal?⁸Korehtaal inkilow noq ink'ihik i kiih kimaam, eh suq wilkeeb'.⁹Eh ma' awach tamb'anik ti' k'axik keh i awach keh pankipaat. Ma' imb'aan ta wo' ti' k'axik keh ruum i Dios.¹⁰Eh noq kik'onik i ki imas wakax xanoq wo' inwihik kak'uun ruuk' i ki ixoq wakax, eh ma' kikimik taj noq ki-aasjik.¹¹Re' taqe i kak'uun kixq'uun xakipisk'anik chik chik'onik, xa je' chik rukab' inki a'n i kok' rak'uun tentzun.¹²Noq inkib'iraj i q'ooj arpa, i q'ooj tamb'oor, i q'ooj inhuupjik paam, xakipisk'anik chik pankooq ruum i rusuqkiil kik'ux.¹³Noq kik'acharik ayu' wach ak'al, ma' k'isiin i chib'ih keh inwihik. Eh ma' xta ti' inkilow wach noq kikimik reje.¹⁴Eh je' wili inkiq'or reh i Dios: Qoh akanaa' chi qutkeel, re' hoj ma' nqaaj ta b'ehik panab'eeh.¹⁵¿Awach i Dios re' re' nim rajaawriik reh chi neenqakamaneej wach? ¿Chib'ih inenqak'ax ruuk' chi neenqa'an qatiij chuwach? inki taqe.¹⁶Re' keh inkikapaaj chi pan kiq'ab' wilik chu'nchel i rusuqkiil kik'ux. Eh re' hin ma' jaruuj neenukapaaj chi je' rukab' inkikapaaj i keh.¹⁷Re' taqe yiib' wach kina'ojb'al. ¿Mi esamaj junriim-oq chikiwach i kib'ehomal? ¿Mi kik'ulum junriim-oq i ti' k'axik? ¿Mi ruye'em junriim-oq i rujosq'iil i Dios chikinaah?¹⁸¿Jank'al nilarik chi nkitukej kiib', je' rukab' noq ink'amarik reje i sohk' ruum i kaq suut teew? chi je' rukab' noq ink'amarik reje i rutuus ixiim ruum i kaq suut teew.¹⁹¿Mi ma' inkiq'or re' chi re' taqe i aj mahk re' kak'uun kixq'uun intojwik wach inki a'n? Re' hin i nuq'or chi ma' chih taj, re' la' wo' taqe i aj mahk naakitojwiik wach, reh chi neenkitijeej.²⁰I ruk'ul wo' hoq chi re' keh naakitojwiik riij i kimahk. Eh i ruk'ul chi naa ruye'em chee rujosq'iil i Dios chikinaah.²¹¿Chib'ih ta wo' chik inkaaj reh chib'ih i nee ruk'ul i kak'uun kixq'uun koq'uun noq kamnaq chik taqe reje i keh?²²¿Mi wilik jino'q re' i neerub'an chi nee rutaq'aaj i Dios ruuk' i chib'ih neerub'an? ¿Mi ma' re' re' i reh inq'atwik i q'orik chikinaah i wilik kajaawriik?²³Wilik taqe i suq suq kik'ux chi riij i chib'ih keh, suq wilkeeb', ma' xta ruti'kiil kik'ux noq kikimik reje.²⁴Eh yohb'aal wach i chib'ih keh, kow i kooq kiq'ab'.²⁵Xa re' la' wilik wo' taqe i xa eliik ti' kik'ux. Eh kikimik reje chi ma' inki a'n ta k'isinoq rusuqkiil i kik'achariik.²⁶Xa re' la' noq kamnaq chik taqe reje kiooj panjul, eliik wach inkik'ul, ink'uxarik i kiti'jolal kuum i haah.

²⁷Eh re' hin weht'al chib'ih inakapaaj chi wiij taq i hat, weht'al chi wilik i yiib' wach na'ojb'al inakapaaj taq chi wiij.²⁸Re' hin weht'al chi napahqaaj taq chawach chi je' wili: ¿Chib'ih i ruk'ul i rupaat i winaq re' re'? ¿Chib'ih i xuk'ul i winaq re' re' yiib' wach i runa'ojb'al? tiki taq.²⁹¿Mi ma' napahqaaj taq keh re' taqe i ki-ik'ik pamb'eeh? ¿Mi ma' nab'iraj taq keh re' chib'ih inkiq'or?³⁰Noq inchalik i rujosq'iil i Dios i ruyeew chee ti' k'axik chikinaah tinamit. Eh re' yiib' wach kina'ojb'al keh ma' xta nkik'ul.³¹¿Mi wilik ineenq'orik keh chi ma' holohik taj inki a'n? ¿Mi wilik ineenye'wik keh chutojariik i kimahk, je' rukab' i ruk'ul chi keh?³²Eh noq kikimik reje kicha'jaljiik, chi riij i re' kiooj muq'ub'joq.³³Noq kiooj muhqoq yohb'aal wach i tinamit inuhch'ihlinik keh wilik i peet chikiwach wilik i xam chikiij. Eh intz'aparik qohoq kinaah chi ma' kow ta laj ak'al.³⁴Re' hin i nuq'or chi ma' xta taq ana'ojb'al, ruum rusuqkiil nuk'ux inchalik taq nayeew noq inaq'or. Xanaah re' chu'nchel taq inaq'or xachukuj q'orik, inki. Re' mahk xukoj i Elifaz

¹Re' Elifaz aj ar Temán je' wili ruchaq'weesjiik i Job xub'an:

²¿Mi neen kamanik reh i Dios i winaq? Ma' chih taj re' wilik runa'ojb'al xa reh wo' reh naa rukamaniik i runa'ojb'al chi rib'il riib'.³¿Mi suuqb'ik ta wo' ruk'ux i Dios nim rajaawriik noq re' hat korik wach ak'ux? ¿Mi wilik i neeruk'ax i reh chi re' hat wilik ana'ojb'al?⁴¿Mi ruum chi korik wach ak'ux re' i ruyeew cho cha naah i ti' k'axik wili eh i ruq'at i q'orik cha naah?⁵¿Mi ma' ruum chi xiik' naah yib'kiil wach tib'anik re'? ¿Mi ma' ruum chixiik'naah amahk re'?⁶Re' hat inapahqaaj keh aawas achaaq' chi naakikanaam i chib'ih keh noq inki a'n kikemeel awuuk', eh inaq'uch i kiso' taqe i neb'aa'.⁷Re' hat ma' nayeew ta kihaa' i chiqiij kichii', ma' nayeew ta kiwa' i kinuhmik⁸Re' hat xa a'n wo' naq rub'aan ruum wilik aloq'il, nim awajaawriik, eh wilik panaq'ab' i b'ehomal.⁹Eh ma' xta xasiij keh i neb'aa' ixoq kamnaq kib'ahiil. Eh xa a'n ti' k'axik keh i ma' xta kituut kajaaw.¹⁰Ruum aj re' k'ahchi' ak'ulum i ti' k'axik yu'naak, ma' k'isiin taj ayo'jiik inchalik ruum.¹¹Eh panq'equm wilkaat ruum i ti' k'axik. Xa je' chik k'achi' awojiik qohoq chupaam i ruchamiil ha' ruum i ti' k'axik.

¹²¿Mi ma' re', re' i Dios wilik cho kopan taxaaj xti nim rajaawriik? Re' taqe ch'umiil pan taxaaj wilkeeb', xa re' wo' reh nim rajaawriik chikiwach i re'.¹³¿Chib'ih reet noq inaq'or i hat chi re' Dios ma' rilow taj chib'ih imb'aan? ¿Chib'ih reet noq inaq'or chi re' Dios ma' rilow taj imb'aan panke'lik?¹⁴Re' hat inaq'or chi re' suutz' impoywik wach chuwach i Dios i mahk imb'aan. Xanaah re', re' Dios i rilow chu'nchel imb'aan.¹⁵¿Mi konawaaj a'nam re' hat yiib' wach na'ojb'al je' rukab' i kianam chee yiib' wach kina'ojb'al?¹⁶Re' keh xa chi jumehq'iil xikimik reje, je' naa kowlaj rooq ha' xk'amwik reje keh noq xsahchik kiwach.¹⁷Eh je' wili i xkiq'or reh i Dios: ¿Chib'ih nee qoh atoob'eej wii' i hat? Re' hoj wilik chu'nchel i chib'ih qeh, inki taqe reh i Dios nim rajaawriik.¹⁸¿Chib'ih reet noq inkiq'or chi je' re'? ¿Mi ma' re', re' i Dios inye'wik i chib'ih keh? Re' hin ma' nureq ta chi riij chib'ih reet noq inkiq'or chi je' re'.¹⁹Eh noq inkik'ul i ti' k'axik taqe re', re' i korik wach kik'ux insuuqb'ik kik'ux. Eh re' taqe i ma' xta kimahk naakise'laniik je' wili i naa kiq'orom:²⁰Re' taqe i ki-ixowanik qawach, xsacharik kiwach. Xsahchik wach chu'nchel i chib'ih keh ruum q'aaq' inko'q taqe.

²¹Chak'am wo' chik awiib' panotob'il ruuk' i QaJaaw Dios. Chi je' re' nee wo' chik inwihik rusuqkiil ak'ux, eh nee ti elik korik.²²Chayeew q'ab' reh i Dios chi nee ruk'uhtaaj aweh i korik. Eh chamol panawánima i ruk'uhb'aal.²³Wila' re' hat xanimaj wo' chik i QaJaaw Dios nim rajaawriik. Wila' xaloch' awiib' chuwach, re' reh neetiresaj chupaam i ti' k'axik wilkaat wii'.²⁴Chakanaa' ruk'axariik wach i oro q'e' holohik, xa je' chik inilarik ak'al cha a'n, oon xa je' chik inilarik ab'aj wilik panim ha' cha a'n.²⁵Re' QaJaaw Dios neenko'linik aweh, re' chik i reh xiik' naah loq'il chawach. Eh re' chik i reh naa rukahniik chi jilow aa oro.²⁶Eh re' reh naa ruye'wiik rusuqkiil ak'ux, ruuk' chik i reh naa-ach'ikaam ak'ux²⁷Wila' xapahqaaj reh chib'ih inawaaj nee ruyeew aweh. Eh re' hat naa wo' aye'em reh i xaq'or reh chinaa-aye'em reh.²⁸Eh chib'ih jariik i naa ayejaam wach naa reliik korik chawach. Chu'nchel ina-a'nam naa aweliik korik ruuk'.²⁹Ruum re' i QaJaaw Dios i resaj i rajaawriik awach i q'e' nim wach i rub'an riib'. Eh i ruko'leej awach i xama' nim ta wach i rub'an riib'.³⁰Eh re' reh neenko'linik aweh i hat wila' saq wach awánima, wila' korik chi ma' xta amahk, inki Elifaz. Re' Job xuko'leej riib' chuwach i Dios

¹Re' Job je' wili ruchaq'weesjiik xub'an:

²Yu'naak i hin naa wo' chik wokiik chi q'orik chi xiik' naah ti'kiil nuk'ux. Ruum re' i QaJaaw Dios xiik' naah i ti' k'axik k'ahchi' ruye'em cho chinaah.³Ma' xta naq reet chi weht'al taj aha' wilik i Dios, nee naq inooj nuq'oreej chupaam i ruye'aab'.⁴Re' hin nee naq i nuq'or reh chi ma' xta numahk, ruuk' naq nuq'oral neenuko'leej wiib'.⁵Re' hin nee naq i nunab'eej chib'ih nee kiruchaq'weej wii', inwaaj naq nunab'eem chib'ih i nee ruq'or.⁶Re' reh nim rajaawriik, xa re' la' ma' ruum ta naq i re' ma' nee ta kirib'iraj. Nee la' naq i ruyeew weh chib'ih i neenupahqaaj reh.⁷Noq nee naq i nub'an nuk'utaaj ruuk' i reh nee naq i rureq chi riij chi ma' xta numahk. Eh nee naq kiresaj chupaam i ti' k'axik chi jumpech.

⁸Xa re' la' re' hin inooj nusik' i Dios i nelik cho wii' i q'iij, ma' nureq taj. Eh inooj nusik' inokik wii' i q'iij ma' nureq ta wo' hoq.⁹Eh noq inooj nusik' pantz'eet reh i rookb'aal q'iij ma' nureq taj, eh noq inooj nusik' pansak'aaj reh i rookb'aal q'iij xama' nureq ta wo' hoq.¹⁰Re' reh noq neerutz'ir riij i nunimaniik, nee rukoj rehtaal, chi ma' xta numahk je' rukab' i oro ma' xta ruch'uwa'iil wach.¹¹Re' hin juneliik i nub'an chib'ih jariik iraaj i reh, eh ma' nukanaam taj i rub'eeh.¹²Eh ma' nukanaam ta wo' rub'aan taqe i ruq'or i ruk'uhb'aal. Juneliik wo' naa nub'anam i kirutaq'aaj wii' i reh.

¹³Eh noq i ruyejaa' wach chib'ih i naa rub'anam i rub'an wo' hoq, ma' awach ta nee nq'orik reh chi ma' nee ta rub'an.¹⁴Re' reh naa wo' rub'anam wuuk' i ruyejaam wach. Chib'ih pa' chik jariik taqe iraaj rub'anam wuuk' nee wo' rub'an.¹⁵Ruum aj re', re' hin kinyo'jik ruum, eh noq i nukapaaj riij chib'ih taqe rub'an yohb'aal wach noq inchalik nuyo'jiik.¹⁶Je' re' noq re' i QaJaaw Dios nim rajaawriik yohb'aal wach i nuyo'jiik k'ahchi' ruye'em.¹⁷¿Chib'ih inchi reet noq ma' xiruyeew chi kimik i QaJaaw Dios? Wita xin kimik reje ma' k'ahchi' ta naq nuk'ulum i ti' k'axik wili, inki Job.¹Eh je' wili i xuq'or: ¿Chib'ih reet noq re' i QaJaaw Dios nim rajaawriik ma' jumehq'iil ta ruq'at i q'orik chikinaah i yiib' wach kina'ojb'al? Reh naq chi neenkikoj rehtaal i kinimanik reh chi rub'an i q'ataj q'orik parub'ehel.²Re' taqe i yiib' wach kina'ojb'al inkijil i rehtalil i k'ula't. Eh inkelq'aaj taqe i kitentzuun i tokoom reh chi neenk'ihaaxb'ik i kekeh.³Eh inkelq'aaj i kib'uruux i ma' xta kituut kajaaw. Eh inkiq'uch i kib'ooyax taqe i neb'aa' ixoq kamnaq kib'ahiil chi riij i kemeel imb'aan kuuk'.⁴Inkesaj pan kib'eeh i neb'aa'. Eh inkikeb'aa' kiib' chikiwach ruum kiyo'jiik i xama' nimaq ta kiwach.⁵Re' taqe neb'aa' kow kikamanik chi rusik'ariik i kiwa' kihaa' i kak'uun kixq'uun. Je' rukab' noq inooj kisik' kiwa' i b'uurux chupaam i ye'aab' chiq yuuq'.⁶Re' taqe i neb'aa' inooj kisik' ki trigo chupaam inkesaj wii' ki trigo i tokoom. Eh inooj wo' kisik' ki uuva inkesaj wii' ki-uuva i yiib' wach kina'ojb'al.⁷Eh inkik'saj aq'ab' chi ma' xta kichamaar, eh ma' xta inkiko'leej wii' kiib' chuwach i k'uxik.⁸Eh kitz'aqik ruum i jab' paraxchee'. Xa chi ri'sil taqe i paat ab'aj inkiko'leej kiib' chuwach i jab'.⁹Eh inkiq'uch i kiha'lak'uun i neb'aa' ixoq kamnaq kib'ahiil. Eh inkiq'uch i chib'ih keh i neb'aa' chi riij i kemeel imb'aan kuuk'.¹⁰Re' taqe neb'aa' xa xiheel chik i kiso' inkimin pan iq'irinik trigo, eh kuyuj kiwa' inki a'n¹¹Noq inkib'ak'ej i ab'aj keeb'al aseite eh noq inkiye'q' paam i yitz'b'al uuva kuyuj kiwa' inki a'n¹²Eh chupaam i tinamit k'erlik kichii' taqe i ti' wilkeeb'. Eh oq'ik inki a'n kow k'ahchi' kipahqaam kitoob'jiik, xa re' la' re' i QaJaaw Dios xama' rib'iraj ta wo' hoq i kitiij.

¹³Re' taqe i yiib' wach kina'ojb'al ma' nkaaj ta wach i saqum, eh ma' nkaaj ta k'acharik pan saqum, ruum ma' nkaaj ta wach i holohik.¹⁴Re' yiib' wach kina'ojb'al kowahq'eq kiooj chi kikantesjiik i neb'aa'. Eh noq inokik aq'ab' kiooj chi i leq'.¹⁵Eh inkich'uwa'risaj wach i kikaxaro chaq'ab' inki a'n aha' wilik inkaaj je' wili inkiq'or: Ma' awach ta k'ahchi' rilwiik qeh ruuk' i k'ahchi' qa'nam, inki taqe.¹⁶Eh re' taqe ajileq' chaq'ab' kiooj chi tehej paat, eh inkitz'ap kiib' pampaat pan q'iij, ruum ma' inkik'ax ta wach elik pan q'iij.¹⁷Re' taqe re' kiyo'jik chi elik ruum inkikapaaj chi neekichoparik pan q'iij. Ruum aj re' chaq'ab' kielik ruum inkikapaaj chi ma' awach ta nilwik keh.

¹⁸Re' i Zofar je' wili xuq'or: Re' taqe i yiib' wach kina'ojb'al jumehq'iil insahchik kiwach, je' naa ha' ink'amwik reje keh, ma' awach ta chik i naa ruwihiik chupaam i ye'aab' ki uuva.¹⁹Re' taqe aj mahk insahchik kiwach noq kimuq'ub'jiik, je' rukab' noq inhaab'ik ruum i rutz'a'iil i q'iij i ruha'iil i suutz' noq i rutoy riib'.²⁰Ma' naa ta chik kik'uliik pank'uxliis kuum i kituut, naa rub'aan rusuqkiil i kiti'jolal kuum i haah. Eh ma' awach ta chik naa ruq'oriik kib'iral. Naa rusahchiik kiwach je' rukab' noq inq'ahik i chee'.

²¹Re' taqe re' xib'anik ti' k'axik keh ixoq ma' xik'isanik taj. Eh ma' xkitob'eej ta wo' junriim-oq i neb'aa' ixoq kamnaq kib'ahiil.²²Xa re' la' re' i QaJaaw Dios ruuk' i rajaawriik xresaj i kajaawriik i yiib' wach kina'ojb'al. Noq inchalik i rujosq'iil i reh ma' awach taj i ruko'leej riib' chuwach.

²³Re' i QaJaaw Dios i rukanaa' pee taqe chi k'acharik pansuqkiil, eh chi ma' xtee nkik'ul, xa re' la' kok'ahchi' rilom chib'ih i k'ahchi' keeb'.²⁴Re' taqe i yiib' wach kina'ojb'al xama' najt ta kielik korik ruuk' inki a'n insahchik kiwach, je' rukab' noq insahchik kiwach i junch'uq. Eh jumehq'iil naa rusachariik kiwach je' rukab' noq inyok'arik i trigo.²⁵Wila' ma' korik i nuq'or. ¿Mi wilik jino'q ineenq'orik reh chi chukuj q'orik i nub'an? Neerub'an chi neeruq'or yu'naak inki i Zofar.

¹Re' Bildad aj ar suhita je' wili ruchaq'weesjiik xub'an:

²Re' i QaJaaw Dios nim rajaawriik, wilik ruyohb'alil wach. Eh re' reh inye'wik rusuqkiil kik'ux i wilkeeb' pan taxaaj.³Re' reh xiik' naah k'ihaal taqe i ruánjel. Eh re' i rusaqumaal insihq'inik cho chinaah chu'nchel.⁴Wila' je' re'. ¿Mi neerub'an chi neeruq'or reh i Dios jino'q i winaq chi saq wach i ránima? ¿Mi neeruq'or chi ma' xta ru mahk i xa ayu' aasjinaq wach ak'al?⁵Re' poh insihq'inik, je' wo' taqe i ch'umiil, xa re' la' xama' rureq ta wo' chi je' rukab' i ruloq'il i Dios⁶Wila' je' re' ra'j naa chik re' i winaq nee rureq chi je' rukab' i ruloq'il i Dios, ruum xa ayu' tii wach ak'al x-aasjik, xa je' rukab' i k'isa haah chuwach inki. Re' Job xuq'or rib'iral i rajaawriik i Dios

¹Re' Job je' wili ruchaq'weesjiik xub'an:

²¿Mi je' wili rutoob'jiik xa a'n i xama' rukuy ta chik i ti' wilik wii'? ¿Mi je' wili rutoob'jiik xa a'n i xama' xta chik k'isinoq ransil?³¿Mi nakapaaj re' hat chi tichol rukojariik runa'ojb'al, chi tichol rutijiik i ma' xta runa'ojb'al?⁴¿Awach xtoob'inik aweh chuq'orariik taqe xaq'or? ¿Aha' wilik uxlab'al xq'orik panawánima chi xaq'or taqe q'orik re' re'? inki.

⁵Re' Bildad je' wili xuq'or: Re' taqe kamnaq xakib'arb'otik chik ruum kiyo'jiik chupaam i ye'aab' wilik chi ri'sil i ha', chi ri'sil i aak'al.⁶Re' i kiye'aab' i kamnaq ma' panke'lik ta wilik chuwach i Dios, ruum chuwach i reh ma' xtaj i ke'lik.⁷Re' i QaJaaw Dios xuyejaa' i taxaaj xa panteew wilik. Eh xuyejaa' i wach ak'al xa panteew wilik.⁸Eh re' reh i rumol wach i ha' chinaah i suutz', re' suutz' ma' nk'er ta ruum i rahliil.⁹Eh i ruq'equmrisaj wach i poh ruuk' i q'equm paam suutz'.¹⁰Eh xuch'aq i ha' ruuk' ak'al, eh xuch'aq i saqum ruuk' i q'equm.¹¹Noq kow inq'orik i Dios re' taqe yuuq' ch'iklik wii' i taxaaj kik'uyu'jik pan kiye'aab' ruum i kiyo'jiik chuwach.¹²Eh ruuk' i rajaawriik i ruq'il i palaw, noq yohb'aal wach i rujosq'iil i palaw i rupab'aa' wo' hoq.¹³Xa ruuk' i rajaawiik xresaj taqe i suutz' pan taxaaj. Re' wo' reh xyej-anik reh i aaq' wilik runa'ojb'al chi jot'ooj.¹⁴Re' Dios yohb'aal wach i rajaawriik, re' k'ahchi' nuq'orom wili, xa re' tik'isiin qeht'al. Koyohb'aal la' wach taqe i rub'anam komajaa' inqanab'eej, re' hoj xama' jaruuj ta wo' naqareqem chi riij i runimaal i rajaawriik i reh, inki. Re' Job xuk'ul i ti' k'axik kuum i yiib' wach kina'ojb'al

¹Re' Job je' wo' chik wili i xuq'or:

²Re' Dios k'achlik i ma' re' ta parub'ehel k'ahchi' ruq'atam i q'orik chi nunaah. Re' i Dios i k'ahchi' rub'aniik ti' k'axik weh.³Re' hin nik' pa' chik najtiil naa ruye'em cho nuk'achariik, nee ruyeew cho wuxlab'al i Dios.⁴Re' hin ma' jaruuj naa nuchukum i q'orik, eh ma' nee ta wo' i nutz'aq wach i q'orik.⁵Eh nik' chik najtiil i nuk'achariik, ma' jaruuj naa nuq'orom chi korik inkiq'or chi wiij, juneliik la' naa nuq'rom chi re' hin ma' xta numahk.⁶Re' hin ma' jaruuj naa nukanaam ruq'orariik chi korik wach nuk'ux, ruum ma' xtaj i yiib' wach nub'anam chi nee ruk'uhtaaj nuk'ixb'ilaal.

⁷Neeta naq kiye'ariik chutojariik i kimahk i ki-ixowanik nuwach, je' rukab' noq kiye'ariik chutojariik i kimahk i yiib' wach kina'ojb'al.⁸¿Mi wilik i ch'iklik reje wii' ruk'ux i yiib' wach runa'ojb'al? ¿Mi wilik neeruko'leej wii' riib' noq neenehteesjik i ruk'achariik ruum i Dios?⁹Eh noq neen wihik panti' k'axik ¿Mi neenib'irjik chee rutiij ruum i Dios noq neerupahqaaj rutoob'jiik?¹⁰¿Mi nee rureq rusuqkiil ruk'ux ruuk' i Dios nim rajaawriik? ¿Mi neerub'an chi eliik nee ruq'oreej i Dios parutiij?¹¹Re' hin naa taq nuk'uhtaam aweh taqe i ruyejaam wach i Dios nim rajaawriik, ma' nee ta taq i nupoy chawach chib'ih taqe rub'an.¹²Eh wila' re' taq i hat awilom taq chik chib'ih taqe rub'an ¿Chib'ih reet noq inaq'or taq i q'orik xama' xta ruk'am chaloq? inki Job.

¹³Re' Zofar je' wili xuq'or: Re' QaJaaw Dios nim rajaawriik naa ruye'em taqe chutojariik i kimahk i yiib' wach kina'ojb'al, taqe i xama' awach ta imponik chikiwach.¹⁴Atoob' ta yohb'aal wach k'ihaal i kak'uun naa rukuxiik kikimiik panq'aq'inik. Eh re' taqe i kok' kiha'lak'uun ma' naa ta kireqem kiwa'.¹⁵Eh re' taqe i ma' naa ta kikimiik ruum taqe re' kaq yab'ilaal naa rukansaniik keh, eh ma' naa ta kooq'jiik kuum i kehk'een naa kikanaam.¹⁶Atoob' ta yohb'aal wach i kitumiin neenkimol wach xa je' chik intuhb'ik pooq, atoob' ta yohb'aal wach i kiso' neenkimol wach.¹⁷Re' i korik wach ruk'ux neemb'anik rusuqkiil i kitumiin. Re' jino'q i korik wach ruk'ux naa rukojwiik reh i kiso'.¹⁸Re' yiib' wach runa'ojb'al ma' holohik taj rupaat xuyejaa', xa je' rukab' i perpat xaq chee' naah re' ruuk' inkamanik chi cha'jalb'al ab'iix.¹⁹Re' b'ehoom naa ruponiik i q'iij chi suq ruk'ux noq naa ruwiriik qohoq, eh noq narik'raam riib' parusaq'iik ma' xta chik i wilik reh.²⁰Naa ruchaliik jinaj runimaal yo'jik chinaah pan q'iij runimaal kaq suut teew naa ruchaliik chinaah chaq'ab'.²¹Eh jinaj i runimaal teew naa ruchaliik pareelb'aal q'iij, re' re' naa rik'iik esanoq reh paruye'aab'.²²Re' Dios naa ruye'em i runimaal teew chinaah i winaq re' re', eh noq naa naq chik ruko'leem riib' chuwach xama' naa ta wo' chik ruko'leem riib'.²³Eh noq naa rusahchiik wach, re' tinamit naakipoq'poteem paam i kiq'ab', eh chu'nchel naakixub'iniik reh, inki. Re' rureqariik chi riij i nimaq wach na'ojb'al¹Re' Job je' wili xuq'or: Wilik i ye'aab' inkan wii' i plata, wilik i ye'aab' i nelik wii' i ruch'uwa'iil i oro.²Eh re' ch'ihch' panak'al inkan inkorjik wii'. Re' i q'an ch'ihch' ab'aj ink'atarik noq inkorjik.³Re' taqe winaq ma' kiyo'jik taj chi qajik chupaam i ye'aab' q'equm paam chi rusik'ariik i k'ih taq tz'aaq ab'aj. Kiqajik paruchamiil chusik'ariik holohaq ab'aj inkiyeew kiib' pankimik.⁴Eh panteew t'uyulkeeb' ruuk' laso noq kiqajik qohoq noq inkik'ot i chaam laj jul, chupaam taqe ye'aab' ma' awach taj i ki-ik'ik chupaam. Eh kutkeel inki a'n i kamanik ar najt ruuk' i tinamit.⁵Chinaah ak'al i nelik i trigo, eh chi ri'sil ak'al inkan i holohaq ab'aj xan reprotik chik xa je' chik q'aaq'.⁶Eh chi ri'sil ak'al inkan i holohaq ab'aj zafiro, eh ar wo' inkan i oro.⁷Eh ni xata re' ooloch', ni xata re' k'uch i kiponik chupaam taqe i chaamlaj jul re' re'.⁸Eh ma' ki-ik'ik ta wo' ar taqe i josq'laj chikop, ni xata re' i kaq b'ahlam ki-ik'ik ar.⁹Re' taqe winaq inkipaxej i kowlaj ab'aj, eh inkik'ot i chaamlaj jul.¹⁰Eh inkik'ot i jul chi ri'sil i yuuq' k'ixkaab', ar inkireq i xa chib'ih jariik k'ih taq tz'aaq.¹¹Eh inkisik' cho paraasb'al taqe i ha' i xa chib'ih jariik ma' nilarik ta naq kiwach.

¹²Xa re' la' ¿Awach aj uuk' inkireq i kina'ojb'al? ¿Awach inkireq chi riij rub'aan?¹³Eh re' na'ojb'al re' re' ruuk' i Dios inchalik yohb'aal wach k'ihaal tz'aaq, ma' awach ta uuk' neenkan ayu' wach ak'al.¹⁴Eh ma' nee ta inkan chupaam i chaam laj jul. Eh ma' nee ta wo' inkan chupaam i palaw.¹⁵Eh ni xata neenloq'arik ruuk' oro, ni xata neenloq'arik ruuk' plata.¹⁶Ma' nee ta wo' nloq'arik ruuk' i manlik oro inkan ar Ofir. Ni xata neenloq'arik ruuk' i holohaq ab'aj ónice, ruuk' i holohaq zafiro.¹⁷Re' na'ojb'al re' re' ma' nee ta pajarik ruuk' oro ruuk' i holohaq ab'aj kireprotik. Eh ma' nee ta rub'an chi neenjal wach ruuk' i xa chib'ih jariik manlik oro.¹⁸Re' nimaq wach na'ojb'al re' re' xiik' naah k'ihaal tz'aaq chuwach i holohaq ab'aj koral, chuwach i ab'aj xan reprotik chik, eh chuwach i taqe i holohaq ab'aj perla.¹⁹Eh ma' nee ta impajarik ruuk' i holohaq ab'aj topacio inkan ar Etiopía. Ni xata neerub'an chi neenloq'arik ruuk' i manlik oro.

²⁰Eh, ¿Awach aj uuk' inkireq i nimaq wach na'ojb'al re' re'? ¿Aha' inkireq chi riij rub'aan?²¹Ruum re' taqe na'ojb'al re' re' ke'lik chikiwach i wilkeeb' chinaah i wach ak'al, ke'lik wo' chikiwach i chikop kirupinik pan taxaaj.²²Re' taqe ye'aab' kamnaq, taqe kamnaq xkib'iraj chi wilik taqe i na'ojb'al re' re' xa re' la' ma' xkinab'eej taj aha' inkan.

²³Eh re' Dios reh reht'al chi xa ruuk' wo' reh inkan taqe na'ojb'al re' re', eh chi xa ruuk' wo' reh inkan i rukowiil kik'ux.²⁴Re' reh reht'al chu'nchel imb'aan chinaah i wach ak'al. Eh reht'al chu'nchel chib'ih i wilik wach ak'al.²⁵Eh re' reh impajwik i ransil i teew, re' wo' reh impajwik iransil i ha'.²⁶Re' wo' reh impab'anik reh i jab' q'iij, re' wo' reh inq'orik reh i ruch'aab' i kahoq aha' naa rik'iik.²⁷Re' Dios xukoj rehtaal chi re' nimaq wach na'ojb'al wilik ruloq'il, wilik kamaj. Eh re' reh xuq'or chi ma' xta reet, xuyeew rajaawriik.²⁸Eh je' wili i xuq'or keh i tinamit. Re' raa' ri'sil i holohik laj na'ojb'al re' i ruyohljiik nuwach i hin. Eh re' rureqariik chi riij rub'aan i holohik, re' i rukanab'jiik rub'aan i yiib' wach chi b'anarik, inki i Dios. Re' i tz'apaab' wach ko'lb'al riib' xub'an i Job

¹Re' Job je' wili i xuq'or:

²Q'e' naq chihooj chi nee ta wo' chik kinsutinik chupaam taqe i q'iij hin ik'inaq cho wii', noq re' Dios kohin cho rucha'jeem.³Re' noq kok'ahchi' naq rusaquumb'isam paam i nukapeb'aal, eh kok'ahchi' naq rusaquumb'isam paam i nub'eeh, reh chi ma' nee ta chik kinb'ehiik panq'equm.⁴Eh je' naq rukab' noq xnub'an cho rusuqkiil i nuk'ijolal. Noq re' naq i Dios incha'jinik keh i awach weh panupaat.⁵Re' noq kok'ahchi' naq kiin rutob'eem i Dios nim rajaawriik, noq ko wilkeeb' naq wuuk' panupaat taqe i wak'uun wixq'uun.⁶Re' noq ma' k'isiin naq i lecha inwesaj keh nu chikoop. Eh ma' k'isiin naq i aseite i ruyeew weh ab'aj inke'jik wii' i wach olivo.⁷Eh noq kinooj naq pan tinamit i hin kinooj naq tz'uhnoq chi kixilak taqe i wuch k'amal rub'eeh tinamit.⁸Re' taqe k'ijolaq kielik naq panub'eeh ye'b'al wajaawriik. Re' taqe i rijib' chik taqe inkipab'aa' naq kiib' noq kinkik'ul.⁹Eh re' taqe i nimaq kiwach inkikanaa' naq i q'orik noq inkilow nuwach, inkitz'ap naq i kichii' ruuk' kiq'ab'.¹⁰Re' taqe i k'amal b'eeh atoob' ta nimaq kajaawriik ma' kiq'orik ta chik noq kinokik i koq chi kixilak ye'b'al wajaawriik.¹¹Eh re' taqe i tinamit ki-ib'irinik naq reh i nuq'or je' wili inkiq'or: atoob' inche reh, inki taqe. Eh re' taqe i ki-ilwik naq reh taqe i nub'an holohik kiq'orik chi wiij.¹²Ruum re' hin inutob'eej naq taqe i ma' xta kituut kajaaw, je' wo' taqe i neb'aa', ma' awach ta naq intoob'inik keh.¹³Eh noq i nutob'eej naq taqe i ti' wilkeeb', re' holohik inkipahqaaj chi nunaah. Eh i nuyeew wo' naq rusuqkiil kik'ux i neb'aa' ixoq kamnaq kib'ahiil.¹⁴Juneliik xnub'an chi korik wach nuk'ux, xnub'an i rub'ehel, xi kamanik weh chi xa je' chik rukab' i nuso' nukojom chi wiij eqal eqal.¹⁵Re' hin juneliik naq i nutob'eej taqe i moywach je' wo' taqe i chelej riib' noq kib'ehik.¹⁶Xa je' naq chik hin kajaaw inkaaj i toob'jik. Hin naq ko'len keh i tokoom tinamit.¹⁷Re' hin inwesaj naq i kajaawriik i yiib' wach kina'ojb'al, je' naq i nupaxej i wach keh i nuq'uch naq pan kiq'ab' inki a'n ti' k'axik reh.¹⁸Re' hin je' naq wili nuq'or panuk'ux: Re' hin yohb'aal wach najtiil naa nuk'achariik, eh noq hin chik rijib' panupaat naa nukimiik.¹⁹Re' hin q'e' suq nuk'ux je' nukab' i juniwal chi chee' tikooj chii' rooq ha', xa eliik rax wach i xaq ruum i raab' suutz' inqajik chaq'ab'.²⁰Juneliik naakiye'em runimaal nuwach, juneliik naa ruwihiik nukowiil kinki panuk'ux.

²¹Eh chu'nchel naq ki-ib'irinik weh, xa nkiyeew naq chik i kixikin noq i nukoj kina'ojb'al.²²Noq i nukohlaaj q'orik ma' jino'q naq inq'orik i ma' holohik taj chi riij, xasuq chik inkib'iraj.²³Eh juneliik naq inkuy-eej i nuq'oral, je' rukab' noq inuyub'jik i jab' pan siq'jil.²⁴Eh noq ti' naq kik'ux re' naq i hin kinye'wik rusuqkiil kik'ux. Ruum i rusuqkiil kik'ux i nuyeew inkoowjik naq kik'ux.²⁵Eh re' naq i hin kiq'orik keh chib'ih i naa kianam. Re' naq i hin kik'amwik kib'eeh je' hin jinaj reey ink'amwik b'eeh chikiwach i ru soldado. Noq ti' kik'ux re' i hin kinye'wik rusuqkiil kik'ux, inki Job. Re' Job ti' xrik'raaj noq xik'ul i ti' k'axik¹Re' Job je' wili xuq'or: Xa re' la' yu'naak kinkikaqse'laaj taqe i ko k'ijolaq chi nuwach. Re' kajaaw i re' ni xata i ruk'ul chi xiye'arik chi kixilak i tz'i' kicha'jinik naq keh i nu chikoop.²Eh, ¿Chib'ih naq xi kamanik wii' weh i re' kow ta kiib'? Re' taqe re' xama' kow ta wo' kiib'.³Eh ruum i kine'b'ail, ruum chi ma' xta kiwa' kiooj chi b'ehik chi kutkeel. Kiooj chi wihik chupaam i ye'aab' chiq yuuq' aha' ma' xta wilik.⁴Eh inkisik' i k'ahlaj ch'ahn pantaq ch'ahn, eh inkisik' i raa' i chee' enebro inkik'ux chi jilow kiwa'.⁵Eh ma' ajwaal ta kiwach kuum i tinamit. K'erik kichii' chikiij noq kajimam, je' rukab' inki a'n reh i ajileq'.⁶Re' taqe re' xiooj chi wihik chupaam taqe paat ab'aj, pantaq jul, pantaq hoop paam ak'al.⁷Eh k'erik kichii' chi ri'sil taqe i chee' ruum kiwa' inkimol kiib' chi ri'sil taqe i k'iix.⁸Re' keh ma' xta kiokik wii' je' cho ma' xta kituut kajaaw, ma' ruk'ul ta naq chi k'acharik inki a'n panqatinamiit.

⁹Xa re' la' yu'naak kinki kaqse'laaj, xa se'lb'al inkiq'or chi wiij.¹⁰Ma' inkaaj ta kilom nuwach, ma' inkijil ta cho kiib' wuuk'. Eh inkichuhb'aaj pan naq'nuwach.¹¹Je' re' inki a'n weh ruum re' Dios xuyeew i rujosq'iil chi nunaah k'ahchi' nuk'ulum i ti' k'axik. Ma' kimponik ta pan naq' kiwach.¹²Eh kichalik paruk'ihaal inkiq'or chi wilik numahk. Eh inkaaj kianam ti' k'axik weh, kinkaaj kikansam.¹³Eh inkiq'at panub'eeh, xti xankaaj chik kianam weh noq xkilow chi ti' wilkiin. Ma' awach ta q'ilwik keh ruuk' inki a'n weh.¹⁴Junchaliik taqe chi nunaah noq xchalik kian weh i ti' k'axik.¹⁵Re' hin xinyo'jik, ma' xta chik nuloqiil xkahnik, je' naa xiik' ruk'am i kowlaj teew. Re' taqe i chib'ih weh xsahchik kiwach, xa je' inik'ik jinaj suutz'.

¹⁶Re' hin xama' nukuy ta chik i wihik wach ak'al. Re' ti' k'axik k'ahchi' rik'iik chi nunaah.¹⁷Re' nuti'kiil imponik wach nub'aqil, ma' inhi'lik ta k'isinoq wach i nu ti'kiil pantaq chaq'ab'.¹⁸Re' Dios je' naa kow k'ahchi' ruchopom chi walaq. Ruuk' i ti' wili je' naa k'ahchi' kiin rujihk'aam ruuk' i nuso'.¹⁹Re' reh je' naa xirukut pan ch'uwa' xa je' chik nukab' i pooq, xa je' chik nukab' i chaaj.²⁰QaJaaw Dios re' hin nupahqaaj nutoob'jiik aweh, xama' kinab'iraj ta wo' hoq, i nupahqaaj nukuyb'al aweh xama' kinab'iraj ta wo' hoq.²¹Re' hat k'ahchi' aye'em cha josq'iil chi nunaah. Ma' k'isiin ta noq k'ahchi' kiin awisam chi ti'.²²Naa rusacham nuwach i ti' k'axik k'ahchi' kiin rik'iik ruk'amam i teew, k'ahchi' kiin rik'iik ruk'amam i teew jab'.²³Re' hin weht'al noq k'ahchi' kiin ak'amam pankimik. Eh inawaaj chi naawojiik chupaam i ye'aab' kiooj wii' chu'nchel i kamnaq.

²⁴¿Mi ma' nutob'eej taqe re' i neb'aa'? ¿Mi ma' wesaj taqe chupaam re' kiti'kiil noq inkipahqaaj otob'il weh?²⁵¿Mi ma' xinoq'ik chikiij re' i ti' wilkeeb', mi ma' xnuketelaaj kiwach re' i ma' xta wilik keh?²⁶Eh noq k'ahchi' naq wuy-eem i holohik, re' chik i ti' k'axik chalik chi nunaah. Noq k'ahchi' naq wuy-eem i saqum, re' chik q'equm xchalik chi nunaah.²⁷Re' hin juneliik ti' nuk'ux, ruum xa re' i ti' k'axik inchalik chi nunaah.²⁸Re' hin juneliik ti' nuk'ux, ma' aha' ta nureq rusuqkiil nuk'ux. Eh i nupahqaaj nutoob'jiik keh i ruk'ihaal ma' awach taj intoob'inik weh.²⁹Xinkikanaa' chi wutkeel, xin kahnik chi je' nukab' taqe i xojb' je' nukab' taqe i nimaq chikop wilik kixiik' avestruz kib'ihnaal.³⁰Eh k'ahchi' kisalojiik iloq i nuti'jolal, xan q'aq'ik chik i wiij i nwik'raaj ruum i tz'a' chi wiij.³¹Re' hin q'e' naq i rusuqb'isaj nuk'ux i q'ooj arpa, je' wo' i xuul q'ooj, eh yu'naak xsutinik chi ruti'kiil k'uxliis, inki i Job. Re' Job xuq'or chi korik wach ruk'ux¹Re' Job je' wilik i xuq'or: Re' hin xnuq'or i xti korik chi ma' naa ta nuk'axam kiwach i kok' q'ahxoq.²Ruum wixnub'an i re', ¿Chib'ih otob'il neerub'an weh i Dios wilik cho pan taxaaj? ¿Chib'ih ta wo' inchel i nukooch nee ruyeew weh i Dios wilik cho pan taxaaj?³¿Mi ma' re' naq re' i yiib' wach runa'ojb'al, i aj mahk naa ruk'ulwiik reh taqe i ti' k'axik wili?⁴¿Mi ma' rilow cho re' i Dios chib'ih taqe i k'ahchi' nub'anam? ¿Mi ma' rukojom rehtaal re' chu'nchel i nub'an?

⁵Re' hin xti korik i nuq'or chi ma' xnub'an taj i chukuj q'orik, eh ma' nik' ta wo' xnujot' jino'q i tokoom.⁶Neeta naq i rutz'ir riij i na'ojb'al i QaJaaw Dios nee naq i rukoj rehtaal chi korik wo' hoq chi ma' xta numahk.⁷Eh wila' xnukanaa' i korik laj b'eeh wila' xnuk'ax wach b'ehomal, wila' xwelq'aaj tokoom aj eh.⁸Neerub'an chi tokoom taqe neen k'uxwik reh i wach inutik, eh neenkichuq i nutik.

⁹Wila' xnuyeew q'ab' chi xirujot' jino'q ixoq wila' xnuk'ax wach i rehk'een i nuka'jaah nuk'ula't.¹⁰Neerub'an chi re' wehk'een neenk'amarik pan ke'k ruum i tokoom winaq, neerub'an chi neen wirik ruuk' i winaq re' re'.¹¹Eh wita xnub'an taqe mahk re' re' i ruk'ul naq chi nee kinkiyeew chi tojariik i numahk taqe i q'atal q'orik.¹²Je' naq rukab' i q'aaq' noq neenchalik chi nunaah chi sachb'al wach taqe i chib'ih jariik, nee naq i rusach wach chu'nchel i chib'ih weh.

¹³Eh noq re' taqe i numoso winaq, i numoso ixoq inkipahqaaj weh chib'ih inkaaj xnuyeew keh.¹⁴Wita ma' je' re' ¿Chib'ih naq i nee nu ch'aqweej wii' i Dios noq neerupahqaaj? ¿Chib'ih naq i neenuko'leej wii' wiib' noq neeruq'at i q'orik chi nunaah?¹⁵¿Mi ma' re' wo' re' Dios xtz'uhkrisanik cho weh re' hin? ¿Mi ma' re' wo' re' i Dios tz'uk'risanik cho kekeh?

¹⁶Re' hin ma' nik' ta xnukanaa' kitoob'jiik taqe i neb'aa'. Eh ma' xnukanaa' ta wo' taqe i neb'aa' ixoq kamnaq kib'ahiil chi xkikuy kiwa' kihaa'.¹⁷Re' hin ma' nik' ta xnub'an nuwa' nuhaa' xa chi wib'il wiib' chi ma' ta xwunej taqe i ma' xta kituut kajaaw.¹⁸Xinwihik chi je' kajaaw taqe i ma' xta kituut kajaaw, ruum kopan nuk'isinal taqe xtohq'ik cho nutob'eem. Eh xnutob'eej taqe chaloq i neb'aa' ixoq kamnaq kib'ahiil.¹⁹Noq inwilow i hin jino'q i ma' xta ruso' i nuyeew reh, noq inwilow jino'q chi ma' xta b'urb'al riib' i nuyeew wo' reh.²⁰Atoob' ta ma' xkit'iosej weh re' hin weht'al chi xnuyeew keh i rismaal kiij taqe i nutentzuun reh chi xkib'ur kiib' chi reh.²¹Re' hin ma' junriim xnub'an ti' k'axik keh i ma' xta kituut kajaaw, atoob' ta weht'al wo' naq chi neenuko'leej wiib' chikiwach i q'atal q'orik panookb'al.²²Wila' ma' korik i k'ahchi' nuq'orom neerub'an chi nee kib'oq paruye'aab' i nutileb', eh neerub'an chi neentoq i nutz'ihk.²³Re' hin ma' xnub'an ta taqe i yiib' wach na'ojb'al, ruum ma' xwaaj ta chi nee ruyeew chee rujosq'iil i Dios chi nunaah.

²⁴Re' hin ma' nik' ta nuyeew nuk'ux chinaah i tumiin, ma' nik' ta xnuch'ikaa' i nuk'ux chinaah i manlik oro.²⁵Re' hin ma' nik' ta xsuuqb'ik nuk'ux chi riij i ma' k'isa b'ehomal, eh chi ma' k'isiin i chib'ih weh xwihik.²⁶Re' hin i nukoj rehtaal i q'iij noq xan saqumanik chik i rub'an, eh inwilow i poh noq xasaqum chik wach.²⁷Eh re' hin ni xata chi q'eeqmaal xnuloq'ej taqe. Eh ma' xnutz'ub' ta wo' johtoq i nuq'ab' chikiwach.²⁸Wita xnub'an taqe i mahk re' re' i ruk'ul naq chi naa nuk'ulum i tojb'al numahk, ruum xnuq'eb' naq i rajaawriik i Dios wilik pan taxaaj.

²⁹Re' hin ma' junriim xsuuqb'ik nuk'ux noq xkik'ul i ti' k'axik i ki-ixowanik nuwach. Eh ma' xsuuqb'ik ta wo' nuk'ux noq xi wihik pan k'axkiil.³⁰Ma' junriim xin mahkunik chi nupahqaaj i ma' holohik taj chikinaah. Eh ma' nik' ta xnupahqaaj kikimiik.³¹Re' taqe i aj b'iyajo chi korik chi juneliik naq i nuyeew kiwa' i kiponik panupaat.³²Re' taqe i aj b'iyajo xnuyeew kipatal panupaat ma' nik' ta xnuwarsaj taqe pamb'eeh.³³Je' re' noq re' hin ma' junriim nupoy naah i numahk je' rukab' inki a'n junch'uq. Ma' nik' ta xnukanaa' pan wánima i numahk.³⁴Re' hin ma' nik' ta xinyo'jikruum inkiq'or i tinamit. Eh ma' junriim xnutz'ap wiib' panupaat chi ma' ta chih i xnuq'or ruum tee nuyo'jiik chi xkixow nuwach taqe awach weh.³⁵Wilik ta nenib'irinik weh, re' hin ch'iklik nuk'ux ruuk' i Dios nim rajaawriik chi re' reh nee nq'orik reh chi ma' xta numahk. Atoob' ta re' i ki-ixowanik nuwach neenkiq'or chi wilik numahk.³⁶Wita korik inkiq'or chi wiij nee naq i nukuy chi neenkiq'or weh chi wilik numahk, nee naq i nuk'am chi je' nukorona wach nunaah.³⁷Re' hin nee nuq'or ree Dios chu'nchel i xnub'an. Eh nee kinooj pa'lojoq chuwach chi ma' xta nuyo'jiik, eh chi ma' xta numahk.

³⁸Re' hin ma' awach taj inwelq'aaj kiye'aab' juneliik i nutoj taqe i kikamanik chupaam i nutik.³⁹Eh ma' nik' ta xwelq'aaj i wach i rutik i tokoom, ma' nik' ta xnutib'isaj kik'ux i kamanoom.⁴⁰Wita xnub'an i je' re' ma' xta reet chi k'iix i neenpoq' cho pan nuye'aab' chi jilow i trigo, eh chi kaq k'iix i neenpoq' cho chi jilow i sebada.
Ruuk' taqe i q'orik wili xukohlaaj q'orik i Job. Re' q'orik xub'an i Eliú

¹Re' taqe ixib' chi winaq xkikanaa' kiwech'um i Job ruum xkilow chi kow ruk'ux chuq'orariik chi ma' xta ru mahk.²Eh ar xwihik jinaj i winaq Eliú rub'ihnaal, rak'uun i Baracel aj ar Buz. Re' i Eliú ma' tokoom ta ruuk' i Ram q'e' xchalik ruk'aah chinaah i Job, ruum xrilow chi kow i ruq'or chi ma' xta ru mahk xukoj panaah i Dios i ti' k'axik k'ahchi' ruk'ulum.³Re' Eliú xchalik wo' ruk'aah chikinaah ixib' chi ramigo i Job, ruum ma' xichol ta ruch'aweesjiik taqe i xuq'or i Job. Eh ma' xuk'ul ta ruk'ux chi re' Job xukoj panaah i Dios i ti' k'axik k'ahchi' ruk'ulum.⁴Re' Eliú xruy-eej chi xkikohlaaj i q'orik ruuk' i Job taqe ixib' chi ramigo, ruum re' reh ko ak'un chikiwach i keh.⁵Ruum chi xukoj rehtaal i Eliú chi ma' xkireq ta chik chi riij nik' wach ruchaq'weesjiik xkian i Job taqe ixib' chi winaq ma' k'isiin ta xchalik i ruk'aah.

⁶Je' wili i xuq'or keh:
Re' hin, kohin taq k'isiin chawach ruum aj re' xinyo'jik chi q'orariik ixwaaj naq nuq'orom. Panuk'ux i hin naa taq acholiik ruchaq'weesjiik i Job, ruum hat taq chik rijib' chi nuwach.⁷Re' hin je' wili xnuq'or: Kiq'oroq peet ruum re' re' mama' winaq chik taqe chi nuwach, eh wilik kina'ojb'al, kinki.⁸Korik wo' hoq chi chu'nchel i winaq wilik kina'ojb'al, ruum re' Dios nim rajaawriik xye'wik keh i kuxlab'al.⁹Xa re' la' ma' xata wo' re' taqe i k'ihkihab'ul wilik runa'ojb'al, ma' ruum ta chi rijib' chik taqe nee rureq chi riij taqe i korik.¹⁰Je' aj re' noq re' hin naa nuq'oriik, eh chab'iraj taq i naa nuq'orom ruum re' hin wilik wo' nuna'ojb'al.

¹¹Re' hin xwuy-eej chib'ih taq i xaq'or, eh i wech'inik taq xa a'n ruuk' i Job xwuy-eej chi xasik' naq taq i chihooj laj q'orik reh i ruchaq'weesjiik.¹²Xa re' la' xnukoj rehtaal chi ma' jino'q taq aweh i hat xub'an ruchaq'weesjiik chi korik i Job.¹³Re' taq i hat ma' ruk'ul ta chi nee taq inaq'or chi wilik ana'ojb'al. Ruum ma' xat chol ta taq ruch'aqweesjiik i Job, xa re' wo' Dios inchol ruchaq'weesjiik.¹⁴Re' Job ma' re' ta wuuk' i hin k'ahchi' chi k'utaaj. Eh ma' nee ta wo' nuq'or i hin chi nee nuchaq'weej chib'ih i ruq'or, je' rukab' i xa a'n taq i hat.

¹⁵Re' i hat Job re' taqe ixib' chi awamigo wili xiyo'jik ruum ma' xichol ta ruch'aqweesjiik chib'ih i xaq'or.¹⁶Re' hin xwuy-eej naq chi naa kiq'oriik xa re' la' xama' xiq'orik ta wo' hoq.¹⁷Ruum aj re', re' hin naa nuq'oriik naa nuq'orom chib'ih inwaaj nuq'orom.¹⁸Ruum re' hin nujinaq panwánima i q'orik xanwaaj chik ruq'orariik.¹⁹Je' inche xanaa chik nuk'eriik noq inwik'raaj ruum xanwotow chik ruq'orariik, xa je' chik rukab' noq ink'er i ak'tz'uhuum inye'arik wii' i ak' riis uuva.²⁰Ruum aj re' naa nuq'orom nik' nimaal i wilik panwánima. Eh ruk'ul chi naa kaat nuchaq'weem.²¹Ma' awach taj i tokoom rilariik naa nub'anam ma' awach taj i naa nuye'em runimaal wach.²²Korik chi ma' awach taj i tokoom rilariik xnub'an, ruum wixnub'an i je' re', re' Dios chi jumehq'iil neekiruyeew chutojariik i numahk. Re' Eliú xukoj runa'ojb'al i Job¹Je' re' noq re' hat Job chab'iraj i naa nuq'orom xti chakoj rehtaal chib'ih i naa nuq'orom aweh.²Re' hin naa wokiik chuq'orariik ruuk' ju' waaq' nik' nimaal i wilik panuk'ux.³Eh chu'nchel i naa nuq'orom aweh re' i korik, eh naa nuq'orom chu'nchel nuk'ux.⁴Re' i QaJaaw Dios xyej-anik weh, re' wo' reh xye'wik nuk'achariik.⁵Re' hat kinachaq'weej wila' i ruyeew riib'. Eh cha kapaaj riij chi korik naa kiin achaq'weem wii'.⁶Chi re' hin, chi re' hat xa eliik qawach chuwach i Dios ruum xa ch'uwa' ak'al wo' xoj korjik wii' i hat, eh je' wo' hin.⁷Re' hat mat yo'jik chi nuwach, ruum re' hin ma' xta wajaawriik cha naah.

⁸Re' hin xb'iraj chi korik chib'ih i xaq'or xb'iraj noq xaq'or taqe i q'orik wili:⁹Re' hin saq wach i wánima, ma' xta numahk, ma' xtaj i yiib' wach na'ojb'al i nub'an.¹⁰Xa re' la' re' Dios i ruyeew chee ti' k'axik chi nunaah, xi rukoj chi je' hin ixowan wach.¹¹Je' naa xulutz' pan chee' kab'chel i wanuch'ehk noq xuyeew chee ti' k'axik chi nunaah, eh k'ahchi' rilom chu'nchel i nub'an, tiki.

¹²Re' hin i nuq'or aweh chi re' taqe xaq'or re' re' ma' holohik taj, ruum re' Dios xiik' naah nimaal wach chuwach i xa winaq.¹³¿Chib'ih reet noq i nawech'uj i Dios? ¿Chib'ih reet noq inaq'or chi ma' ruyeew ta chaaweh inapahqaaj reh?¹⁴Re' QaJaaw Dios xanik' wach ruq'orob'jiik i winaq i rub'an xa re' la' re' reh ma' rukoj ta rehtaal.¹⁵Wilik noq re' Dios i ruq'oreej i winaq paruwiriik, parusaq wiriik, pantaq chaq'ab', noq suq kiwiriik.¹⁶Eh i ruq'or reh chib'ih i naa rub'anam, eh i rukoj runa'ojb'al.¹⁷Reh chi naa rukanaam i yiib' wach i rub'an, eh chi ma' nee ta runimb'isaj riib'.¹⁸Ma' rukanaa' taj chi neensahchik wach, i ruko'leej la' chuwach i kimik.

¹⁹Wilik wo' pech noq re' Dios i rukoj runa'ojb'al ruuk' yab'ilaal, ruuk' i ruti'kiil chu'nchel i ruti'jolal.²⁰Eh i rukanaa' i wi'k ruum, atoob' ta xiik' naah suq kiil i k'uxumb'al reh.²¹Inkahnik chi ma' xta chik rutib'kaal wach i ruti'jolal, ink'utinik chik i koq i rub'aqil.²²Xa ma' rukuy ta chik xakimik chik reh noq i rik'raaj.

²³Xa re' la' wilik ta jino'q i raj taqareel i Dios reht'al k'utaaj nee naq i ruch'ob' rub'ehel reh chib'ih i naa rub'anam.²⁴Nee naq i ruq'or ree Dios chi chuketelaaj wach, reh chi ma' nee ta inkimik neeruko'leej.²⁵Re' winaq nee naq ink'aachjik ruuk' i ruyab'ilaal, nee naq inkahnik chi ma' xta reet je' rukab' i parak'uniil.²⁶Neerub'an rutiij chuwach i Dios nee wo' ye'arik reh chib'ih i neerupahqaaj. Eh suq suq ruk'ux noq nee rureq i rotob'il i Dios, naa wo' chik ruk'ulum i rotob'il i Dios i winaq.²⁷Eh nee ruq'or chi je' wili: Re' hin ximahkunik, xnub'an i ma' holohik taj, xa re' la' re' Dios ma' xiruyeew ta chi tojariik inumahk, je' naq rukab' i ruk'ul chi weh.²⁸Xiruko'leej la' chuwach i kimik, je' re' noq kok'achalkiin, inko'q.

²⁹Je' taqe re' rub'an i Dios ruuk' i winaq k'ih pech i rub'an ruuk' chi ko'lb'al reh.³⁰Je' re' noq i ruko'leej chuwach i kimik i rukanaa' chi k'acharik ayu' wach ak'al.³¹Re' hat Job cha kanaa' i q'orik chab'iraj chi korik k'ahchi' nuq'orom aweh.³²Wila' wilik i naa aq'orom k'uhtb'al reh chi ma' xta mahk cha q'or, re' hin neenukoj rehtaal mi korik chi ma' xta amahk.³³Eh wila' ma' chih i naa aq'orom, chab'iraj i naa nuq'orom aweh. Re' hin neenukoj ana'ojb'al, inki i Eliú. Re' Eliú xuq'or chi korik wach ruk'ux i Dios

¹Re' Eliú je' wo' chik wili xuq'or:

²Chab'iraj taq i nuq'oral i hat wilik taq ana'ojb'al. Re' taq i hat atijem taq awiib' chakoj taq rehtaal chib'ih i naa nuq'orom.³Re' qaxikin i rib'iraj mi holohik i q'orik, je' rukab' noq inqa a'n rusuqkiil pan qachii' chib'ih inqak'ux.⁴Qasik' wach aha' wilik i holohik, eh qakoj rehtaal aha' wilik i korik.⁵Re' Job je' wili i xuq'or: Re' hin korik wach nuk'ux, re' Dios ma' parub'ehel ta ruq'at i q'orik chi nunaah.⁶¿Mi neenuchuk re' q'orik? ¿Mi wilik numahk re'? Re' hin k'ahchi' nuk'ulum i ti' k'axik chi ma' xta numahk, inki.⁷¿Mi wilik jino'q i winaq chi je' rukab' i Job? i rukaqse'laaj i Dios. Eh i rukoj panaah i Dios i ti' k'axik k'ahchi' ruk'ulum.⁸Re' reh ruk'am riib' panotob'il kuuk' i yiib' wach kina'ojb'al, eh i rub'an reh inki a'n i aj mahk.⁹Re' Job je' wili i ruq'or: Re' winaq ma' xta i neeruk'ax wila' xub'an iraaj i Dios, inki.

¹⁰Re' taq i hat wilik ana'ojb'al chab'iraj taq i naa nuq'orom wili: Re' hin weht'al chi re' Dios nim rajaawriik ma' jaruuj neerub'an i ma' holohik taj. Eh parub'ehel inq'atwik q'orik.¹¹Re' reh i ruyeew i rutojb'aal i ju'jun re' q'oreel chib'ih i xub'an, i xuq'or, i ruyeew rujilob'aal keh re' q'oreel nik' wach kina'ojb'al.¹²Xti korik wo' hoq chi re' Dios nim rajaawriik ma' jaruuj neerub'an i ma' holohik taj, parub'ehel la' inq'atwik q'orik.¹³¿Mi wilik jino'q xye'wik rajaawriik, reh chi xokik chi taaq'anik chinaah chu'nchel i wach ak'al?¹⁴Wita re' Dios neeresaj i ruxlab'al i winaq,¹⁵chu'nchel naq neekikimiik, nee wo' naq chik kisutinik chi pooq ak'al.

¹⁶Re' hat Job wila' wilik ana'ojb'al chab'iraj i naa nuq'orom yu'naak.¹⁷¿Mi neerub'an taaq'anik chinaah i wach ak'al i Dios, wila' ma' imponik chuwach i korik? ¿Chib'ih reet noq inakoj panaah i Dios i mahk wili? ¿Mi ma' korik wach ruk'ux re' Dios?¹⁸¿Mi ma' xa re' wo' re' i Dios inq'orik keh i reey, je' wo' keh i q'atal q'orik chi ma' holohik taj inki a'n?¹⁹Re' i Dios ma' rusik' ta wach i ruk'ax. Eliik wach kilariik taqe i reey i rub'an, je' wo' hoq i b'ehoom ruuk' i neb'aa'. Ruum chu'nchel i re', re' wo' reh xtz'uhkrisanik cho keh.²⁰Eh wila' xraaj i Dios xa chi jumehq'iil neerusach kiwach tinamit. Atoob' ta yejal aq'ab' nee rutaq'aaj chee ti' k'axik, ma' re' ta jino'q winaq naa rusachwiik wach i nim rajaawriik, re' la' i Dios.²¹Re' i QaJaaw Dios k'ahchi' rilom chu'nchel i rub'an i winaq, eh reht'al chu'nchel.²²Chuwach i Dios ma' xta jino'q i ye'aab' xiik' naah q'equmaal paam chi nee ta nkikeb'aa' kiib' i yiib' wach kina'ojb'al.²³Re' i QaJaaw Dios ma' kota ruq'at riij i q'iij reh i winaq chi nenooj pa'lojoq chuwach i reh, reh chi nee ruq'at i q'orik chinaah.²⁴Re' reh i resaj taqe pan kiye'aab' nim kajaawriik ma' kota ruman i rusik' chi riij i kimahk, eh tokoom chik i rukoj chi kijilow.²⁵Re' reh naa rusacham kiwach, atoob' ta chaq'ab'. Naa rub'anam ti' k'axik keh ruum reht'al chi yiib' wach i kina'ojb'al.²⁶Ruum chi yiib' wach i kina'ojb'al, naa rub'anam ti' k'axik keh chikiwach chu'nchel i tinamit.²⁷Re' taqe re' xkiq'eb' chi riij kik'ux i Dios, ma' kaaj ta kik'amam i rub'eeh.²⁸Re' keh xkian ti' k'axik keh i neb'aa', je' wo' taqe i ti' wilkeeb'. Re' Dios xrib'iraj i koq'iim ruum i ti' k'axik xkik'ul.²⁹Wila' re' Dios ma' xuyeew ta taqe chutojariik i kimahk. ¿Awach chik neemb'anik reh? Eh wila' ma' xrilow chib'ih i k'ahchi' keeb'. ¿Awach chik nenilwik reh? Re' wo' reh inilwik keh i tinamit, je' wo' hoq i ju'jun chi winaq,³⁰reh chi ma' neetanokik chi ajaab'esil chinaah i tinamit i yiib' wach runa'ojb'al reh chi ma' nee ta rujot' taqe.

³¹Re' hat Job ¿Mi xaq'or reh re' i Dios chi xak'ul chik i ti' k'axik, eh chi ma' naa ta chik amahkuniik?³²¿Mi xaq'or reh re' chi chuk'uhtaaj aweh amahk komajaa' inakoj rehtaal? ¿Mi xaq'or reh chi wila' ma' holohik i xa a'n ma' naa ta chik a'nam?³³¿Mi nawaaj re' hat chi nee ruyeew atojb'aal i Dios je' rukab' inawaaj i hat atoob' ta re' hat ma' nawaaj ta wach i reh? Re' hat aweht'al chib'ih i naa a'nam, ma' re' tee hin. Chaq'or qeh chib'ih inawaaj a'nam.³⁴Re' taqe winaq wilik kina'ojb'al i kow kik'ux je' wili neenkiq'or:³⁵Re' Job ma' xta runa'ojb'al ruum aj re' je' re' inq'orik xama' xta rub'ehel i ruq'oral.³⁶Ruum aj re' ma' xta reet chi neensik'arik chi riij nik' wach noq wilik i Job, ruum re' chaq'wik i rub'an je' inchaq'wik jino'q i yiib' wach runa'ojb'al.³⁷Re' reh ma' xata re' mahk i rub'an, i ruq'etwachej la' wo' i Dios. Eh chi qawach i hoj ma' holohik ta inq'orik chi riij i Dios, eh i ruwech'uj i Dios, inki taqe.

¹Re' Eliú je' wo' chik wili i xuq'or reh i Job:

²¿Mi nakapaaj re' hat chi holohik inaq'or chi naq'or chi ma' xta mahk chuwach i Dios?³Re' hat je' wili i xaq'or reh i Dios: ¿Chib'ih inawaaj reh i hat i nub'an? ¿Mi wilik tiruchej re' hat i mahk i nub'an i hin? tiki.⁴Re' hin naa kaat nuchaq'weem i hat, je' wo' taqe awamigo wilkeeb' awuuk'.⁵Titz'ehtanoq johtoq pan taxaaj chakoj rehtaal chi re' suutz' yohb'aal wach najtiil wilik johtoq cha naah.⁶Wila' xat mahkunik i hat, ¿Mi wilik neenawuchej i Dios? Atoob' ta yohb'aal wach i mahk neena a'n, ¿Mi wilik neenawuchej i Dios?⁷Eh wi korik wach ak'ux, ¿Chib'ih i neeruk'ax i Dios? ¿Mi neerub'an chi nee nayeew k'isinoq chib'ih reh i Dios i hat?⁸¿Mi re' re' i tokoom neenajot' ruuk' amahk? Eh wiholohik i na'ojb'al, ¿Mi tokoom re' i nee nayeew chi suq?

⁹Re' taqe re' k'erik kichii' ruum i ti' k'axik, eh k'ahchi' kisik'im awach naa ruko'liniik keh pan kiq'ab' i nimaq kajaawriik.¹⁰Xa re' la' ma' inkisik' taj i Dios ixtz'uhkrisanik keh re' ineenye'wik rusuqkiil kik'ux chupaam i ti' k'axik.¹¹Ma' inkisik' taj i Dios inye'wik na'ojb'al. Re' intijinik qeh chi korik chikiwach taqe i chikop kib'ehik wach ak'al, je' wo' hoq i kirupinik pan taxaaj.¹²Eh inkik'er wo' naq kichii' chupahqaljiik i rotob'il Dios xama' kitoob'jiik ta wo' hoq, ruum yiib' wach i kina'ojb'al.¹³Xti korik wo' hoq chi re' i Dios nim rajaawriik xama' rib'iraj ta wo' hoq inkipahqaaj ruum ma' chu'nchel ta kik'ux inkipahqaaj.¹⁴¿Mi kore' chik re' hat Job neetirib'iraj chee Dios ruum k'ahchi' aq'orom chi ma' tirutob'eej taj? Chawuy-eej peet, re' reh reht'al chib'ih i k'ahchi' aq'orom.¹⁵Re' hat inaq'or chi re' Dios ma' inchalik ta rujosq'iil, eh chi ma' ruyeew ta taqe chutojariik i kimahk taqe i aj mahk.¹⁶Re' hat Job re' taqe naq'or xama' xta nokik wii'. Ma' xta ana'ojb'al ruum aj re' xayohb'aal wach inaq'or, chi xama' xta rub'ehel, inki. Re' Eliú i ruyeew runimaal wach i rajaawriik i Dios

¹Re' Eliú je' wo' chik wilik i xuq'or reh i Job.

²Chawuy-eej pee k'isinoq ko wilik i naa nuch'ob'om rub'ehel aweh. Ko wilik i naa nuq'orom chi ko'lb'al riij i Dios.³Ruuk' i runimaal wach nuna'ojb'al i nuq'or aweh chi re' nuDios tz'uhk'risanik cho weh wilik reet noq i ruyeew i ti' k'axik cha naah.⁴Re' hin korik i nuq'or aweh, ma' re' ta chukuj q'orik. Re' hin wilik nuna'ojb'al ruum aj re' k'ahchi' taqe nuq'orom aweh i wili:

⁵Re' Dios xti nim rajaawriik, eh wilik runa'ojb'al, ma' ruq'eb' ta taqe i korik wach ruk'ux.⁶Eh i rusach kiwach i yiib' wach kina'ojb'al. Eh parub'ehel i ruq'at i q'orik chikinaah i neb'aa'.⁷Eh juneliik irutoob'eej taqe i korik wach kik'ux. Re' wo' reh inye'wik keh pan kiye'aab' i reey, i ruyeew q'ab' chi inye'arik kiloq'il.⁸Xa re' la' noq wilik i ti' k'axik inkik'ul ruum i ma' holohik taj inki a'n⁹Re' Dios ink'uhtanik keh chi ma' holohik ta i k'ahchi' keeb'. Eh ruk'uhtaaj wo' keh chi q'e' inkinimb'isaj kiwach.¹⁰Eh i ruq'oreej taqe reh kiq'ilariik, reh chi neenkikanaa' rub'aan i yiib' wach na'ojb'al.¹¹Wila' xkinimaj inq'orarik keh, wixkik'am naah naa kianam rusuqkiil kik'achariik korehtaal chik i kikimiik.¹²Eh wila' ma' xkinimaj i xq'orarik keh ruum i Dios naa kikanteesjiik reje ruuk' q'aslaj ch'ihch' chi ma' naa ta kireqem chi riij aha' wilik iraaj i Dios.

¹³Re' taqe i yiib' wach kina'ojb'al, inchalik kik'aah. Atoob' ta panti' k'axik wilkeeb' xama' inkipahqaaj ta wo' kitoob'jiik ree Dios.¹⁴Re' taqe re' naa kikimiik reje pan kik'ijolaal, naakik'uhtaam kikixb'ilaal pan kik'achariik.¹⁵Ruum i ti' k'axik inkik'ul, re' Dios i ruk'uhtaaj keh i chi ma' holohik taj i k'ahchi' keeb', xa reh naq chi neenkireq chi riij.¹⁶Re' hat Job re' Dios nee wo' naq tiresaj chupaam i ti' k'axik. Nee naq tiruyeew chupaam i ye'aab' q'e' holohik. Ma' nee ta naq chik inak'ul i ti'. Eh nee wo' i ruyeew i chib'ih aweh chi xiik' naah k'ihaal.¹⁷Re' hat k'ahchi' ak'ulum i tojb'al amahk, ma' ruk'ul taj chi ma' nee ta ruq'at i q'orik cha naah, eh chi ma' nee ta tiruyeew chutojariik amahk.¹⁸Chawikraaj awiib' maa chih tiruchej ruum rujosq'iil, ni xata naq chik ruuk' ruk'ihaal tumiin neenako'leej awiib' chuwach.¹⁹Re' ab'ehomal ma' jaruuj neetiresaj chupaam i ti' k'axik wilkaat wii', atoob' ta neenak'er aachii' atoob' ta wilik awajaawriik.²⁰Ma' k'ax wach i ruq'equmaal i mahk. Re' noq insahchik kiwach pan kiye'aab' i tinamit.²¹Chawik'raaj awiib' maa a'n chik i yiib' wach na'ojb'al. Yu'naak k'ahchi' ak'ulum i ti' k'axik reh chi ma' nee ta chik ti mahkunik.²²Chakoj rehtaal chi re' Dios xiik' naah runimaal rajaawriik, ma' jino'q chik i aj tijoom chi je' rukab' i reh.²³Eh ma' kota awach inq'orik reh chib'ih taqe rub'an. Ma' awach ta wo' nee nq'orik reh chi ma' holohik taj i xub'an.

²⁴Chu'nchel i kiye'wik ruloq'il taqe i rub'an. Je' wo' hat chayeew wo' ruloq'il taqe i rub'an.²⁵Eh chu'nchel i tinamit kikojwik rehtaal taqe i rub'an, atoob' ta xa chi najt inkilow chaloq.²⁶Re' Dios xiik' naah nimaal wach, re' hoj ma' inqareq ta chi riij taqe rub'an. Eh wilik chi juneliik ma' xta rutohq'iik chaloq, eh ma' xtarukuxiik wach.²⁷Re' Dios ruuk' i rajaawriik rumol wach i ha' pan jinaj ye'aab', chi riij i re' rusutej chi jab'.²⁸Re' reh i rusutej chi jab' i suutz'. Re' jab' i ruyeew cho chikinaah chu'nchel i k'achareel wilkeeb' wach ak'al.²⁹¿Mi wilik jino'q i naab'inik reh nik' wach noq imb'ehik i suutz'? ¿Mi wilik i naab'inik reh nik' wach noq inq'orik chee kahoq?³⁰Re' Dios i rusihq'eej cho paam i taxaaj ruuk' i ruch'aab' kahoq. Eh re' ruchamiil i palaw inkahnik panq'equm.³¹Ruuk' taqe rub'an re' re' i ruyeew chib'ih keh i tinamit, eh i ruyeew wo' k'uxumb'al keh.³²Re' wo' reh intaaq'anik chinaah i kahoq, re' wo' reh inq'orik reh aha' naa rupoq'iik.³³Eh noq impoq' i kahoq ink'utinik chi ma' suq ta ruk'ux i Dios ruuk' chib'ih imb'aan. Noq i rutaq'aaj chee kowlaj teew jab' ar ink'utinik chi k'ahchi' rujosq'iil.¹Eh ruum i re' q'e' kinyo'jik, xan k'uyu'jik chik i wánima, je' inche xanaa chik reliik paruye'aab' noq inwik'raaj.²Chab'iraj taq, re' Dios naa ruq'oriik, xa je' chik kahoq noq naa ruk'erem chii' chi q'orik.³Re' reh ruyeew i ruch'aab' kahoq chupaam chu'nchel i taxaaj, korehtaal imponik chi junsuut i wach ak'al.⁴Eh noq inq'orik i Dios ruuk' i runimaal i rajaawriik je' rukab' noq impoq i kahoq. Eh ma' rumay taj i ruch'aab' noq k'ahchi' chi teleninik.⁵Re' Dios ruuk' i ruq'oral i rub'an taqe i sahchb'al k'uxliis. Re' taqe nimaq wach sahchb'al k'uxliis i rub'an ma' awach ta inreqwik chi riij.⁶Re' reh intaaq'anik cho reh suutz' chinaah i wach ak'al. Re' re' intaaq'anik cho reh i musjab', i runimaal jab' chinaah i wach ak'al,⁷reh chi re' taqe i tinamit ma' kielik ta chik reje riij kipaat, reh chi nkikoj rehtaal chi re' Dios wilik rajaawriik chub'aan taqe re'.⁸Eh re' taqe chikop kiokik pan kijuul ar inkikeb'aa' kiib'.⁹Eh pansak'aaj reje ree i rookb'aal i q'iij inchalik i kowlaj teew, eh pantz'eet reh i rookb'aal q'iij inchalik i k'uxik.¹⁰Re' wo' Dios intaaq'anik reh noq i rutoy riib' i ha', eh kijoot'ik chu'nchel i runimaal ha'.¹¹Re' wo' reh inyej-anik reh i suutz'. Eh ruuk' i ruch'aab' i kahoq i rukaaj reje i suutz'.¹²Eh re' Dios intaaq'anik keh i suutz' noq ki-ik'ik chupaam i taxaaj k'ul kiooj chinaah i wach ak'al, inki a'n wo' taqe i rutaq'aaj wii'.¹³Wilik noq re' Dios i rutaq'aaj chee jab', i rutaq'aaj chee teew, b'amb'al otob'il keh i wilkeeb' wach ak'al, i rutaq'aaj taqe chaloq i re' q'ilb'al keh i tinamit.

¹⁴Chab'iraj i hat Job, xti chakoj rehtaal taqe i sahchb'al k'uxliis i rub'an i Dios.¹⁵¿Mi aweht'al i hat nik' wach noq i rub'an taqe re'? ¿Mi aweht'al i hat nik' wach noq i ruyeew chee ruch'aab' i kahoq pan suutz'?¹⁶¿Mi aweht'al i hat nik' wach noq i ruyeew chi b'ehik i suutz'? ¿Mi aweht'al re' hat nik' wach noq i rub'an taqe i runimaal wach sahchb'al k'uxliis?¹⁷¿Mi aweht'al i hat chib'ih reet noq tz'a' i nawik'raaj noq re' Dios i rutaq'aaj chaloq i teew inchalik pansak'aaj reje reh i rookb'aal q'iij?¹⁸¿Mi xatow re' Dios i hat chi ruyejeb'jiik i taxaaj? ¿Mi xatow re' chi rutinamiit reh chi xkahnik chi je' jino'q ch'ihch' inreprotik?¹⁹Wila' re' hat aweht'al, cha q'or qeh chib'ih i naa qa q'orom reh i Dios, ruum re' hoj ma' inqareq ta chi riij, q'equm chi qawach.²⁰Re' hin ma' jaruuj inwaaj nub'anam nuk'utaaj ruuk' i Dios chi hoj k'ulwach ruuk'. Ruum wixnub'an nee naq i rusach nuwach.

²¹Noq inik'ik i teew i resaj i suutz' chuwach i q'iij, ma' awach taj ineerukuy rilariik inaq'wach i q'iij.²²Noq i nelik chaloq i q'iij, re' taxaaj pantz'eet reje reh i rookb'aal q'iij, xa je' chik holwochiil i xti manlik oro. Ar inqakoj rehtaal i runimaal i ruloq'il i Dios.²³Re' hoj ma' inqareq ta chi riij taqe i rub'an i Dios nim rajaawriik. Re' reh kow riib', eh korik wach ruk'ux. Ruum chi korik wach ruk'ux ma' awach taj i rub'an ti' k'axik reh.²⁴Ruum aj re', re' taqe i tinamit inkiyohleej wach. Chuwach i reh ma' xta kiokik wii' i wilik kina'ojb'al, inki i Eliú. Re' Job xq'ilarik ruum i Dios

¹Re' Dios xuq'il i Job je' wili i xuq'or cho reh chupaam i runimaal kaq suut teew:

²¿Chib'ih a'nam i hat chi nawech'uj riij taqe i nub'an? Re' hat ti q'orik chi je' re' ruum ma' xta ana'ojb'al.³Yu'naak cha yejaa' awiib' chakuhtaaj aakowiil, neenachaq'weej weh i naa nupahqaam aweh.

⁴¿Mi wilkaat chik re' i hat noq xnuyejaa' paruye'aab' i wach ak'al? Wila' xti wilik ana'ojb'al, cha q'or weh.⁵¿Mi aweht'al i hat awach xq'orik reh nik' nimaal i wach ak'al xb'aan? ¿Wila' aweht'al cha q'or weh awach i xpajwik reh?⁶¿Chaq'or weh nik' wach noq ch'iklik paruye'aab' i wach ak'al? ¿Eh awach i xkojwik reh taqe i kowlaj ch'ikaab' reh?⁷Noq kisihq'inik chaloq taqe i ch'umiil pan taxaaj kowahq'eq xasuq chik kik'ux chi loq'inik taqe i nuánjel.

⁸Eh noq x-aasjik chee palaw panak'al ¿Awach xkojwik q'atb'al reh, chi ma' xupuhkaaj ta reje riib'?⁹Re' hin xinkojwik i suutz' chib'urb'al naah i palaw, reh chi xkahnik panq'equm.¹⁰Eh re' hin xinq'orik reh i palaw aha' naa rik'iik xnukoj tz'apb'al reh xnukoj pan laweh.¹¹Eh je' wili xnuq'or reh xa ayu' naa aponiik, ma' naa ta chik awojiik reje chuwach, xa ayu' naakipahiik taqe aab'ohl, kinki reh.¹²Raaj i hat Job, ¿Mi ataq'aam junriim-oq pan achachariik chi naa ruwihiik i wahq'eq? ¿Mi ataq'aam junriim-oq chi naa rusaquumb'iik i wach ak'al?¹³¿Mi aye'em chi saqumb'ik junriim-oq i wach ak'al, reh chi re' taqe i yiib' wach kina'ojb'al nee kielik chaloq chupaam i ye'aab' muqulkeeb' wii'?¹⁴Noq insaq'ik ink'utinik i ru holwochiil i wach ak'al, je' cho riq'omaaj wach i wach ak'al inkahnik chi xa je' chik inka'yik itz'ihy.¹⁵Eh re' taqe i yiib' wach kina'ojb'al ma' imponik ta chik inki a'n i kiyiib' wach na'ojb'al inki a'n naq pan kie'lik.

¹⁶Raaj i hat Job, ¿Mi hat poninaq panke'lik ko' aha' inaasjik cho wii' i palaw? ¿Mi hat poninaq chupaam i ruchamiil?¹⁷¿Mi hat poninaq chupaam i puerta kiokik wii' taqe i kamnaq? ¿Mi hat poninaq chupaam i kiye'aab'?¹⁸¿Mi aweht'al i hat nik' nimaal chu'nchel i wach ak'al? Chaq'or weh wila' xti korik chi aweht'al.

¹⁹¿Mi aweht'al i hat aha' inchalik i saqum? ¿Mi aweht'al i hat aha' inchalik i q'equm?²⁰¿Mi aweht'al i hat ko aha' imponik i saqum noq ruk'ul riib' ruuk' i q'equm? ¿Mi neerub'an chi nee taqe nak'am reje pan kiye'aab'?²¹Wila' aweht'al taqe re' iraaj ruq'orom chi hat chik aasjinaq i hat noq xnuyejaa' i wach ak'al. Iraaj ruq'orom chi xiik' chik naah k'ihaal ahab'ul.

²²¿Mi hat poninaq chupaam i ye'aab' re' hat i numol wii' i saq suutz' i numol wii' taqe i saqb'och?²³Re' taqe re' numolom taqe, reh chi naa taqe nutaq'aam chaloq paruq'ijil i ti' k'axik, paruq'ijil i q'aq'inik.²⁴¿Mi aweht'al i hat aha' inchalik i saqum noq i rupuhkaaj riib' chinaah i wach ak'al? ¿Mi aweht'al i hat nik' wach noq i rupuhkaaj riib' i teew inchalik parelb'aal i q'iij?

²⁵¿Awach intaaq'anik cho reh i kowlaj jab'? ¿Awach inq'orik reh i kahoq aha' naa rik'iik?²⁶¿Awach intaaq'anik cho reh i jab' aha' ma' xta wii' tinamit? ¿Awach intaaq'anik cho reh i jab' panchiq yuuq' ma' xta wilik chupaam?²⁷¿Awach int'aqsanik cho reh i ye'aab' chiq yuuq' reh chi nee nelik chee rax ch'ahn chuwach?

²⁸¿Mi wilik rajaaw i jab'? ¿Mi wilik xyej-anik cho reh i musjab'?²⁹¿Mi wilik rutuut i jot'ik ha' i rutoy riib' ruch'ihil i jot'ik chaaj ink'atwik?³⁰¿Awach insutinik reh i ha' chi rutoy riib' inkahnik chi je' ab'aj? ¿Awach injoot'isanik reh i palaw?

³¹¿Mi re' hat ti ye'wik pan kiye'aab' re' i juntz'uhb' chi ch'umiil Pléyades kib'ihnaal? ¿Mi neena a'n keh teesjiik pan kiye'aab' re' i ch'umiil Orin i kib'ihnaal?³²¿Mi re' hat titaaq'anik kee chi b'ehik re' i ch'umiil ihqen q'iij? ¿Mi re' hat ti k'amwik kib'eeh re' i ch'umiil Osa kib'ihnaal, re' taqe nimaq, taqe kok' taq?³³¿Mi aweht'al re' hat i kik'uhb'aal i wilkeeb' pan taxaaj? ¿Mi hat xat kojwik re' i k'uhb'aal wilkeeb' wach ak'al?

³⁴¿Mi neerub'an chi neenaq'or reh i suutz' chi nee ruyeew chee ma' k'isa jab' chinaah i wach ak'al?³⁵¿Mi wilik awajaawriik re' hat chi neenataq'aaj i kahoq? ¿Mi neenib'irinik chawach re'?³⁶¿Awach inye'wik kina'ojb'al i tinamit? ¿Awach inye'wik rukowiil kik'ux?³⁷¿Mi wilik jino'q i neerub'an kajaljiik taqe i suutz'? ¿Mi wilik jino'q i nee ruq'or reh i suutz' chi chuyeew chee jab',³⁸reh chi re' pooq nee wo' chik insutinik chi ch'uwa' chi nee wo' chik i rulatzej riib'?

³⁹¿Mi re' hat tichopwik keh re' i chikop inkik'ux i kaq i b'ahlam? ¿Mi re' hat ti ye'wik k'uxumb'al keh re' i kok' kak'uun,⁴⁰re' noq inkiyok'aa' kiib' pan kijuul oon panch'ahn chi ruyub'jiik chi naa ruponiik i kitiib'?⁴¹¿Mi re' hat ti ye'wik kiwa' i nimaq taq tz'ok? ¿Mi re' hat ti ye'wik kiwa' re' i kok' kak'uun noq inkik'er kichii' chupahqaljiik i kiwa' weh i hin? inki.¹Re' i Dios je' wo' chik wili i xuq'or reh i Job: ¿Mi aweht'al i hat chib'ih q'ijil ki-aasjik i kak'uun ixoq kaprax wilkeeb' panch'ahn? ¿Mi awilom junriim-oq noq inaasjik i kak'uun ixoq keej?²¿Mi aweht'al jarub' poh inkihqaaj i kak'uun ixoq keej? ¿Mi aweht'al i hat chib'ih q'ijil ki-aasjik i kak'uun?³¿Mi aweht'al re' i hat chi nkik'on kiib' noq inaasjik? ¿Eh q'e' ti' ki-ik'ik noq inaasjik i kak'uun?⁴Noq kik'ihik kikoowjik noq inkik'ux i ch'ahn, eh kiooj ma' kisutinik ta chik cho ruuk' i kituut chi jumpech.

⁵¿Awach xye'wik reh chi b'ehik panch'ahn i b'uurux? ¿Awach xye'wik reh chi b'ehik chi ma' xta ilil reh?⁶Re' hin xin ye'wik reh chupaam i ye'aab' chiq yuuq' chupaam i ye'aab' ma' xta tik i nelik chuwach.⁷Re' b'uurux ma' raaj ta wihik ma' najt ta kuuk' i tinamit, ma' raaj ta chi neenkaajik.⁸Eh i rusik' ruwa' wataq yuuq', i rusik' taqe i ch'ahn re' ruuk' i rax wach.

⁹¿Mi neerub'an re' aakamaj i nimaq imas wakax, wilik paraxchee'? ¿Mi nee raaj wihik chupaam re' aakoraal?¹⁰¿Mi neerub'an re' chi neenab'ak' i perepik chee rij naah, eh nee nakoj chi b'anaj arado pana ye'aab' nee nak'am rub'eeh?¹¹¿Mi neenach'ik'aa' ak'ux chinaah re' xa ruum chi q'e' nim, eh wilik ransil? ¿Mi nee nayeew reh chi b'anarik aakamaj?¹²¿Mi neerub'an re' chi nee rusik' i wach taqe atik amu'uun, eh chi nee rumol chupaam i ye'aab' inamol wii'?

¹³¿Mi re' hat xat ye'wik re' taqe i ruholohaq xiik' i pavoreal taqe i ruxiik' i nimaq chikop Avestruz rub'ihnaal?¹⁴Re' Avestruz i rukanaa' taqe i rumiloj panak'al, reh chi re' ak'al inq'iximb'isanik keh¹⁵Eh ma' rukapaaj taj chi wilik nenik'ik yeq'woq paam taqe i rumiloj, oon chi wilik jino'q i chikop neenik'ik yeq'woq paam taqe i rumiloj.¹⁶Ma' ruk'ax ta taqe i rak'uun, je' cho ma' rak'uun i rub'an reh, ma' xta raaj reh atoob' ta ma' impoq' i rumiloj.¹⁷Ma' rureq ta chi riij i rub'an, ruum re' hin i Dios ma' xnuyeew ta runa'ojb'al.¹⁸Xa re' la' noq i nrupinik reje kow inooj xa rukaqse'laaj i kawáyu je' wo' hoq i iqlik chi riij ruum q'uun kib'ehik.

¹⁹¿Mi re' hat xat ye'wik ransil re' kawáyu? ¿Mi re' hat xat xoyinik reh re' ruuk' i chaamlaj rismaal wilik rij naah?²⁰¿Mi nee nayohb'isaj re' i kawáyu, reh chi neenpisk'anik chi je' jino'q nimlaj chili'l? Re' la' taqe i winaq kiyo'jik noq i ruk'er chii' i reh.²¹¿Kow riib' i ruk'ot aak'al xa raj chik ojik chi q'aq'inik ruum q'e' suq ruk'ux chi riij i ransil?²²Re' kawáyu ma' reht'al ta wach yo'jik xata inyo'jik k'isinoq noq inooj chi q'aq'inik kuuk' i wilik kiq'aslaj ch'ihch'.²³Atoob' ta xan tzilininik chik i q'aslaj ch'ihch' chinaah, atoob' ta xa nelik chik ruq'aq'al i q'as ju' ch'ihch', xama' inyo'jik ta wo' hoq.²⁴Eh xa ruk'ot chik ak'al ruum i rujosq'iil xama' awach ta chik impab'anik reh. Ma' xta raaj reh atoob' ta neenxuuljik chee tuun.²⁵Noq inxuuljik chee tuun i ruk'er chii' i rik'raaj chi naa ruwihiik q'aq'inik. Atoob' ta majaa' nooj chi q'aq'inik rib'iraj chi k'ahchi' chik chi taaq'anik i kajaaw soldado.

²⁶¿Mi ruum re' ana'ojb'al i hat Job inrupinik i k'uch? ¿Mi re' hat ti q'orik reh re' noq inooj reje pansak'aaj reh i rookb'aal i q'iij?²⁷¿Mi re' hat ti q'orik reh re' ixoq xihk noq i ruyejaa' i rusuuq chinaah taqe inajt kinaah ye'aab'?²⁸Re' i chikop re' re' ar impatinik chupaam i ruhopil i saq rehp, ar i ruko'leej riib' chupaam i ruhopil ab'aj.²⁹Eh ko ar taxaaj i rilow taqe chaloq i chikop noq i ruchop.³⁰Re' taqe i rak'uun re' rukik'eel taqe i chikop inkik'ux. Re' ixoq xihk re' re' aha' wilkeeb' i kamnaq ar wo' wilik, inki Dios.

¹Re' i Dios je' wo' chik wili i xuq'or reh i Job:

²¿Mi ruum chi wilik ana'ojb'al re' hat kinawech'uj i hin, hin Dios nim wajaawriik? Awach inwech'inik weh inchol ruchaq'weem i neenupahqaaj reh i hin, inki.

³Eh re' Job je' wili ruchaq'weesjiik i QaJaaw Dios xub'an:

⁴Re' hin ma' xta nuna'ojb'al chi q'orik awuuk'. Yu'naak ma' nee ta chik tinuwech'uj.⁵K'ihpech chik xinq'orik yu'naak ma' xta chik i naa nuq'orom, inki.⁶Re' QaJaaw Dios je' wili ruchaq'weesjiik i Job xub'an chaloq chupaam jinaj i kaq suut teew.

⁷Yu'naak cha yejaa' awiib' cha k'uhtaaj akowiil, neenachaq'weej weh inaa nupahqaam aweh⁸¿Mi naq'or re' hat chi ma' korik taj i nub'an? ¿Mi k'ahchi' akojom numahk re' hin reh chi neetikahnik chi ma' xta mahk i hat?⁹¿Mi xiik' naah re' awajaawriik i hat je' rukab' i hin? ¿Mi je' inq'orik kahoq re' aq'oral i hat, je' rukab' i hin?

¹⁰Wila' je' re' cha k'uhtaaj awajaawriik, cha k'uhtaaj aloq'il, je' wo' hoq holwochiil¹¹Eh cha k'uhtaaj aajosq'iil chikinaah i q'e' kow kiib', chawesaj i kajaawriik.¹²Chawesaj i runimaal kiwach, eh chasach kiwach i yiib' wach kina'ojb'al xa aha' pa' wilkeeb'.¹³Eh chamuq'aa' taqe ri'siak'al, cha taq'aaj taqe pan kiye'aab' i kamnaq.¹⁴Wila' xa a'n taqe i re', re' hin neenunimaj aweh chi xa ruuk' awajaawriik neenako'leej awiib'.

¹⁵Re' i nimlaj chikop hipopotamo rub'ihnaal k'im i ruk'ux, je' rukab' i wakax, re' hin xinyej-anik reh, je' rukab' noq xatnuyejaa' chee hat.¹⁶Re' chikop re' re' kow riib', yohb'aal wach i ransil.¹⁷Re' rujeeh xiik' naah kowiil, je' kowiil i chee' chakaltee', xarutoy chik riib' i paraa' ruum i ransil.¹⁸Re' taqe rub'aqil xa je' chik kowiil b'olob'ik laj q'an ch'ihch', re' taqe i wach'ehk je' kikowiil nimaq rooq ch'ihch'.

¹⁹Re' chikop re' re' nukamaj, wo' hoq xa re' wo' hin nee kinkansanik reh.²⁰Eh i ruk'ux wo' hoq i ch'ahn i nelik wataq yuuq' k'ixkaab'. Re' wilkeeb' wii' i josq'laj chikop.²¹Ar inhi'lik chi ri'sil i rumuuj taqe i chee', eh chupaam taqe i kaxlan-aaj wilkeeb' pantaq ch'uwa'.²²Eh i ruko'leej riib' chi ri'sil taqe chee' wilkeeb' chi' ha', je' wo' chi ri'sil taqe i nimaq ch'ahn.²³Noq ink'ihik i nim ha' xama' inyo'jik ta wo' hoq atoob' ta neemponik chii' ju' i ruchamiil i ha' xama' xta wo' raaj reh.²⁴¿Mi wilik jino'q i neerub'an ruchopariik noq ilooj i rub'an? ¿Mi wilik i neerub'an ruhopariik i ju'? inki Dios.¹Eh je' wo' chik wili i xuq'or reh i Job: ¿Mi neenachop re' i qamaan k'ap ruuk' i chopb'al kar? ¿Mi nenab'ak' re' i ju' ruuk' k'ahaam? Re' qamaan k'ap.²¿Mi neenab'ak i k'ahaam paruhopil ju'? ¿Mi neenahop i rukahkachi' ruuk' jino'q i loklok naah ch'ihch'?³¿Mi rupahqaaj rukuyb'al aweh reh chi nee naketelaaj wach? ¿Mi neerupahqaaj otob'il aweh ruuk' i q'uun laj q'orik?⁴¿Mi neerub'an re' chi nee ruyejaa' wach awuuk', reh chi neen kamanik awuuk' chi jumpech?⁵¿Mi neerub'an re' chi neena a'n ak'oniik ruuk' chi je' jino'q k'isa tz'ikin? ¿Mi neerub'an re' chi neenab'ak', nee nayeew chi kik'onaal i kok' xq'un?⁶¿Mi neerub'an re' chi neenkik'ayej i qamaan k'ap re' re' i k'ayen kar? ¿Mi neenkiyok' chi t'ohraal re' i rutib'kaal?⁷¿Mi neenayok' i rutz'uhmal i riij re' ruuk' kuchilo? ¿Mi neenahop paam i naah re' ruuk' q'as ju' ch'ihch' chopb'al kar?⁸Wila' re' hat xa tz'a'j i qamaam chikop re' re' nee rutoq'aa' peleto awuuk'. Re' hat ma' jaruuj chik naa atz'a'am ruum naa chik ayo'jiik ruum.⁹Eh awach neenilwik wach i qamaan k'ap re' re' neenq'ehb'ik wach ak'al ruum ruyo'jiik¹⁰Wila' awach xkaqrisanik i koq reh yohb'aal wach noq inchalik rujosq'iil, eh ma' awach taj i neeruko'leej riib' chuwach, je' wo' hin ma' awach ta wo' hoq i neeruko'leej riib' chi nuwach.¹¹¿Mi wilik ineenwech'inik weh i hin? Ma' awach taj ruum chu'nchel i wilik wach ak'al weh i hin.

¹²Re' hin ma' naa ta numayam ruq'orariik i qamaan k'ap re' re' ruum xiik' naah kowiil riib', je' wo' taqe i rooq xiik' naah kikowiil.¹³¿Mi wilik jino'q ineenesanik iloq reh i piim laj riij? ¿Mi wilik neenhopwik reh i kowlaj riij?¹⁴¿Mi wilik ineentehwik reh i chii'? Ruum re' reh xasaq k'arik chik taqe i reeh xatiyo'joq chik ruum.¹⁵Re' i ru tahsaal i riij xiik' naah kowiil, je' kowiil pulato ch'ihch' ko'lemb'al iib'.¹⁶Ruk'ulum kiib' chi korik i riij ni xata naq re' i teew inokik chupaam i riij.¹⁷Kichopom kiib' chi korik, kik'ulum kiib' i riij, ma' awach ta neench'aqwik reh i riij.¹⁸Eh noq inat'isrik i qamaan k'ap re' re' xa je' chik ruch'aab' i kahoq i ruxlaab'. Re' taqe inaq'wach xa je' chik rukab' i rusaqumaal inaq'wach i q'iij noq insaq'ik.¹⁹Eh panchii' i nelik chaloq i xaq q'aaq', i nelik wo' chaloq i ruk'oxb' q'aaq'.²⁰Eh i nelik chaloq i sib' panju', xa je' chik rukab' i sib' i nelik chaloq pan xun noq k'ahchi' ruroqrotiik.²¹Eh ruuk' i ruxlaab' i ruqop ruq'aq'al i naah wach q'aaq', eh i nelik chaloq i xaq q'aaq' panchii'.²²Yohb'aal wach i ransil i ralaq, chu'nchel kiyo'jik ruum.²³Eh chu'nchel i rutib'kaal xiik' naah kowiil, ma' awach ta neenhopwik reh, je' kowiil i ch'ihch' haab'isamaj.²⁴Re' i ránima xiik' naah kowiil je' kowiil ab'aj, je' kowiil i kaa' keeb'al.²⁵Eh chu'nchel i wilik kaansil kiyo'jik chuwach ruum xiik' naah kowiil riib'. Inkimol chi elik chuwach ruum kiyo'jiik.²⁶Eh ni xata q'aslaj ch'ihch', ni xata flecha, ni xata q'as ju' ch'ihch' neenhopwik reh i riij.²⁷Chi ree qamaan k'ap xama' xta nokik wii' i ch'ihch', xa je' rukab' i k'im chi reh, eh chi ree q'an ch'ihch' xa je' rukab' i q'aah laj chee'.²⁸Eh noq neenkutarik chi flecha xama' nee ta wo' inyo'jik, noq neenkutarik chi ab'aj, chi ree reh xa je' neenkutarik chi k'im.²⁹Chu'nchel ineenkutarik wii' xama' xta nokik wii' chi ree reh xa je' chiq sohk' chi reh.³⁰Eh re' wach paam xiik' naah q'asiil, i ruk'ot ak'al noq i rujukej riib' xa je' chik rukab' i rub'an i q'as reeh ch'ihch'.³¹Eh i rutukej wach i ruchamiil i palaw xa je' chik rukab' noq inroqrotik i nimlaj xun noq inchaq' ink'ohnik laj iq'oom chupaam.³²Noq inik'ik paruchamiil i palaw xasaq chik wach i rupuuh i rukanaa', xan worwotik chik xa je' chik saq laj nahis.³³Re' qamaan k'ap ma' xta chik jino'q chikop chi je' rukab' i reh ma' inyo'jik ta k'isinoq xatiyo'joq chik ruum.³⁴Eh wilik rajaawriik chikiwach chu'nchel i chikop. Eh i ruk'uhtaaj kik'ixb'ilaal chu'nchel, ruum xa re' wo' reh kow riib', inki i Dios. Re' Dios xukuxisaj wo' chik chee Job

¹Re' Job je' wili ruchaq'weesjiik i QaJaaw Dios xub'an:

²QaJaaw Dios, re' hin weht'al chi chu'nchel i na a'n rub'aan, eh ma' xtaj i kapeb'al ke'lik chawach.³¿Mi wilik wajaawriik re' hin chi nuwech'uj riij taqe i na a'n? Re' hin xnuwech'uj riij ruum ma' xta nuna'ojb'al, kinq'orik naq chi riij taqe i ma' nureq ta chi riij. Xinq'orik chi riij i sachb'al k'uxliis i na a'n, re' i ma' inureq ta chi riij i hin.⁴Re' hat xaq'or weh chi naab'iram i naa aq'orom weh. Eh chi naa nuchaq'weem aweh i naa apahqaam weh.⁵Re' hin xanb'iraj naq rib'iral awajaawriik, eh yu'naak, je' naa xwilow awach i hat ruuk' naq'nuwach.⁶Je' re' noq re' hin yu'naak i nuyot' i nuk'ux chi riij i xnuq'or, inutz'unaa' wiib' pan pooq, pan chaaj, inki Job.

⁷Noq re' i QaJaaw Dios xukohlaaj i q'orik ruuk' i Job, xuq'oreej i Elifaz aj ar Temán, je' wili xuq'or reh: Re' hin k'ahchi' i nujosq'iil cha naah i hat je' wo' chikinaah i kiib' chi awamigo, ruum ma' xaq'or ta taq i korik chi wiij je' rukab' i xuq'or chi wiij i Job, i waj kamanoom.⁸Yu'naak taq i hat wuquub' chi kok' imas wakax, wuquub' imas tentzun, chak'am taq reje reh i Job neeruq'asaj chi k'atoj mayiij taq chawiij i neerub'an rutiij taq chawiij. Eh re' hin neenb'iraj i rutiij, eh ma' xta taq neetiwuchej. Atoob' ta ruk'ul wo' naq chi nee taq tinuyeew chi tojariik aamahk, ruum ma' xaq'or ta taq i korik chi wiij je' rukab' i xuq'or i Job waj kamanoom, inki.

⁹Eh re' i Elifaz aj ar Temán, i Bildad aj ar Sua, eh i Zofar ar Naamat, xponik wo' kian i xq'orarik keh ruum i QaJaaw. Re' QaJaaw xrib'iraj wo' hoq i rutiij i Job. Re' QaJaaw Dios xuyeew wo' chik q'ab' chi xwihik chib'ih reh i Job

¹⁰Eh noq rub'anam chik rutiij i Job chikiij taqe ixib' chi ramigo. Re' QaJaaw xresaj i ti' k'axik chinaah i Job, eh nik' naq k'ihaal i chib'ih reh wilik pampeet, kiib' chik chi je' re' k'ihaal i xye'arik reh chi jilow ruum i Dios.¹¹Eh chu'nchel i ras ruchaaq' i Job chi winaq chi ixoq xi chalik chi rilariik, xi chalik taqe i ramigo xi wihik cho pampeet. Xkian kininq'iij, xkian kiwa' kihaa' parupaat i Job. Eh xkiyeew rukowiil ruk'ux ruum xik'ik panti' k'axik re' xye'arik chinaah ruum i QaJaaw Dios. Eh chi kiju'junaal i re' xkisiij rutumiin i Job, xkisiij ju'jun rulopq'aaq' re' ruuk' i oro.

¹²Re' i QaJaaw Dios ma' k'isiin ta xukuxisaj i Job, ruum xiik' chik naah k'ihaal i chib'ih reh xuyeew chuwach i pampeet. Xuyeew kab'laj miil i rutentzuun, waqiib' miil i rucameyo, jinaj miil k'uhl i rub'oyaax, jinaj miil i rub'uuruux.¹³Eh xye'arik wuquub' i rak'uun, eh ixib' i rixq'uun.¹⁴Re' i peet rixq'uun Jemima i rub'ihnaal xukoj, re' i rukab' Cesia i rub'ihnaal xukoj, re' roox Kere-ahapuc i rub'ihnaal xukoj.¹⁵Re' taqe ixib' chi rixq'uun i Job xa re' wo' keh xiik' naah kiholwochiil chinaah chu'nchel i wach ak'al. Eh xsiijik chib'ih keh ruum i kajaaw ruch'ihil taqe i kas, i kichaaq' winaq.

¹⁶Eh chi riij taqe re', re' Job ko jinaj siento ruuk' ka'winaq haab' chik xk'acharik, koxrilow kiwach taqe i riih rumaam, je' wo' taqe i xikin riih.¹⁷Re' Job xti mama' winaq chik, eh k'ih chik i ruhab'ul noq xkimik reje.

Bible Society in Guatemala

https://app.library.bible/content/695aa4b9f902778f