Read SALMOS 1

SALMOS1

¹Atoob' reh awach i ma' runimaj taj i kitaqchi' taqe i yiib' wach i kina'ojb'al, ni xata ruk'am naah inki a'n taqe i aj mahk, eh ma' ntzuhnik ta chi kixilak i kikaqse'lanik ree Dios.²Ruuk' la' i ruk'uhb'aal i QaJaaw Dios i ruyeew ruk'ux, eh re' i re' i rutijej riij chi q'iij chi aq'ab'.³Eh re' imb'anik reh i re', je' rukab' i chee' tikooj chi chii' jino'q i rooq ha'. Manlik paruq'ijil inwachinik, ma' jaruuj inchiqik i xaq. Eh chu'nchel i rub'an i nelik korik chuwach.

⁴Raaj taqe i yiib' wach kina'ojb'al keh insahchik kiwach. Xa je' kikab' i rutuus ixiim, jumehq'iil inkutarik reje wulu' ruum i teew.⁵Ruum aj re', re' taqe i yiib' wach kina'ojb'al ma' naa ta kehtriik i ruk'axb'al i Dios na' b'anroq i q'ataj q'orik. Eh ma' naa ta kiwihiik chi kixilak i korik wach kik'ux,

⁶ruum re' taqe korik wach kik'ux re' QaJaaw Dios intoob'inik keh ruuk' inki a'n Eh re' inki a'n taqe yiib' wach kina'ojb'al naa rojiik sahchoq wach. Re' taaq'anik naa rub'anam i Reey rusik'im wach i QaJaaw Dios¹¿Chib'ih reet noq yohb'aal wach i kijosq'iil i tinamit? ¿Chib'ih reet noq inkiyejaa' wach rub'aan i xama' xta ruk'am chaloq?²Re' taqe i reey, taqe i aj taaq'oom wilkeeb' wach ak'al inkija' wachej i QaJaaw Dios, eh inkimol kiib' chub'anariik i re' ma' re' chi riij i rukuxisam, rusik'im cho wach.³Eh kow inkiq'or chi je' wili: Qa a'n reh, qesaj i rajaawriik qoh rutaq'aaj wii', qesaj qiib' pan q'ab', inki taqe.

⁴Xanaah re' i QaJaaw Dios wilik chi Reyil pan taxaaj xa ruse'laaj chaloq inkiq'or.⁵Re' reh xuyohb'isaj taqe, ruuk' ruk'aah eh panaqaaw xuq'or keh chi je' wili:⁶Re' hin xin sik'wik wach i nuReey, eh xnukoj chi Reyil chinaah i yuuq' Sión chupaam i nuSantolaj Ye'aab', inki.

⁷Re' Reey paab'amaj, je' wili xuq'or: Re' hin naa nuq'orom rib'iral i xuk'ul ruk'ux i QaJaaw Dios, re' xq'orik weh chi je' wili: Re' hat, hat wak'uun, eh re' hin xin ye'wik aak'achariik yu'naak.⁸Chapahqaaj weh i nimaq tinamit neenuyeew aweh chi akooch. Nee nuq'asaj panaq'ab' chu'nchel i junsuut i wach ak'al.⁹Re' hat je' naa karote ch'ihch' i naa ruwihiik panaq'ab' noq naa awihiik chi taaq'anik chikinaah taqe i reey. Eh je' kixerariik ak'al xun naa a'nam taqe, inki.

¹⁰Re' taq i hat wilkaat taq chi reyil, je' wo' taq i hat, i hat taq aj taaq'oom, chareq taq chi riij taqe wili. Chatijej taq chi korik i naa nuq'orom taq aweh.¹¹Chayohleej taq wach i QaJaaw Dios. Eh cha a'n taq i rukamaj chi suq suq taq ak'ux.¹²Chayeew taq ruloq'il i Ak'uunb'ees, reh chi ma' nee ta nchalik ruk'aah, eh ma' nee ta taq tikimik na'chub'an. Chawik'raaj taq manqop wach i rujosq'iil taq cha naah.
Atoob' keh i ruuk' Ak'uunb'ees inkiyeew i kik'ux. Re' tiij xub'an i reey David pahqb'al reh i rotob'il i QaJaaw Dios¹WaJaaw nuDios, ma' k'isiin taqe i ki-ixowanik nuwach. Eh ma' k'isiin taqe inkaaj kianam ti' k'axik weh.²Ma' k'isiin taqe i je' wili inkiq'or chi wiij: Re' reh ma' jaruuj naa rukoljiik ruum i Dios, inki taqe.

³Raaj i hat, waJaaw nuDios, re' hat ti ko'linik weh chi nujunsuut. Re' hat ti ye'wik nuloq'il, re' hat ti ye'wik rukowiil nuk'ux.⁴Eh re' hin kow i nupahqaaj i rotob'il i QaJaaw Dios. Eh re' reh kiruchaq'weej wo' chaloq parusantolaj Ye'aab'.

⁵Re' hin kinyohkik, kinwirik, kinwuktik wo' chik chi suq nuk'ux, ruum re' i QaJaaw Dios intoob'inik weh.⁶Je' re' noq, re' hin ma' nee ta kinkiyohb'isaj atoob' ta wilik lajeeb'-oq miil neenkisutej wiij reh i nukanteesjiik.

⁷Hat waJaaw nuDios, ti chaloq tii wuuk'. Kink'oloq ako'leej. Re' hat je' naa neenasak' i panaq'kiwach i ki-ixowanik nuwach. Eh je' naa neenapaxej i wachkehi yiib' wach kina'ojb'al.

⁸WaJaaw nuDios, re' hat ti ye'wik cho reh i ko'lemb'al iib'. Je' re' noq qoh atoob'eej i hoj, hoj aatinamiit. Re' reey David xupahqaaj parutiij chi tob'joq ruum i Dios¹WaJaaw nuDios, waj ko'loom, kinachaq'weej tii chaloq noq neetinuq'o'reej, ruum xa re' wo' hat ti esanik weh chupaam i ruti'kiil nuk'ux. Je' re' noq, chaketelaaj nuwach, chab'iraj tii weh i nutiij.

²Raaj taq i hat, nimaq wach ana'ojb'al i na a'n taq awiib'. ¿Kojaruuj taq inakanaa' rub'ajariik i nuloq'il? Eh ¿Kojaruuj taq inakanaa' rusik'ariik i xama' xta nokik wii', re' i xama' korik ta wo' hoq?³Eh re' taq i hat chanab'eej taq chi re' hin xusik' cho nuwach i Dios, ruum korik wach nuk'ux. Eh kirib'iraj wo' noq i nupahqaaj i rotob'il.

⁴Tiyo'joq taq cha kanaa' taq i mahk. Eh noq k'ahchi' taq kaat chi hi'lik wach ayokaab', cha kapaaj taq riij nik' taq wach noq wilkaat.⁵Eh xti chaq'asaj taq awiib' chi korik laj mayiij reh i QaJaaw Dios, eh chayeew taq ak'ux ruuk'.

⁶Eh ma' k'isiin i kiq'orik reh chi je' wili: ¿Awach naa ruye'wiik qeh i suq kiil k'uxliis? waJaaw nuDios, suq tii qilariik cha a'n, inki taqe.⁷Re' hin weht'al chi re' hat ti ye'wik runimaal suq kiil i wánima, ma' xata je' rukab' i rusuqkiil kik'ux i xa eliik wilik k'uxumb'al keh.

⁸WaJaaw nuDios, re' hin kinyohkik, eh kinwirik chi suq nuk'ux, ruum re' hat ti ye'wik rukowiil nuk'ux panuk'achariik. Re' reey David xupahqaaj parutiij chi naa rutoob'jiik ruum i Dios¹WaJaaw nuDios, cha kuy chab'iraj tii weh i nutiij. Chayeew tii weh i nupahqaaj ruuk' oq'ik.²Neeta tii nab'iraj i nupahqaaj aweh ruuk' nuchii', ruum re' hat, hat nuReey, eh hat nuDios, xa re' wo' hat tinuq'o'reej panutiij.³WaJaaw nuDios, re' hin kowahq'eq i nupahqaaj aweh panutiij chib'ih inwaaj, eh kinab'iraj wo' hoq. Eh re' hin kinokik chi ruyub'jiik.

⁴NuDios, re' hat ma' nawaaj ta wach i yiib' wach na'ojb'al. Je' re' noq, re' taqe i yiib' wach kib'anik ma' jaruuj naa aye'em kiye'aab' awuuk',⁵eh ni xata mponik chawach i nimaq kiwach inki a'n kiib'. Ma' nawaaj ta kiwach i ma' holohik ta kib'anik.⁶Re' hat inasach kiwach i chukul q'orik. Eh ma' nawaaj ta kiwach i ma' korik ta kiq'orik, je' wo' taqe i kansan kas kichaaq'.

⁷Eh re' hin, xa ruum chi ma' k'isiin ta xaketelaaj nuwach naawokiik chupaam aSantolaj Paat. Eh ar naa kaat nuloq'em ruuk' i ruyohljiik awach.⁸WaJaaw nuDios, chak'am nub'eeh ruuk' i korik, reh chi ma' xta neekinkuchej i ki-ixowanik nuwach, eh kinak'am chupaam i korik laj b'eeh.

⁹Re' keh ma' korik ta kiq'orik, nujinaq chi yiib' wach na'ojb'al paam i kánima. Eh re' q'orik i nelik cho pan kalaq je' chuhkiil i kamnaq ma' tz'aplik ta naah i rujuleel, eh aj chukul q'orik taqe.¹⁰QaJaaw Dios, chayeew taqe chutojariik i kimahk. Eh maayeew q'ab' keh chi nee kielik korik. Eh chaq'eb' taqe chi riij ak'ux ruum i kimahk, ruum chi xatkiq'eb' wo' chi riij kik'ux i keh.

¹¹Eh re' taqe inkisik' ko'lemb'al kiib' awuuk' chayeew rusuqkiil kik'ux. Juneliik kitz'uyinik, ruum re' hat titoob'inik keh. Re' kik'axwik aweh insuuqb'ik kik'ux awuum i hat.¹²WaJaaw nuDios, chatoob'eej tii i korik wach ruk'ux. Eh je'-oq jino'q nimlaj pulato ch'ihch' chako'leej wii' ruuk' ak'axb'al. Re' reey David xupahqaaj i rotob'il i Dios noq wilik panti' k'axik¹WaJaaw nuDios, makinanaq noq k'ahchi' aajosq'iil, makinayeew panti' k'axik ruum aajosq'iil.²Chaketelaaj la' tii nuwach, ruum re' hin xama' xta chik rukowiil nuti'jolal, xa nb'arb'otik chik ruum yab'ilaal. Jaaw, kinak'achrisaj tii weh.³Je' wo' hoq i wánima xiik' naah ti'kiil wilik. QaJaaw Dios, ¿Kojaruuj kinawesaj chupaam i wili?

⁴QaJaaw Dios chaketelaaj tii nuwach, chako'leej i wánima, eh chako'leej riij i nuk'achariik,⁵ruum re' i kamnaq, ma' nee ta chik tik'ulik paruk'ux. Eh re' muqlik chik parujuul ma' nee ta chik i ruyeew aloq'il.

⁶Re' hin xinq'uhtik chi oq'ik ruum rajlaal aq'ab' k'ahchi' kiin chi ma' k'isa oq'ik. Eh intz'aqik i nuch'itnah ruum i riis naq'nuwach.⁷Re' i ti' wilkiin wii' i ruq'equmrisaj paam i naq'nuwach. Re' i ti' k'ahchi' nuk'ulum, kuum taqe i ki-ixowanik nuwach.

⁸Re' taq i hat, i tib'anik taq reh i yiib' wach na'ojb'al, cha kanaa' taq nujot'ariik, ruum re' QaJaaw xrib'iraj chik weh i nupahqaaj reh ruuk' oq'ik.⁹Re' QaJaaw Dios xrib'iraj chik i xnupahqaaj reh, xuk'ul chik weh i nutiij.¹⁰Yu'naak taqe i ki-ixowanik nuwach yohb'aal wach i kiyo'jiik, xa se'lb'al naa kikahniik wii'. Eh ruum kik'ixiik naakimolom chi elik chi jumehq'iil. Re' reey David xupahqaaj parutiij chi re' Dios naa ruq'atwiik i q'orik¹WaJaaw nuDios, awuuk' i hat nuye'em nuk'ux. Kinako'leej chikiwach chu'nchel i ki-ixowanik nuwach.²Ma' inwaaj tee hin chi neenkixereb'eej i nuti'jolal je' rukab' i rub'an i kaq b'ahlam reh i rutiib'. Ruum aj re', inwaaj chi nee kinako'leej i hat.

³WaJaaw nuDios, wila' ma' holohik i k'ahchi' kiin, wila' ma' holohik i nuna'ojb'al,⁴eh xnub'an oon i ti' k'axik keh i wamigo. Eh re' taqe i ki-ixowanik nuwach ma' nik' ta xnub'an ti' k'axik keh chi ma' xta rub'ehel.⁵Eh wila' yiib' wach i nuna'ojb'al, neerub'an chi nee kinkichop taqe i ki-ixowanik nuwach nee kinkiqerej wach ak'al. Eh neerub'an chi neenkiyeq' panak'al i runimaal nuwach.

⁶WaJaaw nuDios, cha k'uhtaaj aajosq'iil keh i yohb'aal wach i kijosq'iil chi nunaah. Ruum re' hat i q'atal q'orik, eh inwaaj chi neena a'n otob'il weh.⁷Chamol kiwach chu'nchel i tinamit. Chak'uhtaaj i runimaal awajaawriik chikinaah.⁸WaJaaw nuDios, re' hat ti q'atwik q'orik chikinaah i tinamit. Re' hat aweht'al chi re' hin korik wach nuk'ux, k'oloq panak'ux chi ma' xta numahk.⁹Jaaw, re' hat korik wach ak'ux, eh aweht'al chib'ih i wilik cho paránima, parukapeb'aal i ju'jun. Eh chasach wach inki a'n i yiib' wach kina'ojb'al. Eh re' i ma' xta ru mahk chawach, chatoob'eej.

¹⁰Re' inko'linik wee hin re' Dios nim rajaawriik, eh re' wo' inko'linik keh i korik wach i kánima.¹¹Re' Dios parub'ehel inq'atwik q'orik. Eh juneliik i ruq'at q'orik chikinaah i yiib' wach kina'ojb'al.¹²Wila' ma' xkiyot' i kik'ux chi riij i kimahk. Re' Dios naa rujuk'um ruch'ihch', ruyejaam chik i ru flecha.¹³Re' Dios ruyejaam chik choo wach i rukanteesb'aal. Eh ruuk' flecha qoplik ruq'aq'al k'ahchi' choo kitz'ehtjiik.

¹⁴Re' i yiib' wach imb'anik, ti' wilik, ruum xa re' yiib' wach na'ojb'al hamlik cho paránima. Eh xa re' i chukuj q'orik i nelik choo panchii'.¹⁵Re' reh naa ruk'otom jino'q i chaamlaj jul, eh chupaam i re' naa ruq'ehb'iik.¹⁶Re' yiib' wach na'ojb'al i rub'an, ruch'ihil taqe ti' k'axik i rub'an keh i tokoom, wach naah i reh naa rusutiniik.

¹⁷Re' hin nuyeew ruloq'il i QaJaaw Dios ruum parub'ehel inq'atwik q'orik. Naa nutz'uyem wach i QaJaaw Dios wilik cho pan taxaaj. Re' ruloq'il i Dios, eh re' runimaal wach i winaq¹WaJaaw nuDios, xiik' naah loq'il aab'ihnaal chi junsuut i wach ak'al.
Eh xayeew wo' aaloq'il chikinaah chu'nchel i wilkeeb' pan taxaaj.²Ruuk' i kitz'uuy i komanaan, eh ruuk' i kitz'uuy koch'uch' inki a'n naa rutz'uyjiik nuwach, reh chi neentz'ahpik kichii' i ki-ixowanik awach, taqe inkaaj kianam i ti' k'axik aweh.

³Eh noq inwilow johtoq i taxaaj xayejaa' cho ruuk' aq'ab', je' wo' poh, ruch'ihil taqe ch'umiil xayejaa' chaloq,⁴je' wili nuq'or: ¿Chib'ih rajaawriik i winaq xasahchik wach reh chi naaketelaaj wach? Eh, ¿Chib'ih reet noq ink'ulik cho panak'ux, eh ti' inawik'raaj?

⁵Eh xama' najt taj xaqasaj wach i rajaawriik i winaq chuwach i kajaawriik taqe ánjel. Chi riij i re', xayeew wo' chik runimaal wach, xayeew ruloq'il.⁶Xayeew wo' rajaawriik chikinaah chu'nchel ayejaam taqe chaloq ruuk' aaq'ab'. Eh re' hat chu'nchel xayeew chi ri'sil i rajaawriik,⁷re' taqe wili: tentzun, b'ooyax, chu'nchel taqe re', je' wo' taqe xa chib'ih chopkaal wilkeeb' pantaq ch'ahn.⁸Je' wo' taqe i chikop kirupinik pan taxaaj, taqe i kar wilkeeb' chupaam i palaw, eh chu'nchel i chikop wilkeeb' chupaam, xayeew chi ri'sil i rajaawriik i winaq.

⁹WaJaaw nuDios, ehchan qeh, xiik' naah loq'il aab'ihnaal chi junsuut i wach ak'al. Re' reey David xut'iosej reh i Dios, ruum parub'ehel xub'an i q'ataj q'orik¹WaJaaw nuDios, naa kaat nuloq'em chu'nchel i wánima. Eh naa nupuhkaam ruq'orariik taqe i xa a'n ruuk' i runimaal awajaawriik.²Awuum i hat naa nuk'erem nuchii' ruum rusuqkiil nuk'ux, naa wo' nutz'uyiniik panab'ihnaal QaJaaw Dios.

³Re' taqe ki-ixowanik nuwach xi elik chikiij awuum i hat, eh xasach kiwach.⁴Re' hat k'ahchi' kiin awuy-eem ruuk' i ruk'ul chi weh. Eh xatzunaa' awiib' chupaam i loq'laj aye'aab' chuq'atariik q'orik parub'ehel.

⁵Re' hat xatq'ilwik keh i ma' kinimanik taa weh. Eh xasach kiwach i kib'anik reh i yiib' wach na'ojb'al, xajux i kib'ihnaal chi jumpech.⁶Eh re' taqe i ki-ixowanik qawach, re' hat xatsachwik kiwach. Xasach wo' wach i kitinamiit, ni xata chik naa ruq'orariik kib'iral.⁷Eh re' i QaJaaw Dios wilik rajaawriik chi juneliik, eh xutzunaa' chik riib' paruloq'laj Ye'aab' chuq'atariik i q'orik.⁸Re' reh parub'ehel naa ruq'atam i q'orik chikinaah i tinamit, je' wo' chikinaah i kok' tinamit.

⁹Re' QaJaaw Dios inko'linik keh i neb'aa'. Re' reh inko'linik keh nik' inchalik ti' k'axik chikinaah.¹⁰WaJaaw nuDios, nik' nimaal taqe i kinimanik aweh, awuuk' i hat ch'iklik kik'ux, ruum re' hat ma' jaruuj inakanaa' kitoob'jiik i kisik'wik aweh.

¹¹Chatz'uyej taq wach i QaJaaw Dios wilik chupaam i Ye'aab' Sión. Chapuhkaaj taq ruq'orariik pantaq tinamit taqe i xub'an.¹²Re' QaJaaw Dios i ruketelaaj kiwach i wilkeeb' panti' k'axik. Eh i ruyeew keh inkipahqaaj reh. Eh i ruyeew taqe chutojariik i kimahk i kib'anik ti' k'axik keh.

¹³WaJaaw nuDios, chaketelaaj tii nuwach, kinawil, ruum ma' k'isiin ta nkitib'isaj nuk'ux i ki-ixowanik nuwach. Eh kinako'leej chuwach i kimik.¹⁴Chi je' re', neenuq'or keh i aj Jerusaleem chi ruk'ul chi naa alooq'jiik. Eh neenuq'or chi suq nuk'ux, ruum hat xat ko'linik weh.

¹⁵Re' taqe tinamit ma' kinimanik ta aweh, xkik'ot i chaamlaj jul, xkiyejaa' i xirob', xa re' wo' keh xiq'ehb'ik chupaam.¹⁶Re' QaJaaw Dios xuk'uhtaaj i rukorkiil wach ruk'ux ruuk' i q'ataj q'orik xub'an. Re' taqe i runimaal aj mahk xa nkikoj kixirob' chi kib'il kiib'.

¹⁷Re' i yiib' wach kina'ojb'al, insahchik pankik'ux i Dios, naa rusachariik kiwach, naakiye'ariik paruye'aab' kamnaq ruum i Dios.

¹⁸Re' taqe k'axik wilkeeb' ma' naa ta rusahchiik paruk'ux i Dios. Eh ma' naa ta wo' rusahchiik wach i ch'iklik reje wii' kik'ux.

¹⁹WaJaaw nuDios, cha k'uhtaaj awajaawriik, maayeew q'ab' chi neenkiq'at awach i xa winaq. Chaq'at la' q'orik chikinaah i tinamit.²⁰WaJaaw nuDios, chayohb'isaj taqe, reh chi neenkireq chi riij chi ma' xta kajaawriik, xa winaq taqe. Re' tiij xub'an i reey David ree rupahqaljiik i rotob'il i Dios¹WaJaaw nuDios, ¿Chib'ih reet noq najt wilkaat wuuk', eh naakeb'aa' awiib' chi nuwach noq wilkiin panti' k'axik?

²Re' i yiib' wach runa'ojb'al, yohb'aal wach i rujosq'iil noq rujot' i neb'aa'. Xa re' la', xa re' wo' reh naa ruq'ehb'iik chupaam i ruyejaam wach.³Re' i yiib' wach runa'ojb'al, yohb'aal wach i rub'an riib' ruuk' i ruk'ax wach rub'aan. Eh ruum i ruk'axariik wach i xa chib'ih jariik i rixowaaj wach i QaJaaw Dios.⁴Re' yiib' wach runa'ojb'al xa runimb'isaj chik riib'. Ma' rukapaaj ta rusik'ariik i Dios, ma' xta Dios parukapeb'aal.⁵Eh xa re' i yiib' wach na'ojb'al i rub'an, ma' runimaj taj chi re' hat tib'anik i q'ataj q'orik. Eh chu'nchel i ma' naajwanik ta wach, i ruq'eb' taqe chi riij ruk'ux.⁶Eh i ruq'or paránima chi ma' jaruuj naa ruq'ehb'iik, eh chi ma' jaruuj naa ruwihiik ruk'axkiil.⁷Re' reh xa re' i ma' tob'laj q'orik i nelik cho panchii', chukuj q'orik, b'ajooj taqe. Xa re' i ti'laj q'orik i ruq'or, ma' holohik ta k'isinoq inq'orik.⁸Xa rusik' chik ruye'aab', xa panke'lik i rukansaj taqe i ma' xta kimahk patim taqe panab'iix. Eh ma' ruketelaaj ta kiwach i ma' kichol ta ruko'ljiik kiib'.⁹Re' reh i rub'an je' rukab' i rub'an i kaq b'ahlam, i rukeb'aa' riib' chi ruchopariik awach iraaj ruchopom. Eh noq ki-ik'ik chuwach, i rukut riib' chinaah inkahnik pan q'ab'.¹⁰Re' reh xa rupach'aa' chik riib' noq i rutik'aa' jot'ooj. Eh ma' k'isiin taqe i ma' nkian ta ruko'ljiik kiib' kiq'ehb'ik pan q'ab'.¹¹Eh i rukapaaj chi re' Dios sahchinaq taqe paruk'ux, eh chi ma' rilom ta taqe ma' inki a'n ta ruko'ljiik kiib'.¹²WaJaaw nuDios, chayeew aq'ab' chikinaah i ti' wilkeeb'. Mansahchik taqe panak'ux.¹³WaJaaw nuDios, ¿Chib'ih reet noq xa ti rukaqse'laaj i yiib' wach runa'ojb'al? Irukapaaj i reh chi ma' jaruuj q'iij naa apahqaam reh chib'ih i xub'an.

¹⁴Re' hat inawilow i rub'an, re' hat nee ti ye'wik jilow reh. Ruum xa re' wo' hat neetiko'linik keh i ma' nkian ta ruko'ljiik kiib', je' wo' taqe i ma' xta kituut kajaaw.

¹⁵Chawesaj i rajaawriik imb'anik reh i yiib' wach na'ojb'al. Chayeew chutojariik i ru mahk, korehtaal i rutoj wach chu'nchel i rub'an.¹⁶Re' QaJaaw Dios, Reey chi juneliik, re' i ma' kinimanik ta reh naa resam taqe reje chi kixilak i rutinamiit.

¹⁷WaJaaw nuDios, re' hat inab'iraj i kitiij i ma' nimaq ta kiwach, eh i nayeew keh inkipahqaaj aweh. Eh nayeew rukowiil kik'ux.¹⁸Eh chatoob'eej taqe i ma' xta kituut kajaaw, je' wo' taqe i k'ahchi' kik'teesjiik chi ti' k'axik, reh chi re' yiib' wach runa'ojb'al nee rukanaa' i jot'ooj, ruum xa winaq wo' hoq. Re' reey xti xuyeew ruk'ux ruuk' i QaJaaw¹Re' hin re' i QaJaaw Dios inko'linik weh, xama' xta nkih chi neenkiq'or weh: Hiy chakeb'aa' awiib' ju' taq yuuq' je' akab' chikop inrupinik.²Re' taqe yiib' wach kina'ojb'al xa nkikoj chik chaloq i q'as ju' kanteesb'al chupaam i ruk'ahamil i kiflecha. Eh xa panke'lik inkikansaj i korik wach kik'ux.³Eh na' ohoq sahchoq wach i raa' ri'sil i k'uhb'aal, ¿Chib'ih chik naa rub'anam i korik wach ruk'ux? inki taqe.

⁴Xanaah re', re' keh ma' nkikoj taj rehtaal chi re' Dios xa wilik wo' chaloq parusantolaj ye'aab'. Ar wilik chi taaq'anik pan taxaaj, eh i rilow chaloq chib'ih i rub'an i ju'jun.⁵Re' QaJaaw Dios i rucha'jeej i korik wach ruk'ux. Eh re' imb'anik reh i yiib' wach na'ojb'al, imb'anik reh i ti' k'axik, ma' raaj ta wach.⁶Eh naa ruye'em i ti' k'axik chikinaah i yiib' wach kina'ojb'al, naakik'ahtiik ruuk' asufre. Eh naa ruye'em i tz'a'laj teew k'atb'al keh chi tojb'al kimahk.⁷Re' QaJaaw Dios korik wach ruk'ux, imponik chuwach i korik. Ruum aj re', re' korik wach ruk'ux naa rilom wach ruuk' naq'wach. Re' reey David xupahqaaj i rotob'il i Dios¹WaJaaw nuDios, qoh ako'leej, ruum ma' jino'q chik i korik wach rik'ux chi nimanik. Eh ma' awach ta chik jino'q i korik inq'orik.²Xak'ul chik inkichuk i q'orik chikiwach, re' inkiq'or xak'ul inki a'n kiwach ruuk'. Xa ma' xta rub'ehel kiq'orik.

³WaJaaw nuDios, chasach kiwach i xak'ul inki a'n kiwach, re' taqe i nimaq kiwach inki a'n kiib',⁴re' taqe i kiq'orik reh chi je' wili: Re' hoj qohchol q'orik chi qib'il qiib', ruuk' qachii' neenqako'leej qiib'. Eh ma' awach ta neenq'ilwik qeh, inki taqe.

⁵Re' QaJaaw Dios je' wili xuq'or: Re' taqe ma' xta rukowiil kik'ux k'ahchi' kik'teesjiik chi ti' k'axik. Re' taqe i k'axik wilkeeb' inkik'er kichii' chi oq'ik ruum aj re', re' hin naa nutob'eem taqe je' rukab' i ruk'ul chi keh, inki.⁶Re' ruq'oral i QaJaaw Dios xti korik, eh saq wach. Je' rukab' i plata saq wach, wuquub' pech saqb'isamaj wach pan q'aaq'.

⁷WaJaaw nuDios, re' hat neeticha'jinik qeh chi juneliik. Eh nee qoh ako'leej chikiwach i tinamit yiib' wach i kina'ojb'al,⁸ruum re' keh xak'ul chik kiooj chi jot'ooj. Eh chu'nchel i tinamit kiye'wik runimaal wach i kiyiib' wach na'ojb'al. Re' reey David xupahqaaj i rotob'il i Dios noq wilik panti' k'axik¹WaJaaw nuDios, ¿Ko jaruuj kink'ulik cho panak'ux? ¿Mi xinsahchik panak'ux chi jumpech re'? ¿Nik' chik najtiil naa kaat wuy-eem chi nee kinatoob'eej?²¿Ko nik' chik najtiil naa rutib'iik i wánima ruum i ti' k'axik k'ahchi' nuk'ulum? ¿Kojaruuj i numay chi ntz'irik nuwach eqal eqal? Eh ¿kojaruuj kinako'leej pan q'ab' inixowanik nuwach?

³Wajaaw nuDios, kinawilow, kinab'iraj tii. Chasaquumb'isaj paam i naq'nuwach, reh chi ma' nee ta nchalik i kimik chi nunaah.⁴Reh chi re' inixowanik nuwach, ma' nee ta ruq'or chi xub'an weh. Reh chi ma' nee ta wo' insuuqb'ik kik'ux taqe i ruk'u'liil inixowanik nuwach.

⁵WaJaaw nuDios, re' hin ch'iklik nuk'ux chi naa aketelaam cho nuwach. Naa rusuuqb'iik i wánima, ruum re' hat naa ako'liniik weh.⁶Re' hin naa nutz'uyem awach, Jaaw, ruum xayeew cho weh chi manlik aawotob'il. Re' i yiib' wach na'ojb'al inki a'n i ma' kinimanik ta ree Dios¹Re' taqe i ma' kinimanik taj inkiq'or chi ma' xta Dios. Chi kunchelaal xkiq'eb' kiib', xa re' chik i yiib' wach inki a'n Ma' awach ta jino'q i korik wach ruk'ux, jinaj ta naq reje.

²Re' QaJaaw Dios kopan taxaaj i rilow chaloq i tinamit mi wilik jino'q chi kixilak i wilik runa'ojb'al reh chi nee nimjik i reh.³Xa re' la' chi kunchelaal xiooj chupaam i yiib' wach b'eeh. Xkiq'eb' kiib'. Ma' awach ta' keh imb'anik reh i holohik laj na'ojb'al, jinaj ta naq reje.

⁴Eh ma' xta kina'ojb'al, ma' holohik ta kib'anik, inkik'ux i nutinamiit, je' nk'uxarik kaxlanwi'k inki a'n Eh ma' nkikapaaj ta kitiij, inki.⁵Re' keh naakib'arb'otiik ruum kiyo'jiik, ruum re' QaJaaw Dios naa rutoob'iniik keh i korik wach kik'ux.⁶Re' keh inkikaqse'laaj, inki a'n i xama' nimaq ta kiwach, xanaah re', re' QaJaaw Dios naa rutoob'iniik kee keh.

⁷Ar Sión ta naq nee rutaq'aaj chaloq i Dios i ko'lemb'al kiib' i aj Israel. Re' noq naa resam taqe chaloq pan tokoom tinamit, nee naq insuuqb'ik kik'ux i aj Israel, re' taqe i riih rumaam i Jacob. Re' i naa rub'anam ookik chupaam i ru santo laj Ye'aab' i Dios¹WaJaaw nuDios, ¿Awach i neerub'an i okik pan asanto laj Paat? ¿Awach i neerub'an i wihik pan aSanto laj Ye'aab'?²Re' i ma' xta ruch'uwa'iil wach i ránima, re' i holohik runa'ojb'al, eh i ruq'or i korik chu'nchel ruk'ux,³re' i ma' xtaj i yiib' wach i ruq'or chi riij i ras ruchaaq', re' i ma' rujot' taj i ramigo, ni xata rub'aj i ruka'jaah ruk'ula't,⁴re' i ma' najwaan ta wach imb'anik reh i mahk, eh i ruyeew ruloq'il awach inye'wik ruloq'il i Dios, re' imb'anik reh i ruq'or i ruk'uhb'aal i QaJaaw atoob' ta ti' neenik'ik ruum,⁵re' i ma' rupahqaaj ta tojb'al riij i rutumiin, re' i ma' ruk'ul taj i tumiin chi jot'b'al reh i ma' xta ru mahk,
eh re' imb'anik reh taqe re' ma' jaruuj naa ruq'ehb'iik pamahk. Re' i kooch xiik' naah chihojal¹WaJaaw nuDios, kinacha'jeej tii, ruum xa awuuk' wo' hat inusik' ko'lb'al wiib'.

²Aweh hat nuq'orom chi je' wili: Xa re' wo' hat i waJaaw. Eh ma' awach ta chik jino'q i q'e' atoob' wuuk' chi je' rukab' i hat, kinki.

³Re' taqe korik wach kik'ux chunimjiik i Dios, i wilik kisantohiil ayu' wach ak'al, re' re' kiye'wik rusuqkiil nuk'ux.⁴Eh q'e' ti' i naakik'ulum taqe ikiloq'inik reh taqe i xa tiyoox. Eh re' hin ma' jaruuj neenuyeew chi numayiij i rukik'eel chikop chikiwach taqe i kitiyoox, ni xata neenuyeew kiloq'il ruuk' nuchii'.

⁵WaJaaw nuDios, re' hat ti ye'wik weh chib'ih jariik inwaaj. Eh i nayeew weh chi manlik aawotob'il, panaq'ab' wilik i nuk'achariik.⁶Q'e' holohik xinelik, ruum xiik' naah holwochiil i nuye'aab' xayeew, eh xiik' naah chihojal i nukooch xayeew weh.

⁷Eh re' hin naa nuloq'em i QaJaaw Dios, ruum re' reh ink'amwik nub'eeh. Eh xti rukoj nuna'ojb'al atoob' ta pantaq chaq'ab' wilkiin.⁸Re' hin eliik k'ahchi' wilom wach i waJaaw ma' hin ta rukanaam, xa eliik k'ahchi' kiin rutob'eem, reh chi ma' xta neenyojwik nuk'ux.⁹Ruum aj re', re' wánima, re' nuti'jolal, i nukapeb'aal xiik' naah suq kiil kik'ux. Ruum xa ruuk' chik i Dios naa nuye'em nuk'ux.¹⁰Re' hat waJaaw ma' naa ta akanaam i nuti'jolal panjul, naa la' awuksam chaloq. Eh ma' naa ta wo' aye'em q'ab' chi naa ruq'ahiik panjul i ruti'jolal i Santolaj Awak'uun.¹¹Re' hat naa ak'uhtaniik weh i rub'eeh i juneliik k'acharik. Eh wilik jinaj i runimaal rusuqkiil nuk'ux, ruum xa awuuk' wo' hat wilik i rusuqkiil k'uxliis reh juneliik. Re' reey David xupahqaaj parutiij chi naa rutoob'jiik ruum i Dios¹WaJaaw nuDios, chab'iraj tii weh i naa nupahqaam aweh ruuk' rub'ehel. Xti kinab'iraj tii weh i panutiij, ruum re' hin ma' awach tee nujot' ruuk' nuchii'.²Kinako'leej chikiwach i tinamit, ruum re' hat aweht'al chi korik wach nuk'ux.

³Re' hat aweht'al chik paam i wánima, kink'ulik aawula'eej chaq'ab'. Eh xinanik'eej ruuk' i nunimaniik, ma' xtaj i yiib' wach xareq pan wánima. Eh ma' jino'q i yiib' wach q'orik i nelik panuchii'.⁴Ruum chi k'ahchi' nunimam aak'uhb'aal, ma' nuk'am ta naah i yiib' wach na'ojb'al inki a'n i kib'anik i ti' k'axik.⁵Re' hin k'ahchi' nuk'amam naah aab'eeh. Eh ma' naa ta chik nukanaam chi jumpech.

⁶WaJaaw nuDios, re' hat k'ahchi' kaat nuq'o'reem panutiij, ruum weht'al chi nee kinachaq'weej. Je' re' noq, chab'iraj tii i nuq'oral.⁷Chaketelaaj tii nuwach ruuk' i runimaal aak'axb'al, ruum re' hat inako'leej taqe i awuuk' i hat inkisik' ko'lemb'al kiib', inako'leej taqe chikiwach i aj ixowan keh.⁸QaJaaw Dios, kinako'leej tii, je'-oq kinko'ljik rutiyoxil i naq'awach cha a'n weh. Eh je'-oq ruuk' aaxiik' kinamoh-eej,⁹Re' taqe i yiib' wach kina'ojb'al k'ahchi' kiin kik'sam chi ti' k'axik. Re' taqe i ki-ixowanik nuwach xa nkaaj chik kinkikansam.

¹⁰Re' taqe re' ma' xta ketelinik wachiis kuuk'. Xa nimaq chik kiwach inki a'n kiib' ruuk' i kiq'oral.¹¹Xak'ul chik kiooj chi nusik'ariik, xa kok' taq chik ma' kinkichop. Eh k'ahchi' kisik'im chi riij nik' wach noq naa kianam weh.¹²Xa je' chik kikab' i kaq b'ahlam noq kinkaaj kiinkichopom, eh je' rukab' inki a'n i kok' rak'uun kaq b'ahlam noq inkuy-eej i kitiib' pan kijuul.

¹³WaJaaw nuDios, kinab'iraj tii, cha a'n keh yiib' wach kina'ojb'al, chawesaj i kajaawriik. Kinako'leej pan kiq'ab' ruuk' awajaawriik.¹⁴WaJaaw nuDios, ruuk' awajaawriik kinako'leej chikiwach taqe i xa reh ayu' wach ak'al inki a'n Eh inkaaj chi nee kib'ehomrik korehtaal inkinujisaj kiib', je' chi kak'uun chi kixq'uun, chi kiih chi kimaam.

¹⁵Raaj i hin, ruum chi korik wach nuk'ux, naawilom awach ruuk' naq'nuwach. Eh ma' k'isiin ta naa rusuuqb'iik nuk'ux noq naawilom chi awuuk' chik wilkiin ar pan taxaaj. Re' reey David xutz'uyej wach i Dios ruum xko'ljik chuwach i aj ixowaal (2 Sam 22.1-51)¹WaJaaw nuDios, re' hin q'e' ti nuk'ax, ruum re' hat ti ye'wik rukowiil nuk'ux.²Re' hat titoob'inik ti ko'linik, ti esanik weh panti' k'axik: Hat nuDios ye'el rukowiil nuk'ux hat saq rehp ab'aj, hat pulato ch'ihch' ko'lb'al iib' chi weh. Hat najt naah paat ko'lemb'al iib' chi weh.³Ruum aj re', re' hat Jaaw, xti ruk'ul chi naa alooq'jiik. Eh noq tinuq'o'reej, kinako'leej chikiwach i ki-ixowanik nuwach.

⁴Re' keh xa kikotik naq chik chi wiij ree nukanteesjiik. Xchalik wo' naq nuyo'jiik, ruum i yohb'aal wach inkansanik.⁵Re' aj kansaneel xa rukotem naq chik wiij. Xa ma' ha' ta naq chik inuko'leej wiib' chuwach i kimik.

⁶Eh noq wilkiin pan i ti' k'axik, xnuq'o'reej i QaJaaw Dios. Re' reh xirib'iraj wo' chupaam i rusantolaj Ye'aab' re' i xnupahqaaj reh xirib'iraj wo' hoq.

⁷Eh re' QaJaaw Dios ruum i rujosq'iil, je' naa jinaj kowlaj yihk i xuyeew chaloq. Eh je' naa xuk'u'yisaj aak'al, je' naa xrisaj taqe paruye'aab' i yuuq' k'ixkaab'.⁸Re' reh je' naa xelik chaloq i sib' panju'. Je' naa xaq q'aaq'. Eh je' naa naq'wach q'aaq' i xelik cho panchii', sachb'al kiwach i yiib' wach kina'ojb'al.⁹Re' QaJaaw Dios xchalik chi nutoob'jiik je' naax teh chii' i taxaaj. Je' naa q'eq suutz' i wilik ri'si rooq.¹⁰Re' reh je' naa chinaah i ruxiik' i ánjel xuyeew cho riib'. Eh xqajik cho panteew chinaah i wach ak'al.¹¹Eh je' wo' namuqlik chupaam i q'equm paam suutz', re' ruuk' i q'eq suutz' jab' i ruk'am chaloq.¹²Ruum i rusaqumaal chii' wach, re' je' q'eq suutz' xusutej chi saqb'och. Eh xusutej wo' chi je' naq'wach q'aaq' qoplik ruq'aq'al xuyeew chaloq.¹³Re' QaJaaw Dios wilik cho pan taxaaj xub'an chaloq i je' kahoq. Eh xuyeew chaloq i je' saqb'och, je' naq'wach q'aaq' qoplik ruq'aq'al.¹⁴Re' reh je' naa flecha, je' naa kahoq ixukut cho chikinaah i ki-ixowanik nuwach. Eh ruum i re' xkitukej kiib'.¹⁵Re' i je' palaw wilik naq chi nujunsuut, je' naa xb'iq'arik qohoq ruum i ak'al, xa tehlik chik wach aak'al xkahnik. Je' re' xkahnik, ruum kow xq'orik chaloq i QaJaaw Dios ruum rujosq'iil, eh xuhupej taqe chaloq.¹⁶Re' QaJaaw Dios kopan taxaaj xuyeew chaloq i q'ab' chi nunaah ree nuko'ljiik, paruchamiil palaw xink'ulik resaj.¹⁷Xiruko'leej pan q'ab' inixowanik nuwach, je' wo' pan kiq'ab' chu'nchel i ki-ixowanik nuwach, atoob' ta q'e' wo' naq kow kiib' chi nuwach i hin.¹⁸Eh noq wilkiin panti' k'axik, xinkaaj naq kinkikansam. Xa re' chik i QaJaaw Dios xko'linik weh.¹⁹Xiresaj panti' k'axik wilkiin naq wii'. Eh xi ruko'leej, ruum q'e' kiruk'ax.

²⁰Re' QaJaaw Dios je' re' nuk'axariik xub'an, ruum korik wach nuk'ux. Xuyeew jilow weh, ruum i rilow chi ma' xta ruch'uwa'iil wach i wánima.²¹Ruum re' hin k'ahchi' nuk'amam chi korik i rub'eeh. Eh ma' k'ahchi' ta nuq'eb'em wiib' pamahk chuwach.²²Re' hin wilik pan wánima chu'nchel i ruk'uhb'aal i QaJaaw Dios. Ma' nik' ta xnukanaa' rub'aan taqe i ruq'or.²³Re' hin korik wach nuk'ux chuwach nukanaam chik chu'nchel i yiib' wach chi b'anarik,²⁴je' re' noq, re' QaJaaw Dios xuyeew jilow weh i rukorkiil wach nuk'ux, ruum ma' xta ruch'uwa'iil wach i wánima chuwach.

²⁵WaJaaw nuDios, re' hat q'e' naaketelaaj wach imb'anik ketelenik wachiis. Eh korik wach ak'ux ruuk' imb'anik reh i korik.²⁶Re' hat inatob'eej i korik wach ruk'ux. Eh i nayeew aajosq'iil chinaah i yiib' wach runa'ojb'al.²⁷Re' hat inako'leej i tinamit k'ahchi' rub'aan ti' k'axik keh. Eh inawesaj i kajaawriik i xa nimaq chik kiwach inki a'n kiib'.²⁸WaJaaw nuDios, re' hat xayeew chik cho weh i manlik saqum. Xinawesaj chik chaloq chupaam i q'equm.²⁹Eh naa kiin atoob'eem, reh chi neenuq'at kiwach i ki-ixowanik nuwach. Nik' ta naq wach i q'atb'al weh neenkikoj, neenub'an keh.

³⁰Re' rub'eeh i QaJaaw Dios xti korik, re' i ruq'or rib'iral chi naa ruye'em qeh, nee wo' ruyeew. Eh i ruko'leej taqe awach i kiye'em kik'ux ruuk'.³¹Je' re' noq, ma' jino'q chik Dios chi je' rukab' i qaDios, ruum ma' xta chik jino'q Dios neenko'linik qeh je' rukab' i qako'ljiik i rub'an i reh.³²Re' QaJaaw Dios inye'wik wajaawriik. Eh re' reh ink'amwik weh chupaam i korik laj b'eeh.³³Re' reh inye'wik nukowiil reh chi ma' xta neenuk'ul. Xa atoob' ta neenub'an weh ajiim ju' taq yuuq' je' rukab' i rub'an i keej, xama' xta wo' neenuk'ul.³⁴Re' reh inye'wik nuna'ojb'al chi q'aq'inik. Re' reh inye'wik waansil chi rukutariik i flecha q'an ch'ihch' ruyej-aal.³⁵WaJaaw nuDios, re' hat ticha'jinik ti ko'linik weh. Eh ruuk' awajaawriik kinatoob'eej chaloq, eh ruum aak'axb'al xinelik korik.³⁶Re' hat kinatoob'eej, xti xateh i nub'eeh chi korik. Eh ma' xta kinkalojik wii'.

³⁷Re' hin xtohq'ik taqe nusik'im i ki-ixowanik nuwach, eh xnureq wo' taqe. Eh ma' xnukanaa' ta chik taqe korehtaal xnub'an keh.³⁸Noq xnub'an keh xiq'ehb'ik wach ak'al ma' kota chik xi wuktik, eh ma' xkikuy ta k'isinoq waansil.³⁹Re' hat xayeew wajaawriik chi naa nub'anam keh. Eh xawesaj i kajaawriik i ki-ixowanik nuwach, reh chi ma' xkikuy taj i waansil.⁴⁰Re' hat xaq'asaj taqe panuq'ab' i ki-ixowanik nuwach, korehtaal xnusach kiwach chi kunchelaal.⁴¹Noq xkipahqaaj naq kitoob'jiik, ma' awach ta xtoob'inik keh. Eh noq xkipahqaaj naq kitoob'jiik reh i QaJaaw Dios, xama' xiko'ljik ta wo' hoq.⁴²Re' hin xnusach kiwach je' rukab' noq insahchik wach i pooq panteew. Eh xnuye'q'eb'eej taqe pan wooq je' rukab' imb'aan reh i ch'uwa' pamb'eeh.

⁴³WaJaaw nuDios, re' hat xinako'leej pan kiq'ab' i tokoom tinamit ma' kinimanik taa weh. Eh xinakoj chi ajaab'esil chikinaah i tinamit. Eh xinkitob'eej i tinamit ma' weht'al ta naq kiwach.⁴⁴Noq inkib'iraj i nuq'or keh, inkinimaj wo' hoq. Re' taqe i tokoom tinamit xkaaj wo' hoq chi re' chik i hin xin taaq'anik keh.⁴⁵Re' keh xk'isimb'ik kik'ux. Eh xakib'arb'otik chik ruum kiyo'jiik, noq xi elik chaloq aha' kikeb'aam wii' kiib'.

⁴⁶Xti k'achlik i QaJaaw Dios. Loq'imaj ta naq, ruum jinaj paat ab'aj ko'lemb'al iib' chi weh. Neeta naq inye'arik runimaal wach i nuDios waj Ko'loom.⁴⁷Re' reh i Dios, re' inq'ajwik wach imb'aan weh. Re' reh xkojwik weh chi ajaab'esil chikinaah i tinamit.⁴⁸Re' reh inko'linik weh pan kiq'ab' i ki-ixowanik nuwach, re' taqe i xti xkaaj naq kianam weh. Re' wo' xko'linik weh pan q'ab' i winaq xti wilik rajaawriik chi kansanik.

⁴⁹Ruum aj re', re' hin naa kaat nuloq'em chi kixilak taqe i ma' re' ta aj Judío ruuk' i rutz'uuyjiik i runimaal awach.⁵⁰Eh re' i reh xye'wik rajaawriik i ru reey chi ma' xta x-uuchjik. Iruketelaaj wach, i rusik'im cho wach. Eh i ruketelaaj wach i David chi juneliik, je' wo' taqe riih rumaam. Re' chu'nchel i ruyejaam chaloq i Dios ink'uhtanik reh i ruloq'il¹Re' taxaaj, re' wilkeeb' chupaam ink'uhtanik reh chi xiik' naah i ruloq'il i Dios, re' chu'nchel inilarik kiwach ink'uhtanik reh i rukamaj.²Re' re' kik'uhtanik reh chi q'iij chi aq'ab', chi re' Dios nim rajaawriik, eh xti wilik runa'ojb'al.³Korik noq ma' re' ta ruuk' q'orik ma' kichoqik ta chuq'orariik i ruyejaam chaloq i Dios.⁴Eh kuum taqe kik'utinik re' re', xooj rib'iral i ruq'oral i Dios chi junsuut i wach ak'al.
Eh re' wo' Dios xye'wik paruye'aab' i q'iij.⁵Re' q'iij xasuq chik ruk'ux noq i rutoq'aa' cho b'ehik. Xa je' chik rukab' i winaq koxub'an kaxáro. Je' rukab' i aj ajiim i xa ruchop chik ruk'ux.⁶Re' q'iij i nelik chaloq raa' taxaaj, eh i rub'ehuj paam chu'nchel i taxaaj korehtaal imponik chi juntar, eh chu'nchel inik'ranik reh i rutz'a'iil.

⁷Re' ruk'uhb'aal i QaJaaw Dios xti korik, ruum i rujal wach i qánima. Eh re' ruq'or i QaJaaw Dios korik, ruum i ruyeew runa'ojb'al i ma' xta runa'ojb'al.⁸Re' taqe k'uhb'alinik i rub'an i QaJaaw Dios korik wach, i ruyeew suq kiil i qánima. Re' ruk'uhb'aal xti saq wach, eh i rusaquumb'isaj paam i qakapeb'aal.⁹Re' ruyohljiik i QaJaaw Dios saq wach, eh ma' naa ta rusahchiik wach. Re' i ruk'uhb'aal i QaJaaw Dios xti korik, eh xti wilik rub'ehel.¹⁰Re' i ruk'uhb'aal xiik' naah k'ihaal tz'aaq chuwach i manlik oro. Eh xiik' naah ki'iil chuwach i riiskaab' kore' k'ahchi' ruyitz'ariik chaloq¹¹WaJaaw nuDios, re' aak'uhb'aal i rukoj wo' nuna'ojb'al i hin, hin awaj kamanoom. Eh ruum i runimjiik aak'uhb'aal, naa aye'em jinaj i nukooch.

¹²Wilik noq ma' nqakoj ta rehtaal noq inqa a'n i mahk. Jaaw, wila' wilik i mahk i nub'an chi ma' weht'al, cha kuy numahk.¹³Chawesaj weh i niimb'isanik wachiis i hin, hin awaj kamanoom. Chi je' re' neenkahnik chi ma' xta ruch'uwa'iil wach i wánima, eh nee kinako'leej chuwach i runimaal mahk.

¹⁴Neeta naq imponik chawach taqe nuq'oral, je' wo' chu'nchel i nukapaaj. WaJaaw nuDios, xa re' wo' hat ti toob'inik weh, eh hat waj Ko'loom, hat paat ab'aj ko'lemb'al iib' chi weh. Re' tiij chi riij chi naa rub'aan elik korik¹Neeta naq irib'iraj aatiij i QaJaaw Dios noq wilkaat chupaam i ti' k'axik. Re' ta wo' naq i ruDios i Jacob, neenko'linik aweh.²Re' ta naq i Dios wilik parusantolaj Ye'aab' Sión, neentoob'inik aweh, eh neencha'jinik aweh.³Eh nee ta naq ink'ulik cho paruk'ux i Dios chu'nchel alemóxna aye'em. Eh nee ta naq i ruk'ul aweh aamayiij inak'at wach artaal.⁴Neeta naq i ruyeew chaaweh aha' wilik inawaaj. Eh nee ta naq inooj eloq wach chu'nchel ayejaam wach rub'aan.⁵Wila' xooj eloq wach, ma' k'isiin ta nee nqaniinq'ijeej aako'ljiik. Neenqajosaj johtoq i rehtalil chuwach i QaJaaw Dios chi xat elik korik. Eh nee ta wo' naq i ruyeew chaaweh i reh i xapahqaaj reh.

⁶Re' hin xnunab'eej chi re' QaJaaw Dios i ruko'leej i reey rusik'im cho wach. Eh kopan taxaaj naa rib'iram chaloq i Dios i naa rupahqaam i reey. Eh ruuk' i rajaawriik naa ruko'leem chikiwach i aj ixowaal.⁷Wilik taqe i re' kikareta inkitz'e' wacheej chi ko'lb'al kiib'. Eh wilik taqe i re' kikawayu inkitz'e'wacheej. Eh re' hoj xa re' wo' QaJaaw Dios inqatz'e'wacheej chi ko'lb'al qiib'.⁸Re' taqe re' naa ruyojiik kik'ux, naa rub'aan keh. Eh re' hoj ma' xta naakooj kuchem, ma' jaruuj naa ruyojiik qak'ux.

⁹WaJaaw nuDios, chako'leej tii chaloq i reey, reh chi nee nelik korik. Eh nik' neetiqaq'oreej pan qatiij, nee ta tii qoh ab'iraj. Re' rutz'uuyjiik wach i Dios ruum i ko'linik xub'an¹WaJaaw nuDios, re' reey ma' k'isiin ta xsuuqb'ik ruk'ux, ruum xayeew i rajaawriik. Eh suq ruk'ux ruum chi xako'leej pan kiq'ab' i aj ixowaal.²Xayeew wo' reh aha' wilik iraaj rub'anariik. Eh xayeew wo' reh aha' wilik i xupahqaaj aweh parutiij.³Yohb'aal wach i rutoob'jiik xa a'n xakoj rukoróna wach naah re' ruuk' i xti manlik oro.⁴Xupahqaaj ruk'achariik aweh, najt rooq i ruk'achariik xayeew. Eh naa wo' aye'em reh i juneliik k'acharik.⁵Eh xayeew rajaawriik ruum xako'leej. Xayeew ruloq'il, eh xayeew runimaal wach.⁶Wilkaat ruuk' chutoob'jiik chi juneliik. Ruum aj re', ma' k'isiin ta nsuuqb'ik ruk'ux.⁷Je' re' noq, re' hat reey, ruuk' i QaJaaw Dios ch'iklik ak'ux. Eh ruum chi naa ruketelaam wach i QaJaaw nim rajaawriik, ma' xta naa ak'ulum.

⁸Eh re' hat naa aq'atam wach i kajaawriik taqe i ki-ixowanik awach. Eh naa a'nam keh chu'nchel i ma' ki ajwanik ta awach.⁹Je' naa, naa aye'em taqe pan jino'q, horna qoplik ruq'aq'al ruum aajosq'iil. Eh ruum aajosq'iil naa taqe aye'em pa runimaal q'aaq' chi tojb'al kimahk.¹⁰Re' hat reey, naa wo' asacham kiwach i kak'uun kixq'uun, i kiih kimaam wilkeeb' chinaah i wach ak'al.¹¹Atoob' ta naq inkaaj kianam aweh, eh nik' ta naq wach ruyejeb'jiik wach neenkian i naa kianam aweh, xama' xta wo' neetikuchej.¹²Re' keh naa naq kimolom chi elik. Xa re' la', xama' naa ta wo' chik kianam elik, ruum re' hat ruuk' i flecha naa akansam taqe.

¹³WaJaaw nuDios, cha k'uhtaaj awajaawriik. Chi je' re', naaqaye'em runimaal awach, eh naa wo' qatz'uyem awach chu'nchel qak'ux. Re' k'erej chi'is ruum i ruti'kiil k'uxliis, re' tz'uuy chi loq'oomb'al ree Dios¹Hat nuDios, hat nuDios, ¿Chib'ih reet noq xi nakanaa' chi wutkeel? ¿Chib'ih reet noq ma' kinako'leej taj, eh xama' nab'iraj ta wo' hoq i nupahqaaj aweh?²Hat nuDios, re' hin chi q'iij chi aq'ab' i nupahqaaj aawotob'il, xama' kinab'iraj ta wo' hoq. Eh xama' kinhi'lik ta wo' ruuk' i k'ahchi' nuk'ulum.

³Xa re' la', re' hin weht'al noq wilik awajaawriik, hat Santo. Eh inkiyeew aloq'il i tinamit Israel.⁴Re' taqe i qamaam qati't awuuk' i hat xkiyeew kik'ux. Eh noq xkiyeew kik'ux awuuk', xako'leej wo' taqe.⁵Eh noq xkipahqaaj kitoob'jiik aweh, xawesaj wo' taqe panti' k'axik. Xkiyeew kik'ux awuuk', eh re' hat ma' xak'uhtaaj ta kik'ixb'ilaal.

⁶Re' taqe tinamit ma' kimponik ta panaq'kiwach chi hin winaq. Xa je' chik hin k'isa haah noq kinkilow.⁷Eh chu'nchel i ki ilwik weh kinkikaqse'laaj, kinkehtz'aaj, inkik'uyu'saj i kinaah, je' wili inkiq'or:⁸Re' reh i ruq'or chi ruye'em ruk'ux ruuk' i Dios, k'oloq aj ko'ljoq yu'naak re'. I ruq'or chi q'e' ink'axarik, xti k'oloq aj ko'ljoq re', inki taqe chi wiij.

⁹Xa re' la', re' hin weht'al chi xanoq wo' xintohq'ik cho atoob'eem noq xin-aasjik cho ruuk' i nutuut, eh je' wo' hoq nik' najtiil xiruch'uuch'isaj chaloq.¹⁰Xa re' wo' noq komajaa' kin-aasjik, xatkahnik chi cha'jen weh. Eh noq ko hin cho rihqaam i nutuut, xa hat wo' cho nuDios i hat.¹¹WaJaaw nuDios, kinatoob'eej tii, ruum chalik reh i ti' k'axik chi nunaah ma' awach ta jino'q intoob'inik weh.

¹²Re' taqe i ki-ixowanik nuwach xa kikotik chik chi wiij, xa je' chik taqe imas wakax. Xa je' chik kikab' josq'laj imas wakax kichalik Basán.¹³Re' keh xankaaj naq chik kianam weh. Eh xa je' chik kikab' i kaq b'ahlam noq xankaaj chik k'uxuuj.

¹⁴Re' nuti'jolal, ma' xta chik ransil, xa je' chik rukab' i ha' chihkik i rub'an. Eh re' taqe nub'aqil, xa roq'taam chik riib' noq inwik'raaj. Eh re' wánima xa je' chik inhaab'ik kantela noq inwik'raaj.¹⁵Eh xa chiqiij chik paam i nuchii', xa je' chik joox laj xoht. Re' waaq' ruchopom i panujah-aay. Xayeew q'ab' chi naa nuk'ulum i ti'laj kimik, eh naa numuhqiik.

¹⁶Re' taqe i chi yiib' wach kina'ojb'al kisutem chik wiij, k'ahchi' kianam ti' k'axik weh xa je' chik taqe josq'laj tz'i'. Eh xkihopib'eej i wooq ruch'ihil i nuq'ab'.¹⁷Ma' re' ta nkiwii' chi xa nk'utinik chik chaloq taqe i nub'aqil, re' keh xasuq chik kik'ux noq kinkilow i koq.¹⁸Xkich'aqib'eej chikiwach taqe i nuso'. Eh xkiq'ijej riij naab'al reh aha' wilik i naa rukahniik keh chi kiju'junaal.

¹⁹Re' hat waJaaw nuDios, i ti ye'wik rukowiil nuk'ux, makinakanaa' chi wutkeel, kinako'leej la' chi jumehq'iil.²⁰Maayeew q'ab' chi nee kinkanteesjik ruuk' q'aslaj ch'ihch', eh chi nee kinkikansaj taqe i je' josq'laj tz'i' re' re'.²¹Kinako'leej pan kiq'ab' taqe i yohb'aal wach kijosq'iil re' re', xa je' chik kijosq'iil kaq b'ahlam, eh xa je' chik kijosq'iil imas wakax.

²²Chi je' re', neenuq'or keh i was nuchaaq' chi xiik' naah aawotob'il. Eh neenuyeew runimaal awach chikiwach taqe inkimol kiib' chalooq'jiik.²³Re' taq i hat inayohleej taq wach i QaJaaw Dios, chayeew taq ruloq'il. Chayeew taq runimaal wach, i hat taq riih rumaam i Jacob. Eh chawunchelaal taq i hat aj Israel chayohleej taq wach i Dios,²⁴ruum re' reh i rutoob'eej taqe i wilkeeb' panti' k'axik. Ma' rukanaa' ta chi je' re', ruum reht'al chi ti' k'ahchi' kik'iik wii'. Nik' inkipahqaaj i rotob'il, i rutoob'eej wo' taqe.

²⁵Re' hin naa nuye'em runimaal awach chi kixilak i ruk'ihaal inkimol kiib' chalooq'jiik. Eh chikiwach i kiyohlinik awach, naa nuye'em i nuq'orom chi naa nuye'em aweh.²⁶Re' taqe ma' xta wilik keh naa kianam kiwa' kihaa', korehtaal kinujik. Re' naakisik'wiik reh i QaJaaw Dios, naakiye'em ruloq'il, eh naa ruwihiik kik'achariik chi juneliik.

²⁷Re' tinamit chi junsuut i wach ak'al, pantaq nimaq tinamit pantaq kok' tinamit, naa ruk'uliik pankik'ux i QaJaaw Dios. Eh naakisik'im, naakiye'em ruloq'il,²⁸ruum re' QaJaaw Dios xti manlik reey. Eh re' reh naa ruwihiik chi taaq'anik chikinaah chu'nchel i tinamit.

²⁹Eh naakixuk'aam kiib', eh naa kiloq'em i QaJaaw Dios chu'nchel i nimaq kiwach, je' wo' taqe i xama' nimaq ta kiwach. Chu'nchel i re', xanaa wo' kikimiik reje, ruum ma' re' tee keh kiye'wik i kik'achariik chi kib'il kiib'.³⁰Re' taqe wiih numaam naa kiloq'em i QaJaaw Dios. Eh naa kiq'orom rib'iral i rotob'il chu'nchel i kik'achariik.³¹Eh naa kiq'orom chi korik wach ruk'ux i QaJaaw Dios keh taqe i naa kaasjiik koq'uun. Eh naa kiq'orom rib'iral taqe i xub'an. Re' noq xuq'or i reey David chi re' QaJaaw Dios incha'jinik reh¹Re' QaJaaw Dios incha'jinik weh, eh i ruyeew weh chu'nchel i ajwaal wach chi weh.²Eh i rub'an wuuk' je' rukab' i rub'an i cha'jen tentzun: I ruk'am taqe i rutentzuun i wilik wii' i ch'ahn inkik'ux i ruyeew taqe chi hi'lik. Eh i ruyeew kihaa' panha' ma' kow ta rooq.³Eh re' i QaJaaw Dios i ruyeew rukowiil i wánima. Kiruk'am chupaam i korik laj b'eeh ruuk' i ruk'axb'al.

⁴Atoob' ta kinik'ik paruq'equmaal i ruyohb'alil i kimik, re' hin ma' xta nuyohb'isaj wii' wiib', ruum re' hat wilkaat wuuk' eh kina'koleej. I na a'n wuuk', je' rukab' i rub'an i cha'jen tentzun ruuk' taqe rukarote i ruko'leej taqe i rutentzuun.

⁵Eh noq i nub'an nuwa' nah méxa, re' hat ticha'jinik weh chikiwach, ki-ixowanik nuwach. Re' hat i naa chihkaaj i ink'ohnik laj iq'oom wach nunaah. Eh re' wánima xamb'ulik chik chi rusuqkiil k'uxliis, je' rukab' noq imb'ulinik i kulk ye'aab' ha'.⁶WaJaaw nuDios, xti korik noq chi juneliik i nuk'achariik naa aye'em weh aawotob'il. Naa aketelaam nuwach. Eh ma' xata ajlamaj q'iij naa nuwihiik panapaat. Re' i reey xti wilik ruloq'il¹Chu'nchel i wach ak'al, re' QaJaaw Dios inehchanik reh, je' wo' chu'nchel i wilkeeb' chupaam, je' wo' chu'nchel i k'achareel wilkeeb' chupaam.²Re' wo' QaJaaw Dios xyej-anik reh i wach ak'al, chinaah taqe i palaw je' wo' chinaah taqe i nimaq rooq ha'.

³¿Awach i naa rub'anam i johtik ruuk' i QaJaaw Dios? ¿Awach i naa ruwihiik parusantolaj ye'aab'?⁴Re' i ma' mahkunik ta ruuk' i q'ab', saq wach i ránima, ma' rub'an ta reh i xama' xta ruk'am chaloq, eh ma' awach taj i rujot' ruuk' i ruq'oral.⁵Ra'j re' re' naa ruk'ulum i rotob'il i QaJaaw Dios aj Ko'loom. Naa ruye'ariik rukorkiil wach ruk'ux ruum.⁶Ra'j taqe ruuk' re' i wili kisik'wik reh i QaJaaw Dios, inkaaj kilom wach i Dios, re' xuloq'ej chaloq i Jacob.

⁷Titehoq taq i hat puerta wilkaat taq chi juneliik. K'ul taq titehoq, ruum naa rokiik i xti manlik Reey wilik ruloq'il.⁸Eh ¿Awach i xti manlik Reey wilik ruloq'il? Re' i QaJaaw Dios xti kow riib', xti wilik rajaawriik, eh i ruq'at kiwach taqe aj peleto.⁹Titehoq taq i hat puerta, i wilkaat taq chi juneliik. K'ul taq titehoq, ruum naa rokiik i xti manlik Reey wilik ruloq'il.¹⁰Eh ¿Awach i xti manlik Reey wilik ruloq'il? Re' i QaJaaw Dios, i wilik rajaawriik chikinaah chu'nchel chib'ih i wilik. Eh re' reh i Reey xti wilik ruloq'il. Re' reey David xupahqaaj i rotob'il i Dios parutiij¹WaJaaw nuDios, awuuk' i hat i nub'an nutiij.²Hat nuDios, awuuk' i hat i nuyeew i nuk'ux. Ma' ta naq neenuk'uhtaaj nuk'ixb'ilaal. Reh chi ma' nee ta kinkikaqse'laaj i ki-ixowanik nuwach.³Re' inkiyeew kik'ux awuuk', ma' jaruuj inaakik'uhtaam kik'ixb'ilaal. Re' taqe i ma' kinimanik ta aweh, ra'j naakik'uhtaam kik'ixb'ilaal re'.

⁴WaJaaw nuDios, cha k'uhtaaj weh chi korik aab'eeh. Eh cha k'uhtaaj weh inawaaj chi neenub'an.⁵Chak'uhtaaj weh, eh chak'am nub'eeh chupaam i korik, ruum xa re' wo' hat i nuDios waj Ko'loom. Awuuk' i hat i nuyeew nuk'ux chi q'iij chi aq'ab'.

⁶WaJaaw nuDios, chayeew tii weh aak'axb'al. Chaketelaaj nuwach, je' wo' rukab' i na a'n wuuk'.⁷Eh maank'ulik chik cho panak'ux taqe i numahk nub'anam, je' wo' taqe i yiib' wach na'ojb'al nub'anam panuk'ijolal. WaJaaw nuDios, maakinsahchik tii panak'ux, chaketelaaj nuwach ruuk' aak'axb'al.

⁸Re' QaJaaw Dios q'e' atoob', korik wach ruk'ux. Re' reh ink'uhtanik keh i aj mahk i korik laj b'eeh.⁹I ruk'am kib'eeh i xama' nimaq ta kiwach. Irukoj kina'ojb'al reh chi neenkian i rub'ehel.¹⁰Re' i rub'eeh i QaJaaw Dios jinaj ketelenik wachiis, jinaj k'axooj, korik chi keh i kinimanik reh i ruq'orom chi naa rub'anam, eh kinimanik reh i ruk'uhb'aal.

¹¹WaJaaw nuDios, re' hin i nupahqaaj aweh chi nee ta tii nakuy i ruk'ihaal numahk, ruuk' aak'axb'al.¹²Awach i ruyeew ruloq'il i QaJaaw Dios, re' wo' Dios naa ruk'uhtaniik reh i b'eeh naa ruk'amam.¹³Eh naa ruye'em reh suq laj k'acharik, eh re' taqe riih rumaam naakehchaam i ye'aab' q'orooj cho rib'iral.¹⁴Re' QaJaaw Dios wilik pan jinaj wach k'uxliis kuuk' i kiye'wik ruloq'il, eh i ruyeew keh chi naab'jik i ruyejaam cho wach chi naa rub'anam.¹⁵Re' hin juneliik ruuk' i QaJaaw Dios nuye'em nuk'ux, ruum xa re' wo' reh neenko'linik weh chuwach ti' k'axik.

¹⁶QaJaaw Dios, kinawil tii. Chaketelaaj nuwach, ruum ma' awach ta intoob'inik weh ruuk' i ruti'kiil nuk'ux.¹⁷Re' hin xa ruman i ruti'kiil i wánima i k'ahchi' rokiik. Jaaw, kinawesaj tii chupaam i ti' k'axik wilkiin wii'.¹⁸Chawilow i rutz'irkiil nuwach, i ti' k'ahchi' nuk'ulum. Chakuy ta tii chu'nchel i numahk nub'anam.¹⁹Jaaw, kinatoob'eej, ruum yohb'aal wach kik'ihaal taqe i ki-ixowanik nuwach xa kinkaaj chik kinkikansam.²⁰Chako'leej riij i nuk'achariik. Maayeew q'ab' chi neenkik'uhtaaj nuk'ixb'ilaal, ruum xa re' wo' hat ti ko'linik weh.²¹Ruum ta naq i rukorkiil wach nuk'ux, eh chi ma' xta numahk, nee kinako'leej, ruum xa awuuk' wo' hat i nuyeew nuk'ux.

²²Hat nuDios, i nupahqaaj otob'il aweh chi chako'leej i tinamit Israel ruuk' i ti' k'axik wilik wii'. Re' reey David xuq'or reh i Dios chi re' reh korik wach ruk'ux¹WaJaaw nuDios, chaq'at i q'orik chi nunaah. Eh re' hat nee ti q'orik chi ma' xta numahk, ruum awuuk' i hat i nuyeew nuk'ux, chi juneliik.²WaJaaw nuDios, chawilow nik' wach i nuk'achariik chawach. Chawilow mi korik wach i nukapeb'aal, mi korik wach i nuna'ojb'al,³Re' hin weht'al chi juneliik kinak'ax, re' hin korik wach nuk'ux awuuk'.

⁴Eh ma' nub'an ta jinaj nuwach kuuk' i chukul q'orik, ma' kinwihik ta chi kixilak i xak'ul inki a'n kiwach.⁵Eh ma' nwaaj ta wach i moloj iib' inki a'n i yiib' wach kina'ojb'al. Eh ma' jank'al ta kinwihik chi kixilak i ma' holohik ta kib'anik.

⁶QaJaaw Dios, re' hin je' naa naa nutz'ajam i nuq'ab', reh chi ma' xta numahk noq nee kinokik chuwach aa artaal,⁷reh chi naa nutz'uyem awach, eh naa nuq'orom rib'iral taqe i na a'n xiik' naah loq'il.

⁸WaJaaw nuDios, re' hin q'e' nuk'ax i loq'laj apaat, re' i ti wihik wii', re' i ye'aab' wilik wii' i runimaal aaloq'il.⁹Maayeew q'ab' chi nee kinkimik je' rukab' inkik'ul i aj mahk. Eh maayeew q'ab' chi nee nuk'ul weh i ti' k'axik inkik'ul i aj kansan kas kichaaq'.¹⁰Re' keh xa re' wo' hoq i mahk inki a'n xa re' wo' i leq' inki a'n.

¹¹Eh re' hin weht'al chi ma' xta numahk chawach, kinako'leej, chaketelaaj nuwach.¹²Re' hin nuchopom nuk'ux ruuk' i QaJaaw, Ruum aj re', naa nuye'em runimaal i ruloq'il chikiwach i rutinamiit inkimol kib'. Re' QaJaaw Dios i nusaquum, re' reh inko'linik weh¹Re' QaJaaw Dios i nusaquum, re' reh i waj Ko'loom. Re' reh inye'wik rukowiil nuk'ux panuk'achariik. Ruum aj re', ma' xta neekinyo'jik wii'.²Re' taqe i yiib' wach kina'ojb'al, i ki-ixowanik nuwach, noq xkimol naq kiib' chi nunaah chusachariik nuwach, re' chik i keh xsacharik kiwach.

³Atoob' ta neenkimol kiib' i ruk'ihaal soldado chi nunaah chub'anariik weh, ma' nee ta kinyo'jik. Atoob' ta neenkitik'aa' q'aq'inik wuuk', re' hin xama' nee ta wo' inchalik nuyo'jiik.

⁴Re' hin xa jinaj i nupahqaaj reh i QaJaaw Dios, xa jinaj inwaaj chi naa nub'anam: Re' chi nee kinwihik chupaam i rusantolaj Paat chu'nchel i q'iij nik' chik najtiil i nuk'achariik, reh chi ar neenuloq'ej, eh neenub'an rusuqkiil i ruholwochiil chii' wach i reh.

⁵Eh noq neenchalik i ti' k'axik chi nunaah, re' QaJaaw Dios neenko'linik weh. Eh nee wo' kiruko'leej ar chupaam i rupaat. Je' naa chinaah jino'q i paat ab'aj neekiruyeew noq neekiruko'leej.

⁶Re' reh naa kiin rutoob'eem, reh chi neenuq'at kiwach taqe i ki-ixowanik nuwach. Chi je' re' neerub'an chi neenuk'at i numayiij chupaam i ruloq'laj paat i QaJaaw Dios. Eh kow naa nutz'uyem wach ruum i rusuqkiil nuk'ux.

⁷WaJaaw nuDios, re' hat k'ahchi' kaat nuq'oreem. Chayeew tii weh i nupahqaaj aweh. Chaketelaaj tiinuwach, kinab'iraj tii.⁸Re' hin xchalik pan wánima chi naa kaat nusik'im. Ruum aj re', yu'naak k'ahchi' nusik'im i loq'laj awotob'il.⁹WaJaaw nuDios, chayeew tii weh aawotob'il.
Maa kinachaq'weej ruuk' josq'iil. Makinakanaa' wutkeel, ruum xa re' wo' hat titoob'inik weh, eh xa re' wo' hat, hat waj Ko'loom.¹⁰Atoob' ta nee kinkiq'eb' i nutuut wajaaw, re' hin weht'al chi re' QaJaaw Dios neemolwik weh.¹¹WaJaaw nuDios, cha k'uhtaaj tii weh aab'eeh. Chak'am nub'eeh chupaam i korik, reh chi ma' xta neekinkuchej i ki-ixowanik nuwach.¹²Maayeew q'ab' chi neenkian wuuk' inkaaj kianam taqe i ki-ixowanik nuwach, ruum re' keh xa chib'ih i q'orik inkitz'aq chi wiij, inkaaj kianam ti' k'axik weh.

¹³Eh wi ta ma' nunimaj i hin chi naa nuk'ulum i rotob'il i Dios panuk'achariik ayu' wach ak'al, yojinaq naq chik nuk'ux.¹⁴Chachop ak'ux ruuk' i QaJaaw Dios. Marub'an kiib' ak'ux, cha chop la' ak'ux chi korik, ruum xa re' wo' reh i ruk'ul chi naa awuy-eem i rotob'il. Re' reey David x-ib'irjik i rutiij¹WaJaaw nuDios, hat waj ko'loom, hat paat ab'aj ko'lemb'al iib' chi weh. Re' hat tinuq'o'reej, kinab'iraj tii. Chayeew weh i nupahqaaj aweh, reh chi ma' nee ta kinkimik je' rukab' noq kikimik i yiib' wach kina'ojb'al.²Chab'iraj cho weh noq i nupahqaaj aawotob'il ruuk' oq'ik, re' noq i nujosaj johtoq i nuq'ab' chawach chupaam asantolaj ye'aab'.

³Maa a'n ti' k'axik weh, je' rukab' inkik'ul i yiib' wach kina'ojb'al. Maa a'n weh je' rukab' inkik'ul i ma' holohik ta kib'anik, xa q'e' chik taqe atoob' inki a'n kiib'. Xanaah re' i kánima nujinaq chi ma' tob'laj na'ojb'al.⁴Chayeew taqe chutojariik i kimahk, re' q'oreel chib'ih jariik i yiib' wach na'ojb'al inki a'n je' wo' chik re' i cha a'n kuuk' i hat. Cha a'n jilow keh inki a'n⁵Ruum chi ma' xponik ta panaq'kiwach taqe rub'anam i QaJaaw Dios, je' wo' taqe i ruyejaam chaloq, re' wo' reh naa rusachwiik kiwach, eh ma' naa ta keliik korik.

⁶Loq'imaj ta naq i QaJaaw Dios, ruum xuyeew weh i xnupahqaaj reh.⁷Re' i QaJaaw inye'wik rukowiil nuk'ux, eh kiruko'leej. Ruuk' i reh, i nuyeew i wánima, xirutoob'eej, eh insuuqb'ik i wánima. Ruum aj re', naa nutz'uyem wach chi loq'oomb'al reh.

⁸Re' i QaJaaw Dios inye'wik rukowiil kik'ux i rutinamiit. Re' reh inko'linik reh i rukuxisam, chaloq⁹WaJaaw nuDios, chako'leej aatinamiit, chakuxisaj taqe awak'uun awixq'uun. Chacha'jeej taqe atentzuun, eh chayeew rukowiil kik'ux chi juneliik. Re' rajaawriik i QaJaaw Dios, eh re' i ransil i ruq'oral¹Chaloq'ej taq i QaJaaw Dios i hat, hat taq ánjel wilkaat taq cho pan taxaaj. Chayeew taq runimaal wach ruloq'il.²Chayeew taq ruloq'il i QaJaaw Dios, ruum xiik' naah loq'il i rub'ihnaal. Chaloq'ej taq i QaJaaw Dios, ruum xiik' naah holwochiil, eh xti wilik rusantohiil.

³Re' ruq'oral i QaJaaw Dios inib'irjik chinaah taqe ha'. Xa nteleninik chik i ransil i ruq'oral. Eh xa je' chik inq'orik kahoq chinaah i palaw.⁴Je' re' noq, re' ruq'oral i QaJaaw Dios xiik' naah i ransil eh xti wilik rajaawriik.⁵Re' i ruq'oral i QaJaaw Dios i ruxereb'eej taqe chee' chakaltee', Eh i ruxereb'eej taqe i nimaq taq chakaltee' wilkeeb' Líbano.⁶Ruuk' i ruq'oral i ruk'uyu'saj taqe yuuq' ar Líbano, je' wo' wilkeeb' ar Sirión. Xa je' chik kipisk'anik kok' rak'uun wakax, xa je' chik kipisk'anik imas wakax.⁷Re' ransil i ruq'oral i QaJaaw Dios i rukut wo' taqe xaq q'aaq'.⁸Re' ransil i ruq'oral i QaJaaw Dios, i ruk'uyu'saj ye'aab' chiq yuuq'. Eh i ruk'uyu'saj ruuk' i ruq'oral taqe chiq yuuq' wilkeeb' chupaam i ye'aab', Cades.⁹Re' i QaJaaw Dios ruuk' i ruq'oral i ruk'uyu'saj taqe i tz'inuj chee'. Eh i rukanaa' chi ma' xta ruche'el wach taqe yuuq', eh chupaam i rupaat, chu'nchel kiye'wik ruloq'il.

¹⁰Re' i QaJaaw Dios intaaq'anik reh i kowlaj jab' noq i rub'an i elal ha'. Re' reh i reey wilik rajaawriik chi taaq'anik chi juneliik.¹¹Re' QaJaaw Dios inye'wik kajaawriik i rutinamiit. Eh i ruyeew keh i rusuqkiil k'uxliis. Re' reey David xut'iosej ree Dios i rutoob'jiik xb'aan¹WaJaaw nuDios, re' hin tinuloq'ej, ruum re' hat xat ko'linik weh, eh ma' xayeew ta q'ab' chi xinkikaqse'laaj taqe i ki-ixowanik nuwach.²WaJaaw nuDios, noq xnupahqaaj aweh chi naa kiin atoob'eem, xinak'aachrisaj wo' hoq.³WaJaaw nuDios, re' hat xat ko'linik weh. Noq ximponik nah kimik.

⁴Hat taq santo laj aj nimaneel, cha tz'uyej taq wach i QaJaaw Dios. Chaloq'ej taq, ruum re' reh santo i rub'ihnaal.⁵Re' reh, xa junk'aam i ruyeew i rujosq'iil chi qanaah, eh re' rotob'il chi juneliik i qak'achariik i ruyeew qeh. Atoob' nee qoh oq'ik chaq'ab', eh pan wahq'eq ruyeew wo' chik rusuqkiil qak'ux.

⁶Re' hin noq suq chik wilkiin, je' wili i xnuq'or: Ma' xta chik i ti' naawilom wach, kinki.⁷Xanaah re' Jaaw weht'al wo' naq chi re' hat ti ye'wik rukowiil nuk'ux. Eh noq ma' nuyeew ta chik nuk'ux awuuk', ruum i re', xchalik nuyo'jiik.

⁸WaJaaw nuDios, re' hin tinuq'o'reej, eh i nupahqaaj otob'il aweh. Je' wili nuq'or:⁹¿Chih chik neenutiq wach aweh chi hin chik kamnaq? ¿Chib'ih chik neenutiq wach aweh chi muqulkiin chik panjul? ¿Mi nee chik tiruloq'ej re' i nupoqil? ¿Mi konee ruq'or rib'iral re' chi xa re' wo' hat i korik?¹⁰WaJaaw nuDios, kinab'iraj tii, chaketelaaj nuwach, eh kinatoob'eej tii.

¹¹Re' hin ma' nukoj ta chik i nuq'eq' so', ruum re' hat xasutej chi rusuqkiil nuk'ux i ruti'kiil nuk'ux, xa kinsoninik chik ruum i rusuqkiil nuk'ux.¹²Ruum aj re', QaJaaw Dios, re' hin ma' jaruuj neentz'aplojik i nuuchii'. Ma' naa ta nukanaam rutz'uuyjiik awach. Eh juneliik naa nut'iosem awotob'il. Re' reey David xtiruyeew ruk'ux ruuk' i QaJaaw Dios¹QaJaaw Dios, xa awuuk' wo' hat i nuyeew nuk'ux, ruum i nayeew weh i nupahqaaj aweh. Re' hat nee kinako'leej ruum korik wach ak'ux.²Je' re' noq, kinab'iraj tii, kinako'leej chi jumehq'iil hat paat ab'aj ko'lemb'al iib' chi weh, ruum xa re' wo' hat manlik ko'len weh.

³Eh hat paat ab'aj ko'lemb'al iib' chi weh i hin, ruum xa re' wo' hat ti ko'linik weh. Ruum aj re' chak'am tii nub'eeh ruuk' aak'axb'al.⁴Re' taqe ki-ixowanik nuwach kikojom nuxirob'aal, kinawesaj ti chupaam, ruum xa re' wo' hat nee ti ko'linik weh.⁵QaJaaw Dios, re' hin panaq'ab' i nuq'asaj i wánjel nut'iosil. Eh inwaaj chi nee kinawesaj pan k'axik, ruum xa re' wo' hat, i hat i korik laj Dios.

⁶Re' hin awuuk' i hat i nuyeew i nuk'ux. Ruum aj re', ma' inwaaj ta kiwach i kiloq'inik taqe i reh xa tiyoox, xama' xta kajaawriik.⁷QaJaaw Dios, ruuk' aak'axb'al i nayeew rusuqkiil nuk'ux chi manlik. Eh re' hat inawil i ruti'kiil nuk'ux. Eh inawil chi xanyot'ik chik i wánima.⁸Weht'al i hin noq ma' xayeew ta q'ab' chi xinkikansaj taqe i ki-ixowanik nuwach, xayeew la' cho rukowiil nuk'ux.

⁹QaJaaw Dios, chaketelaaj tiinuwach ruum re' hin panyohb'aal wilkiin, re' naq'nuwach xak'ahchi' chi oq'ik ruum i ti' k'axik. Re' wánima, eh re' nuti'jolal xama' xta chik kaansil inwik'raaj.¹⁰Re' taqe ti' k'axik k'ahchi' nuk'ulum k'ahchi' rutoqom rooq i nuk'achariik. Ruum taqe rutz'irkiil nuwach k'ahchi' ruk'uhliik i waansil. Xa je' chik q'ojooj taqe nub'aqil noq inwik'raaj.

¹¹Eh re' taqe i ki-ixowanik nuwach, xa hin kib'ajb'al, re' taqe nuka'jaah nuk'ula't xa hin kise'lb'aal. Eh xa hin chik yohb'isaneel chi keh i kieht'alinik nuwach, eh xa kajiim chik kielik chi nuwach pamb'eeh.¹²Re' taqe re' ma' kink'ulik ta chik pankik'ux chi jumpech, xa je' chik hin kamnaq chikiwach. Eh xa je' chik hin ruxeer ak'al xaro chikiwach.¹³Re' hin imb'iraj taqe tinamit chi k'ahchi' kijask'uum chikiwach chib'ih i naa kianam weh, noq kinooj xa aha', panyohb'aal wilkiin. Eh inkiyejaa' wach i nukanteesjiik.

¹⁴Xa re' la', re' hin Jaaw, awuuk' i hat i nuyeew i nuk'ux, ruum weht'al chi re' hat, hat nuDios.¹⁵Re' nuk'achariik panaq'ab' wilik, kinako'leej pan kiq'ab' i ki-ixowanik nuwach, re' i kib'anik ti' k'axik weh.¹⁶QaJaaw Dios, re' hin, hin awaj kamanoom chayeew tii weh ak'axb'al. Chaketelaaj nuwach, kinako'leej.¹⁷QaJaaw Dios, i nupahqaaj nutoob'jiik aweh maa k'uhtaaj nuk'ixb'ilaal. Re' la' taqe i yiib' wach kina'ojb'al cha k'uhtaaj kik'ixb'ilaal, chakansaj taqe reh chi ma' nee ta chik kiq'orik.¹⁸Chatz'ap i kichii' i aj chukul q'orik, ruum re' keh inkib'aj, inkixowaaj wach, ma' imponik ta panaq'kiwach i korik wach ruk'ux.

¹⁹QaJaaw Dios, re' hat yohb'aal wach aawotob'il i nayeew chikinaah i kiyohlinik aweh. Eh inak'uhtaaj chikiwach i tinamit chi korik chi nak'ax taqe inkiyeew kik'ux awuuk'.²⁰Eh ruum chi wilkaat kuuk' chi kitoob'jiik xako'leej taqe chuwach i kiyejaam wach i yiib' wach kina'ojb'al. Re' wo' hat naa ako'liniik keh chikiwach imb'ajwik keh.

²¹Neeta naq inye'arik ruloq'il i QaJaaw Dios. Ruum ruuk' i ruk'axb'al xuyeew rukowiil nuk'ux noq xub'an taqe i sahchb'al k'uxliis wuuk' noq wilkiin panti' k'axik.²²QaJaaw Dios noq wilkiin panti' k'axik, xnukapaaj chi numemil chi ma' naa ta chik kiin atoob'eem. Eh noq xnupahqaaj aweh chi naa kiin atob'eem xinab'iraj wo' chaloq.

²³Re' taq i hat santo laj aj nimaneel cha k'ax taq i QaJaaw ruum re' reh incha'jinik keh i korik wach kik'ux. Eh re' taqe i nimaq kiwach i ruyeew taqe chutojariik i kimahk nik' wach i ruk'ul chi keh.²⁴Eh koowjoq taq ak'ux i hat, maa rub'an taq kiib' ak'ux, ruum ruuk' i QaJaaw Dios taq aye'em awánima. Re' reey David xupahqaaj kuyb'al ru mahk, eh xkuyarik wo' ru mahk¹Atoob' reh awach i kuyuuj, i sachooj chik chi jumpech chu'nchel ru mahk,²Atoob' reh awach i ma' xta k'isinoq i yiib' wach na'ojb'al i rub'an. Eh ma' xta k'isinoq ru mahk neenkan ruum i QaJaaw Dios.

³Eh noq ma' nupahqaaj ta naq kuyb'al numahk i hin, xama' nukuy ta naq chik taqe nuti'jolal ruum i ruti'kiil nuk'ux chu'nchel q'iij.⁴Ruum chi q'iij chi aq'ab' naq nayeew chi nunaah aq'ab' reh i rub'anariik weh i ti' k'axik, nik' wach noq inchiqik i uhtz'ub' ruum i rutz'a'iil i q'iij, xa je' chik re' i nuti'jolal noq inwik'raaj.

⁵Eh noq xnupahqaaj kuyb'al numahk, chu'nchel i numahk xnuq'or aweh. Eh xchalik panuk'ux chi xnupahqaaj kuyb'al numahk aweh. Re' hat QaJaaw Dios xakuy wo' numahk.

⁶Ruum aj re', nik' ti' wilkeeb' taqe korik wach kik'ux, i ruk'ul chi re' hat naa kaat kiq'o'reem kuuk', chi je' re' atoob' ta xa je' chik ink'u'loq runimaal elel ha' chikinaah taqe ti' k'axik ma' xta naa kuuchjiik ruum.⁷Re' hat naa ako'liniik weh, naa kiin ako'leem chuwach i yohb'aal. Eh naa nuk'erem nuchii', ruum naaweliik korik ruuk' i ko'lemb'al wiib' naa aye'em weh.

⁸Re' QaJaaw Dios je' wili i ruq'or: Re' hin k'ahchi' kaat wilom, eh neenuk'uhtaaj aweh taqe i ruk'ul chi naa a'nam, naa nukojom ana'ojb'al, eh nee nuk'uhtaaj aweh i b'eeh naa ak'amam.⁹Eh mo'-oq je' akab' ixoq kawáyu, mo'-oq je' akab' imaas kawáyu. Re' taqe re', ma' ki-ib'irinik taj, konkojarik b'ak'b'al ree kiju' ko ruuk' i re' kimek'arik kora'j nee kichalik re', inki.

¹⁰Re' yiib' wach kina'ojb'al naa ruchaliik i ti' k'axik chikinaah. Eh re' taqe i ruuk' i QaJaaw kiye'em i kik'ux xiik' naah i ruk'axb'al i ruyeew chikinaah.¹¹Re' taq i hat i tib'anik taq reh i rub'ehel, eh korik taq wach ana'ojb'al, suuqb'oq taq ak'ux ruuk' i QaJaaw Dios cha tz'uyej taq wach. Re' rutz'uyjiik wach i QaJaaw Dios chi t'iosb'al reh i rotob'il¹Re' taq i hat korik wach ak'ux, suuqb'oq taq ak'ux ruuk' i QaJaaw Dios cha tz'uyej taq wach.²Chatz'uyej taq wach ruuk' arpa i QaJaaw Dios. Chatz'uyej taq wach ruuk' chee' q'ooj wilik ruk'ahamil wach.³Chatz'uyej taq wach ruuk' ak' tz'uuy. Chaq'ojej taq aq'ooj chi loq'oomb'al reh i QaJaaw Dios.⁴Ruum re' i ruq'oral i QaJaaw Dios xti korik, re' chu'nchel i ruyejaam ink'uhtanik reh chi korik wach ruk'ux.⁵Re' QaJaaw Dios xtimponik chuwach i korik, ruch'ihil i rub'ehel. Eh re' ruk'axb'al wilik chi junsuut i wach ak'al.

⁶Re' i QaJaaw Dios xa ruuk' i ransil i ruq'oral xuyejaa' i taxaaj, je' wo' chu'nchel chib'ih jariik i wilkeeb' chupaam.⁷Re' wo' reh i molwik kiwach taqe ha' i rumol kiwach pantaq chaamlaj jul, eh i ruyejaa' taqe chii' palaw.

⁸Chayohleej taq wach i QaJaaw Dios i hat i wilkaat taq wach ak'al. Je' wo' taq i hat i k'acharik taq i na a'n chinaah i wach ak'al chayohleej taq i Dios.⁹Eh ruuk' wo' ransil i ruq'oral i Dios xkorjik chu'nchel i chib'ih jariik i wilik. Noq xuq'or i reh chi naa rukorjiik xkorjik wo' hoq.

¹⁰Re' QaJaaw Dios i rusach wach chi jumpech inkiyejaa' wach rub'aan chu'nchel i ma' kinimanik ta reh.¹¹Raaj i rukapaaj rub'aan i QaJaaw Dios reh, eh i ruyejaa' cho wach paránima, ma' jaruuj naa rusahchiik wach.¹²Atoob' reh i tinamit i re' k'achlik Dios i rukoj chi ruDios, re' wo' re' rusik'im cho wach chi rutinamiit.

¹³Re' QaJaaw Dios kopan taxaaj i rilow chaloq i tinamit wach ak'al, eh ko ar wo' rilow chaloq i kina'ojb'al.¹⁴Ko ar chupaam i ruye'aab' i rilow chaloq nik' wach i kik'achariik i tinamit wach ak'al.¹⁵Re' wo' QaJaaw Dios xyej-anik reh i kánima, ruum aj re', reht'al wo' chu'nchel chib'ih jariik i k'ahchi' keeb'.

¹⁶Ma' jino'q i reey neenko'ljik xa ruum i ruk'ihaal soldado. Eh re' kow i rub'an riib' ma' nee ta ruko'leej riib' xa ruum chi ma' k'isiin i ransil.¹⁷Atoob' ta ruuk' kawáyu neerutik'aa' q'aq'inik jino'q xama' nee ta wo' ruko'leej riib'. Eh nik' ta naq kowiil neerub'an riib' xama' nee ta wo' ruko'leej riib'.

¹⁸Raaj taqe i kiye'wik runimaal wach, je' wo' taqe i kiye'em kik'ux ruuk' i QaJaaw Dios re' wo' reh incha'jinik keh.¹⁹Eh nee wo' inko'ljik i kánima ruum i qajaaw chuwach i kimik, eh ma' nee ta ruyeew q'ab' chi nee kikimik ruum wi'jaleel.

²⁰Re' hoj ruuk' QaJaaw Dios qaye'em qak'ux, ruum re' reh intoob'inik qeh, eh i ruko'leej i qánima.²¹Eh ma' k'isiin ta nsuuqb'ik i qánima ruuk' i QaJaaw Dios ruum chi ch'iklik qak'ux ruuk' i rusantolaj b'ihnaal.²²QaJaaw Dios, nee ta tiinaketelaaj qawach, je' rukab' inqaaj chi neena a'n quuk'. Re' QaJaaw Dios i ruko'leej taqe i korik wach kik'ux¹Re' hin naa nuloq'em i QaJaaw Dios chi juneliik. Eh xa eliik re' reh naa nuye'em ruloq'il ruuk' nuchii'.²Re' hin naa rusuqb'iik nuk'ux ruuk' i QaJaaw Dios. Eh noq naa kib'iram i xama' nimaq ta kiwach naa rusuuqb'iik kik'ux.³Qaloq'ej taq i QaJaaw Dios awuuk', jinaj-oq taq wach qak'ux chuye'ariik runimaal wach.

⁴Eh noq xnupahqaaj i rotob'il i QaJaaw Dios xirib'iraj wo' hoq. Eh xiresaj wo' chupaam chu'nchel i yohb'aal.⁵Awach inkipahqaaj i rotob'il i QaJaaw Dios insaqumb'eesjik paam i kikapeb'aal. Eh ma' jaruuj neenk'uhtjik kik'ixb'ilaal.⁶Eh noq ti' wilkiin xnuq'o'reej i QaJaaw Dios xirib'iraj wo' hoq. Re' reh xiresaj chupaam chu'nchel i ruti'kiil nuk'ux.⁷Re' i ruánjel i QaJaaw Dios wilik chi kijunsuut i kiyohlinik ree reh, eh i ruko'leej taqe.⁸Chawilow taq, chakoj taq rehtaal chi re' QaJaaw Dios xiik' naah rotob'il. Ruum aj re' q'e' atoob' reh awach i ruuk' i QaJaaw i ruyeew i ruk'ux.⁹Eh chayohleej taq i QaJaaw Dios i hat santo laj raj nimaneel. Ruum awach kiyohlinik wach i reh inye'arik keh i ajwaal wach chi keh.¹⁰Re' taqe i ma' kikojwik ta ree Dios, inkikuy kiwa'. Je' rukab' noq inkikuy kiwa' i kaq b'ahlam Eh re' taqe i kisik'wik reh i Dios inye'arik keh chu'nchel i ajwaal wach chi keh.

¹¹Kim chab'iraj taq i hat, i wak'uun wixq'uun noq wilkaat. Re' hin naa nuk'uhtaam taq aweh i ruyohljiik i QaJaaw Dios.¹²Eh wila' re' hat inawaaj chi najt rooq ak'achariik. Eh inawaaj awilom wach i suq laj k'acharik,¹³inchol awik'raam awiib' chi manelik chee yiib' wach q'orik ju' aawaaq'. Eh manelik chaloq i chukuj q'orik xaq aachii'.¹⁴Chakanaa' rub'aan i yiib' wach na'ojb'al, xa re' chik i holohik cha a'n. Eh cha sik' i wihik pansuqkiil k'uxliis maakanaa' chik rub'aan.

¹⁵Ruum re' taqe korik wach kik'ux re' QaJaaw Dios incha'jinik keh, eh i nib'irjik i kitiij.¹⁶Eh re' taqe i yiib' wach kib'anik i ruyeew i rujosq'iil i Dios chikinaah. Eh i rusach kiwach chinaah i wach ak'al reh chi ma' awach ta chik naa ruq'oriik kib'iral.¹⁷Eh re' taqe korik wach kik'ux noq inkipahqaaj i rotob'il i QaJaaw Dios ki-ib'irjik wo' hoq, i resaj taqe chupaam chu'nchel i ruti'kiil kik'ux.¹⁸Re' QaJaaw Dios xa wilik wo' kuuk' chi kitoob'jiik i ti' wilik i kánima. Eh i ruko'leej taqe i xama' naa ta chik keliik chupaam i ti' k'axik noq inkik'raaj.

¹⁹Re' korik wach ruk'ux xiik' naah i ti' k'axik inchalik chinaah. Xa re' la', re' wo' QaJaaw Dios ineesanik reh chupaam.²⁰Re' wo' reh naa ruko'liniik reh chi ma' jino'q i rub'aqil naakitoqom.²¹Re' yiib' wach runa'ojb'al re' wo' re' naa ruk'amwiik reh panti' k'axik. Eh re' i ki-ixowanik wach i korik wach ruk'ux naa ruq'atariik i q'orik chikinaah.²²Re' QaJaaw Dios inko'linik riij i kik'achariik taqe rumoso. Eh ma' naa ta kiye'ariik pantojb'al mahk, ruuk' i reh inkiyeew kik'ux. Re' tiij xub'an i reey David pahqb'al reh i rotob'il i QaJaaw Dios¹QaJaaw Dios, kinatoob'eej, chaq'at kiwach i ki-ixowanik nuwach. Eh chak'ulb'ilej taqe i peleto inki a'n wuuk'.²Je'-oq pulato ch'ihch' ko'lemb'al iib' awajaawriik. Eh je'-oq cha chop cha ch'ihch' reh chi nee kinako'leej.³Chayeew weh awajaawriik je'-oq jino'q q'aslaj ch'ihch', reh chi nee kinako'leej pan kiq'ab' i ki-ixowanik nuwach. Eh cha q'or chi re' hat naa ako'liniik weh.

⁴Chi je' re', neenkimol chi elik ruum kik'ixiik taqe inkaaj nukanteesjiik. Eh nee wo' inkimol chi elik ruum kik'ixiik taqe inkaaj kiyojom nuk'ux.⁵Neeta naq imb'aan keh ruum i ruánjel i QaJaaw Dios, je' rukab' imb'aan reh i rutuus ixiim noq inkutarik reje wulu' ruum i teew.⁶Je' ta naq neenq'equmrik, je' ta naq neenkalb'eesjik i kib'eeh ruum i ruánjel i QaJaaw Dios.

⁷Ruum re' keh xkikoj nuxirob'aal, xkik'ot i chaamlaj jul reh chi nee kinq'ehb'ik chupaam, xanaah re' xama' xta wo' numahk.⁸Eh nee ta naq insacharik kiwach chi ma' keht'al, xirob' kiyejaam, re' ta naq i keh neekiqajik chupaam. Eh re' ta naq i keh neekiq'ehb'ik chupaam i chaamlaj jul kik'otom.

⁹Chi je' re', ma' k'isiin ta neensuuqb'ik nuk'ux i hin, ruum neenwilow chi re' QaJaaw Dios neenko'linik weh.¹⁰Eh chu'nchel i wánima neenuq'or chi je' wili: QaJaaw Dios ma' awach ta chi je' rukab' i hat ruum re' taqe ti' wilkeeb' xako'leej taqe pan kiq'ab' i kow kiib'. Xako'leej taqe i neb'aa' pan kiq'ab' inq'uchwik chib'ih keh, kinko'q.

¹¹Wilik taqe yiib' wach kina'ojb'al kitz'aqwik numahk, kinkipech'uj, xanaah re' xama' xta wo' numahk.¹²Re' hin i nub'an otob'il keh re' chik i yiib' wach inki a'n weh chi jilow, xa re' nkaaj chi inyoj nuk'ux.¹³Eh noq xkian i yaab'ilaal xnukoj i nuq'eq' so' ruum ti' nuk'ux chikiij. Eh chu'nchel nuk'ux xnuk'ihpechej i nutiij chikiij chi ma' nub'anam ta nuwa' nuhaa'.¹⁴Re' hin xtib'ik nuk'ux chikiij, je' taqe wamigo, je' taqe was nuchaaq' xnub'an keh. Nik' wach noq intib'ik nuk'ux chi riij i nutuut, je' re' i xnub'an kekeh, ma' xnukanaa' ta wo' naq i tiij chikiij.

¹⁵Eh noq xinq'ehb'ik panti' k'axik i hin, re' keh junokiik taqe chi nukaqse'ljiik, xa je' cho ma' weht'al kiwach xkian kiib'. Eh xkimol kiib' ma' inkikanaa' ta rub'aan weh i ti' k'axik.¹⁶Xa ma' suq ta chik i nub'an kuum ruum xa kinkikaqse'laaj chik, xa nkiqirich'eej chik naah ikehruum i kijosq'iil chi nunaah.

¹⁷QaJaaw Dios, ¿Ko nik' chik najtiil naa nuk'ulum i ti' wili? Jaaw chako'leej tii wánima, chako'leej riij i nuk'achariik, pan kiq'ab' i je' taqe josq'laj kaq b'ahlam re' re'¹⁸Chi je' re', neenuq'or rib'iral aawotob'il chikiwach i ruk'ihaal tinamiit inkimol kiib'. Eh neenuyeew aaloq'il xa aha' pantaq ruk'ihaal tinamit.

¹⁹Reh chi ma' nee ta kielik korik i ki-ixowanik nuwach chi xama' xtarub'ehel. Eh ni xata re' naq' kiwach nee nkimutz'muteej ruum i ma' nkaaj ta nuwach chi xama' xtarub'ehel.²⁰Eh ma' nkisik' taj i wihik pansuqkiil k'uxliis. Re' la' i yiib' wach inkiyejaa' wach chi jot'b'al keh tinamit ma' xtaj i yiib' wach k'ahchi' keeb'.²¹Re' keh xa nkik'er chik kichii' chuq'orariik chi je' wili: Atoob' tii re' hoj xti xqilow ruuk' naq'qawach chib'ih i xub'an, inki taqe chi wiij.

²²QaJaaw Dios, re' hat aweht'al chi ma' xta numahk. Maacanaa' chi je' re' inki a'n weh. Eh makinakanaa' chi wutkeel.²³Wajaaw hat nuDios, kinab'iraj tii, okeen chi wiij. Kinako'leej ruum re' hat aweht'al chi korik wach nuk'ux.²⁴Eh chaq'at q'orik chi nunaah ruuk' irub'ehel ruum re' hat korik wach ak'ux. Reh chi ma' nee ta kinkikaqse'laaj taqe i ki-ixowanik nuwach.²⁵Reh chi ma' nee ta nkiq'or chi je' wili: Xti je' aj wo' naq re' inqaaj chi naa ruk'ulum re', eh xti xqajot' chi manlik, ma' inko'q ta taqe.²⁶Ma' k'isiin la' neenchalik kik'ixiik taqe xasuq chik kik'ux noq k'ahchi' nuk'ulum i ti' k'axik. Eh ma' k'isiin wo' neenchalik kik'ixiik i xiik' naah i kajaawriik inki a'n kiib' chi nuwach i hin.

²⁷Eh re' inkaaj chi naaweliik korik nee ta naq kitz'uyinik ruum rusuqkiil kik'ux, nee ta naq inkiq'or chi je' wili: Re' QaJaaw Dios nim rajaawriik, q'e' imponik chuwach chi suq naa ruwihiik i rumoso, inko'q ta naq taqe.²⁸Re' hin QaJaaw Dios, ruuk' nuchii' naa nuq'orom chi korik wach ak'ux. Eh chu'nchel q'iij naa kaat nuloq'em. Re' yiib' wach na'ojb'al, eh re' i ruk'axb'al i Dios¹Re' imb'anik reh i yiib' wach na'ojb'al, xa re' wo' re' wilik cho paránima, ma' rukapaaj taj chi yohljik iraaj i Dios.²Re' reh iraaj chi naa ruye'ariik runimaal wach, ma' rukoj ta rehtaal chi yiib' wach i rub'an i ma' rukapaaj ta rukanab'jiik i mahk.³Xa ma' holohik ta imb'anik, chukul q'orik, xukanaa' taqe rub'aan i holohik chi b'anarik, xukanaa' wo' rub'aan otob'il.⁴Atoob' ta nah ruch'aht wilik, ar i ruyejaa' wach rub'aan i yiib' wach na'ojb'al. Ar choplik chupaam i yiib' wach b'eeh, ma' jaruuj ta rukanaa' rub'aan i ma' holohik taj.

⁵Raaj aak'axb'al i hat QaJaaw Dios imponik kopan taxaaj. Eh re' suq kiil k'uxliis i nayeew imponik ko aha' wilik cho wii' i suutz'.⁶Re' rukorkiil wach ana'ojb'al, ma' xata je' najtiil naah i nimaq taq yuuq'. Eh re' taqe ruq'or aak'uhb'aal ma' xata je' chamiil paam i palaw. Jaaw re' wo' hat ticha'jinik keh, i winaq je' wo' taqe chikop.

⁷QaJaaw Dios, yohb'aal inche wach i ak'axb'al. Ruum xa awuuk' wo' hat inkisik' ko'lemb'al kiib' taqe awak'uun awixq'uun, ruuk' aaxiik' i namoheej taqe.⁸Re' hat ti ye'wik cho keh chi manlik pan aloq'laj aa ye'aab' chu'nchel i ajwaal wach chi keh. Eh k'achlik rooq ha' i nayeew keh chi uuk'jik.⁹Ruum xa re' wo' hat ti ye'wik reh i k'acharik, re' wo' hat tisaqumb'isanik paam i qakapeb'aal reh chi neenqareq i manlik saqum.¹⁰QaJaaw Dios, juneliik ta naq nee naketelaaj kiwach i kieht'alinik awach. Eh re' i rub'ehel cha a'n kuuk' i korik wach kik'ux.¹¹Eh maayeew q'ab' chi nee kinkiyeq' pankooq i nimaq kiwach. Eh chi neenkian weh iraaj ma' raj b'anarik i yiib' wach kina'ojb'al.¹²Re' hin weht'al chi re' taqe yiib' wach kina'ojb'al naa rub'aan keh. Naa rusachariik kiwach, eh ma' naa ta chik kiwuktiik chi jumpech. Re' ruye'ariik k'uxliis ruuk' i Dios¹Manchalik aajosq'iil kuum i yiib' wach kina'ojb'al, eh maawixowaaj kiwach i ma' holohik ta kib'anik.²Ruum re' keh je' kiyok'arik ch'ahn naa rub'aan. Eh xa je' kichiqiik xaq ch'ahn na' ki-ohoq kuxoq.

³Re' hat ruuk' i QaJaaw Dios cha chop ak'ux, re' holohik cha a'n, korik-oq wach ak'ux, chi je' re' suq naa aak'achariik chupaam i ye'aab' wilkaat wii'.⁴Eh cha k'ax i QaJaaw Dios chi korik, re' reh nee ruyeew aweh taqe inapahqaaj reh chu'nchel awánima.

⁵Chayeew pan q'ab' i QaJaaw Dios ak'achariik, eh cha ch'ikaa' ak'ux ruuk', re' reh neentoob'inik aweh.⁶Re' reh nee rukanaa' chi xasaqum chik wach ana'ojb'al, xa je' chik rukab' i rusaqumaal i q'iij noq imponik kab'lajora.

⁷Maa k'er aachii' chuwach i QaJaaw Dios, chawuy-eej chi q'uun i rotob'il. Manchalik aajosq'iil ruuk' i nelik korik paruk'achariik, je' wo' ruuk' inyej-anik wach i yiib' wach chi b'anarik.

⁸Je' re' noq, cha kanaa' i josq'iil, ma' awach ak'ahej, ruum re' taqe re' xa ruman i ti' k'axik i ruk'am chaloq.⁹Re' taqe i yiib' wach kina'ojb'al naa rusahchiik kiwach. Eh re' taqe i kichopom kik'ux ruuk' i QaJaaw Dios naakehchaam i ye'aab' q'orooj cho rib'iral keh.

¹⁰Re' taqe i yiib' wach kina'ojb'al ilook' insahchik kiwach, atoob' ta nee naq chik inooj asik' pan kiye'aab' ma' naa ta chik areqem taqe ar.¹¹Raaj taqe i xa kiloch'ik naakehchaam i ye'aab' q'orooj rib'iral keh. Eh naa kianam i rusuqkiil i wihik pansuqkiil k'uxliis.¹²Re' i yiib' wach runa'ojb'al i ruyejaa' wach chi naa rub'anam reh i korik wach ruk'ux, eh xa ruqirich'eej chik naah i reeh chinaah.¹³Re' QaJaaw Dios ruse'laaj i yiib' wach runa'ojb'al, ruum reht'al i reh chi ilook' inye'arik chutojariik i ru mahk.

¹⁴Re' taqe i yiib' wach kina'ojb'al inkesaj chaloq i kiq'aslaj ch'ihch', je' wo' kiflecha kantesb'al keh i k'axik wilkeeb', taqe i xama' nimaq ta kiwach ruch'ihil taqe i korik wach kik'ux.¹⁵Xanaah re', xa re' wo' keh naa kikanteesjiik ruuk' i kiq'aslaj ch'ihch' eh re' kiflecha naa rutoqib'iik.

¹⁶Re' taqe korik wach kik'ux xa kok' taq tii chib'ih keh wilik, xa re' la' xiik' naah loq'il chuwach i kib'ehomal i yiib' wach kina'ojb'al.¹⁷Ruum re' QaJaaw Dios naa ruye'em q'ab' chi naa rub'aan keh i yiib' wach kina'ojb'al. Eh re' taqe holohik kina'ojb'al naa rutoob'eem taqe.

¹⁸Re' QaJaaw Dios reht'al nik' najtiil naa kik'achariik i korik wach kik'ux. Eh re' kikooch naa ruye'ariik ma' naa ta rusahchiik wach.¹⁹Re' keh ma' naa ta kik'uhtaam kik'ixb'ilaal na' chaloq i ti' k'axik. Eh na' chaloq i wi'jaleel xanaa wo' kianam kiwa' kihaa' chi manlik.

²⁰Eh re' taqe i yiib' wach kina'ojb'al naakiqopiik je' rukab' i sohk'. Eh re' taqe i ki-ixowanik wach i QaJaaw Dios naa rusahchiik kiwach, je' rukab' noq sahchik wach isib'.

²¹Re' yiib' wach runa'ojb'al noq i rub'an rukemeel ma' ruyeew ta chik jilow. Raaj i korik wach ruk'ux reh i ruyeew jilow i rukemeel.²²Re' taqe irutoob'eej i QaJaaw Dios, naakehchaam i ye'aab' q'orooj cho rib'iral keh. Raaj taqe i ma' imponik ta chuwach i kina'ojb'al ma' naa ta kik'ulariik cho ar.

²³Re' QaJaaw Dios ink'amwik rub'eeh i korik wach ruk'ux. Eh irutoob'eej chub'anariik imponik chuwach i reh.²⁴Re' korik wach ruk'ux atoob' ta neenq'ehb'ik panti' k'axik ma' q'ehb'ik ta naa rub'anam chi jumpech, ruum re' QaJaaw Dios naa ruksaniik reh.

²⁵Re' hin xnub'an chaloq aak'uniil, yu'naak xin rijb'ik chik ma' jank'al ta inwilow i korik wach ruk'ux chi kanamaj ta ruum i Dios. Eh ma' jank'al ta inwilow taqe i riih rumaam chi pahqanik kiwa' chi' taq paat.²⁶Juneliik la' wilik i ketelenik wachiis ruuk', i ruyeew chi kemeel i chib'ih reh, eh re' taqe riih rumaam kitoob'jiik ruum i QaJaaw Dios.

²⁷Chakanaa' rub'aan i yiib' wach na'ojb'al, re' chik i holohik cha a'n, chi je' re' neen wihik aak'achariik chi juneliik.²⁸Re' QaJaaw Dios imponik chuwach i korik. Eh re' taqe korik wach kik'ux ruuk' i reh ma' rukanaa' ta taqe. Eh re' taqe yiib' wach kina'ojb'al i rusach kiwach chi kiih chi kimaam.²⁹Re' taqe korik wach kik'ux naakehchaam i ye'aab' eh ar naa kik'achariik chi juneliik.

³⁰Re' korik wach ruk'ux wilik runa'ojb'al ruuk' taqe chib'ih i ruq'or, eh re' wo' taqe rub'ehel i ruq'or.³¹Ruum re' i ruk'uhb'aal i ruDios wilik cho paránima, ruum i re' ma' xta nq'ehb'ik wii'.

³²Re' yiib' wach runa'ojb'al xak'ahchi' chutahariik i korik wach ruk'ux, eh i rusik' chi riij nik' wach noq naa rukansam.³³Xa re' la', re' QaJaaw Dios ma' naa ta ruye'em q'ab' chi naa rub'anam reh i korik wach ruk'ux, ma' naa ta wo' runimam na'kikoj ru mahk.

³⁴Re' hat chayeew ak'ux ruuk' i QaJaaw Dios. Eh cha nimaj i ruk'uhb'aal, re' reh naa ruye'em awajaawriik chi naa awehchaam chi akooch i ye'aab'. Eh naa awilom na' sacharoq kiwach i aj mahk.

³⁵Re' hin xwilow wo' naq i yiib' wach runa'ojb'al chi xa holohik chik i rub'an riib', xa je' naq chik rukab' i rax laj chee' chakaltee' wilik ar Líbano.³⁶Xa re' la', chik imb'anik reh xa xooj wo' hoq, xa xsacharik wo' wach, xnusik' naq chik ma' aha' ta chik xwilow wach.

³⁷Chakoj rehtaal, i xa atoob', eh korik wach ruk'ux. Re' reh naa rilom wach i suq laj wihik.³⁸Re' taqe i yiib' wach kina'ojb'al i ma' kinimanik taj naa rusahchiik kiwach. Eh naa rusachariik kiwach kak'uun kixq'uun.

³⁹Re' taqe korik wach kik'ux re' QaJaaw Dios inko'linik keh chupaam i ti' k'axik, re' wo' reh inye'wik rukowiil kik'ux.⁴⁰Re' QaJaaw Dios intoob'inik keh, reh chi ma' xta ki uchjik, i ruko'leej taqe pan kiq'ab' i yiib' wach kina'ojb'al, ruum ruuk' wo' reh xkisik' ko'lb'al kiib'. Re' tiij xub'an i reey David noq xuyot' i ruk'ux chi riij i ru mahk¹QaJaaw Dios, ma' ta naq neekinaq'il ruuk' aajosq'iil. Eh ma' ta naq nee kinayeew chutojariik i numahk ruuk' aajosq'iil.²Re' hin je' naa ruuk' flecha k'ahchi' a'nam ti' k'axik weh. Je' naa xayeew cho chi nunaah i rahliil aaq'ab'.

³Ruum taqe numahk xayeew aajosq'iil chi nunaah, ruum aj re' chu'nchel i nuti'jolal xiik' naah ti'kiil wilik. Eh re' taqe nub'aqil ma' suq ta wilkeeb'.⁴Re' taqe nuyiib' wach na'ojb'al xumol riib' chi nunaah, xa je' chik rukab' ahl laj ihq xama' nukuy ta chik.

⁵Ruum i rutehkiil nuwach xooj chi nimaal i ruti'kiil nuk'ux je' rukab' noq inooj chi nimaal q'aah.⁶Re' hin xa kink'utzik chik chu'nchel q'iij ma' xta rukowiil nuk'ux noq inwik'raaj.⁷Ruum re' hin xa eliik je' tz'a' wiij, chu'nchel i nuti'jolal wilik ruyab'ilaal noq inwik'raaj.⁸Xa t'aqlik chik i nuti'jolal, xama' xta chik waansil inwik'raaj. Eh inchalik woq'iim ruum i ruti'kiil i wánima.

⁹QaJaaw Dios, re' hat aweht'al chu'nchel i k'ahchi' nukapaam rub'aan. Eh pan saqum wilik chawach chu'nchel i k'ahchi' nupahqaam aweh.¹⁰Re' wánima xa tenej chik riib' inwik'raaj. Xa ma' xta chik waansil. Eh re' naq'nuwach k'ahchi' rupohyiik paam inwik'raaj.¹¹Re' taqe i naah wamigo ruch'ihil taqe i ma' tokoom ta wuuk' ma' nkijil ta cho kiib' wuuk' ruum i nuti'kiil.

¹²Eh re' taqe inkaaj nukanteesjiik je' naankikoj nuxo'reel. Re' taqe inkaaj nujot'ariik ma' holohik ta kiq'orik chi wiij. Chu'nchel q'iij inkiyejaa' wach chib'ih i naa kianam weh.

¹³Xa re' la', re' hin xa je' ma' imb'iraj i nub'an wiib' chib'ih inkiq'or. Eh xa je' hin meem i nub'an wiib' xama' xta wo' i xnuq'or keh.¹⁴Re' hin xa je' nukab' jino'q i ma' rib'iraj ta q'orik chi jumpech. Eh ma' nchol ta q'orik reh chi nee ta ruko'leej riib'.

¹⁵WaJaaw hat nuDios, inwuy-eej awotob'il, re' hat naa aye'wiik weh i nupahqaaj aweh.¹⁶Eh xnuq'or chi ma' ta naq nee kinkikaqse'laaj, ma' ta naq nee kinq'ehb'ik panti' k'axik, reh chi ma' nee ta nsuuqb'ik kik'ux.

¹⁷Xti korik noq xa k'isiin chik ma' kinq'ehb'ik pamahk, re' nuti'kiil ma' kirukanaa' ta jumehq'-oq.¹⁸Yu'naak naa nupahqaam kuyb'al numahk, ruum q'e' ti' nuk'ux ruum taqe i nub'an.¹⁹Re' taqe i ki-ixowanik nuwach kow inki a'n kiib', xi k'ihaaxb'ik, yohb'aal kiwach i ma' ki ajwanik ta nuwach chi xama' xta rub'ehel.²⁰Re' otob'il i nub'an yiib' wach na'ojb'al inkitoj riij weh. Eh q'e' inkixow nuwach ruum inkilow chi ma' nukanaa' ta rub'aan i holohik laj na'ojb'al.

²¹WaJaaw, hat nuDios, makinakanaa' chi wutkeel. Maa kinaq'eb' chi riij ak'ux.²²QaJaaw Dios, hat waj ko'loom, kinatoob'eej tii chi jumehq'iil. Re' noq xuq'or i reey David chi xama' najt ta rooq i k'acharik ayu' wach ak'al¹Re' hin xnuq'or naq chi naa wik'raam wiib' ruuk' i nuna'ojb'al, chi ma' naa ta numahkuniik ruuk' i ju' waaq'. Eh chi naa naq nutz'apam i nuchii' noq ko wilkeeb' ayu' i yiib' wach kina'ojb'al.²Re' hin xa je' hin meem xnub'an, wiib' ma' xta nuq'or. Ni xata naq chi riij i holohik xinq'orik. Xa re' la', re' nuti'kiil xooj chunimaal.³Re' wánima xa nyot'ik chik, eh noq kinokik chukapeb'jiik riij i k'achi' nuk'ulum, xa je' chik inqop ruq'aq'al i wánima noq inwik'raaj, ruum i re' kow xnuq'or chi je' wili:

⁴QaJaaw Dios inwaaj chi nee nayeew weh chi naab'jik chib'ih naa wojiik kuxoq wii'. Eh nik' chik najtiil naa nuk'achariik ayu' wach ak'al.⁵Mi xama' najt ta rooq i nuk'achariik naa aye'em ayu' wach ak'al. Korik re' nuk'achariik xama' xta tz'aaq chawach, ruum re' k'acharik ayu' wach ak'al xa je' nik'ik junhuup chi teew.⁶Re' i k'achareel ayu' wach ak'al, xa je' nik'ik muuj i ruk'achariik. Xa ma' xta neerutiq reh chi nee rumol wach rub'ehomal, ruum ma' reht'al taj awach aj eh naa rukahniik.

⁷QaJaaw Dios, yu'naak ma' awach ta chik i neenwuy-eej chi nee kirutob'eej, ruum xa awuuk' wo' hat ch'iklik nuk'ux.⁸Je' re' noq, cha a'n otob'il kinako'leej chupaam taqe numahk, maayeew q'ab' chi nee kinkikaqse'laaj taqe i ma' xta kina'ojb'al.⁹QaJaaw Dios, re' hin xa je' ma' kinchol q'orik xnub'an wiib', xama' xta xnuq'or chi riij i xnuk'ul, ruum re' hat aweht'al chib'ih i na a'n wuuk'.¹⁰Chakuy manlik i tojb'al numahk xayeew. Re' hin xakimik chik weh noq inwik'raaj ruum i ti' k'axik xayeew cho chi nunaah.¹¹Re' hat i nayeew chutojariik i ru mahk awach inawaaj akojom runa'ojb'al, eh nayeew q'ab' chi nk'uxarik ruum i rumohol taqe i q'e' looq' reh. Je' re' noq, chu'nchel i k'achareel ayu' wach ak'al xa je' ki-ik'ik junhuup chi teew.

¹²QaJaaw Dios chab'iraj tii weh i nutiij. Chab'iraj i nuq'or aweh. Maacanaa' chi je' re' i nupahqaaj aweh ruuk' oq'ik. Ruum xa hin ik'al b'eeh ayu', je' rukab' noq xi ik'ik chi k'acharik taqe i numaam wati't¹³QaJaaw Dios chayeew pee chik cho k'isinoq rusuqkiil nuk'ux noq komajaa' kinkimik, kinki. Re' reey David xut'iosej reh i QaJaaw Dios parutz'uuy ruum xehteesjik panti' k'axik¹Re' hin ruuk' q'unil xwuy-eej i rotob'il i QaJaaw Dios, korehtaal xirib'iraj. Eh xuyeew wo' weh i xnupahqaaj reh.²Xiresaj cho chupaam runimaal ruti'kiil k'uxliis je' naa pan ch'uwa' xiresaj chaloq. Eh je' naa chinaah ab'aj xuyeew i wooq reh chi ma' nee ta chik kinsutinik chi wiij.³Eh xuyeew weh i QaJaaw Dios chi tz'uuyjik jinaj i ak'laj tz'uuy loq'oomb'al reh. Re' wili ma' k'isiin naa kilwiik reh, ruuk' i re' naakiyohleem, eh naakiye'em kik'ux ruuk' i QaJaaw Dios.

⁴Atoob' reh awach i ruyeew ruk'ux ruuk' i QaJaaw Dios, ma' ruk'am ta naah inki a'n i yiib' wach kina'ojb'al. Eh ni xata ruloq'ej taqe i tiyoox.⁵WaJaaw nuDios, ma' k'isiin i sahchb'al k'uxliis xa a'n quuk' ruuk' aawotob'il, xa eliik qoh akapaaj. Ma' awach ta chik jino'q neemb'anik i na a'n. Re' hin inwaaj naq nutusum wach chi ju'junaal taqe i na a'n, xa re' la' nee kinsahchik chuq'orariik.⁶Re' hat ma' imponik ta chawach i mayiij, je' wo' i limóxna. Ma' nawaaj ta chi nk'atarik i chikop chi mayiij wach artaal. Xateh la' nuxikin reh chi xnureq chi riij.⁷Re' hin je' wili i xnuq'or: QaJaaw Dios ayu' wilkiin chub'anariik, je' rukab' i ruq'or i tz'ihb'amaj cho chi wiij pan santo laj huuj.⁸WaJaaw nuDios, re' hin imponik chi nuwach rub'anariik inawaaj i hat. Eh re' aak'uhb'aal wilik pan wánima chi juneliik.

⁹Re' hin xnuyeew chi naab'jik i rukorkiil wach ak'ux keh ruk'ihaal chi awak'uun awixq'uun. Re' hat aweht'al chi ma' nukanaam ta ruq'orariik rib'iral aaloq'il.¹⁰Ma' nukanaam ta ruq'orariik i rukorkiil wach ak'ux, i nuq'or la' rib'iral chi q'e' hat atoob', eh chi hat aj Ko'loom. Je' re' noq ma' jank'al ta nukeb'aa' chikiwach i ruk'ihaal chi awak'uun awixq'uun i k'axooj i na a'n.

¹¹QaJaaw Dios, maakanaa' ruketeljiik nuwach, nee ta la' naq kinako'leej chi juneliik ruuk' aak'axb'al, ruuk' i korik.¹²Re' hin yohb'aal wach i ti' k'axik k'ahchi' nuk'ulum. K'ahchi' ruk'isimb'iik nuk'ux ruum taqe i numahk, je' nche k'ahchi' inche rupohyiik paam i naq'nuwach noq inwik'raaj. Xti xiik' naah i numahk, ma' xata je' k'ihaal i rismaal i nunaah, ma' xta chik rukowiil nuk'ux inwik'raaj.

¹³QaJaaw Dios, cha kuy kinako'leej tii. Eh kinatoob'eej chi jumehq'iil.¹⁴Neeta naq kikahnik chi xase'lb'al chik taqe inkaaj nukanteesjiik. Neeta naq inkimol chi elik ruum kik'ixiik taqe i xa re' i yiib' wach na'ojb'al inkikapaaj chi wiij.¹⁵Neeta naq inkimol chi elik ruum kik'ixiik taqe i kikaqse'lanik weh.

¹⁶Eh chu'nchel i kisik'wik aweh nee ta naq insuuqb'ik kik'ux. Re' taqe ki ajwanik reh i ko'lemb'al iib' i nayeew i hat, nee ta naq inkiq'or chi je' wili: nim wach i QaJaaw Dios, inko'q ta naq taqe.¹⁷QaJaaw Dios, ro'q ta q'e' ketel nuwach, atoob' ta q'e' ti' nuk'ux, re' hat naa kiin akapaam ruum re' hat titoob'inik weh. Eh nee kinawesaj chupaam i ti' k'axik i hat nuDios. Re' reey David xupahqaaj parutiij reh i Dios chi naa ruk'achreesjiik ruuk' i ti' wilik wii'¹Atoob' reh awach intoob'inik reh i ma' kow ta ruk'ux i ti' wilik, ruum re' i QaJaaw Dios naa ruko'liniik reh panti' k'axik.²Re' QaJaaw Dios naa rutoob'iniik reh, naa ruye'ariik ruk'achariik, naa ruye'ariik i rusuqkiil ruk'ux. Ma' naa ta ruye'em q'ab' i QaJaaw chi naa rub'aan reh kuum i aj ixowaal.³Re' QaJaaw Dios naa ruye'wiik rukowiil ruk'ux noq naa ruwihiik pan yokaab'. Eh naa ruk'achreesjiik ruuk' i ruyab'ilaal.

⁴Re' hin je' wili xnuq'or: QaJaaw Dios, chaketelaaj nuwach, atoob' ta ximahkunik chawach kina k'achrisaj ruuk' i nuti'kiil, kinki.⁵Eh re' taqe ki-ixowanik nuwach je' wili inkiq'or chi wiij: ¿Jaruuj inkimik? ¿Xti jaruuj insahchik wach i rub'ihnaal? inki taqe.⁶Noq kik'ulik chi wula'jiik, xakojol wehtaal kik'ulik. Eh noq kielik reje wuuk' xa re' chik inuk'utjiik inki a'n pamb'eeh.

⁷Re' taqe i ki-ixowanik nuwach inkimol kiib' chi nub'ajariik, inkikapaaj i keh chi ruum numahk k'ahchi' nuk'ulum i ti' k'axik.⁸Eh je' wili inkiq'or chi wiij: Re' ruyab'ilaal re' aj yahm inye'wik chinaah. Je' re' noq xqajik pan yokaab', ma' jaruuj chik naa ruktiik inki taqe.⁹Eh re' naq i naah wamigo i ch'iklik naq wii' nuk'ux, re' i jinaj naq inqa a'n wii' qawa' ruuk' xsutinik chi ixowan nuwach.¹⁰Eh re' hin QaJaaw Dios, aweh i hat i nupahqaaj chi chaketelaaj nuwach kinak'achrisaj johtoq, reh chi neenuyeew chutojariik i ru mahk.

¹¹Eh neenunab'eej chimponik chawach i nuna'ojb'al, reh chi re' inixowanik nuwach ma' xta neekiruchej, ma' nee ta ruq'at nuwach,¹²QaJaaw Dios, re' hat aweht'al chi ma' xtaj i yiib' wach k'ahchi' kiin chawach, re' hat naa atoob'iniik weh naa awihiik wuuk' chi juneliik.

¹³Nee ta naq inye'arik ruloq'il chi juneliik i QaJaaw, re' i qaDios i hoj, hoj aj Israel je' ta wo' naq re'. Re' reey David xuq'or chi chiqiij chii' chusik'ariik i Dios¹QaJaaw Dios, re' hin nuchop nuk'ux chasik'ariik, je' rukab' i rub'an i keej noq chiqiij chii' inooj chusik'ariik ruhaa' korehtaal i rureq.²Re' hin chiqiij nuchii' reh rusik'ariik i QaJaaw, re' k'achlik Dios. Re' hin xa nwaaj chik ojik chalooq'jiik.³Re' hin chi q'iij chi aq'ab' oq'ik i nub'an, ma' nukapaaj ta chik nuwa' nuhaa' ruum. Eh rajlaal q'iij inkiq'or weh chi je' wili: ¿Aha' wilik aaDios inaq'or? inki taqe.

⁴Eh noq inyot'ik i wánima ruum taqe re', xk'ulik cho panuk'ux noq xnuk'am cho kib'eeh i ruk'ihaal tinamit, noq ojik inqa a'n panrupaat i Dios. K'erik qachii' ruum rusuqkiil qak'ux, k'ahchi' qat'iosem ree Dios i rotob'il. Jinaj runimaal ninq'iij chi qeh.

⁵Eh xnuq'or chi je' wili: ¿Chib'ih reet noq q'e' intib'ik nuk'ux eh chi ma' nelik ta pan wánima taqe re'? Xanaah re' ch'iklik wo' naq nuk'ux ruuk' i nuDios, ko nee ruyeew q'ab' chi neenuloq'ej, eh chi nee kiruko'leej, kinki.

⁶Re' hin k'ahchi' ruyojiik nuk'ux ruum i ti' k'axik. Ruum aj re' eliik tinukapaaj noq wilkiin inaasjik cho wii' i nim ha' Jordán, pankiyuq'ul i aj hermonitas, eh chinaah i yuuq' Mizar.⁷Eh noq imb'iraj i elal ha' xa nq'ajb'anik chik i rub'an xilak taq yuuq' eh xumuq'aa' nunaah. Je' aj re' noq i rumuq'aa' nunaah i ti' k'axik.⁸QaJaaw Dios rajlaal q'iij ta naq nee nayeew weh aak'axb'al. Eh re' hin pantaq chaq'ab' neenutz'uyej awach, neenub'an nutiij chawach, ruum re' hat ehchan ree nuk'achariik.

⁹Re' hin i nuq'or reh chi je' wili i nuDios, re' i paat ab'aj ko'lemb'al-iib' chi weh: ¿Chib'ih reet noq xinsahchik panak'ux? ¿Chib'ih reet noq xa eliik ti' nuk'ux kuum i ki-ixowanik nuwach? kinki.¹⁰Eh re' taqe ki-ixowanik nuwach komponik wach nub'aqil ruti'kiil kiq'orik. Eh rajlaal q'iij inkiq'or chi je' wili: ¿Aha' wilik aaDios chib'ih reet noq ma' tirutob'eej? inki taqe weh.

¹¹Eh xuq'or wo' chik chi je' wili: ¿Chib'ih reet noq q'e' ntib'ik nuk'ux eh chi ma' i nelik pan wánima taqe re'? Re' hin ch'iklik wo' naq nuk'ux ruuk' i nuDios konee ruyeew q'ab' chi nee nuloq'ej, chi nee kiruko'leej, kinki. Re' reey David xupahqaaj ree Dios chi naa rehtesjiik chupaam i ti' k'axik¹QaJaaw Dios, chaq'at i q'orik chi nunaah, cha q'or chi ma' xta numahk. Eh kinako'leej chikiwach i tinamit ma' kinimanik taj. Kinako'leej chuwach i winaq aj jot'ool ma' holohik tamb'anik.²Ruum re' hat, hat nuDios ye'el rukowiil nuk'ux. ¿Chib'ih reet noq xinsahchik panak'ux? Eh ¿chib'ih reet noq xa eliik ti' nuk'ux kuum i ki-ixowanik nuwach?

³QaJaaw Dios, chayeew weh asaquumaal, je' wo' i korik. Re' re' neekik'amwik nub'eeh reh chi nee kinponik chupaam aapaat, wilik pana santo laj ye'aab' Sión.⁴Eh noq neekimponik chuwach aa artaal QaJaaw Dios ar neenutz'uyej awach ruuk' arpa. Ruum re' hat, hat nuDios ti ye'wik rusuqkiil nuk'ux.

⁵Eh xnuq'or wo' chi je' wili: ¿Chib'ih reet noq q'e' intib'ik nuk'ux eh chi xa re' chik taqe re' i nukapaaj? Xanaah re' re' hin ch'iklik wo' naq nuk'ux ruuk' i nuDios koneeruyeew q'ab' weh chi nee nuloq'ej, eh chi nee kiruko'leej, kinki. Re' reey David xupahqaaj parutiij ree Dios chi naa ruko'leem i rutinamiit¹QaJaaw Dios, re' hoj kik'utjaam cho qeh i qamaam qati't, qib'iram cho ruuk' qaxikin nik' nimaal aawotob'il a'nam cho kuuk' najtir q'iij, eh nik' wach kitoob'jiik xa a'n taqe.²Eh ruuk' b'ila' awajaawriik xawesaj taqe reje ar kiloq'inik reh taqe i tiyoox, eh xayeew taqe panti' k'axik. Re' b'ila' chik taqe i qamaam qati't xakoj chi patinik chupaam i ye'aab' re' re'.³Eh noq xi okik ar, ma' ruum ta kajaawriik, ma' ruum ta chi wilik kiq'aslaj ch'ihch' xkiq'at wach taqe i aj ixowaal. Ruum la' awajaawriik i hat, xak'uhtaaj awotob'il keh ruum xaketelaaj kiwach.

⁴WaJaaw nuDios. Hat nureey. Qoh ako'leej wo' i hoj ruum hoj wo' cho riih rumaam i Jacob.⁵Ruuk' wo' awajaawriik i hat naa qaq'atam kiwach i aj ixowaal i hoj, ma' xta tz'aaq noq naa qa'nam keh ruum re' hat naa atoob'iniik qeh.⁶Re' hin ma' nutz'e'wacheej taj i nuflecha, i nuq'as laj ch'ihch'.⁷Ruum re' hat naa ako'liniik qeh pan kiq'ab' i ki-ixowanik qawach. Eh xakanaa' chi xase'lb'al taqe i ma' qohponik ta pan naq' kiwach.⁸QaJaaw Dios, re' hoj naaqaye'em runimaal awach chi juneliik, eh ma' naa ta qakanaam rulooq'jiik aab'ihnaal.

⁹Xa re' la' yu'naak, hoj akanaam chi qutkeel, xak'uhtaaj qak'ixb'ilaal, ma' qoh atoob'eej taj noq qoh-ooj chi kik'ulb'ejiik taqe i aj ixowaal.¹⁰Eh xayeew q'ab' chi xqamol chi eliik chikiwach i ki-ixowanik qawach, eh xkelq'aaj i chib'ih qeh i ma' qohponik ta panaq' kiwach.¹¹Xoj aq'asaj pan kiq'ab', je' rukab' i tentzun noq kik'amarik reje pan kantesb'al. Eh chi xqapuhkaaj qiib' chi kixilak i ma' kinimanik taj.¹²Xa ma' k'ih ta xoj ak'ayej wii' keh i ki-ixowanik qawach, xanaah re' xama' xta wo' xak'ax ruuk' i re'.

¹³Eh xak'uhtaaj qak'ixb'ilaal chikiwach taqe i tokoom tinamit. Eh chi qoh kikaqse'laaj qohkib'aj taqe i qaka'jaah qak'ulaa't.¹⁴Xayeew wo' q'ab' chi xojkahnik chi xa je' hoj kik'o'naal taqe i tinamit kiloq'inik reh taqe i tiyoox. Eh inkik'uyu'saj i kinaah chi qakaqse'liij.¹⁵Eh re' hin eqal eqal kink'ixik chikiwach, i nuqasaj qohoq i nunaah xama' nwaaj ta chik wilom taqe.¹⁶Ma' k'isiin ta nchalik nuk'ixiik ruum i nub'ajariik, ruum inkiq'or chi wiij i ki-ixowanik nuwach.

¹⁷Je' re' taqe i ti' k'axik k'ahchi' qak'ulum, xa re' la' xama' xatsahchik ta wo' panqak'ux. Eh xama' qakanaam ta wo' runimjiik aak'uhb'aal.¹⁸Re' hoj ma' nqakapaaj ta akanab'jiik. Eh ma' k'ahchi' ta wo' qakanaam rub'aan i xoj ak'uhb'alej cho wii'.¹⁹QaJaaw Dios, re' hat xat ye'wik q'ab' chi xkian ti' k'axik qeh i ki-ixowanik qawach. Xoj ponik paruq'equmaal i kimik.

²⁰Wi ta xatqaq'eb' chi riij qak'ux QaJaaw Dios, wi ta xqaloq'ej taqe i tiyoox chajilob'aal,²¹jumehq'iil naq xanab'eej i hat. Ruum re' hat aweht'al chu'nchel i wilik cho panwánima ma' xtaj i panq'equm wilik chawach.²²Eh ruum animjiik i hat eliik qohkaaj kikansam, je' rukab' imb'aan keh i tentzun noq kik'amarik reje pankanteesb'al.

²³QaJaaw Dios, qoh ab'iraj tii, ¿Chib'ih reet noq je' suq awiriik i na a'n awiib'? cha kuy chayeew tii qeh inqapahqaaj aweh, maaqoh aq'eb' chi riij ak'ux.²⁴¿Chib'ih reet noq je' cho ma' qoh ab'iraj i na a'n awiib' chi xoj sahchik panak'ux Eh ma' naaketelaaj ta qawach ruuk' i ti' k'axik k'ahchi' qak'ulum?²⁵Re' hoj xama' qakuy ta chik raansil i ti' k'axik, xa je' chik qeremaj wach ak'al i qati'jolal noq inqik'raaj.²⁶QaJaaw Dios, maa qoh akanaa' chi qutkeel, qoh atoob'eej la' qoh ako'leej chaketelaaj qawach. Re' rutz'uuyjiik chi naa rub'anam kaxáro i reey¹Re' hin nujinaq i wánima chi holohaq laj q'orik, ruum aj re' naa nutz'uyem i wach i reey. Re' ju' waaq' xaraaj chik q'orik, je' rukab' i rutz'ihb'aal i winaq kow intz'ihb'anik.

²Je' wili nuq'or ree reey panutz'uuy. Xa re' wo' hat i xiik' naah aholwochiil chikiwach taqe i winaq. Eh q'e' holohik taqe q'orik i nelik chaloq panachii'. Ruum aj re', re' QaJaaw Dios xatrukuxisaj chi juneliik.³Eh chayeew reje aq'as laj ch'ihch' nah atuuq, i hat kowlaj winaq. Ruum re' re' naa ruye'wiik runimaal awach, eh i naa ruye'wiik aloq'il.⁴Chayejaa' awiib' hiy chuko'ljiik riij i korik, i rub'ehel, naa wo' atoob'eem taqe i xama' nimaq ta kiwach. Eh ruuk' awajaawriik naa a'nam i peleto korehtaal inaq'at kiwach i aj ixowaal.⁵Re' hat reey naa a'nam keh i ki-ixowanik awach, korehtaal inik'ik chi juntar i kánima aq'as laj ch'ihch', re' chik i hat naa akahniik chi taaq'anik chinaah i kitinamiit.

⁶QaJaaw Dios, re' awajaawriik naa ruwihiik chi taaq'anik reh juneliik, re' taaq'anik re' re' parukorkiil naa a'nam.⁷Re' hat re' i rub'ehel imponik chawach, eh re' yiib' wach inawixowaaj wach. Ruum aj re' xusik' chaawach aaDios. Eh xiik' nah i rusuqkiil ak'ux xuyeew chuwach i xuyeew keh awuch'ihil.⁸Re' aso' naa runujiik chi nk'ohnik laj i mirra, ink'ohnik laj canela. Eh naa kitz'uyem awach ruuk' k'ahaam wach q'ooj chupaam aapaat marfil ye'jamaj wii'.⁹Eh chupaam i paat naa awihiik wii' chi taaq'anik ar naa kiwihiik taqe i kixq'uun i reey. Eh panasak'aaj naa ruwihiik ixoq reey xoyimaj ruuk' i oro, re' ruuk' inchalik pan i ye'aab' Ofir.

¹⁰Chab'iraj i naa nuq'orom aweh i hat rixq'uun i reey, chakoj rehtaal: Re' hat maakapaaj chik taqe reje awach aweh panapaat, je' wo' hoq aatinamiit.¹¹Re' reey naa ruponiik chuwach aholwochiil. Re' chik i reh naa rehchaniik aweh, eh xa re' chik i reh naa animam.¹²Eh re' taqe holohaq xq'un aj Tiro, naa ruchaliik kisihim chib'ih aweh. Re' taqe i b'ehoom laj tinamit naa rusuuqb'iik kik'ux chawiij, naakisik'im awotob'il.

¹³Wili ixoq reey naa rub'anam kaxáro ruuk' i reey yohb'aal wach holwochiil. Xoyimaj chi oro i ruso', rixq'uun jinaj chik i reey.¹⁴Re' reh xoyimaj ch'ikooj paam i ruso', noq naa ruk'amariik reje ruuk' i reey. Eh tahqalimaj reje kuum i kok' q'ahxoq ma' keht'al ta wach q'o'rinik winaq, kuch'ihil taqe i ki ajwanik wach.¹⁵Eh noq xi k'amarik reje, noq xi okik chupaam i holohik paat wilik wii' reey yohb'aal wach suuqb'ik kik'ux.

¹⁶Re' hat qajaaw reey, re' chik taqe aawak'uun naa akojom chi taaq'anik. Eh naa wo' akojom taqe chi taaq'anik chikinaah chu'nchel i tinamit.¹⁷Eh ruuk' i tz'uuy xnub'an wili naa ruye'ariik runimaal wach kib'ihnaal jar ch'iht pa' chi k'achareel inaakik'iik. Reh chi re' taqe tinamit naakiye'em aloq'il chi juneliik. Re' QaJaaw Dios wilik quuk' chi qatoob'jiik nik' inchalik i ti' k'axik chi qanaah¹Re' QaJaaw Dios inko'linik qeh, re' reh inye'wik rukowiil qak'ux. Re' reh intoob'inik qeh noq wilkooj panti' k'axik.²Ruum aj re' ma' nee ta qohyo'jik, atoob' ta nee nb'oqib'ik chu'nchel i wach ak'al, atoob' ta nenooj qohoq taqe yuuq' paruchamiil i palaw.³Atoob' ta nee nelik i palaw, atoob' ta neenk'uyu'jik taqe yuuq' k'ixkaab' ruum i rujosq'iil i palaw xama' nee ta wo' qohyo'jik.

⁴Re' QaJaaw Dios i ruyeew rusuqkiil ruk'ux i rusantolaj tinamiit, ruuk' i jinaj rooq ha', re' wilik wii' i rusantolaj ye'aab'.⁵Re' Dios naa ruwihiik pankiyejaal pan kixilak i rutinamiit, i ma' xta naa ruyojiik wii' kik'ux. Re' reh naa rutoob'iniik keh korehtaal inkilow wach i saqum.⁶Re' tinamit yohb'aal wach i kijosq'iil, eh re' taqe ajaab'ees xakib'arb'otik chik. Re' Dios xanik' nee ruq'or chi sacharoq wach i wach ak'al.⁷Re' QaJaaw Dios nim rajaawriik, wilik quuk' chi qatoob'jiik. Re' wo' reh inko'linik qeh re' ruDios i Jacob.

⁸Chab'iraj taq, chakoj taq rehtaal chib'ih jariik i xub'an i Dios kuuk' i ki-ixowanik wach i rutinamiit.⁹Re' reh xupab'aa' i q'aq'inik chi junsuut i wach ak'al, xuyeew q'ab' chi xereb'ik i kiflecha. Xitoq taqe i kiq'aslaj ch'ihch', eh xuk'at taqe i kikareta reh q'aq'inik.¹⁰Re' QaJaaw Dios, je' wili ruq'or: Eh xmahyik i q'aq'inik, chanab'eej taq chi re' hin, hin, Dios. Eh chi wilik wajaawriik chikinaah taqe tinamit. Je' wo' chinaah i rujunsuut i wach ak'al, inki.¹¹Re' QaJaaw Dios nim rajaawriik wilik quuk'. Re' reh inko'linik qeh chuwach i ti' k'axik, re' i ruDios i Jacob. Re' QaJaaw Dios xti manlik reey chikinaah i tinamitsut i wach ak'al¹Chawunchelaal taq i hat tinamit chapoq'poteej taq paam aaq'ab', cha k'er taq aachii' chuye'ariik ruloq'il i QaJaaw Dios.²Ruum re' QaJaaw Dios nim rajaawriik yohljik iraaj, xti manlik reey chikinaah i tinamit sut i wach ak'al.³Eh xuq'asaj taqe panqaq'ab' chu'nchel i tinamit ki-ixowanik qawach, eh xuyeew taqe chi ri'sil i qajaawriik.⁴Re' i QaJaaw Dios xsik'wik wach i ye'aab', naa ruye'em chi qakooch. Re' i ye'aab' q'e' xponik chuwach i Jacob, re' i xk'axarik ruum i Dios.

⁵Ruuk' i ruhuupjiik paam i tuun, ruuk' i rutz'uuyjiik wach i Dios xi ponik chupaam i rusantolaj ye'aab' i QaJaaw Dios.⁶Chayeew taq ak'ux chutz'uuyjiik wach i QaJaaw Dios. Chutz'uuyej taq wach ruum re' reh i qareey.⁷Chatz'uyej taq wach ruuk' ana'ojb'al i qaDios ruum re' reh manlik reey chikinaah tinamitsut i wach ak'al.

⁸Re' QaJaaw Dios reey chikinaah i tinamit. Wilik chaloq parusantolaj ye'aab' chi taaq'anik.⁹Re' taqe nimaq wach kajaawriik chupaam tinamit inki a'n jinaj kiwach kuuk' irutinamiiti QaJaaw Dios, re' ruDios chaloq i Abraham.¹⁰Re' i QaJaaw Dios inko'linik keh i tinamitsut i wach ak'al. Eh re' reh inye'arik runimaal wach chikiwach chu'nchel. Re' ruholwochiil, re' ruloq'il i ye'aab' Sión¹Re' QaJaaw Dios xiik' naah nimaal wach. Xti ruk'ul chi naa rulooq'jiik chupaam i rutinamiit, je' wo' chinaah i rusantolaj yuuq' Sión.²Re' yuuq' re' re' yohb'aal wach holwochiil i runajtiil naah, ar wilik pansak'aaj ree rookb'aal q'iij. Eh chu'nchel i tinamit ki ilwik reh insuuqb'ik kik'ux. Re' wo' re' i rutinamiit i qareey nim rajaawriik.³Re' QaJaaw Dios ar wilik chupaam tinamit Jerusaleem, re' reh inko'linik reh i rutinamiit re' re'.

⁴Re' taqe reey wilkeeb' chupaam i ju'jun chi tinamit, xkimol cho kiib' chi peleto ruuk' i tinamit re' re'.⁵Xa re' la' noq xkilow wach i tinamit Jerusaleem xsahchik kik'ux, xi kahnik meem, eh xkimol chi elik.⁶Eh xchalik kib'arb'otiik ruum kiyo'jiik, xichoparik ruum jinaj ti' je' rukab' i ruti'kiil ixoq noq ink'ulik ruk'ux.⁷Je' rukab' i kowlaj teew inchalik pareelb'aal q'iij xsachwik kiwach taqe i barco kichalik Tarsis.⁸Eh parutinamiit i QaJaaw Dios, nim rajaawriik, qilom ruuk' naq'qawach, je' rukab' i kik'utjaam cho qeh. Chi re' Dios naa rukojom chi rutinamiit chi jumpech i Jerusaleem, eh chi naa ruko'leem.

⁹QaJaaw Dios, noq wilkooj chupaam i santo laj aapaat, ink'ulik cho panqak'ux chi re' hat q'e' naaketelaaj qawach.¹⁰QaJaaw Dios, chu'nchel i tinamit sut i wach ak'al kiye'wik aloq'il. Eh inkiyeew runimaal wach aab'ihnaal ruum parub'ehel i na a'n i taaq'anik.¹¹Eh naa rusuuqb'iik kik'ux wilkeeb' chinaah i yuuq' Sión. Naa wo' kipisk'anik pankooq ruum rusuqkiil kik'ux taqe i aj Judá ruum rub'ehel i xayejaa' wach chi naa a'nam.

¹²Re' taq i hat cha sutej taq riij i ye'aab' Sión, chawajlaaj taq jarub' inajt naah tz'aq wilik reh.¹³Eh chakoj taq rehtaal i tz'aq kotimaj wii' riij, je' wo' hoq i holohaq paat wilkeeb' chupaam. Reh chi nee taq inak'utjaaj keh awiih aamaam.¹⁴Naa taq aq'orom rib'iral chi je' re' i xub'an i QaJaaw Dios. Eh chi re' reh i qaDios, chi juneliik. Re' wo' reh naa ruk'amwiik qab'eeh chi juneliik atoob' ta hoj chik kamnaq. Ma' toob' taj i ye'ej k'uxliis chinaah i b'ehomal¹Hat taq tinamit, wilkaat taq chi junsuut i wach ak'al chab'iraj taq i naa nuq'orom.²Wilik taq awajaawriik, taq i hat ma' nimaq ta taq awach, chi b'ehoom, chi neb'aa' chab'iraj taq.³Re' hin naa nuq'orom i nimaq kiwach na'ojb'al. Eh naa nuq'orom i nimaq kiwach kapeew.⁴Eh naa nuq'orom taq aweh i na'ojb'al xiik' naah k'ayewal wach, ruuk' i arpa naa nutz'uyiniik noq naa nuq'orom taq aweh.

⁵¿Chib'ih reet noq naa nuyo'jiik noq neenk'u'loq i ti' k'axik chi nunaah. Eh je' wo' noq neenkian weh i ti' k'axik i aj ixowaal?⁶Re' keh inkiyeew kik'ux chinaah i kib'ehomal. Eh q'e' inkinimb'isaj kiwach ruum ma' k'isiin i chib'ih keh.⁷Xa re' la' xama' awach ta wo' hoq i neeruko'leej riib' ruuk' i chib'ih reh ruum ma' nee ta ruyeew riib' chi nee ruloq' i ruk'achariik ruuk' i Dios.⁸Ma' awach, taj i neerub'an ruloq'ariik chi nee ta inko'ljik riij i ruk'achariik ruum ma' nee ta wo' inkuyjik tz'aaq.⁹Eh ma' awach taj i neerub'an ruloq'ariik i ruk'achariik chi ma' ta neenkimik reje chi jumpech ayu' wach ak'al.

¹⁰Eh ink'utinik chi chu'nchel i k'achareel kikimik reje. Nik' wach noq inkimik i wilik runa'ojb'al je' wo' re' noq inkimik i ma' xta runa'ojb'al, re' kib'ehomal tokoom chik aj eh inkahnik.¹¹Re' keh atoob' ta kikojom pankib'ihnaal i ruhujil i kak'aal xama' naa ta wo' rukahniik keh chi jumpech. Ruum re' i jul naakimuhqiik wii' naa rukahniik chi kiye'aab' chi jumpech.¹²Re' k'achareel ayu' wach ak'al ma' naa ta ruk'achariik ayu' chi juneliik, xanaa wo' rukimiik reje, je' rukab' noq kikimik reje i chikop.

¹³Re' taqe inkich'ikaa' kik'ux xa chi kib'il kiib', je' wo' taqe inkiyeew kik'ux chinaah i kib'ehomal je' wili kiooj kuxoq wii'.¹⁴Eh naakik'ulum keh je' rukab' inkik'ul i tentzun noq kimuq'ub'jiik, eh re' i korik wach kik'ux naa ruq'atwiik kiwach na' ponoq i q'iij. Re' keh naa kikahniik chi ma' xta chik kajaawriik, re' kijuul naa rukahniik chi kiye'aab' chi jumpech.¹⁵Raaj i hin re' QaJaaw Dios naa ruko'liniik reh i wánjel nut'iosil ma' naa ta rukahniik chi muqlik chi jumpech, naa la' ruk'amam johtoq ruuk'.

¹⁶Re' hat mantib'ik ak'ux wila' awach i xb'ehoomrik, eh wi xuyejaa' ruholohaq paat.¹⁷Ruum na'kimoq ma' naa ta ruk'amam reje i rub'ehomal. Ni xata re' i runimaal wach naa ruk'amam reje chi riij.¹⁸Atoob' ta naq enche yohb'aal wach suq kiil ruk'ux noq ko k'acharik i rub'an ayu' wach ak'al. Atoob' ta naq ye'aroq runimaal wach kuum i tinamit,¹⁹Naa ruponiik i q'iij noq naa rukimiik. Eh ma' naa ta chik rilom wach i saqum chi jumpech.²⁰Re' ju'jun chi k'achareel ma' rureq ta chi riij. Atoob' ta yohb'aal wach b'ehomal xanaa wo' rukimiik reje, je' rukab' noq kikimik reje i chikop. Re' Dios parub'ehel i ruq'at q'orik chinaah i tinamit¹Re' QaJaaw Dios nim rajaawriik, i ma' xta chik jino'q Dios chuwach. Re' reh xuq'oreej xuyuq'eej taqe i tinamitsut i wach ak'al.²Re' QaJaaw Dios chupaam i ye'aab' Sión xuk'uhtaaj i ruloq'il, je' wo' hoq i rusaqumaal.

³Eh re' Dios ma' xata je' wili noq naa ruk'uliik, peet la' cho chuwach i q'aaq' aj kansaneel. Eh pa runimaal kaaq suut teew naa ruk'uliik iloq.⁴Re' QaJaaw Dios, naa ruq'oreem i wilkeeb' pan taxaaj, i wilkeeb' wach ak'al, reh chi naa kilom noq naa ruq'atam i q'orik chinaah i rutinamiit.⁵Eh je' wili naa ruq'orom: Kimol kiib' taqe i nuSantolaj aj nimaneel. Re' i kiq'orom chi naa kianam inwaaj noq xkik'at i kimayiij chi nuwach, inko'q.⁶Re' taqe wilkeeb' pan taxaaj kiq'orik chi re' qaDios korik wach ruk'ux. Eh chi parub'ehel inq'atwik q'orik.

⁷Re' QaJaaw Dios je' wili xuq'or: Chab'iraj taq i hat aj Israel hat taq nutinamiit re' hin naa nutehem wach taqe i ma' holohik ta taq i na a'n. Re' hin, hin taq aaDios.⁸Re' hin ma' ruum ta chi ma' nayeew ta taq amayiij k'ahchi' taq kaatnuq'ilim, ruum re' taq i hat juneliik i nak'am taq chaloq ak'atoj mayiij.⁹Re' hin ma' k'ahchi' ta nupahqaam taq aweh aak'isa imas wakax, ni xata re' i kok' imas kaprax wilkeeb' taq panakoraal.¹⁰Ma' k'ahchi' ta nupahqaam taq aweh, ruum weh chu'nchel i chikop, chi je' taqe josq'laj chikop wilkeeb' pantaq ch'ahn, chi je' aachikoop taq i hat.¹¹Wehin taqe i chikop kirupinik pan taxaaj wilkeeb' paraxchee', je' wo' chu'nchel i chikop inkik'er kichii' pantaq ch'ahn.¹²Eh nee ta inchalik nunuhmiik ma' nee ta wo' naq taq i nupahqaaj nuwa' aweh, ruum weh chu'nchel i wach ak'al, je' wo' i wilkeeb' chupaam.¹³¿Mi nuk'ux re' i kitib'kaal i kok' imas wakax, eh mi nwuk'ej re' i kikik'eel i kok' imaas kaprax noq inakapaaj taq i hat?¹⁴Re' i mayiij inwaaj i hin, re' chi naa taq kinaloq'em, eh re' chi naa taq a'nam aq'orom taq weh i hin i Dios nim wajaawriik.¹⁵Kinaq'oreej taq awuuk' nik' ti' taq wilkaat, re' hin nee taq ti wesaj chupaam. Eh re' taq i hat nee taq i nayeew nuloq'il, inki Dios.

¹⁶Eh re' Dios je' wili i ruq'or keh i yiib' wach kina'ojb'al: ¿Chib'ih reet noq inaq'or taq i nuk'uhb'aal, eh inaq'or taq rib'iral i xuk'ul nuk'ux?¹⁷Xa nah re' ma' ruk'ul ta taq ak'ux chi tinuq'il taq. Eh ma' nayeew ta wo' taq rajaawriik i nuq'oral.¹⁸Re' chik inche taqe i ajileq' inak'ul awuuk' panotob'il. Eh je' wo' taqe inkich'uwa'risaj wach i kikaxaro.¹⁹Re' taqe ma' holohik taj, re' taqe tz'aqaj wach q'orik, ra'j xti ma' nim k'ayeew ta noq i nelik taq cho ju' aawaaq' re'.²⁰Re' taq i hat inakoj taq kimahk taqe aahermano. Eh ma' holohik taa taq ti q'orik chikiij i jinaj taq atuut awajaaw kuuk'.²¹Eh re' hin majaa' chih i nuq'or chi riij taqe re', inakapaaj naa taq i hat chi eliik wach nuna'ojb'al taq awuuk'. Yu'naak naa taq kaatnuq'ilim, naa taq nuq'orom aweh i k'ahchi' taq kaat re' re'.²²Chab'iraj taq i nuq'or wili, taq i hat i xinsahchik taq panak'ux, ruum nee-oq taq tinuyeew panti' k'axik. Eh mo'-oq awach taq chik neenko'linik aweh.²³Eh awach re' i nulooq'jiik i ruyeew chi jilow rumayiij, i ruyeew runimaal nuwach, eh i rub'an inwaaj, re' hin naa nuko'liniik reh, inki Dios. Re' reey David xupahqaaj kuyb'al ru mahk ree Dios¹QaJaaw Dios ruuk' ak'axb'al chaketelaaj tii nuwach. Eh ruuk' i runimaal aawotob'il chajux taqe i ruyib'kiil wach i nuna'ojb'al.²Chatz'aj iloq i ma' holohik taj i nub'an. Xti chawesaj iloq taqe numahk.

³Ruum re' hin xnukoj rehtaal chi ma' tinunimaj taj, re' i numahk ma' jaruuj iraaj elik pan wánima.⁴QaJaaw Dios, re' hin xa re' i yiib' wach, xa re' i mahk i nub'an chawach. Eh xa re' chik i ma' imponik ta chawach i nub'an, ruum i re' parub'ehel xaq'at i q'orik chi nunaah, xti ruk'ul chi je' re' i xa a'n⁵Xti korik noq xa hin wo' aj mahk noq xintz'uhkrik chaloq. Eh xa pamahk wo' hin cho aasjinaq ruuk' i nutuut.⁶Re' hat QaJaaw Dios xtimponik chawach i korik. Eh xayeew weh chi naab'jik kopan wánima i holohik laj na'ojb'al.

⁷Chatz'aj iloq i numahk ruuk' q'ab' chee' hisopo. Chatz'aj iloq i numahk reh chi neenkahnik chi xasaq saq chik i wánima, xa je' chik rukab' i saq laj suutz'.⁸Chayeew wo' chik rusuqkiil nuk'ux, makinakanaa' chi ntz'irik nuwach. Reh chi neenik'ik i nuti'kiil xinawik'saj wii'.⁹Chawesaj panaq'awach chu'nchel i numahk, chajux chu'nchel i yiib' wach xnub'an.

¹⁰QaJaaw Dios, chasaqb'isaj wach i wánima. Chajal wach i wánjel nut'iosil reh chi neenub'an i korik chawach.¹¹Maa kinaq'eb' tii chi riij ak'ux, eh maawesaj pan wánima aSantolaj Uxlab'al.¹²Chayeew wo' chik weh i suq kiil k'uxliis i ruyeew i ko'lemb'al iib'. Eh chayeew rukowiil nuk'ux ruuk' aSantolaj Uxlab'al q'e' atoob'.

¹³Reh chi neenuk'uhtaaj keh aab'eeh i ma' kinimanik taa weh, reh chi nee wo' chik ti kinimaj taqe aj mahk.¹⁴QaJaaw Dios, aj ko'len weh, makinayeew tii chi tojariik i numahk chi riij ikaansanik xnub'anam, ruuk'tz'uuy neenuq'or chi korik wach ak'ux.

¹⁵QaJaaw Dios, kinatoob'eej reh chi ma' nim k'ayeew ta noq neenteh i nuchii' reh alooq'jiik.¹⁶Ruum re' hat ma' re' ta wo' mayiij inawaaj, nee ta nuyeew aweh i k'atoj chikop chi numayiij xama' nee ta wo' naq inawaaj.¹⁷Re' mayiij inawaaj i hat QaJaaw Dios re' chi naa nuyot'om i wánima re' yot'oj k'uxliis chi riij mahk. Ruum re' hat ma' nee ta naq'eb' awach ineeruloch' riib' chawach.

¹⁸Chaketelaaj ta tii wach i Sión. Eh chayeew wo' chik q'ab' chi neen korjik i tz'aq kotimaj wii' riij i tinamit Jerusaleem.¹⁹Eh neenak'ul i mayiij imponik chawach. Eh nee wo' nak'ul taqe chikop chi neenk'atarik chi mayiij chawach, eh neekik'atarik i kok' imas wakax chinaah aa artaal. Xa ma' xta nkih chi runimb'isaj riib' i yiib' wach runa'ojb'al¹Re' Dios aj keteloom wachiis chi juneliik. Raaj i hat i wilik awajaawriik i na a'n awiib' ¿Chib'ih reet noq i naa niimb'isaj awach ruuk' i rub'anariik ayiib' wach na'ojb'al?²Re' hat i yiib' wach ana'ojb'al, xa re' chukuj q'orik i nelik cho panachii', re' aawaaq' je' rukab' i q'aslaj ch'ihch'.³Re' i yiib' wach imponik chawach, chuwach i holohik. Eh re' i chukuj q'orik imponik chawach, chuwach i korik.⁴Re' hat xa re' jot'ooj inawaaj ruuk' aawaaq', q'e' imponik chawach taqe q'orik imb'anik sachooj.

⁵Re' hat naa rusacham awach i Dios chi jumpech, naa kaat ruchopom chaloq naa kaat resam cho chupaam aaye'aab'. Eh naa rusacham wach aak'achariik.⁶Eh noq naakilom i korik wach kik'ux i naa ak'ulum, naa kiyo'jiik. Naa kaat kikaqse'laam je' wili naa kiq'orom chawiij:⁷Chawilow taq i xuk'ul i ma' rusik' taj i ko'lemb'al riib' ruuk' i Dios, re' i ruch'ikaa' i ruk'ux chinaah i ma' k'isa rub'ehomal. Eh xa re' i yiib' wach i rub'an, inko'q taqe.

⁸Eh re' hin je' nukab' i chee' olivo rax wach i xaq, ruum parupaat i QaJaaw Dios naa nuwihiik. Eh juneliik naa nuye'em nuk'ux ruuk' i nuDios, ruum i ruketelaaj nuwach.⁹QaJaaw Dios, re' hin juneliik naa nut'iosem aweh i xa a'n, re' hin naawuy-eem awotob'il. Ruum re' hat q'e' hat atoob' kuuk' i asantolaj aj nimaneel. Re' yiib' wach na'ojb'al inki a'n i ma' kinimanik ta ree Dios¹Re' i ma' kinimanik taj, inkiq'or chi ma' xta Dios. Chi kunchelaal xkiq'eb' kiib', xa re' chik i yiib' wach na'ojb'al inki a'n Ma' jino'q keh imb'anik i korik.

²Re' QaJaaw Dios kopan taxaaj rilow chaloq taqe i tinamit mi wilik jino'q chi kixilak i wilik runa'ojb'al reh chi neenimjik i reh.

³Xa re' la' chi kunchelaal xkichop q'ab' rub'anariik i yiib' wach na'ojb'al. Ma' awach keh imb'anik reh i holohik laj na'ojb'al ni xata naq jinaj keh.

⁴Re' taqe ma' xta kina'ojb'al ma' holohik ta kib'anik, k'ahchi' kik'uxum i nutinamiit je' nk'uxarik kaxlanwi'k inki a'n Re' taqe re' ma' nkikapaaj ta kitiij inki Dios.

⁵Re' i rutinamiit i Dios naa rik'iik i kiyo'jiik. Ruum re' Dios xa aha' naa rukanaam tzuub' i kib'aqil taqe inixowanik kiwach. Eh naakik'uhtaam kik'ixb'ilaal, ruum ma' naa ta kikojariik paruman ruum i Dios.

⁶Ruuk' ta naq i QaJaaw Dios wilik cho Sión nee nelik chaloq i ko'lemb'al kiib' i aj Israel re' taqe i riih rumaam i Jacob. Re' noq re' Dios naa resam chaloq i rutinamiit pan tokoom tinamit, nee naq insuuqb'ik kik'ux. Re' reey David xupahqaaj ree Dios chi naa ruko'ljiik pan kiq'ab' i aj ixowaal¹QaJaaw Dios panab'ihnaal ta naq neekinko'ljik. Neeta tii kinako'leej ruuk' i runimaal awajaawriik.²Hat nuDios, chab'iraj tii i nutiij. Eh chayeew tii weh i nupahqaaj aweh.

³Ruum re' hin yohb'aal wach i kik'aah chi nunaah i tinamit i ki-ixowanik nuwach, kinkaaj kiin kikansam. Re' taqe re' ma' tikikapaaj ta k'isinoq i hat.

⁴Re' hat neetiko'linik weh pan kiq'ab' taqe re', ruum re' hat, hat nuDios. Re' hat naa ako'liniik riij i nuk'achariik.⁵Chasutej wach kinaah i inkiyejaa' wach i ki-ixowanik nuwach. Chasach kiwach ruum re' hat parub'ehel inaq'at i Q'orik.

⁶Eh re' hin, QaJaaw Dios xti panuk'ux neenchalik chi neenuyeew i numayiij chawach, eh neenuloq'ej ab'ihnaal.⁷Ruum chi nee kinawesaj chupaam i chu'nchel ruti'kiil nuk'ux, eh chi neenasach kiwach taqe i ki-ixowanik nuwach. Re' rutiij xub'an i reey David noq xq'ahteesjik naq pankimik ruum i ramigo¹Hat nuDios, chab'iraj tii i nutiij, maakanaa' chi je' re' i nupahqaaj aweh.²Kinab'iraj tii, chayeew weh aha' wilik inwaaj, ruum noq k'ahchi' kiin chi nutiij xa nyot'ik chik i wánima.³Eh kiyo'jiik ruum inkiq'or chi wiij i ki-ixowanik nuwach, re' taqe i yiib' wach kina'ojb'al inkikoj numahk. Eh yohb'aal wach i kik'aah, inkaaj kianam weh.

⁴Eh re' wánima xa nyot'ik chik inwik'raaj, ma' k'isiin ta nchalik nuyo'jiik noq imb'iraj rib'iral chi naa kinkikansam.⁵Re' hin kiyo'jik xa kinb'arb'otik chik. Je' nchi xanaa chik nukimiik noq inwik'raaj.⁶Ruum aj re' i nuq'or chi je' wili: Wilik ta naq nuxiik' chi je' rukab' i paloma nee naq kinrupinik reje nee naq kinooj hi'loq.⁷Eh jumehq'iil naq nee kinrupinik reje chi najt. Eh nee naq kinooj chi patinik panchiq yuuq'.⁸Jumehq'iil naq neenukeb'aa' wiib' chikiwach i yohb'aal wach i kijosq'iil chi nunaah xa je' chik rukab' i kaq suut teew jab', kinki.

⁹QaJaaw Dios, nee ta nasach kiwach ruuk' i kiq'oral. Ruum re' hin xnukoj rehtaal chi xa re' i ti' k'axik xa re' i peleto inki a'n ree tinamit.¹⁰Re' keh chi q'iij chi aq'ab' kikotik chi riij i tz'aq kotimaj wii' riij i tinamit, re' yiib' wach na'ojb'al inki a'n eh xa re' ikaansanik inkaaj.¹¹Xa re' rub'anariik i ti' k'axik inkikapaaj, xa re' jot'ooj, xa re' ileq' inki a'n pantaq ookb'al reh i tinamit.

¹²Re' imb'anik weh i ti' k'axik ma' re' ta jino'q inixowanik nuwach. Wi ta re' jino'q inixowanik nuwach xnukuy naq, oon xnukeb'aa' naq wiib' chuwach.¹³Re' la' hat k'ahchi' ab'aniik ti' k'axik weh i hat naq naah wamigo, xanaah re' ma' hat ta naq tokoom wuuk'.¹⁴Xanaah re' noq xub'an xti suq inqaq'oreej qiib' awuuk'. Eh quch'ihil qiib' xasuq chik inqa'an noq qohponik chulooq'jiik i Dios chupaam i rupaat.¹⁵Xa chi ma' keht'al ta naq neenk'uloq i kimik chikinaah i ki-ixowanik nuwach. Neeta naq kimuhqik chi k'achilik kiwach, ruum xa re' i ma' tob'laj na'ojb'al wilik pan kánima.

¹⁶Eh re' hin, re' nuDios naa nuq'o'reem, eh re' reh neenko'linik weh chupaam i ti' k'axik.¹⁷Re' hin naa nuq'o'reem i QaJaaw Dios ruuk' ooq'ik, pan wahq'eq, kab'lajora i q'iij, chaq'ab'. Eh re' reh naa kiin rib'iram.¹⁸Re' reh naa ruko'liniik weh panq'aq'inik, chuwach i kimik, atoob' ta naq yohb'aal wach kik'ihaal taqe i neenkaaj nukanteesjiik.¹⁹Re' QaJaaw Dios wilik rajaawriik chi taaq'anik, neerib'iraj i nutiij. Eh naa resam i kajaawriik taqe i aj ixowaal, ruum re' keh ma' nkijal ta wach i kina'ojb'al. Ni xata nkiyohleej i Dios.

²⁰Eh aha' naq wilik i kamigo, inki a'n ti' k'axik reh. Aha' naq wilik i k'axooj naa kianam noq inkiq'or xama' kian ta wo' hoq.²¹Eh xa ch'ub'ik chik i kiq'oral inki a'n kiib', xa je' chik ch'ub' kiil mantekilla. Xanaah re' xa re' i q'aq'inik inkaaj. Xa je' wo' naq chik ch'ub' kiil aseite i kiq'oral inki a'n kiib'. Xanaah re' q'e' ti' kiq'orik, xa je' chik rukab' i ruyok' i q'aslaj ch'ihch'.

²²Chakanaa' pan q'ab' i QaJaaw Dios chu'nchel i tiqaaj wii' kapeew re' reh neentoob'inik aweh. Ruum re' i QaJaaw Dios ma' jaruuj neeruq'eb' i korik wach ruk'ux.

²³QaJaaw Dios, re' taqe kaansoom, taqe i chukul q'orik ma' naa ta kik'achariik yejaal-oq i kik'achariik. Ruum re' hat naa aye'em q'ab' chi naakikimiik chi jumehq'iil. Eh re' hin, awuuk' i hat i nuyeew nuk'ux. Re' reey David xuq'or parutiij ree Dios chi ruye'em i ruk'ux ruuk'¹QaJaaw Dios, chaketelaaj tii nuwach, ruum ma' k'isiin taqe i kib'anik ti' k'axik weh. Eh chu'nchel i q'iij inkiq'at panub'eeh, inkaaj kianam weh.²Re' taqe ki-ixowanik nuwach, chu'nchel q'iij k'ahchi' kiin kisik'im reh i nukanteesjiik. Eh yohb'aal kiwach i peleto inki a'n wuuk'xiik'naah i kijosq'iil.³QaJaaw Dios, noq neenchalik nuyo'jiik kuum, awuuk' i hat neenuyeew nuk'ux.⁴Re' hin awuuk' i hat nuye'em nuk'ux, i nuyeew ruloq'il aq'oral. Ruum i re' ma' nee ta kinyo'jik ruum i neenkian weh taqe i xa winaq.

⁵Re' keh xa chu'nchel i q'iij inkitib'isaj nuk'ux ruuk' i kiq'oral, xa re' inujot'ariik inkikapaaj rub'aan.⁶Eh inkimol kiib' xak'ul chik kiooj chi keb'anik kiib', reh i nutahariik aha' kinik'ik, re' inkaaj chi naa kinkikansam.⁷QaJaaw Dios, cha a'n jilow keh inki a'n weh. Reh chi ma' nee ta nik'ik chikiij, chawesaj i kajaawriik ruuk' aajosq'iil.

⁸Re' hat aweht'al jarpech hin elenaq chikiwach, eh jarpech i oq'ik nub'anam kuum. Eh weht'al chi atz'ihb'aam rehtalil chupaam asantolaj huuj.⁹QaJaaw Dios, nik' neenupahqaaj aawotob'il nee kielik chikiij i ki-ixowanik nuwach. Ruum re' hin weht'al chi re' hat naa atoob'iniik weh.¹⁰Re' hin ruuk' i Dios i nuyeew nuk'ux, eh i nuyeew ruloq'il i ruq'oral. Xti korik chi nuyeew ruloq'il i ruq'oral.¹¹Ruuk' i QaJaaw Dios i nuyeew nuk'ux, ruum aj re' ma' nee ta kinyo'jik. Ni xata neekinyo'jik ruum i neenkian weh taqe i xa winaq.

¹²QaJaaw Dios re' i nuq'orom chi naa nuye'em aweh, naa nub'anam ruuk' alooq'jiik. Eh naa wo' nut'iosem aawotob'il.¹³Ruum re' hat xat ko'linik weh chuwach i kimik, eh chi ma' xinq'ehb'ik taj. Reh chi konaa nuk'achariik pan saqum, eh chi konaa kaat nuq'o'reem panutiij. Re' reey David xupahqaaj parutiij chi naa rutoob'jiik ruum i Dios (Sal 108.1-5)¹Chaketelaaj tii nuwach QaJaaw Dios, chaketelaaj nuwach kinatoob'eej. Ruum xa awuuk' wo' hat i nusik' ko'lemb'al wiib', kinako'leej ruuk' awajaawriik ri'si-aaxiik' kinayeew korehtaal inik'ik chi wiij i yohb'aal.²Re' hin i nupahqaaj i rotob'il i nuDios wilik cho pan taxaaj, ruum xa re' wo' reh intoob'inik weh.³Re' reh kopan taxaaj naa rutaq'aam chaloq i ruk'axb'al, je' wo' hoq i korik, reh chi naa kiiruk'oleem pan kiq'ab' i ki-ixowanik nuwach.

⁴Re' hin ayu' wilkiin chi kixilak i tinamit xiik' naah kijosq'iil. Xa je' chik q'as ju' ch'ihch' i keeh, xa je' chik flecha, eh re' kaaq' xa je' chik q'aslaj ch'ihch'. Eh je' kijosq'iil i kaaq b'ahlam.

⁵QaJaaw Dios, nee ta naq inak'uhtaaj awajaawriik pan taxaaj. Eh nee ta naq inye'arik aloq'il chinaah chu'nchel wach ak'al.

⁶Re' taqe ki-ixowanik nuwach i xkikoj i xirob' chi nujunsuut, re' naq inkaaj chi xyoj nuk'ux. Eh xkik'ot i chaamlaj jul panub'eeh, xanaah re' xa re' wo' keh xiq'ehb'ik ar.

⁷QaJaaw Dios, re' hin nuye'em nuk'ux awuuk'. Eh naa nutz'uyem awach chu'nchel nuk'ux.⁸Re' hin naa wik'raam wiib' noq naa rusaq'iik. Eh chu'nchel nuk'ux naa nutz'uyem wach i nuDios ruuk' taqe nuq'ooj, ruuk' i warpa.⁹Naa kaat nuloq'em chikiwach i tinamit QaJaaw Dios. Eh naa nuye'em runimaal awach ruuk' i nutz'uuy chikiwach chu'nchel i tinamit.¹⁰Ruum re' ketelinik wachiis i na a'n imponik kopan taxaaj. Eh re' rukorkiil wach ak'ux imponik wilik cho wii' i suutz'.

¹¹QaJaaw Dios nee ta naq i inak'uhtaaj i runimaal awajaawriik pan taxaaj. Eh nee ta naq inye'arik aloq'il chinaah chu'nchel i wach ak'al. Re' reey David xupahqaaj ree Dios chi chuyeew taqe chutojariik i kimahk i yiib' wach kina'ojb'al¹Raaj taq i hat i wilik taq awajaawriik, ¿Mi parub'ehel taq inaq'at i q'orik? ¿Mi parub'ehel taq i nayeew chutojariik i ru mahk i ju'jun?²Ma' je' taj, re' taq i hat juneliik re' i ma' holohik ta taq i na a'n, xa re' i tikij peleto taq inawaaj kuuk' i tinamit.

³Eh chu'nchel i yiib' wach kina'ojb'al xanoq wo' kiq'eb' kiib' noq xitzuhkrik chaloq. Eh xanoq wo' xkitoq'aa' cho chukuj q'orik noq aasjinaq taqe chaloq.⁴Eh je' rukab' i rukiih i aaq' i kiq'oral. Eh ma' jaruuj ki-ib'irinik, xa je' tz'aplik i kixikin je' kikab' i aaq' ma' nib'irinik taj tz'aplik i xikin.⁵Eh ma' nkib'iraj ta wo' hoq i rutz'uuy i aj tz'uyineel, atoob' ta nchol wo' naq tz'uuy chi korik.

⁶QaJaaw Dios, chawisaj i kajaawriik taqe re', chapaxib'eej chu'nchel ikehruum je' kijosq'iil i kaq b'ahlam.⁷Eh nee ta naq inasach kiwach, je' rukab' noq inooj sahchoq wach i ha' i rutz'ir reje riib'. Eh noq neenkikut reje i kiflecha nee ta naq intoqib'ik.⁸Neeta naq insahchik kiwach je' rukab' noq insahchik wach i rupuril i ha'. Oon je' rukab' i ruk'ul i k'isa ha'lak'un kamnaq noq inaasjik ma' rilow ta wach i saqum.⁹Eh nee ta naq insacharik kiwach chi jumehq'iil, xa chi ma' keht'al, je' rukab' noq ink'atarik i k'iix. Eh je' ta naq kichuq'arik reje rax ch'ahn panab'iix.

¹⁰Eh re' taqe korik wach kik'ux naa rusuqb'iik kik'ux na' kilow chi xq'ajarik wach keh inki a'n i yiib' wach kina'ojb'al. Eh na' kilow chi wilkeeb' chik pan kikik'eel taqe re'.¹¹Eh je' wili naa kiq'orom i tinamit: Xti korik chi q'e' holohik i kitojb'aal inkik'ul i korik wach kik'ux. Eh wilik jinaj i Dios inq'atwik q'orik chikinaah i tinamit, inko'q taqe. Re' reey David xupahqaaj parutiij ree Dios chi naa ruko'ljiik pan kiq'ab' i aj ixowaal¹QaJaaw Dios, kinako'leej tii pan kiq'ab' i ki-ixowanik nuwach. Eh kinako'leej pan kiq'ab' inkaaj kianam weh.²Eh kinako'leej pan kiq'ab' i ma' holohik ta kib'anik, kinako'leej wo' pan kiq'ab' i kansan kas kichaaq'.

³Kinako'leej chikiwach i yiib' wach kina'ojb'al wilik kajaawriik inki a'n kiib' inkaaj kianam weh. QaJaaw Dios re' hat aweht'al chi ma' ruum ta numahk inkaaj kianam weh.⁴Atoob' ta ma' xta numahk xankaaj chik nukanteesjiik. QaJaaw Dios chawilow i ti' k'axik k'ahchi' nuk'ulum kinako'leej chi jumehq'iil.⁵QaJaaw Dios, nim awajaawriik, hat ki Dios i aj Israel. Chakoj rehtaal inki a'n taqe i tinamit ma' kinimanik taa weh, chayeew taqe chutojariik i kimahk. Maaketelaaj kiwach ruum ma' holohik ta kib'anik.

⁶Eh rajlaal xq'eq inchalik, kisutej riij i qatinamiit inkik'er kichii', je' rukab' i rub'an i tz'i' noq inokik chi ti'ooj.⁷Xa npuhik chik i kichii' chuq'orariik taqe i yiib' wach q'orik je' wili nkiq'or: Ma' awach ta inib'irinik qeh nki taqe.

⁸Eh re' hat QaJaaw Dios xan chalik ase'eel inki a'n eh xama' nayeew ta wo' rajaawriik inki a'n taqe i ma' kinimanik taa aweh re' re'.⁹QaJaaw Dios, re' hat nee ti ko'linik weh chuwach, i kajaawriik i ki-ixowanik nuwach. Ruum xa re' wo' hat nee ticha'jinik weh.¹⁰Re' QaJaaw Dios inketelinik nuwach re' reh naa rutoob'inik weh, reh chi neenuq'at wach i kajaawriik i ki-ixowanik nuwach.

¹¹QaJaaw Dios, maakansaj peet taqe i re' xa chatukej la' kiwach. Eh chawesaj i kajaawriik, reh chi ma' nee ta nsahchik pankik'ux i nutinamiit i re' hat ti ko'linik qeh.¹²Ruum re' keh juneliik k'ahchi' kimahkunik ruuk' i kiq'oral. Chayeew taqe panti' k'axik ruum q'e' inkinimb'isaj kiib', ruum i yiib' wach, ruum taqe chukuj q'orik inki a'n¹³Eh chasach kiwach ruuk' aajosq'iil, reh chi chu'nchel neenkikoj rehtaal chi re' hat i Dios wilik awajaawriik chi taaq'anik chikinaah i aj Israel. Je' wo' chikinaah chu'nchel i tinamit sut i wach ak'al.¹⁴Re' taqe ki-ixowanik nuwach rajlaal xq'eq inkisuteej riij i qatinamiit, inkik'er kichii', je' rukab' i rub'an i tz'i' noq i rutoq'aa' ti'ooj.¹⁵Re' keh kikotik chusik'ariik i k'uxumb'al keh. Eh inkilow chi ma' nkireq taj inkitoq'aa' kik'erem kichii', je' rukab' i rub'an i tz'i' i rutoq'aa' intz'uytz'utik.

¹⁶QaJaaw Dios, re' hin naa nutz'uyem awach ruum i awajaawriik, naa nuye'em aloq'il pan wahq'eq ruum i naaketelaaj nuwach. Ruum xa re' wo' hat titoob'inik weh, tiko'linik weh panti' k'axik.¹⁷Re' hin naa nutz'uyem awach ruum re' hat ti ye'wik rukowiil nuk'ux, hat ti ko'linik weh, hat i Dios tiketelinik nuwach. Re' reey David xupahqaaj i rotob'il i Dios noq xooj panq'aq'inik (Sal 108.6-13)¹QaJaaw Dios, re' hat xoj akanaa' chi qutkeel ruum aajosq'iil. Xoj akanaa' chi ma' xta chik qakowiil. Inqapahqaaj aweh chi qoh atoob'eej, eh chayeew wo' chik qakowiil.²Chi qeh i hoj je' naa xak'u'yisaj aak'al, je' naa xatarib'eej, xa re' la' qoh atoob'eej wo' chik reh chi nee wo' chik i rureq paruye'aab'.³Eh xayeew q'ab' chi xuk'ul i ti' k'axik aatinamiit, je' naa xayeew qeh chi uuk'jik i k'ahlaj ha' inyojwik na'ojb'al.⁴Re' hat yu'naak xayeew jinaj kehtalil i kiye'wik aloq'il ko'lemb'al kiib' chuwach i kikanteesb'aal i aj ixowaal.⁵Eh qoh ab'iraj tii, qoh ako'leej ruuk' awajaawriik, chawesaj wo' taqe panti' k'axik awach taqe i q'e' nak'ax.

⁶Re' QaJaaw Dios je' wili i xuq'or parusantolaj ye'aab': Re' hin naa rusuuqb'iik nuk'ux noq naa nuch'aqam i ye'aab' Siquem. Eh naa nupajam i ye'aab' wach k'ixkaab' Sucot.⁷Re' i Galaad, i Manasés wee hin taqe. Re' Efraín je' naa poyb'al wach nunaah. Eh re' i Judá, je' naa nukarote noq wilik, rehtalil i wajaawriik.⁸Re' i Moab je' jino'q johm ye'aab' tz'ajb'al nuq'ab'. Eh re' i Edom, naa nuyeq'em pan wooq. Eh naa rusuuqb'iik nuk'ux noq naa nuq'atam kiwach i taqe aj filisteo, inki i Dios.

⁹QaJaaw Dios, ¿Awach naa ruk'amwiik reje weh chupaam i tinamit kow riib'? ¿Awach i naa ruk'amwiik reje weh Edom?¹⁰QaJaaw Dios, ¿Mi xti xoj aq'eb' chi jumpech re'? ¿Mi ma' nee wo' naq chik i rub'an chi re' hat nee ti k'amwik reje qeh panq'aq'inik re'?¹¹Jaaw, qoh ako'leej tii pan kiq'ab' i ki-ixowanik qawach. Ruum re' ko'linik inki a'n i xa winaq xama' xta nokik wii'.¹²Re' QaJaaw Dios naa rutoob'iniik qeh reh chi ma' xta nee qoh kuchej i ki-ixowanik qawach. Eh re' wo' reh neenesanik i kajaawriik. Re' reey David xuch'ikaa' ruk'ux chi re' Dios naa ruko'liniik reh¹WaJaaw, nuDios, chab'iraj tii i nuq'or aweh ruuk' oq'ik. Eh chayeew weh i nupahqaaj aweh panutiij.²Re' hin tinuq'o'reej wuuk' chi junsuut i wach ak'al, ruum re' wánima q'e' ti' wilik. Je'-oq chinaah ab'aj najt naah kinayeew reh chi nee nuko'leej wiib'.³Ruum xa re' wo' hat ti ko'linik weh, je' akab' i tz'aq najt naah ko'lb'al iib', reh chi nee kinako'leej pan kiq'ab' i ki-ixowanik nuwach.

⁴Re' hin naa nuk'achariik chi juneliik chupaam asantolaj paat, weht'al chi re' hat neetiko'linik weh, ri'si'-aaxiik' nee kinayeew.⁵WaJaaw, nuDios, re' hat xab'iraj chik i xnuq'or aweh, ruum xayeew wo' wee hin i kooch je' rukab' i xayeew keh i kiye'wik aloq'il.

⁶Re' hin i reey i nupahqaaj aweh chi najt ta naq rooq i nuk'achariik nee nayeew, reh chi k'ih haab' nee kink'acharik.⁷Eh noq wilkiin chi reyil ruuk' ta naq aawotob'il neenub'an i taaq'anik. Eh nee ta naq inaketelaaj nuwach, nee ta naq i nayeew rukorkiil wach nuk'ux.

⁸Chi je' re' juneliik neenuloq'ej ab'ihnaal, eh eqal eqal neenub'an i nuq'orom aweh chi naa nub'anam. Xa re' wo' ruuk' i QaJaaw Dios inkan i ko'lemb'al iib'¹Xa re' wo' ruuk' i Dios inureq i rusuqkiil nuk'ux. Eh re' wo' reh inye'wik i ko'lemb'al iib'.²Xa re' wo' reh intoob'inik weh, eh xa re' wo' reh inko'linik weh. Ma' nee ta nuq'eb' wiib' ruum re' reh incha'jinik weh.³Eh ¿ko jaruuj taq inakanaa' nupeletohjiik i hat inawaaj taq aq'atam nuwach. Re' taq i hat i nakapaaj taq chi je' nukab' jino'q i tz'aq xa q'ehb'ik chik reh. Eh i nakapaaj taq chi je' nukab' i koraal xa q'ehb'ik chik reh wach ak'al?⁴Re' taq i hat xa re' i rehtesjiik i wajaawriik taq inakapaaj, i nayeew taq ak'ux chi chukuj q'orik. Eh xa chachii taq kinak'ax, eh chupaam taq awánima ma' holohik taj inakapaaj chi wiij.

⁵Re' hin xa ruuk' wo' QaJaaw Dios i nureq rusuqkiil nuk'ux. Eh xa ruuk' wo' reh inuch'ikaa' nuk'ux.⁶Xa re' wo' reh intoob'inik, inko'linik weh jinaj paat ab'aj ko'lb'al iib' chi weh ma' nee ta nuq'eb' wiib' ruum re' reh incha'jinik weh.⁷Re' Dios inye'wik weh i ko'lemb'al wiib'. Eh re' reh inye'wik weh i nuloq'il, re' wo' reh incha'jinik weh.

⁸Hat taq nutinamiit juneliik taq chayeew ak'ux ruuk' i Dios. Eh chu'nchel ak'ux cha a'n taq atiij chuwach ruum xa re' wo' reh i Dios inko'linik qeh.

⁹Re' taqe winaq xama' xta kiokik wii', chi je' taqe b'ehoom, chi je' taqe neb'aa'. Neeta naq kipajarik pan jino'q pexu eliik naq kiwach chi ma' ruk'aaj ahl taqe, ahl naq k'isinoq inerupaj i teew chikiwach.¹⁰Mayeew taq ak'ux chinaah i peletohinik. Eh mo'-oq xa ruuk' taq i leq' neenareq ab'ehomal. Eh wila' xk'ihaaxb'ik taq i chib'ih aweh maayeew taq ak'ux chinaah.

¹¹Re' Dios jinaj i Q'orik ruq'orom chaloq, eh ma' xata junriim b'iram i hin chi xa re' wo' reh nim rajaawriik.¹²QaJaaw Dios xa re' wo' hat tiketelinik wachiis, ruum re' hat i nayeew kitojb'aal i ju'jun re' q'oreel chib'ih xkian i xkiq'or. Xa re' wo' Dios inye'wik rusuqkiil ruk'ux i winaq¹QaJaaw Dios, re' hin chu'nchel nuk'ux tinusik pantaq wahq'eq. Je' rukab' noq iraaj ruhaa' chiqiij laj ak'al, Eh inchiqik chii' i wánima reh asik'ariik i hat nuDios.²Re' hin inwaaj wo' chik wilom awajaawriik, aaloq'il chupaam i loq'laj apaat je' rukab' i wilom chaloq noq xub'an.³Ruum re' ak'axb'al xiik' naah loq'il chuwach i k'acharik, je' re' noq ruuk' nuchii' naa kaat nuloq'em.⁴Chi je' re' naa kaat nuloq'em panuk'achariik. Eh naa nujosam i nuq'ab' noq naa nub'anam johtoq nutiij chawach.

⁵Chi je' re' QaJaaw Dios naa ruch'iklojiik nuk'ux awuuk', je' naa nunujisam wiib' ruuk' i suq laj wi'k ha'. Eh ruum i rusuqkiil nuk'ux naa kaat nuloq'em ruuk' nuchii'.⁶Eh pantaq chaq'ab' noq hin chik yohkinaq, ink'ulik cho panuk'ux aawotob'il, tinukapaaj wo' hoq.⁷Ruum xa re' wo' hat titoob'inik weh i q'e' suq nuk'ux awuuk', ri'si-aaxiik' k'ahchi' kiin ako'leem.⁸Re' hat tichopwik nunaah panuk'achariik, eh ma' jaruuj nee kinakanaa' chi wutkeel.

⁹Eh re' taqe inkaaj nukanteesjiik peet i keh naa kikimiik, eh peet naakimuhqiik.¹⁰Re' keh naa kikanteesjiik ruuk' q'aslaj ch'ihch', eh naakik'uxariik kuum i xojb'.¹¹Eh re' hin i reey naa rusuuqb'iik nuk'ux ruuk' i Dios. Naa wo' kiye'em ruloq'il i Dios ruuk' kitz'uuy inkiq'or i korik parub'ihnaal. Eh re' taqe i chukul q'orik, naa rutz'apariik i kichii'. Re' reey David xupahqaaj ree Dios chi naa ruko'ljiik pan kiq'ab' i aj ixowaal¹Hat nuDios, chab'iraj tii weh i nutiij, ruum ma' k'isiin i nuyohb'eesjiik inki a'n i aj ixowaal, kinako'leej tii pan kiq'ab'.²Kinako'leej chuwach k'achi' kiyejaam wach panke'lik i yiib' wach kina'ojb'al. Kinako'leej chuwach inkikapaaj wach nunaah i ma' holohik ta kib'anik.³Xa q'as chik i ju' kaaq' chi q'orik, xa je' chik q'aslaj ch'ihch'. Eh xiik' naah ti'kiil kiq'orik xa je' chik rukab' inqajik wii' i ju' i flecha.⁴Eh panke'lik, chi ma' eht'alimaj inkikut chaloq chi flecha taqe i ma' xta kimahk, ma' kiyo'jik ta chub'aan.⁵Re' keh inki a'n i yiib' wach na'ojb'al. Eh inkikoj ruxirob'aal taqe i ma' xta kimahk, eh inkikapaaj chi ma' awach ta nilwik keh.⁶Eh inkikapaaj chi ma' awach ta naa runab'iniik reh i ma' holohik taj inki a'n Korik ma' awach ta naa neenab'inik reh xa re' la' re' i QaJaaw Dios reht'al inkikapaaj pan kánima.

⁷Re' wo' QaJaaw Dios naa ruye'wiik keh panti' k'axik, naakik'utariik chi flecha.⁸Re' keh xa ruuk' i kiq'oral naa kiq'ehb'iik, eh nik' k'ihaal i naa rilwiik keh naakikaqse'ljiik kuum.⁹Eh re' i tinamit, q'e' naa kiyo'jiik, naa kiq'orom rib'iral i rukamaj i Dios. Eh naa kireqem chi riij taqe i nimaq wach na'ojb'al i rub'an.

¹⁰Re' korik wach ruk'ux naa rusuuqb'iik ruk'ux ruuk' i Dios, ruuk' i reh naa ruye'em ruk'ux. Eh chu'nchel i holohik kib'anik naakiye'em ruloq'il i Dios. Xa re' wo' QaJaaw Dios i ruk'ul chi naaqaye'em ruloq'il¹QaJaaw Dios, re' hat i ruk'ul chi naa qaye'em aloq'il ar Sión. Eh chi naaqa'nam i qaq'orom aweh chi naaqa'nam.²Re' hat inab'iraj i qatiij. Eh chu'nchel i tinamit aweh i hat inkipahqaaj chib'ih inkaaj.³Wilik noq xa re' chik taqe i yiib' wach na'ojb'al inqa'an chawach. Xa re' la', re' hat q'e' naakuy taqe qamahk.⁴Atoob' keh inasik' kiwach reh chi naa kaat kiloq'em chupaam aapaat. Eh nee ta naq insuuqb'ik qak'ux chi manlik ruuk' i qatiij neenqa a'n chupaam asantolaj paat.

⁵QaJaaw Dios, hat qaj ko'loom, re' hat ruuk' nimaq wach na'ojb'al, ruuk' korik i nayeew qeh inqapahqaaj aweh. Chu'nchel i tinamit sut i wach ak'al awuuk' i hat inkich'ikaa' kik'ux, je' wo' taqe i wilkeeb' kochi juntar i palaw.⁶Re' wo' hat xatyej-anik reh i yuuq', eh aye'em taqe pan kiye'aab' ruuk' i runimaal awajaawriik.⁷Re' hat tipaab'anik reh i rub'ohl i palaw. Eh re' hat tikojwik keh panotob'il i tinamit noq inkitukej kiib'.⁸Ruum aj re', re' taqe i tinamit sut i wach ak'al nsahchik kik'ux ruum taqe i nimaq wach sahchb'al k'uxliis i na a'n. Eh awuum i hat inkik'er kichii' ruum rusuqkiil kik'ux chi q'iij chi aq'ab'.

⁹Re' wo' hat tik'uxlanik reh i wach ak'al, i nayeew i jab' chinaah. Eh i nayeew taqe i rooq i ha' tz'aqtesb'al reh, ruuk' i re' i naak'isaj taqe johtoq i tik, eh kiwachinik.¹⁰Re' hat i nat'aqsaj chaloq chi lohk'aal i tik, i nayeew i ha' pantaq xilak. Eh ruuk' i jab' i nayeew inakanaa' chi ma' kow ta chik i aak'al, inakuxisaj i kiwach taqe tik.¹¹Re' hat xti xayeew aawotob'il chinaah qatik chupaam i haab' wili. Re' taqe aasuutz' ti xkiyeew chaloq i jab' chi manlik.¹²Eh inqajik cho chikinaah taqe ch'ahn wilkeeb' panchiq yuuq' xa rax chik kiwach, xayohb'aal chik wach kiholwochiil kik'utinik reje.¹³Ma' k'isiin taqe i chikop wi'k inki a'n chinaah. Eh wataq k'ixkaab' nujinaq taqe chi tik, eh re' taqe ehchan reh xa nkik'er chik kichii' chi tz'uuy. Re' rutz'uuyjiik wach i Dios ruum taqe i sahchb'al k'uxliis i rub'an¹Re' taq i hat i wilkaat taq chi junsuut i wach ak'al, chayeew taq ruloq'il i Dios chi suq taq ak'ux.²Eh cha a'n taq atz'uuy parub'ihnaal i QaJaaw Dios ye'b'al runimaal wach.³Je' taq wili i cha q'or reh i QaJaaw Dios panatz'uuy: Re' taqe ayejaam xiik' naah kiholwochiil. Eh ruum i runimaal awajaawriik inkiloch' kiib' chawach taqe i ki-ixowanik awach.⁴Eh re' i tinamitsut i wach ak'al tikiloq'ej. Eh inki a'n kitz'uuy panab'ihnaal tiko'q taq reh.

⁵Chab'iraj taq, chakoj taq rehtaal i rub'anam i Dios. Chakoj taq rehtaal i sachb'al k'uxliis rub'anam kuuk' i rutinamiit.⁶Re' reh xuchiqsaj i yejaal i kaq palaw, je' wo' nim ha' Jordán noq ki-ik'ik ar i rutinamiit. Ruum aj re' suuqb'oq qak'ux ruuk' i Dios.⁷Eh ruuk' i rajaawriik i rub'an i taaq'anik chi juneliik, eh reht'al chib'ih inki a'n chu'nchel i tinamit. Eh naa ruq'atam wach i kajaawriik i ma' kinimanik ta ree reh.

⁸Hat taq tinamit chayeew taq ruloq'il i qaDios. Chatz'uyej taq wach chi loq'oomb'al reh.⁹Ruum kok'ahchi' ruye'em cho qak'achariik, eh ma' xuyeew ta q'ab' chi xsacharik taq awach.¹⁰QaJaaw Dios, re' hat xoj anik'eej ruuk' i qanimaniik. Eh xojawik'saj pan xaq q'aaq', je' rukab' noq inik'tesjik wach q'aaq' i manlik plata.¹¹Xojayeew pan jinaj k'axik, je' naa jino'q ahl laj ihq xayeew chi qanaah.¹²Eh xayeew q'ab' chi xojkiyeq' panak'al i ki-ixowanik qawach, eh xojik'ik pan xaq q'aaq', xojik'ik chupaam elal ha'. Eh noq xooj kuxoq xojawisaj chupaam xoj ponik chupaam i ye'aab' xojhi'lik wii'.

¹³Re' hin naawokiik chupaam aapaat chuk'atariik i numayiij. Chi je' re' naa nub'anam i nuq'orom aweh.¹⁴Re' xnuq'or chaaweh chi naa nub'anam noq xinwihik cho panti' k'axik.¹⁵Eh naa nuk'atam wach artaal chi numayiij taqe q'ina' laj chikop. Naa nuye'em aweh taqe b'ooyax, taqe imas tentzun, je' wo' taqe imas kaprax. Reh chi nk'ohnik neemponik chuwach.

¹⁶Kim taq chawunchelaal i hat i tiyohlinik ree Dios. Eh chab'iraj taq, re' hin naa nuk'utjaam taq aweh i rub'anam wuuk' i Dios.¹⁷Eh ruuk' nuchii' xnuq'o'reej wuuk', eh xnuyeew ruloq'il ruuk' i nutz'uuy.¹⁸Wi ta re' taqe i yiib' wach wilik pan wánima, re' QaJaaw Dios ma' xirib'iraj ta naq.¹⁹Xirib'iraj la' i reh, xuyeew cho weh taqe i xnupahqaaj reh panutiij.

²⁰Loq'imaj taa naq i QaJaaw Dios, ruum xrib'iraj i nutiij, eh ruum chi xuketelaaj nuwach. Re' reey David xuq'or chi chu'nchel i tinamit naa ruloq'iniik reh i Dios¹QaJaaw Dios, chaketelaaj ta tii qawach qoh atoob'eej. Eh suq ta tii qilariik neena a'n.²Reh chi chu'nchel i tinamit wach ak'al nee kinab'inik reh inawaaj i hat chi naa rub'aan, eh chi xa re' wo' hat, i aj Ko'loom.³QaJaaw Dios, xti ruk'ul chi chu'nchel i tinamit neetikiloq'ej, eh chi chu'nchel neekiye'wik runimaal awach.

⁴Eh re' taqe aj panimaq tinamit neenkik'er kichii' ruum rusuqkiil kik'ux. Ruum re' hat parub'ehel naa a'nam i taaq'anik chikinaah i tinamit, eh re' hat naa ak'amwiik kib'eeh.⁵QaJaaw Dios, xti ruk'ul chi chu'nchel i tinamit neetikiloq'ej. Eh chi chu'nchel i tinamit neekiye'wik runimaal awach.

⁶Ruum re' qatik xti xiwachinik chi korik. Qeht'al chi re' QaJaaw Dios xtoob'inik qeh.⁷Re' ta naq i QaJaaw Dios neentoob'iin qeh. Eh chu'nchel ta naq i tinamit wilkeeb' sut i wach ak'al neekiye'wik ruloq'il. Re' tz'uuy xkian i aj Israel noq xkiq'at wach i aj ixowaal¹Noq i ruk'uhtaaj i rajaawriik i Dios chi naa rub'anam keh i ki-ixowanik wach, re' keh inkitukej kiib'. Eh inkimol chi elik chuwach ruum kiyo'jiik.²Eh naa rojiik sahchoq kiwach je' rukab' noq inooj sahchoq wach i sib' panteew. Re' taqe yiib' wach kina'ojb'al chuwach i Dios naa rojiik sahchoq kiwach je' rukab' noq inhaab'ik i kantela ruum i q'aaq'.³Eh re' taqe i korik wach kik'ux keh, naa rusuuqb'iik kik'ux chuwach i Dios, naakipisk'aniik pankooq.

⁴Re' taq i hat cha tz'uyej taq wach i Dios. Cha a'n taq atz'uuy parub'ihnaal, chaloq'ej taq i wilik cho nah suutz'. Eh suuqb'oq taq ak'ux ruuk' i QaJaaw. Suuqb'oq taq ak'ux chuwach.⁵Re' QaJaaw Dios wilik pan rusantolaj ye'aab', kajaaw taqe i ma' xta kituut kajaaw. Eh toob'en keh taqe ixoq kamnaq kib'ahiil.⁶Re' QaJaaw Dios i ruyeew kipaat i ma' xta kipaat. Eh i resaj taqe panti' k'axik i wilkeeb' panti' k'axik, i ruyeew rusuqkiil kik'ux. Eh re' taqe i ma' kinimanik taj, naakikanab'jiik chupaam i ye'aab' chiq yuuq'.

⁷QaJaaw Dios, noq hat cho peet chikiwach taqe aatinamiit chupaam taqe ye'aab' chiq yuuq',⁸re' ak'al xk'uyu'jik ruum awajaawriik. Eh xub'an wo' chaloq i jab', re' i ye'aab' Sinaí xk'uyu'jik ruum i runimaal awajaawriik i hat Dios, re' i qaDios i hoj, hoj Israel.⁹QaJaaw Dios, re' hat xti xayeew chaloq i jab' chi korik re' xawaaj i hat chi xayeew cho ransil, eh xat'aqsaj taqe i ye'aab' chiq yuuq'.¹⁰Re' taqe aatinamiit xakoj taqe chi patinik ar. QaJaaw Dios xa ruuk' aak'axb'al xayeew keh i neb'aa' i ajwaal wach chi keh.

¹¹Eh xa ruuk' i ruq'oral i QaJaaw Dios xiyo'jik taqe i aj ixowaal. Eh ma' k'isiin taqe ixoq xiq'orik rib'iral chib'ih i xk'ularik je' wili xkiq'or:¹²Re' taqe reey, taqe i ki soldado xkimol chi elik, inki taqe. Eh re' taqe ixoq k'ahchi' kich'aqam chikiwach pankipaat ixq'ucharik keh i aj ixowaal.¹³Re' taq i hat ma' re' ta nkiwii' chi xakeb'aa' taq awiib' pampaat xa tiq'aa' taq awiib' chi korik. Je' taq akab' i paloma xa nworwotik chik i ruxiik', xa je' chik rukab' i plata. Eh re' riij xa je' chik rukab' i manlik oro.¹⁴Re' QaJaaw Dios ruuk' i rajaawriik xukaaj taqe reje i reey ki-ixowanik wach i rutinamiit, je' rukab' noq i ruyeew chaloq i suutz' chinaah i yuuq' Salmón.

¹⁵Re' taqe yuuq' wilkeeb' chupaam i ye'aab' Basán, xiik' naah najtiil kinaah q'e' holohaq.¹⁶Eh re' taq i hat i wilkaat taq chinaah i yuuq' najt naah ¿Chib'ih reet noq ma' suq ta taq rilariik i na a'n i yuuq' xuyejaa' wii' i rupaat i QaJaaw Dios? Xanaah re' ar naa ruwihiik i QaJaaw Dios chi juneliik.

¹⁷Re' QaJaaw Dios xiik' naah i rajaawriik yohb'aal wach k'ihaal i rukareta reh i q'aq'inik ruch'ihil noq xelik cho chupaam i ye'aab' Sinaí, noq xchalik chupaam i ye'aab' Sión.¹⁸Jaaw re' hat xatjohtik chupaam aa ye'aab'. Wilik taqe i panti' k'axik wilkeeb' xak'am taqe johtoq chawiij, eh xkiyeew aloq'il taqe i winaq. Wilik wo' taqe i ma' kinimanik ta naq aweh xkiloch' kiib' chawach i hat.

¹⁹Loq'imaj ta naq i QaJaaw Dios, re' i qaj Ko'loom. Re' reh eqal eqal qohrutoob'eej ruuk' i qak'axkiil.²⁰Re' QaJaaw Dios jinaj Dios aj ko'loom, eh nee wo' qoh ruko'leej chuwach i kimik.

²¹Re' QaJaaw Dios naa rusacham kiwach taqe i ki-ixowanik wach, naa rupaxem kinaah, reh i rusachariik kiwach ruum ma' nkikanaa' ta rub'aan i mahk.²²Re' QaJaaw je' wili xuq'or: Naa wo' chik taq kaat wesam reje Basán, naa wo' chik taq kaat wik'sam reje chupaam i palaw.²³Re' hin naa nusacham, kiwach i ki-ixowanik taq awach. Eh naa taq awilom i kikik'eel chi wilik taq cha junsuut, eh re' taqe aatz'ii' naa rureqwiik reh, inki.

²⁴QaJaaw Dios, hat nuDios, hat nureey, xk'utinik noq xakilok'ik chik aatinamiit noq xkik'am i koq chupaam aapaat i holohik laj kaxa molik wii' taqe aak'uhb'aal.²⁵Re' taqe aj tz'uuy wilik taqe i peet b'eeh, wilik taqe i xam b'eeh, eh panyejaal wilkeeb' i kok' q'ahxoq k'ahchi' kiq'ojem i kiq'ooj intzalajinik.²⁶Hat taq tinamit aj Israel chawunchelaal taq chayeew ruloq'il i QaJaaw Dios. Chayeew wo' taq ruloq'il noq amolom taq awiib'.²⁷Eh peet chikiwach taqe re' i aj Benjamín, eh ma' k'isiin taqe k'amal kib'eeh aj Judá. Re' wo' taqe haa' i ikik'amwik kib'eeh i aj Zabulón, je' wo' taqe i k'amal kib'eeh i aj Neftalí.

²⁸WaJaaw nuDios, cha k'uhtaaj cho qeh awajaawriik, cha a'n cho quuk' i a'nam cho quuk' noq xub'an.²⁹Re' taqe reey wilkeeb' chi taaq'anik, naa kik'amam chaloq i kimayiij chawach chupaam aapaat ar Jerusaleem.³⁰QaJaaw Dios chaq'il taqe i aj Egipto kimolom kiib' yohb'aal wach i kijosq'iil, je' taqe josq'laj chikop, je' taqe josq'laj wakax. Chawesaj i kajaawriik, korehtaal inkiq'asaj aweh i kib'ehomal. Jaaw chatukej kiwach i tinamit xa re' i Q'aq'inik imponik chikiwach.³¹Wilik taqe i k'amal kib'eeh i aj Egipto, wilik taqe k'amal kib'eeh i aj Etiopía naa ruchaliik kipahqaam kitoob'jiik aweh.

³²Re' taq i hat i wilkaat taq chi taaq'anik chikinaah i tinamit, cha tz'uyej taq wach i QaJaaw Dios.³³Re' wilik cho pan taxaaj, xa wilik wo' chaloq najtir q'iij. Chab'iraj taq xti ko ar naa ruq'oriik cho chi kow ruuk' i runimaal rajaawriik.³⁴Chayeew taq rajaawriik i QaJaaw Dios, re' wilik rajaawriik taq cha naah i hat, wuch aj Israel, xiik' naah i rajaawriik imponik kopan taxaaj.³⁵QaJaaw Dios re' hat sahchb'al k'uxliis i na a'n pan asantolaj ye'aab' ruum i nayeew rukowiil kik'ux aatinamiit Israel.
Loq'imaj ta naq ab'ihnaal chi juneliik. Re' rutiij xub'an i reey David noq q'e' ti' ruk'ux kuum i aj ixowaal¹QaJaaw Dios kinako'leej chupaam i ti' k'axik, ruum re' hin je' naa k'ahchi' nujutlujiik qohoq pantaq chaamlaj ha'.²Eh k'ahchi' nujutlujiik qohoq pan chaamlaj muuq, xama' ha' ta chik i nureq ye'aab' ree wooq. Eh yohb'aal wach chamiil i ha' k'ahchi' kiin ruk'amam reje i rooq noq inwik'raaj.³Re' hin xinq'uhtik, chiqik wach i walaq chaq'orob'jiik. Eh re' naq'nuwach ma' saqum ta chik inilwik, k'ahchi' wuy-eem chi naa kiin atoob'eem i hat, hat nuDios.

⁴Re' i ki-ixowanik nuwach inkaaj kisacham nuwach chi ma' xtarub'ehel, yohb'aal wach kik'ihaal ma' xata je' kik'ihaal i rismaal nunaah. Eh xakow chik inki a'n kiib', kow inkipahqaaj i jilow weh i ma' welq'aam ta wo' hoq.⁵QaJaaw Dios, re' hat aweht'al ruyib'kiil wach i nuna'ojb'al. Eh chu'nchel i numahk pan saqum wilik chawach.

⁶QaJaaw Dios, nim awajaawriik, ma' ta naq neenuk'uhtaaj kik'ixb'ilaal taqe i kiye'em kik'ux awuuk'. Eh ma' ta naq neenuyoj kik'ux inkichop kik'ux chasik'ariik i hat QaJaaw Dios, hat qaDios i hoj, hoj aj Israel.⁷Ruum animjiik k'ahchi' nuk'ulum i b'ajarik, eh k'ahchi' nuk'uhtaam nuk'ixb'ilaal ruuk' inki a'n weh.⁸Re' taqe i jinaj qatuut qajaaw kuuk' xa je' chik ma' keht'al nuwach, xa je' kinilarik tokoom tinamit inki a'n weh.

⁹Re' hin q'e' nuk'ax aapaat, eh q'e' nyot'ik i wánima i rub'an noq inki a'n i re' ma' re' ar. Eh re' ab'ajariik inki a'n wach nunaah i hin inkahnik.¹⁰Noq i nub'an nutiij ruuk' oq'ik chi ma' nub'anam ta nuwa' kinkikaqse'laaj.¹¹Eh noq i nukoj chi wiij inuq'eq so' rehtalil i ruti'kiil nuk'ux xa re' chik i re' inkik'utjaaj.¹²Re' taqe i kitzuhnik chii' puerta xa re' chik i hin wilkiin pan kichii'. Eh re' taqe xohk'reel kinkib'aj pankitz'uuy.

¹³Eh re' hin QaJaaw Dios, chawach i hat i nub'an nutiij, kinatoob'eej tii cho ruuk' i runimaal ak'axb'al. Chayeew weh i nupahqaaj aweh, juneliik kinatoob'eej reh chi nee kinako'leej.¹⁴Re' hin k'ahchi' nuk'ulum i ti' k'axik, k'ahchi' nujutlujiik qohoq pan ch'uwa'. Eh chupaam i chaamlaj ha' wilkiin, Jaaw kinako'leej pan kiq'ab' i ki-ixowanik nuwach.¹⁵Maa yeew q'ab' chi nee kiruk'am reje i kowlaj rooq ha', chi nee kinooj qohoq chupaam i chaamlaj ha'. Eh chi naa rumuq'aam nunaah i chaamlaj jul.

¹⁶QaJaaw chayeew tii weh i nupahqaaj aweh, ruum re' hat q'e' hat atoob' hat aj k'axool. Ruuk' ta naq i runimaal awotob'il nee naketelaaj nuwach.¹⁷QaJaaw Dios, re' hin, hin awaj kamanoom, makinakanaa' tii chi wutkeel. Kinatoob'eej la' ruum xiik' naah yohb'aliil wilkiin wii'.¹⁸Neeta tii ti wihik wuuk' chi nutoob'jiik, reh chi nee kinako'leej pan kiq'ab' i ki-ixowanik nuwach.

¹⁹Re' hat aweht'al i nub'ajariik, i nukaqse'ljiik, i ruk'uhjiik nuk'ixb'ilaal inki a'n Eh aweht'al nik' k'ihaal i ki-ixowanik nuwach.²⁰Re' nub'ajariik inki a'n xponik kopan wánima. Xuyoj nuk'ux, ma' xta chik nukowiil inwik'raaj. Eh xnusik' naq awach naa ruye'wiik rusuqkiil nuk'ux xa re' la' ma' awach ta wo' xketeliin nuwach.²¹Eh xkixilakeej i k'uxb'al nuwa' ruuk' iq'oom inkansanik, eh noq xwaaj nuhaa' ch'amlaj ha' i xkiyeew weh.

²²Ruum aj re', re' taqe i ninq'ijinik inki a'n noq inkiket kiib' nee ta naq insutinik chi q'eb'al keh panti' k'axik.²³Eh nee ta naq inakanaa' taqe chi je' b'urlik naq' kiwach. Eh nee ta naq inakanaa' taqe chi xamb'arb'otik chik i pankaa'.²⁴Neeta naq i nayeew aajosq'iil chikinaah, nee ta naq inasach kiwach.²⁵Eh kahnoq chi ntz'irik paam i rupaat, ma' ta naq chik jino'q neenkahnik chupaam i ruye'aab'.²⁶Ruum re' keh xkixowaaj wach i xataq'aaj chaloq chi xtib'ik ruk'ux. Eh xkikaqse'laaj i xataq'aaj chaloq chi xuk'ul i ti' k'axik.²⁷QaJaaw Dios, cha a'n cho jilow keh i ma' holohik taj inki a'n maakuy kimahk.²⁸Chajux i kib'ihnaal chupaam i ruhujil i k'acharik. Maakoj i kib'ihnaal i wilik wii' i kib'ihnaal korik wach kik'ux.

²⁹Re' i hin Jaaw, hat nuDios, q'e' ti' wilkiin, ti' nuk'ux chaketelaaj tii nuwach, kinawesaj chupaam, eh kinako'leej.

³⁰Re' hin naa nuye'em ruloq'il ruuk' nutz'uuy i rub'ihnaal i nuDios, naa wo' nuye'em runimaal wach t'iosb'al reh i rotob'il.³¹Ruuk' i re' neench'iklojik ruk'ux i QaJaaw Dios chuwach chi neenuk'at i b'oyax, chi nee nuk'at i q'ina' laj rak'uun wakax chi numayiij, wilik taqe ruk'aa', eh wilik taqe rixk'aq.³²Eh noq naakilom i naa rub'anam i Dios taqe i ti' kik'ux naa rusuqb'iik kik'ux. Eh naa ruye'ariik ruman i rukowiil kik'ux taqe i kisik'wik reh i Dios.³³Re' QaJaaw Dios i rib'iraj i kitiij taqe ti' wilkeeb'. Eh ma' rukanaa' ta taqe chi kutkeel i rak'uun rixq'uun wilkeeb' chi prexohjik.

³⁴Neeta naq inye'arik ruloq'il i Dios ruum i taxaaj, ruum i wach ak'al, ruum i palaw, kuum chu'nchel i wilkeeb' chupaam taqe re'.³⁵Re' QaJaaw Dios naa ruko'leem i tinamit Sión. Eh naa wo' chik ruyejaam i tinamiit i Judá, ar wo' chik naakipatiniik, naa wo' chik kehchaam.³⁶Eh chu'nchel i kiih kimaam taqe raj kamanoom i Dios naakehchaam i ye'aab' re' re'. Chu'nchel i kik'axwik reh i Dios ar naakipatiniik. Re' reey David xupahqaaj ree Dios chi naa rehtesjiik chupaam i ti' k'axik¹QaJaaw Dios, cha kuy kinako'leej tii, kinatoob'eej chi jumehq'iil.²Neeta naq kikahnik chi xase'lb'al chik taqe inkaaj nukanteesjiik. Eh nee ta naq inkimol chi elik ruum kik'ixiik taqe i xa re' i yiib' wach inkikapaaj chi wiij.³Neeta naq inkimol chi elik ruum kik'ixiik taqe i kikaqse'lanik weh.

⁴Eh chu'nchel i kisik'wik aweh nee ta naq insuuqb'ik kik'ux. Re' taqe i ki ajwanik reh i ko'lemb'al iib', nee ta naq inkiq'or chi je' wili: Xiik' naah nimaal wach i QaJaaw Dios, inko'q ta naq taqe.

⁵QaJaaw Dios q'e' ketel nuwach, ti' nuk'ux kinatoob'eej tii, xa re' wo' hat titoob'inik weh. Eh xa re' wo' hat nee ti eesanik weh chupaam i ti' k'axik, Jaaw kinatoob'eej tii chi jumehq'iil. Re' rutiij xub'an i reey David noq riji' winaq chik¹QaJaaw Dios, xa awuuk' i hat inusik' ko'lemb'al wiib'. Ma' ta naq neenuk'uhtaaj nuk'ixb'ilaal.²Eh kinatoob'eej, kinako'leej ruuk' i rukorkiil wach ak'ux, eh kinawesaj chupaam i ti' k'axik.³Je'-oq akab' jino'q i saqrehp ab'aj ke'emb'al iib', reh chi nee kinako'leej kinatoob'eej. Eh kinako'leej tii ruum xa re' wo' hat ti ko'linik weh.

⁴WaJaaw nuDios, kinako'leej pan kiq'ab' i yiib' wach kina'ojb'al, pan kiq'ab' i kib'anik weh i re' ma' re', yohb'aal wach i kijosq'iil.⁵Re' hin i nupahqaaj otob'il aweh ruum xa awuuk' wo' hat inuch'ikaa' nuk'ux. Eh re' wo' hat ticha'jinik weh noq ko hin cho ak'un.⁶Eh xa awuuk' wo' hat i nuyeew chee nuk'ux noq ko xintz'uhkrik cho ruuk' i nutuut. Eh ruuk' awotob'il xin-aasjik ruum aj re' naa nuye'em aloq'il chi juneliik.

⁷Ma' k'isiin taqe insahchik kik'ux noq inkilow chi re' hat ruuk' awajaawriik kinako'leej chupaam i ti' k'axik.⁸Je' re' noq re' hin chu'nchel q'iij i nuyeew aloq'il ruuk' nuchii', eh i nuyeew runimaal awach.⁹Re' hin weht'al chi ma' nee ta kinakanaa' chi wutkeel, atoob' ta hin chik riji' winaq chi korik, atoob' ta ma' xta chik rukowiil i nuti'jolal.¹⁰Re' taqe ki-ixowanik weh xkian jinaj wach k'ik'ux. Eh pankomonil k'ahchi' kiyejaam wach nukanteesjiik.¹¹Je' wili inkiq'or chi wiij: Qasik' qachop taq, ruum xkanab'jik chik ruum i ruDios, ma' awach ta chik neenko'linik reh, inki taqe.

¹²QaJaaw Dios, makinakanaa' tii chi wutkeel, kinatoob'eej la' chi jumehq'iil.¹³Neeta naq inkik'uhtaaj kik'ixb'ilaal, nee ta naq insahchik kiwach inkaaj nukanteesjiik. Eh nee ta naq kikahnik chi xa se'lb'al taqe i xa re' i ti' k'axik inki a'n weh.¹⁴Eh re' hin juneliik k'ahchi' wuy-eem aawotob'il, eliik neenuyeew aloq'il.¹⁵Eh ruuk' nuchii' naa nuq'orom chi korik wach ak'ux, juneliik naa nuq'orom rib'iral chi xa re' wo' hat ti ko'linik qeh. Eh re' hin xata wo' jarpech hin ako'leem.¹⁶QaJaaw Dios, re' hin naa nuq'orom rib'iral taqe nimaq wach na'ojb'al aab'anam chaloq. Eh naa wo' nuq'orom rib'iral chi xa re' wo' hat korik wach ak'ux.

¹⁷WaJaaw, nuDios, re' hat kopan wak'uniil xtohq'ik cho ak'uhtaam weh i korik, eh xink'u'loq ayu', yu'naak chi kok'ahchi' nuq'orom rib'iral taqe i na a'n ruuk' i runimaal awajaawriik.¹⁸WaJaaw, nuDios, makinakanaa' chi wutkeel atoob' ta hin chik riji' winaq, saq chik i rismaal nunaah. Ruum re' hin ko nwaaj nuq'orom rib'iral awajaawriik keh i wilkeeb' yu'naak keh i naa kiwihiik na'chub'an.¹⁹NuDios, re' rukorkiil wach ak'ux xiik' naah nimaal wach.
Ruum re' hat yohb'aal wach i na a'n ruuk' awajaawriik. Eh ma' xta chik jino'q Dios chi je' rukab' i hat.²⁰Atoob' ta xayeew q'ab' chi xnuk'ul i ma' k'isa ti' k'axik. Eh ma' k'isiin ta xtib'ik nuk'ux nee wo' chik i nayeew nukowiil pan chaamlaj jul naa kiin awuksam chaloq.²¹Eh naa aye'em ruman i runimaal nuwach, eh naa wo' chik aye'em rusuqkiil nuk'ux.

²²Re' hin naa nut'iosem aweh i na a'n. Naa nutz'uyem awach ruuk' arpa, ruuk' k'ahaam wach q'ooj, i hat nuDios, Santo chikinaah i qatinamiit Israel.²³Eh xasuq chik nuk'ux noq neenutz'uyej awach ruuk' nuchii'. Chu'nchel wánima nee tinuloq'ej ruum re' hat xat ko'linik weh.²⁴Eh juneliik naa nuq'orom rib'iral chi re' hat korik wach ak'ux. Aha' naq wilik taqe i xa re' i ti' k'axik inkaaj kianam weh ma' k'isiin ta xkik'uhtaaj kik'ixb'ilaal. Re' reey David xub'an rutiij chi riij i rak'uun naa rokiik chi reyil¹QaJaaw Dios, chayeew ta tii runa'ojb'al, rukorkiil wach ruk'ux i wak'uun naa rokiik chi reyil.²Reh chi parub'ehel naa ruq'atam q'orik chikinaah aatinamiit. Eh parub'ehel naa ruq'atam q'orik chikinaah ti' wilkeeb'.³Re' taqe ye'aab' parax yuuq' nee ta naq ruyeew taqe pansuqkiil k'uxliis, parurukorkiil wach k'uxliis i tinamit.⁴Re' naa rokiik chi reyil naa rub'anam i q'ataj q'orik parub'ehel. Eh naa ruko'leem taqe i ma' xta wilik keh, eh naa rusacham kiwach imb'anik ti' k'axik keh.

⁵Eh naakiyohleem awach nik' najtiil naa rub'anam i rusaqumaal i q'iij, i rusaqumaal i poh ayu' wach ak'al.⁶Eh nee ta naq i rujoot'isaj wach i ti' k'axik je' rukab' rub'an i jab' noq i rut'aqsaj aak'al, eh noq i rut'aqsaj taqe i ch'ahn.⁷Nik' najtiil naa rub'anam i taaq'anik nee ta naq inwihik i suq kiil k'uxliis, rukorkiil wach k'uxliis nik' najtiil neerub'an i rusaqumaal i poh ayu' wach ak'al.

⁸Neeta naq inwihik rajaawriik chinaah i palaw, je' wo' chinaah i palaw jinaj chik, je' wo' chinaah i nim ha' Éufrates, je' wo' sut i wach ak'al.⁹Eh re' taqe wilkeeb' panchiq yuuq' inaakixowaniik wach, nee ta naq inkiloch' kiib' chuwach noq neenkiq'asaj kiib' reh.¹⁰Eh ma' k'isiin i rukooch naa ruk'uliik ye'aroq kuum i ruch reey, naa kichaliik Tarsis, inaakichaliik chupaam i ye'aab' sutimaj riij chi ha', inaakichaliik Sabá, eh Seba.¹¹Chu'nchel ta naq i reey neenkixuk'aa' kiib' chuwach. Eh chu'nchel ta naq i tinamit neekik'ulwik reh.

¹²Re' reh naa ruko'liniik reh i ti' wilik re' i rupahqaaj chi naa rutoob'jiik. Eh je' wo' hoq i ma' xta wilik reh, ma' awach ta ntoob'inik reh.¹³Re' reh naa ruketelaam kiwach i xama' nimaq ta kiwach. Eh naa ruko'leem riij i kik'achariik ti' wilkeeb'.¹⁴Naa wo' ruko'leem taqe chuwach i yiib' wach minooj taqe wii'. Eh je' wo' chuwach taqe i ti' k'axik, ruum q'e' k'ih tz'aaq i kik'achariik chi ree reh.

¹⁵Najt ta naq neenk'acharik i naa rokiik chi reyil. Neeta naq inye'arik reh i oro inchalik Sabá. Pahqb'al ta naq i rotob'il i Dios chi riij i reh chi neenkuxesjik.¹⁶Neeta naq kiwachinik i trigo panqatinamiit, nee ta naq kiwachinik i tik ju' taq yuuq'. Je'-oq kik'ihaal i chee' wilkeeb' Líbano, nee ta kik'ihaaxb'iik i tinamit chi je' kik'ihaal taqe ch'ahn wilkeeb' wach ak'al.¹⁷Ma' ta naq neensahchik wach i rub'ihnaal i naa rokiik chi reyil. Holohik ta naq rib'iral chi juneliik nik' najtiil naa ruwihiik i rusaqumaal i q'iij. Eh chu'nchel ta naq i neen kik'ul i rotob'il i Dios ruum i reh, eh nee ta naq i inkiq'or chi atoob' reh.

¹⁸Neeta naq inye'arik ruloq'il i QaJaaw, re' i qaDios i hoj, hoj aj Israel, ruum xa re' wo' reh imb'anik i nimaq wach na'ojb'al.¹⁹Eh nee ta naq inye'arik ruloq'il chi juneliik i loq'laj rub'ihnaal. Neeta naq inwihik kuuk' i ruloq'il chu'nchel i tinamit. Je' ta wo' naq re'.

²⁰Ayu' xukohlaaj wach i rutiij i reey David rak'uun i Isaí. Naa rureqem i ruq'ijil chi naa kitojom i kimahk i ma' holohik ta kib'anik¹Xti korik noq re' qaDios xiik' naah rotob'il kuuk' i aj Israel saq wach i kánima.²Eh re' hin, k'isiin ma' xinkalojik, xwaaj naq nukanaam runimjiik i Dios.³Ruum nukaqwachej taqe inkinimb'isaj kiwach, eh noq xwilow chi kielik korik i yiib' wach kina'ojb'al.

⁴Re' keh ma' kimik tan kikapaaj kow taqe ma' xta k'isinoq kiyab'ilaal.⁵Eh ma' inkik'ul ta keh i ruti'kiil k'uxliis je' rukab' ink'ularik, ma' xta ti' inkik'ul je' rukab' inkik'ul i tokoom.⁶Re' niimb'isanik kiwach inki a'n inkikoj chi xoyb'al kiib'. Eh re' i ti' k'axik inki a'n reh i tokoom inkikoj chi kiso'.⁷Re' keh xa nelik chik chaloq inaq'kiwach ruum kiq'ina'iil. Eh xa re' i yiib' wach na'ojb'al inki a'n re' nujinaq cho pan kánima.⁸Ruuk' jot'ooj, ruuk' niimb'isanik wachiis, ruuk' yiib' wach Q'orik inki a'n i ti' k'axik reh i kas kichaaq'.⁹Eh inkib'aj i Dios wilik cho pan taxaaj. Eh re' inkiq'or imponik rib'iral chi junsuut i wach ak'al,

¹⁰Ruum aj re' inye'arik runimaal kiwach kuum i tinamit, inkikapaaj i keh chi ma' xtaj i yiib' wach inki a'n¹¹Eh je' wili inkiq'or: ¿Mi reht'al re' i Dios inki a'n? ¿Mi rukoj rehtaal re' i QaJaaw nim rajaawriik? inki taqe.¹²Re' taqe yiib' wach kina'ojb'al re' re'. Ma' xta inq'ilwik keh noq inkimol wach i kib'ehomal.¹³Re' hin wilik pech i nukapaaj chi xama' xta nkih chi saq wach i wánima oon chi nukanaam i yiib' wach na'ojb'al.¹⁴Ruum re' hin chu'nchel i q'iij inkitib'isaj nuk'ux. Eh juneliik pantaq wahq'eq inki a'n ti' k'axik weh.

¹⁵Xnub'an ta wee hin i je' rukab' inki a'n i yiib' wach kina'ojb'al re' re', xnumin naq taqe panti' k'axik aawak'uun awixq'uun.¹⁶Re' hin xwaaj naq nureqem chi riij, xa re' la' xama' xnureq ta wo' chi riij.¹⁷Kore' noq xi nokik pan aapaat, kora'j xnureq chi riij re' aha' naa kojiik pa'lojoq i yiib' wach kina'ojb'al re' re'.¹⁸Xnureq chi riij chi panyohb'aal taqe aye'em, k'ahchi' taqe aminim chupaam chi naa rojiik sahchoq kiwach.¹⁹Eh xa chi jumehq'iil naa rojiik sahchoq kiwach. Ma' k'isiin ta naa ruchaliik kiyo'jiik, re' re' naa rub'aniik keh.²⁰QaJaaw Dios nik' wach noq inwuktik chi jumehq'iil jino'q i wirik i rub'an. Je' re' noq naa awuktiik i hat chub'aan keh i yiib' wach kina'ojb'al, ruum ma' imponik ta chawach inki a'n.

²¹Eh noq xb'iraj chi je' re' naa a'nam keh, xtib'ik nuk'ux i hin, xa nyot'ik chik i wánima.²²Ruum re' hin ma' kinimanik ta naq chawach, ma' nureq ta naq chi riij je' naq nukab' i kawáyu.²³Atoob' ta je' re' nuna'ojb'al, re' hin xa awuuk' wo' hat nuye'em nuk'ux. Eh re' hat achopom chi rusak'aaj nuq'ab'.²⁴Eh i nak'am nub'eeh ruuk' aak'uhb'aal, eh na' ohoq kuxoq naa kiin ak'ulum chaawuuk' chupaam i loq'laj taxaaj.²⁵Re' hin xa awuuk' wo' hat i nuyeew nuk'ux, ruum ma' awach ta chik jino'q neentoob'inik weh chi je' rukab' i hat, ni xata taxaaj wilik, ni xata wach ak'al wilik.²⁶Re' nuti'jolal xama' xta chik rukowiil. Xa re' la' weht'al chi re' Dios inko'linik weh, eh re' reh inye'wik rukowiil i wánima chi juneliik.

²⁷Eh re' taqe inkikanaa' animjiik naa kikimiik, eh naa asacham wach i ma' korik ta wach ruk'ux awuuk'.²⁸Eh chi wee hin q'e' chihooj animjiik hat waJaaw nuDios. Ruum xa re' wo' hat ti ko'linik weh, naa nuye'em nuk'ux awuuk' reh chi naa nuq'orom rib'iral chu'nchel i na a'n. Re' reey David xupanqaaj ree Dios parutiij chi naa rehtesjiik panti' k'axik i rutinamiit¹QaJaaw Dios, ¿Chib'ih reet noq xoj akanaa' chi qutkeel chi jumpech? ¿Chib'ih reet noq yohb'aal wach aajosq'iil chi qanaah i hoj, i hoj atentzuun noqwilkooj?²K'oloq cho panak'ux re' aatinamiit re' i xa wehchaaj cho pampeet. Eh xawesaj cho panti' k'axik reh chi xakoj haa' chi junch'uq taqe chi aatinamiit. Eh k'oloq panak'ux i ye'aab' Sión re' i ti wihik wii'.³Chawilow nik' wach noq xyojib'ik wach aatinamiit. Re' aj ixowaal sachwik wach chu'nchel chib'ih jariik wilik chupaam asantolaj ye'aab'.

⁴Re' taqe i ki-ixowanik awach xi okik panapaat, k'erlik kichii' chuq'orariik chi xi elik korik. Eh kikojom chik rehtalil chi keh chik.⁵Eh xa je' chik rukab' noq kiokik chuyok'ariik i rax chee' ruuk' ikej inki a'n reh i ookb'al chupaam aaye'aab'.⁶Re' taqe i och'imaj wach chee' kojooj reh i paat xkipaxej ruuk' ikej, je' wo' ruuk' tuhyb'al kalawux.⁷Eh xkikoj ruq'aq'al i asantolaj ye'aab'. Xkian i re' ma' re' chupaam aapaat, eh xkikutib'eej wach ak'al.⁸Xkaaj naq kisacham wach chu'nchel i chib'ih qeh, xkik'atib'eej chu'nchel i ye'aab' tiqaloq'ej wii', wilkeeb' chupaam i tinamit.

⁹Ma' awach ta chik ink'uhtanik qeh jino'q i ehtalil, ruum ma' jino'q chik i jalal ruq'oral i Dios. Eh ma' jino'q imb'inik reh nik' chik najtiil naa qak'ulum i wili.¹⁰QaJaaw Dios, ¿Nik' chik najtiil naa qak'ulum i ti' k'axik pan q'ab' i aj ixowaal re' re'? Eh ¿Kojaruuj i rukanaa' i ma' holohik ta laj q'orik chawiij i hat?¹¹¿Chib'ih reet noq ma' nak'uhtaaj reh aajosq'iil? ¿Chib'ih reet noq xak'ahchi' akanaam chi je' re' i rub'an?

¹²QaJaaw Dios, re' hat xa najtir wo' cho q'iij hat nureey. Xa re' wo' hat, ti ko'linik pan kiq'ab' i aj ixowaal chi junsuut i wach ak'al.¹³Eh ruuk' awajaawriik xa chiqsaj i kaq palaw. Eh ar taqe xamuq'aa' kinaah i je' taqe josq'laj nimaq chikop.¹⁴Re' hat xakansaj i je' qamaan k'ap. Eh re' ruti'jolal xayeew chi kiwa' i josq'laj chikop wilkeeb' chupaam i ye'aab' chiq yuuq'.¹⁵Eh aha' ma' xta ha' ruuk' awajaawriik xpoq' chaloq i ha' xakow chik rooq. Xa chiqsaj i nim ha' xi-ik'ik wii' i aj Israel.¹⁶Re' hat ti ye'wik reh i q'iij, je' wo' hoq i aq'ab'. Eh re' hat ti ye'wik paruye'aab' i q'iij, je' wo' hoq i poh.¹⁷Re' hat xatyej-anik reh chu'nchel i wach ak'al, re' wo' hat xatq'atwik cho riij i si'q'jil, je' wo' hoq iq'ilej.

¹⁸Eh mansahchik panak'ux chi re' inixowanik awach ma' holohik ta inq'orik chawiij. Je' wo' i tinamit yeb'ee wach i kina'ojb'al ma' holohik ta wo' kiq'orik chawiij.¹⁹Maa qohsahchik tii panak'ux i hoj ruum ma' kow ta qak'ux, xa je' qakab' i kok' mukur. Eh maayeew q'ab' chi neenkian qeh i je' josq'laj chikop.

²⁰K'oloq panak'ux aaq'orom cho qeh chi naa a'nam quuk'. Ruum yohb'aal wach i ti' k'axik k'ahchi' ruk'ulariik panqatinamiit, je' wo' hoqsut i wach ak'al.²¹Mayeew q'ab' chi neemanab'jik i ruti'kiil kik'ux aatinamiit, chako'leej la' taqe. Je' wo' taqe i wilkeeb' paneb'a'il reh chi nee tikiloq'ej.

²²QaJaaw Dios, chako'leej taqe ruuk' i k'ahchi' kik'ulum i kinimanik aweh. Ruum re' taqe yiib' wach kina'ojb'al ma' kihi'lik ta chab'ajariik.²³Eh maakanaa' chi je' re' i k'erej kichii' inki a'n ki-ixowanik awach. Ruum re' keh k'ahchi' rojiik chi nimaal i k'ahchi' keeb'. Xa re' wo' Dios i xti korik laj q'atal q'orik¹Inqat'iosej aweh QaJaaw Dios, inqat'iosej aweh, ruum ma' najt ta wilkaat quuk' chi qatoob'jiik. Inqaq'or rib'iral taqe i sachb'al k'uxliis i na a'n.

²Re' QaJaaw Dios je' wili ruq'or: Noq naa ruponiik i q'iij chi nuwach i hin naa nuq'atam q'orik parub'ehel.³Atoob' ta neenk'uyu'jik i wach ak'al, je' wo' taqe i patim chupaam ma' xta nee ruk'ul ruum re' hin kinchopwik reh i raa' ri'sil, inki.⁴Eh re' taqe i q'e' inkinimb'isaj kiwach, i yiib' wach kina'ojb'al je' wili i nuq'or keh: Maa niimb'isaj taq chik awach.⁵Eh mo-oq xa wilik taq awajaawriik i na a'n awiib', maa a'n taq chik i kowlaj q'orik chi nub'ajariik, inki i Dios.

⁶Ruum chupaam chu'nchel i wach ak'al ma' awach taj i neerub'an ruye'ariik rajaawriik i tinamit.⁷Re' la' QaJaaw Dios neenye'wik rajaawriik i tinamit, oon neeresaj i rajaawriik. Ruum xa re' wo' reh q'atal q'orik.⁸Re' QaJaaw Dios je' naa ruyohq'eem jinaj i kulk nujinaq wii' i rujosq'iil je' naa vino xilakkimaj xiik' naah k'ahiil. Eh noq naa ruchihkaam chaloq, naa kuk'em keh tinamit yiib' wach i kina'ojb'al wilkeeb' sut i wach ak'al, ma' xta chik i naa kikanaam.

⁹Eh re' hin xanaa wo' nuq'orom rib'iral, naa nutz'uyem wach chi juneliik i ruDios i Jacob.¹⁰Ruum re' reh naa rusachwiik wach i kajaawriik taqe i yiib' wach kina'ojb'al. Eh re' korik wach ruk'ux naa ruye'em ruman i rajaawriik. Re' Dios i ruq'at kiwach chu'nchel i wilik kajaawriik¹Re' QaJaaw Dios naab'imaj wach ar Judá. Eh xiik' naah holwochiil i rub'ihnaal ar Israel.²Re' i rupaat i Dios inwihik wii', ar wilik chinaah i yuuq' Sión ar Jerusaleem.³Eh ar ruuk' i rajaawriik xutoq i kiflecha, i pulato ch'ihch', i kiq'aslaj ch'ihch' aj ixowaal re' inkikoj reh q'aq'inik.

⁴QaJaaw Dios xiik' naah aaloq'il awajaawriik, ma' xata je' rukab' taqe rax chee' wilkeeb' chi juneliik.⁵Eh re' taqe i q'e' kow kiib' xq'ucharik i chib'ih keh. Eh xqajik i kiwiriik atoob' ta q'e' wo' naq kow kiib', ma' xta wo' i xkian noq xooj kuxoq.⁶QaJaaw, ruDios Jacob noq i inaq'or chi naa a'nam keh, ni xata naq chik re' i kikareta, i kikawayu inkik'uyu'saj.

⁷Eh xiik' naah yohb'alil awach. Ma' awach ta jino'q ineerukuy i pa'lojik chawach noq qopinaq aajosq'iil.⁸Kopan taxaaj i na a'n chaloq i q'ataj q'orik. Eh re' taqe i wilkeeb' wach ak'al ma' k'isiin ta kiyo'jiik, eh kikahniik meem.⁹QaJaaw Dios, ¿kojaruuj aj wo' na a'n re' i q'ataj q'orik? reh chi nee taqe nako'leej chu'nchel i k'ahchi' rub'aan ti' k'axik keh ayu' wach ak'al.

¹⁰Re' rujosq'iil i winaq xama' xta wo' neetiruchej, insutinik la' chi loq'oomb'al aweh, eh chi ye'b'al runimaal awach.¹¹Chayeew taq reh aaDios aaq'orom taq chi naa aye'em reh. Eh re' taq i hat i wilkaat taq chi junsuut i reh, chak'am taq chaloq alemóxna chuwach, i yohljik iraaj wach.¹²Ruum re' reh ineesanik i kik'achariik taqe i k'amal b'eeh. Eh chuwach i reh kiyo'jik taqe reey wilkeeb' wach ak'al. Re' rukapeb'jiik riij i nimaq wach na'ojb'al i rub'an i Dios¹Re' hin, re' nuDios inuq'o'reej chi kow panutiij, reh chi kirib'iraj.²Eh noq intz'irik nuwach inusik' i QaJaaw, xa eliik wo' naq i nujosaj i nuq'ab' chub'aan i nutiij pantaq chaq'ab'. Xa re' la' xama' nureq ta wo' rusuqkiil i wánima.

³Noq ink'ulik panuk'ux i nuDios inchalik woq'iim. Eh noq i nukapaaj riij i rutz'irkiil nuwach inyoj wo' chik nuk'ux.⁴QaJaaw Dios, re' hat ma' naaqasaj ta naq chik, i nuwiriik. Eh insahchik nuk'ux, xama' kinchol ta chik q'orik.⁵Re' hin ink'ulik cho panuk'ux nik' wach xinik'ik cho wii' chupaam taqe q'iij, chupaam taqe haab' ik'inaq chaloq.⁶Eh ink'ulik wo' panuk'ux noq inutz'uyej awach pantaq chaq'ab'. Eh i nukapaaj riij, i nupahqaaj panuk'ux chi je' wili:⁷¿Mi ma' naa chik rik'iik chi jumpech re' i ruk'aah i QaJaaw? ¿Mi ma' nee wo' chik i ruyeew qeh re' i rotob'il?⁸¿Xumay ta'j inchel i k'axooj chi jumpech? ¿Xsahchik ta'j inche paruk'ux i ruq'orom chaloq chi naa rub'anam quuk'?⁹¿Xsahchik ta'j inche paruk'ux i Dios i rotob'il? ¿Mi xti ma' nkuyjik chik re' i rujosq'iil chi ma' neeruketelaaj qawach? kinki panuk'ux.

¹⁰Re' xti ruti'kiil panuk'ux i hin, re' chi nk'ulik panuk'ux chi re' qaDios nim rajaawriik, ma' rub'an ta chik qatoob'jiik je' rukab' i rub'an cho quuk' noq xub'an.¹¹Re' hin naa ruk'uliik panuk'ux taqe i sahchb'al k'uxliis rub'anam quuk' i QaJaaw najtir cho q'iij.¹²Eh naa nukapaam riij chu'nchel i rub'anam, naa nuq'orom rib'iral chu'nchel i rub'an.¹³QaJaaw Dios, re' hat ma' xta chik jino'q i Dios nim rajaawriik chawach ruum re' hat Santo ab'eeh.¹⁴Xa re' wo' hat i Dios i na a'n taqe sahchb'al k'uxliis. Eh xayeew chi naab'jik awajaawriik keh i nimaq tinamit.¹⁵Ruuk' awajaawriik xako'leej taqe aatinamiit re' taqe rak'uun rixq'uun i Jacob, ruch'ihil taqe i rak'uun rixq'uun i José.

¹⁶QaJaaw Dios, noq xrilow awajaawriik i palaw xyo'jik awuum, eh xti nk'uyu'jik taqe i ruha'iil xiik' naah kichamiil.¹⁷Re' taqe suutz' xkiyeew chaloq i ma' k'isa jab'. Eh xa nteleninik chik i kahoq pan taxaaj, xan saqumanik chik i ruch'aab'.¹⁸Eh x-ib'irjik noq xq'orik chaloq taqe kahoq chupaam i teew jab'. Eh xusihq'eej i wach ak'al taqe ruch'aab', xk'uyu'jik aak'al chi kow ruum iyihk.¹⁹Xateh i-ik'b'al panyejaal i palaw, panyejaal taqe nim ha'. Eh noq xa a'n chaloq taqe re', ma' awach ta x-ilwik aweh.²⁰Re' hat xak'am cho kib'eeh aatinamiit chi je' kik'amarik cho tentzun. Eh re' Moisés, re' i Aarón xakoj chaloq chi k'amal kib'eeh. Re' otob'il xub'an i Dios kuuk' i rutinamiit¹Hat taq nutinamiit chakoj taq rehtaal i nuk'uhb'aal. Eh chab'iraj taq i naa nuq'orom.²Re' hin nuch'ob'om rub'ehel taq aweh taqe b'anooj chaloq najtir q'iij, re' taqe i ma' awach ta tehwenaq cho wach.³Aha' wilik taqe i qib'iram i qeht'al, re' taqe i qamaam qati't xik'utjanik cho qeh.⁴Eh ma' naa ta qakeb'aam chikiwach i qak'uun qixq'uun chikiwach taqe tinamit naa kiwihiik koq'uun. Naa la' qaq'orom rib'iral keh i ruloq'il i rajaawiik, i ma' ilooj taj i rub'an QaJaaw Dios.

⁵Eh xuq'or reh i Jacob chib'ih i naa rub'anam. Eh xuyeew keh i k'uhb'aal i quch aj Israel. Eh xuq'or cho keh i qamaam qati't chi naa kik'uhtaam reh i kiih kimaam.⁶Reh chi naa kinab'eem taqe i naa kiwihiik koq'uun, je' wo' taqe i kak'uun kixq'uun konaa raasjiik. Eh re' keh naa wo' chik kik'utjaam reh i kak'uun kixq'uun.⁷Reh chi naakiye'em kik'ux ruuk' i Dios, eh chi ma' naa ta rusahchiik pankik'ux taqe i rub'anam. Eh chi naa kimolom i ruk'uhb'aal.⁸Reh chi ma' naa ta kikahniik chi je' kikab' taqe i kimaam kati't, ma' xinimanik taj, xa re' i xkaaj i keh xkian. Eh ma' xkiyeew taj i kánima, ma' xkian taj i korik chuwach i Dios.

⁹Re' taqe i rutinamiit i Efraín, re' i kiyejaam naq kiib' ruuk' kiflecha reh q'aq'inik, xkimol chi elik noq xponik i ruq'ijil i q'aq'inik.¹⁰Ma' xkian taj i kiq'orom cho ree Dios. Eh ni xata xkaaj kik'amam naah i ruk'uhb'aal.¹¹Re' keh sahchik pankik'ux i rotob'il i Dios, je' wo' taqe i ma' ilooj taj rub'anam cho chikiwach.¹²Re' QaJaaw Dios ma' k'isiin taj i ma' ilooj taj xub'an chaloq kuuk' i qamaam qati't paruyuq'ul i Zoán wilik ar Egipto.¹³Xuch'aq panyejaal i palaw, eh k'ul xumol riib' i ha' pantaq kicheel, panchiqiij rik'saj taqe aj Israel ar¹⁴Pan q'iij ruuk' rumuuj suutz' xub'esaj taqe chaloq. Eh chaq'ab' ruuk' i rusaqumaal i q'aaq' xub'esaj taqe chaloq.¹⁵Eh chupaam i ye'aab' chiq yuuq' xuch'aq i saq rehp ab'aj, xelik chaloq i ha', eh chi kunchelaal xkian kihaa' chi korik.¹⁶Re' QaJaaw Dios ma' k'isa ha' i xresaj chaloq pansaq rep ab'aj, xa je' chik nimlaj raasb'al ha'.

¹⁷Xa re' la' re' keh xama' xkikanaa' ta wo' rub'aan i mahk chuwach i Dios wilik cho pan taxaaj. Eh xkiq'etwachej chupaam i ye'aab' chiq yuuq'.¹⁸Xkaaj naq kipajam i QaJaaw Dios ar, xkipahqaaj kiwa' reh, je' rukab' inkaaj i keh.¹⁹Ma' holohik ta xiq'orik chi riij i Dios je' wili xkiq'or: ¿Mi nee ruyeew qawa' re' Dios ayu' chupaam i ye'aab' chiq yuuq'?²⁰Korik noq re' Dios xuch'aq i saq rehp ab'aj, eh ar xelik chaloq i ha', xa je' chik nim ha', xib'oq taqe ak'al ruum. Xa re' la' ¿mi nee ta wo' ruyeew qakaxlanwi'k qatiib' i hoj, hoj rutinamiit? inki taqe.

²¹Eh noq xrib'iraj i Dios, chi je' re' xkiq'or, xa je' chik q'aaq' noq xqop i rujosq'iil chikinaah i aj Israel re' taqe i rak'uun rixq'uun i Jacob.²²Ruum re' keh ma' xkiyeew ta kik'ux ruuk' i Dios. Eh ma' xkinimaj taj chi re' reh xko'linik cho keh.²³Ma' re' ta nkiwii' chi je' re' xkian re' Dios xutaq'aaj chaloq taqe suutz' xuteh chee chii' i taxaaj.²⁴Yohb'aal wach i maná xujalk'iij cho chikinaah i rutinamiit, pan taxaaj xchalik i xkik'ux.²⁵Re' taqe i tinamit re' re', looq' laj kaxlanwi'k i xkik'ux korehtaal xinujik chi korik. Re' Dios xtaaq'anik cho reh.²⁶Re' Dios i xutaq'aaj chee teew pareelb'aal q'iij, je' wo' pansak'aaj ree rookb'aal i q'iij reh chi xhupinik chinaah i wach ak'al.²⁷Ruuk' i re' ma' k'isa chikop re' ruuk' i kirupinik xuqasaj cho chikinaah i rutinamiit. Xa je' chik kik'ihaal saniib' chi chii' i palaw.²⁸Eh ma' najt ta ruuk' i kiye'aab' xponik ruqasaj i ma' k'isa chikop re' re'. Ar chi junsuut taqe i ki-itz'ihy naah paat.²⁹Eh xkik'ux korehtaal xinujik chi korik. Re' Dios xuyeew cho keh aha' wilik i xkaaj i keh.³⁰Eh ni xata chi je' re' xik'ik i kinuhmiik, xakok'ahchi' wo' naq keeb' chi wi'k,³¹noq xuyeew chaloq i rujosq'iil i Dios chikinaah, xukansaj taqe i winaq q'e' kow kiib'. Eh xukansaj wo' taqe i winaq nimaq wach kina'ojb'al chi kixilak i aj Israel.

³²Eh noq xkilow taqe re', xama' xkikanaa' ta wo' mahk, xama' xkiyeew ta wo' rajaawriik i ma' ilooj taj xub'an i Dios.³³Ruum aj re', re' Dios wilik i xresaj kik'achariik chi jumehq'iil. Eh k'ih laj haab' xrik'saj taqe chi ti' k'axik panye'aab' chiq yuuq'.³⁴Eh noq re' Dios wilik i rukansaj, kora'j inkisik' re' reh, ma' kihi'lik ta chik chupahqaljiik kuyb'al kimahk.³⁵Kora'j ink'ulik cho pankik'ux re' i Dios wilik cho pan taxaaj, chi re' reh inko'linik keh, eh ineesanik keh panti' k'axik.³⁶Xa re' la' chik imb'anik keh ruuk' i kichii', ruuk' i kaaq' inkichuk i q'orik ree Dios.³⁷Re' keh xama' korik ta wo' wach i kánima chuwach i Dios. Eh ni xata xkian i kiq'orom cho reh chi naa kianam.³⁸Xa re' la' xuketelaaj wo' naq kiwach, i rukuy wo' naq i kimahk, ma' noq ta xusach kiwach. K'ihpech xukanaa' chi je' re', ma' noq ta xresaj cho wach i rujosq'iil.³⁹Eh xk'ulik paruk'ux chi xa tiwik wo' taqe. Eh chi xa je' kikab' i teew xa ik'ik i rub'an ma' insutinik ta chik chaloq.⁴⁰Ar chupaam i ye'aab' chiq yuuq', xata wo' jarpech xkiq'etwachej kiib' chuwach i Dios. Eh xkiyeew ruti'kiil ruk'ux.⁴¹Xa re' la' re' taqe i aj Israel re' re', k'ih pech xkipaj i ki Dios wilik ruSantohiil eh xkitz'iraa' wach.⁴²Ma' xk'ulik ta pankik'ux chi pan jinaj cho q'iij ruuk' i rajaawriik i xiko'ljik cho pan kiq'ab' taqe i aj ixowaal.⁴³Re' noq xub'an i Dios taqe i ma' ilooj taj, taqe i sahchb'al k'uxliis, ar chupaam i ye'aab' i Zoán, wilik ar Egipto.⁴⁴Re' noq xusutej taqe chi kik' i rooq ha' ar Egipto, eh ma' xub'an ta chik chi x-uuk'jik.⁴⁵Xutaq'aaj cho chikinaah i ma' k'isa utz', ma' k'isa tuhtz' k'uxarik chu'nchel i chib'ih keh, eh xsacharik wach.⁴⁶Xuyeew chaloq i nimaq chili'l sachb'al i wach i kitik re' i kikamaneem wach.⁴⁷Eh re' taqe i ki higo, i wach i ki-uuva xusach cho wach ruuk' saqb'och, ruuk' jot'ik laj chaaj.⁴⁸Xikimik taqe i kiwakax taqe i kitentzuun ruum i saqb'och, ruum i ruch'aab' kahoq.⁴⁹Re' Dios yohb'aal wach noq xqop rujosq'iil. Eh xrik'saj rujosq'iil chikinaah xutib'isaj kik'ux. Xutaq'aaj taqe chaloq i ruánjel reh i rub'anariik keh i ti' k'axik.⁵⁰Re' Dios ma' xta chik xq'ilojik wii' i rujosq'iil. Ma' xuketelaaj ta chik kiwach, xuq'asaj taqe pankimik.⁵¹Xukansaj chu'nchel i peet kak'uun i aj Egipto xusach wach i peet wach i kitik kimolom chupaam taqe i ruye'aab' i Cam rub'ihnaal.⁵²Eh xresaj cho ar taqe i rutinamiit, je' kib'ehtesjik cho tentzun xub'an, noq xrik'saj taqe cho chupaam i ye'aab' chiq yuuq'.⁵³Eh xucha'jeej taqe chi korik wach b'eeh, reh chi ma' xiyo'jik taj. Eh re' taqe i aj ixowaal xtahqinik cho keh xutz'ap kinaah chupaam i kaq palaw.⁵⁴Xuk'am taqe chaloq i rutinamiit chupaam i santo laj ye'aab'. Re' i ye'aab' xuko'leej riij ruuk' i rajaawriik.⁵⁵Eh xukaaj taqe reje ar i ma' re' ta taqe aj nimaneel, keh chik taqe i quch aj Israel xuch'aq i ye'aab' re' re'. Reh chi, chi kich'uhqaal xi patinik ar.

⁵⁶Xa re' la' re' keh xkipaj, xkiq'etwachej wo' chik i Dios wilik cho pan taxaaj. Eh xama' xkian ta wo' hoq i ruq'or i ruk'uhb'aal.⁵⁷Eh xkian wo' chik keh je' rukab' i xkian i peet kituut kajaaw xkiq'eb' chi riij kik'ux i Dios. Ma' korik ta wach kik'ux, xkijal kib'eeh, je' rukab' i flecha ma' korik ta inkutwik.⁵⁸Ma' k'isiin ta xkiyeew rujosq'iil i Dios noq xkiyejaa' kiartaal loq'oomb'al reh i tiyoox. Eh ruuk' i re' xkiyoj ruk'ux.⁵⁹Re' i Dios xchalik rujosq'iil. Ruum i re' xuq'eb' taqe chi riij ruk'ux chi jumpech i quch aj Israel.⁶⁰Xuq'eb' wo' chi riij ruk'ux i rupaat wilik ar Silo, re' naq inlooq'jik wii' kuum taqe tinamit.⁶¹Xuyeew wo' q'ab' i Dios keh i aj ixowaal chi xq'ucharik keh i quch aj Israel i loq'laj kaxa rehtalil i rajaawriik i ruloq'il i Dios.⁶²Eh ruum i rujosq'iil xuq'asaj i rutinamiit pan kiq'ab' i aj ixowaal, reh chi xikanteesjik ruuk' q'aslaj ch'ihch'.⁶³Re' taqe i k'ijolaq xkuxik kikimiik panq'aq'inik. Eh re' taqe q'ahxoq ma' xta chik ninq'iij xkian reh i kaxáro.⁶⁴Eh re' taqe i k'amal b'eeh aj tiij xi kanteesjik ruuk' q'aslaj ch'ihch'. Eh ma' xuyeew ta chik riib' chi xi ooq'jik kuum i kehk'een.⁶⁵Eh re' i QaJaaw Dios xuko'leej wo' chik i rutinamiit, je' naa kore' xrik'raaj riib' paruwiriik. Je' rukab' noq i rik'raaj riib' i winaq uk'inik vino i rub'an.⁶⁶Re' Dios xub'an keh nixowanik kiwach i rutinamiit, xukaaj taqe reje, eh xuk'uhtaaj kik'ixb'ilaal.

⁶⁷Eh xuq'eb' chi riij ruk'ux i rak'uun rixq'uun i José, ma' re' ta wo' hoq i tinamit Efraín xusik' wach.⁶⁸Re' la' tinamit Judá xusik' wach, re' wilik wii' i yuuq' Sión re' i q'e' ruk'ax.⁶⁹Ar xuyejaa' i ruloq'laj paat kopan ak'al xresaj johtoq najt najt naah q'e' holohik rub'aan, ma' xta naa rub'aniik reh chi jumpech.⁷⁰Eh xusik' wach i rumoso David, re' i cha'jen naq tentzun.⁷¹Xresaj chi kicha'jaljiik i juntzuhb' chi tentzun, reh chi naa rucha'jaljiik i rutinamiit. Re' chik i reh xk'amwik kib'eeh i tinamit Israel.⁷²Je' re' noq re' i David xcha'jinik reh i rutinamiit i Dios. Eh xuk'am kib'eeh panotob'il, ruuk' rukorkiil wach ruk'ux. Re' ruti'kiil k'uxliis chi riij i rusahchiik wach i Jerusaleem¹QaJaaw Dios, re' taqe ma' kinimanik taa weh xkichop naah aaye'aab'. Xkich'uwa'reej paam aSantolaj paat. Eh xkisach wach i tinamit Jerusaleem.²Eh re' i kiti'jolal taqe awaj kamanoom, taqe i santo laj awaj nimaneel, xkiyeew chi rutiib' k'uch, chi rutiib' taqe josq'laj chikop.³Re' kikik'eel xa je' chik inchihkik ha' kuum chupaam chu'nchel i tinamit Jerusaleem, eh ma' awach ta nmuuq'anik keh.⁴Ruum i re' q'e' hoj kib'ajb'al, eh hoj kise'lb'aal taqe tinamit wilkeeb' chi junsuut i qatinamiit.

⁵QaJaaw Dios ¿Xti kojaruuj i nik'ik aajosq'iil? ¿Mi xa eliik naa ruqopiik chaajosq'iil chi qanaah je' rukab' noq inqop i q'aaq'?⁶Chawik'saj la' aajosq'iil chikinaah i tinamit ma' kinimanik taa weh. Je' wo' chikinaah taqe i aj taaq'oom ma' nkian ta kitiij chawach.⁷Ruum re' keh xkisach wach i Jacob. Eh xkisach wo' wach i rutinamiit.

⁸Chakuy, maa qohayeew chutojariik riij i kiyiib' wach na'ojb'al kianam chaloq i qamaam qati't. Chaketelaaj la' qawach chi jumehq'iil. Ruum re' hoj ma' nqakuy ta chik i ti' k'axik wilkooj wii'.⁹QaJaaw aj ko'len qeh, qoh atoob'eej, qoh awesaj chupaam i ti' k'axik, cha kuy qamahk reh chi neenqayeew i ruloq'il aab'ihnaal.¹⁰Reh chi ma' nee ta nkiq'or chi je' wili i ma' kinimanik taa weh: ¿Aha' wilik i ki Dios inkiq'or? ma' inko'q ta taqe. Inqaaj la' qilom chi neenaq'aj wach keh i kikanteesjiik taqe awaj kamanoom xkian.

¹¹Chab'iraj i koq'iim i prexo wilkeeb' ruum i ti' k'axik. Eh chako'leej taqe ruuk' awajaawriik taqe k'ahchi' ruq'orariik chi naa kikanteesjiik.¹²QaJaaw Dios, chayeew cho jilow wuquub'-oq pech keh i tinamit wilkeeb' chi qaka'jaah ab'ajariik xkian, ma' nkiyeew ta k'isinoq aloq'il.¹³Eh re' hoj aatinamiit i je' hoj aatentzuun noq wilkooj, naaqat'iosem chi juneliik awotob'il, eh naaqatz'uyem awach, chiqiih chi qamaam. Re' rupahqaljiik ree Dios chi kisutinoq wo' chik chaloq i aj Israel¹QaJaaw Dios, hat aj cha'jen qeh i hoj, hoj aj Israel, je' incha'jaljik tentzun i na a'n i riih rumaam i José. Eh ar wilkaat chi kixilak i k'achaach wilik kixiik', cha k'uhtaaj i rusaqumaal aaloq'il²Je' wo' hoq junch'uq chi tinamit Efraín, i tinamit Benjamín, i tinamit Manasés, chawilow, chako'leej taqe ruuk' awajaawriik.

³QaJaaw Dios, qoh atoob'eej reh chi nee wo' chik qohkahnik chi je' rukab' i pampeet. Suq tii qilariik cha a'n, eh qoh ako'leej.

⁴QaJaaw Dios, nim awajaawriik, ¿xti kojaruuj i rumay aajosq'iil chi qanaah? ¿Mi xti ma' naa chik ab'iram re' i qatiij i hoj, hoj aatinamiit?⁵Xa re' chikoq'ik inqawab'eej ruum i ruti'kiil qak'ux i nayeew, eh re' qahaa' re' suq suq laj oq'ik inqa'an.⁶Eh xoj akanaa' chi hoj kib'ajb'al i tinamit wilkeeb' chi qaka'jaah. Eh xa hoj kikaqse'lb'aal taqe i ki-ixowanik qawach.

⁷QaDios, nim awajaawriik, qoh atoob'eej, reh chi nee wo' chik qohkahnik chi je' rukab' i pampeet. Suq tii qilariik cha a'n, eh nee qoh ako'leej.

⁸Re' hat je' nehtesjik cho uuva xa a'n chaloq aatinamiit Egipto. Eh aha' xawesaj taqe reje i tokoom tinamit re' chik i keh xatik taqe ar.⁹Re' hat xames wach i ye'aab' re' re' chi kekeh, eh yohb'aal wach noq xi k'ihaaxb'ik. Xa je' chik rukab' noq i ruk'am raa' i uuva.¹⁰Eh noq xi k'ihaaxb'ik xa je' chik rukab' i rub'an i uuva, rutz'ap naah taqe i ch'ahn i rumuuj. Eh re' taqe q'ab' i rutz'ap naah taqe i nimaq chee'.¹¹Eh re' taqe q'ab' xik'ihik reje, je' naa xi ponik chinaah i palaw, re' rutoxl je' naa xponik ko chi chii' i nim ha' Éufrates.¹²¿Chib'ih reet noq xa a'n reh aatinamiit je' rukab' i ruk'ul i uuva noq inehteesjik i koraal chi riij, eh inik'ik sik'aroq i wach kuum taqe i aj b'eeh?¹³Re' i ki-ixowanik wach aatinamiit je' kikab' i k'ichi'ahq, je' kikab' i josq'laj chikop re' taqe re' insachwik kiwach.

¹⁴Hat Dios nim awajaawriik, qoh atoob'eej cho pan taxaaj ruuk' i chib'ih i k'ahchi' qak'ulum, i hoj, i je' hoj uuva noq wilkooj.¹⁵Re' hoj je' naa qohtikarik uuva xooj a a'n je' naa xak'isaj johtoq i rutoxl.¹⁶Re' hat, chasach kiwach ruuk' awajaawriik i kich'uqwik reh, i kik'atwik reh i je' taqe uuva re' re'.¹⁷Xa re' la' chatoob'eej i winaq asik'im cho wach, re' i naa ruko'liniik qeh chi juneliik.¹⁸Chi je' re' ma' nee ta chik inqakanaa' qiib' chawiij, chayeew qak'achariik, xa re' chik i hat nee tiqaq'o'reej pan qatiij.

¹⁹QaJaaw Dios nim awajaawriik, qoh akanaa' wo' chik chi je' rukab' i pampeet. Suq tii qilariik cha a'n, eh nee qoh ako'leej. Re' rotob'il i Dios, eh re' i kiyiib' wach na'ojb'al i aj Israel¹Chatz'uyej taq wach i Dios, ruuk' rusuqkiil k'uxliis, re' ye'el rukowiil qak'ux. Chak'er taq aachii' chulooq'jiik i ruDios chee Jacob.²Chatz'uyej taq wach ruuk' setesaq q'ooj re' ruuk' i kitzalajinik, ruuk' arpa, ruuk' taqe i k'ahaam wach q'ooj.³Chaxulej taq aatuun noq rub'anam i ak' poh, je' wo' na'chub'an k'ul saqum i poh, ruum re' re' jinaj i runimaal ninq'iij chi qeh i hoj.⁴Ruum re' re' i k'uhb'aal xuyeew i Dios reh i Jacob, eh xuyeew wo' keh i quch aj Israel.⁵Re' wo' k'uhb'aal re' re' xq'orarik reh i José noq ruuk' i runimaal i rajaawriik i Dios xi ehteesjik cho ar Egipto.⁶Eh xb'iraj jinaj i q'orik ma' jank'al ta nb'iraj, je' wili xuq'or: yu'naak xwisaj chik i ahl laj ihq taq cha naah, xat nuhi'lisaj taq chik ruuk' i kowlaj kamanik.⁷Eh noq ti' taq wilkaat xapahqaaj taq i atoob'jiik, eh xatnuko'leej wo' taq. Kore' i rub'an cho wii' i kahoq xat b'iraj taq chaloq. Eh xatnupaj taq i wilik wii' i ha' Meriba.

⁸Chab'iraj taq i aq'ilariik naa nub'anam i hat taq nutinamiit Israel. Atoob' wii' xinanimaj taq.⁹Ma' naa ta taq ruwihiik atiyoox, eh ni xata naa taq aloq'em i ki dios i tokoom tinamit.¹⁰Ruum xa re' wo' hin taq aaWaJaaw aaDios xineesanik taq cha weh Egipto. Eh cha pahqaaj taq chib'ih taq inawaaj re' hin naa nuye'em taq aweh.

¹¹Xa re' la' re' nutinamiit Israel xama' xinkinimaj ta wo' hoq. Eh xama' xkaaj ta wo' nuwach,¹²ruum i re' xnuyeew q'ab' chi xkian i xkaaj i keh. Eh xi k'acharik nik' wach i xponik chikiwach i keh.¹³Wi ta xkib'iraj i xnuq'or keh i nutinamiit Israel, xkik'am ta naah i nuk'uhb'aal.¹⁴Re' hin xa chi jumehq'iil naq xnub'an keh inixowanik kiwach. Eh xnuyeew naq taqe panti' k'axik, inki Dios.¹⁵Re' taqe i ki-ixowanik wach i QaJaaw Dios naakiloch'om kiib' chuwach. Eh junelik naakiye'ariik chutojariik i kimahk.¹⁶Eh re' QaJaaw Dios nee naq i ruk'uxlaaj taqe ruuk' i chihooj laj trigo, eh ruuk' i riis kaab' i nelik cho panab'aj. Re' Dios xuq'il i q'atal q'orik¹Re' Dios xuq'oreej taqe i Q'atal q'orik noq kimolom kiib', xuq'at i q'orik chikinaah, je' wili xuq'or keh:²¿Ko jaruuj taq i namay i q'ataj q'orik ma' re' ta parub'ehel? ¿Mi ma' naa taq akanaam kitoob'jiik re' i yiib' wach kina'ojb'al?³Chako'leej la' taq i ma' kow ta ruk'ux, i ma' xta rutuut rajaaw. Eh parub'ehel taq chaq'at i q'orik chinaah i ti' ruk'ux, eh i ma' xta wilik reh.⁴Cha ko'leej taqe i ma' kow ta kik'ux, je' wo' taqe i ma' xta wilik keh, pan kiq'ab' i yiib' wach kina'ojb'al.

⁵Re' taq i hat ma' aweht'al ta taq, ma' nareq ta taq chi riij, pam q'equm taq k'acharik i na a'n. Xa kib'arb'otik chik i wilkeeb' wach ak'al taq awuum.

⁶Re' hin, hat naq taq jilow dios noq xat xnukanaa'. Eh hat naq taq manlik wak'uun noq nuq'or, i hin i Dios nim awajaawriik.⁷Eh naa taq akimiik je' rukab' noq inkimik xa awach. Eh chi je' rukab' noq insacharik wach i q'atal q'orik xakow i rub'an riib', inki Dios.

⁸QaJaaw Dios, chaq'at i Q'orik chikinaah wilkeeb' wach ak'al, ruum re' i hat i ehchan reh i chu'nchel i tinamit. Re' reey David xupahqaaj ree Dios chi chusach kiwach i aj ixowaal¹QaJaaw Dios, maakanaa' chi je' re' i k'ahchi'kooj. Maacanaa' chi ma' xtaj i naa a'nam.²Chawil taqe ma' nkaaj ta awach, re' taqe i ma' kinimanik taa weh k'achi' keeb' chi tukinik wachiis.³Pan komonil xkiyejaa' wach i yiib' wach na'ojb'al, reh chi naa kia'nam reh aatinamiit. Eh chi naa kia'nam reh taqe asik'im cho kiwach.⁴Inkaaj ruchaliik kisacham qawach pan qatinamiit, reh chi ma' nee ta chik inq'orarik rib'iral i qatinamiit Israel.⁵Jinaj i xkiyejaa' wach chawiij i hat, eh xkian jinaj wach kik'ux chi kunchelaal.⁶Kuuk' taqe i patim Edom, kuuk' i aj Ismael. Eh kuuk' rak'uun rixq'uun i agar, kuuk' i aj Moab.⁷Eh kuuk' aj Gebal, kuuk' i aj Amón, kuuk' i aj Amalec, kuuk' i aj filisteo, kuuk' aj Tiro.⁸Eh xkian wo' jinaj wach kik'ux kuuk' i aj Asiria. Re' taqe re' xti q'e' taqe kow chi kixilak i rak'uun rixq'uun i Lot.

⁹Chasach kiwach taqe re', je' rukab' i xa a'n keh i aj Madián, i aj Sísara, aj i Jabín, re' i wilik wii' i nim ha' Cisón.¹⁰Xasach cho kiwach chupaam i ye'aab' Endor. Ar xiq'ahik, chi ruraxiil ak'al.¹¹Chasach kiwach i nimaq kiwach, je' rukab' i xa a'n keh i Oreb, i Zeeb. Cha a'n kuuk' i k'amal kib'eeh, je' rukab' noq xasach wach i Zeba, i Zalmuna.¹²Re' hat xasach kiwach ruum je' wili xkiq'or: Naa qehchaam i rutinamiit i Dios, inki taqe.

¹³WaJaaw nuDios, chasach kiwach, xa je'-oq kik'amarik reje chiqiij laj xaq chee' ruum i kowlaj teew cha a'n keh.¹⁴Je' rukab' noq kichaajrik ruum q'aaq' i rax chee'. Eh je' rukab' noq ink'ahtik ruum q'aaq' i kok' ch'ahn.¹⁵Chayeew i k'axik chikinaah ruuk' awajaawriik. Eh chayohb'isaj taqe ruuk' aajosq'iil.¹⁶QaJaaw Dios, chayeew q'ab' chi neenkik'uhtaaj kik'ixb'ilaal, reh chi nee tikisik'.¹⁷Ma' ta naq nee kielik korik ruuk' inkikapaaj. Reh chi neenkik'uhtaaj kik'ixb'ilaal, eh nee kikimiik.¹⁸Reh chi nee nkinab'eej chi xa re' wo' hat i Dios, xa re' wo' hat i nim awajaawriik chinaah chu'nchel i wach ak'al. Re' rotoowjiik wihik chupaam i rupaat i Dios¹QaJaaw Dios, nim awajaawriik xiik' naah holwochiil aapaat.²Re' hin xa nwotow chik wihik chupaam i aapaat QaJaaw Dios. Eh chu'nchel nuk'ux, chu'nchel i wánima inutz'uyej awach ruum re' hat i k'achlik Dios.

³QaJaaw Dios nim awajaawriik, hat nureey, hat nuDios. Re' taqe kok' tz'unun, taqe i kok' si'q'jil inki req naa re' wo' kiye'aab' chuwach taqe aa artaal, eh ar inkiyejaa' kisuuq' ye'aab' kok' kak'uun.⁴Je' re' noq q'e' atoob' keh i eliik wilkeeb' chupaam aapaat, ruum ma' kihi'lik ta chalooq'jiik.

⁵Eh atoob' keh i awuuk' i hat inkireq rukowiil kik'ux. Eh ma' kikanaa' ta rub'aan inawaaj i hat.⁶Eh noq ki-ik'ik chi ti', noq ki oq'ik inasutej chi rusuqkiil k'uxliis, i nayeew aawotob'il chikinaah je' rukab' noq i nujik i ye'aab' ha' noq i rub'an chee jab'.⁷Eh reh reh kireqem kikowiil reh ojik chikiwach. Eh ar Sión naakilom awach i hat qaDios.

⁸QaJaaw Dios, nim awajaawriik, ruDios chee i Jacob, xti chab'iraj tii cho weh i nutiij.⁹QaJaaw Dios aj ko'len qeh, chayeew tii aawotob'il chinaah i reey asik'im cho wach.

¹⁰Eh q'e' chihooj chi weh chi nee kinwihik jino'q q'iij chupaam aapaat chuwach chi nee kinwihik jino'q miil Q'iij xa aha'. Eh q'e' chihooj chi weh chi nee nucha'eej i ookb'al reh aapaat i hat nuDios chuwach chi nee kinwihik aha' imb'aan wii' i mahk.¹¹Ruum re' QaJaaw Dios insihq'inik reh i qana'ojb'al. Eh qoh ruko'leej, qohruk'ax i ruyeew kiloq'il i ma' xta kiq'ehb'iik wii'. Eh i ruyeew keh i chihooj chi keh.¹²QaJaaw Dios, nim awajaawriik. Q'e' atoob' keh taqe i awuuk' i hat inkiyeew i kik'ux. Re' reey David xupahqaaj chi naa wo' chik kiko'ljiik ruka'peech¹QaJaaw Dios, re' hat q'e' hat atoob' quuk' i hoj, hoj aatinamiit, ruum xoj asutej wo' chik chaloq i hoj, hoj riih rumaam i Jacob.²Eh xakuy chu'nchel i kimahk aatinamiit, je' wo' taqe i yiib' wach na'ojb'al inki a'n³Eh ma' xta chik cho aajosq'iil chikinaah, sahchik panak'ux chi jumpech i ransil aajosq'iil.

⁴QaDios i aj ko'len qeh, je' re' i na a'n. Chakuy qoh ako'leej yu'naak, maayeew chik aajosq'iil chi qanaah.⁵¿Mi ma' naa chik amayam re' aajosq'iil chi qanaah chi jumpech? ¿Mi konaa wo' aye'em cho re' aajosq'iil chikinaah taqe qak'uun qixq'uun naa kiwihiik koq'uun?⁶¿Mi ma' naa chik aye'em qeh re' i suq laj k'acharik reh chi neensuuqb'ik qak'ux awuuk' i hoj, hoj aatinamiit?⁷QaJaaw Dios, chaketelaaj tii qawach, eh qoh ako'leej.

⁸Re' hin naab'iram i naa ruq'orom i QaJaaw Dios. Ruum naa ruq'orom chi naa ruwihiik rusuqkiil kik'ux i rusantolaj tinamiit. Reh chi ma' nee ta chik imb'aan i tehwachiil.⁹Xti korik noq re' QaJaaw Dios ma' najt ta wilik chi kiko'ljiik i kiye'wik runimaal wach, reh chi neen wihik ruloq'il chupaam i qa ye'aab' wilkooj wii'.

¹⁰Re' ketelinik wachiis, re' korik naa ruwihiik kuuk' i tinamit. Eh naa ruwihiik i suq kiil k'uxliis, i rukorkiil wach k'uxliis.¹¹Re' korik chi kixilak i tinamit wach ak'al naa rutihk'iik. Eh re' wihik parukorkiil pan taxaaj naa ruchaliik.¹²Re' QaJaaw Dios naa ruye'em i rotob'il chi qanaah, eh naa ruwachiniik i qatik pan qa ye'aab'.¹³Re' korik naa ruk'uhtaam qeh i QaJaaw. Eh naa ruk'uhtaam qeh i wihik parukorkiil. Re' reey David xupahqaaj reh i jinaj chi Dios chi naa rutoob'jiik¹QaJaaw Dios chab'iraj tii i nupahqaaj aweh, kinatoob'eej, ruum re' hin q'e' ntz'irik nuwach, eh q'e' ti' nuk'ux.²Kinako'leej i hat nuDios, ruum korik wach nuk'ux awuuk'. Kinako'leej hin, hin amoso, awuuk' i hat nuye'em nuk'ux.³QaJaaw Dios chaketelaaj tii nuwach ruum re' hin juneliik nupahqaaj aawotob'il.⁴Jaaw chasuuqb'isaj i wánima hin, hin amoso, eh xa chawach hat i nub'an nutiij.⁵Re' hin Jaaw weht'al chi q'e' hat atoob'. Eh hat kuyuul mahk, i naaketelaaj kiwach inki a'n kitiij chawach.⁶QaJaaw Dios, chab'iraj tii i nutiij, chayeew weh i nupahqaaj aweh.⁷Nik' ti' nuk'ux re' hat tinuq'o'reej, ruum weht'al chi nayeew weh inupahqaaj aweh.

⁸QaJaaw Dios, ma' xta chik jino'q dios chi je' rukab' i hat. Eh ma' awach ta neemb'anik reh taqe i na a'n i hat.⁹QaJaaw Dios, chu'nchel i nimaq tinamit ayejaam, naa kichaliik chalooq'jiik. Eh naakiye'em runimaal wach aab'ihnaal.¹⁰Ruum xa re' wo' hat i jinaj chi Dios, xiik' naah nimaal awach, eh i na a'n taqe i ma' ilooj taj.¹¹QaJaaw Dios, cha k'uhtaaj weh aab'eeh, reh chi neenub'an i korik. Eh chayeew rukowiil i wánima, reh chi neenuyeew runimaal wach aab'ihnaal.¹²Hat waJaaw nuDios, naa kaat nuloq'em chu'nchel i wánima, eh juneliik naa nuye'em ruloq'il ab'ihnaal.¹³Eh ma' k'isiin ta xaketelaaj nuwach. Ruum xinako'leej chuwach i kimik.

¹⁴QaJaaw re' taqe i ki-ixowanik nuwach yohb'aal wach i kijosq'iil. Re' taqe i ma' tikikapaaj taj inkaaj nukanteesjiik.¹⁵Eh re' hat Jaaw, hat Dios, q'e' hat kuyuul. Ma' jumehq'iil ta inchalik aajosq'iil, xiik' la' naah i ketelinik wachiis awuuk', eh re' hat i korik.¹⁶Kinawilow tii chaketelaaj nuwach. Chayeew rukowiil nuk'ux hin, hin amoso, hin rak'uun chaloq amoso re' i nutuut.¹⁷Chak'uhtaaj weh chi korik aawotob'il, eh noq neenkilow i ki-ixowanik nuwach neenchalik kik'ixiik. QaJaaw Dios, weht'al noq re' hat titoob'inik ti ye'wik rusuqkiil nuk'ux. Re' ruye'ariik ruloq'il i tinamit Sión¹Re' raa' ri'sil i rutinamiit i Dios ar wilik chinaah i rusantolaj yuuq'.²Re' QaJaaw Dios ma' k'isiin ta ruk'ax i ye'aab' Sión chuwach i ye'aab' wilkeeb' wii' taqe i rak'uun rixq'uun i Jacob.³Hat rutinamiit i Dios, yohb'aal wach holwochiil i ruq'or aweh i Dios chi je' wili:

⁴Re' taqe i tinamit kieht'alinik nuwach, wilik i naa nuq'orom i kib'ihnaal: Re' Egipto, Babilonia, Filistea, Tiro, Etiopía re' taqe re' awuuk' i hat xitz'uhkrik, je' hat kituut, inki.

⁵Eh re' taqe re' je' wili i naa kiq'orom: Re' hoj, ayu' Sión xoj tz'uhk'rik eh re' wo' Dios nim rajaawriik xsik'wik cho qawach, inkoq taqe.⁶Eh re' QaJaaw Dios rutz'ihb'aam i kib'ihnaal i tinamit, re' taqe i ar xitz'uhkrik Sión re' i je' kituut noq wilik.

⁷Re' taqe aj tz'uuy, taqe i aj q'ooj, je' wili i naa kiq'orom: Re' wili xti manlik qatinamiit ruum ayu' xoj tz'uhk'rik, inko'q taqe. Re' wili rutiij jinaj i winaq q'e' ti' ruk'ux¹QaJaaw Dios, hat waj ko'loom, re' hin chi q'iij chi aq'ab' nupahqaaj nutoob'jiik aweh.²Chab'iraj tii weh i nutiij. Chayeew weh aha' wilik i nupahqaaj aweh.

³Ruum re' hin yohb'aal wach i ti' k'axik xumol riib' chi nunaah, xanaa chik nukimiik noq inwik'raaj.⁴Xa je' chik nukab' taqe i kamnaq noq inwik'raaj, ruum xama' xta chik rukowiil i nuti'jolal.⁵Je' naa xinkahnik chi tuch'ulkiin chi kixilak taqe i kamnaq, je' nukab' taqe i kikimik ruuk' q'aslaj ch'ihch' xi muhqik chik. Eh ma' xako'leej ta taqe i hat, xsahchik taqe panak'ux.⁶Je' naa pan jinaj ruchamiil jul xinayeew, xiik' naah q'equmaal paam.⁷Eh yohb'aal wach aajosq'iil chi nunaah. Eh nimaq taq rub'ohl ha' i k'ahchi' rumuq'aniik nunaah.⁸Xayeew q'ab' chi xinkiq'eb' chi riij kik'ux taqe wamigo. Eh ma' suq ta chik wilariik inki a'n ruum ma' xinatob'eej taj, xama' ha' ta chik kinelik.⁹Eh ruum i ma' k'isa oq'ik i nub'an, k'ahchi' rupohyiik paam i naq'nuwach. Jaaw ruum aj re' chu'nchel q'iij tinuq'o'reej, i nujosaj i nuq'ab' chawach.¹⁰¿Mi ko neena a'n cho re' i nimaq wach ma' ilooj taj kuuk' taqe i kamnaq? Eh ¿Mi ko neetikiloq'ej re' taqe kamnaq?¹¹¿Mi koneeruyeew riib' re' chi neen q'orarik aak'axb'al, ruch'ihil i rukorkiil wach ak'ux chupaam i ye'aab' muqulkeeb' wii' kamnaq?¹²Eh re' taqe i kamnaq, ma' nee ta chik inkireq chi riij i korik. Eh ma' awach ta chik neenilwik reh i ma' ilooj taj i na a'n.

¹³QaJaaw Dios re' hin rajlaal pantaq wahq'eq i nupahqaaj aweh panutiij chi naa kiin atoob'eem.¹⁴Jaaw ¿Chib'ih reet noq xinaq'eb' chi riij ak'ux? ¿Chib'ih reet noq ma' kinab'iraj taj?¹⁵Re' hin kopan nuk'ijolal rutik'aam chaloq i ruti'kiil nuk'ux, eh xink'u'loq ayu' yu'naak chi xa je' pankimik wilkiin awuum.¹⁶Yohb'aal wach aajosq'iil xayeew chi nunaah, ma' nukuy ta chik k'isinoq ransil.¹⁷Re' aajosq'iil eliik i nayeew chi nunaah, je' naa sutimaj wiij chi chaam laj ha'.¹⁸Eh xayeew q'ab' chi xinkiq'eb' chi riij kik'ux taqe i wamigo, taqe wuch'ihil, taqe weht'al kiwach xa panq'equm chik wilkiin. Re' xuyejaa' wach i Dios chi naa rub'anam ruuk' i David¹QaJaaw Dios, re' hin juneliik naa nuq'orom panutz'uuy chi q'e' hat aj keteloom wachiis. Eh eliik naa nuq'orom chi korik wach ak'ux.²Eh naa nuq'orom rib'iral chi re' ketelinik wachiis i na a'n ma' jaruuj naa rik'iik wach, je' wo' rukorkiil wach ak'ux. Je' rukab' noq wilik i taxaaj paruye'aab'.

³Eh je' wili aq'orom: Re' hin wilik i xnuyejaa' wach ruuk' i David i numoso nusik'im wach je' wili i xnuq'or reh:⁴Re' chik taqe aawiih aamaam naa nukojom chi reyil chajilob'aal na' ti eloq i hat re' keh naa kikahniik chi reey chi juneliik, tiki.

⁵QaJaaw Dios, chu'nchel i k'achareel wilkeeb' pan taxaaj tikiloq'ej ruum i wilik kisantohiil. Eh ruum taqe i ma' ilooj taj i na a'n.⁶Ruum re' hat QaJaaw Dios xiik' naah nimaal awajaawriik, ma' xta chik jino'q dios wilik pan taxaaj chi je' ta rukab' i hat.⁷Ruum xa re' wo' hat nim awajaawriik, eh xiik' naah yohb'alil awach. Sutimaj awiij kuum i k'achareel wilkeeb' pan taxaaj, xa re' wo' hat nim awach chi kixilak i keh.⁸QaJaaw Dios nim awajaawriik, ma' awach ta chik jino'q chi je' rukab' i hat. Q'e' nim awajaawriik, xa re' korik wilik awuuk'.⁹Wilik awajaawriik chuq'ilariik i palaw noq yohb'aal wach i rujosq'iil. Eh noq yohb'aal wach i wuktik i rub'an i rub'ohl inapab'aa' wo' hoq.¹⁰Re' hat xa a'n reh i josq'laj chikop Rahab xa je' chik kamnaq xakanaa'. Xatukej kiwach ruuk' awajaawriik taqe i ki-ixowanik awach.¹¹Re' taxaaj, i wach ak'al re' hat ti ehchanik keh. Ruum re' wo' hat xatyej-anik reh i wach ak'al, je' wo' i wilkeeb' chupaam.¹²Re' hat xatyej-anik reh i wilkeeb' pantz'eet ree rookb'aal i q'iij, pansak'aaj ree rookb'aal i q'iij. Eh re' yuuq' Tabor, i yuuq' Hermón inkiyeew aloq'il.¹³Re' hat xiik' naah awajaawriik, eh kow awiib' ruum aj re' ti elik korik ruuk' i taqe i na a'n.¹⁴Re' hat parub'ehel ti q'atwik q'orik chupaam aa ye'aab', eh ruuk' rukorkiil wach ak'ux. Eh juneliik re' k'axooj, eh re' korik wilik awuuk' i hat QaJaaw.¹⁵QaJaaw Dios, atoob' keh i tinamit tikiloq'ej ruuk' rusuqkiil k'uxliis. Eh k'acharik inki a'n chupaam i rusaqumaal i na'ojb'al i nayeew i hat.¹⁶Eh panab'ihnaal i hat neen wihik rusuqkiil kik'ux chi junelik. Eh neen kichop kik'ux ruum i rukorkiil wach ana'ojb'al i hat.¹⁷Ruum xti korik noq re' hat ti ye'wik kikowiil, kiloq'il. Re' hat ti ye'wik ruman qeh i qajaawriik ruum je' re' inawaaj i hat.¹⁸QaJaaw Dios, re' hat ti ko'linik qeh, eh hat qareey i hoj, hoj aj Israel. Eh hat wo' santo chi qanaah.

¹⁹Re' hat xaq'o'reej taqe aatinamiit pan kisaq wiriik je' wili i xaq'or keh: Re' hin xnusik' wach jinaj i kow riib' chi kixilak i nutinamiit, xnuyeew runimaal wach, xnutoob'eej.²⁰Eh nureq i David, chi numoso. Eh xnuyeew i waseite wach naah noq xnupab'aa' chi reyil.²¹Re' reh ma' jaruuj naa nukanaam rutoob'jiik. Juneliik naa nuye'em rukowiil ruk'ux ruuk' i wajaawriik.²²Eh ma' xta naruuchjiik kuum i nixowanik wach. Eh ma' nata ruq'atariik wach kuum i yiib' wach kina'ojb'al.²³Re' hin naa nusacham kiwach i ki-ixowanik wach. Eh naa nuye'em taqe panti' k'axik i ma' ki ajwanik taa wach.²⁴Eh re' hin ma' nata nukanaam ruketeljiik wach, je' wo' hoq i rutoob'jiik. Naa nuye'em ruman i rajaawriik.²⁵Naa nuye'em rajaawriik chinaah i palaw Mediterráneo, eh imponik i wilik wii' i nim ha' Éufrates.²⁶Eh je' wili naa ruq'orom weh: Re' hat i wajaaw, hat i nuDios, hat paat ab'aj ko'lemb'al iib' chi weh, inkoq.²⁷Eh naa nuye'em ruloq'il chi je' peet wak'uun. Eh q'e' naa nuye'em i ruloq'il chuwach i kiloq'il i reey wilkeeb' wach ak'al.²⁸Ma' naa ta nukanaam ruketeljiik wach, ni xata naa nujalam wach i nuq'orom reh chi naa nub'anam ruuk'.²⁹Re' taqe riih rumaam naa kokiik chi reyil chi jilob'aal i reh, je' re' naa rub'aan kuuk' korehtaal insahchik wach i taxaaj.³⁰Eh wila' re' taqe i riih rumaam ma' xkik'am naah i nuk'uhb'aal. Eh wila' ma' xkian i korik inwaaj i hin,³¹eh wila' xkian i mahk chuwach i nuk'uhb'aal. Eh wila' ma' xkaaj kianaam taqe i ruq'or i nuk'uhb'aal,³²re' hin naa nuye'em taqe chutojariik i kimahk. Je' naa ruuk' b'olob'ik chee' naa nub'anam ti' k'axik keh.³³Eh re' David reh eliik naa nuketelaam wach, ma' naa ta nuyojom wach i korik nuq'orom cho reh.³⁴Ma' naa ta nuyojom wach i nuk'uhb'aal nuyejaam wach ruuk', ni xata naa nujalam wach i nuq'orom cho reh.³⁵Re' hin ruuk' i nuSantohiil nuq'orom cho reh i David, chi ma' jaruuj neenuchuk i q'orik reh.³⁶Xti korik chi re' taqe i riih rumaam naa kokiik chi reyil chi juneliik, korehtaal insahchik wach i q'iij.³⁷Re' keh naa ruwihiik kajaawriik chi reyil korehtaal insahchik wach i poh. Je' wo' hoq i taxaaj, inki i Dios.

³⁸Je' wo' naq re' i xaq'or chaloq xa re' la' xaq'eb' wo' chi riij ak'ux i reey asik'im cho wach, xchalik aajosq'iil ruuk'.³⁹Xayoj wach aq'orom cho reh amoso chi naa a'nam cho ruuk'. Je' naa xaq'uch i ru corona, je' naaxakut panak'al.⁴⁰Eh xateheb'eej i tz'aq kotimaj wii' riij i rutinamiit reh chi xusach kiwach.⁴¹Chu'nchel i ki-ik'ik ar inkelq'aaj i chib'ih keh i rutinamiit. Eh kikaqse'ljik kuum kika'jaah.⁴²Xayeew kikowiil inixowanik wach reh chi xb'aan keh. Eh xasuq suq chik kik'ux chi xi elik korik taqe aj ixowaal re' re'.⁴³Ma' xatoob'eej ta cho panq'aq'inik xawesaj i ruq'asiil i ruch'ihch'.⁴⁴Xawesaj chi jumpech i ruloq'il, i rajaawriik chi reyil.⁴⁵Eh xatoq rooq i ruhab'ul, eh xayeew q'ab' chi xuk'uhtaaj ruk'ixb'ilaal.

⁴⁶QaJaaw Dios, ¿Ko jaruuj i naaketelaaj cho nuwach? ¿Mi juneliik naa ruqopiik re' aajosq'iil chi nunaah chi je' nqop q'aaq'?⁴⁷Jaaw, k'oloq panak'ux chi re' nuk'achariik xama' najt ta rooq. Eh chu'nchel i tinamit xatz'uhkrisaj xama' najt ta wo' rooq i kik'achariik.⁴⁸¿Mi wilik jino'q ineenk'acharik chi ma' nee ta inkimik? ¿Mi wilik i neerukot riij chi ma' naa ta reliik reje wach ak'al?

⁴⁹QaJaaw Dios, ¿Mi xakanaa' re' i ketelenik wachiis i na a'n cho najtir, re' i xaq'or cho reh i David ruuk' i rukorkiil wach ak'ux?⁵⁰Jaaw, chakoj rehtaal chi re' taqe amoso k'ahchi' kib'ajariik kuum i tinamit. Eh re' hin ma' inik'ik panuk'ux i ruti'kiil inki a'n weh re' re'.⁵¹Re' taqe i ki-ixowanik awach, je' re' rub'ajariik taqe amoso inki a'n Je' wo' re' rub'ajariik i reey inki a'n re' asik'im cho wach, eh xa aha' inooj je' re' inki a'n reh.

⁵²Loq'imaj ta naq i QaJaaw Dios chi juneliik. Je' ta wo' naq re'. Re' Dios k'achlik chi juneliik re' winaq xama' najt ta nk'acharik¹QaJaaw Dios, xa re' wo' hat ti ko'linik qeh pampeet, eh xakok'ahchi' wo' kooj ako'leem yu'naak.²Eh noq komajaa' i natz'uhkrisaj i yuuq' k'ixkaab', i wach ak'al, taqe i k'achareel wilkeeb' chupaam, xa hat wo' cho Dios, eh je' wo' chi juneliik.

³Re' hat i naasutej wo' chik chi pooq i winaq. Noq inaq'or chi naa wo' chik kisutiniik chi pooq, kisutinik wo' hoq.⁴Xti korik noq re' jinaj miil haab' chawee hat, xa je' rukab' noq xik'ik i q'iij eew, eh xa je' naa nik'ik kiib' ixib'-oq ora reh aq'ab'.

⁵Re' ruk'achariik i winaq xa je' jino'q xohk'risanik inasach wach chi jumehq'iil, je' naa nik'ik qeerjoq ruum i rooq ha'. Xa je' rukab' i ch'ahn, ink'ihik pan wahq'eq.⁶Chawil i ch'ahn reh xasuq chik i k'ihik i rub'an pan wahq'eq, eh paruxq'eqiil inb'ooyrik, eh inkimik chi jumpech.

⁷Xti korik noq re' hat i nayeew aajosq'iil chi qanaah, inasach qawach. Eh insahchik qana'ojb'al chi jumpech.⁸Ruum chu'nchel i qamahk i ruyib'kiil wach qana'ojb'al pansaqum wilik chawach i hat.⁹Eh xti korik chi re' qak'achariik naa asacham wach ruum aajosq'iil, eh jarub' haab' qak'achariik xa je' nik'ik junjiiq' chi uxlab'al.¹⁰Ruum re' hoj xalajeeb' wo' ru kajwinaq haab' qoh k'acharik, eh re' taqe i xti q'e' kow, kajwinaq haab' kik'achariik. Eh chi q'e' najt nee qoh k'acharik, xaruti'kiil k'uxliis, xa kowlaj kamanik i ruk'am chaloq. Eh re' i ju'jun chi haab' jumehq'iil inik'ik je' rukab' i qak'achariik.

¹¹Ma' jino'q ineht'alinik reh nik' wach i sachooj neena a'n ruuk' aajosq'iil. Ma' jino'q ineht'alinik reh ko aha' neemponik i ransil aajosq'iil¹²Chayeew qeh chi naab'jik chi xama' najt ta rooq i qak'achariik, reh chi neenqareq qana'ojb'al chub'anariik i holohik imponik chawach i hat.

¹³QaJaaw Dios, ¿konik' chik najtiil naa aye'em aajosq'iil chi qanaah? Chaketelaaj wo' chik qawach i hoj, hoj amoso.¹⁴Chak'uhtaaj qeh chi jumehq'iil aawotob'il. Chi je' re' ma' k'isiin ta suq kiil qak'ux noq neenqatz'uyej awach nik' chik najtiil i qak'achariik.¹⁵Chayeew jarub'-oq haab' qeh i suq laj k'acharik je' rukab' noq xqak'ul i k'ih laj haab' chi ti' k'axik.¹⁶Chayeew qeh chi naab'jik taqe aakamaj i hoj, hoj amoso. Eh re' taqe i qiih qamaam neenkilow wach aaloq'il.¹⁷Re' ta naq i rotob'il i QaJaaw Dios nee ruyeew chi qanaah. Xti re' ta naq i reh neentoob'inik qeh chi manlik ruuk' i qakamaj reh chi nee qoh elik korik ruuk' i neenqa a'n. Re' QaJaaw Dios inko'linik qeh chuwach i ti' k'axik¹Awach i k'acharik i rub'an chi ri'sil i rajaawriik i QaJaaw Dios xiik' naah nimaal i rajaawriik, ma' xta nee ruk'ul.²Je' la' wili i ruq'or: QaJaaw Dios, re' hat ti ko'linik weh, hat ticha'jinik weh, hat nuDios, awuuk' i hat i nuyeew nuk'ux, inki.³Re' Dios neenko'linik aweh pan kiq'ab' inkaaj achopariik. Eh tiruko'leej chuwach i yab'ilaal inkansanik.⁴Re' reh naa ruko'liniik aweh, je' rukab' noq i ruko'leej i rak'uun i ati't kixlaan chi ri'sil ruxiik'. Eh re' rukorkiil wach ruk'ux naa ruko'liniik aweh chi je' jino'q pulato ch'ihch'.⁵Eh ma' naa ta ayo'jiik kuum taqe i kiyohb'isanik chaq'ab', eh ni xata kuum taqe i ti' k'axik ink'uloq pan q'iij.⁶Ma' nee ta tiyo'jik kuum taqe i yab'ilaal inchalik chaq'ab', ni xata re' taqe i ti' k'axik kib'anik sachooj pan q'iij.

⁷Atoob' ta nee kikimiik jino'q miil panatz'eet, eh lajeeb'-oq miil panasak'aaj, re' hat ma' xta neenak'ul.⁸Xa naa la' awilom ruuk' naq'awach noq naakiye'ariik chutojariik i kimahk taqe i yiib' wach i kina'ojb'al.

⁹Re' hat ma' xta naa ak'ulum, ruum re' QaJaaw Dios nim rajaawriik xakoj chi awaj ko'loom. Eh ruuk' i reh i nayeew ak'ux.¹⁰Ma' xta jino'q i ti' k'axik naa ruchaliik cha naah. Eh ni xata naakitz'a'jiik ruum yab'ilaal i wilkeeb' panapaat.¹¹Ruum re' QaJaaw Dios naa rutaq'aam taqe chaloq i ruánjel, reh chi naa kaat kicha'jeem xa aha' pa' nee tiooj i k'oq.¹²Re' keh naa kaat kich'ihleem ruuk' kiq'ab', reh chi ma' nee ta naq'oj awiib' wataq ab'aj.¹³Eh neetib'ehik chi kixilak kaq b'ahlam, chi kixilak i aaq', chi kixilak i kak'uun i kaq b'ahlam, chi kixilak i nimaq josq'laj chikop.

¹⁴Re' QaJaaw Dios je' wili ruq'or: Ruum chi q'e' kiruk'ax naa nuko'leem chikiwach taqe re'. Eh naa nuye'em runimaal wach ruum reht'al chi re' hin i Dios.¹⁵Eh noq neerupahqaaj rutoob'jiik weh, nee wo' nutob'eej. Re' hin naa wesaniik reh pan i ti' k'axik, eh naa nuye'em ruloq'il.¹⁶Re' hin naa nuye'em k'ih-oq haab' reh i suq laj k'acharik, eh naa wo' nuko'leem, inki. Re' rutz'uuyjiik wach i Dios ruum i rotob'il¹QaJaaw Dios nim awajaawriik, yohb'aal wach holwochiil alooq'jiik, je' wo' hoq i rutzuyjiik wach aab'ihnaal.²Eh ruq'orariik rib'iral pan wahq'eq pan chaq'ab' i ketelinik wachiis i na a'n, i rukorkiil wach ak'ux.³Ruuk' i k'ahaam wach q'ooj, ruuk' arpa xama' q'e' ta kow inq'orik, eh ruuk' k'isa q'ooj k'ahaam wach.⁴QaJaaw Dios, re' hat xayeew rusuqkiil nuk'ux ruuk' taqe i xa a'n wuuk'. Eh noq inwilow taqe akamaj i na a'n ma' k'isiin ta nsuuqb'ik nuk'ux.

⁵QaJaaw Dios, yohb'aal wach nimaal wach taqe akamaj i na a'n, eh yohb'aal wach chamiil paam taqe akapeb'aal.⁶Re' i ruchop ruk'ux chub'anariik i ruyiib' wach na'ojb'al, ma' reht'al taj i wili, ni xata rureq chi riij.⁷Re' taqe i yiib' wach kina'ojb'al, xa je' kikab' noq ink'ihik johtoq i yiib' wach ch'ahn. Eh kielik korik ruuk' inki a'n xa re' la' naa wo' naa rusachariik kiwach.⁸Eh re' hat QaJaaw Dios, naa ruye'ariik runimaal awach chi juneliik.⁹Jaaw xti korik noq re' taqe i ki-ixowanik awach naa rusachariik kiwach. Eh chu'nchel i kib'anik reh i yiib' wach na'ojb'al naa rutuukjiik kiwach.

¹⁰Re' hat xayeew ruman i waansil je' rukab' i ransil jino'q i kowlaj imas wakax. Eh xachihkaaj ink'ohnik laj iq'oom wach nunaah.¹¹Re' hin naawilom noq naa rub'aan keh taqe i ki-ixowaanik nuwach. Eh naab'iram noq naakik'erem kichii' i yiib' wach kib'anik re' re'.

¹²Re' i korik wach kik'ux naakixmak'iniik je' rukab' noq inixmak'inik i kalaab'. Je' rukab' noq ink'ihik i chakaltee' ar Líbano.¹³Re' keh naa kiwihiik parupaat i Dios, eh naakeliik korik je' naa ki ixmak'inik jino'q chee' ma' najt ta ruuk' i rupaat i QaJaaw.¹⁴Re' keh atoob' ta pan kirijb'iil xanaa wo' kiwachiniik ruuk' i naa kianam, xanaa wo' ruwihiik kikowiil.¹⁵Reh chi naa kiq'orom rib'iral chi re' QaJaaw Dios inko'linik qeh. Eh chi korik wach ruk'ux, chi parub'ehel i rub'an chu'nchel. Re' QaJaaw Dios xiik' naah nimaal wach i rajaawriik¹Re' QaJaaw Dios xti manlik reey, xiik' naah nimaal wach, eh xti wilik rajaawriik chinaah chu'nchel i wilik. Re' reh xye'wik paruye'aab' i wach ak'al, reh chi ma' awach ta neenk'uyu'sanik reh.²Noq xa a'n chaloq i re' xa hat wo' cho reey. Ruum xa wilkaat wo' chaloq noq ko ma' jaa' chii wilik.

³Jaaw, re' taqe nim ha' yohb'aal wach i choqik inki a'n ruum i kijosq'iil. Eh yohb'aal wach najtiil imponik i kib'ohl.⁴Re' hat Jaaw i wilkaat chaloq pan taxaaj, inaq'at wach i kib'ohl taqe nim ha' re' re' ruuk' awajaawriik, je' wo' hoq i kijosq'iil i palaw.

⁵QaJaaw Dios, re' taqe i ruq'or aak'uhb'aal ma' jaljinaq ta wach. Eh re' i santohiil naa rukamaniik chi xoyb'al paam aapaat chi juneliik. Re' QaJaaw Dios naa ruq'atwiik q'orik chikinaah i tinamit¹QaJaaw Dios, cha k'uhtaaj aajosqiil kuuk' i yiib' wach kib'anik ruum xa re' wo' hat neetiq'ajwik wach keh inki a'n²Re' hat i q'atal q'orik, chayeew taqe chutojariik i kimahk i nimaq kiwach inki a'n kiib'.³QaJaaw Dios, ¿xti kojaruuj inkimay elik korik i yiib' wach kina'ojb'al? Eh ¿Xti kojaruuj i nelik i rusuqkiil kik'ux?⁴Eh ¿Xti ko jaruuj inkikanaa' ruq'orariik yiib' wach q'orik? Eh ¿Xti ko jaruuj inkikanaa' runimb'eesjiik kiwach taqe i yiib' wach kina'ojb'al?⁵QaJaaw Dios, re' taqe re' kian ti' k'axik keh awak'uun awixq'uun, inkiyeew ruti'kiil ruk'ux.⁶Eh inkikansaj taqe ixoq kamnaq kib'ahiil, taqe i ma' xata kituut qajaaw, je' wo' taqe i tokoom tinamit wilkeeb' ar.⁷Je' wili inkiq'or: Re' ruDios chee Jacob ma' rilow taj chib'ih jariik i k'ahchi'kooj, inki taqe.

⁸Re' taq i hat i yiib' taq wach ana'ojb'al, i na a'n inawaaj taq i hat, ma' nareq ta taq chi riij taq inaq'or.⁹¿Mi ma' nee taq tirib'iraj re' ixyej-anik reh taqe axikin? ¿Mi ma' nee taq tirilow re' ixyej-anik reh taqe i naq'awach?¹⁰¿Mi ma' nee taq tiruyeew chutojariik taq amahk re' i Dios, inq'ilwik keh i nimaq tinamit? ¿Mi ma' neerunab'eej re' taq i na a'n, inkojwik qana'ojb'al?¹¹Re' QaJaaw Dios reht'al chi re' taqe winaq xa memil laj na'ojb'al inkikapaaj.

¹²QaJaaw Dios atoob' keh taqe inakoj kina'ojb'al i hat. Eh inak'uhtaaj keh chib'ih taqe ruq'or aak'uhb'aal.¹³Reh chi xasuq wo' kik'ux noq neenk'u'loq i ti' k'axik chikinaah. Eh re' taqe i yiib' wach kina'ojb'al, k'ahchi' rukorjiik kiye'aab' naakikutariik wii'.¹⁴Eh re' QaJaaw Dios ma' jaruuj neeruq'eb' chi riij ruk'ux i rak'uun rixq'uun, ni xata nee rukanaa' taqe chi kutkeel.¹⁵Eh re' taqe i q'atal q'orik parub'ehel chik naakiq'atam i q'orik. Chu'nchel i korik wach kik'ux je' re' naa kianam.

¹⁶¿Awach naq i xchalik chi nuko'ljiik i hin pan kiq'ab' taqe i yiib' wach kina'ojb'al i ma' holohik ta kib'anik?¹⁷Wita ma' xirutoob'eej i QaJaaw Dios xin kimik naq chik pan kiq'ab' i aj ixowaal, ma' wilkiin ta naq chik yu'naak.¹⁸Eh nik' xnuq'or chi ma' naa ta chik nukuyum, re' hat QaJaaw Dios xatoob'inik weh ruuk' aak'axb'al.¹⁹Nik' xantukik chik paam i nunaah ruum taqe i nukapeew re' hat xat ye'wik rusuqkiil nuk'ux.²⁰Re' hat maa k'am awiib' pansuqkiil kuuk' i q'atal q'orik yiib' wach i kina'ojb'al, re' i ma' inki a'n taj i ruq'or i k'uhb'aal.²¹Eh inkimol kiib' chukojariik kimahk i korik wach kik'ux, inkiq'at i q'orik reh chi naa kikanteesjiik.²²Eh re' hin xa ruuk' wo' QaJaaw Dios inuko'leej wiib', re' reh je' rukab' paat ab'aj ko'lemb'al iib' chi wee hin.²³Re' QaJaaw Dios, naa rusacham kiwach taqe i yiib' wach kina'ojb'al, ruum taqe i kimahk. Eh re' wo' reh naa rusachwiik kiwach. Qatz'uyej wach i QaJaaw Dios chi suq qak'ux¹Kim taq qaloq'ej taq i QaJaaw Dios, ruuk' rusuqkiil qak'ux. Qatz'uyej taq wach i qaj ko'loom, i je' paat ab'aj ko'lb'al iib' chi qeh.²Qat'iosej reh i rotob'il i rub'an quuk', eh qatz'uyej wach ye'b'al ruloq'il.³Ruum re' QaJaaw Dios xti manlik Reey, eh re' reh xiik' naah nimaal wach chikiwach chu'nchel i xa tiyoox.⁴Eh pan q'ab' wilik taqe i ye'aab' pan chaamlaj jul wilkeeb'. Eh re' wo' reh inehchanik reh taqe yuuq' xiik' naah najtiil kinaah.⁵Re' wo' reh inehchanik reh i palaw, je' wo' hoq ak'al ma' xta wii' ha'. Ruum re' wo' reh xyej-anik keh.

⁶Kim taq qaloq'ej, qaloch' qiib', qaxuk'aa' qiib' chuwach i QaJaaw Dios, re' ixtz'uhkrisanik qeh.⁷Re' reh i qaDios, eh re' hoj, hoj rutinamiit, re' reh incha'jinik qeh i hoj, hoj rutentzuun noq wilkooj,
wila' xab'iraj taq i ruq'oral i Dios yu'naak.⁸Maakoowb'isaj taq awánima, maa a'n taq aweh i xkian taq aamaam awati't ar Meriba. Eh je' rukab' i xkian Masah, panchiq yuuq'.⁹Eh chupaam taqe q'iij re' re' xinkaaj naq kipajam aamaam awati't atoob' ta xkilow wo' naq taqe i ma' ilooj taj xnub'an.¹⁰Eh ka'winaq haab' xinkaqrik kuuk' i tinamit re' re', eh je' wili i xnuq'or chikiij: Re' taqe i tinamit wili kiq'eb'em kiib'. Eh ma' nkinimaj taj i nuk'uhb'aal.¹¹Ruum aj re' ruuk' nujosq'iil ti xnuq'or i korik chi ma' jaruuj naa kokiik chupaam i nuye'aab' naa rub'aan wii' hi'lik, inki Dios. Re' ak'laj tz'uuy loq'oomb'al reh i QaJaaw Dios (1 Cron 16.23-33)¹Chatz'uyej taq i ak' laj tz'uuy loq'oomb'al reh i QaJaaw Dios. Chawunchelaal taq i hat aj wach ak'al cha tz'uyej taq wach i QaJaaw.²Chatz'uyej taq wach i QaJaaw Dios, chayeew taq runimaal wach. Eh rajlaal q'iij taq cha q'or rib'iral chi xa re' wo' reh aj Ko'loom.³Chaq'or taq rib'iral i ruloq'il keh chu'nchel i tinamit, je' wo' hoq i ma' ilooj taj i rub'an.⁴Ruum re' QaJaaw Dios xiik' naah nimaal wach, i ruk'ul chi naa qaye'em ruloq'il. Eh xa re' wo' reh nim rajaawriik chikiwach taqe i tiyoox.⁵Re' ki dios taqe i tokoom tinamit, xatz'aqoj tiyoox taqe. Eh re' i qaDios i hoj re' reh xyej-anik reh i taxaaj.⁶Ma' k'isiin ta saqumaal chii' wach. QaJaaw Dios, xiik' naah nimaal i rajaawriik, i ruloq'il chupaam i rupaat.

⁷Chawunchelaal taq i hat aj wach ak'al chayeew taq rajaawriik, ruloq'il i QaJaaw Dios.⁸Chayeew taq ruloq'il i QaJaaw ruum xa re' wo' reh i ruk'ul chi naa taq aye'em ruloq'il. Eh chak'am taq chaloq aamayiij chupaam i rupaat.⁹Chaloq'ej taq i QaJaaw Dios chupaam i ruye'aab' q'e' holohik. Eh chu'nchel ta naq i tinamit neenyohlinik reh.

¹⁰Chaq'or taq keh i tinamit chi re' QaJaaw Dios manlik Reey, eh xuyeew paruye'aab' i wach ak'al, ma' awach ta neenk'uyu'sanik reh. Eh parub'ehel naa ruq'atam i q'orik chikinaah i tinamit.¹¹Neeta naq insuuqb'ik rik'ux i taxaaj, i wach ak'al. Neeta naq ink'uyu'jik i palaw, i wilkeeb' chupaam ruum i rusuqkiil kik'ux.¹²Eh nee ta naq insuuqb'ik kik'ux i yuuq' k'ixkaab', taqe i wilkeeb' chuwach. Neeta naq inkik'er kichii' ruum rusuqkiil kik'ux taqe i chee' wilkeeb' pantaq ch'ahn.¹³Chu'nchel naa rusuuqb'iik kik'ux chuwach i QaJaaw k'ulik iloq reh, ruum parub'ehel naa ruq'atam i q'orik chikinaah i tinamit ayu' wach ak'al. Re' QaJaaw Dios xti manlik Reey¹Re' i QaJaaw Dios manlik Reey suuqb'oq taq ak'ux i hat wach ak'al, je' wo' taq i hat i ye'aab' kotimaj taq awiij chi ha'.²Re' QaJaaw Dios kotimaj riij chi q'equm paam suutz', parub'ehel i ruq'at i q'orik, i rub'an i taaq'anik.³Re' i QaJaaw Dios je' naa q'aaq' peet chuwach, ruuk' i re' i rusach kiwach i ki-ixowanik wach.⁴Eh re' rusaqumaal xan saqumanik chik i wach ak'al i rub'an. Eh re' i wach ak'al ink'uyu'jik ruum.⁵Re' taqe yuuq' kihab'ik, xa je' chik kihab'ik kantela chuwach i QaJaaw Dios ehchan reh chu'nchel i wach ak'al.⁶Re' taxaaj ink'uhtanik i rukorkiil wach ruk'ux i QaJaaw Dios, eh chu'nchel i tinamit ki-ilwik reh i ruloq'il.

⁷Eh chu'nchel inkinimb'isaj kiwach ruuk' i kiloq'oonjiik i tiyoox naa kikahniik pan k'ixb'ilaal. Eh chu'nchel i kikojariik chi dios korehtaal inkiloch' kiib' chuwach i QaJaaw.

⁸QaJaaw Dios, re' ye'aab' Sión, re' tinamiit i Judá ma' k'isiin ta nsuuqb'ik kik'ux, ruum parub'ehel inaq'at i q'orik.⁹Re' hat Jaawxiik'naah nimaal awach, xa re' wo' hat i xti nim awajaawriik chinaah i wach ak'al, je' wo' chikiwach taqe i xa tiyoox.

¹⁰Re' taq i hat i tik'axwik reh i QaJaaw Dios cha kanaa' taq i yiib' wach na'ojb'al. Re' reh i ruko'leej riij i kik'achariik i rusantolaj aj nimaneel, i ruko'leej pan kiq'ab' i yiib' wach kib'anik.¹¹Eh i ruyeew i rusaqumaal i kina'ojb'al i korik wach kik'ux. Iruyeew rusuqkiil kik'ux i korik kib'anik.¹²Re' taq i hat korik taq wach ak'ux chasuuqb'isaj taq awánima ruuk' i QaJaaw Dios, chaloq'ej taq i rusantolaj b'ihnaal. Re' QaJaaw Dios xelik korik ruuk' i xub'an¹Chatz'uyej taq i ak' laj tz'uuy chi loq'oomb'al reh i QaJaaw Dios. Ruum ma' k'isiin taqe i ma' ilooj taj xub'an, eh ruuk' i santo laj rajaawriik xub'an keh i aj ixowaal.²Re' QaJaaw xuq'or rib'iral chi xelik korik, eh xuk'uhtaaj i rukorkiil wach ruk'ux chikiwach chu'nchel i tinamit.³Re' QaJaaw Dios wilik cho paruk'ux i ruketeljiik kiwach, i kitoob'jiik i aj Israel. Eh chu'nchel i tinamit wach ak'al xi-ilwik reh chi xuq'at kiwach i aj ixowaal i QaJaaw Dios.

⁴Chawunchelaal taq i hat aj wach ak'al cha tz'uyej taq wach i QaJaaw Dios chi suq taq ak'ux. Chapoq'poteej taq paam aq'ab' chutz'uuyjiik wach i Dios.⁵Chatz'uyej taq wach i QaJaaw ruuk' arpa, ruuk' taqe xa chib'ih chik q'ojil k'ahaam kiwach.⁶Chatz'uyej taq wach i QaJaaw Dios ruuk' i ruxuljiik i tuun, ruuk' i ch'ihch' kow inq'orik ruum re' reh xti manlik Reey.

⁷Naa ruk'uyu'jiik i palaw, je' wo' i wilkeeb' chupaam. Naa ruk'uyu'jiik i wach ak'al, je' wo' k'achareel chupaam.⁸Naakiq'ojom kiib' kib'ohl i nim ha'. Eh naa rusuuqb'iik kik'ux i yuuq'.⁹Chu'nchel i re' naa rusuqb'iik kik'ux ruum re' QaJaaw naa ruchaliik chi taaq'anik chinaah wach ak'al. Eh parub'ehel naa ruq'atam q'orik chikinaah i tinamit. Re' QaJaaw Dios xti manlik reey nim rajaawriik¹Re' QaJaaw Dios manlik Reey, chi kixilak i k'achaach wilik kixiik'. Re' tinamit, eh re' wach ak'al xakib'arb'otik chik ruum kiyo'jiik chuwach.²Re' QaJaaw Dios xiik' naah nimaal wach ar Sión. Eh xiik' naah i rajaawriik chikinaah chu'nchel i tinamit.³Neeta naq inye'arik ruloq'il rub'ihnaal, ruum re' reh xiik' naah yohb'alil wach. Eh xti wilik rusantohiil.

⁴Re' reey xiik' naah nimaal i rajaawriik imponik chuwach i korik. Eh xub'an cho ruuk' i Jacob i rub'ehel, i korik.⁵Chayeew taq ruloq'il i QaJaaw i qaDios chaxuk'aa' taq awiib' ri'si rooq ri'si q'ab'. Ruum re' reh xti wilik rusantohiil.

⁶Re' Moisés, re' i Aarón xi kamanik chi kajaaw aj tiij chuwach i Dios. Re' i Samuel xwihik chi kixilak i xiloq'inik reh i rub'ihnaal i Dios. Eh noq xkipahqaaj i rotob'il i Dios xitoob'jik wo' hoq.⁷Eh chupaam i junrahp chi suutz' xiq'orob'jik cho ruum i QaJaaw Dios. Eh xkian wo' i xq'orarik keh, xkinimaj chu'nchel i ruk'uhb'aal.

⁸QaJaaw Dios, xatoob'eej taqe noq xkipahqaaj awotob'il xat kikoj chi ki Dios kuyuul mahk. Eh xayeew taqe chutojariik i kimahk i yiib' wach kina'ojb'al.⁹Chaloq'ej taq i QaJaaw i qaDios, chaxuk'aa' taq awiib' chulooq'jiik chupaam i rusantolaj ye'aab' Sión. Ruum re' i QaJaaw Dios xti wilik rusantohiil. Re' ruq'orariik chi naa rut'iosjiik reh i QaJaaw Dios i rotob'il¹Chawunchelaal taq i hat i wilkaat taq chi junsuut i wach ak'al, cha tz'uyej taq wach i QaJaaw Dios chi suq suq taq ak'ux.²Cha a'n taq i rukamaj i QaJaaw Dios chi chu'nchel taq ak'ux. Eh kim taq chaloq'ej taq ruuk' atz'uuy chi suq suq taq ak'ux.

³Chanab'eej taq chi re' QaJaaw re' reh i xti manlik Dios. Eh re' reh tz'uhk'risanik qeh. Ma' re' tee hoj xqatz'uhkrisaj qiib' chi qib'il qiib', hoj rak'uun rixq'uun, hoj rutentzuun noq wilkooj.

⁴Eh okeen taq i koq chi chii' i ru puertahiil i rupaat i QaJaaw Dios chi t'ioosjik i rotob'il. Chatz'uyej taq wach, chayeew taq runimaal wach i rub'ihnaal.⁵Ruum re' i QaJaaw Dios xiik' naah i rotob'il, eh juneliik wilik ketelinik wachiis ruuk'. Eh korik wach ruk'ux chi juneliik. Re' reey David xuq'or reh i Dios chi naa rub'anam i korik¹QaJaaw Dios, re' hin naa kaat nuloq'em ruuk' nutz'uuy. Ruum re' hat korik wach ak'ux, eh hat aj keteloom wachiis.²Re' hin neenureq chi riij i wihik parukorkiil noq nee kinatoob'eej.
Chi je' re' korik wach i nuk'ux noq neekinwihik chi kixilak wilkeeb' panupaat.³Re' hin ma' nuk'ax ta wach i yiib' wach imb'aan.
Eh ma' imponik ta chi nuwach inki a'n inkiq'eb' kiib' chuwach i Dios, re' taqe re' ma' jino'q nanuk'ulum cho wuuk'.⁴Re' hin ma' nee ta nukapaaj i ma' holohik taj. Eh ma' xtaj i yiib' wach na'ojb'al inwaaj nub'anam.

⁵Naa nuq'ilim taqe inkib'aj kas kichaaq'. Re' hin ma' naa ta nukuyum kimahk i xa q'et q'et taqe, eh inkinimb'isaj kiwach.

⁶Re' hin naa nusik'im kiwach taqe i korik wach kik'ux reh chi naa kiwihiik wuuk'. Eh xa re' wo' hoq i korik wach ruk'ux paruk'achariik naa rokiik chi kamanik wuuk'.

⁷Eh chupaam i nupaat ma' jino'q i rub'an i leq' ruuk' jot'ooj naa ruwihiik. Ma' jino'q i chukul q'orik naa ruwihiik ar.

⁸Eh rajlaal q'iij naa nusacham kiwach taqe i yiib' wach kina'ojb'al wilkeeb' panqatinamiit. Eh naawisam taqe reje chi kixilak i rutinamiit i Dios. Re' rutiij jinaj i q'e' ti' ruk'ux¹QaJaaw Dios chab'iraj tii weh i nutiij. Chayeew tii weh i nupahqaaj aweh.²Maa kinakanaa' chi wutkeel noq wilkiin panti' k'axik kinab'iraj la'. Eh kinatoob'eej chi jumehq'iil nik' neenupahqaaj aawotob'il.³Ruum re' nuk'achariik k'ahchi' rusahchiik wach je' rukab' noq sahchik wach i sib'. Eh re' taqe nub'aqil je' cho k'ahchi' ruk'ahtiik pan q'aaq' noq inwik'raaj.⁴Re' wánima xa nyot'ik chik xa je' chik rukab' i ch'ahn noq inchiqik. Eh ruum i re' xata chik i ruq'or nuk'ux i wi'k.⁵Eh xa nub'aqil chik ruum i ma' k'isa oq'ik i nub'an ruum i ruti'kiil nuk'ux.⁶Je' nukab' i ooloch' wilik chupaam i ye'aab' chiq yuuq', eh je' nukab' i tuhkur xa nokik meem.⁷Eh xama' jaruuj chik inqajik i nuwiriik, xa je' chik nukab' jino'q i k'isa tz'ikin i ntz'irik wach nah paat.⁸Re' taqe ki-ixowanik nuwach ma' jaruuj inkikanaa' nub'ajariik, ma' holohik ta kiq'orik chi wiij.⁹Re' hin chaaj chik i nuk'ux chi jilow nuwa'. Eh re' nuhaa' inwuk'ej inq'ehb'ik chaloq i riis naq'nuwach chupaam.¹⁰Ruum re' hat Jaaw xayeew aajosq'iil chi nunaah. Eh pampeet xayeew wajaawriik, eh yu'naak xawesaj i wajaawriik.¹¹Re' nuk'achariik k'ahchi' rusahchiik wach, je' rukab' noq inik'ik jino'q i muuj, eh je' rukab' noq inchiqik i ch'ahn.

¹²Eh re' hat QaJaaw Dios xa wilkaat wo' chi juneliik. Eh xanaa wo' ak'uliik pankik'ux jar ch'iht chi k'achareel i naakik'iik.¹³QaJaaw Dios, qoh ab'iraj tii, chaketelaaj wach i tinamit Sión ruum xponik chik i ruq'ijil. Eh xponik chik i ru orahiil chi naa akuyum i kimahk.¹⁴Re' taqe awaj kamanoom ma' k'isiin ta inkiketelaaj wach taqe ab'aj korjinaq wii' i kipaat, eh q'e' ti' inkik'raaj noq xiyojib'ik.¹⁵Eh chu'nchel i tinamit naakiyohliniik wach i QaJaaw Dios, eh re' taqe reey wilkeeb' sut i wach ak'al naakiye'em ruloq'il.¹⁶Na' chuyejaa' wo' chik cho ruka'peech i tinamit Sión, re' na' chuk'uhtaaj chee ruloq'il.¹⁷Re' noq naa rib'irjiik i kitiij i ti' kik'ux, eh na' ye'aroq keh aha' wilik inkipahqaaj.

¹⁸Re' taqe wili ajwaal wach chi naa rutz'ihb'jiik kahnoq rehtalil. Reh chi neenkiloq'ej i QaJaaw Dios chu'nchel i tinamit naa kiwihiik koq'uun je' wo' hoq i komajaa' ki-aasjik.¹⁹Re' QaJaaw Dios xrilow chaloq ko parusantolaj ye'aab' ar pan taxaaj i tinamit wach ak'al.²⁰Reh chi xutoob'eej taqe i ye'ooj panti' k'axik. Eh chuko'ljiik taqe i q'atooj chik q'orik chikinaah chi naa kikanteesjiik.²¹Reh chi pan tinamit Sión, eh Jerusaleem neen q'orarik rib'iral, eh neenlooq'jik i rub'ihnaal i QaJaaw Dios.²²Re' noq chu'nchel i tinamit naakimolom kiib' chub'anariik aha' wilik iraaj i QaJaaw Dios.

²³Eh re' reh xresaj inukowiil noq komajaa' hin rijib' xuqasaj rooq i nuk'achariik.²⁴Re' hin je' wili i xnuq'or: Jaaw hat nuDios maa kinakansa noq kore' yejaal i nuk'achariik. Ruum re' hat ma' xata ajlamaj haab' aak'achariik kinki reh.²⁵Re' hat xat ye'wik reh pan kiye'aab' chu'nchel i wach ak'al. Eh re' wo' hat xatyej-anik reh i taxaaj.²⁶Chu'nchel i re' naa rusahchiik kiwach, eh re' hat naa awihiik chi juneliik. Re' taqe re' naakiq'ahiik je' rukab' noq inq'ahik itz'ihy, xa je' injalarik itz'ihy neena a'n na' chajal kiwach.²⁷Re' hat xa re' wo' awach chi juneliik, ruum ma' xata ajlamaj haab' aak'achariik.²⁸Re' taqe i kiih kimaam awaj kamanoom naa atoob'eem taqe chi juneliik. Re' hat na awilwiik keh, re' hat naa awihiik kuuk'. Re' hin naa nuloq'em i QaJaaw Dios chu'nchel nuk'ux¹Re' hin naa nuloq'em i QaJaaw Dios chu'nchel i wánima. Eh naa nuye'em ruloq'il i santo laj rub'ihnaal.²Naa nuye'em ruloq'il i QaJaaw Dios chu'nchel i wánima ruum ma' jaruuj naa rusahchiik panuk'ux i rotob'il.³Re' reh inkuywik chu'nchel i numahk, re' reh ink'aachrisanik weh ruuk' chu'nchel i nuti'kiil.⁴Re' reh inko'linik weh chuwach i kimik, eh i ruyeew weh i rotob'il chi manlik, i ruketelaaj nuwach.⁵Re' reh inye'wik weh i suq atoob', reh chi kinkahnik chi je' jino'q ak'un reh chi kinkahnik chi je' jino'q xihk ma' ahl ta ruti'jolal.

⁶Re' QaJaaw Dios parub'ehel i ruq'at i q'orik chikinaah i k'ahchi' rub'aan ti' k'axik keh.⁷Eh xuk'uhtaaj wo' reh i Moisés chib'ih jariik taqe xub'an, xuk'uhtaaj i runimaal i rajaawriik keh i aj Israel.⁸Re' QaJaaw Dios xa atoob' wach ruk'ux, eh q'e' aj keteloom wachiis. Re' reh ma' jumehq'iil ta nchalik rujosq'iil, ruum xiik' naah i ketelinik wachiis ruuk'.⁹Ma' chu'nchel ta q'iij k'ahchi'kooj runaqam, eh ma' ruyeew ta paruk'ux i rujosq'iil.¹⁰Ma' qohruyeew ta panti' k'axik je' naq rukab' i ruk'ul chi qeh, ruum q'e' hoj aj mahk. Eh xiik' naah yib'kiil wach i qana'ojb'al.¹¹Re' QaJaaw Dios xiik' naah i ruketeljiik kiwach i rub'an i kiyohlinik reh. Ma' xata je' najtiil ruuk' i wach ak'al i taxaaj i ruketeljiik kiwach i rub'an.¹²Ruum re' qamahk xresaj reje chi qawach, nik' najtiil wilik ruuk' ireelb'aalq'iij i rookb'aal q'iij je' re' najtiil xukanaa' reje quuk' i qamahk.¹³Re' QaJaaw Dios ma' k'isiin ta ruketelaaj kiwach i kiyohlinik reh, je' rukab' noq i ruketelaaj wach i rak'uun rixq'uun jino'q i aajaab'ees.¹⁴Ruum re' reh reht'al noq xa hoj wo' tii tiwik, eh reht'al wo' hoq chi xa pooq i qayej-aal.

¹⁵Re' ruk'achariik i winaq xa reh junk'aam, xa je' rukab' i ch'ahn, xa je' rukab' i uhtz'ub' ink'er cho pantaq ab'iix.¹⁶Eh inchalik i kowlaj teew chinaah, eh insahchik wach, ma' awach ta chik i naab'inik reh chib'ih inooj kuxoq wii'.¹⁷Raaj i ketelinik wachiis i rub'an i QaJaaw Dios reh, wilik chi juneliik chi keh taqe i kiyohlinik reh, eh naa wo' rub'anam korik kuuk' i kiih kimaam.¹⁸Je' wo' re' i naa rub'anam kuuk' taqe i kib'anik reh taqe i ruq'orom chaloq chi naa rub'aan. Je' wo' kuuk' taqe i kinimanik reh taqe i ruq'or i ruk'uhb'aal.

¹⁹Re' QaJaaw Dios ar wilik chi taaq'anik pan taxaaj. Eh re' reh wilik rajaawriik chikinaah chu'nchel i xa chib'ih jariik.²⁰Chayeew taq ruloq'il i QaJaaw Dios i hat ánjel wilik taq akowiil. Re' taq i hat i na a'n taq aha' wilik i ruq'or, eh i nayeew taq ak'ux chunimjiik.²¹Chayeew taq ruloq'il i QaJaaw Dios chawunchelaal taq i hat i ruye'em taq awajaawriik chub'anariik taqe i rukamaj. Re' i tib'anik taq reh iraaj i reh.²²Eh chawunchelaal taq i hat i xatrutz'uhkrisaj taq, i QaJaaw Dios chayeew taq ruloq'il ko aha' pa' imponik i rajaawriik chi taaq'anik.
Eh je' wo' hin naa wo' nuye'em ruloq'il i QaJaaw Dios chu'nchel i wánima. Re' rulooq'jiik i Dios i xtz'uhkrisanik cho reh i xa chib'ih jariik¹QaJaaw Dios re' hin naa kaat nuloq'em chu'nchel i wánima.
Jaaw, hat nuDios xiik' naah awajaawriik, xiik' naah nimaal awach, xiik' naah aaloq'il.²Re' hat xiik' naah saqumaal aachii' awach, re' hat xatyej-anik reh i taxaaj. Xayeew chinaah i wach ak'al chi je' nimlaj itz'ihy.³Re' hat xayejaa' aa ye'aab' chinaah i ha' ar pan taxaaj. Inakoj taqe chi je' aakareta b'ehtesb'al aweh i suutz'. Eh tib'ehik wo' hoq chupaam i teew.⁴Re' hat inakoj taqe chi awaj taqareel kowlaj teew. Eh inakoj taqe chi awaj kamanoom i xaq q'aaq.

⁵Eh xach'ikaa' wo' chi korik i wach ak'al paruye'aab', reh chi ma' awach ta neenk'uyu'sanik reh.⁶Re' palaw rub'urum naq naah i wach ak'al. Eh re' ha' rub'urum naq naah taqe inajt kinaah yuuq'.⁷Eh noq xaq'or reh i ha', chi naa rumolom riib' xelik wo' chinaah i wach ak'al, noq xrib'iraj aq'oral xa je' chik inq'orik kahoq.⁸Eh noq xawesaj chee ha' chinaah i nimaq yuuq' xumol riib' wach k'ixkaab'. Eh xataq'aaj reje chupaam i ye'aab' aq'orom chi ar naa ruwihiik.⁹Aha' xaq'or reh chi naa ruwihiik xa ar wo' wilik, ma' xq'ahxik ta chik reje chi juntar, reh chi ma' xutz'ap ta chik naah i wach ak'al.

¹⁰Re' hat ti ye'wik reh i ha' inaasjik cho paraasb'al. Eh re' hat ti ye'wik reh taqe nim ha' kiqajik cho nah taq yuuq'.¹¹Eh re' taqe ha' re' re' inkuk'ej i josq'laj chikop. Ruuk' ha' re' re' inkik'saj i kichiqchi'iil i b'uurux wilkeeb' wa taq yuuq' k'ixkaab'.¹²Chi chii' i ha' re' re' inkiyejaa' kisuuq' i kok' tz'ikin kirupinik pan taxaaj. Ar xasuq chik i ruq'or i tz'uuy inki a'n nah q'ab' chee'.¹³Re' hat ti ye'wik cho kihaa' i yuuq' k'ixkaab' ko ar panaye'aab' pan taxaaj. Ruuk' i kowlaj jab' inajot'isaj i wach aak'al.¹⁴Re' hat tik'isanik johtoq reh i ch'ahn inkik'ux i chikop. Re' hat tik'isanik reh i rutik i winaq, reh chi ruuk' i re' naa rub'anam ruwa' ruhaa'.¹⁵Re' wi'k ha' re' re' inye'wik ransil, i nayeew reh i riis uuva chi ruk'ej. Eh i nayeew reh aseite reh chi nsuuqb'ik ruk'ux.¹⁶Inayeew cho kihaa' taqe chee' ak'isam johtoq i hat, je' wo' taqe i chee' chakaltee' wilkeeb' ar Líbano.¹⁷Eh chinaah taqe q'ab' i chee' re' re' inkiyejaa' kisuuq' kok' tz'ikin, eh inkiyejaa' wo' kisuuq' ar taqe i nimaq saq ikih.¹⁸Re' taqe inajt kinaah yuuq' inkamanik chi kiye'aab' i keej re' ruuk' i kaqch'ul. Eh pantaq ruhopil ab'aj inkiyejaa' kisuuq' taqe imul.¹⁹Eh re' hat QaJaaw Dios xayejaa' chee poh pajb'al reh i ju'jun chi q'iij. Eh aweht'al nik' i rumay i sihq'inik i q'iij.²⁰Eh noq re' hat i nayeew chee q'equm chinaah i wach ak'al inkahnik chi chaq'ab' chik, eh kielik taqe chaloq i chikop pantaq ch'ahn.²¹Re' taqe kaq b'ahlam inkik'er kichii' chusik'ariik kitiib' inkipahqaaj aweh i hat i kiwa'.²²Eh noq i nelik chaloq i rusaqumaal i q'iij kiooj wo' chik, eh inooj kiyok'aa' kiib' pankijuul.²³Re' winaq noq insaq'ik inooj pan rukamaj. Eh noq inokik i q'iij insutinik wo' chik cho parupaat.

²⁴QaJaaw Dios yohb'aal inche wach taqe i xayejaa'. Eh chu'nchel i re', xayejaa' ruuk' ana'ojb'al. Aha' ta chik yuuq' ma' nilarik wach taqe i xa tz'uhk'risaj chaloq.²⁵Hat xatyej-anik cho reh i palaw xiik' naah nimaal, eh xiik' naah k'ihaal chikop wilkeeb' chupaam ar, chi nimaq, chi kok' taq.²⁶Eh chinaah palaw re' re' kib'ehik i barco. Ar wilik i qamaan k'ap, reh chi chupaam i palaw i rub'an ruk'o'niik.

²⁷Chu'nchel i chikop re' re', inkuy-eej chi re' hat naa aye'wiik kiwa' paruorahiil.²⁸Re' hat i nayeew keh, eh re' keh inkimol, noq i nayeew keh i inkik'ux i suq atoob' korehtaal kinujik.²⁹Wila' ma' xayeew chik cho kiwa' neenchalik kiyo'jiik. Eh wila' xawesaj i kuxlaab' nee kikimiik, nee wo' chik kisutinik chi pooq ak'al.³⁰Eh noq i nayeew chee aawuxlaab'al wilik wo' chik i ki-aasjik, eh i nujik wo' chik chi k'achareel wach ak'al.

³¹Neeta naq inye'arik ruloq'il i QaJaaw Dios chi juneliik. Eh suuqb'oq ta naq ruk'ux chi riij i rutz'uhkrisam chaloq.³²Eh ink'uyu'jik i wach ak'al noq inilarik cho ruum i Dios. Eh i nelik kisib'eel i yuuq' noq kitz'ajik ruum i Dios.³³Re' hin juneliik naa nutz'uyem wach i QaJaaw Dios nik' pa' chik najtiil i nuk'achariik ayu' wach ak'al.³⁴Neeta naq imponik chuwach i QaJaaw Dios taqe i nukapaaj. Re' hin ruuk' i reh inureq rusuqkiil nuk'ux.³⁵Neeta naq insahchik kiwach chinaah i wach ak'al aj mahk. Eh ma' ta naq chik neenilarik kiwach i yiib' wach i kina'ojb'al.
Re' hin naa nuloq'em i QaJaaw Dios chu'nchel i wánima. Loq'imaj ta naq i QaJaaw. Re' ruk'axb'al i Dios xub'an cho kuuk' i aj Israel (1 Cron 16.7-22)¹Chaloq'ej taq i QaJaaw Dios. Chaq'or taq rib'iral i loq'laj rub'ihnaal. Eh chayeew taq keh chi naab'jik i tinamit taqe i rub'anam.²Cha a'n taq atz'uuy ye'b'al ruloq'il. Chawesaj taq ruq'orkiil i nimaq wach na'ojb'al rub'anam.³Chayeew taq ruloq'il i rusantolaj b'ihnaal. Eh chawunchelaal taq i hat i tisik'wik taq reh i QaJaaw Dios suuqb'oq taq ak'ux.⁴Chasik' taq i rajaawriik i QaJaaw Dios, juneliik taq cha pahqaaj i rotob'il.⁵Mansahchik taq panak'ux i nimaq wach rukamaj rub'anam, je' wo' taqe i ma' ilooj taj rub'anam. K'oloq taq panak'ux i q'ataj Q'orik xub'an.⁶Re' taq i hat, i hat taq riih rumaam i Abraham re' rumoso chee Dios. Hat taq rak'uun rixq'uun chaloq i Jacob i rusik'im cho wach.

⁷Re' reh i QaJaaw, i qaDios. Re' wo' reh wilik chi taaq'anik chinaah chu'nchel i wach ak'al.⁸Re' reh wilik paruk'ux chi juneliik i ruq'orom chaloq chi naa rub'anam ruuk' i tinamit. Xa jarub' pa' ch'iht i k'acharik neenik'ik xama' naa ta wo' rik'iik paruk'ux.⁹Eh ma' nsahchik ta paruk'ux i ruyejaam cho wach ruuk' i Abraham. Je' wo' xti korik xuq'or cho chi riij i Isaac.¹⁰Je' wo' xuyejaa' cho wach ruuk' i Jacob xukanaa' chi jinaj k'uhb'aal, je' wo' i xuyejaa' cho wach ruuk' i Israel.¹¹Re' noq xuq'or chi je' wili: Re' hin naa taq nuye'em aweh i ye'aab' Canaán naa taq nuye'em aweh chi akooch, inki Dios.¹²Eh i xq'orarik keh, ma' re' ta nkiwii' chi xama' k'ih ta taqe, xa je' taqe aj patal ponoq chupaam i ye'aab' re' re'.¹³Eh xata wo' jarub' chi tinamit ki-ik'ik wii', chi je' pankok' tinamit, chi je' panimaq tinamit.¹⁴Re' Dios ma' xuyeew ta q'ab' chi awach ta xb'anik ti' k'axik keh, xuq'il la' taqe i reey je' wili xuq'or keh:¹⁵Maa a'n taq ti' k'axik keh i nusik'im cho kiwach. Ma' chih taq awuchej taqe i jalal nuq'oral, inki.

¹⁶Re' QaJaaw Dios xuyeew chaloq i wi'jaleel chikinaah i aj Israel. Ma' xuyeew ta chik cho k'uxumb'al keh.¹⁷Eh xutaq'aaj reje Egipto i José chi peet, re' xkik'ayej reje pankowlaj kamanik.¹⁸Re' reh xkib'ak' i rooq chi karena. Eh xkian ti' k'axik reh pantz'ilom.¹⁹Eh korehtaal xooj eloq wach i ruq'orom rib'iral i José pampeet. Re' ruq'oral i Dios xk'uhtanik reh chi korik i xuq'or chaloq.²⁰Eh re' i wilik chi reyil chikinaah i ma' k'isa tinamit xuq'or chi xkoq'taaj reje i José.²¹Eh re' reey xupab'aa' i José chi cha'jen reh i rupaat i rub'an wii' taaq'anik. Eh xupab'aa' chi ajaab'esil chikinaah i tinamit.²²Re' i José xwihik rajaawriik chikinaah i xi kamanik ruuk' i reey. Eh chi xukoj kina'ojb'al i k'amal b'eeh, taqe i nimaq wach kikamaj.

²³Eh koq'uun chik xiooj Egipto taqe i aj Israel, re' taqe i rak'uun rixq'uun i Jacob. Ar xi okik chi patinik chupaam i ye'aab' Cam rub'ihnaal.²⁴Re' QaJaaw Dios xuk'ihaaxb'isaj i rutinamiit, yohb'aal wach k'ihaal xi ponik, q'e' chik kow kiib' chikiwach i aj Egipto.²⁵Je' re' noq xtohq'ik rixowjiik kiwach kuum aj Egipto. Eh xuyeew q'ab' i Dios chi xb'aan ti' k'axik keh i rumoso ar.

²⁶Eh xrilow chi je' re' i Dios, xutaq'aaj reje Egipto i rumoso Moisés, ruch'ihil i Aarón rusik'im cho kiwach.²⁷Eh parub'ihnaal i Dios xkik'uhtaaj taqe i ma' ilooj taj ar Egipto. Eh xkik'uhtaaj wo' nimaq wach sahchb'al k'uxliis ar Cam.²⁸Eh re' Dios chi xuyeew i runimaal q'equm chikinaah i aj Egipto. Xa re' la' re' keh xama' xkinimaj ta wo' hoq i xuq'or i Dios.²⁹Eh xusutej wo' chi kik' taqe i nim ha' xukansaj taqe kar wilkeeb' chupaam.³⁰Xunujisaj chi tuhtz' paam chu'nchel i tinamit Egipto xnujik chi tuhtz' paam i paat inwirik wii' i kireey.³¹Eh xa ruuk' i ruq'oral i Dios i xa sib' chik paam i nimaq utz', i kok' utz' xkipuhkaaj kiib' chupaam i tinamit Egipto.³²Xuyeew wo' i nimaq taq saq b'och chi jilow jab' chinaah i tinamit. Eh xuyeew wo' i ma' k'isa xaq q'aaq'.³³Ruuk' i taqe re' xsacharik wach i ki uuva, i ki higo, i xitoqib'ik taqe i chee wilkeeb' chupaam ar Egipto.³⁴Eh xa ruuk' ruq'oral i QaJaaw Dios xnujik i nimaq taq chili'l chupaam i tinamit re' re', ma' xata ajlamaj taqe.³⁵Re' taqe chikop re' re' kik'uxib'eej taqe ch'ahn, je' wo' chu'nchel i kitik i nelik chinaah i wach ak'al.³⁶Eh xukansaj wo' taqe chu'nchel i peet kak'uun i aj Egipto, re' taqe i q'e' naq suq kik'ux chi riij.

³⁷Eh xresaj taqe chaloq Egipto i aj Israel, xkik'am chaloq i ki oro, i ki plata. Eh jar ch'uq chi kiib' ma' jino'q i yowaab' chi kixilak.³⁸Eh re' taqe i aj Egipto xsuuqb'ik kik'ux noq xi elik chaloq i aj Israel, ruum xiyo'jik ruum i xkik'ul.³⁹Eh xuyeew chaloq i suutz' chikinaah muujb'al keh pan q'iij. Eh chaq'ab' xuyeew chaloq i q'aaq' chikinaah sihq'b'al keh.⁴⁰Eh noq xkipahqaaj kitiib', re' Dios xutaq'aaj chaloq k'oot reh chi xkik'ux. Xutaq'aaj chaloq i kaxlanwi'k pan taxaaj, korehtaal xinujik.⁴¹Xutar wo' hoq i saqrehp ab'aj, eh xelik chaloq i ha', xa je' chik nim ha' noq xb'ehik chupaam i ye'aab' chiq yuuq reh chi xkian kihaa'.⁴²Je' re' xub'an i Dios, ruum xk'ulik cho paruk'ux i q'e' looq' ruq'orom cho reh i rumoso Abraham chi naa rub'anam ruuk'.

⁴³Eh xresaj chaloq Egipto i rutinamiit rusik'im cho kiwach ruuk' rusuqkiil k'uxliis xi elik chaloq.⁴⁴Eh xuyeew keh i aj Israel i kiye'aab' i ma' kinimanik ta ree Dios, re' chik i keh xib'anik rusuqkiil i kitik.⁴⁵Reh naq chi naa kinimam i ruk'uhb'aal, eh chi naa kik'amam naah i kitijiik i rub'an.
Loq'imaj ta naq i QaJaaw Dios. Re' ruq'orariik chi re' taqe i aj Israel kok' xilak xkiq'etwachej i Dios¹Loq'imaj ta naq i QaJaaw Dios.
Chaloq'ej taq i QaJaaw Dios ruum re' reh q'e' atoob', eh juneliik wilik ketelinik wachiis ruuk'.²¿Awach i neerub'an ruq'orariik taqe i ma' ilooj taj xub'an i QaJaaw Dios? ¿Awach neerub'an rulooq'jiik je' rukab' i ruk'ul chi reh?³Atoob' keh inkitijej keh rub'aan i korik, eh eliik inki a'n i rub'ehel.

⁴QaJaaw Dios nee ta tii kink'ulik cho panak'ux i hin noq neena a'n otob'il keh aatinamiit. Eh nee ta wo' tii kinako'leej haa' i hin.⁵Reh chi neenwilow i kik'axariik i na a'n taqe asik'im cho kiwach. Reh chi nee kimb'anik haa' i rusuqkiil kik'ux aaloq'il aatinamiit.

⁶Re' hoj xoj mahkunik je' rukab' noq ximahkunik chaloq i qamaam qati't, ma' k'isiin tee yiib' wach na'ojb'al inqa a'n.⁷Chawil taqe i qamaam qati't noq xi wihik cho Egipto, ma' xkiyeew ta rajaawriik i taqe i ma' ilooj taj xa a'n. Eh sahchik pankik'ux i kik'axariik xa a'n, xkija'wachej kiib' chawach chi chii' kaq palaw.⁸Xa re' la' re' QaJaaw Dios xuko'leej taqe k'uhtb'al reh i rajaawriik, ruuk' i ruk'axb'al.⁹Noq xuq'il i palaw jumehq'iil xuchiqsaj, eh rik'saj taqe i aj Israel re' re' panyejaal i palaw chi xa je' panchiq yuuq'.¹⁰Je' re' kiko'ljiik xub'an pan kiq'ab' i nixowanik kiwach xuko'leej wo' pan kiq'ab' i ma' najwaanta kiwach.¹¹Eh ruuk' i palaw, xutz'ap kinaah i nixowanik kiwach, ma' jino'q chik i xi kahnik.¹²Kora'j xkinimaj re' i aj Israel q'orooj cho rib'iral keh ruum i QaJaaw Dios, eh kitz'uuyej wach.

¹³Xa re' la' chi jumehq'iil xsahchik pankik'ux i xub'an Dios kuuk'. Ma' xkuy-eej taj i ruyejaam naq wach chi keh.¹⁴Noq wilkeeb' cho chupaam i ye'aab' chiq yuuq, noq ma' xta chik wilik keh xkipaj i Dios ruuk' i rupahqaljiik reh chi ye'aroq keh chib'ih inkaaj.¹⁵Re' Dios xuyeew wo' keh i xkipahqaaj. Xa re' la' jinaj wo' hoq i runimaal yaab'ilaal xuyeew chikinaah.

¹⁶Chupaam i ye'aab' inkimol wii' kiib' xkixow wach i Moisés ruch'ihil i Aarón re' rusik'im cho wach i Dios.¹⁷Eh ruum i re' xutar chee ak'al i Dios xub'iq' qohoq i winaq Datán rub'ihnaal. Eh xub'iq' wo' qohoq i juntuhb' xihuch'ihlinik reh i Abiram.¹⁸Eh xqop jinaj i q'aaq' pan kiye'aab'. Ruuk' i xaq q'aaq' re' re' xik'ahtik chu'nchel i yiib' wach kina'ojb'al.

¹⁹Chupaam i ye'aab' Horeb xkiyejaa' jinaj i kitiyoox je' ruwii' k'isa imas wakax re' ruuk' i oro, eh xkixuk'aa' kiib' chulooq'jiik.²⁰Eh ma' re' ta chik i k'achlik Dios xkiloq'ej, re' la' chik xkiloq'ej i tiyoox je' ruwii' b'ooyax ink'uxwik ch'ahn.²¹Re' keh xsahchik pankik'ux i ki Dios xko'linik cho keh, re' i xb'anik taqe i ma' ilooj taj kuuk' ar Egipto.²²Re' wo' reh xb'anik taqe sachb'al k'uxliis chupaam i ye'aab' Cam. Eh xub'an kuuk' i ma' ilooj taj noq xi-ik'ik chupaam i kaq palaw.²³Re' i Dios xraaj naq rusacham kiwach. Xchalik i Moisés i rusik'im cho wach i Dios, xupahqaaj chi marusach pee kiwach. Xa je' chik re' noq xik'ik ruk'aah i QaJaaw Dios.

²⁴Re' taqe aj Israel ma' xkinimaj taj i xq'orarik keh ruum i Dios. Eh ma' xponik ta panaq'kiwach i ye'aab' q'e' holohik.²⁵Ma' holohik ta xiq'orik chi riij i QaJaaw chupaam i kitz'ihy naah paat, eh ma' xkinimaj taj i ruq'oral.²⁶Xrilow chi je' re' i QaJaaw Dios, kow xuq'or keh chi naa kikimiik chupaam i ye'aab' chiq yuuq'.²⁷Eh xuq'or chi naakikimiik i kiih kimaam. Eh chi naa rutukem kiwach i tinamit i ma' kinimanik ta ree Dios.

²⁸Eh chupaam i ye'aab' Peor xkiloq'ej i tiyoox Baal. Eh xkik'ux keh i mayijimaj chikiwach i kamnaq tiyoox.²⁹Ruum i kiyiib' wach na'ojb'al xkiqop wach i rujosq'iil i QaJaaw Dios, eh xye'arik chikinaah i runimaal yab'ilaal.³⁰Eh re' i Finees koxub'an chik reh i k'amal kib'eeh i yiib' wach kina'ojb'al, kore' chik xikanab'jik ruum i runimaal yab'ilaal.³¹Re' QaJaaw Dios xrilow otob'il xub'an i Finees, eh xuyeew cho runimaal wach chi riih chi rumaam.

³²Eh xkiqop wo' chik wach i rujosq'iil i QaJaaw Dios ar Meriba re' i wilkeeb' wii' haa'. Kuum i keh xuk'ul i ti' k'axik i Moisés ar.³³Ma' k'isiin ta xkiyeew ruk'aah i Moisés ruum i re' xsahchik ruk'ux xama' rureq ta chik chi riij chib'ih taqe ruq'or.³⁴Re' taqe i aj Israel ma' xkisach ta wach i tinamit xq'orarik keh ruum i QaJaaw Dios.³⁵Xkian la' jinaj kiwach kuuk' taqe i kiloq'inik reh i tiyoox. Eh xkitijej keh inki a'n i keh.³⁶Eh ruum chi xkiloq'ej keh i kitiyoox xsacharik kiwach.³⁷Wilik i kak'uun kixq'uun xkiyeew chi kimayiij chikiwach i ma' tob'laj uxlab'al.³⁸Re' taqe kak'uun kixq'uun xkikansaj i ma' xta kimahk. Eh re' kikik'eel xkiyeew chi kimayiij chuwach taqe i tiyoox inkiloq'ej i aj Canaán. Ruuk' i xkian re' re' xkinih chu'nchel i wach ak'al.³⁹Eh je' wo' keh xkinih wo' kiib'. Je' naa jinaj runimaal k'oyomal i xkian, ruum xkiq'eb' i k'achlik Dios ruum i kiyiib' wach na'ojb'al.

⁴⁰Eh re' i QaJaaw Dios ma' k'isiin ta noq chalik rujosq'iil chikinaah i rutinamiit, xuq'eb' taqe chi riij ruk'ux.⁴¹Xuq'eb' taqe pan kiq'ab' i kiloq'inik reh i tiyoox. Eh xuyeew q'ab' chi xq'atarik kiwach kuum taqe i nixowanik kiwach.⁴²Re' taqe aj Israel xq'atarik kiwach kuum i aj ixowaal. Re' chik taqe i aj ixowaal xi kahnik chi taaq'anik chikinaah.⁴³Re' Dios k'ih pech xuko'leej taqe, eh re' keh ma' xkinimaj taj i xq'orarik keh. Re' chik xkichop kik'ux chub'aan i kiyiib' wach na'ojb'al i keh.⁴⁴Ma' re' ta nkiwii' chi je' re' i xkian, noq xrilow i Dios chi q'e' ti' wilkeeb', eh noq xrib'iraj i koq'iim.⁴⁵Re' reh xk'ulik cho paruk'ux i ruq'orom cho keh chi naa rub'anam kuuk' xujal wach i rukapeew ruum xiik' naah i ketelinik wachiis ruuk'.⁴⁶Eh xuch'ub'isaj i kánima taqe i nixowanik kiwach i rutinamiit. Reh chi ma' xta chik xi uchjik i keh.

⁴⁷Jaaw hat qaDios, qoh ako'leej tii. Qoh awisaj cho chi kixilak i tinamit yiib' wach i kina'ojb'al reh chi neenqaloq'ej i santo laj ab'ihnaal. Reh chi suq qak'ux noq neetiqaloq'eej.

⁴⁸Qayeew ta naq ruloq'il i QaJaaw Dios chi juneliik, re' qaDios i hoj, hoj aj Israel. Je' ta naq re' inko'q ta naq taqe i tinamit chi kunchelaal. Loq'imaj ta naq i QaJaaw. Re' Dios i ruko'leej taqe rutinamiit chuwach i ti' k'axik¹Chaloq'ej taq i QaJaaw Dios ruum re' reh xiik' naah i rotob'il. Eh q'e' aj keteloom wachiis chi juneliik.²Eh nee ta naq inlooq'jik i QaJaaw kuum i xuko'leej taqe. Re' taqe i xuko'leej pan kiq'ab' inixowanik kiwach.³Re' taqe i xumol cho kiwach chinaah i wach ak'al. Chi je' parelb'aal q'iij, chi je' parookb'aal q'iij, chi je' pantz'eet ree rookb'aal q'iij chi je' pansak'aaj ree rookb'aal i q'iij xi chalik.

⁴Eh xisahchik cho panchiq yuuq', ma' nkireq ta naq chik i kib'eeh. Eh ni xata naq inkireq jino'q i tinamit naakipatiniik.⁵Xkikuy cho kiwa' kihaa'. Xa kimik naq chik keh.⁶Eh noq ti' kik'ux xkipahqaaj i rotob'il i QaJaaw Dios xa re' chik i reh x-eesanik keh chupaam ti' k'axik.⁷Eh re' xub'esaj taqe chaloq chupaam i korik laj b'eeh, reh chi xi chalik chupaam jinaj i tinamit xi patinik wii'.⁸Chaloq'ej taq i QaJaaw Dios, ruum re' reh q'e' aj keteloom wachiis, eh i rub'an otob'il keh i tinamit.⁹Ruum re' reh i ruket taqe i kimik keh ruum kiwa'. Eh irik'saj i kichiqchi'iil taqe i chiqiij kichii'.

¹⁰Re' keh panq'equm naq wilkeeb' xakimik naq chik keh ruum i ti' k'axik. Je' naq b'ak'alkeeb' chi karena, je' naq pantz'ilom wilkeeb'.¹¹Je' re' xkik'ul ruum xkiq'etwachej i QaJaaw Dios. Eh ma' xponik ta chikiwach i kik'uhb'aljiik xb'aan ruum i QaJaaw Dios wilik cho pan taxaaj.¹²Re' i QaJaaw Dios, xuyeew taqe chutojariik i kimahk pankowlaj kamanik. Eh noq kiq'ehb'ik wach ak'al ma' awach ta chik imb'anik otob'il keh.¹³Eh noq ti' i kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam.¹⁴Xresaj taqe chaloq chupaam i q'equm aha' xakimik naq chik keh, eh xuchej kiwach.¹⁵Chaloq'ej taq i QaJaaw Dios ruum re' reh q'e' aj keteloom wachiis. Eh i rub'an otob'il keh i tinamit.¹⁶Xuxereb'eej i puerta re' ruuk' i q'an ch'ihch'. Xutoqib'eej i b'olob'aq ch'ihch' noq xuko'leej taqe i rutinamiit.¹⁷Re' keh xa yowaab' naq chik taqe, xa ntz'irik naq chik kiwach ruum i kiyiib' wach na'ojb'al, ruum i kimahk.¹⁸Eh xama' ruq'or ta naq chik kik'ux i wi'k. Ruum i re' xi ponik nah kimik.¹⁹Eh noq ti' kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam ti' k'axik.²⁰Xa ruuk' i ruq'oral xuk'achrisaj taqe. Eh xuko'leej taqe chuwach i kimik.²¹Je' re' noq chaloq'ej taq i QaJaaw Dios, ruum re' reh aj keteloom wachiis, eh i rub'an otob'il keh i tinamit.²²Chayeew taq amayiij chuwach i QaJaaw Dios, t'iosb'al reh i rotob'il. Eh ruuk' suq kiil k'uxliis cha q'or taq rib'iral taqe i rub'anam chaloq re' re'.

²³Re' taqe yakool xa k'ahchi' keeb' chi b'ehik pan barco chinaah i palaw, inkikoj rehtaal chi korik nik' wach noq wilkeeb' taqe ha'.²⁴Eh noq inkilow i runimaal, i ruchamiil i palaw inkikoj rehtaal chi re' i QaJaaw Dios xyej-anik reh ruuk' i runimaal i rajaawriik.²⁵Ruum xa ruuk' i ruq'oral i QaJaaw Dios xwuktik chaloq i runimaal teew jab'. Eh yohb'aal wach taqe i rub'ohl i palaw i ruksaj.²⁶Eh re' ki barco xa nkutarik chik taxaaj, wilik pech noq inooj qohoq ri'si haa'. Re' keh xakib'arb'otik chik ruum kiyo'jiik.²⁷Eh xa kichelchotik chik kiq'ehb'ik xa je' chik taqe xohk'reel. Xa ma' keht'al ta chik inki a'n²⁸Eh noq ti' kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam ti' k'axik.²⁹Re' reh xusutej chi xa kok' musjab' i runimaal teew jab', eh xupab'aa' taqe i rub'ohl i palaw.³⁰Eh noq xkilow chi xipa'lojik taqe i rub'ohl i palaw xsuuqb'ik kik'ux. Xik'amarik reje ruum i Dios ko aha' impa'lojik wii' i barco.³¹Chaloq'ej taq i QaJaaw Dios ruum re' reh q'e' aj keteloom wachiis. Eh i rub'an otob'il keh i tinamit.³²Chayeew taq runimaal wach i QaJaaw Dios noq naa taq amolom awiib'. Chaloq'ej taq noq neenkimol kiib' taqe i nimaq wach kikamaj.

³³Re' QaJaaw Dios nim rajaawriik, ruum i ruchiqsaj taqe nim ha'. Eh i ruchiqsaj wo' taqe i raasb'al ha'.³⁴Eh i resaj iransil aak'al reh chi ma' nwachinik ta chik taqe i tik, ruum q'e' yiib' wach i kina'ojb'al i k'achareel wach ak'al.³⁵Re' QaJaaw Dios i rusutej chi nim ha' i ye'aab' chiq yuuq'. Eh re' i chiqiij pam aak'al i rusutej chi raasb'al ha'.³⁶Chupaam i ye'aab' re' re', i ruyeew taqe i ma' xta kiwa' kihaa'. Eh ar inkiyejaa' kitinamiit kiwihik wii'.³⁷Eh chupaam i ye'aab' re' re' inkitik chib'ih keh, inkitik ki uuva, eh ma' k'isiin tanwachinik.³⁸Kikuxeesjik ruum i QaJaaw Dios, ma' k'isiin ta ink'ihaaxb'ik taqe i kak'uun kixq'uun. Eh ink'ihaaxb'ik taqe i kichikoop.

³⁹Noq imb'aan keh i ma' k'isa ti' k'axik kuum i aj ixowaal insuhb'ik wo' chik rooq i kik'ihaal, ruum wilik i kikimik.⁴⁰Eh re' QaJaaw Dios i rub'an ti' k'axik keh ma' raaj ta kiwach inixowanik kiwach i rutinamiit. Eh re' taqe i k'amal kib'eeh xusach kik'ux, xama' nkireq ta chik kib'eeh.⁴¹Re' QaJaaw Dios i ruko'leej taqe i ti' wilkeeb'. Eh i ruk'ihaaxb'isaj i kak'uun kixq'uun. Je' rukab' noq kik'ihaaxb'iik taqe i tentzun.⁴²Eh noq inkilow chi je' re' taqe i korik wach kik'ux, insuuqb'ik kik'ux. Eh re' taqe yiib' wach kina'ojb'al intz'aplojik i kichii'.⁴³Awach i wilik runa'ojb'al nee rukoj rehtaal taqe wili. Eh nee rureq chi riij chi re' QaJaaw wilik ketelinik wachiis ruuk'. Re' hin nuchopom nuk'ux chulooq'jiik i Dios¹QaJaaw Dios, re' hin nuye'em nuk'ux awuuk', naa nutz'uyem awach. Re' re' i q'e' looq' chi wee hin.²Re' hin naawik'raam wiib' noq naa rusaq'iik, naa nutz'uyem awach ruuk' i k'ahaam wach q'ooj, ruuk' i warpa.³Eh naa kaat nuloq'em chikiwach i tinamit QaJaaw Dios. Eh naa nuye'em runimaal awach ruuk' i nutz'uuy chikiwach chu'nchel i tinamit.⁴Ruum re' ketelinik wachiis i na a'n, imponik kopan taxaaj. Eh re' rukorkiil wach ak'ux, imponik kopan taxaaj.

⁵QaJaaw Dios, nee ta naq nak'uhtaaj i runimaal awajaawriik ar pan taxaaj. Eh nee ta wo' naq inye'arik aloq'il chinaah chu'nchel i wach ak'al.⁶QaJaaw Dios, qoh ab'iraj tii. Eh qoh ako'leej ruuk' awajaawriik, chawisaj taqe cho panti' k'axik taqe i q'e' nak'ax.

⁷Re' QaJaaw je' wili i ruq'or parusantolaj ye'aab': Re' hin naa rusuuqb'iik nuk'ux noq naa nuch'aqam i ye'aab' Siquem, noq naa nupajam i wach k'ixkaab' Sucot.⁸Re' ye'aab' Galaad, i Manasés, wehin taqe. Re' ye'aab' Efraín je' naa nupuneet wach i nunaah. Eh re' i ye'aab' Judá je' naa nukarote noq wilik.⁹Eh re' ye'aab' Moab je' jino'q johm ye'aab' tz'ajb'al q'ab'iis chi weh. Re' ye'aab' Edom, naa nuyeq'em pan wooq, naa rusuuqb'iik nuk'ux noq naa nuq'atam kiwach i aj filisteo, inki.

¹⁰QaJaaw Dios ¿awach naa ruk'amwiik reje weh chupaam i tinamit kow riib'? ¿Awach naa ruk'amwiik reje weh ar Edom?¹¹QaJaaw Dios ¿Mi xoj aq'eb' chi jumpech re'? ¿Mi ma' nee wo' naq chik i rub'an chi re' hat nee ti k'amwik reje qeh panq'aq'inik re'?¹²Eh qoh ako'leej pan kiq'ab' i ki-ixowanik qawach, ruum re' i ko'linik inki a'n i xa winaq xama' xta nokik wii'.¹³Re' QaJaaw Dios naa rutoob'iniik qeh, reh chi ma' xta nee qoh kuchej i ki-ixowanik qawach. Re' i rupahqaljiik chi naa ruq'atariik i q'orik chinaah i aj ixowaal¹QaJaaw Dios, re' hin i nuyeew aloq'il, chayeew tii weh i nupahqaaj aweh.²Re' taqe yiib' wach kina'ojb'al ma' k'isiin i chukuj q'orik inki a'n chi wiij. Eh re' inkiq'or chi wiij ma' korik ta wo' hoq.³Eh xa re' i nu bajariik inki a'n xama' xta rub'ehel noq inki a'n i peleto wuuk'.⁴Re' i kik'axariik i nub'an peleto chik inkiq'aj wii' wach weh. Eh re' hin xa tiij i nub'an chikiij.⁵Eh re' otob'il i nub'an keh, ti' k'axik chik inki a'n weh chi jilow. Re' i kik'axarik i nub'an wixowjiik chik inki a'n chi riij.

⁶Eh chinaah i aj ixowaal re' re', nee ta naq inakoj jino'q i yiib' wach i runa'ojb'al chi q'ataj q'orik chinaah.⁷Noq nee ruq'at i q'orik chinaah nee ta naq i ruq'or chi wilik ru mahk. Eh nee ta naq inye'arik chutojariik i ru mahk.⁸Ma' ta naq najt neenk'acharik, tokoom ta chik neenchopwik naah taqe i chib'ih reh.⁹Eh nee ta naq i ruq'eb' kahnoq i rehk'een, je' wo' taqe i rak'uun rixq'uun.¹⁰Neeta naq kiooj i rak'uun rixq'uun chi' taq paat chupahqaljiik chib'ih inkaaj. Eh re' i kipaat nee ta naq inkahnik chi xan tz'irik chik paam.¹¹Eh re' ta naq taqe i aj kemeel neekik'amwik i chib'ih reh. Eh tokoom ta chik neemb'anik rusuqkiil i rukamaj.¹²Ma' ta naq awach chik neen ketelinik wach i reh, je' wo' taqe i rak'uun rixq'uun naa ruq'eb'em kahnoq.¹³Neeta naq inkuxik reje kikimiik taqe i rak'uun rixq'uun. Eh nee ta naq insahchik wach i kib'ihnaal chi jumpech.¹⁴Eh eliik ta naq wilik paruk'ux i QaJaaw Dios taqe mahk rub'anam chaloq i kajaaw. Ma' ta neensahchik paruk'ux i QaJaaw i ru mahk kituut.¹⁵Wilik ta naq paruk'ux i QaJaaw Dios i yiib' wach inki a'n Ma' ta naq chik neen q'orarik i kib'ihnaal chinaah i wach ak'al.¹⁶Re' aj ixowaal re' re' ma' nik' ta xuketelaaj cho kiwach i k'axik wilkeeb' ruch'ihil taqe xama' nimaq ta kiwach inki a'n kiib', ruch'ihil taqe i ti' kik'ux. Xub'an la' k'axik keh korehtaal xukansaj taqe.¹⁷Eh ruum chi xub'an i ti' k'axik keh i ras ruch'aaq' i reh, naa wo' rub'aan ti' k'axik ree reh. Eh ruum chi ma' xub'an taj i otob'il i reh, ma' naa ta wo' rub'aan otob'il ree reh.¹⁸Re' ti' k'axik nee ruk'ul, nee ta naq nkahnik chi je' ruso'. Eh nee ta naq inokik chi je' ha' chi je' aseite chupaam i ruti'jolal, i rub'aqil.¹⁹Xa re' ta naq chik i ti' k'axik nee ruk'ul, nee ta naq inkahnik chi je' ruso', eh nee ta naq inkahnik chi je' rusincho.

²⁰QaJaaw Dios je' ta naq re' ruq'ajariik wach neena a'n keh i ki-ixowanik nuwach. Je' wo' taqe i ma' holohik ta kiq'orik chi wiij.²¹Raaj i hat QaJaaw Dios, ruum chi q'e' tik'axwik kinatoob'eej tii. Eh kinako'leej panti' k'axik ruum q'e' hat aj keteloom wachiis.²²Ruum re' hin q'e' ti' wilkiin, q'e' ntz'irik nuwach, ma' k'isiin ta nyot'ik i wánima.²³Re' nuk'achariik k'ahchi' rusahchiik wach, xa je' nik'ik q'equm. Eh xa je' rukab' noq kik'amarik reje i chili'l ruum i teew.²⁴Eh ruum chi ma' nub'an ta chik nuwa' nuhaa', xakib'arb'otik chik i pan waa', eh xab'aaq chik.²⁵Noq inkilow nuwach i tinamit, hin kib'ajb'al inkik'uyu'saj i kinaah kinki kaq se'laaj chii naa rub'anam i re', inki taqe.

²⁶WaJaaw hat nuDios, kinako'leej tii. Chaketelaaj nuwach.²⁷Reh chi re' taqe i ki-ixowanik nuwach neenkikoj rehtaal chi ruuk' awajaawriik xa a'n taqe re'.²⁸Re' hin weht'al chi re' hat naa atoob'iniik weh, re' keh neenchalik kik'ixiik ruuk' inki a'n Eh re' hin amoso neensuuqb'ik nuk'ux.²⁹Neeta naq insahchik kik'ux i ki-ixowanik nuwach. Eh nee ta naq inkik'uhtaaj kik'ixb'ilaal. Neeta naq inkojarik chi je' kib'urb'aal.

³⁰Re' hin naa nut'iosem ruuk' nuchii' reh i Dios i rotob'il. Eh naa nuloq'em, chi kixilak i ruk'ihaal tinamit.³¹Ruum re' reh imb'anik otob'il reh i ti' wilik, eh re' wo' reh inko'linik reh pan kiq'ab' i kikojwik ru mahk. Re' QaJaaw Dios xuyeew rajaawriik i xti manlik reey¹Re' QaJaaw Dios je' wili i xuq'or reh i waJaaw: Re' hat ti tzuun panusak'aaj, re' hin korehtaal i nuyeew taqe pana wooq i ki-ixowanik awach inki.

²Re' QaJaaw Dios ko ar Sión xuyeew cha wajaawriik chi je' karote. Reh chi re' chik i hat naa aa taaq'anik chikinaah i ki-ixowanik awach.³Eh re' aatinamiit xa pankik'ux naa ruchaliik noq naa kiq'asam kiib' aweh chupaam asantolaj ye'aab'. Eh naa ruwihiik akowiil chi je' jino'q ak'un, je' rukab' noq inqajik chaloq i raab' suutz' pantaq wahq'eq.⁴Re' QaJaaw Dios xuq'or i xti korik chi je' wili reh i rak'uun: Re' hat naa akahniik chi hat kajaaw i k'amal kib'eeh aj tiij chi juneliik, je' rukab' noq xwihik chaloq i Melquisedec, inki.

⁵Re' QaJaaw Dios naa ruwihiik panasak'aaj cha toob'jiik, paruq'ijil i rujosq'iil, na' chusach kiwach i reey.⁶Re' reh naa ruq'atwiik i q'orik chikinaah tinamit, eh i naa rukansam taqe. Eh naa rukahniik chi kutlik i kiti'jolal chi junsuut i wach ak'al.⁷Re' reh naa naq ruq'uhtiik xa re' la' naa wo' chik ruk'uliik raansil ruum naa ruk'em ruhaa' paraasb'al ha'. Re' ruye'ariik ruloq'il i QaJaaw Dios ruum otob'il xub'an¹Re' hin naa nuye'em ruloq'il i QaJaaw Dios chu'nchel i wánima noq naa qamolom qiib' kuuk' chu'nchel i korik wach kik'ux.²Re' taqe i xub'an i QaJaaw Dios xiik' naah loq'il, eh awach taqe imponik chikiwach inchol kitijem riij.³Re' taqe i xub'an xiik' naah holwochiil, eh q'e' looq'. Re' rukorkiil wach ruk'ux ma' jaruuj naa rusahchiik wach.⁴Eh ma' jaruuj naa rusahchiik pank'uxliis taqe i ma' ilooj taj xub'an. Re' QaJaaw Dios q'e' atoob', eh q'e' aj keteloom wachiis.⁵Ruum i ruyeew kiwa' kihaa' taqe i kiyohlinik reh. Eh ma' insahchik ta paruk'ux i ruyejaam cho wach kuuk'.⁶Re' i rajaawriik xuk'uhtaaj keh i rutinamiit noq xuyeew keh i ye'aab' kichopom naq naah i tinamit ma' re' ta taqe aj nimaneel.⁷Eh aha' wilik taqe i rub'an i reh, rub'ehel, eh chu'nchel i ruq'or i ruk'uhb'aal korik wo' hoq.⁸Eh ma' naa ta ruyojiik wach i ruk'uhb'aal, naa la' ruwihiik chi juneliik. Ruum re' re' rub'ehel, eh korik.⁹Re' QaJaaw Dios xresaj taqe chaloq panti' k'axik i rutinamiit, eh xuyejaa' wach kuuk' i naa rub'anam. Re' Dios Santo, xiik' naah yohb'alil wach.

¹⁰Eh re' raa' ri'sil i na'ojb'al re' i ruyohljiik wach i Dios. Ruum aj re', holohik kina'ojb'al awach inkik'am naah taqe i ruq'or i ruk'uhb'aal. Ruuk' ta naq i re' neenye'arik ruloq'il chi juneliik i QaJaaw Dios. Re' i ruyohleej i Dios i nelik korik ruuk' taqe i rub'an¹Atoob' reh awach i ruyohleej wach i QaJaaw Dios. Eh i ruyeew ruk'ux chub'anariik taqe i ruq'or i ruk'uhb'aal.²Re' taqe i rak'uun rixq'uun i korik wach ruk'ux, naa ruye'ariik kajawriik ayu' wach ak'al, eh naakikuxesjiik.³Re' korik wach ruk'ux naa ruwihiik chib'ih reh parupaat, eh eliik naa rub'anam otob'il keh i tokoom.⁴Re' Dios i rusaquumb'isaj i runa'ojb'al i korik wach rik'ux, q'e' atoob' keteloom wachiis.⁵Re' i holohik runa'ojb'al wilik ketelinik wachiis ruuk', i ruyeew chi kemeel i chib'ih reh. Eh parub'ehel i rub'an i ruyak.⁶Eh ma' jaruuj naa rojiik chik chi riij, juneliik naa ruk'uliik pank'uxliis taqe i rub'an.⁷Eh ma' naa ta ruyo'jiik ruum i ma' holohik taj inq'orarik chi riij ruum ruuk' i QaJaaw Dios ch'iklik ruk'ux.⁸Re' reh kow ruk'ux ma' inyo'jik taj xaruse'laj taqe i ki-ixowanik wach.⁹Eh i runej taqe neb'aa' i chib'ih reh, korik wach ruk'ux chi juneliik, naa ruye'ariik ruloq'il i rajaawriik.¹⁰Eh noq naakilom chi je' re' i yiib' wach kina'ojb'al naa ruchaliik kik'aah chinaah, naakiqirich'eem naah i keeh. Eh re' i naa kianam i keh ma' naa ta keliik korik ruuk'. Re' ruye'ariik ruloq'il i QaJaaw Dios ruum i rotob'il¹Loq'imaj ta naq i QaJaaw Dios. Re' taq i hat raj kamanoom, chayeew taq ruloq'il i rub'ihnaal.

²Eh nee ta naq inye'arik ruloq'il i rub'ihnaal i QaJaaw Dios, je' yu'naak, je' chi juneliik.³Chu'nchel ta naq i tinamit neen ye'wik ruloq'il i QaJaaw, chi je' wilkeeb' parelb'aal q'iij, chi je' wilkeeb' parookb'aal q'iij.⁴Re' QaJaaw Dios wilik rajaawriik chinaah chu'nchel i tinamit. Eh xiik' naah i ruloq'il ar pan taxaaj.

⁵Re' QaJaaw Dios wilik cho chi taaq'anik pan taxaaj, ma' awach ta chik jino'q chi je' rukab' i reh.⁶Re' reh i ruloch' riib' chi rilariik i wach ak'al, je' wo' chi rilariik i pan taxaaj.⁷Re' QaJaaw Dios i ruyeew runimaal kiwach i neb'aa', eh irutoob'eej taqe i ma' xta wilik keh.⁸Reh chi rukoj taqe haa' chi kixilak i wilik kajaawriik, je' wo' chi kixilak i rutinamiit wilik kajaawriik.⁹Eh re' ixoq ma' re' ta aj k'isoom i ruyeew rusuqkiil ruk'ux, ruum i ruyeew taqe rak'uun rixq'uun.
Loq'imaj ta naq i QaJaaw Dios. Re' ruq'orariik rib'iral i keliik chaloq i aj Israel ar Egipto¹Eh noq xi elik chaloq i aj Israel re' taqe rak'uun rixq'uun i Jacob ar Egipto, re' tokoom tinamit naq wilkeeb' cho wii'.²Re' i QaJaaw Dios xwihik rajaawriik chikinaah i aj Israel. Eh pan tinamit Judá xkiyejaa' i rupaat.

³Eh noq xi ponik i aj Israel chi chii' i palaw xchiqik. Noq xi ponik chi chii' i nim ha' Jordán xpa'lojik i rooq.⁴Re' taqe yuuq' k'ixkaab' xa je' chik kipisk'anik imas tentzun, je' kipisk'anik kok' tentzun.

⁵Raaj i hat palaw ¿Chib'ih reet noq xatchiqik noq xi-ik'ik i aj Israel? Raaj i hat nim ha' Jordán ¿Chib'ih reet noq xatpah-ik?⁶Eh raaj taq i hat yuuq k'ixkaab', ¿Chib'ih reet noq xa je' taq chik tipisk'anik imas tentzun, eh je' taq tipisk'anik kok' tentzun?

⁷Re' QaJaaw, i ruDios i Jacob xiik' naah nimaal rajaawriik, ruum aj re' ink'uyu'jik paruye'aab' chu'nchel i wach ak'al chuwach.⁸Re' i QaJaaw Dios xusutej chi raasb'al ha' i chiq yuuq'. Eh xutz'uhkrisaj chaloq i nim ha' chupaam i saq rehp ab'aj. Re' i k'achlik Dios wilik rajaawriik, re' taqe i tiyoox ma' xta kajaawriik¹QaJaaw Dios, re' la' hat naa ruye'ariik aloq'il ma' re' tee hoj. Ruum xa re' wo' hat tiketelinik qawach, eh xa re' wo' hat i korik.²Eh ¿Chib'ih reet noq inkiq'or i tinamit chi je' wili? ¿Aha' wilik i ki Dios re'? inki taqe chiqiij.

³Xanaah re', re' i qaDios i hoj pan taxaaj wilik, chu'nchel i xraaj ruyejaam i reh xuyejaa' wo' chaloq.⁴Eh re' ki dios i tinamit re' re', xa plata, xa oro kiyej-aal, eh xa kiyej-anik winaq.⁵Wilik kichii', xama' kiq'orik ta wo' hoq. Wilik naq' kiwach, xama' ki-ilwik ta wo' hoq.⁶Wilik kixikin, xama' ki-ib'irinik ta wo' hoq. Wilik kiju', xama' kiuhtz'inik ta wo' hoq.⁷Wilik kiq'ab', xama' kitz'a'inik ta wo' hoq. Wilik kooq, xama' kib'ehik ta wo' hoq. Eh ma' xta jino'q q'orik i nelik cho pan kalaq.⁸Re' taqe i tiyoox re' re' ma' xta k'isinoq kajaawriik, eliik wach kimemil ruuk' inyej-anik keh, eh je' wo' taqe inimanik keh.

⁹Hat taq aj Israel ruuk' i QaJaaw Dios chayeew taq ak'ux. Ruum xa re' wo' reh intoob'inik inko'linik taq aweh.¹⁰Hat taq riih i Aarón i ruuk' i QaJaaw Dios taq chayeew ak'ux. Ruum xa re' wo' reh intoob'inik, inko'linik taq aweh.¹¹Re' taq i hat inayohleej taq wach i QaJaaw Dios. Inayeew taq ak'ux ruuk'. Re' wo' reh intoob'inik, inko'linik taq aweh.

¹²Re' QaJaaw Dios xojk'ulik cho paruk'ux, naakooj rukuxisam i hoj, hoj aj Israel. Eh naa wo' rukuxisam taqe i riih Aarón.¹³Eh re' QaJaaw Dios naa wo' rukuxisam taqe chaloq chu'nchel i kiyohlinik reh chi nimaq chi kok' taq.

¹⁴Re' QaJaaw Dios naa ruye'em taq cha naah i hat i rotob'il. Eh naa wo' ruye'em i rotob'il chikinaah taq awak'uun awixq'uun.¹⁵Re' ta naq i QaJaaw Dios xyej-anik cho reh i taxaaj ruch'ihil i wach ak'al neentoob'inik taq aweh i hat.

¹⁶Re' i taxaaj ruye'aab' i QaJaaw Dios ruum ar wilik chaloq, eh re' i wach ak'al xukanaa' chi kiye'aab' i tinamit.¹⁷Re' taqe kamnaq ma' nee ta chik inki a'n rulooq'jiik i QaJaaw Dios, ruum ma' xta chik kuxlaab'.¹⁸Re' la' hoj i naa qaye'wiik ruloq'il i QaJaaw Dios, je' yu'naak, je' chi juneliik.
Loq'imaj ta naq i QaJaaw Dios. Re' tiij t'iosb'al reh i rotob'il i QaJaaw Dios¹Re' hin i nuk'ax i QaJaaw Dios ruum xuyeew weh i xnupahqaaj reh panutiij.²Ruum chi xrib'iraj i nutiij. Re' hin juneliik i nuk'achariik naa nupahqaam, reh chi naakiin rutoob'eem.³Re' hin rukotem naq chik wiij i kimik, eh xa ximponik chik chii' jul noq xwik'raaj. Xa re' naq chik i yo'jik, i ruti'kiil k'uxliis wilik chi nunaah.⁴Eh noq xwilow chi je' re' xnupahqaaj reh i QaJaaw Dios chi chuko'leej riij i nuk'achariik.

⁵Re' i QaJaaw Dios ruum chi korik wach ruk'ux, chi q'e' aj keteloom wachiis. Eh q'e' atoob' xirutoob'eej wo' hoq.⁶Re' reh i ruko'leej taqe i ma' nimaq ta kiwach. Chawil i hin noq xakimik naq chik weh xi ruko'leej wo' hoq.

⁷Yu'naak aj re', naa wo' chik rusuuqb'iik i nuk'achariik ruum re' QaJaaw Dios q'e' xiruk'ax.⁸Ruum re' reh xi ruko'leej chuwach i kimik, eh xresaj weh ooq'ik reh chi ma' xinq'ehb'ik taj.⁹Ruum aj re' naa nunimam chi kixilak i k'achareel ayu' wach ak'al.¹⁰Eh noq xiik' naq naah ti'kiil nuk'ux, xnunimaj chi re' QaJaaw Dios naa rutoob'iniik weh.¹¹Eh noq xsahchik nuna'ojb'al xnuq'or chi chu'nchel i winaq aj chukul q'orik taqe.

¹²¿Nik' wach noq neenutoj riij reh i QaJaaw Dios i rotob'il i rub'anam wuuk'?¹³Re' hin naa nuk'amam cho chi numayiij i riis uuva, t'iosb'al reh i rotob'il xub'an wuuk'.¹⁴Eh naa nutojom reh i QaJaaw Dios i nuq'orom chi ree reh, chikiwach taqe irutinamiitnaa nuye'em.

¹⁵Re' QaJaaw Dios ti' riik'raaj i kikimiik taqe i rusantolaj aj nimaneel.¹⁶QaJaaw Dios re' hin, hin awaj kamanoom. Hin rak'uun i nutuut re' awaj kamanoom. Re' hat xinawesaj chupaam i ti' k'axik naq wilkiin wii'.

¹⁷Re' hin naa nuk'atam i numayiij chuwach i QaJaaw Dios, t'iosb'al reh i rotob'il xub'an wuuk'.¹⁸Re' hin naa nutojom reh i QaJaaw Dios i nuq'orom chi ree reh, eh chikiwach i rutinamiit naa nuye'em.¹⁹Re' wili ar Jerusaleem naa nuye'em chuwach rupaat i QaJaaw Dios.
Loq'imaj ta naq QaJaaw Dios. Re' rutz'uuyjiik wach i QaJaaw Dios ruum q'e' aj keteloom wachiis¹Chaloq'ej taq i QaJaaw Dios chawunchelaal i taq i hat i wilkaat taq panimaq tinamit, i wilkaat taq pankok' tinamit chaloq'ej taq.²Ruum re' reh xiik' naah i ruketeljiik qawach xub'an. Eh korik wach ruk'ux quuk' chi juneliik.
Loq'imaj ta naq i QaJaaw Dios. Re' rut'iosjiik reh i Dios i ko'linik xub'an¹Chaloq'ej taq i QaJaaw Dios ruum re' reh q'e' atoob'. Eh juneliik i ruketelaaj qawach.

²Eh nee ta naq inkiq'or aj Israel chi re' QaJaaw chi juneliik i ruketelaaj qawach.³Neeta naq inkiq'or i riih i Aarón chi juneliik i ruketelaaj qawach.⁴Nee ta naq inkiq'or i kiyohlinik reh i QaJaaw Dios chi juneliik ruketelaaj qawach.

⁵Re' hin noq ti' nuk'ux xnupahqaaj i rotob'il QaJaaw Dios. Eh re' reh xirib'iraj, xiresaj chupaam i ruti'kiil nuk'ux.⁶Re' hin re' QaJaaw Dios intoob'inik weh, ruum aj re' ma' kinyo'jik ta ruum chib'ih jariik i neerub'an weh i xa winaq.⁷Re' QaJaaw Dios wilik wuuk', re' reh naa rutoob'iniik weh. Reh chi naa nub'anam keh i ki-ixowanik nuwach.⁸Xiik' naah chihojal chi ruuk' i QaJaaw Dios neenuyeew nuk'ux, chuwach chi ruuk' winaq neenuyeew nuk'ux.⁹Xiik' naah chihojal chi ruuk' i QaJaaw Dios neenuyeew nuk'ux chuwach chi neenuyeew nuk'ux ruuk' i winaq nim wach.

¹⁰Re' hin chu'nchel naq i tinamit kikotej wiij chi naa kianam weh Eh nusach kiwach ruuk' rajaawriik i QaJaaw Dios.¹¹Eh k'ul xi okik chaloq reh i rub'anariik weh. Eh re' hin nusach kiwach ruuk' i rajaawriik i QaJaaw Dios.¹²Eh xkimol cho kiib' chi nunaah xa kiqop chik ruum kik'aah, je' rukab' noq inkimol cho kiib' i k'ohlox. Eh jumehq'iil xnusach kiwach ruuk' i rajaawriik i QaJaaw Dios, xa je' kik'ahtik sohk'.¹³Re' keh xti kow naq xi okik wuuk' re' naq inkaaj chi xkian weh, xa re' la', re' hin re' QaJaaw Dios xtoob'inik weh.¹⁴Re' hin i nutz'uyej wach i QaJaaw Dios, inye'wik rukowiil nuk'ux, re' inko'linik weh.

¹⁵Eh pankipaat korik wach kik'ux inkik'er kichii' chi tz'uuy je' wili inkiq'or: Ruum i rajaawriik i QaJaaw Dios xoj elik korik.¹⁶Re' rajaawriik i QaJaaw Dios ma' ha' ta chi je'. Ruum ruuk' i rajaawriik xqaq'at kiwach i ki-ixowanik qawach, inki taqe.¹⁷Re' hin komajaa' ta naa nukimiik, konaa nuk'achariik. Konaa nuq'orom rib'iral i xub'an i QaJaaw Dios.¹⁸Korik noq re' i QaJaaw Dios, xiruyeew panti' k'axik, xa re' la', ma' xinkikansaj taj.

¹⁹Chateh taq weh i ru puertahiil i rupaat i QaJaaw Dios, re' hin naawokiik ar chi loq'oonjiik i reh.²⁰Re' wili i ru puertahiil i rupaat i QaJaaw Dios, eh ar naa kokiik taqe i korik wach kik'ux.

²¹QaJaaw Dios, re' hin naa kaat nuloq'em ruum xayeew weh i xnupahqaaj aweh, eh xinako'leej.²²Re' ab'aj ma' xponik ta panaq'kiwach i aj yej-an paat, re' re' xkahnik chi rukowiil i rooq i paat.²³Re' wili xub'an QaJaaw Dios, xiik' naah nimaal wach chi qeh i hoj.²⁴Eh chupaam taqe q'iij wili xub'an i re' i QaJaaw Dios. Ruum aj re' q'e' suq qak'ux ma' ntz'irik ta qawach.²⁵QaJaaw Dios cha kuy qoh ako'leej tii. Jaaw cha kuy chayeew q'ab' qeh chi nee qoh elik korik.²⁶Neeta naq inye'arik ruloq'il ik'ulik iloq reh parub'ihnaal i QaJaaw Dios. Re' hoj inqayeew ruloq'il chupaam i rupaat i QaJaaw Dios.²⁷Re' QaJaaw Dios, xk'uhtanik qeh i saqum. Yu'naak chatik'aa' taq i ninq'iij chak'am taq reje amayiij, hiy taq chayeew pantaq rutz'u'kaal i artaal.

²⁸WaJaaw hat nuDios, re' hin juneliik naa kaat nuloq'em, naa nuye'em runimaal awach.

²⁹Chaloq'ej taq i QaJaaw Dios, ruum re' reh q'e' atoob', eh juneliik wilik ketelinik wachiis ruuk'. Re' ruye'ariik ruloq'il i ruk'uhb'aal i QaJaaw Dios¹Atoob' keh i re' korik inki a'n pan kik'achariik. Eh inkik'am naah i ruk'uhb'aal i QaJaaw Dios.²Atoob' keh inki a'n chu'nchel i ruq'or i ruk'uhb'aal. Eh inkisik' chu'nchel i kánima.³Ma' nkian taj i yiib' wach na'ojb'al, inkik'am la' i rub'eeh i QaJaaw Dios.⁴Re' hat QaJaaw Dios aq'orom chi ajwaal wach chi naa rub'aan taqe i ruq'or aak'uhb'aal.⁵Re' hin holohik ta naq neekinb'anik reh chi neenub'an i taqe ruq'or aak'uhb'aal.⁶Eh wila' xnub'an chu'nchel i ruq'or aak'uhb'aal ma' xta neekink'ixik wii'.⁷Eh noq nureqem chik chi riij aak'uhb'aal, naa kaat nuloq'em ruuk' i rukorkiil wach i wánima.⁸Re' hin neenub'an chu'nchel i ruq'or taqe aak'uhb'aal. Xa re' la' makinakanaa' chi wutkeel.⁹¿Nik' wach noq nee rureq i saq wach k'acharik i k'ijool? Xa re' wo' chi neerub'an taqe i ruq'or aq'oral.¹⁰Eh re' hin chu'nchel nuk'ux xatnusik' maayeew q'ab' chi neenukanaa' runimjiik taqe aak'uhb'aal.¹¹Re' hin numolom pan wánima taqe aq'oral reh chi ma' nee ta chik kimahkunik chawach.¹²QaJaaw Dios, re' hat xiik' naah aaloq'il. Cha k'uhtaaj tii weh taqe aak'uhb'aal.¹³Re' hin naa nuq'orom rib'iral chu'nchel aak'uhb'aal aq'orom chaloq.¹⁴Re' hin insuuqb'ik nuk'ux chub'aan i ruq'or taqe aak'uhb'aal, ma' xata je' rukab' i ruyeew chu'nchel i b'ehomal.¹⁵Eh naa nutijem riij chi korik aak'uhb'aal, eh naa nuk'amam naah ruuk' animjiik.¹⁶Re' hin insuuqb'ik nuk'ux ruum taqe aak'uhb'aal eh ma' jaruuj naa rusahchiik panuk'ux aq'oral.¹⁷Jaaw, chayeew pee nuk'achariik i hin, hin awaj kamanoom. Reh chi neenub'an taqe i ruq'or aak'uhb'aal.¹⁸Eh cha teh inukapeb'aal reh chi neenureq chi riij chi re' aak'uhb'aal xiik' naah loq'il.¹⁹Re' hin xa hin ik'al b'eeh ayu' wach ak'al, ruum aj re', maakeb'aa' tii chi nuwach taqe aak'uhb'aal.²⁰Re' hin chu'nchel q'iij inyot'ik i wánima chi rotoowjiik rureqariik chi riij chi korik, aak'uhb'aal.²¹Re' hat xaq'il taqe inkinimb'isaj kiwach, re' taqe i kiq'eb'em kiib', eh kikanaam runimjiik aak'uhb'aal.²²Jaaw kinako'leej tii chuwach i kijosq'iil taqe i ki-ixowanik nuwach, ruum re' hin i nunimaj taqe aak'uhb'aal.²³Eh wilik taqe i nimaq wach kina'ojb'al inkaaj nujot'ariik. Xa re' la', re' hin, i hin awaj kamanoom re' taqe aak'uhb'aal naa nutijem riij.²⁴Re' hin q'e' nsuuqb'ik nuk'ux chi riij taqe aak'uhb'aal, ruum re' taqe re' inkojwik nuna'ojb'al.²⁵Q'e' ti' wilkiin, xanaa chik nukimiik noq i wik'raaj. Jaaw kinako'leej tii, je' rukab' aaq'orom weh.²⁶Eh nuq'or aweh nik' wach i nuna'ojb'al, eh re' hat xayeew weh i xnupahqaaj aweh. Eh cha k'uhtaaj weh taqe aak'uhb'aal.²⁷Chayeew nuna'ojb'al reh chi neenureq chi riij taqe aak'uhb'aal. Reh chi nutijem riij taqe i xiik' naah loq'il inak'uhtaaj.²⁸Re' hin xa re' chikoq'iki nub'an. Chayeew rukowiil nuk'ux, je' rukab' aaq'orom weh.²⁹Eh inwaaj chi neenawesaj chi nuwach taqe chukuj q'orik. Chaketelaaj nuwach kinatijej ruuk' taqe aak'uhb'aal.³⁰Re' hin xnusik' chik i korik laj b'eeh ruum aj re', xa re' chik i ruq'or taqe aak'uhb'aal i nub'an.³¹QaJaaw Dios re' hin i nub'an taqe inaq'or. Ruum ma' nwaaj taj chi neenak'uhtaaj nuk'ixb'ilaal.³²Re' hin i nuyeew nuk'ux chub'aan taqe i ruq'or aak'uhb'aal, ruum q'e' insuuqb'ik i wánima.³³QaJaaw Dios cha k'uhtaaj weh i rukorkiil taqe aak'uhb'aal reh chi nee nunimaj korehtaal i weliik ayu' wach ak'al.³⁴Chayeew tii nuna'ojb'al reh chi nee nub'an chu'nchel nuk'ux taqe i ruq'or aak'uhb'aal.³⁵Chak'am nub'eeh ruuk' taqe aak'uhb'aal ruum xa ruuk' wo' re' neenureq rusuqkiil nuk'ux.³⁶Eh xa re' chik taqe aak'uhb'aal neenub'an. Ma' nee ta nuyeew nuk'ux chinaah i b'ehomal.³⁷Eh chawesaj i naq'nuwach chinaah i xama' xta ruk'am chaloq. Chayeew la' rukowiil nuk'ux reh chi neenuk'am aab'eeh.³⁸Chayeew wee hin, i hin awaj kamanoom i aq'orom cho chi naa aye'em keh i kiyohlinik aweh.³⁹Eh chawesaj chi nuwach i nub'ajariik inki a'n re' inchalik nuyo'jiik ruum. Re' taqe i ruq'or aak'uhb'aal korik.⁴⁰Re' hin xa nwotow chik rub'aan taqe i ruq'or aak'uhb'aal. Chayeew rukowiil nuk'ux, ruum re' hat korik wach ak'ux.⁴¹QaJaaw Dios, chaketelaaj nuwach kinako'leej tii je' rukab' aaq'orom cho weh.⁴²Chi je' re' nee kinchol ruchaq'weesjiik imb'ajwik weh, ruum re' hin nuch'ikaam nuk'ux ruuk' aq'oral.⁴³Maayeew q'ab' chi neenukanaa' ruq'orariik i korik, ruum re' hin chinaah taqe aak'uhb'aal nuye'em nuk'ux.⁴⁴Re' hin inwaaj nub'anam panuk'achariik chi juneliik taqe i ruq'or aak'uhb'aal.⁴⁵Eh ma' xta neenq'ilwik weh, ruum k'ahchi' nuk'amam naah taqe aak'uhb'aal.⁴⁶Re' hin naa nuq'orom rib'iral aak'uhb'aal keh taqe i reey, ma' nee ta kink'ixik chuq'orariik.⁴⁷Eh re' hin q'e' nuk'ax taqe aak'uhb'aal, eh q'e' suq nuk'ux chi riij.⁴⁸Q'e' nuk'ax, eh inwootwaaj rub'anariik i ruq'or taqe aak'uhb'aal, eh xa re' chik i re' i nukapaaj riij.⁴⁹K'oloq panak'ux aaq'orom chaloq chi naa a'nam wuuk' i hin, i hin awaj kamanoom. Reh chi neenwuy-eej.⁵⁰Eh re' aq'orom cho weh chi naa a'nam wuuk' inye'wik rusuqkiil nuk'ux noq ti' nuk'ux. Ruuk' i re' i nayeew rukowiil nuk'ux.⁵¹Re' taqe i nimaq kiwach inki a'n kiib' xak'ahchi' keeb' chi nub'ajariik. Xa re' la', re' hin ma' nukanaam ta runimjiik aak'uhb'aal.⁵²QaJaaw Dios, re' hin ink'ulik panuk'ux taqe aak'uhb'aal aq'orom cho najtir, ruuk' taqe re' insuuqb'ik nuk'ux.⁵³Ruum aj re', inchalik nuk'aah chikinaah i yiib' wach kina'ojb'al, ruum inkiq'eb' chi riij kik'ux taqe aak'uhb'aal.⁵⁴Re' hin inutz'uyej wach aak'uhb'aal noq wilkiin chupaam i ye'aab' wili i xa ik'ik weh chupaam.⁵⁵QaJaaw Dios re' hin tik'ulik panuk'ux pantaq chaq'ab', ruum aj re', inwaaj numolom aak'uhb'aal.⁵⁶Re' aawotob'il wili ruk'ul chi weh ruum k'ahchi' nunimam taqe aak'uhb'aal.⁵⁷QaJaaw Dios, xa re' wo' hat titoob'inik weh, ruum aj re', naa nub'anam i ruq'or aq'oral.⁵⁸Re' hin chu'nchel nuk'ux i nupahqaaj aawotob'il, chaketelaaj tii nuwach, je' rukab' aaq'orom weh.⁵⁹Eh xnukoj rehtaal chi ma' holohik taj i nuna'ojb'al, ruum i re', xnunimaj wo' chik taqe aak'uhb'aal.⁶⁰Atoob' naak ma' xnucham ta wiib', jumehq'iil wo' chik xtohq'ik nub'anam i ruq'or taqe aak'uhb'aal.⁶¹Eh re' taqe i yiib' wach kina'ojb'al inkikotej wiij. Xa re' la', re' hin ma' nsahchik ta panuk'ux aak'uhb'aal.⁶²Eh yejal aq'ab' kinwuktik chi t'ioosjik aweh, ruum re' aak'uhb'aal xti korik.⁶³Re' hin i nub'an jinaj wach nuk'ux kuuk' i kiyohlinik aweh. Eh inki a'n taqe i ruq'or aak'uhb'aal.⁶⁴QaJaaw Dios re' ketelinik wachiis i na a'n ink'utinik chi junsuut i wach ak'al. Ruum aj re' cha k'uhtaaj weh taqe aak'uhb'aal.⁶⁵Jaaw re' hin, i hin awaj kamanoom eliik i na a'n otob'il weh, je' rukab' aq'orom weh.⁶⁶Eh chayeew tii nuna'ojb'al reh chi neenureq chi riij i holohik. Ruum re' hin, ch'iklik nuk'ux ruuk' taqe aak'uhb'aal.⁶⁷Korik, noq komajaa' inuk'ul i ti' k'axik xa chib'ih naq jariik kinq'ehb'ik wii'. Eh yu'naak i nunimaj chik aq'oral.⁶⁸Re' hat q'e' hat atoob', xa re' holohik i na a'n. Re' hin inwaaj chi nee nak'uhtaaj weh taqe aak'uhb'aal.⁶⁹Re' taqe nimaq kiwach inki a'n kiib' inkitz'aq wach numahk. Xa re' la' re' hin, chu'nchel nuk'ux k'ahchi' kiin i ruq'or taqe aak'uhb'aal.⁷⁰Re' taqe re' tz'aplik i kikapeb'aal, raaj i hin q'e' nsuuqb'ik nuk'ux ruuk' aak'uhb'aal.⁷¹Chi wee hin ma' xta reet chi xinayeew panti' k'axik. Ruum chi je' re' neenureq chi riij taqe aak'uhb'aal.⁷²Chi wee hin xiik' naah loq'il aak'uhb'aal xinatijej wii' chuwach i ruk'ihaal oro, i ruk'ihaal plata.⁷³Re' hat xatyej-anik weh, re' hat xat ye'wik nuk'achariik. Ruum aj re', inwaaj chi nee nayeew nuna'ojb'al reh chi neenutijej taqe aak'uhb'aal.⁷⁴Re' taqe i kiyohlinik aweh naa rusuuqb'iik kik'ux, noq naakiinkilom chi ruuk' aq'oral inuch'ikaa' nuk'ux.⁷⁵QaJaaw Dios, re' hin weht'al chi re' hat parub'ehel ti q'atwik q'orik. Ruum aj re', rub'ehel noq kow xinaq'il.⁷⁶Ruuk' i ruketeljiik nuwach xa a'n ma' k'isiin ta nsuuqb'ik nuk'ux. Je' rukab' aq'orom cho weh chi naa a'nam wuuk', i hin awaj kamanoom.⁷⁷Chak'uhtaaj tii weh aawotob'il reh chi konee kink'acharik. Ruum re' taqe aak'uhb'aal inye'wik rusuqkiil nuk'ux.⁷⁸Neeta naq inkik'uhtaaj kik'ixb'ilaal i nimaq kiwach. Ruum re' keh xa nkitz'aq wach i numahk, re' hin re' taqe aak'uhb'aal i nutijej riij.⁷⁹Eh jinaj ta naq wach kik'ux wuuk' i kiyohlinik aweh, ruum keht'al chib'ih ruq'or taqe aak'uhb'aal⁸⁰Eh korik ta naq wach i wánima chunimjiik taqe aak'uhb'aal reh chi ma' xta neekink'ixik wii'.⁸¹Re' hin xanwaaj chik chi naakiin ako'leem. Ruum inuch'ikaam nuk'ux ruuk' aak'uhb'aal.⁸²Re' hin xa kinook chik iil reh taqe aq'orom rib'iral weh, je' wili i nuq'or: ¿Jaruuj i ruyeew rusuqkiil nuk'ux? kinki.⁸³Atoob' ta hin chik riji' winaq xama' xta chik kinokik wii', re' aak'uhb'aal ma' jaruuj insahchik panuk'ux.⁸⁴Jaaw ¿Ko nik' chik najtiil naawuy-eem? ¿Ko jaruuj i nayeew taqe chutojariik i kimahk i ki-ixowanik nuwach?⁸⁵Re' taqe i nimaq kiwach i ma' kinimanik ta reh aak'uhb'aal, inkisik' chi riij i nukanteesjiik.⁸⁶Jaaw kinatoob'eej tii ruum re' hin inkixowaaj nuwach chi ma' xta numahk. Weht'al i hin chi re' taqe aak'uhb'aal korik i ruq'or.⁸⁷Ach naq k'isiin ma' xinkesaj ayu' wach ak'al, xa re' la', re' hin xama' xnukanaa' ta wo' runimjiik taqe aak'uhb'aal.⁸⁸Chaketelaaj tii nuwach chayeew pee nuk'achariik. Chi je' re' ko neenub'an taqe aak'uhb'aal aq'orom ruuk' aachii'.⁸⁹QaJaaw Dios re' aq'oral wilik chi juneliik. Eh ar choplik cho chi korik pan taxaaj.⁹⁰Re' rukorkiil wach ak'ux wilik chi juneliik, re' hat xat ye'wik reh paruye'aab' i wach ak'al, eh xkahnik paruye'aab'.⁹¹Chu'nchel i re' xa ko pan kiye'aab' wo' wilkeeb' yu'naak, je' rukab' i xaq'or keh. Eh chu'nchel i re' awaj kamanoom taqe.⁹²Wi ta ma' xuk'am cho rusuqkiil nuk'ux aak'uhb'aal, xin kimik naq chik chupaam i ruti'kiil nuk'ux.⁹³Re' hin ma' jaruuj neensahchik panuk'ux taqe aak'uhb'aal ruum ruuk' taqe re' xayeew nuk'achariik.⁹⁴Jaaw kinako'leej tii ruum re' hat ti ehchanik weh. Eh k'ahchi' nub'anam i ruq'or taqe aak'uhb'aal.⁹⁵Re' i yiib' wach kina'ojb'al xa kuy-eem chik nik' naakiin kikansam. Eh re' hin, re' aak'uhb'aal wilik panuk'ux.⁹⁶Eh chu'nchel i xa chib'ih jariik insahchik kiwach. Eh re' taqe aak'uhb'aal i hat ma' jaruuj naa rusahchiik kiwach.⁹⁷Re' hin ma' k'isiin ta nuk'ax aak'uhb'aal, chu'nchel i q'iij inutijeej riij.⁹⁸Re' taqe aak'uhb'aal xuyeew nuna'ojb'al chi korik. Ruum aj re', q'e' chik wilik nuna'ojb'al chikiwach i ki-ixowanik nuwach.⁹⁹Eh q'e' chik wilik nuna'ojb'al chikiwach i kitijiniik weh ruum xa re' chik taqe aak'uhb'aal i nutijej riij.¹⁰⁰Eh q'e' wilik nuna'ojb'al chikiwach i mama' winaq. Ruum re' hin, i nunimaj i ruq'or taqe aak'uhb'aal.¹⁰¹Re' hin xnuq'eb' chi riij nuk'ux chu'nchel i yiib' wach b'eeh, reh chi naa nub'anam i ruq'or aq'oral.¹⁰²Eh ma' nukanaa' ta runimjiik taqe aak'uhb'aal ruum re' hat xatk'uhtanik weh.¹⁰³Re' aq'oral, ma' k'isiin ta suq kiil i ruq'or. Ma' xata je' ki'iil i riis kaab' chi wee hin.¹⁰⁴Re' hin re' taqe aak'uhb'aal xkojwik nuna'ojb'al, ruum aj re', q'e' inwixow wach chu'nchel i yiib' wach chi b'anarik.¹⁰⁵Eh jinaj saqum chi weh aq'oral ruum re' i re' ink'uhtanik weh chib'ih i naa nub'anam.¹⁰⁶Re' hin xnuq'or i korik chi naa nub'anam i ruq'or taqe aak'uhb'aal. Eh koruman chi naa nub'anam.¹⁰⁷QaJaaw Dios, re' hin q'e' ti' i nuk'ux. Chakuy chayeew tii nuk'achariik je' rukab' aaq'orom weh.¹⁰⁸QaJaaw Dios, chak'ul tii weh i numayiij i nuq'or aweh ruuk' nuchii'. Eh cha k'uhtaaj weh chi korik taqe aak'uhb'aal.¹⁰⁹Korik re' hin xa eliik wilkiin paruyohb'alil i kimik, xa re' la' re' hin, ma' sahchik ta panuk'ux aak'uhb'aal.¹¹⁰Re' i yiib' wach kina'ojb'al xa nkisik' chik chi riij nukanteesjiik. Eh re' hin ma' nukanaa' ta taqe aak'uhb'aal.¹¹¹Re' aak'uhb'aal xnuk'ul chi je' jinaj nukooch reh juneliik, ruum re' i re' inye'wik rusuqkiil i wánima.¹¹²Re' hin chu'nchel i wánima naa nub'anam i ruq'or taqe aak'uhb'aal, korehtaal i weliik ayu' wach ak'al.¹¹³Eh ma' imponik ta chi nuwach taqe i xak'ul inki a'n kiwach. Eh re' aak'uhb'aal q'e' nuk'ax.¹¹⁴Re' hat titoob'inik weh, re' hat ti ko'linik weh, eh ruuk' aq'oral nuch'ikaam i nuk'ux.¹¹⁵Re' taq i hat yiib' taq wach ana'ojb'al cha kanaa' taq nujot'ariik ruum re' hin inwaaj nub'anam i ruq'or taqe i ruk'uhb'aal i nuDios.¹¹⁶QaJaaw Dios chayeew nukowiil je' rukab' aaq'orom weh, reh chi konee kik'acharik. Eh ma' ta naq neenooj chi re' chi ma' re' i ch'iklik wii' nuk'ux.¹¹⁷Kinatoob'eej reh chi nee nuko'leej wiib', chi je' re' neenub'an i ruq'or taqe aak'uhb'aal.¹¹⁸Re' hat ma' imponik ta chawach inkikanaa' taqe aak'uhb'aal. Ruum re' keh ma' xta kamaj i kikapeb'aal.¹¹⁹Re' hat inasach kiwach i yiib' wach kina'ojb'al ruum xa je' taqe sohk' chawach, ruum aj re', re' hin q'e' nuk'ax taqe aak'uhb'aal.¹²⁰Re' hin xa kinb'arb'otik chik ruum nuyo'jiik chawach, ruum ma' k'isiin ta kinyo'jik ruum i q'ataj q'orik i na a'n.¹²¹Eh juneliik re' i korik, re' i rub'ehel i nub'an, maa kinakanaa' pan kiq'ab' taqe i ki-ixowanik nuwach.¹²²Kinatoob'eej tii, reh chi ma' xta neenuk'ul i hin, hin awaj kamanoom. Eh maayeew q'ab' chi neenkian ti' k'axik weh i nimaq kiwach.¹²³Re' hin xakinokik chik iil chi naa kiin ako'leem. Eh chi naa kiin awesam chupaam i ti' k'axik, je' rukab' aq'orom weh.¹²⁴Chaketelaaj nuwach i hin, hin awaj kamanoom, cha k'uhtaaj weh chi korik taqe aak'uhb'aal.¹²⁵Re' hin, hin awaj kamanoom chayeew nuna'ojb'aal, ruum re' hin inwaaj nureqem chi riij i ruq'or taqe aak'uhb'aal.¹²⁶QaJaaw Dios, ruq'ijil chik chi naa ak'uhtaam aajosq'iil, ruum ma' nkinimaj ta chik aak'uhb'aal.¹²⁷Ruum aj re', re' hin q'e' nuk'ax taqe aak'uhb'aal, ruum xiik' naah loq'il chuwach i manlik oro.¹²⁸Re' hin xnukoj rehtaal taqe aak'uhb'aal chi xa re' wo' re' i korik chikiwach taqe i xa chib'ih jariik. Ruum aj re', xnuq'eb' chi riij nuk'ux chu'nchel i ma' korik ta laj na'ojb'al.¹²⁹Re' taqe aak'uhb'aal chi wee hin xiik' naah holwochiil, ruum aj re', i nuyeew nuk'ux chunimjiik.¹³⁰Eh ruuk' i ruch'ob'ariik rub'ehel aq'oral i na a'n inasihq'eej kina'ojb'al, eh inatijej taqe i ma' xta kina'ojb'al.¹³¹Re' hin xank'ahb'ik chik i nuchii', ruum xa nwotow chik rureqariik chi riij taqe aak'uhb'aal.¹³²QaJaaw Dios, kinatoob'eej tii, chaketelaaj nuwach, je' rukab' noq inaketelaaj kiwach i kik'axwik aweh.¹³³Chak'am nub'eeh ruuk' aq'oral, maayeew q'ab' chi nee ruq'at nuwach i yiib' wach na'ojb'al.¹³⁴Kinako'leej chupaam i ti' k'axik inki a'n weh i aj ixowaal, ruum re' hin inwaaj nub'anam i ruq'or taqe aak'uhb'aal.¹³⁵Jaaw suq tii wilariik cha a'n i hin, hin awaj kamanoom. Eh cha k'uhtaaj weh chi korik taqe aak'uhb'aal.¹³⁶Re' hin ma' k'isiin oq'ik i nub'an, ruum ma' imponik ta panaq'kiwach aak'uhb'aal.¹³⁷QaJaaw Dios, re' hat korik wach ak'ux, je' wo' hoq aak'uhb'aal korik wo' hoq.¹³⁸Eh chu'nchel i ruq'or taqe aak'uhb'aal manlik wach, eh korik.¹³⁹Re' hin inchalik nuk'aah chikinaah taqe i ki-ixowanik nuwach, ruum xsahchik pankik'ux taqe aak'uhb'aal.¹⁴⁰Re' hin, i hin awaj kamanoom weht'al chi re' aq'oral saq wach ruum aj re' q'e' nuk'ax.¹⁴¹Re' hin ma' re' ta nkiwii' chi xama' xta wajaawriik, eh chi ixowaal nuwach, ma' jaruuj insahchik panuk'ux taqe aak'uhb'aal.¹⁴²Re' rukorkiil wach ak'ux wilik chi juneliik, re' aak'uhb'aal xti korik.¹⁴³Re' hin ma' k'isiin taj i ti' inuk'ul, xa nyot'ik chik i wánima i rub'an, xa re' chik taqe aak'uhb'aal inye'wik rusuqkiil nuk'ux.¹⁴⁴Re' taqe aak'uhb'aal juneliik korik i ruq'or, chayeew la' nuna'ojb'al, reh chi nee nuk'achareej i ruq'or.¹⁴⁵QaJaaw Dios, chu'nchel nuk'ux i nupahqaaj awotob'il. Kinab'iraj tii, reh chi neenub'an i ruq'or taqe ak'uhb'aal.¹⁴⁶Re' hat tinuq'o'reej kinatoob'eej tii reh chi neenub'an i ruq'or taqe aak'uhb'aal.¹⁴⁷Re' hin xakomajaa' wo' insaq'ik noq i nupahqaaj awotob'il. Ruum ch'iklik nuk'ux ruuk' aq'orom weh.¹⁴⁸Eh noq inwik'raaj wiib' panuwiriik chaq'ab' intohq'ik nutijem riij i ruq'or taqe aak'uhb'aal.¹⁴⁹QaJaaw Dios, chab'iraj i nuq'oral chaketelaaj tii nuwach. Chayeew nuk'achariik ruuk' i rukorkiil wach ak'ux.¹⁵⁰Re' taqe i ki-ixowanik nuwach xa re' i yiib' wach inki a'n Eh ma' nkaaj ta runimjiik aak'uhb'aal.¹⁵¹QaJaaw Dios re' hat ma' najt ta wilkaat quuk'. Eh chu'nchel taqe aak'uhb'aal korik.¹⁵²Re' hin xa najtir wo' intohq'ik cho nureqem chi riij i ruq'or taqe aak'uhb'aal. Eh weht'al chi re' hat xatyej-anik reh, eh reh juneliik.¹⁵³Jaaw chawil i ti' k'axik k'ahchi' wik'iik wii' kinawesaj chupaam. Ruum re' hin, ma' sahchik ta panuk'ux taqe aak'uhb'aal.¹⁵⁴Kinako'leej, kinawesaj chupaam i wilkiin wii'. Chayeew nuk'achariik, je' rukab' aaq'orom weh.¹⁵⁵Eh re' taqe yiib' wach kina'ojb'al xama' jaruuj ta wo' naa ako'leem taqe, ruum ma' inkinimaj taj i ruq'or taqe aak'uhb'aal.¹⁵⁶QaJaaw Dios re' hat q'e' hat aj keteloom wachiis, Neeta tii nayeew nuk'achariik ruuk' i rukorkiil wach ak'ux.¹⁵⁷Re' hin ma' k'isiin i kib'anik ti' k'axik weh re' taqe i ki-ixowanik nuwach. Eh xama' nukanaam ta wo' rub'aan i ruq'or taqe aak'uhb'aal.¹⁵⁸Re' hin xinq'uhtik chi kilariik i yiib' wach kina'ojb'al, ruum ma' inkinimaj ta taqe aak'uhb'aal.¹⁵⁹QaJaaw Dios, re' hat aweht'al chi q'e' i nuk'ax aak'uhb'aal. Eh nee ta tii nayeew nuk'achariik, ruum q'e' hat aj keteloom wachiis.¹⁶⁰Chu'nchel aq'oral tz'ihb'amaj pan santo laj huuj xti manlik wach, xti korik, naa ruwihiik chi juneliik.¹⁶¹Re' taqe i wilik kina'ojb'al k'ahchi' kianam ti' k'axik weh chi xama' xta numahk. Eh re' hin inuyohleej wach aq'oral.¹⁶²Re' hin nsuuqb'ik nuk'ux ruuk' aq'oral, je' rukab' noq insuuqb'ik ruk'ux jino'q i ruk'ul k'ih hoq rukooch.¹⁶³Re' hin q'e' nuk'ax aak'uhb'aal, ma' imponik ta chi nuwach taqe i chukuj q'orik.¹⁶⁴Re' hin wuquub' pech tinuloq'ej chuwach i q'iij, ruum parub'ehel ti q'atwik q'orik.¹⁶⁵Eh re' taqe i kik'axwik reh aak'uhb'aal, xa eliik suq kik'ux, eh ma' awach ta neenq'eb'wik keh pamahk.¹⁶⁶QaJaaw Dios, re' hin k'ahchi' wuy-eem chi nee kinako'leej ruum re' hin k'ahchi' kiin i ruq'or taqe aak'uhb'aal.¹⁶⁷Re' hin i nunimaj i ruq'or taqe aak'uhb'aal, eh q'e' nuk'ax chu'nchel wánima.¹⁶⁸Korik chi nunimaj taqe aak'uhb'aal, eh i nuyeew nuk'ux chub'aan i taqe inaq'or. Eh re' hat aweht'al chu'nchel i nuna'ojb'al.¹⁶⁹QaJaaw Dios nee ta tii nayeew weh i nupahqaaj aweh. Chayeew nuna'ojb'al, je' rukab' inaq'or weh ruuk' aq'oral.¹⁷⁰Eh nee ta tii nab'iraj i nutiij. Eh kinako'leej je' rukab' aaq'orom weh.¹⁷¹Re' hin juneliik naa kaat nuloq'em ruuk' nuchii', ruum xak'uhtaaj weh i rukorkiil taqe aak'uhb'aal.¹⁷²Eh naa nutz'uyem awach ye'b'al ruloq'il aak'uhb'aal ruum re' re' manlik wach, eh xti korik.¹⁷³Neeta naq kinatoob'eej ruuk' awajaawriik, ruum re' taqe aak'uhb'aal xnusik' wach chi naa nub'anam taqe i ruq'or.¹⁷⁴QaJaaw Dios, inwaaj i hin chi nee kinako'leej. Ruum re' aak'uhb'aal inye'wik rusuqkiil nuk'ux.¹⁷⁵Eh chayeew nuk'achariik, reh chi nee tinuloq'ej. Re' ta naq i rukorkiil wach ak'ux neentoob'inik weh.¹⁷⁶Re' hin ximahkunik chawach, xa je' naq hinsah cheel laj tentzun. Kinako'leej tii hin, hin awaj kamanoom, ruum ma' insahchik ta panuk'ux taqe aak'uhb'aal. Re' tiij xub'an i reey David noq xb'aan ti' k'axik reh¹Re' hin noq wilkiin panti' k'axik, re' QaJaaw Dios inuq'o'reej, eh re' reh kirutob'eej wo' hoq.²QaJaaw Dios, kinako'leej tii pan kiq'ab' taqe i chukul q'orik, taqe i ma' holohik ta kiq'orik chi wiij.

³Raaj taq i hat aj chukul q'orik ¿chib'ih taq i naa ak'axam ruuk' taqe re'?⁴Re' taq i naa ak'ulum chi riij re' chi naa taq kaat kikutum chi flecha q'as ju', naa taq kaat kik'atam ruuk' q'aaq'.

⁵Re' hin q'e' ti' wilkiin chupaam i tinamit Mesec, noq patinik i nub'an chi kixilak i aj Cedar.⁶Eh najtir inutoq'aa' wihik chi kixilak i ma' ki ajwanik ta wach i wihik pansuqkiil k'uxliis.⁷Noq nuq'or chi naa qawihiik pansuqkiil k'uxliis, re' keh peleto chik kinkichaq' weej wii'. Re' QaJaaw Dios incha'jinik aweh¹Eh noq ti' wilkiin xintz'ehtanik chinaah taqe yuuq', je' wili i xnuq'or: ¿Aha' naa ruchaliik i naa rutoob'inik weh?²Re' i naa rutoob'iniik weh, re' i QaJaaw Dios i xyej-anik reh i taxaaj i wach ak'al.

³Re' reh intoob'inik aweh reh chi ma' nee ta naq'eb' awiib'. Ruum re' reh ma' inwirik ta chacha'jaljiik.⁴Re' reh xti korik noq ma' inwirik taj ma' nchalik ta ruwiriik incha'jinik keh i aj Israel.

⁵Re' QaJaaw Dios incha'jinik aweh, re' reh inko'linik aweh, eliik wilik awuuk' cha toob'jiik.⁶Ruum aj re', re' i rutz'a'iil i q'iij ma' xta naa kaat ruchem pan q'iij, eh ma' xta naa kaat ruchem i poh chaq'ab'.

⁷Re' QaJaaw Dios inko'linik aweh chupaam chu'nchel i yohb'aal, eh re' reh inko'linik riij aak'achariik.⁸Re' QaJaaw Dios naa rucha'jiniik aweh noq naa aweliik reje, eh noq naa asutiniik chaloq. Je' re' i naa rub'anam awuuk' yu'naak, eh je' chi juneliik. Re' tiij chi riij chi naa ruwihiik suq kiil k'uxliis Jerusaleem¹Re' hin ma' k'insiin ta nsuuqb'ik nuk'ux noq kinkik'am reje parupaat i QaJaaw Dios.²Eh yu'naak i hoj wilkooj chik chi chii' i ookb'al reh i tinamit Jerusaleem.³Re' Jerusaleem xkorb'eesjik reh chi ar naakimolom kiib' pan jinaj wach k'uxliis i tinamit chulooq'jiik i QaJaaw Dios.⁴Eh ar naa kojiik jar ch'uq taqe i aj Israel chut'iosjiik i rotob'il i Dios, je' rukab' i xq'orarik keh pampeet.⁵Ar wo' pan tinamit Jerusaleem wilik i kiye'aab' inki a'n wii' i q'ataj q'orik taqe i ruk'u'liil i reey David.

⁶Chapahqaaj taq chi wih-oq pansuqkiil k'uxliis i Jerusaleem. Eh nee ta naq kielik korik i kik'axwik taq aweh.⁷Neeta naq inwihik i suq kiil k'uxliis chupaam taq aatinamiit. Eh ma' ta naq chih neen kik'ul pan kiye'aab' taqe awaj taaq'oom.⁸Ruum chi nuk'ax i nutinamiit, taqe i wamigo, naa nupahqaam reh i QaJaaw Dios chi wih-oq i suq kiil k'uxliis Jerusaleem.⁹Eh ruum chi q'e' nuk'ax i rupaat QaJaaw Dios naa nupahqaam ree reh chi naa rutoob'eem i nutinamiit. Re' rupahqaljiik reh i QaJaaw Dios chi chub'aan i ketelinik wachiis¹QaJaaw Dios wilkaat cho pan taxaaj aweh i hat inupahqaaj chi naakiin atoob'eem.²QaJaaw Dios kow inqapahqaaj aawotob'il, je' rukab' noq i rupahqaaj otob'il reh i rupatroon i winaq. Eh je' rukab' noq i rupahqaaj otob'il ixoq reh i rupatroon ixoq. Je' re' inqa a'n aweh i hat korehtaal inaketelaaj qawach.

³QaJaaw Dios chaketelaaj qawach, cha kuy chaketelaaj tii qawach, ruum ma' nqakuy ta chik i qab'ajariik inki a'n⁴Re' hoj ti' wilkooj ruum i qakaqse'ljiik inki a'n taqe i b'ehomaq. Eh ruum chi ma' qohponik ta panaq'kiwach taqe i nimaq kiwach. Re' rulooq'jiik i QaJaaw Dios xkian i aj Israel ruum i kiko'ljiik¹Eh ¿Chib'ih naq i xqak'ul i hoj, i hoj aj Israel wi ta ma' xojruko'leej i QaJaaw Dios?²¿Chib'ih naq ixqa a'n noq yohb'aal wach i kijosq'iil noq xi chalik chi qapletohjik i aj ixowaal wi ta ma' xojrutoob'eej i QaJaaw Dios?³Eh ruum i kijosq'iil jumehq'iil naq xkisach qawach, xoj kib'iq' naq chi k'achlik qawach.⁴Ruuk' naq i xkian qeh re' re' je' naa xojruqerej reje i kowlaj rooq haa'. Eh xumuq'aa' qanaah i nim ha'.⁵Je' naa xik'ik chi qanaah i kowlaj rooq ha' wi ta ma' xooj ruko'leej i QaJaaw Dios.

⁶Ruum aj re' nee ta naq inye'arik ruloq'il i QaJaaw Dios, ruum ma' xuyeew ta q'ab' chi xkisach qawach i ki-ixowanik qeh.⁷Re' hoj xojko'ljik chuwach i kantesb'al, je' rukab' noq i ruq'uch reje riib' i tz'ikin pan xirob' ruum ma' xi elik ta korik ruuk' i xkian naq qeh.

⁸Eh re' i xtoob'inik qeh re' i QaJaaw Dios ixyej-anik cho reh i taxaaj, i wach ak'al. Re' QaJaaw Dios i rucha'jeej taqe i rutinamiit¹Awach taqe i kiye'em kik'ux ruuk' i QaJaaw Dios, je' kikab' i yuuq' Sión ma' nk'uyu'jik ta paruye'aab', wilik paruye'aab' chi juneliik.²Nik' wach noq wilkeeb' i yuuq' chi junsuut i tinamit Jerusaleem, je' re' noq rusutem riij i rutinamiit i QaJaaw Dios yu'naak, eh je' chi juneliik.³Re' i yiib' wach kina'ojb'al ma' chu'nchel ta q'iij naa kiwihiik chi taaq'anik chinaah i kiye'aab' korik wach kik'ux. Ruum ma' nkitoq'aa' inche keh i yiib' wach taqe i korik wach kik'ux.

⁴QaJaaw Dios, cha a'n otob'il keh i holohik kina'ojb'al, je' wo' taqe i korik wach kik'ux.⁵Eh re' i kib'anik reh i yiib' wach na'ojb'al, chayeew taqe panti' k'axik je' rukab' inkik'ul i yiib' wach kina'ojb'al.
Eh nee ta naq inwihik i suq kiil k'uxliis kuuk' i aj Israel. Re' tiij chi riij i kisutiniik wo' chik chaloq i aj Israel¹Noq xojrusutej wo' chik cho Jerusaleem i QaJaaw Dios, xa je' xqaxohk'reej noq xqakapaaj.²Ruum i re' xooj se'lanik xqak'er qachii' chi looq'jiik ruum rusuqkiil qak'ux. Eh re' taqe i tokoom tinamit je' wili i xkiq'or. Ma' k'isa sahchb'al k'uxliis i xub'an i Dios kuuk', inki taqe.³Korik wo' hoq chi re' QaJaaw Dios ma' k'isiin i sahchb'al k'uxliis xub'an cho quuk' ruum aj re' q'e' suq qak'ux yu'naak.

⁴QaJaaw Dios chayeew wo' chik rusuqkiil qak'ux je' rukab' noq inat'aqsaj i chiq yuuq' Neguev.⁵Awach taqe oq'ik inki a'n noq inkitik, ruuk' chik suq kiil k'uxliis inkisik' i wach i kitik.⁶Atoob' taoq'ik inki a'n noq kiooj chutikariik i kijaa'. Eh noq neenq'anb'ik i wach i kitik xasuq suq chik kik'ux noq neenkik'am chaloq pampaat. Chu'nchel i chib'ih wilik qeh re' qaDios inye'wik qeh¹Wila' ma' re' QaJaaw Dios xyej-anik reh i paat xama' xta neerutiq i neenkian i aj yej-an reh. Eh wila' ma' re' i QaJaaw Dios incha'jinik reh i tinamit xama' xta rutiq i neenkian i aj cha'joom.²Eh xama' xta neerutiq reh jino'q chi neenokik q'iij chi kamanik, xa k'axik wo' noq nee rureq rukaxlanwi'k. Eh re' QaJaaw Dios ma' k'axik ta noq i ruyeew kikaxlanwi'k taqe i ruk'ax, i ruyeew kihi'liik.

³Re' taqe i qak'uun qixq'uun ki-aasjik xa qakooch noq i ruyeew cho qeh i QaJaaw Dios, eh xiik' naah kiloq'il chi qeh.⁴Re' taqe i qak'uun qixq'uun ki-aasjik noq ko hoj ak'un, je' naa jinaj flecha chi qeh. Je' rukab' i ruko'leej wii' riib' i winaq kow riib'.⁵Atoob' reh awach i wilik k'ih-oq rak'uun rixq'uun, ruum ma' naa ta ruk'ixiik chikiwach taqe i ki-ixowanik wach, noq naa ruq'orob'jiik panookb'al. Atoob' keh awach inkihyohleej wach i QaJaaw Dios¹Atoob' reh awach i ruyohleej wach i QaJaaw Dios, eh i ruk'am naah taqe ruk'uhb'aal.²Atoob' aweh i hat ruum naa a'nam rusuqkiil i tz'aaq aakamaj, eh suq naa awihiik.³Eh re' awehk'een je' rukab' noq kiwachinik i uuva wilkeeb' chi junsuut aapaat. Eh re' taqe awak'uun awixq'uun chi junsuut aamexa, je' kikab' i ruche'el olivo.⁴Re' QaJaaw Dios je' re' rukuxeesjiik naa rub'anam i winaq inyohlinik reh.

⁵Eh nee ta naq ti rukuxisaj chee QaJaaw Dios ko ar Sión. Neeta naq inawilow chi suq chik wilkeeb'aj Jerusaleem, nik' chik najtiil aak'achariik⁶Konee ta naq inkilow aawiih aamaam,
chi pansuqkiil k'uxliis chik wilkeeb' i aj Israel. Re' QaJaaw Dios ineesanik keh panti' k'axik i aj Israel¹Re' taq i hat wuch aj Israel yohb'aal wach i ti' k'axik taq ak'ulum, xa re' wo' rutohq'iik chee qatinamiit cha q'or taq chi je' wili:²Re' hoj yohb'aal wach i ti' k'axik qak'ulum, xa re' wo' rutohq'iik chee qatinamiit. Xa re' la', xakomajaa' ta wo' chih qoh kuchej.³Eh yohb'aal wach ti'kiil inki a'n qeh, k'ahchi'kooj kiye'em chi tz'uhuum, xa rukanaa' chik rehtalil chi qajurub'.⁴Eh re' QaJaaw Dios korik wach ruk'ux, re' reh xko'linik qeh pan kiq'ab' i yiib' wach kina'ojb'al.⁵Neeta naq inkimol chi elik ruum kik'ixiik taqe i ki-ixowanik wach i tinamit Sión.⁶Eh nee ta naq kikahnik chi xa je' kikab' i ch'ahn impoq' naah paat inchiqik noq komajaa' inchuqarik.⁷Eh chi xa je' kikab' i ch'ahn xama' xta inkamanik wii' reh isik'il trigo, eh ni xata kamanik reh imb'ak'wik paam chi chuhtaal.⁸Eh awach i ki-ik'ik ma' kiq'or ta chi je' wili: Re' QaJaaw Dios inkuxisanik keh, ma' inko'q ta taqe. Eh ni xata neenpahqaljik i rotob'il i Dios chikinaah. Re' taqe aj Israel xq'orarik keh chi naakuy-eem i rotob'il i Dios¹QaJaaw Dios, noq inyot'ik i nuk'ux, aweh i hat i nupahqaaj nutoob'jiik.²Jaaw nee ta tii kinab'iraj. Neeta nayeew weh i nupahqaaj aweh ruuk' ruti'kiil nuk'ux.

³QaJaaw Dios, nee ta qohayeew chutojariik i qamahk ma' awach ta naq neenkuywik reh aajosq'iil.⁴Inakuy inasach la' chu'nchel i qamahk, re' nawaaj i hat chi naa kaat qaloq'em.

⁵Re' hin chu'nchel nuk'ux inwuy-eej chi naa kiin rutob'eem i QaJaaw Dios, ruum ruuk' i reh ch'iklik nuk'ux.⁶Re' hin kinokik chi ruyub'jiik i rotob'il i QaJaaw Dios. Je' rukab' noq inkuy-eej i saq'ik i aj cha'jen tinamit.

⁷Re' taq i hat aj Israel chawuy-eej taq i rotob'il i QaJaaw Dios, ruum re' reh aj keteloom wachiis. Eh re' reh neenko'linik taq aweh.⁸Re' QaJaaw Dios naa ruko'liniik keh i aj Israel ruuk' chu'nchel i kimahk. Re' i tiij chi riij i ye'ej k'uxliis ruuk' i Dios¹QaJaaw Dios, re' hin ma' nunimb'isaj ta nuwach. Eh ma' nunimb'isaj ta nuwach ruuk' i ruk'axariik i xa chib'ih jariik. Ma' nusik' taj i nimaq wach na'ojb'al k'axik chi reqarik chi riij.²Xa ma' kinchoqik ta la', xa je' nukab' jino'q i ha'lak'un, kore' xye'arik ruch'uuch' ruum i rutuut. Korik noq re' hin je' nukab' jino'q i ha'lak'un konuujinaq ruum i ruch'uuch'.

³Eh re' taq i hat wuch aj Israel chawuy-eej taq i rotob'il i QaJaaw Dios, je' yu'naak, eh je' chi juneliik. Re' i xq'orarik cho reh i reey David ruum i Dios¹QaJaaw Dios, chatoob'eej tii i reey David ruuk' chu'nchel i ti' k'axik k'ahchi' ruk'ulum.²K'oloq panak'ux i xti korik xuq'or chaaweh i hat QaJaaw Dios, ruDios i Jacob.³Re' reh je' wili i ruq'orom chaloq: Re' hin ma' nee ta kinookik panupaat, eh ma' nee ta i nuyok'aa' wiib' chi hi'lik.⁴Eh ma' jaruuj neekinokik chi wirik, ma' nee ta numutz' k'isinoq i naq'nuwach.⁵Korehtaal inqareq i rupaat i loq'laj kaxa molik wii' aak'uhb'aal. Re' naa ahi'liik wii' i hat QaJaaw Dios, ruDios Jacob, inki.

⁶Eh noq wilkooj cho Efrata xqib'iraj cho rib'iral i loq'laj kaxa re' re'. Eh ko ar xqareq chupaam i ye'aab' Jaar rub'ihnaal.⁷Je' re' noq, taq taq chupaam i paat wilik wii' i QaJaaw Dios. Qaxuk'aa' cho qiib' ri'si rooq ri'si q'ab'.

⁸QaJaaw Dios, kim yu'naak, hat-oq junokiik chi wihik chupaam aaye'aab' ruuk' i loq'laj kaxa, re' wilik wii' awajaawriik.⁹Eh korik ta naq wach kik'ux taqe i k'amal kib'eeh aj tiij. Eh nee ta naq inwihik rusuqkiil kik'ux i wilik kisantohiil.¹⁰Je' re' i cha a'n ketelb'al wach i reey David asik'im cho wach, re' awaj kamanoom, mat tib'isaj ruk'ux.

¹¹Re' QaJaaw Dios xuq'or i xti korik reh i reey David, eh ma' xik'ik ta wach, je' wili i ruq'orom cho reh: Re' hin re' taqe awak'uun awixq'uun naa nukojom chi reyil chajilob'aal.¹²Eh wila' xkinimaj i nuk'uhb'aal awak'uun awixq'uun, eh wila' xkik'am naah i naa nuk'uhb'aleem taqe wii'. Re' keh naa wo' nukojom taqe chi reyil chi juneliik, inki.

¹³Ruum re' i QaJaaw Dios rusik'im wach i ye'aab' Sión, chi ar naa ruwihiik.¹⁴Eh je' wili i ruq'orom: Chupaam i ye'aab' wili naa nuwihiik chi juneliik, ruum je' re' i xponik chi nuwach.¹⁵Naa nukuxisam chi manlik i ye'aab' wili naa nuye'em k'uxumb'al keh i ma' xta wilik keh.¹⁶Eh re' hin naa nuko'liniik keh i k'amal kib'eeh aj tiij. Re' taqe i wilik kisantohiil naakik'erem kichii' ruum i rusuqkiil kik'ux.¹⁷Eh chi kixilak i rak'uun rixq'uun i reey David, naa reliik chaloq i naa ruwihiik rajaawriik chi reyil, nusik'im cho wach, re' reh i saqum.¹⁸Re' taqe i naa rixowanik wach naa ruk'uhtaam kik'ixb'ilaal. Eh re' reh naa ruwihiik rajaawriik chi juneliik, inki. Re' ruye'ariik ruloq'il i k'axooj, eh wihik pansuqkiil k'uxliis¹Chakoj taq rehtaal chi ma' k'isiin ta holwochiil. Eh ma' k'isiin ta loq'il noq re' taqe hermano wilkeeb' pan komonil, pan jinaj wach k'uxliis.²Eh je' k'ohonkiil aséite chihkamaj cho wach naah i Aarón rajaaw aj tiij, xik'ik rut'aqsaj i rusinchii', eh xoj qohoq ko chi rooq i ruso'.³Je' rukab' noq inqajik chee mus jab' chinaah i yuuq' Hermón, chikinaah taqe yuuq' ar Sión. Eh ar xukuxisaj taqe i rutinamiit i QaJaaw Dios, eh xuyeew keh i juneliik k'acharik. Re' kik'uhb'aljiik i kikamanik chupaam i rupaat i Dios¹Chab'iraj taq chawunchelaal i hat i tikamanik taq pantaq chaq'ab' chupaam i rupaat i QaJaaw Dios. Chayeew taq ruloq'il i QaJaaw Dios.²Eh chajosaj taq aq'ab' chulooq'jiik i QaJaaw Dios, noq wilkaat taq parusantolaj ye'aab'.

³Re' ta naq i QaJaaw Dios i xyej-anik reh i taxaaj, i wach ak'al neenkuxisanik taq weh chupaam i ye'aab' Sión. Re' k'achlik Dios wilik rajaawriik, re' taqe i tiyoox ma' xta kajaawriik¹Qaloq'ej taq i rub'ihnaal i QaJaaw Dios. Chaloq'ej taq i hat i tib'anik taq reh i rukamaj.²Chayeew taq ruloq'il i QaJaaw Dios i hat i wilkaat taq chupaam i rupaat. Je' wo' taq i hat i wilkaat taq chi chii' i rupaat i QaJaaw Dios.³Chaloq'ej taq i QaJaaw Dios ruum re' reh q'e' atoob'. Eh cha a'n taq atz'uuy ye'b'al ruloq'il, ruum re' reh q'e' chaq'laam.⁴Re' QaJaaw Dios xusik' cho wach i Jacob, eh xusik' cho wach i Israel reh chi xukanaa' chi rutinamiit.

⁵Re' hin weht'al chi korik chi xa re' wo' QaJaaw Dios k'achlik wilik rajaawriik chikiwach taqe i tiyoox.⁶Re' QaJaaw Dios chib'ih i rub'an pan taxaaj, i rub'an wo' wach ak'al, i rub'an wo' chinaah palaw, i rub'an wo' pantaq i julkahq.⁷Eh i rutaq'aaj chaloq i suutz' chinaah chu'nchel i wach ak'al, i ruyeew chaloq i kahoq noq i rub'an i jab', eh i rutaq'aaj chaloq i teew wach ak'al.

⁸Re' QaJaaw Dios xkansanik keh chu'nchel i peet kak'uun taqe i aj Egipto, je' wo' chu'nchel i peet rak'uun i kichikoop.⁹Eh ma' k'isiin taqe i ma' ilooj taj xub'an ar Egipto reh chi xchalik ruyo'jiik i reey, je' wo' taqe i kikamanik ruuk'.¹⁰Ma' k'isiin taqe i nimaq tinamit xusach kiwach. Eh xusach wo' kiwach taqe i reey q'e' kow kiib'.¹¹Xukansaj i Sehón, kireey i aj amorreo, je' wo' hoq i Og, kireey i aj Basán, je' wo' chu'nchel i kireey i aj Canaán.¹²Re' i kiye'aab' naq taqe i reey re' re', xuyeew i QaJaaw Dios chi kikooch i rutinamiit Israel.

¹³QaJaaw Dios re' hat k'achalkaat chi juneliik. Ruum aj re', juneliik naa ak'uliik pankik'ux i tinamit, xajarch'iht pa' naakik'iik.¹⁴Re' QaJaaw Dios parub'ehel naa ruq'atam i q'orik chikinaah i rutinamiit, eh naa ruketelaam kiwach i raj kamanoom.

¹⁵Re' taqe i tinamit, xa oro, xa plata ruyej-aal i ki dios, xa kiyej-aniik winaq taqe.¹⁶Wilik kichii', xama' kiq'orik ta wo' hoq, wilik wo' naq naq' kiwach, xama' ki-ilwik ta wo' hoq.¹⁷Wilik kixikin, xama' ki-ib'irinik ta wo' hoq. Eh xama' k'achalkeeb' ta wo' hoq.¹⁸Eh eliik wach kimemil ruuk' taqe i tiyoox re' re' awach inyej-anik keh, je' wo' taqe inimanik keh.

¹⁹Hat taq aj Israel chayeew taq ruloq'il i QaJaaw Dios, hat riih rumaam i Aarón chayeew taq ruloq'il i QaJaaw.²⁰Hat riih rumaam i Leví chayeew taq ruloq'il i QaJaaw Dios. Eh re' taq i hat i tiyohlinik reh i QaJaaw Dios chayeew taq ruloq'il.²¹Eh loq'imaj ta naq i QaJaaw Dios ar Sión, ruum re' reh ar wilik Jerusaleem.
Loq'imaj ta naq i QaJaaw Dios. Re' rulooq'jiik i QaJaaw Dios ruum juneliik wilik i ketelinik wachiis ruuk'¹Chaloq'ej taq i QaJaaw Dios, ruum re' reh q'e' atoob', ruum juneliik wilik ketelinik wachiis ruuk.²Chaloq'ej taq i QaJaaw Dios, ruum nim rajaawriik chikiwach taqe i tiyoox, ruum juneliik wilik ketelinik wachiis ruuk'.³Chaloq'ej taq i QaJaaw Dios, re' i ajaab'ees chikinaah taqe ajaab'ees, ruum juneliik wilik ketelinik wachiis ruuk'.

⁴Xa re' wo' reh, i QaJaaw i rub'an taqe i ma' ilooj taj, ruum juneliik wilik ketelinik wachiis ruuk'.⁵Re' reh i xyej-anik reh i taxaaj ruuk' i runa'ojb'al, ruum juneliik wilik ketelinik wachiis ruuk'.⁶Re' reh xyej-anik reh i wach ak'al chinaah i ha', ruum juneliik wilik ketelinik wachiis ruuk'.⁷Re' reh xyej-anik reh i q'iij je' wo' i poh, ruum juneliik wilik ketelinik wachiis ruuk'.⁸Re' q'iij xuyejaa' reh chi naa rusihq'iniik pan q'iij, ruum juneliik wilik ketelinik wachiis ruuk'.⁹Re' poh, re' taqe i ch'umiil xuyejaa' reh chi naa kisihq'iniik chaq'ab', ruum juneliik wilik ketelinik wachiis ruuk'.

¹⁰Re' reh xkansanik keh chu'nchel i peet kak'uun i aj Egipto, ruum juneliik wilik ketelinik wachiis ruuk'.¹¹Re' reh x-eesanik cho Egipto i rutinamiit Israel, ruum juneliik wilik i ketelinik wachiis ruuk'.¹²Eh ruuk' i runimaal i rajaawriik xresaj taqe chaloq, ruum juneliik wilik ketelinik wachiis ruuk'.¹³Re' reh xch'aqwik panyejaal i kaq palaw, ruum juneliik wilik ketelinik wachiis ruuk.¹⁴Re' reh x-ik'sanik cho keh i aj Israel chi yejaal i palaw, ruum juneliik wilik ketelinik wachiis ruuk'.¹⁵Re' reh xkutwik chupaam i kaq palaw i kireey, i ki soldado aj Egipto, ruum juneliik wilik ketelinik wachiis ruuk'.¹⁶Re' reh xb'esanik cho reh i rutinamiit chupaam i ye'aab' chiq yuuq', ruum juneliik wilik ketelinik wachiis ruuk'.

¹⁷Re' reh xkansanik keh i reey q'e' nimaq kiwach, ruum juneliik wilik ketelinik wachiis ruuk'.¹⁸Re' reh xkansanik keh i reey q'e' naq kow kiib', ruum juneliik wilik ketelinik wachiis ruuk'.¹⁹Re' reh xkansanik reh i Sehón, i kireey i aj amorreo, ruum juneliik wilik i ketelinik wachiis ruuk'.²⁰Re' reh xkansanik reh i Og, kireey i aj Basán, ruum juneliik wilik ketelinik wachiis ruuk'.²¹Re' reh xch'aqwik reh i kiye'aab' naq i reey re' re', ruum juneliik wilik ketelinik wachiis ruuk'.²²Eh re' reh xye'wik i ye'aab' re' re' keh i aj Israel re' taqe i raj kamanoom, ruum juneliik wilik i ketelinik wachiis ruuk'.

²³Re' reh intoob'inik qeh noq wilkooj panti' k'axik, ruum juneliik wilik ketelinik wachiis ruuk'.²⁴Re' reh inko'linik qeh pan kiq'ab' i ki-ixowanik qawach, ruum juneliik wilik i ketelinik wachiis ruuk'.²⁵Re' reh ink'uxlanik keh i tinamit, je' wo' taqe i chikop, ruum juneliik wilik i ketelinik wachiis ruuk'.

²⁶Chayeew taq ruloq'il i QaJaaw Dios wilik cho pan taxaaj, ruum juneliik wilik ketelinik wachiis ruuk. Re' ruti'kiil kik'ux i aj Israel noq xi wihik Babilonia¹Noq inqatzunaa' qiib' chi chii' taqe nim haa' ar Babilonia, inchalik qoq'iim noq ink'ulik cho panqak'ux i tinamit, Sión.²Eh chinaah taqe i q'ab' i chee' wilkeeb' ar inqat'uyaa' taqe qarpa.³Re' taqe i xi k'amwik reje qeh pan tokoom tinamit, i xiq'uchwik chib'ih qeh, je' wili i xkiq'or qeh: Chatz'uyej taq qeh i tz'uuy chi suq taq ak'ux je' rukab' taq i natz'uyej Sión, inki taqe.

⁴Eh ¿Nik' wach noq neenqatz'uyej i tz'uuy loq'oomb'al reeh QaJaaw Dios pan tokoom tinamit?⁵Eh wila' xat sahchik panuk'ux i hat Jerusaleem, i ruk'ul chi neenchiqik i rusak'aaj nuq'ab'.⁶Eh i ruk'ul chi nee ruchop i panujah-aay i waaq' wila' ma' nuyeew chik awajaawriik, wila' ma' tik'ulik chik panuk'ux, eh chi re' hat ti ye'wik rusuqkiil nuk'ux i hat Jerusaleem.

⁷QaJaaw Dios maakanaa' chi je' re' i xkian qeh i aj Edom, noq xb'aan reh i Jerusaleem je' wili xkiq'or: Chasach taq wach, chasach taq wach chi jumpech, inki taqe.

⁸Re' taq hat aj Babilonia naa taq rusahchiik awach. Atoob' reh awach naa ruq'ajwiik wach taq aweh i ti' k'axik xa a'n taq qeh.⁹Atoob' reh awach i naa ruchopom taq aakok' ha'lak'uun, eh naa ruq'ojib'eem wa taq ab'aj. Re' tiij loq'oomb'al reh i QaJaaw Dios ruum i rotob'il¹QaJaaw Dios re' hin naa kaat nuloq'em chu'nchel i wánima. Eh xa re' wo' hat naa nutz'uyem awach, chikiwach i tiyoox.²Re' hin naa nuxuk'aam wiib' chupaam i aapaat, reh alooq'jiik ruum hat aj keteloom wachiis, eh korik wach ak'ux. Eh ruum chi xa re' wo' ab'ihnaal, xa re' wo' aq'oral nim rajaawriik chikinaah i xa chib'ih wilkeeb'.³Eh noq xnupahqaaj aawotob'il xinatob'eej wo' hoq, eh xayeew wo' ruman i rukowiil nuk'ux.

⁴Chu'nchel i reey wilkeeb' sut i wach ak'al naa kaat kiloq'em na'kib'iraj rib'iral i na a'nam, re' aq'orom cho ruuk' aachii'.⁵QaJaaw Dios re' hat chu'nchel naakitz'uyiniik awach, ruum taqe i xa a'n. Eh ruum chi q'e' nim aaloq'il.⁶Re' hat q'e' inaketelaaj kiwach i xama' nimaq ta kiwach. Eh ma' suq ta kilariik i na a'n i inkinimb'isaj kiwach.

⁷Noq wilkiin panyohb'aal re' hat ti ko'linik riij i nuk'achariik. Eh i nayeew weh awajaawriik, kinako'leej chuwach i kijosq'iil taqe i ki-ixowanik nuwach.⁸QaJaaw Dios, korehtaal inamanaa' wach awotob'il wuuk', ruum juneliik wilik ketelinik wachiis awuuk'. Je' re' noq, chamanaa' wach aakamaj atoq'aam cho wuuk'. Re' QaJaaw Dios reht'al chu'nchel chib'ih imb'aan¹QaJaaw Dios, re' hat inawilow, eh aweht'al nik' wach noq wilkiin.²Eh aweht'al noq kinwuktik. Je' wo' noq kintzuhnik, ko chi najt i nanaab'eej aha' wilik taqe i nukapaaj.³Re' hat aweht'al chib'ih taqe nub'an noq kinhi'lik. Eh aweht'al chib'ih jariik taqe i nub'an panuk'achariik.⁴QaJaaw Dios, atoob' ta komajaa' i nelik i q'orik ju' waaq' re' hat aweht'al chik chib'ih i naa nuq'orom.⁵Re' hat i peet chi nuwach, re' hat i xam chi wiij, eh i nayeew aaq'ab' chi nunaah.⁶Re' ana'ojb'al xiik' naah loq'il chi wee hin, xiik' naah nimaal wach, ma' nureq ta chi riij nik' wach noq i na a'n.

⁷¿Mi neerub'an re' chi nee nukeb'aa' wiib' chuwach aawuxlaab'al? ¿Mi neerub'an re' chi nenooj nukeb'aa' wiib' chawach?⁸Neeta kinjohtik pan taxaaj nee wo' kinawilow ar. Eh nee ta kinooj ko paruchamiil ak'al kiye'aab' i kamnaq, nee wo' kinawilow ar.⁹Eh nee ta nuq'or reh i teew chi nee kiruk'am reje chi patinik ko chi juntar i palaw wilik parelb'aal q'iij.¹⁰Xa nee wo' kinawilow ar ruuk' awajaawriik. Eh xama' nee ta wo' kinakanaa'.¹¹Eh nee ta nooj nukeb'aa' wiib' panq'equm, nee ta nsutinik chi q'equm aq'ab' i saqum wilik chi nujunsuut.¹²Re' q'equm xama' nee ta wo' kirukeb'aa' chawach. Ruum chawee hat xa eliik wach chaq'ab' ruuk' pan i q'iij. Xa eliik wach q'equm ruuk' saqum cha weh i hat.

¹³Re' wo' hat xatyej-anik cho reh chu'nchel i nuti'jolal. Eh re' wo' hat xatz'uhkrisanik cho weh ruuk' i nutuut.¹⁴Re' hin tinuloq'ej ruum insahchik nuk'ux i rub'an taqe akamaj a'nam. Eh xiik' naah loq'il chu'nchel i a'nam, xti nunimaj chi je' re'.¹⁵Re' hat xawilow noq xkorjik chu'nchel i nuti'jolal. Ma' re' ta nkiwii' chi ma' eht'alimaj xintz'uhkrik chaloq ruuk' i nutuut.¹⁶Re' hat xawilow noq xkorjik i nuti'jolal, chu'nchel i re' xanoq wo' atz'ihb'aam chaloq. Xa noq wo' awajlaam cho riij i nuq'ijil noq komajaa' kin-aasjik.¹⁷QaJaaw Dios, yohb'aal inche wach nimaal wach taqe akapeew chi wee hin. Xiik' naah loq'il chu'nchel noq inooj taqe ruk'ul riib'.¹⁸Eh nee ta naq inwajlaaj ma' nee ta naq i nukuy rajaljiik ruum ma' xata je' k'ihaal i saniib', eh noq inwik'raaj wiib' xa wilkaat wo' wuuk'.

¹⁹QaJaaw Dios nee ta naq inasach kiwach i yiib' wach kina'ojb'al, chawesaj taqe chi nuwach i aj kansan kas kichaaq.²⁰Re' taqe i ma' holohik ta kiq'orik chawiij, eh inkiq'or ab'ihnaal chi xama' xta rub'ehel.²¹QaJaaw Dios, re' hin inwixowaaj kiwach i ki-ixowanik awach i hat. Ma' nwaaj ta kiwach taqe inkiq'ehtaaj kiib' chawach.²²Ma' imponik ta chi nuwach inki a'n ma' k'isiin ta inwixowaaj kiwach.²³QaJaaw Dios, chawilow chib'ih taqe jariik i wilik cho pan wánima, kinapaj reh chi nee nanaab'eej i nukapeb'aal.²⁴Eh kinawilow, wila' re' i yiib' wach b'eeh inuk'am, kinak'am tii chupaam i b'eeh ma' naa ta rusahchiik wach. Re' reey David xupahqaaj parutiij chi naa ruko'ljiik ruum i Dios¹QaJaaw Dios, kinako'leej pan q'ab' i yiib' wach runa'ojb'al. Kinako'leej pan kiq'ab' i yohb'aal wach kijosq'iil.²Re' taqe i xa re' wo' yiib' wach na'ojb'al wilik pankanima, xa re' wo' peleto inki a'n chu'nchel q'iij.³Re' ju' kaaq' ma' ahl ta chi q'orik, je' rukab' i raaq' i aaq'. Re' kiq'oral xanoq wo' inkansanik je' rukab' i rub'an i rukiih i aaq'.

⁴QaJaaw Dios kinako'leej pan kiq'ab' i yiib' wach kina'ojb'al, je' wo' pan kiq'ab' i yohb'aal wach kijosq'iil. Re' ikiyejaam wach i nukanteesjiik.⁵Eh nimaq kiwach inki a'n kiib', inkikoj i xirob' panub'eeh, xa nkisik' chik chi riij nik' wach noq naa kianam weh. Eh inkiq'at panub'eeh reh chi naa nuq'ehb'iik.

⁶Re' hin je' wili i nuq'orom cho reh i QaJaaw: Re' hat, i hat nuDios, chayeew ti weh i nupahqaaj aweh, chu'nchel nuk'ux.⁷QaJaaw Dios, nim awajaawriik hat aj ko'len weh, eh xinako'leej pan kiq'ab' i aj q'aq'ineel reh chi ma' xta xinkuchej, kinki reh.

⁸QaJaaw Dios, maayeew q'ab' reh i yiib' wach runa'ojb'al chi neenelik korik ruuk' taqe iraaj rub'anam, ruuk' taqe i rukapaaj. Reh chi ma' nee ta runimb'isaj riib'.⁹Re' taqe i re' k'ul kiokik chaloq chub'anariik weh. Re' taqe i yiib' wach q'orik i nelik cho pan kichii' naa ruk'amwiik chee ti' k'axik chikinaah.¹⁰Re' taqe re' naq'wach q'aaq' qoplik ruq'aq'al naa ruye'ariik chikinaah. Eh naakikutariik chupaam i jul ma' jaruuj chik naakeliik cho ar.¹¹Re' ma' holohik ta nq'orik xama' najt ta naa ruk'achariik ayu' wach ak'al. Re' i yohb'aal wach josq'iil re' ti' k'axik naa rusachwiik wach reh.

¹²Re' hin weht'al chi re' QaJaaw Dios naa ruketeliniik wach i ti' ruk'ux. Eh re' reh naa rutoob'iniik reh i ma' xta wilik reh.¹³QaJaaw Dios re' taqe i korik wach kik'ux naa kiloq'inik reh aab'ihnaal. Re' taqe i holohik kina'ojb'al naa kik'achariik chawach. Re' reey David xupahqaaj parutiij i rotob'il i Dios¹QaJaaw Dios, re' hin nupahqaaj aawotob'il kinab'iraj tii chi jumehq'iil. Chayeew weh i nupahqaaj aweh.²Eh nee ta naq imponik awuuk' i nutiij chi je' k'ohonkiil insensia. Noq i nujosaj i nuq'ab' chawach je' ta naq rukab' i mayiij inkiyeew chawach pantaq xq'eq.

³QaJaaw Dios kinaq'il ruuk' i nuq'oral. Kinaq'il reh chi ma' nee ta nelik reje i yiib' wach q'orik panuchii'.⁴Eh maayeew q'ab' chi nee ruq'or nuk'ux taqe i yiib' wach na'ojb'al. Reh chi ma' nee ta nub'an weh inki a'n i ma' holohik ta kib'anik. Eh ma' nee ta kinokik haa' chub'aan i kininq'iij taqe re'.

⁵Eh wila' kow xiruq'il i korik wach ruk'ux, otob'il neerub'an weh, je' ink'ohnik laj iq'oom ineerujalk'iij wach nunaah. Eh kow neenub'an nutiij, reh chi ma' nee ta inkahnik chi je' re' inki a'n weh i yiib' wach kina'ojb'al.⁶Re' i k'amal kib'eeh i yiib' wach kina'ojb'al naa kikutarik chaloq naa paat ab'aj. Eh ar naa kikojom rehtaal chi re' i nuq'or i korik.⁷Eh re' i kib'aqil xa aha' naa rukahniik tzuub' chi chii' i rujuleel kamnaq. Je' rukab' noq inkahnik tzuub' aak'al noq ink'otarik reje paam.

⁸QaJaaw Dios, re' hin awuuk' i nuyeew inaq'nuwach. Eh awuuk' hat inusik' ko'lemb'al wiib', ruum weht'al chi ma' nee ta kinakanaa' chi wutkeel.⁹Jaaw kinako'leej tii chuwach i kixirob'. Re' keh inkikoj i xirob' panub'eeh, reh chi naa kianam weh.¹⁰Eh re' ta naq i yiib' wach kina'ojb'al neekiq'ehb'ik chupaam i kixirob', eh re' hin, nee kinooj chi nuwach. Re' tiij xub'an i reey David noq wilik panti' k'axik¹Re' hin kow i nupahqaaj i rotob'il i QaJaaw Dios. Eh kow i nupahqaaj reh chi naa ruketelaam nuwach.²Eh xa reh wo' reh i nuq'or taqe i ti' k'axik inchalik chi nunaah. Reh wo' reh i nuq'or taqe i ruti'kiil nuk'ux.

³Eh noq xiik' naah ti'kiil i wánima, re' hat Jaaw aweht'al inuk'achariik. Eh xa aha' ta chik ma' nkikoj i xirob' panub'eeh reh chi naa kianam weh.⁴Eh noq kintz'ehtanik reje panusak'aaj ma' awach taj ink'u'loq chi nutoob'jiik. Ma' awach ta wo' ink'ulik ko'linoq weh.

⁵QaJaaw Dios, re' hin i nupahqaaj aawotob'il, je' wili i nuq'or: Re' hat ti ko'linik weh, xa re' wo' hat wilkaat chinaah i nuk'achariik ayu', kinki.

⁶Jaaw, chayeew tii weh i nupahqaaj aweh, ruum q'e' ti' nuk'ux. Kinako'leej pan kiq'ab' i ki-ixowanik nuwach, ruum re' keh q'e' taqe kow kiib' chi nuwach i hin.⁷Re' hin je' naa pantz'ilom wilkiin. Kinako'leej tii reh chi nee tinuloq'ej, eh re' taqe i korik wach kik'ux naa rusuuqb'iik kik'ux wuuk' noq naakib'iram chi xinako'leej. Re' tiij xub'an i reey David pahqb'al ko'lemb'al riib'¹QaJaaw Dios, chab'iraj tii i nutiij, chayeew weh i nupahqaaj aweh. Ruum re' hat q'e' hat atoob', eh korik wach ak'ux.²Ma' q'at i q'orik chi nunaah i hin, hin awaj kamanoom, ruum chawach i hat ma' awach ta i nee ruq'or chi ma' xta ru mahk.

³Re' taqe i ki-ixowanik nuwach inki a'n ti' k'axik weh, xinkiyeq' panak'al. Eh je' panq'equm wilkiin kuum, je' nukab' taqe i kamnaq.⁴Re' hin ma' suq ta k'isinoq i nub'an kuum, xantolik i wánima ruum i ruti'kiil nuk'ux.

⁵Re' hin ink'ulik panuk'ux i q'iij ik'inaq taqe chaloq i nukapaaj riij taqe i a'nam chaloq. Je' wo' chu'nchel ayejaam taqe cho ruuk' aq'ab'.⁶Re' hin awuuk' hat i nujosaj i nuq'ab' ruum re' wánima chiqiij chii' reh asik'ariik, je' rukab' i chiq ak'al xaraaj chik ruhaa'.

⁷QaJaaw Dios, chayeew tii weh chi jumehq'iil i nupahqaaj aweh, ruum re' hin xama' kow ta chik nuk'ux inwik'raaj. Eh wila' ma' xinatob'eej nee kinkahnik chi je' kikab' i kamnaq.⁸QaJaaw Dios, rajlaal ta naq wahq'eq neenuk'ul aawotob'il, ruum awuuk' i hat nuye'em nuk'ux. Eh cha k'uhtaaj weh i naa nub'anam, ruum awuuk' hat i nupahqaaj nuna'ojb'al.⁹Jaaw, kinako'leej tii pan kiq'ab' i ki-ixowanik nuwach, ruum awuuk' i hat inusik' ko'lemb'al wiib'.¹⁰Eh cha k'uhtaaj weh rub'anariik inawaaj, ruum re' hat i nuDios. Re' ta naq aawuxlaab'al q'e' atoob' neenk'amwik weh chupaam i korik laj b'eeh.

¹¹QaJaaw Dios, chako'leej riij i nuk'achariik reh chi nee nuloq'ej aab'ihnaal. Ruum chi korik wach ak'ux naa kiin awesam chupaam i ti' k'axik.¹²Eh ruum chi naaketelaaj nuwach chasach kiwach i ki-ixowanik nuwach. Chasach kiwach chu'nchel i kiye'wik ruti'kiil nuk'ux ruum re' hin, hin awaj kamanoom. Re' reey David xupahqaaj parutiij ree Dios chi naa ruko'ljiik¹Neeta naq inye'arik ruloq'il i QaJaaw Dios re' i paat ab'aj ko'lemb'al iib' chi weh. Re' reh intijinik weh chi q'aq'inik.²Re' reh inketelinik nuwach, waj ko'loom, ye'el rukowiil nuk'ux, esan weh panti' k'axik. Eh pulato ch'ihch' ko'lemb'al iib' chi weh, ruuk' i reh i nuyeew nuk'ux, i ruq'asaj chi ri'sil i wajaawriik i nutinamiit.

³QaJaaw Dios, ¿Chib'ih rub'anam i winaq chi tiqaaj kapeew chi riij? Eh ¿Chib'ih rub'anam i xa rak'uun winaq chi ti' nawik'raaj?⁴Ruum re' ruk'achariik, xa je' nik'ik jun huup chi teew. Eh xa je' nik'ik jino'q muuj.

⁵QaJaaw Dios, chaqasaj chaloq awajaawriik kopan taxaaj k'oloq atz'aa'j taqe yuuq' reh chi nee nelik kisib'eel.⁶Chayeew chaloq taqe kahoq chikinaah i ki-ixowanik nuwach, ruuk' flecha chakut taqe, reh chi neenkitukej kiib'.⁷Eh chayeew chaloq aq'ab' chi nunaah kopan taxaaj, kinako'leej. Eh kinawesaj chupaam i je' chaamlaj ha' wilkiin wii'. Kinako'leej pan kiq'ab' i tokoom tinamit.⁸Ruum re' keh xama' xta rub'ehel i kiq'oral, xa re' i chukuj q'orik inkaaj.

⁹QaJaaw Dios, re' hin jinaj i ak'laj tz'uuy naa nutz'uyem ye'b'al aloq'il. Eh naa nutz'uyem taqe i tz'uuy ruuk' taqe nu k'ahaam wach q'ooj.¹⁰Re' i hat ti esanik keh korik i reey. Re' hat titoob'inik weh i hin David, hin awaj kamanoom, chi ma' kinkikansaj ta ruuk' q'aslaj ch'ihch'.¹¹Eh kinawesaj, kinako'leej tii pan kiq'ab' taqe i tokoom tinamit. Re' taqe i xama' xta rub'ehel kiq'orik, xa re' chukuj q'orik inkaaj.

¹²QaJaaw Dios, chayeew tii kikowiil i qak'uun, je'-oq kik'ihik johtoq i k'ijol chee' chi xilak uhtz'ub'. Re' taqe i qixq'uun je' ta naq kikab' i ruch'itil i nimlaj paat.¹³Chatoob'eej i qatik, reh chi neenqamol panye'aab' reh i xa reh reh wach chi k'uxumb'al qeh. Reh chi neenk'ihaaxb'ik i qachikoop, korehtaal kiponik chi yohb'aal wach kik'ihaal chupaam i qaye'aab'.¹⁴Eh chayeew tii kikowiil taqe i qab'ooyax inqakoj reh qakamaj. Ma' ta naq awach i neenokik chi i leq' panqatinamiit reh chi ma' awach taj ineeruk'er chii' ruum ruyo'jiik.

¹⁵Atoob' reh i tinamit i je' re' ruk'ulariik i rotob'il i Dios i rub'an. Atoob' reh i tinamit i xa re' k'achlik Dios i rukoj chi ruDios. Chu'nchel ta naq i tinamit neekiloq'iniik reh i Dios¹Re' hin naa nuye'em i runimaal awach ruum hat nuDios, hat nuReey. Eh naa nuye'em runimaal wach chi juneliik aab'ihnaal.²Raaj laal q'iij naa nuye'em runimaal awach, eh naa nuloq'em chi juneliik ab'ihnaal.³Re' QaJaaw Dios xiik' naah nimaal wach, ruum aj re' ruk'ul chi naa ruye'ariik ruloq'il. Re' i runimaal wach ma' aha' ta chi je'.

⁴Eh chi tuut, chi ajaaw, chi-iih maam naakiye'wiik ruloq'il taqe akamaj. Eh naa kiq'orom chikiwach chi xiik' naah loq'il i a'nam taqe chaloq.⁵Naa wo' ruq'orariik rib'iral i runimaal awach q'e' looq', re' hin naa nuq'orom rib'iral i nimaq kiwach na'ojb'al i na a'n.⁶Re' tinamit naa kiq'orom rib'iral i xiik' naah yohb'alil kiwach a'nam chaloq. Eh re' hin naa nuq'orom rib'iral i runimaal awach.⁷Naa wo' kiq'orom rib'iral aawotob'il xiik' naah nimaal wach, kow naa kiq'orom rib'iral chi re' hat korik wach ak'ux.

⁸Re' QaJaaw Dios q'e' atoob', eh aj keteloom wachiis, ma' jumehq'iil ta nchalik rujosq'iil ruum wilik ketelinik wachiis ruuk'.⁹Re' QaJaaw Dios q'e' atoob' chu'nchel aj uuk', ruuk' q'unil i rucha'jeej taqe chu'nchel i ruyejaam chaloq.

¹⁰Eh nee ta naq tikiloq'ej chu'nchel ayejaam chaloq. Eh nee ta naq inkiyeew runimaal awach asantolaj aj nimaneel.¹¹Neeta naq inkiq'or rib'iral i runimaal aaloq'il. Eh nee ta naq inkiq'or rib'iral awajaawriik.¹²Neeta naq inkiyeew chi naab'jik awajaawriik keh i tinamit. Je' wo' hoq i ruloq'il i runimaal awajaawriik.¹³Re' runimaal awajaawriik naa ruwihiik chi juneliik. Eh naa awihiik chi taaq'anik chikinaah, i jar ch'iht chi k'achareel inaakik'iik.

¹⁴QaJaaw Dios, re' hat ti ye'wik rukowiil kik'ux taqe i rub'an kiib' kik'ux. Eh re' wo' hat titoob'inik keh i wilkeeb' panti' k'axik.¹⁵Chu'nchel i k'achareel inkuy-eej aawotob'il reh chi nee nayeew i kiwa' kihaa' paruorahiil.¹⁶Jaaw, chayeew tii keh ajwaal wach chi keh. Chayeew aawotob'il chikinaah taqe i k'achareel.¹⁷Re' QaJaaw Dios korik wach ruk'ux ruuk' taqe i rub'an. Eh i ruketelaaj kiwach chu'nchel i ruyejaam chaloq.¹⁸Re' QaJaaw Dios, ma' najt ta wilik kuuk' i kipahqanik reh i rotob'il. Re' taqe i korik wach kik'ux chupahqaljiik i rotob'il.¹⁹Eh i ruyeew i ajwaal wach chi keh i kiyohlinik ree reh. Noq inkipahqaaj reh chi naa kitoob'jiik, ki-ib'irjik, kiko'ljik wo' hoq.²⁰Re' i QaJaaw Dios i ruko'leej taqe i kik'axwik reh. Eh i rusach kiwach taqe i yiib' wach kina'ojb'al.

²¹Neeta naq inuloq'ej ruuk' nuchii' i QaJaaw Dios. Chu'nchel ta naq neekiye'wik ruloq'il i rusantolaj b'ihnaal, je' yu'naak, je' chi juneliik. Re' rulooq'jiik i Dios ruum taqe rub'anam chaloq¹Re' hin naa nuloq'em i QaJaaw Dios pan wánima.²Naa nuloq'em i QaJaaw Dios panuk'achariik. Naa nutz'uyem wach nik' pa' chik najtiil wilkiin ayu'.

³Maayeew taq ak'ux chikinaah i ajaab'ees Ni xata chinaah chik jino'q i winaq ruum re' reh xama' inko'linik ta wo' hoq.⁴Eh noq inkimik kisutinik wo' chik chi pooq ak'al. Eh xa chupaam i q'iij re' re' insahchik wach aha' naq wilik taqe i rukapaaj rub'aan.

⁵Atoob' reh awach i ruk'ul i rotob'il i QaJaaw re' ruDios i Jacob. Eh ruuk' wo' i RaJaaw i ruDios i ruyeew i ruk'ux.⁶Re' xyej-anik reh i taxaaj, i wach ak'al, i palaw, je' wo' chu'nchel i wilkeeb' chupaam taqe re'. Eh i rub'an taqe i ruq'or.⁷Re' rub'ehel i rub'an kuuk' i ti' wilkeeb'. Eh i ruyeew kiwa' taqe i nuhmeel.
Eh i resaj taqe panti' k'axik i je' pantz'ilom wilkeeb'.⁸Re' QaJaaw Dios i ruteh inaq'kiwach i moywach Eh i ruksaj taqe i q'ehb'eel, i ruk'ax taqe i korik wach kik'ux.⁹Re' QaJaaw Dios i ruko'leej taqe i tokoom tinamit, taqe i ma' xta kituut kajaaw, taqe ixoq kamnaq kib'ahiil. Eh i ruyoj wach inkiyejaa' wach i yiib' wach kina'ojb'al.

¹⁰Re' taq i hat i aj Sión, re' taq aaWaJaaw aaDios naa ruwihiik chi taaq'anik, xa jar ch'iht pa' chi k'achareel naa kik'iik.
Neeta naq inye'arik ruloq'il. Re' tz'uuy ye'b'al ruloq'il i Dios ruum otob'il xub'an kuuk' i aj Jerusaleem¹Loq'imaj ta naq i QaJaaw Dios. Xiik' naah holwochiil rutz'uyjiik wach. Ruum xa re' wo' reh i ruk'ul chi naa qaloq'em ruuk' suq kiil k'uxliis.²Re' QaJaaw Dios naa wo' chik ruyejaam i Jerusaleem, naa wo' chik rumolom kiwach i aj Israel tukimaj kiwach.³Re' reh i resaj i kiti'kiil taqe inyot'ik i kánima, eh iriq'omaj taqe ruuk' i kiti'kiil.⁴Re' reh i rajlaaj taqe chu'nchel i ch'umiil, eh i ruq'or i kib'ihnaal chi ju'junaal.⁵Xti xiik' wo' chik naah nimaal wach i QaJaaw Dios. Eh q'e' nim rajaawriik, xiik' naah loq'il taqe i runa'ojb'al.⁶Re' QaJaaw Dios i ruyeew runimaal kiwach i xama' nimaq ta kiwach, eh i resaj chi jumpech i runimaal kiwach taqe i yiib' wach kina'ojb'al.

⁷Chatz'uyej taq wach i QaJaaw Dios, chi t'iosb'al reh i rotob'il. Chatz'uyej taq wach i qaDios ruuk' arpa.⁸Ruum re' reh imb'urwik paam i taxaaj ruuk' i suutz'. Re' reh inyej-anik cho wach i jab' i ruyeew cho chinaah i wach ak'al. Re' reh ink'isanik reh i kok' ch'ahn wa taq yuuq'.⁹Re' reh inketwik keh chikop, re' reh inketwik keh i kak'uun taqe i nimaq taq tz'ok, noq k'erlik kichii' chupahqaljiik kiwa'.¹⁰Re' QaJaaw Dios ma' nsuuqb'ik ta ruk'ux ruuk' i kaansil i kawáyu, je' wo' ruuk' i kikowiil taqe i xa winaq.¹¹Insuuqb'ik la' ruk'ux i QaJaaw Dios kuuk' i kik'axwik reh. Eh inkiyeew kik'ux ruuk' chi naa ruketeljiik kiwach.

¹²Hat taq aj Jerusaleem chaloq'ej taq i QaJaaw Dios, hat taq aj Sión chaloq'ej taq aaDios.¹³Re' reh inko'linik reh taq aatinamiit pan kiq'ab' i aj ixowaal. Re' reh intoob'inik taq aweh i wilkaat taq chupaam aatinamiit re' re'.¹⁴Re' i Dios inye'wik i suq laj k'achariik chupaam taq aatinamiit. Eh i ruyeew taq chaaweh i chihooj laj trigo.¹⁵Eh re' reh i rutaq'aaj chaloq i ruq'oral wach ak'al, eh chi jumehq'iil inooj rib'iral xa aha'.¹⁶Eh i ruyeew i ha' chaaj chi xa je' chik saq lana. Eh ruum i reh i rupuhkaaj riib' i ha' chaaj, xa je' chik rukab' noq i rupuhkaaj riib' i pooq.¹⁷Eh i ruyeew chaloq i chaaj chi je' ruwii' saq b'och, eh ruuk' i k'uxik i ruyeew i rujoot'isaj taqe ha' xa jot'ik chik paam.¹⁸Noq i ruq'or chi naa kihab'ik i ha'chaj kitoyom naq kiib' kihab'ik wo' chik. Eh ruuk' i teew i ruyeew chaloq i rutoq'aa' b'ehik i rooq ha'.¹⁹Re' QaJaaw Dios xuyeew chi naab'jik i ruk'uhb'aal reh i Jacob. Je' wo' keh i aj Israel taqe i ruq'or i ruk'uhb'aal.²⁰Re' QaJaaw Dios ma' je' ta re' i xub'an kuuk' chu'nchel i tinamit ma' xuyeew ta keh chi naab'jik taqe i ruq'or i ruk'uhb'aal.
Loq'imaj ta naq i QaJaaw Dios. Ye'aroq ruloq'il i Dios kuum chu'nchel i rutz'ukrisam chaloq¹Chaloq'ej taq i QaJaaw Dios i hat i wilkaat taq pantaxaj. Chayeew taq ruloq'il pan taxaaj.²Chaloq'ej taq i QaJaaw Dios i hat, i hat ruánjel. Je' wo' taq i hat ruk'ihaal taq chaawiib' ruchopom taq anaah ar pan taxaaj.³Chaloq'ej i QaJaaw Dios i hat q'iij, je' wo' hat poh. Chaloq'ej wo' taq i QaJaaw Dios hat ch'umiil i tisihq'inik taq.⁴Chaloq'ej QaJaaw Dios i hat taxaaj, najt wilkaat chaloq, je' wo' hat ha' wilkaat pan taxaaj.⁵Chaloq'ej taq i rub'ihnaal i QaJaaw Dios, ruum noq xuq'or i reh chi naa kikorjiik xi korjik wo' chu'nchel.⁶Eh chu'nchel xuyeew taqe paruye'aab' reh juneliik. Eh aha' wilik i xuq'or keh ma' awach ta naa ruq'atwiik wach.

⁷Chaloq'ej taq i QaJaaw Dios i hat wach ak'al. Je' wo' taq i hat nimaq josq'laj chikop wilkaat taq pam palaw, eh i wilkaat taq pantaq jul.⁸Eh chuloq'ej QaJaaw Dios i ruch'aab' i kahoq, i saq b'och, i mus jab', i raab' suutz'. Je' wo' hoq i kowlaj teew jab' i rub'an i q'orooj reh ruum i reh.⁹Eh kiloq'ej i QaJaaw Dios taqe inajt naah yuuq', taqe i rub'ohl yuuq'. Je' wo' i chee' chakaltee', taqe i chee' kiwachinik,¹⁰taqe i chikop xa ruuk' paat kiwihik, taqe i josq'laj chikop. Je' wo' taqe i chikop kirupinik, taqe i kijukem kiib' noq kib'ehik.¹¹Je' wo' taqe i reey wilkeeb' i wach ak'al, taqe chu'nchel i tinamit. Je' wo' taqe k'amal b'eeh, taqe i wilkeeb' chi ajaab'esil wach ak'al.¹²Eh kiloq'ej i QaJaaw Dios taqe i tinamit chi winaq chi ixoq, chi nimaq, chi kok' taq.

¹³Chaloq'ej taq i rub'ihnaal i QaJaaw Dios, ruum xa re' wo' reh xiik' nah nimaal wach. Eh xiik' naah nimaal wach chinaah i wach ak'al, je' wo' pan taxaaj.¹⁴Re' i QaJaaw Dios xye'wik ruloq'il i rutinamiit Israel. Xuyeew runimaal kiwach chu'nchel i santo laj raj nimaneel.
Loq'imaj ta naq i QaJaaw Dios. Re' rulooq'jiik i Dios, ruum re' reh aj tz'uhk'risoom, eh manlik reey¹Loq'imaj ta naq i QaJaaw Dios. Chatz'uyej taq i ak'laj tz'uuy ye'b'al ruloq'il i QaJaaw Dios. Cha a'n taq chaxilak taq i hat i wilik taq asantohiil.

²Suuqb'oq kik'ux i aj Israel ruuk' i QaJaaw Dios, je' wo' taqe i aj Sión, ruum re' reh tz'uhk'risanik cho keh, re' reh kiReey.³Eh kiyeew ruloq'il i rub'ihnaal i kipisk'anoq pankooq ruuk' arpa, ruuk' setset laj q'ooj.⁴Ruum ruuk' re' insuuqb'ik ruk'ux i QaJaaw Dios kuuk' i rutinamiit, eh i ruyeew kiloq'il. Eh i ruko'leej taqe, i xama' nimaq ta kiwach.⁵Eh suuqb'oq kik'ux i wilik kisantohiil, ruum xi elik korik, atoob' ta koyokolkeeb' wach kich'aht kian kitz'uuy.

⁶Kiyeew kik'ux chulooq'jiik i QaJaaw Dios ruuk' kichii', eh wilik-oq pan kiq'ab' i kich'ihch' k'ul q'as.⁷Reh chi neenkiq'aj wach imb'aan keh kuum i nimaq tinamit, eh chi neenk'ik'saj chi ti' taqe i wilkeeb' pankok' tinamit.⁸Reh chi neenkib'ak' wach taqe i reey. Eh neenkib'ak' wach chi karena ch'ihch' taqe i kow inki a'n kiib' chi taaq'anik.⁹Reh chi naa ruq'atariik i q'orik chikinaah je' rukab' i ruq'orom i QaJaaw Dios. Ruuk' i wili xuyeew kiloq'il chu'nchel i wilik kisantohiil.
Loq'imaj ta naq i QaJaaw Dios. Re' ruq'orariik chi naa rulooq'jiik i Dios ruuk' i xa reh reh wach chi q'ooj¹Chaloq'ej taq i QaJaaw Dios chupaam i rupaat. Chaloq'ej taq ruum taqe i xuyejaa' cho ruuk' i rajaawriik.²Chaloq'ej taq i QaJaaw Dios ruum taqe i rukamaj rub'anam chaloq. Chaloq'ej taq ruum xiik' naah nimaal wach.³Eh chaloq'ej taq ruuk' i ruxuljiik taq aatuun. Chaloq'ej taq ruuk' i ruq'ojiik taq aawarpa, ruuk' i aa kok' k'ahaam wach q'ooj.⁴Chaloq'ej taq i QaJaaw Dios ruuk' i setset laj q'ooj, tipisk'anoq taq panawooq. Chaloq'ej taq ruuk' aaxuul q'ooj, ruuk' i k'ahaam kiwach q'ooj.⁵Chaloq'ej taq i QaJaaw Dios ruuk' i pulato ch'ihch' intzalajinik, ruuk' i setesaq q'ooj intzalajinik.⁶Chu'nchel i wilik kuxlab'al kiloq'ej i QaJaaw Dios.
Loq'imaj ta naq i QaJaaw Dios. Ruuk' taqe q'ooj wili xlooq'jik chaloq i Dios.

Bible Society in Guatemala

https://app.library.bible/content/695aa4b9f902778f