Edwɛndolɛ17
Devidi wɔ Nana Nyamenle andɛba alubo ne abo
1Mesɛlɛ wɔ moalɛ, O Awulae; ɔluakɛ medi nɔhalɛ memaa wɔ. Yɛ ɛnzolɛ tie me nzɛlɛlɛ, ɔluakɛ meyɛ mɔɔ sɔ ɛ nye a.2Ye me fi bagua nu ɛtaneyɛlɛ nu; maa ɛ nye ɛrɛla kpalɛ ne mɔɔ meyɛ ye dahuu la azo.3Saa ɛsɔ me ahonle ɛnea, saa ɛbakpɔla me nɔɔzo alevinli-mu-nwiɔ avinli, anzɛɛ saa ɛto me agyiba biala a, ɛnrɛnwu ɛtane biala wɔ me nwo; ɛdawɔ mumua ne ɛze kɛ medi nɔhalɛ.4Mɔɔ fale dasanli asa anloa gyima gyima nwo, meli wɔ mɛla ne mɔ azo; na mekpo kɛ me nee amumuyɛvoma kɛdu.5Dahuu mefa wɔ ndenle ne mɔ mɔɔ wɔhile me la azo; me gyakɛ ɛtɛkoatile nuhua ko bɔbɔ.6Wɔmɔ yɛɛ mesu mefɛlɛ wɔ a, O Nana Nyamenle; ɔluakɛ meze ye wienyi kɛ ɛbadie me; yɛ ɛnzolɛ maa me, na tie me modolɛ.7Kile wɔ ɛhulolɛ kpundii ne wɔ nwanwane nu ala, O Awulae; ɛle ngoanedievolɛ ɛmaa bɛdabɛ mɔɔ bɛhyia wɔ moalɛ wɔ kpɔvolɛma asa anu la.8Sinza me kɛmɔ ɛsinza ɛ nye ma ne mɔ la; na fa me fea ɛ ndɛba bedevinli ne abo.9Bɔ me nwo bane fi amumuyɛvoma asa anu; ye me fi me agbɔvolɛ kodiawuma mɔɔ bɛbɔ me nwo mgbɔlɛka bɛyia la asa anu.10Anwunvɔnezelɛ biala ɛnle bɛ ahonle nu; bɛmemaa bɛ nwo zo na bɛka mgbole.11Bɛbɔ me nwo mgbɔlɛka bɛyia; bɛyɛ anwomoalɛ kɛ bɛkɛzuhu me bɛkɛdo me aze; bɛdu bɛ nye bɛzie me nwo kɛ bɛku me.12Bɛzia kpɔɔnwo kɛ awenade mɔɔ ɛnwu nane na ɔkado yeahye ye la pɛ; bɛnyia me a anrɛɛ bɛtete me nu nzokɛnzoka zɛhae ala.13Dwazo, O Nana Nyamenle! Ko me ti maa me ɛ. Tu bɛ adwenle ngyehyɛleɛ ɛtane ne mɔ gua! Fa wɔ adabɛlaka ne die me ngoane fi amumuyɛvoma ɛhye mɔ asa anu.14Menli mɔɔ wɔmɔ wɔwula bɛ anwosesebɛ, O Nana Nyamenle, mɔɔ bɛmɛ ewiade anyiabɛnwo ala a bɛdwenle nwolɛ la. Maa ninyɛne mɔɔ ɛdawɔ wɔhyehyɛ wɔmaa bɛ la ɛyi bɛ ko ɛbulu zolɛ; maa bɛ mra nee bɛ nlɔnra ɛnyia agyapadeɛ dɔɔnwo ɛdɛla mɔɔ bɛkpondɛ la; maa bɛhakye na bɛgyakyi bie bɛ nzi bɛmaa bɛ mra ngyikyi.15Na mame ɛdeɛ, mebanwu ɛ nyunlu wɔ tenleneyɛlɛ nu; saa mevi nla nu medwazo noko a, me kunlu badwo fɔɔnwo kɛ menwu wɔ sonlabaka ne la.Biblica, Inc.