Edwɛndolɛ18
Devidi ye Ɛpepɛlielɛ edwɛne
1Mekulo wɔ somaa, O Nana Nyamenle! Ɔluakɛ wɔmɔ yɛɛ ɛpepɛ ɛdie me a.2Nana Nyamenle le me sinzavolɛ; ɔle me nriandifeabelɛ. Me Nyamenle a sinza me a; me nee ye lua a, dahuu me nwo kɔlɔɔnwo. Ɔsinza me kɛ konle nu wowadeɛ; ɔle kɛ ɛnlankɛ nyinli mɔɔ ye mɛne ɛdwazo wɔ konle nu la.3Mesu mefɛlɛ Awulae, na ɔpepɛ ɔdie me ɔfi me kpɔvolɛma asa anu. Nana Nyamenle fɛta ayɛlɛyelɛ amgba!4Ewule nwɔnzɔnwɔnzɔ ne bɛngale me yiale; deɛsɛkyevolɛma azɛlɛkye noko vale me aze.5Bɔbɔ membɔle mɔdenle, kɛ menwɔlie me nwo menwɔvi ewule sa nu; noko akee ɛnee funli kuma ɛzua me ɛhane dɛbadɛba.6Wɔ me ɛmianlɛ nu, menzunle menvɛlɛle Nana Nyamenle; menvɛlɛle me Nyamenle kɛ ɔraboa me. Ɔdele me ne wɔ ye Asɔne Sua Kpole ne anu; na ɔyɛle ɛnzolɛ ɔdiele me.7Akee azɛlɛ wozole, na awoka kpakyekpakyele; ɔluakɛ ɛnee Nana Nyamenle ɛva ɛya.8Esike vi ɔ bonyi nu vindele; na senle vile ɔ nloa anu zɛkyele ninyɛne dɔɔnwo,9Ɔwɔnenle anwuma maanle ne ati aze, na ɔ gyakɛ abo yɛle esike mungumungu.10Ɔvale anwumabɔvolɛ, mɔɔ le abɔdeɛ mɔɔ lɛ ndɛbalɛ la ko ɔyɛle ye ɛkpɔnwɔ na ɔdule; ɔvale anwoma ndɛbalɛ ɔdule.11Ɔvale awozinli ɔhedale ɔ nwo zo, na ɔvale amungu kabii ɔlile ɔ nyunlu.12Akee ɔmaanle wienyi ne mɔɔ wɔ ye nu la kpakyele wɔ awozinli kabii ne anu, kɛ ezule mɔɔ ɛlɛfedevede la.13Nana Nyamenle deanle nu wɔ anwuma maanle nu nehane; na bɛdele Nyamenle bedevinli ne ane amgba.14Ɔtotole ye ɛda mbaka ne mɔ, na ɔbɔle ye kpɔvolɛma ne mɔ asande; ɔkpakyele ɛsɛlɛmanye na ɔvale ɔdule bɛ bo.15Ɛdeanle nu kokye ala la, O Nana Nyamenle, nyevile hwenle guale aze gɔɔ; na azɛlɛ ye abo ninyɛne kpokpoti yele bɛ nwo relerele zɛhae ala. Ɛhwile wɔ kpɔvolɛma anyunlu, O Awulae, wɔ melɛ mɔɔ ɛhulule ɛguale bɛ nwo zo wɔ ɛyavalɛ nu la.16Awulae zoanle vile anwuma lɔ, ɔmaanle bɛravale me; ɔhwenle me ɔvile amaneɛnwunlɛ nu.17Ɔliele me ɔvile me kpɔvolɛ nee bɛdabɛ mɔɔ bɛkyi me kɔkɔkɔkɔ la asa anu, ɔluakɛ bɛ anwosesebɛ ɛdeɛ ne bo me nwo zo.18Bɛvale me aze, wɔ mekɛ mɔɔ ɛnee menlɛ anwosesebɛ la, na Nana Nyamenle gyinlanle me nzi kpundii.19Ɔvale me ɔhɔle ɛleka mɔɔ munzule biala ɛnle ɛkɛ a; ɔliele me ngoane, ɔluakɛ ɔ nye die me nwo.20Nana Nyamenle nea me tenleneyɛlɛ nwo tua me kakɛ; ɔnea me nwuanzanwuanzayɛlɛ ne anwo ɔyila me.21Ɔluakɛ medi Nana Nyamenle mɛla ne mɔ azo; yɛɛ eza noko mengakyi me nzi menzi me Nyamenle.22Meze ye ngyehyɛlɛ ne mɔ amuala; yɛɛ medi ye mɛla ne mɔ noko amuala azo.23Mebɔ mɔdenle kɛ menwɔli bɛ muala azo, na menea ye boɛ kɛ amgba noko menrɛvo ye ndenle ne mɔ biala.24Ye zɔhane ati Nana Nyamenle yila me, ɔluakɛ meyɛ mɔɔ fɛta la; yɛɛ me ahonle nu noko te saanwu.25O Awulae, amgba ɛkile wɔ anwunvɔnezelɛ ne ɛmaa bɛdabɛ mɔɔ bɛse anwunvɔne la! Yɛɛ eza noko ɛdi nɔhalɛ ɛmaa bɛdabɛ mɔɔ bɛdi nɔhalɛ la.26Tenlenema nyia nyilalɛ fi wɔ lɔ; na emomu ɛtanevolɛma ɛdeɛ, ɛ nee bɛ ɛnli hweledede.27Ɛdie anwoazehanlɛma ngoane; na emomu, ɛbɛlɛ bɛdabɛ mɔɔ memaa bɛ nwo zo la aze.28Nana Nyamenle, ɛdawɔ mumua ne a ɛle me kɛnlaneɛ a; me Nyamenle mumua ne a ta wienyi maa me wɔ awozinli nu a.29Ɔlua wɔ moalɛ ti, ɛlɔne ɛngola ɛngo ɛnva me aze; ɔlua wɔ tumi zo metia ɛhane zo a ɔnvuandi.30Nɔhalɛ nu, Nyamenle ɛhye, Yemɔ ye adenle nu yɛ nwanwane amgba. Nana Nyamenle anloa edwɛkɛ ɛmbɔ aze ɛlɛ. Ɔwowa bɛdabɛ mɔɔ bɛdie ye bɛdi la.31Nyamenle boni a tɛla Awulae kpole a? Anzɛɛ nwane bieko a le katakyie tɛla Nana Nyamenle a?32Nana Nyamenle a wula me anwosesebɛ, na ɔsinza me wɔ me ɛbɛlabɔlɛ nu a.33Yemɔ a saa melua bolɛ sinli nyunlu bɔbɔ a, ɔmmaa mengoati a; anzɛɛ saa melua boka nye anwo bɔbɔ a, ɔmmaa mentele mendɔ aze a.34Ɔdaye a ɔkilehile me konle nu agyibadolɛ a, na eza ɔmaa me anwosesebɛ wɔ mbulalɛ ɛda ɛdolɛ nu a.35O Awulae, wɔva wɔ ngoanelielɛ tumi ne wɔmaa me, na wɔva ɛ sa fema ne wɔzɔ me nu; wɔ ndetelɛ kpalɛ ne ɛmaa meyɛ kpole.36Wɔmaa me gyakɛ ɛhola aze, ɔlua zo metɛtelele metɛtɔle aze ɛlɛ.37Mekpo me kpɔvolɛma na meto bɛ; memmaa bɛnva bɛ nwo bɛnli; kɔkpula kɛ menwɔli bɛ nwo zo konim la.38Mebodɛboda bɛ mɔɔ bɛngola bɛndwazo bɛngyinla a; mekomo bɛ nwo zo wɔ me gyakɛ abo.39Ɛfa konle nu anwosesebɛ tɛladeɛ ɛwula me; ɛkye menli mɔɔ ko tia me la nuokɛ, na ɛfa bɛ ɛwula me gyakɛ abo.40Ɛmaa me kpɔvolɛma nriandi gua ɛ bɔ nu; ɛmaa medi menli mɔɔ ko tia me la anwo zo konim.41Bɛsu bɛfɛlɛ boavolɛ, noko akee bɛnnyia bie; bɛsu bɛfɛlɛ Awulae, na ɔmbua bɛ.42Meti bɛ motomoto kɛ sianlɛ; metietia bɛ nwo zo kɛ gua zo anwea la.43Ɛlielɛ me ɛvile bɛdabɛ mɔɔ bɛhonle bɛtiale me la asa anu, na ɛvale me ɛziele maanle maanle bɛ belemgbunli. Ɔlua zo, menli mɔɔ menze bɛ bɔbɔ la, ɛnɛ akee sonle me. Maanle gyɛne nu amra bɔ bɛ ti aze maa me; metendɛ a bɛdi me mɛla zo.45Bɛminli bɛ akɛnrazilɛ, na bɛfi bɛ fealeka mgbole mgbole ne mɔ anu, na bɛfa anwowozolɛ bɛba me nyunlu.46Awulae de aze dahuu! Bɛye me pepɛdievolɛ ne ayɛlɛ! Bɛbɔ Nana Nyamenle ye kpoleyɛlɛ ne anwo nolo, yemɔ mɔɔ ɔdie me ngoane a.47Ɔmaa meko metɔ zo wɔ me kpɔvolɛma anyunlu; ɔkomo maanle maanle mɔɔ wɔ me bo la kpokpoti anwo zo,48na ɔyɛ me ɔfi me atiakunlutanevolɛma asa anu. O Nana Nyamenle, ɛmaa me konimlilɛ wɔ me kpɔvolɛma anwo zo, na eza ɛsinza me ɛfi amumuyɛvoma ngane nu.49Ɛhye ati mekanvo wɔ wɔ maanle maanle avinli; meto edwɛne meyeyɛ wɔ dahuu.50Nana Nyamenle fa konimlilɛ mgbole maa ye belemgbunli ne; ɔda ye ɛhulolɛ kpundii ne ali ɔkile sonla holɛ ko ne mɔɔ yeye ye la. Devidi, ɔ nee ɔ bo zo amra, wɔ melɛ mɔɔ ɔnlɛ awieleɛ.Biblica, Inc.