Luke13
1ยามนั้นผู้ลางคนซึ่งอยู่บ่อนนั้นเว่าเรื่องซุมกาลิลีปีลาตเอาเลือดและเครื่องบูชาของซุมหมู่เขามาคะลนเข้ากันให้พระเยซูฟัง2พระเยซูจั่งเว่ากับซุมหมู่เขาว่าสุเจ้าคึดว่าซุมกาลิลีซุมนั้นเป็นขี้บาปหลายกว่าซุมกาลิลีซุมอื่นย้อนว่าซุมหมู่เขาทุกยากจั่งสั้นบ่3เฮาบอกุมหมู่เจ้าว่าบ่แม่นข้างเจ้าบ่กลับใจใหม่กะสิซิบหายคือกัน4สิบแปดคนนั้นที่ถืกหอรบสิโลอัมพังทับตายเจ้าคึดว่าซุมหมู่เขาเฮ็ดพิษหลายกว่าคนที่เซาอยู่ในกรุงเยรูซาเล็มสั้นบ่5เฮาบอกซุมหมู่เจ้าว่าบ่แม่นคั้นซุมเจ้าบ่กลับใจใหม่กะสิต้องซิบหายคือกัน6พระเยซูกะเว่าผญาจั่งสิว่าพ่อซายผู้หนึ่งปลูกต้นหมากเดื่อไว้ในสวนองุ่นของเจ้าของบัดยามเขามาหาหมากเดื่อก็บ่พ้อจักหน่วย7เขาจั่งเว่ากับคนที่เบิ่งแยงเคือหมากองุ่นว่าจั่งสิหละเฮามาซอกหาหน่วยอยู่ต้นหมากเดื่อนี้สามปีแล้วแต่ก็บ่พ้อหน่วยให้ตัดมันทิ่มสาสิให้ดินจืดไปซื่อๆเฮ็ดหยัง8ผู้ที่เบิ่งแยงเคือบักองุ่นจั่งตอบว่านายเจ้าข้าเก็บเอาไว้อีกจักปีแหน่ลองให้ขะน้อยใส่ปุ๋ยพวนดินเบิ่งก่อน9คั้นปีหน้ามันออกหน่วยกะดีอยู่แต่ท่ามันบ่ออกหน่วยกะจั่งตัดทิ่ม10บัดยามพระเยซูนั่งสอนอยู่ในศาลาบ่อนหนึ่งในมื้อสะบาโต11มีแม่หญิงผ้หนึ่งที่มีผีเข้าสิงเฮ็ดให้ลาวเป็นโรคมาสิบแปดปีแล้วอยู่บ่อนนั้นนำหลังของลาวกะโก้งยืดขึ้นกะบ่ได้12พระเยซูเหลียวเบิ่งจั่งเอิ้นลาวว่านางเอ้ยเจ้าได้ฮับการปลดปล่อยให้พ้นจากโรคของเจ้าแล้วเด้อ13พระเยซูวางมือเทิงโต่ลาวบัดไดนั้นลาวกะยืดโตตงได้และสรรเสริญพระเจ้า14แต่นายศาลาบ่พอใจย้อนว่าพระเยซูปั๋วโรคในมื้อสะบาโตจั่งเว่ากับซุมผู้คนว่ามีหกมื้อที่สิเฮ็ดงานจั่งมาปั๋วโรคในหกมื้อนั้นอย่มมาเฮ็ดในมื้อสะบาโต15พระเยซูจั่งเว่ากับซุมเขาว่าพวกจอกหลอกแจกแหลกซุมหมู่เจ้ากะปล่อยวัวปล่อยลาออกจากคอกของมันพาไปกินน้ำในมื้อสะบาโตบ่แม่นบ่16แม่หญิงผู้หนึ่งเป็นเซื้อแนวของอับราฮัมถืกผีมัดไว้สิบแปดปีแล้วบ่ควรบ่ที่สิให้ลาวหลุดพ้นจากแนวจ๊องในมื้อสะบาโต17บัดยามพระเยซูเว่าจั่งสั้นแล้วซุมที่บ่ถืกกับพระเยซูกะได้อ่ายซุมหมู่คนกะพากันม้วนซื้นสะออนกับแนวดีสุแนวที่พระเยซูเฮ็ด18พระเยซูเว่าว่าแผ่นดินของพระเจ้าคือกับอีหยังแล้วเฮาสิเปรีบแผ่นดินนั้นกับอีหยังดี19กะเปรียบคือกันกับเม็ดผักเม็ดน้อยๆที่ผู้หนึ่งเอาไปปลูกในสวนมันเกิดขึ้นเป็นต้นใหญ่นกที่อยู่เทงฟ้ากะมาเฮ็ดฮังเซาอยู่ตามกิ่งของต้นนั้น20พระเยซูจั่งเว่าว่าเฮาสิเปรียบแผ่นดินของพระเจ้ากับอีหยัง21กะเป็นคือเชื้อซึ่วแม่หญิงผู้หนึ่งเอาแก่งลงในแป้งสามถังจนแป้งนั้นฟูขึ้นทั้งเมิ่ด22พระเยซูย่างไปจตามบ้านตามเมืองและสั่งสอนในหว่างทางที่สิไปกรุงเยรูซาเล็ม23มีผู้หนึ่งเว่าถามพระเยซุว่าพระเยซูเอ้ยคนที่สิรอดกะมีน้อยท่อนี้บ่พระเยซูเว่ากับซุมเขาว่า24ให้สุเจ้าเพียรเข้าไปทางประตูคับแคบย้อนว่าเฮาบอกซุมเจ้าคนหลายเกิดสิเพียรเข้าไปแต่เข้าบ่ได้25บัดเจ้าของเฮือนลุกขึ้นปิดประตูแล้วและซุมหมู่เจ้ากะยืนอยู่ข้างนอกเคาะพักกะตูว่าเจ้านายเอ้ยซอยเปิดให้เฮาแหน่แต่เจ้าของเฮือนกะตอบเจ้าว่าเฮาบ่ฮู้ว่าซุมหมู่เจ้ามาจากไส26แล้วเจ้าสิเว่าว่าเฮาเคยกินดื่มกับนายแล้วนายกะเคยสอนบ่อนถนนของเฮา27แต่เจ้าของบ้านสิเว่าว่าเฮาบ่ฮู้ว่าซุมเจ้าได้เฮ็ดซั่วมาแต่ไสไปให้พ้นหน้าเฮา28แล้วสิมีการฮ้องโฮโพสังกาในยามที่ซุมหมู่เจ้าแนมเห็นอับราฮัม อิสอัค ยาโคบ และบรรดาผู้เผยพระวจนะในแผ่นดินของพระเจ้าแต่โตซุมเจ้าเองกะสิถืกไล่ออกไปอยู่ข้างนอก29แล้วสิมีคนจากทิศตะวันออก ทิศตะวันตก ทิศเหนือ ทิศใต้มานั่งฮ้วมโต๊ะในแผ่นดินของพระเจ้า30เบิ่งดูผู้ที่เป็นคนลุนสิกับกลายเป็นคนต้นและผู้ที่เป็นคนต้นกะสิกลายเป็นคนลุน31บัดยามนั้นมีพวกฟาริสีลางคนมาบอกพระเยซูว่าท่านไปจากบ่อนนี้สาย้อนว่าเฮโรดอยากสิฆ่าท่าน32พระเยซูจั่งตอบซุมหมู่เขาว่าจั่งไปเว่ากับหมาจอกโตนั้นว่าฟังให้ดีเฮาขับผีและปั๋วโรคในมื้อนี้และมื้ออื่นแล้วในวันที่สามเฮาก็จะเสร็จงาน33แต่ว่าเฮาจำเป็นสิต้องย่างไปต่อในมื้อนี้มื้ออื่นและมื้อฮือย้อนว่าเป็นไปบ่ได้ที่ผู้เผยพระวจนะสิถืกฆ่านอกกรุงเยรูซาเล็ม34เยรูซาเล็มเอ้ยเมืองที่ฆ่าซุมผู้เผยพระวจนะแล้วเอาหมากขี้หินดึกไส่ผู้รับใช้จนเขาตายเฮาคึดสิฮวมลูกของเจ้าไว้คือแม่ไก่กกลูกอยู่ใต้ปีกของมันแต่พวกเจ้าก็บ่ยอม35เบิ่งดูะ นิเวศของเจ้าสิถืกทิ่มและฮ้างเฮาบอกซุมเจ้าว่าเจ้าสิบ่เห็นเฮาจนกว่าซุมเจ้าสิออกปากว่าขอให้ท่านผู้เสด็จมาในพระนามขององค์พระผู้เป็นเจ้าทรงพระเจริญ
Son Light Foundation