Mark13
1อึมเหลีย พระเยซู ฮุจ หล็อฺฮ จี รู แซ็ม+ กอฺนซิด ค็อฺง หนาว หมูย หนะ หญวง ปาย “แซ็ม แหน หรัวะ หมัดเหม็ย เนาะ อาจาน! กเมา เทาะ แกะ เหลียย ก็ หรัวะ ลือๆ.”2พระเยซู หวาว ปาย “หมวง เผิห์ หมาล เทาะ กอฺ ซ็อฺฮ ยัง แนน แหน เถ? จิง ปุ เกิด กเมา แหน ลือ อึงขับ อึนดัว กู แมแต หมูย กอน แต หนาว จิง หลือ แอ แซง บ็อฺฮ ฉิม.”3พระเยซู ตะกาว กู บวน บรู กแฉว หวิฮ ซีแหม แซ็ม. เปโตร ยากอบ ยอน หนะ อันดรู หมูดเจา บวย พระเยซู แต โมหนาว หม็อฺฮ ปาย4“เถียร อึนเต บีห์ อาจาน เฮดกาน ติงฉิม โม แหน จิง เกิด ซ็อฺฮ ตอฺห์ เหนีย? จิง เกิด มายซำคัน หนอฺ หนืจ ออฺน ดิง ปาย เฮดกาน โม แหน จิง เกิด ซ็อฺฮ แหลว? ”5พระเยซู หวาว อึนเต ปาย “จำ ระหมัด ดัวะ ออฺน ออฺ เดอ. จิ ออฺน ดาย เจา ทอ โมหมวง บืน.6จิง เกิด กูย ดาล หนะ เจา เปรฺอ กะหมึฮ ค็อฺง ไฮ ปาย ‘แหน ไฮ ขือ พระคริซ แหลวก็ หลัว ออฺน กูย ดาล หนะ ฉือ หนาว.7คัน โมหมวง จิง ซ็อฺง เซง กะบัง อึนดัว อึนฉัลืหรือ อึงฮาย จิ อึนถรุฮ กะฮอฺมจี. หมาล แหน จิง ต็อฺง เกิด ซ็อฺฮ หมัดเหม็ย แต นะขัย ก็ ด็อฺง ถัน ตอฺห์ เหวเหลีย บันเซ็อด.8หมืง หมูย จิง ซู หมืง หมูย เฉียด ตอฺ เฉียด จิง กะบังซู อึนดัว.จิง เกิด กแตห์ อึนฉืจ กู ถูๆ ติง อัดโดย. คัน เฮดกาน โม แหน เกิด ซ็อฺฮ ก็ เกิด นะ กูย กไป อี ผุง หลัจ เทาะ ด็อฺง ถัน ตอฺห์ เหวเหลีย หลัจ กอฺน ขัย.9โมหมวง ต็อฺง ระหมัด จะ ดัวะ เพราะ โมหนาว จิง กอบ โมหมวง ซ็อฺอ ซาน จิง ตำ โมหมวง หลึง ฮอง กะฉุม อึมผาฮ พระเจ้า จิง ดิง โมหนาว จี กเย็อง กู นา มแหนห์ โม ซะดัจ หนะ โม เถรงเหนียย เพราะ โมหมวง กู นา ไฮ. แหลว โมหมวง จิง เกิด พยานนา ไฮ ออฺน หนาว ตะงัด.10แต คาวออฺ จิง ต็อฺง อึนเต ออฺน ดิง ถูๆ กแตห์ หญูง แต จิง ตอฺห์ เหวเหลีย บันเซ็อด.11คัน โมหนาว กอบ โมหมวง จี ซ็อฺฮ ซาน จิ ขึด เล็ย ปาย จิง หวาว นะเหนีย ออฺ. คัน ตอฺห์ เหวเหลีย หวาว พระเจ้า จิง เถียน มนาย หวาว ออฺน เอง. เพราะ หมัดเหม็ย แหลว ผระกเหวียย จิง เกิด กูย หวาว ปุ แหมน หมวง.12แซม หนะ ซาย จิง ตัจจา อึนดัว ออฺน กร กแจด อาหนุ ก็ จิง ตัจจา กอฺน กอฺน จิง ตัจจา เหมห์ หนุ ออฺน ไกร กแจด.13ขูหนะ จิง กะอาร โมหมวง เพราะ โมหมวง กู นา ไฮ. แต กูย เทาะ ฉือ อะหรัง จน ตอฺห์ บันเซ็อด จิง เผ็อน.14หมวง จิง เผิห์ ‘หมาล เทาะ นา กะอีห์ เขรียญจะ หมัดเหม็ย’ ตัง กู หลึง บวน เทาะ ปุ ขูน ตัง กู.”(กูย อาน ออฺน เคาไจ แอ เอง เดอ!) “แหลว ออฺน กูย เทาะ กู ปา เทิน ยูเดีย เผียว หงัจ จี ปา บรู.15กูย เทาะ กู นา ปอฺง ดุง จิง หมูด จี แอ หมาลๆ หลึง ดุง เต็อด จะ จี.16กูย เทาะ กู หลึง เหลียจแซ จิ ลบจี แอ ฮับ นากราว ปา ดุง.17หลึง ตไง ขัย จิง อึมเบียะ คลัง หลึง โม กูย กไป ผุงผืด หนะ เหมห์ กอฺนงา.18ออฺน เผียวะเหนีย เถียร ตอฺ พระเจ้า ปาย หมาล โม แหน จิง ปุ เกิด ซ็อฺฮ กเตอ ตะกอฺห์19เพราะ หลึง เหวเหลีย ขัย จิง กเตา กะตาจ ดาล เหลิฮ เหวเหลีย เหนียๆ เทาะ เขย เกิด เจา ตังรู พระเจ้า หวัว กแตห์ เจา จน ตอฺห์ ขู ตไง แหน. แหลว จิง ปุ เกิด เหวเหลีย เหนีย มัฮ เหวเหลีย แหน เล็ย ตอฺจี.20แต พระเจ้า บืน หวัว ออฺน ตไง ซะดาว อึงแก็ฮ หมูดแหลว. คัน ปุ หวัว นะขัย ก็ จิง ปุ เกิด ดาย ลือ เผ็อน บืน เล็ย. เทาะ พระเจ้า หวัว ออฺน ตไง อึงแก็ฮ หมูด แหน ก็ เพราะ เผิห์ แก กูย เทาะ หนาว หลืก ดัวะ.21นะขัย คัน เกิด ดาย เจา อึนเต หมวง ปาย ‘แหน พระคริซ กู บวน แหน!’ หรือ ปาย ‘ถุฮ กู บวน ถุฮ’ ก็ จิ ฉือ หนาว.22เพราะ โม พระคริซ ปลอม หนะ โม กูย+ หวาว มนาย ค็อง พระเจ้า ปลอม จิง ผรึฮ ซ็อฺฮ. หนาว จิง หวัว หวีห์ อัดซะจัน หนะ หวีห์ นา หงึด หญาว กูย แมแต กูย เทาะ พระเจ้า หลึก ดัวะ คัน หวัว จี บืน.23ออฺน ระหมัด จะ ดัวะ เดอ เพราะ ไฮ บืน อึนเต โมหมวง ขูยาง ดัวะ หญูง แหลว.24กรอย รู เหวเหลีย อึมเบียะถุก ขัย มเหนียง จิง กเวห์ จี เผรียงไซ ปุ เบรียง เถิน ตอฺจี25โม อึนตอล จิง อึนถรุฮ แซงเจา รู ผราฮ. อำนาด กะน็อฺฮๆ หลึง ผราฮ จิง ไกร ผูย หล็อฺฮ จี รู กะนา ค็อฺง ไอ.26แหลว จิง เผิห์ ไฮ กอฺนกูย+ เจา หลึง กเหม็อล เกิด ริดอำนาด ผืดๆ หนะ ซะงาราซี.27ไฮ กอฺนกูย จิง เปรฺอ โม เทวะเดีย+ ออฺน หล็อฺฮ จี ติง อะปอน นา หลึง กแตห์ ออฺน กโมล กูย ติงฉิม เทาะ พระเจ้า หลืก ดัวะ แหลว ตังรู เซ็อด กแตห์ นา แหน จี ตอฺห์ เซ็อด กแตห์ น ถุฮ.28ออฺน หรีน เจา รู ขัล บกดือ+ เดอ. คัน หมวง เผิห์ ไอ กแดง ซะลา หญวม ซ็อฺฮ หมวง ก็ ดิง ปาย อึนฉัล จิง ตอฺห์ กเตอ กเตา แหลว.29แหน ก็ นะอึนดัว คัน หมวง เผิห์ เฮดกาน โม แหน เกิด ซ็อฺฮ หมวง ก็ จิง ดิง ปาย อึนฉัล ตอฺห์ เหวเหลีย แหลว.30ไฮ หวาว หมัดเหม็ย เฮดกาน โม แหน จิง เกิด ซ็อฺฮ หญูง โม กูย หลึง รูหนัว ด็อฺง ถัน แหล็ฮ จี ฉิม หนะ.31ผราฮ หนะ กแตห์ จิงเป็อด บ็อฺฮ จี แต มนาย ค็อฺง ไฮ จิง ปุ เกิด ตไง เป็อด บ็อฺฮ จี.ปุ เกิด ดาย ดิง ปาย จิง เกิด ซ็อฺฮ ตอฺห์ เหนีย32แต ปุ เกิด ดาย ดิง ปาย ตไง เหวเหลีย ขัย จิงเจา ตอฺห์ ตอฺห์ เหนีย เทวะเดีย หลึง ซะวัน หรือ กอฺน หมูย ค็อฺง พระเจ้า ก็ ปุ ดิง ดิง แต อาหนุ มัฮขัย.33ออฺน ระซา ระหมัด กู เพราะ หมวง ปุ ดิง ปาย เหวเหลีย ขัย จิง เจา ตอฺห์ ตอฺห์ เหนีย.34ปรีบ นะเถรง ดุง หมูย หนะ หล็อฺฮ รู ดุง จี ถีว กะนา อึงฮาย. หนาว หมวบ ออฺน กูยเปรฺอ ฉิม หนะ ระซา ดุง ขูหนะ ต็อฺง หวัว หวีห์ ค็อฺง หนาว เอง. เถรง ดุง ซัง กูย ระซา กเหวียล ออฺน แหม ออฺน ออฺ.35นะขัย ออฺน โมหมวง ระหมัด ดัวะ ออฺน ออฺ เพราะ โมหมวง ปุ ดิง ปาย เถรง ดุง จิง เจา ตอฺห์ ตอฺห์ เหนีย จิงเจา กะบือ หรือ เหวเหลีย ดึก หรือ เหวเหลีย อึนถรูย ตะการ หรือ กะลัฮ ซ็อฺอ ก็ บืน.36ออฺน ระหมัด ออฺน ออฺ อะตูง ปาย เหนียย จิง ตูจ เจา เกลอะๆ เผิห์ หมวง บิจ เกลอะ กู.37มนาย เทาะ ไฮ อึนเต โมหมวง ไฮ ก็ อึนเต กูย ขรบ หนะ ปาย ออฺน ระซา ระหมัด ออฺน ออฺ”
Empower Asia Bible Translation Movement