Mark12
1พระเยซู หวาว เกิด มนาย ปรีบ ออฺน โม กูย ตะงัด ปาย “เกิด กูย หมูย หนาว หวัว ไซ องุน หวัว ระบวง ซะวีล เป็จ อึมป็อฺฮ ดัวะ เดียะ องุน เหลิห์ โหรง ถีๆ ดัวะ ระซา แหลวก็ ออฺน โม กูย เชา ไซ ขัย หวัว. หนาว เอง หล็อฺฮ ฮุจ กะนา จี หมืง กราว.2ตอฺห์ กเตอ ตะ ไปล องุน แหลว เถรง หนาว เปรฺอ อึนฉัฮ หมูย หนะ จี บวย กูย เชา ไซ จี แอ ไปล เทาะ แบง อึนดัว.3แต โม กูย เชา ไซ หนาว กอบ อึนฉัฮ ขัย เจา ตำ ผูย ลบจี เต เถๆ.4เถรง ไซ ก็ เปรฺอ อึนฉัฮ เถิน หมูย หนะ จี แต กูย เชา ไซ ตำ ปลอฺ กูย ขัย กเหลียย หวัว เบียบ หนาว ดาล ยาง.5ตอฺ ขัย เถิน เถรง ไซ เปรฺอ อึนฉัฮ หมูย หนะ จี เถิน แต กูย เชา ไซ กแจด หนาว. เถรง ไซ เปรฺอ กูย จี ดาล หนะ แต กูย เชา ไซ ตำ หนืจ กแจด หนืจ.6เถรง ไซ ด็อฺง เกิด กอฺน อึนถรุฮ เทาะ หมัก หมูย หนะ บันเซ็อด เถรง ไซ ออฺน กอฺน ขัย จี ขึด ปาย ‘โม เชา จิง นับทือ กอฺน ค็อฺง ไฮ เฮน.’7“แต กูย เชา ไซ หวาว อึนดัว ปาย ‘ถุฮ ไอ อึงเคา! ฮวย เยอ กแจด หนาว บ็อฺฮ แหลว ไซ องุน จิง เกิด ค็อฺง โมไฮ!’8แหลว โมหนาว ก็ ผรู หมูดเจา กอบ กอฺน เถรง ไซ ขัย กแจด แอ จะ เหลียฮ หล็อฺฮ จี นา กราว ไซ.”9แหลว พระเยซู หม็อฺฮ ปาย “แหลว เถรง ไซ จิง หวัว นะเหนีย? หนาว ก็ จิง กแจด กูย เชา ไซ ขัย แหลว แอ ไซ องุน ออฺน กูย กะน็อฺฮ เชา.10แหมน หมวง เขย อาน อึมผี+ เทาะ คีน ดัวะ ปาย ‘กเมา เทาะ เฉียง กอฺ หนาว ตัฮ บ็อฺฮ ปาย เปรฺอ ปุ บืน แหลว ตอฺห์ กรอย ก็ แอเจา เปรฺอ เกิด กเมา เอก บืน. แหน เกิด หวีห์ ค็อฺง พระเจ้า11เทาะ นา หงึด หมัด เหม็ย.’”12โม อึงเคา ค็อฺง กูย ยิว หนาว ดิง ปาย พระเยซู หวาว มนาย ปรีบ แหน อึนตัญ โมหนาว ก็ บวย กะนา กอบ พระเยซู. แต หนาว อะตูงโวยโซะ เลย จี ตัฮ พระเยซู.13แหลว หนาว เปรฺอ โม ฟาริซี+ กูย หนืจ หนะ โม กูย หนืจ หลึง โมด ค็อฺง เฮโรด หล็อฺฮ จี กอบ หลอฮ พระเยซู.14หนาว เพะ เจา หม็อฺฮ พระเยซู ปาย “อาจาน ลัฮ โมไฮ ดิง ปาย หมวง เกิด กูย หวาว แต มนาย หมัดเหม็ย ปุ เขย เกรง ดาย ปาย หนาว จิง ขึด นะเหนีย ปุ เผิห์ หลึง หมัด ดาย แต หมวง ซอฺน กะนา ค็อฺง พระเจ้า ยัง ตรง. เหนีย อึนเต แม็ฮ ปาย หลอฮ กด+ ค็อฺง โมเซ เถ เทาะ จิง เซียเขีย ออฺน ซะดัจผืด ค็อฺง โรม? เซีย ออฺ หรือ ปุ เซีย ออฺ?”15พระเยซู ดิง ตอฺห์ กะฮอฺม ค็อฺง หนาว ก็ หวาว ปาย “ เหนีย แต เจา ทอ หม็อฺฮ ไฮ? แอ เหรียน ประ หมูย เจา แหม แม็ฮ.”16หนาว ก็ แอ เจา ออฺน. พระเยซู หม็อฺฮ หนาว ปาย “กะหมึฮ หรูบ กู หลึง ประ แหน เกิด ดาย ยัฮ?” หนาว อึนเต ปาย “ก็ ซะดัจผืด ฮะ.”17พระเยซู หวาว ปาย “คัน นะขัย เทาะ เกิด ค็อฺง ซะดัจผืด ก็ แอจี ออฺน ซะดัจผืด วะ แหลว เทาะ เกิด ค็อฺง พระเจ้า ก็ ทะวาย ออฺน พระเจ้า. กูย ดาล หนะ เทาะ ซ็อฺง พระเยซู หวาว นะแหน ก็ หงึด กะฮอฺม ดาล.18เกิด โม ซะดูซี+ เจา บวย พระเยซู. (โม แหน ซอฺน ปาย กูยแหล็ฮ แหลว ปุ ดิง หมอฮ ซ็อฺฮเจา รู แหล็ฮ.) กูย โม แหน หม็อฺฮ พระแยซู ปาย19อาจาน ลัฮ โมเซ ซังดัวะ ปาย คัน เกิด กูยแหล็ฮ จี หนาว เกิด อึนแดล แต ปุ เกิด กอฺน ก็ ออฺน แซม หรือ ซาย ค็อฺง กูยแหล็ฮ ขัย หรับ อึนแดล ค็อฺง กูยแหล็ฮ เจา เกิด อึนแดล ดัวะ แอ กอฺนซืบ ตะกูน ค็อฺง กูยแหล็ฮ ขัย20ซาแหน เกิด แซมซาย กู กโผล หนะ ซาย ผืด ขัย แอ อึนแดล ก็ แหล็ฮ ด็อฺง ถัน เกิด กอฺน เล็ย.21แซม เต็อด หรับ กแลบ เจา เกิด อึนแดล ก็ แหล็ฮ เถิน ปุ เกิด กอฺน. แซม ตอฺเจา ก็ หรับ แอ นะอึนดัว แหล็ฮ ปุ เกิด กอฺน.22แหลว แซมซาย ติง กโผล หนะ ก็ บืน กูย กไป หมูย แหน เกิด อึนแดล แต แหล็ฮ ปุ เกิด กอฺน. บันเซ็อด กูย กไป ก็ แหล็ฮ น็อฺง.23คัน ตอฺห์ ตไง กูยแหล็ฮ หมอฮ ซ็อฺฮเจา รู แหล็ฮ ขัย กไป แหน จิง เกิด อึนแดล ค็อฺงดาย ลัฮ? เพราะ ขูหนะ ก็ บืน กไป แหน เจา เกิด อึนแดล น็อฺง.”24พระเยซู หวาว ปาย “โมหมวง ขึด หลอฮ หมัดเหม็ย. เพราะ หนอฺ? ก็ เพราะ โมหมวง ปุ ดิง อึมผี หนะ ริดอำนาด ค็อฺง พระเจ้า.25คัน กูยแหล็ฮ หมอฮ ซ็อฺฮเจา รู แหล็ฮ แหลว หนาว จิง กู แบบ เทวะเดีย+ หลึง ซะวัน จิง ปุ แอ อึนดัว เกิด กะยาห์ อึนแดล เถิน.26แต หรืง กูย หมอฮ ซ็อฺฮเจา รู แหล็ฮ ขัย โมหมวง เขย อาน นังเซอ เทาะ โมเซ คีน หวาว ตอฺห์ หรืง โปล อะหลวง ขัย ปาย พระเจ้า หวาว หลึง โมเซ ปาย ‘ ไฮ ขือ พระเจ้า ค็อฺง อับราฮัม พระเจ้า ค็อฺง อิซอัก หนะ พระเจ้า ค็อฺง ยาโคบ27พระเจ้า เกิด พระเจ้า ค็อฺง กูย กะมง ปุ แหมน ค็อฺง กูยแหล็ฮ. โมหมวง ขึด หลอฮ หมัดเหม็ย.”28อาจาน ซอฺน กด ค็อฺง โมเซ หมูย หนะ ซ็อฺง หนาว กะฉีน อึนดัว แหน ก็ เผิห์ ปาย พระเยซู ตอฺบ โม ซะดูซี ยัง ไกร หนาว ก็ เจา บวย พระเยซู หม็อฺฮ ปาย “อาจาน ลัฮ กด ค็อฺง โมเซ คอ เหนีย ผืด เหลิฮ โม?”29พระเยซู หวาว ปาย “คอ แหน ฮะ ผืด หมัดเหม็ย ‘กูย อิซราเอง ลัฮ ออฺน ตะงัด เดอ พเหญีย พระเจ้า ค็อฺง ไฮ เกิด พระเจ้า หมูย มะหนะเอง.30ออฺน หมัก พระเจ้า พเหญีย ค็อฺง หมวง ออฺน เซ็อดจะ เซ็อดถัย ติง มนายขึด อึมลัง แหรง ค็อฺง หมวง ติงฉิม.’31กด คอ ตอฺเจา ก็ ‘ ออฺน หมัก โมโซะ นะ หมัก จะเอง.’ ปุ เกิด กด คอ เหนีย จิง ผืด เหลิฮ อเบีย คอ แหน.”32อาจาน ซอฺน กด ค็อฺง โมเซ หวาว ปาย “ไกร แหลว อาจาน เทาะ ปาย พระเจ้า เกิด พระเจ้า แต หมูย มะหนะเอง ปุ เกิด ผระ กะน็อฺฮ เถิน เล็ย.33กูย ต็อฺง หมัก พระเจ้า จน เซ็อด กะฮฮฺม มนายขึด หนะ อึมลัง แหรง แหลว ต็อฺง หมัก โมโซะ แบบ หมัก จะเอง. โมไฮ จิง หวัว โตน กด ติง อเบีย แหน ก็ ออฺ เหลิฮ แอ หมาล จี บุฮ แซน พระเจ้า.”34พระเยซู เผิห์ ปาย หนาว ตอฺบ ยัง ออฺ ก็ หวาว อึนเต หนาว ปาย “หมวง กู ปุ อึงฮาย รู พระเจ้า เกิด ซะดัจ ขุม อฺอฮ.” กรอย รู แหน ปุ เกิด ดาย ฮาน หม็อฺฮ หนอฺ พระเยซู เถิน.35พระเยซู ซอฺน กู หลึง แซม+ขัย หนาว หม็อฺฮ ปาย “เกิด หนอฺ แต โม อาจาน ซอฺน กด ค็อฺง โมเซ หวาว ปาย พระคริซ เกิด กอฺนเจา ค็อฺง ดาวิด ลัฮ?36ดาวิด ขัย เอง บืน หวาว โตน เทาะ ผระกเหวียย อึนเต หนาว ปาย ‘ พระเจ้า หวาว หลึง เถรงเหนียย ค็อฺง ไฮ ปาย ออฺน ตะกาว นาตำ ค็อฺง ไฮ จน ปาย ไฮ จิง ปราบ โม ซัตรู ค็อฺง หมวง ออฺน กู กเดิบ หฺยืง ค็อฺง หมวง.’37ดาวิด ด็อฺง กเหฺยีย หนาว ขัย เถรงเหนียย แหลว พระคริซ จิง เกิด กอฺนเจา ดาวิด บืน นะเหนีย ลัฮ?”38พระเยซู หวาว ตอฺจี ซอฺน หนาว ปาย “ออฺน ระหมัด โม อาจาน ซอฺน กด ค็อฺง โมเซ เดอ. หนาว หมัก ผาห์ ฮัยผืด อึนถรึงๆ ฮุจ จีเจา โตน ตลาด ออฺน ดาย ๆ อึมผาฮ หนาว.39คัน จี จาเลียง หรื หมูดจี หลึง ฮอง+กะฉุม อึมผาฮ พระเจ้า บวน เหนีย หนาว ก็ หลืก ตะกาว บวน ออฺๆ เทาะ หนาว จัด ดัวะ ออฺน กูย เกิด เกียด.40หนาว หมัก แอ ปรีบ โม ยะกะมาย แหลว ยึด แอ หมาล ๆ หนะ ดุง ค็อฺง โม ยะกะมาย จี เกิด ค็อฺง ยะเอง. หนาว หมัก เผียวะเหนีย อึนถรืงๆ อูด ออฺน ดาย เผิห์. กูย โม แหน จิง ไกร แซงโถด ยัง อึนต็อฺง.”41พระเยซู ตะกาว กู อึนฉัล ฮีบ เซอ ประ ทะวาย แหน กูย แอ ประ เจา เซอ. กูย หมี ดาล หนะ หนาว แอ ประ เจา เซอ ดาล.42ด็อฺง เกิด ยะกะมาย อัดกะฮะ หมูย หนะ หนาว แอ ประตาง กเซา อเบีย เหรียน เจา เซอ ซำ หมูย ซเล็อง.43พระเยซู กเหฺยีย กอฺนซิด เจา กโมล อึนดัว หวาว ปาย “ไฮ หวาว หมัดเหม็ย ยะกะมาย อัดกะฮะ กูย แหน แอ ประตาง เจา เซอ ดาล เหลิฮ กูย เทาะ หมังหมี.44โม หมี ขัย แอ ประ ลือ เปรฺอ ลือ จา เจา เซอ แต ยะแหน อัดกะฮะ คลัง ด็อฺง แอ ประ กะซม ดัวะ โตล จา เจา เซอ ฉิม.”
Empower Asia Bible Translation Movement