Mark14
1เถิน อเบีย ตไง จิง ตอฺห์ ตไง โหรม หวีห์ กโฮดจีเล็ย+ หนะ งาน จา คะนมปังปุเกิดฉือ+. โม คูบา หนะ โม อาจาน ซอฺน กด+ ค็อฺง โมเซ จำ บวย กะนา จิง กอบ พระเยซู ซะงัดๆ กแจด บ็อฺฮ.2แต หนาว หวาว อึนดัว ปาย “จิ หวัว วาง งาน จาเลียง แหน เล็ย อะตูง โวยโซะ จิง เอะอะ อึนดัว ซ็อฺฮ.”3พระเยซู ฉาว กู ปา ดุง ค็อฺง ซีโมน กูย เกิด ถูด+ หลึง โซะ เบทานี. พระเยซู จาโดย กู ขัย เกิด กูย กไป หมูย หนะ กัน ควด หมึกโพม เหรียเขีย ทไล หมูดเจา กแต็ฮ ปลอฺ ควด ออฺน กเหลียย เตาะ หมึกโพม เซอ ปลอฺ ค็อฺง พระเยซู.4แต เกิด กูย หนืจ เทาะ กู หลึง บวน ขัย หมู กแบะ ปาย “เซีย หมึกโพม บ็อฺฮ ฉือๆ.5หมึกโพม แหน คัน ตัจ ก็ จิง บืน ประ ดาล เหลิฮ เหรียน ประ อไป หรวยท แอจี อึนแจห์ กูยอัด ก็ ด็อฺง ออฺ เหลิฮ.” แหลว อึงฮออก เซอ กไป แหน.6แต พระเยซู หวาว ปาย “จิ หวาว ยะแหน ออฺน อี กะฮอฺม เล็ย. หนาว หวัว หมาล เทาะ หรัวะ หมัดเหม็ย พลือ ไฮ.7กูยอัด จิง กู หลึง โมหมวง เล็ยๆ จิง ฉูย หนาว ตอฺห์ เหนีย ก็ บืน. แต ไฮ จิง ปุ กู หลึง โมหมวง เล็ยๆ ตอฺจี.8ยะแหน หวัว ก็ มัฮ เทาะ หวัว บืน มัฮ หรัฮ+ หมีน ไฮ ดัวะ ตบ.9ไฮ หวาว หมัดเหม็ย ปุ ปาย จิง อึนเต คาวออฺ+ แหน จี ถู เหนียๆ ก็ จิง หวาว ตอฺห์ หรืง เทาะ ยะแหน หวัว ออฺน ไฮ ออฺน เตือน กะฮอฺม ออฺน ขึด ตอฺห์ ยะแหน.”10แหลว ยูดาซ กูย โซะ เคริโอท เทาะ เกิด กอฺนซิด หมูย หลึง โมด กอฺนซิด ซิบซอง หนะ ยูดาซ หล็อฺฮ จี บวย โม คูบา ยัก จิง จาตัจ พระเยซู ออฺน.11โม คูบา ซ็อฺง นะขัย ก็ เอิห์ ซันยา ปาย จิง ออฺน ประตาง ยูดาซ. รูขัย เจา ยูดาซ ก็ จำ บวย กะนา จิง จาตัจ พระเยซู.12ตไง รูกอฺ ค็อฺง หวีห์ จา คะนมปังปุเกิดฉือ เกิด ตไง เทาะ กแจด กอฺนแกะ หมีน จา โหรม ตไง กโฮดจีเล็ย โม กอฺนซิด หม็อฺฮ พระเยซู ปาย “อาจาน ออฺน โมไฮ หมีน จา โหรม ตไง กโฮดจีเล็ย ออฺน หมวง บวน เหนีย?”13พระเยซู ก็ เปรฺอ กอฺนซิด อเบีย หนะ จี อึนเต ปาย “หมูดจี หลึง หมืง เดอ แหลว โมหมวง จิง เผิห์ กูย อึนถรุฮ หมูย หนะ ถูล อแด็ฮ เดียะ หล็อฺฮ เจา หรับ.14โตน หนาว ขัย หมูดจี ปา ดุง แหลว หม็อฺฮ เถรง ดุง ปาย ‘อาจาน ออฺน หม็อฺฮ ปาย จิง ออฺน จา โหรม ตไง กโฮดจีเล็ย หลึง โม กอฺนซิด ลแหวง เหนีย?’15หนาว จิง อึนเต ลแหวง ผืด หลึง ถี เทาะ เกิด หมาลๆ หมีน ดัวะ ผรวม แหลว. ออฺน จัด หมีน หมาลจา บวน ขัย เดอ.”16โม กอฺนซิด ก็ จี หมืง หมูดจี บวน เทาะ พระเยซู อึนเต ก็ เผิห์ ขูยาง นะ เทาะ พระเยซู อึนเต ขัย. โมหนาว ก็ หมีน จัด หมาลจา โหรม ตไง กโฮดจีเล็ย.17ตอฺห์ กะบือ พระเยซู ก็ เจา หนะ โม กอฺนซิด ซิบซอง หนะ.18อึมเหลีย จา โหรม อึนดัว กู ขัย พระเยซู อึนเต ปาย “ไฮ หวาว หมัดเหม็ย กูย เทาะ หลึง โมหมวง จิง จาตัจ ไฮ ขือ กูย เทาะ จา โดย หนะ ไฮ.”19โม กอฺนซิด ปุ กะออฺบ กะฮอฺม ก็ หม็อฺฮ พระเยซู ปาย “ไฮ เถ อาจาน?”20พระเยซู หวาว ปาย “กูย หมูย หลึง โมด หมวง ซิบซอง หนะ แหน เฮย เทาะ แอ คะนมปัง แปด หลึง โขม หมูย หนะ ไฮ.21ไฮ กอฺนกูย จิง ต็อฺง แหล็ฮ แบบ เทาะ อึมผี+ อึนเต ดัวะ แต จิง นา อะตูง คลัง หลึง กูย เทาะ จาตัจ ไฮ ขัย. คัน หนาว ปุ เกิด เจา เล็ย ก็ ออฺ เหลิฮ.”22อึมเหลีย จาโดย หลึง อึนดัว กู ขัย พระเยซู เซาะ แอ คะนมปัง ซ็อฺฮ เจา คอบคุน พระเจ้า แหลว แป็ฮ หล็อฺฮ อึมลาว ออฺน โม กอฺนซิด หวาว ปาย “ฮือ แหน เกิด จะ ค็อฺง ไฮ.”23แหลว หนาว ก็ เซฺาะ แอ จอฺก บล็อฺง องุน ซ็อฺฮ เจา คอบคุน พระเจ้า อึมลาว ออฺน โมหนาว. ขูหนะ ก็ หรับ แอ หงวจ.24พระเยซู หวาว หลึง โมหนาว ปาย “แหน เกิด อึงฮาม ค็อฺง ไฮ เทาะ ต็อฺง ฮอฺย หล็อฺฮ พลือ กูย ดาล หนะ เกิด ตรา กะถับ มนายซันยา+ ค็อฺง พระเจ้า.25ไฮ หวาว หมัดเหม็ย ไฮ จิง ปุ หงวจ บล็อฺง องุน เถิน จน ปาย จิง ตอฺห์ เหวเหลีย เทาะ ไฮ จิง หงวจ กไม คัน ตอฺห์ เหวเหลีย พระเจ้า เกิด ซะดัจ ขุม.”26ตอฺ รูขัย โมหนาว ก็ รองเพลง แหลวก็ ดึง อึนดัว หล็อฺฮ จี บรู กแฉว.27แหลว พระเยซู หวาว หลึง โม กอฺนซิด ปาย “โมหมวง ขูหนะ จิง หงัจ จี ตัฮ บ็อฺฮ ไฮ โตน อึมผี คีน ดัวะ ปาย ‘พระเจ้า จิง ตำ กะหมะแกะ แหล็ฮ แหลว โพง แกะ ขัย จิง กเหลียย อึนดัว จี.’28แต กรอย รู พระเจ้า ออฺน ไฮ หมอฮ ซ็อฺฮเจา รู แหล็ฮ เถิน ไฮ จิง กโฮด จี ปา เทิน กาลิลี หญูง โมหมวง.”29เปโคร หวาว ซ็อฺฮ ปาย “แมปาย ดายๆ จิง ตัฮ หมวง จี ฉิม ไฮ จิง ปุ ตัฮ จี เอ็อฮ!”30พระเยซู อึนเต เปโตร ปาย “ไฮ หวาว หมัดเหม็ย หลึง ซะดาว แหน หญูง อึนถรูย ตะการ อเบีย ดวง หมวง จิง หวาว ตอฺห์ อไป ดวง ปาย หมวง ปุ ตะขัล ไฮ.”31เปโตร หวาว แค็งๆ ปาย “ไฮ จิง ปุ หวาว นะขัย เอ็อฮ ปาย ปุ ตะขัล หมวง. แมปาย ไฮ จิง ต็อฺง แหล็ฮ หลึง หมวง ไฮ ก็ ญอฺม.” โม กอฺนซิด กะน็อฺฮๆ ขูหนะ ก็ หวาว นะอึนดัว.32แหลว โมหนาว จี หมูย บวน กะหมึฮ เกทเซมนี. พระเยซู ซัง โม กอฺนซิด ปาย “ตะกาว จำ กู บวน แหน หญูง ไฮ จิง จี เผียวะเหนีย.”33พระเยซูดึง เปโตร ยากอบ หนะ ยอน จี หลึง. พระเยซู เอง อึนถรุฮ กะฮอฺม ซะน็อฺฮ ดาล34ก็ หวาว หลึง หนาว อไป หนะ ปาย “ไฮ อึมเบียะ กะฮอฺม บัน แหน ผืด คลัง นะ กะฮอฺม จิง เถ็อดเหม็อด. ออฺน จำ ระหมัด ระซา กู หลึง ไฮ บวน แหน.”35แหลว หนาว ฮุจ จี อึงฮาย บีห์ เถิน แหลว เหลียฮ จะ แซง กแตห์ ฉิม อึมลัง ผางๆ เผียวะเหนีย เถียร ตอฺ พระเจ้า ปาย คัน เกิด จี บืน ออฺน อึมเบียะถุก แหน เผ็อน จี รู หนาว.36หนาว หวาว ปาย “อาหนุ ลัฮ อาหนุ หวัว บืน ขูยาง. เถียร ออฺน แอ จอฺก อึนเบียะ แหน จี รู ไฮ แต จิ ออฺน เกิด จี โตน กะฮอฺม ค็อฺง ไฮ แต เถียร ออฺน เกิด จี โตน กะฮอฺม ค็อฺง อาหนุ.”37พระเยซู ลบ จี เผิห์ โม กอฺนซิด อไป หนะ ขัย บิจ เกลอะ กู ก็ หม็อฺฮ เปโตร ปาย “เหนีย ซีโมน เกลอะ เถ? กู เกิด โม ไฮ หมูย เขรียว ปุ บืน บอ?”38แหลว หวาว หลึง กอฺนซิด ปาย “ออฺน ระหมัด ระซา กู ออฺน เผียวะเหนีย เดอ บีห์ โมหมวง จิง ไกร หญาว ออฺน อึนถรุฮ หวัว เบียบ. กะฮอฺม ผรวม ก็ ไกร แต จะ ขัย ด็อฺง กแหมน กู.”39พระเยซู หล็อฺฮ จี เผียวะเหนีย หมูย ดวง เถิน นะเดล.40หนาว ลบ เจา เถิน หมูย ดวง ก็ เผิห์ โม กอฺนซิด บิจ เกลอะ กู เถิน เพราะ หนาว กะหมูด บิจ เหลิห์ หมัด ปุ โถน. โมหนาว ปุ ดิง จิง หวาว หลึง พระเยซู นะเหนีย ออฺ.41พระเยซู ลบ เจา บวย โม กอฺนซิด เถิน เกิด อไป ดวง แหน ก็ หวาว ปาย “ด็อฺง บิจ เกลอะ กู ออฺน อึมลัง เถ? ผัว แหลว! หฺยูรๆ แหน ก็ ตอฺห์ เหวเหลีย แหลว เทาะ ไฮ กอฺนกูย จิง ไกร จาตัจ จี หลึง อำนาด ค็อฺง กูยเบียบ ขัย.42หฺยูร หวัย! แหม ถุฮ กูย จาตัจ+ ไฮ เจา แหลว.”43พระเยซู หวาว ด็อฺง ถัน เซ็อด มนาย ยูดาซ กอฺนซิด หมูย หลึง โมด กอฺนซิด ซิบซอง หนะ ก็ เจา ตอฺห์. เกิด กูย หมูย โมด ผืด กัน ดาบ หนะ ขวนเดียม เจา รู โม คูบา โม อาจาน ซอฺน กด ค็อฺง โมเซ หนะ โม อึงเคา.44กูย จาตัจ บืน อึนเต โมด ขัย แหลว ปาย “ไฮ อึงฮูญ+ กูย เหนีย ก็ กอบ แอ เล็ย ขุม แอจี.”45ผัว ยูดาซ จี ตอฺห์ หนาว ก็ ซะลิว หมูด จี บวย พระเยซู หวาว ปาย “อาจาน ลัฮ!” แหลว ก็ อึงฮูญ.46โม เทาะ เจา น็อฺงก็ ผรู หมูดเจา กอบ พระเยซู ดัวะ.47แต เกิด กูย หมูย กเย็อง กู อึนฉัล อึนเถ็อง ดาบ หล็อฺฮ เจา ปัจ ซะลา กะตอร นา มะหนี ค็อฺง กูยเปรฺอ ค็อฺง ซะดัจ มอฺม+ เถ็อด.48พระเยซู หวาว หลึง โมด หนาว ขัย ปาย “โมหมวง กัน ดาบ กัน ขวนเดียม เจา กอบ ไฮ นะ ปาย ไฮ เกิด จอน บอ?49ไฮ กู หลึง โมหมวง หลึง แซ็ม+ ขู ตไง กะบือ ลัฮ โมหมวง ก็ ปุ กอบ. แต ขู มนาย เทาะ คีน ดัวะ หลึง อึมผี จิง ต็อฺง เกิด กะหมัด.”50ซาแหน โม กอฺนซิด ขูหนะ อึมปรอญ หงัจ จี ตัฮ บ็อฺฮ พระเยซู.51เกิด โปลห์ หมูย หนะ เทาะ จี โตน พระเยซู หนาว ซับ กเนิห์ ก็ ซะลุฮ หล็อฺฮ หงัจ จี เหรียดๆ.พระเยซู กู นา มแหนห์ กะฉุมผีกะนา52แต นู บือ รถุ ฉิก บอะ แลว ด่อง แตะ จะ เถ่ จี53แหลว โมด โมหนาว ขัย ดึง พระเยซู จี ปา ดุง ค็อฺง ซะดัจ มอฺม เกิด โม คูบา โม อึงเคา หนะ โม อาจาน ซอฺน กด ค็อฺง โมเซ โหรม อึนดัว กู.54เปโตร โตน เจา อึงฮายๆ หมูดจี กู ปา เถริง ดุง ค็อฺง ซะดัจ มอฺม หมูดจี ตะกาว อึงแฮง อูฮ กู หลึง โม กูเหฺยียม.55โม คูบา หนะ โม กูย เทาะ กะฉุมผีกะนา+ บวย หรืง โถด เซอ พระเยซู ออฺน แหล็ฮ แต หนาว ปุ เผิห์ กะนา.56หนาว บวย พยาน ทอ ซ็อฺฮ ดาล หนะ แต มนาย ค็อฺง กูย โม แหน ก็ ปุ ตรง อึนดัว.57ซาแหน เกิด หนืจ หฺยูร ซ็อฺฮ หวาว ทอ ปาย58ไฮ ซ็อฺง หนาว แหน หวาว ปาย ‘ไฮ จิง หลือ บ็อฺฮ เทาะ กูย หวัว ซ็อฺฮ แหน แหลว อไป ตไง จิง หวัว แซ็ม กไม เทาะ ปุ ต็อฺง เปรฺอ กูย หวัว’”59แต ตอฺห์ นะขัย โมหนาว ก็ ด็อฺง หวาว ปุ ตรง อึนดัว.60ซะดัจ มอฺม หฺยูร ซ็อฺฮ หม็อฺฮ พระเยซู ปาย “เหนีย จิง แก นะเหนีย?”61แต พระเยซู ซะงัด กู ปุ หวาว หนอฺ. ซะดัจ มอฺม หม็อฺฮ พระเยซู ตอฺจี เถิน ปาย “หมวง เกิด พระคริซ+ กอฺน หมูย ค็อฺง พระเจ้า แหมน เถ?”62พระเยซู ตอฺบ ปาย “เออ ฮะ แหลว หมวง จิง เผิห์ กอฺนกูย ตะกาว กู เกิด เกียด นาตำ พระเจ้าเกิดริด แหลว แซงเจา หลึง กเหม็อล หลึง ผราฮ.”63ซะดัจ มอฺม ก็ กเฉียะ+ ฮับผืด หวาว ปาย “โมไฮ ปุ ต็อฺง บวย พยาน เถิน เอ็อฮ.64โมหมวง ก็ ซ็อฺง หนาว ซัดกะมาด ดูทูก พระเจ้า แหลว. โมหมวง ขึด นะเหนีย แหน?” ขูหนะ หวาว เซง หมูยๆ ปาย “หลอฮ แหลว หนาว ต็อฺง แหล็ฮ!”65เกิด กูย หนืจ กโจ็ฮ เดียะหวี เซอ พระเยซู แอ อึนฉิจ ซัด หมัด แหลว ถาฮ หนาว คลัง หลัว แกล “เถียย แม็ฮ ดาย ถาฮ หมวง?” โม ทะฮาน กูเหฺยียม ก็ ถาฮ หมัด พระเยซู น็อฺง.66เปโตร ด็อฺง กู หลึง เถรง ดุง ขัย ก็ เกิด กูยเปรฺอ กะมอร ค็อฺง ซะดัจ มอฺม หมูดเจา.67ผัว หนาว เผิห์ เปโตร อึงแฮง อูฮ กู ก็ หวิฮ ซี ออฺน ขาก หวาว ปาย “ หมาย น็อฺง เทาะ กู หลึง เยซู กูย นาซาเร็ท.”68เปโตร หวาว แค็งๆ “ไฮ ปุ ดิง ไฮ ปุ ดิง ปาย หมวง หวาว ตอฺห์ หรืง หนอฺ!”แหลว เปโตร ฮุจ จี บวน กเหวียล.เหวเหลีย ขัย ซบ อึนถรูย ตะการ.69กูยเปรฺอ กะมอร เทาะ ขัย ก็ อึนเต กูย เทาะ กู บวน ขัย ปาย “หนาว แหน เขย กู หลึง หนาว ขัย น็อฺง.”70แต เปโตร ด็อฺง หวาว แค็งๆ กู. กรอย รูขัย หมูย เขรียว กูย เทาะ กเย็อง กู อึนฉัล ก็ หวาว ซ็อฺฮ หลึง เปโตร ปาย “ก็ ไอ เพราะ หมวง เอง เจา รู กาลิลี น็อฺง.”71เปโตร หวาว แค็งๆ ปาย “ออฺน พระเจ้า แซงโถด ยะ ไฮ ปุ ตะขัล กูย เทาะ หมวง หวาว ตอฺห์ ขัย เล็ย!”72เหวเหลีย ขัย เอง อึนถรูย ก็ ตะการ เกิด อเบีย ดวง. แหลว เปโตร ขึด ตอฺห์ มนาย เทาะ พระเยซู หวาว อึนเต ดัวะ ปาย “หญูง อึนถรูย ตะการ อเบีย ดวง หมวง จิง หวาว ตอฺห์ อไป ดวง ปาย หมวง ปุ ตะขัล ไฮ” แหลว เปโตร ก็ เหญียม.
Empower Asia Bible Translation Movement