Mark11
1อึนฉัล จิง ตอฺห์ หมืง เยรูซาเล็ม โม พระเยซู เจา ตอฺห์ โซะ เบทฟายี หนะ โซะ เบทานี เทาะ กู ปา บรู กแฉว. แหลว พระเยซู เปรฺอ กอฺนซิด อเบีย หนะ กโฮด จี หญูง2ซัง หนาว ปาย “หมูดจี หลึง โซะ นา มแหนห์ ขัย. หมวง จิง เผิห์ กอฺนลา หมูย เหลียม ดัวะ เทาะ ด็อฺง ถัน เกิด ดาย ฉิฮ เล็ย. ออฺน หรีล เตอะ เจา ออฺน ไฮ.3คัน เกิด ดาย หม็อฺฮ ปาย ‘หรีล กอฺนลา หวัว หนอฺ?’ ก็ ออฺน อึนเต ปาย ‘อาจาน ยัก เปรฺอ แหลว จิง ฉูน ลบเจา ออฺน หวัยเหวียง.’ ”4กอฺนซิด อเบีย หนะ ก็ จี แหลวก็ เผิห์ กอฺนลา หมูย เหลียม กู โตน นา มแหนห์ ดุง. อึมเหลีย หนาว หรีล กไซ เหลียม หล็อฺฮ กู ขัย5เกิด กูย เทาะ กเย็อง กู อึนฉัลๆ หม็อฺฮ ปาย “หรีล ลา จี หวัว หนอฺ ขัย?”6หนาว ก็ อึนเต นะ พระเยซู ซัง ออฺน หวาว. กูย โม แหน ก็ ญอฺม ออฺน.7หนาว เตอะ ลา ขัย เจา ออฺน พระเยซู แหลว แอ ฮับ ค็อฺง ยะเอง ซาล โก็ฮ ลา ออฺน พระเยซู ฉิฮ.8โม หนืจ แอ ฮับ ซาล ปา กะนาลูง โม หนืจ ปัจ แอ แหมห์ อะหลวง เกิด ซะลา เจา ซาล โตน นา.9กูย โมด ผืด เทาะ ฮุม มแหนห์ ฮุม กรอย พระเยซู เตรห์ ซ็อฺฮ ปาย “ซาถูห์! เถียร พระเจ้า ซีแหม กูย เทาะ เจา หลึง กะหมึฮ ค็อฺง พเหญีย!10เถียร พระเจ้า ออฺน ผวน อำนาดขุม ค็อฺง ดาวิด ผอฺห์ถูด ค็อฺง โมไฮ เทาะ จิง หมูดเจา ขุม แหลว! ซาถูห์!”11พระเยซู หมูด หมืง เยรูซาเล็ม หมูดจี หลึง แซ็ม ฮุจ ซีแหม ถู ๆ. เหวเหลีย ขัย กะบือ คลัง แหลว ก็ หล็อฺฮ จี ปา โซะ เบทานี หนะ กอฺนซิด ซิบซอง หนะ.12ตอฺห์ลัฮ พระเยซู หนะ กอฺนซิด อึมลัง ลบเจา รู ดซะ เบทานี พระเยซู กเหวียฮ จา โดย.13หนาว ซีเผิห์ ขัล บกดือ+ หมูย กู อึงฮาย เกิด ซะลา ซุง ก็ หมูดจี แหม เกิด ไปล หรือ เถ. จี ตอฺห์ ก็ ปุ เผิห์ เกิด ไปล กิด แต ซะลา เพราะ ด็อฺง ถัน ตอฺห์ กเตอ ไปล.14แหลว พระเยซู กเดียซา ขัล บกดือ ขัย ปาย “จิ ออฺน ดาย จา ไปล ไอ เล็ย ตอฺจี.” โม กอฺนซิด ก็ ซ็อฺง มนาย ขัย.15ผัว พระเยซู หนะ กอฺนซิด หมูดจี หลึง หมืง เยรูซาเล็ม พระเยซู ก็ หมูดจี หลึง แซ็ม ผูย กูย ตัจ โตล หมาล กู หลึง แซ็ม ขัย หล็อฺฮ อึนตบ โตะ ค็อฺง กูย แตก ประ หนะ เตาเอ ค็อฺง กูย ตัจ แจม เขรียบ.16หนาว ฮาม ปุ ออฺน ดาย แอ หมาล เปรฺอ ฮุจ พา จี หลึง เถริง แซ็ม ขัย.17หนาว ซอฺน โม กูย ขัย หวาว ปาย “เกิด มนาย คีน ดัวะ หลึง อึมผี+ ปาย พระเจ้า หวาว ปาย ‘ หนาว จิง กเหฺยีย แซ็ม ค็อฺง ไฮ เกิด บวน เผียวะเหนีย ค็อฺง เฉียด ถูๆ กแตห์ ’ แต โมหมวง กลัฮ หวัว ออฺน เกิด บวนกู ค็อฺง โม จอน.”18โม คูบา หนะ โม อาจาน ซอฺน กด+ ค็อฺง โมเซ ซ็อฺง หรืง แหน ก็ บวย ทา กแจด พระเยซู แต ด็อฺง อะตูง กูย โวยโซะ เพราะ กูย ดาล หนะ หงึด มนายซอฺน ค็อฺง พระเยซู.19แหลว ตอ เวหลีย ตบือ เทวเดีย หวูย หลอ จี รู กรุง20รู กะลัฮ ผืด อึมเหลีย พระเยซู หนะ โม กอฺนซิด ฮุจ จี โตน กะนา หนาว เผิห์ ขัล บกดือ ขัย แหล็ฮ กรีม ตอฺห์ แหร็ฮ.21เปโคร ขึด บืน ตอฺห์ หรืง เทาะ พระเยซู กเดียซา ขัล บกดือ ก็ หวาว หลึง พระเยซู ปาย “แหม หนี อาจาน ขัล บกดือ เทาะ หมวง กเดียซา ติ อะบาย แหล็ฮ กรีม แหลว!”22พระเยซู ซอฺน หนาว ปาย “ขูหนะ ออฺฯ ฉือ หลึง พระเจ้า เดอ.23ไฮ หวาว หมัดเหม็ย คัน กูย เหนีย จิง ซัง บรู แหน ออฺน ญับ แซงจี หลึง ทเหล แหลว หนาว ปุขึด หนอฺ เล็ย แต ฉือ ปาย จิง เกิด นะขัย ก็ จิง เกิด โตน กะฮอฺมฉือ ขัย หมัดเหม็ย.24ไฮ อึนเต ปาย คัน โมหมวง เผียวะเหนีย เถียร หมาล หนอฺ ออฺน ฉือ ปาย หมวง บืน หรับ แหลว หมวง จิง บืน หรับ หมัดเหม็ย.25คัน หมวง กเย็อง เผียวะเหนีย กู ออฺน เหลิห์โถด ออฺน ขูหนะ เทาะ หวัว หลอฮ ตอฺ หมวง แหลว อาหนุ กู บวน ซะวัน จิง เหลิห์โถด ออฺน หมวง.”26คัน หมวง กเย็อง เผียวะเหนีย กู ออฺน เหลิห์โถด ออฺน ขูหนะ เทาะ หวัว หลอฮ ตอฺ หมวง แหลว อาหนุ กู บวน ซะวัน จิง เหลิห์โถด ออฺน หมวง.”27ตอฺ ขัย เจา พระเยซู หนะ โม กอฺนซิด ลบจี หมืง เยรูซาเล็ม. ฮุจ หลึง แซ็ม กู ขัย โม คูบา โม อาจาน ซอฺน กด ค็อฺง โมเซ หนะ โม อึงเคา ก็ เจา บวย พระเยซู28หม็อฺฮ ปาย “หมวง เกิด ซิด หนอฺ หวัว หมาล โม แหน? ดาย หมวบ ซิด แหน ออฺน หมวง?”29พระเยซู หวาว ปาย “ไฮ ก็ จิง หม็อฺฮ หมวง บีห์. คัน หมวง ตอฺบ ไฮ ก็ จิง อึนเต ปาย ไฮ เกิด ซิด หนอฺ เจา หวัว หมาล โม แหน.30เหนีย อึนเต แม็ฮ ยอน เกิด ซิด หนอฺ หวัว เซ็น อึมหระเดียะ+ออฺน โวยโซะขัย? ซิด แหน เจา พระเจ้า หรือ เจา รู กูย?”31โม หนาว แหน กะฉีน อึนดัว ซ็อฺฮ ปาย “จิง หวาว นะเหนีย ออฺ แหน? คัน จิง หวาว ปาย เจา รู พระเจ้า หนาว ก็ จิง หม็อฺฮ ปาย ‘ คัน นะขัย เกิด หนอฺ ปุ ฉือ ยอน ลัฮ?’32แต คัน จิง หวาว ปาย ‘ เจา รู กูย...’” (ก็ ปุ ฮาน เพราะ อะตูง โวยโซะ เพราะ กูย ขูหนะ ฉือ ปาย ยอน เกิด กูย+ หวาว มนาย ค็อฺง พระเจ้า ยัง หมัด เหม็ย.)33โมหนาว ก็ ตอฺบ พระเยซู ปาย “ปาย ดิง แหน.” พระเยซู หวาว ปาย “คัน นะขัย ไฮ ก็ ปุ อึนเต โมหมวง นะอึนดัว ปาย ไฮ เกิด อำนาด หนอฺ หัว หมาล โม แหน.”
Empower Asia Bible Translation Movement