Mark10
1พระเยซู หล็อฺฮ รู บวน ขัย จี ปา เทิน ยูเดีย กะลอฺง ตอม จอแดน จี. เกิด กูย ดาล เจา ฮุม พระเยซู เด โม ผืด. พระเยซู ซอฺน หนาว นะเขย.2เกิด โม ฟาริซี+ กูย หนืจ เจา จำ บวย หรืง พระเยซู เถิน หวาว ปาย “เหนีย อึนเต แม็ฮ กด+ ค็อฺง โมเซ ญอฺม ออฺน กูย ตัอ อึนแดล เถ?”3พระเยซู หม็อฺฮ หนาว ลบ กรอย ปาย “โมเซ ซัง ปาย นะเหนีย?”4หนาว อึนเต “โมเซ ญอฺม ออฺน หวัว ไบตัดยา ตัฮ อึนแดล บืน.”5พระเยซู หวาว ปาย “เทาะ โมเซ คีน ดัวะ นะขัย ก็ เพราะ โมหมวง กะฮอฺม คะญัง.6แต อึมผี+ หวาว ปาย รูเดิม ขัย ‘พระเจ้า หวัว กูย เกิด อึนถรุฮ หนะ กไป.’7เพราะ เฮด แหน กูย อึนถรุฮ จิง ตัฮ เหมห์ หนุ ค็อฺง หนาว จี กู หลึง อึนแดล.8แหลว หนาว ติง อเบีย จิง เกิด กูย หมูยๆ.’ นะขัย หนาว ก็ จิง ปุ เกิด หมวง เกิด ไฮ ตอฺจี แต จิง เกิด นะ กูย หมูยๆ.9นะขัย กูย ปุ ขูน แยก หนอฺ หล็อฺฮ เทาะ พระเจ้า กะฉาร แปด ดัวะ.”10ผัว โมหนาว หมูด ดุง แหลว โม กอฺนซิด หมูดจี หม็อฺฮ พระเยซู ตอฺห์ หรืง แหน.11พระเยซู อึนเต หนาว ปาย “คัน ดาย ตัฮ อึนแดล แหลว จี แอ อึนแดล กไม ก็ มัฮ ปาย หนาว กแล อึมเผรอะ หลึง กไป ขัย.12อึนแดล เทาะ ตัฮ กะยาห์ ก็ นะอึนดัว คัน หนาว จี แอ กะยาห์ กไม ก็ มัฮ หนาว แกล อึมเผรอะ อึนถรุอ กะน็อฺฮ นะอึนดัว.”13เกิด กูย ดึง กอฺนแนน เจา ออฺน พระเยซู ดะ เต เซอ. ผัว โม กอฺนซิด เผิห์ ก็ อึงฮอก เซอ.14แต พระเยซู เผิห์ นะขัย ก็ หมู หวาว หลึง โม กอฺนซิด ปาย “ตัฮ ออฺน โม กอฺนแนน หมูดเจา บวย ไฮ ยะ จิ ฮาม หนาว เล็ย. เพราะ กูย เหนีย เทาะ ออฺน พระเจ้า หมูด เกิด ซะดัจ ขุม กะฮอฺม หนาว จิงื ต็อฺง เกิด นะ กอฺนแนน โม แหน.15ไฮ หวาว หมัดเหม็ย กูย เหนีย เทาะ ปุ ญอฺม หรับ พระเจ้า เกิด ซะดัจ ขุม แบบ กอฺนแนน หรับ จิง หมูด ออฺน พระเจ้า เกิด ซะดัจ ขุม หนาว ปุ บืน เล็ย.”16แหลว พระเยซู แอ กอฺนแนน เจา ออฺบ ดะ เต ปอฺง หนาว ขรบ หนะ ออฺน ผวน.17พระเยซู หล็อฺฮ จี โตน กะนา เกิด กูย อึนถรุฮ หมูย หนะ อึมปรอญ เจา ผอด หวาว ปาย “อาจาน ลัฮ หมวง เกิด กุย ออฺ ไอ จิง ต็อฺง หวัว นะเหนีย แต จิง บืน จะกะมงเซ็อด ปุดิงแหล็ฮ?”18พระเยซู หม็อฺฮ ย “เกิด หนอฺ แต กเหฺยีย ไฮ ปาย กูย ออฺ? ปุ เกิด ดาย ออฺ เกิด แต พระเจ้า มัฮขัย.19กด ค็อฺง โมเซ หมวง ก็ ตะขัล กู แหลว จิ กแจด กูย จิ แกล อึมเปลย จิ ตูจ จิ หวาว ทอ กูย จิ ทอจา หนาว ออฺน เกียด เหมห์ หนุ ค็อฺง หมวง.”20กูย ขัย หวาว ปาย “เออ อาจาน ไฮ บืน หวัว โตน กด ขู คอ รู เกิด กอฺนแนน เจา.”21พระเยซู ซี กูย ขัย ก็ เอิห์ หนาว หวาว ปาย “แต หมวง ด็อฺง คาด กู หมูย ยาง เถิน. ออฺน จี ตัจ หมาลๆ เทาะ เกิด กู ติงฉิม แอ ประ เจา อึนแจห์ โม กูยอัด หวัย. แหลว หมวง จิง เกิด หมาล เกิด เขีย ยัง ดาล หลึง ซะวัน. แหลว เจา โตน ไฮ.”22ผัว กูย ขัย ซ็อฺง ก็ อึนถรุฮ กะฮอฺม หมัด ก็ ซะยู ลบ หล็อฺฮ จี ยัง แอ็ด กะฮอฺม เพราะ หนาว หมี ดาล.23พระเยซู ซีแหม ซะวีล หวาว หลึง กอฺนซิด ปาย “กูย หมังหมี จิง หมูด ออฺน พระเจ้า เกิด ซะดัจ ขุม ก็ กรอ หมัดเหม็ย!”24กอฺนซิด ซ็อฺง มนาย ขัย ก็ หงึด กะฮอฺม แต พระเยซู หนาว หวาว เถิน ปาย “กอฺน ลัฮ กรอฺ หมัดเหม็ย เทาะ กูย หมังหมี จิง หมูด ออฺน พระเจ้า เกิด ซะดัจ ขุม”25อูด จิง หลุ ผร็อฺง กอด อึนเฉ็อล ด็อฺง อึมเบฺอ เหลิฮ กูย หมี จิง หมูด ออฺน พระเจ้า เกิด ซะดัจ ขุม.”26โม กอฺนซิด ก็ หงึด กะฮอฺม หมัดเหม็ย หม็อฺฮ ปาย “คัน นะขัย ดาย ลัฮ จิง เผ็อน บืน?”27พระเยซู ซี โม กอฺนซิด หวาว ปาย “กูย จิง หวัว ปุ บืน เล็ย แต พระเจ้า หวัว บืน เพราะ พระเจ้า หวัว บืน ขูยาง.”28เปโตร หวาว ซ็อฺฮ ปาย “แหลว โมไฮ ลัฮ เกิด นะเหนีย? บืน ตัฮ หนอฺๆ ฉิม ขูยาง เจา โตน หมวง.”29พระเยซู หวาว ปาย “ไฮ หวาว หมัดเหม็ย กูย เหนีย ตัฮ บ็อฺฮ ดุง หรืง แซม หนะ ซาย เหมห์ หนะ หนุ กอฺน แซไซ เพราะ เผิห์ แก ไฮ หนะ คาวออฺ+ ค็อฺง ไฮ30กูย ขัย จิง หรับ หมาล ดาล เหลิฮ ขัย หมูย หรวย ซูน หลึง เฉียด แหน ขือ ดุง หรืง แซมซาย เหมห์ กอฺน แซไซ แต จิง หรับ อึมเบียะถุก น็อฺง. แหลว หลึง เฉียด นา มแหนห์ หนาว จิง บืน จะกะมงเซ็อด ปุดิงแหล็ฮ.31แต กูย ดาล หนะ เทาะ กู นา ปลอฺ รูหนัว ก็ จิง ลบ จี กู นา กรอย เซ็อด แหลว กูย ดาล หนะ เทาะ กู กรอย เซ็อด ก็ จิง ลบจี กู นา ปลอฺ.”32เหวเหลีย ขัย พระเยซู หนะ โม กอฺนซิด ฮุจ จี ปา หมืง เยรูซาเล็ม พระเยซู หล็อฺอ ฮุจ หญูง. โม กอฺนซิด หนาว อึนถรุฮ กะฮอฺม โม กูย ฮุจ โตน ก็ อะตูง. พระเยซู กเหฺยีย กอฺนซิด ซิบซอง หนะ ขัย หล็อฺฮ จี หวาว อึนดัว แต โมหนาว อึนเต ตอฺห์ หรืง เทาะ จิง เกิด หลึง หนาว เอง33หวาว ปาย “ตะงัด เดอ โมไฮ จิง จี หมืง เยรูซาเล็ม. บวน ขัย ไฮ กอฺนกูย+ จิง ไกร หนาว กอบ ฉูน จี ออฺน โม คูบา+ หนะ โม อาจาน ซอฺน กด ค็อฺง โมเซ. โมหนาว ขัย จิง โถด เซอ ไฮ ออฺน ตอฺห์ กแจด แหล็ฮ แหลว จิง ฉูน ไฮ จี ออฺน กูยปุแหมนยิว.34โมหนาว ขัย จิง กะจัง แกล กโจ็ฮ เดียะหวี เซอ แอ อึมผาด บอฺร กแถ็ฮ ตำ แหลวก้ แอ จี กแจด แหล็ฮ. แต ตไง เทาะ อไป ไฮ จิง หมอฮ ซ็อฺฮเจา รู แหล็ฮ.”35แหลว ยากอบ หนะ ยอน เทาะ เกิด กอฺน ค็อฺง เซเบดี เจา บวย พระเยซู หม็อฺฮ ปาย “อาจาน ลัฮ อาจาน จิง ฉูย หนอฺ ไฮ บืน หนืจ เถ?”36พระเยซู หม็อฺฮ ปาย “หมวง ยัก ออฺน ไฮ ฉูย หวัว นะเหนีย?”37หนาว หวาว ปาย “คัน ตอฺห์ ตไง หมวง ซ็อฺฮ ขุม เกิด ซงาราซี แหลว เถียร ออฺน ไฮ อเบีย หนะ ตะกาว กู นาตำ หมูย หนะ นาแปห์ หมูย หนะ.”38แต พระเยซู หวาว ปาย “ขัย หมวง ปุ ดิง ปาย หมวง เถียร หนอฺ. หมวง หงวจ รู จอฺก เทาะ อึมเบียะถุก เทาะ ไฮ จิง หงวจ บืน เถ? แหลว หมวง จิง เท็อน หรับ เซ็น หลึง อึมเบียะ นะ ไฮ จิง หรับ บืน เถ?”39อเบีย หนะ ตอฺบ ปาย “เออ บืน เฮย!” พระเยซู หวาว ปาย “จอฺก เทาะ ไฮ จิง หงวจ หมวง จิง หงวจ หมัดเหม็ย เฮย อึมเบียะ เทาะ ไฮ จิง หรับ หมวง จิง หรับ หมัดเหม็ย เฮย.40แต กูย เทาะ จิง ตะกาว นาตำ หนะ นาแปห์ ค็อฺง ไฮ ขัย ไฮ ปุ เกิด ซิด จิง ออฺน แต พระเจ้า จัด ดัวะ ออฺน ดาย ก็ ดัวะ ออฺน กูย ขัย.”41กอฺนซิด เถิน อึนเจ็อด หนะ ซ็อฺง หรืง แหลว ก็ หมู ยากอบ หนะ ยอน ดาล.42ซาแหน พระเยซู กเหฺยีย กอฺนซิด ขูหนะ เจา หวาว ปาย “โมหมวง ก็ ดิง กู แหลว ปาย กูย ขุม กูยปุแหมนยิว เปรฺอ อำนาด. โม เถรงเหนียย หมัก วาง อำนด ปอฺง กูย เทาะ หนาว ขุม ซีแหม.43แต หลึง โมหมวง จิง ปุ เกิด นะ แหน เอ็อฺฮ. คัน กูย เหนีย หลึง โมหมวง ยัก จิง เกิด ขัล หนาว ต็อฺง หรับเปรฺอ โม.44แหลว คัน กูย เหนีย หลึง โมหมวง ยัก จิง เกิด ขัล หนาว ต็อฺง ญอฺม เกิด ซอล โม.45แมแต ไฮ กอฺนกูย ปุ บืน เจา ออฺน ดายๆ หรับเปรฺอ ไฮ แต เจา ยัก หรับเปรฺอ โม กูย ติง ผลีจะ ออฺน เกิด เขีย ไท กูย โม ดาล ออฺน เผ็อน เบียบโถด.”46โมหนาว ขัย จี ตอฺห์ โซะ เยรีโค. พระเยซู กอฺนซิด หนะ โวยโซะ โมด ผืด ขัย โตน กะนา หล็อฺฮ จี ก็ เกิด กูย เถียรจา หมัดซอด หมูย หนะ กะหมึฮ บารทิเมอัซ กอฺน ค็อฺง ทิเมอัซ ตะกาว กู ซูยๆ กะนา.47ผัว หนาว ดิง ปาย เกิด พระเยซู กูย นาซาเร็ท หนาว ก็ เตรห์ ยัง ซำผืด ปาย “พระเยซู กอฺนเจา+ ดาวิด ลัฮ เถียร เหฺยาะเหฺยียล ไฮ หนืจ หนอฺ!”48เกิด กูย ดาล หนะ อึงฮอก เซอ ออฺน หนาว ซะงัด แต หนาว อึงเฮ็ง แต เตรห์ เซง ยัง โซล ปาย “กอฺนเจา ดาวิด ลัฮ เหฺยาะเหฺยียล ไฮ หนืจ หนอฺ!”49พระเยซู ซ็อฺง ก็ ฉาว อึนเต โมหนาว ปาย “กเหฺยีย กูย ขัย ออฺน หมูดเจา แหน.” กูย เทาะ กู อึนฉัลๆ ก็ อึนเต กูย หมัดซอด ปาย “แหน พระเยซู กเหฺยีย แหลว หมูดจี บวย หวัย.”50หนาว ก็ ตอฺห์ ฮับ เทาะ ฮุม จะ กู หล็อฺฮ แหลว โหลด ซ็อฺฮ จี บวย พระเยซู ยัง หวัย.51พระเยซู หม็อฺฮ ปาย “หมวง ยัก ออฺน ไฮ หวัว หนอฺ ออฺน ลัฮ?” กูย หมัดซอด หวาว “อาจาน ลัฮ ไฮ ยัก ซีเผิห์.”52พระเยซู หวาว ปาย “จี ยัฮ กะฮอฺมฉือ ค็อฺง หมวง หวัว ออฺน หมัด ค็อฺง หมวง ออฺ ซอด แหลว.” มีปลัฮ ขัย เอง หนาว ก็ ซีเผิห์ บืน แหลว ฮุจ โตน พระเยซู จี โตน นา.
Empower Asia Bible Translation Movement