Kesikpɛkpɛ26
Isak nɛ̀ Abimɛlɛk
1Otsiɛnɔ bɔbhɛ dɔ nɛ kesiakpa nabha-gɛ bɔgã ɔtɔ nɛ bɔgɛ dɔ nɛ Abraham yɛibeɛ-kɛlɛ Isak avɛ Filisianɛ ekusi Abimɛlɛk ɔkɔ nɛ Geɖa.2Apaleteɛ ebu yɛishu akasɛ Isak kɛlɛ aɖɔ asɛ "Tizhyi ɔvɛ Egipte; zã kesiakpa gɛ kalɛ abha mɛba tseɖe wɔ ɔsɛ tɛ ɔzã.3Zã kesiakpa alɛ abha kɛbɔɛ, kɛlɛ ɛbazã plɛnɔ wɔ pɛ ɛba yulà akɔ wɔ. Ɔmɔsɛ wɔnɛ wɔ beshuialɛ mɛba lɔkɔ busiakpa alɛ akɔ tɛ ɛbhɛtɛ tɔɖɔ atabuɔ gɛ yɛ mɛka kɔ wɔ aka Abraham nabha.4Ɛbakɔ wɔeshuialɛ tɛkakalà mɛ kpe asɛ awɔɛ nɛ kɛlɛ́ɛ nɔ mɛ kɛlɛ ɛbà lɔkɔ busiakpa alɛ petee kɔ alɛ, kɛlɛ ɔgana wɔeyi mɔmɔ́ alɛ nabha, bebe yulà akɔ amadiɛ petee nɛ kesiakpa nabha,5ɔmɔsɛ Abraham elũatɔ̃ akɔ mɛ kɛlɛ abhɛtɛ atɔɖɔ kɛgɛ ibisi odenɔ yɛahɔɛ, mɛ ɛsha kɔkɔɔ, mɛ keplukpamɛ ɛshaa, nɛ̀ mɛ ɛsha kpɛkpɛ nabha."6Klisoɔ Isak adɛzã Gɛɖa.7Gɛ banyɛ gɛazã ɛkɛlɛ ebisi asɛ tɛ betì yɛedziniɛ, aɖɔ asɛ, "Mɛada yɛenu," ɔmɔsɛ kifu ziyii tɛ aɖɔ asɛ, "Mɛedzini yɛenu." Eɖi asɛ, "Banyɛ nɛ ɛkɛlɛ ebeyìi mɛ nɛ Rebeka ɛtakpu, ɔmɔsɛ eyì bubite."8Gɛ Isak azã ɛkɛlɛ nɛ kibè dzololoɔ mɛɛ, Abimɛlɛk gɛedzì Filisteanɛ ekusiɛ eɖi kesiɛ asɛsɛ ɔganà fɛsrɛ nɔ mɛ kɛlɛ amɔ gɛ Isak aalahɔɛ nɛ yɛedzini Rebeka shu.9Kliso Abimɛlɛk ekulu Isak pɛ aɖɔ asɛ, "Wɔedzinì yɛenu kɛgbãa! Kiɖeso pɛ ɔɖɔ ɔsɛ, 'Mɛada yɛenu dza'?"Isak ebuiliulũ akɔɛ asɛ, "ɔmɔsɛ iɖi sɛ mɛkpã bakoeyì nɛ yɛtakpu."10Kɛlɛ mɛ Abimɛlɛk aɖɔ asɛ, "Kibui ɖuwoe lu idi nɛ ɛlɛ wɔbhɛtɛ nɛ̀ bɔlɔ ana? Banyɛ ɔmayɛmɛ teli ata wɔsɔ̃ nɛ̀ wɔedzini pɛ ɔtɔ mana kibui zizĩ nɛ bɔlɔ abha."11Kliso Abimɛlɛk akpɛ banɔnɔ petee ɔsha asɛ: "Anɔnɔ gɛ awɔà ɔfɔ̃ nɛ anyɛ alɛ alo yɛedzinu shuɔ, bebeyii gɛ kɛtɛ batsyina."12Isak awɔà kɛŋaŋã nɛ kesiakpa alɛ nabha nɛ kɛgɔ ɛlɛ mɛ, kɛlɛ nɛ kɛgɔ ɛlɛ mɛɛ, apɔ̃ bɔdɔeyi nɛ akpã edi tɔtɔɖɔ mɛ ɔmɔsɛ Apaleteɛ eyulà akɔɛ.13Anyɛ ebedzì ehoeyielete, kɛlɛ yɛehoeyi tɛmɔmɔ̃ zɛmɔ́ atɔɖɔ ɔdɛ kpɛnɔ gɛ ebedzì ehoeyielete gbagbala.14Baagã nɛ̀ baanɛntsyɔɛ azã yɛahɔɛ gbĩ nɛ̀ baxɔɛdɛ gɛ kɛkɔ ɔsɛ Filisteanɛ azakpɛ yɛawɔ̃.15Kliso bulĩ iziɛ gɛ yɛaka baxɔɛdɛ ebú nɛ yɛaka Abraham kibeɛ, Filisteanɛ etũ bɔdɔ̃ akpɛ ɛlɛ mɛ, kɛlɛ balɔkɔ tisi eyukú ɛlɛ mɛ.16Kɛlɛ mɛ Abimɛlɛk etseɖe Isak asɛ, "Shɛ nɛ bɔlɔ ɔbhà; ohumi obokù wɔahɔɛ faanɔ ɔkɔ bɔlɔ."17Kliso Isak ashɛ nɛ ɛkɛlɛ pɛ edibhui kazã nɛ Gɛɖa kadadasiɛ pɛ atsɛ nɛ ɛkɛlɛ.18Isak edzinì bulĩ izĩɛ gɛ bebú nɛ yɛaka Abraham kibeɛ, pɛ Filisteanɛ etsú tisi adã ɛlɛ nɛ Abraham yɛ butsí niede, kɛlɛ akɔ ɛlɛ inye asɛ gɛ yɛaka akɔ ɛlɛ ana.19Isak yɛaxɔɛdɛ editsú kadadasiɛ kɛlɛ badɛ tɔnɔ̃ bulĩ ozĩ gɛ ɔdzyɛ ɔkpasɛ bɔlɛ mɛ nɛ ɛkɛlɛ.20Pɔɔ Gɛɖanɛ gɛeɖi banɛntsyɔɛ nabha akpɛ ebelà nɛ̀ bagɛ beɖì Isak yɛ banɛntsyɔɛ nabha pɛ baɖɔ asɛ, "Bulĩɛ nu bɔlɔ ɔyɛ!" Kliso pɛ akɔ bulĩ ozĩɛ nɛinye asɛ Isɛk, ɔmɔsɛ bawɔlãkɛ ebui nɛ yɛ nɛ ɔlɛ ɛtakpu.21Kliso betsú bulĩ ozĩ bhlatɔ, pɔ bazapɛ ebela nɛ ɔlɛ tsyɛ shu, kliso akɔ ɔlɛ inye asɛ Sitina (Gɛ kɛlɛ esi nu sɛ kitì lɔlɔ)22Ashɛ nɛ ɔlɛ ɔbha pɛ ezeditsú bulĩ ozĩ bhlatɔ, pɔ ananà agapɛ ebelà nɛ ɔlɛ xɔnɔ̃ ɛtakpu. Akɔ ɔlɛ inye asɛ Rehobɔt, pɛ aaɖɔ asɛ, "Otsialɛ Apaleteɛ akɔ ɔlɔ ɔzãkɔ kɛlɛ bɔlɔ axɔɛ wɔawɔa abapɛ̃ akɔ ɔlɔ nɛ kesiakpa nabha."23Odenɔ ɛkɛlɛɛ, ewu avɛ Biɛsheba.24Elishi alɛ Apaleteɛ ebu yɛishu akasɛ yɛ pɛ aɖɔ asɛ, "Mɛinu wɔakaa Abraham yɛ Owusoso Akaa. Tɛosi kifu ɔmɔsɛ ɛlɛ plɛnɔ wɔ; ɛba yulà akɔ wɔ kɛlɛ ɛbakɔ wɔ eshui alɛ tɛkakalà mɛ kpè atɔɖɔ nɛ mɛ axɔɛdɛ Abraham shu so."25Isak edzu bɔdɔ̃pɔpɔɛ osubha nɛ ɛkɛlɛ pɛ ekulu Apaleteɛ nɛinye. Ɛkɛlɛ yɛedzu yɛ kɛpɔtɛ kagbaa, pɛ ɛkɛlɛ yɛaxɔɛdɛ etsú bulĩ ozĩ.26Kidegbaa, Abimɛlɛk alɔ ede Gɛɖa aba yɛɔkɔ, ɔplɛnɔ Ahuzati gɛenu anɔ̃ gɛ yɛehu buluhũ akɔɛ nɛ̀ Fikɔl agɛ yɛedzi yɛ keyuiza otugbazazã elete.27Isak ebisi alɛ asɛ, "Kiɖe sopɛ nɔba mɛɔkɔ, gɛ nɔtɛ ɔpɛ mɛamɛ ɔsɛ ɔmɔ̃ pɛ nɔtɛ kaka mɛ tsyɛ?"28Bebuiliulũ asɛ, "Bɔmɔ piapi ɔsɛ Apaleteɛ alɛ aplɛnɔ wɔ; kliso pɛ bɔɔɖɔ ɔsɛ, 'Kɛlɛ ɔsɛ olugbù tenikpo tɛbhɛbhɛtɛ gɛide bɔdɔ̃ tɛtatanà mɛ zã bɔlɔɛshi'-bɔlɔ nɛ̀ wɔɛshi. Kɔ bɔbhɛtɛ olugbùshɔshɔ̃ nɛ̀wɔ29sɛ ɔtɛ bɔbhɛtɛ kibui zizĩ nanà nɛ̀ bɔlɔ asɛ kanà gɛ bɔlɔ tsyɛ gɛ wɔa ɔfɔ̃ nɛ̀ wɔ, pɔ bɔbhɛtɛ wɔɛbui piapi pɛ bɔkpɛ wɔɛdzo nɛ ishu yɔyɔ mɛ. Kɛlɛ otsiɛ nɔ, Apaleteɛ eyulà akɔ wɔ."30Nɛ kɛlɛ mɛ, Isak atɔɖɔ kɛŋaŋã ketsukpuifú kɔalɛ, kɛlɛ baŋã pɛ bawɔ̃ɛ.31Kelizaza nɛvɔlɔ plii nɔ, banyɛ atanà bɔdɔ̃ akɔ bagɔlɔ. Kɛlɛ mɛ Isak adɛkpɛ balɛ kidzo, kɛlɛ bashɛ nɛ yɛɔbhà nɛ ishuyɔyɔ mɛ.32Kiwui ɛlɛ Isak yɔaxɔɛdɛ aba ebetseɖe yɛ kibui nɛ bulĩ oziɛ gɛ bebuɔ shu. Baɖɔ asɛ, "Bɔtɛ mɔ̃ bulĩ!"33Akɔ ɔlɛ kinye asɛ Siba, kɛlɛ bɔkpɛnɔ obuɔ, bekulu ɔmã ɔlɛ asɛ Biɛsheba.34Gɛ Esawu aŋã agɔ afɛtaalɛ, agbanà Yuɖif, gɛedzì Biɛɖi gɛenu Xitieyiɛ yɛeyiadzɛ, nɛ̀ Basemati gɛedzi Elɔn gɛenu Xitieyiɛ yɛeyiadzɛ.35Baanɔ alɛ edzi ɔwɔnyɔnɔ̃ akɔ Isak nɛ̀ Rebeka.
The Seed Company