Kesikpɛkpɛ25
Abraham yɛ Titsitsí
1Abraham azagbanà adzɛ bhlatɔ, gɛ bekulu asɛ Ketura.2Amɔ̃ Zimram, Yɔkshan, Mɛdan, Miɖian, Ishbak nɛ̀ Shua akɔ yɛ.3Yɔkshan amɔ́ Sheba nɛ̀ Dedan; kɛlɛ Dedan yɛihui nɔ balɛenu Ashuɖianɛ, Letushianɛ nɛ̀ Leumianɛ.4Miɖian yɛ beyianyɛ balɛenu; Ɛfa, Efea, Hanɔk, Abiɖa nɛ̀ Elɖaah. Banɔ alɛ nyɔ̃ɔ balɛedzì Ketura yɛ kihui nɔ.5Abraham ashɛnɛ ahɔɛ nɛ kɛkanyiaka gɛzã yɛahɔɛ shu akɔ Isak.6Pɔ nɛ kibeɛ gɛ azã nɛkpãa, azakɔ beyianyɛ gɛ amɔ̃ nɛ yɛ bagɔlɔ alɛ shuɔ bɔdɔ̃ kɛlɛ akpɛ alɛ kidzo asɛsɛ kesiakpa gɛalɛ kiwuiɛ otukɔɔ nɛ yɛeyianyɛ Isak ishu.7Balɔkɔ akpɛ kitsùɔ, Abraham azã nɛkpã agɔ kɛkpã zɛzɛ nɛ̀ afɛtegegene nɛ̀ teeti.8Kɛlɛ Abraham afuĩa yɛ ɔfɔfuiã gɔgɔɛ pɛ etsí nɛ tisheshè gbangbã mɛ, anɔ sheshè gɛ aŋã agɔ gelee, kɛlɛ bavɔbɔ yɛ aplɛnɔ yɛeshopo alɛ.9Yɛ beyianyɛ Isak nɛ̀ Ishmael badɛ vɔbɔ yɛ nɛ aklagbu ozĩɛ gɛɔlɛ Makipela gɛ etso aplɛnɔ Mamrɛ, nɛ Efrɔn gɛenu eyianyɛ kɔ Zoha gɛenu Hittieyiɛ yɛ kesiakpa mɛ,10kesiakpa gɛ Abraham edzì odenɔ Xitianɛ ɔkɔ. Ɛkɛlɛ bavɔbɔ Abraham aplɛnɔ yɛedzini Sara.11Nɛ Abraham butsí niedeɛ, Owusoso Akaa eyula akɔ yɛeyianyɛ Isak, anɔ gɛ azã Biɛɛ Lahai Rɔi ɔbhà nɛ kibe ɛlɛ mɛ.Ishmael Yɛ Beyianyɛ
12Ebuiɛ gɛ bamɔ̃ aɖɔ nɛ Abraham yɛeyianyɛ Ishmael gɛ Sara yɛaxɔɛdɛ Haga Egiptedziɛ amɔ̃ akɔ Abraham naalɛ.13Ishmael yɛ beyianyɛ nɛ kɛmɔ gɛ bamɔ̃ alɛ naalɛ: Nɛbaiot yeɛdzì eyikusi gɛ Ishmael amɔ̃, Kɛɖa, Aɖbel, Mibsan,14Mishma, Duma, Massa,15Haɖaɖ, Tɛma, Yetɔ, Nafish nɛ̀ Kedema.16Ishmael yɛ beyianyɛ, egbogbo ekusi lɔfɔ nɛ̀ taabha nɛ balɛ kɛkɔtɔ nɛ̀ balɛ kazãa banɔ alɛ enyeɛ naalɛ.17Balɔkɔ akpɛ kitsùɔ, Ishmael azã nɛkpã agɔ kɛkpã zɛzɛ nɛ̀ afɛata nɛ̀ tegegene. Afuĩa ɔfɔfuĩa gɔgɔɛ kɛlɛ etsí, kɛlɛ balɔkɔ yɛadɛ vɔbɔ aplɛnɔ yɛeshopo alɛ.18Yɛ kihui nɔ bhui kazã nɛ Havila ɔvɛnɔ Shɛɛ bɔdɔmɛ, gɛ etso ɔplɛnɔ Egipte buboɔ, onupɛ ɔvɛ Ashɛɛ kibé. Kɛlɛ bazã nɛ otití mɛ nɛ balɛ adzya alɛ petee shu.Yakob nɛ̀ Esawu
19Ebuiɛ gɛ bamɔ̃ aɖɔ nɛ Abraham yɛeyianyɛ Isak shuɔ naalɛ. Abraham amɔ́ Isak,Abraham ebedzì akaa akɔ Isak,20kɛlɛ Isak aŋã agɔ afɛtaalɛ nɛ kibèɛ gɛ agbanà Rebeka gɛenu eyiadzɛ akɔ Betuɛl Aramueyiɛ gɛede Paddan Aramu nɛ̀ ada akɔ Laban Aramueyiɛ.21Isak ekulu Apaleteɛ nɛ yɛedziniɛ kinye mɛ, ɔmɔsɛ yɛ kamɔmɔ̃vũɔ adã. Apaleteɛ adɛmɛ yɛ tikukuluɔ akɔɛ, kɛlɛ yɛedzinì Rebeka ebemunu ɛya.22Beyiɛ bawlɔãkɛ nɛ̀ bagɔlɔ nɛ ɛyamɛ, kɛlɛ aɖɔ asɛ, "Kiɖeso pɛ kibui ɛlɛ ba mɛabha ana? Klisoɔ, avɛ edibisi odenɔ Apaleteɛ ɔkɔ.23Apaleteɛ etseɖe yɛasɛ,Amadi taabha akpasɛ wɔ kamɔmɔ̃vũɔ mɛ,kɛlɛ banɔ taabha gɛ akpasɛ wɔ mɛɛ ebebu bagɔlɔ ɔtɔ;kɛmadi tinikpo bagagalĩ ɔdɛ kɛbhalaa,kɛlɛ esheshèɛ abakpɛ kɛtakpuesi akɔ ebluibhlui nɔ."24Gɛ kibeɛ na akɔɛ asɛ amɔɔ, taabha eyianyɛ balɛ azã yɛ kamɔmɔ̃vũɔ mɛ.25Agɛ ekoeyi eputɔ nɔ adzã, kɛlɛ yɛishupiɛ petee yì tɛkã asɛ tɛkã kɛpɔtɛ́; klisoɔ bakɔ yɛinye asɛ Esawu.26Kɛlɛ niedeɛ, yɛadzya ekoeyi, gɛ yɛɔhɔɛ anyanã Esawu katsɛɖɛkpɔ niede ovunũ; kliso bakɔ yɛinye asɛ Yakɔb. Isak aŋã agɔ afɛteehlo flogo pɛ Rebeka amɔ̃ alɛ.27Banyɛnuvɔɛ nɔ eshè, kɛlɛ Esawu ebedzì abhɛbhɛ̃ gɛ atɛ́tafã, kifutù mɛ anyɛ, gɛ Yakɔb xɔnɔ edzì anɔ yɔyɔ, gɛ azã kɛpɔtɛ bɔgba nɛishi.28Isak gɛ yɛ kineke zã kifutù mɛ bagã shuɔ, adɛmɛ Esawu kibui, pɔ Rebeka adɛmɛ Yakɔb ibui.29Kiwui tinikpo gɛ Yakɔb azagbã oɖutsu nɔ, Esawu ede ayakpa mɛ aba nɛ̀ bɔbhɛ.30Etseɖe Yakɔb asɛ, "Kɔ yɛatsɔ̀, kɔmɛ wɔ oɖutsu dzadzã telí! Bɔbhɛ dɛ mɛ́!" (Kliso pɛ bekulu yɛ tsyɛ asɛ Edom)31Yakɔb ebuiliulũ akɔɛ asɛ, "Dɛ wɔ osheshe ɔŋãkɔ kɔmɛ flogo."32Esawu aɖɔ asɛ, "Ɖi, ɛba batsí. Kɛgbagbã ɖuwoe gɛlɛ osheshe ɔŋãkɔ akɔ mɛ?"33Pɔ Yakɔb aɖɔ asɛ, "Tanã bɔdɔ̃ akɔ mɛ kpɛ otugba." Klisoɔ atanà bɔdɔ̃ akɔɛ, kɛlɛ adɛ yɛ osheshè ɔŋãkɔ akɔ Yakɔb.34Kɛlɛ Yakɔb akɔ Esawu abolo teli nɛ̀ oɖutsu gbagbãa teli. Atã pɛ awɔ̃ɛ, kɛlɛ alɔ pɛ ashɛ.
Kliso Esawu akpɛ yɛ osheshè ɔŋãkɔ nɔtsɔ̃.
The Seed Company